1 JÃ

1 JÃ

¹ A ala na ɩ a baafʋ ƴɛrɩ̃ ɩnɛ sɩ sɛbɛ nyɩ, na ɩ a ƴɛrɩ̃ ʋlↄ na dãa be be a korĩ-cɛ jaa, sɩ na dãa wõ, ɩ̃ a sɩ mimie mɩ nyɛ. Sɩ Ꞌwuor ʋ na cɛ̃pɛn, ɩ̃ a sɩ nur mɩ sɩɩr ʋ. ² A Naaŋmɩn miilʼɩ̃ na a baafʋ ʋlↄ a sɩ nyɛ ʋ; ala-ɩ̃-sↄ a sɩ ƴɛrɛ kʋrↄ nyɩ, mana nɩ nyɩ a ʋna baa-kↄ̃-tɛw na dãa be a Sãa sɛ̃ ʋ de miilʼɩ̃ sɩ. ³ A ala sɩ na nyɛ ɩ̃ mɩ wõ, ala sɩ mana nyɩ mɩ, a mɩnɛ a nyɩ na tʋↄ lãw nɩ sɩ a ʋna lãw-taa pʋↄ sɩ na tɛrɛ nɩ a Sãa nɩ a ʋ Bie Jeeju-Kirisi. ⁴ Sɩ sɛbɛ nyɩ na a ana yele a mɩnɛ a nʋ̃ↄ ʋlↄ na be a sɩ jie na nyɩrɩ̃ ƴala. ⁵ A ƴɛrɩ̃ ʋlↄ sɩ na dãa wõ a Jeeju-Kirisi sɛ̃ ɩ̃ mɩ mana kʋrↄ nyɩ ɩ na, áa Naaŋmɩn ɩ na cãa ɩ̃ a libe ma be a ʋ pʋↄ fɩ̃ɩ wa. ⁶ A sɩmɩ yel á sɩ be nɩ ʋ na, ɩ̃ lɛ cãa tʋnↄ a libe tʋmↄ, sɩ ɩ na jir-ŋmarba, ɩ̃ ma tɛrɛ yel-mɩ̃ɛ wa. ⁷ A sɩmɩ cere a cãa pʋↄ a mɩnɛ a ʋlↄ mɩ̃ɛ na be a cãa pʋↄ, lãw-taa na be na a sɩ sↄ̃w, ɩ̃ a ʋ Bie Jeeju jɩ̃ɩ na pɛɛrɛ na a sɩ maal-fãa a jaa bara. ⁸ A sɩmɩ yel á saa tɛrɛ maal-fãa wa, sɩ bɛlɛ na sɩ mɩ̃ɛ; saa tɛrɛ yel-mɩ̃ɛ wa. ⁹ Ɩ̃ a sɩmɩ caalɩ̃ a sɩ maal-fãa kʋ a Naaŋmɩn, ʋ na de na bar kʋ sɩ, ɩ̃ cↄↄrɩ̃ a sɩ burbur a jaa bar, a-na-ɩ ʋ ɩ na dẽdẽ ɩ̃ mɩ tor. ¹⁰ A sɩmɩ yel á saa maal fãa wa, sɩ de na a Naaŋmɩn ʋ ɩ jir-ŋmara, ɩ̃ saa sↄw de a ʋ ƴɛrɩ̃ wa.

¹ Ɩ̃ bibiir, ɩ̃ sɛbɛ nyɩ na a asɩmɛ a mɩnɛ a nyɩ kↄ̃ maal fãa wa. Ɩ̃-cɛ a nɩrɛ wa maal a fãa, sɩ tɛrɛ na a lↄlʋↄrↄ a Sãa sɛ̃ na tor, na ɩ a Jeeju-Kirisi. ² Ʋ ɩ na a ʋlↄ na lɩɛb ɩ a baar-lo-bom na tʋↄ ir a sɩ maal-fãa bar; ɩ̃ aa ɩrɛ a sɩ ben tɛw ʋ wa, ɩ̃-cɛ a nɩbɛ ba jaa maal-fãa ʋ mɩ. ³ A sɩmɩ jↄrↄ a Naaŋmɩn ƴɛr-kpɛn, sɩ na bↄ̃w na ka sɩ bↄ̃w ʋ na. ⁴ A ala ɩ a nɩrɛ yelʼã: “Ɩ̃ bↄ̃w ʋ na,” ɩ̃ ma jↄrↄ a ʋ ƴɛr-kpɛn wa, ʋ ɩ na jir-ŋmara; yel-mɩ̃ɛ ma be a ʋ pʋↄ wa. ⁵ Ɩ̃-cɛ a ʋlↄ na jↄrↄ a ʋ ƴɛrɩ̃, bom ma sɩrɩ̃ ɓↄr a ʋ Naaŋmɩn nʋfʋ pʋↄ wa. Nyɛ a mɩnɛ sɩ na tʋↄrↄ bↄ̃wnↄ á sɩ ɩ na a Naaŋmɩn ben: ⁶ a ʋlↄ na yel á ʋ ɩ na a Naaŋmɩn ben, a ʋ baafʋ sɛw na ʋ wↄ̃ a mɩnɛ a Kirisi baafʋ na dãa be. ⁷ Ɩ̃ badɛɛ, aa ɩ ƴɛr-kpɛ̃w paalaa ɩ̃ sɛbɛ nyɩ wa, ɩ̃-cɛ a ɩ na a bõ-kʋraa ʋlↄ nyɩ na pↄw a korĩ-cɛ jaa. A ƴɛr-kpɛ̃w kʋraa ɩ na a ƴɛrɩ̃ ʋlↄ nyɩ na dãa wõ. ⁸ Ɩ̃-cɛ a cãa na ɩ a ƴɛr-kpɛ̃w paalaa ɩ̃ sɛbɛ nyɩ, ɩ̃ a ʋ yel-mɩ̃ɛ miile na a Kirisi jie, nɩ a nyɩ jie mɩ, a-na-ɩ a libe tↄlↄ na ɩ̃ a yel-mɩ̃ɛ cãa gↄr caara. ⁹ A ʋlↄ na yel á ʋ be na a cãa pʋↄ, ɩ̃ cãa Ꞌlaar a ʋ yɛbɛ, ʋ cãa na be a libe pʋↄ. ¹⁰ Ɩ̃ a ʋlↄ na nʋnↄ a ʋ yɛbɛ be na a cãa pʋↄ, ɩ̃ bom ma be a ʋ jie na maala nɩrɛ ʋ loro wa. ¹¹ Ɩ̃-cɛ a ʋlↄ na Ꞌlaar a ʋ yɛbɛ be na a libe pʋↄ. Ʋ cere na a libe pʋↄ, ɩ̃ ma mɩ bↄ̃w a jie ʋ na cere wa, a-na-ɩ a libe jↄ̃w ʋ na bar. ¹² Ɩ̃ bibiir, ɩ̃ sɛbɛ nyɩ na a-na-ɩ a Naaŋmɩn de na a nyɩ maal-fãa bar kʋ nyɩ a Kirisi yuor ɩnɛ. ¹³ Sãa nʋmↄ, ɩ̃ sɛbɛ nyɩ na a-na-ɩ nyɩ bↄ̃w na a ʋlↄ na be be a korĩ-cɛ jaa. Polbil, ɩ̃ sɛbɛ nyɩ na a-na-ɩ nyɩ tʋↄ na a Fãa Sʋbↄ. ¹⁴ Bibiir, ɩ̃ sɛb nyɩ na a-na-ɩ nyɩ bↄ̃w na a Sãa. Sãa nʋmↄ, ɩ̃ sɛb nyɩ na a-na-ɩ nyɩ bↄ̃w na a ʋlↄ na be be a korĩ cɛ jaa. Polbil, ɩ̃ sɛb nyɩ na a-na-ɩ nyɩ tɛrɛ na kpɛ̃w; a Naaŋmɩn ƴɛrɩ̃ be na a nyɩ pʋↄ, ɩ̃ nyɩ mɩ tʋↄ na a Fãa Sʋbↄ. ¹⁵ Nyɩ taa nʋ a tẽw na maal-bie nɩ a ʋ yele wa. A ʋlↄ na nʋnↄ a tẽw na maal-bie ma cãa nʋnↄ a Sãa wa. ¹⁶ A-na-ɩ a ala a jaa na be ka a tẽw pʋↄ, wↄ̃ taa nɩ a ɩ̃gan buur yele bↄfʋ, mɩɩ a ala sɩ na ma nyɛ ɩ̃ jɩɛlɛ, mɩɩ a yel-yaw tɛrɛfʋ yo-bↄb, ma yi a Sãa jie wa, ɩ̃-cɛ a tẽw pʋↄ a yi. ¹⁷ A tẽw nɩ a ʋ yele a nɩbɛ na Ꞌlaar tↄlↄ na, ɩ̃-cɛ a ʋlↄ na maala a Naaŋmɩn pʋ-tɩɛrʋ̃, ʋ na be na be a daar a jaa. ¹⁸ Ɩ̃ bibiir, nyɩ́ nyɛ, a tẽw baarfʋ daar tara na. Nyɩ wõ na a ba yel á Kirisi San-Sʋbↄ waara na. Ɩ̃-cɛ a ƴɛ̃ƴɛrɩ̃, a Kirisi sama-deme yaw gↄrʼã be ka. Ala ɩ̃ saa a sɩ bↄ̃w ka a tẽw baarfʋ daar tara na. ¹⁹ A bana nɩbɛ yi na a sɩ sↄ̃w, ɩ̃ baa dãa ɩ a sɩ nɩbɛ wa. A ala dãa ɩ ba ɩ na a sɩ nɩbɛ, ba naa dãa na cãa be nɩ sɩ. Ba yi na a sɩ sↄ̃w a na miil a bõ-ƴen jaa ma dãa sɩrɩ̃ ɩ a sɩ nɩrɛ wa. ²⁰ Ɩ̃-eɛ a nyɩmɩ, nyɩ pↄw na a Sɩɛ ʋlↄ a Kirisi na kʋ nyɩ, ɩ̃ a nyɩ jaa bↄ̃w na a yel-mɩ̃ɛ. ²¹ Maa sɛb nyɩ a-na-ɩ nyaa bↄ̃w a yel-mɩ̃ɛ wa, ɩ̃-cɛ a-na-ɩ nyɩ bↄ̃w ʋ na, ɩ̃ mɩ bↄ̃w ka a jiri kãw ma tʋↄrↄ yire a yel-mɩ̃ɛ pʋↄ wa. ²² Ala ʋlↄ ɩ̃ ɩ a jir-ŋmara ɩ̃ ma ɩ a ʋlↄ na cɩɩrɛ áa Jeeju ma ɩ a Kirisi wa? Ʋ ɩ na a Kirisi San-Sʋbↄ, ɩ̃ ma jaar a Sãa nɩ a Bie jaa bar. ²³ A nɩrɛ lɛ na jaar a Bie ma mɩ tɛrɛ a Sãa wa, ɩ̃ a ʋlↄ na sↄw de a Bie mɩ tɛrɛ na a Sãa. ²⁴ Ɩ̃ a nyɩmɩ, nyɩ́ bↄ̃w tɛrɛ a nyɩ suur pʋↄ a ala nyɩ na dãa wõ a korĩ-cɛ. A ala ɩ nyɩ bↄ̃w na tɛrɛ a nyɩ suur pʋↄ a ala nyɩ na dãa wõ a korĩ-cɛ, nyɩ na be na a Sãa nɩ a Bie pʋↄ. ²⁵ Ɩ̃ a pʋlɩ̃fʋ ʋlↄ a Kirisi na pʋlɩ̃ nɩ sɩ ɩ na a baa-kↄ̃-tɛw. ²⁶ Ɩ̃ sɛb nyɩ na a asɩmɛ a bala na bʋↄrↄ ba bɛlɛ nyɩ a nyɩ bↄr ɩnɛ. ²⁷ Ɩ̃-cɛ a nyɩmɩ, a Sɩɛ ʋlↄ nyɩ na dãa pↄw a Kirisi sɛ̃ cãa na be a nyɩ pʋ̃ↄ, ɩ̃ nyaa lɛ bʋↄrↄ nɩrɛ ʋ lɛ jaan nyɩ wa. A Sɩɛ ʋlↄ nyɩ na tɛrɛ jaana nyɩ na a yele a jaa, ɩ̃ a ala ʋ na jaana nyɩ ma ɩ jiri wa; yel-mɩ̃ɛ ʋ. Ala-ɩ̃-sↄ, a mɩnɛ ʋ na jaan nyɩ, nyɩ́ bↄ̃w ɩraa a Kirisi pʋↄ. ²⁸ Ɩ̃ bibiir, a ƴɛ̃ƴɛrɩ̃ na, nyɩ́ bↄ̃w ɩraa a ʋ pʋↄ a mɩnɛ a ʋlↄ wa nyɩr, a sɩ na tɛrɛ Ꞌlafʋ, ɩ̃-cɛ a vĩ kↄ̃ sɛw sɩ a mimie a ʋ waa bibir wa. ²⁹ A ala ɩ nyɩ bↄ̃w ka ʋ torʼã, nyɩ mɩ bↄ̃w na áa nɩrɛ ʋlↄ na maala a ala na tor ɩ na a Naaŋmɩn bile.

¹ Nyɩ́ nyɛ a mɩnɛ a Sãa na tɩɩ nyɩrɩ̃ nʋ sɩ a mɩnɛ ʋ na bʋↄlↄ sɩ a ʋlↄ Naaŋmɩn mɩ̃ɛ bibiir; ɩ̃-cɛ a lɛ sɩ sɩrɩ̃ ɩ. A bom na ɩnɛ a tẽw na nɩbɛ na ma bↄ̃w sɩ wa, ɩ na a mɩnɛ ba na ma mɩ dãa bↄ̃w ʋ wa. ² Ɩ̃ badɛɛ, a ƴɛ̃ƴɛrɩ̃ na sɩ ɩ na a Naaŋmɩn bibiir, ɩ̃ a ala sɩ nↄↄ lɛ ɩrɛ ma yi cãa pʋↄ sɛr wa. Ɩ̃ sɩ bↄ̃w ka a lɛdaar ʋ nↄↄ nyɩrɛ a cãa pʋↄ, sɩ na wↄ̃ na taa nɩ ʋ, a-na-ɩ sɩ na nyɛ ʋ na a mɩnɛ ʋ na be. ³ A nɩrɛ lɛ na tɛrɛ a tɩɛrʋ̃ son ʋlↄ a Kirisi pʋↄ, ma cↄↄrↄ na a ʋ mɩ̃ɛ ɩrɛ cɛcɛ, a mɩnɛ a Jeeju-Kirisi mɩ̃ɛ na ɩ a cɛcɛ. ⁴ A nɩrɛ lɛ na maal a fãa sãw na a Naaŋmɩn ƴɛr-kpɛn, a-na-ɩ a fãa maalfʋ ɩ na a Naaŋmɩn ƴɛr-kpɛn sãwfʋ. ⁵ Nyɩ bↄ̃w ka a Jeeju-Kirisi wa na a ka na ir a maal-faar bar, ɩ̃ maal-fãa fɩ̃ɩ ma be a ʋ pʋↄ wa. ⁶ A nɩrɛ lɛ na be a ʋ pʋↄ ma maala fãa wa. Ɩ̃ a nɩrɛ lɛ na maala a fãa ma nyɛ ʋ wa, ɩ̃ ma mɩ bↄ̃w ʋ wa. ⁷ Ɩ̃ bibiir, nyɩ taa wa sↄw a nɩrɛ wa bɛlɩ̃ nyɩ wa. A ʋlↄ na maal a ala na tor mɩ torʼã, a mɩnɛ a Jeeju-Kirisi na tor. ⁸ Ɩ̃ a ʋlↄ na maala a fãa ɩ na a Satã ben, a-na-ɩ a korĩ-cɛ jaa a Satã ɩ̃ ma maala a fãa. A Naaŋmɩn Bie wa na a ka, na sãw a Satã tʋmↄ bar. ⁹ A nɩrɛ lɛ na ɩ a Naaŋmɩn bile ma barʼã a fãa maalfʋ, a-na-ɩ a Naaŋmɩn wↄmↄ be na a ʋ pʋↄ. ꞋWaa lɛ tʋↄrↄ maala a fãa wa, a-na-ɩ a Naaŋmɩn ɩ na a ʋ Sãa. ¹⁰ A ala na saa a Naaŋmɩn bibiir nɩ a Satã bibiir be a kpee kpee ɩ na: a ʋlↄ na ma maala a ala na tor wa, mɩɩ ma nʋnↄ a ʋ yɛbɛ wa, ma ɩ a Naaŋmɩn ben wa. ¹¹ A ƴɛrɩ̃ ʋlↄ sɩ na dãa wõ a korĩ-cɛ jaa ɩ na, á sɩ nʋnↄ taa, ¹² ɩ̃ a sɩ kↄ̃ wↄ̃ taa nɩ a Kayɩ̃ na dãa ɩ a Fãa Sʋbↄ ben ɩ̃ kú a ʋ yɛbɛ wa. Ɩ̃ bõ ɩnɛ ʋ kú ʋ? Ʋ kú ʋ na a-na-ɩ a ʋ maalfʋ dãa na ɩ a fãa, ɩ̃ a ʋ yɛbɛ ben dãa tor. ¹³ Ɩ̃ yɛɛr, nyɩ taa wa ɩ a nʋↄr ko nyɩ, a ala ɩ a tẽw na nɩbɛ wa Ꞌlaar nyɩ na. ¹⁴ Sɩ bↄ̃w ka sɩ yi na a kũu pʋↄ ɩ̃ kpɛ a baafʋ pʋↄ, a-na-ɩ sɩ nʋnↄ na a sɩ yɛɛr. A ʋlↄ na ma nʋnↄ a ʋ yɛbɛ wa, cãa na be a kũu pʋↄ. ¹⁵ A nɩrɛ lɛ na Ꞌlaara a ʋ yɛbɛ ɩ na nɩ-kʋrↄ. Ɩ̃ nyɩ bↄ̃w ka nɩ-kʋrↄ lɛ ma tɛrɛ a baa-kↄ̃-tɛw wa. ¹⁶ A mɩnɛ sɩ na ɩrɛ ɩ̃ wa bↄ̃wnↄ a nʋfʋ ɩ na, áa Jeeju-Kirisi tɩɩrʼã a ʋ baafʋ a sɩ ɩnɛ. Ɩ̃ a sɩmɩ mɩ sɛw na na tɩɩr a sɩ baafʋ a sɩ yɛɛr ɩnɛ. ¹⁷ A ala ɩ a nɩrɛ lɛ tɛrɛ na a ala na sɛw ʋ a ka a tẽw pʋↄ, ɩ̃ nyɛ a ʋ yɛbɛ ʋ be a nãw pʋↄ, ɩ̃ a Ꞌwaa bↄ̃w ʋ a nãw wa, mɩnɛ ʋ na ɩ ɩ̃ tʋↄ yel áa Naaŋmɩn nʋfʋ be na a ʋ pʋ̃ↄ? ¹⁸ Ɩ̃ bibiir, nyɩ taa ɩ a sɩ nʋfʋ tↄↄ ɩ a nↄ-vaar nɩ a ƴɛr-bie tɛw wa, ɩ̃-cɛ a sɛw na a ɩ a maal-bie nɩ yel-mɩ̃ɛ. ¹⁹ A nↄhↄ̃ sɩ na bↄ̃w na bↄ̃w ka sɩ be na a yel-mɩ̃ɛ pʋↄ, ɩ̃ a sɩ sube na mɩ ɓãa na a Naaŋmɩn nii-sↄw. ²⁰ A-na-ɩ a ala saarɩ̃ ɩ a sɩ suur dama sɩ na, a Naaŋmɩn bɛrmɛ na gãw a sɩ suur, ɩ̃ mɩ bↄ̃w a yele a jaa. ²¹ Ɩ̃ badɛɛ, a ala ɩ a sɩ suur mↄↄ dama sɩ wa, sɩ na barʼã nyãa ɩ̃ pɩɛlɛ a Naaŋmɩn. ²² A bom lɛ sɩ na sʋↄrↄ ʋ, sɩ na pↄw na, a-na-ɩ sɩ jↄrↄ na a ʋ ƴɛr-kpɛn, ɩ̃ mɩ maala a ala na nʋmↄ ʋ. ²³ Nyɩ́ nyɛ a ala ʋ na kpãkpan sɩ, á sɩ ƴↄ̃w a ʋ Bie Jeeju-Kirisi a nyãa, tɩɛrɛ nɩ a ʋ yuor, ɩ̃ mɩ nʋnↄ taa tuure nɩ a ƴɛr-kpɛ̃w ʋlↄ a Kirisi na dãa kʋ sɩ. ²⁴ A ʋlↄ na jↄrↄ a Naaŋmɩn ƴɛr-kpɛn be na a Naaŋmɩn pʋↄ, ɩ̃ a Naaŋmɩn mɩ be a ʋ pʋↄ. Ɩ̃ sɩ bↄ̃w ka ʋ be na a sɩ pʋↄ, a ʋ Sɩɛ ʋ na kʋ sɩ ɩnɛ.

¹ Ɩ̃ badɛɛ, nyɩ taa wa sↄwrↄ a bala ba jaa na yele áa Naaŋmɩn Sɩɛ ba tɛrɛ ƴɛrʼɩ̃ wa, ɩ̃-cɛ nyɩ́ jʋʋr ba je kãa, a ala ɩ ba sɩrɩ̃ na tɛrɛ a Naaŋmɩn Sɩɛ, a-na-ɩ jir-ŋma-ƴɛr-hierbe yaw yɛrʼã pↄw a tẽw. ² Nyɛ a mɩnɛ nyɩ na tʋↄrↄ bↄ̃wnↄ a ʋlↄ na tɛrɛ a Naaŋmɩn Sɩɛ: a ʋlↄ na cã yel áa Jeeju-Kirisi wa na ka a tẽw pʋↄ tɛrɛ a nɩrɛ ɩ̃gan, sɩrɩ̃ na tɛrɛ a Naaŋmɩn Sɩɛ. ³ Ɩ̃ a ʋlↄ na ma sↄw cã yel a nↄhↄ̃ a Jeeju ɩnɛ wa, ma tɛrɛ a Naaŋmɩn Sɩɛ wa, ɩ̃-cɛ a ʋna sɩɛ ʋ na tɛrɛ ɩ na a Kirisi San-Sʋbↄ. Nyɩ dãa na wõ á ʋ na wa na a ka a tẽw pʋↄ, ɩ̃ a ƴɛ̃ƴɛrɩ̃ na ʋ gↄrʼã be ka. ⁴ Ɩ̃ bibiir, nyɩ ɩ na a Naaŋmɩn ben, ɩ̃ nyɩ tʋↄ na a jir-ŋma-ƴɛr-hierbe bala, a-na-ɩ a Sɩɛ ʋlↄ na be a nyɩ pʋ̃ↄ gãw na a ʋlↄ na be ka a tẽw pʋↄ. ⁵ A bala, ba ɩ na a tẽw na nɩbɛ, ala-ɩ̃-sↄ a ba ƴɛrɩ̃sɩ ɩ a tẽw na ben, ɩ̃ a tẽw na nɩbɛ ma sↄw na a ba ƴɛrɩ̃. ⁶ A sɩmɩ, sɩ ɩ na a Naaŋmɩn ben. A ʋlↄ na bↄ̃w a Naaŋmɩn ma sↄw na a sɩ ƴɛrɩ̃, ɩ̃ a ʋlↄ na ma ɩ a Naaŋmɩn ben wa, maa sↄw a sɩ ƴɛrɩ̃ wa. A nↄhↄ̃, sɩ na tʋↄ na bↄ̃w a ʋlↄ na tɛrɛ a yel-mɩ̃ɛ Sɩɛ, nɩ a ʋlↄ na tɛrɛ a jiri sɩɛ. ⁷ Ɩ̃ badɛɛ, nyɩ́ ɩ a sɩ nʋnↄ taa, a-na-ɩ a nʋfʋ yi na a Naaŋmɩn jie. A nɩrɛ lɛ na tɛrɛ a nʋfʋ ɩ na a Naaŋmɩn bile, ɩ̃ mɩ bↄ̃w a Naaŋmɩn. ⁸ A ʋlↄ na ma tɛrɛ a nʋfʋ wa ma bↄ̃w a Naaŋmɩn wa, a-na-ɩ a Naaŋmɩn ɩ na a nʋfʋ. ⁹ Nyɛ a mɩnɛ a Naaŋmɩn na miil a ʋ nʋfʋ a sɩ jie: ʋ tʋ̃ na a ʋ Bi-daadaa ʋ wa a ka a tẽw na pʋↄ a mɩnɛ a sɩ na tʋↄ pↄw a baafʋ a ʋ ɩnɛ. ¹⁰ A nʋfʋ ɩ na: aa ɩ a sɩmɩ ɩ̃ dãa nʋ a Naaŋmɩn wa, ɩ̃-cɛ a ʋlↄ ɩ́ nʋ sɩ, ɩ̃ tʋ̃ a ʋ Bie ʋ wa ɩ a baar-lo-bom a sɩ maal-faar ir-barfʋ ɩnɛ. ¹¹ Ɩ̃ badɛɛ, a ala ɩ a Naaŋmɩn nʋ sɩ na a nↄhↄ̃, a sɛw na a sɩmɩ mɩ, sɩ mɩ nʋnↄ taa. ¹² Nɩrɛ ma dãa nyɛ a Naaŋmɩn wa. A ala ɩ sɩ nʋnↄ na taa, Naaŋmɩn be na a sɩ pʋ̃ↄ, ɩ̃ a ʋ nʋfʋ na be a sɩ pʋ̃ↄ ma ɓↄrↄ sɩ wa. ¹³ Sɩ bↄ̃w na ka sɩ be na a ʋ pʋ̃ↄ, ɩ̃ ʋ mɩ be a sɩ pʋ̃ↄ, a-na-ɩ ʋ po sɩ na a ʋ Sɩɛ. ¹⁴ Ɩ̃ sɩ nyɛ na ɩ̃ mɩ mana kʋrↄ a nɩbɛ, áa Sãa tʋ̃ na a ʋ Bie ʋ na ɩ a tẽw nɩbɛ ba jaa Fafaara. ¹⁵ A nɩrɛ lɛ na cã yel áa Jeeju ɩ na a Naaŋmɩn Bie, Naaŋmɩn be na a ʋ pʋ̃ↄ, ɩ̃ ʋ mɩ be a Naaŋmɩn pʋ̃ↄ. ¹⁶ Sɩ bↄ̃w na a nʋfʋ ʋlↄ a Naaŋmɩn na tɛrɛ nɩ sɩ, ɩ̃ mɩ sↄw de ʋ. A Naaŋmɩn ɩ na nʋfʋ. A ʋlↄ na ɩraa a nʋfʋ pʋↄ be na a Naaŋmɩn pʋ̃ↄ, ɩ̃ a Naaŋmɩn mɩ be a ʋ pʋ̃ↄ. ¹⁷ A ala ɩ a nʋfʋ ma ɓↄr a sɩ pʋ̃ↄ wa, sɩ na barʼã nyãa a ƴɛrɩ̃ guorfʋ bibir, a-na-ɩ a mɩnɛ a Jeeju-Kirisi na be, lɛ sɩ mɩ be a ka a tẽw na pʋↄ. ¹⁸ A nʋfʋ ma tɛrɛ dãbɩ̃ɛ wa. A nʋfʋ ʋlↄ na ɩ a cɛcɛ ma diw na a dãbɩ̃ɛ bar. A ʋlↄ na jↄrↄ a dãbɩ̃ɛ, a ʋ nʋfʋ ɓↄrʼã, a-na-ɩ a dãbɩ̃ɛ ma miile na a kpãafʋ na waara. ¹⁹ Sɩ tɛrɛ na a nʋfʋ, a-na-ɩ a Naaŋmɩn de na nĩe nʋ sɩ. ²⁰ A ala ɩ a nɩrɛ yelʼã: “Ɩ̃ nʋnↄ na a Naaŋmɩn,” ɩ̃ Ꞌlaar a ʋ yɛbɛ, jir-ŋmara ʋ ɩ. A-na-ɩ a ʋlↄ na ma nʋnↄ a ʋ yɛbɛ ʋ na nyɛ wa, Ꞌwaa tʋↄrↄ nʋnↄ a Naaŋmɩn ʋ na ma nyɛ wa. ²¹ A ƴɛr-kpɛ̃w ʋlↄ a Kirisi na kʋ sɩ ɩ na, áa ʋlↄ na nʋnↄ a Naaŋmɩn sɛw na ʋ mɩ nʋnↄ a ʋ yɛbɛ.

¹ A nɩrɛ lɛ na sↄw bↄ̃w ka a Jeeju ɩ na a Kirisi, ɩ na a Naaŋmɩn bile, ɩ̃ a ʋlↄ na nʋnↄ a sãa mɩ nʋnↄ na a ʋ bie. ² Nyɛ a mɩnɛ sɩ na bↄ̃w ka sɩ nʋnↄ na a Naaŋmɩn bibiir: a ɩ na a mɩnɛ sɩ na nʋnↄ a Naaŋmɩn, ɩ̃ mɩ jↄrↄ a ʋ ƴɛr-kpɛn. ³ A-na-ɩ a nʋfʋ ʋlↄ sɩ na tɛrɛ nɩ a Naaŋmɩn ɩ na a sɩ na jↄrↄ a ʋ ƴɛr-kpɛn. Ɩ̃ a ʋ ƴɛr-kpɛn ma nyɩrɩ̃ kpɛmɛ sɩ a jↄfʋ wa, ⁴ a-na-ɩ a ʋlↄ a Naaŋmɩn na dↄw tɛrɛ na a tʋↄfʋ a tẽw na ɩnɛ. Ɩ̃ a tʋↄfʋ ʋlↄ sɩ na tʋↄ nɩ a tẽw yi na a sɩ ƴↄ̃w-nyãa pʋↄ. ⁵ Ala ɩ a ʋlↄ na tʋↄ a tẽw? A ʋlↄ tɛw na tɛrɛ a ƴↄ̃w-nyãa, bↄ̃w ka a Jeeju ɩ na a Naaŋmɩn Bie ʋ. ⁶ A Jeeju-Kirisi ɩ na a ʋlↄ na dãa wa. Ɩ̃ a mɩnɛ ʋ na wa, ba mʋr ʋ na a kʋ̃ↄmɩ, ɩ̃ a ʋ jɩ̃ɩ mɩ deer. Aa ɩ a kʋ̃ↄ tɛw ʋ wa nɩ wa, ɩ̃-cɛ a kʋ̃ↄ nɩ a jɩ̃ɩ jaa ʋ. Ɩ̃ a Naaŋmɩn Sɩɛ mana na a ala ɩ na yel-mɩ̃ɛ, a-na-ɩ a Naaŋmɩn Sɩɛ ɩ na a yel-mɩ̃ɛ. ⁷ A yel-mɩ̃ɛ manfʋ ɩ na jiir ata: ⁸ a Naaŋmɩn Sɩɛ, a kʋ̃ↄ, nɩ a jɩ̃ɩ, ɩ̃ a jaa ata tɛrɛ na nↄ-bõ-ƴen. ⁹ Sɩ ma sↄw na a nɩrɛ yel-mɩ̃ɛ manfʋ, ɩ̃-cɛ a Naaŋmɩn yel-mɩ̃ɛ manfʋ gãw na a lɛ, a-na-ɩ a ɩ na a Naaŋmɩn yel-mɩ̃ɛ manfʋ ʋlↄ ʋ na dãa man a ʋ Bie ɩnɛ. ¹⁰ A ʋlↄ na sↄw de a Naaŋmɩn Bie tɛrɛ na a ʋna yel-mɩ̃ɛ manfʋ a ʋ suur pʋↄ. Ɩ̃ a ʋlↄ na jaar, de na a Naaŋmɩn ʋ ɩ jir-ŋmara, a-na-ɩ Ꞌwaa sↄw a ʋna yel-mɩ̃ɛ manfʋ a Naaŋmɩn na man a ʋ Bie ɩnɛ wa. ¹¹ Nyɛ a ʋna yel-mɩ̃ɛ manfʋ. A Naaŋmɩn kʋ sɩ na a baa-kↄ̃-tɛw, ɩ̃ a ʋna baafʋ be na a ʋ Bie pʋↄ. ¹² A ʋlↄ na tɛrɛ a Bie mɩ tɛrɛ na a ʋna baafʋ; ɩ̃ a ʋlↄ na ma tɛrɛ a Naaŋmɩn Bie wa, ma tɛrɛ a ʋna baafʋ wa. ¹³ Ɩ̃ sɛbʼã a yele asɩmɛ kʋ a nyɩmɩ na ƴↄ̃w a Naaŋmɩn Bie a nyãa tɩɛrɛ nɩ ʋ, a nyɩ na tʋↄ bↄ̃w ka nyɩ tɛrɛ na a baa-kↄ̃-tɛw. ¹⁴ Sɩ barʼã nyãa a Naaŋmɩn nii-sↄw, a-na-ɩ sɩ bↄ̃w ka a sɩmɩ sʋↄr a bom lɛ tu nɩ a ʋ pʋ-tɩɛrʋ̃, ʋ na cɛl sɩ na, ¹⁵ ɩ̃ a ala ɩ sɩ bↄ̃w ka ʋ ma cɛlɛ na a sɩ sʋↄrfʋ a jaa, sɩ mɩ bↄ̃w na ka sɩ pↄw na a yele ala sɩ na sʋↄr. ¹⁶ A ala ɩ a nɩrɛ nyɛ na a ʋ yɛbɛ ʋ maala a maal-fãa kãw na ma cere nɩ ʋ a kũu pʋↄ wa, ú sʋↄr Naaŋmɩn ɩ̃ a Naaŋmɩn na kʋ ʋ na a baafʋ. A nanɩ ɩ na a bala tɛw maal-faar na ma cere nɩ ba a kũu pʋↄ wa. A-na-ɩ maal-fãa kãw be na be na cere nɩ a nɩrɛ a kũu pʋↄ, ɩ̃ maa yel á nyɩ sʋↄr Naaŋmɩn a ala ɩnɛ wa. ¹⁷ A burbur a jaa ɩ na maal-fãa, ɩ̃-cɛ a maal-fãa kãw be na be na ma cere nɩ a nɩrɛ a kũu pʋↄ wa. ¹⁸ Sɩ bↄ̃w ka a ʋlↄ a Naaŋmɩn na dↄw maa cãa cere a maal-fãa pʋↄ wa, a-na-ɩ a Naaŋmɩn Bie gu ʋ na, ɩ̃ a Fãa Sʋbↄ ma tʋↄrↄ maala ʋ bom wa. ¹⁹ Sɩ bↄ̃w ka sɩ ɩ na a Naaŋmɩn ben, ɩ̃ a tẽw na nɩbɛ ba jaa be na a Fãa Sʋbↄ nuumɩ. ²⁰ Sɩ mɩ bↄ̃w na ka a Naaŋmɩn Bie wa na kʋ sɩ a bↄ̃wfʋ, a sɩ na tʋↄ bↄ̃w nɩ a ʋlↄ na ɩ a Yel-mɩ̃ɛ Sʋbↄ. Sɩ be na a Yel-mɩ̃ɛ Sʋbↄ pʋ̃ↄ, a mɩnɛ sɩ na be a ʋ Bie Jeeju-Kirisi pʋ̃ↄ. A ʋlↄ ɩ a Yel-mɩ̃ɛ Naaŋmɩn nɩ a baa-kↄ̃-tɛw. ²¹ Ɩ̃ bibiir, nyɩ́ tɛrɛ nyɩ mɩ̃ɛ a naaŋmɩn-kpansɩ jie!