କରନ୍ତିୟମାନଙ୍କୁ ପ୍ରେରିତ ପାଉଲଙ୍କ ପ୍ରଥମ ପତ୍ର
କରନ୍ତି ଲକ୍ମଃନ୍କେ ପେରିତ୍ ପାଉଲାର୍ ହଃର୍ତୁ ଚିଟି
୧ କରନ୍ତି ଚିଟି ବିସୟେ ହଃଦେକ୍
କରନ୍ତି ମଣ୍ଡ୍ଳିକେ ପାଉଲାର୍ ହଃର୍ତୁ ଚିଟି ଜିସୁକ୍ରିସ୍ଟର୍ ଜଃଲମାର୍ ହାକାହାକି ୫୫ ବଃର୍ସ୍ ହଃଚେ ଲେକା ଅୟ୍ଆଚେ ୧:୧ । ଅଃମାର୍ ହାକ୍ ରିଲା ଜଳେକ୍ ଚିଟି ବିତ୍ରେ ଇରି ପାଉଲ୍ କରନ୍ତିକେ ଲେକ୍ଲା ହଃର୍ତୁ ଚିଟି । ପାଉଲ ଇ ଚିଟି ଏପିସିଏ ରଃୟ୍କଃରି କରନ୍ତିକେ ଜାତା ଆଗ୍ତୁ ମାସିଦନିଆୟ୍ ହୁଣି ଜାତା ବଃଳ୍ ଲେକ୍ଲା ଚିଟି ୧୬:୫-୯ । ଇ ଚିଟି ତଃୟ୍ ମଣ୍ଡ୍ଳିର୍ କଃତିଗଟ୍ ନେତାମଃନାର୍ ବିତ୍ରେ କଃତେକ୍ ଦୁର୍ବୁଳ୍ ଅବ୍ୟାସ୍ ରିଲା ବିସୟେ ଆର୍ ଦାରିକାମ୍ ସଃଙ୍ଗ୍ ଦଃଳ୍ ବାଗ୍ କଃର୍ତାର୍ ବିସୟ୍ ମଃନ୍ ଲେକୁଲା । କରନ୍ତି ଗଃଳ୍ ଦାରିକାମେ ଜାଣାସୁଣା ରିଲି ସେତାକ୍ ଇ ମଣ୍ଡ୍ଳି ହେଁ ଇ ବିସୟେ ଜଃଞ୍ଜାଳେ ହଃଳିରିଲି । କରନ୍ତି ପୁସ୍ତକେ ହେଁ ଲାଡ୍ ବିସୟେ ୧୩ ହଃଦେ ଗଟ୍ ମୁଳ୍ ବିସୟ୍ ଲେକା ଆଚେ ।
ଇ ଚିଟି ବିତ୍ରେ ରିଲା ମୁଳ୍ ବିସୟ୍ମଃନ୍
୧. ପାଉଲ କରନ୍ତିୟ ମଣ୍ଡ୍ଳିକେ ଦନ୍ୟବାଦ୍ ଆର୍ ଜୁଆର୍ ଜାଣାଉଁଲା । ୧:୧-୯
୨. ପାଉଲ ମଣ୍ଡ୍ଳିର୍ ଦଃଳ୍ବାଗ୍ ବିସୟେ ଲେକୁଲା । ୧:୧୦–୪:୨୧
୩. ପାଉଲ୍ ଦାରିକାମ୍ ଆର୍ ଜଃୟ୍ଲ୍ କଃଟାଉତା ବିସୟେ ଲେକୁଲା । ୫–୬
୪. ପାଉଲ ବିବାକଃତା, ମୁର୍ତିହୁଜା, ସେବା ଆର୍ଦ୍ନା, ଆତ୍ମାର୍ ଦାନ୍, ମଃରି ଉଟ୍ତାର୍ ବିସୟ୍ ମଃନ୍ କଃଉଁଲା । ୭–୧୫
୫. ସଃରାସଃରି ନିଜାର୍ ଚାଲ୍ଚାଲ୍ତି ବିସୟେ ଲେକୁଲା । ୧୬
11ମୁୟ୍ଁ ପାଉଲ୍ ଆର୍ ଇସ୍ୱରାର୍ ଇଚା ହଃର୍କାରେ କୁଦ୍ଲାର୍ ଜିସୁ କ୍ରିସ୍ଟର୍ ପେରିତ୍ ଅଃମାର୍ ବାୟ୍ ସସ୍ତିନାକେ ଜୁଆର୍ ହଃଟାଉଁଲୁ ।
2୧:୨ ପେରି ୧୮:୧.କରନ୍ତି ଗଃଳେ ରିଲା ଇସ୍ୱରାର୍ ମଣ୍ଡ୍ଳିକେ ଇ ଚିଟି ଲେକୁଲାୟ୍, ଜୁୟ୍ମଃନ୍ ଇସ୍ୱରାର୍ ହାୟ୍ ନିର୍ମୁଳ୍ ଲକ୍ ଅଃଉଁକେ କୁଦ୍ଲାର୍ ଆର୍ ଜିସୁ କ୍ରିସ୍ଟର୍ ସଃଙ୍ଗ୍ ମିସ୍ଲାକେ ଇସ୍ୱରାର୍ ଅୟ୍ ଆଚ୍ତି ଆର୍ ସଃବୁବଃଳ୍ ଅଃମାର୍ ମାପ୍ରୁ ଜିସୁକ୍ରିସ୍ଟର୍ ସେବା କଃରୁଲାୟ୍ ।
3ସେ ସଃବୁଲକେ ଅଃମିମଃନାର୍ ଉବା ଇସ୍ୱରାର୍ ଆର୍ ମାପ୍ରୁ ଜିସୁ କ୍ରିସ୍ଟର୍ ଦଃୟା ଆର୍ ସୁସ୍ତା ଅଃଉଅ ।
କ୍ରିସ୍ଟର୍ତଃୟ୍ ଆସିର୍ବାଦ୍
4ଜିସୁ କ୍ରିସ୍ଟର୍ ସଃଙ୍ଗ୍ ମିସ୍ଲାକେ ତୁମିମଃନ୍କେ ଦିଆ ଅୟ୍ଲାର୍ ଇସ୍ୱରାର୍ ଜୁୟ୍ ଦଃୟା ଆୟ୍ଲି, ସେତାର୍ ଗିନେ ମୁୟ୍ଁ ସଃବୁବଃଳ୍ ତୁମିମଃନ୍କାର୍ କଃତାୟ୍ ଇସ୍ୱର୍କେ ଦନ୍ୟବାଦ୍ ଦେଉଁଲେ, 5କାୟ୍ତାକ୍ବଃଲେକ୍ କ୍ରିସ୍ଟର୍ ସଃଙ୍ଗ୍ ମିସ୍ଲାକେ ତାର୍ ତଃୟ୍ ସଃବୁ କଃତାୟ୍, ମୁଳ୍କଃରି ସଃବୁ ରଃକମ୍ କଃତା କଃଉତାର୍ ସଃକ୍ତି ତଃୟ୍ ଆର୍ ସଃବୁରଃକମ୍ ଗିଆନେ ତୁମିମଃନ୍ ମାଜନ୍ ଅୟ୍ ଆଚାସ୍ । 6କ୍ରିସ୍ଟର୍ ସଃବୁ ବିସୟ୍ ତୁମିମଃନ୍କାର୍ ବିତ୍ରେ ତିର୍ କଃରାଅୟ୍ଆଚେ 7ସେତାର୍ଗିନେ ତୁମିମଃନ୍କେ ଅଃମିମଃନାର୍ ମାପ୍ରୁ ଜିସୁ କ୍ରିସ୍ଟର୍ ଆସ୍ତାର୍ ଜାଗିରଃୟ୍ ପବିତ୍ର ଆତ୍ମାର୍ ଦାନେ ହେଁ ଉଣା ନଃହେଳାସ୍ । 8ଅଃମିମଃନାର୍ ମାପ୍ରୁ ଜିସୁ କ୍ରିସ୍ଟର୍ ଦିନେ ଜଃନ୍କଃରି ତୁମିମଃନ୍ ଲିନ୍ଦା ନଃହାଉଆସ୍, ଇତାର୍ ଗିନେ ସେ ତୁମିମଃନ୍କେ ସେସ୍ଦିନ୍ ହଃତେକ୍ ବାଚାୟ୍ଦ୍ । 9ଜୁୟ୍ ଇସ୍ୱର୍ ତାର୍ ହୟ୍ସି ଜିସୁ କ୍ରିସ୍ଟର୍ ସଃଙ୍ଗ୍ ରେତାର୍ ଗିନେ ତୁମିମଃନ୍କେ କୁଦିଆଚେ ସେ ସଃବୁବଃଡ୍, ସଃତ୍ ।
ବିସ୍ୱାସି ବିତ୍ରେ ଦଃଳ୍ ବାଗ୍ ଅଃଉତାର୍
10ଏ ବାୟ୍ବେଣିମଃନ୍, ଅଃମିମଃନାର୍ ମାପ୍ରୁ ଜିସୁ କ୍ରିସ୍ଟର୍ ନାଉଁଏ ମୁଁୟ୍ ତୁମିମଃନ୍କେ ଗଃଉଆରି କଃରୁଲେ, ଜଃନ୍କଃରି ତୁମିମଃନ୍ ଗଟ୍ କଃତା କଃଉଆ, ଆର୍ ତୁମିମଃନ୍କାର୍ ବିତ୍ରେ ଦଳ୍ବାଗ୍ ନଃଉଅ, ମଃତର୍ ତୁମିମଃନ୍କେ ଗଟେକ୍ ମଃନେ ଗଟେକ୍ ବିଚାରେ ମିସା । 11ଏ ମର୍ ବାୟ୍ବେଣିମଃନ୍, କ୍ଲୟ୍ ଗଃରାର୍ ଲକାର୍ ତଃୟ୍ହୁଣି ତୁମାର୍ କଃତା ମକେ ଜାଣା ହଃଳିଆଚେ ଜେ, ତୁମାର୍ ବିତ୍ରେ ବେଗଳ୍ ଆଚେ 12୧:୧୨ ପେରି ୧୮:୨୪.ମର୍ କଃତାର୍ ବାବ୍ ଇରି, ତୁମିମଃନ୍କାର୍ ବିତ୍ରେ କୁୟ୍ କୁୟ୍ ଲକ୍ମଃନ୍, କଃଉଁଲାୟ୍, “ମୁଁୟ୍ ପାଉଲାର୍;” କେକେ କଃଉଁଲାୟ୍ “ମୁଁୟ୍ ଆପଲାର୍;” କେକେ କଃଉଁଲାୟ୍ “ମୁଁୟ୍ କେପାର୍;” ଆର୍ କେକେ କଃଉଁଲାୟ୍ “ମୁଁୟ୍ କ୍ରିସ୍ଟର୍ ହଃଚେ ଜଃଉଁଲେ ।” 13କ୍ରିସ୍ଟ କାୟ୍ ବାଗ୍ ଅୟ୍ଆଚେ ? ତୁମାର୍ ଗିନେ କାୟ୍ ପାଉଲ କ୍ରୁସେ ମଃରି ରିଲା ? ଆର୍ ତୁମିମଃନ୍କେ କାୟ୍ ପାଉଲାର୍ ନାଉଁଏ ବାପ୍ତିସମ୍ ଅୟ୍ରିଲାସ୍ ?
14୧:୧୪ ପେରି ୧୮:୮; ପେରି ୧୯:୨୯; ରମି ୧୬:୨୩.କ୍ରିସ୍ପ ଆର୍ ଗାୟକ୍ ଚାଡି ତୁମିମଃନ୍କାର୍ ବିତ୍ରେ ଆର୍ କାକେହେଁ ବାପ୍ତିସମ୍ ନଃଦେୟ୍ଁ ବଃଲି ମୁଁୟ୍ ଇସ୍ୱର୍କେ ଦନ୍ୟବାଦ୍ ଦେଉଁଲେ, 15ଇତାର୍ ଗିନେ କେ ତୁମିମଃନ୍କେ ମର୍ ନାଉଁଏ ବାପ୍ତିସମ୍ ଅୟ୍ ଆଚାସ୍ ବଃଲି କେ ନଃକଃଉଅତ୍ । 16୧:୧୬ ୧ କର ୧୬:୧୫.ହେଁ ସ୍ତିପାନାର୍ କୁଟୁମ୍କେ ହେଁ ବାପ୍ତିସମ୍ ଦଃୟ୍ଆଚି; ଇରି ଚାଡି ମୁୟ୍ଁ ଆର୍ କାକେ ବାପ୍ତିସମ୍ ଦଃୟ୍ଆଚି ବଃଲି ମୁୟ୍ଁ ଏତୁ କଃରୁଲେ । 17କାୟ୍ତାକ୍ବଃଲେକ୍ କ୍ରିସ୍ଟ ମକେ ବାପ୍ତିସମ୍ ଦେଉଁକେ ହଃଟାୟ୍ ନଃକେରେ, ନିକ କବୁର୍ ପର୍ଚାର୍ କଃରୁକେ ହଃଟାୟ୍ଲା, ସେରି ହେଁ କଃତାର୍ ବଃଡ୍ହାଣ୍ ଗିଆନେ ନାୟ୍, ଚଃନେମଃନେ କ୍ରୁସ୍ ଉହ୍ରେ କ୍ରିସ୍ଟର୍ ମଃର୍ନ୍ ହଲ୍ୟା ଅୟ୍ଦ୍ ।
କ୍ରିସ୍ଟ ଇସ୍ୱରାର୍ ସଃକ୍ତି ଆର୍ ଗିଆନ୍
18କାୟ୍ତାକ୍ବଃଲେକ୍ ନାସ୍ ଅଃଉତା ଲକ୍ମଃନାର୍ ଗିନେ କ୍ରୁସ୍ ଉହ୍ରେ କ୍ରିସ୍ଟର୍ ମଃର୍ନ୍ କଃତା ନିର୍ବୁଦିଆ, ମଃତର୍ ମୁକ୍ତି ହାଉତାର୍ ଅଃମିମଃନାର୍ ଗିନେ ସେରି ଇସ୍ୱରାର୍ ସଃକ୍ତି । 19ତଃବେ ସାସ୍ତରେ ଲେକା ଆଚେ,
“ମୁଁ ଗିଆନି ଲକ୍ମଃନାର୍ ଗିଆନ୍ ନଃସ୍ଟ୍ କଃରିନ୍ଦ୍,
ଆର୍ ବୁଦିମାନ୍ ମଃନାର୍ ବୁଦିକ୍ ନଃଚି ।”
20ଗିଆନି କଃୟ୍ ? ହଃଣ୍ଡିତ୍ କଃୟ୍ ? ଇ ଜଃଗତାର୍ କଃତାକାଟୁ ଗିଆନି କଃୟ୍ ? ଇସ୍ୱର୍ କାୟ୍ ଜଃଗତାର୍ ଗ୍ୟାନ୍କ୍ ନିର୍ବୁଦିଆ ବଃଲି କୟ୍ ନଃକେରେ ?
21କାୟ୍ତାକ୍ବଃଲେକ୍ ଇସ୍ୱରାର୍ ଗିଆନ୍ ଜାଣାହଃଳି ରିଲେକ୍ ହେଁ ଜଃଗତ୍ ନିଜାର୍ ଗିଆନେ ଇସ୍ୱର୍କେ ନଃଜାଣ୍ଲାକ୍ ଇସ୍ୱର୍ ବଃକୁଆ ହାଣେ ବିସ୍ୱାସ୍ କଃଲେକ୍ ମୁକ୍ତି ହାଉତାର୍ ସେରି ଇସ୍ୱର୍ ତିର୍ କଃଲା ଆଚେ । 22କାୟ୍ତାକ୍ବଃଲେକ୍ ଜିଉଦି ମଃନ୍ କାବା ଅଃଉତା ଚିନ୍ ଲଳ୍ତି, ଆର୍ ଗ୍ରିକ୍ମଃନ୍ ଗିଆନ୍ ଲଳ୍ତି । 23ମଃତର୍ ଅଃମିମଃନ୍ କ୍ରୁସେମଃଲା କ୍ରିସ୍ଟକେ ପର୍ଚାର୍ କଃରୁଲୁ, ଜେ ଜିଉଦିମଃନାର୍ ଗିନେ ବାଦା ହର୍ ଆର୍ ଅଜିଉଦିମଃନାର୍ ଗିନେ ଅଗ୍ୟାନ୍ ହର୍ । 24ମଃତର୍ ଜିଉଦି ଅଃଉଆ କି ଅଜିଉଦି ଲକ୍ ଅଃଉଆ, ଜୁୟ୍ ଲକ୍ମଃନ୍କେ ଇସ୍ୱର୍ କୁଦିଆଚେ, ସେମଃନାର୍ ଗିନେ କ୍ରିସ୍ଟ ଇସ୍ୱରାର୍ ସଃକ୍ତି ଆର୍ ଇସ୍ୱରାର୍ ଗିଆନ୍ ହର୍ ଅୟ୍ଦ୍ । 25ବଃଲେକ୍ ଜୁୟ୍ରି ଇସ୍ୱରାର୍ ନିର୍ବୁଦିଆର୍ କଃତା ମାନାୟ୍ର୍ ଗିଆନେ ହୁଣି ଅଃଦିକ୍ ହୁର୍ନ୍ ଗିଆନ୍ ହର୍, ଆର୍ ଇସ୍ୱରାର୍ ବଃଳ୍ ନାୟ୍ଲାର୍ ମାନାୟ୍ର୍ ବଃଳ୍ ତଃୟ୍ ହୁଣି ଅଃଦିକ୍ ସଃକାତ୍ ହର୍ ।
26ଏ ବାୟ୍ ଆର୍ ବେଣିମଃନ୍, ଇସ୍ୱର୍ କୁଦ୍ଲା ବଃଳ୍ ତୁମିମଃନ୍ କଃନ୍କାର୍ ରିଲାସ୍ ସେରି ଏତାୟ୍ ଦଃକା, ଜଃଗତାର୍ ଇସାବେ ବାବିଦଃକା ସଂସାରାର୍ କଃତା ହଃର୍କାରେ ତୁମିମଃନାର୍ ବିତ୍ରେ କଃତେକ୍ ଲକ୍ ଗିଆନି, ସଃକ୍ତିସାଳି ଆର୍ କଃତେକ୍ ଡାକେ ହୁଟି ରିଲାୟ୍ । 27ମଃତର୍ ଜଃନ୍କଃରି କୁୟ୍ ଜଃଗତ୍ ଇସ୍ୱରାର୍ ମୁଏଁ ଗର୍ବ୍ ନଃକେରେ, ଇତାକ୍ ମୁର୍କ୍ ବିସୟ୍ ବାଚି ଆଚେ । 28ଇତାର୍ ଗିନେ ଇସ୍ୱର୍ ଗିଆନି ମଃନ୍କେ ଲାଜ୍ କଃରାଉଁକ୍ ଜଃଗତାର୍ ଅଗ୍ୟାନିମଃନ୍କେ ବାଚିଆଚେ, ଆରେକ୍ ବଃଳ୍ବାନ୍ମଃନ୍କ୍ ଲାଜ୍ କଃରାଉଁକ୍ ଇସ୍ୱର୍ ଜଃଗତାର୍ ବଃଳ୍ ନଃୟ୍ଲା ଲକ୍କେ ବାଚ୍ଲା । 29ଆର୍ ଜାୟ୍ରି ଜଃଗତାର୍ ଆକାୟ୍ ମାୟ୍ନ୍କାରି, ସେ ସଃବୁ ତିନିହଲ୍ୟା କଃରୁକେ ଇସ୍ୱର୍ ଜଃଗତାର୍ ମଲ୍ ନୟ୍ଲାର୍ ଆର୍ ନଃହେଚାର୍ଲା କଃତାକ୍ ହେଁ, ଗଣିତା ନାୟ୍ଲାରିମଃନ୍ ବାଚ୍ଲା ଆଚେ । 30ମଃତର୍ ଇସ୍ୱର୍ ତୁମିମଃନ୍କେ ଜିସୁର୍ ତଃୟ୍ ମିସାୟ୍ ଆଚେ, ଆର୍ ସେ କ୍ରିସ୍ଟ ହଃକା ଅଃମାର୍ ଗିନେ ଗ୍ୟାନ୍ ହର୍ ଅୟ୍ଆଚେ । ତାର୍ ଗିନେ ଇସ୍ୱରାର୍ ସଃଙ୍ଗ୍ ଅଃମିମଃନାର୍ ମିସାଣ୍ ଟିକ୍ ଅୟ୍ଆଚେ, ତଃବାର୍ ଗିନେ ଦଃର୍ମି ଆର୍ ପବିତ୍ର ଲକ୍ ଅୟ୍ ମୁକ୍ଳି ଆଚୁ । 31ଇତାର୍ ଗିନେ ସାସ୍ତରେ ଜଃନ୍କାର୍ ଲେକା ଅୟ୍ଆଚେ, “ଜେ ଗଃର୍ବ୍ କଃରୁକେ ମଃନ୍ କଃରେଦ୍, ସେ ମାପ୍ରୁ ଜାୟ୍ରି କଃରିଆଚେ ସେତାର୍ ଗିନେ ସେ ଗଃର୍ବ କଃର ।”
2କ୍ରୁସେ ମଃଲା କ୍ରିସ୍ଟର୍ କଃତା
1ଏ ବାୟ୍ ଆର୍ ବେଣିମଃନ୍, ଜଃଡ୍ବଃଳ୍ ମୁୟ୍ଁ ତୁମିମଃନ୍କାର୍ ହାକ୍ ଜାୟ୍ ରିଲେ, ସଃଡେବଃଳ୍ ଇସ୍ୱରାର୍ ଗୁପ୍ତ୍ କଃତାର୍ ସଃତ୍ ପର୍ଚାର୍ କି, ଗିଆନାର୍ ବଃଡ୍କଃତା ଜେ ତୁମିମଃନାର୍ ହାକ୍ ପର୍ଚାର୍ କଃରିରିଲେ, ସେରି ନାୟ୍ । 2କାୟ୍ତାକ୍ବଃଲେକ୍ ଜିସୁ କ୍ରିସ୍ଟ ଆର୍ କ୍ରୁସ୍ ଉହ୍ରେ ତାର୍ ମଃର୍ନ୍ ଚାଡିକଃରି ତୁମିମଃନାର୍ ବିତ୍ରେ ଆରେକ୍ କାୟ୍ କଃତା ହେଁ ନଜାଣୁକ୍ ମୁଁୟ୍ ମଃନେ ତିର୍ କଃଲେ । 3୨:୩ ପେରି ୧୮:୯.ଆରେକ୍, ମୁଁୟ୍ ଦୁର୍ବୁଳ୍, ଡିର୍, ଆର୍ ବଃଡେ ଡିରାର୍ ସଃଙ୍ଗ୍ ତୁମିମଃନାର୍ ବିତ୍ରେ ରିଲେ । 4ଇତାର୍ ଗିନେ ମର୍ ସିକ୍ୟା ଆର୍ ମର୍ ପର୍ଚାର୍ ଗିଆନାର୍ ସୁନ୍ଦୁର୍ କଃତା ମିସ୍ଲାର୍ ନଃୟ୍କଃରି ଇସ୍ୱରାର୍ ଆତ୍ମାର୍ ସଃକାତ୍ ଆର୍ ସଃତ୍ ହଃର୍ମାଣ୍ରିଲାର୍ ଅୟ୍ରିଲି । 5ତୁମିମଃନ୍କାର୍ ବିସ୍ୱାସ୍ ଜଃନ୍କଃରି ମାନାୟ୍ର୍ ଗିଆନ୍ ଉହ୍ରେ ନଃୟ୍କଃରି ଇସ୍ୱରାର୍ ସଃକ୍ତି ଉହ୍ରେ ତିର୍ ଅୟ୍ଦ୍ ।
ଇସ୍ୱରାର୍ ଗିଆନ୍
6ଅୟ୍ଲେକ୍ ହେଁ ଅଃମିମଃନ୍ ଆତ୍ମାୟ୍ ହୁର୍ନ୍ ଲକ୍ମଃନ୍କାର୍ ବିତ୍ରେ ଗିଆନାର୍ କଃତା କଃଉଁଲୁ, ମଃତର୍ ସେରି ଇ ଜଃଗତାର୍ ଗିଆନ୍ ନୟ୍ କି ଇ ଜୁଗାର୍ ନେତାମଃନାର୍ ନଃସ୍ଟ୍ ଗିଆନ୍ ନାୟ୍ । 7ମଃତର୍ ଅଃମିମଃନ୍ ଗୁପ୍ତ୍ ଗିଆନ୍ ହର୍ ଇସ୍ୱରାର୍ ଗିଆନାର୍ କଃତା କଃଉଁଲୁ; ସେ ଗୁପ୍ତ୍ ଗିଆନ୍ ଇସ୍ୱର୍ ଅଃମିମଃନାର୍ ଜଃଜ୍ମାନାର୍ ଗିନେ ଜଃଗତାର୍ ଉବ୍ଜାଣ୍ ହୁର୍ବେ ଟିକ୍ କଃରିରିଲା । 8ଇ ଜଃଗତାର୍ ଅଃଦିକାରିମଃନାର୍ ବିତ୍ରେ କେହେଁ ସେରି ନଃଜାଣ୍ତି, ବଃଲେକ୍ ସେରି ଜାଣିରିଲେକ୍ ଜଃଜ୍ମାନାର୍ ମାପ୍ରୁକେ କ୍ରୁସେ ଚଃଗାୟ୍ ନଃକେଲାୟ୍ହୁଣି । 9ମଃତର୍ ଜଃନ୍କଃରି ଲେକା ଆଚେ,
“ଆକି ଜୁୟ୍ରି ନଃଦେକେ, କାନ୍ ଜୁୟ୍ରି ନଃସୁଣେ,
ଆର୍ ମାନାୟ୍ର୍ ମଃନେ ଜୁୟ୍ରି ଜାତ୍ ଅୟ୍ ନଃକେରେ,
ସେ ସଃବୁ ଇସ୍ୱର୍ ଅଃହ୍ଣାର୍ ଲାଡ୍କାରି ଲକ୍ମଃନାର ଗିନେ ଟିକ୍ କଃରିଆଚେ ।”
10ମଃତର୍ ଇସ୍ୱର୍ ଆତ୍ମା ତଃୟ୍ ଅଃମିମଃନାର୍ ଗିନେ ଇ ବିତ୍ରି କଃତା କୟ୍ଆଚେ; ସେ ଆତ୍ମା ହଃକା ଇସ୍ୱରାର୍ ସଃବୁ ଗୁପ୍ତ୍ କଃତାମଃନ୍ କଜେଦ୍ । 11ମାନାୟ୍ର୍ କଃତାମଃନ୍ ମାନାୟ୍ର୍ ବିତ୍ରେ ରିଲା ଆତ୍ମା ଜାଣେଦ୍ । ସେରଃକମ୍ ଇସ୍ୱରାର୍ କଃତାମଃନ୍ ଇସ୍ୱରାର୍ ଆତ୍ମାକେ ଚାଡି ଆରେକ୍ କେହେଁ ନଃଜାଣେ । 12ଜଃନ୍କଃରି ଇସ୍ୱରାର୍ ଲାଗି ଅଃମିମଃନ୍କ୍ ଦଃୟାକଃରି ଦିଲାର୍ କଃତାମଃନ୍ ଅଃମିମଃନ୍ ଜାଣୁ ହାରୁ, ଇତାର୍ ଗିନେ ଅଃମିମଃନ୍ ଜଃଗତାର୍ ଆତ୍ମା ନଃହାୟ୍ ଇସ୍ୱରାର୍ ଆତ୍ମା ହାୟ୍ ଆଚୁ ।
13ଜୁୟ୍ସଃବୁ କଃତା ସିକ୍ୟା ଦେୟ୍ଆଚି ଆତ୍ମିକ୍ କଃତା ଆତ୍ମିକ୍ ଲକ୍ମଃନ୍କେ ସିକ୍ୟା ଦଃୟ୍ଆଚି । ମଃତର୍ ମାନାୟ୍ର୍ ଗିଆନେ ସିକ୍ଲାର୍ କୟ୍ନଃରେଉଁ, ମଃତର୍ ଆତ୍ମାର୍ କଃତାମଃନ୍ ଆତ୍ମାର୍ କଃତାୟ୍ ବୁଜାୟ୍ ଆତ୍ମା ତଃୟ୍ ସିକ୍ଲା କଃତା କଃଉନ୍ଦ୍ । 14ମଃତର୍ ଜୁୟ୍ଲକାର୍ ତଃୟ୍ ଇସ୍ୱରାର୍ ଆତ୍ମା ନାୟ୍ ସେ ଜଃଗତାର୍ ମାନାୟ୍ ଇସ୍ୱରାର୍ ଆତ୍ମାର୍ କଃତାମଃନ୍ ମାନି ନଃକେରେ, କାୟ୍ତାକ୍ବଃଲେକ୍ ସେ ସଃବୁ ତାର୍ତଃୟ୍ ମଲ୍ ନୟ୍ଲାର୍, ଆରେକ୍ ସେ ସଃବୁ ବୁଜୁ ନାହାରେ, ଜୁୟ୍ରି ସେସଃବୁ ଆତ୍ମାୟ୍ ହଃକା ବୁଜୁକ୍ ନଃଚ୍ତି । 15ମଃତର୍ ଜାର୍ତଃୟ୍ ଇସ୍ୱରାର୍ ଆତ୍ମା ଆଚେ, ସେ ସଃବୁ କଃତାକ୍ ବିଚାର୍ କଃରେଦ୍, ମଃତର୍ ତାକେ କେହେଁ ତାର୍ ବୁଜୁକ୍ ନଃଚ୍ତି । 16କାୟ୍ତାକ୍ବଃଲେକ୍ ସାସ୍ତର୍ କଃଉଁଲି,
“କେ ମାପ୍ରୁର୍ ମଃନ୍ ଜାଣି ଆଚେ ଜେ,
ସେ ତାକେ ସିକାଉଁ ହାରେ ?”
ମଃତର୍ ଅଃମିମଃନ୍ କ୍ରିସ୍ଟର୍ ମଃନ୍ ହାୟ୍ ଆଚୁ ।
3ଇସ୍ୱରାର୍ ସେବାକାରି ମଃନ୍
1ଏ ବାୟ୍ବେଣିମଃନ୍, ମୁଁୟ୍ ଆତ୍ମାର୍ ମଃନାର୍ ଲକ୍ମଃନ୍କେ କୟ୍ଲା ହର୍ ତୁମିମଃନ୍କେ କଃଉ ନଃହାର୍ଲେ, ମଃତର୍ ଗଃଗାଳାର୍ ଲକ୍ମଃନ୍କେ ଆର୍ କ୍ରିସ୍ଟର୍ ତଃୟ୍, ବିସ୍ୱାସାର୍ ହିଲାମଃନ୍କେ କୟ୍ଲା ହର୍ ତୁମିମଃନ୍କେ କୟ୍ଲେ । 2୩:୨ ଏବ୍ରି ୫:୧୨,୧୩.ମୁଁୟ୍ ତୁମିମଃନ୍କେ ଦୁଦ୍ ସୁରାୟ୍ ବିନ୍ କାଦି ନଃଦିଲେ, କାୟ୍ତାକ୍ବଃଲେକ୍ ତୁମିମଃନ୍କେ ସେରି ସୁରୁକ୍ ସଃକ୍ତିନଃରିଲି ଆର୍ ଅଃବେ ହେଁ ସଃକାତ୍ ନଃଉଆସ୍ । 3ସେତାକ୍, ଅଃବେ ହଃତେକ୍ ତୁମିମଃନ୍କେ ଜଃଗତାର୍ ଲକ୍ହର୍ ଜିଉଁଲାସ୍ । କାୟ୍ତାକ୍ବଃଲେକ୍ ଜଃଡ୍ବଃଳ୍ ତୁମିମଃନ୍କାର୍ ବିତ୍ରେ ରିସା ଆର୍ ମାଡ୍ଗଳ୍ ଆଚେ, ତୁମିମଃନ୍କେ କାୟ୍ ଜଃଗତାର୍ ମାନାୟ୍ ନାୟ୍ ଆର୍ ମାନାୟ୍ର୍ ବାବ୍ ହଃର୍କାରେ ଚାଲ୍ଚାଲ୍ତି ନଃକେରାସ୍ ? 4୩:୪ ୧ କର ୧:୧୨.ଜୁୟ୍ତାକ୍ ଜଃଡ୍ବଃଳ୍ ଗଟ୍ଲକ୍ କୟ୍ଦ୍, “ମୁଁୟ୍ ପାଉଲାର୍” ଆରେକ୍ ଏକ୍ଲା କୟ୍ଦ୍ “ମୁୟ୍ଁ ଆପଲାର୍,” ତଃବେ ତୁମିମଃନ୍କେ ଇସ୍ୱରାର୍ ଆତ୍ମା ନଃହାୟ୍ଲା ଲକ୍ମଃନାର୍ ହର୍ ନୟ୍କି ?
5ପାଉଲ୍ କେ ଆର୍ ଆପଲ୍ କେ ? ସେମଃନ୍ତ ସେବାକାରି ମଃନ୍, ଜୁୟ୍ମଃନାର୍ କଃରୁକେ ହଃତିଲକେ ମାପ୍ରୁ ଜଃନ୍କଃରି ଦଃୟ୍ ଆଚେ, ସେହଃର୍କାରେ ତୁମିମଃନ୍କେ ସଃତ୍ କଃରିଆଚାସ୍ । 6୩:୬ ପେରି ୧୮:୪-୧୧; ପେରି ୧୮:୨୪-୨୮.ମୁଁୟ୍ ଲାଗାୟ୍ ଆଚି, ଆପଲ୍ ହାଣି ରଃକାୟ୍ ଆଚେ, ମଃତର୍ ଇସ୍ୱର୍ ବାଡାୟ୍ ଆଚେ । 7ତଃବେ, ଜେ ରୟ୍ଦ୍ କି ଜେ ହାଣି ରଃକାୟ୍ଦ୍, ସେ ବଃଡ୍ ନାୟ୍ ମଃତର୍ ବାଡାୟ୍ଦ୍ ଜୁୟ୍ ଇସ୍ୱର୍ ସେ ବଃଳ୍ । 8ଜେ ରୟ୍ଦ୍ ଆର୍ ଜେ ହାଣି ଚିଚେଦ୍, ସେ ଦୁୟ୍ଲକ୍ ଏକ୍, କାୟ୍ତାକ୍ବଃଲେକ୍ ହଃତିଲକ୍କେ ଇସ୍ୱର୍ ନିଜାର୍ କଃବାଳ୍ ହଃର୍କାରେ ପୁରିସ୍କାର୍ ଦଃୟ୍ଦ୍ । 9କାୟ୍ତାକ୍ବଃଲେକ୍ ଅଃମିମଃନ୍ ଇସ୍ୱର୍ ସଃଙ୍ଗ୍ କାମ୍ କଃରୁଲୁ ।
ତୁମିମଃନ୍କେ ଇସ୍ୱରାର୍ ତାସ୍ହଃଦା ଇସ୍ୱରାର୍ ଗଃର୍ । 10ମକେ ଦିଆଅୟ୍ଲା ଇସ୍ୱରାର୍ ଦଃୟା ହଃର୍କାରେ ମୁୟ୍ଁ ଗଟ୍ ବୁଦିରିଲା ଗଃର୍ ବାନ୍ଦୁହର୍ କୁନାଦି ହଃକାୟ୍ ଆଚି, ବିନ୍ଲକ୍ ତାର୍ ଉହ୍ରେ ବାନ୍ଦୁଲା । ମଃତର୍ ହଃତିଲକ୍ ସେତାର୍ ଉହ୍ରେ କଃନ୍କଃରି ବାନ୍ଦ୍ଲାୟ୍, ସେ କଃତାୟ୍ ଜଃଗ୍ରାତ୍ ଅଃଉଆ । 11କାୟ୍ତାକ୍ବଃଲେକ୍ ଇସ୍ୱର୍ ଜୁୟ୍ କୁନାଦି କଃରିଆଚେ ସେରି ଚାଡିକଃରି ବିନ୍ କୁନାଦି କେ ହେଁ ହଃକାଉଁ ନାହାରେ ସେ କୁନାଦି ଜିସୁ କ୍ରିସ୍ଟ । 12ମଃତର୍ କଃତେକ୍ ଲକ୍ ସେ କୁନାଦି ଉହ୍ରେ ସନା, ରୁହା, ବଡେମଲାର୍ ଟେଳା ଗଃର୍ ବାନ୍ଦ୍ତି । ଆରେକ୍ କଃତେକ୍ ଲକ୍ ଗଃଚ୍, ରଃନ୍ କି ହିରି ସଃଙ୍ଗ୍ ତିଆର୍ କଃର୍ତି । 13ତଃନ୍ଅଲେ ହଃତିଲକାର୍ କାମ୍ କଃନ୍କାର୍, ସେରି ଜାଣାହଃଳେଦ୍, ବଃଲେକ୍ କ୍ରିସ୍ଟ ଆରେକ୍ ଆସ୍ତା ଦିନ୍ ସେରି ଦଃକାୟ୍ଦ୍, ବଃଲେକ୍ ସେଦିନ୍ ଅଃମାର୍ କାମ୍ ଜୟ୍ ସଃଙ୍ଗ୍ ଦଃକାୟ୍ ଅୟ୍ଦ୍, ଆର୍ ହଃତି ଲକାର୍ କାମ୍ କଃନ୍କାର୍, ସେ ଜୟ୍ ପରିକ୍ୟା କଃରେଦ୍ । 14ଜେ ଜାୟ୍ରି କୁନାଦି ଉହ୍ରେ ଗଃଳି ଆଚେ, ତାର୍ ସେ କାମ୍ ଜଦି ରଃୟ୍ଦ୍, ତଃବେ ସେ ପୁରିସ୍କାର୍ ହାୟ୍ଦ୍ । 15ଜଦି କାର୍ କାମ୍ ହଡିଜାୟ୍ଦ୍, ସେ ପୁରିସ୍କାର୍ ନଃହାୟ୍, ଅୟ୍ଲେକ୍ ହେଁ ସେ ନିଜେ, ସେରି ଜୟ୍ ବିତ୍ରେ ଗଃଲାହର୍ ଅୟ୍ ମୁକ୍ଳେଦ୍ ।
16୩:୧୬ ୧ କର ୬:୧୯; ୨ କର ୬:୧୬.ତୁମିମଃନ୍ କାୟ୍ ନଃଜାଣାସ୍ ? ତୁମିମଃନ୍ ଇସ୍ୱରାର୍ ମନ୍ଦିର୍, ଆର୍ ଇସ୍ୱରାର୍ ଆତ୍ମା ତୁମିମଃନ୍କାର୍ ବିତ୍ରେ ବାସା କଃରେଦ୍ । 17ଜଦି କୁୟ୍ ଲକ୍ ଇସ୍ୱରାର୍ ମନ୍ଦିର୍କେ ନଃସ୍ଟ୍ କଃରେଦ୍, ତବେ ଇସ୍ୱର୍ ତାକେ ନଃସ୍ଟ୍ କଃରେଦ୍; କାୟ୍ତାକ୍ବଃଲେକ୍ ଇସ୍ୱରାର୍ ମନ୍ଦିର୍ ପବିତ୍ର, ସେ ମନ୍ଦିର୍ ତୁମିମଃନ୍ ।
18କେ ଅଃହ୍ଣାକ୍ ନଃଟକ । ଜଦି କୁୟ୍ଲକ୍ ଇ ଜଃଗତାର୍ ତୁମିମଃନ୍କାର୍ ବିତ୍ରେ ଅଃହ୍ଣାକ୍ ଗିଆନି ବଃଲି ବାବେଦ୍, ତଃବେ ସେ ଜଃନ୍କଃରି ଗିଆନି ଅଃଉଁ ହାରେ, ଇତାର୍ ଗିନେ ସେ ବଃକୁଆ ହର୍ ଅଃଉଅ । 19କାୟ୍ତାକ୍ବଃଲେକ୍ ଇ ଜଃଗତାର୍ ଗିଆନ୍ ଇସ୍ୱରାର୍ ତଃୟ୍ ବଃକୁଆରି । ସାସ୍ତରେ ଲେକାଆଚେ, “ଇସ୍ୱର୍ ଗ୍ୟାନିମଃନ୍କ୍ ସେମଃନାର୍ ଚାଲାକିତଃୟ୍ ଦଃରେଦ୍ ।” 20ଆରେକ୍ ହେଁ ସାସ୍ତରେ ଲେକାଆଚେ, “ଗ୍ୟାନିମଃନାର୍ କଃତା କାଟାକାଟି ଅଃସାର୍ ବଃଲି ମାପ୍ରୁ ଜାଣୁଲା ।” 21ମୁଳ୍କଃରି ତୁମିମଃନ୍କେ ସଃବୁ କଃତାର୍ ଅଃଦିକାରି । ସେତାକ୍, କେ ମାନାୟ୍ କଃଲା କାମ୍କେ ଗଃର୍ବ୍ ନଃକେର । 22ପାଉଲ୍ ବଃଲା କି ଆପଲ୍ ବଃଲା କି ପିତର୍ କଃଉଆ, ଜଃଗତ୍ କଃଉଆ କି ଜିବନ୍ କଃଉଆ କି ମଃର୍ନ୍ କଃଉଆ, ଅଃବାର୍ କଃତା କଃଉଆ କି ଗଃଟ୍ତା କଃତା ସଃବୁ ହେଁ ତୁମାର୍ । 23ମଃତର୍ ତୁମିମଃନ୍ କ୍ରିସ୍ଟର୍, ଆର୍ କ୍ରିସ୍ଟ ଇସ୍ୱରାର୍ ।
4କ୍ରିସ୍ଟର୍ ପେରିତ୍ ମଃନ୍
1ଲକ୍ମଃନ୍ ଅଃମିମଃନ୍କ୍ କ୍ରିସ୍ଟର୍ ଦଃଙ୍ଗ୍ଳା, ଆରେକ୍ ଇସ୍ୱରାର୍ ଗୁପ୍ତ୍କଃତାର୍ ବଃଣ୍ଡାର୍ଗଃରିଆ ବଃଲି ବାବତ୍ । 2ଆର୍ ବଃଣ୍ଡାର୍ଗଃରିଆ କଃତାୟ୍ ଇରି ବାୟ୍ଦ୍ରେ ଲଳା, ଜଃନ୍କଃରି ସେ ବିସ୍ୱାସାର୍ ଜୟ୍ଗ୍ ଜାଣାହଃଳେଦ୍ । 3ମଃତର୍ ତୁମିମଃନ୍କେ କି ଲକ୍ କଃଲା କୁଟୁମ୍ ବିଚାର୍ କଃର୍ତି ମର୍ ହାୟ୍ଁ ବଃଡ୍ କଃତା ନାୟ୍, ଇ ରଃକମ୍ ମୁଁୟ୍ ନିଜେ ନିଜାର୍ ବୁଜୁକ୍ ନାହାରି । 4କାୟ୍ତାକ୍ବଃଲେକ୍ ମୁଁୟ୍ ନିଜାର୍ ବିରଦେ କାୟ୍ରି ବୁଜୁକ୍ ନଃଜାଣି । ଅୟ୍ଲେକ୍ ହେଁ ଇତାର୍ ଗିନେ ନିର୍ଦସି ବଃଲି ଜାଣାନଃହେଳି; ମଃତର୍ ଜେ ମକେ ବିଚାର୍ କଃରେଦ୍, ସେ ମାପ୍ରୁ । 5ସେତାକ୍, ବେଳା ଆଗ୍ତୁ ମାପ୍ରୁ ବିଚାର୍ କଃରୁକେ ଆସ୍ତା ହଃତେକ୍ କାୟ୍ କଃତା ହେଁ ବିଚାର୍ ନଃକେରା, ସେ ଅଃନ୍ଦାର୍ ବିତ୍ରାର୍ ଗୁପ୍ତ୍ କଃତାମଃନ୍ ଉଜାଳେ ଦଃକାୟ୍ଦ୍, ଆରେକ୍ ମଃନାର୍ ବାବ୍ନାମଃନ୍ ହଃଦାୟ୍ ଦଃକାୟ୍ଦ୍; ସଃଡେବଃଳ୍ ହଃତିଲକ୍ ଇସ୍ୱରାର୍ ତଃୟ୍ ଜଃଜ୍ମାନ୍ ହାଉତି ।
6ଏ ବାୟ୍ବେଣିମଃନ୍, ମୁଁୟ୍ ତୁମିମଃନ୍କେ ସିକାଉଁକେ ଇ ସଃବୁ କଃତା ମକେ ନିଜ୍କେ ଆର୍ ଆପଲକେ ଦଃକି ଜାଣତ୍ ବଃଲି କୟ୍ଲେ, ଜଃନ୍କଃରି ଜୁୟ୍ରି ସାସ୍ତରେ ଲେକା ଆଚେ, ସେରି ମାନା ଇତି ତୁମିମଃନ୍କେ ଅଃମାର୍ ତଃୟ୍ ହୁଣି ସିକା, ଆରେକ୍ ଜଃନ୍କଃରି ତୁମିମଃନ୍କାର୍ ବିତ୍ରେ କାକେ ଦଃରି ଗଃର୍ବ କଃରା ନାୟ୍ ଆର୍ କାକେ ଦଃରି ସାନ୍ କଃରାନାୟ୍ । 7ବଃଲେକ୍ କେ ତୁମିକେ ବଃଡ୍ କଃଲା ଆଚେ ? ଆର୍ ଜୁୟ୍ ଇସ୍ୱରାର୍ ବେଟି ନଃହାଉଆସ୍, ଇରଃକମ୍ କାୟ୍ରି ଆଚେ ? ଜଦି ତୁମି ଦାନ୍ ଦିଲା ହର୍ ହାୟ୍ ଆଚାସ୍, ତବେ ସେରି ଦାନ୍ ନଃହାୟ୍ଲା ହର୍ କାୟ୍କଃରୁକ୍ ଗଃର୍ବ୍ କଃରୁଲାସ୍ ?
8ତୁମିମଃନ୍କେ କାୟ୍ ସଃବୁ ଲଳାରି ମିଳିସଃର୍ଲିନି ? ଅଃତେକ୍ ବିତ୍ରେ କାୟ୍ ତୁମିମଃନ୍ ମାଜନ୍ ଅୟ୍ଲାସ୍ ? ଅଃମିକ୍ ଚାଡି ତୁମିମଃନ୍ କାୟ୍ ରଃଜା ଅୟ୍ ଆଚାସ୍ ? ହେଁ ତୁମିମଃନ୍ ରଃଜା ଅୟ୍ରିଲେକ୍ ନିକ ଅୟ୍ଲି ହୁଣି, ତଃନ୍ଅଲେ ଅଃମିମଃନ୍ ହେଁ ତୁମିମଃନାର୍ ସଃଙ୍ଗ୍ ରାୟ୍ଜ୍ କଃଲୁହୁଣି । 9କାୟ୍ତାକ୍ବଃଲେକ୍ ମର୍ ଏତୁହଃଳୁଲି ଅଃମାର୍ ହର୍ ପେରିତ୍ ମଃନ୍କେ ଇସ୍ୱର୍ ସେସ୍ ହଃତେକ୍ ସଃଙ୍ଗାୟ୍ ଆଚେ ସଃବୁ ଜଃଗତାର୍ ଆର୍ ଦେବ୍ ଦୁତ୍ ମଃନାର୍ ମୁଏଁ ନିଚଳାୟ୍ ଅଃଉତା ଲକାର୍ କଃରି ସଃଙ୍ଗାୟ୍ ଆଚେ । 10ଅଃମିମଃନ୍ କ୍ରିସ୍ଟର୍ ଗିନେ ବଃକୁଆ, ମଃତର୍ ତୁମିମଃନ୍ କ୍ରିସ୍ଟକେ ମିସିରିଲାକେ ବୁଦିରିଲାର୍; ଅଃମିମଃନ୍ ଦୁର୍ବୁଳ୍, ମଃତର୍ ତୁମିମଃନ୍ ବପୁକାରି, ତୁମିମଃନ୍ ଜଃଜ୍ମାନାର୍, ମଃତର୍ ଅଃମିମଃନ୍ ହାକ୍ରେ ହିଙ୍ଗ୍ଲାର୍ । 11ଅଃବେ ହଃତେକ୍ ହେଁ ଅଃମିମଃନ୍ ବୁକେ ଆର୍ ସଃସେ ଆଚୁ, ହାଟ୍ଲା ବଃସ୍ତର୍ ହିନ୍ଦୁଲୁ ଆର୍ ମାଡ୍କାଉଁଲୁ, ଆରେକ୍ ଆସ୍ର ନଃହାୟ୍ ଏଣେ ତେଣେ ବୁଲୁଲୁ 12୪:୧୨ ପେରି ୧୮:୩.ନିଜାର୍ ଆତେ କାମ୍ କଃରୁକଃରୁ କଃସ୍ଟ୍ କଃରୁଲୁ, ଲିନ୍ଦା ହାୟ୍ ଆସିର୍ବାଦ୍ କଃରୁଲୁ, କଃସ୍ଟ୍ ହାୟ୍ ସଃମ୍ବାଳ୍ଲୁ, 13ବେଗଳ୍ କଃଲେକ୍ ହେଁ ମିସ୍ତା କଃତା କଃଉଁଲୁ; ଅଃବେ ହଃତେକ୍ ଅଃମିମଃନ୍ ଜଃଗତାର୍ କଃଉଆର୍ ହର୍ ଅୟ୍ ଆଚୁ, ସଃବୁଲକ୍ ଅଃମିକ୍ ହାକ୍ରେ ହଃକାୟ୍ ଆଚ୍ତି ।
14ମୁଁୟ୍ ତୁମିମଃନ୍କେ ଲାଜ୍ କଃରାଉଁକ୍ ଇରି ନଃଲେକି, ମଃତର୍ ମର୍ ନିଜାର୍ ଲାଡାର୍ ହିଲା ବଃଲି ମଃନେକଃରି ତୁମିମଃନ୍କେ ଚେତାୟ୍ ଦେଉଁକେ ଇ ସଃବୁ ଲେକୁଲେ । 15କାୟ୍ତାକ୍ବଃଲେକ୍ ତୁମିମଃନାର୍ ଜଦି କ୍ରିସ୍ଟର୍ କଃତା ଦଃସ୍ଅଃଜାର୍ ସିକାଉତା ଲକ୍ ରେତି, ଅୟ୍ଲେକ୍ ହେଁ ତୁମିମଃନ୍କାର୍ ଗଟେକ୍ ଉବାଦି; କାୟ୍ତାକ୍ବଃଲେକ୍ କ୍ରିସ୍ଟ ଜିସୁର୍ ସଃଙ୍ଗ୍ ମୁଁୟ୍ ତୁମିମଃନ୍କେ ନିକ କବୁରେ ପର୍ଚାର୍ କଃରି ତୁମାର୍ ଉବାଦି ହର୍ ଅୟ୍ଲେ ଆଚି । 16୪:୧୬ ୧ କର ୧୧:୧; ପିଲିପି ୩:୧୭.ଇତାର୍ ଗିନେ ତୁମିମଃନ୍କେ ଗଃଉଆରି କଃରୁଲେ, ତୁମିମଃନ୍ ମର୍ କଃତା ମାନା । 17ଇତାର୍ ଗିନେ ମୁଁୟ୍ ତିମତିକେ ତୁମାର୍ ହାକ୍ ହଃଟାଉଁଲେ, ସେ ମାପ୍ରୁର୍ ତଃୟ୍ ମର୍ ଲାଡାର୍ ମାୟଃନ୍କାରି ହଅ; ଜଃନ୍କଃରି ମୁଁୟ୍ ସଃବୁବାଟ୍ ସଃବୁ ବିସ୍ୱାସି ଦଃଳ୍କେ ସିକାଉଁଲେ, ସେ ରଃକମ୍ ସେ ତୁମିମଃନ୍କେ ମର୍ ଜିସୁ କ୍ରିସ୍ଟର୍ ଜିବନାର୍ ଗୁଣ୍ମଃନ୍ ସଃବୁ ଏତାୟ୍ ଦଃୟ୍ଦ୍ ।
18ମୁଁୟ୍ ତୁମିମଃନ୍କାର୍ ହାକ୍ ନଃଜଃଉଁଲେ ବଃଲି କୁୟ୍ କୁୟ୍ ଲକ୍ମଃନ୍ ହୁରାହୁରି ଗଃର୍ବ୍ କଃରୁଲାୟ୍ । 19ମଃତର୍ ଜଦି ମାପ୍ରୁ ମଃନ୍ କଃରେଦ୍, ମୁଁୟ୍ ତୁମିମଃନ୍କାର୍ ହାକ୍ ବେଗି ଆସିନ୍ଦ୍; ଆରେକ୍ ଜୁୟ୍ମଃନ୍ ଗଃର୍ବ୍ କଃରୁଲାୟ୍, ସେମଃନ୍କାର କଃତା ନାୟ୍ ମଃତର୍ ସଃକ୍ତି ମୁୟ୍ଁ ନିଜେ ଜାଣିନ୍ଦ୍ । 20କାୟ୍ତାକ୍ବଃଲେକ୍ ଇସ୍ୱରାର୍ ରାଇଜ୍ କଃତାୟ୍ ହଃକା ନାୟ୍, ମଃତର୍ ସଃକାତ୍ ଜାଣାହ୍ଳେଦ୍, 21ତୁମିମଃନ୍କାର୍ ମଃନ୍ କାୟ୍ରି ମୁଁୟ୍ ଡାଙ୍ଗ୍ ଦଃରି ତୁମାର୍ ହାକ୍ ଆସିନ୍ଦ୍ କି ଲାଡ୍ ନଃୟ୍ ଦିର୍ସୁସ୍ତାର୍ ମଃନ୍ ଆତ୍ମା ଦଃରି ଆସିନ୍ଦ୍ ।
5ବିସ୍ୱାସି ଦଃଳେ ଦାରିକାମ୍
1ସଃତ୍କଃରି ସୁଣାଜଃଉଁଲି ଜେ, ତୁମାର୍ ବିତ୍ରେ ଦାରିକାମ୍ ଆଚେ, ଆର୍ ଇ ରଃକମ୍ ଦାରିକାମ୍, ଜୁୟ୍ରିକି ଅଜିଉଦି ଲକ୍ମଃନାର୍ ତଃୟ୍ ହେଁ ନାୟ୍, ଇ ରଃକମ୍ ଗଟ୍ଲକ୍ କୁଡ୍ ଆୟ୍ସିକ୍ ସଃଙ୍ଗାୟ୍ ଆଚେ । 2ଆରେକ୍ ଜେ ଇ କାମ୍ କଃରିଆଚେ, ସେ ଜଃନ୍କଃରି ତୁମିମଃନ୍କାର୍ ତଃୟ୍ ହୁଣି ବିନେ କଃରା ଅୟ୍ଦ୍, ଇତାର୍ ଗିନେ କାନ୍ଦି ନଃକେରି ଗଃର୍ବ୍ କଃରୁଲାସ୍ । 3ମଃତର୍ ମୁୟ୍ଁ ଗଃଗାଳେ ସେତି ନଃରିଲେକ୍ ହେଁ, ଆତ୍ମାୟ୍ ସେତି ରଃୟ୍, ଜେ ଅଃନ୍କା କାମ୍ କଃରିଆଚି, ମୁୟ୍ଁ ସେତି ରିଲା ହର୍ କଃଉଁଲେ ମାପ୍ରୁ ଜିସୁର୍ ନାଉଁଏ ତାର୍ ବିଚାର୍ ସଃରିଆଚେ । 4ବଃଲେକ୍, ତୁମିମଃନ୍କେ ଆର୍ ମର୍ ଆତ୍ମା ଅଃମିମଃନାର୍ ମାପ୍ରୁ ଜିସୁ ନାଉଁଆର୍ ସଃକ୍ତିୟେ ରୁଣ୍ଡିକଃରି ଇରି ଟିକ୍ କଃରିଆଚୁ ଜେ, 5ଅଃନ୍କା ଲକେ ଗଃଗାଳାର୍ ନଃସ୍ଟ୍ ଅଃଉଁକେ ସୟ୍ତାନାର୍ ଆତେ ସଃର୍ହିଦେତା ଲଳା, ଜଃନ୍କଃରି ମାପ୍ରୁ ଜିସୁର୍ ଦିନେ ତାର୍ ଆତ୍ମା ବଚୁହାରେ ।
6୫:୬ ଗାଲା ୫:୯.ତୁମିମଃନ୍କେ ଅଃନ୍କଃରି ଗଃର୍ବ୍ କଃର୍ତାର୍ ନିକ ନାୟ୍ । ତୁମିମଃନ୍ କାୟ୍ ନଃଜାଣାସ୍ କି, “ଇଡିକଃଣ୍ଡ୍ କମିର୍ ସଃବୁ ମୟ୍ଦା ଇଟ୍ଲାକେ କମିର୍ କଃରି ଦଃୟ୍ଦ୍ ।” 7ତୁମିମଃନ୍ ତ ନିର୍ମୁଳ୍ ଲକ୍, ଇତାକ୍ ଜଃନ୍କଃରି ନଃଉଆଁ ମଇଦା ଅଃଉଁ ହାରାସ୍, ଇତାର୍ ଗିନେ ହର୍ନା ମଇଦା ବାର୍କଃରି ହଃକାଉଆ; ବଃଲେକ୍ ଅଃମିମଃନାର୍ ମୁକ୍ଳାଉତା ହଃର୍ବାର୍ ମେଣ୍ଡାହିଲା, ବଃଲେକ୍ କ୍ରିସ୍ଟ ହେଁ ହୁଜାଅୟ୍ ଆଚେ । 8ତଃବେ ଆସା, ଅଃମିମଃନ୍ ଦୁସ୍ଟ୍ ଆର୍ କଃରାବ୍ କାମାର୍ ହର୍ କମିର୍ ତଃୟ୍ ହଃର୍ବ ହାଳି ନଃକେରି ନିର୍ମଃୟାଁ ସଃଙ୍ଗ୍ ସଃତାର୍ କମିର୍ ନୟ୍ଲାର୍ ହଃର୍ବ ମାନୁଆଁ ।
9ଦାରି କଃରୁମଃନ୍ ସଃଙ୍ଗ୍, ମିଳାମିସା ନଃକେରୁକେ ମୁୟ୍ଁ ତୁମିମଃନ୍କେ ହୁର୍ବାର୍ ଚିଟିତଃୟ୍ ଲେକି ରିଲେ । 10ଇ ଜଃଗତାର୍ ଦାରିକଃରୁ କି ଦଃନ୍ଲଃବି, ଲକାର୍ ଦଃନ୍ବିତ୍ ଚର୍ତା ଲକ୍ କି ହୁଜେରି ମଃନ୍କାର୍ ସଃଙ୍ଗ୍ ଜେ ମୁଳ୍କେ ସଃଙ୍ଗ୍ ଦଃରାନାୟ୍ଁ । ତଃନ୍ଅଲେ ତୁମିମଃନ୍କେ ଜଃଗତେ ହୁଣି ବାରାୟ୍ ଜଃଉଁକେ ହଃଳେଦ୍ । 11ମଃତର୍ ମର୍ ଲେକ୍ତାର୍ ବାବ୍ ଇରି ରିଲି, ଜଦି କୁୟ୍ଲକ୍ ବାୟ୍ ବଃଲି ଡାକେହୁଟି ଦାରିଆ, କି ଦଃନ୍ଲଃବି, କି ହୁଜେରି, କି ଲିନ୍ଦାକଃରୁ, କି ମାତୁଆଳି, କି ହଃରାର୍ ଦଃନ୍ ଚର୍ ଅୟ୍ଦ୍, ତଃବେ ସେରଃକମ୍ ଲକାର୍ ସଃଙ୍ଗ୍ ମିସା ନାୟ୍, ଆରେକ୍ ତାର୍ସଃଙ୍ଗ୍ କାହା ହେଁ ନାୟ୍ ।
12କାୟ୍ତାକ୍ବଃଲେକ୍ ହଃଦାର୍ ଲକ୍ମଃନାର୍ ବିଚାର୍ କଃରୁକେ ମୁୟ୍ଁ କେ ? ମଃତର୍ ବିସ୍ୱାସି ଦଃଳ୍ ବିତ୍ରେ ରିଲା ଲକ୍ମଃନ୍କେ ବିଚାର୍ କଃର୍ତା ଅଃଦିକାର୍ ଅଃମାର୍ ନାୟ୍ କି ? 13ମଃତର୍ ଜୁୟ୍ମଃନ୍ ହଃଦାୟ୍ ଆଚ୍ତି, ସେମଃନ୍କାର ବିଚାର୍ ଇସ୍ୱର୍ କଃରେଦ୍ । ଦଃର୍ମ୍ ସାସ୍ତରେ ଲେକା ଆଚେ, “ସେ ଦୁସ୍ଟ୍ ଲକ୍ମଃନ୍କେ ତୁମାର୍ ବିତ୍ରେ ହୁଣି ବାର୍କଃରି ଦିଆସ୍ ।”
6ବିସ୍ୱାସି ବିରଦେ କେସ୍ କଃର୍ତାର୍
1ତୁମିମଃନ୍କାର୍ ବିତ୍ରେ କାର୍ ବିନ୍ଲକାର୍ ବିରଦେ କଃତା ରିଲେକ୍ ସେତାର୍ ବିଚାର୍ କଃରୁକେ ବିସ୍ୱାସି ମଃନାର୍ ହାକ୍ ନଃଜାୟ୍ଁ ବିସ୍ୱାସ୍ ନଃକେର୍ତା ବିଚାର୍ କଃରୁ ଲକାର୍ ତଃୟ୍ ଜଃଉଁକେ କଃନ୍କଃରି ସାସ୍ କଃରେଦ୍ ? 2ଇସ୍ୱରାର୍ ଲକମଃନ୍ ଜଃଗତାର୍ ବିଚାର୍ କଃର୍ତି, ଇ କଃତା କାୟ୍ ତୁମିମଃନ୍ ନଃଜାଣାସ୍ ? ଆର୍ ଜଃଗତ୍କେ ତୁମିମଃନ୍ ବିଚାର୍ କଃରାସ୍, ତଃବେ ତୁମିମଃନ୍ ସାନ୍ ସାନ୍ କଃତା ବିଚାର୍ କଃରୁକେ ଜୟ୍ଃଗ୍ ନାୟ୍କି ? 3ଅଃମିମଃନ୍ ସଃର୍ଗ୍ ଦୁତ୍ମଃନାର୍ ବିଚାର୍ କଃରୁ ହାରୁନ୍ଦ୍, ତଃବେ ଜଃଗତାର୍ ଜିବ୍କା ବିସୟେ ବିଚାର୍ କଃରୁକେ କଃସ୍ଟ୍ କି ? ଇରି କାୟ୍ ତୁମିମଃନ୍ ନଃଜାଣାସ୍ ? 4ତଃବେ ଇ ଜିବନାର କଃତା କାୟ୍ରି ? ବଃଲେକ୍ ଜଦି ବିଚାରାର୍ ଗିନେ ତୁମିମଃନ୍କାର୍ ଇ ଜିବନାର୍ କଃତା କାୟ୍ କଃତା ରିଲେକ୍, ତଃବେ ମଣ୍ଡ୍ଳିଏ ଜୁୟ୍ ଲକ୍ମଃନ୍ ଗଣିତା ନାୟ୍, ସେମଃନ୍କେ କାୟ୍ ବିଚାର୍ କଃରୁକେ ବଚାସ୍ ? 5ମୁଁୟ୍ଁ ତୁମିମଃନ୍କେ ଲାଜ୍ କଃରାଉଁକ୍ କଃଉଁଲେ । ବାୟ୍ବାୟ୍ ବିତ୍ରେ କଃତା ଚିଡାଉଁକେ ହାରେ, ଇରଃକମ୍ ଏକ୍ଲା ହେଁ ଗିଆନି ଲକ୍ କାୟ୍ ସଃତ୍କଃରି ତୁମାର୍ ବିତ୍ରେ ନାୟ୍ ? 6ମଃତର୍ ବାୟ୍ ବିରଦେ ବାୟ୍ ବିଚାର୍ କଃର୍ତା କର୍ଟେ କୟ୍ଦ୍, ସେରି ହେଁ ଅବିସ୍ୱାସିମଃନାର୍ ହାକ୍ ।
7ମଃତର୍ ତୁମିମଃନ୍କେ ଗଟ୍ଲକ୍ ଆରେକ୍ ଗଟ୍ଲକାର୍ ବିରଦେ ବିଚାର୍ କଃର୍ତାତଃୟ୍ ନେଉଁଲାସ୍, ସେତାକ୍ ତୁମିମଃନ୍ ବାୟ୍ଦ୍ରେ ଦସି । ତଃବେ କାୟ୍ତାକ୍ ଅଃନ୍ୟାୟ୍ ସଃମ୍ବାଳୁ ନାହାରୁଲାସ୍ ? 8ତୁମିମଃନ୍ ନିଜେ ନିଜେ ଅଃନ୍ୟାୟ୍ ଆର୍ ନଃସ୍ଟ୍ କଃରୁଲାସ୍, ଆର୍ ସେରି ବାୟ୍ ମଃନ୍କେ କଃରୁଲାସ୍ । 9ତଃବେ ସଃତ୍ ନଃକେର୍ତା ଲକ୍ ତ ଇସ୍ୱରାର୍ ରାଇଜେ ଅଃଦିକାରି ନଃଉତି, ଇରି କାୟ୍ ତୁମିମଃନ୍ ନଃଜାଣାସ୍ ? ବୁଲ୍କି ନଃଜାହା, ଦାରିଆ କି ହୁଜେରି କି ଅଃଣ୍ଡ୍ରାଅଃଣ୍ଡ୍ରା ଟକିଟକି ଦାରି କଃର୍ତାର୍ କି ଟକି ହର୍ ଚାଲ୍ଚାଲ୍ତି କି ବେସୁଆ, 10କି ଚର୍ କି ଦଃନ୍ଲଃବି ମାତୁଆଳି କି ଲିନ୍ଦାକଃରୁ କି ବିନ୍ ଲକାର୍ ଆସ୍ତିମଃନ୍ ଚର୍, ଇମଃନ୍ ଇସ୍ୱରାର୍ ରାଇଜାର୍ ଅଃଦିକାରି ନଃଉତି । 11ଆର୍ ତୁମିମଃନ୍କାର୍ ବିତ୍ରେ କୁୟ୍ କୁୟ୍ ଲକ୍ମଃନ୍ ଇରଃକମ୍ ରିଲାୟ୍; ମଃତର୍ ମାପ୍ରୁ ଜିସୁ କ୍ରିସ୍ଟର୍ ନାଉଁଏ ଆର୍ ଅଃମିମଃନାର୍ ଇସ୍ୱରାର୍ ଆତ୍ମା ତଃୟ୍ ତୁମିମଃନ୍କେ ଦଃଉଆ ଅୟ୍ଆଚେ, ନିର୍ମୁଳ୍ କଃରା ଅୟ୍ ଆଚାସ୍ ଆର୍ ଦଃର୍ମି ବଃଲି ଗଃଣା ଅୟ୍ ଆଚାସ୍ ।
ଦାରି କାମେହୁଣି ଦୁରିକ୍ ରିଆ
12୬:୧୨ ୧ କର ୧୦:୨୩.କେ କଃଉଁ ହାରେ, “ସଃବୁ କଃରୁକେ ମର୍ ଅଃଦିକାର୍ ଦିଆ ଅୟ୍ଆଚେ, ମଃତର୍ ସଃବୁ କଃତା ଉହ୍କାରି ନାୟ୍ ।” ମୁୟ୍ଁ କଃଉଁ ହାରି, ସଃବୁକଃତା ହୁର୍ନ୍ କଃରୁକେ ମର୍ ଅଃଦିକାର୍ ଆଚେ, ମଃତର୍ ମୁଁୟ୍ କାୟ୍ କଃତାୟ୍ ହେଁ ଆରିନଃକେରି । 13ଆରେକ୍ କେ କଃଉଁ ହାରେ, “କାଦି ହେଟାର୍ଗିନେ, ଆର୍ ହେଟ୍ କାଦିର୍ ଗିନେ; ମଃତର୍ ଇସ୍ୱର୍ ଜଳେକ୍କେ ହେଁ ନସ୍ଟ୍ କଃରେଦ୍ ।” ଗଃଗାଳ୍ ବେସୁଆ କାମ୍ ଗିନେ ନାୟ୍, ମଃତର୍ ମାପ୍ରୁର୍ ସେବାର୍ ଗିନେ, ଆର୍ ମାପ୍ରୁ ଗଃଗାଳାର୍ ଗିନେ ସଃବୁ ଜାଗାୟ୍ଦ୍ । 14ଇସ୍ୱର୍ ଜିସୁ ମାପ୍ରୁକେ ମଃର୍ନେହୁଣି ଉଟାୟ୍ଲା, ଆରେକ୍ ନିଜାର୍ ସଃକ୍ତିଏ ଅଃମିମଃନ୍କ୍ ହେଁ ଉଟାୟ୍ଦ୍ ।
15ତୁମିମଃନାର୍ ଗଃଗାଳ୍ ଜେ କ୍ରିସ୍ଟର୍ ଗଃଗାଳ୍ ହର୍, ଇତି ନଃଜାଣାସ୍ କି ? ତଃବେ ମୁଁୟ୍ କ୍ରିସ୍ଟର୍ ଗଃଗାଳ୍କେ ନଃୟ୍କଃରି ବେସୁଆ ଗଃଗାଳ୍ କଃରିନ୍ଦ୍ କି ? ସେରି କଃବେହେଁ ନଃଉଅ । 16କି ଜେ ବେସୁଆ ସଃଙ୍ଗ୍ ମିସିଜାୟ୍ଦ୍, ସେ ତାର୍ ସଃଙ୍ଗ୍ ଗଟେକ୍ ଗଃଗାଳ୍ ଅୟ୍ଦ୍, ଇରି କାୟ୍ ତୁମିମଃନ୍ ନଃଜାଣାସ୍ ? କାୟ୍ତାକ୍ କଃଉଆ ଅୟ୍ଆଚେ, “ସେ ଦୁୟ୍ଲକ୍ ଗଟେକ୍ ଗଃଗାଳ୍ ଅଃଉତି ।” 17ମଃତର୍ ଜେ ମାପ୍ରୁ ସଃଙ୍ଗ୍ ମିସେଦ୍, ସେ ତାର୍ସଃଙ୍ଗ୍ ଆତ୍ମାୟ୍ ଗଟେକ୍ ଅୟ୍ଦ୍ ।
18ବେସୁଆ କାମ୍ ଚାଡି ଦିଆସ୍ । ମାନାୟ୍ ଜୁୟ୍ ହାହ୍ ହେଁ କଃରେଦ୍, ସେରି ଗଃଗାଳାର୍ ବିଟାଳ୍ ନଃକେରେ; ମଃତର୍ ଜେ ବେସୁଆ ଅୟ୍ଦ୍, ସେ ନିଜାର୍ ଗଃଗାଳାର୍ ବିରଦେ ହାହ୍ କଃରେଦ୍ । 19୬:୧୯ ୧ କର ୩:୧୬; ୨ କର ୬:୧୬.ତୁମିମଃନ୍କାର୍ ଗଃଗାଳ୍ ଜେ ଇସ୍ୱରାର୍ ତଃୟ୍ ହୁଣି ହାୟ୍ଲା ତୁମିମଃନ୍କାର୍ ବିତ୍ରେ ବାସାକଃର୍ତା ପବିତ୍ର ଆତ୍ମାର୍ ମନ୍ଦିର୍, ଇରି କାୟ୍ ନଃଜାଣାସ୍ ? ଆର୍ ତୁମିମଃନ୍ ନିଜେ ନିଜାର୍ ନାୟ୍, ମଃତର୍ ଇସ୍ୱରାର୍ । 20କାୟ୍ତାକ୍ବଃଲେକ୍ ତୁମିମଃନ୍ ବଃଡେ ମଲେ ଗେନ୍ଲାର୍; ଇତାର୍ ଗିନେ ତୁମିମଃନ୍କାର୍ ଗଃଗାଳ୍ ଇସ୍ୱରାର୍ ଜଃଜ୍ମାନ୍ ଗିନେ ବେବାର୍ କଃରା ।
7ବିବା କଃତା
1ତୁମିମଃନ୍ ଜୁୟ୍ସଃବୁ କଃତା ଲେକି ଆଚାସ୍, ସେ ସଃବୁର୍ ଉତୁର୍ ଇରି, ବିବା ନଃଉତାର୍ ଅଃଣ୍ଡ୍ରାର୍ ଗିନେ ନିକ; 2ମଃତର୍ ଦାରିକାମ୍ ଡିରାର୍ ଗିନେ ହଃତି ଅଃଣ୍ଡ୍ରାର୍ ନିଜାର୍ ମାୟ୍ଜି ଦଃର୍କାର୍, ଆର୍ ହଃତି ମାୟ୍ଜିର୍ ଗଟେକ୍ ଗଟେକ୍ ଅଃଣ୍ଡ୍ରା ରେଅତ୍ । 3ଅଃଣ୍ଡ୍ରା ନିଜାର୍ ମାୟଜିକେ ତାର୍ ହାଉତାର୍ ହୁରୁଣ୍ କଃର, ଆରେକ୍ ହେଁ ସେରଃକମ୍ ମାୟ୍ଜି ତାର୍ ଅଃଣ୍ଡ୍ରା ହାଉତାର୍ ହୁରୁଣ୍ କଃର । 4ମାୟ୍ଜିର୍ ନିଜାର୍ ଗଃଗାଳ୍ ଉହ୍ରେ ଅଃଦିକାର୍ ନାୟ୍, ମଃତର୍ ଅଃଣ୍ଡ୍ରାର୍ ଆଚେ; ସେରଃକମ୍ ଡକ୍ରାସିର୍ ହେଁ ନିଜାର୍ ଅଃହ୍ଣାର୍ ଗଃଗାଳ୍ ଉହ୍ରେ ଅଃଦିକାର୍ ନାୟ୍ ମଃତର୍ ମାୟ୍ଜିର୍ ଆଚେ । 5ଦୁୟ୍ଲକ୍ ହେଁ ନାୟ୍ ନଃବେଲା; କେଜାଣ୍ ପାର୍ତ୍ନା ଗିନେ ବେଳା ହାଉଁକେ ଦୁୟ୍ଲକ୍ ହେଁ ମାନାମାନିଅୟ୍ ଚଃନେକାର୍ ଗିନେ ବିନେ ଅୟ୍ ରେଉଁ ହାରାସ୍; ଆର୍ ତୁମିମଃନ୍କାର୍ ଗଃଗାଳ୍ ଉଟ୍ତାର୍ ତେବାଉଁକେ ନାହାର୍ତାର୍ ଗିନେ ସୟ୍ତାନ୍ ଜଃନ୍କ୍ରି ତୁମିମଃନ୍କେ କଃଟ୍ହାଳ୍ ନଃବୁଜେ, ଇତାର୍ ଗିନେ ଆରେକ୍ ମିସା ।
6ମୁଁୟ୍ ତୁମିକେ ଆଦେସ୍ ଦିଲା ହର୍ ନଃକୟ୍ଁ, ମଃତର୍ ତୁମିମଃନାର୍ ନିକ ଗିନେ ଇତି କଃଉଁଲେ । 7ଅୟ୍ଲେକ୍ ହେଁ ସଃବୁଲକ୍ ମର୍ ହର୍ ଅଃଉତି, ଇରି ମର୍ ମଃନ୍, ମଃତର୍ କେ ଇ ରଃକମ୍ କେ ସେ ରଃକମ୍, ହଃତିଲକ୍ ଇସ୍ୱରାର୍ ତଃୟ୍ ହୁଣି ଦାନ୍ ହାୟ୍ ଆଚ୍ତି ।
8ମଃତର୍ ମୁୟ୍ଁ ବିବା ନଃଉତା ଆର୍ ରାଣ୍ଡିମଃନ୍କେ କଃଉଁଲେ, ସେମଃନ୍ ମର୍ ହର୍ ଏକ୍ଲା ରିଲେକ୍ ସେମଃନାର୍ ହାଁୟ୍ ନିକ ଅୟ୍ଦ୍ । 9ମଃତର୍ ଜଦି ସେମଃନ୍ ଗଃଗାଳାର୍ ଇଚା ସଃମ୍ବାଳୁ ନଃହାର୍ତି, ତଃବେ ବିବା ଅଃଉଅତ୍; କାୟ୍ତାକ୍ବଃଲେକ୍ ଗଃଗାଳ୍ ସଃମ୍ବାଳୁ ନଃହାର୍ତା ବାଦୁଲେ ବିବା ଅଃଉତାର୍ ନିକ ।
10୭:୧୦ ମାତି ୫:୩୨; ୧୯:୯; ମାର୍କ ୧୦:୧୧,୧୨; ଲୁକ ୧୬:୧୮.ମଃତର୍ ବିବା ଅୟ୍ଲାର୍ ମଃନ୍କେ ମୁଁୟ୍ ଜଃବର୍ କଃଉଁଲେ, ମୁୟ୍ଁ ନୟ୍ ମଃତର୍ ମାପ୍ରୁ କଃଉଁଲା ମାୟ୍ଜି ନିଜାର୍ ଅଣ୍ଡ୍ରାତଃୟ୍ ହୁଣି ବିନେ ନଃଉଅ 11ମଃତର୍ ଜଦି ସେ ବିନ୍ ଅୟ୍ଦ୍, ତଃବେ ସେ ଆରେକ୍ ବିବା ନଃକେର, ଆର୍ ନିଜାର୍ ଅଣ୍ଡ୍ରାସଃଙ୍ଗ୍ ମିସ ଆର୍ ଅଃଣ୍ଡ୍ରା ନିଜାର୍ ମାୟ୍ଜିକେ ନଃଚାଡ ।
12ମଃତର୍ ବିନ୍ ସଃବ୍କେ କଃଉଁଲେ, ମାପ୍ରୁ ନଃକୟ୍, ଜଦି କୁୟ୍ ବିସ୍ୱାସି ବାୟ୍ର୍ ବିସ୍ୱାସ୍ ନକେର୍ତା ମାୟ୍ଜି ରଃୟ୍ଦ୍, ଆର୍ ସେ ମାୟ୍ଜି ତାର୍ ସଃଙ୍ଗ୍ ରେଉଁକେ ମଃନ୍କଃରେଦ୍, ତଃବେ ସେ ତାକେ ନଃଚାଡ । 13ଆର୍ ଜୁୟ୍ ମାୟ୍ଜିର୍ ଅବିସ୍ୱାସି ଅଃଣ୍ଡ୍ରା ରୟଦ୍ ଆର୍ ସେ ଅଃଣ୍ଡ୍ରା ତାର୍ ସଃଙ୍ଗ୍ ରେଉଁକେ ମଃନ୍କଃରେଦ୍, ତଃବେ ସେ ନିଜାର୍ ଡକ୍ରାସିକ୍ ଚାଡନାୟ୍ । 14କାୟ୍ତାକ୍ବଃଲେକ୍ ଅବିସ୍ୱାସି ଅଃଣ୍ଡ୍ରା ମାୟ୍ଜିର୍ ଗିନେ ନିର୍ମୁଳ୍ କଃରାଜାୟ୍ ଆଚେ, ଆର୍ ବିସ୍ୱାସ୍ ନୟ୍ଲା ମାୟ୍ଜି ଅଃଣ୍ଡ୍ରାର୍ ଗିନେ ନିର୍ମୁଳ୍ କଃରାଜାୟ୍ ଆଚେ, ତଃନ୍ ଅଲେ ତୁମିମଃନାର୍ ହିଲାମଃନ୍ ନିର୍ମୁଳ୍ ନାୟ୍ । 15ଅୟ୍ଲେକ୍ ହେଁ ଜଦି ଅବିସ୍ୱାସି ବିନ୍ବିନ୍ ଅଃଉଁକେ ମଃନ୍ କଃର୍ତି, ତବେ ସେମଃନ୍ ବିନ୍ବିନ୍ ଅଃଉଅତ୍, ଅଃନ୍କା ତଃୟ୍ ସେ ବାୟ୍ କି ବେଣି ଗତି ନାୟ୍; ଇସ୍ୱର୍ ତୁମିମଃନ୍କେ ସୁସ୍ତାୟ୍ ବେବାର୍ କଃରୁକେ କୁଦିଆଚେ । 16ତଃବେ ଏ ବିସ୍ୱାସି ମାୟ୍ଜି ତୁୟ୍ ଜେ ଅଃହ୍ଣାର୍ ଅଃଣ୍ଡ୍ରାର୍ ମୁକ୍ଳାଉତାର୍ ହର୍ ଅଃଉସି, ଇରି କାୟ୍ ନଃଜାଣ୍ସି ? କି ଏ ବିସ୍ୱାସି ଡକ୍ରାସି ତୁୟ୍ ଜେ ନିଜାର୍ ଡକୁର୍ଦିର୍ ମୁକ୍ଳାଉତାର୍ କଃତା ଅଃଉସି ଇରି କାୟ୍ ନଃଜାଣ୍ସି ?
ଇସ୍ୱର୍ କୁଦ୍ଲା ହଃର୍କାରେ ଚାଲାଚାଲ୍ତି
17ମାପ୍ରୁ ଜାକେ ଜଃନ୍କଃରି ଦାନ୍ ବାଟାକଃରି ଦିଲା ଆଚେ, ଇସ୍ୱର୍ ହଃତିଲକେ ଜଃନ୍କଃରି କୁଦି ଆଚେ ସେ ସେରଃକମ୍ ହଃକା ବେବାର୍ କଃର । ମୁଁୟ୍ ସଃବୁ ମଣ୍ଡ୍ଳି ତଃୟ୍ ଇ ରଃକମ୍ କଃଉଁଲେ । 18କାକେ ଜଦି ଇସ୍ୱର୍ ସୁନତ୍ ଆୟ୍ଲା ଅବୁସ୍ତାୟ୍ କୁଦି ଆଚେ, ସେ ସୁନତ୍ ନୟ୍ଲା ହର୍ ଦଃକାୟ୍ ଅଃଉଁକ୍ ମଃନ୍ ନଃକେର । ଜଦି କାକେ ଇସ୍ୱର୍ ସୁନତ୍ ନଃଉତ୍ କୁଦ୍ଲା ଆଚେ, ସେ ସୁନତ୍ ନଃଉଅ । 19ସୁନତ୍ ଅଃଉତାର୍ କି ସୁନତ୍ ନଃଉତାର୍ ବଃଡ୍ କଃତା ନାୟ୍ ମଃତର୍ ଇସ୍ୱରାର୍ ଆଦେସ୍ ମାନ୍ତାର୍ ହଃକା ବଃଡ୍ କଃତା । 20ଇସ୍ୱର୍ କୁଦ୍ଲା ବଃଳ୍ ଜେ ଜୁୟ୍ ଅବୁସ୍ତାୟ୍ ରିଲା, ସେ ଅବୁସ୍ତାୟ୍ ରେଉଅ । 21ତୁମି କି ଗତିଦଃଙ୍ଗ୍ଳା ଅୟ୍ କୁଦାୟ୍ ଅୟ୍ ଆଚାସ୍ ? ଦୁକ୍ କଃରାନାୟ୍; ମଃତର୍ ଜଃବେ ମୁକ୍ଳୁକ୍ ବାଟ ହାଉଆସ୍, ତଃବେ ସେ ଅବୁସ୍ତାକ୍ ବେବାର୍ କଃରା । 22କାୟ୍ତାକ୍ବଃଲେକ୍ ଜେ ଗତିଦଃଙ୍ଗ୍ଳା ଅୟ୍ କୁଦାୟ୍ ଅୟ୍ଆଚେ, ସେ ମାପ୍ରୁର୍ ମୁକ୍ତ୍ ଲକ୍, ସେରଃକମ୍ ଜେ ମୁକ୍ତ୍ ଅୟ୍ କୁଦାୟ୍ ଅୟ୍ଆଚେ, ସେ କ୍ରିସ୍ଟର୍ ଗତିଦଃଙ୍ଗ୍ଳା । 23ଇସ୍ୱର୍ ତୁମିମଃନ୍କେ ବଃଡେ ମଲେ ଗେନି ଆଚେ, ମାନାୟ୍ମଃନାର୍ ଗତିଦଃଙ୍ଗ୍ଳା ଅଃଉଆ ନାୟ୍ । 24ଏ ବାୟ୍ ଆର୍ ବେଣିମଃନ୍ ଇସ୍ୱର୍ ତୁମିମଃନ୍କେ କୁଦ୍ଲା ବଃଳ୍ ତୁମିମଃନ୍କେ ଜୁୟ୍ ଅବୁସ୍ତାୟ୍ ରିଲାସ୍ ସେ ଅବୁସ୍ତାୟ୍ ଇସ୍ୱରାର୍ ସଃଙ୍ଗ୍ ରିଆ ।
ଡିଣ୍ଡାମଃନାର୍ ଆର୍ ରାଣ୍ଡିମଃନାର୍ କଃତା
25ତୁମିମଃନ୍କେ ବିବା ନୟ୍ଲା ଲକାର୍ କଃତା ଜାଣୁକେ ମଃନ୍ କଃଲାସ୍ ମାପ୍ରୁର୍ ତଃୟ୍ ହୁଣି କାୟ୍ କଃତା ହେଁ ନଃସୁଣି, ମଃତର୍ ମାପ୍ରୁର୍ ଦଃୟାର୍ ଗିନେ ବିସ୍ୱାସି ଅୟ୍ ନିଜାର୍ ମଃନାର୍ କଃତା କଃଉଁଲେ ।
26ମୁଁୟ୍ ମଃନ୍କଃରୁଲେ, ଜେ ମାନାୟ୍ ଜଃନ୍କଃରି ଆଚେ; ଆସୁଲା ବିପ୍ତିର୍ ଗିନେ ସେରଃକମ୍ ରେତା ଲଳା । 27ତୁମି କି ଡକୁର୍ଦି ସଃଙ୍ଗ୍ ବାନ୍ଦିଅୟ୍ ଆଚାସ୍ ? ତଃବେ ମୁକ୍ତ୍ ଅଃଉଁକେ ବାଟ୍ କଜା ନାୟ୍ । ତୁମି କି ମାୟ୍ଜି ତଃୟ୍ ହୁଣି ମୁକ୍ତ୍ ? ତଃବେ ମାୟ୍ଜି ହାଉଁକେ ବାଟ୍ କଜା ନାୟ୍ । 28ମଃତର୍ ଜଦି ତୁମିମଃନ୍ ବିବା କଃରିଆଚାସ୍, ତଃନ୍ଅଲେ ବାୟ୍ଦ୍ରେ ହାହ୍ ନଃକେରାସ୍ । ମଃତର୍ ବିବା ଅୟ୍ଲା ଲକ୍ ଗଃଗାଳେ ଦୁକ୍ହାୟ୍ଦ୍ । ଆର୍ ତୁମିମଃନ୍ ଜଃନ୍କଃରି ରଃକ୍ୟାହାଉଆସ୍, ଇରି ମର୍ ମଃନ୍ ।
29ମଃତର୍ ଏ ବାୟ୍ବେଣିମଃନ୍, ମର୍ କଃତାର୍ ବାବ୍ ଇରି, ବେଳା ନାୟ୍ନି, ସେତାକ୍ ଜୁୟ୍ଲକାର୍ ମାୟ୍ଜି ଆଚେ, ସେମଃନ୍ ମାୟ୍ଜି ନୟ୍ଲା ହର୍ ଅଃଉଅତ୍ । 30ଆର୍ ଜୁୟ୍ମଃନ୍ କାନ୍ଦ୍ତି, ସେମଃନ୍ ନଃକାନ୍ଦ୍ତା ଲକ୍ ହର୍ ଅଃଉଅତ୍; ଆର୍ ଜୁୟ୍ମଃନ୍ ସଃର୍ଦା କଃର୍ତି, ସେମଃନ୍ ସଃର୍ଦା ନଃକେର୍ତା ଲକ୍ହର୍ ଅଃଉଅତ୍; ଜୁୟ୍ମଃନ୍ ଗେନ୍ତି ସେମଃନ୍ ଅଃଦିକାରି ନୟ୍ଲା ଲକ୍ହର୍ ଅଃଉଅତ୍ । 31ଆର୍ ଜୁୟ୍ ଲକ୍ମଃନ୍ ଜଃଗତାର୍ କଃତାୟ୍ ବୁଡି ଆଚ୍ତି, ସେମଃନ୍ ଜଃଗତେ ବୁଡି ନଃରେଅତ୍ । କାୟ୍ତାକ୍ ବଃଲେକ୍ ଇ ଜଃଗତାର୍ ରୁହ୍ ଆରେକ୍ ତିର୍ ଅୟ୍ ନଃରେୟ୍ ।
32ତୁମିମଃନ୍କେ ଜଃନ୍କଃରି ଚିତାକଃରା ନାୟ୍, ଇରି ମର୍ ମଃନ୍ । ଜେ ବିବା ନୟ୍ଆଚେ ସେ କଃନ୍କଃରି ମାପ୍ରୁର୍ ଗଟେକ୍ ଲାଡାର୍ ଅୟ୍ଦ୍, ଇତାର୍ ଗିନେ ମାପ୍ରୁର୍ କଃତା ନଃୟ୍ ଚିତା କଃରେଦ୍ । 33ମଃତର୍ ଜେ ବିବା ଅୟ୍ଆଚେ, ସେ କଃନ୍କଃରି ନିଜାର୍ ମାୟ୍ଜିର୍ ଲାଡାର୍ ଅୟ୍ଦ୍, ସେତାର୍ ଗିନେ ସେ ଜଃଗତାର୍ କଃତାକ୍ ନଃୟ୍ ଚିତା କଃରେଦ୍ । 34ତାର୍ ମଃନ୍ ଦୁୟ୍ ବାଗ୍ ଅୟ୍ଦ୍ । ବିବା ନଃଉତା ମାୟ୍ଜି ଆର୍ ଦଃଙ୍ଗ୍ଳି ମାପ୍ରୁ କାମେ ସେ ମଃନ୍ ଦଃୟ୍ଦ୍, ବଃଲେକ୍ ଗଃଗାଳେ ଆର୍ ଆତ୍ମାୟ୍ ମଃନେ ପବିତ୍ର ଅଃଉଁକେ ମାପ୍ରୁର୍ କଃତା ନଃୟ୍ ଚିତା କଃର୍ତି; ମଃତର୍ ଜେ ବିବା ଅୟ୍ଆଚେ ସେ କଃନ୍କଃରି ନିଜାର୍ ଅଃଣ୍ଡ୍ରାର୍ ଲାଡାର୍ ଅଃଉଁକେ ଦଃନ୍ଦା ରଃୟ୍ଦ୍, ସେତାର୍ ଗିନେ ଜଃଗତାର୍ କଃତାୟ୍ ଚିତା କଃରେଦ୍ ।
35ଇ କଃତା ମୁଁୟ୍ ତୁମିମଃନ୍କାର୍ ନିଜାର୍ ବଃଲ୍ ହାୟ୍ କଃଉଁଲେ, ତୁମିମଃନ୍ ବାନ୍ଦୁଣେ ବାନ୍ଦୁକେ ନଃକୟ୍ଁ, ମଃତର୍ ତୁମିମଃନ୍କେ ଜଃନ୍କ୍ରି ନିକ ବେବାର୍ କଃରି ଏକ୍ମଃନେ ମାପ୍ରୁର୍ ତଃୟ୍ ମିସି ରିଆସ୍, ଇତାର୍ ଗିନେ କଃଉଁଲେ ।
36ମାଗ୍ଣି ଅୟ୍ଲା ହଃଚେ ଅଃଣ୍ଡ୍ରା ଜଦି ମଃନ୍କଃରେଦ୍ ତଃବେ ମାଗ୍ଲା ଡକୁର୍ସିକେ ମିସୁକେ ମଃନ୍ ଅଃଉଁଲି ଆର୍ ଜଦି ତାର୍ ଗଃଗାଳ୍ ଟେକୁଲି ସେ ତାକେ ବିବା କଃରୁକେ ବାୟ୍ଦ୍ରେ ଲଳା, ତଃବେ ସେମଃନ୍ ତାକାର୍ ମଃନ୍ ହଃର୍କାରେ ବିବା କଃରତ୍, ଇତାର୍ ଗିନେ କାୟ୍ ହାହ୍ ନାୟ୍ । 37ମଃତର୍ ଜେ ମଃନେ ତିର୍ ରଃୟ୍ଦ୍, ଆର୍ ଲଳାନାୟ୍ ବଃଲି ମଃନେ ବାବେଦ୍ ଆର୍ ଜାର୍ ଅଃହ୍ଣାର୍ ଅଃହ୍ଣାର୍ ଇଚା ହଃର୍କାରେ କଃରୁକେ ଅଃଦିକାର୍ ରଃୟ୍ଦ୍, ଆର୍ ଜେ ନିଜାର୍ ମାଗ୍ଲା କଃନ୍ୟାକେ ବିବା ଅଃଉଁକେ ଜାଗୁହାରେ, ସେ ନିକ କଃରେଦ୍ । 38ଇତାକ୍ ଜେ ନିଜାର୍ ମାଗ୍ଲା କଃନ୍ୟାକେ ବିବା ଅୟ୍ଦ୍, ସେ ନିକ କଃରେଦ୍, ଆର୍ ଜେ ବିବା ନଃୟେ, ସେ ଅଃଦିକ୍ ନିକ କଃରେଦ୍ ।
39ଅଃଣ୍ଡ୍ରା ଜିବନ୍ ରେତାହଃତେକ୍ ମାୟ୍ଜି ତାର୍ ବାନ୍ଦୁଣେ ରଃୟ୍ଦ୍; ମଃତର୍ ଜଦି ଅଃଣ୍ଡ୍ରା ମଃରେଦ୍, ତଃବେ ମାୟ୍ଜି ଆରେକ୍ ବିବା ଅଃଉଁ ହାରେ, ମଃତର୍ ମାପ୍ରୁର୍ ବିସ୍ୱାସିକ୍ ବିବା କଃରୁକେ ହାରେ । 40ମର୍ ମଃନ୍ ଇରି ସେ ବିବା ଅୟ୍ରିଲେକ୍ ନିକ ଅୟ୍ଦ୍, ମଃତର୍ ବିବା ଅୟ୍ନଃରିଲେକ୍ ଅଃଦିକ୍ ସୁକ୍ ହାୟ୍ଦ୍ । ଆର୍ ମୁୟ୍ ହେଁ ଇସ୍ୱରାର୍ ଆତ୍ମା ହାୟ୍ଆଚି ବଃଲି ବାବୁଲେ ।
8ହୁଜା ବଗାର୍ କଃତା
1ଦେବ୍ତାକେ ବଗ୍ ଦେତାର୍ ମର୍ ଉତୁର୍ ଇରି, “ଅଃମାର୍ ସଃବୁଲକାର୍ ଗିଆନ୍ ଆଚେ” ବଃଲି ତୁମିମଃନ୍ ଜୁୟ୍ରି କଃଉଁଲାସ୍, ସେରି ଅଃମିମଃନ୍ ଜାଣୁ । ଗିଆନ୍ ଗଃର୍ବ୍ ଜାତ୍ କଃରେଦ୍ । ମଃତର୍ ଲାଡେ ଉହ୍କାର୍ ଅୟ୍ଦ୍ । 2ଜଦି କେ କୁୟ୍ କଃତାୟ୍ ଗିଆନି ବଃଲି ବାବେଦ୍, ତଃବେ ତାର୍ ଜଃନ୍କଃରି ଜାଣ୍ତା ଦଃର୍କାର୍, ସେ ଅଃବେ ହଃତେକ୍ ସେ ହର୍ ନଃଜାଣେତା । 3ମଃତର୍ କେ ଜଦି ଇସ୍ୱର୍କେ ଲାଡ୍ କଃରେଦ୍, ଇସ୍ୱର୍ ତାକେ ଜାଣି ଆଚେ ।
4ଇତାକ୍ ଦେବ୍ତାକେ ହୁଜାଦିଲାର୍ ବଗ୍ କାତାର୍ କଃତା ଅଃମିମଃନ୍ ଜାଣି ଆଚୁ, ଜଃଗତେ ମୁର୍ତିର୍ କାୟ୍ ମଲ୍ ନାୟ୍, ଆର୍ ଗଟେକ୍ ଇସ୍ୱର୍ ଚାଡି ଆରେକ୍ ଜୁଳେକ୍ ନାୟ୍ । 5କାୟ୍ତାକ୍ବଃଲେକ୍ ସଃର୍ଗେ ଅଃଉଅ କି ହୁର୍ତିଏ ଅଃଉଅ, ଜୁୟ୍ ଲକ୍ମଃନ୍କେ “ଦେବ୍ତା” ବଃଲି କଃଉତି ଜଦି ସେମଃନ୍ ରିଲେକ୍ ହେଁ ଇ ରଃକମ୍ତ ଗାଦା “ଦେବ୍ତା” ଆର୍ ଗାଦା “ମାପ୍ରୁ” ରେଉଁ ହାର୍ତି । 6ଅୟ୍ଲେକ୍ ହେଁ ଅଃମାର୍ ଗଟେକ୍ ହଃକା ଇସ୍ୱର୍, ବଃଲେକ୍ ଜୁୟ୍ ଉବାର୍ ତଃୟ୍ ହୁଣି ସଃବୁକଃତା ଉବ୍ଜି ଆଚେ, ଆର୍ ଅଃମିମଃନ୍ ତାର୍ ଗିନେ ବଚିଆଚୁ, ଆର୍ ଗଟେକ୍ ବଃଲି ମାପ୍ରୁ, ବଃଲେକ୍ ଜିସୁ କ୍ରିସ୍ଟ, ତାର୍ତଃୟ୍ହୁଣି ସଃବୁ କଃତା ଉବ୍ଜି ଆଚେ, ଆର୍ ତାର୍ତଃୟ୍ହୁଣି ଅଃମିମଃନ୍ ବାଚି ଆଚୁ ।
7ଅୟ୍ଲେକ୍ ହେଁ ସଃବୁଲକ୍ ଇ ସଃତ୍ ନଃଜାଣତି, ମଃତର୍ କଃତିଲକ୍ ଅଃବେ ହଃତେକ୍ ଦେବ୍ତା ଆଚେ ବଃଲି ବାବି ମୁର୍ତି ଦେବ୍ତାକେ ଦିଲା ହୁଜାକାଦି କାଉଁଲାୟ୍ ଆର୍ ସେମଃନାର୍ ବାବ୍ନା ଦୁର୍ବଳ୍ ରିଲାକେ ବିଟାଳ୍ ଅଃଉଁଲାୟ୍ । 8ମଃତର୍ କାଦିମଃନ୍ ଅଃମିକ୍ ଇସ୍ୱରାର୍ ଚଃମେ କି ଦୁରିକ୍ ନଃକେରେ; ନଃକାୟ୍ଲେକ୍ ଅଃମିମଃନାର୍ ନଃସ୍ଟ୍ ନାୟ୍, କି କାୟ୍ଲେକ୍ ଅଃମିମଃନାର୍ ଲାବ୍ ନାୟ୍ ।
9ଜଃଗ୍ରାତ୍, ଚଃନେମଃନେ ତୁମିମଃନ୍କାର୍ ଇ ଅଃଦିକାର୍ ଅଃଳକ୍ ବିସ୍ୱାସି ମଃନାର୍ ଗିନେ ବାଦା ହର୍ ଅୟ୍ଦ୍ । 10ବଃଲେକ୍ ଗଟ୍ ଦୁର୍ବୁଳ୍ ବିସ୍ୱାସି ତୁମାର୍ ହର୍ ଗଟ୍ “ଗିଆନି ଲକେ,” ଜଦି ଦେଉଳେ ବଗ୍ କାତାର୍ ଦଃକେଦ୍, ତଃବେ ସେ ଦେବ୍ତାକେ ହୁଜା ଦିଲା ବଗ୍ କାଉଁକେ ସଃର୍ଦା ନୟ୍କି ? 11ଇତାର୍ ଗିନେ ଜୁୟ୍ ଅଃଳକ୍ ବିସ୍ୱାସି ବାୟ୍ର୍ ଗିନେ କ୍ରିସ୍ଟ ମଃଲା, ମଃତର୍ ତୁମାର୍ ଇ “ଗିଆନ୍” ଗିନେ ନଃସ୍ଟ୍ ନଃଉଁଲା କି ? 12ଇ ରଃକମ୍ ବାୟ୍ ମଃନ୍କାର୍ ବିରଦେ ହାହ୍ କଃରି ଆର୍ ସେମଃନାର୍ ବଃଲ୍ମଃନ୍ଦ୍ ଜାଣ୍ତା ଗ୍ୟାନିକ୍ କଃସ୍ଟ୍ ଦଃୟ୍ ତୁମିମଃନ୍ କ୍ରିସ୍ଟର୍ ବିରଦେ ହାହ୍ କଃରୁଲାସ୍ । 13ସେତାକ୍ ଜଦି କାଦିମଃନ୍ ମର୍ ବାୟ୍ର୍ ବାଦାର୍ ଅଃଉତାର୍ କଃତା ଅୟ୍ଦ୍, ତଃବେ ମର୍ ବାୟ୍ ଜଃନ୍କଃରି ମର୍ଗିନେ ବାଦା ନଃହାୟ୍, ଇତାର୍ ଗିନେ ମୁୟ୍ଁ କଃବେ ହେଁ ମାସ୍ ନଃକାୟ୍ଁ ।
9ପେରିତ୍ ଚେଲାର୍ କାମ୍ ଆର୍ ବିଦି
1ମୁୟ୍ଁ କାୟ୍ ମର୍ ଇଚାୟ୍ ନାୟ୍କି ? ମୁୟ୍ଁ କାୟ୍ ପେରିତ୍ ନୟ୍କି ? ମୁୟ୍ଁ କାୟ୍ ଅଃମାର୍ ମାପ୍ରୁ ଜିସୁକ୍ ନଃଦେକି ? ତୁମିମଃନ୍ କାୟ୍ ମାପ୍ରୁର୍ ତଃୟ୍ ମୁୟ୍ଁ କଃଲା କାମାର୍ ହଃଳ୍ ନୟ୍କି ? 2ଅୟ୍ଲେକ୍ ହେଁ ମୁୟ୍ଁ ବିନ୍ କାର୍ ତଃୟ୍ ଗଟ୍ ପେରିତ୍ ନୟ୍ଲେକ୍ ହେଁ ତୁମିମଃନାର୍ ହାକ୍ ଗଟ୍ ପେରିତ୍, କାୟ୍ତାକ୍ ବଃଲେକ୍ ମାପ୍ରୁର୍ ତଃୟ୍ ତୁମିମଃନ୍କେ ମର୍ ପେରିତ୍ ହଃଦାର୍ ମୁଦ୍ରାମାର୍ଲାର୍ ।
3ମର୍ ବିରଦେ ହଃଚାର୍ଲା ଲକ୍ମଃନ୍କେ ମଃର୍ ବିଚାର୍ ଇରି । 4କାତାର୍ କାୟ୍ ଅଃମିମଃନାର୍ ଅଃଦିକାର୍ ନାୟ୍ ? 5ବିନ୍ ସଃବୁ ପେରିତ୍, ମାପ୍ରୁର୍ ବାୟ୍ବେଣିମଃନ୍ ଆର୍ ପିତର୍ ହଃର୍ ବିସ୍ୱାସିନି ମାୟ୍ଜି ବିବା କଃରି ମିସ୍ଣେ ନଃୟ୍ ବୁଲୁକ୍ କାୟ୍ ଅଃମାର୍ ଅଃଦିକାର୍ ନାୟ୍ ? 6କଃସ୍ଟକଃରି ବଚୁକ୍ କାୟ୍ ମର୍ ଆର୍ ବର୍ନବାର୍ ଅଃଦିକାର୍ ନାୟ୍ ? 7କେ ନିଜାର୍ କଃର୍ଚ୍ କଃରି ସଃୟ୍ନ୍ କାମ୍ କଃରେଦ୍ ? କେ ଅଙ୍ଗୁର୍ ବାଳ୍ କଃରି ସେତିର୍ ହଃଳ୍ ନଃକାୟ୍ ? କି କେ ମେଣ୍ଡାମଃନ୍ଦା ହାଳି ତାକାର୍ ଦୁଦ୍ ନଃକାୟ୍ ?
8ମୁୟ୍ଁ ମାନାୟଃର୍ ଗିନେ କାୟ୍ ଇସାବ୍ କଃତା ନଃକଃଉଁଲେ ? ମସାର୍ ବିଦି ହେଁ କାୟ୍ ଇସାବ୍ କଃତା ନଃକୟ୍ ? 9୯:୯ ୧ ତିମ ୫:୧୮.କାୟ୍ତାକ୍ବଃଲେକ୍ ମସାର୍ ସାସ୍ତରେ ଇରି ଲେକାଆଚେ, “ଦାନ୍ ମାଡାଉତା ବଃଳ୍ ବଃଇଲ୍ ମୁୟେ କତ୍ରା ବାନ୍ଦାନାୟ୍ ।” ଇସ୍ୱର୍ କାୟ୍ରି ବଃୟ୍ଲାର୍ କଃତା ଚିତା କଃରୁଲା ? 10ସେ କାୟ୍ ଅଃବ୍କା ଅଃମାର୍ ଗିନେ କୟ୍ ନଃକେରେକି ? ହେଁ ଅଃମାର୍ ଗିନେ ଇରି ଲେକା ଅୟ୍ଆଚେ, ଜଃନ୍କଃରି ଜେ କାମାଉଣି କଃରେଦ୍, ବଃର୍ସାକଃରି ତାର୍ କାମାଉଣି କଃର୍ତା ଲଳା, ଆର୍ ଜେ ମାଡାଉଁକେ ଗଃଣା ହଃକାୟ୍ଦ୍, ବାଗ୍ ହାଉଁକ୍ ଆସା କଃରି ତାର୍ ମାଡାଉଁକେ ଗଃଣା ହଃକାଉତା ଲଳା । 11୯:୧୧ ରମି ୧୫:୨୭.ଜଦି ଅଃମିମଃନ୍ ଅଃମାର୍ ଗିନେ ଆତ୍ମାର୍ ବିଆନ୍ ବୁଣି ଆଚୁ, ତଃବେ ତୁମିମଃନ୍କାର୍ ଇ ଜଃଗତାର୍ ତାସ୍ ହାଉଁକେ ଆସା ନଃକେରୁ କି ? 12ଜଦି ବିନ୍ ଲକ୍ମଃନ୍ ତୁମିମଃନ୍କାର୍ ବାଗାର୍ ଅଃଦିକାରି ଅଃଉତି, ତଃବେ ଅଃମିମଃନ୍ କାୟ୍ ଆରେକ୍ ଅଃଦିକ୍ ନଃଉଁ ?
ଅୟ୍ଲେକ୍ ହେଁ ସେ ଅଃଦିକାର୍ ଦଃକାୟ୍ ନଃକେରୁ; ମଃତର୍ ଜଃନ୍କଃରି କ୍ରିସ୍ଟର୍ ନିକ କବୁରାର୍ କାୟ୍ ବାଦା ନଃଉଅ ବଃଲି ସଃବୁ ସଃମ୍ବାଳ୍ଲୁ । 13ଜୁୟ୍ମଃନ୍ ମନ୍ଦିରାର୍ ସେବା କଃର୍ତି, ସେମଃନ୍ ଜେ, ମନ୍ଦିରାର୍ କାଦି ହାଉତି, ଆର୍ ଜୁୟ୍ମଃନ୍ ବେଦିର୍ ସେବାୟ୍ ଲାଗିରେତି, ସେମଃନ୍ ଜେ, ବେଦି ସଃଙ୍ଗାର୍ ବାଗ୍ ହାଉତି, ଇରି କାୟ୍ ନଃଜାଣାସ୍ ? 14୯:୧୪ ମାତି ୧୦:୧୦; ଲୁକ ୧୦:୭.ସେରଃକମ୍ ଜୁୟ୍ମଃନ୍ ନିକ କବୁର୍ ପର୍ଚାର୍ କଃର୍ତି, ସେମଃନ୍ ଜେ ନିକ କବୁର୍ ତଃୟ୍ ଜିବନ୍ କାଟ୍ତି, ଇରି ମାପ୍ରୁ କୟ୍ ଆଚେ ।
15ମଃତର୍ ମୁୟ୍ଁ ଅଃଦିକାର୍ ବେବାର୍ ନଃକେରି, ଆର୍ ମକେ ଜେ ଅଃନ୍ କଃରା ଅୟ୍ଦ୍, ଇତାର୍ ଗିନେ ମୁଁୟ୍ ଇରିମଃନ୍ ଲେକୁ ନଃଚୁଲେ; କାୟ୍ତାକ୍ ବଃଲେକ୍ କେ ମର୍ ଇ ଗଃର୍ବ୍କେ ତିନିହଲ୍ୟା କଃର୍ତା ବାଦୁଲେ ମୁୟ୍ଁ ମଃର୍ତାର୍ ନିକ । 16କାୟ୍ତାକ୍ବଃଲେକ୍ ମୁୟ୍ଁ ଜଦି ନିକ କବୁର୍ ପର୍ଚାର୍ କଃରିନ୍ଦ୍, ସେତାକ୍ ମୁୟ୍ଁ ଗଃର୍ବ୍ କଃର୍ତାର୍ ଲଳାନାୟ୍ଁ, ଜଃନ୍କଃରି ହେଁ ମୁୟ୍ଁ ସେରି କଃର୍ତା ଲଳା; ଆର୍ ଜଦି ମୁୟ୍ଁ ନିକ କବୁର୍ ପର୍ଚାର୍ ନଃକେଲେକ୍ ଚି, ମୁୟ୍ଁ ଦଃଣ୍ଡାର୍ ଜୟଃଗ୍ । 17ଜଦି ମୁୟ୍ଁ ନିଜାର୍ ଇଚାୟ୍ ଇ କାମ୍ କଃରିନ୍ଦ୍, ତଃବେ ମର୍ ପୁରିସ୍କାର୍ ଆଚେ; ମଃତର୍ ଜଦି ନିଜାର୍ ଇଚାୟ୍ ନଃକେରି, ତଃବେହେଁ ସେବାକଃର୍ତା ହଃଦାର୍ ବଜ୍ ମକେ ସଃହ୍ରି ଦିଆ ଅୟ୍ଆଚେ । 18ତଃବେ ମର୍ ପୁରିସ୍କାର୍ କାୟ୍ରି ନାୟ୍, ସେତାର୍ ଗିନେ ନିକ କବୁର୍ ପର୍ଚାର୍ କଃରୁକେ ମୁୟ୍ଁ କାୟ୍ ହେଁ ଅଃଦିକାର୍ ବଗ୍ କଃରୁକେ ବେବାର୍ ନଃକେରି ।
19କାୟ୍ତାକ୍ବଃଲେକ୍ ମୁଁୟ୍ ଜଃବର୍ ଲକେ ଲାବ୍ କଃରୁକେ ହାରି, ଇତାର୍ ଗିନେ ମୁୟ୍ଁ କାର୍ ତଃଳେ ଗତି ନଃରିଲେକ୍ ହେଁ ନିଜ୍କେ ସଃବୁ ଲକାର୍ ସେବାକାରି ଅୟ୍ ଆଚି 20ଜଃନ୍କଃରି ମୁୟ୍ଁ ଜିଉଦିମଃନ୍କେ କ୍ରିସ୍ଟର୍ ଗିନେ ଲାବ୍ କଃରୁକେ ହାରି, ଇତାର୍ ଗିନେ ଜିଉଦିମଃନାର୍ ହାକ୍ ମୁୟ୍ଁ ଜିଉଦି ହର୍ ଅୟ୍ଲେ; ଜଃନ୍କଃରି ମସାର୍ ବିଦି ତଃଳେ ରିଲା ଲକ୍ମଃନ୍କେ କ୍ରିସ୍ଟର୍ ଗିନେ ଲାବ୍ କଃରୁହାରି ଇତାର୍ ଗିନେ ମସାର୍ ବିଦିର୍ ତଃଳେ ନୟ୍ଲେକ୍ ହେଁ ବିଦି ତଃଳେ ରିଲା ଲକ୍ମଃନ୍କାର୍ ହାକ୍ ବିଦି ତଃଳାର୍ ହଃର୍ ଅୟ୍ଲେ 21ଜଃନ୍କଃରି ମୁୟ୍ଁ ମସାର୍ ଅଜିଉଦି ଲକ୍ମଃନ୍କେ ଲାବ୍ କଃରୁହାରି, ଇତାର୍ ଗିନେ ମୁଁୟ୍ ଇସ୍ୱରାର୍ ବିଦି ନଃଚାଡି କ୍ରିସ୍ଟର୍ ବିଦିକେ ମାନ୍ଲେକ୍ ହେଁ ବିଦିନୟ୍ଲା ଲକ୍ମଃନାର୍ ହାକ୍ ମସାର୍ ବିଦିନୟ୍ଲା ହର୍ ଅୟ୍ଲେ । 22ଜଃନ୍କଃରି ମୁୟ୍ଁ ବିସ୍ୱାସେ ଦୁର୍ବୁଳ୍ ମଃନ୍କେ ଲାବ୍ କଃରୁହାରି, ଇତାର୍ ଗିନେ ମୁଁୟ୍ ଦୁର୍ବୁଳ୍ ମଃନ୍କାର୍ ହାକ୍ ଦୁର୍ବୁଳ୍ ହର୍ ଅୟ୍ଲେ, ମୁୟ୍ଁ ଜଃନ୍କଃରି ହେଁ କଃତି ଲକ୍କେ ବଚାଉଁ ହାରି, ଇତାର୍ ଗିନେ ମୁଁୟ୍ଁ ସଃବୁ ଲକାର୍ ହାକ୍ ସଃବୁ ରଃକମ୍ ଚାଲାଚାଲ୍ତି କଃଲେ ।
23ମୁୟ୍ଁ ଜଃନ୍କଃରି ନିକ କବୁରାର୍ ଆସିର୍ବାଦାର୍ ବାଗିଦାରି ଅୟ୍ନ୍ଦ୍, ଇତାର୍ ଗିନେ ନିକ କବୁରାର୍ ଗିନେ ସଃବୁ କଃରିନ୍ଦ୍ ।
ମାପ୍ରୁର୍ ହାଁୟ୍ ଦଃବ୍ଳା
24ଜୁୟ୍ ଲକ୍ମଃନ୍ କେଲ୍ତା ହଃଦାୟ୍ ଦଃବୁଳ୍ତି, ସେମଃନ୍ ଦଃବୁଳ୍ତି ସଃତ୍, ମଃତର୍ ଏକ୍ଲା ହ୍କା ପୁରିସ୍କାର୍ ଜିଣେଦ୍, ଇରିକାୟ୍ ତୁମିମଃନ୍ ନଃଜାଣାସ୍ ? ତୁମିମଃନ୍ ଜଃନ୍କଃରି ପୁରିସ୍କାର୍ ହାଉଆସ୍, ଇତାର୍ ଗିନେ ସେନ୍କଃରି ଦଃବ୍ଳା ।
25କୁଣ୍ ଲକ୍ କେଲ୍ତା ତଃୟ୍ କେଲୁକ୍ ସିକ୍ତାବଃଳ୍ ସେ ସଃବୁ କଃତାୟ୍ ବିଦି ହଃର୍କାରେ କଃରୁକେ ଅୟ୍ଦ୍; ସେମଃନ୍ ନଃସ୍ଟ୍ଅଃଉତା ଜିତ୍ଲା ପୁରିସ୍କାର୍ ହାଉଁକ୍ ସେରି କଃର୍ତି, ମଃତର୍ ଅଃମିମଃନ୍ ନଃସ୍ଟ୍ ନଃଉତାର୍ ପୁରିସ୍କାର୍ ହାଉଁକେ ସେରି କଃରୁଲୁ । 26ସେତାକ୍ ମୁୟ୍ଁ ଏଣେ ତେଣେ ନାୟ୍, ସଃଳ୍କେ ଦଃବ୍ଳୁଲେ, ମୁଁୟ୍ ବିଦାମାରୁଲେ, ମଃତର୍ ବାଉକେ ମାର୍ଲା ଲକ୍ ହର୍ ନୟ୍ । 27ମୁୟ୍ଁ କଃସ୍ଟ୍ ସଃମ୍ୱାଳି ଗଃଗାଳକେ ଅଃଟୁଆ କଃରି ଆଚି ଆର୍ ନିଜାର୍ ଆୟ୍ତ୍ ତଃଳେ ସଃଙ୍ଗାୟ୍ ଆଚି କାୟ୍ତାକ୍ବଃଲେକ୍ ବିନ୍ ଲକ୍ମଃନାର୍ ତଃୟ୍ ନିକ କବୁର୍ ପର୍ଚାର୍ କଃରି ରିଲେକ୍ ହେଁ ମୁୟ୍ଁ ନିଜେ ଜଃନ୍କଃରି ହଲ୍ୟାୟ୍ ପୁରିସ୍କାର୍ ଆରାୟ୍ ନଃକେରି ।
10ମୁର୍ତି ହୁଜା ବିରଦେ ଜଃଗ୍ରାତ୍
1କାୟ୍ତାକ୍ବଃଲେକ୍ ଏ ବାୟ୍ବେଣିମଃନ୍, ଅଃମିମଃନାର୍ ଦାଦିବାବୁ ମଃନାର୍ ସଃଙ୍ଗ୍ କାୟ୍ରି ସଃବୁ ଗଃଟିରିଲି ସେରିଏତାଉଆ । ସେମଃନ୍ ସଃବୁଲକ୍ ବାଦୁଳ୍ ତଃଳେ ବିବ୍ତି ନଃଉତ୍ ରିଲାୟ୍ ଆର୍ ସୁପ୍ ସାଗର୍ ଅୟ୍ ଲିଙ୍ଗ୍ଲାୟ୍ । 2ମସାର୍ ହଃଚେ ଜାତାଲକ୍ ହିସାବେ ମେଗ୍ତଃଳେ ଆର୍ ସଃମ୍ନ୍ଦେ ସେମଃନ୍ ସଃବୁଲକ୍ ବାପ୍ତିସମ୍ ନଃୟ୍ରିଲାୟ୍ । 3ଆର୍ ସଃବୁ ଲକ୍ ଗଟେକ୍ ଆତ୍ମାର୍ କାଦି କାୟ୍ଲାୟ୍ 4ଆର୍ ସଃବୁଲକ୍ ଆତ୍ମାର୍ ସୁର୍ତାର୍ ଆତ୍ମାର୍ ହଃର୍ବାତେ ହୁଣି ସୁର୍ତି ରିଲାୟ୍ ଆର୍ ସେ ହଃର୍ବାତ୍ କ୍ରିସ୍ଟ 5ଅୟ୍ଲେକ୍ ହେଁ ସେମଃନ୍କାର ବିତ୍ରେ କଃତିଲକେ ଇସ୍ୱରାର୍ ସଃଲ୍ମତ୍ ନଃରିଲି, ସେତାକ୍ ସେମଃନ୍ ଟଃଙ୍ଗ୍ରାବଃଟାୟ୍ ମଃଲାୟ୍ ଇସାବ୍ କଃତା ଜେ ତୁମିମଃନ୍କେ ନଃଜାଣିକଃରି ରିଆ, ଇତି ମର୍ ମଃନ୍ ନାୟ୍ ।
6ସେମଃନ୍ ଜଃନ୍କଃରି କଃରାବ୍ କଃତାୟ୍ ମଃନ୍ କଃରି ରିଲାୟ୍, ଅଃମିମଃନ୍ ସେରଃକମ୍ ମଃନ୍ କଃର୍ତାର୍ ନଃଉଆଁ, ଇତାର୍ ଗିନେ ଇସାବ୍ କଃତା ଅଃମିମଃନାର୍ ଗିନେ ଜାଣୁକେ ଅୟ୍ଆଚେ । 7ଜଃନ୍କଃରି ସେମଃନ୍କାର ବିତ୍ରେ କଃତିଲକ୍ ମୁର୍ତିହୁଜା କଃରୁଲାୟ୍, ସେରଃକମ୍ ତୁମିମଃନ୍ ମୁର୍ତିହୁଜା କଃରାନାୟ୍ ଜଃନ୍କଃରି ଲେକା ଆଚେ, “ଲକ୍ମଃନ୍ କାଉଆ ହିଉଆ କଃରୁକେ ବଃସ୍ଲାୟ୍ ଆର୍ ବେସୁଆ କାମ୍ କଃରୁକେ ଦଃର୍ଲାୟ୍ ।” 8ସେମଃନ୍କାର ବିତ୍ରେ କଃତିଲକ୍ ଦାରିକାମ୍ କଃରି ଗଟେଦିନ୍ କଳେ ତିନି ଆଜାର୍ ଲକ୍ ମଃଲାୟ୍, ସେରଃକମ୍ ହାହ୍ ଅଃମିମଃନ୍ ନଃକେରୁଆଁ । 9ଜଃନ୍କଃରି ସେମଃନ୍କାର ବିତ୍ରେ କଃତେକ୍ ମାପ୍ରୁକେ କଃଟ୍ହାଳ୍ ବୁଜି ସାହ୍ ଚାବାୟ୍ଅୟ୍ ମଃଲାୟ୍, ସେରଃକମ୍ ଅଃମିମଃନ୍ କ୍ରିସ୍ଟକେ କଃଟ୍ହାଳ୍ ନଃବୁଜୁଆଁ । 10ଜଃନ୍କଃରି ସେମଃନ୍କାର ବିତ୍ରେ କଃତେକ୍ ଲକ୍ ଇସ୍ୱରାର୍ ବିରଦେ କଃତାକୟ୍ ମାର୍ତା ଦୁତାର୍ ଆତେ ନାସ୍ ଅୟ୍ଲାୟ୍, ତୁମିମଃନ୍ ସେରଃକମ୍ କଃତା କଃଉଆ ନାୟ୍ ।
11ଇ ସଃବୁ କଃତା ଦଃକାଦଃୟ୍ କୟ୍ଲା ହର୍ ସେମଃନ୍କେ ଗଃଟ୍ଲି, ଆର୍ ଜୁୟ୍ ମଃନ୍କାର୍ ଜୁଗ୍ ବୁଡ୍ତାର୍ ଅୟ୍ଲି ଆଚେ, ଇରଃକମ୍ ଜେ ଅଃମିମଃନ୍, ଅଃମାର୍ ଜାଣୁକେ ସେରିମଃନ୍ ଲେକା ଅୟ୍ଆଚେ ।
12ଇତାକ୍ ଜେ ନିଜ୍କେ ତିର୍ବଃଲି ବାବେଦ୍, ସେ ଜଃନ୍କଃରି ତଃଳେ ନଃହେଳେ ଇତାର୍ ଗିନେ ସେ ଜଃଗ୍ରାତ୍ ଅଃଉଅ । 13ମାନାୟ୍ର୍ ଗିନେ ଜୁୟ୍ ରଃକମ୍ କଃଟ୍ହାଳ୍ ଅୟ୍ଦ୍, ସେରି ଚାଡି ବିନ୍ ରଃକମ୍ କଃଟ୍ହାଳ୍ ତୁମିମଃନ୍କେ ଗଃଟି ନଃକେରେ; ମଃତର୍ ଇସ୍ୱର୍ ସଃତ୍, ସେ ତୁମିମଃନ୍କେ କାୟ୍ ହେଁ ସଃମ୍ବାଳୁ ନଃହାର୍ତା କଃଟ୍ହାଳେ ହଃଳୁକ୍ ନଃଦେୟ୍, ମଃତର୍ ଜଃନ୍କଃରି ତୁମିମଃନ୍ ସଃମ୍ବାଳୁ ହାରାସ୍, ଇତାର୍ ଗିନେ କଃଟ୍ହାଳ୍ ଗଃଟୁଗଃଟୁ ସେ ବଚାଉତା ବାଟ୍ ହେଁ ଟିକ୍ କଃରିଆଚେ ।
14ଏ ମର୍ ଲାଡାର୍ ବାୟ୍ବେଣିମଃନ୍, ମୁର୍ତିହୁଜା ଚାଡିଦିଆସ୍ । 15ମୁୟ୍ଁ ବୁଦି ରିଲା ଲକେ କୟ୍ଲା ହଃର୍ କଃଉଁଲେ; ମୁଁୟ୍ ଜାୟ୍ରି କଃଉଁଲେ, ସେରି ତୁମିମଃନ୍ ନିଜେ ବିଚାର୍ କଃରା । 16୧୦:୧୬ ମାତି ୨୬:୨୬-୨୮; ମାର୍କ ୧୪:୨୨-୨୪; ଲୁକ ୨୨:୧୯,୨୦.ପର୍ବୁର୍ ବଜିଏ ଜୁୟ୍ ସୁର୍ତା କପା ଦଃରୁଲୁ, ସେତାର୍ଗିନେ ଅଃମି ଇସ୍ୱର୍କେ ଦନ୍ୟବାଦ୍ ଦେଉଁଲୁ । ଇ ସୁର୍ତା କପାର୍ ସୁର୍ତାବଃଳ୍ ଅଃମି କ୍ରିସ୍ଟର୍ ବଃନିର୍ ବାଗିଦାର୍ ଅଃଉଁନ୍ଦ୍ । ଆର୍ ରୁଟି ବାଙ୍ଗି କାତାର୍ ଗିନେ ଅଃମି କ୍ରିସ୍ଟର୍ ଗଃଗାଳାର୍ ବାଗ୍ ହାଉଁନ୍ଦ୍ 17କାୟ୍ତାକ୍ବଃଲେକ୍ ରୁଟି ଗଟେକ୍ ଅୟ୍ଲାକ୍ ଅଃମିମଃନ୍ ଗାଦେକ୍ ଅୟ୍ଲେକ୍ ହେଁ ଗଟେକ୍ ଗଃଗାଳ୍, ଇତାକ୍ ଅଃମିମଃନ୍ ସଃବୁ ସେ ଗଟେକ୍ ରୁଟିର୍ ବାଗାର୍ କଃଣ୍ଡେକ୍ ହାଉତା ଲକ୍ମଃନ୍ ।
18ଇସ୍ରାଏଲ୍ ଲକ୍ମଃନାର୍ କଃତା ବାବି ଦଃକା; ଜୁୟ୍ ଲକ୍ମଃନ୍ ହୁଜା ଦିଲା ମାସ୍ କାତି, ସେମଃନ୍ କାୟ୍ ବେଦିର୍ ହୁଜାୟ୍ ବାଗ୍ ନଃଉତି ? 19ତଃବେ ମୁୟ୍ଁ କାୟ୍ରି କଃଉଁଲେ ? ଦେବ୍ତାକେ ଦିଲା ହୁଜାକାଦି କାୟ୍ ମଲ୍ନାୟ୍ କି ମୁର୍ତିର୍ କାୟ୍ ମଃଲ୍ ନାୟ୍ । 20ମଃତର୍ ମୁୟ୍ଁ କଃଉଁଲେ ଜେ, ଜାୟ୍ରି ସେମଃନ୍ ହୁଜା କଃର୍ତି, ସେସଃବୁ ଇସ୍ୱରାର୍ ଗିନେ ହୁଜା ନଃକେରି ବୁତ୍ମଃନାର୍ ଗିନେ ହୁଜା କଃର୍ତି । ଆର୍ ତୁମିମଃନ୍କେ ବୁତ୍ମଃନାର୍ ସଃଙ୍ଗ୍ ମିସାବିଳା ଅଃଉଆ, ଇରି ମର୍ ଇଚା ନାୟ୍ । 21ତୁମିମଃନ୍ ମାପ୍ରୁର୍ ସୁର୍ତା କପା ଆର୍ ବୁତ୍ମଃନାର୍ ସୁର୍ତା କପା ଜଳେକାର୍ ବାଗ୍ ମିସୁ ନାହାରାସ୍; ତୁମିମଃନ୍ ମାପ୍ରୁର୍ ଆର୍ ବୁତ୍ମଃନାର୍ ଟେବୁଲ୍ ଜଳେକାର୍ ବାଗିଦାର୍ ଅଃଉଁ ନାହାରାସ୍ । 22କି ଅଃମିମଃନ୍ କାୟ୍ ମାପ୍ରୁକେ କାକ୍ରି କରାଉଁଆ ? ଅଃମିମଃନ୍ କାୟ୍ ତାର୍ ତଃୟ୍ ହୁଣି ଅଃଦିକ୍ ସଃକ୍ତି ।
23୧୦:୨୩ ୧ କର ୬:୧୨.ସେମଃନ୍ କଃଉଁଲାୟ୍ ସଃବୁ କଃରୁକେ ଅଃମାର୍ ଅଃଦିକାର୍ ଆଚେ, ମଃତର୍ ସଃବୁ ହେଁ ଉହ୍କାର୍ ନାୟ୍ । ସଃବୁ କଃରୁକେ ଅଃଦିକାର୍ ଆଚେ, ମଃତର୍ ସଃବୁ କଃତାୟ୍ ନିକ ଜାତ୍ ନାୟ୍ 24କେ ହେଁ ନିଜାର୍ ଉହ୍କାର୍ ଗିନେ ଉପାୟ୍ ନଃକେର, ମଃତର୍ ହଃତିଲକ୍ ବିନ୍ ଲକାର୍ ବଃଲାର୍ ଗିନେ ଉପାୟ୍ କଃର ।
25ବଃଜାରେ ଜାୟରି ବିକା ଅୟ୍ଦ୍ ବଃଲ୍ମଃନ୍ଦ୍ ବୁଜୁକ୍ କାୟ୍ରି ହଚାରି ନଃକେରି ସେରି କାହା, 26କାୟ୍ତାକ୍ବଃଲେକ୍ ସାସ୍ତରେ ଲେକାଆଚେ, “ହୁର୍ତିବି ଆର୍ ସେତି ରିଲାର୍ ସଃବୁ କଃତା ମାପ୍ରୁର୍ ।”
27ଅଃବିସ୍ୱାସି ମଃନ୍କାର୍ ବିତ୍ରାର୍ କେ ଜଦି ତୁମିମଃନ୍କେ କାଉଁକେ କୁଦେଦ୍, ଆର୍ ତୁମିମଃନ୍ ଜଃଉଁକେ ମଃନ୍ କଃରାସ୍ ତଃବେ ଜାୟ୍ରି ହେଁ ବାଟାକଃରା ଅୟ୍ଦ୍ ବଃଲ୍ମଃନ୍ଦ୍ କାୟ୍ରି ବୁଜୁକ୍ ହଃଚାରା ନାୟ୍ ସେରି କାହା । 28ମଃତର୍ କେ ଜଦି ତୁମିମଃନ୍କେ କୟ୍ଦ୍ ଇତି ହୁଜା କଃରା ଅୟ୍ଆଚେ, ତଃବେ କୟ୍ରିଲାର୍ ଗିନେ ଆର୍ ନିଜାର ବାବ୍ତାର୍ ଗିନେ କାହା ନାୟ୍ । 29ତୁମାର୍ ନିଜାର୍ ବଃଲ୍ମଃନ୍ଦ୍ ଜାଣ୍ତାର୍ ଗିନେ ବଃଲି ମୁଁୟ୍ ନଃକୟ୍ଁ ମଃତର୍ ତାର୍ ବଃଲ୍ମଃନ୍ଦ୍ ଜାଣ୍ତାର୍ ଗିନେ ମର୍ ଅଃଦିକାର୍ କାୟ୍ତାକ୍ ବିନ୍ ଲକାର୍ ବଃଲ୍ ମଃନ୍ଦାର୍ ଗିନେ ବିଚାର୍ ଅୟ୍ଦ୍ ? 30ଜଦି ମୁୟ୍ଁ ଇସ୍ୱର୍କେ ଦନ୍ୟବାଦ୍ ଦଃୟ୍ ଜୁୟ୍ କାଦି କାୟ୍ନ୍ଦ୍, ତଃବେ ଜୁୟ୍ ଇସ୍ୱର୍କେ ଦନ୍ୟବାଦ୍ ଦଃୟ୍ନ୍ଦ୍ ସେ ଇସ୍ୱର୍ ଲିନ୍ଦା ହାୟ୍ଦ୍ କାୟ୍କଃରୁକ୍ ?
31ସେତାର୍ ଗିନେ ତୁମିମଃନ୍ ଜାୟ୍ରି ହେଁ କାହା ଆର୍ ଜାୟ୍ରିହେଁ କଃରା, ଇସ୍ୱରାର୍ ଜଃଜ୍ମାନ୍ ଗିନେ ସଃବୁ କଃରା । 32ଜିଉଦି କି ଅଜିଉଦି ଜେ କି ଇସ୍ୱରାର୍ ବିସ୍ୱାସି ଦଃଳ୍, କାର୍ ଜଟ୍ୟାୟ୍ ଅଃଉତାର୍ ହର୍ ଅଃଉଆ ନାୟ୍ । 33ତୁମି ମର୍ ହର୍ ଚାଲାଚାଲ୍ତି କଃରା । ମୁୟ୍ଁ ସଃବୁ କଃତାୟ୍ ସଃବ୍କେ ସଃର୍ଦା କଃରାଉଁକ୍ ଚେସ୍ଟା କଃରୁଲେ, ଜଃନ୍କଃରି ମୁଁୟ୍ ହେଁ ମର୍ ନିଜାର୍ ଲାବ୍ ଆସା ନଃକେରି ଗାଦେକ୍ ଲକ୍ ମଃନ୍କାର୍ ମୁକ୍ତି ହାଉତା ଗିନେ ସେମଃନାର୍ ନିକ ଉପାୟ୍ କଃରିନ୍ଦ୍ ଆରେକ୍ ସଃବୁ କଃତାୟ୍ ସଃବୁଲକେ ଜଃତୁନ୍ କଃରିନ୍ଦ୍ ।
111୧୧:୧ ୧ କର ୪:୧୬; ପିଲିପି ୩:୧୭.ମୁୟ୍ଁ ଜଃନ୍କଃରି କ୍ରିସ୍ଟର୍ ଦଃକି କଃରୁଲେ, ତୁମିମଃନ୍କେ ହେଁ ସେନ୍କଃରି ମର୍ ଦଃକି କଃରା ।
ପାର୍ତ୍ନା କଃର୍ତା ବଃଳ୍ ମୁଣ୍ଡେ ଅଡ୍ଣା
2ତୁମିମଃନ୍ ଜେ ସଃବୁ କଃତାୟ୍ ମକେ ଏତାୟ୍ ରିଆସ୍ ଆର୍ ତୁମିମଃନ୍ ଜେ ସଃବୁ ବିଦି ଦିଲେ ଆଚି ସେ ସଃବୁ ମାନୁ ହାରାସ୍ ଇତାର୍ ଗିନେ ତୁମିମଃନ୍କେ ଦନ୍ୟବାଦ୍ କଃରୁଲେ । 3ମଃତର୍ କ୍ରିସ୍ଟ ଜେ ହଃତି ଅଣ୍ଡ୍ରାମଃନାର୍ ମୁଣ୍ଡ୍ ହର୍ ଆର୍ ଅଃଣ୍ଡ୍ରା ଜେ ମାୟ୍ଜିର୍ ମୁଣ୍ଡ୍ହର୍ ଆର୍ ଇସ୍ୱର୍ ଜେ କ୍ରିସ୍ଟର୍ ମୁଣ୍ଡ୍ହର୍ ଇରି ତୁମିମଃନ୍ ଜାଣା ବଃଲି ମର୍ ମଃନ୍ । 4କୁୟ୍ ଅଃଣ୍ଡ୍ରା ଅଃହ୍ଣାର୍ ମୁଣ୍ଡେ ଅଡ୍ଣା ଦଃୟ୍କଃରି ପାର୍ତ୍ନା କଃରେଦ୍ କି ଇସ୍ୱରାର୍ କବୁର୍ ଲକ୍ମଃନ୍କେ କୟ୍ଦ୍ ସେ ଅଃହ୍ଣାର୍ ମୁଣ୍ଡ୍ ଜେ କ୍ରିସ୍ଟ ତାର୍ ଇଜତ୍ କାଟେଦ୍ । 5ମଃତର୍ ଜୁୟ୍ ମାୟ୍ଜି ଅଃହ୍ଣାର୍ ମୁଣ୍ଡ୍ ଅଡ୍ଣା ନଃଡାହି କଃରି ପାର୍ତ୍ନା କଃରେଦ୍ କି ବାବ୍ବାଣି କୟ୍ଦ୍ ସେ ଅଃହ୍ଣାର୍ ମୁଣ୍ଡ୍ ଜେ ଡକ୍ରାସି ତାର୍ ଇଜତ୍ କାଡେଦ୍, ତଃବେ ସେ ମାୟ୍ଜି ମୁଣ୍ଡ୍ କୁରାୟ୍ ଅୟ୍ଲା ମାୟ୍ଜି ସଃଙ୍ଗ୍ ସଃମାନ୍ । 6କାୟ୍ତାକ୍ବଃଲେକ୍ ଜଦି ମାୟ୍ଜି ମୁଣ୍ଡ୍ ଅଡ୍ଣା ନଃଡାହେ, ତଃବେ ସେ ବାଳ୍ ହେଁ କୁରାଅ, ମଃତର୍ ଜଦି ମାୟ୍ଜିର୍ ଗିନେ ବାଳ୍ କଃତ୍ରାଉତାର୍ କି ମୁଣ୍ଡ୍ କୁରାଉତାର୍ ଲାଜାର୍ କଃତା, ତଃନ୍ ଅୟ୍ଲେକ୍ ସେ ମୁଣ୍ଡେ ଅଡ୍ଣା ଡାହ । 7ଅଃଣ୍ଡ୍ରା ଇସ୍ୱରାର୍ ନିଜାର୍ ମୁର୍ତି ଆର୍ ଜଃଜ୍ମାନାର୍ ହର୍ ଅୟ୍ଲାକ୍ ସଃତ୍କଃରି ତାର୍ ମୁଣ୍ଡ୍ ଅଡ୍ଣା ଡାହ୍ତାର୍ ଲଳାନାୟ୍, ମଃତର୍ ମାୟ୍ଜି ଅଃଣ୍ଡ୍ରାର୍ ଜଃଜ୍ମାନାର୍ ହର୍ । 8କାୟ୍ତାକ୍ବଃଲେକ୍ ଅଃଣ୍ଡ୍ରା ମାୟ୍ଜିତଃୟ୍ହୁଣି ଜଃଲମ୍ ଅୟ୍ ନଃକେରେ, ମଃତର୍ ମାୟ୍ଜି ଅଃଣ୍ଡ୍ରା ତଃୟ୍ ହୁଣି ଜଃଲମ୍ ଅୟ୍ଆଚେ । 9ଆର୍ ମାୟ୍ଜିର୍ ଗିନେ ଅଃଣ୍ଡ୍ରା ଉବ୍ଜାଣ୍ ଅୟ୍ ନଃକେରେ; ମଃତର୍ ଅଃଣ୍ଡ୍ରାର୍ ଗିନେ ମାୟ୍ଜି ଉବ୍ଜାଣ୍ ଅୟ୍ଲି । 10ଇତାର୍ ଗିନେ ଅଃହ୍ଣାର୍ ଅଃଣ୍ଡ୍ରାର୍ ଅଃଦିକାର୍ ତଃଳେ ଆଚେ ବଃଲି ଦଃକାଉଁକ୍ ଆର୍ ସଃର୍ଗ୍ ଦୁତ୍ମଃନାର୍ ଗିନେ ମାୟ୍ଜି ମୁଣ୍ଡେ ଅଡ୍ଣା ଡାହ୍ତା ଲଳା । 11ଅୟ୍ଲେକ୍ ହେଁ ମାପ୍ରୁର୍ ମିସାଣ୍ ତଃୟ୍ ଅଃଣ୍ଡ୍ରାର୍ ତଃୟ୍ ହୁଣି ମାୟ୍ଜି ବିନ୍ ନାୟ୍ କି ମାୟ୍ଜି ତଃୟ୍ହୁଣି ଅଃଣ୍ଡ୍ରା ବିନ୍ ନାୟ୍ । ବଃଲେକ୍ ମାୟ୍ଜି ଜଃନ୍କଃରି ଅଃଣ୍ଡ୍ରାର୍ ତଃୟ୍ହୁଣି ଉବ୍ଜି ଆଚେ । 12କାୟ୍ତାକ୍ବଃଲେକ୍ ମାୟ୍ଜି ଅଃଣ୍ଡ୍ରା ତଃୟ୍ହୁଣି ଉବ୍ଜି ଆଚେ ଆର୍ ଅଃଣ୍ଡ୍ରା ମାୟ୍ଜି ତଃୟ୍ହୁଣି ଜଃଲମ୍ ଅୟ୍ଆଚେ । ମଃତର୍ ସଃବ୍କେ ଉବ୍ଜାଉତା ଲକ୍ ଇସ୍ୱର୍ ।
13ତୁମିମଃନ୍ ନିଜେ ନିଜେ ବିଚାର୍ କଃରା ମୁଣ୍ଡ୍ ଅଡ୍ଣା ନଃଡାହିକଃରି ଇସ୍ୱରାର୍ ତଃୟ୍ ପାର୍ତ୍ନା କଃର୍ତାର୍ ମାୟ୍ଜି ମଃନାର୍ କାୟ୍ ନିକ ? 14ଅଃମି ଜୁୟ୍ ଚାଲାଚାଲ୍ତି ତଃୟ୍ ଜଃଲମ୍ ଅୟ୍ ଆଚୁ ସେରି କାୟ୍ ତୁମି ମଃନ୍କେ ସିକାୟ୍ ନଃକେରେ ଜେ ଅଃଣ୍ଡ୍ରା ଡେଙ୍ଗ୍ ବାଳ୍ ଚାଡ୍ଲେକ୍ ସେରି ଲାଜାର୍ କଃତା, 15ମଃତର୍ ମାୟ୍ଜିର୍ ଡେଙ୍ଗ୍ ବାଳ୍ ତାର୍ ଗିନେ ଜଃଜ୍ମାନାର୍ କଃତା କି ? କାୟ୍ତାକ୍ବଃଲେକ୍ ମୁଣ୍ଡାର୍ ଅଡ୍ଣାହର୍ ତାର୍ ବାଳ୍ ତାକେ ଦିଆ ଅୟ୍ଲି ଆଚେ । 16ମଃତର୍ କେ ଦ୍ରାମ୍ସ୍କା ଅଃଉଁକେ ମଃନ୍ କଃଲେକ୍ ସେ ଜାଣ ଜେ, ଅଃମିମଃନାର୍ ତଃୟ୍ କି ଇସ୍ୱରାର୍ ମଣ୍ଡ୍ଳିମଃନାର୍ ତଃୟ୍ ପାର୍ତ୍ନା କଃର୍ତା ଇରଃକମ୍ ବିଦିକେ ଚାଡି ଆରେକ୍ କୁୟ୍ ବିଦି ନାୟ୍ ।
ମାପ୍ରୁ ବଜି
17ମଃତର୍ ତୁମିମଃନାର୍ ରୁଣ୍ଡ୍ତାର୍ ଜେ ବଃଲାର୍ ଗିନେ ନଃୟ୍କଃରି, ମଃତର୍ ନଃସ୍ଟାର୍ ଗିନେ ଅଃଉଁଲି, ଇତାକ୍ ମୁଁୟ୍ ତୁମିମଃନ୍କାର୍ ଗୁଣ୍ କଃଉଁକେ ନାହାରି ଇ ଆଦେସ୍ ଦେଉଁଲେ । 18କାୟ୍ତାକ୍ବଃଲେକ୍ ହଃର୍ତୁ ମୁୟ୍ଁ ସୁଣୁଲେ ଜେ, ପାର୍ତ୍ନା ଗଃରେ ମଣ୍ଡ୍ଳି ହର୍ ରୁଣ୍ଡ୍ତାବଃଳ୍ ତୁମିମଃନାର୍ ବିତ୍ରେ ଦଃଳ୍ ବାଗ୍ ଜାତ୍ ଅଃଉଁଲି, ଆର୍ ମୁଁୟ୍ ଆଦେକ୍ ଇତି ସଃତ୍ କଃରୁଲେ । 19ଜଃନ୍କଃରି ତୁମିମଃନ୍କାର୍ ବିତ୍ରେ ଇସ୍ୱରାର୍ ତଃୟ୍ କୁୟ୍ ଲକ୍ମଃନାର୍ କଃତା ମାୟ୍ନ୍ କଃର୍ତାର୍ ସେରି ଜାଣା ହଃଳେଦ୍, ଇତାର୍ ଗିନେ ତୁମିମଃନ୍କାର୍ ବିତ୍ରେ ଦଃଳ୍ ବାଗ୍ ବାୟ୍ଦ୍ରେ ଅୟ୍ଦ୍ । 20ତୁମିମଃନ୍କେ ଗଟେକ୍ ଦଃଳ୍ ହର୍ ରୁଣ୍ଡି, ଜୁୟ୍ ବଜିୟେ ବାଗି ଅଃଉଁଲାସ୍, ଆର୍ ସେରି ମାପ୍ରୁ ବଜି ବଃଲି ବାବୁଲାସ୍, ମଃତର୍ ସେରି ମାପ୍ରୁ ବଜି ନାୟ୍ । 21କାୟ୍ତାକ୍ବଃଲେକ୍ କାତାବଃଳ୍ ତୁମିମଃନ୍କେ ହଃତିଲକ୍ ବିନ୍ଲକେ ନଃଜାଗି ନିଜାର୍ ନିଜାର୍ କାଦି କାଉଁକେ ବେଲ୍କି, ସେତାକ୍ ଗଟ୍ଲକ୍ ବୁକେ ରଃୟ୍ଦ୍ ଆର୍ ବିନ୍ଲକ୍ ମାତେଦ୍ । 22କାୟ୍ରି ? ତୁମିମଃନ୍କାର୍ କାୟ୍ କାଉଆହିଉଆ କଃରୁକେ ନିଜାର୍ ଗଃର୍ ନାୟ୍, କି ତୁମିମଃନ୍କାର୍ ଇସ୍ୱରାର୍ ମଣ୍ଡ୍ଳିକେ ନଃମାନୁଲାସ୍, ଆରେକ୍ ଜୁୟ୍ମଃନାର୍ ନାୟ୍ ସେମଃନ୍କେ ଲାଜ୍ କଃରୁଲାସ୍ ? ମୁୟ୍ଁ ତୁମିମଃନ୍କେ କାୟ୍ବଃଲି କୟ୍ଦ୍ ? କାୟ୍ରି ତୁମିମଃନ୍କାର୍ ଗୁଣ୍ କୟ୍ଦ୍ ? କଃବେ ହେଁ ନାୟ୍ ।
23କାୟ୍ତାକ୍ବଃଲେକ୍ ମାପ୍ରୁତଃୟ୍ ହୁଣି ଜୁୟ୍ ସିକ୍ୟା ହାୟ୍ଆଚି, ତୁମିମଃନ୍କେ ଜାଣାଉଁଲେ, ସେରି ଇରି, ସତ୍ରୁ ଆତେ ସଃର୍ହିଅଉତା ରାତି ମାପ୍ରୁ ଜିସୁ ରୁଟି ଦଃରି, 24ଇସ୍ୱର୍କେ ଦନ୍ୟବାଦ୍ କଃରି, ସେରି ବାଙ୍ଗି କୟ୍ଲା, “ଇରି ତୁମିମଃନ୍କାର୍ ଗିନେ ମର୍ ଗଃଗାଳ୍; ମକେ ଏତାଉଁକେ ଇରି କଃରା ।” 25ସେରଃକମ୍ କାୟ୍ଲା ହଃଚେ, ସେ ସୁରୁକେ ହେଁ ନଃୟ୍ କୟ୍ଲା, “ଇ ସୁର୍ତା ଗିନା ମର୍ ବଃନିଏ ତାହୁନ୍ କଃଲା ଇସ୍ୱରାର୍ ନଃଉଆଁ ନିଅମ୍, ତୁମିମଃନ୍ ଜଃତିତର୍ ସୁରାସ୍, ସଃତିତର୍ ମକେ ଏତାଉଁକେ ଇରି କଃରା ।”
26କାୟ୍ତାକ୍ବଃଲେକ୍ ଜଃତିତର୍ ତୁମିମଃନ୍ ଇ ରୁଟି କାହାସ୍ ଆର୍ ଇ ସୁର୍ତା ଗିନାୟ୍ହୁଣି ସୁରାସ୍ ସଃତେକ୍ ତର୍ ତୁମିମଃନ୍ ମାପ୍ରୁର୍ ଆସ୍ତାର୍ ହଃତେକ୍ ତାର୍ ମଃର୍ନାର୍ କବୁର୍ ପର୍ଚାର୍ କଃରାସ୍ । 27କାୟ୍ତାକ୍ବଃଲେକ୍, ଜେହେଁ ନିଜ୍କେ ଜୟ୍ଗ୍ ନଃକେରି ମାପ୍ରୁର୍ ଇ ରୁଟି କାୟ୍ଦ୍ କି ଇ ଗିନାର୍ ସୁରେଦ୍, ସେ ମାପ୍ରୁର୍ ଗଃଗାଳ୍ ଆର୍ ବଃନିର୍ ବିରଦେ ହାହ୍ କଃରେଦ୍ । 28ମଃତର୍ ମାନାୟ୍ ନିଜ୍କେ ପରିକ୍ୟା କଃର, ଆର୍ ସେରଃକମ୍ ଇ ରୁଟି କାଉଅ ଆର୍ ଇ ଗିନାର୍ ସୁର । 29କାୟ୍ତାକ୍ବଃଲେକ୍ ଜେ ମାପ୍ରୁର୍ ଗଃଗାଳାର୍ ଟିକ୍ ଅଃର୍ତ୍ ନଃବୁଜି କାୟ୍ଦ୍ ଆର୍ ସୁରେଦ୍, ସେ ନିଜାର୍ ଡଃଣ୍ଡାର୍ ଗିନେ କାୟ୍ଦ୍ ଆର୍ ସୁରେଦ୍ । 30ଇତାର୍ ଗିନେ ତୁମିମଃନ୍କାର୍ ବିତ୍ରେ ଗାଦେକ୍ ଦୁର୍ବୁଳ୍ ଆର୍ ମଃଳୁହଃଳ୍ଲାର୍ ଆର୍ ଗାଦେକ୍ ଲକ୍ ମଃରି ଆଚ୍ତି । 31ମଃତର୍ ହଃର୍ତୁ ଜଦି ଅଃମିମଃନ୍ ଅଃହ୍ଣାର୍ ଅଃହ୍ଣାର୍ ବିଚାର୍ କଃଲୁହୁଣି, ତଃବେ ଇସ୍ୱରାର୍ ବିଚାର୍ ତଃଳେ ନାୟ୍ଲୁହୁଣି । 32ମଃତର୍ ଜଃଗତାର୍ ସେସ୍ ଦଃଣ୍ଡେ ହୁଣି ଅଃମିକ୍ ବଚାଉଁକ୍ ଇସ୍ୱର୍ ଅଃମିକ୍ ବିଚାର୍ କଃରି ସୁଦାରୁଲା ।
33ତଃବେ, ମର୍ ବାୟ୍ ବେଣିମଃନ୍, ତୁମିମଃନ୍ ମାପ୍ରୁ ବଜି କାଉଁକେ ରୁଣ୍ଡ୍ତାବଃଳ୍ ହଃତି ଲକାର୍ ଗିନେ ଜାଗାଜାଗି ଅଃଉଆ । 34ତୁମିମଃନ୍କାର୍ ରୁଣ୍ଡ୍ତାର୍ ଜଃନ୍କଃରି ଇସ୍ୱରାର୍ ଡଃଣ୍ଡାର୍ ଗିନେ ନାୟ୍ । ଇତାର୍ ଗିନେ ଜଦି କେ ବୁକେ ଆଚେ, ତଃବେ ସେ ଗଃରେ କାଉଅ, ସଃରାସଃରି ବାକି ରିଲା ସଃବୁ କଃତା ମୁଁୟ୍ ଆୟ୍ଲା ହଃଚେ ବୁଜାୟ୍ ଦଃୟ୍ନ୍ଦ୍ ।
12ପବିତ୍ର ଆତ୍ମାର୍ ତଃୟ୍ହୁଣି ଦାନ୍
1ବାୟ୍ ଆର୍ ବେଣିମଃନ୍, ପବିତ୍ର ଆତ୍ମାର୍ ଦାନ୍ କଃତା ତୁମିମଃନ୍କେ ନିକ କଃରି ଜାଣା, ଇତି ମର୍ ଇଚା । 2ତୁମିମଃନ୍ ଜାଣା ଜେ, ଜଃଡେବଃଳ୍ ତୁମିମଃନ୍ ଅଜିଉଦି ରଃୟ୍ ଇସ୍ୱର୍କେ ଜାଣି ନଃରିଲାସ୍, ସଃଡେବଃଳ୍ ଜିବନ୍ ନୟ୍ଲା ମୁର୍ତି ମଃନାର୍ ହୁଜା କଃରି ବିନ୍ ବାଟ୍ ଜାତିରିଲାସ୍ । 3ସେତାର୍ ଗିନେ ମୁୟ୍ଁ ତୁମିମଃନ୍କେ ଜାଣାଉଁଲେ, ଇସ୍ୱରାର୍ ଆତ୍ମାୟ୍ ଚାଲ୍ତା ଲକ୍, “ଜିସୁ ସାୟ୍ପାର୍ ବଃଲି କଃଉ ନାହାରେ,” ଆର୍ କୁୟ୍ ଲକ୍ ହେଁ ପବିତ୍ର ଆତ୍ମା ନଃହାୟ୍, “ଜିସୁକେ ମାପ୍ରୁ” ବଃଲି କଃଉ ନାହାଁରେ ।
4୧୨:୪ ରମି ୧୨:୬-୮.ପବିତ୍ର ଆତ୍ମାର୍ ଦାନ୍ ବିନ୍ ବିନ୍ ରଃକମ୍, ମଃତର୍ ସେ ଗଟେକ୍ ପବିତ୍ର ଆତ୍ମା ସଃବୁ ଦଃୟ୍ଦ୍ । 5ସେବାକାମ୍ ବିନ୍ ବିନ୍ ରଃକମାର୍ ଆଚେ, ମଃତର୍ ମାପ୍ରୁ ଗଟେକ୍ । 6କାମ୍ ବିନ୍ବିନ୍ ରଃକମ୍, ମଃତର୍ ଇସ୍ୱର୍ ଗଟେକ୍, ସେ ସଃବୁ ଲକାର୍ ତଃୟ୍ ସଃବୁ ହୁରା କଃରେଦ୍ । 7ମଃତର୍ ହଃତିଲକେ ଆତ୍ମାର୍ ଗୁଣ୍ ଦଃକାଉତା ଦାନ୍ ସଃବୁର୍ ବଃଲାର୍ ଗିନେ ଦିଆ ଅୟ୍ଦ୍ । 8କାୟ୍ତାକ୍ବଃଲେକ୍ ଗଟ୍ଲକେ ଆତ୍ମା ସଃଙ୍ଗ୍ ଗ୍ୟାନାର୍ ସଃବୁ କଃଉଁକେ, ଆର୍ ବିନ୍ଲକେ ସେ ଗ୍ୟାନାର୍ କବୁର୍ ସିକାଉଁକ୍ ସକ୍ତି ଦଃୟ୍ଦ୍ । 9ଆରେକ୍ ଗଟ୍ ଲକେ ସେ ଆତ୍ମା ତଃୟ୍ ବିସ୍ୱାସ୍, ଆରେକ୍ ଗଟେକ୍କେ ସେ ଆତ୍ମା ତଃୟ୍ ଉଜ୍ କଃର୍ତା ସଃକ୍ତି ଦଃୟ୍ଦ୍ । 10ବିନ୍ ଲକେ ବିନ୍ ବିନ୍ ସକ୍ତିର୍ କାମ୍ କଃର୍ତା ସଃକ୍ତି; ଆରେକ୍ ଏକ୍ଲାକେ ଇସ୍ୱରାର୍ କବୁର୍ କଃଉତା ସଃକ୍ତି, ବିନ୍ଲକେ ପବିତ୍ର ଆତ୍ମା ଆର୍ ବିଟାଳ୍ ଆତ୍ମା ଚିନ୍ତା ସଃକ୍ତି, ଆରେଗଟ୍ ଲକେ ବିନ୍ବିନ୍ ନଃଉଆଁ ବାସା କଃଉତା ସଃକ୍ତି, ଆରେକ୍ ଏକ୍ଲାକେ ବିନ୍ବିନ୍ ନଃଉଆଁ ବାସାର୍ ଅଃର୍ତ୍ କଃରୁକେ ସଃକ୍ତି ଦିଆ ଅୟ୍ଦ୍ । 11ମଃତର୍ ସେ ଗଟେକ୍ ହଃକା ପବିତ୍ର ଆତ୍ମା ନିଜାର୍ ଇଚା ହଃର୍କାରେ ହଃତିଲକେ ଅଃଲ୍ଗା ଅଃଲ୍ଗା କଃରି ଦାନ୍ ବାଟାକଃରି ହୁର୍ନ୍ କଃରେଦ୍ ।
ଗଟେକ୍ ଗଃଗାଳେ ଗାଦା ଅଃଙ୍ଗ୍
12୧୨:୧୨ ରମି ୧୨:୪,୫.ଜଃନ୍କଃରି ଗଃଗାଳ୍ ଗଟେକ୍, ଆର୍ ସେତିର୍ ଅଃଙ୍ଗ୍ମଃନ୍ ଗାଦା, ମଃତର୍ ଗଃଗାଳାର୍ ସଃବୁ ଅଃଙ୍ଗ୍ମଃନ୍ ଗାଦା ଅୟ୍ଲେକ୍ ହେଁ, ଗଟେକ୍ ଗଃଗାଳ୍, ସେରଃକମ୍ କ୍ରିସ୍ଟ ହେଁ ଗଟେକ୍ । 13ଜୁୟ୍ତାର୍ ଗିନେ ଅଃମିମଃନ୍ ଜିଉଦି ଅଃଉଁଆ କି ଅଜିଉଦି ଲକ୍, ଗତିଦଃଙ୍ଗ୍ଳା ଅଃଉଁଆ କି ନଃଉଁଆ, ସଃବୁ ଲକ୍ ତ ଗଟେକ୍ ଗଃଗାଳ୍ ଅଃଉଁକେ ଗଟେକ୍ ଆତ୍ମାୟ୍ ବାପ୍ତିସମ୍ ଅୟ୍ ଆଚୁ, ଆରେକ୍ ଗଟେକ୍ ଆତ୍ମା ହାୟ୍ ଆଚୁ ।
14କାୟ୍ତାକ୍ବଃଲେକ୍ ଗଃଗାଳ୍ତ ଗଟେକ୍ ଅଃଙ୍ଗ୍ ତଃୟ୍ ତିଆର୍ ନାୟ୍, ମଃତର୍ ଗାଦେକ୍ ଅଃଙ୍ଗ୍ ନଃୟ୍ ତିଆର୍ ଅୟ୍ଆଚେ । 15ହାଦ୍ ଜଦି କୟ୍ଦ୍, “ମୁୟ୍ଁ ଆତ୍ ନାୟ୍, ତଃବେ ଗଃଗାଳାର୍ ଅଃଙ୍ଗ୍ ନଃୟ୍,” ତଃବେ ଇତାର୍ ଗିନେ ସେରି ଗଃଗାଳାର୍ ଅଃଙ୍ଗ୍ ନଃୟ୍ କଃରି ରେଉଁ ନାହାରେ । 16ଆରେକ୍ କାନ୍ ଜଦି କୟ୍ଦ୍, “ମୁୟ୍ଁ ଆକି ନୟ୍, ସେତାକ୍ ଗଃଗାଳାର୍ ଅଃଙ୍ଗ୍ନୟ୍,” ତଃବେ ସେତାର୍ଗିନେ ସେରି ଗଃଗାଳାର୍ ଅଃଙ୍ଗ୍ ନଃୟ୍ କଃରି ରେଉଁ ନାହାରେ । 17ସଃବୁ ଗଃଗାଳ୍ ଜଦି ଆକି ଅୟ୍ଦ୍, ତଃବେ ସୁଣ୍ତାର୍ କୁୟ୍ତିହୁଣି ? ସଃବୁ ଗଃଗାଳ୍ ଜଦି କାନ୍ ଅୟ୍ଦ୍, ତଃବେ ସୁଙ୍ଗ୍ତାର୍ କୁୟ୍ତି । 18ମଃତର୍ ଇସ୍ୱର୍ ଗଟେକ୍ ଗଟେକ୍ କଃରି ଗଃଗାଳେ ନିଜାର୍ ଇଚା ହଃର୍କାରେ ଜଳିଆଚେ । 19ଆର୍ ଜଦି ସେ ସଃବୁ ଗଟେକ୍ ଅଃଙ୍ଗ୍ ଅୟ୍ଦ୍, ତଃବେ ଗଃଗାଳ୍ କୁୟ୍ତି । 20ମଃତର୍ ସଃତ୍କଃରି ଅଃଙ୍ଗ୍ମଃନ୍ ଗାଦେକ୍ ମଃତର୍ ଗଃଗାଳ୍ ଗଟେକ୍ ।
21“ତର୍ତଃୟ୍ ମର୍ ଲଳା ନାୟ୍ !” ବଃଲି ଆକି ଆତ୍କେ କଃଉଁ ନାହାରେ, କି “ତର୍ତଃୟ୍ ମର୍ ଲଳା ନାୟ୍” ବଃଲି ମୁଣ୍ଡ୍ ହାଦ୍କେ କଃଉ ନାହାଁରେ । 22ବଃଲେକ୍ ଗଃଗାଳାର୍ ସଃବୁ ଅଃଙ୍ଗ୍ମଃନ୍ ବଃଳେ ଦୁର୍ବୁଳ୍ ବଃଲି ଜାଣାହଃଳେଦ୍ । ଆଦମ୍ ସଃଙ୍ଗ ମିସିରିଲାକେ ସଃବୁ ମାନାୟ୍ ମଃଲାୟ୍ ଆରେକ୍ ଜଃଡ୍ବଃଳ୍ କ୍ରିସ୍ଟର୍ ସଃଙ୍ଗ ମିସ୍ଲାକେ ସଃବୁ ଲକ୍ମଃନ୍ ଜିବନ ହାୟ୍ଲାୟ୍ । 23ଆରେକ୍ ଗଃଗାଳାର୍ ଜୁୟ୍ ସଃବୁ ଅଃଙ୍ଗ୍ ଅଃଦିକ୍ ଲାଡ୍ ନୟ୍ଲାର୍ ବଃଲି ଅଃମିମଃନ୍କ୍ ଜାଣା ହଃଳେଦ୍, ସେ ସଃବୁ ଅଃଙ୍ଗ୍କେ ଅଃମିମଃନ୍ ଅଃଦିକ୍ ଲାଡାର୍ ସଃଙ୍ଗ୍ ଜଃତୁନ୍ କଃରୁନ୍ଦ୍; ଆର୍ ଅଃମାର୍ ଜୁୟ୍ ଅଃଙ୍ଗ୍ମଃନ୍କେ ଅଃମି ସଃବୁବଃଳ୍ ନଃଦେକାଉଁ, ସେତାକ୍ ଅଃମିମଃନ୍ ଅଃଦିକ୍ ଜଃତୁନ୍ ନେଉଁନ୍ଦ୍ । 24ମଃତର୍ ଅଃମିମଃନାର୍ ସୁନ୍ଦୁର୍ ଗଃଗାଳାର୍ ଅଃଙ୍ଗ୍ମଃନାର୍ ସୁନ୍ଦୁର୍ ଅଃଉତା ଲଳା ନାୟ୍ । 25ମଃତର୍ ଗଃଗାଳ୍ ବିତ୍ରେ ବିରଦ୍ ନଃଗେଟେ ସେତାକ୍, ଅଃଙ୍ଗ୍ମଃନ୍ ସଃମାନ୍ବାବେ ହଃତି ଅଃଙ୍ଗ୍ ଏକ୍ଆରେକାର୍ ଗିନେ ଚିତା କଃର୍ତି । 26ଆର୍, ଗଟେକ୍ ଅଃଙ୍ଗ୍ ଦୁକ୍ବୟ୍ଗ୍ କଃଲେକ୍ ବିନ୍ ଅଃଙ୍ଗ୍ମଃନ୍ ତାର୍ ସଃଙ୍ଗ୍ ଦୁକ୍ବୟ୍ଗ୍ କଃର୍ତି, ଆର୍ ଗଟେକ୍ ଅଃଙ୍ଗ୍ ଜଃଜ୍ମାନ୍ ହାୟ୍ଲେକ୍ ବିନ୍ ଅଃଙ୍ଗ୍ମଃନ୍ ସଃର୍ଦା ଅଃଉତି ।
27ତୁମିମଃନ୍କେ କ୍ରିସ୍ଟର୍ ଗଃଗାଳ୍, ଆର୍ ହଃତିଲକ୍ ସେ ଗଃଗାଳାର୍ ଅଃଙ୍ଗ୍ । 28୧୨:୨୮ ଏପି ୪:୧୧.ଆରେକ୍, ଇସ୍ୱର୍ ମଣ୍ଡ୍ଳି ତଃୟ୍ ହଃର୍ତୁ ପେରିତ୍, ଦୁୟ୍ ଲଃମରେ ବାବ୍ବାଦି, ତିନି ଲଃମରେ ଗୁରୁ, ହଃଚେ କାବା ଅଃଉତା ସଃକ୍ତି, ତାର୍ହ୍ଚେ ଉଜ୍ କଃର୍ତା ସଃକ୍ତି, ହଃର୍କେ ଉହ୍କାର୍ କଃର୍ତା ସଃକ୍ତି, ଆର୍ ମୁଳିକାର୍ ସଃକ୍ତି, ବିନ୍ବିନ୍ ହଃର୍ ବାସା କଃଉତା ସଃକ୍ତି ଦେୟ୍ ଆଚେ । 29ସେମଃନ୍ ସଃବୁ ଲକ୍ ପେରିତ୍, ବାବ୍ବାଦି, ଗୁରୁ ନାୟ୍, ସେମଃନ୍ ସଃବୁ ଲକ୍କେ କାବା ଅଃଉତା କାମ୍ କଃରୁକେ ସଃକ୍ତି ଦିଆ ନୟେ । 30ସଃବୁ କାୟ୍ ଉଜ୍ କଃର୍ତା ସଃକ୍ତି ଗିନେ ଆଚ୍ତି ? ସଃବୁ ଲକ୍ କି ବିନ୍ ବାସାୟ୍ କଃତା କଃଉଁକେ ହାର୍ତି କି ? ସଃବୁ ଲକ୍ କି ବାସାର୍ ଅଃର୍ତ୍ କଃରୁ ହାର୍ତି କି ? 31ମଃତର୍ ବଃଡେ ମଲାର୍ ଦାନ୍ ସଃବୁ ହାଉଁକେ ଉଦ୍ଜଗି ଅଃଉଆ । ମୁୟ୍ଁ ତୁମିମଃନ୍କେ ଗଟେକ୍ ଅଃଦିକ୍ ନିକ ବାଟ୍ ଦଃକାଉଁଲେ ।
13ଲାଡ୍
1ଜଦି ମୁୟ୍ଁ ମାନାୟ୍ମଃନାର୍ ଆର୍ ଦୁତ୍ମଃନାର୍ ବାସାୟ୍ କଃତା କୟ୍ନ୍ଦ୍, ମଃତର୍ ମର୍ ଲାଡ୍ ନରେୟ୍, ତଃବେ ମୁଁୟ୍ ଗଃର୍ଜ୍ତା ଗଃଟା ନୟ୍ଲେକ୍ ଜଃମ୍ଜଃମ୍ ବାଜ୍ତା ବଃଡ୍ ଗିନି ହର୍ ଅୟ୍ ଆଚି । 2୧୩:୨ ମାତି ୧୭:୨୦; ୨୧:୨୧; ମାର୍କ ୧୧:୨୩.ଆର୍, ଜଦି ମର୍ ତଃୟ୍ ଇସ୍ୱରାର୍ କବୁର୍ କଃଉତା ସଃକ୍ତି ରଃୟ୍ଦ୍; ମର୍ତଃୟ୍ ସଃବୁ ଗୁପ୍ତ୍ ଅଃର୍ତ୍ ବୁଜୁକ୍ ସଃକ୍ତି ରେଉଁ ହାରେ; ସଃବୁ ଗିଆନ୍ ହାୟ୍ରଃୟ୍ନ୍ଦ୍, ଆର୍ ହଃର୍ବାତ୍କେ ଗୁଚାଉତା ଗିନେ ମର୍ ବିସ୍ୱାସ୍ ରଃୟ୍ଦ୍, ମଃତର୍ ମର୍ ଜଦି ଲାଡ୍ ନଃରେୟ୍, ତଃବେ ମୁୟ୍ଁ କାୟ୍ରି ନାୟ୍ । 3ଆରେକ୍ ମୁୟ୍ଁ ନୟ୍ଲା ଲକେ କାଳାଉଁକେ ମର୍ ସଃବୁ ବାଟା କଃରି ଦଃୟ୍ନ୍ଦ୍, ଆରେକ୍ ଜଦି ମୁୟ୍ଁ ମର୍ ଗଃଗାଳ୍ ହଡୁକ୍ ସଃହ୍ରି ଦଃୟ୍ନ୍ଦ୍, ମଃତର୍ ମର୍ ଲାଡ୍ ନଃରେୟ୍, ତଃବେ ମର୍ କାୟ୍ ଲାବ୍ ନାୟ୍ ।
4ଲାଡ୍ ଦୁକ୍ ସଃମ୍ବାଳ୍ତାର୍, ଲାଡ୍ ଉହ୍କାର୍ କଃର୍ତାର୍ । ଡାରା ନଃକେରେ, ଗଃର୍ବ୍ ନଃକେରେ, ଅଃକାର୍ ନଃକେରେ 5ମଃନେ ଲାଡ୍ ରିଲାର୍ ଗିନେ ରିସା ଜାତ୍ ନୟ୍, ନିଜେ ଲାବ୍ ହାଉଁକେ ଉପାୟ୍ ନଃକଜେ କାକ୍ରି ନୟ୍, ଉହ୍କାର୍ ହାୟ୍ ନଃରିଲେକ୍ ହେଁ ମଃନେ ବେର୍ ନଃଦେରେ । 6ଅଃଦଃର୍ମେ ସଃର୍ଦା ନଃକେରେ ମଃତର୍ ସଃତ୍ ତଃୟ୍ ସଃର୍ଦା କଃରେଦ୍, 7ଲବଦ୍ ସଃବୁ ସଃମ୍ବାଳେଦ୍, ସଃବୁ ସଃତ୍ କଃରେଦ୍, ସଃବୁ ଆସା କଃରେଦ୍, ସଃବୁ କଃତାୟ୍ ସାସ୍ଦଃରି ରଃୟ୍ଦ୍ ।
8ଲାଡ୍ କଃବେହେଁ ନଃସେରେ, ଇସ୍ୱରାର୍ କବୁର୍ କଃଉତା ସଃକ୍ତି ରଃୟ୍ଦ୍, ସେରି ସଃରେଦ୍, ଜଦି ବିନ୍ ବାସା କଃଉତା ସଃକ୍ତି ରଃୟ୍ଦ୍, ସେସଃବୁ ସେସ୍ ଅୟ୍ଦ୍, ଜଦି ମାନାୟ୍ର୍ ଗିଆନ୍ ରଃୟ୍ଦ୍, ସେରି ନଃସ୍ଟ୍ ଅୟ୍ଦ୍ । 9କାୟ୍ତାକ୍ବଃଲେକ୍ ଅଃମିମଃନାର୍ ଗିଆନାର୍ ଦାନ୍ ଆର୍ ଇସ୍ୱରାର୍ କବୁର୍ କଃଉତାର୍ ଗିଆନ୍ ଅଃଳକ୍ । 10ମଃତର୍ ସଃବୁ କଃତାର୍ ହୁର୍ଣ୍ଣ୍ କଃତା ଆୟ୍ଲେକ୍ ଅଃଳହଃଳ କଃତା ନଃସ୍ଟ୍ ଅୟ୍ଦ୍ ।
11ମୁୟ୍ଁ ସାନ୍ ରିଲାବଃଳ୍ ସାନ୍ ହିଲା ହର୍ କଃତା କଃଉତିରିଲେ, ହିଲାହର୍ ବାବ୍ତି ରିଲେ, ହିଲା ହର୍ ବିଚାର୍ କଃର୍ତିରିଲେ; ବଃଡ୍ ଅୟ୍ଲାକ୍ ମୁଁୟ୍ ହିଲା ବଃଳାର୍ କଃତା ସଃବୁ ଚାଡ୍ଲେ । 12କାୟ୍ତାକ୍ବଃଲେକ୍ ଅଃବେ ମୁୟ୍ଁ ଦଃର୍ହାଣେ ଦଃକ୍ଲା ହର୍ ଅଃଳକ୍ ଜାଣିଆଚି । ମଃତର୍ ସଃଡେବଃଳ୍ ମୁୟ୍ଁ ନିକକଃରି ଜାଣିନ୍ଦ୍; ମଃତର୍ ସଃଡେବଃଳ୍, ମୁୟ୍ଁ ଜଃନ୍କଃରି ଚିନ୍ଲାର୍, ସେରଃକମ୍ ହେଁ ଜାଣାହଃଳିନ୍ଦ୍ ।
13ତଃବେ ବିସ୍ୱାସ୍, ବଃର୍ସା, ଲାଡ୍, ଇ ତିନିଗଟ୍ ସଃବୁବଃଳ୍ ରଃୟ୍ଦ୍, ଆର୍ ଇମଃନାର୍ ବିତ୍ରେ ଲାଡ୍ ସଃବ୍କେ ବଃଡ୍ ।
14ଆତ୍ମାର୍ ଦାନ୍ମଃନ୍
1ଲାଡେ ଅଃଦିକ୍ ଅଃଉଆ, ଆରେକ୍ ଆତ୍ମାର୍ ଦାନ୍ମଃନ୍ ହାଉଁକେ, ମୁଳ୍କଃରି ଜଃନ୍କଃରି ଇସ୍ୱରାର୍ କବୁର୍ ପର୍ଚାର୍ କଃରୁକେ ମଃନ୍ ଦିଆନେ ଲାଗିରିଆ । 2କାୟ୍ତାକ୍ବଃଲେକ୍ ଜେ ବିନ୍ ବାସାୟ୍ କଃତା କୟ୍ଦ୍, ସେ ମାନାୟ୍କେ ନଃକୟ୍, ମଃତର୍ ଇସ୍ୱର୍କେ କୟ୍ଦ୍, କାୟ୍ତାକ୍ବଃଲେକ୍ କେହେଁ ତାକେ ବୁଜୁ ନାହାର୍ତି, ମଃତର୍ ସେ ଆତ୍ମା ତଃୟ୍ ଗୁପ୍ତ୍ କଃତା କୟ୍ଦ୍ । 3ମଃତର୍ ଜେ ଇସ୍ୱରାର୍ କବୁର୍ କୟ୍ଦ୍, ସେ, ମାନାୟ୍ ମଃନ୍କେ ଉହ୍କାର୍, ସଃର୍ଦା, ଆର୍ ଦୁକ୍ହାସ୍ରାଉତା କଃତା କୟ୍ଦ୍ । 4ଜେ ବିନ୍ ବାସାୟ୍ କଃତା କୟ୍ଦ୍, ନିଜାର୍ ନିକ ଗିନେ କୟ୍ଦ୍, ମଃତର୍ ଜେ ବାବ୍ବାଣି କୟ୍ଦ୍, ସେ ମଣ୍ଡ୍ଳିମଃନାର୍ ଉହ୍କାର୍ ଗିନେ କୟ୍ଦ୍ ।
5ତୁମିମଃନ୍ ସଃବୁଲକ୍ ବିନ୍ ବାସାୟ୍ କଃତା କଃଉଆ, ଇରି ମର୍ ମଃନ୍, ମଃତର୍ ତୁମିମଃନ୍ ଇସ୍ୱରାର୍ ବାବ୍ବାଣି କଃଉଆ, ଇରି ମର୍ ଅଃଦିକ୍ ମଃନ୍; ଜେ ବିନ୍ ବାସାୟ୍ କଃତା କୟ୍ଦ୍, ସେ ଜଦି ମଣ୍ଡ୍ଳିର୍ ଲାବାର୍ ଗିନେ ବାସାର୍ ଅଃର୍ତ୍ ନଃବୁଜାୟଃଦ୍, ତଃବେ ତାର୍ ବାଦୁଲେ ଜେ ଇସ୍ୱରାର୍ କଃତା କୟ୍ଦ୍ ସେ ବଃଡ୍ । 6ସେତାକ୍ ଏ ବାୟ୍ବେଣିମଃନ୍, ମୁୟ୍ଁ ଜଦି ତୁମିମଃନ୍କାର୍ ହାକ୍ ଜାୟ୍ ଜାଣାୟ୍ଲା କଃତା, କି ଗିଆନ୍, କି ଇସ୍ୱରାର୍ କଃତା, କି ବାବ୍ବାଣି କଃତା ନଃକୟ୍ଁ ଅଃବ୍କା ବିନ୍ ବାସାୟ୍ ହ୍କା କଃତା କୟ୍ନ୍ଦ୍, ସେତାକ୍ ମୁୟ୍ଁ ତୁମିମଃନ୍କାର୍ କାୟ୍ ଉହ୍କାର୍ କଃରିନ୍ଦ୍ ?
7ସୁର୍ଲି ଅଃଉଅ କି ବିଣା ଅଃଉଅ, ଜିବନ୍ ନୟ୍ଲା ବାଜାମଃନ୍ ବାଜ୍ଲେକ୍ ହେଁ ଜଦି ବାଜୁଣେ ବିନ୍ ନଃରେୟ୍, ତଃବେ ସୁର୍ଲିଏ କାୟ୍ରି ବାଜୁଲି କି ବିଣାୟ୍ କାୟ୍ରି ବାଜୁଲି, ସେରି କଃନ୍କଃରି ଜାଣା ହଃଳେଦ୍ ? 8ଆରେକ୍, କମ୍ ଜଦି ନିକକଃରି ନଃବାଜେ, ତଃବେ କେ ଜୁଜ୍ କଃରୁକେ ତିଆର୍ ଅୟ୍ଦ୍ ? 9ସେରଃକମ୍ ତୁମିମଃନ୍କେ ହେଁ ଜଦି ବିନ୍ବାସାୟ୍ କଃତା ଅଃଉଆସ୍, ତଃବେ କାୟ୍ରି କଃଉଁଲାସ୍, ସେରି କଃନ୍କଃରି ଜାଣାହଃଳେଦ୍ ? କାୟ୍ତାକ୍ବଃଲେକ୍ ଅଃଗାସ୍କେ କୟ୍ଲା ହର୍ ଅୟ୍ଦ୍ । 10ଅଃଉଁ ହାରେ ଜଃଗତେ ଗାଦାଗଟ୍ ସଃବଦ୍ ଆଚେ, ଆରେକ୍ କୁୟ୍ ସଃବଦ୍ ହେଁ ଅଃର୍ତ୍ ନଃୟ୍ଲାର୍ ନାୟ୍ । 11ଇତାକ୍, ମୁଁୟ୍ ଜଦି କୟ୍ଲା ଲକାର୍ କଃତାର୍ ଅଃର୍ତ୍ ବୁଜୁକ୍ ସଃକାତ୍ ନାୟ୍, ତଃବେ, ମୁଁୟ୍ ତାର୍ ଗିନେ ବିଦେସିଆ ହଃର୍ ଅୟ୍ନ୍ଦ୍, ଆର୍ ସେ ମର୍ ହାକ୍ ବିଦେସିଆ ହର୍ ଅୟ୍ଦ୍ । 12ସେରଃକମ୍ ତୁମିମଃନ୍କେ ହେଁ ପବିତ୍ର ଆତ୍ମାର୍ ଦାନ୍ମଃନ୍ ହାଉଁକେ ଲାଗିହଃଳି ରିଲେକ୍ ମଣ୍ଡ୍ଳିର୍ ଉହ୍କାର୍ ଗିନେ ସେ ସଃବୁ ଅଃଦିକ୍ ହାଉଁକେ ଲାଗିହଃଳା ।
13ବଃଲେକ୍ ଜେ ବିନ୍ ବାସାୟ୍ କଃତା କୟ୍ଦ୍, ସେ ଜଃନ୍କଃରି ସେ କଃତାର୍ ଅଃର୍ତ୍ କଃରୁହାରେ, ଇତାର୍ ଗିନେ ପାର୍ତ୍ନା କଃର । 14କାୟ୍ତାକ୍ବଃଲେକ୍ ମୁୟ୍ଁ ଜଦି ବିନ୍ ବାସାୟ୍ ପାର୍ତ୍ନା କଃରିନ୍ଦ୍ ତଃବେ ମର୍ ଆତ୍ମା ପାର୍ତ୍ନା କଃରେଦ୍, ମଃତର୍ ମର୍ ବୁଜ୍ତା ସଃକ୍ତି ସେତି ନଃରଃୟ୍ । 15ତଃବେ କଃର୍ତାର୍ କାୟ୍ରି ? ମୁୟ୍ଁ ମର୍ ଆତ୍ମା ତଃୟ୍ ପାର୍ତ୍ନା କଃରିନ୍ଦ୍; ଆରେକ୍ ବୁଦିର୍ ସଃଙ୍ଗ୍ ପାର୍ତ୍ନା କଃରିନ୍ଦ୍, ମର୍ ଆତ୍ମାୟ୍ ମାପ୍ରୁର୍ ଗିତ୍ କୟ୍ଦ୍, ଆରେକ୍ ବୁଦିର୍ ସଃଙ୍ଗ୍ ହେଁ ମାପ୍ରୁର୍ ଗିତ୍ କୟ୍ଦ୍ । 16ନୟ୍ଲେକ୍ସଃରି ତୁମି ଜଦି ଆତ୍ମାର୍ ତଃୟ୍ ଦନ୍ୟବାଦ୍ କଃରାସ୍, ତଃବେ ବିନ୍ ଲକ୍ ତୁମାର୍ କଃତା ନଃବୁଜ୍ଲେ କଃନ୍କଃରି ତୁମାର୍ ଦନ୍ୟବାଦ୍ ତଃୟ୍ ଆରେକ୍ ଆମେନ୍ ବଃଲି କଃଉତି । 17ଜଦି ତୁମି ନିକକଃରି ଇସ୍ୱର୍କେ ଦନ୍ୟବାଦ୍ ଦେଉଁଲାସ୍ ସଃତ୍, ମଃତର୍ ସେରି ବିନ୍ ଲକାର୍ ଉହ୍କାର୍ ନଃୟ୍ ।
18ମୁୟ୍ଁ ତୁମାର୍ ସଃବୁର୍ ତଃୟ୍ହୁଣି ଅଃଦିକ୍ ବିନ୍ ବାସାୟ୍ କଃତା କୟ୍ନ୍ଦ୍ ବଃଲି ଇସ୍ୱର୍କେ ଦନ୍ୟବାଦ୍ ଦେଉଁଲେ । 19ଅୟ୍ଲେକ୍ ହେଁ ମୁୟ୍ଁ ଜଃନ୍କଃରି ବିନ୍ ଲକେ ହେଁ ସିକାଉଁ ହାରି, ଇତାର୍ ଗିନେ ମଣ୍ଡ୍ଳିଏ ହଃର୍ ବାସାୟ୍ ଗଃଣୁନାହାର୍ତା କଃତା କଃଉତା ବାଦୁଲେ ବୁଦିର୍ ସଃଙ୍ଗ୍ ହାଁଚ୍ଗଟ୍ କଃତା କଃଉଁକେ ବଃଲ୍ହାୟ୍ନ୍ଦ୍ । 20ଏ ବାୟ୍ବେଣିମଃନ୍, ବୁଦିଏ ହିଲାହର୍ ନଃଉଆଁ, ମଃତର୍ କଃରାବ୍ ତଃୟ୍ ହିଲାହର୍ ଅଃଉଆ, ମଃତର୍ ବୁଦିଏ ହୁର୍ନ୍ ବଃୟ୍ସାର୍ ଅଃଉଆ । 21ଦଃର୍ମ୍ସାସ୍ତରେ ଲେକା ଆଚେ,
“ମାପ୍ରୁ କଃଉଁଲା, ବିନ୍ ବାସା କଃଉତା ଲକାର୍ ତଃୟ୍
ଆର୍ ବିନ୍ ଦେସାର୍ ବାସା କଃଉତା ଲକ୍ମଃନ୍କାର୍ ଟଣ୍ଡ୍ ତଃୟ୍ ଅଃମି ଇ ଲକ୍ମଃନ୍କେ କଃତା କଃଉନ୍ଦ୍,
ସେନ୍ ଅୟ୍ଲେକ୍ ହେଁ ସେମଃନ୍ ଅଃମାର୍ କଃତା ନଃସୁଣ୍ତି ।”
22ଇତାର୍ ଗିନେ ବିନ୍ ବାସାୟ୍ କଃତା କଃଉତାର୍ ବିସ୍ୱାସିମଃନାର୍ ଗିନେ ଚିନ୍ହର୍ ନୟ୍, ମଃତର୍ ଅବିସ୍ୱାସି ମଃନ୍କାର୍ ଗିନେ ଚିନ୍ହର୍; ଆରେକ୍ ଇସ୍ୱରାର୍ କଃତା କଃଉମଃନାର୍ ହାଁୟ୍ ଚିନ୍ ହର୍ ନାୟ୍, ମଃତର୍ ବିସ୍ୱାସି ମଃନାର୍ ଗିନେ ଚିନ୍ ହର୍ ।
23ଆରେକ୍ ହେଁ ସଃବୁ ମଣ୍ଡ୍ଳି ଜଦି ରୁଣ୍ଡ୍ତି ଆର୍ ସଃବୁ ଲକ୍ ବିନ୍ବାସାୟ୍ କଃତା ଅଃଉତି, ଆରେକ୍ ଜେସେହେଁ ଆର୍ ଅବିସ୍ୱାସି ଲକ୍ମଃନ୍ ଆସ୍ତି, ତଃନ୍ଅଲେ ତୁମିମଃନ୍କେ ବଃୟା ବଃଲି ସେମଃନ୍ ନଃକ୍ଉତି କି ? 24ମଃତର୍ ଜଦି ସଃବୁଲକ୍ ବାବ୍ବାଣି କଃଉତି, ଆର୍ ଗଟ୍ ଅଃବିସ୍ୱାସି କି ଜେସେ ଆସେଦ୍, ତଃବେ ସେ ସଃବୁଲକାର୍ ତଃୟ୍ ଦସି ବଃଲି ଜାଣା ହଃଳେଦ୍, ସଃବୁ ଲକାର୍ ତଃୟ୍ ବୁଜୁକ୍ ଅୟ୍ଦ୍ । 25ତାର୍ ଗଃର୍ବାର୍ ଗୁପ୍ତ୍ କଃତା ଜାଣାହଃଳ୍ଲେକ୍, “ସେତି ସେ ମୁଣ୍ଡ୍ୟା ମାରେଦ୍ ଆର୍ ଇସ୍ୱର୍ ଜେ ବାୟ୍ଦ୍ରେ ତୁମିମଃନାର୍ ବିତ୍ରେ ଆଚେ,” ଇତି କୟ୍କଃରି ତାକେ ସେବା କଃରେଦ୍ ।
ମଣ୍ଡ୍ଳି ତଃୟ୍ ବିଦି ମାନି ରେତାର୍
26ଏ ବାୟ୍ବେଣିମଃନ୍, କାୟ୍ରି କଃର୍ତାର୍ ଆଚେ ? ତୁମିମଃନ୍କେ ରୁଣ୍ଡ୍ତାବଃଳ୍ ଗିତ୍, କି ସିକ୍ୟା କି ଇସ୍ୱର୍ ଜାଣାୟ୍ଲାର୍ ଜାଣାହଃଳ୍ତା କଃତା କଃଉତାର୍, କି ବିନ୍ବାସା, କି ବାସାର୍ ଅଃର୍ତ୍, ଇରଃକମ୍ ସଃବୁର୍ କାୟ୍ରି କି କାୟ୍ରି ଆଚେ । ସଃବୁ କଃତା ଉହ୍କାର୍ ଗିନେ କଃରା ଅଃଉଅ । 27ଜଦି କେ ହଃର୍ ବାସାୟ୍ କଃତା କୟ୍ଦ୍, ତଃବେ ଦୁୟ୍ କି ଅଃଦିକ୍ ଅୟ୍ଲେକ୍ ତିନିଲକ୍ ହାଳୁହାଳୁକଃରି କଃଉଅତ୍, ଆର୍ ଏକ୍ଲା ଅଃର୍ତ୍ କଃର । 28ମଃତର୍ ଜଦି କେହେଁ ଅଃର୍ତ୍ କଃରୁ ନଃରେୟ୍, ତଃନ୍ ଅଲେ ସେ ମଣ୍ଡ୍ଳିଏ ଚିମ୍ରା ରେଉଅ, ଆର୍ ସିଣିନ୍ଦ୍ ଟାଣେ ଇସ୍ୱର୍କେ କଃଉଅ । 29ଆର୍ ଦୁୟ୍ କି ତିନିଗଟ୍ ବାବ୍ବାଦି ଲକ୍ ଇସ୍ୱରାର୍ କବୁର୍ କଃଉଅତ୍, ଆରେକ୍ ବିନ୍ ଲକ୍ମଃନ୍ ସେତାର୍ ବିଚାର୍ କଃରତ୍ । 30ମଃତର୍ ବଃସି ରିଲା ବିନ୍ କାର୍ ଲଃଗେ ଜଦି କାୟ୍ କଃତା ହଃଳେଦ୍, ହଃର୍ତୁ ଲକ୍ ଚିମ୍ରା ଅଃଉଆ । 31କାୟ୍ତାକ୍ବଃଲେକ୍ ଜଃନ୍କଃରି ସିକ୍ୟା ହାଉତି, ଆରେକ୍ ସଃବୁ ଲକ୍ମଃନ୍ ଚେତ୍ନା ହାଉତି, ଇତାର୍ ଗିନେ ତୁମିମଃନ୍କେ ସଃବୁଲକ୍ ଗଟେକ୍ ଗଟେକ୍ କଃରି ହଃତିଲକ୍ ଇସ୍ୱରାର୍ କବୁର୍ କଃଉ ହାରାସ୍ । 32ଇସ୍ୱରାର୍ କବୁର୍ କଃଉତା ଆତ୍ମା ବାବ୍ବାଦିର୍ ତଃଳେ ରେତା ଦଃର୍କାର୍ । 33କାୟ୍ତାକ୍ବଃଲେକ୍ ଇସ୍ୱର୍ ବେଗଳ୍ କଃର୍ତା ଇସ୍ୱର୍ ନାୟ୍, ମଃତର୍ ସେ ସୁସ୍ତାକ୍ ମଃନ୍କଃର୍ତା ଇସ୍ୱର୍ । ଜଃନ୍କଃରି ଇସ୍ୱରାର୍ ମଃନ୍କାର୍ ସଃବୁ ମଣ୍ଡ୍ଳି ତଃୟ୍ ଅଃଉଁଲି, 34ସେରଃକମ୍ ମାୟ୍ଜିମଃନ୍ ମଣ୍ଡ୍ଳି ତଃୟ୍ ଚିମ୍ରା ରେଉଅତ୍, ବଃଲେକ୍ କଃତା କଃଉଁକେ ସେମଃନ୍ ଅଃଦିକାର୍ ହାୟ୍ ନଃକେର୍ତି, ମଃତର୍ ମସାର୍ ବିଦି ହଃର୍କାରେ ସେମଃନ୍ ମଦାଅୟ୍ ରେଉଅତ୍ । 35ସେମଃନ୍ ଜଦି କାୟ୍ କଃତା ବୁଜୁକ୍ ମଃନ୍କଃର୍ତି, ତଃବେ ଅଃହ୍ଣା ଅଃହ୍ଣାର୍ ଡକ୍ରାସିମଃନ୍କେ ହଃଚାରତ୍, କାୟ୍ତାକ୍ବଃଲେକ୍ ମଣ୍ଡ୍ଳି ବିତ୍ରେ କଃତା କଃଉତାର୍ ମାୟ୍ଜିମଃନାର୍ ଗିନେ ଲାଜାର୍ କଃତା ।
36କାୟ୍ରି ଇସ୍ୱରାର୍ କଃତା କାୟ୍ ତୁମିମଃନ୍କାର୍ ତଃୟ୍ହୁଣି ବାରାୟ୍ ଆସି ଆଚେ ? କି ଅଃବ୍କା ତୁମିମଃନ୍କାର୍ ତଃୟ୍ ଆସିଆଚେ ? 37କେ ଜଦି ନିଜ୍କେ ବାବ୍ବାଦି କି ଆତ୍ମା ଦିଲାର୍ ଗିନେ ବଃଲି ବାବେଦ୍, ତଃନ୍ଅଲେ ତୁମିମଃନ୍କେ ଜୁୟ୍ଜୁୟ୍ରି ଲେକୁଲେ, ସେରିମଃନ୍ ଜେ ମାପ୍ରୁର୍ ନିକ, ବିଦି ଇରି ସେ ଜାଣ । 38ମଃତର୍ ସେ ଜଦି ଇ ସଃବୁ କଃତାକ୍ ମଃନ୍ ନଃଦେୟ୍, ତଃବେ ତୁମି ହେଁ ତାକେ ମଃନ୍ ଦିଆସ୍ ନାୟ୍ ।
39ଇତାକ୍ ଏ ମର୍ ବାୟ୍ ବେଣିମଃନ୍, ଇସ୍ୱରାର୍ କବୁର୍ କଃଉଁକେ ମୁଳ୍କଃରି ଲାଗିହଃଳି ରିଆ; ଆର୍ ହଃର୍ ବାସାୟ୍ କଃତା କଃଉଁକେ ତେବାଉଆ ନାୟ୍ । 40ମଃତର୍ ସଃବୁ କଃତା ଟିକ୍ବାବେ ସୁଦାରି କଃରି କଃରା ଅଃଉଅ ।
15ଜିସୁର୍ ମଃରି ଉଟ୍ତାର୍
1ଏ ବାୟ୍ବେଣିମଃନ୍ ମୁୟ୍ଁ ତୁମିମଃନ୍କାର୍ ହାକ୍ ଜୁୟ୍ ନିକ କବୁର୍ ପର୍ଚାର୍ କଃରିରିଲେ, ଜୁୟ୍ରି ତୁମିମଃନ୍କେ ମାନିରିଲାସ୍, ଜୁୟ୍ତି ହେଁ ତିର୍ ଅୟ୍ ଆଚାସ୍, ମୁୟ୍ଁ ଜୁୟ୍ ରଃକମେ ସେରି ତୁମାର୍ ହାକ୍ ପର୍ଚାର୍ କଃରିରିଲେ, ଇରି ଏତାୟ୍ ଦେଉଁକ୍ ମଃନ୍କଃରୁଲେ । 2ଜଦି ତୁମିମଃନ୍ ସେରି ଜଃବର୍କଃରି ଦଃରିରିଆସ୍, ସେତାର୍ ଗିନେ ମୁକ୍ତି ହାଉଁଲାସ୍, ନୟ୍ଲେକ୍ତ ହଲ୍ୟାୟ୍ ତୁମିମଃନ୍କେ ବିସ୍ୱାସି ଅୟ୍ରିଲାସ୍ ।
3କାୟ୍ତାକ୍ବଃଲେକ୍ ଜୁୟ୍ଜୁୟ୍ ବୁଦି ହାୟ୍ରିଲେ, ସେବିତ୍ରାର୍ ଇ ମୁଳ୍ସିକ୍ୟା ତୁମିମଃନ୍କେ ଦଃୟ୍ରିଲେ ବଃଲେକ୍, କ୍ରିସ୍ଟ ସାସ୍ତର୍ ହଃର୍କାରେ ଅଃମିମଃନାର୍ ହାହାର୍ ଗିନେ ମଃଲା । 4୧୫:୪ ମାତି ୧୨:୪୦; ପେରି ୨:୨୪-୩୨.ସାସ୍ତର୍ ହଃର୍କାରେ ସେ ତହାଅୟଲା, ଆର୍ ତିନିଦିନେ ଜିବନ୍ ହାୟ୍ ଉଟ୍ଲା । 5୧୫:୫ ଲୁକ ୨୪:୩୪; ମାତି ୨୮:୧୬,୧୭; ମାର୍କ ୧୬:୧୪; ଲୁକ ୨୪:୩୬; ଜହ ୨୦:୧୯.ସେ ପିତର୍, ଆର୍ ତାର୍ହଃଚେ ବାରଗଟ୍ ଚେଲାକେ ଦଃକାୟ୍ ଅୟ୍ଲା । 6ତାର୍ହଃଚେ ଅଃକାର୍କେ ହାଁଚ୍ସ ହୁଣି ଅଃଦିକ୍ ବାୟ୍ମଃନ୍ ତାର୍ ହଃଚେ ଜାତାଲକ୍ ଦଃକାୟ୍ ଅୟ୍ଲା; ସେମଃନ୍କାର ବିତ୍ରେ କଃତିଲକ୍ ଜିବନ୍ ଆଚ୍ତି, ମଃତର୍ ଚେଳେମଃନ୍ ମଃରିଜାୟ୍ ଆଚ୍ତି । 7ତାର୍ହଃଚେ ସେ ଜାକୁବକେ, ଆର୍ ହ୍ଚେ, ସବୁ ପେରିତ୍ମଃନ୍କ୍ ଦଃକାୟ୍ ଅୟ୍ଲା ।
8୧୫:୮ ପେରି ୯:୩-୬.ସଃରାସଃରି ହଲ୍ୟା ଜଃଲମ୍ ଅୟ୍ଲା ହର୍ ଏକ୍ଲା ଜେ ମୁୟ୍ଁ, ସେ ମକେ ହେଁ ଦଃକାୟ୍ ଅୟ୍ଲା । 9୧୫:୯ ପେରି ୮:୩.କାୟ୍ତାକ୍ବଃଲେକ୍ ଇସ୍ୱରାର୍ ବିସ୍ୱାସି ଦଃଳ୍କେ କଃସ୍ଟ୍ ଦଃୟ୍ଆଚି ସେତାକ୍ ପେରିତ୍ମଃନାର୍ ବିତ୍ରେ ମୁୟ୍ଁ ସଃବ୍କେ ସାନ୍ ଆର୍ ପେରିତ୍ ନାଉଁଏ ନାଉଁ ହୁଟୁକ୍ ଜୟ୍ଗ୍ ନାୟ୍ । 10ମଃତର୍ ମୁୟ୍ଁ ଜାୟ୍ରି ଅୟ୍ ଆଚି, ସେରି ଇସ୍ୱରାର୍ ଦଃୟାୟ୍ ଅୟ୍ ଆଚି, ଆର୍ ମକେ ଦିଲାର୍ ତାର୍ ଦଃୟା ହଲ୍ୟା ଅୟ୍ ନଃକେରେ । ମଃତର୍ ମୁୟ୍ଁ ସେ ସଃବୁଲକାର୍ ତଃୟ୍ହୁଣି ଅଃଦିକ୍ କଃସ୍ଟ୍ କଃରିଆଚି, ଅୟ୍ଲେକ୍ ହେଁ ମୁୟ୍ଁ ନାୟ୍ ମଃତର୍ ମର୍ସଃଙ୍ଗ୍ ରିଲା ଦଃୟା ସେରି କଃରି ଆଚେ । 11ସେତାକ୍ ମୁୟ୍ଁ କି ସେମଃନ୍ ଅଃଉଅତ୍ ଇରଃକମ୍ ଅଃମିମଃନ୍ ପର୍ଚାର୍ କଃରିରେଉଁନ୍ଦ୍, ଆର୍ ଇରଃକମ୍ ତୁମିମଃନ୍କେ ବିସ୍ୱାସି ଅୟ୍ ଆଚାସ୍ ।
ଅଃମାର୍ ମଃରି ଉଟ୍ତାର୍
12କ୍ରିସ୍ଟ ଜେ ମଃଲାମଃନ୍କାର୍ ବିତ୍ରେ ହୁଣି ଉଟିଆଚେ, ଇତି ଜଦି ପର୍ଚାର୍ କଃରାଜାୟ୍ ଆଚେ, ତଃବେ ମଃଲା ଲକାର୍ ଆରେକ୍ ଉଟ୍ତାର୍ ନାୟ୍ ବଃଲି ତୁମିମଃନ୍କାର୍ ବିତ୍ରେ ଚେଳେମଃନ୍ କଃନ୍କଃରି କଃଉଁଲାୟ୍ । 13ଜଦି ମଃଲା ଲକାର୍ ଆରେକ୍ ଉଟ୍ତାର୍ ନାୟ୍, ତଃବେ କ୍ରିସ୍ଟ ହେଁ ଉଟି ନଃକେରେ । 14ଆର୍ ଜଦି କ୍ରିସ୍ଟ ଉଟି ନଃକେରେ, ତଃନ୍ଅଲେ ଅଃମାର୍ ପର୍ଚାର୍ ମିଚ୍, ତୁମିମଃନ୍କାର୍ ବିସ୍ୱାସ୍ ହେଁ ହଲ୍ୟା । 15ଆର୍ ଅଃମିମଃନ୍ ଇସ୍ୱରାର୍ କଃତାର୍ ମିଚ୍ ସାକି, ଇତି ଜାଣାହଃଳୁଲି । କାୟ୍ତାକ୍ବଃଲେକ୍ ଅଃମିମଃନ୍ ଇସ୍ୱରାର୍ ବିରଦେ ସାକିଦିଲୁହୁଣି ସେ କ୍ରିସ୍ଟକେ ଉଟାୟ୍ ଆଚେ, ମଃତର୍ ଜଦି ମଃଲା ଲକ୍ ନୁଟ୍ତି, ତଃବେ ସେ ଇସ୍ୱର୍ ତାକେ ଉଟାୟ୍ ନଃକେରେ । 16ଜଦି ମଃଲା ଲକ୍ ମଃର୍ନେହୁଣି ନୁଟ୍ତି, ତଃବେ କ୍ରିସ୍ଟ ହେଁ ନଃଉଟେ; 17ଆର୍ ଜଦି କ୍ରିସ୍ଟ ଉଟି ନଃକରେ, ତଃବେ ତୁମିମଃନ୍କାର୍ ବିସ୍ୱାସ ହଲ୍ୟା, ଆର୍ ତୁମିମଃନ୍କେ ଅଃବେ ହଃତେକ୍ ହାହେ ଆଚାସ୍ । 18ତଃନ୍ ଅୟ୍ଲେକ୍ ଜୁୟ୍ ଲକ୍ମଃନ୍ କ୍ରିସ୍ଟର୍ ତଃୟ୍ ମଃରି ଆଚ୍ତି, ସେମଃନ୍ ହେଁ ନାସ୍ ଅୟ୍ ଆଚ୍ତି । 19ଜଦି ଇ ଜିବନାର୍ ଗିନେ ହଃକା ଅଃମିମଃନ୍ କ୍ରିସ୍ଟର୍ତଃୟ୍ ଆସା କଃରିଆଚୁ, ତଃବେ ସଃବୁ ମାନାୟ୍ ମଃନ୍କାର୍ ବିତ୍ରେ ଅଃମାର୍ ଅଃଦିକ୍ ଦୁକାର୍ କଃତା ।
20ମଃତର୍ ସଃତ୍କଃରି କ୍ରିସ୍ଟ ହଃର୍ତୁ ହଃଳ୍ ହର୍ ମଃଲା ଲକ୍ମଃନାର୍ ବିତ୍ରେ ହୁଣି ଉଟିଆଚେ । 21କାୟ୍ତାକ୍ବଃଲେକ୍ ମାନାୟ୍ର୍ ତଃୟ୍ ହୁଣି ମଃର୍ନ୍ ଆୟ୍ଲି, ଆର୍ ସେରଃକମ୍ ମାନାୟ୍ ତଃୟ୍ହୁଣି ମଃଲା ଲକ୍ମଃନ୍କାର୍ ଉଟ୍ତାର୍ ଆସି ଆଚେ । 22ସେତାକ୍ ଆଦମ୍ ତଃୟ୍ ମିସିରିଲାକେ ଜଃନ୍କଃରି ସଃବୁଲକ୍ ମଃର୍ନ୍ ଡଃଣ୍ଡ୍ ହାଉତି, ସେ ରଃକମ୍ ହେଁ କ୍ରିସ୍ଟର୍ ତଃୟ୍ ମିସ୍ଲାକେ ସଃବୁ ଲକ୍ ଜିବନ୍ ହାଉତି । 23ମଃତର୍ ସଃବୁଲକ୍ ଅଃହ୍ଣାର୍ ଅଃହ୍ଣାର୍ ଦଃଳେ ହଃର୍ତୁ ହଃଳ୍ ହର୍ କ୍ରିସ୍ଟ, ହଃଚେ କ୍ରିସ୍ଟର୍ ଆସ୍ତାବଃଳ୍ ତାର୍ ତଃୟ୍ ଆୟ୍ଲି ଲକ୍ମଃନ୍ । 24ତାର୍ହଃଚେ ଜୁଗ୍ ବୁଡେଦ୍ । କ୍ରିସ୍ଟ ସଃବୁ ବିଟାଳ୍ ଆତ୍ମା, ଜାର୍ତଃୟ୍ ରାଜ୍କଃର୍ତାର୍, ଅଃଦିକାରି, ଆର୍ ସଃକ୍ତି ଆଚେ ସେ ସଃବ୍କେ ଆରାୟ୍ଦ୍, ଆର୍ ତାର୍ ହଃଚେ ଉବା ଇସ୍ୱର୍କେ ରାଇଜ୍ କଃରୁକେ ସଃହ୍ରି ଦଃୟ୍ଦ୍ । 25ବଃଲେକ୍ ପର୍ବୁ ସଃବୁ ସଃତ୍ରୁ ମଃନ୍କେ ନିଜାର୍ ହାଦ୍ ତ୍ଳେ ନଃସେଙ୍ଗାଉତା ହଃତେକ୍ ତାକେ ଜଃନ୍କଃରି ହେଁ ରାୟଃଜ୍ କଃରେଦ୍ । 26ସଃରାସଃରି ସଃତ୍ରୁ ହର୍ ମଃର୍ନ୍କେ ବଃସମ୍ କଃରା ଅୟ୍ଦ୍ । 27କାୟ୍ତାକ୍ବଃଲେକ୍ ସାସ୍ତର୍ କଃଉଁଲି ସେ ସଃବୁ କଃତା କ୍ରିସ୍ଟର୍ ହାଦ୍ତଃଳେ କଃରେଦ୍ । ଜଃଡ୍ବଃଳ୍ ସେ କୟ୍ଦ୍, ସଃବୁ କଃତା ତାର୍ ଆୟ୍ତେ କଃରାଜାୟ୍ ଆଚେ, ଇରି ସଃତ୍, ସଃବୁ କଃତା ଜେ ତାର୍ ଆୟ୍ତେ କଃଲା, ସେସଃବୁର୍ ବିତ୍ରେ ଇସ୍ୱର୍ ନାୟ୍ । 28ଆର୍ ସଃବୁକଃତା କ୍ରିସ୍ଟର୍ ଆୟ୍ତେ କଃରାଗ୍ଲା ହଃଚେ ସଃବୁକଃତା ତାର୍ ଆୟ୍ତେ କଃଲା, ନିଜେ କ୍ରିସ୍ଟ ହେଁ ତାର୍ ଆୟ୍ତେ ରଃୟ୍ଦ୍, ଜଃନ୍କଃରି ଇସ୍ୱର୍ ରାୟ୍ଜ୍ ସଃବ୍କାର୍ ଉହ୍ରେ ଅୟ୍ଦ୍ ।
29ମଃଲା ଲକାର୍ ଗିନେ ଜୁୟ୍ ଲକ୍ମଃନ୍ ବାପ୍ତିସମ୍ ଅଃଉତି, ସେମଃନାର୍ ବିସୟେ ତୁମି କାୟ୍ରି ଲେକ୍ଲାସ୍, କଃତେକ୍ ଲକାର୍ କଃତା ଇସାବେ, ଜୁୟ୍ ଲକ୍ମଃନ୍ ମଃରି ନଃଉଟ୍ତି ସେମଃନାର୍ ଗିନେ ବିନ୍ ଲକ୍କେ କାୟ୍ତାକ୍ ବାପ୍ତିସମ୍ ଦିଆ ଅୟ୍ଦ୍ ? 30ଆରେକ୍ ଅଃମିମଃନ୍ କାୟ୍ତାକ୍ ହଃତିତର୍ ବିପ୍ତିଏ ହଃଳୁଲୁ । 31ଏ ବାୟ୍ ବେଣିମଃନ୍, ଅଃମିମଃନାର୍ ମାପ୍ରୁ ଜିସୁ କ୍ରିସ୍ଟର୍ ତଃୟ୍ ତୁମାର୍ ଗିନେ ମୁୟ୍ଁ ଜୁୟ୍ ଗଃର୍ବ୍ କଃରି ଆଚି, ସେତିର୍ ସଃୟ୍ତ୍ କଃରି କଃଉଁଲେ, ମୁୟ୍ଁ ସଃବୁ ଦିନ୍ ମଃରୁଲେ । 32ଜଦି ଲକାର୍ ଚାଲ୍ଚାଲ୍ତି ହଃର୍କାରେ ମୁୟ୍ଁ ଏପିସିଏ ବଃନାର୍ ଜଃତୁମଃନାର୍ ହର୍ ଲକ୍ମଃନାର୍ ସଃଙ୍ଗ୍ ଜୁଜ୍ କଃରିଆଚି, ତଃବେ ସେତି ମର୍ କାୟ୍ ଲାବ୍ ଅୟ୍ଲି ? ଜଦି ମଃଲା ଲକ୍ ନଃଉଟ୍ତି, ତଃବେ ଆସା, କଃତାରିଲା ହଃର୍କାରେ ଅଃମିମଃନ୍ “କାଉଆ ହିଉଆ କଃରୁଆଁ କାୟ୍ତାକ୍ବଃଲେକ୍ କାଲି ଅଃମିମଃନ୍ ମଃରୁଆଁ ।”
33ମଃତର୍ ତୁମିମଃନ୍ ବୁଲ୍କା ନାୟ୍, ନିକ ଚାଲାଚାଲ୍ତି କଃରାବ୍ ଚାଲ୍ଚାଲ୍ତି ନଃସ୍ଟ୍ କଃରେଦ୍ । 34ନ୍ୟାୟ୍ବାବେ ଜଃଗ୍ରାତ୍ ଅଃଉଆ ହାହ୍ କଃରା ନାୟ୍, କାୟ୍ତାକ୍ବଃଲେକ୍ କଃର୍ତାର୍ ଇସ୍ୱରାର୍ କଃତାୟ୍ ଗିଆନ୍ ନାୟ୍; ମୁୟ୍ଁ ତୁମିମଃନ୍କାର୍ ଲାଜାର୍ ଗିନେ ଇ କଃତା କଃଉଁଲେ ।
ଆରେକ୍ ଜିବନ୍ ହାୟ୍ଲା ଗଃଗାଳ୍
35କେ ହଃଚାରୁ ହାରେ, “ମଃଲା ଲକ୍ମଃନ୍ କଃନକଃରି ଉଟ୍ତି ? କଃନ୍କା ଗଃଗାଳେ ସେମଃନ୍ ଆସ୍ତି ?” 36ଏ ନିର୍ବୁଦିଆ, ତୁମି ନିଜେ ଜାୟ୍ରି ବୁଣାସ୍ ସେରି ନଃମେଲେକ୍ ଜିବନ୍ ନଃହାୟ୍ । 37ଆର୍ ଜୁୟ୍ ଗଃଗାଳ୍ ଅୟ୍ଦ୍ ସେରି ନଃବୁଣାସ୍, ମଃତର୍ ଗଅଁ ଅଃଉଅ କି ବିନ୍ ଜୁୟ୍ ତାସ୍ ହେଁ ଅଃଉଅ ସେରି ଅଃବ୍କା ମୁଞ୍ଜି ହଃକା । 38ମଃତର୍ ଇସ୍ୱର୍ ଅଃହ୍ଣାର୍ ଇଚା ହଃର୍କାରେ ତାକେ ଗଃଗାଳ୍ ଦଃୟ୍ଦ୍, ଆର୍ ସଃବୁ ବିଆନ୍ ବିତ୍ରେ ହଃତିତାକେ ସେ ଅଃହ୍ଣାର୍ ଗଃଗାଳ୍ ଦଃୟ୍ଦ୍ ।
39ସଃବୁ ଜିବ୍ଜଃତୁର୍ ଗଃଗାଳ୍ ଅଃକାହର୍ ନଃରଃୟ୍, ମଃତର୍ ମାନାୟ୍ମଃନାର୍ ଗଟେକ୍ ରଃକମ୍ ଗଃଗାଳ୍, ଜଃତୁମଃନାର୍ ବିନ୍ ରଃକମ୍ ଗଃଗାଳ୍ ଆରେକ୍ ଚେଳେମଃନ୍କାର୍ ଆରେକ୍ ବିନ୍ ରଃକମ୍ ଗଃଗାଳ୍ ଆର୍ ମାଚ୍ ମଃନାର୍ ବିନ୍ ରଃକମ୍ ଗଃଗାଳ୍ ।
40ଅଃଗାସାର୍ ଗଃଗାଳ୍ ଆଚେ ଆର୍ ହୁର୍ତିବିର୍ ଗଃଗାଳ୍ ହେଁ ଆଚେ, ମଃତର୍ ସଃର୍ଗ୍ହୁରାର୍ ଗଃଗାଳାର୍ ଗଟେରଃକମ୍ ଉଜାଳ୍, ହୁର୍ତିବିର୍ ଗଃଗାଳାର୍ ବିନ୍ ରଃକମ୍ ଉଜାଳ୍ । 41ବେଳାର୍ ଗଟେରଃକମ୍ ଉଜାଳ୍, ଜନାର୍ ଗଟ୍ରଃକମ୍ ଉଜାଳ୍ ଆର୍ ତାରାମଃନାର୍ ବିନ୍ ରଃକମ୍ ଉଜାଳ୍; ଉଜାଳେ ଗଟ୍ ତାରା ଆରେଗଟ୍ ତାରା ତଃୟ୍ହୁଣି ବିନ୍ ।
42ତୁମିମଃନାର୍ ମଃର୍ନେହୁଣି ଉଟ୍ତାର୍ ହେଁ ସେରଃକମ୍ । ନଃସ୍ଟେ ବୁଣା ଜାୟ୍ଦ୍, ମଃତର୍ ନଃସ୍ଟ୍ ନଃୟ୍କଃରି ଉଟେଦ୍ । ତହ୍ତା ଗଃଗାଳ୍ ନଃସ୍ଟ୍ ଅୟ୍ଦ୍, ମଃତର୍ ଆରେକ୍ ଉଟ୍ଲା ଗଃଗାଳ୍ ନଃସ୍ଟ୍ ନୟ୍ । 43ଲାଡ୍ ନଃକେରି ବୁଣା ଜାୟ୍ଦ୍, ଜଃଜ୍ମାନ୍ ଅୟ୍ ଉଟେଦ୍; ଦୁର୍ବୁଳେ ବୁଣା ଜାୟ୍ଦ୍ ସଃକାତ୍ ଅୟ୍ ଉଟେଦ୍ । 44ସଃତ୍ ଗଃଗାଳ୍ ବୁଣା ଅୟ୍ଦ୍, ଆତ୍ମାର୍ ଗଃଗାଳ୍ ଉଟେଦ୍ । ଜଦି ସଃତ୍ ଗଃଗାଳ୍ ଆଚେ, ତଃବେ ଆତ୍ମାର୍ ଗଃଗାଳ୍ ହେଁ ଆଚେ । 45ଇ ରଃକମ୍ ଲେକା ହେଁ ଆଚେ, ହଃର୍ତୁ ମାନାୟ୍ ଆଦମ୍ ଜିବନ୍ ରିଲାର୍ ଅୟ୍ଲା ସଃରାସଃରି ଆଦମ୍ ଜିବନ୍ ଦେତାର୍ ଆତ୍ମା ଅୟ୍ଲା । 46ମଃତର୍ ଜାୟ୍ରି ଜିବନାର୍ ସେରି ହଃର୍ତୁ ନାୟ୍, ମଃତର୍ ଜୁୟ୍ରି ଜିବନାର୍ ନୟ୍ ଜଃଗତାର୍, ସେରି ହଃର୍ତୁ ତାର୍ହଃଚେ ଜିବନାର୍ । 47ହଃର୍ତୁ ମାନାୟ୍ ଆଦମ୍ ହୁର୍ତିବିର୍, ମାଟିଏ ତିଆର୍ ଅୟ୍ରିଲା, ହଃଚେ ଆୟ୍ଲି ଆଦମ୍ ସଃର୍ଗେହୁଣି ଆୟ୍ଲାର୍ । 48ଜୁୟମଃନ୍ ମାଟାୟ୍ ଗଃଳ୍ଲାର୍, ସେମଃନ୍ ମାଟାୟ୍ ହାଜ୍ଲାର୍ ସେ ମାନାୟ୍ହର୍, ଆରେକ୍ ଜୁୟ୍ ଲକ୍ମଃନ୍ ସଃର୍ଗ୍ହୁରେ ହୁଣି ଆୟ୍ଲାର୍, ସେମଃନ୍ ସଃର୍ଗେ ହୁଣି ଆୟ୍ଲା ସେମାନାୟ୍ ହର୍ । 49ଆର୍ ଅଃମିମଃନ୍ ହେଁ ମାଟାୟ୍ ହାଜ୍ଲାର୍ ସେ ମାନାୟ୍ର୍ ରୁହ୍ ଦଃରି ଆଚୁ, ସେରଃକମ୍ ସେ ସଃର୍ଗ୍ହୁରାର୍ ମାନାୟ୍ ହର୍ ଅଃଉଁଆ ।
50ଏ ବାୟ୍ ଆର୍ ବେଣିମଃନ୍, ମୁୟ୍ଁ ଇରି କଃଉଁଲେ, ମାସ୍ ଆର୍ ବଃନିର୍ ଗଃଗାଳ୍ ଇସ୍ୱରାର୍ ରାଇଜ୍କେ ଅଃଦିକାର୍ କଃରୁ ନାହାରେ, କି ନଃସ୍ଟ୍ ଅଃଉତାର୍ ନଃସ୍ଟ୍ ନଃଉତାରିକ୍ ଅଃଦିକାର୍ କଃରୁ ନାହାରେ ।
51୧୫:୫୧ ୧ ତେସ ୪:୧୫-୧୭.ଦଃକା, ମୁୟ୍ଁ ତୁମିମଃନ୍କେ ଗଟ୍ ଗୁପ୍ତ୍ କଃତା କଃଉଁଲେ, ଅଃମିମଃନାର୍ ବିତ୍ରେ ସଃବୁ ଲକ୍ ମଃରି ନଃକେରୁ । ମଃତର୍ ଅଃମିମଃନ୍ ବାଦ୍ଲି ଜଃଉଁନ୍ଦ୍ । 52ଇତି ଅଃକା ସଃଙ୍ଗ୍ ଗଟେକ୍ ଆକି ମିଟ୍କାୟ୍, ସଃରାସଃରି କମ୍ ସଃବଦେ ଅଃମିମଃନ୍ ସଃବୁଲକ୍ ବାଦ୍ଲୁନ୍ଦ୍ । କାୟ୍ତାକ୍ ବଃଲେକ୍ ତୁରି ବାଜେଦ୍, ଆର୍ ମଃଲା ଲକ୍ମଃନ୍ ନଃସ୍ଟ୍ ନଃୟ୍କଃରି ଉଟ୍ତି ଆର୍ ଅଃମିମଃନ୍ ବାଦ୍ଲୁନ୍ଦ୍ । 53କାୟ୍ତାକ୍ବଃଲେକ୍ ଇ ନଃସ୍ଟ୍ ଅଃଉତା ଗଃଗାଳ୍କେ ନଃସ୍ଟ୍ ନଃଉତା ବଃସ୍ତର୍ ହିନ୍ଦୁକ୍ ଅୟ୍ଦ୍ । ଆର୍ ଇ ଜଃଗତାର୍ ଗଃଗାଳକେ ଅଃମ୍ବର୍ ବର୍ ହର୍ ବଃସ୍ତର୍ ହିନ୍ଦୁକ୍ ଅୟ୍ଦ୍ । 54ମଃତର୍ ଇ ନସ୍ଟ୍ ଗଃଗାଳ୍ ନଃସ୍ଟ୍ନଃଉତା ବଃସ୍ତର୍ ଆର୍ ଇ ଜଃଗତାର୍ ଗଃଗାଳ୍ ଅଃମ୍ବର୍ ହର୍ ବଃସ୍ତର୍ ହିନ୍ଦ୍ଲା ହଃଚେ, ଇ ଲେକ୍ଲା କଃତା ସଃତ୍ ଅୟ୍ଦ୍, “ମଃର୍ନାର୍ ନାସ୍ ଗଃଟିଆଚେ ଆର୍ ଜିଣ୍ତାର୍ ହୁର୍ନ୍ ଅୟ୍ଆଚେ,
55ରେ ମଃର୍ନ୍ କଃୟ୍ ତର୍ ଜିତାହାଣ୍ ?
ରେ ମଃର୍ନ୍ କଃୟ୍ ତର୍ କାଳ୍ ?”
56ମଃର୍ନ୍ କଃର୍ତା ସଃକ୍ତି ହାହେ ହୁଣି ହାୟ୍ଦ୍, ଆର୍ ହାହାର୍ ବଃଳ୍ ମସାର୍ ବିଦି; 57ମଃତର୍ ଜୁୟ୍ ଇସ୍ୱର୍ ଅଃମିମଃନାର୍ ମାପ୍ରୁ ଜିସୁ କ୍ରିସ୍ଟର୍ ଗିନେ ଅଃମିମଃନ୍କ୍ ଜିତାୟ୍ଲା ଆଚେ, ତାର୍ ଦନ୍ୟବାଦ୍ ଅଃଉଅ ।
58ବଃଲେକ୍ ଏ ମର୍ ଲାଡାର୍ ବାୟ୍ ବେଣିମଃନ୍ ମାପ୍ରୁର୍ ସେବାୟ୍ ତୁମିମଃନ୍ କଃସ୍ଟ୍ ହାୟ୍ଲାର୍ ହଲ୍ୟା ନଃଜାୟ୍ଁ, ଇରି ଜାଣି ମାପ୍ରୁର୍ କାମେ ତିର୍ ଆର୍ ଅଃଟୁଆ ରଃୟ୍ ସଃବୁ ବଃଳ୍ ଅଃଦିକ୍ ଜଃଗ୍ରାତ୍ ଅଃଉଆ ।
16ଇସ୍ୱରାର୍ ଲକ୍ମଃନାର୍ ଗିନେ ଦାନ୍ଦେତାର୍
1୧୬:୧ ରମି ୧୫:୨୫,୨୬.ଜିଉଦାର୍ ଦଃର୍ମିମଃନାର୍ ଗିନେ ଦାନ୍ ଦେଉଁକେ ଜଃନ୍କଃରି ମୁୟ୍ଁ ଗାଲାତିର୍ ମଣ୍ଡ୍ଳିମଃନ୍କେ ଗଃଉଆରି କଃରିରିଲେ, ତୁମିମଃନ୍ ହେଁ ସେନ୍ କଃରା । 2ମୁୟ୍ଁ ଗଃଲେକ୍ ଜଃନ୍କଃରି ଦାନ୍ ମାଗ୍ତାର୍ ଲଳା ନଃହେଳେ, ଇତାର୍ ଗିନେ ହଃତି ରୟ୍ବାର୍ ଦିନ୍ ତୁମିମଃନ୍କେ ଅଃହ୍ଣାର୍ ଅଃହ୍ଣାର୍ କାମାଉଣିର୍ ସୁବିଦା ହଃର୍କାରେ ଅଃଳକ୍ ଅଃଳକ୍ ଜଃମା କଃରି ବିନେ ସଃଙ୍ଗାଉଆ । 3ଆର୍ ମୁୟ୍ଁ ଆୟ୍ଲେକ୍ ତୁମିମଃନ୍କେ ଜୁୟ୍ ଲକ୍ମଃନ୍ ପରିକ୍ୟାୟ୍ ଜିଣି ଆଚ୍ତି ବଃଲି ମଃନେ କଃରାସ୍, ମୁୟ୍ଁ ସେ ମଃନ୍କେ ଚିଟି ଦଃୟ୍ ଜିରୁସାଲମେ ତୁମିମଃନ୍କାର୍ ଦିଲାର୍ ଦାନ୍ ନେଉଁକେ ହଃଟାୟ୍ନ୍ଦ୍ । 4ଆରେକ୍ ଜଦି ମୁୟ୍ଁ ଜାତାର୍ ଲଳା ଅୟ୍ଲେକ୍, ସେମଃନ୍ ମର୍ ସଃଙ୍ଗ୍ ଜାତି ।
ପାଉଲାର୍ ଉପାୟ୍
5୧୬:୫ ପେରି ୧୯:୨୧.ମଃତର୍ ମୁୟ୍ଁ ମାକିଦନିଆ ଅୟ୍ ଗଃଲାହଃଚେ, ତୁମିମଃନ୍କାର୍ ହାକ୍ ଆସିନ୍ଦ୍, ବଃଲେକ୍ ମୁୟ୍ଁ ମାକିଦନିଆ ଅୟ୍ ଜାୟ୍ନ୍ଦ୍ 6ଆର୍ ଅଃଉଁହାର୍ଲେକ୍ ତୁମିମଃନ୍କାର୍ ସଃଙ୍ଗ୍ କଃତିଦିନ୍ ରଃୟ୍ନ୍ଦ୍ ସିତ୍ ହଃଦ୍ନା ରଃୟ୍ନ୍ଦ୍ ବଃଲି ବାବୁଲେ, ସେତାକ୍ ମୁୟ୍ଁ ଜେଣେ ଗଃଲେକ୍ ହେଁ ତୁମିମଃନ୍ ମକେ ଉହ୍କାର୍ କଃରୁ ହାରାସ୍ । 7କାୟ୍ତାକ୍ବଃଲେକ୍ ଇ ତର୍ ଜାତାବଃଳ୍ ତୁମିମଃନ୍କାର୍ ସଃଙ୍ଗ୍ ବେଟ୍ଗାଟ୍ ଅଃଉଁକେ ମଃନ୍କଃରୁଲେ, ବଃଲେକ୍ ମାପ୍ରୁ ରେଉଁକ୍ ଦିଲେକ୍ ତଃବେ ତୁମିମଃନାର୍ ସଃଙ୍ଗ୍ ବୁତେକ୍ ବିନ୍ ରେଉଁକେ ଆସା କଃରୁଲେ ।
8୧୬:୮ ପେରି ୧୯:୮-୧୦.ମଃତର୍ ମୁୟ୍ଁ ପେଣ୍ଟିକସ୍ଟ୍ ହଃର୍ବାର୍ ଦିନ୍ ହଃତେକ୍ ଏପିସିଏ ରଃୟ୍ନ୍ଦ୍; 9କାୟ୍ତାକ୍ବଃଲେକ୍ ମର୍ ବିରଦି ମଃନ୍ ଗାଦେକ୍ ରିଲେକ୍ ହେଁ, ହଃଳ୍ ହାଉତା କାମ୍ କଃରୁକେ, ମର୍ଗିନେ ଅସାର୍ ଦୁଆର୍ ଉଗାଳା ଅୟ୍ଆଚେ ।
10୧୬:୧୦ ୧ କର ୪:୧୭.ଜଦି ତିମତି ଜାୟ୍ଦ୍ ତଃବେ ଜଃନ୍କଃରି ନଃଡିରିକଃରି ତୁମିମଃନ୍କାର୍ ସଃଙ୍ଗ୍ ରଃୟ୍ଦ୍, ସେତାର୍ ଗିନେ ଦିଆନ୍ କଃରା କାୟ୍ତାକ୍ବଃଲେକ୍ ମୁୟ୍ଁ ଜଃନ୍କାର୍ ସେ ହେଁ ସେନ୍କାର୍ ମାପ୍ରୁର୍ କାମ୍ କଃରୁଲା । 11ଇତାକ୍ ତାକେ କେ ସାନ୍ ନଃକେର, ମଃତର୍ ସେ ଜଃନ୍କଃରି ମର୍ ହାକ୍ ଆସୁ ହାରେ ଇତାର୍ ଗିନେ ତାକେ ସୁସ୍ତାୟ୍ ବାଟ୍ କାଡାୟ୍ ଦିଆସ୍, କାୟ୍ତାକ୍ବଃଲେକ୍ ବାୟ୍ ବେଣିମଃନାର୍ ସଃଙ୍ଗ୍ ଆସେଦ୍ ବଃଲି ମୁୟ୍ଁ ଜାଗିଆଚି । 12ମଃତର୍ ବାୟ୍ ଆପଲାର୍ କଃତା କଃଉଁଲେ, ବାୟ୍ମଃନାର୍ ସଃଙ୍ଗ୍ ତୁମିମଃନ୍କାର୍ ହାକ୍ ଜଃଉଁକେ ମୁୟ୍ଁ ତାକେ ବେସି ଗଃଉଆରି କଃଲେ, ମଃତର୍ ଅଃବେ ଜଃଉଁକେ ତାର୍ ମୁଳ୍କେ ମଃନ୍ ନାୟ୍, ମଃତର୍ ସୁବିଦା ମିଳ୍ଲେକ୍ ସେ ଜାୟ୍ଦ୍ ।
ସଃରାସଃରି କଃତା
13ତୁମିମଃନ୍କେ ଜଃଗ୍ରାତ୍ ରଃୟ୍ ବିସ୍ୱାସେ ତିର୍ ଅୟ୍ରିଆ, ସାସ୍ ଦଃରି ବଃଳ୍ ହାଉଆ । 14ସଃବୁ କାମ୍ ଲାଡେ କଃରା ଅଃଉଅ ।
15୧୬:୧୫ ୧ କର ୧:୧୬.ଏ ବାୟ୍ ବେଣିମଃନ୍, ମୁୟ୍ ଗଃଉଆରି କଃରୁଲେ, ସ୍ତିପାନ୍ ଆର୍ ତାର୍ ଗଃର୍କୁଟୁମ୍ ଜେ ଆକାୟାର୍ ହଃର୍ତୁ ଅୟ୍ଲା ବିସ୍ୱାସି; ଆର୍ ଦଃର୍ମିମଃନାର୍ ସେବାୟ୍ ଲାଗିହଃଳି ଆଚ୍ତି, ଇରି ତୁମିମଃନ୍ ଜାଣାସ୍ । 16ଇ ହଃର୍କାରେ ଲକ୍ମଃନ୍କାର୍ ଆରେକ୍ ସଃବୁ ମିସ୍ଣେ କାମ୍ କଃର୍ତା ଲକ୍ମଃନ୍ ଆର୍ କଃସ୍ଟ୍ କଃର୍ତା ଲକ୍ମଃନ୍କାର୍ କଃତା ମାନା, ତୁମିମଃନ୍କେ ଇ ଗଃଉଆରି କଃରୁଲେ ।
17ସ୍ତିପାନ୍, ପର୍ତୁନାତ୍ ଆର୍ ଆକାୟା ଆୟ୍ଲାକ୍ ମୁୟ୍ଁ ସଃର୍ଦା କଃରୁଲେ, କାୟ୍ତାକ୍ବଃଲେକ୍ ତୁମିମଃନାର୍ ନଃରିଲାର୍ ଗିନେ ମର୍ ଜୁୟ୍ ଅକେଟ୍ ରିଲି, ସେରି ସେମଃନ ହୁରୁଣ୍ କଃରିଆଚ୍ତି 18ଜୁୟ୍ତାର୍ ଗିନେ ସେମଃନ୍ ମର୍ ଆର୍ ତୁମିମଃନ୍କାର୍ ଆତ୍ମାକେ ସଃର୍ଦା କଃରାୟ୍ଲାୟ୍; ତଃବେ ତୁମିମଃନ୍କେ ଇ ରଃକମ୍ ଲକ୍ମଃନ୍କେ ଜୟ୍ଃଗ୍ ବଃଲି ଜାଣି ମାନ୍ତି କଃରା ।
19୧୬:୧୯ ପେରି ୧୮:୨.ଆସିଆ ଦେସାର୍ ମଣ୍ଡ୍ଳିମଃନ୍ ତୁମିମଃନ୍କେ ଦନ୍ୟବାଦ୍ ଜାଣାଉଁଲାୟ୍ । ଆକିଲା ଆର୍ ପ୍ରିସ୍କିଲା ସେମଃନାର୍ ଗଃରାର୍ ମଣ୍ଡ୍ଳି ସଃଙ୍ଗ୍ ମାପ୍ରୁର୍ ତଃୟ୍ ତୁମିମଃନ୍କେ ଲାଡାର୍ ଦନ୍ୟବାଦ୍ ଜାଣାଉଁଲାୟ୍ । 20ଇତିର୍ ବାୟ୍ ଆର୍ ବେଣି ସଃବୁଲକ୍ ତୁମିମଃନ୍କେ ଦନ୍ୟବାଦ୍ ଜାଣାଉଁଲାୟ୍, କ୍ରିସ୍ଟାନ୍ ପବିତ୍ର ଲାଡେ ହଃତିଲକ୍ ଦନ୍ୟବାଦ୍ କଃରାକଃରି ଅଃଉଆ ।
21ମୁୟ୍ଁ ପାଉଲ୍ ନିଜାର୍ ଆତେ ଇ ସଃବୁ ଲେକି ଦନ୍ୟବାଦ୍ ଜାଣାଉଁଲେ ।
22ଜଦି, କେ ମାପ୍ରୁକେ ଲାଡ୍ ନଃକେରେ, ତଃବେ ସେ ସାୟ୍ପ୍ ହାଉଅ । ମାରାନାତା, ଅଃମାର୍ ମାପ୍ରୁ ଆସ ।
23ମାପ୍ରୁ ଜିସୁର୍ ଦଃୟା ତୁମିମଃନ୍କାର୍ ଉହ୍ରେ ଅଃଉଅ ।
24କ୍ରିସ୍ଟ ଜିସୁର୍ ତଃୟ୍ ମର୍ ଲାଡ୍ ତୁମି ସଃବୁ ଲକାର୍ ଉହ୍ରେ ରେଉଅ ।