ଯୋହନଙ୍କ ପ୍ରତି ପ୍ରାକାଶିତ ବାକ୍ୟ
ଜହନାର୍ ପ୍ରକାସିତ୍ ବାକ୍ୟ
ପ୍ରକାସିତ୍ ବାକ୍ୟ ବଇ ବିସୟେ ହଃଦେକ୍
ପ୍ରକାସିତ୍ ବାକ୍ୟ ଅଃଉଁଲି ନଃଉଆଁ ନିୟମାର୍ ସଃରାସଃରି ପୁସ୍ତକ । ଇରି ହେଁ ଜିସୁ କ୍ରିସ୍ଟର୍ ଜଃଲମାର୍ ୯୫ ବଃର୍ସ୍ ବିତ୍ରେ ଜହନ୍ ଲେକିରିଲା ୧:୧ । ଜହନ୍ ନିକ କବୁର୍ ସଃଙ୍ଗ୍ ତିନିଗଟ୍ ଚିଟି ହେଁ ଲେକିରିଲା । ୧ ଜହନ୍, ୨ ଜହନ୍, ୩ ଜହନ୍ । ଇ ଜହନ୍ ଜାକେକି ଜିସୁ ବେସି ଲାଡ୍ କଃର୍ତିରିଲା ବଃଲି ଜାଣା ସୁଣା ଜହ ୧୩:୨୩ । ଜହନ୍ ଆଇସ୍ ଲାଣ୍ଡାର୍ ପାତ୍ମସେ ରିଲା ବଃଳ୍ ଇ ବାକ୍ୟ ଲେକିରିଲା କାୟ୍ତାକ୍ ବଃଲେକ୍ ଜିସୁକ୍ରିସ୍ଟର୍ ନିକ କବୁରାର୍ ଗିନେ ତାକେ ସଃମ୍ନ୍ଦ୍ ଜିଣାୟ୍ ରିଲାୟ୍ ୧:୯ ।
ଜିସୁର୍ ଆସ୍ତାର୍ ଚଃମେ ଆଚେ ଲାଗି ଜିସୁ କ୍ରିସ୍ଟର୍ ତଃୟ୍ ମାୟ୍ନ୍ କାରି ଅୟ୍ ରେଉଁକେ ହଳତା ଲକ୍ମଃନ୍କେ ସାସ୍ ଆର୍ ଆସା ଦେଉଁକେ ଜହନ୍ ଇ ଦଃର୍ସନ୍ ବାକ୍ୟ ଲେକ୍ଲା ୧:୩; ୨୨:୭ । ସେ ସଃବୁ ବିସ୍ୱାସି ଆର୍ ମୁଳ୍କଃରି ସାତ୍ ଗଟ୍ ମଣ୍ଡ୍ଳିକେ ଇରି ଲେକୁଲା ୨:୩ । ଜହନ୍ ତାର୍ ଲେକାୟ୍ ବାବ୍ବାଣି୧:୩ ଆର୍ ସେ ଦଃକିରିଲା ଅଃନେକ୍ ରୁହ୍ ମଃନ୍ ବିସୟେ ଲେକୁଲା । ଇ ପୁସ୍ତକେ ହର୍ନା ନିଅମାର୍ କଃତେକ୍ ବାଗେ ସଃମାନ୍ ଆଚେ, ମୁଳ୍କଃରି ଜିକରିଅ ପୁସ୍ତକେ-ଜିକ ୬:୧-୮ ଦଃକୁଲୁ । ବଃଲେକ୍ ୭ ଗଟ୍ ତୁରି ଆର୍ ୭ ଗଟ୍ ଡକା ଜୁୟ୍ରି କି ଇସ୍ୱର୍ ମିସରାର୍ ଲକ୍ମଃନ୍କେ ଦଃଣ୍ଡ୍ ଦେଉଁକେ ମଃର୍ଡି ହଃଟାୟ୍ଲା ଜାତ୍ରା ୭–୯ । ଦର୍ସନ୍ ବାକ୍ୟ ସେସ୍ ସଃମୟ୍ ଜାଣାଉଁଲି ଜିସୁ ସଃରାସଃରି ଜିଣେଦ୍ ଆର୍ ଜୁୟ୍ମଃନ୍ ତାର୍ତଃୟ୍ ଆସ୍ର କଃରିଆଚ୍ତି ସେମଃନ୍ ସଃବୁବଃଳ୍ ତାର୍ ସଃଙ୍ଗ୍ ରେତି । ଇ ପୁସ୍ତକ ତୁମିମଃନ୍କେ ଚେତ୍ନା ଦେଉଅ ଆର୍ ଆସା ଦେଉଅ ଜିସୁ ବେଗି ବାଉଳି ଆସୁଲା ।
ଇ ବଇ ବିତ୍ରେ ମୁଳ୍ ବିସୟ୍ମଃନ୍
୧. ଜହନାର୍ ବିସୟେ ଆର୍ ଦଃର୍ସନ୍ । ୧:୧–୧:୨୦
୨. ଜିସୁର୍ ତଃୟ୍ହୁଣି ସାତ୍ ମଣ୍ଡ୍ଳିକେ ଜହନାର୍ କବୁର୍ । ୧:୧–୩:୨୨
୩. ସାତ୍ ମୁଦ୍ରା ୪:୧–୮:୫ ସାତ୍ ଗଟ୍ ତୁରି । ୮:୬–୧୧:୧୯
୪. ହାହିମଃନ୍ ଆର୍ ସାତ୍ ଗଟ୍ ମୁଣ୍ଡ୍ ରିଲା ହର୍ନା ସାହ୍ ସଃଙ୍ଗ୍ ଜୁଜ୍ । ୧୨:୧–୧୪:୨୦
୫. ସାତ୍ ଗଟ୍ ଦଃଣ୍ଡାର୍ ଜୟ୍ଗ୍ । ୧୫:୧–୧୬:୧୮
୬. ଇସ୍ୱର୍ ସଃର୍ଗେ ହୁଣି ସଃତ୍ରୁକେ ଜିତେଦ୍ । ୧୭:୧–୨୦:୧୫
୭. ନଃଉଆଁ ସଃର୍ଗ୍ ଆର୍ ନଃଉଆଁ ହୁର୍ତିବି । ୨୧:୧–୨୨:୨୧
1ପ୍ରକାସିତ୍ ବାକ୍ୟ
1ଜୁୟ୍ ସଃବୁ ବଃଡେ ବେଗି ଗଃଟୁକ୍ ଜଃଉଁଲି, ଇସ୍ୱର୍ ଜିସୁ କ୍ରିସ୍ଟ ତଃୟ୍ ଜାଣାରିଲା ସଃବୁ କଃତା ଇ ବଇ ତଃୟ୍ ଲେକା ଅୟ୍ଆଚେ । ସେ ସଃବୁ ବିସୟ୍ ତାର୍ ଗତିଦଃଙ୍ଗ୍ଳା ମଃନ୍କେ ଜାଣାଉଁକେ କ୍ରିସ୍ଟ ଗଟେକ୍ ସଃର୍ଗ୍ ଦୁତ୍କେ ହଃଟାୟ୍ ତାର୍ ଗତିଦଃଙ୍ଗ୍ଳା ଜହନ୍କେ ସେରି ଜାଣାୟ୍ଲା । 2ଆର୍ ଜହନ୍ ନିଜେ ଜାୟ୍ରି ସଃବୁ ଦଃକିଆଚେ, ସେ ବିସୟେ ଇତି ଜାଣାୟ୍ ଆଚେ । ଇ ବଇ ତଃୟ୍ ଇସ୍ୱରାର୍ କବୁର୍ ଆର୍ ଜିସୁ କ୍ରିସ୍ଟ ଜାଣାୟ୍ଲା ସଃତ୍ ସାକି ବିସୟ୍ ଆଚେ । 3ଜୁୟ୍ ଲକ୍ ଇ ବଇ ହଳେଦ୍ ଆର୍ ଜୁୟ୍ମଃନ୍ ଇ ବାବ୍ବାଣି ସୁଣି ତାର୍ ଆଦେସ୍ମଃନ୍ ମାନ୍ତି, ସେମଃନାର୍ ସଃତ୍କଃରି ବାୟ୍ଗ୍; କାୟ୍ତାକ୍ବଃଲେକ୍ ସେ ସଃବୁ ଗଃଟ୍ତା ବେଳା ଚଃମେ ଆୟ୍ଲିନି ।
ସାତ୍ ଗଟ୍ ମଣ୍ଡ୍ଳିକ୍ ଜୁଆର୍
4୧:୪ ପ୍ରକା ୪:୫.ଜହନ୍ ଆସିଆ ଦେସାର୍ ସାତ୍ ଗଟ୍ ମଣ୍ଡ୍ଳିକ୍ ଲେକୁଲା, ଜେ ଅଃବେ ଆଚେ, ଜେ ହୁର୍ବେ ରିଲା, ଆର୍ ଜାର୍ ଆସ୍ତାର୍ ଆଚେ, ତାର୍ ତଃୟ୍ହୁଣି ଦଃୟା ଆର୍ ସୁସ୍ତା ଆର୍ ତାର୍ ସିଙ୍ଗାସଣ୍ ମୁଏଁ ରିଲା ସାତ୍ ଗଟ୍ ଆତ୍ମା ତଃୟ୍ହୁଣି, 5ଆରେକ୍ ବିସ୍ୱାସାର୍ ଜୟ୍ଗ୍ ସାକି, ମଃଲା ଲକ୍ମଃନାର୍ ତଃୟ୍ହୁଣି ହଃର୍ତୁ ଉଟ୍ଲାର୍ ଆର୍ ହୁର୍ତିବିର୍ ରଃଜାମଃନାର୍ ରଃଜା ଜିସୁ କ୍ରିସ୍ଟର୍ ତଃୟ୍ହୁଣି ଦଃୟା ଆର୍ ସୁସ୍ତା ତୁମିମଃନାର୍ ଉହ୍ରେ ଅଃଉଅ । ସେ ଅଃମିମଃନ୍କ୍ ଲାଡ୍ କଃରୁଲା ଆର୍ ଅଃହ୍ଣାର୍ ବଃନି ସଃଙ୍ଗ୍ ଅଃମିମଃନ୍କ୍ ଅଃମାର୍ ହାହେ ହୁଣି ମୁକ୍ଳାୟ୍ ଆଚେ, 6୧:୬ ପ୍ରକା ୫:୧୦.ଆରେକ୍ ତାର୍ ଉବାସି ଇସ୍ୱରାର୍ ସେବା କଃରୁକେ ଅଃମିକ୍ ଗଟେକ୍ ଜାଜକାର୍ କୁଳ୍ବଃଉଁସ୍ କଃରି ବାଚିଆଚେ । ସଃବୁ ଜଃଜ୍ମାନ୍ ଆର୍ ସଃକାତ୍ ଜୁଗେଜୁଗେ ଜିସୁ କ୍ରିସ୍ଟର୍ ଅଃଉଅ । ଆମେନ୍ ।
7୧:୭ ମାତି ୨୪:୩୦; ମାର୍କ ୧୩:୨୬; ଲୁକ ୨୧:୨୭; ୧ ତେସ ୪:୧୭; ଜହ ୧୯:୩୪,୩୭; ମାତି ୨୪:୩୦.ଦଃକା, ସେ ମେଗ୍ଉହ୍ରେ ଆସୁଲା, ହୁର୍ତିଏ ବାସା କଃର୍ତା ସଃବୁ ଲକ୍ ତାକ୍ ଦଃକ୍ତି, ଇରଃକମ୍ କି ଜୁୟ୍ମଃନ୍ ତାକ୍ ବୁସି ରିଲାୟ୍, ସେମଃନ୍ ହେଁ ଦଃକ୍ତି, ଆର୍ ହୁର୍ତିବିର୍ ସଃବୁ ଲକ୍ ତାର୍ ଆସ୍ତାର୍ ଗିନେ ଏତାୟ୍ ଏତାୟ୍ କାନ୍ଦ୍ତି । ଇ ସଃବୁ ବାୟ୍ଦ୍ରେ ଗଃଟେଦ୍ ! ଆମେନ୍ ।
8୧:୮ ପ୍ରକା ୨୨:୧୩.ମାପ୍ରୁ ସଃବ୍କେ ସଃକ୍ତିମାନ୍ ସେ ଇସ୍ୱର୍ କଃଉଁଲା, “ମୁଁୟ୍ ଆରୁମ୍ ଆର୍ ସେସ୍ ।” ସେ ଅଃବେ ଆଚେ, ହୁର୍ବେ ରିଲା ଆର୍ ସେ ଆସ୍ତା ଦିନ୍ ଆସେଦ୍ ।
ଜିସୁ କ୍ରିସ୍ଟ ଦଃକାୟ୍ ଅୟ୍ଲା
9ମୁୟ୍ ଜହନ୍, ତୁମାର୍ ଗଟେକ୍ ବାୟ୍, ଜିସୁର୍ ଚେଲା ହର୍ ତାର୍ ରାଇଜାର୍ ଲକ୍ମଃନାର୍ ଉହ୍ରେ ଅଃଉତା ତାଳ୍ନା ସାସ୍ ସଃଙ୍ଗ୍ ସଃମ୍ବାଳୁକ୍ ମୁୟ୍ ତୁମିମଃନାର୍ ଗଟେକ୍ ବାଗିଦାରି । ଜିସୁ ଜାଣାୟ୍ରିଲା ସଃତ୍ ଆର୍ ଇସ୍ୱରାର୍ କଃତା ପର୍ଚାର୍ କଃରି ରିଲାକ୍ ମକ୍ ପାତ୍ମସ୍ ନାଉଁଆର୍ ସଃମ୍ନ୍ଦ୍ ମଃଜିର୍ ବୁଏଁ ନିଆ ଗଃଲି । 10ମୁଁୟ୍ ମାପ୍ରୁର୍ ବିନ୍ ଆତ୍ମାୟ୍ ହୁର୍ନ୍ ଅୟ୍ ମର୍ ହଃଚ୍ ବାଟ୍ୟା ତୁରି ସଃବ୍ଦ୍ ହର୍ ଗଟେକ୍ ବଃଡ୍ ସଃବଦେ ଇରି କଃଉତି ରିଲାର୍ ସୁଣ୍ଲେ, 11ଗଟ୍ ଲକ୍ ମକ୍ କୟ୍ଲା, “ତୁୟ୍ ଜୁୟ୍ରି ଦଃକୁଲିସ୍, ସେରି ଗଟେକ୍ ପୁସ୍ତକ୍ ତଃୟ୍ ଲେକ୍, ଆର୍ ଏପିସିଏ, ସୁମର୍ନା, ପର୍ଗାମ୍, ତୁୟତିରା, ସାର୍ଦି, ପିଲାଦେଲ୍ପିଆ ଆର୍ ଲାଅଦିକିଆ ଇ ସାତ୍ଗଟ୍ ଗଃଳେ ରିଲା ମଣ୍ଡ୍ଳିମଃନ୍କେ ହଃଟାଉ ।”
12କେ ମର୍ ସଃଙ୍ଗ୍ କଃତା ଅଃଉଁଲା, ଇରି ଦଃକୁକ୍ ମୁଁୟ୍ ହଃଚ୍ବାଟ୍ ଲେଉଟ୍ଲେ ଆର୍ ସାତ୍ ଗଟ୍ ସନାର୍ ଦିହ୍ରୁକା ଦଃକ୍ଲେ । 13ଆରେକ୍ ସେ ଦିହ୍ମଃନାର୍ ମଃଜାୟ୍ ନଃରାର୍ ହୟ୍ସି ହର୍ ଗଟେକ୍ ଲକ୍; ସେ ହାଦ୍ ହଃତେକ୍ ବଃସ୍ତର୍ ଡାହି ଅୟ୍ଆଚେ ଆର୍ ଉରେ ସନାର୍ ବାନ୍ଦୁଣ୍ ବାନ୍ଦି ଅୟ୍ଆଚେ । 14ତାର୍ ମୁଣ୍ଡାର୍ ବାଳ୍ କଃରାଟେଳା ହର୍ ଆର୍ ଉଲ୍ ହର୍ ଚିଟ୍ ଦବ୍, ଆର୍ ତାର୍ ଆକି ଜୟ୍ ହର୍ ଲାଗ୍ତିରିଲି । 15ତାର୍ ଜଳେକ୍ ହାଦ୍ ବଃଟିର୍ ଜୟ୍ସଃଙ୍ଗ୍ ସୁଦ୍ କଃଲା ହିତୁଳ୍ ହର୍ ଜିକ୍ଜିକ୍ତି ରିଲି ଆର୍ ତାର୍ ଟଣ୍ଡାର୍ ସଃବ୍ଦ୍ ଉହ୍ରେ ହୁଣି ଅଦୁର୍ତା ହାଣିର୍ ସଃବ୍ଦ୍ ହର୍ । 16ସେ ଅଃହ୍ଣାର୍ କାତା ଆତେ ସାତ୍ଗଟ୍ ତାରାମଃନ୍କେ ଦଃରିରିଲା, ଆର୍ ତାର୍ ଟଣ୍ଡେହୁଣି ଦୁୟ୍ବାଟ୍ ଦାର୍ ରିଲା କଃଣ୍ଡା ବାରାୟ୍ଲି, ଆର୍ ତାର୍ ମୁଉଁ ମୁଣ୍ଡେ ବେଳାର୍ ବେଳ୍ ହର୍ ଉଜାଳ୍ ରିଲି । 17୧:୧୭ ପ୍ରକା ୨:୮; ୨୨:୧୩.ତାକ୍ ଦଃକି ମୁଁୟ୍ ମଃଲା ହର୍ ଅୟ୍ ତାର୍ ହାଦ୍ ତଃଳେ ଅଦୁର୍ଲେ । ସେତାକ୍ ସେ ମର୍ ଉହ୍ରେ ବୁଜ୍ଣି ଆତ୍ ସଃଙ୍ଗାୟ୍ କୟ୍ଲା, “ଡିର୍ ନାୟ୍, ମୁଁୟ୍ ହଃର୍ତୁ ଆର୍ ସେସ୍ । 18ଆରେକ୍ ମୁୟ୍ ନିଜେ ଜିବନ୍ ! ମୁଁୟ୍ ମଃଲେ, ଆର୍ ଦଃକ୍, ମୁଁୟ୍ ଅଃବେ ସଃବୁ ଦିନାର୍ ଗିନେ ଜିବନ୍, ଆରେକ୍ ମର୍ ଆତେ ମଃର୍ନ୍ ଆର୍ ହଃତାଳାର୍ କୁଚିକାଡା ଆଚେ । 19ତଃବେ, ଜାୟ୍ ଜାୟ୍ରି ଦଃକ୍ଲିସ୍, ଜାୟ୍ ଜାୟ୍ରି ଅଃବେ ଗଃଟୁଲି ଆର୍ ଜୁୟ୍ସଃବୁ ଆସୁଲା ଦିନେ ଗଃଟେଦ୍, ସେରି ସଃବୁ ଲେକିରେ । 20ମର୍ ବୁଜ୍ଣି ଆତେ ରିଲା ଜୁୟ୍ ସାତ୍ଗଟ୍ ତାରା ଦଃକ୍ଲିସ୍, ସେତାର୍ ଆର୍ ସାତ୍ଗଟ୍ ସନା ଦିହାର୍ ବିତ୍ରି କଃତା ଇରି, ସେ ସାତ୍ଗଟ୍ ତାରା ସାତ୍ଗଟ୍ ମଣ୍ଡ୍ଳିର୍ ଦୁତ୍ମଃନ୍ ଆର୍ ସାତ୍ଗଟ୍ ଦିହ୍ରୁକା ସାତ୍ଗଟ୍ ମଣ୍ଡ୍ଳି ।”
2ଏପିସି ମଣ୍ଡ୍ଳିକ୍ କବୁର୍
1“ଏପିସିଏ ରିଲା ମଣ୍ଡ୍ଳିର୍ ଦୁତ୍କେ ଲେକ୍, ‘ଜେ କାତା ଆତେ ସାତ୍ଗଟ୍ ତାରା ଦଃରେଦ୍ ଆର୍ ସାତ୍ଗଟ୍ ସନାର୍ ଦିହ୍ରୁକାମଃନାର୍ ବିତ୍ରେ ଚାଲାବୁଲା କଃରେଦ୍, ସେ ଇରି କଃଉଁଲା । 2ମୁଁୟ୍ ତୁମାର୍ କାମ୍, କଃସ୍ଟ୍ ଆର୍ ସଃମ୍ବାଳ୍ତାର୍ ଜାଣିଆଚି; ଆରେକ୍ ମୁୟ୍ ଜାଣି ଆଚି, ତୁମି ଜେ ଦୁସ୍ଟ୍ମଃନାର୍ କାମ୍ ସଃମ୍ବାଳୁ ନଃହାରାସ୍ । ଆରେକ୍ ଜୁୟ୍ମଃନ୍ ଅଃହ୍ଣା ଅଃହ୍ଣାକ୍ ପେରିତ୍ ଚେଲା ବଃଲି କଃଉତି, ମଃତର୍ ସଃତ୍କଃରି ସେମଃନ୍ ପେରିତ୍ ଚେଲା ନାୟ୍, ସେମଃନ୍କେ ତୁମି ପରିକ୍ୟା କଃରି ମିଚ୍ କଃଉତା ଲକ୍ମଃନ୍ ବଃଲି ହଃର୍ମାଣ୍ କଃରି ଆଚାସ୍ । 3ଆରେକ୍ ସାସ୍ ଦଃରି ମର୍ ନାଉଁଆର୍ ଗିନେ କଃସ୍ଟ୍ ସଃମ୍ବାଳି ଆଚାସ୍ ଆର୍ ନଃତାକାସ୍, ଇରି ହେଁ ମୁଁୟ୍ ଜାଣି । 4ଅୟ୍ଲେକ୍ ହେଁ ତୁମାର୍ ବିରଦେ ମର୍ ଇ କଃତା ଆଚେ, ତୁମି ଆଗ୍ତୁ ଲାଡ୍ କଃଲା ହର୍ ମକ୍ ଅଃବେ ଲାଡ୍ ନଃକେରୁଲାସ୍ । 5ତୁମିମଃନ୍ କଃନ୍କଃରି ଅଃତେକ୍ ତଃଳେ ଅୟ୍ ଗଃଲାସ୍, ସେରି ଏତାୟ୍ କଃରି ହାହେହୁଣି ମଃନ୍ ବାଦ୍ଲାଉଆ ଆର୍ ଆଗ୍ତୁର୍ କାମ୍ ସଃବୁ କଃରା; ଜଦି ତୁମିମଃନ୍ ହାହେହୁଣି ବାଉଳି ନଃକେରାସ୍, ତଃବେ ମୁଁୟ୍ ତୁମାର୍ ଲଃଗେ ଆସି ତୁମାର୍ ଦିହ୍କେ ରିଲା ଟାଣେହୁଣି ଗୁଚାୟ୍ ଦେଉଁନ୍ଦ୍ । 6ମଃତର୍, ତୁମାର୍ ଇ ବଃଲ୍ ଗୁଣ୍ ଆଚେ ଜେ, ମୁଁୟ୍ ନିକଲାତିଅମଃନାର୍ ଜୁୟ୍ ସଃବୁ କାମ୍କେ ଗିଣ୍ କଃରୁଲେ, ତୁମି ହେଁ ସେସଃବୁ ଗିଣ୍ କଃରୁଲାସ୍ ।’”
7୨:୭ ପ୍ରକା ୨୨:୨.“ଜଦି ତୁମିମଃନାର୍ କାନ୍ ଆଚେ, ତଃବେ ମଣ୍ଡ୍ଳିମଃନ୍କେ ପବିତ୍ର ଆତ୍ମା କାୟ୍ରି କଃଉଁଲି, ସେରି ସୁଣା । ଜୁୟ୍ ଲକ୍ ଜିଣେଦ୍, ତାକ୍ ମୁଁୟ୍ ଇସ୍ୱରାର୍ ବାଳାର୍ ଜିବନ୍ ଗଃଚେ ହଃଳ୍ଲା ହଃଳ୍ କଃଉଁକେ ଅଃଦିକାର୍ ଦଃୟ୍ନ୍ଦ୍ ।”
ସୁମର୍ନା ମଣ୍ଡ୍ଳିକ୍ କବୁର୍
8୨:୮ ପ୍ରକା ୧:୧୭; ୨୨:୧୩.“ସୁମର୍ନା ତଃୟ୍ ରିଲା ମଣ୍ଡ୍ଳିର୍ ଦୁତ୍କେ ଲେକ୍, ଜେ ହଃର୍ତୁ ଆର୍ ସେସ୍, ଜେ ମଃରି କଃରି ଆରେକ୍ ଜିବନ୍ ଅୟ୍ଲା, ସେ ଇରି କଃଉଁଲା, 9ମୁଁୟ୍ ତୁମାର୍ କଃସ୍ଟ୍ ଆର୍ ତୁମିମଃନ୍ ଗଃରିବ୍ ବଃଲି ଜାଣି, ମଃତର୍ ତୁମିମଃନ୍ ସଃତ୍କଃରି ଦଃନି ଆର୍ ଜୁୟ୍ମଃନ୍ ଅଃହ୍ଣା ଅଃହ୍ଣାକ୍ ଜିଉଦି ବଃଲି କଃଉତି, ମଃତର୍ ସଃତ୍କଃରି ଜିଉଦି ନାୟ୍, ମଃତର୍ ସୟ୍ତାନ୍ ଦଃଳ୍, ସେମଃନ୍ ତୁମାର୍ ବିରଦେ ଲିନ୍ଦା କଃତା କଃଉଁଲାୟ୍ ବଃଲି ହେଁ ମୁଁୟ୍ ଜାଣି । 10ଜୁୟ୍ ସଃବୁ ଦୁକ୍ ବୟଃଗ୍ କଃରୁକେ କଃଉଁଲାସ୍, ସେ ସଃବୁର୍ ଗିନେ ଡିରା ନାୟ୍; ସୁଣା, ତୁମିମଃନଃକ୍ ପରିକ୍ୟା କଃରୁକେ ସୟ୍ତାନ୍ ତୁମିମଃନାର୍ ବିତ୍ରେ କାକେ କାକେ ଜଃଇଲେ ହୁରାୟ୍ଦ୍, ଆର୍ ତୁମିମଃନ୍ ଦଃସ୍ ଦିନ୍ କଃସ୍ଟ୍ ବୟଃଗ୍ କଃରାସ୍ । ତୁମି ମଃର୍ନ୍ ହଃତେକ୍ ବିସ୍ୱାସ୍ କଃରି ରିଆ, ସେତାକ୍ ମୁଁୟ୍ ତୁମିକେ ଜିବନାର୍ ମୁକୁଟ୍ ଦଃୟ୍ନ୍ଦ୍ ।”
11୨:୧୧ ପ୍ରକା ୨୦:୧୪; ୨୧:୮.“ଜଦି ତୁମିମଃନାର୍ କାନ୍ ଆଚେ, ତଃବେ ମଣ୍ଡ୍ଳିମଃନ୍କେ ପବିତ୍ର ଆତ୍ମା କାୟ୍ରି କଃଉଁଲି, ସେରି ସୁଣା । ଜୁୟ୍ ଲକ୍ମଃନ୍ ଜିଣ୍ତି, ହଃଚେ ମଃର୍ତା ମଃର୍ନ୍ ସେମଃନ୍କେ ନଃସ୍ଟ୍ କଃରୁ ନାହାରେ ।”
ପର୍ଗାମ୍ ମଣ୍ଡ୍ଳିକ୍ କବୁର୍
12“ପର୍ଗାମ୍ ତଃୟ୍ ରେତା ମଣ୍ଡ୍ଳିର୍ ଦୁତ୍କେ ଲେକ୍, ଜାର୍ ତଃୟ୍ ଦୁୟ୍ବାଟ୍ ଦାର୍ ରିଲା ଲାଗୁଣ୍ କଃଣ୍ଡା ଆଚେ, ସେ ଇରି କଃଉଁଲା । 13ଜୁୟ୍ଲଃଗେ ସୟ୍ତାନାର୍ ସିଙ୍ଗାସଣ୍ ଆଚେ, ସେତି ତୁମିମଃନ୍ ବାସା କଃରୁଲାସ୍, ଇରି ମୁୟ୍ ଜାଣିଆଚି; ଅୟ୍ଲେକ୍ ହେଁ ତୁମିମଃନାର୍ ମର୍ ନାଉଁ ଉହ୍ରେ ଅଃଟୁଆ ବିସ୍ୱାସ୍ ଆଚେ, ଇବାନ୍ୟା କି ମର୍ ଗଟେକ୍ ବିସ୍ୱାସି ଦଃଙ୍ଗ୍ଳା ଆନ୍ତିପାକ୍ ସୟ୍ତାନ୍ ବାସା କଃର୍ତା ତଃୟ୍ ଜଃଡେବଃଳ୍ ମଃର୍ନେ ମାର୍ଲାୟ୍, ସଃଡେବଃଳ୍ ହେଁ ତୁମି ମର୍ ତଃୟ୍ ବିସ୍ୱାସ୍ କଃର୍ତାର୍ ଚାଡି ନଃରିଲାସ୍ । 14ମଃତର୍ ତୁମାର୍ ବିରଦେ ମର୍ କଃତେକ୍ କଃତା ଆଚେ, ସେତି ତୁମାର୍ ସଃଙ୍ଗ୍ ରେତା କଃତେକ୍ ଲକ୍ ବିଲିଆମାର୍ କଃତାୟ୍ ଇଣ୍ଡୁଲାୟ୍ । ସେ ବିଲିଆମ୍ ମୁର୍ତି ହୁଜା କଃଲା ବଗ୍ କାଉଁକେ ଆର୍ ଦାରି କାମ୍ କଃରୁକେ ଇସ୍ରାଏଲାର୍ ଲକ୍ମଃନ୍କେ ସୁତ୍ରାଉଁକ୍ ବାଲାକକେ ସିକାଉତି ରିଲା । 15ସେବାନ୍ୟା ହେଁ ନିକଲାତିଅର୍ କଃତା ମାନ୍ତା କଃତେକ୍ ଲକ୍ ତୁମାର୍ ବିତ୍ରେ ଆଚ୍ତି । 16ଅଃବେ ତୁମିମଃନ୍ ହାହେହୁଣି ମଃନ୍ ବାଦ୍ଲାଉଆ; ନୟ୍ଲେକ୍ ମୁଁୟ୍ ବେଗି ତୁମାର୍ ଲଃଗେ ଆସି ମର୍ ଟଣ୍ଡେହୁଣି ବାରାଉତା କଃଣ୍ଡା ସଃଙ୍ଗ୍ ସେମଃନାର୍ ସଃଙ୍ଗ୍ ଜୁଜ୍ କଃରିନ୍ଦ୍ ।”
17୨:୧୭ ଜହ ୬:୪୮-୫୦.“ଜଦି ତୁମିମଃନାର୍ କାନ୍ ଆଚେ, ତଃବେ ମଣ୍ଡ୍ଳିମଃନ୍କେ ପବିତ୍ର ଆତ୍ମା କାୟ୍ରି କଃଉଁଲି, ସେରି ସୁଣା । ଜେ ଜିଣେଦ୍, ତାକ୍ ମୁଁୟ୍ ଲୁକ୍ଣେ ରିଲା ମାନ୍ନା ଦଃୟ୍ନ୍ଦ୍ । ଆରେକ୍ ହେଁ ନଃଉଆଁ ନାଉଁ ଲେକା ଅୟ୍ରିଲା ଗଟେକ୍ ଦବ୍ ଟେଳା ସେମଃନ୍କେ ଦଃୟ୍ନ୍ଦ୍ ସେ ନଃଉଆଁ ନାଉଁ କାୟ୍ରି, ଟେଳା ଦଃର୍ତାର୍ ଲକ୍କେ ଚାଡି ବିନ୍ ଲକ୍ କେହେଁ ଜାଣୁ ନଃହାର୍ତି ।”
ତୁୟାତିରା ମଣ୍ଡ୍ଳିକ୍ କବୁର୍
18“ତୁୟତିରା ତଃୟ୍ ରିଲା ମଣ୍ଡ୍ଳିର୍ ଦୁତ୍କେ ଲେକ୍, ଇସ୍ୱରାର୍ ଜୁୟ୍ ହୟ୍ସିର୍ ଆକି ଲାଗ୍ତା ଜୟ୍ ହର୍ ଆର୍ ହାଦ୍ ଜିକ୍ଜିକା ହିତୁଳ୍ ହର୍, ସେ ଇରି କଃଉଁଲା, 19ମୁଁୟ୍ ତୁମାର୍ କାମ୍, ଲାଡ୍, ବିସ୍ୱାସ୍, ସେବା ଆର୍ ସଃମ୍ବାଳ୍ତାର୍ ଜାଣି, ଆରେକ୍ ତୁମାର୍ ହୁର୍ବାର୍ କାମ୍ମଃନାର୍ ତଃୟ୍ହୁଣି ଅଃବାର୍ କାମ୍ ଜେ ଅଃଦିକ୍, ଇରି ହେଁ ଜାଣି । 20ଅୟ୍ଲେକ୍ ହେଁ ତୁମାର୍ ବିରଦେ ମର୍ ଇ କଃତା ଆଚେ, ଜିଜିବଲ୍ ନାଉଁଆର୍ ଜୁୟ୍ ମାୟ୍ଜି ଅଃହ୍ଣାକ୍ ବାବ୍ବାଦିଣି ବଃଲି କୟ୍ ମର୍ ଗତି ଦଃଙ୍ଗ୍ଳାମଃନ୍କେ ଦାରିକାମ୍ କଃରାଉଁଲି ଆର୍ ମୁର୍ତିହୁଜା କଃଲାର୍ ବଗ୍ କାଉଁକେ ସିକ୍ୟା ଦଃୟ୍ ବିନ୍ବାଟେ ନେଉଁଲି, ତୁମି ତାର୍ କଃରାବ୍ କାମ୍କେ ସଃମ୍ବାଳୁଲାସ୍ । 21ମୁଁୟ୍ ତାକ୍ ହାହେହୁଣି ମଃନ୍ ବାଦ୍ଲାଉଁକ୍ ବେଳା ଦିଲେକ୍ ହେଁ ସେ ଅଃହ୍ଣାର୍ ଦାରି କାମେ ହୁଣି ମଃନ୍ ବାଦ୍ଲାଉଁକ୍ ମଃନ୍ ନଃକେରୁଲି । 22ଦଃକା, ମୁଁୟ୍ ତାକ୍ ରଗ୍ୟା କଃରି ଟାଟାୟ୍ ହଃକାୟ୍ନ୍ଦ୍, ଆର୍ ଜୁୟ୍ମଃନ୍ ତାର୍ ସଃଙ୍ଗ୍ ଦାରିକାମ୍ କଃର୍ତି, ସେମଃନ୍ ତାର୍ ସଃଙ୍ଗ୍ ମିସି କଃର୍ତା କାମେ ହୁଣି ମଃନ୍ ନଃବାଦ୍ଲାୟ୍ଲେକ୍ ମୁଁୟ୍ ସେମଃନ୍କେ ବଃଡେ ଦୁକ୍କଃସ୍ଟେ ହଃକାୟ୍ନ୍ଦ୍, 23ଆରେକ୍ ମୁଁୟ୍ ତାର୍ ହିଲାମଃନକେ ହେଁ ନାସ୍ କଃରିନ୍ଦ୍ । ସେତାକ୍ ମୁଁୟ୍ ଜେ ମଃନାର୍ କଃତା ଆର୍ ଗଃର୍ବ୍କ୍ ପରିକ୍ୟା କଃର୍ତା ଲକ୍, ଆରେକ୍ ତୁମାର୍ ସଃବୁ ଲକ୍କେ ଅଃହ୍ଣା ଅଃହ୍ଣାର୍ କାମ୍ ହଃର୍କାରେ ହଃଳ୍ ଦେତା ଲକ୍, ଇରି ମଣ୍ଡ୍ଳିମଃନ୍ ଜାଣ୍ତି ।
24ମଃତର୍ ତୁମିମଃନ୍କେ, ବଃଲେକ୍ ତୁୟତିରା ତଃୟ୍ ରେତା ଜୁୟ୍ ବିନ୍ ଲକ୍ମଃନ୍ ଇ କଃତା ନଃମାନ୍ତା ଲକ୍ ନାୟ୍ ଆର୍ ଜାକେ ସୟ୍ତାନାର୍ ବିତ୍ରି ସିକ୍ୟା ବଃଲି କଃଉତି, ସେରି ନଃଜାଣୁ, ତୁମିମଃନ୍କେ ମୁଁୟ୍ କଃଉଁଲେ, ତୁମାର୍ ଉହ୍ରେ ମୁଁୟ୍ ଆର୍ କାୟ୍ହେଁ ବଜ୍ ନଃଦେଉଁ । 25ଅଃବ୍କା ତୁମାର୍ ଲଃଗେ ଜାୟ୍ରି ଆଚେ, ସେରି ମୁଁୟ୍ ଆସ୍ତା ହଃତେକ୍ ଅଃଟୁଆ କଃରି ଦଃରି ରିଆ । 26ଜୁୟ୍ଲକ୍ ଜିଣେଦ୍ ଆର୍ ସେସ୍ ହଃତେକ୍ ମର୍ କାମ୍ କଃରେଦ୍, ମୁଁୟ୍ ଜଃନ୍କଃରି ମର୍ ଉବାର୍ ତଃୟ୍ହୁଣି ଅଃଦିକାର୍ ହାୟ୍ଆଚି, ସେରି ସେମଃନ୍କେ ଦଃୟ୍ନ୍ଦ୍ । 27ସେ ହୁର୍ତିର୍ ଲକେ ଲଃଉଆ ଡାଙ୍ଗ୍ ସଃଙ୍ଗ୍ ସାସନ୍ କଃରେଦ୍, ଆର୍ ସେମଃନ୍ ମାଟି ଡକାହର୍ କଃଣ୍ଡ୍ କଃଣ୍ଡ୍ କଃରୁକେ ଅଃଦିକାର୍ ଦଃୟ୍ନ୍ଦ୍, 28ଆରେକ୍ ମୁଁୟ୍ ସେମଃନ୍କେ ସଃକାଳାର୍ ତାରା ଦଃୟ୍ନ୍ଦ୍ ।”
29“ଜଦି ତୁମିମଃନାର୍ କାନ୍ ଆଚେ, ତଃବେ ମଣ୍ଡ୍ଳିମଃନ୍କେ ପବିତ୍ର ଆତ୍ମା କାୟ୍ରି କଃଉଁଲି, ସେରି ସୁଣା ।”
3ସାର୍ଦି ମଣ୍ଡ୍ଳିକ୍ କବୁର୍
1“ସାର୍ଦି ତଃୟ୍ ରିଲା ମଣ୍ଡ୍ଳିର୍ ଦୁତ୍କେ ଲେକ୍, ଜେ ଇସ୍ୱରାର୍ ସାତ୍ଗଟ୍ ଆତ୍ମା ଆର୍ ସାତ୍ଗଟ୍ ତାରା ଦଃରିଆଚେ, ସେ ଇରି କଃଉଁଲା, ମୁଁୟ୍ ତୁମାର୍ କାମ୍ ଜାଣି, ତୁମିମଃନ୍ ନାଉଁକ୍ ଜିବନ୍ ଆଚାସ୍, ମଃତର୍ ସଃତ୍ୟାକଃରି ମଃରି ଆଚାସ୍ । 2ଜଃଗ୍ରାତ୍ ଅଃଉଆ, ଆରେକ୍ ଜାୟ୍ରି ଅଃବେ ଆଚେ, ନଃସ୍ଟ୍ ଅଃଉତା ଆଗ୍ତୁ ସେରି ବାଡାଉଆ; କାୟ୍ତାକ୍ବଃଲେକ୍ ମୁଁୟ୍ ତୁମାର୍ ସଃବୁ କାମ୍କେ ଅଃମାର୍ ଇସ୍ୱରାର୍ ଚଃମେ ନିର୍ଦସି ବଃଲି ନଃଦେକି । 3୩:୩ ମାତି ୨୪:୪୩,୪୪; ଲୁକ ୧୨:୩୯,୪୦; ପ୍ରକା ୧୬:୧୫.ଇତାର୍ ଗିନେ କୁୟ୍ ରଃକମାର୍ ସିକ୍ୟା ହାୟ୍ ଆଚାସ୍ ଆର୍ ସୁଣି ଆଚାସ୍, ସେରି ଏତାୟ୍ କଃରି ମାନା ଆର୍ ମଃନ୍ ବାଦ୍ଲାଉଆ; ଜଦି ଜଃଗ୍ରାତ୍ ନଃଉଆସ୍, ତଃବେ ମୁଁୟ୍ ଚର୍ ହର୍ ଆସିନ୍ଦ୍, ଆର୍ କୁୟ୍ ବେଳାୟ୍ ତୁମାର୍ ଚଃମେ ଆସି ହଚିନ୍ଦ୍, ସେରି ତୁମି ଜାଣୁ ନାହାରାସ୍ । 4ଅୟ୍ଲେକ୍ ହେଁ ଜୁୟ୍ମଃନ୍ ଅଃହ୍ଣା ଅଃହ୍ଣାର୍ ବଃସ୍ତର୍ ମେଳି ନଃକେର୍ତି, ତୁମାର୍ ବିତ୍ରେ ସାର୍ଦି ତଃୟ୍ ଇବାନ୍ୟା କଃତେକ୍ ଲକ୍ ଆଚ୍ତି; ସେମଃନ୍ ଦବ୍ ବଃସ୍ତର୍ ହିନ୍ଦି ମର୍ ସଃଙ୍ଗ୍ ଚାଲାବୁଲା କଃର୍ତି, କାୟ୍ତାକ୍ବଃଲେକ୍ ସେମଃନ୍ ଜୟ୍ଗ୍ । 5୩:୫ ପ୍ରକା ୨୦:୧୨; ମାତି ୧୦:୩୨; ଲୁକ ୧୨:୮.ଜୁୟ୍ଲକ୍ ଜିଣେଦ୍, ସେ ଇବାନ୍ୟା ଦବ୍ ବଃସ୍ତର୍ ହିନ୍ଦେଦ୍, ଆର୍ ମୁଁୟ୍ ଜିବନାର୍ ସାସ୍ତର୍ ତଃୟ୍ହୁଣି ତାର୍ ନାଉଁକ୍ କଃନ୍କଃରି ହେଁ ନଃଲିବାୟ୍ ଅଃମାର୍ ଉବା ଆର୍ ତାର୍ ଦୁତ୍ମଃନାର୍ ମୁଏଁ ସେମଃନ୍କେ ମର୍ ଲକ୍ ବଃଲି କୟ୍ନ୍ଦ୍ ।”
6“ଜଦି ତୁମିମଃନାର୍ କାନ୍ ଆଚେ, ତଃବେ ମଣ୍ଡ୍ଳିମଃନ୍କେ ପବିତ୍ର ଆତ୍ମା କାୟ୍ରି କଃଉଁଲି, ସେରି ସୁଣା ।”
ପିଲାଦେଲ୍ପିଆ ମଣ୍ଡ୍ଳିକ୍ କଃବୁର୍
7“ପିଲାଦେଲ୍ପିଆ ତଃୟ୍ ରେତା ମଣ୍ଡ୍ଳିର୍ ଦୁତ୍କେ ଲେକ୍, ଜେ ପବିତ୍ର ଆର୍ ସଃତ୍, ଜାର୍ ଆତେ ଦାଉଦାର୍ କୁଚିକାଡା ଆଚେ, ଜେ ଉଗାଳ୍ଲେକ୍ କେ ଡାହୁ ନଃହାର୍ତି, ଆର୍ ଡାହ୍ଲେକ୍ କେ ଉଗାଳୁ ନଃହାର୍ତି, ସେ ଇରି କଃଉଁଲା, 8ମୁଁୟ୍ ତୁମାର୍ କାମ୍ ଜାଣି ଆଚି, ଦଃକ୍, ମୁଁୟ୍ ତୁମାର୍ ମୁଏଁ ଗଟେକ୍ ଦୁଆର୍ ଉଗାଳି ଆଚି, କେ ସେରି ଡାହୁକ୍ ନଃହାର୍ତି, କାୟ୍ତାକ୍ବଃଲେକ୍ ତୁମାର୍ ସଃକ୍ତି ଉଣା, ଅୟ୍ଲେକ୍ ହେଁ ତୁମି ମର୍ କଃତା ମାନି, ମର୍ ନାଉଁକ୍ ନଃଜାଣୁ ବଃଲି ନଃକଃଉଆସ୍ । 9ଦଃକା, ଜୁୟ୍ମଃନ୍ ଜିଉଦି ନୟ୍, ମଃତର୍ ମିଚେ ଆହ୍ଣାମଃନ୍କ୍ ଜିଉଦି ବଃଲି କଃଉତି, ଇବାନ୍ୟା ସୟ୍ତାନାର୍ ଦଃଳାର୍ ଲକ୍ମଃନ୍କେ ମୁଁୟ୍ ଆଣି ତୁମାର୍ ହାଦ୍ ତଃଳେ ଜୁଆର୍ କଃରାୟ୍ନ୍ଦ୍, ଆର୍ ମୁଁୟ୍ ଜେ ତୁମିକେ ଲାଡ୍ କଃରୁଲେ, ଇରି ସେମଃନ୍କେ ଜାଣାଉଁନ୍ଦ୍ । 10ତୁମି ମର୍ ଆଦେସ୍ ହଃର୍କାରେ ସଃମ୍ବାଳି କଃରି ଆଚାସ୍, ଇତାର୍ ଗିନେ ହୁର୍ତିୟେ ବାସା କଃର୍ତା ଲକ୍ମଃନ୍କେ ପରିକ୍ୟା କଃରୁକେ ସଃବୁ ଜଃଗତ୍ ଉହ୍ରେ ଜୁୟ୍ ପରିକ୍ୟାର୍ ବେଳ୍ ଆସେଦ୍, ସେତିହୁଣି ହେଁ ମୁଁୟ୍ ତୁମିକେ ବଚାୟ୍ନ୍ଦ୍ । 11ମୁଁୟ୍ ବେଗି ଆସୁଲେ, ତୁମାର୍ ଜିଣ୍ଲା ମୁକୁଟ୍କେ ଜଃନ୍କଃରି କେ ଚରିକଃରି ନଃନେୟ୍, ଇତାର୍ ଗିନେ ତୁମାର୍ ତଃୟ୍ ଜାୟ୍ରି ଆଚେ ସେରି ଅଃଟୁଆ କଃରି ଦଃରି ରିଆ । 12୩:୧୨ ପ୍ରକା ୨୧:୨.ଜୁୟ୍ଲକ୍ ଜିଣେଦ୍, ମୁଁୟ୍ ତାକ୍ ଅଃମାର୍ ଇସ୍ୱରାର୍ ମନ୍ଦିରାର୍ ମୁଣ୍ଡା ହର୍ କଃରିନ୍ଦ୍, ସେ ଆରେକ୍ ସେତିହୁଣି ହଃଦାୟ୍ ଜଃଉଁ ନାହାରେ; ମୁଁୟ୍ ଅଃମାର୍ ଇସ୍ୱରାର୍ ନାଉଁ ଆର୍ ସଃର୍ଗେହୁଣି ତାର୍ ତଃୟ୍ହୁଣି ଆସ୍ତା ଜୁୟ୍ ଜିରୁସାଲମ୍, ଅଃମାର୍ ଇସ୍ୱରାର୍ ସେ ଗଃଳାର୍ ନାଉଁ, ଆରେକ୍ ମର୍ ନିଜାର୍ ନଃଉଆଁ ନାଉଁ ତାର୍ ଉହ୍ରେ ଲେକିନ୍ଦ୍ ।”
13“ଜଦି ତୁମିମଃନାର୍ କାନ୍ ଆଚେ, ତଃବେ ମଣ୍ଡ୍ଳିମଃନ୍କେ ପବିତ୍ର ଆତ୍ମା କାୟ୍ରି କଃଉଁଲି, ସେରି ସୁଣା ।”
ଲାଅଦିକିଆ ମଣ୍ଡ୍ଳିକ୍ କଃବୁର୍
14“ଲାଅଦିକିଆ ମଣ୍ଡ୍ଳିର୍ ଦୁତ୍କେ ଲେକ୍, ଜେ ସଃତ୍, ଜେ ବିସ୍ୱାସାର୍ ଜୟ୍ଗ୍ ଆର୍ ସଃତ୍ୟା ସାକି, ଜେ ଇସ୍ୱରାର୍ ଉବ୍ଜାଣାର୍ ଆରୁମ୍ । ସେ ଇରି କଃଉଁଲା । 15ମୁଁୟ୍ ତୁମାର୍ କାମ୍ ଜାଣି, ତୁମି କାକର୍ ନାୟ୍ କି ତାହାତ୍ ନାୟ୍; ତୁମି କାକର୍ କି ତାହାତ୍ ରିଲେକ୍ ନିକ ଅୟ୍ଲି ହୁଣି । 16ଇତାର୍ ଗିନେ ତୁମି କାକର୍ କି ତାହାତ୍ ନଃୟ୍କଃରି ନଃକ୍ ଉସୁମ୍ ଅୟ୍ ଆଚାସ୍, ଇତାର୍ ଗିନେ ମୁଁୟ୍ ତୁମିକେ ମର୍ ଟଣ୍ଡେ ହୁଣି ଉକାଳୁକ୍ ଜଃଉଁଲେ । 17ତୁମି କଃଉଁଲାସ୍, ମୁୟ୍ଁ ମାଜନ୍, ମର୍ ବୁତେକ୍ ସଃମ୍ପତି ଆଚେ, ମର୍ କାୟ୍ରି ହେଁ ଅକେଟ୍ ନାୟ୍; ମଃତର୍ ତୁମାର୍ ବାୟ୍ଗ୍ ଜେ କଃରାବ୍, ତୁମି ଦୁକି, ଗଃରିବ୍, କାଣା ଆର୍ ନଃଗ୍ଳା, ଇରି ନଃଜାଣାସ୍ । 18ଇତାର୍ ଗିନେ ମୁୟ୍ଁ ତୁମିକେ ଇ ସିକ୍ୟା ଦେଉଁଲେ, ତୁମି ମାଜନ୍ ଅଃଉତା ଗିନେ ଜୟେ ନିର୍ମୁଳ୍ ଅୟ୍ଲା ସନା, ଆର୍ ତୁମାର୍ ନଃଗ୍ଳା ରେତା ଲାଜ୍ ଜଃନ୍କଃରି ଜାଣା ନଃହେଳେ, ଇତାର୍ ଗିନେ ହିନ୍ଦୁକ୍ ଦବ୍ ବଃସ୍ତର୍, ଆରେକ୍ ଦଃକୁ ହାର୍ତା ଗିନେ ଆକାୟ୍ ଲାଗାଉଁକ୍ ଆକିକାଜଳ୍ ମର୍ ତଃୟ୍ହୁଣି ଆସି ଗେନା । 19୩:୧୯ ଏବ୍ରି ୧୨:୬.ମୁୟ୍ଁ ଜଃତେକ୍ ଲକ୍କେ ଲାଡ୍ କଃରୁଲେ, ସେମଃନ୍କେ ଉଳିନ୍ଦ୍ ଆର୍ ସାସନ୍ କଃରିନ୍ଦ୍; ବଃଲେକ୍ ତିକ୍ତିକା ଅୟ୍ ମଃନ୍ ବାଦ୍ଲାଉଆ । 20ଦଃକା, ମୁୟ୍ଁ ଦୁଆର୍ ଲଃଗେ ଟିଆ ଅୟ୍ କାହାଟେ ମାରୁଲେ; ଜଦି କେ ମର୍ ଟଣ୍ଡ୍ ସୁଣି କାହାଟ୍ ଉଗାଳେଦ୍, ତଃନ୍ଅୟ୍ଲେକ୍ ମୁୟ୍ଁ ଗଃରେ ହୁରି ତାର୍ ଲଃଗେ ଜାୟ୍ନ୍ଦ୍, ଆରେକ୍ ମୁଁୟ୍ ତାର୍ ସଃଙ୍ଗ୍ କାୟ୍ନ୍ଦ୍ ଆର୍ ସେ ମର୍ ସଃଙ୍ଗ୍ କାୟ୍ଦ୍ । 21ମୁୟ୍ଁ ଜଃନ୍କାର୍ ଜିଣିକଃରି ଅଃମାର୍ ଉବାର୍ କାତାବାଟ୍ୟା ବଃସି ଆଚି, ସେରଃକମ୍ ଜେ ଜିଣେଦ୍, ମୁୟ୍ଁ ତାକ୍ ମର୍ ସଃଙ୍ଗ୍ ମର୍ ସିଙ୍ଗାସଣେ ବଃସୁକ୍ ଅଃଦିକାର୍ ଦଃୟ୍ନ୍ଦ୍ ।”
22“ଜଦି ତୁମିମଃନାର୍ କାନ୍ ଆଚେ, ତଃବେ ମଣ୍ଡ୍ଳିମଃନ୍କେ ପବିତ୍ର ଆତ୍ମା କାୟ୍ରି କଃଉଁଲି, ସେରି ସୁଣା ।”
4ସଃର୍ଗେ ଅଃଉତା ପାର୍ତ୍ନା
1ଇତାର୍ ହଃଚେ ମୁଁୟ୍ ଦଃକ୍ଲେ, ଆର୍ ଦଃକା, ସଃର୍ଗେ ଗଟେକ୍ ଦୁଆର୍ ଉଗାଳା ଆଚେ; ଆରେକ୍ ତୁରିର୍ ସଃବ୍ଦ୍ ହର୍ ମର୍ ସଃଙ୍ଗ୍ କଃତା ଅଃଉତା ଜୁୟ୍ ଟଣ୍ଡ୍ ମୁୟ୍ଁ ହୁର୍ବେ ସୁଣି ରିଲେ, ସେରି କୟ୍ଲି, “ଇହାକ୍ ଉଟିଆଉ; ଜୁୟ୍ସଃବୁ ଇତାର୍ହଃଚେ ବାୟ୍ଦ୍ରେ ଗଃଟେଦ୍, ସେ ସଃବୁ ମୁଁୟ୍ ତକ୍ ଦଃକାୟ୍ନ୍ଦ୍ ।” 2ସେଦାହ୍ରେ ମୁୟ୍ଁ ଆତ୍ମାୟ୍ ହୁର୍ନ୍ ଅୟ୍ଲେ, ଆର୍ ଦଃକା, ସଃର୍ଗେ ଗଟେକ୍ ସିଙ୍ଗାସଣ୍ ସଃଙ୍ଗାୟ୍ଲାର୍ ଆଚେ, ଆରେକ୍ ସଃର୍ଗେ ସିଙ୍ଗାସଣ୍ ଉହ୍ରେ ଗଟେକ୍ ଲକ୍ ବଃସି ଆଚେ । 3ବଃସିରିଲା ଲକାର୍ ରୁହ୍ ହିରା ଆର୍ ମଣି ହର୍, ଜିକ୍ଜିକା ଡିସ୍ତିରିଲି ଆର୍ ସିଙ୍ଗାସଣାର୍ ଚାରିବେଳ୍ତ୍ ଗଟେକ୍ ଲିଙ୍ଗିଲାଟି, ଆର୍ ମରକତ ମଣି ହର୍ ଡିସ୍ତି ରିଲି । 4ଆରେକ୍ ସିଙ୍ଗାସଣାର୍ ଚାରି ବାଟ୍ୟା ଚାରିଗଟ୍ ସିଙ୍ଗାସଣ୍ ସଃଙ୍ଗା ଅୟ୍ଆଚେ ଆର୍ ସିଙ୍ଗାସଣ୍ମଃନାର୍ ଉହ୍ରେ ଚବିସ୍ଗଟ୍ ପାରାଚିନ୍ ବଃସି ଆଚ୍ତି, ସେମଃନ୍ ଦବ୍ଳା ବଃସ୍ତର୍ ହିନ୍ଦି ଆଚ୍ତି ଆର୍ ସେମଃନାର୍ ମୁଣ୍ଡ୍ ଉହ୍ରେ ସନାର୍ ମୁକୁଟ୍ । 5୪:୫ ପ୍ରକା ୮:୫; ୧୧:୧୯; ୧୬:୧୮; ପ୍ରକା ୧:୪.ସିଙ୍ଗାସଣ୍ ତଃୟ୍ହୁଣି ବିଜ୍ଲି, ବିନ୍ବିନ୍ ଟଣ୍ଡ୍ ଆର୍ ମେଗାର୍ ଗଃର୍ଜାଣ୍ ବାରାଉଁଲି, ଆର୍ ସିଙ୍ଗାସଣାର୍ ମୁୟେ ଜୟ୍ଲାଗ୍ତା ସାତ୍ଗଟ୍ କୁପି ଲାଗୁଲି, ଇ ସାତ୍ଗଟ୍ କୁପି ଇସ୍ୱରାର୍ ସାତ୍ଗଟ୍ ଆତ୍ମା । 6ସିଙ୍ଗାସଣ୍ ମୁୟେ କାଚ୍ ହର୍ ହଃଟିଚ୍ ଗଟେକ୍ ସଃମ୍ନ୍ଦ୍; ସିଙ୍ଗାସଣ୍ ଚାରିବାଟାର୍ ମଃଜାୟ୍ ଚାରିଗଟ୍ ଜଃତୁ ରିଲାୟ୍, ସେମଃନାର୍ ଆଗ୍ବାଟ୍ ଆର୍ ହଃଚ୍ବାଟ୍ ଆକିମଃନ୍ ରିଲି । 7ହଃର୍ତୁ ଜଃତୁ ସିମାବାଗ୍ ହର୍, ଦୁୟ୍ ଲଃମର୍ ଜଃତୁ ସଃଣ୍ଡ୍ ହର୍, ତିନି ଲଃମ୍ବର୍ ଜଃତୁର୍ ମୁଉଁ ନଃର୍ ମୁଉଁ ହର୍, ଆରେକ୍ ଚାରି ଲଃମ୍ବର୍ ଜଃତୁ ଉଡ୍ତା ରାବଣ୍ ହର୍ । 8ହଃତି ଜଃତୁର୍ ଚଅ ଚଅ ଗଟ୍ ଡେଣା, ସେ ଡେଣାମଃନାର୍ ହଃଦାବାଟ୍ ଆର୍ ବିତୁର୍ ବାଟ୍ ଅଃକାୟ୍ ହୁର୍ନ୍ ଆଚେ । ସେମଃନ୍ ଦିନ୍ରାତି ନଃବିସାୟ୍ କଃଉଁଲାୟ୍,
“ଜେ ସଃବ୍କେ ସଃକାତ୍, ଜେ ରିଲା, ଆଚେ ଆର୍ ଆସୁକ୍ ଆଚେ,
ସେ ମାପ୍ରୁ ଇସ୍ୱର୍ ପବିତ୍ର, ପବିତ୍ର, ପବିତ୍ର ।”
9ଜିବ୍ଜଃତୁମଃନ୍ ଜଃଡେବଃଳ୍ ସେ ସିଙ୍ଗାସଣେ ବଃସିରିଲା ସଃବୁବଃଳ୍ ଜିବନ୍ ରେତା ଲକ୍କେ ଜଃଜ୍ମାନ୍, ମାନ୍ତି ଆର୍ ଜୁଆର୍ କଃର୍ତି ରିଲାୟ୍, 10ସଃଡେବଃଳ୍ ଚବିସ୍ ପାରାଚିନ୍ ସିଙ୍ଗାସଣେ ବଃସିରିଲା ଲକାର୍ ଚଃମେ ମୁଣ୍ଡିଆ ମାରି ସଃବୁବଃଳ୍ ଜିବନ୍ ରେତା ଲକ୍କେ ଜୁଆର୍ କଃଲାୟ୍ ଆର୍ ସିଙ୍ଗାସଣାର୍ ମୁଏଁ ଅଃହ୍ଣା ଅଃହ୍ଣାର୍ ମୁକୁଟ୍ ସଃଙ୍ଗାୟ୍ କଃଉଁଲାୟ୍,
11“ଏ ଅଃମିମଃନାର୍ ମାପ୍ରୁ ଇସ୍ୱର୍,
ତୁୟ୍ ଜଃଜ୍ମାନ୍, ମାନ୍ତି ଆର୍ ସଃକ୍ତି ହାଉଁକ୍ ଜୟ୍ଗ୍,
ତୁୟ୍ ସଃବୁ ଉବ୍ଜାଣ୍ କଃରି ଆଚ୍ସି,
ଆର୍ ତର୍ ଇଚାୟ୍ ସେସଃବୁ ଜିବନ୍ ହାୟ୍ ଉବ୍ଜାଣ୍ ଅୟ୍ଆଚେ ।”
5ବଇ ଆର୍ ମେଣ୍ଡା ହିଲା
1ମୁୟ୍ଁ ସିଙ୍ଗାସଣେ ବଃସ୍ଲା ଲକାର୍ ବୁଜ୍ଣି ଆତେ ଗଟେକ୍ ହଃର୍ନା ପୁସ୍ତକ୍ ଦଃକ୍ଲେ, ସେରି ଦୁୟ୍ ବାଟ୍ୟା ଲେକା ଅୟ୍ଲାର୍ ଆର୍ ସାତ୍ ଗଟ୍ ମୁଦ୍ରା ମାରା ଅୟ୍ଆଚେ । 2ଆର୍ ମୁୟ୍ଁ ଗଟେକ୍ ବଃଡେ ସଃକାତାର୍ ଦୁତ୍ ଦଃକ୍ଲେ, ସେ ବଃଡ୍ ଟଣ୍ଡେ ପର୍ଚାର୍ କଃରି କଃଉତି ରିଲା, “କେ ଇ ମୁଦ୍ରା ସଃବୁ ବାଙ୍ଗାୟ୍ ପୁସ୍ତକ୍ ଇଟାଉଁକ୍ ଜୟ୍ଗ୍ ?” 3ମଃତର୍ ସଃର୍ଗ୍, ହୁର୍ତିବିଏ ଆର୍ ହଃତାଳେ୫:୩ ହଃତାଳେ-ମଃଲା ଲକ୍ମଃନାର୍ ଜଃଗତ୍ । କେ ସେ ପୁସ୍ତକ୍ ଇଟାଉଁକ୍ କି ସେରି ଦଃକୁକ୍ ଜୟ୍ଗ୍ ନୟ୍ଲାୟ୍ । 4ସେ ପୁସ୍ତକ୍ ଇଟାଉଁକ୍ କି ସେରି ଦଃକୁକ୍ ଜୟ୍ଗ୍ କେ ନଃମିଳ୍ଲାକ୍ ମୁୟ୍ଁ ବେସି କାନ୍ଦ୍ଲେ । 5ସେତାକ୍ ପାରାଚିନ୍ମଃନାର୍ ବିତ୍ରେହୁଣି ଗଟେକ୍ ଲକ୍ ମକ୍ କୟ୍ଲା, “କାନ୍ଦ୍ ନାୟ୍, ଦଃକ୍, ଜେ ଜିଉଦା ବଃଉଁସେ ଜଃଲମ୍ ସିମାବାଗ୍ ଆର୍ ଦାଉଦାର୍ ମୁଳ୍, ସେ ପୁସ୍ତକାର୍ ସାତ୍ଗଟ୍ ମୁଦ୍ରା ବାଙ୍ଗି, ସେରି ଇଟାଉଁକ୍ ଜିଣି ଆଚେ ।”
6ସଃଡେବଃଳ୍ ମୁୟ୍ଁ ଦଃକ୍ଲେ, ସିଙ୍ଗାସଣ୍, ଚାରିଜଃତୁ ଆର୍ ପାରାଚିନ୍ମଃନାର୍ ମଃଜାୟ୍ ଗଟେକ୍ ମେଣ୍ଡା ହିଲା ଟିଆ ଅୟ୍ଆଚେ, ସେ ମଃରି ଉଟ୍ଲା ହର୍ ଡିସ୍ତିରିଲା, ତାର୍ ସାତ୍ଗଟ୍ ସିଙ୍ଗ୍ ଆର୍ ସାତ୍ଗଟ୍ ଆକି; ସେ ସଃବୁ ଆକି ସଃବୁ ହୁର୍ତିୟେ ହଃଟାୟ୍ଲା ଇସ୍ୱରାର୍ ସାତ୍ଗଟ୍ ଆତ୍ମା । 7ସେ ମେଣ୍ଡାହିଲା ଆସି ସିଙ୍ଗାସଣେ ବଃସିରିଲା ଲକାର୍ କାତା ଆତେ ହୁଣି ସେ ପୁସ୍ତକ୍ ନିଲା । 8ସେ ପୁସ୍ତକ୍କେ ନିଲା ଦାହ୍ରେ ସେ ଚାରିଜିବ୍ ଆର୍ ଚବିସ୍ ପାରାଚିନ୍ ମେଣ୍ଡା ହିଲାର୍ ମୁୟେ ମୁଣ୍ଡିଆ ମାର୍ଲାୟ୍; ସେମଃନାର୍ ସଃବ୍କାର୍ ଆତେ ବିଣା ଆର୍ ଦଃର୍ମିମଃନାର୍ ପାର୍ତ୍ନା ହର୍ ଦୁହ୍ଣି ତଃୟ୍ ହୁର୍ନ୍ ଅୟ୍ଲା ସନାର୍ କପା ରିଲି । 9ସେମଃନ୍ ଗଟେକ୍ ନଃଉଆଁ ଗିତ୍ କୟ୍କଃରି କୟ୍ଲାୟ୍,
“ତୁୟ୍ ସେ ପୁସ୍ତକ୍ ନେଉଁକ୍
ଆର୍ ସେତିର୍ ମୁଦ୍ରା ସଃବୁ ବାଙ୍ଗୁକ୍ ଜୟ୍ଗ୍, କାୟ୍ତାକ୍ବଃଲେକ୍ ତୁୟ୍ ମଃରି ରିଲିସ୍,
ଆରେକ୍ ଅଃହ୍ଣାର୍ ବଃନି ତଃୟ୍ ସଃବୁ କୁଟୁମ୍, ବିନ୍ବିନ୍ ବାସାର୍ ଲକ୍,
ବିନ୍ବିନ୍ ବଃଉଁସ୍ ଆର୍ ଜାତି ବିତ୍ରେ ଇସ୍ୱରାର୍ ଗିନେ ଲକ୍ମଃନ୍କେ ଗେନି ଆଚ୍ସି ।
10୫:୧୦ ପ୍ରକା ୧:୬.ଆରେକ୍ ସେମଃନ୍କେ ଅଃମିମଃନାର୍ ଇସ୍ୱରାର୍ ଗିନେ ରଃଜାର୍ ବଃଉଁସ୍ ଆର୍ ଜାଜକ୍ କଃରି ଆଚ୍ସି;
ଆର୍ ସେମଃନ୍ ହୁର୍ତି ଉହ୍ରେ ରାଜ୍ କଃର୍ତି ।”
11ତାର୍ହଃଚେ ମୁୟ୍ଁ ଦଃକ୍ଲେ, ଆରେକ୍ ସିଙ୍ଗାସଣ୍, ଜିବ୍ଜଃତୁ ଆର୍ ପାରାଚିନ୍ମଃନାର୍ ଚାରିବାଟ୍ୟା ଗାଦାଗାଦା ଦୁତ୍ମଃନାର୍ ଟଣ୍ଡ୍ ସୁଣ୍ଲେ; ସେମଃନ୍ ଅଃଜାର୍ ଅଃଜାର୍ ଆର୍ ଲାକ୍ ଲାକ୍ ରିଲାୟ୍ । 12ସେମଃନ୍ ବଃଡ୍ ଟଣ୍ଡେ କଃଉତି ରିଲାୟ୍,
“ସଃକାତ୍, ଦଃନ୍, ଗ୍ୟାନ୍,
ସଃକ୍ତି, ମାନ୍ତି, ଜଃଜ୍ମାନ୍ ଆର୍ ଗୁଣ୍ଗିତ୍ ହାଉଁକ୍
ମଃରିରିଲା ମେଣ୍ଡା ହିଲା ହଃକା ଜୟ୍ଗ୍ ।”
13ଆର୍ ମୁୟ୍ଁ ସଃର୍ଗ୍, ହୁର୍ତି, ହଃତାଳ୍ ଆର୍ ସଃମ୍ନ୍ଦେ ରିଲା ସଃବୁ ଉବୁଜ୍ଲା ଜଃତୁ, ହେଁ, ସେତି ରିଲା ସଃବୁ ଇରି କଃଉତାର୍ ସୁଣ୍ଲେ,
“ଗୁଣ୍ଗିତ୍, ମାନ୍ତି, ଜଃଜ୍ମାନ୍ ଆର୍ ରାଜ୍ କଃର୍ତାର୍ ଜୁଗେଜୁଗେ
ସିଙ୍ଗାସଣେ ବଃସିରିଲା ଲକାର୍ ଆର୍ ମେଣ୍ଡାହିଲାର୍ ଅଃଉଅ ।”
14ସେତାକ୍ ଚାରି ଜିବ୍ଜଃତୁ କୟ୍ଲାୟ୍, “ଆମେନ୍ ।” ଆରେକ୍ ପାରାଚିନ୍ମଃନ୍ ମୁଣ୍ଡିଆ ମାରି ଜୁଆର୍ କଃଲାୟ୍ ।
6ମୁଦ୍ରାମଃନ୍
1ତାର୍ହଃଚେ ମୁୟ୍ଁ ମେଣ୍ଡାହିଲାକେ ସାତ୍ଗଟ୍ ମୁଦ୍ରା ବିତ୍ରେହୁଣି ହଃର୍ତୁ ମୁଦ୍ରାକ୍ ବାଙ୍ଗ୍ତାର୍ ଦଃକ୍ଲେ, ଆର୍ ଚାରି ଜିବ୍ଜଃତୁ ବିତ୍ରେ ହୁଣି ଏକ୍ଲାକେ ବିଜ୍ଲିର୍ ସଃବଦ୍ ହର୍ ଇରି କଃଉତାର୍ ସୁଣ୍ଲେ, “ଆଉ ।” 2ସେତାକ୍ ମୁୟ୍ଁ ଦଃକ୍ଲେ, ଆର୍ ଦଃକା, ଗଟେକ୍ ଦବ୍ ଗଳା, ଆରେକ୍ ତାକ୍ ଚାଲାଉତା ଲକାର୍ ଆତେ ଗଟେକ୍ ଦଃଣୁ, ତାକ୍ ଗଟେକ୍ ମୁକୁଟ୍ ଦିଆ ଅୟ୍ଲି, ଆର୍ ସେ ଜିଣ୍ତା ଲକ୍ ଅୟ୍ ଜିଣୁକ୍ ବାରାୟ୍ ଗଃଲା ।
3ମେଣ୍ଡାହିଲା ଜଃଡେବଃଳ୍ ଦୁୟ୍ ଲଃମ୍ବର୍ ମୁଦ୍ରା ବାଙ୍ଗ୍ଲା, ସଃଡେବଃଳ୍ ମୁୟ୍ଁ ଦୁୟ୍ ଲମ୍ବର୍ ଜିବ୍ଜଃତୁକ୍ ଇରି କଃଉତାର୍ ସୁଣ୍ଲେ, “ଆଉ ।” 4ସେତାକ୍ ଆରେକ୍ ଗଟେକ୍ ଗଳା ବାରାୟ୍ଲି, ସେରି ରଃତା ରଃଙ୍ଗାର୍; ଲକ୍ମଃନ୍ ଜଃନ୍କଃରି ଏକ୍ ଆରେକ୍କେ ଅଃତ୍ୟା କଃର୍ତି, ଇତାର୍ ଗିନେ ହୁର୍ତିବିର୍ ସୁସ୍ତା ଦୁର୍ କଃରୁକେ ତାକ୍ ଚାଲାଉତା ଲକ୍କେ ଅଃଦିକାର୍ ଦିଆଗଃଲି, ଆରେକ୍ ତାକ୍ ଗଟେକ୍ ବଃଡ୍ କଃଣ୍ଡା ଦିଆ ଅୟ୍ଲି ।
5ମେଣ୍ଡାହିଲା ଜଃଡେବଃଳ୍ ତିନି ଲଃମ୍ବର୍ ମୁଦ୍ରା ବାଙ୍ଗ୍ଲା, ସଃଡେବଃଳ୍ ମୁଁୟ୍ ତିନି ଲଃମର୍ ଜିବ୍ ଇରି କଃଉତାର୍ ସୁଣ୍ଲେ, “ଆଉ ।” ସେତାକ୍ ମୁଁୟ୍ ଦଃକ୍ଲେ, ଆର୍ ଦଃକା, ଗଟେକ୍ କଃଳିଆ ରଃଙ୍ଗାର୍ ଗଳା, ଆରେକ୍ ତାକ୍ ଚାଲାଉତା ଲକାର୍ ଆତେ ଗଟେକ୍ ନାହ୍ତା ଡାଙ୍ଗ୍ । 6ଆର୍ ମୁୟ୍ଁ ଚାରି ଜିବ୍ଜଃତୁ ତୟ୍ହୁଣି ବାରାୟ୍ଲା ହର୍ ଇ ଟଣ୍ଡ୍ ସୁଣ୍ଲେ, “ଦିନେକାର୍ ବୁତି ଡାବୁ ତଃୟ୍ ଗଟେକ୍ କେଜି ଗଅଁ ଆର୍ ଦିନେକାର୍ ବୁତି ଡାବୁ ତଃୟ୍ ତିନି କେଜି ଜବ ଅୟ୍ଦ୍ । ମଃତର୍ ତୁମି ଚିକଣ୍ ଆର୍ ଅଙ୍ଗୁର୍ ରଃସ୍ ନଃସ୍ଟ୍ କଃରାନାୟ୍ ।”
7ମେଣ୍ଡାହିଲା ଜଃଡେବଃଳ୍ ଚାରି ଲଃମ୍ବର୍ ମୁଦ୍ରା ବାଙ୍ଗ୍ଲା, ସଃଡେବଃଳ୍ ମୁୟ୍ଁ ଚାରି ଲଃମ୍ବର୍ ଜିବ୍ଜଃତୁ ଇରି କଃଉତାର୍ ସୁଣ୍ଲେ, “ଆଉ ।” 8ସେତାକ୍ ମୁୟ୍ଁ ଦଃକ୍ଲେ, ଆର୍ ଦଃକା, ଗଟେକ୍ ବେଜା ରଃଙ୍ଗାର୍ ଗଳା, ତାକ୍ ଚାଲାଉତା ଲକାର୍ ନାଉଁ ମଃର୍ନ୍, ଆରେକ୍ ହଃତାଳ୍୬:୮ ମଃଲା ଲକାର୍ ହୁର୍ତିବିଏ । ତାର୍ ହଃଚେ ହଃଚେ ଜାତି ରିଲି; କଃଣ୍ଡା, କଃତାର୍, ମଃର୍ଡି ଆର୍ ହୁର୍ତି ବଃନାର୍ ଜଃତୁମଃନାର୍ ତଃୟ୍ ନାସ୍ କଃରୁକେ ହୁର୍ତିବିର୍ ଚାରିବାଗ୍ ଉହ୍ରେ ସେମଃନ୍କେ ଅଃଦିକାର୍ ଦିଆ ଅୟ୍ଲି ।
9ମେଣ୍ଡାହିଲା ଜଃଡେବଃଳ୍ ହାଁଚ୍ ଲଃମ୍ବର୍ ମୁଦ୍ରା ବାଙ୍ଗ୍ଲା, ସଃଡେବଃଳ୍ ଜୁୟ୍ମଃନ୍ ଇସ୍ୱରାର୍ କଃତାର୍ ଗିନେ ଆର୍ ସେମଃନ୍ ଦିଲା ସାକିର୍ ଗିନେ ମଃରି ରିଲାୟ୍, ସେମଃନାର୍ ଆତ୍ମା ମୁଁୟ୍ ବେଦି ତଃଳେ ଦଃକ୍ଲେ । 10ସେମଃନ୍ ଉଲ୍ଗାଟେ କଃଉତି ରିଲାୟ୍, “ଏ ପବିତ୍ର ଆର୍ ସଃତ୍ ମାପ୍ରୁ, ଆର୍ କଃତେକ୍ କାଳ୍ ତୁୟ୍ ନ୍ୟାୟ୍ ବିଚାର୍ ନଃକେରି ହୁର୍ତିବିର୍ ଲକ୍ମଃନାର୍ ତଃୟ୍ହୁଣି ଅଃମିମଃନ୍କ୍ ଅଃତ୍ୟା କଃଲା ବାଦ୍ଲା ନଃନେସି ?” 11ସେତାକ୍ ସେମଃନ୍ ହଃତି ଲକ୍କେ ଦବ୍ ବଃସ୍ତର୍ ଦିଆ ଅୟ୍ଲି, ଆରେକ୍ ସେମଃନାର୍ ଜୁୟ୍ ସଃଙ୍ଗାର୍ ଦଃଙ୍ଗ୍ଳା ଆର୍ ବାୟ୍ମଃନ୍ ସେମଃନାର୍ ହର୍ ହେଁ ମାରା ଅଃଉତି, ସେମଃନାର୍ ଲଃମ୍ବର୍ ହୁର୍ନ୍ ନଃଉତା ହଃତେକ୍ ଆର୍ କଃତେକ୍ କାଳ୍ ବିସାଉଁକ୍ ସେମଃନ୍କେ କଃଉଆ ଅୟ୍ଲି ।
12୬:୧୨ ପ୍ରକା ୧୧:୧୩; ୧୬:୧୮; ମାତି ୨୪:୨୯; ମାର୍କ ୧୩:୨୪,୨୫; ଲୁକ ୨୧:୨୫.ମେଣ୍ଡାହିଲା ଚଅ ଲଃମ୍ବର୍ ମୁଦ୍ରା ବାଙ୍ଗାଉତା ବଃଳ୍ ମୁୟ୍ଁ ଦଃକ୍ଲେ, ଦଃର୍ତି ଲଃଦ୍ବଃଦ୍ଲି, ବେଳ୍ ରଃମ୍ତଃୟ୍ ତିଆର୍ ଅୟ୍ଲା ଚାଦର୍ ହର୍ କଃଳିଆ ଅୟ୍ଲି ଆର୍ ଜଃନ୍ ହୁରାହୁରି ବଃନି ରଃଙ୍ଗ୍ ଅୟ୍ଲି । 13ଜଃବର୍ ବାଉର୍ ବଃଳେ ଡୁମ୍ବୁର୍ ଗଃଚାର୍ ନାହାକ୍ତା ହଃଳ୍ସଃବୁ ଜଃନ୍କଃରି ଅଦ୍ରେଦ୍, ସେବାନ୍ୟା ଅଃଗାସାର୍ ତାରାସଃବୁ ହୁର୍ତିୟେ ଅଦୁର୍ଲାୟ୍ । 14୬:୧୪ ପ୍ରକା ୧୬:୨୦.ଅଃଗାସ୍ ମଃଣ୍ଡଳା ଚାମ୍ଳାର୍ ପୁସ୍ତକ୍ ଗୁଳ୍ୟାୟ୍ ଅୟ୍ଲା ହର୍ ଗୁଳ୍ୟାୟ୍ ଅୟ୍ ଲୁକ୍ଲି, ଆରେକ୍ ହଃର୍ବାତ୍ ଆର୍ ଚାରିବେଳ୍ତ୍ ହାଣି ଆର୍ ମଃଜାୟ୍ ମାଟି ରିଲା ଜଃଗାମଃନ୍ ଏଣେ ତେଣେ ଅୟ୍ଲି । 15ଆର୍ ହୁର୍ତିବିର୍ ରଃଜାମଃନ୍, ମଃତ୍ରିମଃନ୍, ସଃଇନ୍ମଃନାର୍ ଉହ୍ରେ ବଃଡ୍ ସଃଇନ୍ ଆର୍ ମାଜନ୍ ଲକ୍ମଃନ୍, ସଃକାତ୍ ଲକ୍ମଃନ୍ ଆର୍ ଗତିଦଃଙ୍ଗ୍ଳା ଆର୍ ଗତି ନଃକେଟ୍ତା ଲକ୍ମଃନ୍ ସଃବୁ ଟେଳାଅଃଡୁ ଆର୍ ହଃର୍ବାତାର୍ ଟେଳା ହାରେମଃନ୍ ଅଃହ୍ଣା ଅଃହ୍ଣାକ୍ ଲୁକାୟ୍ଲାୟ୍ । 16୬:୧୬ ଲୁକ ୨୩:୩୦.ଆରେକ୍, ସେମଃନ୍ ହଃର୍ବାତ୍ ଆର୍ ଟେଳାମଃନ୍କେ କୟ୍ଲାୟ୍, “ଅଃମିମଃନାର୍ ଉହ୍ରେ ଅଦ୍ରି ସିଙ୍ଗାସଣେ ବଃସିରିଲା ଲକ୍ ତଃୟ୍ହୁଣି ଆର୍ ମେଣ୍ଡାହିଲାର୍ ରିସା ତଃୟ୍ହୁଣି ଅଃମିମଃନ୍କ୍ ଲୁକାୟ୍ ସଃଙ୍ଗାଉ । 17କାୟ୍ତାକ୍ବଃଲେକ୍ ସେମଃନାର୍ ରିସାର୍ ବଃଡ୍ ବିନ୍ କେଟି ଆଚେ, ଆର୍ କେ ଟିଆ ଅଃଉଁ ହାରେ ?”
7୧୪୪,୦୦୦ ଇସ୍ରାଏଲାର୍ ଲକ୍
1ତାର୍ହଃଚେ ମୁୟ୍ଁ ଦଃକ୍ଲେ, ହୁର୍ତି କି ସଃମ୍ନ୍ଦ୍ ବୁଏଁ କି କୁୟ୍ ଗଃଚ୍ ଉହ୍ରେ ଜଃନ୍କଃରି ବାଉ ନଃଦୁକେ, ଇତାର୍ ଗିନେ ହୁର୍ତିବିର୍ ଚାରି କଣେ ଚାରି ଗଟ୍ ଦୁତ୍ ଟିଆ ଅୟ୍ ହୁର୍ତିବିର୍ ଚାରି କନେ ବାଉକ୍ ତେବାୟ୍ ଦଃରି ଆଚ୍ତି । 2ଆରେକ୍ ମୁଁୟ୍ ଗଟେକ୍ ଦୁତ୍କେ ହୁର୍ବ୍ ଦିଗେ ହୁଣି ଉଟି ଆସ୍ତାର୍ ଦଃକ୍ଲେ; ତାର୍ ଆତେ ଜିବନ୍ ଇସ୍ୱରାର୍ ମୁଦ୍ରା ରିଲି । ହୁର୍ତି ଆର୍ ସଃମ୍ନ୍ଦ୍ ନଃସ୍ଟ୍ କଃରୁକେ ଅଃଦିକାର୍ ଦିଆ ଅୟ୍ଲା ସେ ଚାରି ଗଟ୍ ଦୁତ୍କେ ସେ କୁଦି କୟ୍ଲା, 3“ଅଃମିମଃନ୍ ତୁମିମଃନାର୍ ଇସ୍ୱରାର୍ ସେବାକାରିମଃନାର୍ କଃହାଳେ ମୁଦ୍ରା ନଃମାର୍ତା ହଃତେକ୍ ତୁମିମଃନ୍ ହୁର୍ତି କି ସଃମ୍ନ୍ଦ୍ କି ଗଃଚ୍ମଃନ୍କ୍ ନଃସ୍ଟ୍ କଃରାନାୟ୍ ।” 4ତାର୍ହଃଚେ ମୁଦ୍ରା ମାରା ଅୟ୍ଲା ଲକ୍ମଃନାର୍ ଲଃମ୍ବର୍ ମୁୟ୍ଁ ସୁଣ୍ଲେ, ଇସ୍ରାଏଲାର୍ ହୟ୍ସିମଃନାର୍ ସଃବୁ ବଃଉଁସ୍ ବିତ୍ରେ ହୁଣି ୧୪୪,୦୦୦ ଲକ୍କେ ମୁଦ୍ରା ମାରା ଅୟ୍ଲି । 5ଜିଉଦା ବଃଉଁସେ ହୁଣି ବାର ଆଜାର୍, ରୁବେନ୍ ବଃଉଁସେ ହୁଣି ବାର ଆଜାର୍, ଗାଦ ବଃଉଁସେ ହୁଣି ବାର ଆଜାର୍, ମୁଦ୍ରାମାର୍ଲାର୍, 6ଆସେର୍ ବଃଉଁସେ ହୁଣି ବାର ଆଜାର୍, ନପ୍ତାଲି ବଃଉଁସେ ହୁଣି ବାର ଆଜାର୍, ମନସି ବଃଉଁସେ ହୁଣି ବାର ଆଜାର୍, 7ସିମିୟନ୍ ବଃଉଁସେ ହୁଣି ବାର ଆଜାର୍, ଲେବି ବଃଉଁସେ ହୁଣି ବାର ଆଜାର୍, ଇସାକାର୍ ବଃଉଁସେ ହୁଣି ବାର ଆଜାର୍, 8ସୁବ୍ଲନ୍ ବଃଉଁସେ ହୁଣି ବାର ଆଜାର୍, ଜସେପ୍ ବଃଉଁସେ ହୁଣି ବାର ଆଜାର୍, ବିନ୍ୟାମିନ୍ ବଃଉଁସେ ହୁଣି ବାର ଆଜାର୍ ମୁଦ୍ରା ମାର୍ଲାର୍ ।
ଅଲେକାର୍ ଲକ୍ ଦଃଳ୍
9ଇତାର୍ ହଃଚେ ମୁଁୟ୍ ଦଃକ୍ଲେ, ଆର୍ ଦଃକା, ସଃବୁ ଜାତି, ସଃବୁ କୁଟୁମ୍, ସଃବୁ ଦେସ୍, ଆର୍ ସଃବୁ ବାସାର୍ ଅଲେକାର୍ ଗଟେକ୍ ଲକ୍ ଦଃଳ୍ ଦବ୍ ବଃସ୍ତର୍ ହିନ୍ଦି ଆର୍ କଃଜ୍ରି ଡାଳ୍ ଆତେ ଦଃରି ସିଙ୍ଗାସଣ୍ ଆର୍ ମେଣ୍ଡାହିଲାର୍ ମୁୟେ ଟିଆ ଅୟ୍ ଆଚ୍ତି । 10ସେମଃନ୍ ଆଉଲି ଅୟ୍ କଃଉଁଲାୟ୍, “ମୁକ୍ଳାଉତାର୍ ସିଙ୍ଗାସଣେ ବଃସ୍ଲା ଇସ୍ୱରାର୍ ଆର୍ ମେଣ୍ଡାହିଲାର୍ କାମ୍ ।” 11ଆରେକ୍ ସଃବୁ ଦୁତ୍ ସିଙ୍ଗାସଣ୍, ପାରାଚିନ୍ମଃନ୍ ଆର୍ ଚାରି ଜିବ୍ ଚାରିବାଟ୍ ଟିଆ ଅୟ୍ଆଚ୍ତି, ଆର୍ ସିଙ୍ଗାସଣାର୍ ମୁୟେ ଲଃହ୍ଟିକଃରି ଇସ୍ୱର୍କେ ଜୁଆର୍ କଃରି 12କଃଉଁଲାୟ୍, “ଆମେନ୍; ଗୁଣ୍ଗିତ୍, ଜଃଜ୍ମାନ୍ ଗ୍ୟାନ୍, ଜୁଆର୍, ମାନ୍ତି, ବଃଳ୍ ଆର୍ ସଃକାତ୍ ଜୁଗେଜୁଗେ ଅଃମାର୍ ଇସ୍ୱରାର୍; ଆମେନ୍ ।”
13ଆରେକ୍ ପାରାଚିନ୍ ମଃନାର୍ ବିତ୍ରେ ହୁଣି ଗଟେକ୍ ଲକ୍ ମକ୍ ହଃଚାର୍ଲା, “ଦବ୍ ବଃସ୍ତର୍ ହିନ୍ଦ୍ଲା ଏ ଲକ୍ମଃନ୍ କେ ଆର୍ ସେମଃନ୍ କୁୟ୍ତି ହୁଣି ଆସି ଆଚ୍ତି ?”
14୭:୧୪ ମାତି ୨୪:୨୧; ମାର୍କ ୧୩:୧୯.ମୁୟ୍ଁ ତାକ୍ କୟ୍ଲେ, “ଏ ମର୍ ମାପ୍ରୁ, ତୁୟ୍ ହ୍କା ସେରି ଜାଣି ଆଚ୍ସି ।” ସେତାକ୍ ସେ ମକ୍ କୟ୍ଲା, “ଇମଃନ୍ ବଃଡ୍ ଦୁକ୍କଃସ୍ଟେ ହୁଣି ବାରାୟ୍ ଆସି ଆଚ୍ତି ଆର୍ ମେଣ୍ଡାହିଲାର୍ ବଃନି ତଃୟ୍ ଅଃହ୍ଣା ଅଃହ୍ଣାର୍ ବଃସ୍ତର୍ ଦଃୟ୍ ଦବ୍ କଃରି ଆଚ୍ତି । 15ସେତାର୍ଗିନେ ସେମଃନ୍ ଇସ୍ୱରାର୍ ସିଙ୍ଗାସଣ୍ ମୁଏଁ ରଃୟ୍ ଦିନ୍ରାତି ତାର୍ ହୁଜା କଃର୍ତି, ଆରେକ୍ ସିଙ୍ଗାସଣେ ବଃସିରିଲା ଲକ୍ ସେମଃନାର୍ ବିସାଉଁଣି ଗଃର୍ ଅୟ୍ଦ୍ । 16ସେମଃନ୍କେ ଆର୍ କଃବେ ହେଁ ବୁକ୍ କି ସସ୍ ନଃଲାଗେ, ଆରେକ୍ ବେଳ୍ କି କୁୟ୍ ତଃହାତ୍ରି ସେମଃନ୍କେ ହଡାଉଁ ନାହାରେ, 17କାୟ୍ତାକ୍ବଃଲେକ୍ ସିଙ୍ଗାସଣାର୍ ବଃସିରିଲା ମେଣ୍ଡାହିଲା ସେମଃନାର୍ ଗଃଉଳିଆ ଅୟ୍ଦ୍ ଆର୍ ଜିବନ୍ ଦେତା ହାଜ୍ରା ହାଣିର୍ ଚଃମେ ସେମଃନ୍କେ କାଡାୟ୍ ନଃୟ୍ଦ୍, ଆରେକ୍ ଇସ୍ୱର୍ ସେମଃନାର୍ ଆକିର୍ ସଃବୁ ଆସୁ ହୁଚି ଦଃୟ୍ଦ୍ ।”
8ସାତ୍ ଲଃମ୍ବର୍ ମୁଦ୍ରା
1ମେଣ୍ଡାହିଲା ଜଃଡେବଃଳ୍ ସାତ୍ ଲଃମ୍ବର୍ ମୁଦ୍ରା ବାଙ୍ଗ୍ଲା, ସଃଡେବଃଳ୍ ସଃର୍ଗେ ହାକାହାକି ଅଦା ଗଣ୍ଟା ହଃତେକ୍ ଚିମ୍ରା ଚାହି ଗଃଲି । 2ତାର୍ହଃଚେ ମୁୟ୍ଁ ଇସ୍ୱରାର୍ ମୁୟେ ଟିଆ ଅୟ୍ଲା ସାତ୍ ଗଟ୍ ଦୁତ୍କେ ଦଃକ୍ଲେ, ସେମଃନ୍କେ ସାତ୍ଗଟ୍ ତୁରି ଦିଆ ଅୟ୍ଲି ।
3ସେତାକ୍ ଆରେକ୍ ଗଟେକ୍ ଦୁତ୍ ଆସି ବେଦି ଲଃଗେ ଟିଆ ଅୟ୍ଲି, ତାର୍ ଆତେ ସନାର୍ ବଃତିରୁକା ରିଲି, ଆରେକ୍ ସିଙ୍ଗାସଣ୍ ମୁଁ ଲଃଗାର୍ ସନାର୍ ବେଦି ଉହ୍ରେ ସଃବୁ ଦଃର୍ମି ଲକ୍ମଃନାର୍ ପାର୍ତ୍ନା ସଃଙ୍ଗ୍ ମିସୁକ୍ ତାକ୍ ଗାଦେକ୍ ଦୁହ୍ଣି ଦିଆ ଅୟ୍ଲି । 4ସେତାକ୍ ଦୁତାର୍ ଆତେହୁଣି ଦୁହ୍ଣିର୍ ଦୁଆଁ ଦଃର୍ମି ଲକ୍ମଃନାର୍ ପାର୍ତ୍ନା ସଃଙ୍ଗ୍ ଇସ୍ୱର୍ ମୁୟେ ଉଟ୍ଲି । 5୮:୫ ପ୍ରକା ୧୧:୧୯; ୧୬:୧୮.ହଃଚେ ସେ ଦୁତ୍ ବଃତିରୁକା ଦଃରି ବେଦିର୍ ଜୟେ ସେରି ହୁର୍ନ୍ କଃରି ହୁର୍ତି ଉହ୍ରେ ହଃକାୟ୍ଲା । ସେତାକ୍ ବିଜ୍ଲି ସଃବ୍ଦ୍, ବିନ୍ବିନ୍ ସଃବ୍ଦ୍, ଉଜାଳ୍ ଆର୍ ମାଟି ଲଦ୍ବଃଦ୍ଲି ।
ତୁରି ବାଜ୍ଲି
6ସଃଡେବଃଳ୍ ସାତ୍ଗଟ୍ ତୁରି ଦଃର୍ଲା ସାତ୍ଗଟ୍ ଦୁତ୍ ତୁରି ସଃବଦ୍ କଃରୁକେ ଜଃଗ୍ରାତ୍ ଅୟ୍ଲାୟ୍ ।
7ହଃର୍ତୁ ଦୁତ୍ ତୁରି ସଃବ୍ଦ୍ କଃଲା ଦାହ୍ରେ ବଃନି ମିସ୍ଲା ଟେଳା ଆର୍ ଜୟ୍ ଆସି ହୁର୍ତିୟେ ହଃକାୟ୍ ଅୟ୍ଲି; ସେତାକ୍ ହୁର୍ତି ଆର୍ ଗଃଚ୍ମଃନାର୍ ତିନିବାଗ୍ ହୁଣି ଗଟେକ୍ ବାଗ୍ ଆରେକ୍ ସଃବୁ କଃଚା ହଃତ୍ରିଆ ଡିସ୍ତା ରଃନ୍ ସଃବୁ ହଡିଗଃଲି ।
8ଦୁୟ୍ ଲଃମ୍ବର୍ ଦୁତ୍ ତୁରି ସଃବଦ୍ କଃଲାଦାହ୍ରେ ଜଃନ୍କଃରି ଜୟ୍ଲାଗ୍ତା ଗଟେକ୍ ବଃଡ୍ ହଃର୍ବାତ୍ ସଃମ୍ନ୍ଦେ ହଃକାୟ୍ ଅୟ୍ଲି । ସେତାକ୍ ସଃମ୍ନ୍ଦାର୍ ତିନିବାଗ୍ ହୁଣି ଗଟେ ବାଗ୍ ବଃନି ଅୟ୍ଗଃଲି, 9ଆରେକ୍ ସଃମ୍ନ୍ଦେ ରିଲା ଜଃତୁମଃନାର୍ ତିନିବାଗ୍ ମଃଲାୟ୍ ଆର୍ ଡଙ୍ଗାର୍ ତିନିବାଗ୍ ନଃସ୍ଟ୍ ଅୟ୍ଲି ।
10ତିନି ଲଃମରାର୍ ଦୁତ୍ ତୁରି ସଃବ୍ଦ୍ କଃଲାଦାହ୍ରେ ଜୟ୍ଦାଉ ହର୍ ଲାଗ୍ତା ଗଟେକ୍ ବଃଡ୍ ତାରା ଅଃଗାସେ ହୁଣି ଉଟ୍କି ଅୟ୍ ଗାଡ୍ ମଃନାର୍ ତିନିବାଗେ ହୁଣି ଗଟେ ବାଗ୍ ହାଜ୍ରାହାଣି ଉହ୍ରେ ଅଦୁର୍ଲି । 11ସେ ତାରାର୍ ନାଉଁ “ହିତା ।” ସେତାକ୍ ହାଣିର୍ ୩ ବାଗ୍ ହୁଣି ଗଟେ ବାଗ୍ ହିତା ଅୟ୍ଲି, ଆର୍ ଗାଦେକ୍ ଲକ୍ ସେ ହାଣିର୍ ଗିନେ ମଃଲାୟ୍, ବଃଲେକ୍ ସେରି ହିତା କଃରା ଜାୟ୍ରିଲି ।
12ଚାରି ଲଃମ୍ବର୍ ଦୁତ୍ ତୁରି ସଃବ୍ଦ୍ କଃଲା ଦାହ୍ରେ, ବେଳ୍, ଜଃନ୍ ଆର୍ ତାରାମଃନାର୍ ତିନିବାଗ୍ ହୁଣି ଗଟେବାଗ୍ ଦଃକା ହାୟ୍ଲାକ୍ ସେସଃବୁର୍ ତିନିବାଗାର୍ ଗଟେ ବାଗ୍ ଅଃନ୍ଦାର୍ ଅୟ୍ଲି, ଦିନାର୍ ତିନିବାଗାର୍ ଗଟେ ବାଗ୍ ଉଜାଳ୍ ନୟ୍ଲି ଆର୍ ରାତି ହେଁ ସେରଃକମ୍ ଅୟ୍ଲି ।
13ହଃଚେ ମୁଁୟ୍ ଦଃକ୍ଲେ, ଆର୍ ଅଃଗାସାର୍ ମଃଜି ବାଗେ ଉଡ୍ତିରିଲା ଗଟେକ୍ ରାବଣ୍ ଚେଳେ ଉଲ୍ଗାଟ୍ ଅୟ୍ ଇରି କଃଉତି ରିଲାର୍ ସୁଣ୍ଲେ, ଚି ! ଚି ! ଚି ! ହୁର୍ତିବିର୍ ଦୁକ୍ ହାଉତା ଲକ୍ମଃନ୍, କାୟ୍ତାକ୍ବଃଲେକ୍ ଆରେକ୍ ତିନି ଗଟ୍ ଦୁତ୍ ତୁରି ସଃବ୍ଦ୍ କଃରୁକେ ଜଃଉଁଲାୟ୍ ।
91ତାର୍ହଃଚେ ହାଁଚ୍ ଲଃମ୍ବର୍ ଦୁତ୍ ମରି ସଃବ୍ଦ୍ କଃଲାଦାହ୍ରେ, ମୁଁୟ୍ ଅଃଗାସେ ହୁଣି ଗଟେକ୍ ତାରା ହୁର୍ତିବି ଉହ୍ରେ ଅଦୁର୍ତାର୍ ଦଃକ୍ଲେ; ତାକ୍ ହଃତାଳାର୍୯:୧ ହୁର୍ତି ତଃଳେ ଗଟ୍ କାଲ୍ ଆଚେ ବିଚାର୍ ଦିନ୍ ଅଃଉତା ହଃତେକ୍ ବନ୍ଦି କଃରା ଜାୟ୍ ଆଚେ । କୁଚିକାଡା ଦିଆ ଜାୟ୍ରିଲି । 2ସେ ହଃତାଳ୍ ଉଗାଳ୍ଲା ଦାହ୍ରେ ସେତିହୁଣି ବଃଡ୍ ବଃଟିର୍ ଜୟ୍ଦୁଆଁ ହର୍ ଦୁଆଁ ଉଟ୍ଲି, ଆର୍ ସେ ହଃତାଳାର୍ ଦୁଆଁର୍ ଗିନେ ବେଳ୍ ଆରେକ୍ ଅଃଗାସ୍ ଅଃନ୍ଦାର୍ ଅୟ୍ଲି । 3ଦୁଆଁ ବିତ୍ରେ ହୁଣି ଜିଟ୍କା ବାରାୟ୍ ହୁର୍ତି ତଃୟ୍ ଆୟ୍ଲାୟ୍, ସେମଃନ୍କେ ହୁର୍ତିବିର୍ ମିଚ କାକ୍ଳାର୍ ସଃକ୍ତି ହର୍ ସଃକ୍ତି ଦିଆଗଃଲି । 4ହୁର୍ତିବିର୍ ରଃନ୍ କି କଃଚା ହଃତ୍ରିଆ ସାଗ୍ ଗଃଚ୍ କି କୁୟ୍ ଗଃଚାର୍ ନଃସ୍ଟ୍ ନଃକେରି, ଜୁୟ୍ ଲକ୍ମଃନାର୍ କାହାଳେ ଇସ୍ୱରାର୍ ଚିନ୍ ନାୟ୍, ଅଃବ୍କା ସେମଃନାର୍ ନଃସ୍ଟ୍ କଃରୁକେ ସେମଃନ୍କେ କଃଉଆ ଅୟ୍ଲି । 5ସେମଃନ୍କେ ମଃର୍ନେ ନଃମାରି କଃରି ହାଁଚ୍ ମାସ୍ ହଃତେକ୍ ସେମଃନ୍କେ ଦୁକ୍ କଃସ୍ଟ୍ ଗଃଟାଉଁକ୍ ସେମଃନ୍କେ ଅଃଦିକାର୍ ଦିଆ ଅୟ୍ଲି । ମିଚକାକ୍ଳା ନଃର୍ମଃନ୍ ଚାବ୍ଲେକ୍ ଜଃନ୍କାର୍ କଃସ୍ଟ୍ ଅୟ୍ଦ୍, ଇ କଃସ୍ଟ୍ ସେରଃକମ୍ । 6ସଃଡେବଃଳ୍ ନଃର୍ମଃନ୍ ମଃର୍ନ୍କେ ଲଳ୍ତି, ମଃତର୍ କଃନ୍କଃରି ହେଁ ତାକ୍ ହାଉଁ ନାହାର୍ତି; ସେମଃନ୍ ମଃରୁକ୍ ମଃନ୍ କଃର୍ତି, ମଃତର୍ ମଃର୍ନ୍ ସେମଃନାର୍ ତଃୟ୍ ହଃଳାୟ୍ଦ୍ ।
7ଜିଟ୍କା ମଃନାର୍ ରୁହ୍ ଜୁଜାର୍ ଗିନେ ତିଆର୍ ଅୟ୍ଲା ଗଳାମଃନାର୍ ହର୍, ସେମଃନାର୍ ମୁଣ୍ଡାର୍ ଅଡ୍ଣି ସନାର୍ ମୁକୁଟ୍ ହର୍, ଆରେକ୍ ସେମଃନାର୍ ମୁଉଁ ନଃର୍ମଃନାର୍ ମୁଉଁ ହର୍; 8ମାୟ୍ଜିମଃନାର୍ ବାଳ୍ ହର୍ ସେମଃନାର୍ ବାଳ୍ ସିମାବାଗାର୍ ଦାତ୍ ହର୍ ସେମଃନାର୍ ଦାତ୍; 9ଲଃଉଆ ଉର୍ହାଟା ହର୍ ସେମଃନାର୍ ଉର୍ହାଟା, ଆରେକ୍ ରଃତ୍ ଆର୍ ଜୁଜ୍ ହଃଦାୟ୍ ଦଃବୁଳ୍ତା ଗାଦେକ୍ ଗଳାମଃନାର୍ ସଃବ୍ଦ୍ ହର୍ ସେମଃନାର୍ ହଃକିର୍ ସଃବ୍ଦ୍ । 10ମିଚ୍ କାକ୍ଳାର୍ ଲେଞ୍ଜ୍ ଆର୍ କାଳ୍ ହର୍ ସେମଃନାର୍ ଲେଞ୍ଜ୍ ଆର୍ କାଳ୍; ହାଁଚ୍ ମାସ୍ ହଃତେକ୍ ନଃର୍ମଃନାର୍ ନଃସ୍ଟ୍ କଃରୁକେ ସେମଃନାର୍ ଲେଞ୍ଜେ ସଃକ୍ତି ରିଲି । 11ହଃତାଳାର୍ ଦୁତ୍ ସେମଃନାର୍ ରଃଜା, ତାର୍ ନାଉଁ ଏବ୍ରି ବାସାୟ୍ ଅବଦନ୍, ଆର୍ ଗ୍ରିକ୍ ବାସାୟ୍ ଆପଲିଅନ୍, ଜାର୍ ନାଉଆର୍ ଅଃର୍ତ୍ ନାସ୍କାରି ।
12ହଃର୍ତୁ ବଃଡେ ବିପ୍ତି ଗଃଲି, ଦଃକା, ଇତାର୍ହଃଚେ ଆରେକ୍ ଜଳେକ୍ ବିପ୍ତି ଆସୁଲି ।
13ଚଅ ଲଃମରାର୍ ଦୁତ୍ ତୁରି ସଃବଦ୍ କଃଲା ଦାହ୍ରେ ମୁୟ୍ଁ ଇସ୍ୱରାର୍ ମୁୟେ ରିଲା ସନାର୍ ବେଦିର୍ ସିଙ୍ଗ୍ମଃନାର୍ ତଃୟ୍ ହୁଣି ଗଟେକ୍ ସଃବ୍ଦ୍ ସୁଣ୍ଲେ, 14ସେରି ତୁରି ଦଃରିରିଲା ଚଅ ଲଃମ୍ବର୍ ଦୁତ୍ କୟ୍ଲା, “ପରାତ୍ ବଃଡ୍ ଗାଡେ ବନ୍ଦି ଅୟ୍ରିଲା ଚାରିଗଟ୍ ଦୁତ୍କେ ଚାଡି ଦିଆସ୍ ।” 15ସେତାକ୍ ନଃର୍ମଃନାର୍ ୩ ବାଗାର୍ ବାଗେକ୍ ଲକ୍କେ ମାରୁକ୍ ଇ ଜୁୟ୍ ଚାରିଗଟ୍ ଦୁତ୍ ସେ ବେଳା, ବିନ୍, ମାସ୍ ଆର୍ ବଃର୍ସ୍ ଗିନେ ତିଆର୍ ଅୟ୍ରିଲାୟ୍, ସେମଃନ୍ ଚାଡା ଅୟ୍ଲାୟ୍ । 16ଗଳାୟ୍ ଚଃଗ୍ଲା ସଃୟ୍ନ୍ମଃନ୍ ୨୦୦ ଲାକ୍ ରିଲାୟ୍; ମୁଁୟ୍ ସେମଃନାର୍ ଲଃମ୍ବର୍ ସୁଣ୍ଲେ । 17ଆର୍ ମୁଁୟ୍ ଚଃହ୍ନେ ଗଃଳା ଆର୍ ସେମଃନ୍କେ ଚାଲାଉତା ଲକ୍କେ ଇବାନ୍ୟା ଦଃକ୍ଲେ, ସେମଃନାର୍ ବୁକ୍ହାଟା ଜୟ୍ ରଃଙ୍ଗ୍, ନିଳିଆ ରଃଙ୍ଗ୍ ଆର୍ ଅଃଳ୍ସିଆ ରଃଙ୍ଗ୍; ଗଳାମଃନାର୍ ମୁଣ୍ଡ୍ ସିମାବାଗ୍ମଃନାର୍ ମୁଣ୍ଡ୍ ହର୍, ଆର୍ ସେମଃନାର୍ ଟଣ୍ଡେ ହୁଣି ଜୟ୍, ଦୁଆଁ ଆର୍ ଗଃନ୍ଦ୍ ବାରାଉତି ରିଲି । 18ସେମଃନାର୍ ଟଣ୍ଡେ ହୁଣି ବାରାଉତା ଜୟ୍, ଦୁଆଁ ଆର୍ ଗଃନ୍ଦକ୍ ହର୍ ଇ ତିନିଗଟ୍ ବିବ୍ତି ତଃୟ୍ ନଃର୍ମଃନାର୍ ୩ ବାଗାର୍ ବାଗେକ୍ ମାରା ଗଃଳାୟ୍ । 19କାୟ୍ତାକ୍ବଃଲେକ୍ ଗଳାମଃନାର୍ ସଃକ୍ତି ସେମଃନାର୍ ଟଣ୍ଡେ ଆର୍ ଲେଞ୍ଜେ ରିଲି, ଜୁୟ୍ତାର୍ ଗିନେ ସେମଃନାର୍ ଲେଞ୍ଜ୍ ସାହ୍ ହର୍ ଆର୍ ମୁଣ୍ଡ୍ ରିଲାର୍; ସେତାର୍ ସଃଙ୍ଗ୍ ସେମଃନ୍ ନଃସ୍ଟ୍ କଃର୍ତି ।
20ଜୁୟ୍ ବାକିରିଲା ନଃର୍ମଃନ୍ ଇ ସଃବୁ କଃସ୍ଟ୍ ତଃୟ୍ ମାରା ଅୟ୍ନଃରିଲାୟ୍, ସେମଃନ୍ ଅଃହ୍ଣା ଅଃହ୍ଣାର୍ ଆତେ କଃଲା କାମେ ହୁଣି ମଃନ୍ ନଃବାଦ୍ଲାୟ୍ଲାୟ୍, ବଃଲେକ୍ ଡୁମାମଃନାର୍ ହୁଜା, ଆରେକ୍ ଦଃକୁକ୍, ସୁଣୁକ୍ ଆର୍ ଇଣ୍ଡୁକ୍ ନଃହାର୍ତା ସନା, ରୁହା, ହିତୁଳ୍, ଟେଳା ଆର୍ ଗଃଚେ ତିଆର୍ ଅୟ୍ଲା ମୁର୍ତିର୍ ସେବା ନଃଚାଡ୍ଲାୟ୍ । 21ଆର୍ ସେମଃନ୍ ଅଃହ୍ଣାମଃନାର୍ ନଃର୍ ଅଃତ୍ୟା, ମନ୍ତର୍, ଦାରିକାମ୍ ଆର୍ ଚର୍ କାମେ ହୁଣି ମଃନ୍ ନଃବାଦ୍ଲାୟ୍ଲାୟ୍ ।
10ଦୁତ୍ ଆର୍ ସାନ୍ ବଇ
1ତାର୍ହଃଚେ ମୁଁୟ୍ ଆରେକ୍ ଗଟେକ୍ ସଃକ୍ତିମାନ୍ ଦୁତ୍କେ ସଃର୍ଗେ ହୁଣି ଉତ୍ରି ଆସ୍ତାର୍ ଦଃକ୍ଲେ; ସେ ମେଗେ ଡାହି ଅୟ୍ରିଲା, ତାର୍ ମୁଣ୍ଡ୍ ଉହ୍ରେ ଲିଙ୍ଗିଲାଟି, ତାର୍ ମୁଉଁ ବେଳ୍ ହର୍ ଆର୍ ହାଦ୍ ଜୟ୍ ମୁଣ୍ଡା ହର୍ । 2ତାର୍ ଆତେ ଗଟେକ୍ ଉଗାଳା ରିଲା ସାନ୍ ବଇ ରିଲି । ସେ ଅଃହ୍ଣାର୍ କାତାହାଦ୍ ସଃମ୍ନ୍ଦ୍ ଉହ୍ରେ ଆର୍ ଡେବ୍ରିହାଦ୍ ହୁର୍ତି ଉହ୍ରେ ସଃଙ୍ଗାୟ୍ କଃରି, 3ସିମାବାଗ୍ ଗଃର୍ଜ୍ଲା ହର୍ ଗଃର୍ଜାଣ୍ ସଃବଦେ କୁଦି କୟ୍ଲା, ସେ କୁଦି କୟ୍ଲା ଦାହ୍ରେ ସାତ୍ଗଟ୍ ମେଗ୍ ଗଃର୍ଜାଣ୍ ଅଃହ୍ଣା ଅଃହ୍ଣାର୍ ସଃବ୍ଦ୍ ସୁଣାୟ୍ଲାୟ୍ । 4ସେ ସାତ୍ଗଟ୍ ମେଗ୍ ଗଃର୍ଜାଣ୍ ଅଃହ୍ଣା ଅଃହ୍ଣାର୍ ସଃବ୍ଦ୍ ସୁଣାୟ୍ଲା ଦାହ୍ରେ ମୁଁୟ୍ ଲେକୁକ୍ ଜାତିରିଲେ, ସଃଡେବଃଳ୍ ମୁଁୟ୍ ମର୍ ହାକ୍ ଅଃଗାସେ ହୁଣି ଆୟ୍ଲା ଇ କଃତା ସୁଣ୍ଲେ, “ସେ ସାତ୍ଗଟ୍ ମେଗ୍ ଗଃର୍ଜାଣ୍ ଜାୟ୍ସଃବୁ ସୁଣାୟ୍ଲାୟ୍, ସେ ସଃବୁ ମୁଦ୍ରା ମାରିକଃରି ସଃଙ୍ଗାଉ, ଲେକ୍ ନାୟ୍ ।”
5ତାର୍ହଃଚେ ଜୁୟ୍ ଦୁତ୍କେ ମୁଁୟ୍ ସଃମ୍ନ୍ଦ୍ ଆର୍ ହୁର୍ତି ଉହ୍ରେ ଟିଆ ଅଃଉତାର୍ ଦଃକିରିଲେ, ସେ ଅଃହ୍ଣାର୍ କାତାଆତ୍ ସଃର୍ଗ୍ ବାଟ୍ ଉଟାୟ୍, 6ଜେ ସଃର୍ଗ୍, ହୁର୍ତି, ସଃମ୍ନ୍ଦ୍ ଆର୍ ସେ ବିତ୍ରେ ରିଲା ସଃବୁ ବିସୟ୍ ଉବ୍ଜାୟ୍ ଆଚେ, ସେ ସଃବୁବଃଳ୍ ଜିବନ୍ ରେତା ଲକାର୍ ନାଉଁଏ ସଃୟ୍ତ୍ କଃରି କୟ୍ଲା, ଆର୍ ବିଲମ୍ ନାୟ୍; 7ମଃତର୍ ଇସ୍ୱର୍ ଅଃହ୍ଣାର୍ ସେବାକାରି ବାବ୍ବାଦିମଃନାର୍ ହାକ୍ ଜାଣାୟ୍ଲା ବଃଲ୍ କବୁର୍ ହଃର୍କାରେ ସାତ୍ ଲଃମ୍ବର୍ ଦୁତ୍ କଃତା ପର୍ଚାର୍ କଃର୍ତା ବଃଳ୍, ବଃଲେକ୍ ଜଃଡେବଃଳ୍ ସେ ତୁରି ସଃବ୍ଦ୍ କଃରୁକେ ଜାୟ୍ଦ୍, ସଃଡେବଃଳ୍ ଇସ୍ୱରାର୍ ବିତ୍ରି ଜଃଜ୍ନା ହେଁ ହୁରୁଣ୍ କଃରେଦ୍ ।
8ଆରେକ୍ ମୁୟ୍ ଅଃଗାସେ ହୁଣି ଜୁୟ୍ ସଃବ୍ଦ୍ ସୁଣ୍ଲେ, ସେରି ଆରେକ୍ ଗଟ୍ତର୍ ମର୍ ହାକ୍ ସଃବ୍ଦ୍ କଃରି କୟ୍ଲା, ଜାଆ, ସଃମ୍ନ୍ଦ୍ ଆର୍ ହୁର୍ତି ଉହ୍ରେ ଟିଆ ଅୟ୍ରିଲା ଦୁତାର୍ ଆତେ ଜୁୟ୍ ପୁସ୍ତକ୍ ଉଗାଳା ଆଚେ, ସେରି ନେଏ ।
9ସେତାକ୍ ମୁଁୟ୍ ସେ ଦୁତାର୍ ଲଃଗେ ଜାୟ୍ ସାନ୍ ବଇ ମକ୍ ଦେଉଁକ୍ ତାକ୍ କୟ୍ଲେ । ସେ ମକ୍ କୟ୍ଲା, ଇରି ନଃୟ୍ କାଆ; ଇରି ତର୍ ହେଟ୍କେ ହିତା କଃରେଦ୍, ମଃତର୍ ତର୍ ଟଣ୍ଡ୍କେ ଇରି ମଃଉଁ ହର୍ ସୁଆଦ୍ ଲାଗେଦ୍ ।
10ସେତାକ୍ ମୁଁୟ୍ ଦୁତାର୍ ଆତେ ହୁଣି ସେ ସାନ୍ ବଇକ୍ ନଃୟ୍ ସେରି କାୟ୍ଲେ; ସେରି ମର୍ ଟଣ୍ଡ୍କେ ମଃଉଁ ହର୍ ସୁଆଦ୍ ଲାଗ୍ଲି, ମଃତର୍ ସେରି କାୟ୍ଲା ହଃଚେ ମର୍ ହେଟ୍ ହିତା ଅୟ୍ଗଃଲି । 11ତାର୍ହଃଚେ ମକ୍ କଃଉଆ ଅୟ୍ଲି, ଗାଦେକ୍ ବଃଉଁସ୍, ଜାତି, ବିନ୍ବିନ୍ ବାସାର୍ ଲକ୍ମଃନ୍ ଆର୍ ରଃଜାମଃନାର୍ ବିସୟେ ତକ୍ ଆରେକ୍ ଗଟ୍ତର୍ ବାବ୍ବାଣି କଃଉଁକେ ଅୟ୍ଦ୍ ।
11ଜଳେକ୍ ସାକି
1ହଃଚେ ମକ୍ ଗଃଜ୍ଡାଙ୍ଗ୍ ହର୍ ଗଟେକ୍ ଡାଙ୍ଗ୍ ଦିଆ ଅୟ୍ଲି । ଗଟେକ୍ ଲକ୍ ମକ୍ କୟ୍ଲା, “ଉଟ୍, ଇସ୍ୱରାର୍ ମନ୍ଦିର୍, ବେଦି ଆର୍ ଜୁୟ୍ ଲକ୍ମଃନ୍ ସେତିର୍ ସେବା କଃର୍ତି, ସେମଃନ୍କେ ନାହ୍ । 2୧୧:୨ ଲୁକ ୨୧:୨୪.ମଃତର୍ ମନ୍ଦିରାର୍ ହଃଦାୟ୍ ରିଲା କୁଆଳ୍କେ ଚାଡିଦେସ୍, ସେରି ନାହ୍ ନାୟ୍, କାୟ୍ତାକ୍ବଃଲେକ୍ ସେରି ଅଜିଉଦିମଃନ୍କେ ଦିଆ ଅୟ୍ଆଚେ, ସେମଃନ୍ ୪୨ ମାସ୍ ହଃତେକ୍ ପବିତ୍ର ଗଃଳ୍କେ ହାଦ୍ ତଃଳେ ମାଡ୍ତି । 3ଆର୍ ଅଃମି ଅଃମାର୍ ଜଳେକ୍ ସାକିକ୍ ଅଃଦିକାର୍ ଦେଉଁନ୍ଦ୍ ଜେ, ସେମଃନ୍ ବାସ୍ତାର୍ ବଃସ୍ତର୍ ହିନ୍ଦିକଃରି ୧,୨୬୦ ବିନ୍ ହଃତେକ୍ ବାବ୍ବାଣି କଃଉତି ।”
4ସେମଃନ୍ ହୁର୍ତିବିର୍ ମାପ୍ରୁର୍ ମୁୟେ ଟିଆ ଅୟ୍ ରିଲା ଜଳେକ୍ ଜିତ୍ ଗଃଚ୍ ଆର୍ ଜଳେକ୍ ଦିହ୍ ହର୍ । 5କେ ଜଦି ସେମଃନାର୍ ନଃସ୍ଟ୍ କଃରୁକେ ମଃନ୍ କଃରେଦ୍, ତଃବେ ସେମଃନାର୍ ମୁୟେ ହୁଣି ଜୟ୍ ବାରାୟ୍ ସେମଃନାର୍ ସଃତ୍ରୁମଃନ୍କେ ନାସ୍ କଃରେଦ୍; କେ ଜଦି ସେମଃନାର୍ ନଃସ୍ଟ୍ କଃରୁକେ ମଃନ୍ କଃରେଦ୍, ତାକ୍ ଇବାନ୍ୟା କଃରି ମଃରୁକ୍ ଅୟ୍ଦ୍ । 6ସେମଃନ୍ ବାବ୍ବାଣି କଃଉତା ବଃଳ୍ ଜଃନ୍କଃରି ବଃର୍ସା ନଃମାରେ, ଇତାର୍ ଗିନେ ଅଃଗାସ୍ ବଃନ୍ଦ୍ କଃରୁକେ ସେମଃନାର୍ ଅଃଦିକାର୍ ଆଚେ, ଆରେକ୍ ଜଃତେକ୍ ତର୍ ମଃନ୍, ସଃତେକ୍ ତର୍ ହାଣିକ୍ ବଃନି କଃରି ବାଦ୍ଲାଉଁକ୍ ଆର୍ ହୁର୍ତିବିକ୍ ସଃବୁ ରଃକମାର୍ ମଃର୍ଡି ସଃଙ୍ଗ୍ ମାରୁକ୍ ହେଁ ସେମଃନାର୍ ଅଃଦିକାର୍ ଆଚେ ।
7୧୧:୭ ପ୍ରକା ୧୩:୫-୭; ୧୭:୮.ସେମଃନାର୍ ସାକି ସଃର୍ଲା ହଃଚେ ହଃତାଳ୍ କୁଣ୍ଡେ ହୁଣି ଜୁୟ୍ ଜଃତୁ ଆସେଦ୍, ସେ ସେମଃନାର୍ ସଃଙ୍ଗ୍ ଜୁଜ୍ କଃରେଦ୍ ଆର୍ ସେମଃନ୍କେ ଜିଣି କଃରି ମାରେଦ୍ । 8ସେ ସେମଃନ୍କେ ଆରାୟ୍ କଃରି ଅଃତ୍ୟା କଃରେଦ୍, ସେତାକ୍ ଜୁୟ୍ ବଃଡ୍ ଗଃଳକେ ଆତ୍ମିକ୍ ବାବେ ସଦମ୍ ଆର୍ ମିସର୍ ବଃଲି କଃଉଆ ଜାୟ୍ଦ୍, ଜୁୟ୍ଲଃଗେ ସେମଃନାର୍ ମାପ୍ରୁ ହେଁ କ୍ରୁସ୍ କାଟେ ମଃରି ରିଲା, ସେ ବଃଡ୍ ଗଃଳାର୍ ରାଜ୍ ରଃସ୍ତାୟ୍ ସେମଃନାର୍ ମଃଳ୍ ହଃଳି ରଃୟ୍ଦ୍ । 9ଆର୍ ବିନ୍ ବିନ୍ ବଃଉଁସ୍, କୁଟୁମ୍, ବାସାବାଦି ଆର୍ ଜାତିର୍ ଲକ୍ମଃନ୍ ତିନି ବିନ୍ ଆର୍ ଗଟ୍ ଅଳି ହଃତେକ୍ ସେମଃନାର୍ ମଃଳ୍କେ ଦଃକ୍ତି ଆର୍ ମଃଳ୍ ତହୁକ୍ ନଃଦେତି । 10ସଃଡେବଃଳ୍ ହୁର୍ତି ତଃୟ୍ ବାସା କଃର୍ତା ଲକ୍ମଃନ୍ ସେମଃନାର୍ ମଃଲା କବୁର୍ ସୁଣି ସଃର୍ଦା ଆର୍ ଆନନ୍ଦ୍ କଃର୍ତି, ଆରେକ୍ ଏକ୍ ଆରେକ୍କେ ଇନାମ୍ ଦେତି, କାୟ୍ତାକ୍ବଃଲେକ୍ ଇ ଦୁୟ୍ ବାବ୍ବାଦି ହୁର୍ତି ତଃୟ୍ ବାସା କଃର୍ତା ଲକ୍ମଃନ୍କେ କଃସ୍ଟ୍ ଦେତି ରିଲାୟ୍ । 11ତିନିଦିନ୍ ଆର୍ ଗଟେ ଅଳି ହଃଚେ ଇସ୍ୱର୍ ତଃୟ୍ହୁଣି ଜିବନ୍ ବାଉ ଆସି ସେମଃନାର୍ ତଃୟ୍ ହୁର୍ଲି । ସେତାକ୍ ସେମଃନ୍ ହାଦେ ଟିଆ ଅୟ୍ଲାୟ୍, ଆର୍ ସେମଃନ୍କେ ଦଃକ୍ତା ଲକ୍ମଃନ୍ ଜଃବର୍ ଡିର୍ଲାୟ୍ । 12ସଃଡେବଃଳ୍ ସେମଃନ୍ ଅଃଗାସେ ହୁଣି ବଃଡ୍ ସଃବଦେ ଇ କଃତା ସୁଣ୍ଲାୟ୍, “ଇତି ଉଟି ଆସା ।” ସେତାକ୍ ସେମଃନ୍ ମେଗେ ଡାହି ଅୟ୍ ସଃର୍ଗେ ଗଃଲାୟ୍, ଆର୍ ସେମଃନାର୍ ସଃତ୍ରୁମଃନ୍ ସେମଃନ୍କେ ଦଃକ୍ଲାୟ୍ । 13୧୧:୧୩ ପ୍ରକା ୬:୧୨; ୧୬:୧୮.ସଃଡେବଃଳ୍ ବଃଡ୍ ବୁମିକମ୍ପ୍ କୟ୍ଲି ଆର୍ ଗଃଳାର୍ ୧୦ ବାଗାର୍ ଗଟ୍ ବାଗ୍ ବୁମିସାତ୍ ଅୟ୍ଲି, ଆରେକ୍ ବୁମିକମ୍ପେ ୭,୦୦୦ ଲକ୍ ମଃଲାୟ୍ ଆର୍ ବାକି ରିଲା ଲକ୍ ଡିରି କଃରି ସଃର୍ଗାର୍ ଇସ୍ୱରାର୍ ଜଃଜ୍ମାନ୍ ଗିତ୍ କୟ୍ଲାୟ୍ ।
14ଦୁୟ୍ ଲଃମ୍ବର୍ ବିପ୍ତି ଗଃଲି; ଦଃକା, ତିନି ଲଃମ୍ବର୍ ବିପ୍ତି ବେଗି ଆସୁଲି ।
ସାତ୍ ଲଃମ୍ବର୍ ତୁରି
15ସାତ୍ ଲଃମ୍ବର୍ ଦୁତ୍ ତୁରି ବାଜାୟ୍ଲା ଦାହ୍ରେ ସଃର୍ଗେ ବଃଡ୍ ସଃବ୍ବ୍ଦ୍ ସଃଙ୍ଗ୍ ଇ କଃତା ଆୟ୍ଲି, “ଜଃଗତ୍ ଉହ୍ରେ ରାଜ୍ ଅଃମିମଃନାର୍ ମାପ୍ରୁର୍ ଆର୍ ତାର୍ କ୍ରିସ୍ଟର୍ ଆତେ ଦିଆ ଅୟ୍ଆଚେ, ଆର୍ ସେ ଜୁଗେଜୁଗେ ରାଜ୍ କଃରେଦ୍ ।” 16ସେତାକ୍ ଇସ୍ୱରାର୍ ମୁୟେ ଅଃହ୍ଣା ଅଃହ୍ଣାର୍ ସିଙ୍ଗାସଣେ ବଃସି ରିଲା ୨୪ ପାରାଚିନ୍ ମୁଣ୍ଡ୍ୟା ମାରିକଃରି ଇସ୍ୱର୍କେ ଜୁଆର୍ କଃଲାୟ୍ । 17ଆର୍ କୟ୍ଲାୟ୍,
“ଏ ମାପ୍ରୁ, ସଃବ୍କେ ସଃକ୍ତିମାନ୍ ଇସ୍ୱର୍, ଅଃବେ ଆଚ୍ସି ଆର୍ ହୁର୍ବେ ରିଲିସ୍ ଜେ ତୁୟ୍,
ଅଃମିମଃନ୍ ତର୍ ଦନ୍ୟବାଦ୍ କଃରୁଲୁ,
କାୟ୍ତାକ୍ବଃଲେକ୍ ତୁୟ୍ ଅଃହ୍ଣାର୍ ବଃଡ୍ ସଃକ୍ତି ଦଃରିକଃରି ରାଜ୍ କଃର୍ତା ଅଃଦିକାର୍ ହାୟ୍ଆଚ୍ସି ।
18ଅଜିଉଦି ଲକ୍ମଃନ୍ ରିସା ଅୟ୍ରିଲାୟ୍, ମଃତର୍ ତର୍ ରିସା ଆୟ୍ଲି ଆଚେ,
ଆରେକ୍ ମଃଲା ଲକ୍ମଃନାର୍ ବିଚାର୍ କଃର୍ତା ବଃଳ୍ ଆର୍ ତର୍ ଦଃଙ୍ଗ୍ଳା ବାବ୍ବାଦିମଃନ୍କେ,
ଦଃର୍ମିମଃନ୍ କେ ଆର୍ ତର୍ ନାଉଁକ୍ ଡିର୍ତା ସାନ୍ ବଃଡ୍ ସଃବୁ ଲକ୍କେ ପୁରିସ୍କାର୍ ଦେତାର୍
ଆର୍ ହୁର୍ତିବିକ୍ ନାସ୍କାରିମଃନ୍କ୍ ନାସ୍ କଃର୍ତାର୍ ବେଳା ଆୟ୍ଲି ଆଚେ ।”
19୧୧:୧୯ ପ୍ରକା ୮:୫; ୧୬:୧୮; ପ୍ରକା ୧୬:୨୧.ସଃଡେବଃଳ୍ ସଃର୍ଗେ ରେତା ଇସ୍ୱରାର୍ ମନ୍ଦିର ଉଗାଳି ଅୟ୍ଲି ଆର୍ ତାର୍ ମନ୍ଦିର୍ ବିତ୍ରେ ତାର୍ ନିଅମାର୍ ହେଳି ଦଃକାଗଃଲି, ଆରେକ୍ ବିଜ୍ଲି, ବିନ୍ ବିନ୍ ସଃବ୍ବ୍ଦ୍, ମେଗ୍ ଗଃର୍ଜାଣ୍, ବୁମିକମ୍ପ୍ ଆର୍ ଜଃବର୍ କଃରା ଟେଳା ବଃର୍ସା ଅୟ୍ଲି ।
12ଗଟେକ୍ ମାୟ୍ଜି ଆର୍ ସାହ୍
1ହଃଚେ ଅଃଗାସେ ଗଟେକ୍ ବଃଡ୍ ଚିନ୍ ଦଃକା ଗଃଲି; ବେଳ୍ ହିନ୍ଦିରିଲା ଗଟେକ୍ ମାୟ୍ଜି, ତାର୍ ହାଦ୍ ତଃଳେ ଜଃନ୍ ଆର୍ ମୁଣ୍ଡେ ବାରଗଟ୍ ତାରା ଲାଗିରିଲା ଗଟେକ୍ ମୁକୁଟ୍ । 2ସେ ଆଙ୍ଗେ ଅୟ୍ ହିଲା ଜଃଲମ୍ କଃର୍ତା ଦୁକାକ୍ କାନ୍ଦିକଃରି ହିଲା ଜଃଲମାର୍ କଃସ୍ଟ୍ ହାଉତିରିଲି ।
3ଅଃଗାସେ ଆରେକ୍ ଗଟେକ୍ ଚିନ୍ ଦଃକା ଗଃଲି; ଦଃକା, ଗଟେକ୍ ବଃଡ୍ କାଳ୍ସାହ୍, ତାର୍ ସାତ୍ଗଟ୍ ମୁଣ୍ଡ୍ ଆର୍ ଦଃସ୍ଗଟ୍ ସିଙ୍ଗ୍, ମୁଣ୍ଡ୍ ମଃନାର୍ ଉହ୍ରେ ସାତ୍ଗଟ୍ ମୁକୁଟ୍ । 4ତାର୍ ଲେଞ୍ଜ୍ ଅଃଗାସାର୍ ତିନିବାଗାର୍ ଗଟେ ବାଗ୍ ତାରାମଃନ୍କେ ଜିକି କଃରି ହୁର୍ତି ତଃୟ୍ ହଃକାୟ୍ଲି । ଆର୍ ସେ ସାହ୍, ହିଲା ହାଉଁକ୍ ଜାତା ମାୟ୍ଜି ହିଲା ହାୟ୍ଲା ଦାହ୍ରେ ତାର୍ ହିଲାକ୍ ଗିଳୁକ୍ ତାର୍ ମୁୟେ ଟିଆ ଅୟ୍ଲି । 5ଜେ ସଃବୁ ଜାତିକ୍ ଲଃଉଆର୍ ଡାଙ୍ଗ୍ ସଃଙ୍ଗ୍ ସାସନ୍ କଃରେଦ୍, ଇବାନ୍ୟା ଗଟେକ୍ ଅଃଣ୍ଡ୍ରା ହିଲାକ୍ ସେ ମାୟ୍ଜି ଜଃଲମ୍ କଃଲି, ଆର୍ ତାର୍ ହିଲା ଇସ୍ୱର୍ ଆର୍ ତାର୍ ସିଙ୍ଗାସଣ୍ ଚଃମେ ଉଟାୟ୍ ନିଆଗଃଲି । 6ଆରେକ୍, ସେ ମାୟ୍ଜି ବଃଟା ହାକ୍ ହଃଳାୟ୍ ଗଃଲି, ସେତି ୧,୨୬୦ ବିନ୍ ହଃତେକ୍ ରେଉଁକ୍ ତାର୍ ଗିନେ ଇସ୍ୱର୍ ତିଆର୍ କଃଲା ଗଟେକ୍ ଜଃଗା ରିଲି ।
7୧୨:୭ ଜିଉ ୧:୯.ତାର୍ହଃଚେ ସଃର୍ଗେ ଜୁଜ୍ ଅୟ୍ଲି, ମିକାଏଲ୍ ଆର୍ ତାର୍ ଦୁତ୍ମଃନ୍ ସେ ସାହ୍ ଆର୍ ତାର୍ ଦୁତ୍ମଃନାର୍ ସଃଙ୍ଗ୍ ଜୁଜ୍ କଃଲାୟ୍ । ସେତାକ୍ ସେ ସାହ୍ ଆର୍ ତାର୍ ଦୁତ୍ମଃନ୍ ହେଁ ଜୁଜ୍ କଃଲାୟ୍, 8ମଃତର୍ ସେମଃନ୍ ଜିଣୁକ୍ ନଃହାର୍ଲାୟ୍, ଆରେକ୍ ସଃର୍ଗେ ସେମଃନ୍ ଟାଣ୍ ନାହାୟ୍ଲାୟ୍ । 9୧୨:୯ ଲୁକ ୧୦:୧୮.ସେତାକ୍ ସଃବୁ ଜଃଗତ୍କେ ଟକଃତାର୍, ଦିଆବଳ୍ ଆର୍ ସୟ୍ତାନ୍ ନାଉଁଏ ଡାକ୍ ହୁଟ୍ଲା ସେ ବଃଡ୍ ସାହ୍, ସେ ହଃର୍ନା ନାଗ୍, ସେ ଅଃହ୍ଣାର୍ ଦୁତ୍ମଃନାର୍ ସଃଙ୍ଗ୍ ହୁର୍ତି ତଃୟ୍ ହଃକାୟ୍ ଅୟ୍ଲି ।
10ସଃଡେବଃଳ୍ ମୁୟ୍ଁ ସଃର୍ଗେ ଇ ବଃଡ୍ ଟଣ୍ଡ୍ ସୁଣ୍ଲେ, ଅଃବେ ଅଃମିମଃନାର୍ ଇସ୍ୱରାର୍ ମୁକ୍ତି, ସଃକାତ୍ ଆର୍ ରାଇଜ୍ ଆରେକ୍ ତାର୍ କ୍ରିସ୍ଟର୍ ଅଃଦିକାର୍ ଆସିଆଚେ, କାୟ୍ତାକ୍ବଃଲେକ୍ ଅଃମିମଃନାର୍ ବାୟ୍ବେଣିମଃନାର୍ ଲିନ୍ଦାକଃରୁ, ଜେ ଦିନ୍ ରାତି ସେମଃନାର୍ ବିରଦେ ଅଃମାର୍ ଇସ୍ୱରାର୍ ଚଃମେ ଅଃମାର୍ ଦଃସ୍ କଃଉତିରିଲି, ସେ ତଃଳେ ହଃକା ଅୟ୍ଆଚେ । 11ଆର୍ ସେମଃନ୍ ମେଣ୍ଡା ହିଲାର୍ ବଃନିର୍ ଅଃହ୍ଣା ଅଃହ୍ଣାର୍ ସାକିର୍ କଃତା ତଃୟ୍ ତାକ୍ ଜିଣି ଆଚ୍ତି, ଆରେକ୍ ସେମଃନ୍ ମଃର୍ନ୍ ହଃତେକ୍ ଅଃହ୍ଣା ଅଃହ୍ଣାର୍ ଜିବନ୍କେ ଲାଡ୍ ନଃକେର୍ତି ରିଲାୟ୍ । 12ବଃଲେକ୍, ଏ ସଃର୍ଗ୍ ଆର୍ ସେତି ବାସା କଃର୍ତା ଲକ୍ମଃନ୍, ସଃର୍ଦା କଃରା; ମଃତର୍ ଚି ! ହୁର୍ତି ଆର୍ ସଃମ୍ନ୍ଦ୍, ତୁମିମଃନ୍ ଦଃଣ୍ଡାର୍ ଜୟ୍ଗ୍, କାୟ୍ତାକ୍ବଃଲେକ୍ ବେଳ୍ ବେସି ଅଃଳକ୍ ବଃଲି ଜାଣି ଦିଆବଳ୍ ଅଃହ୍ଣାର୍ ବଃଡେ ରିସାର୍ ସଃଙ୍ଗ୍ ତୁମିମଃନାର୍ ହାକ୍ ଉତ୍ରି ଜାୟ୍ଆଚେ ।
13ସାହ୍ ଅଃହ୍ଣାକ୍ ହୁର୍ତିୟେ ହଃକା ଅଃଉତାର୍ ଦଃକି ସେ ଅଃଣ୍ଡ୍ରାହିଲା ଜଃଲମ୍ କଃଲା ମାୟ୍ଜିକେ କଃସ୍ଟ୍ ଦିଲି । 14ସେତାକ୍ ସେ ମାୟ୍ଜି ଜଃନ୍କଃରି ସାହାର୍ ମୁୟେ ହୁଣି ରଃକ୍ୟା ହାୟ୍ ତିନିବଃର୍ସ୍ ଚଅ ମାସ୍ ହଃତେକ୍ ବାଚି ରୟ୍ଦ୍, ଇତାର୍ ଗିନେ ବଃଟାୟ୍ ରିଲା ଅଃହ୍ଣାର୍ ଜଃଗାୟ୍ ଉଡି ଜଃଉଁକେ ତାକ୍ ବଃଡ୍ ରାବଣ୍ ଚେଳେର୍ ଜଳେକ୍ ଡେଣା ଦିଆ ଅୟ୍ଲି । 15ସେ ମାୟ୍ଜିକେ ହାଣାୟ୍ ବାସାଉଁକ୍ ସାହ୍ ତାର୍ ହଃଚେ ଅଃହ୍ଣାର୍ ମୁୟେ ହୁଣି ଗାଡ୍ ହର୍ ହାଣି ଉକାଳ୍ଲି । 16ମଃତର୍ ହୁର୍ତି ଅଃହ୍ଣାର୍ ଟଣ୍ଡ୍ ମେଲାକଃରି ସାହ୍ ଟଣ୍ଡେ ହୁଣି ବାରାୟ୍ଲା ଗାଡ୍କେ ଗିଳି କଃରି ମାୟ୍ଜିର୍ ଉହ୍କାର୍ କଃଲି । 17ସେତାକ୍ ସାହ୍ ମାୟ୍ଜିର୍ ଉହ୍ରେ ବଃଡେ ରିସା ଅୟ୍, ତାର୍ ବଃଉଁସାର୍ ଜୁୟ୍ ବାକିରିଲା ଲକ୍ମଃନ୍ ଇସ୍ୱରାର୍ ଆଦେସ୍ ମାନ୍ତି ଆର୍ ଜିସୁର୍ ବିସୟେ ସାକି ଦେତି, ସେମଃନାର୍ ସଃଙ୍ଗ୍ ଜୁଜ୍ କଃରୁକେ ଗଃଲି । 18ଆର୍ ସେ ସଃମ୍ନ୍ଦାର୍ ବାଲି ଉହ୍ରେ ଟିଆ ଅୟ୍ଲି ।୧୨:୧୮ କଃତିଗଟ୍ ଲେକାୟ୍ ଡ୍ରାଗନ୍ ଟିଆ ଅୟ୍ଲି, କଃତେକ୍ ପୁସ୍ତକେ ଆର୍ ମୁୟ୍ ଟିଆ ଅୟ୍ଲେ, ମିସି କୁୟ୍ ବୁଜାଉଁଲି ।
13ଜଳେକ୍ ଜଃତୁ
1୧୩:୧ ପ୍ରକା ୧୭:୩,୭-୧୨.ତାର୍ହଃଚେ ମୁଁୟ୍ ସଃମ୍ନ୍ଦ୍ ବିତ୍ରେହୁଣି ଗଟେକ୍ ଜଃତୁକ୍ ଉଟି ଆସ୍ତାର୍ ଦଃକ୍ଲେ, ତାର୍ ଦଃସ୍ ଗଟ୍ ସିଙ୍ଗ୍ ଆର୍ ସାତ୍ ଗଟ୍ ମୁଣ୍ଡ୍, ତାର୍ ସିଙ୍ଗ୍ ମଃନାର୍ ତଃୟ୍ ଦଃସ୍ ଗଟ୍ ମୁକୁଟ୍ ଆର୍ ମୁଣ୍ଡ୍ମଃନାର୍ ଉହ୍ରେ ଇସ୍ୱର୍ ଲିନ୍ଦା ଚିନାଉତାର୍ ବିନ୍ବିନ୍ ନାଉଁ । 2ଇ ଜୁୟ୍ ଜଃତୁକ୍ ଦଃକ୍ଲେ, ସେରି ଚିତାବାଗ୍ ହର୍, ତାର୍ ହାଦ୍ ବାଲୁର୍ ହାଦ୍ ହର୍ ଆର୍ ଟଣ୍ଡ୍ ସିମାବାଗାର୍ ଟଣ୍ଡ୍ ହର୍ । ସେ ସାହ୍ ତାର୍ ଅଃହ୍ଣାର୍ ସଃକ୍ତି, ସିଙ୍ଗାସଣ୍ ଆର୍ ମଃହା ଅଃଦିକାର୍ ଦିଲି । 3ତାର୍ ମୁଣ୍ଡ୍ମଃନାର୍ ବିତ୍ରେ ହୁଣି ଗଟେକ୍ ମୁଣ୍ଡେ ଜଃନ୍କାର୍ ବୟଃଙ୍କାର୍ ମାଡ୍ ଅୟ୍ରିଲି । ଆର୍ ତାର୍ ସେ ମଃର୍ନ୍ ଦେତା ଗାଉ ଉଜ୍ ଅୟ୍ଲି, ଆରେକ୍ ସଃବୁ ହୁର୍ତି ସେ ଜଃତୁ ବିସୟେ କାବା ଅୟ୍ ତାର୍ ହଃଚେହଃଚେ ଗଃଳାୟ୍ । 4ଆରେକ୍ ସାହ୍ ସେ ଜଃତୁକ୍ ଅଃହ୍ଣାର୍ ଅଃଦିକାର୍ ଦିଲାକ୍ ସେମଃନ୍ ସାହ୍କେ ଜୁଆର୍ କଃଲାୟ୍; ସେମଃନ୍ ଜଃତୁକ୍ ହେଁ ଜୁଆର୍ କଃରି କୟ୍ଲାୟ୍, “ଇ ଜଃତୁ ହର୍ କେ ? ଆର୍ କେ ତାର୍ ସଃଙ୍ଗ୍ ଜୁଜ୍ କଃରୁ ହାରେ ?”
5ତାକ୍ ଅଃକାର୍ ଆର୍ ଇସ୍ୱରାର୍ ଲିନ୍ଦା କଃତା କାଉଁକେ ଟଣ୍ଡ୍ ଦିଆ ଅୟ୍ଲି, ଆର୍ ୪୨ ମାସ୍ ହଃତେକ୍ ସାସନ୍ କଃରୁକେ ଅଃଦିକାର୍ ଦିଆଗଃଲି । 6ସେତାକ୍ ସେ ଟଣ୍ଡ୍ ହୁଟାୟ୍ ଇସ୍ୱର୍ ଲିନ୍ଦାର୍ କଃତା କୟ୍ ତାର୍ ନାଉଁ ଆର୍ ତାର୍ ତୁମ୍ ଆରେକ୍ ସଃର୍ଗେ ବାସା କଃର୍ତା ଲକ୍ମଃନାର୍ ଲିନ୍ଦା କଃଲି । 7ସଃବୁ ଦଃର୍ମିମଃନାର୍ ସଃଙ୍ଗ୍ ଜୁଜ୍ କଃରୁକେ ଆର୍ ସେମଃନାର୍ ଉହ୍ରେ ଜିଣୁକ୍ ତାକ୍ ଅଃଦିକାର୍ ଦିଆ ଅୟ୍ଲି, ଆର୍ ସଃବୁ କୁଟୁମ୍, ଦେସ୍, ବିନ୍ ବିନ୍ ବାସାର୍ ଲକ୍, ଆର୍ ଜାତି ଉହ୍ରେ ତାକ୍ ଅଃଦିକାର୍ ଦିଆଗଃଲି । 8ଜୁୟ୍ ମଃନାର୍ ନାଉଁ ଜଃଗତ୍ ଉବ୍ଜାଣ୍ ଅଃଉତା ହୁର୍ବେ ମାରା ଅୟ୍ଲା ମେଣ୍ଡାହିଲାର୍ ଜିବନ୍ ପୁସ୍ତକ୍ ତଃୟ୍ ଲେକା ନୟ୍, ହୁର୍ତି ତଃୟ୍ ବାସା କଃର୍ତା ସେ ସଃବୁ ଲକ୍ ତାକ୍ ଜୁଆର୍ କଃର୍ତି ।
9ଜାର୍ କାନ୍ ଆଚେ, ସେ ସୁଣ । 10କେ ଜଦି ବନ୍ଦି କଃରା ଅୟ୍ଦ୍, ସେତଃନ୍ ଅୟ୍ଲେକ୍ ସେ ବନ୍ଦି ଅୟ୍ଜାୟଦ୍; କେ ଜଦି କଃଣ୍ଡା ସଃଙ୍ଗ୍ ମାରେଦ୍, ତଃବେ ସେ ନିଚୟ୍ କଃଣ୍ଡା ସଃଙ୍ଗ୍ ମାରା ଜାୟ୍ଦ୍ । ଇରଃକମ୍ ବେଳାୟ୍ ଦଃର୍ମିମଃନାର୍ ସଃମ୍ବାଳ୍ତାର୍ ଆର୍ ବିସ୍ୱାସ୍ ଲଳା ।
11ତାର୍ହଃଚେ ମୁୟ୍ଁ ଆରେକ୍ ଗଟେକ୍ ଜଃତୁକ୍ ବୁୟେଁ ହୁଣି ଉଟି ଆସ୍ତାର୍ ଦଃକ୍ଲେ; ମେଣ୍ଡାହିଲା ହର୍ ତାର୍ ଜଳେକ୍ ସିଙ୍ଗ୍, ଆର୍ ସେ ହୁର୍ବାର୍ ସାହ୍ ହର୍ କଃତା କଃଉତି ରିଲି । 12ସେ ହଃର୍ତୁ ଜଃତୁ ଜାର୍ ଗାଉ ଉଜ୍ ଅୟ୍ରିଲି, ସେ ସଃବୁ ଅଃଦିକାର୍ ତାର୍ ଦଃକ୍ଣେ ଚାଲାୟ୍ଦ୍, ଆର୍ ସେ ଜୁୟ୍ ହଃର୍ତୁ ଜଃତୁର୍ ମଃର୍ନ୍ ଦେତା ଗାଉ ଉଜ୍ ଅୟ୍ରିଲି, ତାକ୍ ଜୁଆର୍ କଃରୁକେ ହୁର୍ତି ଆର୍ ସେତି ବାସା କଃର୍ତା ଲକ୍ମଃନ୍କେ ବଃଳ୍ମାଡ୍ କଃଲି । 13ସେ ବଃଡେ ବଃଡେ କାବା ଅଃଉତା ଚିନ୍ ଦଃକାୟ୍ଦ୍, ଇରଃକମ୍ କି ନଃର୍ମଃନାର୍ ଦଃକ୍ଣେ ଅଃଗାସେ ହୁଣି ହୁର୍ତି ଉହ୍ରେ ଜୟ୍ ବଃର୍ସା କଃରାୟ୍ଲି । 14ଆର୍ ସେ ଜଃତୁର୍ ଦଃକ୍ଣେ ଜୁୟ୍ କାବା ଅଃଉତା କାମ୍ କଃରୁକେ ସେ ଅଃଦିକାର୍ ହାୟ୍ରିଲି, ସେତାର୍ ସଃଙ୍ଗ୍ ସେ ହୁର୍ତିଏ ବାସା କଃର୍ତା ଲକ୍ମଃନ୍କେ ବୁଲ୍କାୟ୍ କଃରି, ଜୁୟ୍ ଜଃତୁ କଃଣ୍ଡା ସଃଙ୍ଗ୍ ମାଡ୍ କାୟ୍ ରିଲେକ୍ ହେଁ ଜିବନ୍ ରିଲି, ତାର୍ ଗଟେକ୍ ମୁର୍ତି ତିଆର୍ କଃରୁକେ ସେମଃନ୍କେ ଆଦେସ୍ ଦିଲି । 15ଜଃତୁର୍ ମୁର୍ତି ଜଃନ୍କଃରି କଃତା କଃଉ ହାରେ ଆର୍ ଜଃତେକ୍ ଲକ୍ ଜଃତୁର୍ ସେ ମୁର୍ତିକେ ଜୁଆର୍ ନଃକେରେ, ସେମଃନ୍ ଜଃନ୍କଃରି ମାରା ଅଃଉତି, ଇତାର୍ ଗିନେ ତାକ୍ ସେ ଜଃତୁର୍ ମୁର୍ତିକେ ଜିବନ୍ ଦାନ୍ କଃରୁକେ ଅଃଦିକାର୍ ଦିଆ ଗଃଲି । 16ଆର୍ ସେ ସାନ୍ ଆର୍ ବଃଡ୍, ମାଜନ୍ ଆର୍ ଗଃରିବ୍; ଗତିଦଃଙ୍ଗ୍ଳା ଲକ୍ ଆର୍ ଗତି ଦଃଙ୍ଗ୍ଳା ନଃକେଟ୍ତା ଲକ୍ ସଃବ୍କେ ସେମଃନାର୍ କାତା ଆତେ ନୟ୍ଲେକ୍ କାହାଳେ ଗଟେକ୍ ଚିନ୍ ଦଃରୁକ୍ ବଃଳ୍ମାଡ୍ କଃଲି । 17ଆରେକ୍ ସେ ଚିନ୍ ବଃଲେକ୍ ଜଃତୁର୍ ନାଉଁ କି ତାର୍ ନାଉଁଆର୍ ଲଃମ୍ବର୍ ଦଃରି ନଃରିଲା ଲକ୍ମଃନ୍କେ ଗେନାବିକା କଃରୁକେ ମଃନା କଃରେଦ୍ ।
18ଇତି ଗ୍ୟାନ୍ ଦଃର୍କାର୍, ଜାର୍ ବୁଦି ଆଚେ, ସେ ଜଃତୁର୍ ଲଃମ୍ବର୍ ଇସାବ୍ କଃର, କାୟ୍ତାକ୍ବଃଲେକ୍ ସେରି ଗଟେକ୍ ନଃରାର୍ ଲଃମ୍ବର୍, ଆର୍ ତାର୍ ଲଃମ୍ବର୍ ଅଃଉଁଲି, ୬୬୬ ।
14ମେଣ୍ଡା ହିଲା ଆର୍ ତାର୍ ଲକ୍ମଃନ୍
1୧୪:୧ ପ୍ରକା ୭:୩.ତାର୍ହଃଚେ ମୁୟ୍ଁ ଦଃକ୍ଲେ, ଆର୍ ଦଃକା, ସିଅନ୍ ହଃର୍ବାତ୍ ଉହ୍ରେ ମେଣ୍ଡାହିଲା, ଆର୍ ଜୁୟ୍ ଲକ୍ମଃନାର୍ କାହାଳେ ତାର୍ ନାଉଁ ଆର୍ ତାର୍ ଉବାସିର୍ ନାଉଁ ଲେକାଅୟ୍ ରିଲି, ଇରଃକମ୍ ୧୪୪,୦୦୦ ଲକ୍କେ ତାର୍ ସଃଙ୍ଗ୍ ଟିଆ ଅୟ୍ରିଲାର୍ ଦଃକ୍ଲେ । 2ଆରେକ୍ ମୁୟ୍ଁ ସଃର୍ଗେ ହୁଣି ହାଣି ଅଦୁର୍ତାର୍ ଆର୍ ଗଃଳ୍ଗଃଳି ସଃବ୍ଦ୍ ହର୍ ଗଟେକ୍ ସଃବ୍ଦ୍ ସୁଣ୍ଲେ, ଜୁୟ୍ ସଃବ୍ଦ୍ ମୁୟ୍ଁ ସୁଣ୍ଲେ, ସେରି ବିଣା ବାଜାଉତା ଲକ୍ମଃନାର୍ ବିଣାର୍ ସଃବ୍ଦ୍ ହର୍ । 3ସେମଃନ୍ ସିଙ୍ଗାସଣ୍, ଚାରିଜିବ୍ ଆର୍ ପାରାଚିନ୍ ମଃନାର୍ ଚଃମେ ଗଟେକ୍ ନଃଉଆଁ ଗିତ୍ କୟ୍ଲାୟ୍, ଆରେକ୍ ହୁର୍ତିଏ ହୁଣି ଗେନ୍ଲା ସେ ୧୪୪,୦୦୦ ଲକ୍କେ ଚାଡି ଆରେକ୍ କେ ହେଁ ସେ ଗିତ୍ ସିକୁ ନାହାର୍ଲାୟ୍ । 4ସେମଃନ୍ ମାୟ୍ଜିମଃନାର୍ ସଃଙ୍ଗ୍ ନଃମିସି ଡିଣ୍ଡା ରିଲାୟ୍, କାୟ୍ତାକ୍ବଃଲେକ୍ ସେମଃନ୍ ପବିତ୍ର ରିଲାୟ୍ । ମେଣ୍ଡାହିଲା ଜୁୟ୍ ଜଃଗାୟ୍ ଜାୟ୍ଦ୍, ସେ ଜଃଗାୟ୍ ସେମଃନ୍ ତାର୍ ହଃଚେହଃଚେ ଜାତି । ସେମଃନ୍ ଇସ୍ୱର୍ ଆର୍ ମେଣ୍ଡାହିଲାର୍ ଗିନେ ହଃର୍ତୁ ଜାତ୍ ଅୟ୍ଲା ହଃଳ୍ ହର୍ ନଃର୍ମଃନାର୍ ବିତ୍ରେ ହୁଣି ଗେନା ଅୟ୍ ଆଚ୍ତି । 5ସେମଃନାର୍ ଟଣ୍ଡେ କାୟ୍ ହେଁ ମିଚ୍ କଃତା ନାୟ୍, ସେମଃନ୍ ନିର୍ଦସି ।
ତିନି ଗଟ୍ ଦୁତ୍
6ହଃଚେ ମୁଁୟ୍ ଆରେକ୍ ଗଟେକ୍ ଦୁତ୍କେ ଅଃଗାସାର୍ ମଃଜାୟ୍ ଉଡ୍ତାର୍ ଦଃକ୍ଲେ, ସେ ହୁର୍ତିଏ ବାସା କଃର୍ତା ସଃବୁ ଜାତି, କୁଟୁମ୍, ବିନ୍ବିନ୍ ବାସାର୍ ଲକ୍ ଆର୍ ବଃଉଁସାର୍ ଲକାର୍ ତଃୟ୍ ପର୍ଚାର୍ କଃରୁକେ ଗଟେକ୍ ସଃବୁ ଦିନ୍ ରେତା ନିକ କବୁର୍ ହାୟ୍ ବଃଡ୍ ଟଣ୍ଡେ କୟ୍ଲା, 7“ଇସ୍ୱର୍କେ ଡିରା ଆର୍ ତାକ୍ ଜଃଜ୍ମାନ୍ ଦିଆସ୍, କାୟ୍ତାକ୍ବଃଲେକ୍ ତାର୍ ବିଚାର୍ ବେଳା ଆସି କେଟିଆଚେ, ଆରେକ୍ ଜେ ଅଃଗାସ୍, ହୁର୍ତି, ସଃମ୍ନ୍ଦ୍ ଆର୍ ଚିଉଆହାଣିମଃନ୍ ଉବ୍ଜାୟ୍ ଆଚେ, ତାକ୍ ଜୁଆର୍ କଃରା ।”
8୧୪:୮ ପ୍ରକା ୧୮:୨.ହଃର୍ତୁ ଦୁତାର୍ ହଃଚେ ହଃଚେ ଆରେକ୍ ଏକ୍ଲା, ବଃଲେକ୍ ଦୁୟ୍ ଲଃମ୍ବର୍ ଦୁତ୍ ଆସି କୟ୍ଲା, “ଜୁୟ୍ ବଃଡ୍ ଗଃଳ୍ ବାବିଲ୍ ସଃବୁ ଜାତିକ୍ ଅଃହ୍ଣାର୍ ଦାରିକାମାର୍ ହର୍ ମଃଦ୍ ଡୁକାୟ୍ ଆଚେ, ସେ ନାସ୍ ଅୟ୍ଆଚେ ।”
9ସେମଃନାର୍ ହଃଚେ ଆରେକ୍ ଏକ୍ଲା, ବଃଲେକ୍ ତିନି ଲଃମ୍ବର୍ ଦୁତ୍ ଆସି ବଃଡ୍ ଟଣ୍ଡେ କୟ୍ଲା, “ଜଦି କେ ସେ ଜଃତୁ ଆର୍ ତାର୍ ମୁର୍ତି କେ ଜୁଆର୍ କଃରେଦ୍, ଆରେକ୍ ଅଃହ୍ଣାର୍ କଃହାଳେ କି ଆତେ ତାର୍ ଚିନ୍ ଦଃରେଦ୍, 10ତଃବେ ସେ ହେଁ ଇସ୍ୱରାର୍ ରିସାର୍ ଜୁୟ୍ ମଃଦ୍ କି କାୟ୍ରି ନଃମିସାୟ୍ କଃରି ତାର୍ ରିସାର୍ କପାୟ୍ ତିଆର୍ କଃରା ଅୟ୍ଆଚେ, ସେରି ଡୁକେଦ୍, ଆରେକ୍ ପବିତ୍ର ଦୁତ୍ମଃନାର୍ ଆର୍ ମେଣ୍ଡାହିଲାର୍ ମୁଏଁ ଜୟ୍ ଆର୍ ଗଃନ୍ଦକ୍ ଲଃଗେ ଡଃଣ୍ଡ୍ ହାୟ୍ଦ୍ । 11ଇରଃକମ୍ ଲକ୍ମଃନାର୍ ଦଃଣ୍ଡାର୍ ଦୁଆଁ ଜୁଗେ ଜୁଗେ ଉଟ୍ତି ରଃୟ୍ଦ୍; ଜୁୟ୍ ଲକ୍ମଃନ୍ ଜଃତୁ ଆର୍ ତାର୍ ମୁର୍ତି କେ ଜୁଆର୍ କଃର୍ତି, ଆରେକ୍ ତାର୍ ନାଉଁଏ ଚିନ୍ ଦଃର୍ତି, ସେମଃନାର୍ ଜୁଗେଜୁଗେ ବିସାଉଁଣି ନାୟ୍ ।”
12ଇତି ଦଃର୍ମିମଃନାର୍, ବଃଲେକ୍ ଜୁୟ୍ ଲକ୍ମଃନ୍ ଇସ୍ୱରାର୍ ଆଦେସ୍ ମାନ୍ତି ଆର୍ ଜିସୁକେ ବିସ୍ୱାସ୍ କଃର୍ତି, ସେମଃନ୍କେ ସଃମ୍ବାଳୁକ୍ ହଃଳେଦ୍ ।
13ଆରେକ୍ ମୁୟ୍ଁ ସଃର୍ଗେ ହୁଣି ଇ କଃତା ସୁଣ୍ଲେ, “ଇରି ଲେକ୍, ଜୁୟ୍ ଲକ୍ମଃନ୍ ଅଃବେ ମାପ୍ରୁର୍ ତଃୟ୍ ରଃୟ୍ ମଃର୍ତି, ସେମଃନାର୍ ବାୟ୍ଗ୍ ।” ହେଁ ଆତ୍ମା କଃଉଁଲି, “ଇରି ବାୟ୍ଦ୍ରେ ଗଃଟେଦ୍, ସେମଃନ୍ ଅଃହ୍ଣା ଅଃହ୍ଣାର୍ କଃବାଳେ ହୁଣି ବିସାଉତି, କାୟ୍ତାକ୍ବଃଲେକ୍ ସେମଃନାର୍ କାମ୍ ସେମଃନାର୍ ସଃଙ୍ଗ୍ ଜାୟ୍ଦ୍ ।”
ହୁର୍ତିର୍ ତାସ୍ କାଟ୍ତା ବେଳା
14ତାର୍ହଃଚେ ମୁଁ ଦଃକ୍ଲେ, “ଆର୍ ଦଃକା, ଦବ୍ ରଃଙ୍ଗାର୍ କଃଣ୍ଡେକ୍ ମେଗ୍, ତାର୍ ଉହ୍ରେ ନଃରାର୍ ହୟ୍ସି ହର୍ ଏକ୍ଲା ବଃସିଆଚେ, ତାର୍ ମୁଣ୍ଡେ ସନାର୍ ମୁକୁଟ୍ ଆର୍ ଆତେ ଲାଗୁଣ୍ ଇଳା । 15ସେତାକ୍ ମନ୍ଦିରେ ହୁଣି ଆରେକ୍ ଗଟେକ୍ ଦୁତ୍ ବାରାୟ୍ ସେ ମେଗେ ବଃସି ରିଲା ଲକ୍କେ ବଃଡ୍ ଟଣ୍ଡେ କୟ୍ଲା, ତର୍ ଇଳା ଲାଗାୟ୍ ତାସ୍ କାଟ୍, କାୟ୍ତାକ୍ବଃଲେକ୍ କାଟ୍ତା ବେଳା ଆସିଆଚେ, ଆର୍ ହୁର୍ତିବିର୍ ତାସ୍ ହାକି ଆଚେ । 16ଇରି ସୁଣି, ସେ ମେଗେ ବଃସିରିଲା ମାନାୟ୍ ହୁର୍ତିଏ ଇଳା ଲାଗାୟ୍ ସେତିର୍ ତାସ୍ କାଟ୍ଲା ।”
17ତାର୍ହଃଚେ ସଃର୍ଗାର୍ ମନ୍ଦିରେ ହୁଣି ଆରେକ୍ ଗଟେକ୍ ଦୁତ୍ ବାରାୟ୍ଲା, ତାର୍ ଆତେ ହେଁ ଗଟେକ୍ ଲାଗୁଣ୍ ଇଳା ରିଲି ।
18ଆରେକ୍ ବେଦି ଲଃଗେ ହୁଣି ଆରେକ୍ ଗଟେକ୍ ଦୁତ୍ ବାରାୟ୍ଲା, ସେ ଜୟ୍ଉହ୍ରେ ଅଃଦିକାର୍ ହାୟ୍ଆଚେ; ଜାର୍ ଆତେ ଲାଗୁଣ୍ ଇଳା ରିଲି, ତାକ୍ ବେସି ସଃବଦେ କୁଦିକଃରି କୟ୍ଲା, ତର୍ ଲାଗୁଣ୍ ଇଳା ଲାଗାଉ ଆର୍ ହୁର୍ତିବିର୍ ଅଙ୍ଗୁର୍ ଜୁବ୍ଳା ସଃବୁ ରୁଣ୍ଡାଉ, କାୟ୍ତାକ୍ବଃଲେକ୍ ସେତିର୍ ଅଙ୍ଗୁର୍ ହଃଳ୍ ସଃବୁ ହାକି ଆଚେ । 19ସେତାକ୍ ସେ ଦୁତ୍ ହୁର୍ତିଏ ଅଃହ୍ଣାର୍ ଇଳା ଲାଗାୟ୍ ସେତିର୍ ଅଙ୍ଗୁର୍ ହଃଳ୍ ସଃବୁ ରୁଣ୍ଡାୟ୍ଲା ଆର୍ ଇସ୍ୱରାର୍ ରିସାର୍ ବଃଡ୍ ଅଙ୍ଗୁର୍ କୁଣ୍ଡେ ସେସଃବୁ ହଃକାୟ୍ଲା । 20୧୪:୨୦ ପ୍ରକା ୧୯:୧୫.ଗଃଳାର୍ ହଃଦାୟ୍ ସେ ଅଙ୍ଗୁର୍କୁଣ୍ଡ୍ ମାଡା ଅୟ୍ଲି, ଆର୍ ସେତିହୁଣି ବଃନି ବାରାୟ୍ ୨ ମିଟେର୍ ଉଚ୍ ହଃତେକ୍ ଉଟି ୩୦୦ ମିଲମିଟେର୍ ହଃତେକ୍ ହୁର୍ ଗଃଲି ।
15ସଃରାସଃରି ମଃର୍ଡି
1ତାର୍ହଃଚେ ମୁୟ୍ଁ ସଃର୍ଗେ ଆରେକ୍ ଗଟେକ୍ ବଃଡେ ବୟଃଙ୍କାର୍ ଚିନ୍ ଦଃକ୍ଲେ, ସାତ୍ଗଟ୍ ଦୁତ୍, ସେମଃନାର୍ ଆତେ ସାତ୍ଗଟ୍ ମଃର୍ଡି, କାୟ୍ତାକ୍ବଃଲେକ୍ ଇ ମଃର୍ଡିମଃନାର୍ ଇସ୍ୱରାର୍ ସଃରାସଃରି ରିସା ।
2ଆର୍ ମୁୟ୍ଁ ଦଃକ୍ଲେ, ଜଃନ୍କଃରି ଜୟ୍ ମିସ୍ଲା ଗଟେକ୍ କାଚ୍ ସଃମ୍ନ୍ଦ୍, ଆରେକ୍ ଜୁୟ୍ ଲକ୍ମଃନ୍ ଜଃତୁ, ତାର୍ ମୁର୍ତି ଆର୍ ତାର୍ ନାଉଁଆର୍ ଲଃମ୍ବର୍ ଉହ୍ରେ ଜିଣି ଆଚ୍ତି, ସେମଃନ୍ ଇସ୍ୱରାର୍ ବିଣା ଦଃରି କାଚାର୍ ସଃମ୍ନ୍ଦେ ଟିଆ ଅୟ୍ଆଚ୍ତି । 3ସେମଃନ୍ ଇସ୍ୱରାର୍ ଦଃଙ୍ଗ୍ଳା ମସା ଆର୍ ମେଣ୍ଡାହିଲାର୍ ଗିତ୍ କୟ୍ କଃଉଁଲାୟ୍,
“ଏ ମାପ୍ରୁ, ସଃବ୍କେ ସଃକ୍ତିମାନ୍ ଇସ୍ୱର୍,
ତର୍ କାମ୍ ସଃବୁ କଃଡେକ୍ ବଃଡ୍ ଆର୍ କାବା ଅଃଉତାର୍;
ଏ ସଃବୁ ଜାତିମଃନାର୍୧୫:୩ କଃତେକ୍ ତଃୟ୍ ଜାତି ଆର୍ କଃତେକ୍ ତଃୟ୍ ବଃର୍ସ୍ ବଃଲି ଆଚେ । ରଃଜା,
ତର୍ ବାଟ୍ ସଃବୁ ଟିକ୍ ଆର୍ ସଃତ୍ ।
4ଏ ମାପ୍ରୁ, କେ ତକ୍ ନଃଡିରେ ?
କେ ତର୍ ନାଉଁଏ ଜଃଜ୍ମାନ୍ ଗିତ୍ ନଃକୟ୍ଁ ?
କାୟ୍ତାକ୍ବଃଲେକ୍ ଅଃବ୍କା ତୁୟ୍ହଃକା ପବିତ୍ର;
ସଃବୁ ଜାତି ଆସି ତକ୍ ଜୁଆର୍ କଃର୍ତି,
କାୟ୍ତାକ୍ବଃଲେକ୍ ତର୍ ବିଦି କାମ୍ସଃବୁ ଜାଣା ହଃଳି ଆଚେ ।”
5ଇତାର୍ହଃଚେ ମୁୟ୍ଁ ଦଃକ୍ଲେ, ସଃର୍ଗେ ରିଲା ସାକି ତୁମାର୍ ମନ୍ଦିରାର୍ ଦୁଆର୍ ଉଗାଳି ଅୟ୍ଲି । 6ଆର୍ ମନ୍ଦିରେ ହୁଣି ସାତ୍ଗଟ୍ ମଃର୍ଡି ଦଃର୍ଲା ସାତ୍ଗଟ୍ ଦୁତ୍ ବାରାୟ୍ ଆୟ୍ଲାୟ୍, ସେମଃନ ମଣି ଲାଗିରିଲା ନିର୍ମୁଳ୍ ଆର୍ ଉଜାଳ୍ ମଃସ୍ଣି ବଃସ୍ତର୍ ହିନ୍ଦି ରିଲାୟ୍, ଆରେକ୍ ସେମଃନାର୍ ବୁକେ ସନାର୍ ବୁକ୍ହାଟାର୍ ବାନ୍ଦୁଣ୍ ବାନ୍ଦି ଅୟ୍ରିଲାୟ୍ । 7ସେତାକ୍ ଚାରିଜଃତୁ ବିତ୍ରେ ଗଟେକ୍ ଜଃତୁ ସଃବୁବଃଳ୍ ଜିବନ୍ ରେତା ଇସ୍ୱରାର୍ ରିସାୟ୍ ହୁର୍ନ୍ ଅୟ୍ରିଲା ସାତ୍ଗଟ୍ ସନାର୍ କପା ସେ ସାତ୍ଗଟ୍ ଦୁତ୍କେ ଦିଲା । 8ଆର୍ ଇସ୍ୱରାର୍ ଜଃଜ୍ମାନ୍ ଆର୍ ସଃକ୍ତିର୍ ଦୁଆଁୟ୍ ମନ୍ଦିର୍ ହୁର୍ନ୍ ଅୟ୍ଲି, ସାତ୍ଗଟ୍ ଦୁତ୍ମଃନାର୍ ସାତ୍ଗଟ୍ ମଃର୍ଡି ନଃସେର୍ତା ହଃତେକ୍ କେ ହେଁ ମନ୍ଦିରେ ହୁରୁ ନଃହାୟ୍ଲାୟ୍ ।
16ଇସ୍ୱରାର୍ ରିସାୟ୍ ହୁର୍ନ୍ ସାତ୍ଗଟ୍ କପା
1ତାର୍ହଃଚେ ମୁୟ୍ ମନ୍ଦିରେ ହୁଣି ଗଟେକ୍ ବଃଡ୍ ଟଣ୍ଡେ ସାତ୍ଗଟ୍ ଦୁତ୍ମଃନ୍କେ କଃଉତାର୍ ସୁଣ୍ଲେ, “ଜାହା ଆର୍ ଇସ୍ୱରାର୍ ସାତ୍ଗଟ୍ ରିସାର୍ କପା ହୁର୍ତି ଉହ୍ରେ ଡାଳା ।”
2ଇରି ସୁଣି ହଃର୍ତୁ ଦୁତ୍ ଜାୟ୍ ହୁର୍ତି ଉହ୍ରେ ଅଃହ୍ଣାର୍ କପା ଡାଳ୍ଲା । ସେତାର୍ଗିନେ ଜୁୟ୍ମଃନ୍ ଜଃତୁର୍ ଚିନ୍ ଦଃରିରିଲାୟ୍ ଆର୍ ତାର୍ ମୁର୍ତି କେ ଜୁଆର୍ କଃରି ରିଲାୟ୍, ସେମଃନାର୍ ଗଃଗାଳେ ବଃଡେ କଃସ୍ଟ୍ ଦେତା ବିସ୍ ହଃଟ୍କା ଅୟ୍ଲି ।
3ତାର୍ହଃଚେ ଦୁୟ୍ ଲଃମର୍ ଦୁତ୍ ଅଃହ୍ଣାର୍ କପା ସଃମ୍ନ୍ଦ୍ ଉହ୍ରେ ଡାଳ୍ଲା । ସେତାର୍ଗିନେ ସେରି ମଃଲା ଲକାର୍ ବଃନି ହର୍ ଅୟ୍ଲି, ଆର୍ ସଃମ୍ନ୍ଦେ ରିଲା ସଃବୁ ଜିବ୍ ଜଃତୁମଃନ୍ ଜିବନ୍ ଗଃଲି ।
4ତାର୍ହଃଚେ ତିନି ଲଃମରାର୍ ଦୁତ୍ ଅଃହ୍ଣାର୍ କପା ଗାଡ୍ ଆର୍ ଜର୍ଣାହାଣି ମଃନାର୍ ଉହ୍ରେ ଡାଳ୍ଲା । ସେତାକ୍ ସେସଃବୁ ବଃନି ଅୟ୍ଗଃଲି । 5ସଃଡେବଃଳ୍ ମୁୟ୍ ହାଣି ଅଃଦିକାରି ଦୁତ୍କେ ଇରି କଃଉତାର୍ ସୁଣ୍ଲେ, “ଏ ଅଃବାର୍ ଆର୍ ହୁର୍ବାର୍, ଆରେକ୍ ପବିତ୍ର ଜେ ଜୁୟ୍ ନ୍ୟାୟ୍କଃର୍ତା ଲକ୍ ବଃଲି ଇବାନ୍ୟା ବିଚାର୍ କଃରି ଆଚ୍ସି । 6ଜୁୟ୍ତାର୍ ଗିନେ ସେମଃନ୍ ଦଃର୍ମିମଃନାର୍ ଆର୍ ବାବ୍ବାଦିମଃନ୍କେ ମାରି ରିଲାୟ୍, ଆର୍ ଜୁୟ୍ ସେମଃନ୍କେ ସୁର୍ତା ଗିନେ ବଃନି ଦଃୟ୍ ଆଚ୍ସି, ସେମଃନ୍ ସେରି ହାଉତାର୍ ଜୟ୍ଗ୍ ।” 7ତାର୍ହଃଚେ ମୁୟ୍ ବେଦି ତଃୟ୍ହୁଣି ଇରି ସୁଣ୍ଲେ, “ହିଁ, ଏ ମାପ୍ରୁ, ସଃବ୍କେ ସଃକାତାର୍ ଇସ୍ୱର୍, ତର୍ ସଃବୁ ବିଚାର୍ ସଃତ୍ ଆର୍ ଟିକ୍ ।”
8ତାର୍ହଃଚେ ଚାରି ଲଃମ୍ବର୍ ଦୁତ୍ ଅଃହ୍ଣାର୍ କପା ବେଳ୍ ଉହ୍ରେ ଡାଳ୍ଲା । ସେତାକ୍ ତାକ୍ ମାନାୟ୍ମଃନ୍କେ ଜୟେ ବଃସମ୍ କଃରୁକେ ସଃକ୍ତି ଦିଆଗଃଲି । 9ସଃଡେବଃଳ୍ ମାନାୟ୍ମଃନ୍ ବଃଡେ ତଃହାତେ ହଡି ରିସା ଅୟ୍ ଜୁୟ୍ ଇସ୍ୱରାର୍ ଇ ସଃବୁ କଃସ୍ଟ୍ ଉହ୍ରେ ଅଃଦିକାର୍ ଆଚେ, ତାର୍ ନାଉଁଏ ଲିନ୍ଦା କଃଲାୟ୍, ତାକ୍ ଜଃଜ୍ମାନ୍ ଦେଉଁକେ ମଃନ୍ ବାଦ୍ଲାଉଁକ୍ ନଃଚ୍ଲାୟ୍ ।
10ତାର୍ହଃଚେ ହାଁଚ୍ ଲଃମ୍ବର୍ ଦୁତ୍ ଅଃହ୍ଣାର୍ କପା ସେ ଜଃତୁର୍ ସିଙ୍ଗାସଣ୍ ଉହ୍ରେ ଡାଳ୍ଲା । ସେତାକ୍ ତାର୍ ରାଇଜ୍ ଅଃନ୍ଦାର୍ ଅୟ୍ଲି, ଆର୍ ଲକ୍ମଃନ୍ ବଃଡେ ଦୁକାମଃନାର୍ ଗିନେ ଅଃହ୍ଣା ଅଃହ୍ଣାର୍ ଜିବ୍ କଃତ୍ରୁକ୍ ଲାଗ୍ଲାୟ୍ । 11ଆରେକ୍ ସେମଃନ୍ ଅଃହ୍ଣା ଅଃହ୍ଣାର୍ ବଃଡେ ଦୁକା ଆର୍ ଗାଉମଃନାର୍ ଗିନେ ସଃର୍ଗାର୍ ଇସ୍ୱରାର୍ ଲିନ୍ଦା କଃଲାୟ୍ ଆର୍ ଅଃହ୍ଣା ଅଃହ୍ଣାର୍ କଃରାବ୍ କାମେ ହୁଣି ମଃନ୍ ବାଦ୍ଲାଉଁକ୍ ନଃଚ୍ଲାୟ୍ ।
12ତାର୍ହଃଚେ ଚଅ ଲଃମ୍ବର୍ ଦୁତ୍ ଅଃହ୍ଣାର୍ କପା ପରାତ୍ ନାଉଁଆର୍ ଗାଡ୍ ଉହ୍ରେ ଡାଳ୍ଲା । ସେତାକ୍ ବେଳ୍ ଉଦ୍ତି ଦିଗେ ହୁଣି ଆସ୍ତା ସଃତ୍ରୁ ରଃଜାମଃନାର୍ ଗିନେ ବାଟ୍ ତିଆର୍ ଅଃଉତା ଗିନେ ସେତିର୍ ହାଣି ସୁକି ଗଃଲି । 13ତାର୍ହଃଚେ ମୁୟ୍ ଦଃକ୍ଲେ, ସାହ୍ ଟଣ୍ଡେହୁଣି, ଜଃତୁର୍ ଟଣ୍ଡେହୁଣି ଆର୍ ବମ୍ଳାଉତା ବାବ୍ବାଦିର୍ ଟଣ୍ଡେହୁଣି ବେଙ୍ଗ୍ ହର୍ ତିନିଗଟ୍ ବିଟାଳ୍ ଆତ୍ମା ବାରାୟ୍ଲାୟ୍ । 14ସେମଃନ୍ କାବା ଅଃଉତା କାମ୍ କଃର୍ତା ବୁତ୍ ଆତ୍ମାମଃନ୍ । ଇ ତିନିଗଟ୍ ଆତ୍ମାମଃନ୍ ସଃକ୍ତିମାନ୍ ଇସ୍ୱରାର୍ ବଃଡ୍ ଦିନାର୍ ଜୁଜାର୍ ଗିନେ ସଃବୁ ଜଃଗତାର୍ ରଃଜାମଃନ୍କେ ଗଟେତଃୟ୍ କଃରୁକେ ସେମଃନାର୍ ହାକ୍ ବାରାୟ୍ ଗଃଳାୟ୍ ।
15୧୬:୧୫ ମାତି ୨୪:୪୩,୪୪; ଲୁକ ୧୨:୩୯,୪୦; ପ୍ରକା ୩:୩.“ସୁଣା, ମୁୟ୍ ଚର୍ ହର୍ ଆସୁଲେ । ଜେ ଜଃଗ୍ରାତ୍ ରଃୟ୍ ଅଃହ୍ଣାର୍ ବଃସ୍ତର୍ ବାଚାୟ୍ଦ୍, ତାର୍ ବାୟ୍ଗ୍, କାୟ୍ତାକ୍ବଃଲେକ୍ ସେରି କଃଲେକ୍ ସେ ନଃଗ୍ଳା ଅୟ୍ ନଃବୁଲେ ଆର୍ ଲକ୍ମଃନ୍ ତାକ୍ ଲାଜ୍ ନଃକେରାଉତି ।”
16ତାର୍ହଃଚେ ସେ ବିଟାଳ୍ ଆତ୍ମାମଃନ୍ ହୁର୍ତିର୍ ରଃଜାମଃନ୍କେ ଏବ୍ରି ବାସାୟ୍ ହର୍ମିଗିଦନ୍ ନାଉଁଆର୍ ଗଟେକ୍ ଜଃଗାୟ୍ ରୁଣ୍ଡାୟ୍ଲାୟ୍ ।
17ତାର୍ହଃଚେ ସାତ୍ ଲମ୍ବର୍ ଦୁତ୍ ଅଃହ୍ଣାର୍ କପା ଅଃଗାସେ ଡାଳ୍ଲା । ସେତାକ୍ ମନ୍ଦିର୍ ବିତ୍ରେ ହୁଣି ସିଙ୍ଗାସଣେ ହୁଣି ଇ ବଃଡ୍ ସଃବଦ୍ ଅୟ୍ଲି, “ସଃରି ଗଃଲି ।” 18୧୬:୧୮ ପ୍ରକା ୮:୫; ୧୧:୧୩,୧୯.ସଃଡେବଃଳ୍ ବିଜ୍ଲି, ବିନ୍ ବିନ୍ ସଃବ୍ଦ୍ ଆର୍ ବିଜ୍ ମାର୍ତା ସଃବ୍ଦ୍, ଆରେକ୍ ବଃଡ୍ ବୁମିକମ୍ପ୍ ଅୟ୍ଲି । ହୁର୍ତିଏ ମାନାୟ୍ ଉବ୍ଜାଣ୍ ଅୟ୍ଲା ବଃଳ୍ ହୁଣି ଇବାନ୍ୟା ବୟଃଙ୍କାର୍ ବୁମିକମ୍ପ୍ ଆର୍ କଃବେ ଅୟ୍ନଃରିଲି । 19ସେତାକ୍ ସେ ବଃଡ୍ ଗଃଳ୍ ତିନି ବାଗ୍ ଅୟ୍ ବାଟା ଅୟ୍ଲି ଆର୍ ସଃବୁ ଦେସାର୍ ଗଃଳ୍ମଃନ୍ ମାଟାୟ୍ ମିସ୍ଲି । ଆର୍ ବାବିଲ୍ ନାଉଁଆର୍ ବଃଡ୍ ଗଃଳ୍କେ ଇସ୍ୱର୍ ଅଃହ୍ଣାର୍ ବୁତେକ୍ ରିସାର୍ ମଃଦ୍ କପାୟ୍ ହୁଣି ସୁରାଉଁକ୍ ଏତାୟ୍ଲା । 20୧୬:୨୦ ପ୍ରକା ୬:୧୪.ଆରେକ୍ ଚାରିବେଳ୍ତି ହାଣି ରିଲା ଦେସ୍, ସଃବୁ ଡଙ୍ଗୁର୍ ଆର୍ ହର୍ବାତ୍ମଃନ୍ ଆରେକ୍ ନଃଡିସ୍ଲି । 21୧୬:୨୧ ପ୍ରକା ୧୧:୧୯.ଅଃଗାସେ ହୁଣି ମାନାୟ୍ମଃନାର୍ ଉହ୍ରେ ବଃଡ୍ ବଃଡ୍ କଃରାଟେଳା ବଃର୍ସା ଅୟ୍ଲି, କଃରା ଟେଳାମଃନ୍ ଗଟେକ୍ ଗଟେକ୍ ୫୦ କେଜି ଅଜନାର୍, ଆର୍ କଃରାଟେଳା ବଃର୍ସାର୍ ଗିନେ ମାନାୟ୍ମଃନ୍ ଇସ୍ୱରାର୍ ଲିନ୍ଦା କଃଲାୟ୍, କାୟ୍ତାକ୍ବଃଲେକ୍ ସେ କଃସ୍ଟ୍ ବଃଡେ ବୟଃଙ୍କାର୍ ।
17ବଃଡେ ବେସ୍ୟା ଆର୍ ଜଃତୁ
1ତାର୍ହଃଚେ ସାତ୍ ଲଃମ୍ବର୍ କପା ଦଃର୍ଲା ସାତ୍ ଲଃମ୍ବର୍ ଦୁତ୍ମଃନାର୍ ବିତ୍ରେ ହୁଣି ଗଟେକ୍ ଆସି ମକ୍ କୟ୍ଲା, “ଇତି ଆଉ, ଜୁୟ୍ ଡାକ୍ହୁଟା ବେସ୍ୟା ବୁତେକ୍ ହାଣି ରିଲା ଉହ୍ରେ ବଃସି ଆଚେ, 2ଜାର୍ ସଃଙ୍ଗ୍ ହୁର୍ତିବିର୍ ରଃଜାମଃନ୍ ଦାରି କଃରି ଆଚ୍ତି ଆର୍ ହୁର୍ତିଏ ବାସା କଃର୍ତା ଲକ୍ମଃନ୍ ଜାର୍ ଦାରି କାମାର୍ ମଃଦେ ମାତି ଆଚ୍ତି, ତାର୍ ଡଃଣ୍ଡ୍ ତକ୍ ଦଃକାୟ୍ନ୍ଦ୍ ।”
3୧୭:୩ ପ୍ରକା ୧୩:୧.ସେତାକ୍ ସେ ମକ୍ ଆତ୍ମାୟ୍ ସୁକ୍ଲା ବଃଟାୟ୍ ନିଲାକ୍ ମୁୟ୍ଁ ଗଟେକ୍ ମାୟ୍ଜି ଲକ୍କେ ଗଟେକ୍ ରଃତା ରଃଙ୍ଗାର୍ ଜଃତୁ ଉହ୍ରେ ବଃସି ରିଲାର୍ ଦଃକ୍ଲେ । ସେ ଜଃତୁର୍ ସଃବୁ ଗଃଗାଳେ ଇସ୍ୱରାର୍ ଲିନ୍ଦାକ୍ ଚିନାଉତାର୍ ନାଉଁଏ ବଃର୍ତି, ଆର୍ ତାର୍ ସାତ୍ ଗଟ୍ ମୁଣ୍ଡ୍ ଆର୍ ଦଃସ୍ଗଟ୍ ସିଙ୍ଗ୍ । 4ମାୟ୍ଜି ବେଜା ରଃଙ୍ଗାର୍ ଆର୍ ରଃତା ରଃଙ୍ଗାର୍ ବଃସ୍ତର୍ ହିନ୍ଦିରିଲି, ଆରେକ୍ ସନା, ବୁତେକ୍ ମଲାର୍ ମଣି ଆର୍ ମୁକ୍ତାୟ୍ ସଃଜ୍ ଅୟ୍ଆଚେ । ତାର୍ ଆତେ ଗଟେକ୍ ସନା କପା, ସେରି ବାନ୍ୟା ଜିନିସ୍ ଆର୍ ତାର୍ ଦାରି ହର୍ ବିଟାଳ୍ କାମେ ହୁର୍ନ୍ । 5ତାର୍ କାହାଳେ ଇ ବିତ୍ରି ବାବ୍ ରିଲା ଗୁପ୍ତ୍ ନାଉଁ ଲେକା ରିଲି, “ବଃଡ୍ ଗଃଳ୍ ବାବିଲ୍, ଦାରିମଃନାର୍ ଆର୍ ହୁର୍ତିବିର୍ ସଃବୁ ବାନ୍ୟା କଃର୍ତାର୍ ଜିନିସାର୍ ଆୟ୍ସି ।” 6ମୁୟ୍ ସେ ମାୟ୍ଜିକ୍ ଦଃର୍ମିମଃନାର୍ ଆର୍ ଜିସୁର୍ ସାକିମଃନାର୍ ବଃନି କାତାତଃୟ୍ ମାତ୍ତାର୍ ଦଃକ୍ଲେ । ତାକ୍ ଦଃକି ମୁଁୟ୍ ବଃଡେ କାବା ଅୟ୍ଲେ ।
7ସେତାକ୍ ଦୁତ୍ ମକ୍ କୟ୍ଲା, “କାୟ୍ତାକ୍ କାବା ଅୟ୍ଲିସ୍ ? ମୁୟ୍ ତକ୍ ସେ ମାୟ୍ଜିର୍ ଆର୍ ସେ ବଃସ୍ଲା ସାତ୍ଗଟ୍ ମୁଣ୍ଡ୍ ଆର୍ ଦଃସ୍ଗଟ୍ ସିଙ୍ଗ୍ ରିଲା ଜୁୟ୍ ଜଃତୁ, ତାର୍ ବିତ୍ରି କଃତା ବୁଜାୟ୍ ଦଃୟ୍ନ୍ଦ୍ । 8୧୭:୮ ପ୍ରକା ୧୧:୭.ସେ ଜୁୟ୍ ଜଃତୁକ୍ ତୁୟ୍ ଦଃକ୍ଲିସ୍, ସେରି ରିଲି, ଅଃବେ ନାୟ୍, ଆରେକ୍ ସେରି ହଃତାଳ୍ କୁଣ୍ଡେ ହୁଣି ଉଟି ନାସ୍ ହାୟ୍ଦ୍ । ସେତାକ୍ ହୁର୍ତିଏ ବାସା କଃର୍ତା ଜଃତେକ୍ ଲକାର୍ ନାଉଁ ଜଃଗତାର୍ ଉବଃଜାଣ୍ ଅଃଉତା ହୁର୍ବେ ଜିବନ୍ ପୁସ୍ତକା ତଃୟ୍ ଲେକା ନାୟ୍, ସେମଃନ୍ ସଃଡେବଃଳ୍ ସେ ଜଃତୁକ୍ ଦଃକ୍ତି ଜେ ସେରି ରିଲି, ଅଃବେ ନାୟ୍ ହଃଚେ ଆସେଦ୍, ସଃଡେବଃଳ୍ ସେମଃନ୍ କାବା ଅଃଉତି ।”
9“ଇ ଜଃଗାୟ୍ ବୁଦି ରିଲା ମଃନ୍ ଦଃର୍କାର୍ । ସେ ସାତ୍ଗଟ୍ ମୁଣ୍ଡ୍ ସାତ୍ଗଟ୍ ହଃର୍ବାତ୍କେ ବୁଜାୟ୍ଦ୍, ଇ ସାତ୍ଗଟ୍ ହଃର୍ବାତ୍ ଉହ୍ରେ ମାୟ୍ଜି ବଃସିଆଚେ, ସେ ସାତ୍ଗଟ୍ ମୁଣ୍ଡ୍ ସାତ୍ଗଟ୍ ରଃଜାକ୍ ହେଁ ବୁଜାୟ୍ଦ୍ । 10ସେମଃନାର୍ ବିତ୍ରେ ହାଁଚ୍ ଲକ୍ ନାସ୍ ଅୟ୍ ଆଚ୍ତି, ଗଟେକ୍ ଲକ୍ ଅଃବେ ଆଚେ, ଆରେକ୍ ଗଟେକ୍ ଲକ୍ ଅଃବେ ହଃତେକ୍ ନାସେ, ସେ ଆୟ୍ଲେକ୍ ଅଃଳକ୍ କାଳ୍ ହଃକା ରଃୟ୍ଦ୍ । 11ଆରେକ୍ ଜୁୟ୍ ଜଃତୁ ରିଲି ସେ ଆର୍ ଅଃବେ ନାୟ୍, ସେ ଆଟ୍ ଲମ୍ବର୍ ଅୟ୍ଲେକ୍ ହେଁ ସେ ସାତ୍ଗଟ୍ ରଃଜାମଃନାର୍ ବିତ୍ରେ ଗଟେକ୍, ଆର୍ ସେ ହେଁ ବେଗି ନାସ୍ ଅୟ୍ଦ୍ ।
12ଆର୍ ଜୁୟ୍ ଦଃସ୍ଗଟ୍ ସିଙ୍ଗ୍ ଦଃକ୍ଲିସ୍, ସେ ସଃବୁ ଦଃସ୍ଗଟ୍ ରଃଜାକେ ବୁଜାଉଁଲି । ସେମଃନ୍ ଅଃବେ ହଃତେକ୍ ରାଇଜ୍ ନଃହାଉତି, ମଃତର୍ ଜଃତୁ ସଃଙ୍ଗେ ଗଟେକ୍ ଗଣ୍ଟା ହଃତେକ୍ ରଃଜାମଃନାର୍ ହର୍ ଅଃଦିକାର୍ ହାଉତି । 13ସେମଃନ୍ ଏକ୍ ମଃନାର୍ ଲକ୍, ଆର୍ ସେମଃନ୍ ସେ ଜଃତୁକ୍ ଅଃହ୍ଣାମଃନାର୍ ସଃକ୍ତି ଆର୍ ଅଃଦିକାର୍ ଦେତି । 14ସେମଃନ୍ ମେଣ୍ଡା ହିଲାର୍ ସଃଙ୍ଗ୍ ଜୁଜ୍ କଃର୍ତି, ଆର୍ ମେଣ୍ଡା ହିଲା ସେମଃନ୍କେ ଜିଣେଦ୍, କାୟ୍ତାକ୍ବଃଲେକ୍ ସେ ମାପ୍ରୁମଃନାର୍ ମାପ୍ରୁ ଆର୍ ରଃଜାମଃନାର୍ ରଃଜା, ଆରେକ୍ ଜୁୟ୍ମଃନ୍ ତାର୍ ସଃଙ୍ଗ୍ ଆଚ୍ତି, ସେ କୁଦ୍ଲା, ବାଚ୍ଲା ଆର୍ ବିସ୍ୱାସି ଲକ୍ମଃନ୍କେ ହେଁ ଜିଣେଦ୍ ।”
15ଆର୍ ମକ୍ ସେ କୟ୍ଲା, “ଜୁୟ୍ ହାଣି ଚଃମେ ଜୁୟ୍ ଦାରିଆଣିକ୍ ବଃସି ରିଲାର୍ ଦଃକ୍ଲିସ୍, ସେ ହାଣି ବିନ୍ ବିନ୍ ଗସ୍ଟି, ଲକ୍, ଜାତି ଆର୍ ବାସାବାଦି ଲକ୍ମଃନ୍କେ ବୁଜାୟ୍ଦ୍ । 16ଆରେକ୍ ଜୁୟ୍ ଦଃସ୍ଗଟ୍ ସିଙ୍ଗ୍ ଦଃକ୍ଲିସ୍, ସେ ସଃବୁ ଆର୍ ସେ ଜଃତୁ ଦାରିଆଣିକ୍ ଗିଣ୍ କଃର୍ତି ଆର୍ ତାର୍ ତଃୟ୍ହୁଣି ସଃବୁ ଜିକି ନେତି ଆର୍ ତାକ୍ ନଃଗ୍ଳା କଃର୍ତି ଆର୍ ତାର୍ ମାସ୍ କାତି ଆର୍ ତାକ୍ ଜୟେ ହଡାଉତି । 17କାୟ୍ତାକ୍ବଃଲେକ୍ ଇସ୍ୱରାର୍ ସବୁ ବାକ୍ୟ ଜଃବେ ହଃତେକ୍ ହୁରା ନୟେ, ସେ ହଃତେକ୍ ସେମଃନ୍ ଜଃନ୍କଃରି ତାର୍ ଇଚାକ୍ ହୁରୁଣ୍ କଃର୍ତି ଆର୍ ଗଟେକ୍ ମଃନ୍ ଅୟ୍ ଅଃହ୍ଣାମଃନାର୍ ରାଇଜ୍ ଜଃତୁକ୍ ଦାନ୍ କଃର୍ତି, ଇତାର୍ ଗିନେ ଇସ୍ୱର୍ ସେମଃନାର୍ ମଃନେ ଜାଣାୟ୍ ଦିଲା ।”
18“ଆର୍ ଜୁୟ୍ ମାୟ୍ଜିକେ ଦଃକ୍ଲିସ୍, ସେ ହୁର୍ତିବିର୍ ରଃଜାମଃନାର୍ ଉହ୍ରେ ରାଜ୍ କଃର୍ତା ବଃଡ୍ ଗଃଳ୍କେ ବୁଜାୟ୍ଦ୍ ।”
18ବାବିଲନ୍ ନାସ୍ ଅଃଉତାର୍
1ତାର୍ହଃଚେ ମୁୟ୍ ଆରେକ୍ ଗଟେକ୍ ଦୁତ୍କେ ସଃର୍ଗେ ହୁଣି ଉତ୍ରି ଆସ୍ତାର୍ ଦଃକ୍ଲେ । ସେ ଅଃଦିକାର୍ ହାୟ୍ରିଲା ଆର୍ ତାର୍ ଜଃଜ୍ମାନ୍ ସଃବୁ ହୁର୍ତିକ୍ ଉଜାଳ୍ କଃର୍ତି ରିଲି । 2୧୮:୨ ପ୍ରକା ୧୪:୮.ସେ ବଃଡେ ଉଲ୍ଗାଟ୍ ଅୟ୍କଃରି କୟ୍ଲା, “ତାର୍ ବଃସମ୍ ଅୟ୍ଆଚେ ! ବଃଡ୍ ଗଃଳ୍ ବାବିଲନ୍ ବଃସମ୍ ଅୟ୍ଆଚେ, ସେରି ଅଃବେ ଡାଣି ଆର୍ ହାହ୍ ଆତ୍ମାମଃନାର୍ ରେତା ଟାଣ୍ ଅୟ୍ଆଚେ । ସଃବୁ ରଃକମାର୍ ବିଟାଳ୍ ଆର୍ ଗିଣ୍ଗିଣା ଚେଳେମଃନ୍ ସେତି ବାସା ବାନ୍ଦି ଆଚ୍ତି । 3କାୟ୍ତାକ୍ବଃଲେକ୍ ସେ ସଃବୁ ମାନାୟ୍ ଜାତିକ୍ ତାର୍ ଦାରିକାମାର୍ ମଃଦ୍ ସୁରାୟ୍ ଆଚେ, ହୁର୍ତିବିର୍ ରଃଜାମଃନ୍କେ ତାର୍ ସଃଙ୍ଗ୍ ଦାରି କାମାର୍ ହାହେ ବୁଡାୟ୍ ଆଚେ । ଜଃଗତାର୍ ବେପାରିମଃନ୍ ତାର୍ ନଃହୁଣ୍ଡ୍ତା ଦାରିକାମାର୍ ଗିନେ ଅଃଦିକ୍ ଦଃନ୍ ହାୟ୍ ଦଃନି ଅୟ୍ଆଚ୍ତି ।”
4ହଃଚେ ମୁୟ୍ ସଃର୍ଗେ ହୁଣି ଆରେକ୍ ଗଟେକ୍ ସଃବ୍ଦ୍ ଇରି କଃଉତାର୍ ସୁଣ୍ଲେ, “ଏ ମର୍ ଲକ୍ମଃନ୍ ବାରାୟ୍ ଆସା ! ତାର୍ ଲଃଗେ ହୁଣି ବାରାୟ୍ ଆସା ! ତୁମିମଃନ୍ ତାର୍ ହାହେ ଆରେକ୍ ବୁଡି ରିଆ ନାୟ୍; ସେ ଜୁୟ୍ ଦଃଣ୍ଡ୍ ହାୟ୍ଦ୍, ସେତିର୍ ବାଗିଦାରି ଅଃଉଆ ନାୟ୍ ।
5କାୟ୍ତାକ୍ବଃଲେକ୍ ତାର୍ ହାହ୍ମଃନ୍ ଗାଦ୍ ଅୟ୍କଃରି ସଃର୍ଗ୍ ହଃତେକ୍ ହେଁ ଉଟି ଆଚେ,
ଆର୍ ଇସ୍ୱର୍ ତାର୍ ହାହ୍କାମ୍ ସଃବୁ ଏତାୟ୍ ଆଚେ ।
6ସେ ଜଃନ୍କଃରି ତୁମିମଃନାର୍ ସଃଙ୍ଗ୍ ବେବାର୍ କଃରି ଆଚେ,
ତୁମିମଃନ୍ ତାର୍ ସଃଙ୍ଗ୍ ଟିକ୍ ସେରଃକମ୍ ବେବାର୍ କଃରା ।
ସେ ଜାୟ୍ରି କଃରି ଆଚେ, ତାକ୍ ତାର୍ କଃଲା କାମାର୍ ଦୁୟ୍ଗୁଣ୍ ହଃଳ୍ ବାଉଳାୟ୍ ଦିଆସ୍ ।
ଆର୍ ତୁମିମଃନ୍କେ କାଳାଉଁକ୍ ସେ ଜୁୟ୍ ମଃଦ୍ ତିଆର୍ କଃରି ରିଲି, ତାର୍ ଦୁୟ୍ଗୁଣ୍ ହିତା ମଃଦ୍ ତାର୍ କାତା କପାୟ୍ ହୁର୍ନ୍ କଃରା ।
7ସେ ନିଜ୍କେ ଜଃତେକ୍ ଜଃଜ୍ମାନ୍ କଃର୍ତିରିଲି,
ଆର୍ ଜଃଡେକ୍ ମାଜନେ ବୁଡି ରେତି ରିଲି,
ସେ ଇସାବେ ତାକ୍ ଦୁକ୍ କଃସ୍ଟ୍ ଦିଆସ୍ ।
କାୟ୍ତାକ୍ବଃଲେକ୍ ସେ ମଃନେ ମଃନେ କଃଉଁଲି,
‘ମୁୟ୍ ଇତି ରାଣି ଅୟ୍ ବଃସିଆଚି !
ମୁୟ୍ ରାଣ୍ଡି ନାୟ୍, ମକ୍ କଃବେ ହେଁ ଦୁକ୍ ନାସେ ।’
8ତାର୍ ଇ ସଃବୁ ହାହାର୍ ଗିନେ,
ରଗ୍, ଦୁକ୍, କଃତାର୍, ମଃର୍ଡି ଗଟ୍ଦିନ୍ ତାକ୍ ଅଃକାବଃଳ୍ ଗଃଟେଦ୍,
ଆରେକ୍ ସେ ଜୟେ ଚିଡ୍ତେ ବଃସମ୍ ଅୟ୍ ଜାୟ୍ଦ୍ ।
କାୟ୍ତାକ୍ବଃଲେକ୍ ତାର୍ ଜେ ବିଚାର୍ କଃରୁଲା, ସେ ମାପ୍ରୁ ଇସ୍ୱର୍ ବଃଡେ ସଃକ୍ତିମାନ୍ ।”
9ହୁର୍ତିବିର୍ ଜୁୟ୍ ବଃଡ୍ ରଃଜାମଃନ୍ ତାର୍ ସଃଙ୍ଗ୍ ଦାରି ଆର୍ ହାହ୍ ବେବାର୍ କଃରି ରିଲାୟ୍, ସେମଃନ୍ ତାର୍ ଜୟ୍ର୍ ଦୁଆଁ ଦଃକି କାନ୍ଦ୍ତି । 10ତାର୍ ଦୁକ୍ କଃସ୍ଟାର୍ ବାଗିଦାରି ଅଃଉଁକ୍ ଡିରିକଃରି ସେମଃନ୍ ତାର୍ ତଃୟ୍ହୁଣି ଦୁରିକ୍ ଟିଆ ଅୟ୍ ରେତି ଆର୍ ହାୟ୍, ହାୟ୍ କଃରି କଃଉତି, “କଃଡେକ୍ ବୟଃଙ୍କାର୍, ଜୁୟ୍ ଡଃଣ୍ଡ୍ ହାଉତା ଜୟ୍ଗ୍ । ତୁୟ୍ କି ସେ ସଃକ୍ତିମାନ୍ ବଃଡ୍ ଗଃଳ୍ ବାବିଲନ୍ ! ଅଃକାୟ୍ ଗଟେକ୍ ଗଣ୍ଟା ବିତ୍ରେ ଜୁୟ୍ ଅଃତେକ୍ ଡଃଣ୍ଡ୍ ହାୟ୍ଲିସ୍ ।”
11ଆର୍ ହୁର୍ତିବିର୍ ବେପାରିମଃନ୍ ତାର୍ ଗିନେ କାନ୍ଦ୍ତି ଆର୍ ଦୁକ୍ କଃର୍ତି, କାୟ୍ତାକ୍ବଃଲେକ୍ ସେମଃନାର୍ ବିକ୍ତା ଜିନିସ୍ମଃନ୍ ଗେନ୍ତା ଲକ୍ ଆରେକ୍ କେ ହେଁ ନାୟ୍ । 12ସେମଃନାର୍ ସନା, ରୁହା, ମଣି, ମୁକ୍ତା, ମଃସିଣ୍ ବଃସ୍ତର୍, ବେଜା ରଃଙ୍ଗାର୍ ବଃସ୍ତର୍, ପଟୁବସ୍ତର୍, ସିନ୍ଦୁର୍ ରଃଙ୍ଗାର୍ ବଃସ୍ତର୍, ସଃବୁ ରଃକମାର୍ ଚନ୍ଦନ୍ ଦାରୁ, ଆତି ଦାତେ ତିଆର୍ ଅୟ୍ଲା ସଃବୁ ରଃକମାର୍ ଜିନିସ୍, ବୁତେକ୍ ମଲାର୍ ଦାରୁମଃନ୍, ହିତୁଳ୍, ଲଃଉଆ ଆର୍ ମାର୍ବଃଲ୍ ହଃକ୍ଣାୟ୍ ତିଆର୍ ଅୟ୍ଲା ସଃବୁ ରଃକମାର୍ ଜିନିସ୍, 13ଦାରୁଚିନି, ବିନ୍ବିନ୍ ମିସ୍ଲା ଜିନିସ୍, ଦୁହ୍ଣି, ବାସ୍ନା ଲାଗାଉତା ଜିନିସ୍, କୁନ୍ଦୁରୁ, ମଃଦ୍, ଚିକଣ୍, ମଇଦା, ଗଅଁ, ଗାଇଗଃରୁ, ମେଣ୍ଡା, ଗଳା, ରଃତ୍, ଗତିଦଃଙ୍ଗ୍ଳା ଆର୍ ନଃର୍ମଃନାର୍ ଗଃଗାଳାର୍ ଜିବନ୍କେ ଗେନ୍ତା ଲକ୍ ହେଁ କେ ନଃରେତି । 14ବେପାରିମଃନ୍ ତାକ୍ କଃଉତି, “ତର୍ ସୁକ୍ ବୟ୍ଗ୍ କଃର୍ତା ସଃବୁ ନିକନିକରି ମଃୟା ଅୟ୍ଗଃଲି ଆର୍ ତର୍ ଦଃନାର୍ ଜିକ୍ଜିକା ଆରେକ୍ ନାୟ୍ନି । ତୁୟ୍ ସେ ସଃବୁକ୍ ଆରେକ୍ କଃବେ ହେଁ ଲେଉଟି ନଃହାଉସି ।” 15ଜୁୟ୍ ବେପାରିମଃନ୍ ସେ ଗଃଳେ ବେପାର୍ କଃରି ମାଜନ୍ ଅୟ୍ରିଲାୟ୍, ସେମଃନ୍ ତାର୍ ଦୁକ୍ ବୟ୍ଗାର୍ ବାଗି ଅଃଉଁକ୍ ଡିରିକଃରି ଦୁରିକ୍ ଟିଆ ଅୟ୍ କାନ୍ଦିକଃରି ଆର୍ ଦୁକ୍ କଃରି, 16କଃଉତି, “ହାୟ୍ ହାୟ୍, ଦଃଣ୍ଡାର୍ ଜୟ୍ଗ୍ ବଃଡ୍ ଗଃଳ୍ । ସେ ମଃସିଣ୍ ବଃସ୍ତର୍, ବେଜା ରଃଙ୍ଗାର୍ ଆର୍ ସିନ୍ଦୁର୍ ରଃଙ୍ଗାର୍ ବଃସ୍ତର୍ ହିନ୍ଦ୍ତି ରିଲି, ଆରେକ୍ ସନା, ମଣି ଆର୍ ମୁକ୍ତାୟ୍ ଡାହି ଅୟ୍ରିଲି । 17ମଃତର୍ ଗଟେକ୍ ଗଣ୍ଟା ବିତ୍ରେ ସେ ଇ ସଃବୁ ଦଃନ୍ବିତ୍ ଆରାୟ୍ଲି ।” ଜାଜ୍ମଃନାର୍ ମୁଳିକାମଃନ୍, ହାଣିଜାଜେ ଚଃଗି ଜାତା ଲକ୍ମଃନ୍, ଜାଜ୍ମଃନାର୍ ଡାୟ୍ବର୍ମଃନ୍ ଆର୍ ସଃମ୍ନ୍ଦ୍ ବେପାରିମଃନ୍ ବେସି ଦୁରିକ୍ ଟିଆ ଅୟ୍ଲାୟ୍ । 18ଆର୍ ହଡ୍ତା ଗଃଳାର୍ ଦୁଆଁ ଦଃକି ଆଉଲି ଅୟ୍କଃରି କୟ୍ଲାୟ୍, “ଇ ବଃଡ୍ ଗଃଳ୍ ହର୍ ଆରେକ୍ କୁୟ୍ ଗଃଳ୍ ନଃରିଲି ।” 19ସେମଃନ୍ ଅଃହ୍ଣା ଅଃହ୍ଣାର୍ ମୁଣ୍ଡେ ଦୁଳି ବିଚ୍ରି ଏତାୟ୍ ଏତାୟ୍ କାନ୍ଦିକଃରି କୟ୍ଲାୟ୍, “ଚି, ଚି, ଦଃଣ୍ଡାର୍ ଜୟ୍ଗ୍ ବଃଡ୍ ଗଃଳ୍ । ସଃମ୍ନ୍ଦେ ଜାଆ ଆସ୍ ଅଃଉତା ଡଙ୍ଗାମଃନ୍ ତାର୍ ଦଃନେ ମାଜନ୍ ଅୟ୍ରିଲାୟ୍, ମଃତର୍ ଗଟେକ୍ ଗଣ୍ଟା ବିତ୍ରେ ସେ ସଃବୁ ଆରାୟ୍ ଆଚେ ।”
20ଏ ସଃର୍ଗ୍, ସେ ବଃସମ୍ ଅୟ୍ଲାକ୍ ସଃର୍ଦା କିଆଲି କଃରା । ଏ ଦଃର୍ମି ଲକ୍ମଃନ୍, ଏ ପେରିତ୍ ଚେଲାମଃନ୍ ଆର୍ ବାବ୍ବାଦିମଃନ୍, ସଃର୍ଦା ଅଃଉଆ । କାୟ୍ତାକ୍ବଃଲେକ୍ ତୁମିମଃନାର୍ ଉହ୍ରେ ସେ ଜାୟ୍ରି କଃରିରିଲି, ସେତାର୍ଗିନେ ଇସ୍ୱର୍ ତାକ୍ ବିଚାର୍ ଡଃଣ୍ଡ୍ ଦଃୟ୍ଆଚେ ।
21ତାର୍ହଃଚେ ଗଟେକ୍ ସଃକ୍ତିସାଳି ଦୁତ୍ ଜଃତା ଟେଳା ହର୍ ଗଟେକ୍ ବଃଡ୍ ଟେଳା ନଃୟ୍ ସଃମ୍ନ୍ଦେ ହଃକାୟ୍ଲା ଆର୍ କୟ୍ଲା, “ବଃଡ୍ ବଃଳ୍ ବାବିଲନ୍ ଇରଃକମ୍ କଃରି ହଃକାଅୟ୍ଦ୍ ଆର୍ ତାକ୍ କେ ହେଁ କଃବେ ଦଃକୁ ନଃହାର୍ତି । 22ବିଣା, କି ଗିତ୍କୁଳିଆ, ସୁର୍ଲି କି ମରି ବାଜୁଣ୍, କଃବେ ଆର୍ ତର୍ ଲଃଗେ ସୁଣା ନଃଜାୟ୍ଁ । କୁୟ୍ ହେଁ ମେସ୍ତୁରି ତର୍ ତଃୟ୍ ଆରେକ୍ ନଃଡିସ୍ତି; କି ଜଃତାର୍ ରୁଚ୍ତା ସଃବଦ୍ ସୁଣା ନଃଜାୟ୍ଁ । 23ତର୍ ତଃୟ୍ ଆରେକ୍ କଃବେ ହେଁ କୁପି ଉଜାଳ୍ ନଃଲାଗେ; କି ବଃର କଃନ୍ୟାର୍ କଃତା ସୁଣା ନଃଜାୟ୍ଁ । କାୟ୍ତାକ୍ବଃଲେକ୍ ତର୍ ବେପାରିମଃନ୍ ହୁର୍ତିଏ ବଃଡ୍ ସଃକ୍ତିସାଳି ଅୟ୍ରିଲାୟ୍, ତର୍ ଜାଦୁ ବିଦ୍ୟା ତଃୟ୍ ଜୁୟ୍ ହୁର୍ତିବିର୍ ସଃବୁ ଲକ୍କେ ବାମ୍ଳାୟ୍ କଃରି ସଃଙ୍ଗାୟ୍ ରିଲିସ୍ ।”
24ଆରେକ୍ ଇ ବଃଡ୍ ଗଃଳେ ହୁର୍ତିବିର୍ ଗାଦେକ୍ ବାବ୍ବାଦି ଆର୍ ଦଃର୍ମିମଃନ୍କେ ମଃର୍ନେ ମାରା ଅୟ୍ରିଲି । ଇ ସଃବୁ ହାହାର୍ ଗିନେ ସେ ସଃମାନ୍ ଇସାବେ ଡଃଣ୍ଡ୍ ହାୟ୍ଆଚେ ।
19ସଃର୍ଗେ ସଃର୍ଦା
1ଇତାର୍ ହଃଚେ ମୁୟ୍ ଜାୟ୍ରି ସୁଣୁଲେ, ସେରି ସଃର୍ଗାର୍ ଗଟ୍ ଅଲେକାର୍ ଲକ୍ମଃନ୍ଦାର୍ କାଲାହୁଲିର୍ ସଃବ୍ଦ୍ ହର୍ ଲାଗ୍ତି ରିଲି । ସେମଃନ୍ କଃଉତି ରିଲାୟ୍, “ଇସ୍ୱରାର୍ ସ୍ତୁତି କଃରା । ଅଃମାର୍ ଇସ୍ୱର୍ ମୁକ୍ତି, ଜଃଜ୍ମାନ୍ ଆର୍ ସଃକ୍ତିର୍ ଅଃଦିକାରି । 2ତାର୍ ବିଚାର୍ ସଃତ୍ ଆର୍ ନ୍ୟାୟ୍ କଃରାବ୍ କାମେ ହୁର୍ତିବିକ୍ ବିଟାଳ୍ କଃର୍ତା ବେସ୍ୟାଣିକ୍ ସେ ଟିକ୍ ଡଃଣ୍ଡ୍ ଦଃୟ୍ଆଚେ । ଇସ୍ୱରାର୍ ସେବାକାରିମଃନ୍କେ ମଃର୍ନେ ମାରି ରିଲାକ୍ ସେ ତାକ୍ ଡଃଣ୍ଡ୍ ଦଃୟ୍ଆଚେ ।” 3ମୁୟ୍ ସୁଣ୍ଲେ, ସେମଃନ୍ ଆରେକ୍ କାଲାହୁଲି ଅୟ୍ କୟ୍ଲାୟ୍, “ହାଲେଲୁୟା; ସେ ବଃଡ୍ ଗଃଳ୍କେ ବଃସମ୍ କଃର୍ତା ଜୟ୍ ଦୁଆଁ ଜୁଗେଜୁଗେ ଉହ୍ରେ ଉଟ୍ତି ରଃୟ୍ଦ୍ ।” 4ସିଙ୍ଗାସଣେ ବଃସିରିଲା ଇସ୍ୱରାର୍ ଚଃମେ ୨୪ ଗଟ୍ ପାରାଚିନ୍ମଃନ୍ ଆର୍ ସେ ଚାରିଗଟ୍ ଜିବନ୍ ଜଃତୁ ମୁଣ୍ଡ୍ୟା ମାରି ଇସ୍ୱରାର୍ ସେବା କଃଲାୟ୍ । ସେମଃନ୍ କୟ୍ଲାୟ୍, “ଆମେନ୍, ହାଲେଲୁୟା ।”
ମେଣ୍ଡା ହିଲାର୍ ବିବା ବଜି
5ତାର୍ହଃଚେ ଇସ୍ୱରାର୍ ସିଙ୍ଗାସଣେ ହୁଣି ଗଟେକ୍ ସଃବଦ୍ ସୁଣା ଅୟ୍ଲି, “ଏ ଇସ୍ୱରାର୍ ଗତିଦଃଙ୍ଗ୍ଳା ଆର୍ ସେବା କଃରୁମଃନ୍, ତାକ୍ ଡିର୍ତା ସାନ୍ ଆର୍ ବଃଡ୍ ଲକ୍ମଃନ୍, ସଃବୁ ଲକ୍ ତାର୍ ଗୁଣ୍ଗିତ୍ କଃଉଆ ।” 6ସଃଡେବଃଳ୍ ମୁୟ୍ ସୁଣ୍ଲେ, ଅଲେକାର୍ ଲକ୍ମଃନ୍ଦାର୍ ସଃବଦ୍, ବୁତେକ୍ ହାଣି ଅଦୁର୍ତା ସଃବଦ୍ ଆର୍ ଜଃବର୍ ମେଗ୍ ଗଃର୍ଜାଣାର୍ ସଃବ୍ଦ୍ ହର୍ ଗଟେକ୍ ସଃବ୍ଦ୍ ଇରି କଃଉତାର୍ ସୁଣ୍ଲେ, “ହାଲେଲୁୟା, କାୟ୍ତାକ୍ବଃଲେକ୍ ଅଃମାର୍ ମାପ୍ରୁ ସଃବ୍କେ ସଃକ୍ତିମାନ୍ ଇସ୍ୱର୍, ସେ ହଃକା ଅଃମାର୍ ରଃଜା । 7ଆସା ଅଃମିମଃନ୍ ସଃର୍ଦା ଆର୍ ଗିତ୍ନାଟ୍ କଃରୁଆଁ, ତାର୍ ବଃଡ୍ ନିକଗୁଣ୍ ଗିନେ ଜଃଜ୍ମାନ୍ କଃରୁଆଁ ! କାୟ୍ତାକ୍ବଃଲେକ୍ ମେଣ୍ଡାହିଲାର୍ ବିବା ଅଃଉତା ବେଳା ଆସି ଆଚେ, ଆର୍ ତାର୍ କଃନ୍ୟା ସେତାର୍ ଗିନେ ଅଃହ୍ଣାକ୍ ତିଆର୍ କଃରି ଆଚେ । 8ତାକ୍ ହିନ୍ଦ୍ତା ଗିନେ ଦବ୍ଳା ଆର୍ ପବିତ୍ର ମଃସୁଣ୍ ବଃସ୍ତର୍ ଦିଆ ଅୟ୍ଲି ।” ସେ ମଃସିଣ୍ ବଃସ୍ତର୍ ଇସ୍ୱରାର୍ ଲକ୍ମଃନାର୍ ଦଃର୍ମ୍କାମ୍ ।
9୧୯:୯ ମାତି ୨୨:୨,୩.ସଃଡେବଃଳ୍ ସଃର୍ଗ୍ ଦୁତ୍ ମକ୍ କୟ୍ଲା, “ଇରି ଲେକି ରେ, ଜୁୟ୍ମଃନ୍ ମେଣ୍ଡାହିଲାର୍ ବିବା ବଜିଏ କୁଦା ଜାୟ୍ ଆଚ୍ତି, ସେମଃନାର୍ ବାୟ୍ଗ୍ ।” ସେ ଆରେକ୍ ମକ୍ କୟ୍ଲା, “ଇ ସଃବୁ ଇସ୍ୱରାର୍ ସଃତ୍ କଃତା ।”
10ସେତାକ୍ ମୁୟ୍ ସେ ଦୁତ୍କେ ଜୁଆର୍ କଃରୁକେ ତାର୍ ହାଦ୍ ତଃଳେ ଡୁଳ୍ଲେ । ମଃତର୍ ସେ ମକ୍ କୟ୍ଲା, “ଜଃଗ୍ରାତ୍, ଇରଃକମ୍ କଃର୍ ନାୟ୍, ମୁୟ୍ ତର୍ ହର୍ ଆର୍ ତର୍ ବାୟ୍ମଃନାର୍ ହର୍ ଜିସୁର୍ ଗଟେକ୍ ଗତିଦଃଙ୍ଗ୍ଳା । ତୁମିମଃନାର୍ ହର୍ ମୁୟ୍ ହେଁ ଜିସୁ ଜାଣାୟ୍ଲା ସଃତ୍କେ ଦଃରିଆଚି । ଇସ୍ୱର୍କେ ହଃକା ହୁଜା କଃରା । ଜିସୁ ଜାଣାୟ୍ ରିଲା ସଃତ୍ ଆତ୍ମା ହଃକା ବାବ୍ବାଦିମଃନ୍କେ ସିକ୍ୟା ଦଃୟ୍ଦ୍ ।”
ଦବ୍ ଗଳାୟ୍ ଚଃଗି ଆସ୍ତା ମାନାୟ୍
11ତାର୍ହଃଚେ ମୁୟ୍ ଦଃକ୍ଲେ, ସଃର୍ଗ୍ ଦୁଆର୍ ଉଗାଳି ଅୟ୍ଆଚେ ଆର୍ ସେତି ଗଟେକ୍ ଦବ୍ଳା ରଃଙ୍ଗାର୍ ଗଃଳା ଆଚେ । ସେ ଗଳା ଚାଲାଉତା ଲକାର୍ ନାଉଁ ବିସ୍ୱାସାର୍ ଜୟ୍ଗ୍ ଆର୍ ସଃତ୍ । ତାର୍ ବିଚାର୍ ନ୍ୟାୟ୍ ଆର୍ ଦଃର୍ମେ ଜୁଜ୍ କଃରୁକେ ବାଚା ଅୟ୍ଆଚେ । 12ତାର୍ ଆକି ଜୟ୍ ଅଳା ହର୍ ଆର୍ ତାର୍ ମୁଣ୍ଡେ ଗାଦେକ୍ ମୁକୁଟ୍ ରିଲି । ତାର୍ ଗଟେକ୍ ନାଉଁ ଲେକା ଜାୟ୍ରିଲି, ମଃତର୍ ସେରି କାୟ୍ରି, ତାକ୍ ଚାଡି ଆରେକ୍ କେ ହେଁ ନଃଜାଣ୍ତି । 13ସେ ହିନ୍ଦିରିଲା ବଃସ୍ତର୍ ବଃନି ତଃୟ୍ ବୁଡାୟ୍ ଅୟ୍ରିଲି । ସେ “ଇସ୍ୱରାର୍ ବାକ୍ୟ” ନାଉଁଏ ଜାଣାସୁଣା । 14ସଃର୍ଗାର୍ ସଃଇନ୍ ମଃନ୍ଦା ନିର୍ମୁଳ୍, ଦବ୍, ମଃସିଣ୍ ବଃସ୍ତର୍ ହିନ୍ଦି ଦବ୍ ଗଳାମଃନାର୍ ଉହ୍ରେ ଚଃଗି ତାର୍ ହଃଚେ ହଃଚେ ଜାତି ରିଲାୟ୍ । 15୧୯:୧୫ ପ୍ରକା ୧୪:୨୦.ତାର୍ ଟଣ୍ଡେ ହୁଣି ଗଟେକ୍ ଦାରୁଆ କଃଣ୍ଡା ବାରାଉତି ରିଲି । ସେ କଃଣ୍ଡା ସଃଙ୍ଗ୍ ସେ ହୁର୍ତିବିର୍ ସଃବୁ ଜାତିକ୍ ଆରାୟ୍ଦ୍ । ଆରେକ୍ ସେମଃନ୍କେ ସେ ଲଃଉଆ ଡାଙ୍ଗ୍ ସଃଙ୍ଗ୍ ସାସନ୍ କଃରେଦ୍ ଆର୍ ସଃବ୍କେ ସଃକ୍ତିମାନ୍ ଇସ୍ୱରାର୍ ଜଃବର୍ ରିସା ହର୍ ଅଙ୍ଗୁର୍କେ ସେ ଗଃଣା କୁଣ୍ଡେ ନିଜେ ହିଳିକଃରି ଅଙ୍ଗୁର୍ ରଃସ୍ ବାର୍ କଃରେଦ୍ । 16ତାର୍ ବଃସ୍ତର୍ ଉହ୍ରେ ଆର୍ ଜଃଙ୍ଗେ ଇ ନାଉଁ ଲେକା ଅୟ୍ରିଲି, “ରଃଜା ମଃନାର୍ ରଃଜା ଆର୍ ମାପ୍ରୁ ମଃନାର୍ ମାପ୍ରୁ ।”
17ତାର୍ହଃଚେ ମୁୟ୍ ଗଟେକ୍ ଦୁତ୍କେ ବେଳ୍ ଉହ୍ରେ ଟିଆ ଅୟ୍ରିଲା । ସେ ଅଃଗାସେ ଉଡ୍ତା ଚେଳେମଃନ୍କେ ଆଉଲି ଅୟ୍କଃରି କୟ୍ଲା, “ଆସା, ଇସ୍ୱରାର୍ ବଃଡ୍ ବଜିଏ ଜଃଉଁକେ ଗଟେତଃୟ୍ଁ ରୁଣ୍ଡା । 18ରଃଜା, ସଃଇନ୍, ସଃଇନ୍ମଃନାର୍ ମୁଳିକା, ଗଳା, ଆର୍ ଗଳା ଚାଲାଉ, ଗତିଦଃଙ୍ଗ୍ଳା, ସ୍ୱାଦିନ୍, ବଃଡ୍ କି ସାନ୍ ସଃବ୍କାର୍ ମାସ୍ ଆସିକଃରି କାହା ।”
19ତାର୍ହଃଚେ ମୁୟ୍ ଦଃକ୍ଲେ, ସେ ଗଳା ଚାଲାଉ ଆର୍ ତାର୍ ସଃଇନ୍ ଦଃଳ୍ ବିରଦେ ଜୁଜ୍ କଃରୁକେ ସେ ଜଃତୁ ଆର୍ ହୁର୍ତିବିର୍ ସଃବୁ ରଃଜାମଃନ୍ ଆର୍ ସେମଃନାର୍ ସଃଇନ୍ ଦଃଳ୍ ଗଟେକ୍ ଅୟ୍ଲାୟ୍ । 20୧୯:୨୦ ପ୍ରକା ୧୩:୧-୧୮.ସେ ଜୁଜ୍ତଃୟ୍ ଜଃତୁ ଆର୍ ତାର୍ ମୁଏଁ କାବା ଅଃଉତା କାମ୍ କଃର୍ତା ସେ ବଃମ୍ଳାଉତା ବାବ୍ବାଦି ଦଃରା ହଃଳି ବନ୍ଦି ଅୟ୍ଲାୟ୍ । ଜୁୟ୍ ଲକ୍ମଃନାର୍ ତଃୟ୍ ଜଃତୁର୍ ଚିନ୍ ରିଲି ଆର୍ ଜୁୟ୍ମଃନ୍ ତାର୍ ମୁର୍ତି କେ ସେବା କଃର୍ତି ରିଲାୟ୍, ଜଃତୁ ତାର୍ କାବା ଅଃଉତା କାମ୍ ତଃୟ୍ ସେମଃନ୍କେ ବାମ୍ଳାୟ୍ ରିଲି । ସେ ଜଃତୁ ଆର୍ ସେ ବମ୍ଳାଉତା ବାବ୍ବାଦି ଗଃନ୍ଦକ୍ ଜୟ୍କୁଣ୍ଡେ ଜିବନ୍ ଜିବନ୍ ହଃବ୍ଳାୟ୍ଲାୟ୍ । 21ଆରେକ୍ ସେମଃନାର୍ ସଃଇନ୍ ଦଃଳ୍, ସେ ଗଳାଚାଲାଉର୍ ଟଣ୍ଡେ ହୁଣି ବାରାଉତା କଃଣ୍ଡା ସଃଙ୍ଗ୍ ମାରା ଅୟ୍ଲାୟ୍ । ଅଃଗାସାର୍ ସଃବୁ ଚେଳେମଃନ୍ ମଃନ୍ ଇଚାୟ୍ ସେମଃନାର୍ ମାସ୍ କାୟ୍ଲାୟ୍ ।
20୧୦୦୦ ବଃର୍ସାର୍ ରାଜ୍ କଃର୍ତାର୍
1ତାର୍ହଃଚେ ମୁୟ୍ଁ ଆରେକ୍ ଗଟେକ୍ ଦୁତ୍କେ ସଃର୍ଗେ ହୁଣି ଉତ୍ରି ଆସ୍ତାର୍ ଦଃକ୍ଲେ, ତାର୍ ଆତେ ହଃତାଳ୍ ରାଜିର୍ କୁଚିକାଡା ଆର୍ ଗଟେକ୍ ବଜ୍ ସିକ୍ଳି ରିଲି । 2ସେରି ସେ ହଃର୍ନା ନାଗ୍ ସାହ୍, ସେ ଡାଣି ଆର୍ ସୟ୍ତାନ୍କେ ଦଃରି ୧,୦୦୦ ବଃର୍ସ୍ ହଃତେକ୍ ସିକ୍ଳି ତଃୟ୍ ବାନ୍ଦ୍ଲା । 3ଆରେକ୍ ତାକ୍ ହଃତାଳ୍ କୁଣ୍ଡେ ହଃକାୟ୍ ସେତିର୍ ଦୁଆର୍ ଡାହ୍ଲାୟ୍ ଆର୍ ଦୁଆରେ ମୁଦ୍ରା ମାର୍ଲାୟ୍ । ଏକ୍ ଆଜାର୍ ବଃର୍ସ୍ ନଃସେର୍ତା ହଃତେକ୍ ସେ ଆରେକ୍ କୁୟ୍ ଦେସାର୍ ଲକ୍କେ ବାମ୍ଳାଉଁ ନାହାରେ । ତାର୍ହଃଚେ କଃତେକ୍ ବେଳାର୍ ଗିନେ ତାକ୍ ଚାଡା ଅୟ୍ଦ୍ ।
4ତାର୍ହଃଚେ ମୁୟ୍ ସିଙ୍ଗାସଣ୍ ସଃବୁ ଦଃକ୍ଲେ, ସେମଃନାର୍ ଉହ୍ରେ ବଃସିରିଲା କଃତେକ୍ ଲକ୍ମଃନ୍କେ ବିଚାର୍ କଃରୁକେ ଅଃଦିକାର୍ ଦିଆ ଜାୟ୍ଆଚେ । ଆରେକ୍ ହେଁ ମୁୟ୍ କଃତେକ୍ ମଃଲା ଲକ୍ମଃନାର୍ ଆତ୍ମାକେ ଦଃକ୍ଲେ, ସେମଃନ୍ ଜିସୁ ଜାଣାୟ୍ରିଲା କଃତା ଆର୍ ଇସ୍ୱରାର୍ କଃତା ପର୍ଚାର୍ କଃର୍ତି ରିଲାକ୍ ମଃର୍ତେ ମାରା ଜାୟ୍ରିଲାୟ୍ । ସେମଃନ୍ ଜଃତୁ କି ତାର୍ ମୁର୍ତି କେ ସେବା କଃରି ନଃରିଲାୟ୍, କି କାହାଳ୍ ଆର୍ ଆତେ ସେ ଜଃତୁର୍ ଚିନ୍ ଗଦାୟ୍ ଅୟ୍ନଃରିଲାୟ୍ । ସେମଃନ୍ ଆରେକ୍ ଜିବନ୍ ହାୟ୍ କ୍ରିସ୍ଟର୍ ସଃଙ୍ଗ୍ ୧,୦୦୦ ବଃର୍ସ୍ ରାଇଜ୍ କଃଲାୟ୍ । 5ବାକି ମଃଲା ଲକ୍ମଃନାର୍ ବିତ୍ରେ ସେ ୧,୦୦୦ ବଃର୍ସ୍ ନଃସେର୍ତା ହଃତେକ୍ କେ ହେଁ ଜିବନ୍ ହାୟ୍ ନଃରିଲାୟ୍ । ଇରି ହଃକା ମଃଲା ଲକ୍ମଃନ୍ ହଃର୍ତୁ ଉଟ୍ତାର୍ । 6ମଃଲା ଲକ୍ମଃନାର୍ ଇ ହଃର୍ତୁ ଉଟ୍ତା ତଃୟ୍ ଜୁୟ୍ମଃନ୍ ମିସି ଆଚ୍ତି, ସେମଃନାର୍ କଃଡେକ୍ ବାୟ୍ଗ୍ ଆର୍ କଃଡେକ୍ ସଃର୍ଦା । ସେମଃନାର୍ ଉହ୍ରେ ଆରେକ୍ ମଃର୍ନାର୍ ଅଃଦିକାର୍ ନାୟ୍ । ମଃତର୍ ସେମଃନ୍ ଇସ୍ୱରାର୍ ଆର୍ କ୍ରିସ୍ଟର୍ ଜାଜକ୍ ଅୟ୍ କ୍ରିସ୍ଟର୍ ସଃଙ୍ଗ୍ ୧,୦୦୦ ବଃର୍ସ୍ ହଃତେକ୍ ରାଇଜ୍ କଃର୍ତି ।
ସୟ୍ତାନାର୍ ଆର୍ତାର୍
7ସେ ୧,୦୦୦ ବଃର୍ସ୍ ସଃର୍ଲା ହଃଚେ ସୟ୍ତାନ୍କେ ବାନ୍ଦୁଣେ ହୁଣି ମୁକ୍ଳାୟ୍ ଦିଆ ଅୟ୍ଦ୍, 8ଆର୍ ସେ ଗଗ୍ ଆର୍ ମାଗଗ୍ ହର୍ ହୁର୍ତିବିର୍ ଚାରିହାକ୍ ସଃମ୍ନ୍ଦାର୍ ବାଲି ହର୍ ବିଚ୍ରି ଅୟ୍ରିଲା ଜାତିମଃନାର୍ ଅଲେକାର୍ ଦଃଳ୍କେ ସୟ୍ତାନ୍ ବାମ୍ଳାୟ୍ କଃରି ଜୁଜ୍ ଗିନେ ଗଟେ ତଃୟ୍ କଃରୁକେ ବାରାୟ୍ ଜାୟ୍ଦ୍ । 9ସେମଃନ୍ ହୁର୍ତିବିର୍ ଚାରିହାକ୍ ବିଚ୍ରି ଅୟ୍ ଦଃର୍ମି ଲକ୍ମଃନାର୍ ଜଃଗା ମଃନ୍କେ ଆର୍ ଇସ୍ୱରାର୍ ଲାଡାର୍ ଗଃଳ୍ମଃନ୍କେ ବେଳ୍ତି । ମଃତର୍ ସଃଡେବଃଳ୍ ସଃର୍ଗେ ହୁଣି ଜୟ୍ ଅଦ୍ରି ସେମଃନ୍କେ ବଃସମ୍ କଃରେଦ୍ । 10ଆର୍ ଜୁୟ୍ ଗଃନ୍ଦକ୍ ଜୟ୍ ଲାଗ୍ତା କୁଣ୍ଡେ ଜଃତୁ ଆର୍ ବମ୍ଳାଉତା ବାବ୍ବାଦିକେ ହଃକା ଅୟ୍ରିଲି, ବଃମ୍ଳାଉତା ସୟ୍ତାନ୍କେ ହେଁ ସେଲଃଗେ ହଃକା ଅୟ୍ଦ୍ । ସେମଃନ୍ ବିନ୍ ରାତି ଜୁଗେଜୁଗେ କଃସ୍ଟ୍ ବୟ୍ଗ୍ କଃର୍ତି ।
ସେସ୍ ବିଚାର୍
11ତାର୍ହଃଚେ ମୁୟ୍ ଗଟେକ୍ ବଃଡ୍ ଦବ୍ଳା ରଃଙ୍ଗାର୍ ସିଙ୍ଗାସଣ୍ ଆର୍ ସେତି ବଃସି ରିଲା ଗଟେକ୍ ଲକ୍କେ ଦଃକ୍ଲେ । ତାର୍ ମୁୟେ ହୁଣି ହୁର୍ତି ଆର୍ ଅଃଗାସ୍ ମଃଣ୍ଡଳ୍ ହଃଳାୟ୍ଲାୟ୍ ଆର୍ ସେରିମଃନ୍ ନଃଡିସ୍ଲି 12ଆରେକ୍ ମୁୟ୍ ସାନ୍ ଆର୍ ବଃଡ୍ ସଃବୁ ମଃଲା ଲକ୍ମଃନ୍କେ ସିଙ୍ଗାସଣାର୍ ମୁୟେ ଟିଆ ଅୟ୍ରିଲାର୍ ଦଃକ୍ଲେ । ଆର୍ ପୁସ୍ତକ୍ମଃନ୍ ସଃବୁ ଉଗାଳା ଅୟ୍ଲି, ଆର୍ ଜିବନ୍ ପୁସ୍ତକ୍ ନାଉଁଆର୍ ଆରେକ୍ ଗଟେକ୍ ପୁସ୍ତକ୍ ଉଗାଳା ଅୟ୍ଲି । ସେ ଜିବନ୍ ବଇ ତଃୟ୍ ଲକ୍ମଃନାର୍ କଃଲା କାମ୍ମଃନାର୍ ବିସୟେ ଜାୟ୍ରି ସଃବୁ ଲେକା ଅୟ୍ରିଲି, ସେ ହଃର୍କାରେ ସେମଃନାର୍ ବିଚାର୍ କଃରା ଅୟ୍ଲି । 13ଆର୍ ସଃମ୍ନ୍ଦ୍ ଅଃହ୍ଣାର୍ ବିତ୍ରେ ମଃରିରିଲା ଲକ୍ମଃନ୍କେ ସଃହ୍ରି ଦିଲି । ଆରେକ୍ ମଃର୍ନ୍ ଆର୍ ହଃତାଳ୍ ସେମଃନାର୍ ତଃୟ୍ ରିଲା ମଃଲା ଲକ୍ମଃନ୍କେ ସଃହ୍ରି ଦିଲାୟ୍ । ଆର୍ ସେମଃନ୍ ସଃବୁ ଲକ୍ ନିଜାର୍ ନିଜାର୍ କଃଲା କାମ୍ ହଃର୍କାରେ ବିଚାର୍ କଃରା ଅୟ୍ଲି । 14ତାର୍ହଃଚେ ମଃର୍ନ୍ ଆର୍ ହଃତାଳ୍କେ ସେ ଜୟ୍ ଲାଗ୍ତା କୁଣ୍ଡେ ହଃକା ଗଃଲି । ଇ ଜୟ୍ ଲାଗ୍ତା କୁଣ୍ଡ୍ ଅୟ୍ଲି, ଦୁୟ୍ ଲମ୍ବର୍ ମଃର୍ନ୍ । 15ଜୁୟ୍ ଲକ୍ମଃନାର୍ ନାଉଁ ଜିବନ୍ ସାସ୍ତର୍ ତଃୟ୍ ଲେକା ଅୟ୍ନଃରିଲି, ସେମଃନ୍କେ ସେ ଜୟ୍ ଲାଗ୍ତା କୁଣ୍ଡେ ହିଙ୍ଗା ଅୟ୍ଲି ।
21ନଃଉଆଁ ସଃର୍ଗ୍ ଆର୍ ନଃଉଆଁ ହୁର୍ତିବି
1୨୧:୧ ୨ ପିତ ୩:୧୩.ସଃରାସଃରି ହଃଚେ ମୁୟ୍ ଗଟେକ୍ ନଃଉଆଁ ଅଃଗାସ୍ ଆର୍ ନଃଉଆଁ ହୁର୍ତି ଦଃକ୍ଲେ । ହଃର୍ନା ଅଃଗାସ୍, ହଃର୍ନା ହୁର୍ତି ନଃସ୍ଟ୍ ଅୟ୍ରିଲି, ଆର୍ ସଃମ୍ନ୍ଦ୍ ନଃରିଲି । 2୨୧:୨ ପ୍ରକା ୩:୧୨.ଆର୍ ଗଟେକ୍ ପବିତ୍ର ଗଃଳ୍, ନଃଉଆଁ ଜିରୁସାଲମ୍, କଃନ୍ୟା ବେସେ ତିଆର୍ ଅୟ୍ ସଃର୍ଗାର୍ ଇସ୍ୱରାର୍ ତଃୟ୍ହୁଣି ହୁର୍ତି ଉହ୍ରେ ଉତୁର୍ତାର୍ ଦଃକ୍ଲେ । 3ଆରେକ୍ ସଃର୍ଗାର୍ ସିଙ୍ଗାସଣେ ହୁଣି ଗଟେକ୍ ସଃବ୍ଦ୍ ଆୟ୍ଲି, “ଅଃବେ ଇସ୍ୱରାର୍ ବାସା କଃର୍ତା ଟାଣ୍ ମାନାୟ୍ମଃନାର୍ ତଃୟ୍ ଆଚେ, ସେ ସେମଃନାର୍ ସଃଙ୍ଗ୍ ବାସା କଃରେଦ୍ ଆର୍ ସେମଃନ୍ ତାର୍ ନିଜାର୍ ଲକ୍ ଅଃଉତି । ଇସ୍ୱର୍ ନିଜେ ସେମଃନାର୍ ସଃଙ୍ଗ୍ ବାସା କଃରେଦ୍ ଆର୍ ସେ ସେମଃନାର୍ ଇସ୍ୱର୍ ଅୟ୍ଦ୍ । 4ଇସ୍ୱର୍ ସେମଃନାର୍ ଆକିର୍ ସଃବୁ ଆସୁ ହୁଚି ଦଃୟ୍ଦ୍ । ମଃର୍ନ୍, ଦୁକ୍, କାନ୍ଦ୍ତାର୍ କି ଦୁକା ଆରେକ୍ ନଃରେୟ୍ । ସଃବୁ ହଃର୍ନା ବିସୟ୍ ନାସ୍ ଅୟ୍ଆଚେ ।”
5ସିଙ୍ଗାସଣ୍ ଉହ୍ରେ ବଃସ୍ଲା ଲକ୍ କୟ୍ଲା, “ହେଁ ମୁୟ୍ ସଃବୁ ବିସୟ୍ ନଃଉଆଁ କଃରିଆଚି ।” ଆରେକ୍ ସେ ମକ୍ ଆଦେସ୍ ଦିଲା, “ଇ ସଃବୁ କଃତା ଲେକ୍, କାୟ୍ତାକ୍ବଃଲେକ୍ ଇରି ସଃତ୍ ଆର୍ ବିସ୍ୱାସାର୍ ଜୟ୍ଗ୍ ।” 6ଆରେକ୍ ହେଁ ସେ କୟ୍ଲା, “କାମ୍ ସଃରି ଆଚେ । ମୁୟ୍ ହଃର୍ତୁ ଆର୍ ସଃରାସଃରି, ଆରୁମ୍ ଆର୍ ସେସ୍ । ଜାକେ ସସ୍ ଲାଗୁଲି, ଜିବନ୍ ହାଜ୍ରା ହାଣି ବାରାଉତା ତଃୟ୍ହୁଣି ବିନାମଲେ କାଉଁକେ ଦଃୟ୍ନ୍ଦ୍ । 7ଜୁୟ୍ମଃନ୍ ଜିଣ୍ତି, ମୁୟ୍ ସେମଃନ୍କେ ଇ ପୁରିସ୍କାର୍ ଦଃୟ୍ନ୍ଦ୍, ମୁୟ୍ ସେମଃନାର୍ ଇସ୍ୱର୍ ଅୟ୍ନ୍ଦ୍ ଆର୍ ସେମଃନ୍ ମର୍ ହିଲା ଅଃଉତି । 8ମଃତର୍ ଜୁୟ୍ମଃନ୍ ଡିର୍କୁଳା, ଅବିସ୍ୱାସି, କଃରାବ୍ ଚାଲାଚାଲ୍ତି, ନଃର୍ ମାରୁ, ଦାରିକଃରୁ, ହାଙ୍ଗୁଣ୍ କଃରୁ, ମୁର୍ତି ହୁଜାକଃରୁ ଆର୍ ମିଚ୍ କଃଉତା ଲକ୍, ଇବାନ୍ୟା ସଃବୁ କଃରାବ୍ କାମ୍ କଃର୍ତା ଲକ୍ମଃନାର୍ ଗିନେ ଟିକ୍ କଃଲା ଟାଣ୍ ଆଚେ, ଗଃନ୍ଦକ୍ ସଃଙ୍ଗ୍ ଜୟ୍ ଲାଗ୍ତା କୁଣ୍ଡ୍ ସେତି ଆଚେ, ସେମଃନ୍ ଦୁୟ୍ତରାର୍ ମଃର୍ନ୍ ବୟ୍ଗ୍ କଃର୍ତି ।”
ନଃଉଆଁ ଜିରୁସାଲେମ୍
9ତାର୍ହଃଚେ ସାତ୍ ଗଟ୍ ସେସ୍ ମଃର୍ଡି ହୁର୍ନ୍ ଅୟ୍ଲା ସାତ୍ ଗଟ୍ କପା ଦଃରି ରିଲା ସାତ୍ ଗଟ୍ ଦୁତ୍ମଃନାର୍ ବିତ୍ରେ ଗଟେକ୍ ଲକ୍ ମର୍ ଲଃଗେ ଆସି କୟ୍ଲା, ଆଉ, ମେଣ୍ଡାହିଲାର୍ ଡକୁର୍ସି ନଃଉଆଁ କଃନ୍ୟାକେ ଦଃକ୍ସି । 10ସେତାକ୍ ସେ ମକ୍ ଆତ୍ମାୟ୍ ଗଟେକ୍ ବଃଡ୍ ଆର୍ ଉଚ୍ ହଃର୍ବାତେ ନଃୟ୍ ପବିତ୍ର ଗଃଳ୍ ଜିରୁସାଲମ୍କେ ଦଃକାୟ୍ଲା, ସେରି ସଃର୍ଗାର୍ ଇସ୍ୱରାର୍ ଚଃମେ ହୁଣି ଉତ୍ରି ଆସ୍ତି ରିଲି ଆର୍ ଇସ୍ୱରାର୍ ଜଃଜ୍ମାନେ ଜଃଲ୍କ୍ତି ରିଲି । 11ସେ ଗଃଳ୍ କାଚ୍ ହର୍ ଉଜାଳ୍ ଆର୍ ବଃଡେ ମଲାର୍ ମଣି ହର୍ ଜିକ୍ଜିକ୍ତି ରିଲି । ଆର୍ ତାର୍ ମଣି ଇସ୍ୱରାର୍ ଜଃଜ୍ମାନେ ଜଃଲ୍କ୍ତି ରିଲି । 12ତାର୍ ଗଟେକ୍ ବଃଡ୍ ଉଚ୍ କଃତି ରିଲି । ଇ କଃତିର୍ ବାରଗଟ୍ ଦୁଆରେ ବାରଗଟ୍ ସଃର୍ଗ୍ ଦୁତ୍ ଜାଗି ରିଲାୟ୍ । ଆର୍ ସେ ଦୁଆର୍ ମଃନାର୍ ଉହ୍ରେ ଇସ୍ରାଏଲାର୍ ବାରଗଟ୍ ବଃଉଁସାର୍ ନାଉଁ ଲେକା ଅୟ୍ରିଲି । 13କଃତିର୍ ଚାରିବାଟ୍ ତିନିଗଟ୍ ଲେକ୍ ଦୁଆର୍ ରିଲି, ବେଳ୍ ଉଦ୍ତି ଦିଗେ ତିନିଗଟ୍, ଦକିଣ୍ ଦିଗେ ତିନିଗଟ୍, ଉତୁର୍ ଦିଗେ ତିନି ଗଟ୍ ଆର୍ ପସ୍ଚିମ୍ ଦିଗେ ତିନି ଗଟ୍ । 14ଗଃଳାର୍ ଇ କଃତି, ବାରଗଟ୍ ଟେଳାର୍ କୁନାଦି ଉହ୍ରେ ତିଆର୍ ଅୟ୍ରିଲି ଆର୍ ସେ ବାରଗଟ୍ କୁନାଦି ଉହ୍ରେ ମେଣ୍ଡାହିଲାର୍ ବାରଗଟ୍ ପେରିତ୍ ଚେଲାମଃନାର୍ ନାଉଁ ଲେକାୟ୍ରିଲି । 15ମର୍ ସଃଙ୍ଗ୍ କଃତା ଅଃଉତା ଦୁତାର୍ ଆତେ ଗଃଳ୍, କଃତି, ଆର୍ ଦୁଆର୍ମଃନ୍କେ ନାହୁକ୍ ଗଟେକ୍ ସନାର୍ ନାହ୍ତା ଡାଙ୍ଗ୍ ରିଲି । 16ଗଃଳ୍ ଚାରି କନିଆ ରିଲି, ତାର୍ ଡେଙ୍ଗ୍ ଆର୍ ଅଃସାର୍ ସଃମାନ୍ ରିଲି । ଦୁତ୍ ତାର୍ ନାହ୍ତା ଡାଙ୍ଗେ ଗଃଳ୍କେ ନାହ୍ଲା । ତାର୍ ଡେଙ୍ଗ୍, ଅଃସାର୍ ଆର୍ ଉଚ୍ ସଃମାନ୍ ୨,୪୦୦ କିଲମିଟେର୍ ରିଲି । 17ଦୁତ୍ କଃତିର୍ ଉଚ୍ ହେଁ ନାହ୍ଲା । ସେରି ୬୦ ମିଟେର୍୨୧:୧୭ କଃତେକ୍ ତଃୟ୍ ଉଚ୍ ଆର୍ କଃତେକ୍ ତଃୟ୍ ଗଃଳ୍ଗଃଳି ବଃଲି ଆଚେ । ରିଲି । 18ସେ କଃତି ମଣି ତଃୟ୍ ତିଆର୍ ଅୟ୍ରିଲି ଆର୍ ଗଃଳ୍ କାଚ୍ ହର୍ ନିର୍ମୁଳ୍ ସୁଦ୍ ସନାୟ୍ ତିଆର୍ ଅୟ୍ରିଲି । 19ଗଃଳାର୍ ଚାରିହାକ୍ ରିଲା କଃତିର୍ କୁନାଦି ଲଃଗେ ମଣି ମାଣିକ୍ୟ ଡଃସା ଅୟ୍ରିଲି, ହଃର୍ତୁ କୁନାଦି ଲଃଗେ ହିରା, ଦୁୟ୍ ଲଃମ୍ବର୍ ତଃୟ୍ ନିଳକାନ୍ତ ମଣି, ତିନି ଲଃମ୍ବର୍ ତଃୟ୍ ବଇଦୁର୍ଜ୍ୟ ମଣି, ଚାରି ଲଃମର୍ ତଃୟ୍ ମରକତ ମଣି, 20ହାଚ୍ ଲଃମ୍ବର୍ ତଃୟ୍ ପୁଲକ ମଣି, ଚଅ ଲଃମ୍ବର୍ ତଃୟ୍ ମାଣିକ୍ୟ, ସାତ୍ ଲଃମ୍ବର୍ ତଃୟ୍ ପୁସ୍ପ ରାଗ୍ ମଣି, ଆଟ୍ ଲଃମ୍ବର୍ ତଃୟ୍ ପିରଜ୍ ମଣି, ନଅ ଲଃମ୍ବର୍ ତଃୟ୍ ଗମେଦକ୍ ମଣି, ଦଃସ୍ ଲଃମ୍ବର୍ ତଃୟ୍ ଲୁସନିୟ ମଣି, ଏଗାର୍ ଲଃମ୍ବର୍ ତଃୟ୍ ଇନ୍ଦ୍ରନିଳ ମଣି ଆର୍ ବାର ଲଃମ୍ବର୍ ତଃୟ୍ ବାସ୍ନା ମଣି ରିଲି । 21ବାରଗଟ୍ ଦୁଆର୍ ଅଃଉଁଲି ବାରଗଟ୍ ମୁକ୍ତା, ହଃତି ଦୁଆର୍ ଗଟେକ୍ ଗଟେକ୍ ମୁକ୍ତା ସଃଙ୍ଗ୍ ତିଆର୍ ଅୟ୍ରିଲି । ଗଃଳାର୍ ବାଟ୍ ସଃବୁ ସୁଦ୍ ସନାୟ୍ ତିଆର୍ ଅୟ୍ରିଲି ।
22ମୁୟ୍ ଗଃଳେ କୁୟ୍ ହେଁ ମନ୍ଦିର୍ ନଃଦେକି, କାୟ୍ତାକ୍ବଃଲେକ୍ ନିଜେ ସଃବ୍କେ ସଃକାତ୍ ମାପ୍ରୁ ଇସ୍ୱର୍ ଆର୍ ମେଣ୍ଡାହିଲା ସେତିର୍ ମନ୍ଦିର୍ । 23ଗଃଳ୍କେ ଉଜାଳ୍ କଃରୁକେ ବେଳ୍ ଜନାର୍ ଲଳା ନାୟ୍, କାୟ୍ତାକ୍ବଃଲେକ୍ ଇସ୍ୱରାର୍ ଜଃଜ୍ମାନେ ସେରି ଉଜାଳ୍ ଅଃଉତି ରିଲି ଆର୍ ମେଣ୍ଡାହିଲା ସେତିର୍ କୁପି । 24ହୁର୍ତିବିର୍ ସଃବୁ ଲକ୍ ତାର୍ ଉଜାଳେ ଚାଲାବୁଲା କଃର୍ତି । ହୁର୍ତିବିର୍ ରଃଜାମଃନ୍ ଇତି ସେମଃନାର୍ ଦଃନ୍ବିତ୍ ଆଣି ଦେତି । 25ଗଃଳାର୍ ସଃବୁ ଦୁଆର୍ ସଃବୁବଃଳ୍ ଉଗାଳା ରଃୟ୍ଦ୍ । ସେତିର୍ ଦୁଆର୍ ସଃବୁ କଃବେ ହେଁ ବଃନ୍ଦ୍ କଃରା ନୟେ । କାୟ୍ତାକ୍ବଃଲେକ୍ ସେତି କଃବେ ରାତି ନୟେ । 26ସଃବୁ ଦେସାର୍ ଦଃନ୍ବିତ୍ ଆର୍ ଜଃଜ୍ମାନ୍ ଇ ଗଃଳେ ଆସି ରୁଣ୍ଡେଦ୍ । 27କାୟ୍ ହେଁ ବିଟାଳ୍ ଆସ୍ତି ଇତି ଆଣା ନୟେ । ବାନ୍ୟା କଃର୍ତା କାମେ ବୁଡ୍ଲା ଦୁସ୍ଟ୍ ଲକ୍ ଆର୍ ମିଚ୍ କଃଉତା ଲକ୍ମଃନ୍ ଇ ଗଃଳେ ହୁରୁ ନଃହାର୍ତି । ଜୁୟ୍ ଲକ୍ମଃନାର୍ ନାଉଁ ମେଣ୍ଡାହିଲାର୍ ଜିବନ୍ ପୁସ୍ତକ୍ ତଃୟ୍ ଲେକା ଅୟ୍ ରଃୟ୍ଦ୍, ସେମଃନ୍ ହଃକା ଇ ଗଃଳ୍ ବିତ୍ରେ ହୁରୁକ୍ ହାର୍ତି ।
22ଜିବନ୍ ହାଣିର୍ ଗାଡ୍
1ନଃଉଆଁ ହୁର୍ତି ତଃୟ୍ କାଚ୍ ହର୍ ନିର୍ମୁଳ୍ ଜିବନ୍ ହାଣିର୍ ଗଟେକ୍ ଗାଡ୍ ଦୁତ୍ ମକ୍ ଦଃକାୟ୍ଲା । ଇ ଗାଡ୍ ଇସ୍ୱର୍ ଆର୍ ମେଣ୍ଡାହିଲାର୍ ସିଙ୍ଗାସଣେ ହୁଣି ବାରାୟ୍, 2ଗଃଳାର୍ ମଃଜି ରଃସ୍ତା ବାଟ୍ ଅୟ୍ଜାତି ରିଲି । ଗାଡାର୍ ଦୁୟ୍ କଣ୍ଡି ବାଟ୍ ଜିବନ୍ ଗଃଚ୍ ଆଚେ । ସେରି ବଃର୍ସାର୍ ହଃତି ମାସେ, ହଃଳ୍ ହଃଳେଦ୍ ଆର୍ ଇତାର୍ ହଃତାର୍ ରଗ୍ ଉଜ୍ କଃର୍ତାର୍ ।
3ଇସ୍ୱରାର୍ ସାୟ୍ପ୍ ହାୟ୍ଲାର୍ କାୟ୍ରି ହେଁ ସେ ଗଃଳେ ଦଃକୁକ୍ ନଃମିଳେ । ଇସ୍ୱର୍ ଆର୍ ମେଣ୍ଡାହିଲାର୍ ସିଙ୍ଗାସଣ୍ ସେ ଗଃଳାର୍ ମଃଜାୟ୍ ରଃୟ୍ଦ୍ । ଆର୍ ସେତି ତାର୍ ସେବାକାରିମଃନ୍ ତାର୍ ଅଃର୍ଦନା କଃର୍ତି । 4ସେମଃନ୍ ତାର୍ ମୁଁ ଦଃକ୍ତି ଆର୍ ସେମଃନାର୍ କାହାଳେ ତାର୍ ନାଉଁ ଲେକା ଅୟ୍ଦ୍ । 5ସେତି ଆରେକ୍ ରାତି ନୟେ ଆର୍ କୁପି କି ବେଳ୍ ଉଜାଳ୍ ସେମଃନାର୍ ଆରେକ୍ ଲଳା ନାୟ୍, କାୟ୍ତାକ୍ବଃଲେକ୍ ମାପ୍ରୁ ଇସ୍ୱର୍ ସେମଃନାର୍ ଉଜାଳ୍ ଅୟ୍ଦ୍ ଆର୍ ସେମଃନ୍ ରଃଜା ହର୍ ସଃବୁବଃଳ୍ ରାଇଜ୍ କଃର୍ତି ।
ଜିସୁ ଆରେକ୍ ଆସ୍ତାର୍
6ଦୁତ୍ ମକ୍ କୟ୍ଲା, “ଇସଃବୁ କଃତା ସଃତ୍ ଆର୍ ବଃର୍ସାର୍ ଜୟ୍ଗ୍ । ଜାୟ୍ ଜାୟ୍ରି ବେଗି ଗଃଟେଦ୍, ସେରି ତାର୍ ସେବାକାରି ମଃନ୍କେ ଜାଣାଉଁକ୍ ବାବ୍ବାଦିମଃନ୍କେ ଆତ୍ମିକ୍ ବୁଦି ଦେତା ଇସ୍ୱର୍ ତାର୍ ଦୁତ୍କେ ହଃଟାୟ୍ ଆଚେ ।”
7ଜିସୁ କଃଉଁଲା, “ସୁଣ୍, ମୁୟ୍ ବେଗି ଆସୁଲେ, ଜୁୟ୍ମଃନ୍ ଇ ପୁସ୍ତକ୍ ତଃୟ୍ ଜାଣାୟ୍ରିଲା ବାବ୍ବାଣିକେ ମଃନ୍ ଦଃୟ୍ ମାନ୍ତି, ସେମଃନାର୍ ବାୟ୍ଗ୍ ।”
8ମୁୟ୍ ଜହନ୍, ଇ ସଃବୁ ବିସୟ୍ ନିଜେ ସୁଣିଆଚି ଆର୍ ଦଃକିଆଚି । ସଃବୁ ସୁଣ୍ଲା ଆର୍ ଦଃକ୍ଲା ହଃଚେ, ଜୁୟ୍ ଦୁତ୍ ମର୍ ତଃୟ୍ ସେରି ଜାଣାୟ୍ଲା, ତାର୍ ହାଦ୍ ତଃଳେ ଡୁଳି ତାକ୍ ଜୁଆର୍ କଃରୁକେ ଜାତି ରିଲେ । 9ମଃତର୍ ସେ କୟ୍ଲା, “ସେବାନ୍ୟା କଃର୍ ନାୟ୍, କାୟ୍ତାକ୍ବଃଲେକ୍ ମୁୟ୍ ହେଁ ତର୍ ହର୍ ଗଟେକ୍ ଗତିଦଃଙ୍ଗ୍ଳା । ତର୍ ଜୁୟ୍ ବାବ୍ବାଦି ବାୟ୍ମଃନ୍ ଆର୍ ଜୁୟ୍ ସଃବୁ ଲକ୍ ଇ ପୁସ୍ତକାର୍ କଃତା ହଃର୍କାରେ କଃତା ମାନି ରେତି, ସେମଃନାର୍ ହର୍ ମୁଏଁ ହେଁ ଗଟେକ୍ ସେବାକାରି । ଇସ୍ୱର୍କେ ଜୁଆର୍ କଃର୍ ।” 10ସେ ଆରେକ୍ ମକ୍ କୟ୍ଲା, “ଇ ପୁସ୍ତକାର୍ ଆସୁଲା ଦିନ୍ ଗଃଟ୍ତା କଃତା ମୁଦ୍ରାମାରି ସଃଙ୍ଗାଉଁ ନାୟ୍, କାୟ୍ତାକ୍ବଃଲେକ୍ ଇ ସଃବୁ ଗଃଟ୍ତା ବେଳା ଚଃମେ ଆୟ୍ଲିନି । 11ତଃବେ ଇ କଃତା ଜାଣି କଃରି ଜେ ଜାୟ୍ରି ଇଚା ସେରି କଃର । ଦସ୍ କାମ୍ କଃରୁ ଜଦି ଇଚା କଃରେଦ୍, ସେ ଆରେକ୍ ଦସ୍ କାମ୍ କଃର । ବିଟାଳ୍ ମାନାୟ୍ ବିଟାଳ୍ ଅୟ୍ ରେଉଅ । ମଃତର୍ ଜେ ଟିକ୍ କାମ୍ କଃରୁ, ସେ ଟିକ୍ କାମ୍ କଃରୁକେ ଚାଡ ନାୟ୍ । ଜେ ପବିତ୍ର ସେ ପବିତ୍ର ଅୟ୍କଃରି ରେଉଅ ।”
12ଜିସୁ କଃଉଁଲା, “ସୁଣା, ମୁୟ୍ ବେଗି ଆସୁଲେ, ହଃତି ଲକ୍କେ ନିଜାର୍ ନିଜାର୍ କାମ୍ ହଃର୍କାରେ ହଃଳ୍ ଦେଉଁକ୍ ମୁୟ୍ ପୁରିସ୍କାର୍ ଦଃରି ଆସିନ୍ଦ୍ । 13୨୨:୧୩ ପ୍ରକା ୧:୮; ପ୍ରକା ୧:୧୭; ୨:୮.ମୁୟ୍ ହଃର୍ତୁ ଆର୍ ସଃରାସଃରି, ଆରୁମ୍ ଆର୍ ସେସ୍ ।”
14ଜୁୟ୍ ଲକ୍ମଃନ୍ ନିଜାର୍ ନିଜାର୍ ବଃସ୍ତର୍ ଦଃୟ୍ ନିର୍ମୁଳ୍ କଃରିଆଚ୍ତି, ସେମଃନାର୍ ବାୟ୍ଗ୍ । ଜିବନ୍ ଗଃଚାର୍ ହଳ୍ କାଉଁକେ ଆର୍ ଦୁଆର୍ ଦଃୟ୍ ଗଃଳ୍ ବିତ୍ରେ ହୁରୁକ୍ ସେମଃନାର୍ ଅଃଦିକାର୍ ଆଚେ । 15ମଃତର୍ ବିଟାଳ୍ ଗୁଣାର୍ ଲକ୍, ଜଃତର୍ ମଃତର୍ କଃର୍ତା ଲକ୍, ନଃର୍ ମାର୍ତା ଲକ୍, ମୁର୍ତିହୁଜା କଃର୍ତା ଲକ୍, ମିଚ୍ କଃଉତା ଲକ୍ ଆର୍ ତାଳ୍ନା କଃର୍ତା ଲକ୍ମଃନ୍ ସଃବୁ ଗଃଳାର୍ ହଃଦାୟ୍ ରେତି ।
16“ମୁୟ୍ଁ ଜିସୁ । ମଣ୍ଡ୍ଳିମଃନାର୍ ତଃୟ୍ ତୁମିମଃନାର୍ ନିକର୍ ଗିନେ ଇ ସଃବୁ ବିସୟ୍ ସାକି ଦେଉଁକ୍ ମର୍ ଦୁତ୍କେ ହଃଟାୟ୍ ଆଚି । ମୁୟ୍ ଦାଉଦ୍ ବଃଉଁସାର୍ । ମୁୟ୍ ସେ ଉଜାଳ୍ ସଃକାଳାର୍ ତାରା ।”
17ପବିତ୍ର ଆତ୍ମା ଆର୍ ସେ ନଃଉଆଁ କଃନ୍ୟା କଃଉଁଲାୟ୍, ଆସା । ସୁଣ୍ତା ହଃତି ଲକ୍ ହେଁ କଃଉତି, ଆସା । ଜୁୟ୍ ଲକ୍କେ ସସ୍ ଲାଗୁଲି, ସେ ଆସ । ଜିବନ୍ ଦେତା ହାଣି କାଉଁକେ ଜାର୍ ଇଚା, ସେ ଆସି ମଲ୍ ନଃଦେତେ ସେରି ନେଉଅ ।
ସଃରାସଃରି କଃତା
18ମୁୟ୍ ଜହନ୍ । ଜୁୟ୍ ଲକ୍ମଃନ୍ ଇ ପୁସ୍ତକାର୍ ଆସୁଲା ଦିନ୍ ଗଃଟ୍ତା ବିସୟ୍ ସଃବୁ ସୁଣ୍ତି, ସେମଃନ୍କେ ମୁୟ୍ ସାକି ଦଃୟ୍ ଜଃଗ୍ରାତ୍ କଃରାଉଁଲେ, ଜଦି ଇତି କେ କାୟ୍ରି ଜଳେଦ୍, ତଃବେ ଇ ପୁସ୍ତକ୍ ତଃୟ୍ ଲେକା ଅୟ୍ଲା ମଃର୍ଡି ତଃୟ୍ ଇସ୍ୱର୍ ତାକ୍ ଡଃଣ୍ଡ୍ ଦଃୟ୍ଦ୍ । 19ଆର୍ ଇ ପୁସ୍ତକାର୍ ଆସୁଲା ଦିନ୍ ଗଃଟ୍ତା ବିସୟେ ହୁଣି କେ ଜଦି କାୟ୍ରି ଚାଡେଦ୍, ତଃବେ ଇସ୍ୱର୍ ତାକ୍ ଇ ପୁସ୍ତକ୍ ତଃୟ୍ ଲେକା ଅୟ୍ଲା ଜିବନ୍ ଗଃଚାର୍ ହଃଳ୍ ଆର୍ ପବିତ୍ର ଗଃଳ୍ ନଃଦେୟ୍ ।
20ଜେ ଇ ସଃବୁ ବିସୟେ ସାକି ଦେଉଁଲା, ସେ କଃଉଁଲା, “ଇରି ସଃତ୍କଃରି ଅୟ୍ଦ୍ । ମୁୟ୍ ବେଗି ଆସୁଲେ । ସେରି ସେ ଅଃଉଅ । ମାପ୍ରୁ ଜିସୁ ଆଉ ।”
21୨୨:୨୧ କଃତିଗଟ୍ ପୁସ୍ତକେ ଇସ୍ୱରାର୍ ଲକେ ବଃଲିଆଚେ, କଃତେକ୍ ତଃୟ୍ ଇସ୍ୱରାର୍ ସଃବୁ ଲକେ ବଃଲିଆଚେ ।ମାପ୍ରୁ ଜିସୁର୍ ଦଃୟା ସଃବୁ ଲକାର୍ ଉହ୍ରେ ଅଃଉଅ । ଆମେନ୍ ।