1 Yowani

Akugu Ma Dɔgba ꞌBa

YOWANI

Lende ꞌBa Dïdï

¹Dëdï dugu waraga nime ziye gɔ köꞌdu abo ꞌba lende ꞌba dïdï. Bɔ nime rɔ lende ꞌba Bɔkoꞌba ne bo ëdï ꞌdeni mɔlo bine di bi tisaki ꞌba dɔliŋɔ nime. Tine duwö bo ꞌdeni ti mbili ze doꞌja bo ti kɔmɔze közïze kosa rɔ bo gbï. ²Bo na rɔ dïdï ma laka zi bilaka. Mï tileme bo tönë ze na doꞌja bo. Gɔ köꞌdu mo kina me dëdï diya ziye, bo na rɔ dïdï ma ŋburuŋburu. Bo gbï kɔtɔ ti Bɔkoꞌba kina me kileme bo ꞌdeni zize. ³Rɔ ma laka wa nime doꞌja ꞌdeni duwö gbï ne na me dëdï diya ꞌdeni gbï ziye, römöyï ꞌdɔ kpe kodɔꞌbɔke rɔye kɔtɔ tize. Ma ꞌbeze dëdï ꞌdeni mï rɔ kodɔꞌbɔ ti Yësu Kurïsïtö kole ꞌba Bɔkoꞌba gbï kɔtɔ ti ꞌbu bo Bɔkoꞌba. ⁴Na ma dëdï dugu ame ꞌdeni ziye gɔ rɔ kodɔꞌbɔ ꞌbe tize kiꞌdi ze ti dëdï lɔ ti lɔŋɔ.

⁵Ame na rɔ laja ma duwö di zi Yësu kina me dëdï diya ziye. Bɔkoꞌba na rɔ bi kɔpɔ, ma di zi bo a mɔtɔ rɔ bi kölu inza. ⁶Kina ɔdɔ diyake te dëdïke ꞌdeni mï rɔ kodɔꞌbɔ ti bo koꞌja loma ze këdï gba mï bi kölu doꞌdɔke bëtï ꞌdeni, akoꞌdɔ ze ga inza du te rɔ lende ma kodɔrɔ abo. ⁷Ne ɔdɔ loma ze ga këdï mï bi kɔpɔ kɔzɔ ame bo Bɔkoꞌba këdï mï bi kɔpɔ ne tine, odɔꞌbɔ ze ꞌdeni ŋgï rɔ akɔtɔ. Roma Yësu kole ꞌba Bɔkoꞌba urögö ze ꞌdeni yaga kɔpɔ di mï lende kënyë ze ga.

⁸Ɔdɔ diyake te dinzake ti lende kënyë, duꞌböluke rɔze ꞌdeni kina lende ma kodɔrɔ ɔtɔ ꞌba Bɔkoꞌba inza du te mïze. ⁹Ne ɔdɔ dodɔke kpeze gɔ lende kënyë ze ga na laka, Bɔkoꞌba ti koꞌdɔ köꞌdu laka abo ŋgï kɔzɔ ame bo kiꞌdi köꞌdu mo ꞌdeni mɔlo tara ne. Bo ti kola ze gɔ lende kënyë ze ga pili bo kurögö ze yaga kɔpɔ di yïmo.

¹⁰Ne ɔdɔ diyake te doꞌdɔke lende kënyë ɔtɔ dë du te, diꞌdike Bɔkoꞌba ꞌdeni rɔ bɔ bëtï. Kina a mɔtɔ rɔ lende abo inza du te mïze.

Kurïsïtö Bɔ Kpërï Gɔze

¹Mëdï mugu waraga nime ziye kole ma ga kinza kari koꞌdɔke lende kënyë ra. Ne ɔdɔ nï mɔtɔ di mï löŋgö ze nime bine koꞌdɔ lende kënyë, Yësu Kurïsïtö na köꞌbö ꞌdeni rɔ bɔ kpërï ze mï löŋgö ze ti Bɔkoꞌba ꞌbu. Römöyï bo na rɔ bɔ ame koꞌdɔ lende laka ꞌba Bɔkoꞌba ꞌdeni ²bo kombi laŋba ꞌba lende kënyë ze ꞌdeni ti tölë abo. Dë ŋge rɔze kɔtɔ tine rɔ gɔze bilaka ꞌba mï dɔyayi nime pili.

³Kina me miya ziye, wa ame ꞌdɔ kileme ze rɔ bɔ tikali Bɔkoꞌba rɔ ma laka ne na rɔ toro köꞌdu kiꞌdi abo ga. ⁴Ɔdɔ bɔ mo kiya te bo ikali Bɔkoꞌba ꞌdeni ŋgï tara kinza ma bo koro köꞌdu kiꞌdi mo ga dë yɔ, bo ꞌdeni rɔ bɔ bëtï, kina lende ma kodɔrɔ ɔtɔ ꞌba Bɔkoꞌba inza du te mï bo. ⁵Tine lïjë ame ga pili këdï koꞌdɔ lende ꞌba Bɔkoꞌba ne lïjë na rɔ ya ame ga akɔꞌɔ ꞌba Bɔkoꞌba këdï koꞌdɔ ndɔbɔ ŋgï rɔ ma laka mïnnï ne. Wa ame ꞌdɔ kileme ma dëdï ꞌdeni rɔ akɔtɔ ti Bɔkoꞌba ne na me. ⁶Bɔ ame kiya te bo öꞌbö ꞌdeni rɔ akɔtɔ ti Bɔkoꞌba ne bo kiꞌdi loma abo këdï kɔzɔ ꞌba Yësu Kurïsïtö.

Köꞌdu Kiꞌdi

⁷Kpe ame ga mɔꞌɔ ye ne, köꞌdu kiꞌdi nime mëdï mugu ziye ne wa laꞌja na dë. Köꞌdu kiꞌdi mɔlo tönë kiꞌdi ziye mɔlo di bi tisaki mo ne na. Kina köꞌdu kiꞌdi mɔlo nime bo na rɔ laja ma tönë kuwöke ne. ⁸Tine bo na gbï rɔ köꞌdu kiꞌdi ma laꞌja. Loma ꞌba Yësu ti loma ꞌbe na kileme laꞌja mo ꞌdeni. Römöyï bi kölu ëdï ꞌdeni kote rönï bi kɔpɔ ma laka na ꞌdeni këdï kiyɔpɔ gɔ bi.

⁹Bɔ ame kiya te bo ëdï ꞌdeni mï bi kɔpɔ tine bo gba rɔ ma koꞌji löndö ne, bo ëdï abo ka gba mï bi kölu. ¹⁰Lïjë ame ga kɔꞌɔ löndö nnï ga ne na rɔ ya ma këdï ꞌdeni mï bi kɔpɔ. Kina a mɔtɔ inza kpe rɔ ma kënyë mïnnï ame gɔ kiꞌdi lïjë kɔcɔ yaga di mï kɔri ꞌba Bɔkoꞌba. ¹¹Tine bɔ ame koꞌji löndö nï ne bo ëdï abo gba mï bi kölu. Kina bo ëdï gba kiliŋgere mï bi kölu kinza ma bo kikali bi ma bo këdï kari teyi. Römöyï bi kölu ïyölu kɔmɔ bo ꞌdeni.

Tɔꞌɔ Dɔliŋɔ

¹²Kole ma ga, mëdï mugu wa naga nime ziye römöyï Bɔkoꞌba ola ye ꞌdeni gɔ lende kënyë ꞌbe ga gɔ köꞌdu ꞌba Yësu. ¹³Kpe bulöbu, mëdï mugu wa naga nime ziye römöyï ikalike bɔ ma tönë koloma mɔlo di bi tisaki mo ne ꞌdeni. Kpe yɔbi, mëdï mugu wa naga nime ziye römöyï aꞌdake Satani bɔ ma kënyë ne ꞌdeni. ¹⁴Kpe kole ma ga, mëdï mugu wa naga nime ziye römöyï ikalike ꞌbu ze Bɔkoꞌba ꞌdeni. Kpe bulöbu, mëdï mugu wa naga nime ziye römöyï ikalike bɔ ma tönë koloma mɔlo di bi tisaki mo ne ꞌdeni. Kpe yɔbi, mëdï mugu wa naga nime ziye römöyï kpe na rɔ bɔ tigɔ kina lende ꞌba Bɔkoꞌba öꞌbö ꞌdeni gbï mïye kaꞌdake Satani bɔ ma kënyë ne ꞌdeni.

¹⁵Miya ziye pili, kinza kɔꞌɔke dɔliŋɔ nime dë gbï ti wa mo ga. Bɔ ame kɔꞌɔ dɔliŋɔ nime inza kikali tɔꞌɔ ꞌbu ze Bɔkoꞌba. ¹⁶Römöyï wa pili ꞌba dɔliŋɔ nime ame ga kɔzɔ akoꞌdɔkɔ ꞌba yida rɔ ni ti mï kombi ni ti dɔ kombi ni naga nima inza rɔ ꞌba Bɔkoꞌba, lïjë ꞌba dɔliŋɔ nime na. ¹⁷Kina me dɔliŋɔ nime ti kote rönï kɔtɔ yaga ti wa mo naga nima bilaka këdï koꞌdɔ ndörö gɔmo ne. Tine lïjë ame ga koꞌdɔ akoꞌdɔkɔ ꞌba Bɔkoꞌba ne ti koloma ŋgï köꞌbö rɔ ŋburuŋburu.

Ŋburuŋburu ꞌBa Dɔliŋɔ

¹⁸Kole ma ga, kada ma ŋburuŋburu ꞌba dɔliŋɔ nime na ꞌdeni me. Tönë mɔlo bine uwöke ꞌdeni tëgë bɔ ndoꞌji bɔ ya ꞌba Kurïsïtö ti kɔdɔ ꞌdeni. Kina me leꞌjete bɔ ndoꞌji ma konzi bɔ ya ꞌba Kurïsïtö ɔdɔ ꞌdeni. Gɔ köꞌdu mo na me kiꞌdi dikali ꞌdeni kada mo tönë ömö ꞌdeni. ¹⁹Bɔ ndoꞌji naga nime lïjë ënyï ꞌdeni konye rönnï yaga di mï löŋgö ze. Tine lïjë inza du te rɔ lëpï ze ga, römöyï ma lïjë këdï ra ŋgï ko rɔ lëpï ze ga dëne lïjë ëdï köꞌbö tize. Tine lïjë ënyï koza rönnï yaga di rɔze kina me kileme ꞌdeni ŋgï ma kɔtɔ ꞌbënnï mɔtɔ inza du te rɔ lëpï zize.

²⁰Ne ma ꞌbeye Kurïsïtö odɔ Nyï Kɔtɔ Laka ꞌdeni dɔye kina me kpe pili ikalike lende ma laka ꞌdeni. ²¹Tine ame mëdï mugu wa nime ziye ne, miya dë te ikalike lende ma kodɔrɔ dë. Ne mëdï mugu ziye römöyï ikalike lende ma kodɔrɔ ꞌdeni kina ikalike ꞌdeni gbï a mɔtɔ rɔ bëtï inza mï lende ma kodɔrɔ.

²²Ne tine yë na rɔ bëtï? Bëtï na rɔ bɔ ame kiya te Yësu na dë rɔ Kurïsïtö ma Bɔkoꞌba koja ne. Römöyï Bɔkoꞌba ꞌbu gbï ti Kurïsïtö kole mo na ma bo kilagi ꞌdeni. Kina me bɔtɔ mo nima bo ꞌdeni rɔ bɔ ndoꞌji bɔ ya ꞌba Kurïsïtö. ²³Römöyï lïjë ame ga pili kilagi tiꞌdi dönnï gɔmo Yësu na rɔ kole ꞌba Bɔkoꞌba ne, lïjë ikali Bɔkoꞌba ꞌbu ꞌba Yësu dë. Ne lïjë ame ga pili kiꞌdi dönnï gɔmo Yësu na rɔ kole ꞌba Bɔkoꞌba ne lïjë na kikali Bɔkoꞌba ꞌbu ꞌba Yësu ꞌdeni gbï.

²⁴Kina me ziye, öꞌböke tiꞌdi dɔye gɔ lende naga nime kuwöke ꞌdeni mɔlo di bi tisaki mo ne. Römöyï ɔdɔ köꞌböke tiꞌdi dɔye ŋgï gɔmo ti köꞌböke ꞌdeni ŋgï rɔ akɔtɔ ti Yësu kole ꞌba Bɔkoꞌba gbï rɔ akɔtɔ ti ꞌbu bo Bɔkoꞌba. ²⁵Töꞌbö rɔ akɔtɔ ti Bɔkoꞌba nime na rɔ loma ma ŋburuŋburu mo tönë Yësu kiya ꞌdeni mɔlo tëgë ꞌdɔ bo kiꞌdi zize ne.

²⁶Kina me mugu lende naga nime ꞌdeni ziye gɔ köꞌdu ꞌba bɔtɔ naga nima koꞌdɔkɔ tuꞌbölu ye ne. ²⁷Ne kpe ꞌbeye nime Kurïsïtö kodɔ Nyï Kɔtɔ Laka abo ꞌdeni dɔye köꞌbö ꞌdeni mïye ne, ëddï koꞌdɔkɔke ꞌböwu ꞌdɔ bilaka lesi kiyandi ye gɔ waꞌdi? Nyï Kɔtɔ Laka abo nima na ti kiyandi ye ti wa pili kina akiyandi abo na rɔ ma kodɔrɔ, bëtï inza mï bo. Kina ꞌdɔ kolomake rɔ akɔtɔ ti Kurïsïtö kɔzɔ ame Nyï Kɔtɔ Laka kiyandi ye ne tara.

²⁸Kina me mëdï miya gbï ziye kole ma ga, olomake rɔ akɔtɔ ti Kurïsïtö römöyï mï kada ꞌba tileki abo bine gɔ dɔze këdï rɔ ma kïtëwu kinza debeke ra tusu dɔze di zi bo ti rɔ kaya. ²⁹Römöyï ikalike ꞌdeni Kurïsïtö na rɔ bɔ lende laka. Kina ꞌdɔ kikalike gbï ze ame ga pili doꞌdɔke lende laka ne öyö ze ꞌdeni yaga rɔ ma laꞌja rɔ kole ꞌba Bɔkoꞌba.

Kole ꞌBa Bɔkoꞌba

¹Kina me oꞌjake akɔꞌɔ löbu nime Bɔkoꞌba koꞌdɔ gɔze kiꞌdi kïdëkï ze rɔ kole abo ga ne ꞌdeni. Rɔ ma laka ze kole abo ga na. Ne bilaka ꞌba dɔliŋɔ nime ikali Bɔkoꞌba dë gɔ lende mo na ma kiꞌdi lïjë kikali ze dë rɔ kole ꞌba Bɔkoꞌba. ²Kpe ame ga mɔꞌɔ ye ne, ze ꞌdeni rɔ kole ꞌba Bɔkoꞌba. Tine tëdï ze ma di dɔgba yayi mo ileme dë gba zize. Ne ma dikalike mo ɔdɔ Yësu kako ꞌdeni kileme rɔ bo ti dëdïke gbï kɔzɔ bo römöyï ti doꞌjake bo ŋgï ko kɔzɔ ame bo këdï ne tara. ³Kina me ze ame ga ꞌdeni pili ti kɔmɔ kiꞌdi ꞌdɔ tëdï kɔzɔ Kurïsïtö ne diꞌdike lende ze ga ti köꞌbö ŋburu rɔ ma laka kɔzɔ ꞌba bo ꞌba Kurïsïtö tara.

⁴Ya ame ga köꞌbö ꞌbënnï toꞌdɔ lende kënyë ne, lïjë na rɔ ma kilagi köꞌdu kiꞌdi ꞌba Bɔkoꞌba ꞌdeni naga. Römöyï toꞌdɔ lende kënyë na rɔ tilagi köꞌdu kiꞌdi ꞌba Bɔkoꞌba. ⁵Ikalike ꞌdeni Kurïsïtö ako dɔliŋɔ bine tombi lende kënyë ꞌba bilaka kina a mɔtɔ rɔ lende kënyë inza mï bo. ⁶Kina me bɔ ame köꞌbö ꞌdeni rɔ akɔtɔ ti Kurïsïtö ne öꞌbö dë kpe toꞌdɔ lende kënyë. Tine ꞌbënnï ꞌba bɔtɔ bɔ koꞌdɔ lende kënyë naga nima lïjë ma ꞌbënnï oꞌja Kurïsïtö dë kikali bo dë gbï yɔ.

⁷Kpe kole ma ga, kinza kiꞌdike bɔtɔ mɔtɔ kuꞌbölu ye dë. Ya ame ga köꞌbö toꞌdɔ lende laka ne lïjë na rɔ ma laka di kɔmɔ Bɔkoꞌba gbï kɔzɔ Kurïsïtö tara. ⁸Ne lïjë ame ga köꞌbö toꞌdɔ lende kënyë ne lïjë ꞌba Satani na römöyï Satani isaki toꞌdɔ lende kënyë ꞌdeni mɔlo kako di bi tisaki mo. Köꞌdu ꞌba ꞌdɔ tïyëyï mï ndɔbɔ kënyë ꞌba Satani nime yaga na me ꞌdɔ kiꞌdi Bɔkoꞌba koja kole abo kako gɔmo dɔliŋɔ nime bine ne.

⁹Bɔ ame ꞌdeni rɔ kole ꞌba Bɔkoꞌba öꞌbö dë kpe nduwë toꞌdɔ lende kënyë römöyï bo ꞌdeni rɔ kupö ꞌba Bɔkoꞌba. Bɔkoꞌba na rɔ ꞌbu ze dɔꞌbɔke dë kpe toꞌdɔ lende kënyë. ¹⁰Wa nime na këdï kileme rɔ ma laka yë ga na rɔ kole ꞌba Bɔkoꞌba kina yë ga na ꞌbënnï rɔ ꞌba Satani. Lïjë ame ga pili koꞌdɔ lende laka dë kɔꞌɔ löndö nnï ga dë ne inza rɔ kole ꞌba Bɔkoꞌba.

¹¹Ame na rɔ lende ame kuwöke ꞌdeni mɔlo di bi tisaki mo, zize tɔꞌɔ lëpï ze ga. ¹²Tine dë ꞌdɔ tëdï kɔzɔ ꞌba Kayina ma tönë bine kupö bɔ löndö bo ne. Bo ꞌba bo nima rɔ ꞌba Satani. Ne gɔ waꞌdi na bo kupö bɔ löndö bo? Römöyï lende abo ga pili rɔ ma kënyë ꞌba bɔ löndö bo na rɔ ma laka kɔmɔ Bɔkoꞌba.

¹³Löndö ma ga, kinza kiꞌdike lende nime dë kïlïkö dɔye ɔdɔ dɔliŋɔ këdï koꞌji ye. ¹⁴Ze ꞌbeze ma ze tiye nime ditelike dɔ tölë ꞌdeni dɔdɔke mï dïdï ma ŋburuŋburu. Akɔꞌɔ ze ame dɔꞌɔke löndö ze ga ne na kiꞌdi ze ꞌdeni dikalike wa nime. Römöyï lïjë ame ga kɔꞌɔ löndö nnï ga dë ne öꞌbö ꞌbënnï ꞌdeni mï tölë. ¹⁵Lïjë ame ga pili koꞌji löndö nnï ga ne lïjë bɔ akupö na. Kina kɔzɔ ma kikalike lïjë ama ga tara ne ti kɔꞌbɔ tëdï ti dïdï ma ŋburuŋburu te tondo ga?

¹⁶Dikalike wa nime rɔ akɔꞌɔ ne ꞌdeni römöyï Kurïsïtö ilagi dë di bi tiꞌdi rɔ bo tölë gɔze. Kina gbï tara kinza dilagike dë di bi tölë gɔ löndö ze ga. ¹⁷Ne oŋgɔke te, nï mɔtɔ ame këdï ti wa ꞌba dɔliŋɔ nime tine kebe kupupu dökïꞌdï yï ŋgï lipo bërï di bi tokɔnyi löndö mɔtɔ ame rɔ leri mo ne, ti akɔꞌɔ ꞌba Bɔkoꞌba këdï mïyï totondo?

Dɔ Kïtëwu Kɔmɔ Bɔkoꞌba

¹⁸Kole ma ga, kinza diꞌdike akɔꞌɔ ꞌbeze köꞌbö dë ŋge dɔ kpeze tine zize ꞌdɔ tokɔnyi lëpï ze ga ŋgï ko rɔ ma laka. ¹⁹Ɔdɔ doꞌdɔke te na ti dikalike ŋgï lende laka ꞌba Bɔkoꞌba ëdï mïze. ²⁰Kina ɔdɔ dökïꞌdï ze këdï pele rɔ ma kombi gɔ köꞌdu ꞌba lende kënyë ze ga ti dëdïke ŋgï ti mï këyï kɔmɔ Bɔkoꞌba. Römöyï akikali abo ꞌba Bɔkoꞌba na rɔ dɔ kiteli kebe ꞌbeze. Kina bo na kikali wa pili.

²¹Kpe ame ga mɔꞌɔ ye ne, ɔdɔ këdï ꞌdeni tara dökïꞌdï ze kombi dë kpe gɔ köꞌdu ꞌba lende kënyë ze ga, ti dolomake rɔ dɔ kïtëwu kɔmɔ Bɔkoꞌba. ²²Kina bo ti kiꞌdi wa pili ame ga dititike ne ŋgï zize römöyï dëdï duwöke dɔ köꞌdu kiꞌdi abo ꞌdeni dëdï doꞌdɔke akoꞌdɔkɔ abo ga. ²³Wa ma bo kose zize na rɔ tiꞌdi dɔze gɔ lende ꞌba kole abo Yësu Kurïsïtö kina gbï ꞌdɔ tɔꞌɔ lëpï ze ga kɔzɔ ame Kurïsïtö kiꞌdi köꞌdu mo zize ne tara. ²⁴Ze ame ga pili duwöke dɔ ndose ꞌba Bɔkoꞌba ne ze ꞌdeni rɔ akɔtɔ ti bo Bɔkoꞌba kina bo ꞌdeni gbï rɔ akɔtɔ tize. Nyï Kɔtɔ Laka abo nime bo kiꞌdi mïze ne na kiꞌdi ze ꞌdeni dikali ma bo Bɔkoꞌba këdï ꞌdeni rɔ akɔtɔ tize.

Bɔ Kumë Lende Dɔ Kïndëndë

¹Kpe ame ga mɔꞌɔ ye ne, iꞌdike kɔmɔye kandi laka, bɔ kumë lende dɔ kïndëndë ma konzi itaꞌba ꞌdeni kote mï dɔliŋɔ. Kina kinza kiꞌdike dɔye dë ŋgï welo gɔ lende ꞌba bɔtɔ ame ga pili këdï kiya te lïjë ëdï ti Nyï Kɔtɔ Laka ꞌba Bɔkoꞌba mïnnï ne. Tine ziye titi tiyɔzɔ mo ꞌdɔ kikalike ɔdɔ këdï ŋgï rɔ ꞌba Bɔkoꞌba. ²Tikali mo na kɔzɔ a nime te, lïjë ame ga këdï kiya te Yësu Kurïsïtö ako ꞌdeni dɔliŋɔ bine rɔ bilaka lesi ne lïjë na rɔ ꞌba Bɔkoꞌba. ³Ne lïjë mɔtɔ ama ga pili kowasa lende nime kiya te Kurïsïtö ako dë su dɔliŋɔ bine rɔ kïnë bilaka lesi ne lïjë inza rɔ ꞌba Bɔkoꞌba. Lïjë ꞌbënnï ꞌba bɔ ndoꞌji bɔ ya ꞌba Kurïsïtö tönë na. Uwöke ꞌdeni mɔlo bine iya te bɔ ndoꞌji nima ëdï kako mï dɔliŋɔ kina me bo kömö ꞌdeni.

⁴Kole ma ga, kpe na rɔ kole ꞌba Bɔkoꞌba kina aꞌdake bɔ kumë lende dɔ kïndëndë naga nima ꞌdeni. Römöyï bo Bɔkoꞌba ame mïye ne bo na mbiri di dɔ Satani nima mïnnï lïjë bilaka ꞌba dɔyayi nime ne. ⁵Kina ma bɔ kumë lende dɔ kïndëndë naga nima lïjë ꞌbënnï rɔ bilaka ꞌba mï dɔyayi nime. Kina lende ꞌbënnï ga pili rɔ ꞌba dɔyayi nime gɔ köꞌdu mo na ma bilaka ꞌba dɔyayi nime këdï kuwö dɔ lende ꞌbënnï ne. ⁶Ne ze ꞌbeze ma ze tiye nime ze ꞌdeni rɔ kole ꞌba Bɔkoꞌba. Kina ame ga pili kikali Bɔkoꞌba ne na ti kuwö dɔ lende ma ꞌbeze. Tine lïjë ame ga pili kinza rɔ kole ꞌba Bɔkoꞌba ne lïjë uwö dɔ lende ze dë. Kina me bɔ ame ɔdɔ doŋgɔ bo kuwö dɔ lende ze nima, omba bo na rɔ bɔ ame Nyï Kɔtɔ Laka ꞌba lende kodɔrɔ ꞌba Bɔkoꞌba këdï mï bo ne. Tine ma kinza kuwö dɔ lende ze dë naga nima ti dikali lïjë ŋgï rɔ ma laka rɔ ꞌba Satani bɔ bëtï.

Akɔꞌɔ

⁷Kpe ame ga mɔꞌɔ ye ne, döꞌböke ti nduwë tɔꞌɔ rɔze. Römöyï akɔꞌɔ na rɔ ꞌba Bɔkoꞌba. Kina me ze ame ga pili ti akɔꞌɔ mïze ne ze na rɔ kole abo ꞌba Bɔkoꞌba kina ze na gbï rɔ bilaka ame ga kikali bo ne. ⁸Tine lïjë ame ga ꞌbënnï kinza akɔꞌɔ mïnnï lïjë kɔꞌɔ lëpï nnï ga dë ne, lïjë ikali Bɔkoꞌba dë du te römöyï Bɔkoꞌba bo na rɔ mï zana ꞌba akɔꞌɔ. ⁹Bɔkoꞌba ileme akɔꞌɔ abo ꞌdeni zize ti toja kole kɔtɔ kpökï abo kako mï dɔliŋɔ ame ti bo na dëdïke ꞌdeni ti dïdï ma ŋburuŋburu ne. ¹⁰Akɔꞌɔ ame rɔ ma laka ne inza rɔ ma dɔꞌɔke bo Bɔkoꞌba. Akɔꞌɔ ma laka mo na rɔ ame bo kɔꞌɔ ze bo koja kole kɔtɔ abo kako kombi laŋba ꞌba lende kënyë ze ga ti tölë abo ne.

¹¹Kpe ame ga mɔꞌɔ ye ne, kɔzɔ ame Bɔkoꞌba kɔꞌɔ ze ꞌdeni kulöwö ne zize gbï ꞌdɔ tɔꞌɔ lëpï ze ga. ¹²Bɔtɔ mɔtɔ inza kɔtɔ te ame koꞌja kïnë Bɔkoꞌba. Tine ɔdɔ dɔꞌɔke lëpï ze ga ꞌdeni Bɔkoꞌba ꞌdeni rɔ akɔtɔ tize, akɔꞌɔ abo ëdï ꞌdeni ŋgï koꞌdɔ ndɔbɔ laka mïze.

¹³Dikalike ꞌdeni ze rɔ akɔtɔ ti Bɔkoꞌba kina bo gbï rɔ akɔtɔ tize gɔ Nyï Kɔtɔ Laka abo nime bo kiꞌdi ꞌdeni mïze ne. ¹⁴Kina gbï doꞌja ꞌdeni Bɔkoꞌba ꞌbu ꞌba Yësu Kurïsïtö oja kole abo dɔliŋɔ bine tɔmɔ bilaka di mï tölë na me dëdï duwöwö ꞌdeni ti. ¹⁵Kina me lïjë ame ga pili kutï gɔmo Yësu na ŋgï rɔ kole ꞌba Bɔkoꞌba ne lïjë na köꞌbö ꞌdeni rɔ akɔtɔ ti Bɔkoꞌba kina Bɔkoꞌba gbï rɔ akɔtɔ tïnnï. ¹⁶Dikalike laka ꞌba akɔꞌɔ ꞌba Bɔkoꞌba gɔze ꞌdeni. Bo na rɔ mï zana ꞌba akɔꞌɔ. Kina lïjë ame ga pili köꞌbö tɔꞌɔ lëpï nnï ga ne lïjë na ꞌdeni rɔ akɔtɔ ti Bɔkoꞌba kina bo gbï rɔ akɔtɔ tïnnï.

¹⁷Kina ɔdɔ akɔꞌɔ ꞌba Bɔkoꞌba këdï ꞌdeni ŋgï koꞌdɔ ndɔbɔ mïze rɔ ma laka ti dëdïke ŋgï rɔ dɔ kïtëwu mï kada ꞌba burë löbu nima këdï kako ne. Dɔ kïtëwu ze ti këdï ŋgï gɔ loma ze mï dɔliŋɔ bine ame ꞌdeni gbï ko kɔzɔ ꞌba Kurïsïtö tara ne. ¹⁸Tikere ni ti akɔꞌɔ odɔꞌbɔ dönnï dë bi kɔtɔ. Kina me ɔdɔ kiya te akɔꞌɔ ꞌba Bɔkoꞌba këdï ꞌdeni koꞌdɔ ndɔbɔ rɔ ma laka mïze ti koga tikere ŋgï ŋbö yaga. Römöyï tikere ëdï koloma mï bilaka gɔ lende ꞌba karama nime Bɔkoꞌba këdï kodɔ dɔ bilaka ne. Kina me lïjë ame ga rɔ tikere ne akɔꞌɔ ꞌba Bɔkoꞌba oꞌdɔ ndɔbɔ dë du te laka mïnnï.

¹⁹Bɔkoꞌba na kɔꞌɔ ze ꞌdeni dɔgba kina gɔ köꞌdu mo ꞌdɔ dɔꞌɔke bilaka gbï. ²⁰Nï bɔ ame koꞌji löndö yï ne ɔdɔ kiya te ɔꞌɔ Bɔkoꞌba nï bɔ bëtï na. Römöyï ɔdɔ kɔꞌɔ löndö yï ame këddï koꞌja kïnë mo ne dë, ti kɔꞌɔ Bɔkoꞌba ame kinza koꞌja kïnë mo dë ne totondo ga? ²¹Kina gbï köꞌdu kiꞌdi ame Kurïsïtö kiꞌdi zize na me lïjë ame ga pili kɔꞌɔ Bɔkoꞌba ne gɔ lïjë kɔꞌɔ löndö nnï ga gbï.

Taꞌda Dɔliŋɔ

¹Lïjë ame ga pili kiꞌdi dönnï ꞌdeni ŋgï gɔmo Yësu na rɔ Kurïsïtö ma Bɔkoꞌba koja ne lïjë na rɔ kole ꞌba Bɔkoꞌba. Kina me bɔ ame kɔꞌɔ ꞌbu ne ɔꞌɔ kole mo ꞌdeni gbï. ²Gɔ lende mo na me dikalike ꞌdeni ɔdɔ dɔꞌɔke Bɔkoꞌba doroke köꞌdu kiꞌdi mo gbï, omba dɔꞌɔke kole abo ꞌba Bɔkoꞌba ꞌdeni. ³Tɔꞌɔ bo Bɔkoꞌba na rɔ toꞌdɔ köꞌdu kiꞌdi abo. Kina köꞌdu kiꞌdi abo inza rɔ gomɔ zize ⁴römöyï lïjë ame ga pili rɔ kole ꞌba Bɔkoꞌba ne ëdï taꞌda wa ꞌba dɔliŋɔ nime ŋgï pili rɔ gɔmo. Tiꞌdi dɔze gɔ lende ꞌba Yësu na rɔ akaꞌda ame daꞌdake dɔliŋɔ ꞌdeni timo mï kɔtɔ. ⁵Kina me mëdï miya ziye, bɔtɔ mɔtɔ inza ame kaꞌda dɔliŋɔ tine ŋge kɔtɔ rɔ bɔ ame kiꞌdi dönï ŋgï gɔmo Yësu na rɔ kole ꞌba Bɔkoꞌba ne.

Lende ꞌBa Yësu Kurïsïtö

⁶Yësu Kurïsïtö na rɔ bɔ ame kako ꞌdeni dɔliŋɔ bine ti mini ꞌba bapatisi gbï ti roma ꞌba tölë abo. Bo ileme rɔ bo dë ŋge ti mini tine bo ileme rɔ bo ti mini gbï ti roma. Kina Nyï Kɔtɔ Laka odɔrɔ gɔmo ꞌdeni yaga laka. Römöyï Nyï Kɔtɔ Laka na rɔ bɔ lende kodɔrɔ. ⁷Kina me wa ëdï ꞌdeni mota ame kileme laka ꞌba lende ꞌba Yësu. ⁸Lïjë wa mota naga nima Nyï Kɔtɔ Laka ni ti mini ꞌba bapatisi ti roma ꞌba tölë abo utï dɔ lende pili bi kɔtɔ.

⁹Oŋgɔke te, ze dutïke gɔ wa ma bilaka kileme zize, ne ꞌba Bɔkoꞌba ame bo kileme na rɔ dɔ kiteli di dɔ ꞌba bilaka lesi. Lende ꞌba kole abo na me bo kileme bine. ¹⁰Kina me lïjë ame ga kiꞌdi dönnï ꞌdeni gɔ lende ꞌba kole ꞌba Bɔkoꞌba ne akileme abo nime ëdï ꞌdeni mï dökïꞌdï mo. Tine lïjë ame ga pili kiꞌdi dönnï dë gɔ lende ꞌba Bɔkoꞌba ne lïjë oꞌdɔ Bɔkoꞌba ꞌdeni yaga rɔ bɔ bëtï. Römöyï lende ꞌba Bɔkoꞌba ame bo kileme kole abo timo ne na ma ꞌdeni lïjë kilagi tiꞌdi dönnï gɔmo.

¹¹Ame na gbï rɔ akileme abo mo. Bo iꞌdi dïdï ma ŋburuŋburu ꞌdeni zize ti kole abo. ¹²Kina me bɔ ame ꞌdeni rɔ akɔtɔ ti kole ꞌba Bɔkoꞌba ne ëdï ꞌdeni ti dïdï ma ŋburuŋburu. Tine bɔ ame kinza rɔ akɔtɔ ti kole ꞌba Bɔkoꞌba ne inza ti dïdï ma ŋburuŋburu.

Dïdï Ma Ŋburuŋburu

¹³Wa naga nime mugu ꞌdeni ziye ꞌdɔ kikalike ëddïke ꞌdeni ti dïdï ma ŋburuŋburu. Römöyï kpe na rɔ ya ame ga kiꞌdike dɔye ꞌdeni gɔ lende ꞌba kole ꞌba Bɔkoꞌba. ¹⁴Ze ꞌbeze ma ze tiye nime ꞌdeni rɔ dɔ kïtëwu kɔmɔ Bɔkoꞌba römöyï gɔ akoꞌdɔkɔ abo ɔdɔ dititike bo gɔ wa mɔtɔ bo ëdï nduwë tuwö dëkï ꞌba dɔze. ¹⁵Gɔ köꞌdu mo dikalike ŋgï laka ɔdɔ dititike a mɔtɔ di zi bo dikalike ŋgï dëdïke ꞌdeni timo.

¹⁶Ɔdɔ nï mɔtɔ koꞌja löndö yï mɔtɔ këdï koꞌdɔ lende kënyë ame kinza rɔ ꞌba tölë ne, ititi Bɔkoꞌba gɔ bo. Kina bo ti koꞌja dïdï ma ŋburuŋburu ŋgï ɔdɔ lende kënyë abo mo nima kinza rɔ ꞌba tölë. Römöyï lende kënyë mɔtɔ ga ëdï bina rɔ ꞌba tölë. Kina me lende nime miya te ꞌdɔ kititi Bɔkoꞌba gɔ bɔ lende kënyë ne inza gönnï ya ame ga koꞌdɔ lende kënyë ma te ne. ¹⁷Lende kirasi pili rɔ gɔmo rɔ lende kënyë di kɔmɔ Bɔkoꞌba. Tine lende kënyë mɔtɔ ga inza rɔ ꞌba tölë ma ŋburuŋburu.

¹⁸Dikalike kole ame ga rɔ ꞌba Bɔkoꞌba ne öꞌbö dë kpe nduwë toꞌdɔ lende kënyë. Römöyï Yësu kole ꞌba Bɔkoꞌba itata lïjë ꞌdeni. Satani osa rönnï dë kpe. ¹⁹Ze pili dikalike ꞌdeni gbï ze ꞌba Bɔkoꞌba na, ne dɔliŋɔ nime pili ëdï közï Satani. ²⁰Dikalike ꞌdeni kole ꞌba Bɔkoꞌba ako ꞌdeni dɔliŋɔ bine tiꞌdi wa naga nime këdï njo zize ꞌdɔ dikalike Bɔkoꞌba ame ŋge kɔtɔ kpökï mïtɔrɔ ne. Ze ꞌdeni rɔ akɔtɔ ti bo Bɔkoꞌba römöyï ze ꞌdeni rɔ akɔtɔ ti kole abo Yësu Kurïsïtö. Bo na rɔ Bɔkoꞌba ame kɔtɔ kpökï mïtɔrɔ ne. Kina bo na rɔ bɔ dɔ dïdï ma ŋburuŋburu.

²¹Kina me kole ma ga, kinza kupöke rɔye dë ti lende ꞌba akoro.