Akugu ꞌBa Pɔlo Zi
TITO
11Ma Pɔlo mugu waraga nime zïyï Tito. Ma bɔ ndɔbɔ ꞌba Bɔkoꞌba gbï bɔ laja ꞌba Yësu Kurïsïtö. Bo Bɔkoꞌba iꞌdi ma ꞌdeni toꞌdɔ ndɔbɔ abo nime ꞌdɔ tokɔnyi ya ame ga bo kigeli ꞌdeni ne ꞌdɔ kiꞌdi dönnï gɔ lende kodɔrɔ abo, kina gbï tikali loma ame bo Bɔkoꞌba koꞌdɔkɔ zïnnï ne. 2Mëdï moꞌdɔ römöyï ma ꞌdeni ti kɔmɔ kiꞌdi gɔ dïdï ma ŋburuŋburu ma bo këdï kiꞌdi zize. Bo Bɔkoꞌba oꞌdɔ bëtï dë, bo iya ꞌdeni mɔlo di bi tisaki mo ꞌdɔ tiꞌdi dïdï ma ŋburuŋburu zi bilaka abo ga. 3Kina ame na ꞌdeni rɔ kada ma laka mo, bo ileme lende ꞌba dïdï abo tönë ꞌdeni zize. Lende ꞌba dïdï nime Bɔkoꞌba bɔ tɔmɔ ze di mï tölë iꞌdi ꞌdeni zö, kose gɔmo ꞌdɔ muwöwö zi bilaka ma laki.
4Nï Tito na rɔ kole ꞌba gbagba ma mï tiꞌdi dɔ gɔ lende ꞌba Yësu Kurïsïtö. ꞌBu ze Bɔkoꞌba ti Yësu Kurïsïtö bɔ tɔmɔ ze di mï tölë koꞌdɔ yëyï döyï kiꞌdi lende këyï koloma tïyï.
Tito Bɔ Laja Mï Dɔyayi ꞌBa Kurëtë
5Mola yi mï Kurëtë ꞌdɔ kileŋo gɔ ndɔbɔ ꞌba kanisa laka kina gbï ꞌdɔ kiꞌdi löbu ꞌba dɔ kanisa mï dɔliŋɔ mo ga pili. Kina kɔzɔ ma mose zïyï tikali mo laka gɔ lende ꞌba tiꞌdi löbu ꞌba dɔ kanisa. 6Löbu ꞌba dɔ kanisa ꞌdɔ këdï rɔ bilaka ame kinza bi ŋgɔrɔ ꞌba lende mɔtɔ rɔmo. Kina ꞌdɔ bo këdï gbï ŋge ti ꞌja kɔtɔ, rɔ bɔ ame kole abo ga kuwö dɔ bo laka kiꞌdi dönnï gɔ lende ꞌba Yësu Kurïsïtö, tine gbï kinza wa mɔtɔ ame ꞌdɔ bilaka kususu lïjë timo mï loma ꞌbënnï ne. 7Löbu ꞌba dɔ kanisa ꞌdɔ këdï rɔ bɔ ame kinza bi ŋgɔrɔ mɔtɔ rɔmo ne römöyï bo na rɔ bɔ koŋgɔ gɔ bilaka ꞌba Bɔkoꞌba. Kina ꞌdɔ bo këdï rɔ bilaka ame kinza rɔ bɔ toꞌdɔ mï löbu, rɔ bɔ tënyï welo rɔ ꞌdïrï. Kina kinza bo kinza gbï rɔ bɔ layi, rɔ bɔ koꞌdɔ ya ala gbï rɔ bɔ toꞌja yamo ti kɔri ma kënyë. 8Tine ꞌdɔ bo këdï rɔ bɔ koꞌdɔ ŋba, koꞌdɔkɔ ŋge rɔ lende ma laka. Bo këdï rɔ bɔ ma koꞌdɔ lende dë rɔ dɔ rumö, tine rɔ bɔ togbɔ dɔ yida rɔ bo ŋge toꞌdɔ lende laka ame Bɔkoꞌba koꞌdɔkɔ ne. 9Kina ꞌdɔ bo këdï rɔ bɔ ame kindaꞌba laja laka ꞌba Bɔkoꞌba kɔzɔ ma miyandi yi timo. Kɔri nime na ti kiꞌdi bo ŋgï kɔꞌbɔ tocɔ bilaka ꞌba kanisa ti akiyandi ma kodɔrɔ kina ti lende abo kodowe dɔkɔnyɔ ya ma kinza koꞌdɔkɔ lende ꞌba Bɔkoꞌba dë naga nima ŋgï.
10Löbu ꞌba dɔ kanisa na ꞌdɔ këdï kɔzɔ a nime te, römöyï ma konzi mɔtɔ ga uwö dɔ lende ꞌba Bɔkoꞌba dë, ŋgï rɔ bɔ ꞌbölu bɔ lende yawa. Bɔ ꞌbölu naga nime ma konzi mo ga di mï Yudayi. 11Lïjë iꞌdi kpa gɔli ma konzi mɔtɔ ga ꞌdeni kɔcɔ yaga di mï kɔri ꞌba lende ꞌba Bɔkoꞌba. Tine zïyï ꞌdɔ koboso kpa akiyandi kënyë ꞌbënnï nima kɔrɔ yaga, ame lïjë këdï koꞌdɔ ŋge toꞌja yamo timo ne. 12Römöyï bɔ ꞌbɔsi ꞌbënnï mɔtɔ ꞌba Kurëtë iya ꞌdeni tönë te, “Bilaka ꞌba Kurëtë lïjë ŋgï rɔ bɔ bëtï, bɔ kpa gbörö, bɔ tïkëpï rɔ kuruku ma kënyë.” 13Lende nime ëdï rɔ ma laka, kina miya zïyï ꞌdɔ kilende zïnnï rɔ ma kitigɔ ꞌdɔ lïjë köꞌbö tiꞌdi dönnï gɔ lende ꞌba Bɔkoꞌba, kinza lïjë koga kpënnï dë gɔmo. 14Tine kinza lïjë kiꞌdi dönnï dë gbï gɔ lende yawa ꞌba Yudayi naga nima. Kina kinza lïjë kuwö dɔ köꞌdu kiꞌdi ꞌba bɔ kilagi lende kodɔrɔ ꞌba Bɔkoꞌba naga nima dë.
15Lende ma rɔ dömöyï bilaka naga nima na me. Bɔ ame ꞌdeni rɔ ma kɔpɔ kɔmɔ Bɔkoꞌba, wa mɔtɔ ꞌba dɔliŋɔ nime inza kpe ma ꞌdɔ kiꞌdi bo rɔ tiꞌda di kɔmɔ Bɔkoꞌba. Tine ya ma kinza kiꞌdi dönnï dë gɔ lende abo naga nima ꞌdeni pili rɔ tiꞌda di kɔmɔ bo. Lende ꞌbënnï ga ꞌdeni kpaki rɔ tiꞌda kina dönnï irasi rönï ꞌdeni lïjë ikali lende ma laka dë kpe. 16Lïjë idewo rönnï rɔ bɔ tikali Bɔkoꞌba tine ndɔbɔ ꞌbënnï ga ileme ŋgï lïjë ikali bo Bɔkoꞌba dë du te. Lïjë uwö dɔ Bɔkoꞌba dë tine lïjë ebe gbï toꞌdɔ wa ma bo koꞌji naga. Kina ŋgï lïjë ɔꞌbɔ dë kpe toꞌdɔ wa mɔtɔ rɔ ma laka.
2Akiyandi Ma Laka
1Tine nï ꞌbëyï iyandi lïjë toꞌdɔ wa ame kutï dönï ti akiyandi laka ꞌba Bɔkoꞌba nime ne. 2Ilende zi bilaka ꞌba kanisa ame ga rɔ bulöbu ne ꞌdɔ lïjë kogbɔ dɔ yida rönnï, koꞌdɔ a ma kodɔrɔ tine dë toꞌdɔ wa ma rɔ dɔ rumö. Kina ꞌdɔ lïjë kiꞌdi dönnï gɔ lende ꞌba Bɔkoꞌba ti dökïꞌdï kɔtɔ gbï tɔꞌɔ bilaka kina tombi gomɔ kinza tola gɔmo.
3-4Kina ꞌdɔ kilende gbï zi ꞌja löbu mo ga, lïjë ꞌba Bɔkoꞌba na, loma ꞌbënnï köꞌbö rɔ ma laka. Kinza lïjë köꞌbö dë rɔ bɔ kore ala rɔ atɔli ꞌba layi. Tine zïnnï tiyandi ꞌja titi ti lende laka tɔꞌɔ mëꞌdë nnï gbï ti kole ꞌbënnï ga. 5Kina ꞌdɔ lïjë ꞌja titi kogbɔ dɔ yida rönnï ti kinza toꞌdɔ yërï. Gɔ lïjë koꞌdɔ ndɔbɔ ꞌba dɔ liŋɔ ꞌbënnï ga na rɔ ma laka ti mï këyï gbï ti tuwö dɔ mëꞌdë nnï ga. Ame na ŋgï ti kiꞌdi bilaka kitiꞌja lende ꞌba Bɔkoꞌba dë kpe.
6Kina ilende gbï zi yɔbi mo ga togbɔ dɔ yida rönnï ga laka. 7Tine nï ꞌbëyï ꞌdɔ köꞌbö rɔ bɔ kileme lende laka mï akoꞌdɔ ꞌbï pili. Akiyandi ꞌbï iꞌdi këdï kinza ꞌbölu kina gbï kinza lende yawa yïmo. 8Mï akiyandi pili öꞌbö ti lende laka ame kinza bilaka koꞌja bi ŋgɔrɔ mɔtɔ ꞌdɔ kususu yi timo. ꞌDɔ bɔ kilagi lende ze naga nima rɔmo kaya ŋgï kikali dë kpe tiya a ma kënyë mɔtɔ ti möyï ze.
9Kina ꞌdɔ kilende gbï zi bilaka ꞌba kanisa ame ga rɔ bɔ ndɔbɔ zi ya mɔtɔ ga ne. Kina laka ꞌdɔ lïjë kuwö dɔ bɔ dönnï ga gbï toꞌdɔ akoꞌdɔkɔ mo ga pili kinza lende mɔtɔ teyi. 10Kina kinza lïjë koꞌbali wa mo ga dë gbï. Tine ꞌdɔ lïjë koꞌdɔ wa ame ga gɔ kileme lïjë rɔ bilaka laka zi bɔ dönnï ga mï ndɔbɔ koꞌdɔ ꞌbënnï ne. Kina ti kileme ŋgï akiyandi ꞌba Bɔkoꞌba bɔ tɔmɔ ze di mï tölë nime ëdï rɔ lende laka.
11Miya te römöyï Bɔkoꞌba iꞌdi lende këyï abo ꞌdeni zi bilaka pili koyi bi kɔzɔ bi kɔpɔ tara. Römöyï ti lende këyï abo na me bo kɔmɔ dɔkomali bilaka lesi ꞌdeni pili di mï tölë. 12Bo ose ꞌdeni zize ꞌdɔ dodɔke rɔze ti bërï di mï akoꞌdɔ ti akoꞌdɔkɔ ꞌba dɔliŋɔ nime. Tine zize toloma mï dɔliŋɔ nime togbɔ dɔ yida rɔze. Kina gbï ꞌdɔ doꞌdɔke lende laka toro Bɔkoꞌba. 13Römöyï dëdïke ꞌdeni ti kɔmɔ kiꞌdi ti bi koda gɔ kada laka ame ꞌdɔ Yësu Kurïsïtö kileme rɔ bo rɔ löbu ꞌba dɔ wa pili ne. Bo na rɔ Bɔkoꞌba ze ame rɔ dɔ kiteli, bo kɔmɔ ze ꞌdeni yaga di mï tölë ne. 14Bo ölë ꞌdeni tutë gɔze di mï lende kënyë pili tiꞌdi ze rɔ ma kɔpɔ rɔ ꞌba gbagba bo ga ŋge tönyö gɔ lende koꞌdɔ laka.
15Oto ndose naga nime zi bilaka ꞌba kanisa. Römöyï Bɔkoꞌba iꞌdi közï kakpa ꞌdeni zïyï tocɔ lïjë mï lende laka tamo dönnï gɔ lende kënyë. Tine nï kinza kiꞌdi bɔtɔ mɔtɔ kudölï yi dë.
3Loma ꞌBa Bilaka ꞌBa Kanisa
1Iya zi bilaka ꞌba kanisa kinza lïjë kola gɔ tuwö dɔ turu ni ti ya ma ti közï kakpa naga dë. Ma laka mo na ꞌdɔ lïjë koro ya naga nime. Kina ꞌdɔ lïjë köꞌbö ŋburu ndö toꞌdɔ a ma laka ame ga këdï kiya zïnnï toꞌdɔ mo ne. 2Kinza lïjë kitiꞌja bɔtɔ dë, koꞌdɔ ꞌdïrï dë gbï. Tine ꞌdɔ lïjë kokɔnyi bilaka pili gbï toloma ti kɔmɔ kele.
3Römöyï pa mɔlo bine gba kinza dëdïke rɔ ꞌba Kurïsïtö dolomake ꞌdeni toꞌdɔ lende dɔ rumö doroke bilaka dë kina doꞌdɔke lende laka ɔtɔ dë gbï yɔ. Döꞌböke eze ŋge toꞌdɔ dɔkomali wa ame ga rɔ akoꞌdɔkɔ ꞌba yida rɔze ga ne. Dolomake ꞌdeni bine rɔ bɔ koꞌdɔ lende kënyë, ti mï kombi. Bilaka oꞌji ze, kina ze gbï tara doꞌjike bilaka. 4Tine kina me Bɔkoꞌba kileme akɔꞌɔ abo ꞌdeni gbï ti yëyï mo ame ꞌdɔ bo kɔmɔ ze di mï tölë. 5Bo oꞌdɔ ꞌdeni gɔ mï këyï abo tine inza du te gɔ lende koꞌdɔ laka ze ga. Nyï Kɔtɔ Laka abo urögö ze ꞌdeni rɔ ma kɔpɔ yaga di mï lende kënyë ze ga kiꞌdi ze ꞌdeni tëdï rɔ wa laꞌja. 6Bo iꞌdi Kurïsïtö kɔmɔ ze ꞌdeni yaga di mï tölë, bo koja Nyï Kɔtɔ Laka abo ꞌdeni kulöwö kako kilaꞌba dɔze. 7Lende këyï abo zize rɔ mbëmbë kina me bo kiꞌdi ze ꞌdeni ꞌdɔ dëdïke rɔ ma laka kɔmɔ bo. Gɔ köꞌdu mo na dikalike ꞌdeni ti doꞌjake dïdï ma ŋburuŋburu ŋgï rɔ apötö. 8Lende naga nime rɔ ma laka kina ꞌdɔ koto tiya mo nduwë zi bilaka ꞌba kanisa, kinza kudölu ra di dɔ ya ma kiꞌdi dönnï ꞌdeni gɔ lende ꞌba Bɔkoꞌba naga nima lïjë könyö nduwë gɔ toꞌdɔ ndɔbɔ ma laka mï loma ꞌbënnï ga ame ꞌdɔ kokɔnyi bilaka mɔtɔ ga gbï rɔ apötö.
9Tine nï ꞌbëyï kinza konyɔnyɔ röyï dë mï kowasa yawa naga nima ti lende ꞌba tïtëtë möyï bulöbu ma mɔlo naga rɔ gögö. Kina gbï kinza kodɔꞌbɔ röyï dë ti bɔ këdï kamo koꞌdɔ ꞌdïrï gɔ köꞌdu kiꞌdi ꞌba Musa naga nima. Lende naga nima pili rɔ köꞌdu yawa okɔnyi bɔtɔ dë kɔtɔ te. 10Ɔdɔ bɔ mɔtɔ këdï ame këdï kiꞌdi bilaka ꞌba kanisa koꞌdɔ lamo rɔ gɔ rönnï, ilende zi bɔ mo kola gɔ toꞌdɔ mo yaga. Ɔdɔ bo kola gɔmo dë ileki kiya gbï zi bo. Tine ɔdɔ bo köꞌbö nduwë toꞌdɔ mo kinza kodɔꞌbɔ röyï dë kpe ti bo. 11Ikali ꞌdeni, lïjë bilaka ma kɔzɔ wa naga nima tara, ölu ꞌdeni yaga di mï kɔri ꞌba Bɔkoꞌba kina akoꞌdɔ ꞌbënnï ga ileme lïjë ꞌdeni rɔ bɔ lende kënyë.
Ndose Ma Ŋburuŋburu
12Mëdï moꞌdɔ toja Arotema mɔtɔga Tukïkö kari zïyï yayi. Ɔdɔ bo kömö ꞌdeni opi röyï ndɔ kako zö Nikopoli. Römöyï mëdï moꞌdɔ tari toloma yayi mï kada ꞌba bi këyï. 13Kina ꞌdɔ kopi röyï gbï tokɔnyi Zena bɔ toweli mï burë ni lïjë ti Apolo. Ɔdɔ lïjë këdï koꞌdɔ tënyï di zïyï yayi oŋgɔ gönnï laka ꞌdɔ lïjë këdï ti wa pili ma ꞌdɔ kokɔnyi lïjë mï liŋgere nima.
14Iyandi bilaka ze ga ꞌba kanisa laka toꞌdɔ ndɔbɔ ꞌdɔ lïjë kokɔnyi ya ma këdï rɔ leri ꞌba wa. Kina gbï kinza loma ꞌbënnï këdï ra ŋgï rɔ yawa mï dɔliŋɔ nime.
15Löndö ame ga pili tö bine ne, umötö yi laka. Kina ꞌdɔ kumötö ya ama ga yayi rɔ bɔ kiꞌdi dönnï gɔ lende ꞌba Kurïsïtö kɔꞌɔ ze kulöwö ne.
Lende këyï ꞌba Bɔkoꞌba koloma tiye pili.