Yakoba

Akugu ꞌBa

YAKOBA

¹Ma Yakoba bɔ koja laja ꞌba Bɔkoꞌba kina gbï ꞌba ŋere Yësu Kurïsïtö, mumötö ye kpe bilaka ꞌba Bɔkoꞌba ame ga kïyëyïke rɔye ꞌdeni mï dɔliŋɔ nime pili ne.

Gomɔ Ti Akiyari

²Löndö ma ga, ɔdɔ akiyari ꞌba gomɔ ma gege mɔtɔ ga koꞌja ye olomake rɔ lɔŋɔ rɔ mbëmbë gɔ lende mo. ³Miya ziye, ɔdɔ konyake dɔ gomɔ mo naga nima ꞌdeni ti tiꞌdi dɔye ŋgï rɔ ma laka gɔ lende ꞌba Yësu ti köꞌböke ꞌdeni ŋgï nduwë di pötö mo rɔ bɔ mï këddï. ⁴Öꞌböke nduwë ti mï këddï kinza kogake kpeye ra gɔ lende nime ꞌdɔ këddïke rɔ bilaka ma laka zi Bɔkoꞌba kinza a ma kënyë mɔtɔ këdï ra mïye.

⁵Ne ɔdɔ kiya te nï bɔ mɔtɔ këddï rɔ lisa ꞌba akikali, ititi Bɔkoꞌba, kina bo ti kiꞌdi yi ꞌdeni ŋgï kikali wa. Römöyï Bɔkoꞌba na rɔ bɔ kiꞌdi wa rɔ ma sari zi bilaka kinza dɔ kose teyi. ⁶Kina ɔdɔ kiya te kititi Bɔkoꞌba gɔ wa mɔtɔ, zïyï tiꞌdi döyï gɔmo rɔ ma laka Bɔkoꞌba ëdï kiꞌdi ŋgï zïyï. Kina kinza kiꞌdi lende mo dë kïlïkö döyï. Bilaka ame këdï kiꞌdi lende nime kïlïkö dönï ne bo ëdï ꞌba bo kɔzɔ surupu ꞌba dɔ mini löbu ame lili këdï kome nduwë kilaki timo ne tara. ^7-8Bo inza ti meri ma kodɔrɔ mï bo kina ma kiꞌdi bo köꞌbö ŋgï nduwë tuyï kɔri abo ne. Kina ꞌdɔ bo kikali ŋgï rɔ ma laka Bɔkoꞌba inza kiꞌdi wa ma kɔtɔ mɔtɔ du te zi bo.

Bɔ Lisa

⁹Kpe bilaka ꞌba Kurïsïtö ame ga rɔ lisa ne, olomake ti mï këyï römöyï ëddïke ꞌdeni rɔ wa ma mbiri di kɔmɔ Bɔkoꞌba. ¹⁰Kina gbï tara, kpe bilaka ꞌba Kurïsïtö ame ga rɔ bɔ wa ne, olomake ti mï këyï römöyï ëddïke ꞌdeni rɔ wa ma titiyi di kɔmɔ bilaka ꞌba dɔliŋɔ nime. Römöyï bɔ wa ni ti kote rönnï kada mɔtɔ ti wa ꞌbënnï ga kɔzɔ döwöru ꞌba ŋgërï ame lili këdï kome kote yaga ne tara. ¹¹Kada ɔdɔ di bërï ti tututu ꞌbënï koŋma ŋgërï ŋgï kututu yaga. Kina döwöru mo ga kilayi ŋgï me yaga tele mo kirasi rönï ŋgï. Kina gbï tara, bɔ wa ti kölë ꞌdeni gbï di dɔ wa ꞌbënï ga tara.

Mï Këddï

¹²Ne ɔdɔ nï bɔ mɔtɔ kiꞌdi mïyï ŋgï këddï zi gomɔ, koloma kinza koga kpëyï dë gɔ lende ꞌba Yësu, Bɔkoꞌba ti koꞌdɔ yëyï ma laka ꞌdeni ŋgï döyï ti dïdï ma ŋburuŋburu. Kɔzɔ ame bo Bɔkoꞌba bo kiya ꞌdeni mɔlo tiꞌdi dïdï ma ŋburuŋburu zi ya ame ga kɔꞌɔ bo ne tara.

¹³Ne ɔdɔ nï bɔ mɔtɔ gomɔ këdï ꞌdeni koꞌdɔ yi, kinza kiya dë te, “Bɔkoꞌba na me ꞌdeni këdï kiꞌdi gomɔ nime koꞌdɔ ma ꞌdɔ mari moꞌdɔ lende kënyë.” Inza du tara, wa mɔtɔ inza ame ꞌdɔ kiꞌdi Bɔkoꞌba koꞌdɔ lende kënyë, kina bo iꞌdi gomɔ dë gbï koꞌdɔ bilaka ꞌdɔ kiꞌdi lïjë kari toꞌdɔ lende kënyë. ¹⁴Meri kënyë ꞌbënnï ꞌba bilaka lesi na kïndëndë lïjë ꞌdeni kindaꞌba lïjë, kina ma kiꞌdi lïjë koꞌdɔkɔ ŋgï rɔ toꞌdɔ lende kënyë. ¹⁵Kina meri kënyë ꞌbënnï ga kënyï kɔmɔ ŋgï köyö rɔ lende kënyë. Kina ɔdɔ lende kënyë nima kulu rönï ꞌdeni na köyö ꞌbënï ŋgï rɔ tölë.

¹⁶Kpe löndö ma mɔꞌɔ kulöwö naga nime, kinza kïlïköke dɔye dë. ¹⁷Wa ame ga pili Bɔkoꞌba këdï kiꞌdi zize ne kina ꞌdo rɔ wa ma laka kina gbï ŋge rɔ wa ma kele. Bo na me koꞌba kada ni, ti nyepe ni gbï ti këlu ꞌba mïtɔrɔ. Ne bo öꞌbö dë tiyese rɔ bo yaga kɔzɔ ꞌba kada ame këdï kiyese rönï yaga ꞌdɔ kiꞌdi gɔ bi këdï kölu dɔyayi nime ne tara, kina bo uyï rɔ bo dë gbï. ¹⁸Bo oꞌdɔkɔ ze ꞌdɔ dëdïke rɔ wa ma kele rɔ dɔ kiteli di mï löŋgö wa pili ame ga bo koꞌba dɔliŋɔ nime bine ne, kina me bo kuwöwö lende kodɔrɔ abo ꞌdeni zize ꞌdɔ kiꞌdi ze dïdïdïke yaga rɔ ma lölöwö.

Mbili Ni Ti Kpa

¹⁹Kpe löndö ma mɔꞌɔ kulöwö naga nime, ziye tikali lende naga nime laka. Iꞌdike mbili ye kapa tuwö lende ne tine, iꞌdike kpeye këdï rɔ ma kïrïndï di bi tiya mo. Kina kinza kënyïke dë gbï welo rɔ ꞌdïrï ti bilaka mɔtɔ, ²⁰römöyï bilaka ame ꞌdeni rɔ ꞌdïrï ne inza kikali toꞌdɔ wa ma laka ame ga Bɔkoꞌba koꞌdɔkɔ ne. ²¹Olake gɔ lende kënyë pili, kinza koꞌdɔke mï kombi dë kpe. Ojeke mbili ye laka gɔ lende ꞌba Bɔkoꞌba. Bo iꞌdi lende naga nima ꞌdeni mïye ꞌdɔ kiꞌdi tigɔ ziye ꞌdɔ kɔmɔ ye di mï tölë.

^22-23Ne kinza köꞌböke dë tuwö lende ꞌba Bɔkoꞌba ŋge rɔ tuwö, ziye gbï ꞌdɔ tari toꞌdɔ mo. Bɔ ame këdï kuwö ꞌbënï lende ꞌba Bɔkoꞌba ŋge ti mbili nï kinza bo koꞌdɔ dë ne, bo ëdï ꞌba bo ka kuꞌbölu rɔ bo rɔ tuꞌbölu. Bo ëdï ꞌba bo kɔzɔ bilaka ame këdï koŋgɔ rönï di mï mandara ne tara. ²⁴Bo oŋgɔ rɔ bo laka di mï mandara ne ɔdɔ bo kari ꞌdeni mbowa yaga kïnë bo tönë udölu ŋgï yaga di dɔ bo. ²⁵Ne bɔ ame kindaꞌba köꞌdu kiꞌdi ꞌba Bɔkoꞌba koꞌdɔ kiꞌdi kinza kudölu di dɔ bo ne, bo na ti këdï ti yëyï ma laka mï akoꞌdɔ abo, römöyï köꞌdu kiꞌdi ꞌba Bɔkoꞌba na pili rɔ ma laka kiꞌdi ze gbï dëdïke rɔ dɔ ŋgölö.

²⁶Nï bɔ mɔtɔ ma di zïyï iya te nï bɔ koꞌdɔ mötu na? Ne ɔdɔ kiya te kogbɔ dɔ dɔndeꞌde yï dë bërï di bi tiya lende, ëddï ëꞌbï ka kuꞌbölu röyï rɔ tuꞌbölu. Kina mötu koꞌdɔ ꞌbï naga nima ëdï ka ŋgï rɔ wa sari zi Bɔkoꞌba. ²⁷Römöyï mötu ma laka ame ꞌbu ze Bɔkoꞌba koꞌdɔkɔ di zize ne, kina rɔ tokɔnyi kiriꞌbala ni ti makuruꞌbë ame ga rɔ lisa ne di mï gomɔ ꞌbënnï ga, kina gbï ꞌdɔ doŋgɔke rɔze laka di zi lende konya ꞌba dɔliŋɔ naga nime.

Kɔmɔ Geli

¹Kpe löndö ma ga ame kiꞌdike dɔye ꞌdeni gɔ lende ꞌba ŋere ze Yësu Kurïsïtö löbu ꞌba dɔ wa pili ne, kinza koꞌdɔke kɔmɔ geli dë zi bilaka. ²Ɔdɔ kiya te bilaka ma rïyö mɔtɔ ga kako mï bi ꞌba mötu ꞌbe, bɔ mɔtɔ rɔ bɔ wa ti bɔŋgɔ ma kele rönï ti wa ꞌba dɔkole közï ma kele, kina bɔ mɔtɔ ꞌbënï rɔ bɔ lisa ti bɔŋgɔ ŋgɔrɔ rönï kako gbï, kinza koꞌdɔke geli dë mï löŋgö lïjë. ³Ne ɔdɔ kiya te bɔ ama ti bɔŋgɔ ma kele rönï ne na kënyïke ŋge kumötöke rɔ ma laka kiyake teyi, kiya te, “Ako koloma dɔ kïtï ma laka nime bine.” Kina kebe kënyï kuyïke kɔmɔye dɔ bɔ ma ti bɔŋgɔ ŋgɔrɔ rönï nima kiyake te, “Nï, ɔrɔ ꞌbëyï yayi, ala ako koloma bërï mï yayi bi ndïze bine.” ⁴Irasike köꞌdu ꞌdeni römöyï ebeke ꞌdeni za kozake mï bilaka ti toꞌdɔ burë ꞌba bilaka rɔ ma kënyë.

⁵Kpe löndö ma mɔꞌɔ kulöwö naga nime, uwöke lende nime laka. Bɔ lisa ꞌba dɔliŋɔ naga nime lïjë na Bɔkoꞌba koza ꞌdeni ꞌdɔ kiꞌdi dönnï gɔ lende ꞌba Yësu. Kina lïjë na ti këdï kɔzɔ bɔ wa tara kɔmɔ bo. Bo ëdï koꞌdɔ yëyï zïnnï ti wa ma laka ꞌba mïtɔrɔ kɔzɔ ame bo kiya ꞌdeni mɔlo toꞌdɔ yëyï zi ya ame ga kɔꞌɔ bo ne tara. ⁶Ne kina me kpe kebeke za ꞌböwu titiꞌja bɔ lisa. Ma kikalike ꞌbeye, yë mo ga na këdï koŋbeŋbe ye ne? Bɔ wa na dë? Bɔ wa naga nima lïjë na këdï kïtïŋï gɔye kɔmɔ kïtï ꞌba burë. ⁷Ikalike dë, lïjë na gbï tönë koloma bine rɔ tiya kpa kënyë rɔ ŋere ze Yësu Kurïsïtö ame kpe rɔ bilaka mo ga ne?

⁸Köꞌdu kiꞌdi ꞌba ŋere ze Bɔkoꞌba ame kugu mï buku abo ne, iya te, “Ɔꞌɔ lëpï yï mɔtɔ gbï kɔzɔ ame kɔꞌɔ yida röyï ne tara.” Ɔdɔ kiya te koꞌdɔke ꞌdeni ŋgï tara oꞌdɔke lende ma laka ꞌdeni. ⁹Ne ɔdɔ kebe koꞌdɔke geli ꞌdeni mï löŋgö bilaka, oꞌdɔke lende kënyë ꞌdeni kina inzake gbï kpe rɔ bɔ koro köꞌdu kiꞌdi ꞌba Bɔkoꞌba. ¹⁰Römöyï köꞌdu kiꞌdi ꞌba Bɔkoꞌba nime ɔdɔ koro ꞌdeni me kina kebe kënyï ꞌböwu kirasi ŋge rɔ ma kɔtɔ mɔtɔ, irasi lïjë nima ꞌdeni pili rɔ gɔmo. ¹¹Köꞌdu kiꞌdi ꞌba Bɔkoꞌba mɔtɔ iya ꞌdeni te, “Kinza koꞌdɔ yërï dë.” Kina mɔtɔ iya ꞌdeni gbï te, “Kinza kupö bilaka dë.” Ne ɔdɔ kiya te koꞌdɔ yërï dë pele, kina ɔdɔ kupö bilaka ꞌdeni irasi köꞌdu kiꞌdi ꞌba Bɔkoꞌba ꞌdeni kina inza kpe rɔ bɔ koro mo.

¹²Kina me miya ꞌdeni ziye, iꞌdike lende koꞌdɔ ꞌbe ga ti lende kiya ꞌbe ga köꞌbö pili rɔ ma laka. Römöyï köꞌdu kiꞌdi ꞌba Bɔkoꞌba iꞌdi ye ꞌdeni kolomake rɔ dɔ ŋgölö. Kina iꞌdike lende mo këdï dɔye, Bɔkoꞌba ëdï koꞌdɔ burë ꞌbe kada mɔtɔ ti lende naga nime. Ɔdɔ kiya te oꞌdɔke ala oꞌdɔke dë pele. ¹³Mï kada ꞌba burë mo nima yayi Bɔkoꞌba inza kiꞌdi mï bo këyï kpe rɔ bilaka ame ga koꞌdɔ mï këyï dë gbï zi lëpï nnï ga ne. Bo ti kodɔ karama ŋgï dönnï. Ne ya ame ga rɔ bɔ mï këyï ne inza koloma rɔ tikere mï kada mo nima.

Toꞌdɔ Lende Laka

¹⁴Löndö ma ga, ɔdɔ nï bɔ mɔtɔ kiya te iꞌdi döyï ꞌdeni gɔ lende ꞌba Yësu Kurïsïtö, ne ɔdɔ kiya te koꞌdɔ lende laka mo dë lende ꞌbï naga nima ëdï ka ŋgï rɔ wa sari. Kina gbï tiꞌdi döyï ŋge gɔ lende ꞌba Yësu Kurïsïtö nima inza kikali tɔmɔ yi di mï burë ꞌba Bɔkoꞌba. ¹⁵Ɔdɔ kiya te nï bɔ mɔtɔ kari koꞌja löndö yï ti lëmï yï mɔtɔ ga këdï rɔ leri ꞌba bɔŋgɔ ala ꞌba wa mɔtɔ ame gɔ lïjë konyo ne, ¹⁶kina kënyï kiya zïnnï, kiya te, “Bɔkoꞌba kiꞌdi yëyï laka abo koloma dɔye, koja gɔ akonyo ziye gɔ konyoke, kiꞌdi bɔŋgɔ ꞌba bi këyï ziye.” Ma komeri ꞌbëyï lende ꞌbï nima ti koꞌdɔ waꞌdi zi bilaka naga nima? Rɔ ma laka ɔdɔ kiya te kiꞌdi wa mo tɔ nima lïjë këdï rɔ leri mo ne dë zïnnï, lende ꞌbï naga nima inza koꞌdɔ wa mɔtɔ du te zïnnï. ¹⁷Kina gbï tara, bɔ ame këdï kiŋgele ꞌbënï ŋge kiya te bo iꞌdi dönï ꞌdeni gɔ lende ꞌba Yësu Kurïsïtö kinza bo koꞌdɔ lende laka ꞌba Bɔkoꞌba mo dë ne, lende kiya abo naga nima ëdï ka rɔ töku.

¹⁸Ɔdɔ bɔ mɔtɔ kënyï ꞌba bo kiya te, “Bɔ nime na kiꞌdi dönï ꞌdeni rɔ ma laka gɔ lende ꞌba Yësu Kurïsïtö, kina bɔ ame na rɔ bɔ koꞌdɔ lende laka ꞌba Bɔkoꞌba.” Ti mënyï mititi bɔ mo nima miya te, “Ïyëtï zö te, bilaka mɔtɔ ti kikali ꞌba bo ŋge tiꞌdi dönï gɔ lende ꞌba Yësu Kurïsïtö rɔ ma sari kinza ma bo koꞌdɔ lende laka mo totondo mo ga?” Ne ꞌbama ndɔbɔ koꞌdɔ ma na ti kileme rɔ ma laka ziye miꞌdi dɔma ꞌdeni gɔ lende ꞌba Yësu Kurïsïtö. ¹⁹Iꞌdike dɔye ꞌdeni gɔmo Bɔkoꞌba ëdï ŋge kɔtɔ. Tine ele sowa. Ne nökï ame gbï rɔ bɔ koja laja ꞌba Satani ne lïjë ikali lende nima gbï kɔzɔ wa nima tara, kina rönnï kiꞌdi ŋgï tïlëꞌdï di zi tikere gɔ köꞌdu mo.

²⁰Nï bɔ dɔ kïrïndï nime, mëdï mileme zïyï rɔ ma laka. Ɔdɔ bɔ mɔtɔ kiya te bo iꞌdi dönï ꞌdeni gɔ lende ꞌba Yësu Kurïsïtö kina ɔdɔ bo koꞌdɔ lende laka ꞌba Bɔkoꞌba dë, lende abo naga nima ëdï ka rɔ wa sari. ²¹Oŋgɔke ꞌbu ze löbu Abarayama te. Waꞌdi na kiꞌdi Bɔkoꞌba kïdëkï Abarayama rɔ bɔ lende laka? Lende koꞌdɔ laka ꞌba Abarayama ame bo kilagi dë ꞌdɔ tumu kole abo Yisika rɔ roma zi Bɔkoꞌba ne, kina ma kiꞌdi ꞌdɔ Bɔkoꞌba kïdëkï bo rɔ bɔ lende laka ne. ²²Kina doŋgɔke te, Abarayama iꞌdi dɔ bo gɔ lende ꞌba Bɔkoꞌba kina bo koꞌdɔ lende mo rɔ ma laka. Kina ndɔbɔ abo naga nime kiꞌdi bo ŋgï kikali lende ꞌba Bɔkoꞌba rɔ ma laka. ²³Lende nime oꞌdɔ rönï ꞌdeni kɔzɔ lende ma tönë kugu mɔlo mï buku ꞌba Bɔkoꞌba kiya te, “Abarayama iꞌdi dɔ bo ꞌdeni gɔ lende ꞌba Bɔkoꞌba kina me kiꞌdi Bɔkoꞌba kïdëkï Abarayama rɔ bɔ lende laka ne.” Kina ma ꞌdɔ kiya te Abarayama rɔ bɔ pɔri ma laka ꞌba Bɔkoꞌba ne.

²⁴Kina me dikalike ꞌdeni lende koꞌdɔ laka ꞌba bilaka na këdï kiꞌdi Bɔkoꞌba kïdëkï lïjë rɔ bɔ lende laka. Inza ŋge gɔ lende ꞌba tiꞌdi dönnï gɔ lende abo. ²⁵Kina gbï kɔzɔ lende ꞌba Raba ma tönë rɔ ꞌja bɔ rɔnyɔ mï kada ꞌba ꞌbu ze löbu ga bine ne tara. Bɔkoꞌba ïdëkï lɔko ꞌdeni rɔ bɔ lende laka gɔ lende laka ꞌbënï ame lɔko koꞌdɔ zi bɔ kore ze ga ꞌba Yisarele ame koja kari bi toŋgɔ mï dɔliŋɔ ꞌbënnï ne, ame lɔko kota lïjë koloma liŋɔ ꞌbënï kina lɔko kokɔnyi lïjë kiꞌdi kiriŋa kebe gɔ kɔri mɔtɔ ne. ²⁶Kina gbï tara bɔ ame kiya te bo iꞌdi dönï ꞌdeni gɔ lende ꞌba Yësu Kurïsïtö rɔ ma sari kinza bo koꞌdɔ lende laka ꞌba Bɔkoꞌba dë ne, lende abo nima ëdï ka rɔ töku kɔzɔ yida rɔ ame ꞌdeni kinza dïdï yïmo ne tara.

Dɔndeꞌde

¹Löndö ma ga, kinza bilaka ma konzi ꞌbeye mɔtɔ ga koloma dë me rɔ bɔ kɔmɔ kiyandi ꞌba lende ꞌba Bɔkoꞌba. Römöyï dikalike ꞌdeni ze ame ga rɔ bɔ kɔmɔ kiyandi ne, ze na Bɔkoꞌba këdï kodɔrɔ bïcï lende rɔze rɔ dɔ kiteli di dɔ ꞌba ya ma laki pili. ²Ze bilaka lesi pili dirasike lende ma konya. Ne ɔdɔ bɔ mɔtɔ kirasi lende ma kɔtɔ mɔtɔ dë ti tiya lende ma kënyë, bo na rɔ ma laka rɔ ma kɔpɔ, kina bo na gbï ti kikali togbɔ dɔ yida rɔ bo ga pili bërï.

³Doŋgɔke kosani te, ze bilaka lesi diꞌdike yamo kpamo kina dosike kabi yɔki mo ꞌdɔ kiꞌdi kuwö dɔze, ame ꞌdɔ dikalike tuyï kpamo gɔ kɔri ame ga dëdï doꞌdɔkɔke tari teyi ne. ⁴Kina doŋgɔke lende ꞌba sorope ame ga këdï kiliŋgere kebe dɔ mini löbu ne gbï te. Sorope naga nima ïyöbu ꞌbënnï ŋgï rɔ dɔ kiteli ame lili ma kembe na ŋge këdï kïtïŋï gɔmo ꞌdɔ kari. Ne bilaka ebe tuyï kpamo ti ŋgërï ma titiyi kari gɔ kɔri ame lïjë këdï koꞌdɔkɔ tari teyi ne. ⁵Dɔndeꞌde ze bilaka lesi nime na gbï tara. Bo na ma le titiyi, tine bo ebe tëbï rɔ bo ti tiya lende ma löbu naga.

Doŋgɔke paꞌdo te, paꞌdo ma titiyi ɔdɔ kogba kusu mï lïndï ꞌba mɔli ma löbu ëdï koŋma tara kote yaga. ⁶Dɔndeꞌde ze bilaka lesi nime ëdï gbï kɔzɔ paꞌdo tara, bo na rɔ mï zana ꞌba lende kënyë ꞌba dɔliŋɔ nime. Kina me bo gbï rɔ kapa ꞌba yida rɔze mɔtɔ kina bo kiꞌdi lende kënyë ŋgï kitaꞌba kote rɔze pili. Kina me dɔndeꞌde kusu paꞌdo ma löbu ꞌba Gehena ꞌdeni ŋgï rɔ dïdï ze ga ꞌdɔ kirasi loma ze ga pili yaga.

⁷Ze bilaka lesi dikalike tiꞌdi dɔkomali yërï ꞌba yï mökö, ti yali ni, ti wa ma titi ma këdï kele kebe bërï naga, ti kenze ni këdï mï kɔmɔ közïze. ⁸Ne bɔtɔ ma kɔtɔ mɔtɔ ikali dë ma ꞌdɔ kogbɔ dɔ dɔndeꞌde nï bërï. Dɔndeꞌde ꞌbënï ŋgï rɔ wa ma kënyë ame kikali dë toloma le, bo oso ꞌbënï ŋgï lɔ ti wɔwɔ ma kata ame ga këdï kupö bilaka ŋgï kɔzɔ wɔwɔ ꞌba murë tara ne.

⁹Kina me dëdï dïlëluke ŋere Bɔkoꞌba ame rɔ ꞌbu ze ne ti dɔndeꞌde ze ga kina debe duyïke ꞌböwu gbï tulömu bilaka lëpï ze ga ame Bɔkoꞌba koꞌba ꞌdeni gbï kɔzɔ bo tara ne timo. ¹⁰Akïlëlu ma laka ni ti lömu ma kënyë naga ëdï kɔdɔ kpaki di mï kpa kɔtɔkɔtɔ nima. Löndö ma ga, lende nima ele dë, kinza doꞌdɔke dë tara. ¹¹Daa kɔtɔ ikali dë ma ꞌdɔ kulöwu mini ma kindili gbï ti mini ma kata di kɔmɔ kɔtɔkɔtɔ nima. ¹²Ŋgërï këlu ikali dë ma ꞌdɔ kana kɔlɔ kina ŋgërï maa ikali dë gbï ma ꞌdɔ kana këlu. Kina gbï tara daa ame këdï kulöwu ꞌbënï rɔ ma konzolɔrɔ ne ikali dë ma ꞌdɔ kulöwu mini ma laka.

Akikali Ma Laka

¹³Nï bɔ mɔtɔ ɔdɔ këddï rɔ bɔ kikali lende, oloma rɔ bɔ koꞌdɔ lende laka ꞌdɔ lende këyï ꞌbï na kileme akikali ꞌbï nima. ¹⁴Ne ɔdɔ këddï rɔ bɔ mï kombi, rɔ bɔ mï kata, kina gbï rɔ bɔ mï kututu, kinza kebe dë tëbï röyï gɔ döyï kiya te nï bɔ kikali lende na. Nï bɔ ame këddï kiya tara ne lende ꞌbï nima inza du te rɔ ma kodɔrɔ. ¹⁵Kina akikali ꞌbï nima inza gbï rɔ ma Bɔkoꞌba kiꞌdi. Akikali ꞌba Satani ni ti ꞌba bilaka ꞌba dɔliŋɔ nime na ka. ¹⁶Römöyï mï kombi ni ma ti mï kututu na këdï kiꞌdi bilaka kebe toꞌdɔ lamo ni ti lende ma kënyë mɔtɔ ga.

¹⁷Ne bilaka ame ga Bɔkoꞌba na kiꞌdi akikali ꞌbënï teyi ne lïjë oꞌdɔ ꞌbënnï wa pili rɔ ma kodɔrɔ. Lïjë oꞌdɔ ꞌdïrï dë ti bɔtɔ kina lïjë oꞌdɔ kɔmɔ kënyë dë gbï dɔ bilaka. Kina lïjë oꞌdɔ mbili minyi dë gbï, lïjë öꞌbö ꞌbënnï ti mï këyï, kina lende koꞌdɔ ꞌbënnï ga köꞌbö ŋgï pili rɔ ma laka. Ya ame ga ꞌdeni te ne oꞌdɔ kɔmɔ geli dë zi bilaka, meri ꞌbënnï pili rɔ ma laka. ¹⁸Lïjë na rɔ bɔ lata mï löŋgö ya ma konzi, ame lende këyï ꞌbënnï kiꞌdi bilaka ꞌdeni ꞌdɔ koloma köꞌbö toꞌdɔ lende laka ꞌba Bɔkoꞌba.

Mï Kombi

¹Waꞌdi ga na këdï kiꞌdi ye kamoke koꞌdɔke ꞌdïrï rɔ gɔ rɔye? Meri gɔ akoꞌdɔkɔ ma kënyë ꞌba yida rɔye ga na këdï koꞌde lende naga nima. Römöyï meri naga nima öꞌbö ŋgï rɔ toꞌdɔ ya mïye ꞌdɔ kogbɔ ye bërï. ²Oꞌdɔkɔke wa mɔtɔ ga, kina ɔdɔ koꞌjake dë yɔ kina mïye kënyï kombi ŋgï rɔ lëpï ye ga. Kina mï kombi ꞌbe ga kodɔ ŋgï rɔ lamo ni ti ꞌdïrï ziye ꞌdɔ tupö lëpï ye ga yaga.

Ne wa mo naga nima koꞌdɔkɔke ne oꞌjake dë römöyï ititike Bɔkoꞌba dë su gɔ lende mo. ³Ne ɔdɔ kititike Bɔkoꞌba gɔ lende ꞌba wa mo naga nima bo inza kiꞌdi gbï ziye römöyï akititi ꞌbe ga ele dë. Ëddï kititike wa naga nima ɔdɔ kiꞌdi ꞌdeni ziye ꞌdɔ kiꞌdike ŋge koloma rɔ wa ꞌba lɔŋɔ ꞌba gbagba ye ga.

⁴Kpe bilaka ebeke toga kpeye gɔ lende ꞌba Bɔkoꞌba kɔzɔ ꞌja ame këdï koꞌdɔ yërï di dɔ mëꞌdë nï ne tara. Ikalike dë su tɔꞌɔ wa ꞌba dɔliŋɔ nime na rɔ wa ame këdï koꞌdɔ ya ti Bɔkoꞌba? Bilaka ame ga kiya rönnï rɔ bɔ kɔꞌɔ wa ꞌba dɔliŋɔ nime kulöwö ne lïjë na koꞌdɔ rönnï ꞌdeni rɔ bɔ koꞌdɔ ya ti Bɔkoꞌba. ⁵Ikalike dë, lende tönë kugu mï buku ꞌba Bɔkoꞌba ne ëdï ŋgï rɔ ma laka, ame kugu kiya te, dökïꞌdï nime Bɔkoꞌba kiꞌdi mïze ne ŋgï rɔ dökïꞌdï ꞌba mï kombi? ⁶Tine Bɔkoꞌba mï bo ëyï rɔze sowa kina me bo kiꞌdi tigɔ ame rɔ dɔ kiteli di dɔ mï kombi ze ga ne. Ëdï ꞌdeni gbï kɔzɔ lende ma tönë kugu mɔlo mï buku ꞌba Bɔkoꞌba kiya te, “Bɔkoꞌba ëdï rɔ ya ti bilaka ame ga köꞌbö tubötö rönnï ne. Mï bo ëdï këyï ŋge rɔ ya ame ga kotɔ ëꞌbënnï dönnï le bërï ne.”

⁷Kina me mëdï miya ziye lende ꞌba Bɔkoꞌba na kuwöke dɔmo. Ilagike yaga di rɔ ꞌba Satani ꞌdɔ kiꞌdi bo kiriŋa yaga di rɔye. ⁸Akoke zi Bɔkoꞌba kina bo ti kako gbï ziye. Kpe bɔ lende kënyë naga nime, olake gɔ lende kënyë yaga. Kpe bɔ dökïꞌdï rïyö naga nime, iꞌdike dɔye gɔ lende ꞌba Bɔkoꞌba ti dökïꞌdï kɔtɔ. ⁹Uduke mɔlo te di zi lende kënyë ꞌbe ga. Kinza kögöke dë kpe, öꞌböke rɔ monɔ. Kinza kolomake dë kpe rɔ lɔŋɔ, ne tine öꞌböke rɔ meri. ¹⁰Ilekike rɔye titiyi bërï kɔmɔ Bɔkoꞌba kina bo ti kiꞌdi ye ꞌdeni ŋgï këddïke mbiri.

¹¹Löndö ma ga, kinza kitiꞌjake lëpï ye ga dë. Nï bɔ ame këddï kitiꞌja lëpï yï ga ame ꞌdeni rɔ ꞌba Kurïsïtö ne, kiya lïjë rɔ ma kënyë, köꞌdu kiꞌdi ꞌba Bɔkoꞌba na ma ꞌdeni kitiꞌja kiya rɔ ma kënyë ne. Kina inza ëꞌbï kpe rɔ toꞌdɔ köꞌdu kiꞌdi ꞌba Bɔkoꞌba, ëddï ëꞌbï ꞌdeni za rɔ toꞌdɔ burë mo. ¹²Tine Bɔkoꞌba bo na ŋge kɔtɔ kpökï rɔ bɔ koꞌdɔ burë, kina bo na gbï ŋge rɔ bɔ kiꞌdi köꞌdu kiꞌdi. Bo na ŋge ti tigɔ ꞌba tɔmɔ bilaka di mï tölë, kina bo ëdï gbï ti tigɔ ꞌba tupö bilaka timo. Ne nï ꞌbëyï oꞌdɔkɔ ꞌdeni toꞌdɔ röyï rɔ yë, ɔdɔ kebe gbï bi toꞌdɔ burë ꞌba rɔ lëpï yi ga?

Tudölï Bɔkoꞌba

¹³Uwöke dɔma te, kpe bilaka ame ga këddï kiyake te, “Tïlëndö dëdï dari dɔ gawo ma te ꞌdɔ dari doloma yayi kɔmɔ kɔɔ kɔtɔ bi tugö ndögö ꞌdɔ doꞌja yamo.” ¹⁴Ikalike lende ꞌba bi këzë ma tïlëndö ra? Kina ikalike lende ꞌba loma ꞌbe ga ra gbï yɔ? Rɔ ma laka loma ꞌbe ga ëdï ŋge kɔzɔ matutu tara. Oloma ŋge mbowa kina koya ŋgï yaga. ¹⁵Lende ꞌbeye ame ꞌdɔ köꞌböke rɔ tiya mo ne kina me, iyake te, “Ɔdɔ kiya te ŋere Bɔkoꞌba koꞌdɔkɔ zize kiꞌdi gɔ bi këzë laka dɔze tïlëndö ꞌdɔ dari doꞌdɔke wa ma te.” ¹⁶Dëne lende kiya ꞌbe naga nima ti këdï ka rɔ dölï. Kina dölï ma kɔzɔ wa nima tara ëdï rɔ lende kënyë.

¹⁷Kina me leꞌjete ikalike lende laka ꞌdeni, ne ɔdɔ koꞌdɔke dë oꞌdɔke lende ma kënyë ꞌdeni.

Bɔ Wa

¹Kpe bɔ wa ni, uwöke dɔma. Uduke konyoke kökö mɔlo te di zi gomɔ löbu nime këdï koꞌdɔkɔ todɔ mo dɔye ne. ²Wa mbëmbë ꞌbe naga nima ëdï kirasi rönnï, kina kulörö ëdï konyo bɔŋgɔ kele ꞌbe naga nima gbï. ³Rɔ yamo ꞌbe naga nima ëdï koromaro, kina ɔdɔ rɔmo koromaro ꞌdeni kirasi rönï tine, ti kileme lende ꞌba yida rɔye ꞌdeni ŋgï. Ti koŋma yida rɔye ꞌdeni ŋgï kɔzɔ paꞌdo tara. Römöyï kada ame rɔ ŋburuŋburu ꞌba dɔliŋɔ nime ne kina ꞌdeni me, ne kina këddïke ꞌbeye za gba bi totɔtɔ wa rɔ mbëmbë.

⁴Oŋgɔke bɔ ndɔbɔ ame ga këdï kumu nyönyu di mï nyaka ꞌbe ga ne te. Opike gïrïsï ꞌbënnï ga dë yɔ, kina me lïjë ꞌdeni ŋgï ti monɔ rɔ ma kënyë gɔ lende mo. Monɔ ꞌbënnï ömö ꞌdeni ŋbö mbili Bɔkoꞌba bɔ tigɔ dɔ kiteli. ⁵Ne ꞌbeye kpe ŋgï rɔ lɔŋɔ di dɔliŋɔ nime bine ti wa ŋbaŋi. Kina kiꞌdike yida rɔye ꞌdeni ŋgï kɔnɔ kɔzɔ kamölö ame këdï koꞌdɔkɔ ꞌdeni ꞌdɔ tari tumu mo ne tara. ⁶Odɔke karama ꞌdeni dɔ bilaka ma laka naga kina kupöke mɔtɔ ga ꞌdeni gbï ŋgï yaga rɔ ma sari kinza ma lïjë koꞌdɔ wa mɔtɔ ziye.

Loma Ti Kɔmɔ Kiꞌdi

⁷Löndö ma ga, olomake liya ti kɔmɔ kiꞌdi ŋbö kömö mï kada ꞌba tako ꞌba ŋere ze Yësu Kurïsïtö ame bo këdï kileki kako dɔliŋɔ nime bine ne. Oŋgɔke bɔ nyaka ni ma këdï koloma ëꞌbënnï ga le liya ti kɔmɔ kiꞌdi gɔ tɔrɔ ŋbö kömö mï kpa dɔlili te. Lïjë oloma ti kɔmɔ kiꞌdi ŋbö lïjë koꞌja wa ma laka di mï nyaka ꞌbënnï ga mï kada ꞌba kpa dɔlili. ⁸Kina ꞌdɔ kolomake gbï tara ti kɔmɔ kiꞌdi ti mï këddï römöyï kada ꞌba tako ꞌba ŋere ze Yësu Kurïsïtö ɔwɔ dë kpe.

⁹Löndö ma ga, gomɔ ame ga këdï koꞌdɔ ye ne kinza kuduke monɔ mo dë ti lëpï ye mɔtɔ ga. Ɔdɔ kebeke tudu monɔ mo ti lëpï ye ga, Bɔkoꞌba ëdï kodɔ karama dɔye gɔmo mï kada ꞌba burë abo. Kina me ꞌdeni kada mo ɔwɔ dë kpe.

¹⁰Löndö ma ga, oŋgɔke lende koꞌdɔ ꞌba bɔ kumë lende ꞌba Bɔkoꞌba ma mɔlo tönë ga koloma rɔ tiya lende ꞌba Bɔkoꞌba zi bilaka ne te. Lïjë oloma ti mï këddï kina lïjë kogbɔ rönnï ŋgï kɔrɔ kpa gomɔ mo. Kina ꞌdɔ koꞌdɔke gbï kɔzɔ ꞌbënnï tara. ¹¹Lïjë ogbɔ dökïꞌdï nnï kina me dëdï diyake te Bɔkoꞌba oꞌdɔ yëyï ma laka zïnnï ne. Kina ikalike di gɔ lende ꞌba Eyobo ame bo koloma ti mï këddï rɔ gɔ kɔwɔ ne, kina ikalike ꞌdeni gbï ma Bɔkoꞌba kokɔnyi bo di pötö gomɔ abo römöyï Bɔkoꞌba bo ëdï ti mï këyï rɔ mbëmbë rɔ bilaka abo ga.

Ndose Ma Ŋburuŋburu

¹²Löndö ma ga, lende ame rɔ dɔ kiteli ne kina me mëdï miya ziye. Kinza kulömuke rɔye dë ti mïtɔrɔ ala ti dɔyayi ala ti wa mɔtɔ. Ɔdɔ kutï ꞌdeni gɔ lende mo tɔ nima, iya te, “Yëë.” Ne ɔdɔ kilagi ëꞌbï ꞌdeni, iya te, “Ee.” Ɔdɔ koꞌdɔ ꞌdeni pili tara, Bɔkoꞌba inza kpe kodɔ karama döyï.

¹³Nï bɔ mɔtɔ ɔdɔ këddï ti gomɔ ititi Bɔkoꞌba ꞌdɔ bo kokɔnyi yi. Nï bɔ mɔtɔ ɔdɔ këddï rɔ lɔŋɔ ïlëlu Bɔkoꞌba ti ŋgala koba. ¹⁴Nï bɔ mɔtɔ ɔdɔ këddï dɔ rɔkɔꞌɔ ïdëkï bilaka ma löbu ꞌba kanisa kako zïyï ꞌdɔ lïjë kondi ꞌbu röyï kititi Bɔkoꞌba ti közï kakpa ꞌba ŋere ze Yësu Kurïsïtö gɔ bo kileŋo yi. ¹⁵Lïjë iꞌdi dönnï ꞌdeni gɔ lende ꞌba Bɔkoꞌba, kina bo ti kileki dɔ akititi ꞌbënnï nima ŋgï kileŋo yi di dɔ rɔkɔꞌɔ ꞌbï nima. Kina ɔdɔ kiya te koꞌdɔ lende kënyë mɔtɔ ga ꞌdeni pele mɔlo, Bɔkoꞌba ëdï kola yi ŋgï gɔmo.

¹⁶Kina oꞌdɔkɔ ziye ꞌdɔ kodɔke kpeye gɔ lende kënyë ꞌbe ga rɔ gɔ rɔye, kina ꞌdɔ kititike Bɔkoꞌba gbï gɔ lende ꞌba lëpï ye ga ꞌdɔ bo kokɔnyi lïjë. Kina Bɔkoꞌba ti kileŋo ye ŋgï di dɔ rɔkɔꞌɔ ꞌbe ga römöyï akititi ꞌba bɔ lende laka ëdï ti tigɔ rɔ dɔ kiteli. ¹⁷Doŋgɔke Eliya te, bo gbï rɔ bilaka lesi kɔzɔ ze te. Bo ititi Bɔkoꞌba ti dökïꞌdï kɔtɔ ꞌdɔ koꞌjɔŋɔ tɔrɔ kinza kaꞌdi mï dɔyayi ꞌba Yisarele. Kina kada keze ŋgï ŋbö kɔmɔ kɔɔ mota kɔdɔ dɔmo nyepe modɔɔkɔtɔ. ¹⁸Kina bo kileki kititi Bɔkoꞌba ꞌböwu ꞌdɔ kiꞌdi tɔrɔ kaꞌdi kina tɔrɔ kaꞌdi ŋgï rɔ ma kënyë, dɔkomali wa ꞌba dɔyayi pili kënyï kötu yaga.

¹⁹Löndö ma ga, iꞌdike lende nime këdï laka dɔye. Ɔdɔ bɔ mɔtɔ di mï löŋgö ye nima kënyï kɔcɔ yaga di mï kɔri ꞌba lende laka ꞌba Bɔkoꞌba kina ɔdɔ bɔ mɔtɔ kari koꞌde bo ꞌdeni ꞌböwu mï kɔri nima, ²⁰bilaka mo nima bo olɔ lëpï bo nima koꞌdɔ lende kënyë ne ꞌdeni yaga di mï tölë. Kina Bɔkoꞌba ti kola bilaka mo nima ŋgï gɔ lende kënyë ma konzi ame ga bo koꞌdɔ ne.