2 ZAA

’Sɔnabɔgʋʋ

Zaa

’cɛlɩɛ

’Bɔgʋ nɩ ’mö a wɛlɩɩ

Zezwii a ‑nʋa a ‑zɩkpa ‑mämaa ‑bhlʋ ‑a ‑wʋä ‑mä Azii‑bhölɩɩ ’möö, ’mö ɔ tietienyɔ Zaa ’pää ’ɔ ’sɔnabɔgʋ nɩ ’wʋ. ‑Mä wʋ ’mö, ‑zɩkpa ’la, ’mö ɔ pälɩɛ ’nglɔ ’wʋ. Zezwii a ‑nʋa ‑wa ‑wʋä ‑mä ‑zɩkpaa ’möö, ’mö ɔ laa nglɔɔ a yuëa. Nza ɔ pälɩɛ Zezwii a ‑nʋa a ‑zɩkpa ’la, ’nglɔ ‑nyɛ ɔ ’yuë Lagɔ ‑sɛɛ ‑lɛ ’sɔ ’wʋ.

Nglɔ ’la ‑nyɛ ’ɔ yuëa ’sɔ, ’mö ɔ zʋä ’dɩ ’mö nɩɩ, wa nɩ ‑wawanɩ, wa nɩ ’nɛmanɩ yiowaa ‑wa ’cɩaa yiowɛlɩɩ ’wʋ, wa nɩ tuë päla, wa nɩ tuë’ɛ kätɩkpa a’bhë kä’mö ’ngwa.

Bhälɩwɛlɩɩ

¹‑Amö ’yukugänɩnyɔɔ, ‑nmö nglɔɔ1.1 nglɔɔ: Zezwii a ‑nʋa a ‑zɩkpaa ma‑a., ‑nmö Lagɔ ‑sɛɛ ‑lɛ, ‑n ‑nyɛ ‑na’a yuëa1.1 yuëa: ‑Zɩkpa ’la ’mö a ‑nʋa muëë. ’sɔ, abhʋa n cɛlɩɛ dɛ’ɛ ’wʋ. ‑Tiamö dlɩ wʋ a ‑gälaa tenyii. Na ’yize ‑amöö ’nanyɩɛ ‑wa, ‑maa nɩkpaa ’wuë ‑wa ‑yiɛ Lagɔ ’a ‑tiamö a wɛlɩɩ, wa ‑wamanyɩ. ²Ɛ’ɛ ‑bhö nyɩasɛ, ‑maa Lagɔ ’a ‑tiamö ’a wɛlɩɩ mɩɩ ‑wʋnyɩɛ dila zɛmö, mɩɩ ‑kanyɩɛ ’kwädlɩ ‑su.

³‑Aa dɩba Lagɔ, ɔ ‑nyɛ ’ɔ Yuu Zezwii Kliisɩ ’sɔ, wa yi ‑aa ngäzɩdlɩ ’pä, ’pʋpʋɛ ‑nyɛ ’nyupälɩɩ ’sɔ ‑yɩ ’bhöönuëë ’möö, yɩ ‑yinyɩ ’wʋ ghlɛ. ‑Lɛ a dɔ’wʋ Lagɔ ’a ‑tiamö a wɛlɩɩ ‑nyɛ ’ɔ ‑wawʋʋ ’sɔ, ‑a ’naa ’kɩ ’kwädlɩ kɛ’mö ‑sɛ.

Lagɔ ’a ‑tiamö a wɛlɩɩ ‑nyɛ ‑wawʋʋ ’sɔ

⁴‑Na’a yuëa gla’mö a ‑mumuë, sɛ wa ‑gänɩɛ sasɛ Lagɔ ’a ‑tiamö a wɛlɩɩ, n ’yɩɛ ‑sɩbhä ’ylɩmöö, ’mäna lɩbhaaa tenyii. ‑Aa dɩba Lagɔ, sɛ ɔ gbää ‑a nɩ nɛmöö, ‑sɩbhä wa nɛmöä da’a. ⁵Zaa, ‑a’bhida, wɛlɩɩ ‑yɩ nʋä nɩɩ: ‑A nɩ ‑wawanɩ, ’zwi ’klʋkpamö. Wɛlɩlili n ‑nɩmöä dɛ’ɛ ’nyɛ, ‑maa wɛlɩɩ ‑n ’nʋ a‑a tɛkädɔ’wʋʋ, ’mö n ligbanɩmöä dɛ’ɛ ’wʋ. ⁶‑Wawʋʋ muä nɩɩ, ’zʋ Lagɔ ’a wɛlɩɩ ’klʋkpamö. Wɛlɩ ’la, sɛ’ɛ yɩ nʋä nɩɩ, ‑mä ‑a’a nɛmönɛmösaa ’wuë ’mö, ‑wawʋ mʋʋ nɩ ‑sunyɩ. Dɩɩ wa zʋʋnyɩ a‑a ‑pa ’wʋ ’möö, miɛ da’a.

A nɩ ’nɛmanɩ duladulawaa ’wʋ

⁷Nyɩasɛ n’n‑ä ‑sɩbhä nʋ, ‑maa duladulawa a ‑bɛ, wa yɛ mä’ä ’pɩwʋ mlɩmanɩ. Nɩkpa ’la, wɛlɩkïbhëa ‑a nʋä nɩɩ, Zezwii Kliisɩ, ‑aa sɛ a nɩkpɛ ɔ ’zʋä, ’mö wa kpɛnɩɛ ’mö. A nɩ yɩbhlɩnɩ sɛ nɩɩ, yionyɔ ’kɔdɔɔ, wa laa ‑ɔ ‑gblɩ Kliisɩ, mɔɔ ’wlʋnɩɛ da’a ’yli. ⁸Zaa, a nɩ ’nɛmanɩ anyɩ ’wʋ, a tɩa Lagɔ ’a wɛlɩɩ a dɔ’wʋ ’fʋ yɔlɔ, ‑lii ’wuë a ’kä a‑a ’a yɔlɔyʋlʋʋ a ’ylimö ghlɩɩ, a tia ’mö bɔ.

⁹Sɛ’ɛ n gbää nɩɩ, Kliisɩ ’a wɛlɩɩ wa ’cɩanyɩɛ, sɛ yɩ gbää, ‑ɔ ’ni ‑sɩbhä ‑gänɩ, ‑ɔ ‑kɩɩ ’ɔ käböwɛlɩ ‑gömö ’zʋʋ, ɔ ‑nyɛ Lagɔ ’nɩɛ ’wʋ ‑wʋnɩ. ‑Maa ‑ɔ ‑kɩɩ ‑sɩbhä ‑gänɩ, ɔbhlɩ, mɔɔ ‑nyɛ Dɩbaa ‑wʋnɩɛ ’wʋ, mɔɔ ‑nyɛ Yuu ‑wʋnɩmöä ’gämö ’wʋ. ¹⁰Zaa nɩkpɛ a ‑mɔɔ ‑kä ‑mä ’a mä’a yi, wɛlɩ ’la, ɔ ‑kɩɩ ’mö cɩcɛ, ɔ ‑kaanyɩ käböwɛlɩ ’nyɛɛ, ‑sɩbhä a nɩkpɛ ’la, a nɩ to päla, a nɩ to kätɩkpa a’bhë kä’mö ’ngwa. ¹¹Ɛ’ɛ ‑bhö nyɩasɛ, ‑maa sa’a a nɩkpɛ, ‑n ‑kɔɔ bhälɩɩ, ’ɔ ‑lizokuu ɔ nʋä da’aa, mö ‑n nglunɩɛ.

’Gbëbhlenɩwɛlɩɩ

¹²N kä wɛlɩ ‑mimii a ‑bɛ ’mlɩ, n ’kanyi ’nyɛ. N’n‑ä ’yɩbhä n ’kɩ ’bɔgʋ ’mö ’cɛlɩ. ‑Maa n yɩbhä n ’kä na’bhë ‑mä ’a mä’a yi, n ’kanyɩ ngli ’dɩ ’nyɛnɩ. ‑Lɛ a dɔ’wʋ ‑a ’wuë, ‑mä ‑a’a dilaa zɛmö, ’mäna yi ‑mä ‑wʋ tenyii.

¹³‑Na nglʋdaayu Lagɔ ‑sɛɛ ‑lɛ, ’ɔ yuëa lɛ wa bhälanyɩ.