1 TIMOTE

¹ - ² A maa Pol ɩ̃ tɩɩrɛ a sɛbɛ na kʋrↄ a Timote na ɩ a ɩ̃ bi-tↄr a ƴↄ̃w-nyãa pʋↄ, a maa na ɩ a Jeeju-Kirisi nɩ-tʋnaa a sɩ Fafaara Naaŋmɩn, nɩ a Jeeju-Kirisi ʋlↄ juu sɩ na dↄↄl a sɩ tɩɛrɩ̃sɩ na tʋ̃. A sũofʋ nɩ a nã-bↄ̃wfʋ nɩ a pɩɛnfʋ na yi a sɩ Sãa Naaŋmɩn nɩ a sɩ Nɩ-kpɛ̃ɛ Jeeju-Knisi sɛ̃, á be a fʋ jie. ³ A mɩnɛ ɩ na dãa yel fʋ a lɛdaar ɩ̃ na dãa cere a Masɛdↄn-tẽw, ɩ̃ cãa na bʋↄrↄ fʋ jɛ a be a Ɛfɛɛsɩ-tẽw pʋↄ, a mɩnɛ a fʋ na tʋↄ mↄ̃w a bala na tɛrɛ a jaan-kpeesɩ bar, ⁴ a mɩnɛ a ba kↄ̃ cɛlɩ̃ a kpurĩsɩ pʋↄ, nɩ a ba sãa-kʋnbↄ yoe sↄrfʋ pʋↄ na ma tɛrɛ tɛw wa. A ala waara nɩ a cɩɩrɩ̃fʋ tɛw, ɩ̃ ma sũono a ala a Naaŋmɩn na gbɛɛrɩ̃ a cere nii-sↄw wa. A nɩbɛ ƴↄ̃w-nyãa pʋↄ ba na bↄ̃w a ala. ⁵ A kpãkpanfʋ ʋlↄ par ɩ na a ba na tɛrɛ a nʋfʋ na yire a su-cɛcɛ pʋↄ, mɩ tɛrɛ nɩ a mɩ̃ɛ-bↄ̃wfʋ na vɩɛlɛ, nɩ a yel-mɩ̃ɛ ƴↄ̃w-nyãa. ⁶ A nɩŋmɛɛ ma bↄ̃w cɛl a ala wa, ɩ̃ vɩɛ kpɛ a ƴɛr-pↄrsɩ pʋↄ, ⁷ bʋↄrↄ ba ɩ a ƴɛr-kpɛn-manba, ɩ̃-cɛ baa mɩ bↄ̃w a ba mɩ̃ɛ ƴɛrɩ̃sɩ par wa, nɩ a ala ba na ma kpãkpana a nɩbɛ wa. ⁸ Sɩ bↄ̃w na ka a ƴɛr-kpɛn ɩ na bõ-son a ala sɩ nyↄw ʋ na a mɩnɛ a na sɛw. ⁹ A-na-ɩ sɩ bↄ̃w ka aa ɩ nɩ-toraa ɩnɛ ba ƴↄ̃w a ƴɛr-kpɛn wa, ɩ̃-cɛ ba ƴↄ̃w na a ƴɛr-kpɛn a nɩ-burbur, a to-wownbo, a nɩ-kpansɩ, a nɩ-faar, a bala na ma jↄrↄ a Naaŋmɩn, mɩɩ a puorfʋ yele wa, a bala na kʋrↄ a ba sãa, mɩɩ a ba mã, nɩ a nɩ-kʋrbↄ ba jaa ɩnɛ. ¹⁰ Ba mɩ ƴↄ̃w na a ƴɛr-kpɛn a bala na ɩ a pepebe, a dabsɩ bala na maala taa a vĩ tʋmↄ, a bala na ƴaba a nɩbɛ, a jir-ŋmarba, a bala na pↄrↄ ŋmara nɩ a jiri, nɩ a maal-bie a jaa na vara a jaan-son ƴɛrɩ̃. ¹¹ A lɛ a ƴɛr-son na be a maal-vɩlaa Naaŋmɩn na kʋ ma, miile nɩ a ʋ yo-yifʋ. ¹² Ɩ̃ pɛwrɛ na a sɩ Nɩ-kpɛ̃ɛ Jeeju-Kirisi na kʋ ma a fãgã, a-na-ɩ ʋ nyɛ ma na ɩ̃ ɩ nɩ-dẽdẽ, ʋ vɛl ma ir ƴↄ̃w a ʋ tʋmↄ pʋↄ. ¹³ A mɩnɛ ɩ̃ na dãa saarɩ̃ kpɛrɛ a Naaŋmɩn, ɩ nɩ a nɩ-bier hʋↄlↄ nɩ a nɩbɛ a korĩ-cɛ, ɩ̃-cɛ ʋ nyɛ ma na ɩ̃ ɩ ʋ a nãw, a-na-ɩ maa dãa bↄ̃w a ala ɩ̃ na maala wa. Maa mɩ dãa tɛrɛ a ƴↄ̃w-nyãa wa, ¹⁴ ɩ̃ a sɩ Nɩ-kpɛ̃ɛ nyɩrɩ̃ na sũo ma, mɩ kʋ ma a ƴↄ̃w-nyãa nɩ a nʋfʋ ala sɩ na tɛrɛ a Jeeju-Kirisi pʋↄ. ¹⁵ Nyɛ a yel-mɩ̃ɛ ƴɛrɩ̃ na sɛw sɩ sↄw de nɩ a sɩ suur ʋ jaa: a Jeeju-Kirisi wa na ka a tẽw pʋↄ a nɩ-faar faafʋ ɩnɛ. A ba pʋↄ, a maa mɩ̃ɛ ɩ̃ nyɩrɩ̃ ŋme a juu. ¹⁶ A ala ɩnɛ a Naaŋmɩn nyɛ ma na ɩ̃ ɩ ʋ a nãw, ʋ bʋↄrↄ ʋ de nĩe miil a Jeeju-Kirisi su-nyↄwraa ʋ jaa a ɩ̃ jie, ɩ̃ ɩ bõ-tↄↄnaa a bala na bɩɛrɛ waara jie, a bala nↄↄ mɩ tɛrɛ nɩ ʋ a ƴↄ̃w-nyãa, ɩ̃ pↄw a baa-kↄ̃-tɛw. ¹⁷ A Jaman-daadaa, na ma tɛrɛ kũu daar wa, ba na ma mɩ tʋↄrↄ nyɛrɛ wa, na ɩ a Naaŋmɩn bõ-ƴen tɛw, ú pↄw a ju-kpɛ̃ɛ, ɩ̃ a ʋ yuor u mɩ yire a daar a jaa. Ámɛn. ¹⁸ Ɩ̃ bie Timote, a ƴɛrɩ̃ nɩ a naa ɩ̃ na kʋrↄ fʋ, tuure nɩ a ƴɛrɩ̃sɩ ala a Naaŋmɩn Sɩɛ na dãa kʋ a nɩbɛ a ba de nĩe ƴɛrɛ a fʋ ɩnɛ. Bↄ̃w tɛrɛ a ana ƴɛrɩ̃sɩ a be a fʋ jie, a fʋ jɛbɛ nɩ a jɛb-son, ¹⁹ mɩ tɛrɛ nɩ a ƴↄ̃w-nyãa, nɩ a fʋ mɩ̃ɛ-bↄ̃wfʋ na ma dama wa. A nɩŋmɛɛ ma dãa cɛl a ba mɩ̃ɛ-bↄ̃wfʋ wa, a ba ƴↄ̃w-nyãa sãw. ²⁰ A ba pʋↄ, Imene nɩ Alɛsãdɩrɛ be na tↄ, bala ɩ̃ taw kʋ a Satã ʋ na kpãa ba, a ba kↄ̃ lɛ kpɛrɛ a Naaŋmɩn go wa.

¹ A dãdãw bom ɩ̃ na bʋↄrↄ ɩ na a nyɩ na puoro a Naaŋmɩn, sʋↄrↄ nɩ ʋ, ɩ̃ mɩ sʋↄrↄ ƴↄnↄ a nɩbɛ, puoro nɩ ʋ a nɩbɛ ba jaa ɩnɛ. ² Nyɩ́ sʋↄrↄ ƴↄnↄ a jamansɩ nɩ a fãgã deme ba jaa, a mɩnɛ sɩ na tʋↄrↄ tɛrɛɛ a pɩɛnfʋ jɩnɛɛ nɩ jom, ƴↄnↄ nɩ a Naaŋmɩn mɩ cere nɩ dẽdẽ a sɩ maalfʋ pʋↄ. ³ A ala ɩ na bõ-son, ɩ̃ mɩ vɩɛlɛ a sɩ Fafaara Naaŋmɩn jie, ⁴ na bʋↄrↄ a nɩbɛ ba jaa ba pↄw a faafʋ, ɩ̃ mɩ wa bↄ̃w a yel-mɩ̃ɛ sↄr. ⁵ A-na-ɩ a Naaŋmɩn bõ-ƴen tẽtẽ ɩ̃ be be, ɩ̃ lↄlʋↄrↄ bõ-ƴen tɛw mɩ be be a Naaŋmɩn nɩ a nɩbɛ sↄↄlɩ̃sↄw. Ʋ ɩ na a nɩrɛ ʋlↄ na ɩ a Jeeju-Kirisi, ⁶ na tɩɩr a ʋ mɩ̃ɛ a kũu pʋↄ naa ʋ da nɩ a nɩbɛ ba jaa ɩ̃ faa ba. A nↄhↄ̃ a Jeeju miilʼɩ̃ a Naaŋmɩn pʋ-tɩɛrʋ̃ a daar ʋlↄ na sɛw. ⁷ Yel-mɩ̃ɛ ɩ̃ yele, maa ŋmaa jiri wa, a Naaŋmɩn ƴↄ̃w ma na ɩ̃ ɩ a ƴɛƴɛrɛ nɩ a nɩ-tʋnaa a ala ɩnɛ, mɩ mana nɩ a nɩ-bʋrↄ bʋrↄ a ƴↄ̃w-nyãa nɩ yel-mɩ̃ɛ. ⁸ Ala-ɩ̃-sↄ ɩ̃ bʋↄrↄ na, a jiir a jaa, a dabsɩ bá jã a nur puoro nɩ a Naaŋmɩn nɩ su-cɛcɛ, kↄ̃ nyɛ suur cɩɩrɛ nɩ taa wa. ⁹ Ɩ̃ mɩ bʋↄrↄ na a pↄↄbↄ ba ma su a yele ala na sɛw, a mɩnɛ ba kↄ̃ wa cʋrↄ a dabsɩ fere nɩ, ma wobʼɩ̃ a juu nyɩrɩ̃ kãka, ƴↄnↄ nɩ a sɛlmɛ yele, mɩɩ a lɛr-nyɩlɩsɩ, mɩ suure nɩ a cẽcene ala na nyɩrɩ̃ kpɛmɛ a dafʋ wa. ¹⁰ Ɩ̃-cɛ a ala na sɛw nɩ a pↄↄbↄ bala na puoro a Naaŋmɩn ɩ na ba maala tʋ̃-vɛlɛ. ¹¹ A sɛw na a pↄw ʋ wur a ʋ mɩ̃ɛ, ɩ̃ ma sine cɛlɛ nɩ a Naaŋmɩn ƴɛrɩ̃. ¹² Maa kʋ a pↄw a sↄr ʋ na mana a ƴɛrɩ̃, mɩɩ ʋ tɛrɛ a kpɛ̃w a daba jie wa, ɩ̃-cɛ ú sine. ¹³ A-na-ɩ a Adã ba dãa de nĩe mɛ, ɩ̃ pãa bɩɛr mɛ a Awa. ¹⁴ Ɩ̃ aa mɩ dãa ɩ a Adã ba bɛlɩ̃ wa, ɩ̃-cɛ a pↄw ba bɛlɩ̃, ʋ kpɛ a maal-fãa pʋↄ. ¹⁵ Ɩ̃-cɛ ʋ na pↄw na a faafʋ a mɩnɛ ʋ na ɩa bi-dↄↄrↄ, a ala ɩ ba wurʼã a ba mɩ̃ɛ, bↄ̃w tɛrɛ nɩ a ƴↄ̃w-nyãa nɩ a nʋfʋ, mɩ ɩ nɩ cɛcɛ.

¹ Ba ma yelʼã, áa nɩrɛ ɩ̃ bʋↄrↄ ʋ ɩ a ni-diere, á tʋ̃-son ʋ bʋↄrↄ. Sɩrɛ jaa ʋ. ² Ɩ̃-cɛ a ni-diere ʋlↄ sɛw na ʋ ɩ nɩrɛ na ma tɛrɛ mabfʋ jie wa, na mɩ tɛrɛ pↄw bõ-ƴen, tɛrɛ nɩ a yɛ̃, ɩ̃ mɩ ɩ a cɛcɛlɛ. A sɛw na ʋ bↄ̃w a yele cↄↄrɩ̃fʋ, ɩ̃ ɩ nɩrɛ na diere a sáanba, ɩ̃ mɩ tʋↄrↄ jaana a nɩbɛ. ³ Ʋ taa Ꞌlaar a dãa wa, ʋ taa mɩ ɩ suur sʋbↄ wa, ɩ̃ ú ɩ su-ɓaar sʋbↄ. Ʋ taa ɩ cɩcɩɩrɛ wa, mɩɩ nyɩrɩ̃ Ꞌlaar a libie wa. ⁴ Ʋ bↄ̃w Ꞌwuoro a ʋ mɩ̃ɛ yir, maal a ʋ bibiir a ba wur a ba mɩ̃ɛ, ƴↄnↄ nɩ ʋ. ⁵ A-na-ɩ a ala ɩ a nɩrɛ ma bↄ̃w cɛlɛ a ʋ mɩ̃ɛ yir deme wa, mɩnɛ ʋ na ɩ ɩ̃ tʋↄ Ꞌwuoro a Naaŋmɩn duo-puorbo? ⁶ Ʋ taa ɩ nɩrɛ na kpɛ a paalʋ̃ wa, a mɩnɛ ʋ kↄ̃ wa bʋↄrↄ a yuor ɩ̃ lo a kpãafʋ ʋlↄ pʋↄ ba na ƴↄ̃w a Satã wa. ⁷ A sɛw na ʋ ɩ nɩrɛ a bala na ma puoro wa na ƴↄnↄ, a mɩnɛ a ba kↄ̃ wa kpɛrɛ ʋ, ɩ̃ ʋ wa lo a Satã cakpo pʋↄ wa. ⁸ A lɛ ʋ mɩ, a bala na ɩ a yel-Ꞌwuorbo a nyɩ sↄ̃w sɛw na ba ɩ nɩ-hɛlɛlɛ, kↄ̃ ŋmɩlɛ wa. Ba taa ɩ dã-Ꞌlaarba wa. Ba taa mɩ ɩ bɛbɛlbɛ bʋↄrↄ nɩ a libi-yaw wa. ⁹ Bá bↄ̃w tɛrɛ a ba mɩ̃ɛ-bↄ̃wfʋ vɩlaa, ɩraa nɩ a puorfʋ ƴɛrɩ̃ ʋlↄ pʋↄ a Naaŋmɩn na miil sɩ. ¹⁰ A sɛw na a ba na de nĩe jʋʋr ba je kãa, ɩ̃ a bala mↄↄ nyɛ bom a ba jie wa, bá pãa bar ba a ba tʋ̃ a Naaŋmɩn tʋmↄ. ¹¹ A ala ɩ a pↄↄbↄ ʋ mɩ, a sɛw na a ba mɩ ɩ nɩ-hɛlɛlɛ, kↄ̃ ɩ nɩ-korbo wa. Bá tɛrɛ a yɛ̃, ɩ nɩ nɩ-dẽdẽsɩ a yele a jaa pʋↄ. ¹² A sɛw na a yel-Ꞌwuorbo a nyɩ sↄ̃w na tɛrɛ pↄw bõ-ƴen tɛw, ɩ̃ bↄ̃w cɛlɛ tↄ a ba bibiir nɩ a ba yir deme vɩlaa. ¹³ A-na-ɩ a bala tʋ̃ a Naaŋmɩn tʋmↄ a vɩlaa, ba na pↄw na a yo-vɩlaa, mɩ pↄw nɩ a Ꞌlafʋ a ba ƴↄ̃w-nyãa ba na tɛrɛ a Jeeju-Kirisi pʋↄ. ¹⁴ Ɩ̃ sɛbʼã a yele asɩmɛ tɩɩr kʋ fʋ, bʋↄrↄ ɩ̃ wɩ a fʋ sɛ̃ fↄfↄw. ¹⁵ Ɩ̃-cɛ a maa wa kama, a sɛw na a fʋ na bↄ̃w a mɩnɛ na sɛw a nɩbɛ bala na ɩ a Naaŋmɩn yir deme na maala a ba sↄ̃w. A bala, ba ɩ na a baafʋ Naaŋmɩn duo-puorbo na tɩɛ a yel-mɩ̃ɛ a luur kaarɩ̃. ¹⁶ A nɩbɛ ba jaa bↄ̃w na bↄ̃w ka a puorfʋ ƴɛrɩ̃ ʋlↄ a Naaŋmɩn na miil sɩ ɩ na bõ-kpɛ̃ɛ: A Kirisi, ba nyɛ ʋ na ʋ nyɩr ɩ a nɩsaa salaa. A Naaŋmɩn Sɩɛ miilʼã a ʋ torfʋ. A Naaŋmɩn sɩ-tʋnɩsɩ nyɛ ʋ na. A nɩbɛ hierʼã a ʋ ƴɛrɩ̃ a ten bʋrↄ bʋrↄ yↄ nɩ. Ba sↄw na a ʋ ƴɛrɩ̃ a tẽw ʋ jaa pʋↄ. A Naaŋmɩn de ʋ na do nɩ a saa juu.

¹ A Naaŋmɩn Sɩɛ yel sɩ na cãa pʋↄ, áa baarfʋ daar wa tara, a nɩŋmɛɛ na ŋmaa na yi a puorfʋ pʋↄ, ɩ̃ cɛlɛ a sɩ-kpansɩ na bɛlɛ ba, ɩ̃ mɩ sↄwrↄ a ƴɛrɩ̃sɩ ala a kↄ̃tↄnsɩ na jaana ba. ² A asɩmɛ yi na a poe ayi deme jie na mana a jir-ƴɛrɩ̃sɩ, a nɩbɛ bala a mɩ̃ɛ-bↄ̃wfʋ na sãw wↄ̃ taa nɩ vũu fal a Satã na ƴↄ̃w ba a ɩ a jɩbaa. ³ A nɩbɛ bala yelʼã áa kul-taa ciire na, ɩ̃ mɩ jaana a nɩbɛ a ba taa dɩrɛ a yele ŋmɛɛ wa. Ɩ̃-cɛ a Naaŋmɩn maalʼã a yele a jaa, a mɩnɛ a popuorbo bala na bↄ̃w a yel-mɩ̃ɛ na tʋↄ puor ƴↄ̃w, ɩ̃ dɩ. ⁴ A-na-ɩ a yele a jaa a Naaŋmɩn na maal ɩ na bõ-son. Bom ma be be na ɩ bõ-jaaraa wa, ɩ̃-cɛ sɩ ma dɩrɛ puoro nɩ ʋ. ⁵ A Naaŋmɩn ƴɛrɩ̃ nɩ a Naaŋmɩn sʋↄrfʋ lɩɛb ʋ na ʋ ɩ bõ-son. ⁶ A fʋ̃ʋ wa de a yele asɩmɛ man kʋ a yɛɛr, fʋ na ɩ na a Jeeju-Kirisi tʋ̃tʋ̃-vɩlaa, ɩ nɩ a nɩrɛ ʋlↄ na guolo a ʋ mɩ̃ɛ nɩ a Naaŋmɩn ƴɛrɩ̃sɩ nɩ a jaan-vɩlaa fʋ na tu. ⁷ Lcɛ, jaar a ana kpurĩ-pↄrsɩ a pↄↄ-nyan na ma kpure, ɩ̃ ƴↄ̃w kpɛ̃w a Naaŋmɩn sↄr pʋↄ. ⁸ A-na-ɩ a ɩ̃gan kpɛ̃w pↄwfʋ vɩɛlɛ na a daar fɩ̃ɩ pʋↄ tɛw, ɩ̃-cɛ a Naaŋmɩn sↄr tufʋ vɩɛlɛ na a yele a jaa pʋↄ, a-na-ɩ ʋ pʋlɩ̃ nɩ sɩ na a baafʋ ʋlↄ sɩ na tɛrɛ a ƴɛ̃ƴɛrɩ̃ na nɩ a ʋlↄ sɩ nↄↄ tɛrɛɛ a nɩdaar. ⁹ A yel-mɩ̃ɛ ƴɛrɩ̃ nɩ a naa, na sɛw sɩ sↄw de nɩ a sɩ suur ʋ jaa. ¹⁰ A ala ɩnɛ sɩ tʋnↄ dɩrɛ nɩ a tuo, a-na-ɩ sɩ barʼã a sɩ tɩɛrɩ̃sɩ ƴↄ̃w a baafʋ Naaŋmɩn nuumɩ na ɩ a nɩbɛ ba jaa Fafaara; ɩ̃ a bala na tɩɛrɛ ʋ, bala ʋ sɩrɩ̃ faa. ¹¹ Kpãkpana nɩ ba, ɩ̃ mɩ jaana ba a yele asɩmɛ a jaa. ¹² Taa ɩ nɩrɛ ʋ kpɛrɛ fʋ a-na-ɩ polbile fʋ ɩ wa, ɩ̃-cɛ fʋ̃ ɩ bõ-tↄↄnaa a popuorbo jie, a fʋ ƴɛrɩ̃sɩ pʋↄ, nɩ a fʋ maalfʋ pʋↄ, nɩ a fʋ nʋfʋ pʋↄ, nɩ a fʋ ƴↄ̃w-nyãa pʋↄ, nɩ a mɩnɛ fʋ na ɩrɛɛ nɩ a cɛcɛ. ¹³ A lɛ fʋ na cãa gure ma, bↄ̃w cɛlɛ tↄ Ꞌwuoro a Naaŋmɩn Sɛbɛ jawra nɩ a nɩbɛ, mɩ jaana nɩ ba. ¹⁴ Taa mele a tʋↄfʋ ʋlↄ a Naaŋmɩn Sɩɛ na kʋ fʋ wa, a ʋlↄ fʋ na dãa pↄw a lɛdaar a ni-dierbe na dãa dↄↄl fʋ a ba nur, ɩ̃ mɩ bʋʋ a Naaŋmɩn pʋ-tɩɛrʋ̃ a fʋ ɩnɛ. ¹⁵ Bↄ̃w cɛl tↄ ƴↄ̃w a fʋ mɩ̃ɛ a ana tʋmↄ naa pʋↄ, maala nɩ a mɩnɛ a nɩbɛ ba jaa na nyɛ bↄ̃w ka a fʋ tʋmↄ vɩɛlɛ na. ¹⁶ Bↄ̃w Ꞌwuoro a fʋ mɩ̃ɛ, nɩ a fʋ jaanfʋ, ɩraa nɩ a ala pʋↄ cĩcĩ, a-na-ɩ a fʋ̃ʋ maala a lɛ, fʋ na faa na a fʋ mɩ̃ɛ nɩ a bala na eɛlɛ fʋ.

¹ Taa wa tana a daba ʋlↄ na kor wa, ɩ̃-cɛ ƴɛrɛ nɩ ʋ a fʋ sãa kaarɩ̃, mɩ ƴɛrɛ nɩ a polbil a fʋ yɛɛr kaarɩ̃. ² A ala ɩa pↄↄ-koro ʋ, mɩ ƴɛrɛ nɩ ba a fʋ mã nʋmↄ kaarɩ̃, nɩ a pↄↄbↄ a fʋ yɛ-pↄↄbↄ kaarɩ̃, tɛrɛ nɩ a fʋ mɩ̃ɛ cĩcĩ. ³ Bↄ̃w cɛlɛ tↄ a bala na sɩrɩ̃ ɩ a kpɩ̃ɩ-pↄↄbↄ. ⁴ Ɩ̃-cɛ a ala ɩ a kpɩ̃ɩ-pↄw tɛrɛ na bibiir mɩɩ a yan, ba sɛw na na de nĩe maal a ba yir deme jie a ala na sɛw a puorfʋ sↄr pʋↄ, mɩ lɩɛb guolo a ba dↄↄrbↄ, a-na-ɩ lɛ a Naaŋmɩn bʋↄrↄ. ⁵ Ɩ̃ a ʋlↄ na sɩrɩ̃ ɩ a kpɩ̃ɩ-pↄw, na ma tɛrɛ nɩrɛ ʋ Ꞌwuoro ʋ wa, ʋ de na a ʋ mɩ̃ɛ bar kʋ a Naaŋmɩn, ɩ̃ be a Naaŋmɩn sʋↄrfʋ pʋↄ, mɩ lↄbↄ nɩ ʋ a nur a daar a jaa. ⁶ Ɩ̃ a kpɩ̃ɩ-pↄw ʋlↄ na de a ʋ mɩ̃ɛ ƴↄ̃w a ala na nʋmↄ ʋ maalfʋ pʋↄ, ʋ kpi na ɩ̃ cãa a mimir. ⁷ Kpãkpana ba a ana yele, a mɩnɛ a ba kↄ̃ tɛrɛ mabfʋ jie wa. ⁸ A ala ɩ a nɩrɛ ma cɛlɛ tↄ a ʋ nɩbɛ jie, wa yele nɩ a ʋ yir deme wa, ʋ barʼã a ʋ ƴↄ̃w-nyãa a Naaŋmɩn sↄr pʋↄ, ɩ̃ ʋ bierʼã gãw a ʋlↄ na ma puoro wa. ⁹ A kpɩ̃ɩ-pↄw ʋlↄ yomo na ma ta a lɩjaata sɛr wa, taa wa diere ʋ ƴↄnↄ a kpɩ̃ɩ-pↄↄbↄ pʋↄ wa. Ɩ̃-cɛ a sɛw na a dãa ɩ dab-bõ-ƴen ʋ kul, ¹⁰ a nɩbɛ bá mɩ bↄ̃w ʋ a ʋ tʋ̃-vɛlɛ ɩnɛ: a ʋ bibiir ʋ na dãa guolo, a sáanba ʋ na dãa bↄ̃w a defʋ, mɩ dãa pɛwrɛ nɩ a popuorbo gbɛɛ, sũono nɩ a bala na dãa be a won pʋↄ, maala nɩ a tʋ̃-vɛlɛ bʋrↄ bʋrↄ a jaa. ¹¹ Taa wa diere a kpɩ̃ɩ-pↄↄbↄ bala na ma kor sɛr wa, ƴↄnↄ a kpɩ̃ɩ-pↄↄbↄ pʋↄ wa, a-na-ɩ a lɛ a kulfʋ vɩláa nↄↄ nyↄwrↄ ba gãwna a Kirisi tufʋ, ba na bʋↄrↄ na a sɩrɛ kulfʋ. ¹² A lɛ, ba lɩɛbʼã ɩ̃ bar a ba korĩ-cɛ pʋlɩ̃fʋ, kpɛ nɩ a ƴɛrɩ̃ guorfʋ pʋↄ. ¹³ Ba ma mɩ lɩɛbʼã ɩ tõtol deme, yʋↄrↄ nɩ a yie. Ɩ̃ aa ɩ a tõtol tɛw ʋ wa. Ba ma mɩ ƴɛrɛ na folõ-folõ yʋↄrↄ nɩ, kpɛɛrɛ nɩ a yele ala pʋↄ na ma mɩ ba ba wa, mɩ ƴɛrɛ nɩ a ala na ma vɩɛlɛ wa. ¹⁴ Ala-ɩ̃-sↄ ɩ̃ bʋↄrↄ na a kpɩ̃ɩ-pↄↄbↄ bala na ma kor sɛr wa, bá lɛ kul sɩrbɛ ɩ̃ dↄↄr a bibiir, Ꞌwuoro nɩ a ba yir, a mɩnɛ a sɩ sama-deme kↄ̃ wa nyɛ sↄr ƴɛr ƴɛr-fãa ƴↄ̃w ba wa. ¹⁵ A-na-ɩ a ŋmɛɛ gↄrʼã lɩɛb ɩ̃ bar a sↄr son, ɩ̃ tuure a Satã. ¹⁶ A ala ɩ a pↄw na ɩ a popuoro tɛrɛ na a kpɩ̃ɩ-pↄↄbↄ a ʋ yir pʋↄ, ʋ sɛw na na sũono ba, a mɩnɛ ba kↄ̃ wa ɩ a duo-puorbo tuor wa, ɩ̃-cɛ a duo-puorbo nyɛ sↄ̃r na tʋↄ̃ sũono a bala na sɩrɩ̃ ɩ a kpɩ̃ɩ-pↄↄbↄ. ¹⁷ A duo-puor-ni-dierbe bala na tʋnↄ a ba tʋmↄ vɩlaa, sɛw na na pↄw a yar dↄↄlaa. A bala a na nyɩrɩ̃ tor ɩ na a bala na dɩrɛ a tuo ƴɛrɛ a Naaŋmɩn ƴɛrɩ̃, mɩ jaana nɩ a nɩbɛ. ¹⁸ A-na-ɩ a Naaŋmɩn Sɛbɛ ƴelʼã: “Taa lũ a naab ʋlↄ nʋↄr pↄw fʋ na ƴↄ̃w ʋ ŋmeere fʋ á ci wa.” ɩ̃ a lɛ yelʼã. “A tʋ̃tʋnↄ sɛw nɩ na a ʋ yar.” ¹⁹ Taa sↄw a ƴɛ̃rɩ̃ ba na ƴↄ̃w a ni-diere, ɩ̃ a ala ma ɩ a yel-mɩ̃ɛ ƴɛr-manba ɩ na ayi mɩɩ ata wa. ²⁰ Gala a bala na lo a fãa pʋↄ a nɩbɛ jaa nii-sↄw, a mɩnɛ a nɩŋmɛɛ na jↄrↄ dãbɩ̃ɛ. ²¹ Ɩ̃ kpãkpana fʋ na a Naaŋmɩn nɩ a Jeeju-Kirisi nɩ a sɩ-tʋnɩsɩ sono nii-sↄw, jↄrↄ a ana ƴɛrɩ̃sɩ kↄ̃ Ꞌwuoro a nɩbɛ kpee kpee wa. Taa wa maala bom nɩ gõgolĩfʋ wa. ²² Taa wa pↄↄrↄ sʋↄrↄ a Naaŋmɩn dↄↄlↄ nɩ a nɩrɛ lɛ a nuu ƴↄnↄ nɩ ʋ a Naaŋɩnɩn tʋmↄ pʋↄ wa. Taa wa kpɛɛrɛ tↄ a nɩŋmɛɛ maal-fãa pʋↄ wa. Tɛrɛ fʋ mɩ̃ɛ cĩcĩ. ²³ Taa cãa nyuure a kʋ̃ↄ nɛrɛ wa, ɩ̃-cɛ ma nyu a dɩvɛ̃ fɩ̃ɩ, a na tʋↄ sũo a fʋ pʋↄ na ma Ꞌwↄbↄ, nɩ a mɩnɛ fʋ na maa yaarɩ̃ ɩ a wʋlɩ̃ wa. ²⁴ A nɩbɛ ŋmɛɛ maal-fãa gↄrʼã be cãa pʋↄ ɩ̃-cɛ a baa mɩ guor a ba ƴɛrɩ sɛr wa, ɩ a nɩŋmɛɛ ben na yi na nɩdaar kãw. ²⁵ A lɛ ʋ mɩ, a tʋ̃-vɛlɛ mɩ be na a cãa pʋↄ, ɩ̃ a ala saarɩ̃ ɩ a ŋmɛɛ ma nyɩr sɛr wa, aa tʋↄrↄ sↄↄlↄ wa.

¹ A bala ba jaa na be a gbãgbaar tʋmↄ pʋↄ, a sɛw na ba bↄ̃w ka a ba nɩ-bɛrɛ sɛw nɩ na a ƴↄ̃wfʋ a jaa, a mɩnɛ a nɩrɛ kↄ̃ wa kpɛrɛ a Naaŋmɩn yuor, nɩ a sɩ jaanfʋ wa. ² A bala na tɛrɛ a nɩ-bɛrɛ a ba ɩ a popuorbo ma sɛw na wõw toor a ba jie a-na-ɩ yɛɛr ba ɩ wa. Ɩ̃-cɛ a sɛw na a ba ɛ̃ɛ ƴↄ̃w fãgã ɩ̃ tʋnↄ a ba tʋmↄ, a-na-ɩ a bala ba na tʋnↄ kʋrↄ ɩ na a popuorbo ba na mɩ nʋnↄ. Nyɛ a ala na sɛw fʋ jaana mɩ kpãkpana nɩ ba. ³ A ala ɩ a nɩrɛ wa jaana na a jaan-kpee, ɩ̃ ma sↄw de a sɩ Nɩ-kpɛ̃ɛ Jeeju-Kirisi ƴɛr-sono nɩ a Naaŋmɩn sↄr jaanfʋ wa, ⁴ ju-kpɛ̃ɛ ʋ bʋↄrↄ. ꞋWaa bↄ̃w bom wa, ɩ̃-cɛ a ƴɛr-soorsɩ nɩ a ƴɛrɩ̃ cɩɩrɩ̃fʋ sãw ʋ na bar. A be jie a nyuur ma yi, nɩ a faa-taa, a kpɛfʋ, nɩ a tɩɛrʋ̃-fãa ba na tɩɛrɛ ƴↄnↄ taa. ⁵ Ba ɩ na nɩ-giemsɩ na ma cɩɩrɛ taa a daar a jaa, ɩ̃ ma lɛ cãa bↄ̃w a yel-mɩ̃ɛ wa. Ba tɩɛrʼã bↄ̃w ka a Naaŋmɩn sↄr tufʋ na le ba na. ⁶ A Naaŋmɩn sↄr tufʋ sɩrɩ̃ na ɩ a lefʋ bom a ʋlↄ jie na bↄ̃w ka a ala ʋ na tɛrɛ sɛw nɩ ʋ na. ⁷ A-na-ɩ saa dãa tɛrɛ bom wa nɩ ka a tẽw pʋↄ wa, ɩ̃ saa mɩ lɛ tʋↄrↄ diere bom cere nɩ wa. ⁸ Ɩ̃ a sɩmɩ tɛrɛ a bõ-dɩraa nɩ a cẽcene, a na sɛw sɩ na. ⁹ A bala na bʋↄrↄ a lefʋ, ba ma lo na a bɩɩrfʋ pʋↄ kpɛ a cakpo pʋↄ, a-na-ɩ a yel-yaw vɩláa na nyↄw ba na, a yele na ɩ a dãbol yele nↄↄ ƴↄnↄ ba a fãa pʋↄ. A yele ala ma gãw na a nɩbɛ, taw ba kpɛ nɩ a sãwfʋ nɩ a wɛfʋ pʋↄ. ¹⁰ A-na-ɩ a libie nʋfʋ ɩ na a fãa bʋrↄ bʋrↄ juu. A nɩŋmɛɛ dãa na nyɩrɩ̃ bʋↄrↄ ʋ, ɩ̃ bↄr jãa taa nɩ a Naaŋmɩn ƴɛrɩ̃, ɩ̃ woor a won a sɛw a ba sube. ¹¹ Ɩ̃-cɛ a fʋ̃ʋ na ɩ a Naaŋmɩn tʋ̃tʋnↄ, ŋmaa yi a ala a jaa pʋↄ, ɩ̃ bↄ̃w tuure a torfʋ ƴↄnↄ nɩ a Naaŋmɩn, bʋↄrↄ nɩ a ƴↄ̃w-nyãa nɩ a nʋfʋ, mɩ ɩ nɩ a nɩ-hɛlɛlɛ. ¹² Jɛbɛ a ƴↄ̃w-nyãa jɛb na ɩ a jɛb-son. Bↄ̃w tɛrɛ a baa-kↄ̃-tɛw, a-na-ɩ a ʋlↄ ɩnɛ a Naaŋmɩn dãa bʋↄl fʋ a lɛdaar fʋ na dãa man a fʋ yel-mɩ̃ɛ ƴɛrɩ̃ a nɩ-yaw nii-sↄw. ¹³ Ɩ̃ kpãkpana fʋ na nɩ a Naaŋmɩn ʋlↄ na kʋrↄ a yele a jaa a baafʋ, nɩ a Jeeju-Kirisi ʋlↄ na dãa man a ʋ yel-mɩ̃ɛ ƴɛrɩ̃ a Pↄ̃sɩ Pɩlatɩ nii-sↄw, ¹⁴ bↄ̃w gu a Naaŋmɩn ƴɛrɩ̃sɩ ala fʋ na dãa pↄw, a kↄ̃ tɛrɛ cɛfʋ jie, wa ta nɩ a lɛdaar a sɩ Nɩ-kpɛ̃ɛ Jeeju Kirisi na nyɩrɛ. ¹⁵ A Naaŋmɩn na miilɩ̃ ʋ na a daar ʋlↄ pʋↄ ʋ na ƴↄ̃w, a Naaŋmɩn ʋlↄ na ɩ a fãw nɩ a maal-vɩlaa Sʋbↄ yẽ tẽtẽ, na mɩ ɩ a jamansɩ Jamana, nɩ a nɩ-bɛrɛ Nɩ-kpɛ̃ɛ. ¹⁶ Ʋlↄ tɛw ma tɛrɛ a kũu daar wa, ɩ̃ mɩ be a cãa ʋlↄ pʋↄ a nɩrɛ na ma tʋↄrↄ pɩɛlɛ wa. Nɩrɛ kãw ma dãa nyɛ ʋ sɛr wa, ɩ̃ nɩrɛ ma mɩ tʋↄrↄ nyɛrɛ ʋ wa. Ʋlↄ ɩ̃ sɛw nɩ a ju-kpɛ̃ɛ nɩ a fãw na ma tɛrɛ a bɛwfʋ daar wa. Amɛn. ¹⁷ Yel a bala na ɩ a ka a tẽw na pʋↄ naabsɩ a ba taa bʋↄrↄ yuor wa, a ba taa mɩ ƴↄ̃w a ba tɩɛrɩ̃sɩ a na-yele pʋↄ wa, a-na-ɩ saa bↄ̃w a ana yele baarfʋ daar wa. Ɩ̃-cɛ a ba ƴↄ̃w a ba tɩɛrɩ̃sɩ a Naaŋmɩn jie, a ʋlↄ na kʋrↄ sɩ a yel-bʋrↄ bʋrↄ a jaa a na ƴↄ sɩ a sɩ na tʋↄ tɛrɛ a nʋ̃ↄ. ¹⁸ Yel ba á bá maala a ala na vɩɛlɛ, tʋnↄ nɩ a tʋ̃-vɛlɛ bʋrↄ bʋrↄ, ɩ nɩ a yɛ̃-bↄↄnbↄ, kↄ̃ bɛlɩ̃ puor wa. ¹⁹ A lɛ, ba na kaala na a na-yele yaw biine a daar ʋlↄ nↄↄ waara ɩnɛ, a mɩnɛ a ba na tʋↄ bↄ̃w tɛrɛ a yel-mɩ̃ɛ baafʋ. ²⁰ Ɩ̃ Timote, bↄ̃w gu a ala ba na kʋ fʋ, ɩ̃ ŋmaa yi a ana ƴɛr-pↄrsɩ pʋↄ na ma tɛrɛ par wa, nɩ a bala jie na tɛrɛ a jiri-bↄ̃wfʋ cɩɩrɛ nɩ, ²¹ a bↄ̃wfʋ ala a nɩŋmɛɛ na dãa de yↄ nɩ wa faa, ɩ̃ ŋmaa yi a sɩ puorfʋ pʋↄ. A Naaŋmɩn sũofʋ ú be a nyɩ jie.