3 ZAA

Tanabɔgʋʋ

Zaa

’cɛlɩɛ

’Bɔgʋ nɩ ’mö a wɛlɩɩ

Gayusɩ, ‑ɔ glɩnɩmöä Zezwii Kliisɩ a ‑nɔɔ, ’mö Zezwii a tietienyɔ Zaa ’pää ’bɔgʋ nɩ ’wʋ. Ɛ’ɛ ‑bhö nyɩasɛ, ‑maa ɔ ’kɔ bhälɩ, ɔ ’kɔ’ɛ ‑gämö bhɩyɩ sɛɛ ɔ ’zʋnɩɛ nɩkpaa ‑wa möä ‑mä ’wa mä’a Lagɔwɛlɩɩ biaa ’yli a za.

‑Mä ’bɔgʋ nɩ ’mö. Pɔɔlʋ bhɩzɩmö’ɛɛ Zezwii a ‑nɔ ‑mɔmɔɔ ‑bhlʋ wa laa Demetlusɩ, ‑ɔnyɩɩ ’dɩ a ‑dɩ nɩkpaa ’wuë sɛɛ. ’Wë ’n ɔ yiɛ Gayusɩ ’dɩ ’mö zʋ nɩɩ, ɔ nɩ tɩ Diotlɛfʋ manɩ. Diotlɛfʋ, ‑ɔ ’yɩbhää dɛ’ɛ ɔ nɩ ‑gänɩ ’yuku, ‑maa ‑ɔɔ ngluä nɩkpaa päla gbʋʋ.

‑A’bhɩanyɩ, dɩɩ ’bɔgʋ nɩ zʋʋnyɩɛ ’mö miɛ nɩɩ, nɩkpaa ’wuë ‑wa nʋä ‑Alowli Zezwii ’a ’libhoo, ‑a kä ‑a ’kʋä päla klɩpaa.

Bhälɩwɛlɩɩ

¹‑Amö ’yukugänɩnyɔɔ, ‑nmö na dlɩsɛkänyɔ Gayusɩ, ‑nmöö ‑glaaa dlɩ ’wʋ tenyii‑i, ‑nmö n cɛlɩɛ dɛ’ɛ ’wʋ.

Zaa yɛ Gayusɩ bhɩzɩ

²’Tua, ‑ayo! ‑Na’a sɛ ‑n ‑gänɩɛ Lagɔ ’a wɛlɩɩ, ‑sɩbhä ‑gä kɛ. N bhibhee Lagɔ nɩɩ, ‑na’a kpökpaa nɩ ‑gämö ‑sɩbhä kɛ. ³‑A ’bhɩa Lagɔgänɩwa ‑mumuë mʋa ’bhööä ‑mä ‑na’a mä’a, mʋa nyɩaaa ’dɩ nɩɩ, Lagɔ ’a ‑tiamö a wɛlɩɩ ’mö a dɔ’wʋ dɛ ‑n kää sɛ, ‑n kä ‑lɛ sɛ ’yize, sɛ yɩ gbää, ‑n nɛmö ’kwädlɩ ‑sɩbhä. Wa nyɩaaa ‑sɩbhä ’dɩɩ, ’mänaa lɩbhaaa tenyii. ⁴‑Wa ’zʋä Lagɔ ’a ‑tiamö a wɛlɩɩ a za na ’yuëë, n ‑kä ’nʋ nɩɩ, wa ‑gënii sasɛɛ, miɛ ’na ’mäna ’wuë ma‑a.

⁵’Tua, ‑na ’bhɩa Lagɔgänɩwaa, wa yi lɛgäwa a’bhë glɩnɩ oo, ‑na’a sɛ ‑n ’zʋnɩmuëë sasɛ ’ylii, ‑sɩbhä nɛnɩ a nɛnɩɛ tenyii. ⁶Wa gla’mö a ‑mumuë, wa yiɛ mä’ää, sɛɛ ‑n tulanuëë ‑na’a ‑wawʋʋ ’ylimö a ’tɩtɩ, ’mö wa ‑sɛnɩɛ ‑lɛ Zezwii a ‑nʋa a ‑zɩkpa a ’yila ’klʋ. N bhiamö, nɩkpa ’la, sɛɛ ‑n ’kʋä ’wʋ yi ’n yɩ ’kää Lagɔ dlɩ yɔwʋ nɛnɩɩ, yuë ‑sɩbhä ’wʋ, mä wa ‑wʋä mö dɔ’wʋʋ, wa ’käa ’yukusɛ mö. ⁷Wa ’kä Zezwii Kliisɩ ’a nglɩɩ saa ’wuë biaa, nza wa möä ‑mä lɛga ’mö. Wa ‑wʋä mö dɔ’wʋʋ, ‑waaa Zezwii a ‑nʋä glɩnɩɩ, wa ’nuëë ‑lu zɛla. ⁸‑Sɩbhä a za n gbää nɩɩ, ‑abhʋa Zezwii a ‑nʋa, ‑a kä ‑a ’kä ‑sɩbhä a nɩkpa ’wʋ yi. ‑A ‑kä ‑sɩbhä ’zʋʋ, Lagɔ ’a ‑tiamö a wɛlɩɩ a biabialibhoo, mö ‑a nʋmöä da’a.

’Yukugänɩnyɔzokwë

⁹N yɛ Zezwii a ‑nʋa a ‑zɩkpaa ‑a ‑wʋä ‑mä ’a mä’a ’bɔgʋ ’wʋ ’pä. ‑Maa Diotlɛfʋ, ɔnyɩ ɔ libhïä a gla’mö a dɔ’wʋ ’kɔdɔ ’mö ’wʋ zaa, ɔ’ɔɔ ’yɩbhä ɔ ’kä ’na wɛlɩɩ ’yukwli ‑pʋnɩ. ¹⁰‑Sɩbhä a za, n ‑kä yii, ’ɔ ‑lizokuu ’wuë ɔ nʋä, ‑a yi yɩ ’kïbhï ’ylɩmö. Wɛlɩzoku ɔ bhïlaa ‑aa dɛ. Sa’a a ’yize ɔ’ɔɔ zʋ. ‑Maa nɩkpaa ‑wa yiɛ ‑mä ’a mä’a Lagɔ ’a wɛlɩɩ biaaa, ɔ’ɔ pölʋä. ‑Mumuë ‑wa yɩbhää wabhlɩ wa ’kʋä pälaa, ɔ lɛ wa nɩ tuë päla, ’n ɔ sʋää ‑mä Zezwii a ‑nʋa ‑zɩkpa ’mö.

¹¹’Tua, ‑wa nʋä ‑lizokuu, tuëa manɩ. ‑Maa ‑wa nʋä ‑li a ‑lii, ’wa gbäpöö mö ‑n nɩ ‑gänɩ. ‑Ɔ nʋä ‑li a ‑lii, Lagɔ a ‑nɔ ɔ glɩnɩɛ. ‑Maa ‑ɔ nʋä ‑lizokuu, ɔ’ɔɔ Lagɔ ‑yi.

¹²‑Aa ‑daayu Demetliusɩ ɔbhlɩ, nɩkpaa ’wuë sɛ ɔ ’dɩ a dɩ. ’Ɔ sɛ ɔ ‑gänɩɛ sasɛ Lagɔ ’a ‑tiamö a wɛlɩɩ, ‑sɩbhä ma‑a tulanɩɛ ’ylimö nɩɩ, ɔ ‑gä kɛ. ‑Abhʋaa ‑wʋä mä’ää, ‑a ‑sɛmö ɔ ’dɩ a dɩ. ‑Na’bhë, ‑n ‑yi sɛ nɩɩ, sɛ ‑a gbää nɩkpɛ a dɛɛ, ‑tiawɛlɩɛ.

’Gbëbhlenɩwɛlɩɩ

¹³N ‑kä wɛlɩ ‑mimii a ‑bɛ ’mlɩ, n ‑kami ’nyɛ, ‑maa n’n‑ä ’yɩbhä n ’kɩ ’bɔgʋ ’mö ’cɛlɩ. ¹⁴Ɛ’ɛ ‑bhö nyɩasɛ ‑maa na’bhë, ɛ ‑bhɩɛ n ‑yimöa’a ‑pa ’ylɩmöä yi. N ‑kä yii, n ‑kamö ngli ’dɩ ’nyɛnɩ.

¹⁵’Tɩɩglɩglɛ nɩ ghälamö ’wʋ. ‑Na ’tuawa ‑wa ‑wʋä mä’ää, wa lɛ wa bhälɩmö. ‑Aa ’tuawa ‑wa ‑wʋä ‑mä, ’nyʋä bhʋlʋbhlʋ ’dɩ nɩɩ, n bhäluë.