1 TIMOTEE

Tɛkäbɔgʋʋ Pɔɔlʋ ’cɛlɩɛ

Timotee

’wʋʋ

’Bɔgʋ nɩ ’mö a wɛlɩɩ

Timotee, Likaoni‑bhölɩɩ ’mö a ‑glɔ ’kɔdʋʋ wa laa Lisiitɩ, ‑mä a nɩkpɛ ɔ glɩnɩɛ. Ɔ ‑da, Zwiiföylikwiɛ, ’n ɔ dɩba glɩnɩɛ Glɛköyi. Dɛɛ Pɔɔlʋ möä tɛkädɔ’wʋ ‑mä Lisiitɩ Zezwii ’a ’Mänatɩtɩɩ biaaa, ‑lɛ Timotee nglunɩɛ Lagɔ ’a wɛlɩɩ ’wʋ, ’n ɔ yiɛ Zezwii a ‑nɔ zʋ. Zaa, Pɔɔlʋ möä ‑mä Lisiitɩ ’ɔ ’sɔnalowluu ’möö, ‑lɛ ɔ ’libhïnɩɛ Timotee ’wʋ, ’n ɔ ‑nyɔɔ yiɛ ‑mä Efɛɛzɩ mö, nzɩɩ ɔ ’kɔ ‑Alowli ’a libhoo kwänɩ. ‑Maa Pɔɔlʋ tɩ ‑mä Timotee Efɛɛzɩ, ’n ɔ yiɛ ‑mä Masedʋanɩ‑bhölɩɩ ’mö mö.

Pɔɔlʋ yɩbhä a ɔ kä ‑mä Efɛɛzɩ ’bɩwʋ mö, ‑maa ɔ’ɔa’a ‑zlɩmɛ ‑yi, mɩɩ kää ’nglɩ, ’n ɔ yiɛ Timötee ’bɔgʋ nɩ ’wʋ ’pä. ‑Mä wʋ ’mö, sɛ’ɛ ɔ nyɔɔ ’dɩ nɩɩ, nɩkpaa ‑wa ’cɩaa käböwɛlɩɩ ‑yɩ ‑nyɛ Lagɔ ’a wɛlɩɩ ’nɩ mönɩɛ yɔwʋʋ, Timotee nɩ ’nɛmanuë ’wʋ wa tɩa Zezwii a ‑nʋa dula. ’Dɩ ɔ nyɔ’ɛɛ ’gämö nɩɩ, ɔ nɩ ‑sɛ Zezwii a ‑nʋa a ‑zɩkpa a ’yukugänɩwa ‑nyɛ ngäzɩwa a ’yliwʋwa ’sɔ.

Bhälɩwɛlɩɩ

¹‑Amö Zezwii Kliisɩ a tietienyɔ Pɔɔlʋ, ‑amöö cɛlɩɛ dɛ’ɛ ’bɔgʋ nɩ. ‑Aa Puënyɔ Lagɔ ‑nyɛ ‑aa dlɩtɛɛnɩnyɔ Zezwii Kliisɩ ’sɔ, mʋa ’zʋaaa wa tietienyɔ ’wʋ. ²‑Nmö Timotee, ‑nmöö glɩnɩɛ Lagɔsɛ a dɔ’wʋ na ’yuu, ‑nmö n cɛlɩɛ dɛ’ɛ ’wʋ. ‑Aa dɩba Lagɔ ‑nyɛ ‑Alowli Zezwii Kliisɩ ’sɔ, dlɩzɛmönanɔɔ ‑nyɛ ’nyupälɩɩ ’sɔ ’n ’pʋpʋɛɛ ‑yɩ ’bhöönuëë ’möö, yɩ nɩ ghälamö ’wʋ.

Nɩkpaa ‑wa sɛnɩɛ Lagɔ ’a wɛlɩɩ widɩ ’möö

³Na ’yu, n lɛ ’kää ‑mä Masedʋanɩ‑bhölɩɩ ’mö möä yi a sɛ n nyɩamö a‑a ’dɩɩ, ‑sɩbhä n nyɩamöä dɛ’ɛ ’dɩ nɩɩ: ‑Mä Efɛɛzɩ glɔ ’mö, glɩ ‑bhlɛ ‑mä ’yize. ‑Maa ‑mä ‑glɔ ’la ’mö, nɩkpa ‑mumuë ‑wʋ ‑mä, käböwɛlɩ a ‑mii ‑nyɛ Lagɔ ’a wɛlɩɩ ’nɩ mönɩɛ yɔwʋʋ, ’mö wa biaa. ’Nyʋä ’dɩ, wa nɩ tɩ sa’a zʋ. ⁴Wɛlɩ nɩkpa sɛɛ ’wlumö, ’n sɛɛ ‑aa dɩbawa a dɩbawa gwälɩgwälɩnɩɛ a wɛlɩ, ‑yɩɩɛ ’bhlenɩdɛ ‑kää, wa nɩ ‑sɩɩ kɛ’mö. Ɛ’ɛ ‑bhö nyɩasɛ, ‑maa sa’a a wɛlɩɩ, kpɛnɩkpɛnɛ a ’yize yɩ lɛmöä. Lagɔ ’a slɛlɛɛ ɔ ’pää ‑a ’kɔ dlɩ ’tɛɛnɩɩ, ɛ dɔ’wʋ, yɩ’ɩɛ dɛsɛ ‑kä. ⁵’Lɩlɩlɩ a dɔ’wʋ, ’dɩmözʋzwɛɛ ’wuë a zɛmö ma‑a nɩɩ, nɩkpɛ ’kä ‑wawʋ a ’yize dlɩ zɛmö ‑kä, ’ɔ dlɩɩ tɩa ’mö ‑dlinɩ, ɔ dlɩ zɛmö ’kä ‑pälɛpälɛ ‑wʋ, ɔ ’kä ‑tiamö Lagɔ dlɩ ’tɛɛnɩ. ⁶‑Maa nɩkpa ‑mumuë, wa yɛ ‑li ’la ’wuë kɛ’mö ‑sɛ, ’fʋ a wɛlɩɩ a ’mökpɛnɩlibho wa käa’aa. ⁷Wa lɛ mʋa glɩnɩ Lagɔ ’a Gböö a ’cɩawaa. ‑Maa ‑lii ‑yɩnyɩɩ dɛ wa ‑kä bhïla dɔ’wʋ ‑wʋ ’n ku ’mö ‑suëë, wa’bhï wa ’niɛ tɛkäsɛ a’bhë ‑yi. Wanyɩ a wɛlɩɩ wa sɛɛ ’wlumö, ’n wa bhïlaa ‑li ’la a dɛɛ, wa’bhï wa’aa yɩ zɛmö ‑yi.

⁸‑A ‑yi sɛ nɩɩ, Lagɔ ’a Gböö, ‑li a ‑li yɩ glɩnɩɛ nɩkpɛ a ‑mɔ zwiɛ sasɛ ’klʋkpamö a dɔ’wʋ. ⁹’Lɩlɩlɩ a dɔ’wʋ Lagɔ ’a Gböö, nɩkpa a ‑muëë nʋä ’saa nɛnɩɛ Lagɔ dlɩ yɔwʋʋ, wa za yɩ’ɩɛ ‑lɛ ‑wʋ. ‑Maa ‑muë ‑waa ngluä ‑lu ‑bhlʋ a’bhë a ’klʋkpamözʋgbʋ, ‑wa fälanɩɛ Lagɔ ‑nyɛ Lagɔlii ’wuë ’sɔ ’ylimö, ‑wa nʋä ‑lizoku a kii ’wuë, ‑wa lɩbhää wa dɩbawa ‑nyɛ wa ‑dawa ’sɔ ’n wa kuä, wa ‑nyɛ ’kulɩbhäwa a kii ’wuë ’sɔ, ¹⁰’ngwlɩ ‑nyɛ nyɩbhɛlɩ ’sɔ ‑wa nʋä yɩ’ɩɛ nʋnʋsɛ ‑wʋ muë, ‑wa ‑nyɛ wa ’bhɩanyɩbhɛlɩ pöä ’ngwlɩ a sɛ sɛ muë, ‑wa pää nɩkpaa ’pɛlʋ muë, ‑wa ’libhïnɩɛ wa ’bhɩa yio ’wʋʋ, wa ‑nyɛ yiowaa ’wuë ’sɔ muë, ‑li a kii ’wuë ‑yɩ ‑nyɛ Lagɔ ’a ‑tiamö a wɛlɩɩ ’nɩ mönɩɛ yɔwʋʋ, ‑wa nwiɛ, wa za Lagɔ ’a Gböö ‑wʋä ‑lɛ. ¹¹Sɛ n nyɩamöä dɛ’ɛ ’dɩɩ, Lagɔ ‑ɔ ’ghïliɛ, ‑li a ‑li a kii ’wuë ’bhöönɩɛ ’möö, ’ɔ ’Mänatɩtɩɩ ‑yɩnyɩɩ biabialibhoo ɔ nyɩaaa, ‑sɩbhä yɩ gbää.

Pɔɔlʋ bhälɩ ‑Alowli Zezwii ’ɔ ‑li a ‑lii a za

¹²‑Alowli Zezwii Kliisɩ, sɛ ɔ ‑kaaa dlɩ ’wʋ ’n ɔ ‑yiiɛ ‑lɛ ‑sɛ n ’kä ’ɔ libhoo nʋ a za, n bhälɔ ‑këë. Ɔ’bhë mɔɔ nyɩaaa ’mötɛɛnɔ n ’kä ‑lɛ a libho ’la nʋ. ¹³Bhla’mö a dɔ’wʋ, wɛlɩzoku n bhïla a‑a ɔ dɛ, ‑di n zio a‑a, ɔ ‑nʋa ’mö n ‑gblɩ a‑a. ‑Sɩbhä yɩ ‑wʋ ’mö, ’n ɔ yiɛ na ngäzɩdlɩ ’pä. Ɔ ‑yi sɛ nɩɩ, dɛ n ‑wʋ a‑a sa’a ’zʋ dɔ’wʋʋ, n ’nɔ a dlɩ ’wʋ ‑kä zaa, n’n a ’saa n nʋä ‑yi. ¹⁴‑Alowli Zezwii, ’nyu ɔ paaaa ‑tiamö tenyii, ɔ’bhë mɔɔ kää ’nglɩ ’n n ’tɛɛnɔa’aa ‑sɩkaa dlɩ ’n n ‑wɔɔɔ tenyii. ¹⁵Zezwii Kliisɩ, ɔ ’kä nɩkpa ’wa ’nyinylolii a gbʋʋ ‑gömö ‑sɛ, ɔ ’kʋä puë, nza ɔ yiɛ mä’ä dʋdʋ ’wʋ. Wɛlɩ ’la, ‑tiawɛlɩ a ‑mi nɩkpaa ’wuë kä wa ’kä ’wʋ nglu wa ’kä dlɩ ’wʋ ‑kää, ’mö yɩ glɩnɩɛ. ‑Maa ’nyinylolinʋwa ’la ’wuë a gla’mö a dɔ’wʋ, ‑amöö ziɛ ’wʋ. ¹⁶‑Amöö glɩnɩɛ sɛ’ɛ ’nyinylolinʋwaa a gla’mö a ’kɔdɔɔ, na ngäzɩdlɩ Zezwii Kliisɩ ’pää tɛɛ a’bhë. ’Fʋ ɔ’ɔɔ ‑sɩbhä ’zʋ, ‑maa sɛ ɔ ‑kpaanɩɛ dlɩ ’mö nɩkpa ‑gömö a dɔ’wʋʋ, ‑sɩbhä ’kä ’ylɩmö ’yoo, nzɩɩ nɩkpaa ’wuë ’kä sɛ yɩbhlɩmanɩ nɩɩ, ‑wa glɩnɩɛ sɛ’ɛ ’na sɛ a ’nyinylolinʋwa ’kädɩɩ, wa ‑kɔɔ dlɩ ’tɛɛnɩɩ, wa ’wuë ɔ yi wa ngäzɩdlɩ ’pämö, ’pɩwʋ mää ’naa ’kää ’yli bhɩɛɛ, ɔ yuë ‑mä ’nyɛ. ¹⁷Lagɔ ‑ɔ ’kämanɩ ’kwädlɩkwädlɩnɩ, ‑ɔɔ bhɩɛ ’wʋ, ‑bɛ ’nɩɛ ‑bhlɛ tɛkäsɛ ’ylɩmö, ‑ɔ glɩnɩ ɔ ’yize ‑tiamö a Lagɔ, nɩkpaa ’wuë nɩ ’zʋ ‑lɛ ɔ ’nglɩ, yɩ nɩ ’ghlimanɩ ’kwädlɩkwädlɩnɩ. ‑Amɛɛ!

¹⁸‑Nmö na ’yu Timotee, wɛlɩɩ n tɩɩmöä dɛ’ɛ yɔwʋʋ, ’nyɩ nɩkpa. ‑Na’a libhoo Lagɔ nyɩamöä, muä. ’Mö Lagɔ ’a ’Wugɔmʋʋ bhïlanɩ a‑a ’ylɩ ‑bhlʋ ’mö nɩkpa ‑mumuë ‑na dɛ ’mö. Wɛlɩ ’la, ti ’wʋ dlʋ tʋ ‑tɩmöa lu, nzɩɩ libho a ‑libhoo Lagɔ nyɩamöä ‑n ’kʋ nʋ. ¹⁹‑N ‑kʋʋ nʋ dɔ’wʋ ‑wʋʋ, Lagɔ ’a ‑tiamö a wɛlɩɩ ti kɛ ’mö ‑sɛ, ‑na’a ’mlɩwʋnuëyii ‑tɩmöa gbʋ köbha. ‑Maa nɩkpa ‑mumuë wabhlɩ, ’wa ’mlɩwʋnuëyii, wa ’nɔɔ ’yukwli ‑pʋnɩ, mɩɩ kää ’nglɩ, käböwɛlɩɩ ‑yɩɩɛ gbëaa ’mö ‑kää, ’n yɩ yuëë ’wlumö nyima. ²⁰Nɩkpaa ’sɔ ‑kpɔ wa laa Yimenee ’n Alɛzaadlɩ, ‑sɩbhä wa ‑wʋmöä. ‑Sɩbhä a za n plɩnuëë Sataa kä’mö. ‑Lɛ a dɔ’wʋ, wa yi Lagɔ ’a nglɩɩ a nyimanyimu kɛ’mö ‑sɛ.

A nɩ bhibhee nɩkpa ’wuë a ’wlumö

¹‑Lii ’wuë ’mö a dɔ’wʋ, ’dɩmözʋwɛlɩɩ ‑yɩ kää tenyii dɛsɛ, n nyɛɛ Zezwii a ‑nʋa ’wuë, miɛ nɩɩ: ’Saa a ‑kä nɩkpaa ’wuë a dɔ’wʋ ’yɩbhää, a nɩ ’nyɛ Lagɔ yɩ ’dɩ. A nɩ bhibheoo ’kwädlɩ, a ’kɔ wa ’wuë a ’wlumö ‑bɛlɩ ’pä. A ‑kä ‑sɩbhä ’zʋ dɔ’wʋ ‑wʋʋ, a nɩ bhälɔɔ ’gämö ’ɔ kɛgänɔɔ a za. ²’Bhlɩlowluwa ’kädɩɩ, ’kämanɩwaa ’wuë, a nɩ bhibhe wa ’wlumö, nzɩɩ bhlɩɩ wa ’kämanɩɛ ‑gömöö, ɛ ’kä ’tɩɩglɩglɛ ’mö ‑kä, ‑a ’kä ‑pälɛpälɛ ‑lɛ glɩ, ‑a ’kä ’kwädlɩ Lagɔ bʋbɔ, ’saa zlɔnɩɛ ’möö, ‑a ’kʋ nʋ. ³‑Sɩbhä ma‑a nɛnɩɛ. ‑Aa Puënyɔɔ Lagɔ, ‑sɩbhä ma‑a nɛnɔɔ dlɩ yɔwʋ. ⁴’Ɔ ’saa ɔ yɩbhää, miɛ nɩɩ, nɩkpaa ’wuë wa nɩ ghlɩ ’ɔ ’pʋpʋɛɛ, wa nɩ yɩbhlɩnɩ ’ɔ ‑tiamö a wɛlɩɩ ‑yɩ glɩnɩɛ gbëaa a ’yizee.

⁵‑A ‑yi sɛ nɩɩ, Lagɔ, ɔ ‑bhli ‑bhlʋ ‑kpöö.

‑Ɔ kää ’nglɩ ’n nɩkpaa ’wuë ‑nyɛ Lagɔ ’sɔ wa ’kää wamanɩɩ,

ɔ ‑bhli’ɛ ɔbhlɩ ‑bhlʋ ‑kpöö.

Zezwii Kliisɩ ‑ɔ ’zʋä ‑aa sɛ a nɩkpɛ mɔɔ.

⁶Mɔɔ ’wlʋä ɔnyɩ ’mö,

’n ɔ yiɛ ’bhlɩbhëa ’wuë zeti.

Sa’a ‑sɩbhä ɔ tulanɩɛ ’ylimö nɩɩ,

Lagɔ yɩbhä ‑tiamö ɔ ’kä nɩkpaa ’wuë puë.

Wɛlɩ ’la, ’tɛnyɩ Lagɔ ‑dɩ a‑a,

ɛ ghlɛɛ ’n yɩ yiɛ ’yli ’wlʋnɩ.

⁷Yɩ biabialibhoo, ’mö Lagɔ nyɩaaa, ’n ɔ ‑yiiɛ ɔ tietienyɔ ’wʋ ’zʋa. N ‑kä sa’a nʋʋ, ‑tiawɛlɩ n bhïlaa, n’n‑ä yio ‑kä. Lagɔ ’a wɛlɩɩ ‑yɩ ‑wʋä gbëaa ’mö, nɩkpaa ’wuë kää wa ’kä dlɩ ’wʋ ‑kää, yɩ ’cɩanyɔ n glɩnɩɛ ‑mä ‑waaa Zwiiföwa glɩnɩ jijo’wʋ.

Zezwii a ‑nʋa ’a ’wluyɩbhäyɩbhʋʋ a dɔ’wʋ sɛ’ɛ Pɔɔlʋ ’zʋëë ’dɩ ’mö

⁸‑Gwlɩɩ ’wuë ‑gömö, Zezwii a ‑nʋa ‑kä ’wlu ’yɩbhää, nyɩbhɛlɩɩ, mʋa nɩ bhibhe Lagɔ. ’Wa kätɩkpöö wa pää ghäyɩ ’n wa bhibhee Lagɔ, wa nɩ ti ’nyinyloli ’mö nʋnɩ. Wa nɩ tɩ ’lʋlʋwa glɩnɩ, wa nɩ tɩ ’klɛkäwa glɩnɩ.

⁹Wa gla’mö a ngwlɩɩ, sɛ’ɛ n nyʋää ’dɩ nɩɩ: Wa ‑kä ’mö pälaa, ’wa ’möpälalii, yɩ nɩ tɩ nɩkpa ’klʋ ’mö ’kpëakpëanɩ, yɩ nɩ tɩ zʋ ’wʋ ‑bhö. ‑Mä ’wa ’möpälasaa ‑nyɛ ’wa nyukuu a ’wlugïganɩsaa ’sɔ ’mö, wa nɩ tɩ ’yila sɛ tɛlɩ. Bɔlɔbɔlɔlii a kii ’wuë, yɩ ‑nyɛ ’pɛlʋtɛɛloku ’sɔ, wa nɩ ti ’mö pälamö. ¹⁰‑Maa ‑li a ‑li ’mö wa nɩ nʋ, nglwɩɩ ‑wa zʋä Lagɔ ’klʋkpamö a saa. ¹¹Wa ‑kä Lagɔwɛlɩɩ bhïlaa, ngwlɩɩ nɩ ‑wʋ vlɩɩ wa ’kä ’yukwli ‑pʋnɩ, wa nɩ ’zʋ nyɩbhɛlɩɩ ’klʋkpamö ’tɩɩ. ¹²Zezwii a ‑nʋa ‑kä ’wlu ’yɩbhä wa ’kä Lagɔwɛlɩɩ ’yukwli ‑pʋnɩɩ, n’n‑ä ’yɩbhä ’nglɔ nɩ ’cɩɩ. ’Nglɔ nɩ tɩ nyɩbhɛlʋ ‑gömö ’kämanɩ. ¹³’Lɩlɩlɩ a dɔ’wʋ, Adaa ’mö Lagɔ ‑bhɛɛ ’wë ’n ɔ yia’aa bhäla ɔ ’lɛnglɛ Ɛɛvö ‑bhɛ. ¹⁴Lagɔ ‑bhɩʋää ’wëë, Adaa ’mö Sataa ’nɩɛ dula, ‑maa Ɛɛvö ’mö ɔ dulaa, mɔɔ ‑sɛɛ Lagɔ ’a bhïlawɛlɩɩ ’klʋkpamö. ¹⁵‑Sɩbhä yɩ ‑wʋ ’mö, ‑maa ’nglɔ, ’ɔ dlɩtɛɛnɩtɛnɛɛ ‑nyɛ ‑wawʋʋ ’sɔ, ɔ ’ni kɛ’mö ‑sɛ, ɔ ’nɩ ɔnyɩ ’kɔdɔ ’mö ’wʋ ’libhï, sɛɛ nɛnɩɛ Lagɔ dlɩ yɔwʋ, ɔ ‑kä ‑sɩbhä nɛmöö, Lagɔ yo puë ’yugwälɩza.

Zezwii a ‑nʋa a ’yukugänɩwaa a wɛlɩɩ

¹Wa ‑kä nɩɩ, Zezwii a ‑nʋa a ‑zɩkpa a ’yukugänɩtʋ ‑kä nɩkpɛ ’lɩbhä, libho a ‑libho ɔ yɩbhää nʋʋ, ‑tiamöä. ²‑Maa ‑ɔ glɩnɩɛ Zezwii a ‑nʋa a ’yukugänɩnyɔɔ, ɔ nɩ glɩnɩ nɩkpɛ a ‑mɔ ‑ɔɔɔ ‑maa yɔwʋ ‑kä. Ɔ nɩ kä ’nglɔ ‑bhlʋ ‑kpöö, ɔ nɩ ‑yi ’ɔ dlɩɩ a ’wʋ ‑pɩɛnɩ sɛ, ɔ nɩ ’nɛɛ, nɩkpɛ a ‑mɔɔ ‑ɔɔ nyimaa ɔnyɩ a ’nglɩɩ, ’mö ɔ nɩ glɩnɩ. Ɔ nɩ päla sasɛ lowluwa, ɔ nɩ ‑yi Lagɔwɛlɩɩ a ’cɩasɛ. ³Ɔ nɩ tɩ nʋnɩmänyɔ glɩnɩ, ɔ nɩ tɩ ‑glakänyɔ glɩnɩ. ’Ɔ dlɩɩ nɩ ‑wʋ ‑pälɛpälɛ nɩkpaa ’wuë ‑gömö, ɔ nɩ tɩ ’lʋlʋnyɔ glɩnɩ. Moni a ’tʋ nɩ to ’wlumö ‑sunɩ. ⁴Ɔ nɩ glɩnɩ ’ligbëlowli a ‑nɔ a ‑nɔ, ‑ɔ ‑yiɛ sasɛ ɔ ‑nʋa a ‑susɛ. ’Ɔ yuëa nɩ ’zo ‑lɛ, wa ’nɩ ’zʋ ’klʋkpamö. ⁵Ɛ’ɛ ‑bhö nyɩasɛ, ‑maa nɩkpɛ ’nɩ ɔ ‑nʋa a ‑susɛ ‑yii, ɔ’ɔɔ bhɛnɩ ɔ ’kä Lagɔ a ‑nʋa a ‑zɩkpa a ’ylizʋnɩsɛ ‑yi. ⁶Nɩkpɛ a ‑mɔɔ ’zʋä ’lilili ’wʋ Zezwii a ‑nɔɔ, ɔ nɩ tɩ ’yukugänɩnyɔ ’zʋ bhabhʋ toa sɛ bhlɩ, Lagɔ toa Sataa a saa gbʋ köbha. ⁷‑Ɔ ‑gänɩɛ Zezwii a ‑nʋa ’yukuu, ’ɔ nɛmönɛmösaa nɩ kä ’nglɩ, ‑waaa Zezwii a ‑nʋä glɩnɩ, wa ’kä ɔ ’dɩ a dɩ ‑sɛ, wa toa ’ylimö fälanɩ, Sataa toa ‑kälɛ ’mö ’pä.

Ngäzɩwaa a ’yliwʋlibhoo a wɛlɩɩ

⁸‑Wa kää ‑mä Zezwii a ‑nʋa jijo’wʋ ngäzɩwaa a ’yliwʋlibhoo, wa nɩ nʋmö’ɛ wabhlɩ ’klʋkpamözʋli, wa nɩ glɩnɩ nɩkpa a ‑muë wa ’kä dlɩ ’wʋ ‑kä. Wa nɩ tɩ nʋnɩmäwa glɩnɩ, wa nɩ tɩ moni ‑bi ’mö linɩ. ⁹‑Tiamö a wɛlɩɩ Lagɔ kälɩnɩnyɩɛ kɛ ’klʋʋ, wa nɩ kɩ dlɩ ’wʋ ’tɩɩ, yɩ dɔ’wʋ ’wa dilaa nɩ tɩ ’mö ‑dlinɩ. ¹⁰Wa ‑kʋä libho ’la ’nyɛɛ yii, wa nɩ yɩlɩ sasɛ ’wa nɛmönɛmösaa ’wʋ ’wë, wa ’nɩ ‑maa yɔwʋ ‑kä, wa ’käa’a bhäla ngäzɩwaa a ’yliwʋlibho ’la nʋ. ¹¹’Ngwlɩ a ‑muë wa zʋ ’klʋkpamö, ’mö ’wa ngwlɩɩ nɩ glɩnɩ. Wa nɩ tɩ ’ngwlɩ a ‑muë bhïla ’zokwësɛ glɩnɩ, wa nɩ ‑känɩ wanyɩ kpämɩɔ, ‑mä ‑lii ’wuë ’mö a dɔ’wʋ, wa nɩ glɩnɩ ’ngwlɩ a ‑muë wa ’kä dlɩ ’wʋ ‑kä. ¹²Nɩkpɛ a ‑mɔɔ kää ngäzɩwaa a ’yliwʋlibhoo, ɔ nɩ kä ’nglɔ ‑bhlʋ ‑kpöö. Ɔ nɩ ‑yi ’ɔ yuëa ‑nyɛ ’ɔ ’ligbëa ’mö a ‑lii ’wuë ’sɔ a ‑susɛ. ¹³Ngäzɩwaa a ’yliwʋnyɔɔ, ɔ ‑kä sasɛ ’ɔ libho nʋʋ, nɩkpa yo tenyii ’zʋ, ‑lɛ a dɔ’wʋ, Zezwii Kliisɩ a dlɩtɛɛnɩtɛnɛ a wɛlɩɩ, ɔ yi ’mänasɛ bhïla.

Wɛlɩ a ‑wɛlɩɩ Lagɔ kälɩnɩnyɩɛ kɛ ’klʋʋ

¹⁴Timotee, wɛlɩ ’wuë ’mö n cɛlɩmöä abhlɩ dɛ’ɛ ’wʋ, ‑maa n kɩ dlɩ ’wʋ nɩɩ, na’bhë n ‑yimöa’a ‑pa ’ylɩmöä yi. ¹⁵‑Maa ’n n ’nɩ ‑pa yii, Lagɔgligbëa ‑a glɩnɩɛ Zezwii a ‑nʋa a ‑zɩkpaa, a ’yila ’klʋ sɛ ‑n kää ‑n ’kä nɛmöö, ’bɔgʋ nɩ mʋʋ ‑kamöä ‑sɩbhä sʋlʋnɩ. ‑Abhʋaa ‑gänɩɛ Zezwii ’a wɛlɩɩ, Lagɔ ‑ɔ ‑bhölɩ mɔɔ glɩnɩɛ ‑Alowli. ’Ɔ ‑tiamö a wɛlɩɩ, ‑abhʋa ɔ ‑nʋa ’wuë ‑abhʋa ɔ ’nyɩɛ, ‑a ’kɩ ’wʋ gwɩ. ¹⁶‑Tiamö, wɛlɩ Lagɔ kälɩnɩnyɩɛ kɛ ’klʋ ‑a kää dlɩ ’wʋʋ, yɩ’ɩɛ ‑sɩbhä a sɛ ‑wʋ. Sɛ’ɛ yɩ nʋä Zezwii Kliisɩ a dɛ nɩɩ:

‑Aa sɛ a nɩkpɛ ɔ ’zʋä,

’n ɔ yiɛ mä’ä dʋdʋ ’wʋ yi.

’Wugɔmʋʋ ’Wlɩlɩ lɛ naa,

mɔɔ nɛnɩɛ Lagɔ dlɩ yɔwʋ.

Lagɔzuzukuu ’yɩ ɔ ’ghïlinɔɔ ’ylɩmö.

Ngäya ’wuë gla’mö,

wa bia ‑mä ɔ ’dɩ,

mä’ä ’pɩwʋ, ’n wa ’tɛɛnɔɔ dlɩ.

‑Mä ghäyɩ ’wʋ, ’n wa yiɛ ɔ ’nglɩ ’ghlimanɩ.

‑Wa sɛnɩɛ Lagɔ ’a wɛlɩɩ widɩ ’möö

¹’Wugɔmʋʋ ’Wlɩlɩ, sɛ’ɛ ɔ gbää gbëaa nɩɩ: ’gbëbhlenɩtɛnyɩɩ ’mö, nɩkpa ‑mumuë, Lagɔ ’a ‑tiamö a wɛlɩɩ wa kä a‑a dlɩ ’wʋʋ, wa yi kɛ’mö ‑sɛ. Nyɩasɛwɛlɩ ‑yɩ dulaa, zuzukuzokuu zʋä nɩkpa ’wlumöö, ’mö wa ’kää ‑gänɩ. ²’Kwlɩsɔkäwa ‑wa kää yio a ’yize nglii, ‑wa ‑kä ‑lizoku kɔkɔmlɛɛ nʋ ‑kë ‑wanyɩ gbʋʋ ’nɩɛ ‑mä ‑wʋʋ, ’wa wɛlɩɩ ’mö wa ’kää ’yukwli ‑pʋnɩ. ³‑Lɛ a yiowa ’la, ’wa wɛlɩɩ wa biaa, sɛ’ɛ yɩ nʋä nɩɩ: Nɩkpɛ nɩ tɩ ’nglɔ kwä. Sɛ’ɛ wa nʋ’ɛɛ nɩɩ, lilili a ki ‑mimii, nɩkpɛ nɩ ti li. ‑Maa ‑li ’la wa nʋä da’a nɩkpa nɩ tɩ lii, Lagɔ mɔɔ ‑bhɩɩɛ. Zaa, nɩkpɛ a ‑mɔɔ yɩbhlɩnɩɛ Lagɔ ’a wɛlɩɩ, ‑ɔ ’tɛɛnɩɛ Zezwii dlɩɩ, ɔ nɩ bhälɩ ɔbhlɩ yɩ za Lagɔ ɔ ’kɩ li. ⁴Ɛ’ɛ ‑bhö nyɩasɛ, ‑maa ‑lii ’wuë Lagɔ ‑bhɛɛ, ‑li a ‑liɛ, yɩ’ɩɛ ’zokwë ’mö ‑kä. Zaa, mä’ä ’pɩwʋ a ‑lii ’wuë, ‑n ‑kä yɩ za Lagɔ bhälɩ ‑n ‑kɩɩ ’wʋ ’libhïï, yɩ nɛnɩ.

⁵Sɛ’ɛ n gbää nɩɩ, Lagɔ a’bhë mɔɔ nʋä nɩɩ, ‑lii ’wuë ɔ ‑bhɛɛ ‑li a ‑liɛ. Zaa, ‑n ‑kɔɔ bhibhe ’wë ‑n ‑kɩɩ ’wʋ ’libhïï, yɩ nɛnɩ ɔ dɔ’wʋ.

Zezwii Kliisɩ a libhonʋnyɔ a ‑libhonʋnyɔ

⁶Timotee, ‑n ‑kä nɩɩ ‑n ’kä Zezwii Kliisɩ a ’yliwʋnyɔ a ‑nɔ a ‑nɔ glɩnɩ nʋʋ, wɛlɩ nɩ n nyɩamöä dɛ’ɛɛ, ’nyɩ ‑na Lagɔdaayuë. ‑N ‑kä ‑sɩbhä ’zʋʋ, wɛlɩ a ‑wɛlɩɩ wa ’cɩanyɩɛ, ‑a kää dlɩ ’wʋ, ‑n ‑gänɩmöä ’tɩɩ ’yizee, yɩ ‑yimö ’mötɛɛnɔ ’nyɛ, ‑n yi ’kwädlɩ ’yukusɛ mö. ⁷‑Maa nyɩasɛwɛlɩɩ nɩkpa sɛɛ ’wlumö, ‑yɩ ‑nyɛ Lagɔ ’a wɛlɩɩ ’nɩ mönɩɛ yɔwʋʋ, ti tɛkäsɛ a’bhë ’yukwli ‑pʋnɩ. ‑N ’kä Lagɔ ’a ’klʋkpamözʋzwɛɛ ’mö ‑jɩbhɛnɩ a dɔ’wʋ, ’tɛmanɩ ’kwädlɩ ’yli yɔwʋ ’yize. ⁸Ɛ’ɛ ‑bhö nyɩasɛ, ‑maa Nɩkpɛ ’kä ’ɔ kpökpaa nʋnʋlii ’mö ’jɩbhɛanɩɩ, mɩɩ ’nɩɛ tenyii dɛsɛ ‑kä. ‑Maa ‑n ’kä Lagɔ ’a ’klʋkpamözʋzwɛɛ ’mö ‑jɩbhɛnɩ, mɩɩ kää tenyii dɛsɛ. Mɩɩ ’kää ’nglɩ ‑kä, ’n Lagɔ ‑kamöä ’nyu ’pä, mä’ä ’pɩwʋ, ’n ‑mä ’ɔ ’pɩwʋlelea ’wʋ. ⁹Wɛlɩ ’la, ‑tiawɛlɩ a ‑mi nɩkpaa ’wuë kää wa ’kä ’wlumö ’zʋʋ, ’mö yɩ glɩnɩɛ. ¹⁰‑Sɩbhä a za, Lagɔ ’a libhoo kä yɔlɔylʋ ’mö ‑kë, a‑a nuä ’yize. Ɛ’ɛ ‑bhö nyɩasɛ, ‑maa Lagɔ ‑ɔ ‑bhölɩ, ‑ɔ glɩnɩɛ nɩkpaa ’wuë a Puënyɔɔ, ‑ɔ nyɛɛ nɩkpaa ‑wa kää Zezwii dlɩ ’wʋ ’ɔ ’pʋpʋɛɛ ’wuë, mɔɔ glɩnɩɛ ‑aa dlɩtɛɛnɩdɛ.

¹¹Sɛ’ɛ n gbää nɩɩ, wɛlɩ nɩ ’wuë, ’nyɩ nɩkpa. ’Nyʋä ’dɩ, wa nɩ ’zwi ’klʋkpamö. ¹²Tɩ nɩkpɛ ’yi ’tatinɩ, gbʋmö ‑n glɩnɩa nyɛgbayu a za, ɔ nɩ ‑tɩmö ’ylimö fälanɩ. Nɩkpɛ a ‑mɔ ‑ɔnyɩɩ ’gbäpö Zezwii a ‑nʋa ’wuë ’kää ‑gänɩ, mö ‑n nɩ glɩnɩ. Miɛ nɩɩ, ‑Na’a bhïlawɛlɩɩ ‑nyɛ ‑na’a nʋnʋlii ’sɔ, yɩ nɩ zlɔnɩ ’mö. Kä nɩkpa a ‑wawʋ dlɩ zɛmö. ’Tɛɛnɩ sasɛ Zezwii dlɩ. Lagɔ a dɛ, ‑na’a dlɩɩ nɩ tɩ ’mö ‑dlinɩ. ¹³Lagɔwɛlɩɩ, zɛlɩnii nɩkpabhë a ’yila ’klʋ ’mö, bhïlii, ‑sɛsɛnii nɩkpa dlɩ ‑gömö. ’Zʋ sa’a, ‑këë n ’kä yi. ¹⁴’Wugɔmʋʋ ’Wlɩlɩ mɔɔ bhïlanɩɛ ’ylɩ ‑bhlʋ ’mö ‑na dɛ nɩkpa ’mö, ’n Zezwii a ‑nʋa a ’yukugänɩwaa ‑yimöä kätɩkpö ’wlu zʋ nzɩɩ Lagɔ ‑kamö ’nyu ’pä. ‑Lɛ a ’nyupälɩ ’la, Lagɔ ghälamöä ’wʋʋ, ti ’yibɔlɩ ’wʋ plɛnɩ. ¹⁵Yɩ gbʋʋ nɩ ‑plɛnɩmö tenyii. ‑Lɛ a dɔ’wʋ sɛ ‑n möä ’yukusɛɛ, nɩkpaa ’wuë yi ‑sɩbhä ’ylɩmö. ¹⁶‑Na’a nɛmönɛmösaa, ’nɛmanɩ ‑sɩbhä ’wʋ. ‑Na’a Lagɔwɛlɩɩ ‑n ’cɩaa nɩkpaa, köbhɩɩ ’yli. ‑N ‑kä ‑sɩbhä ’zʋʋ, ‑na’bhë, ‑sɩbhä yi ‑na ’pʋpʋɛ ’mö ‑kä, ’n ‑wa ‑pʋnɩmöä ’yukwlii, ‑sɩbhä yi’ɛ wa ’pʋpʋɛ ’mö ‑kämö.

¹Timotee, nɩkpɛ ‑kä ’yli yɔwʋ ’kʋlʋʋ, ‑n ‑kɔɔ ’mö zlɔmanɩɛ yii, to yɔwʋkanɩsɛ ’dɩ ’nyɛ. ‑Maa, sɛ ‑n ’kää ‑na dɩba ’dɩ ’nyɛɛ, ‑sɩbhä ‑n nɩ ’nyɔ ’dɩ. Nyɛgbayuëa, ’zuë ‑daayuësɛ ’dɩ ’mö. ²’Ngwlɩ ’kädɩɩ, ’zuë ‑na ‑dawa a sɛ ’dɩ ’mö. Nglʋdɩgbö, ’zuë ‑na nglʋdaayuë a sɛ ’dɩ ’mö, tuë ‑nanyɩ ’mö ’bhɛta.

Zezwii a ‑nʋa a ‑zɩkpa ’mö a ’kuzlengwlɩɩ

³Timotee, ’kuzlengwlɩɩ ‑waaa ‑tiamö ’wʋyinyɔ ‑kä, yuë ’wʋ. ⁴‑Maa ’kuzlenglɔ ‑kä ’yuë ‑kä, ɛ ‑kä’ɛ ’yuë a yuëë, yuë ’la, ’nyʋä ’dɩ, ’saa zlɔnɩɛ ’mö wa ‑lowluwa a dɛɛ, ’mö wa nɩ nʋ tɛɛ, miɛ nɩɩ, wa ‑da mɔɔ ‑suëë a‑a, zaa wa nɩ ‑sumɔ’ɛ wabhlɩ. ‑Sɩbhä ma‑a nɛnɩɛ Lagɔ dlɩ yɔwʋ. ⁵’Kuzlenglɔ ‑ɔɔɔ ’wʋyinyɔ ‑kää, Lagɔ a ’yize ’mö ɔ ’tɛɛnɩɛ dlɩ. Sɛɛ zlɩ zɩɛ, sɛɛ swe yluä, ’mö ɔ bhibhee ɔ ’kɔ ’wʋ yi. ⁶‑Maa ’kuzlenglɔ ‑kä nɛmönɛmölibho ‑kä, ɔ yi ‑bhölɩ ‑kë, ‑gäzɛ a sɛ ɔ ‑wʋä. ⁷Wɛlɩɩ ‑n ’kää ’kuzlengwlɩɩ ’wʋ ligbanɩ, wa tuëa nuë ’wʋ kwää, miɛ da’a. ⁸Sɛ’ɛ n gbää nɩɩ, nɩkpɛ ’nɩ ’ɔ waa ’yli ’zʋnɩ, ’n ’ɔ ‑kosu yɔwʋ a ‑nʋa a’bhë, ɔ ’nuë ’yli ’zʋnɩɩ, Lagɔ ’a wɛlɩɩ ’mö ɔ yɛɛ da’a kɛ’mö ‑sɛ. Ɔ zi nɩkpɛ a ‑mɔ ‑ɔɔɔ Lagɔ ‑gänɩ a’bhë ’wʋ.

⁹’Kuzlenglɔ a ‑mɔ Zezwii a ‑nʋa a ‑zɩkpaa kää wa ’kä ’yli ’zʋnɩɩ, ɛ nɩ tɩ ’kuzlenglɔ a ‑mɔ ‑ɔɔɔ ‑bhlɛ ’ylʋbö a gwlɩ ta ghlɩ glɩnɩ. ’Kuzlenglɔ a ‑mɔɔ ’nɩɛ ‑bhlɛ tɛkäsɛ käböghlɩ möö, ’mö ɔ nɩ glɩnɩ. ¹⁰’Nglɔ a ‑mɔ ‑ɔnyɩɩ ’dɩ a dɩ nɩkpa sɛɛ, ’mö ɔ nɩ glɩnɩ. Miɛ nɩɩ, ’nglɔ a ‑mɔɔ ‑su a‑a sasɛ ’ɔ yuëa, ‑ɔ päla a‑a sasɛ lowluwa, ‑ɔ yɩbhä a‑a ɔ ’kä ɔ ’bhɩa Lagɔgänɩwaa ’yli ‑wʋ, ‑ɔ yi a‑a ngäzɩwa ’wʋ, ‑ɔ nʋ a‑a ‑li a ‑li a kii ’wuë, ’mö ɔ nɩ glɩnɩ.

¹¹‑Maa ’kuzlenglɔ ‑kä ‑dɩgba glɩnɩɩ, ’mö n ’nɩɛ gaaa. Ɛ’ɛ ‑bhö nyɩasɛ, ‑maa ‑sɩbhä a ’nglɔ, nyɩbhɛlɩ a ’tʋ ‑kɔɔ tenyii ’lɩbhää, ɔ yi Kliisɩ ’a wɛlɩɩ ‑gömö panɩ, ɔ yi käböghlɩ mö. ¹²‑Sɩbhä a dɔ’wʋ, ’ɔ wɛlɩɩ ɔ bhïla a‑a nɩɩ, ɔ ’kä Kliisɩ a ’yize ’yli ‑wʋʋ, ’mö ɔ ‑sɛɛ da’a nimï zaa, ’nyinyloli ɔ nʋä. ¹³Nglʋdɩgbö, libho wa plɛnɩɛ ’yibɔlɩ ’wʋ, ’n wa nɛmöä kpaakpa, ‑mä ’ligbï ’wuë ’mö ‑mä wa möä. ‑Yɩɩɛ tenyii nɛnɩ a’bhë, miɛ nɩɩ ‑kɔlɔkɔlɔ wa nʋä, wɛlɩ ‑yɩ ’nuëë ’wʋ yɩlɩɩ, ’mö wa pää wanyɩ ’mö. ¹⁴Nza n gbää nɩɩ, ’kuzlenglɔ ‑kä ‑dɩgba glɩnɩ, ɔ nɩ mö ghlɩ ‑mɛmɛɛ, ɔ ’kä ’yuë gwälɩ, ɔ ’kä sasɛ ’ɔ ’ligbëa ’yli ’zʋnɩ. ‑Lɛ a dɔ’wʋ wa ’naa ’kä Zezwii a ‑nʋa a ‑gblɩwaa nuë ’nyɛ wa ’naa ’kʋä zɛmö ‑dɩnɩ. ¹⁵Nyɩasɛ n’n‑ä ‑sɩbhä gbä, ‑maa ‑sɩbhä a ’kuzlengwlɩ ‑mumuë, wa yɛ Zezwii ’a ’yioo ’wʋ ’bhöö. Sataa ’mö wa ‑gänɩɛ. ¹⁶Sɛ’ɛ n gbää nɩɩ, ’nglɔ a ‑mɔɔ glɩnɩɛ Zezwii a ‑nɔ, ’kuzlengwlɩ ‑kä ‑mä ’ɔ waa gla’mö ‑wʋʋ, ɔ’bhë, mɔɔ nɩ ’zʋnuë ’yli, ‑maa ɔ nɩ tuë Zezwii a ‑nʋa a ‑zɩkpa tɩnɩ. ‑Lɛ a dɔ’wʋ Zezwii a ‑nʋa a ‑zɩkpa yi kä’mö ‑ghönɩ, wa yi ’kuzlengwlɩɩ ‑waaa ’zʋsɛ ‑kä ’lɩlɩlɩ ’yli ’zʋnɩ.

Zezwii a ‑nʋa a ‑zɩkpa a ’yukugänɩwaa

¹⁷Zezwii a ‑nʋa a ’yukugänɩwaa ‑wa nʋä sasɛ ’wa libhoo, wa nɩ ’zuë ‑lɛ tenyii. Wa gla’mö a ‑muëë ylɔɔ, ‑wa bhïlaa Lagɔ ’a wɛlɩɩ, ‑wa ‑sɛsɛniɛ nɩkpa dlɩ ‑gömöö, ’mö wa nɩ ’zʋ ‑lɛ tenyii a’bhë. Libhoo wa nʋä da’a a ’wlumö, wa nɩ ’pɛnuë sasɛ. ¹⁸Sɛ’ɛ yɩ cɛlɩɛ ‑mä Lagɔbɔgʋʋ ’mö nɩɩ: Bhilii ‑ɛ yʋä lilea, tɛ nuë gwa.5.18 Detlenɔɔmö 25.4. ’Mö ’Bhɛtɩa nʋä nɩɩ: «Wa’a yɩlɩ ’lilelɛlɛnyɔ gbʋgbʋ ’mö.»

Sɛ’ɛ yɩ cɛlɩ’ɛɛ ‑mä nɩɩ: Nɩkpɛ a ‑mɔɔ nʋä libhoo, wa kä wa ’kɔ wʋ ’wlumö ’pɛnɩ.

¹⁹Timotee, nɩkpɛ ‑kä yi, ɔ ‑kä nɩɩ, ɔ yɛ Zezwii a ‑nʋa a ’yukugänɩnyɔ ‑bhlʋ ’kïbhëzokwë ‑gömö ghlɩ nʋʋ, ’n nɩkpa ’sɔ nɩkpa ta ’nɩ ‑sɩbhä gbämöö, to ’yukwli ‑pʋnɩ. ²⁰‑Maa wa ‑kä ‑tiamö nɩkpɛ ’kïbhëzokwë ‑gömö ghlɩɩ, ’nyɛnɔ nɩkpabhë a ’yila ’klʋ gbëaa ’dɩ nɩɩ, sɛ ɔ ’zʋä, ‑sɩbhä ’nɩɛ nɛnɩ, ‑lɛ a dɔ’wʋ Zezwii a ‑nʋa ‑muë’la ’wuë wa yi nganɔ ku ’mö ‑kämö.

²¹Lagɔ mɔ, Zezwii Kliisɩ mɔ, Lagɔzuzukuu mi, wa ’wuë a ’yila ’klʋ, wɛlɩɩ n nyɩamöä dɛ’ɛ ’zwi ’klʋkpamö, tɩ nɩkpɛ a ’klʋ ‑gu. ²²‑N ‑kä ‑n ’kä nɩkpɛ kätɩkpö ’wlu zʋʋ, tɩ yɛ’mö tɩta, ‑n tɩa ‑nanyɩ ‑mɔmɔɔ a ’nyinyloli a gbʋ ’wʋ jlinɩ. ‑Na’bhë, ’nɛmanɩ ‑nanyɩ ’wʋ, ‑n tɩa ’nyinyloli nʋmö.

²³Timotee, ‑nn‑ä ’mlɩ ‑kä zaa, tɩ ’nyu a ’yize ’nɩmä, ‑maa ’nɩmämö’ɛ nʋ ’tikïyie, ɛ’ɛ ‑bhö nyɩasɛ, ‑maa ‑nn‑ä ’ylʋ ’wʋ ’bhöö.

²⁴Timotee, nɩkpa ‑mumuë, ’wa ’nyinylolii wa nʋä, ‑bɛ ’nɩ ’nɛkɩ ’mö a’bhë, ’n yɩ bhliɛ gbëdanguu. ‑Maa ‑mumuë wabhlɩ, wa ‑nɩɩ ziza‑a yɩ ziza‑aa, wa ’maa ’kɩ ’mö ’nɛka ‑këë, ’n yɩ bhlia’aa bhäla gbëdanguu. ²⁵Sɛ ‑bhʋlʋ ‑kpɔ ’la ‑sɩbhä nɩkpa ‑mumuë ’a ‑li a ‑li wa nʋä pöä gbëdanguu. ‑Maa ‑mumuë wabhlɩ, ’wa ‑li a ‑li wa nʋä, ziza‑a yɩ ziza‑aa, ‑maa sɛ yɩ ‑kä ’mö ‑wʋ ‑kë, ’wa ‑li a ‑li ’la yɩ yi ’ylɩ ‑bhlʋ ’mö ’ylɩmö ’yoo.

Göwa ‑nyɛ wa ’bhidɩbawa ’sɔ

¹Zezwii a ‑nʋa ’wuë ‑wa glɩnɩɛ göwaa, wa nɩ tɩ wa ’bhidɩbawa ’ylimö fälanɩ, ‑maa wa nɩ ’zuë ’klʋkpamö ’tɩɩ. ‑Lɛ a dɔ’wʋ, nɩkpɛ ’naa ’kä wa za Lagɔ a ’nglɩ nyima, ’ɔ wɛlɩɩ ‑a ’cɩaa, ’n ‑bɛ ’naa ’kɩɛ ’kïbhëzokwë ‑gömö ’zʋ. ²Göwa a ‑muë ‑wanyɩɩ ’bhidɩbawaa glɩnɩmöä Zezwii a ‑nʋää, wa nɩ tɩ nɩɩ, ‑a ’bhidɩbawa, ‑aa ‑daayuë wa glɩnɩɛ zaa, wa ’klʋkpamözʋgbʋ ‑nɩnyɩɛ tenyii plɛnɩ, wa nɩ tɩ ‑sɩbhä nʋ. ‑Maa wa ’bhidɩbawa ’la, ’wa sɛ wa glɩnɩmöä Zezwii a ‑nʋä Lagɔ ‑waa, ‑sɩbhä ma‑a nɩ kä tenyii a’bhë ’nglɩ wa ’kʋä sasɛ ’yli ‑wʋ. Timotee, wɛlɩ nɩ, ‑sɛsɛnii nɩkpa dlɩ ‑gömö, ’zuë ’dɩ ’mö wa ’kɩa ’klʋkpamö zʋ.

Moni a tʋʋ ‑nyɛ Lagɔ ’a libhoo ’sɔ

³‑Alowli Zezwii Kliisɩ ’a wɛlɩɩ, ‑abhʋa ɔ ‑nʋa ’wuë ‑a kää dlɩ ’wʋ, ‑yɩ ‑wʋä Lagɔsɛɛ, nɩkpa ‑waaa ’yɩbhä wa ’kɩ ‑gänɩ, ‑wa sɛɛ wa’bhï wa ‑nɩ ’wlumö ’n wa biiɛ, ⁴bhabhawa wa glɩnɩɛ, wa’aa Lagɔ ’a wɛlɩ a’bhë ‑yi ’lɩlɩlɩ. Wa ’kä ’fʋ a wɛlɩkïbhïyiea ’mö ’nɛka wa ’kɩ ’mö kpɛnɩ a gbʋʋ, mʋʋ plɛnuëë tenyii, ‑n ‑kä ‑sɩbhä ’wʋ yɩlɩɩ, ‑n yi nɩɩ, wa ’wlumö yɛ nyimo nʋ. ’Wa sɛ wa zʋä da’a, ‑sɩbhä ma‑a lɛmöä ’ylikälɩkälɛ, ’lʋlwɛɛ, ‑diziaziu, ‑sɩbhä ma‑a kää ’nglɩ ’n nɩkpa pää wa ’bhɩa a dɛ ’zokwësɛ dlɩ. ⁵Kpɛnɩkpɛnɩwa ’la, wa’aa ’nɛɛnɔ ’wlumö ‑kä, wa yɛ Lagɔ ’a ‑tiamö a wɛlɩɩ kɛ’mö ‑sɛ. ‑Sɩbhä a za ’wa kpɛnɩkpɛnɛɛ ’nɩɛ ’bhlenɩdɛ ‑kä. Wa ‑tɔnɩ nɩɩ, Lagɔgänɩgänɛ, moni a sɛtɛlɩlibhoo.

⁶Lagɔ a dlɩtɛɛnɩtɛnɛ, ɛ kä ‑tiamö ‑li a ‑li ’mö, ‑maa nɩkpa a ‑muë ’saa Lagɔ nyʋää ‑wa nʋä wʋ ‑zunuë kɛɛ, wa ’yize a dɔ’wʋ ɛ kää ‑li a ‑li ’mö.

⁷Nyɩasɛ n’n‑ä ‑sɩbhä gbä, ‑maa nɩkpɛ ‑kä ’pɩwʋ yii, ɔ ‑nyɛ ‑lu ’nɩɛ yi,

ɔ ‑kä’ɛ ’pɩwʋ ’bhööä yii, ɔ ‑nyɛ ‑lu ’nɩɛ mö.

⁸Zaa, nɩkpɛ ‑kä lile ‑kä, ɔ ‑kä ’wuali ‑kä, yɩ nɩ ‑zunɔɔ kɛ.

⁹‑Maa nɩkpɛ a ‑mɔɔ yɩbhää ɔ ’kä klɩpaa wʋlʋnɩnyɔ ’zʋʋ, ’ɔ dlɩɩ yo dula, nyɩasɛlii a kii ’wuë ‑yɩɩɛ ɔ ‑lu a ‑lu ’mö ‑kää, yɩ yi ’ɔ zɩkpaa nyima, ɔ yi ’yli bhɩɛ ’lɩlɩlɩ. ¹⁰Ɛ’ɛ ‑bhö nyɩasɛ, ‑maa moni a tʋ, mʋʋ glɩnɩɛ ‑lizoku a kii ’wuë a ’bhöönɩda. Nɩkpa ‑mumuë, moni a tʋ mʋʋ zumanuëë tenyii dlɩ zɛmö, ’n wa yiɛ Lagɔ ’a dlɩ’wʋkänɔɔ kɛ’mö ‑sɛ, ’n wa yiɛ wanyɩ gbɩ a ‑zebï pälɩ, ’n yɩ ziuëa’aa ’zwɩ.

Sɛ’ɛ Pɔɔlʋ ’a ’gbëbhlenɩwɛlɩɩ gbää

¹¹‑Maa ‑nmö ‑naa Timotee,

Lagɔnɩkpɛ ‑n glɩnɩɛ,

zaa ‑lizoku ’la, ’dianii ‑nanyɩ gwë.

’Saa zlɔnɩɛ ’mö, mö ‑n nɩ tɛlɩ sɛ,

nɛmö Lagɔsɛ, ’tɛɛnɩ Lagɔ dlɩ,

‑wawʋ nɩ ‑wʋmö dlɩ zɛmö,

‑kpaanɩ dlɩ ’mö, yɔnɩ dlɩ ’wʋ.

¹²Gwɩ sasɛ Lagɔ a dlɩtɛɛnɩtɛnɛ a tʋ,

miɛ nɩɩ, ’tɛmanɩ ’yli yɔwʋ ‑n ’kä Lagɔ dlɩ ’tɛɛnɩ,

gbulo Lagɔ ’a ’pɩwʋlelea ’wʋ.

‑N ‑yi sɛ nɩɩ, Lagɔ mɔɔ ‑samöä ‑lɛ ‑n ’ka ghlɩ.

‑Na’bhë ‑sɩbhä ‑n bhïliiɛ ’ylɩ ‑bhlʋ ’mö gbëaa nɩkpa a ‑bɛ a ’yila ’klʋ.

¹³Timotee, Lagɔ ‑bhölɩbhölɛ ’wuë ’bhöönɩɛ ’mö mɔ, ’nZezwii Kliisɩ, ‑ɔɔɔ ‑lɛ Pɔɔsɩ Pilaatɩ a ’yila ’klʋ Lagɔ ’a wɛlɩɩ kɛ’mö ‑sɛ ’lɩlɩlɩɩ, wa ’nglɩ ’mö, ’dɩ n nyɩamöä dɛ’ɛ nɩɩ: ¹⁴Wɛlɩɩ n nyɩamöä, ti kɛ’mö ‑sɛ. ‑Na’a nɛmönɛmösaa nɩ zlɔnɩ ’mö, ‑sɩbhä nɩ tɩ ‑maa yɔwʋ ‑kä. ’Zʋ ‑sɩbhä ‑këë ‑Alowli Zezwii Kliisɩ ’kä yi. ¹⁵’Ɔ yiyitɛnyɩ ’la, Lagɔ a’bhë mɔɔ ‑deee.

Ɔ ’yize mɔɔ glɩnɩɛ ‑lii wuë a ‑lowli,

’mö ’nyupälɩ ’wuë ’bhöönɩɛ ’mö,

mɔɔ glɩnɩɛ ’bhlɩlowluwaa ’wuë jijo’wʋ a ’bhlɩlowli ’kɔdɔɔ,

’kämanɩwaa ’wuë mɔɔ ’kämanuëë ‑gömö.

¹⁶Ɔ ’yize mɔɔ glɩnɩɛ ‑ɔɔ bhɩɛ ’wʋ.

Lɩlɛɛ ‑ɛ ‑binɔɔɔ, ‑bɛ ’nɩɛ bhɛnɩ ɔ ’kɛ yɔwʋ ’dio.

‑Bɛ ’nɔɔ ‑bhlɛ tɛkäsɛ ’ylɩmö,

mä’ä dʋdʋ ’wʋ a nɩkpɛ ’nɩɛ bhɛnɩ ɔ ’kɔ ’ylɩmö.

’Ɔ nglɩɩ ‑nyɛ ’ɔ ’kämanɔɔ ’sɔ,

yɩ nɩ ’ghlimanɩ ’kwädlɩkwädlɩnɩ.

‑Amɛɛ!

¹⁷‑Wa kää mä’ä ’pɩwʋ a lɩɩ, ’nyʋä ’dɩ, wa nɩ tɩ bhabhawa glɩnɩ. Lɩɩ ‑yɩ glɩnɩɛ ’plɩplɩli a ’yizee, ’mö wa nɩ tɩ dlɩ ’tɛɛnɩ, ‑maa Lagɔ ‑ɔ nyɩanyɩɛ ‑lii ’wuë ‑a ’kä ’mäna ’mö ‑wʋ, ‑ɔ ‑kanyɩ ’nyɛɛ yi ‑ɔɔ yɛkaa, ’mö wa nɩ ’tɛɛnɩ dlɩ. ¹⁸’Nyʋä ’dɩ wa nɩ nʋ ‑li a ‑li. Wa nɩ ’nyɛ nɩkpa, wa nɩ nyɛnɩ dlɩwätɛ ’mö. ¹⁹’Wa ‑li a ‑li wa nʋä da’aa, sɛ wa ’yɩbha’ɛ lɩ a ki ‑mimii ’wluu, ‑sɩbhä ma‑a. Miɛ nɩɩ, ‑mä Lagɔ yɔwʋ, wa yi ‑mä ‑tiamö a ‑bhölɩbhölɛ ghlɩ.

²⁰‑Nmö na ’yu Timotee, sɛ’ɛ n gbää nɩɩ, ’saa ’wuë Lagɔ nyɩamöä, ’zʋnu sasɛ ’yli. ‑Maa nɩkpaa ‑wa laa ’fʋ wanyɩ Lagɔ ’a ‑lii ’wuë a ‑yiwa, nyɩasɛwɛlɩɩ ‑yɩɩɛ gbëaa ’mö ‑kä, ‑yɩ ‑nyɛ Lagɔ ’a wɛlɩɩ ’nɩ mönɩɛ yɔwʋ, ‑wa biiɛ, ’dionuë gwë. ²¹Nyɩasɛ n ‑nɩmöä ‑sɩbhä ’dɩ ’nyɛ, ‑maa Zezwii a ‑nʋä ‑mumuë, ‑lɛ a wɛlɩ ’la ’mö wa ‑gänɩɛ, Lagɔ ’a wɛlɩɩ ‑a kää dlɩ ’wʋʋ, ’n wa yiɛ gwë ’dionɩ.

Timotee, a ’wuë, Lagɔ nɩ ’panyɩ ’kwädlɩ ’nyu ’yize.