1 TƐSALONIKI

¹ A maa Pol nɩ a Sɩlasɩ nɩ a Timote ɩ̃ sɛbɛ a sɛbɛ na tɩɩrɛ kʋrↄ a nyɩmɩ Tɛsaloniki duo-puorbo na be a sɩ Sãa Naaŋmɩn nɩ a sɩ Nɩ-kpɛ̃ɛ Jeeju-Kirisi pʋↄ. A Naaŋmɩn sũofʋ nɩ a ʋ pɩɛnfʋ á be a nyɩ jie. ² Sɩ puoro na a Naaŋmɩn a nyɩ jaa ɩnɛ a daar a jaa, ɩ̃ sʋↄrↄ ʋ ƴↄnↄ nyɩ ma gala wa. ³ A lɛdaar sɩ na ma puoro a sɩ Sãa nɩ a sɩ Naaŋmɩn, sɩ maa hiin a nyɩ ƴↄ̃w-nyãa tʋmↄ wa, nɩ a mɩnɛ nyɩ na dɩ a tuo ɩ̃ tʋ̃ a tʋmↄ a yi a nyɩ nʋfʋ pʋↄ, nɩ a mɩnɛ nyɩ na mɩ ɩraa a cĩcĩ a nyɩ tɩɛrʋ̃ son pʋↄ, a jaa yi a sɩ Nɩ-kpɛ̃ɛ Jeeju-Kirisi jie. ⁴ Yɛɛr, sɩ bↄ̃w na ka a Naaŋmɩn nʋ nyɩ na, ɩ̃ vɛl nyɩ ir sↄ. ⁵ A-na-ɩ a lɛdaar sɩ na wɩ nɩ a Naaŋmɩn ƴɛr-son a nyɩ sɛ̃, saa ƴɛr nyɩ a ƴɛrɩ̃sɩ tɛw wa, ɩ̃ sɩ wɩ nɩ na a fãw ʋlↄ a Naaŋmɩn Sɩɛ na kʋ sɩ, a sɩ bↄ̃w nɩ áa ƴɛrɩ̃ ʋlↄ sɩrɩ̃ na ɩ yel-mɩ̃ɛ. Nyɩ bↄ̃w na a nɩ-wↄ̃ mɩnɛ sɩ na dãa ɩ a nyɩ sↄ̃w, a na sũo nyɩ. ⁶ Ɩ̃ a nyɩmɩ, nyɩ lɩɛbʼã ɩ a sɩ tↄ̃tↄↄnbↄ, ɩ̃ mɩ tↄↄnↄ a sɩ Nɩ-kpɛ̃ɛ, a mɩnɛ nyɩ na sↄw de a Naaŋmɩn ƴɛrɩ̃ sɩ na ƴɛr nyɩ a kpowfʋ pʋↄ, mɩ tɛrɛ nɩ a nʋ̃ↄʋlↄa Naaŋmɩn Sɩɛ na kʋ nyɩ. ⁷ Ala-ɩ̃-sↄ nyɩ lɩɛbʼã ɩ nɩ-tↄↄnsɩ a Masɛdↄn nɩ a Akayi ten pʋʋr a Naaŋmɩn-puorbo ba jaa jie. ⁸ A-na-ɩ a Nɩ-kpɛ̃ɛ ƴɛrɩ̃ nyɩ na ƴɛr cʋbʼã cen na vɩɛ a Masɛdↄn nɩ a Akayi ten bar, a nɩbɛ wõ a jiir a jaa a nyɩ ƴↄ̃w-nyãa nyɩ na tɛrɛ a Naaŋmɩn jie. Ala-ɩ̃-sↄ saa lɛ bʋↄrↄ sɩmɩ mɩ̃ɛ sɩ lɛ man go wa. ⁹ A-na-ɩ a bala mɩ̃ɛ mana na a mɩnɛ nyɩ na sↄw de sɩ a lɛ sɩ na dãa wɩ a nyɩ sɛ̃, nɩ a mɩnɛ nyɩ na jaar a nyɩ tɩbɛ sↄr bar, ɩ̃ lɩɛb de a ʋlↄ na ɩ a yel-mɩ̃ɛ Naaŋmɩn nɩ a Naaŋmɩn-mimir, mɩ tʋnↄ kʋrↄ ʋ. ¹⁰ Ba mɩ mana na a mɩnɛ nyɩ na eɛlɛ a Naaŋmɩn Bie nↄↄ yire a saa juu waara, a Jeeju ʋlↄ a Naaŋmɩn na ir a kũu pʋↄ, nↄↄ wɩ́ɛrɛ sɩ a Naaŋmɩn su-tuo na waara ɩnɛ.

¹ Yɛɛr, nyɩ mɩ̃ɛ bↄ̃w ka a sɩ wɩfʋ a nyɩ sɛ̃ ma ɩ pↄrↄ wa. ² Nyɩ mɩ bↄ̃w ka a mɩnɛ sɩ na ma dãa ta a nyɩ sɛ̃ sɛr wa, a Fɩlɩpɩ tẽ-deme dãa na hʋↄl sɩ mɩ tʋ tʋ nɩ sɩ, ɩ̃-cɛ a mɩnɛ sɩ na ta a nyɩ tẽw, a ala saarɩ̃ ɩ a nɩ-yaw na mɩ dãa jɛbɛ nɩ sɩ ʋ, a Naaŋmɩn kʋ sɩ na a Ꞌlafʋ a sɩ ƴɛrʼɩ̃ a ʋ ƴɛr-son kʋ nyɩ. ³ A sɩ ƴɛrɩ̃ miilfʋ sɩ na wɩ, saa wɩ nɩ jiri ƴɛrɩ̃sɩ, mɩɩ a bõ-kpee bↄfʋ nɩ a bɛlɩ̃fʋ wa. ⁴ Ɩ̃ a Naaŋmɩn ɛ̃ɛ jʋʋr sɩ bↄ̃w, ɩ̃ pãa de a ʋ ƴɛrɩ̃ kʋ sɩ, ɩ̃ a lɛ sɩ ƴɛrɛ. Saa ƴɛrɛ bʋↄrↄ a nɩbɛ ba pɛwrɛ sɩ wa, ɩ̃-cɛ á nʋmↄ a Naaŋmɩn ʋlↄ na ma Ꞌwuor bↄ̃w a ala na be a sɩ sube pʋʋr. ⁵ Nyɩ bↄ̃w ka saa dãa wɩ a nyɩ jie nɩ yɛ̃ ƴɛrɩ̃sɩ wa, ɩ̃ saa mɩ lɛ wɩ nɩ a nↄ-kãa bʋↄrↄ sɩ pↄw bom kãw wa. A Naaŋmɩn mɩ̃ɛ bↄ̃w na a sɩ tɛw. ⁶ Saa mɩ dãa bʋↄrↄ a yo-yifʋ a nɩbɛ jie wa; nɩ a nyɩ jie, mɩɩ a nɩrɛ lɛ jie wa. ⁷ A-na-ɩ a Kirisi nɩ-tʋnɩsɩ sɩ ɩ, sɩ dãa na tɛrɛ a sↄr na fɛr nyɩ, ɩ̃-eɛ sɩ ɛ̃ɛ na bal a nyɩ sↄ̃w, wↄ̃ taa nɩ a pↄw na guolo a ʋ bibiir cↄↄrↄ nɩ ba. ⁸ A mɩnɛ sɩ na tɩɩ nʋ nyɩ, ala-ɩ̃-sↄ a saa bʋↄrↄ sɩ tɩɩr a Naaŋmɩn ƴɛr-son tɛw kʋ nyɩ wa, ɩ̃-cɛ a sɩ de a sɩ mɩ̃ɛ ʋ jaa kʋ nyɩ, a-na-ɩ nyɩ lɩɛbʼã ɩ a sɩ nɩ-nʋnɩsɩ. ⁹ Yɛɛr, nyɩ cãa na bↄ̃w a mɩnɛ sɩ na dãa dɩ a tuo, ɩ̃ tʋnↄ nɩ kpɛ̃w a tɩsↄw nɩ a mↄtↄ̃w, a mɩnɛ sɩ kↄ̃ wa ƴↄ̃w nɩrɛ kãw won wa a lɛdaar sɩ na hiere a Naaŋmɩn ƴɛr-son kʋrↄ nyɩ. ¹⁰ Nyɩ mɩ̃ɛ bↄ̃w sɩ na a Naaŋmɩn kaarɩ̃, a mɩnɛ sɩ na dãa wↄ̃ a nyɩmɩ popuorbo sↄ̃w. A sɩ maalfʋ dãa na ɩ cɛcɛ, ɩ̃ mɩ tor; burbur ma dãa be be fɩ̃ɩ wa. ¹¹ - ¹² A-na-ɩ nyɩ bↄ̃w na a mɩnɛ sɩ na maal a nyɩ jaa bõ-ƴene-ƴene jie, a mɩnɛ a daba na ma maal a ʋ bibiir jie. Sɩ miil nyɩ na a Naaŋmɩn sↄr, mɩ ɓaalɩ̃ nyɩ ɩ̃ mɩ kpãkpan nyɩ a mɩnɛ a nyɩ maalfʋ kↄ̃ wa sãw a Naaŋmɩn your wa, a ʋlↄ na bʋↄl nyɩ a nyɩ na kpɛ a ʋ mɩ̃ɛ fãw nɩ a ʋ yo-yifʋ pʋↄ. ¹³ A sɩmɩ mɩ, sɩ puoro na a Naaŋmɩn ma gala wa, a-na-ɩ a mɩnɛ nyɩ na wõ a Naaŋmɩn ƴɛrɩ̃ a sɩ jie, nyaa de ʋ ʋ ɩ a nɩbɛ ƴɛrɩ̃ wa, ɩ̃-cɛ nyɩ de ʋ na a mɩnɛ ʋ na sɩrɩ̃ ɩ a Naaŋmɩn ƴɛrɩ̃, na be a nyɩ pʋ̃ↄ lɩɛbɛ a nyɩmɩ na sↄw de ʋ. ¹⁴ Yɛɛr, nyɩ lɩɛbʼã wↄ̃ taa nɩ a Naaŋmɩn duo-puorbo a Jude wɩɛr pʋↄ na be a Jeeju-Kirisi pʋↄ, a-na-ɩ nyɩ nyɛ na hʋʋr a nyɩ mɩ̃ɛ tẽ-deme jie, wↄ̃ taa nɩ a bala na mɩ dãa nyɛ a hʋʋr a Jufisɩ jie. ¹⁵ A Jufisɩ bala, ba kú na a Nɩ-kpɛ̃ɛ Jeeju nɩ a Naaŋmɩn ƴɛr-hierbe, ɩ̃ mɩ diw sɩ bar a Jeeju yuor ɩnɛ. Á ba maalfʋ ma vɩɛlɛ a Naaŋmɩn jie wa, a-na-ɩ ba Ꞌlaarʼã a nɩbɛ ba jaa. ¹⁶ Ba mɩ bʋↄrↄ na ba var sɩ a sↄr a mɩnɛ a sɩ kↄ̃ wa ƴɛrɛ a Naaŋmɩn ƴɛrɩ̃ kʋrↄ a nɩ-kpeesɩ a ba pↄw a faafʋ wa. A nↄhↄ̃ ba dↄↄl taa a ba maal-faar a daar a jaa, ɩ̃ a Naaŋmɩn su-tuo pãa na ta ba. ¹⁷ Yɛɛr, sɩ ŋma na taa a daar fɩ̃ɩ pʋↄ (a ɩ̃gan buur tɛw pʋↄ, ɩ̃-cɛ a sɩɩr cãa be taa), ala-ɩ̃-sↄ a sɩ tɩɩ bʋↄrↄ sɩ lɛ nyɛ nyɩ ɩ̃ dãa ƴↄ̃w a fãgã ¹⁸ bʋↄrↄ sɩ wɩ a nyɩ sɛ̃. A maa Pol mɩ̃ɛ bↄ na a sↄr gbɛɛ amɩnɛ jaa faa, a-na-ɩ a Satã dãa na var sɩ a sↄr. ¹⁹ Bõ na ɩ a sɩ tɩɛrʋ̃ son nɩ a sɩ nʋ̃ↄ a sɩ Nɩ-kpɛ̃ɛ Jeeju nii-sↄw? Bõ na ɩ a tʋↄfʋ bom sɩ nↄↄ Ꞌlara miile a sɩ mɩ̃ɛ a ʋ waa daar ɩ̃ a ala ma ɩ a nyɩmɩ ʋ wa? ²⁰ A-na-ɩ a sɩ yo-yifʋ nɩ a sɩ nʋ̃ↄ yi na a nyɩ jie.

¹ Ala-ɩ̃-sↄ a nyɩ tɩɛrʋ̃ nyɩrɩ̃ na gãw sɩ, a sɩ guor taa ɩ̃ jɛ a Atɛn-tẽw pʋↄ a sɩ yẽ, ² ɩ̃ tʋ̃ a sɩ yɛbɛ Timote na ɩ a Naaŋmɩn tʋ̃tʋnↄ a Kirisi ƴɛr-son pʋↄ, ʋ wɩ a nyɩ sɛ̃ na sũo nyɩ, a nyɩ na tɛrɛ a fãgã nɩ a Ꞌlafʋ a nyɩ ƴↄ̃w-nyãa pʋↄ. ³ Saa bʋↄrↄ nɩrɛ kãw ʋ wa ɩ a dama ʋ a ana hʋʋr nyɩ na nyɛrɛ ɩnɛ wa. A-na-ɩ nyɩ mɩ̃ɛ bↄ̃w ka a sɛw na a ta sɩ a lɛ. ⁴ A mɩnɛ sɩ na dãa cãa be a nyɩ sɛ̃, sɩ dãa na de nĩe yel nyɩ a sɩ na nyɛ na a ana nãw, ɩ̃ nyɩ bↄ̃w na a ala ɩ̃ ta sɩ. ⁵ Ala-ɩ̃-sↄ, a nyɩ tɩɛrʋ̃ dãa na gãw ma, ɩ̃ jɛ faa ɩ̃ tʋ̃ a ɩ̃ bↄ̃w a mɩnɛ a nyɩ ƴↄ̃w-nyãa na be. Ɩ̃ dãa na jↄrↄ dãbɩ̃ɛ a mɩnɛ a bɩbɩɩrɛ nↄↄ nyɛ sↄr bɩɩr nyɩ, ɩ̃ cɛ a sɩ tʋmↄ bar a lo. ⁶ Ɩ̃-cɛ a ƴɛ̃ƴɛrɩ̃ na, a Timote yi na a nyɩ sɛ̃ ɩ̃ wa ta man sɩ a nyɩ ƴɛr-vɛlɛ, na ɩ a nyɩ ƴↄ̃w-nyãa nɩ a mɩnɛ a nʋfʋ na be a nyɩ sↄ̃w, nɩ a mɩnɛ nyɩ na mɩ cãa tɛrɛ a sɩ tɩɛrʋ̃ bʋↄrↄ nyɩ lɛ nyɛ sɩ a sɩ kaarɩ̃. ⁷ Ala-ɩ̃-sↄ yɛɛr, sɩ lɛ tɛrɛ na Ꞌlafʋ a nyɩ ƴↄ̃w-nyãa ɩnɛ, a sɩ na lɛ tʋↄ a won nɩ a hʋʋr nyɛfʋ ala pʋↄ sɩ na be. ⁸ A wↄ̃ na taa nɩ baa-paalaa sɩ ma pↄw, a ala ɩ nyɩ ɩraa na eĩeĩ a Nɩ-kpɛ̃ɛ sↄr pʋↄ. ⁹ Mɩnɛ sɩ na tʋↄ puor a Naaŋmɩn a na sɛw, a ʋna nʋ̃ↄ kpɛ̃ɛ jaa sɩ na tɛrɛ a nyɩ ɩnɛ a Naaŋmɩn nii-sↄw? ¹⁰ A daar a jaa sɩ ma sʋↄrↄ na a Naaŋmɩn ú kʋ sɩ a sↄr bɩlɛ, a sɩ lɛ tʋↄ lɛ nyɛ taa gbelẽgbelẽ, na sɩ tʋↄ ɓã nyɩ a ala na ɓↄr a nyɩ ƴↄ̃w-nyãa pʋↄ. ¹¹ Sɩ sʋↄrʼã a Naaŋmɩn na ɩ a sɩ Sãa mɩ̃ɛ, nɩ a sɩ Nɩ-kpɛ̃ɛ Jeeju, ʋ gbɛɛrɩ̃ a sↄr a sɩ be wɩfʋ ɩnɛ. ¹² A Nɩ-kpɛ̃ɛ ú dↄↄl a nyɩ nʋfʋ a paal, maalʼɩ̃ nyɩ a nyɩ nʋnↄ taa, mɩ nʋnↄ a nɩbɛ jaa, a mɩnɛ sɩ na mɩ nʋnↄ nyɩ. ¹³ A sɩ Sãa Naaŋmɩn ú sũo nyɩ a nyɩ ɩraa cĩcĩ kↄ̃ dama wa, ɩ̃ mɩ ow nyɩ kpee a nyɩ kↄ̃ tɛrɛ cɛfʋ jie a ʋ nii-sↄw a lɛdaar a sɩ Nɩ-kpɛ̃ɛ Jeeju nↄↄ waara nɩ a ʋ sɩ-tʋnɩsɩ wa.

¹ Yɛɛr, nyɩ́ nyɛ a ala na cɛ. Sɩ dãa na man nyɩ a mɩnɛ na sɛw a nyɩ na maala a nʋmↄ a Naaŋmɩn, ɩ̃ a ala nyɩ gↄr maala. A ƴɛ̃ƴɛrɩ̃ na sɩ sʋↄrↄ nyɩ na, kpãkpana nɩ nyɩ nɩ a Nɩ-kpɛ̃ɛ Jeeju yuor a nyɩ na nyɩrɛ maala a lɛ. ² Nyɩ bↄ̃w na a ƴɛrɩ̃sɩ ala sɩ na dãa man nyɩ, na yi a Nɩ-kpɛ̃ɛ Jeeju jie. ³ A-na-ɩ a Naaŋmɩn pʋ-tɩɛrʋ̃ ɩ na a nyɩ ow kpee, taw nɩ a nyɩ mɩ̃ɛ jãa nɩ a gã-ta-burbur pʋↄ, ⁴ ɩ̃ a nyɩ jaa bõ-ƴene-ƴene, nyɩ mɩ bↄ̃w tɛrɛ a nyɩ ɩ̃gan cɛcɛ, gbɛɛrɛ nɩ ʋ. ⁵ ꞋWaa bʋↄrↄ nyɩ de a nyɩ mɩ̃ɛ lↄb bar a pebfʋ pʋↄ wa, wↄ̃ taa nɩ a nɩ-kpeesɩ na ma bↄ̃w a Naaŋmɩn wa. ⁶ A yele asɩmɛ pʋↄ, nɩrɛ lɛ ma sɛw na maala a fãa ŋmama nɩ a ʋ yɛbɛ wa, a-na-ɩ a Nɩ-kpɛ̃ɛ na kpãa na a nɩbɛ a ana yele a jaa ɩnɛ, a mɩnɛ sɩ na dãa yel nyɩ ɩ̃ lɛ kpãkpana nyɩ. ⁷ A Naaŋmɩn ma bʋↄl sɩ a maal-bi-kpansɩ maalfʋ ɩnɛ wa, ɩ̃-cɛ ʋ bʋↄl sɩ na a sɩ na ɩ cɛcɛ. ⁸ Ala-ɩ̃-sↄ, a nɩrɛ lɛ wa jaar a ƴɛrɩ̃ naa, aa ɩ nɩrɛ ʋ jaar wa, ɩ̃-cɛ a Naaŋmɩn mɩ̃ɛ na ma tɩɩr a ʋ Sɩ-cɛcɛ kʋ nyɩ, ʋ jaar. ⁹ Ɩ̃-cɛ a ƴɛ̃ƴɛrɩ̃, a ala ɩ a nʋ-taa ƴɛrɩ̃ ʋ, aa lɛ sɛw ɩ̃ lɛ sɛb nyɩ sɛbɛ a ala ɩnɛ go wa, a-na-ɩ nyɩmɩ mɩ̃ɛ jaana a Naaŋmɩn jie a nyɩ nʋ-taa ƴɛrɩ̃, ¹⁰ ɩ̃ a lɛ nyɩ sɩrɩ̃ nʋnↄ a nyɩ yɛɛr a Masɛdↄn wɩɛr ʋ jaa. Ɩ̃ yɛɛr, sɩ lɛ kpãkpana nyɩ na a nyɩ na nyɩrɛ a nʋ-taa pʋↄ, ¹¹ ɩ̃ mɩ ƴↄ̃w fãgã ɩ̃ ɩ nɩ-jomsɩ, Ꞌwuoro a yele ala tɛw na ba nyɩ, ɩ̃ sɩrɩ̃ tʋnↄ Ꞌwuoro nɩ a nyɩ mɩ̃ɛ a mɩnɛ sɩ na dãa yel nyɩ. ¹² A nyɩmɩ maala a nↄhↄ̃, a bala na ma puoro wa na ƴↄnↄ nyɩ na, ɩ̃-cɛ nyɩ kↄ̃ lɛ bʋↄrↄ a nɩrɛ bom wa. ¹³ Yɛɛr, saa bʋↄrↄ nyɩ tɛrɛ baalɩ̃fʋ a bala na kpi ɩnɛ wa, a mɩnɛ a kↄ wa nyɩrɩ̃ dama nyɩ wↄ̃ taa nɩ a bala na ma bↄ̃w a ala nↄↄ tara a nɩdaar wa. ¹⁴ A mɩnɛ sɩ na bↄ̃w ka a Jeejn kpi na ɩ̃ ir a kũu pʋↄ, a lɛ ʋ mɩ, sɩ bↄ̃w ka a Naaŋmɩn na maalʼã a bala na dãa ƴↄ̃w a Jeeju nyãa ɩ̃ kpi, a ba lãa lɩɛb wa nɩ ʋ. nɩ ʋ. ¹⁵ Nyɛ a ala sɩ na tɛrɛ yele nyɩ, na ɩ a Nɩ-kpɛ̃ɛ ƴɛrɩ̃. Aa ɩ a sɩmɩ nↄↄ cãanɛɛ a Nɩ-kpɛ̃ɛ waa daar ɩ̃ diere nĩe tuoro ʋ a bala na kpi ɩnɛ wa. ¹⁶ A-na-ɩ a Nɩ-kpɛ̃ɛ mɩ̃ɛ nↄↄ yi na a saa juu ɩ̃ suu nɩ a cɛlɩ̃nyɛ nɩ a sɩ-tʋnɩsɩ nɩ-kpɛ̃ɛ kↄkɩr nɩ a ɩl kpɛ̃ɛ gↄn, ɩ̃ a bala na dãa kpi a Kirisi pʋↄ na de na nɩ̃e ir a kũu pʋↄ. ¹⁷ A ala ɩ̃ baar, a sɩmɩ nↄↄ cãanɛɛ a lɛdaar, a Naaŋmɩn na jal sɩ na a sɩ lãa do nɩ ba a dↄ̃dↄrɩ̃sɩ pʋʋr, tuoro a Nɩ-kpɛ̃ɛ a saꞋlon. A nↄhↄ̃ sɩ na lãa na be taa nɩ a Nɩ-kpɛ̃ɛ a daar a jaa. ¹⁸ Ala-ɩ̃-sↄ nyɩ́ ɓaala taa nɩ a ƴɛrɩ̃sɩ asɩmɛ.

¹ Ɩ̃-cɛ yɛɛr, a ala ɩ a bibir nɩ a daar a ana yele nↄↄ tara ʋ, nyaa lɛ bʋↄrↄ sɩ lɛ sɛb yel nyɩ bom kãw wa, ² a-na-ɩ nyɩmɩ mɩ̃ɛ bↄ̃w na vɩlaa áa Nɩ-kpɛ̃ɛ wafʋ bibir na wↄ̃ na taa nɩ a mɩnɛ a nyanyuur na ma wa a tɩsↄw. ³ A daar ʋlↄ a nɩbɛ nↄↄ yele: “Damfʋ ma be be wa; pɩɛnfʋ tɛw ɩ̃ be be,” ɩ̃ a jie naan, a sãwfʋ nↄↄ ta na a ba jie wↄ̃ taa nɩ a mɩnɛ a walfʋ na ma ta a pↄw, ɩ̃ cɩ̃ɛfʋ jie kↄ̃ be be fɩ̃ɩ wa. ⁴ Ɩ̃-cɛ yɛɛr, a ala ɩ a nyɩmɩ ʋ, nyaa be a libe pʋↄ a mɩnɛ a ʋna bibir nↄↄ dũunɩ nyɩ wa. ⁵ A nyɩmɩ, nyaa ɩ a libe pʋↄ nɩbɛ wa. Saa mɩ wↄ̃ taa nɩ a bala na ma tʋnↄ a ba tʋmↄ a tɩsↄw wa. A-na-ɩ cãa pʋↄ nɩbɛ sɩ ɩ, mɩ tʋnↄ a sɩ tʋmↄ a mↄtↄ̃w. ⁶ Ala-ɩ̃-sↄ sɩ taa wↄ̃ a nɩŋmɛɛ kaarɩ̃ na gure wa, ɩ̃-cɛ sɩ́ cɛl tↄ jʋʋrↄ ɩ̃ mɩ bↄ̃w tɛrɛ a sɩ mɩ̃ɛ. ⁷ A bala na ma gure, tɩsↄw ba ma gur; a bala a dãa na kʋrↄ, tɩsↄw a ma kʋ ba. ⁸ Ɩ̃-cɛ a sɩmɩ na ɩ a cãa nɩbɛ, sɩ́ tɛrɛ a sɩ mɩ̃ɛ, mɩ de a sɩ nyãa-piwraa na ɩ a sɩ ƴↄ̃w-nyãa nɩ a sɩ nʋfʋ, ɩ̃ mɩ de a sɩ ju-piwraa na ɩ a faafʋ tɩɛrʋ̃ daadaa. ⁹ A-na-ɩ a Naaŋmɩn ma vɛl sɩ ir biin a ʋ su-tuo ɩnɛ wa, ɩ̃-cɛ ʋ vɛl sɩ na ir a sɩ na pↄw a faafʋ a sɩ Nɩ-kpɛ̃ɛ Jeeju-Kirisi ɩnɛ, ¹⁰ a ʋlↄ na dãa kpi a sɩ ɩnɛ, a mɩnɛ a sɩmɩ wa saarɩ̃ kpi, mɩɩ sɩ cãana, a sɩ na tʋↄ lãa tɛrɛ nɩ ʋ a baafʋ. ¹¹ Ala-ɩ̃-sↄ nyɩ́ ɓaala taa ɩ̃ mɩ sũono taa a mɩnɛ nyɩ na gↄr maala. ¹² Yɛɛr, sɩ sʋↄrↄ nyɩ na a nyɩ na bↄ̃wnↄ nɩ a bala na dɩrɛ a tuo tʋnↄ a nyɩ sↄ̃w, na mɩ ɩ a nyɩ ni-dierbe mana nyɩ a yɛ̃ a Nɩ-kpɛ̃ɛ pʋↄ. ¹³ Nyɩ́ bↄ̃w ƴↄnↄ ba nɩ nʋfʋ a ba tʋmↄ ɩnɛ, ɩ̃ mɩ tɛrɛ nↄ-bõ-ƴen a nyɩ sↄ̃w. ¹⁴ Yɛɛr, sɩ lɛ kpãkpana nyɩ na, nyɩ́ mana a tõtol deme a yɛ̃, mɩ ɓaala nɩ a bala na ma tɛrɛ a Ꞌlafʋ wa. Nyɩ́ mɩ tɩɛ a bala na bal, tɛrɛ nɩ a su-nyↄwraa a nɩbɛ ba jaa jie. ¹⁵ Nyɩ́ tɛrɛ nyɩ mɩ̃ɛ a nɩrɛ kãw kↄ̃ wa de a bier ya a bier wa, ɩ̃-cɛ a daar a jaa nyɩ́ bʋↄrↄ a son maalfʋ, a nyɩ sↄ̃w nɩ a nɩbɛ ba jaa jie mɩ. ¹⁶ Nyɩ́ cɩlɛ a daar a jaa, ¹⁷ mɩ puoro nɩ a Naaŋmɩn kↄ̃ gala wa. ¹⁸ A bom lɛ na tara, nyɩ́ puoro a Naaŋmɩn, a-na-ɩ a lɛ ɩ̃ ɩ a ʋ pʋ-tɩɛrʋ̃ a Jeeju-Kirisi pʋↄ a nyɩ ɩnɛ. ¹⁹ Nyɩ taa vara a Naaŋmɩn Sɩɛ tʋmↄ wa. ²⁰ Nyɩ taa mele a ʋ pʋ-tɩɛrʋ̃-bʋʋrbↄ wa. ²¹ Nyɩ́ ma bↄ̃w jʋʋr a yele a jaa, ɩ̃ sↄw de a ala na vɩɛlɛ. ²² Nyɩ́ taw jãa nɩ a maal-fãa bʋrↄ bʋrↄ a jaa fɛw. ²³ A pɩɛnfʋ Naaŋmɩn mɩ̃ɛ, ú ow nyɩ kpee cɛcɛ, gu nyɩ a nyɩ mɩ̃ɛ ʋ jaa, a sɩɛ pʋↄ, a suur, nɩ a ɩ̃gan pʋↄ, a nyɩ kↄ̃ wa tɛrɛ cɛfʋ jie a sɩ Nɩ-kpɛ̃ɛ Jeeju-Kirisi lɛwaa bibir wa. ²⁴ A ʋlↄ na bʋↄl nyɩ ɩ na dẽdẽ; ʋ na maalʼã a ala a jaa. ²⁵ Yɛɛr, nyɩ́ mɩ sʋↄrↄ a Naaŋmɩn ƴↄnↄ sɩ. ²⁶ Nyɩ́ puoro a sɩ yɛɛr ba jaa woro nɩ ba nɩ a Nɩ-kpɛ̃ɛ yuor. ²⁷ Ɩ̃ yele nyɩ na nɩ a Nɩ-kpɛ̃ɛ yuor á nyɩ́ Ꞌwuor a sɛbɛ naa a yɛɛr ba jaa nii-sↄw. ²⁸ A sũofʋ na yi a sɩ Nɩ-kpɛ̃ɛ Jeeju-Kirisi sɛ̃ ú be a nyɩ jie.