1 ZAA

Tɛkäbɔgʋʋ

Zaa

’cɛlɩɛ

’Bɔgʋ nɩ ’mö a wɛlɩɩ

Zaa ’cɛlɩɛ ’Mänatɩtɩɩ ‑yɩ bhïlaa Zezwii a dɛ ’wëë, ɔ ’cɛlɩ’ɛ ’bɔgwɩ ‑mimii, yɩ gla’mö a ‑bhlʋä dɛ’ɛ. ‑Maa ‑bɛ ’nɩɛ Zezwii a ‑nʋa a ‑zɩkpa ‑ma ɔ kʋ ’wʋ ’pää ‑yi. ‑Mä wʋ ’mö, wɛlɩkïbhï ’kädɩ ’sɔ, mɩɩ cɛlɩɛ ‑mä.

Tɛkäkïbhëa, sɛ’ɛ a nʋä nɩɩ, Zezwii a ‑nʋa, wa nɩ nɛmönɩ ‑mä ‑gägäzlɩɩ ’mö. Kïbhë ’la, ma‑a sɛɛ zɛmö nɩɩ, Zezwii a ‑nʋä nɩ ’zʋ ’ɔ wɛlɩɩ ’klʋkpamö, wa nɩ ‑wawanɩ.

’Sɔnakïbhëa, sɛ’ɛ a nʋä nɩɩ, yiowaa, wa ’cɩa nɩkpa nɩɩ, Zezwii ’nɩ ‑bhö Lagɔ a Yu, mɔɔ ’nɩɛ’ɛ Puënyɔ Lagɔ ‑sɛɛ ‑lɛ glɩnɩɩ, Zezwii a ‑nʋa nɩ ’nɛmanuë ’wʋ.

Wɛlɩ ‑ɔ nyɛ ‑tiamö a ‑bhölɩbhölɛ

¹Wa laa Wɛlɩ, ‑ɔ nyɛ ‑tiamö a ‑bhölɩbhölɛ, ɔ dɩ ‑a nyanyɩɛ. ’Pɩwʋ a tɛɛnɩdɛ, ɔ ‑bhölɩ a ɔbhlɩ. ‑A’bhï, ’ɔ bhïlawɛlɩɩ, ‑a ’nwi, ‑a ’yɩnɔ ‑a’a yilaa ’mö ’ylɩmö, a‑a yoo ’yli köbha, ‑a’a kätɩkpöö zo kɛ. ²‑Ɔ glɩnɩɛ ‑tiamö a ‑bhölɩbhölɛ mɔɔ ’wlʋnɩɛ mä’ä ‑aa jijo’wʋ ’yli, a‑a yoo ’ylɩmö. ‑Mä ɔ ‑wʋ a‑a ‑aa dɩba Lagɔ yɔwʋ. ‑Maa ɔ yiɛ, ’pɩwʋ mää ’naa ’kää ’yli bhɩɛ ma‑a ’wlʋnɩɛ da’a ’yli. Pɩwʋ ’la a wɛlɩɩ, mö ‑a zʋä kɛ ‑gömö nɩɩ, ‑tiawɛlɩɛ, mö ‑a nyanyɩɛ. ³Sɛ’ɛ n gbää nɩɩ, ’saa ‑a ’yɩɛ ’ylɩmö, ’saa ‑a ’nʋä, yɩ dɩ ‑a ’nyɛmanyɩɛ, nzɩɩ sɛ ‑a glɩnɩɛ Lagɔ a ‑nʋä, a ’kä ‑sɩbhä ɔ ‑nʋä ’zʋmö. ‑Lɛ a dɔ’wʋ, ‑a ’wuë, ‑a ‑nyɛ ‑aa dɩba Lagɔ ’sɔ, ’ɔ Yuu Zezwii Kliisɩ kökä, ‑a yi ’gämö ’wʋ ‑wʋnɩ. ⁴Zaa, ’bɔgʋ nɩ mö ‑a cɛlanyɩɛ ’wʋ, nzɩɩ ‑a ’wuë ’mäna ‑kanyɩ ’wlu ’mänanɩ.

A‑a ’nɩ nɛmönɩ ‑mä ‑gägäzlɩɩ ’mö

⁵Sɛɛ Zezwii Kliisɩ nyɩanyɩɛ ’dɩɩ, ‑sɩbhä ‑a nyanyɩɛ dɛ’ɛ ’dɩ nɩɩ: Lagɔ, ‑gägäzlɩɩ ɔ glɩnɩɛ, ɔ’ɔɔ ’yuylukwë ’mö ‑kä ’lɩlɩlɩ. ⁶Zaa, ‑a ‑kä nɩɩ Lagɔ mö ‑a ‑nyɛɛ ‑wʋnɩ ’wʋ nʋʋ, a‑a ‑kä’ɛ ‑mä ’yuylukwë ’mö nɛmöö, widɩsɛwa ‑a glɩnɩɛ, ‑aaa gbëaa ’mö ‑kä. ⁷‑Maa, a‑a ‑kä ‑mä ‑gägäzlɩɩ ’mö nɛmöö, Lagɔ, ‑gägäzlɩɩ ɔ glɩnɩɛ zaa, ɔ Yowli Zezwii ’a dluu ‑wʋ kwliɛ a za, ‑a’a ’nyinylolii a gbʋʋ ‑yinyɩ ‑gömö ’bhöö, ‑a yi ’wʋ ‑wʋnɩ.

⁸‑A ‑kä nɩɩ ‑aaa ‑lizoku nʋ, gbʋ ‑nɩnyɩɛ ‑gömö ‑wʋ nʋʋ, ‑anyɩ ‑a dulaa, ‑aaa gbëaa ngli kä. ⁹‑Maa, a‑a ’nɩ ‑a’a ’nyinylolii ziza, ‑a ‑kä yɩ ’bï ‑sɛɛ, Lagɔ, ɔ’ɔɔ yio ngli ‑kä, ‑kpöö ’wʋ ɔ ‑wʋä zaa, ɔ yi ‑a’a ’nyinylolii a gbʋʋ ’yi ’tatinɩ, ɔ ’yila ’klʋ a dɔ’wʋ ‑a yi ’wlɩlɩ plɛ. ¹⁰‑A ‑kä nɩɩ ‑aaa ’nyinyloli nʋ ’lɩlɩlɩ nʋʋ, ‑lɛ a dɔ’wʋ, Lagɔ, widɩsɛnyɔ mö ‑a libhoo ’wʋ, ’ɔ wɛlɩɩ ‑nɩnyɩɛ dlɩ zɛmö ‑wʋ.

‑Ɔ ’kää ‑mä Lagɔ a ’yila ’klʋ ‑aa dɛ bhïlaa

¹Na ’yuënyɩ, a tɩa ’nyinyloli nʋ a za, nza n cɛlanyɩɛ dɛ’ɛ ’wʋ. ‑Maa ’n nɩkpɛ ‑kä ’nyinyloli nʋʋ, ɔ nɩ yɩbhlɩnɩ sɛ nɩɩ, ‑ɔ ’kää ‑mä ‑aa dɩba Lagɔ a ’yila ’klʋ ɔ dɛ bhïlaa, ɔ ‑bhölɩ. Zezwii Kliisɩ ‑ɔɔɔ tɛkäsɛ ’nyinyloli nʋʋ, mɔɔ. ²Mɔɔ bʋbɔnɩɛ ɔnyɩ Lagɔ, nzɩɩ ‑a’a ’nyinylolii a gbʋʋ ‑kanyɩ ‑gömö ’bhöö. ‑A ’yize ’a ’nyinylolii a za ɔ’ɔɔ ’ku, ‑maa ’bhlɩbhë ’wuë a ’nyinyloli a za ɔ ’kuä.

³A‑a ‑kä Lagɔ ’a wɛlɩɩ ’klʋkpamö zʋʋ, ‑lɛ a dɔ’wʋ ‑a ‑yi sɛ nɩɩ, ‑a yoo. ⁴‑Maa ‑ɔ ‑kä nɩɩ ɔ ‑yi Lagɔ nʋʋ, ’n ɔ ’nɩ ’ɔ wɛlɩɩ ’klʋkpamö zʋʋ, ɛ nɩkpɛ ’la, widɩsɛnyɔ ɔ glɩnɩɛ, ɔ’ɔɔ gbëaa ngli ‑kä. ⁵‑Maa ‑ɔ ‑kä Lagɔ ’a wɛlɩɩ ’klʋkpamö zʋʋ, ‑lɛ a nɩkpɛ ’la, nɩkpɛ a ‑mɔɔ ‑waa ‑tiamö Lagɔ ’mö ɔ glɩnɩɛ, sa’a ‑sɩbhä ‑a yɩbhlɩnɩɛ sɛ nɩɩ, ‑a ‑gälɔɔ ’wʋ. ⁶Zaa, ‑ɔ ‑kä nɩɩ Lagɔ ’mö ɔ ‑nyɛ ‑wʋnɩɛ ’wʋ nʋʋ, sɛɛ Zezwii ’a nɛmönɛmösaa ‑wʋ a‑a, ’ɔ nɛmönɛmösaa nɩ ‑wʋmö ‑sɩbhä.

Gbalele

⁷Na dlɩsɛkäwanyɩ, dɩɩ ‑yɩnyɩ za n ‑wʋanyɩɛ dɛ’ɛ ’wʋ ’cɛlɩ dɔ’wʋʋ, a dɔ’wʋ, ɛ’ɛ ‑bhö ’dɩlili, ‑maa bhla’mö a dɩɩ wa ’nyanyɩ a‑a tɛɛtɛɛdɔ’wʋʋ, miɛ. Lagɔwɛlɩɩ a ’nʋ a‑a tɛkädɔ’wʋ ’mö n gaa. ⁸‑Maa n yi nɩɩ, ’dɩliliɛ nʋ. Ɛ’ɛ ‑bhö nyɩasɛ, ‑maa Zezwii mɔɔ ’wälaniiɛ ’yli ’n a zwiɛ ’klʋkpamö. Nza n gbää nɩɩ, ’yuylukwëa ‑wʋ ’plɩ dɔ’wʋ, zlɩ pä ‑nieniee.

⁹Zaa, ‑ɔ ‑kä nɩɩ ‑mä ɔ ‑bhölɩnɩɛ ‑gägäzlɩɩ ’mö nʋ, ’n ɔ ‑kä ɔ ‑daayu ‑gblɩɩ, ‑mä ɔ ‑bhölɩnɩɛ ‑bhlɛ ’yuylukwëa ’mö. ¹⁰‑Maa ‑ɔ ‑kä ɔ ’lilɛ ‑waa, ‑mä ɔ ‑bhölɩnɩɛ ‑gägäzlɩɩ ’mö. ‑Lu a ‑muu ’kää ’nglɩ ‑kä ɔ ’kä gozo ɔ ’kä bhlii, wʋ’ʋä ‑bhölɩ. ¹¹‑Maa ‑ɔ ‑kä ɔ ’lilɛ ‑gblɩɩ, ’yuylukwë ’mö ɔ ‑wʋä, bhöbhlɩnɩ ɔ bhöbhlɩnɩɛ, ’yuylukwëa a za, ɔ’ɔɔ ’yioo ’wʋ yɩlɩɩ.

¹²Na ’yuënyɩ,

Zezwii ’a nglɩɩ a bɔɔmö a za,

Lagɔ yɛ ’a ’nyinylolii a gbʋʋ ’yi ’tatinɩ, nza n cɛlanyɩɛ ’wʋ.

¹³‑Lowluwanyɩ,

‑ɔ ‑bhölɩ a‑a tɛɛtɛɛdɔ’wʋ ‑këë zɩ’ɛ,

sɛ a ‑yooo a za, nza n cɛlanyɩɛ ’wʋ.

Nyɛgbayuënyɩ,

a yɛ Sataa ’wlu ’plɩ, nza n cɛlanyɩɛ ’wʋ.

¹⁴Na ’yuënyɩ,

a ‑yi sɛ nɩɩ, Lagɔ, a dɩba ɔ glɩnɩɛ, nza n cɛlanyɩɛ ’wʋ.

‑Lowluwanyɩ,

‑ɔ ‑bhölɩ a‑a tɛɛtɛɛdɔ’wʋ ‑këë zɩ’ɛ,

sɛ a ‑yooo a za, nza n cɛlanyɩɛ ’wʋ.

Nyɛgbayuënyɩ,

Lagɔ ’a ’mötɛɛnɔɔ, wʋ ‑wʋanyɩ ‑gömö,

’n a zʋä ’ɔ wɛlɩɩ dlɩ zɛmö,

’n a yiɛ Sataa ’wlu ’plɩ, nza n cɛlanyɩɛ ’wʋ.

¹⁵’Pɩwʋ mä ‑a ‑wʋä dɛ’ɛɛ, a nɩ tɩ ‑mä ’a dilaa yowʋ ’nyɛ, ‑mä a ‑lii a ’tʋ nɩ tanyɩ ’wlumö köbhänɩ. ‑Maa nɩkpɛ a ‑mɔ ‑waa mä’ä ’pɩwʋ a ‑lii, ɔ’ɔɔ ‑aa dɩba Lagɔ a ‑wawʋʋ dlɩ zɛmö ‑kä. ¹⁶Ɛ’ɛ ‑bhö nyɩasɛ, ‑maa ‑ɔ glɩnɩɛ mä’ä ’pɩwʋ a ‑nɔ, ɔnyɩ ɔ tɛlɩnɩɛ ’wʋ sɛ. ’Saa sɔɔ dlɩ ’mlɩ ’wuë, ɔ yɩbhä ɔ ’kɩ ghlɩ klɩpaa. Tɛkpɔ ɔ tɛkpɔɔ ’ɔ lɩɩ a za. ‑Mi’la ’wuë, ‑mä yɩ’ɩɛ Lagɔ ’mö ’bhöönɩ, ‑maa mä’ä ’pɩwʋ a ‑li yɩ glɩnɩɛ. ¹⁷’N ‑maa, ’yli yɩ ’kää bhɩɛ. ‑Maa sɛɛ Lagɔ yɩbhää, nɩkpɛ a ‑mɔɔ zʋä ‑sɩbhää, ɔ yi ’kwädlɩkwädlɩnɩ ‑bhölɩ ’yize.

‑Ɔ ‑gblɩɛ Kliisɩ

¹⁸Na ’yuënyɩ, ’pɩwʋ a ’ylibhɩɛdaa, ‑lɛ yɛ tenyii ’dio. A yɛ a ‑pa ’wʋ ’nʋ nɩɩ, ‑ɔ ‑gblɩ Kliisɩ, ɔ yi ’yli ’wlʋ. ‑Sɩkaa a nɩkpa a ‑bɛ, wa yɛ ‑sɩbhä a nɩkpa ’zʋ. Mɩɩ nyɩanyɩɛ ‑tiamö ’dɩ nɩɩ, ’pɩwʋ a ’ylibhɩɛdaa, ‑lɛ yɛ tenyii ’dio. ¹⁹Nɩkpa ’la, ‑abhʋa Zezwii a ‑nʋa a gla’mö ‑mä wa ‑wʋmö a‑a. ‑Maa wa’aa la ‑tiamö Zezwii a ‑nʋä glɩnɩ. Wa ‑kä a ‑tiamö ɔ ‑nʋä glɩnɩ laa, wa ‑nyɛ ‑abhʋa ’naa ’kä a ’ylimö ‑sɛnɩ. ‑Maa sɛ wa ‑nyɛ ‑abhʋa ‑sɛnɩɛ da’a ’ylimöö, ‑sɩbhä ma‑a tulanɩɛ nɩkpabhë ’ylimö nɩɩ, wa gla’mö a nɩkpɛ ‑bhlʋ a’bhë ’nɩ ‑bhö a ‑tiamö Zezwii a ‑nɔ.

²⁰‑Maa abhʋa abhlɩ, Kliisɩ, mɔɔ ’zʋanyɩɛ Lagɔ ’a ’Wugɔmʋʋ ‑gömö. Nza a ‑yiɛ ‑yɩ ‑wʋä gbëaa. ²¹Lagɔ ’a ‑tiamö a wɛlɩɩ, n ’kanyi ’nyɛ a za, nza n ’nanyɩɛ dɛ’ɛ ’wʋ ’cɛlɩ. A’bhï a ‑yii ’kɩ. ’N a ‑yi’ɛ sɛɛ nɩɩ, ‑ɔ ‑yiɛ Lagɔ ’a ‑tiamö a wɛlɩɩ, ɔ ’naa ’kɩ widɩ ’mö ‑sɛnɩ ’lɩlɩlɩ.

²²‑Maa ‑ɔ sɛnɩɛ Lagɔ ’a wɛlɩɩ widɩ ’möö, ’mö n ’kanyɩɛ dɛ’ɛ sʋlʋnɩ. Nɩkpɛ a ‑mɔɔ nʋä nɩɩ, Zezwii, mɔɔ ’nɩɛ Puënyɔɔ Lagɔ ‑sɛɛ ‑lɛ glɩnɩ. ‑Ɔ cɛlɩɛ dɩbaa ’n ɔ cɛlɩ’ɛɛ ’ɔ Yuu, mɔɔ glɩnɩɛ ‑ɔ ‑gblɩ Kliisɩ. ²³‑Ɔ nʋä nɩɩ, Zezwii ’nɩ ‑bhö Lagɔ ’a Yuu mɔɔ, ɛ nɩkpɛ ’la, ɔ ‑nyɛ dɩbaa ’nɩɛ ’wʋ ‑wʋnɩ. ‑Maa ‑ɔ nʋä nɩɩ, Zezwii, mɔɔ glɩnɩɛ Lagɔ ’a Yuu, ɛ nɩkpɛ ’la, mɔɔ ‑nyɛ dɩbaa ‑wʋnɩɛ ’wʋ.

²⁴Zaa, abhʋa abhlɩ, Lagɔwɛlɩɩ a ’nʋ a‑a tɛkädɔ’wʋ, a ’zʋ a‑a dlɩ zɛmöö, a nɩ ti kɛ’mö ‑sɛ. ’N a ’ni kɛ’mö ‑sɛɛ, ‑aa dɩba Lagɔ ‑nyɛ ’ɔ Yuu Zezwii ’sɔ, a ‑nyʋä yi ’wʋ ‑wʋnɩ. ²⁵’Wʋwʋnɩwʋnɛ ’la, mɛɛ glɩnɩɛ ’pɩwʋ mää ’naa ’kää ’yli bhɩɛ. ’Mö Zezwii Kliisɩ gbää ɔ ‑kanyɩ ’nyɛ.

²⁶‑Wa yɩbhää wa ’kanyɩ ’wlumö nyima a za, wɛlɩɩ n ’nyanyɩɛ, miɛ da’a. ²⁷‑Maa abhʋa abhlɩ, Lagɔ ’a ’Wugɔmʋʋ Kliisɩ ’zʋanyɩɛ ‑gömöö, ɔ ‑wʋanyɩ ’kwädlɩ ‑gömö ’yize. Mɔɔ sɛnanyɩɛ Lagɔ ’a wɛlɩɩ ’wuë zɛmö. Ɔ’ɔ ‑sɛ widɩ, ‑maa wɛlɩɩ ’wuë ɔ nyanyɩɛ, ‑tiawɛlɩɛ. ‑Sɩbhä a za, nɩkpa ‑wa ’kanyɩ’ɛɛ Lagɔ ’a wɛlɩɩ a zɛmö sʋlʋnɩɩ, a tuëa’a sɛ tɛlɩ ’lɩlɩlɩ. ‑Maa sɛɛ Lagɔ ’a ’Wugɔmʋʋ ’nyanyɩɛ ’dɩ nɩɩ, a nɩ ‑glɛ ’kwädlɩ Kliisɩ ’wʋʋ, a nɩ ’zʋ ‑sɩbhä ’klʋkpamö.

²⁸Na ’yuënyɩ, sɛ’ɛ n gbää nɩɩ, a nɩ ‑glɛ ’kwädlɩ Kliisɩ ’wʋ. ‑Lɛ a dɔ’wʋ, ’ɔ yiyizlɩɩ ‑kä ghlɛɛ, ‑aa dila zɛmö yi ‑pälɛpälɛ ‑wʋ, zʋ ’naa ‑kanyɩ ’lɩbhä ɔ ’yila ’klʋ. ²⁹A ‑yi sɛ nɩɩ nɩkpɛ a ‑mɔɔ nɛnɩɛ Lagɔ dlɩ yɔwʋ ’mö ɔ glɩnɩɛ. ‑Sɩbhä a za, a nɩ yɩbhlɩnɩ’ɛ sɛ nɩɩ, nɩkpɛ a ‑mɔɔ nʋä ’saa nɛnɩɛ Lagɔ dlɩ yɔwʋʋ, mɔɔ glɩnɩɛ Lagɔ a ’yu.

Lagɔ a yuë ‑a glɩnɩɛ ‑tiamö

¹Na yuënyɩ, sɛɛ Lagɔ ‑wanyɩɛ, ‑sɩbhä ’nɩɛ ‑sɩbhä a sɛ ‑wʋ. Nza ɔ laanyɩɛ ɔnyɩ a ’yuë. ‑Tiamö, ɔ yuë ‑a glɩnɩɛ. ‑Maa mä’ä ’pɩwʋ a nɩkpaa, sɛɛ wa’aa Lagɔ ‑yi a za, wa ’niɛ ‑sɩbhä ‑yi. ²Na dlɩsɛkäwanyɩ, ‑sɩkaa a dɔ’wʋ Lagɔ a yuë ‑a glɩnɩɛ, ‑maa ’saa Lagɔ ‑kanyɩɛ zɩla’a ’wʋ ’zʋaa, wʋ’ʋä ‑bhlɛ sasɛ ’yli ’wlʋnɩ. ‑Sɩbhä yɩ ‑wʋ ’mö, ‑maa ‑a ‑yi sɛ nɩɩ, ‑zlɩ Zezwii ’a ’ghïlinɔɔ ‑kä ’yli ’wlʋnɩɩ, sɛ ɔ ‑wʋä, ‑sɩbhä ‑a ’kää ‑wʋmö. ‑Lɛ a ’tɛnyɩ ’la ’mö, sɛ ɔ ‑wʋä ’tɩɩ, ‑sɩbhä ‑a ’kɔɔ gbëaa ’ylɩmö. ³Wɛlɩ ’la, ‑ɔ ‑kɩɩ dlɩ ’wʋ ‑kä nɩɩ yɩ yi ’yli ’wlʋnɩɩ, ɔ yi ’ɔ ‑lizokuu ’kwädlɩ kɛ’mö ‑sɛ ’yize, sɛɛ Zezwii Kliisɩ nɛnɩɛ Lagɔ dlɩ yɔwʋ, ɔ ’kä ‑sɩbhä Lagɔ dlɩ yɔwʋ nɛnɩ.

⁴‑Ɔ nʋä ’nyinylolii, Lagɔ ’mö ɔ sɛɛ ’klʋkpamö. Ɛ’ɛ ‑bhö nyɩasɛ, ‑maa ’nyinylolinʋnwɛ, Lagɔ a ’klʋkpamösɛsʋä. ⁵A’bhï a ‑yi sɛɛ nɩɩ, Zezwii ɔbhlɩ, ɔ’ɔɔ ’nyinyloli ’mö ‑kä ’lɩlɩlɩ, ‑maa ɔ ’kä nɩkpa ’wa ’nyinylolii a gbʋ ‑gömö ‑sɛ wa ’kɩ kɛ’mö ‑sɛ a za, nza ɔ yiɛ mä’ä dʋdʋ ’wʋ. ⁶‑Sɩbhä a za, nɩkpɛ a ‑mɔɔ ‑glɛɛ ’kwädlɩ Zezwii ’wʋʋ, ’ɔ ’nyinylolii ’mö ɔ sɛɛ kɛ’mö. ‑Maa ‑ɔ ’nɩ ’yɩbhä ɔ ’kɩ kɛ’mö ‑sɛɛ, ɔ’ɔɔ ‑bhlɛ Zezwii ghlɩ, ɔ ’nɔɔ ‑yi.

⁷Na ’yuënyɩ, ‑bɛ nɩ tanyɩa ’wlumö nyima. ‑Maa nɩkpɛ a ‑mɔɔ nʋä ’saa nɛnɩɛ Lagɔ dlɩ yɔwʋʋ, sɛɛ Zezwii nɛnɩɛ Lagɔ dlɩ yɔwʋʋ, ‑sɩbhä ɔ nɛnɩɛ Lagɔ dlɩ yɔwʋ. ⁸‑Maa ’pɩwʋ a tɛɛnɩdɛ ‑këë zɩ’ɛ, Sataa, ’nyinyloli a ’yize ɔ nʋä. Zaa, nɩkpɛ a ‑mɔɔ ’nɩ ’ɔ ’nyinylolii kɛ’mö ‑sɛɛ, Sataa a ‑nɔ ɔ glɩnɩɛ. ‑Maa Lagɔ ’a Yuu, ɔ ’kä Sataa ’a nʋnʋlii ’yli bhɩa a za, nza ɔ yiɛ mä’ä dʋdʋ ’wʋ.

⁹Zaa, nɩkpɛ a ‑mɔɔ ’zʋä Lagɔ a ’yuu, sɛɛ Lagɔ ’pïlanɔɔ ’ɔ ‑wʋwʋsaa a za, ɔ ‑nyɛ ’nyinylolii yɛ ’ylimö ‑sɛnɩ. Sɛɛ Lagɔ yɛɛ ɔ dɩba ’zʋ a za, ɔ’ɔa’a ’nyinylolinʋlibho ‑kä. ¹⁰‑Maa nɩkpɛ a ‑mɔɔ nʋä ’saa ’nɩɛ Lagɔ dlɩ yɔwʋ nɛnɩ, ‑ɔɔɔ ɔ ’li ‑waa, ɔ’ɔ ‑bhö Lagɔ a ‑nɔ. Sa’a ‑sɩbhä wa ’kää Lagɔ ’a yuëa yɩbhlɩnɩ, ’n wa ’kä’ɛɛ Sataa a ‑nʋa yɩbhlɩnɩ.

‑A kä ‑a ’kä ‑wawanɩ

¹¹Sɛ’ɛ n gbää nɩɩ, Lagɔ ’a wɛlɩɩ a ’nʋ a‑a tɛkädɔ’wʋ ‑këë zɩ’ɛɛ, sɛ’ɛ yɩ nʋä nɩɩ, ‑a kä ‑a ’kä ‑wawanɩ. ¹²Nɩkpɛɛ wa laa Kayɛɛ, sɛ ɔ ‑wʋ a‑a, a‑a nɩ tɩ ‑sɩbhä ‑wʋ. ‑Maa nɩkpɛ ’la, Sataa a ‑nɔ ɔ glɩnɩ a‑a, ’n ɔ yi a‑a ɔ ‑daayu ’lɩbhä ’n ɔ yi a‑a ’ku. Nyɩasɛ ɔ’ɔɔ a sa’a zʋ, ‑maa ’ɔ nʋnʋlii, ’zoku a ’yize yɩ glɩnɩ a‑a ’n ɔ ‑daayu a ‑nɩɩ nɛnɩ a‑a Lagɔ dlɩ yɔwʋ.

¹³‑Sɩbhä a za, ‑atʋayuënyɩ, mä’ä ’pɩwʋ a ’yize a ‑nʋa, wa ‑kaanyɩ ‑gblɩɩ, yɩ nɩ tanyɩ ngli yɩa. ¹⁴‑Maa ‑abhʋa ‑abhlɩ, ‑a ‑yi sɛ nɩɩ, ‑a yɛ ’kwie a ’mötɛɛnɔ ngli ’pʋ, ‑a yɛ Lagɔ ’a ’pɩwʋlelea ’wʋ a ‑nʋä ’zʋ. ’Saa tulanɩɛ ’ylimö nɩɩ ‑a yɛ ‑tiamö ‑mä a ‑nʋä ’zʋʋ, muä nɩɩ: ‑A kä ‑a ’liewa a ‑wawʋʋ dlɩ zɛmö. ‑Maa nɩkpɛ a ‑mɔɔ ’nɩ ɔ ’li a ‑wawʋ dlɩ zɛmö ‑kä, ’kwie a ’mötɛɛnɔ ngli, ‑mä ɔ ‑wʋä ’yize. ¹⁵‑Ɔ ‑gblɩɛ ɔ ’lilɛ, ’kulɩbhänyɔ ɔ glɩnɩɛ. ’N a ‑yi sɛ nɩɩ, ’kulɩbhänyɔ, ’pɩwʋ mää ’naa ’kää ’yli bhɩɛɛ, ɔ ’bhle ’nɩɛ ‑mä ‑wʋ. ¹⁶Wa ‑kä ‑wawʋ nʋʋ, sɛ yɩ sɛɛ ‑tiamö zɛmöö, Zezwii mɔɔ tulanɩnyɩɛ ‑sɩbhä ’ylimö. Miɛ nɩɩ, ‑aa za, ’ɔ pɩwʋʋ ’mö ɔ ’wlʋä ’mö. Sɛ ‑bhʋlʋ ‑kpɔ ’la, ‑sɩbhä ‑a kää ‑a ’kä ‑a ’liewa a za ‑a’a pɩwʋʋ ’mö ’wlʋ. ¹⁷‑Sɩbhä a za, ‑n ‑kä lɩ ‑kä ’n ‑na ’lilɛ ‑bhlʋ ’nɩ ‑lu kä’mö ‑kä, n‑n ’nɩ ɔ ngäzɩdlɩ ’pä ‑n ’kɔ ‑lu ’nyɛɛ, n‑n ‑kä nɩɩ Lagɔ a ‑wawʋʋ ‑n kä dlɩ zɛmö nʋʋ, ‑tiamö bhä ‑a? ¹⁸Na ’yuënyɩ, a‑a nɩ tɩ nyɩasɛ nɩkpa gla ’klʋ ‑wanɩ, ‑maa ‑a’a nʋnʋlii nɩ tulanɩ ’ylimö nɩɩ, ‑a ‑wʋä ‑tiamö.

‑Ɔ ‑waa ɔ ’lii mɔɔ glɩnɩɛ ‑tiamö Lagɔ a ‑nɔ

¹⁹‑A ‑kä nɩkpaa ‑waa, mɩɩ tulanɩɛ ’ylimö nɩɩ, gbëaa a ‑nʋä ‑a glɩnɩɛ. Zaa, Lagɔ a ’yila ’klʋ, ‑a’a dila zɛmö yi ‑pälɛpälɛ ‑wʋ. ²⁰’N ‑a’a dilaa ‑kanyɩ gbʋ köbhaa, ‑a ‑yi sɛ nɩɩ, Lagɔ mɔɔ ’ghïliɛ mɔɔ ziɛ ‑a’a dilaa ’wʋ, zaa, ɔ yi ‑lii ’wuë. ²¹Na dlɩsɛkäwanyɩ, sɛ’ɛ n gbää nɩɩ, ’n ‑a’a dilaa ‑nɩnyɩa’a gbʋ köbhaa, nganɔ ‑nɩnyɩɛ dlɩ zɛmö ‑wʋ a‑a yiɛ ‑lɛ ɔ ’yila ’klʋ, a‑a bhibheoo. ²²‑A ‑kɔɔ bhibhee, ’saa ‑a ‑kɔɔ ’yɩbhänɩ ‑kë, ɔ ‑yinyu ’nyɛ. Ɛ’ɛ ‑bhö nyɩasɛ, ‑maa ’ɔ wɛlɩɩ mö ‑a zʋä ’klʋkpamö, ’saa nɛnɔɔ dlɩ yɔwʋ mö ‑a nʋä. ²³’Ɔ wɛlɩɩ, sɛ’ɛ yɩ nʋä nɩɩ, ‑a nɩ ’tɛɛnɩ ’ɔ Yuu Zezwii Kliisɩ dlɩ, sɛɛ Zezwii nyɩanyɩɛ ’dɩɩ, ‑a nɩ ‑wawanɩ ‑sɩbhä. ²⁴‑Ɔ ‑kɩɩ ‑sɩbhä ’klʋkpamö zʋʋ, mɔɔ ‑glɛɛ sasɛ Lagɔ ’wʋ, ’mö Lagɔ ‑wʋä ‑gömö. Sɛɛ Lagɔ zʋʋnyɩɛ ’ɔ ’Wugɔmʋʋ ‑gömö a za, nza ‑a ‑yiɛ sɛ nɩɩ, ɔ’bhë, mɔɔ ‑wʋnyɩɛ ‑gömö.

‑Wa nʋä Lagɔ a ’möbhïlanɩwaa wa glɩnɩɩ

¹Na dlɩsɛkäwanyɩ, nɩkpaa ’wuë ‑wa nʋä Lagɔ ’a ’Wugɔmʋʋ mɔɔ ‑wuëë ‑gömöö, a nɩ tuë ‑sɩbhä dlɩ ’wʋ kä cuu. ‑Maa, a nɩ yɩlɩ ’wa bhïlawɛlɩɩ ’mö ’n ’Wugɔmʋʋ ɔ bhïlanuë ’mö ‑kä Lagɔ a ‑nɔ glɩnɩɩ, a ’kä sɛ ‑yi. ‑Maa yiowa a ‑bɛ, ‑wa nʋä Lagɔ a ’möbhïlanɩwaa wa glɩnɩɩ, wa yɛ mä’ä ’pɩwʋ mlɩmanɩ. ²’Saa a ’kää Lagɔ ’a ’Wugɔmʋʋ a wɛlɩɩ ’mö yɩbhlɩnɩɩ, muä nɩɩ: ‑Ɔ ‑kä nɩɩ Zezwii Kliisɩ, ‑aa sɛ a nɩkpɛ ɔ ’zʋä ‑tiamö nʋʋ, ’mö Lagɔ ’a ’Wugɔmʋʋ ‑wʋä ‑gömö. ³‑Maa nɩkpɛ a ‑mɔɔ kpɛnɩɛ ‑lɛ a wɛlɩ ’la ’möö, Lagɔ ’a ’Wugɔmʋʋ mɔɔ ’nɔɔ ‑gömö ‑wʋ, ‑maa ‑ɔ ‑gblɩ Kliisɩ ’a ’wugɔmʋʋ, mɔɔ ‑wɔɔɔ ‑gömö. ‑Ɔ ‑gblɩ Kliisɩ, wa nʋ a‑a ‑ɔ ’kä yii, mɔɔ yɛɛ da’a yi ’wëë.

⁴Na ’yuënyɩ, abhʋa abhlɩ Lagɔ a ‑nʋä a glɩnɩɛ, ‑sɩbhä a za nɩkpa ’la Lagɔ ’nɩɛ ’mö bhïlanɩɩ, a kʋä ’wlu ’plɩ. Ɛ’ɛ ‑bhö nyɩasɛ, ‑maa ’Wugɔmʋʋ ‑ɔ ‑wʋanyɩɛ ‑gömö, mɔɔ ’tɛɛ ’mö mɔɔ ziɛ ‑ɔ ‑wʋä mä’ä ’pɩwʋ a ‑nʋa ‑gömö ’wʋ. ⁵Nɩkpa ’la, mä’ä ’pɩwʋ a ‑nʋä wa glɩnɩɛ, mɩɔ ‑bhʋlʋ wa kää ngli. Nza wa ngluä ’wa wɛlɩɩ ’wʋ. ⁶‑Maa ‑abhʋa ‑abhlɩ, Lagɔ a ‑nʋä ‑a glɩnɩɛ. Zaa, ‑a ‑kä ’mö ‑sɛnɩɩ, ‑wa ‑yiɛ Lagɔ, wa ’yize mʋa ngluä ‑a’a wɛlɩɩ ’wʋ. ‑Maa ‑waaa Lagɔ a ‑nʋä glɩnɩ, wa’a ngwli ’wʋ. Zaa, nɩkpa a ‑muë Lagɔ ’a ’Wugɔmʋʋ bhïlanɩɛ ‑tiawɛlɩɩ ’möö, wa ‑nyɛ ‑muë zuzukwëzokwëa bhïlanɩɛ yiowɛlɩ ’mö ’sɔ, sa’a ‑sɩbhä wa ’kʋää yɩbhlɩnɩ.

Lagɔ ‑wawʋ ɔ glɩnɩɛ

⁷Na dlɩsɛkäwanyɩ, a‑a nɩ ‑wawanɩ. Ɛ’ɛ ‑bhö nyɩasɛ, ‑maa ‑wawʋʋ, ‑mä Lagɔ ’mö ‑mä wʋ ’bhöönɩɛ. Nza n gbää nɩɩ, ‑ɔ kää ‑wawʋ dlɩ zɛmöö, Lagɔ a ’yu ɔ glɩnɩɛ. Mɔɔ ‑yiɛ ‑tiamö Lagɔ. ⁸‑Maa ‑ɔɔɔ ‑wawʋ dlɩ zɛmö ‑kää, ɔ’ɔɔ Lagɔ ‑yi. Ɛ’ɛ ‑bhö nyɩasɛ, ‑maa Lagɔ, ‑wawʋ ɔ glɩnɩɛ. ⁹Sɛɛ Lagɔ tulanɩnyɩɛ ’ɔ ‑wawʋʋ ’ylimöö, ‑sɩbhä ma‑a nɩɩ: ’Ɔ Yuu ‑bhʋlʋ ‑kpɔ ’mö ɔ tiee mä’ä ’pɩwʋ, ‑a ’kä ɔ za ‑tiamö a ‑bhölɩbhölɛ ghlɩ. ¹⁰’Ɔ ‑wawʋ ’la, muä nɩɩ, ‑abhʋaa ’nɔɔ ‑wa, ‑maa mɔɔ ‑wanyɩɛ. ’Ɔ Yuu ’mö ɔ tiee ɔ ’kɔ ɔnyɩ bʋbɔnɩ, nzɩɩ, ‑a’a ’nyinylolii a gbʋʋ ‑kanyɩ ‑gömö ’bhöö. ¹¹Zaa, na dlɩsɛkäwanyɩ, sɛɛ Lagɔ ‑wanyɩɛ sa’a tenyii a za, ‑abhʋa’ɛ ‑abhlɩ, ‑a kä ‑a ’kä ‑wawanɩ. ¹²Lagɔ, ‑bɛ ’nɔɔ ‑bhlɛ ’ylimö ’ylɩmönɩ. ‑Maa ‑a ‑kä ‑wawanɩɩ, ɔ ‑wʋnyɩ ’kwädlɩ ‑gömö, nzɩɩ ’ɔ ‑wawʋʋ ‑kanyɩ dila zɛmö ‑jɩbhɛnɩ.

¹³Sɛ’ɛ n gbää nɩɩ, sɛɛ Lagɔ zʋʋnyɩɛ ’ɔ ’Wugɔmʋʋ ‑gömö a za, nza ‑a ‑yiɛ sɛ nɩɩ, ‑a ‑nyɔɔ ’sɔ wʋ ‑a ‑wʋnɩɛ ’kwädlɩ, ɔ’bhë mɔɔ ‑wʋnyɩɛ ‑gömö. ¹⁴Zaa, ‑a’bhï, ’saa ‑a ’yɩɛ ’ylɩmöö, yɩ dɩɩ, mö ‑a nyɛɛ nɩkpa ’wuë nɩɩ: ‑Aa dɩba Lagɔ, ’ɔ Yuu ’kä mä’ä ’pɩwʋ a nɩkpa a Puënyɔ ’zʋ a za, nza ɔ tioo. ¹⁵Zaa, ‑ɔ ‑kɩɩ dlɩ ’wʋ ‑kä nɩɩ Zezwii, Lagɔ ’a Yuu ’mö ɔ glɩnɩɛ, mɔɔ ‑nyɛ Lagɔ ‑wʋnɩɛ ’kwädlɩ ’wʋ, ’mö Lagɔ ‑wʋä ‑gömö. ¹⁶‑Abhʋa ‑abhlɩ, sɛɛ Lagɔ ‑wanyɩɛ, ‑a ‑yi ‑sɩbhä. ’Ɔ ‑wawʋ ’la mö ‑a ’tɛɛnɩɛ dlɩ.

Sɛ’ɛ n gbää nɩɩ, Lagɔ, ‑wawʋ ɔ glɩnɩɛ. Zaa, ‑ɔ kää ’kwädlɩ Lagɔ ’a ‑wawʋʋ dlɩ zɛmöö, mɔɔ ‑nyɛ Lagɔ ‑wʋnɩɛ ’kwädlɩ ’wʋ, ’mö Lagɔ ‑wʋä ‑gömö. ¹⁷’N Lagɔ ’a ‑wawʋʋ ‑kanyɩ dila zɛmö ‑jɩbhɛnɩɩ, sɛɛ Zezwii ‑wʋ a‑a mä’ä dʋdʋ ’wʋʋ, ‑a yi ‑sɩbhä ‑wʋmö. ‑Lɛ a dɔ’wʋ, Lagɔ ’a ‑zijle ’kädaa a zlɩɩ ‑kä ghlɛɛ, ‑a’a dilaa yi ’tɩɩ glɩ. ¹⁸‑Wawʋ ‑nyɛ nganɔ ’nɩɛ yɔwʋ mönɩ, miɛ nɩɩ, nɩkpɛ, sɛɛ Lagɔ ‑wɔɔɔ tenyii, ’n ɔ ‑kä ‑sɩbhä ‑yii, ‑sɩbhä nganɔ a sɔɔ ku ’mö. ‑Ɔ ngänɩɛ, gu ɔ guä, wa toa ‑lu nʋ. Miɛ nɩɩ, ɔ’ɔɔ ‑bhlɛ sasɛ ‑wawʋ a zɛmö yɩbhlɩnɩ.

¹⁹‑Maa ‑abhʋa ‑abhlɩ, sɛɛ Lagɔ ‑wanyɩɛ tɛɛ a za, nza ‑wawʋ ‑wʋnyɩɛ dila zɛmö. ²⁰‑Maa ‑n ‑kä nɩɩ Lagɔ mö ‑n ‑waa nʋʋ, n‑n ‑kä’ɛ ‑na ’lilɛ ‑gblɩɩ, widɩsɛnyɔ ‑n glɩnɩɛ. Nyɩasɛ n’n‑ä ‑sɩbhä gbä, ‑maa ‑na ’lilɛ ‑n yɩlɩɛ ’wʋ, n‑n ’nɔ ‑waa, Lagɔ ‑nn‑ä ‑bhlɛ ’ylɩmöö, sɛ ‑n ’kɔ bhä ’mö ‑wawanɩ ’nɩ? ²¹Sɛɛ Kliisɩ nyɩanyɩɛ ’dɩɩ, ‑sɩbhä ma‑a nɩɩ: ‑Ɔ ‑kä Lagɔ ‑waa, ɔ kä ɔ ’kä ɔ ’lilɛ ‑wamö.

‑A bhɛnɩ ‑a ’kä mä’ä ’pɩwʋ a ‑lii ’wuë ’wlu ’plɩ

¹‑Ɔ ‑kɩɩ dlɩ ’wʋ ‑kä nɩɩ, Zezwii mɔɔ glɩnɩɛ Puënyɔ Lagɔ ‑sɛɛ ‑lɛ, Lagɔ a ’yu ɔ glɩnɩɛ. ‑Ɔ ‑wa ‑dɩbaa, ’ɔ yuëa ’mö ɔ ‑wamöä. ²‑Sɩbhä a za n gbää nɩɩ, n‑n ‑kä ‑na dɩba Lagɔ ‑wa, n‑n ‑kä ’ɔ wɛlɩɩ ’klʋkpamö zʋʋ, ‑lɛ a dɔ’wʋ ‑n ‑yi sɛ nɩɩ, ‑n ‑wamö ’ɔ yuëa. ³Sɛ’ɛ n gbää nɩɩ, ‑ɔ ‑kä Lagɔ ’mö ɔ ‑waa nʋʋ, ɔ kä ɔ ’kä ’ɔ wɛlɩɩ ’klʋkpamö zʋ. ’Ɔ wɛlɩɩ a ’klʋkpamözʋzwɛ a’bhë, ɛ’ɛɛ ’mö ’tɛɛ. ⁴Ɛ’ɛ ‑bhö nyɩasɛ, ‑maa ‑ɔ glɩnɩɛ Lagɔ a ’yuu, ɔ yi mä’ä ’pɩwʋ a ‑lii ’wlu ’plɩ. ‑A’a sɛ ‑a ’tɛɛnɩɛ Zezwii dlɩɩ, ‑sɩbhä ma‑a ’kää ’nglɩ ‑kä, a‑a ’kɩɛ ’wlu ’plɩ.

Zezwii mɔɔ glɩnɩɛ ‑tiamö Lagɔ ’a Yuu

⁵‑Bɛ ’nɩɛ bhɛnɩ ɔ ’kä mä’ä ’pɩwʋ a ‑lii ’wlu ’plɩ, ’n ɛ ’nɩ ‑bhö nɩkpɛ a ‑mɔɔ kɩɛ dlɩ ’wʋ nɩɩ, Zezwii, Lagɔ a Yuä. ⁶Zezwii Kliisɩ yiɛ mä’ä dʋdʋ ’wʋʋ, ’nyu ’mö wa wɔlʋnɔɔ ’wlu. Ɔ ’kunɩɛ ‑lɛ suu ’klʋʋ, ’ɔ dluu kwli. Nyuu wa wɔlʋnɔɔ ’wluu, wʋ ’yize muu ’nɩɛ dɛsɛ ‑kä, ‑maa ’ɔ dluu ‑wʋ kwliɛ, wʋ ‑kämö’ɛ dɛsɛ. Lagɔ ’a ’Wugɔmʋʋ, ‑ɔ kää gbëaa a ’yize nglii, mɔɔ nyɩanyɩɛ ‑sɩbhä ’dɩ zaa, ‑tiawɛlɩɛ. ⁷Zaa, ‑li ta mɩɩ nyɩanyɩɛ Zezwii a dɛ gbëaa ’dɩ. ⁸Lagɔ ’a ’Wugɔmʋʋ mɔ, nyuu mu, ’n dluu, yɩ ta ‑kpɔ, sɛ ‑bhʋlʋ yɩ nyɩanyɩɛ ’dɩ. ⁹Nɩkpa ‑kanyɩ wɛlɩ ’nyɛɛ, ‑a kɩ’ɛ dlɩ ’wʋʋ, mɛɛ ’kä zi’e Lagɔ a’bhë. Zaa, wɛlɩɩ ɔ nyɩanyɩɛ ’ɔ Yuu a dɛɛ, ‑tiawɛlɩɛ. ¹⁰‑Ɔ ‑kä Lagɔ ’a Yuu dlɩ ’wʋ ‑kää, ’ɔ dlɩɩ yo ’dɩ ’nyɛ nɩɩ: Wɛlɩɩ Lagɔ ’nyɔɔ da’aa, ‑tiamö a wɛlɩɛ. ‑Maa nɩkpɛ a ‑mɔɔ ’nɩ Lagɔ dlɩ ’wʋ ‑kää, wɛlɩɩ Lagɔ ’nyɔɔ ’ɔ Yuu Zezwii a dɛɛ, sɛ ɔ ’niɛ ’wʋ nglu a za, Lagɔ ’mö ɔ ’libhïä widɩsɛnyɔ ’mö ’wʋ. ¹¹Sɛ’ɛ Lagɔ nyɩanyɩɛ ’dɩ nɩɩ, ɔ’bhë mɔɔ kää ’nglɩ, a‑a yiɛ zɩkpaa ‑a ’naa ’kää ’yli bhɩɛ ghlɩ. Zɩkpa ’la, ’ɔ Yuu ’mö a ’bhöönɩɛ ’mö. ¹²Nza n gbää nɩɩ: ‑Ɔ ‑kä ’ɔ Yuu ’wʋ ‑kä, ɔ yɛ ‑tiamö a ‑bhölɩbhölɛ ghlɩ. ‑Maa ‑ɔ ’nɩ ’ɔ Yuu ’wʋ ‑kä, ɔ ’nɛɛ ghlɩ.

Zɩkpaa ‑aa bhɩɛ ’ylii

¹³Nyɩasɛ n ’nanyɩɛ ‑sɩbhä ’wʋ ’cɛlɩ, ‑maa abhʋaa ’tɛɛnɩɛ Lagɔ ’a Yuu Zezwii dlɩɩ, a ’kä sɛ ‑yi nɩɩ, zɩkpaa ‑a ’naa ’kää ’yli bhɩɛ, a ka ghlɩ, nza n cɛlanyɩɛ ’wʋ. ¹⁴Sɛ ‑a ’tɛɛnɩɛ Lagɔ dlɩɩ, ‑sɩbhä ma‑a nɩɩ: ‑A ‑kɔɔ bhibhee, ’saa ‑a ‑kɔɔ ’yɩbhänɩ ‑kë, ’n ‑lu ’la ‑kɔɔ dlɩ yɔwʋ nɛnɩɩ, ‑a ‑yi sɛɛ nɩɩ, ɔ ‑pʋnɩnyɩ ’yukwli. ¹⁵Sɛ ɔ ‑pʋnɩnyɩɛ da’a ’yukwli a za, ‑a ‑yi’ɛ sɛɛ nɩɩ: ’Saa ‑a ’yɩbhänɔɔ da’aa, ɔ ngulu ’wʋ ɔ ‑kanyu ’nyɛ.

¹⁶‑Sɩbhä a za, ‑n ‑kä sɛ yɩbhlɩmanɩ nɩɩ, ‑na ’lilagɔgänɩnyɔ ‑bhlʋ, ’nyinyloli ɔ nʋä, bhibhe ɔ ’wlumö Lagɔ. ‑Lɛ a dɔ’wʋ Lagɔ yi gbä, nɩkpɛ ’la, ɔ yi zɩkpaa ‑a ’naa ’kää ’yli bhɩɛ ghlɩ. ‑Maa ’nyinyloli a ’ke ‑bhlʋ ‑wʋ ‑lɛ, ma‑a kwää ’kwie ’mö. Nɩkpɛ a ‑mɔɔ ‑kaa nʋʋ, ɔ ’wlumö n’n‑ä wa nɩ bhibhe nʋ. ‑Maa ‑mi’la ’wuë a dɔ’wʋ, wa yi bhibhe. ¹⁷‑Lii ’wuë ‑yɩɩɛ Lagɔ dlɩ yɔwʋ nɛnɩɩ, ’nyinyloliɛ. ‑Maa ’nyinyloli ‑mimii ‑wʋ ‑lɛ, mɩɩ ’nɩ kwää ’kwie ’mö.

¹⁸Sɛ’ɛ n gbää nɩɩ, nɩkpɛ a ‑mɔɔ ’zʋä Lagɔ a ’yuu, ’nyinylolii ’mö ɔ sɛɛ kɛ’mö. Lagɔ ’a Yuu, mɔɔ kpëtoo ’wʋ zaa, Sataa ’nɔɔ bhɛnɩ.

¹⁹Mä’ä ’pɩwʋ a nɩkpa ’wuë, Sataa mɔɔ ’kämanuëë ‑gömö. ‑Maa ‑abhʋa ‑abhlɩ ‑a ‑yi sɛɛ nɩɩ, Lagɔ a ‑nʋä ‑a glɩnɩɛ.

²⁰‑A ‑yi’ɛ sɛɛ nɩɩ, Lagɔ ’a Yuu mɔɔ yiɛ mä’ä dʋdʋ ’wʋ, mɔɔ ‑dɩnyɩɛ ’yila, ‑ɔ glɩnɩɛ ‑tiamö a Lagɔ, a‑a yoo yɩbhlɩnɩ. ‑Ɔ glɩnɩɛ ‑tiamö a Lagɔ, ‑a ‑nyɔɔ ’sɔ, ‑a ‑käa’a ’wʋ ‑wʋnɩɩ, ’ɔ Yuu, Zezwii Kliisɩ mɔɔ kää ’nglɩ. Ɛ’ɛ ‑bhö nyɩasɛ, ‑maa Zezwii Kliisɩ a’bhë mɔɔ glɩnɩɛ ‑tiamö a Lagɔ. ’N wa ‑kä’ɛ zɩkpaa ‑a ’naa ’kää ’yli bhɩɛ nʋʋ, ’mö wa gaaa.

²¹Na ’yuënyɩ, a nɩ ’nɛmanɩ anyɩ ’wʋ a tɩa nyɩasɛlagwɩɩ bʋbɔ.