2 PIƐLƖ

’Sɔnabɔgʋʋ

Piɛlɩ

’cɛlɩɛ

’Bɔgʋ nɩ ’mö a wɛlɩɩ

Zezwii a ‑nʋa a ‑zɩkpöö ’wuë ’mö Piɛlɩ ’pää ’sɔnabɔgʋ nɩ ’wʋ. ‑Mä wʋ ’mö, Zezwii a ‑nʋa ‑wa ‑wʋä ‑mä ‑zɩkpö ’la ’möö, ’mö ɔ nyɛɛ ’dɩ nɩɩ, ’tɛnyɩ ‑ɛ tʋʋä ‑mä ɔ ’kä mä’ä ’pɩwʋ ’wʋ ’bhöö, ɛ yɛ ’dio. Zaa, Lagɔwɛlɩɩ ɔ ’nyʋä a‑a, ’mö ɔ ligbanuëë ’wʋ.

‑Mä Tɛkäbɔgʋʋ ’mö a saa, swɩ nyɛmʋ ’mö ɔ pʋä nɩɩ, wa yuë Lagɔwɛlɩɩ a za ’klɩ ’yɩa ‑kë, Zezwii a dlɩtɛɛnɩ dɔ’wʋ, dɛ wa kää sɛ, wa nɩ nyɔlʋ ‑lɛ kɛ. ’Dɩ ’mö ɔ zuë’ɛɛ ’gämö nɩɩ, ’n nɩkpa ‑kä ‑mä wa mä’a yi, wa ‑kʋä wɛlɩɩ ‑yɩ ‑nyɛ Zezwii ’a ‑tiamö a wɛlɩɩ wa ’nyʋä a‑a ’nɩ mönɩɛ yɔwʋ ’nyɛɛ, wa nɩ tɩ yiowɛlɩ ’la ’wʋ nglu.

Bhälɩwɛlɩɩ

¹‑Amö Zezwii Kliisɩ a ’yliwʋnyɔ Simɔɔ Piɛlɩ, ‑amöö glɩnɩɛ ɔ tietienyɔɔ, abhʋa ’tɛɛnɩɛ ‑aa saa Lagɔ dlɩɩ, abhʋa n ’pää ’bɔgʋ nɩ ’wʋ. Dlɩtɛɛnɩtɛnɛ ’la, ‑aa dɩba Lagɔ ‑nyɛ ‑aa Puënyɔ Zezwii Kliisɩ ’sɔ a ‑kpöö’wʋwʋza a ’ghïlee.

²Sɛ n bhibhee a dɛ ‑aa dɩba Lagɔ, ‑sɩbhä ma‑a nɩɩ: Ɔ’bhë, ɔ ‑nyɛ ‑Alowli Zezwii ’sɔ, a nɩ yɩbhlɩnuë sasɛ, nzɩɩ ’tɩɩglɩglɛɛ ‑nyɛ ’nyupälɩɩ ’sɔ ‑yɩ ’bhöönuëë ’möö, yɩ ’kanyɩ ’wlu ’mänanɩ.

Lagɔ mɔɔ ‑sanyɩɛ ‑lɛ

³Sɛ’ɛ n gbää nɩɩ, ‑Alowli Lagɔ mɔɔ zʋʋnyɩɛ ’ɔ ’mötɛɛnɔɔ ‑gömö, nza ‑a bhɛnɩa’aa ‑a ’kä ‑tiamö a ‑bhölɩbhölɛ ghlɩ, ‑a ’kɔ’ɛ sasɛ ‑gänɩ. Mɔɔ gbää, Zezwii Kliisɩ, ‑ɔ ’ghïliɛ ‑ɔ ’tɛɛ ’mö, ‑ɔ ‑sanyɩɛ ‑lɛ ‑a ’kɔ ’wʋ ‑glɛɛ, a‑a yoo yɩbhlɩnɩ. ⁴‑A yɩbhlɩnɔɔ a dɛsɛkälii ɔ nʋä nɩɩ ɔ yi ‑aa dɛ ’yli ’wälanɩɩ, yɩ’ɩɛ ‑sɩbhä a sɛ ‑wʋ, miɛ nɩɩ, mä’ä ’pɩwʋ a nɩkpaa ‑wa ’kää ’yli bhɩɛ ’lɩlɩlɩ ‑lii a ’tʋzokwëa a za‑a, ‑a ’naa ’kä wa saa ’yli bhɩɛmö, ‑maa Lagɔ, ’ɔ ‑wʋwʋsaa ‑sɩbhä ‑a ’kää ’mö yinɩ. ⁵‑Sɩbhä a za, abhʋaa ’tɛɛnɩɛ Lagɔ dlɩɩ, a nɩ ’tɛmanɩ ’yli yɔwʋ, ’a nɛmönɛmösaa ’wuë ’kä Lagɔsɛ ‑wʋ. ‑Sɩbhä ma‑a ’kää ’ylimö tulanɩ nɩɩ a ‑yi ‑tiamö Lagɔ. ⁶A nɩ ‑yi’ɛ ’a dilaa a ’wʋpɩɛnɩsɛ. Dɛ a kää sɛ, a nɩ nyɔnʋ ‑lɛ kɛ, a ’kä Lagɔ ’wʋ ‑glɛɛ ’tɩɩ. ⁷‑Mä ’a Lagɔgänɩgänɛ ’wuë ’mö, a nɩ ‑wa a ’bhɩa Lagɔgänɩwaa. A nɩ kä’ɛ ’gämö nɩkpa ’wuë a ‑wawʋ dlɩ zɛmö. ⁸Sa’a ‑sɩbhä a kää a ’kä ‑wʋ. ‑Li a ‑li ’la ’wuë ’mö a dɔ’wʋ, a ‑kä ’yukusɛ mö ’yizee, yɩ yi ’nglɩ ‑kä a yi ’kwädlɩ sasɛ ‑Alowli Zezwii Kliisɩ yɩbhlɩnɩ. ⁹‑Maa ‑ɔ ’nɩ ‑sɩbhä nɛmöö, Lagɔ ’a wɛlɩɩ ’mö a dɔ’wʋ, ’kukwlekänyɔ a sɛ bhöbhlɩnɩ ɔ bhöbhlɩnɩɛ. Sɛɛ Lagɔ yɛɛ ’ɔ bhla’mö a ’nyinylolii a gbʋʋ ’yi ’tatinɩ a dɔ’wʋ, ‑dlʋ ɔ ‑dlʋä.

¹⁰‑Atʋayuënyɩ, nɩkpa a ‑muë Lagɔ ‑sɛɛ ‑lɛ ’n wa yiɛ ɔ ‑nʋä ’zʋʋ, ’mö a glɩnɩɛ zaa, dɛ a kää da’a sɛ, a nɩ nyɔnʋ ‑lɛ kɛ a tɩa Lagɔ ’a ’yioo ’wʋ ’bhöö. ‑Lɛ a dɔ’wʋ, ¹¹‑Alowli Zezwii Kliisɩ, ‑aa Puënyɔ, ’pɩwʋ mä ɔ ’kämanɩɛ, mää ’naa ’kää ’yli bhɩɛɛ, a yi ‑mä ’tɩɩ ghlɛ.

¹²Nza n ligbananyɩɛ ’kwädlɩ kïbhï nɩ ’wʋ. N ‑yi abhlɩ sɛ nɩɩ, Lagɔ ’a ‑tiamö a wɛlɩɩ wa ’nyanyɩɛ, a ‑yii ’tɩɩ, ‑mä yɩ ’mö a dɔ’wʋ, a ‑nyɔnʋ glu. ¹³‑Sɩbhä yɩ ‑wʋ ’mö, ‑maa n ‑kä ‑bhlɛ ‑bhölɩmöö, n kä n ’kanyɩ ’kwädlɩ ’dɩ ’nyɛ, a ’kä ‑ligba a ’kä ‑lɛ glɩ. ¹⁴Nyɩasɛ n’n‑ä ‑sɩbhä gbä, ‑maa n ‑yi sɛ nɩɩ, n yia’a ‑pa ’pɩwʋ ’bhöö. ‑Alowli Zezwii Kliisɩ a’bhë mɔɔ tulanɩ’miɛ ’yli’mö. ¹⁵Nza n tɩtaa yɛ’mö, ’n n ’cɩanyɩɛ wɛlɩ nɩ, nzɩɩ n ‑käa ’pɩwʋ ’bhöö ’wëë, a ’kɩa ’wʋ ligbanɩ.

‑Wa ’yɩɛ Zezwii ’a ’ghïlinɔɔ ’ylɩmöö

¹⁶‑Alowli Zezwii Kliisɩ, sɛ ɔ ’kää ’ɔ ’mötɛɛnɔɔ ’kɔdʋʋ ’mö mä’ä dʋdʋ ’wʋ ’bɩwʋ yi a wɛlɩɩ ‑a ’nyanyɩɛ, nyɩasɛwɛlɩɩ nɩkpa sɛɛ ’slɛlɛsɛ ’wlumöö, mö ‑a ’nɩɛ ’wʋ ’libhï ‑a ’kanyi ’nyɛ. ‑Maa ‑a’bhï, ’ɔ ’ghïlinɔɔ, ‑a kʋ tɛkäsɛ ’ylimö ’ylɩmönɩ, nza ‑a ’nyanyɩɛ ‑lɛ a wɛlɩ ’la.

¹⁷‑Zlɩ ‑aa dɩba Lagɔ ’zʋä Zezwii Kliisɩ a wɛlɩɩ kɛ ‑gömö ’n ɔ yiɛ ɔ ’nglɩ ’ghlimanɩɩ, ‑lɛ a zlɩ ’la ’mö, ‑a ‑wʋ a ‑lɛ Zezwii yɔwʋ, n wɛlɩ yiɛ ‑mä ghäyɩ ’wʋ ’bhöönɩ. Sɛ’ɛ yɩ gbää Zezwii a dɛ nɩɩ: «‑Mɔ nɩ ’dɛɛ, mɔɔ glɩnɩɛ ’na ‑Wawayuu, mɔɔ ‑glaa dlɩ ’wʋ.» ¹⁸Sɛ’ɛ n gbää nɩɩ, ‑mä Lagɔgägaa ’wlu, ‑a ‑nyɔɔ ’sɔ ‑a ‑wʋ ‑mä, a‑a yiɛ wɛlɩ ’la ‑bhʋlʋ kpɔ ’nʋ, yɩ ’bhöönɩ ‑mä ghäyɩ.

¹⁹Nza wɛlɩɩ Lagɔ ’a ’möbhïlanɩwaa ’wuë bhïla a‑a, ‑a kɩɛ tenyii dlɩ ’wʋ. ’Wa Lagɔwɛlɩ ’la, sɛɛ ’wapɛ lɩ’ɛ ’yuylukwë ’möö, ‑sɩbhä yɩ ‑wʋä mä’ä ’pɩwʋ, yɩ ’kanyɩ ’wʋ ngäla. Zaa, a ‑kɩɩ sasɛ ’yli köbhaa, ‑li a ‑liɛ. A nɩ ti kɛ ’mö ‑sɛ ‑këë, Lagɔ ’a zlɩ ’kädɛɛ ’kä zɩ, ‑Alowli Zezwii Kliisɩ wa laa ’zɔkpɔzeliyii, ɔ ’kä yi, ɔ’bhë ɔ ’kanyɩ ’wʋ ngäla a ’kä ’ɔ ’ghïlinɔɔ ’ylɩmö.

²⁰‑Atʋayuënyɩ, a ‑pʋnɩ sasɛ ’yukwli, n nɛ naa: Lagɔ ’a ’möbhïlanɩwaa a wɛlɩɩ ’wuë ‑yɩ cɛlɩɛ ‑mä ’wa Lagɔbɔgwɩɩ ’möö, sɛ yɩ sɛɛ ‑tiamö zɛmöö, nɩkpɛ ’nɩɛ bhɛnɩ ɔ ’kä ‑sɩbhä ɔnyɩgäsɛ a ’nɛɛnɔɔ ’mö yɩbhlɩnɩ. ²¹Ɛ’ɛ ‑bhö nyɩasɛ, ‑maa wa’bhï mʋa ’niɛ ’wlumö ‑sɛ wa ’kɩ bhïla, ‑maa ’Wugɔmʋʋ ’Wlɩlɩ mɔɔ ‑wuëë ‑gömö, mɔɔ ’nyʋää ’dɩ, wɛlɩɩ ‑yɩ ’bhöönɩɛ Lagɔ a’bhë nglii, ’n wa yiɛ bhïla.

Lagɔwɛlɩɩ a ’cɩawazokuu

¹Bhla’mö a dɔ’wʋ, ‑mä Lagɔ a ‑nʋa a jijo’wʋ, yiowaa ‑wa nʋä nɩɩ, Lagɔ a ’möbhïlanɩwaa wa glɩnɩɩ, wa ’wlʋnɩ a ‑mä ’yli. Sɛ ‑bhʋlʋ ‑kpɔ ’la, ‑sɩbhä nɩkpa a ‑muë ’cɩaa wɛlɩɩ ‑yi ‑nyɛ Lagɔ a ‑nɩɩ ’nɩ mönɩɛ yɔwʋʋ, wa ’kää ‑a’a ‑sɩkaa a ’tɛnyɩ nɩ ’mö ‑mä a jijo’wʋ ’yli ’wlʋnɩmö. Nɩkpa ’la, ‑Alowli Zezwii ‑ɔ zetiuëë, ’mö wa ’kää ‑gömö panɩ. Wɛlɩ a ‑mii ‑nyɛ Lagɔ ’a wɛlɩɩ ’nɩ mönɩɛ yɔwʋ, nɩkpɛ ‑kä ‑gänɩ ’n ɔ ’kää ’yli bhɩɛɛ, ’mö wa ’kää ‑mä a jijo’wʋ ylʋsɛ päla. ’Wa sa’a ‑sɩbhä ma‑a ’kää ’nglɩ ‑kä ’n Lagɔ ’kʋää ‑pa ’yli bhɩa. ²‑Maa nɩkpa a ‑bɛ yi ’wa wɛlɩzoku ’la ‑gänɩ wa ’kä wa saa ’zokwësɛ nɛmö. Wa za nɩkpa ’kää ‑wa ‑gänɩɛ Lagɔ ’a ‑tiamö a wɛlɩɩ a ’nglɩ nyima. ³‑Lɛ a yiowa ’la, gugwaguguu mʋʋ ’kää ‑mä wa dila zɛmö su. ’Wa wɛlɩɩ wa sɛɛ ’wlumöö, wa ‑kaanyi ’nyɛ dɔ’wʋ ‑wʋʋ, wa ’kanyɩ kä’mö kplɛ, ’mö wa ’kää sɛ tɛlɩ. ‑Maa sɛ’ɛ n gbää nɩɩ, Lagɔ ‑ɔ ’kʋää ’wa ‑lizokuu a ’pɛna ’nyɛɛ, ɔ ‑wʋ ’kwädlɩ ‑lɛ ’yize, ɔ’ɔɔ ngämö. Ɔ yuëa’a ‑pa ’yli bhɩa.

⁴Lagɔzuzukuu a’bhï ‑yɩ ‑sɛ a‑a bhlagɔgɔ’mö Lagɔ ’klʋkpamöö, Lagɔ ’niɛ ‑sɩbhä ’yi ’tatinɩ. ‑Maa ’bhʋkwa ’käda ‑a ’bhʋɔ ’möö, mää guylukwëa ‑wʋä, ‑mä ɔ ’pɩɛ, ‑mä yɩ ‑gwanɩɛ ’gogwi. ‑Mä yɩ ’kää ‑wʋ ‑këë ’ɔ ‑zijle ’kädaa a zlɩɩ ’kä ghlɛ. ⁵Sɛ ‑bhʋlʋ ‑kpɔ ’la ‑sɩbhä bhlagɔgɔ’mö, Lagɔnɩkpɛ Nowee a ’tɛnyɩ ’mö a nɩkpa ‑wa ‑sɛ a‑a Lagɔ ’klʋkpamöö, ɔ ’nuë a‑a ‑sɩbhä ’yi ’tatinɩ, ‑maa ’nyizakwë ’käda ’käda ɔ lɩbhaa, ’n nyuu yiɛ saa ’wuë ’wʋ yie, ’n wʋ yiɛ ’kpʋkpʋwa ’la ’yli bhɩa. Nowee ‑ɔ pä a‑a wɛlɩ nɩɩ wa nɩ ’zʋ Lagɔ ’klʋkpamöö, ɔ ‑nyɛ nɩkpa ‑mumuë ngbi’sɔ ’sɔ, wa ’yize ’mö Lagɔ ’pʋaa nyuu ngli. ⁶’Tɛnyɩ ‑mɛmɛɛ ’mö ’yɛ, Sodɔɔmö a ‑glɔɔ mu, Gomɔɔlʋ a ‑glɔɔ mu, ‑gwlɩ ’la ’sɔ ‑kpɔ ’mö a nɩkpaa ‑wa nʋä ‑lizoku a ’yizee, ’n Lagɔ yuëë yɩ ’pɛna ’nyɛ, ’n ɔ yuëë ’wa ‑gwlɩɩ sianɩ. Sɛ yɩ ’plɩɛ da’a ’wʋʋ, ‑sɩbhä ma‑a nyɛɛ nɩkpa ’dɩ nɩɩ, ‑waaa ’yɩbhä wa ’kä Lagɔ ’klʋkpamö zʋʋ, wa ’wuë wa yi ‑sɩbhä ’yli bhɩɛmö. ^7-8Sɛ’ɛ n gbää nɩɩ, ‑mä ‑gwlɩ ’la ’sɔ ‑kpɔ ’mö a nɩkpaa, ’yli wa bhɩɛɛ, nɩkpɛ ‑bhlʋ ‑kpöö ’mö Lagɔ ’pʋa a‑a ‑kosuu ngli, Lagɔnɩkpɛ Lɔɔtɩ mɔɔ. Nɩkpɛ ’la Lagɔ ’mö ɔ zʋ a‑a ’klʋkpamö zaa, nɩkpa ɔ glɩ a‑a da’a jijo’wʋʋ, sɛɛ zila zɩɛ ’yize, ‑lizokuu ’wa dilaa ’pänuëë ’wʋ ɔ ‑kɩɩ ’wʋ yɩlɩ, ɔ ‑kä ’wa wɛlɩzokuu wa bhïlaa ’yukwli ‑pʋnɩɩ, dlɩ ’yli yɩ sioo tenyii. ‑Maa ‑lɛ a ’klɩyɩyɛ ’la, Lagɔ ‑sɔnyɩ a ngli. ⁹Nza n gbää nɩɩ, Lagɔ, nɩkpa ‑wa ‑gänɩɛ ’ɔ wɛlɩɩ, wa ‑kä ’klɩyɩyɛ ’mö ‑wʋʋ, ɔ ‑yi sɛ ɔ ’kʋä ‑mä ‑sɛ. ‑Maa ’saa ’nɔɔ dlɩ yɔwʋ nɛnɩ ‑wa nwiɛ, ’ɔ ‑zijle ’kädaa a zlɩɩ, ’mö ɔ ‑kuanuëë, ɔ ’kʋä ’wa ‑lizokuu a ’pɛna ’nyɛ. ¹⁰Wɛlɩ ’la, ’nyinylolinʋwaa ’wuë a ‑liɛ, ‑maa ‑wa nʋä lizokuu wanyɩ a ‑wʋwʋsɛzokwëa ’pänuëë ’wʋʋ, ‑wa flanɩɛ ‑Alowli ’a ’kämanɔɔ ’ylimöö, mʋa ‑këliɛ tɛɛ.

Nɩkpa ’la, wa’a la nɩkpɛ a wɛlɩ wɛlɩ, wa’a ‑lu a nganɔ ku ’mö ‑kä. Zuzukuu ‑yɩ ’ghïliɛ, wa’a yɩ nganɔ ku ’mö ‑kä, ‑maa wɛlɩzokuu wa bhïlaa yɩ dɛ. ¹¹Lagɔzuzukuu a’bhë ‑yɩ ’tɛɛ ’mö ‑yɩ ziɛ yiowa ’la ‑wa ’cɩaa a ’fʋ a wɛlɩɩ ’wʋʋ, yɩ’ɩ bhïla yɩbhlɩ ‑sɩbhä zuzuku ’la a dɛ wɛlɩzoku Lagɔ a ’yila ’klʋ. ¹²‑Maa yiowa ’la wabhlɩ, nɩma a sɛ, wa’aa ’cɛlɩ a ‑cɛlɩ ’wlumö ‑kä. Sɛɛ nɩmɛ ‑wʋ’ɛ ‑lɛ wa ’kɛ köbhä wa ’kɛ ’lɩbhä a za‑a, ‑sɩbhä wa ‑wʋä. ’Saa wa’aa ‑yii a dɛ wa bhïlaa wɛlɩzoku. Lagɔ yuë ’ylɩ ‑bhlʋ ’mö ’yli bhɩa. ¹³’Wa ‑lizokuu wa nʋä, yɩ ’pɛnaa Lagɔ ’kʋää ’nyɛɛ, ma‑a da’a. ‑Lizokuu ’wa dilaa ’pänuëë ’wʋ, wa ’kɩ nɩkpabhë a ’yila ’klʋ nʋnɩ mɩɩ nɛnuëë dlɩ yɔwʋ. Wa ’wʋlinɩlinɛ ’zʋ ’wʋ ɛ ‑bhöä ’wa ‑lizokuu wa nʋä a za. Wa ’kanyɩ dula mɩɩ ‑bhuëë ’mäna ’wʋ. ¹⁴Wa ‑kä ’nglwɩ ’ylɩmöö, wa ’kʋä sɛ tɛlɩ a dlɩ wa pää cuu. Wa’a yɔlɔnɩ ’nyinyloli ’wʋ. ‑Waaa ‑bhlɛ sasɛ ’yli yɔwʋ ’tɛmanɩ Lagɔ ’a wɛlɩɩ ’mö a dɔ’wʋʋ, ’mö wa nyimaa ’wlumö. ‑Mä ’wa dilaa zɛmö, moni a tʋ a ’yize mʋʋ suä ‑mä. Wa ‑bhätlɩnɩ ’kɩ Lagɔ a ’yila ’klʋ. ¹⁵Wa yɛ Lagɔ ’a ’yioo ’wʋ ’bhöö, wa yɛ tʋʋ. Bhla’mö a Lagɔnɩkpɛɛ Balaamö, Bosɔɔ ‑yowli, ’ɔ ‑gbuduu, ’mö wa bhliɛ. Nɩkpɛ ’la, moni a tʋ a za ɔ yɩbhä a ɔ ’kä ‑lizoku nʋ. ¹⁶’N Lagɔ yoo ’ɔ ’klʋkpamösɛsʋ a za ’lʋnɩ. ‑A ‑yi sɛ nɩɩ, ‑sʋkʋfanɩ ’nɩ bhïla, ‑maa ‑sɩbhä yɩ ‑wʋ ’mö, ’n Lagɔ yiɛ ‑sʋkʋfanɩ ’mö ghlɛnɩ ’n ɛ yiɛ bhïla ’n ɛ yiɛ Balaamö ’dɩ ’nyɛ, ɔ ’kä ’ɔ ‑ɔɔ’nɛɛnɩli ’la kɛ’mö ‑sɛ.

¹⁷Sa’a a nɩkpaa, sɛɛ ’nyibhë ‑kä’ɛ ’mö yɛ ’n a ’nɩɛ dɛsɛ ‑kää, ‑sɩbhä wa ‑wʋä. ’Nyizakwë a ‑maa ‑kä’ɛ ’ylimö köbhä ’wë ’vuu ‑nyɛɛ plɩ’ɛɛ, ’mö wa ‑nyɛɛ ’wlʋnɩɛ, ’yli wa ’kää bhɩɛ. Dɛ ‑bhlʋ dɛɛ guylukwëa ‑wʋä, ‑lɛ Lagɔ ’kʋää ’zʋ.

¹⁸Wa bhïla ‑këkëkë, ‑maa ’wa bhïlawɛlɩɩ ’wuë ’nɩɛ zɛmö ‑kä ’lɩlɩlɩ. ’Zʋ’wʋbhölii, ’wa dlɩpäsɛzokwëa ’pänuëë ’wʋʋ, ’mö wa libhïä ’wʋ, nɩkpaa ‑wa ‑sɛɛ ’lili ’wʋ ’wa ‑lizokuu kɛ’mö wa ’kä Lagɔ ‑gänɩɩ, ’n wa nyimuëë ’wlumö. ¹⁹Sɛ’ɛ wa nyʋää ’dɩ nɩɩ, ’wa wɛlɩɩ, nɩkpɛ ‑kɩɩ ‑gänɩɩ, ‑lu ’naa ’kɔa’a ’wlumö ‑känɩ. ‑Maa ‑tiamö a dɔ’wʋ, wa’bhï, ’nyinylolii, ‑yɩ bhɩaa nɩkpɛ ’ylii, mɩɩ ‑känuëë ’wlumö. Zaa, nɩkpa ’la, ‑lizokuu wa nʋä a göwa wa glɩnɩɛ. Nyɩasɛ n’n‑ä ‑sɩbhä gbä, ‑maa ‑lu a ‑muu ‑känɩɛ nɩkpɛ ’wlumöö, wʋ gïyi ɔ glɩnɩɛ. ²⁰‑Maa nɩkpɛ ‑kä ‑Alowli Zezwii Kliisɩ ɔ Puënyɔ ’mö yɩbhlɩnɩɩ, mä’ä ’pɩwʋ a ‑lizokuu ’n Zezwii ‑kɔnyɩ ngli ’pʋa ’wë, ’n ɔ ‑kä’ɛ ’wʋ ’sɔ ’ɔ bhla’mö a daa nimï yi, ‑lizoku ’la ‑kɔɔ’ɛ ‑gömö ’kämanɩɩ, ‑sɩbhä a nɩkpɛ ’la, ’ɔ wɛlɩɩ, ’mö yɩ ’tɛɛa’a tenyii, yɩ zi tɛkänɩɩ ’wʋ. ²¹Sɛ’ɛ n gbää nɩɩ, nɩkpɛ ‑kä Lagɔ ’a ‑tiamö a wɛlɩɩ yɩbhlɩnɩ ’wë, ɔ ‑kɩɩ ‑gömö panɩ, wɛlɩɩ Lagɔ a’bhë ’nyɔ a‑a, ɔ ’nia’a ’klʋkpamö ’zʋʋ, ‑sɩbhä a nɩkpɛ ’la, ɔ ‑nɩɩ ’mö yɩ ’tɛɛ tenyii. Ɔ ’nɩ a tɛkäsɛ Lagɔ ’a wɛlɩɩ yɩbhlɩnɩ ’lɩlɩlɩ a’bhëë, yɩ nɛnɩ a. ²²‑Sɩbhä a nɩkpɛ ’la, ’ɔ ninea wa ’kɔɔ ’pänɩ, ma‑a nɩɩ: Gwɩ, ‑ɔ ‑kä ’mëti ’wë ‑ɔ li ɔnyɩ a ’mëtili.2.22 Plovɛɛbö 26.11. ’N nine ‑mämaa nʋ’ɛɛ nɩɩ: Kokoti, wa ‑kä bida ’wë ‑ɔ bhli ‑bädɩ.

‑Alowli Zezwii Kliisɩ yi ‑tiamö yi

¹Na dlɩsɛkäwanyɩ, n kanyɩ a tɛkäbɔgʋ ’wʋ ’pä ’wë, ’n n ‑wʋanyɩ’ɛɛ dɛ’ɛ ’sɔnʋ ’wʋ ’cɛlɩ dɔ’wʋ. ‑Mä yɩ ’sɔ ‑kpɔ ’mö, Lagɔwɛlɩɩ a ‑yiɛ ’kɩ, ’mö n ligbananyɩɛ ’wʋ, a tia käböwɛlɩ ’dʋanɩ. ²‑Maa Lagɔ ’a bhla’mö a ’möbhïlanɩwaa, ’wa Lagɔwɛlɩɩ wa ’cɛlɩ a‑a mi, ’n ‑Alowli Zezwii Kliisɩ, ‑aa Puënyɔ, sɛɛ ’ɔ tietiewaa ’nyanyɩɛ ɔ ’nglɩ ’mö ’dɩ ma, a nɩ ti ’kwädlɩ ’wʋ dlʋ. ³A nɩ ‑yi sɛ nɩɩ, ’pɩwʋ a ’ylibhɩɛdaa ‑kä ghlɛɛ yii, nɩkpa ‑mumuë yi ’yli ’wlʋ. ’Saa ’wa dilazokuu ’pänuëë ’wʋ a ’yize ’mö wa ’kää nʋ. Nɩkpa ’la, nɛpɔ wa ’kanyɩɛ nɛpɔ. ⁴Sɛ’ɛ wa ’kää nɩɩ: «A lɛ, Zezwii mɔɔ gbä a ɔ yi ’wʋ ’sɔ mä’ä dʋdʋ ’wʋ yinɩ. Zaa, ‑zlɩmɛ ɔ ’kä bhäa’a yi a’bhë ’nɩ? ‑Aa dɩbawaa ’wuë wa yɛ ’ku ’wë, ɔ’ɔ yia’a. ’Pɩwʋ a ‑lii ’wuë, sɛ yɩ ’maa ’kä a ’wlʋ a sɛɛ zɩkpaa ‑wʋ a‑a, sɩbhä a ‑wʋä dɛ’ɛ ’yize.» ⁵Wa ‑kä sa’a nʋ dɔ’wʋ ‑wʋʋ, ’saa wa dlʋä ’wʋ muä nɩɩ: Bhlagɔgɔ’mö a dɔ’wʋ, Lagɔ, ’ɔ bhïlawɛlɩɩ ’mö ɔ ’wälanɩɛ zlɩ ‑nyɛ dʋdʋʋ ’sɔ ’mö. Saa ’wuë ’nyu a ’yize ‑wʋ a‑a ‑sɩbhä. ’N ɔ yiɛ bhïla, n dʋdʋ yiɛ ’wʋ ’wlʋ ’n wʋ ‑nyɛ nyuu yiɛ ’ylimö ‑sɛnɩ. ⁶‑Lɛ a zɩkpa ’la, Lagɔ ’kaa ’yli bhɩaa yii, nyuu ’mö ɔ bhɩanaa ’mö ’yli. ’Nyizakwë ’käda ’käda ɔ lɩbhaa ’n zɩkpaa yiɛ ’yli bhɩɛ. ⁷Sɛ ‑bhʋlʋ ‑kpɔ ’la ‑sɩbhä zɩkpaa ‑a ‑wʋä dɛ’ɛ ’wʋ, a ’kää ‑lɛ ‑wʋ ‑këë, ’tɛnyɩɩ Lagɔ a’bhë ‑dɩɛ, ɛ ‑kä ghlɛ ɔ ’ka ’yli bhiamö. ‑Kosuu ’mö ɔ ’kaa ’mö ’yli bhɩanɩ. Nɩkpaa ’wuë, ‑waaa ’yɩbhää wa ’kɔ ’klʋkpamö zʋʋ, ‑lɛ a zlɩ ’la, ’mö ɔ ‑kuanuëë ɔ ’kʋä ‑zijli tu, ɔ ’kʋä ’yli bhiamö.

⁸Na dlɩsɛkäwanyɩ, a nɩ ‑yi sɛ nɩɩ Lagɔ a dɔ’wʋ, ’ylɩ ‑bhlʋ, ’ylʋbö a milɩ ‑bhlʋ a sɛ ɛ ‑wʋä, ’n ’ylʋbö a milɩ ‑bhlʋ, ’ylɩ ‑bhlʋ a sɛ yɩ ‑wʋä. ⁹Sɛ’ɛ ‑mumuë nʋä nɩɩ: ‑Alowli Zezwii ‑ɔ gbä a‑a ɔ yi ‑pa yii, ’tɛnyɩ ‑a ‑tɔnɩ a‑a ɔ ’kä ’mö yii, ɔ kɛ ’wʋ ’mɩɛ zaa, yi ɔ’ɔa’aa yi. ‑Maa ’wa sɛ wa pää da’a dlɩɩ, ɛ’ɛ ‑bhö ‑sɩbhä ma. ‑Maa ‑Alowli Zezwii ɔ’ɔɔ ’yɩbhä nɩɩ, a gla’mö a ‑nɔ ‑bhlʋ a’bhë nɩ bhɩɛ ’yli, ‑maa ɔ yɩbhä nɩɩ, nɩkpa ’wuë nɩ ligba wa ’kä ’wa ‑lizokuu kɛ’mö ‑sɛ ɔ ’kʋä puë, ‑sɩbhä a za ɔ ‑kpaanɩɛ dlɩ ’mö ’n ɔ ’nɩɛ ‑bhlɛ yi.

¹⁰Miɛ abhlɩ, ‑maa ‑Alowli Zezwii Kliisɩ ’a yiyizlɩɩ, sɛɛ ’winyɔ yi’ɛ zɛmövusɛɛ, ‑sɩbhä ɛ ’kää nɩkpa zɛmö ‑vu. ‑Lɛ a ’tɛnyɩ ’la ’mö, zlɩ ’wuë ‑jiji ’kädɛ ɛ ’kää ‑sɛ, ɛ ’kä ’kpɔtɔ ’gboo, ɛ ’kä ’mö ghälɔghlɔnɩ. ‑Mä zlɩ ’mö a ‑lii ’wuë yɩ ’kä si, yɩ ’kä ’yli bhɩɛ. Dʋdʋkpäta ‑nyɛ a ’klʋ a ‑lii ’wuë ’sɔ, yɩ yi ’yli bhɩɛmö.

¹¹‑Atʋayuënyɩ, ‑lii ’wuë sa’a yɩ ’kää ’plɩ. Zaa, ’a sɛ a ’kää zʋʋ, a nɩ ‑yi ’kwädlɩ ‑sɩbhä. ’A nɛmönɛmösaa ’wuë nɩ ‑wʋ Lagɔsɛ, a nɩ glɛ anyɩ Lagɔ ’wʋ. ¹²A nɩ ‑ligba a ’kä ’ɔ yiyizlɩɩ ‑kʋnɩ, sɛ a bhɛnɩɛ a ’kä zʋʋ, a nɩ ’zʋ ‑sɩbhä nzɩɩ ɔ ’käa ‑pa yi. Sɛ’ɛ n gbää nɩɩ, ‑lɛ a ’tɛnyɩ ’la ’mö, zlɩɩ, ’yi ɛ ’kää do ɛ ’kä si, ɛ ’mö a ‑lii ’wuë kɔslʋ ’kɩ ’yli bhɩa. ¹³‑Maa Lagɔ lɛ naa, yɩ ‑kä sa’a ’plɩ ’wëë, ɔ yi zlɩlele ‑nyɛ dʋdʋlulu ’sɔ ’wäla. ‑Mä a nɩkpaa, ’saa zlɔnɩɛ ’mö a ’yize ’mö wa ’kää nʋ. ‑Lɛ a pɩwʋ ’la, mö ‑a ‑kʋnɩɛ.

¹⁴Na dlɩsɛkäwanyɩ, ‑lɛ a zlɩ ’la ’mö a ‑kʋnɩmöä zaa, a nɩ ’tɛmanɩ ’yli yɔwʋ, a ‑nyɛ Lagɔ ’kä ’kwädlɩ ‑wanɩ, ɔ ’yila ’klʋ a dɔ’wʋ, a ’kä ’wlɩlɩ ‑wʋ, Zezwii ‑kä yi ɔ tanyɩa ‑maa yɔwʋ ghlɩ. ¹⁵A nɩ yɩbhlɩnɩ sɛ nɩɩ, ‑Alowli Zezwii, ɔ ‑kä dlɩ ’mö ‑kpaanɩ, ɔ ’nɩ ‑bhlɛ yii, ɔ yɩbhä nɩɩ nɩkpa ’wuë nɩ yɩbhlɩnɔɔ ɔ ’kʋä puë, nza ɔ’ɔɔ ‑bhlɛ yi. Wɛlɩ nɩ, sɛ n cɛlanyiɛ dɛ’ɛ ’wʋʋ, ‑aa dlɩsɛkädaayu Pɔɔlʋ, ‑sɩbhä ɔ ’cɛlɩmanyiɛ ’wʋ. Lagɔ mɔɔ ’nyɔɔ ‑lɛ a ’nɛɛnɔɔ ’n ɔ yeanyiɛ ’wʋ ’cɛlɩ. ¹⁶’Ɔ ’bɔgwɩɩ ’wuë ɔ ’panyɩɛ ’wʋʋ, ɔ ‑kä ‑mä yɩ ’mö kïbhë nɩ kɛ zɩɩ, sɛ n gbää dɛ’ɛ, ‑sɩbhä ɔ gbämöä. ‑Maa ‑tiamö abhlɩ, ‑mä ’ɔ ’bɔgwɩɩ ’mö, wɛlɩkïbhï ‑mimii ‑wʋ ‑mä, nɩkpɛ ’kɩ ‑pa ’mö ’nʋ a dɔ’wʋ, ’mö yɩ ’tɛɛ. Nɩkpa ‑mumuë ‑waaa sasɛ Lagɔ ’a wɛlɩɩ ‑yi, ‑wa kää pamɩɩ nglii, ‑sɩbhä a za wa cɩcɛɛ Pɔɔlʋ ’a wɛlɩɩ ’la ’mö, ’n wa sɩɛ ’wa käbösɛ zɛmö. Lagɔ ’a wɛlɩɩ Lagɔnɩkpa ‑muë’la ’cɛlɩ a‑a, ‑sɩbhä wa ’zʋmi’ɛɛ. ’Wa sɛ wa zʋä da’aa, ‑sɩbhä a za Lagɔ ’kʋä ’yli bhɩa.

¹⁷‑Maa abhʋa abhlɩ, abhʋaa ‑kaaa dlɩsɛɛ, wɛlɩɩ ’wuë sɛ yɩ ’kää ’wʋ ’plɩɩ, a yɛ ‑sɩbhä ’mö ’nʋ ’wë. Zaa, a nɩ ’nɛmanɩ anyɩ ’wʋ, nzɩɩ sa’a a nɩkpazoku ’la, ’wa yiowɛlɩɩ tanyɩa dula, yɩ tanyɩa Lagɔ ’a ’yioo ’wʋ ‑sɛ, ‑mä Lagɔ ’a wɛlɩɩ ’mö a dɔ’wʋ, a ’käa glu ‑nyɔnʋ. ¹⁸‑Alowli Zezwii Kliisɩ, ‑aa Puënyɔ, sɛɛ zila zɩɛ ’kwädlɩɩ, a nɩ yɩbhlɩnɔɔ sasɛ ’yize, sɛɛ Lagɔ ’pää ɔ bɔɔmö a za ‑aa ngäzɩdlɩɩ, a nɩ yɩbhlɩnɩ’ɛ ‑sɩbhä sasɛ ’yize. ’Ɔ nglɩɩ, yɩ nɩ ’ghlimanɩ ’kwädlɩkwädlɩnɩ. ‑Amɛɛ!