2 Timatíyo

Gbre wáraga bɨ Páwulo eké zɨ́

Timatíyo

ní

Ledre gɨ ro gbre bụ́kụ bɨ Timatíyo ní

Páwulo eké ledre ba gɨ sɨmɨ sị́gịnị. Sómụ́ ledre ené nɨ kóo kɨ́dí nɨyí go úfu née ꞌdiya. Gɨ zɨ́ kéyị née ili kóo zɨ́ Timatíyo ógụné zɨ́ne ꞌdiya ꞌdáꞌdá zɨ́ye kɨ́ úfu née. Gɨ zɨ́a bɨ kóo Timatíyo ndịsị sáká Páwulo kɨ́ngaya kɨ́ moko ní, zɨ́a ídíne zɨ́ Páwulo káa zɨ́ owụ́ ꞌbɨ ené ní, zɨ́ ꞌbú Timatíyo ídíne doa kɨ́ngaya.

Páwulo eké ledre ba gɨ zɨ́a bi sinyí roa mɨsínyí gɨ ro ꞌyị ga bɨ ꞌbɨ Kɨ́résịto bɨ nɨyí ndị́sị ꞌdódo yée bɨsinyíne ní. Gɨ zɨ́ kéyị née zɨ́a úku ledre zɨ́ Timatíyo idí tóro ngbúó sɨmɨ ledre ꞌbɨ Kɨ́résịto bɨ ṇgúṇgu ní, ndị́sị úku ledre ꞌbɨ Lomo zɨ́ ꞌyị e ngịrị ndaá roa wá abú sɨmɨ sịndị́ kadra ꞌbɨ ꞌdoꞌdó, idí kpá ndị́sị úkucáyi ledre ꞌbɨ ꞌyị ꞌdódo ledre ga bɨ ꞌyị ṛanga e ní.

¹Timatíyo, máa Páwulo bɨ ꞌBụzé Lomo gelé máa, zɨ́ma ídíma káa do ꞌyịmɨkása zɨ́ Kɨ́résịto Yésụ bɨ ndịsịzé óto komozé kacɨ́ a gɨ ro trịdrị bɨ za fí ní.

²Máéké ledre ba máa zɨ́yị, gɨ zɨ́a, áyí zɨ́ma go mbigí owụ́ ꞌbɨ amá sɨmɨ Lomo.

ꞌBụzé Lomo maꞌdáa kɨ́ Kɨ́résịto Yésụ Ngére ezé, idínɨ́ ndị́sị lúrú bi kacɨ́yị gɨ do bɨ zɨ́yị ndị́sịyị́ bɨlámáne.

Páwulo Iꞌbí mbófo éyị́ zɨ́ Lomo gɨ ro Timatíyo

³Timatíyo owụ́ ꞌbɨ amáa, ledreyị́ lịgị máa wá. Kacɨ́ kadra za mbá, kɨ́ꞌdí bɨ mááyí go íni ini zɨ́ ꞌBụzé Lomo ní, mándị́sị óto yị́ị kóꞌdụ́ a. Gɨ zɨ́a, nɨ ne mbigí Lomo, bulúndu bulúnduzé e ndịsịnɨ́ kóo íni ini zɨ́a kɨ́ mɨmbéꞌdeyé kị́éꞌdo. Kpá káa zɨ́ bɨ ndịsịzé karaba íni ini zɨ́a kɨ́ mɨmbéꞌdezé kị́éꞌdo ní. ⁴Máóyó sogomá zɨ́yị wá, mááyí ógụ lúrú yị́ị. Máówo bú, sɨmɨ bɨ kóo ifizé sɨmɨzé kéyị ní, nɨ kóo zɨ́yị mongụ́ lerị́, née sị́ ledre bɨ kóo léfe iní komoyị́ gɨ zɨ́a kɨ́ngaya ní. ⁵Máówo bú bɨlámáne kɨ́dí, ṇgúṇgu ledre Yésụ go káa do Ngére eyị́ cụ́ kɨ́ mɨmbéꞌdeyị́ káa zɨ́ bɨ kóo tetéyị Lóyisi kɨ́ mbágáyị Yụ́nịsị ṇguṇgunɨ́ ledre a ní. ⁶Moko ꞌbɨ Lomo bɨ do sị́lị́yị née ndaá úyu wá, idí ngbóró tátá roné fú ꞌdáꞌdá káa zɨ́ bɨ kóo máíꞌbí úndru moko máa née go zɨ́yị ní. ⁷Ídí ndị́sị méngị moko née fú kenée ndéré kɨ́e ꞌdáꞌdá, gɨ zɨ́a, ꞌBụzé Lomo iꞌbí ꞌdówụ́ne go zɨ́ze gɨ ro zɨ́a ndị́sịné óto zée zɨ́ze ídíze kɨ́ rokoꞌbụzé, do ndị́sị tórozé ngbúó sɨmɨ úzu éyị́, zɨ́ze ndị́sịzé óto ꞌbú lafúze e, kpá gɨ ro zɨ́ze ndị́sịzé méngị mbá bɨlámá ledre e.

⁸Káa zɨ́ bɨ ꞌDówụ́ Lomo nɨ bo kɨ́ze, nɨ ndị́sị sáká zée ní, ngịrị ndaá méngị yị́ị kɨ́ ꞌdódo ledre ꞌbɨ Ngére Yésụ zɨ́ ꞌyị e wá. Dokuwu ndaá kpá méngị yị́ị kɨ́ ꞌdódo ledre ené zɨ́ ꞌyị e gɨ zɨ́a bɨ kóo otonɨ́ máa sɨmɨ sị́gịnị gɨ ro bɨlámá ledre ené ní wá. Kacɨ́ kadra mbá, ídí ídí nzíyiyị́. Togụ́ ꞌdoꞌdó ogụ royị́ gɨ zɨ́a bɨ ṇgúṇgu ledre Ngére Yésụ ní yá, ídí ótoómo royị́ zɨ́yị ꞌdóꞌdóyị. Máótoómo kóo romá kpá kenée zɨ́ma ndị́sịmá ꞌdóꞌdóma gɨ ro ledre ené. ⁹Gɨ zɨ́a, wo Lomo, yomo ené kóo zée kéyị kpá kɨ́ tụ́ꞌdụ́ ngíti géyị ꞌyị e, zɨ́ze ídíze káa do mbigí ꞌyị ené e ba ndaá gɨ zɨ́a bɨ azé bɨlámá ꞌyị e, mɨméngị ledre ezé e nɨyí mbá bɨlámáye ní wá. Yeme kóo ledre née gɨ rozé go kú ꞌdesị́ kpụrụ́ gɨ sɨmɨ Kɨ́résịto Yésụ ꞌdáꞌdá zɨ́a kóo kɨ́ ótoógụ ere e kɨ́ káṇgá, gɨ zɨ́a, nɨ yị́ ené kú Lomo ꞌyị méngị bɨlámá ledre zɨ́ ꞌyị e. ¹⁰Bɨ ba ní, owoyemezé nda bɨlámá ledre bɨ kóo sɨmɨ bɨ Kɨ́résịto Yésụ ꞌYị yómo ꞌyị e bɨ úyu do mɨngbúngbu kágá gɨ rozé ní go. Mɨúrúa bɨ kóo gɨ sɨmɨ umbu ní, ꞌdodo zɨ́ze kɨ́dí, wo Yésụ, rokoꞌbụa romo do umbu go. Zée ꞌyị ga bɨ ꞌbɨ Yésụ maꞌdáa ní, togụ́ uyuzé yá, Yésụ maꞌdáa nɨ úru zée, gɨ zɨ́a, urúụtụ kóo roné go ne gɨ sɨmɨ umbu maꞌdáa, rokoꞌbụ a romo do ꞌbɨ umbu go. ¹¹Máa Páwulo, ꞌBụzé Lomo gelé máa káa do ꞌyịmɨkása ené, ꞌyị ꞌdódo ledre ené kpá ꞌyị ndị́sị úku bɨlámá ledre ené zɨ́ ꞌyị e za mbá. ¹²Née sị́ ledre bɨ otonɨ́ máa gɨ zɨ́a sɨmɨ sị́gịnị do ndị́sị kɨ́ ꞌdóꞌdo máa ní. Abú kenée ndotó, dokuwu mengị ené máa gɨ zɨ́ ledre ga gére née wá, gɨ zɨ́a, máówo bú, máṇgúṇgu yị́ amá ledre mbigí Lomo. Wo Lomo maꞌdáa nɨ ndị́sị yómo máa gɨ sɨmɨ ꞌdoꞌdó ga gére née gị sɨmɨ odụ sịndị́ kadra bɨ karanée Ngére Yésụ nɨ ndáꞌbaógụ sɨmɨ a ní.

¹³Owụ́ ꞌbɨ amáa, ledre ga bɨ kóo máꞌdódo yée zɨ́yị ní, ndanɨ́ lị́gị yị́ị wá. Ídí ndị́sị ꞌdódo dụụ́ ledre ga gére née zɨ́ ꞌyị e, sɨmɨ bɨ áyí go ndị́sị méngị ledre máa ga gére ní, ledre Kɨ́résịto Yésụ bɨ ṇgúṇgu ní, cíyí a idí ngbóró sɨmɨyị́ mongụ́ne, zɨ́yị ídíyị kpá ꞌyị óto ꞌbú ꞌyị e za mbá. ¹⁴Máówo bú, ꞌDówụ́ Lomo nɨ ndị́sị sáká yị́ị, zɨ́yị ndị́sịyị́ méngị moko ꞌbɨ Lomo do bɨlámá mɨsiꞌdiné.

¹⁵Máúku ledre née kenée gɨ zɨ́a, éyị́ bɨ ꞌyị ꞌbɨ Ásiya mengịnɨ́ ní, oto máa, mándá kɨ́ rokinyi gɨ roa wá. Lúrú aka, Fugélo e kɨ́ Amogéno kɨ́ ngíti géyị lafúye e, oyónɨ́ sogoyé go zɨ́ ledre ꞌbɨ Lomo bɨ máꞌdódo zɨ́ye ní. Ndịsịnɨ́ nda yị́ eyé go lódụ́ ngíti géyị mɨsiꞌdi eyé e kpị́.

¹⁶Abú mengịnɨ́ kenée ndotó, Onésịforụ otoomo máa wá. Tɨ́ bɨ owo bú otonɨ́ máa sɨmɨ sị́gịnị ba gɨ zɨ́a bɨ máṇgúṇgu ledre Yésụ ní. Sɨmɨ ledre ga gére née mbá, Onésịforụ otoomo máa wá. Ndịsị kpá fú ngásáógụ kɨ́ lúrú máa, zɨ́ mɨmbéꞌdemá gịe ndị́sị ị́drị́ne, zɨ́ síli ndị́sị ílíne romá. Mámbófo wo go kɨ́ngaya sɨmɨ ledre bɨ mengị yée zɨ́ma née. Ngére Yésụ ídí méngị bɨlámá ledre zɨ́a kɨ́ ꞌyị ꞌbɨ ꞌbe ꞌbɨ ené mbá. ¹⁷Sɨmɨ bɨ ogụ sɨmɨ Róma ní, zɨ́ mɨmbéꞌdea ídíne ꞌdága kɨ́ngaya gɨ ro zɨ́ne lúrú máa. Zɨ́a tónóne ndúꞌyúsóꞌdo ledre gɨ romá, tɨ́ bɨ zɨ́a ógụné gị zɨ́ma do bi bɨ otonɨ́ máa doa ní.

¹⁸Bɨlámá ledre ga bɨ kóo Onésịforụ ndịsị méngị yée zɨ́ma sɨmɨ Éfeso née, ndanɨ́ mɨlóꞌboyé wá, ówo kóo bú bɨlámáne. Gɨ zɨ́ kéyị née ní, zɨ́ma ndị́sịmá óto wo kɨ́ ꞌyị ꞌbɨ ꞌbe ꞌbɨ ené e do sị́lị́ Lomo. ꞌBụzé Lomo kɨ́ Ngére Yésụ, idínɨ́ ndị́sị lúrú bi kacɨ́ a gɨ ro zɨ́a ndị́sịné bɨlámáne.

Páwulo énzị komo Timatíyo

¹Áko Timatíyo owụ́ ꞌbɨ amáa, káa zɨ́ bɨ Lomo mengị bɨlámá ledre go zɨ́yị kpụrụ́ gɨ sɨmɨ Owụ́ ꞌbɨ ené Kɨ́résịto Yésụ ní, ídí ídí kɨ́ rokoꞌbụyị́, zɨ́yị ndị́sị tóroyị́ ngbúó sɨmɨ ledre e kacɨ́ kadra za mbá. ²Ledre ga bɨ kóo lúrútóko gɨ zɨ́ma, mándị́sị ꞌdódo yée zɨ́ tụ́ꞌdụ́ ꞌyị e ní, ídí ꞌdíꞌbi ledre máa ga gére née, zɨ́yị ꞌdódotátá yée zɨ́ ꞌyị ga bɨ lúrú yée utúasánɨ́ go gɨ ro ꞌdódotátá ledre e ní, zɨ́ye ndị́sịyé ꞌdódotátá yée zɨ́ ngíti géyị ꞌyị e. ³Ídí ódó mɨmbéꞌdeyị́ sɨmɨ ledre e káa zɨ́ze ní, zɨ́yị tóroyị́ ngbúó káa zɨ́ asikíri ꞌbɨ Kɨ́résịto Yésụ ní. ⁴Bɨ áyí go asikíri ꞌbɨ Ngére Yésụ ní, ndá lolụ ndị́sị méngị mɨméngị ledre ꞌbɨ gbékpị́ ꞌyị e wá. Ídí ndị́sị méngị dụụ́ ledre máa yée ga bɨ Yésụ nɨ ídí kɨ́ rokinyi gɨ royé ní. ⁵Togụ́ kenée wá, ídí ídí káa zɨ́ ꞌyị bɨ ndịsịnɨ́ ngásá mɨdogelị́gélị ní. Lúrú, togụ́ ꞌyị nɨyí go ngásá mɨdogelị́gélị kɨ́ lafúne e ní, oto ené sómụ́ ledre ené gbre gbre wá. Nɨ óto komoné dụụ́ ro ngásá bɨ kóꞌdụ́ne ní, ꞌbúó togụ́ ngasáonzónɨ́ ngásá máa née go.

⁶Ngíti sómụ́ ledre nɨ kpá káa, ídí ídí káa zɨ́ ꞌyị bɨ nɨ ꞌyị óꞌdo éyị́ kɨ́ngaya ní. ꞌYị bɨ nɨ ꞌyị óꞌdo éyị́ kɨ́ngaya ní, nɨ yị́ ené lengbe fú lá kɨ́ rokinyi. ⁷Ledre ga bɨ máúku yée zɨ́yị née, ídí sómụ́ sɨmɨyé kpó kpó kpó. Ngére Yésụ nɨ íꞌbí komokenzị zɨ́yị kpụrụ́ gɨ sɨmɨ ledre káa zɨ́ ga gére née.

⁸Ídí óto komoyị́ ro Kɨ́résịto Yésụ bɨ nɨ gɨ sɨmɨ kúfú ngére Dawídi bɨ kóo ꞌBụzé Lomo uru wo gɨ sɨmɨ umbu ní. Née bɨlámá ledre bɨ mándị́sị ꞌdódo a zɨ́ ꞌyị e ní. ⁹Gɨ zɨ́a bɨ mándị́sị ꞌdódo bɨlámá ledre née zɨ́ ꞌyị e ní, ꞌyị máa yée ga bɨ ngárá ilinɨ́ bɨlámá ledre máa née wá ní, zɨ́ye ndị́sịyé ꞌdóꞌdo máa kpá kɨ́ ónzó máa sɨmɨ sị́gịnị káa zɨ́ éyị́ bɨ mándị́sị méngị bɨsinyí ledre ní. ¹⁰Abú kenée ndotó, máíꞌbí romá go zɨ́ma ꞌdóꞌdóma gɨ ro ꞌyị e za mbá, gɨ do bɨ zɨ́ye ṇgúṇgu ledre ꞌbɨ Kɨ́résịto Yésụ, zɨ́ye ídíye mbigí ꞌyị ga bɨ ꞌbɨ Lomo ní za fí.

¹¹Maꞌdíi,

togụ́ otoomozé bɨsinyí ledre ga bɨ kóo ndịsịzé méngị yée ní mbá ꞌdáꞌba yá,

Yésụ nɨ yómo zée, zɨ́a óto zée, zɨ́ze ídíze trịdrịzé za fí káa zɨ́ne ní.

¹²Ndaá kpá lá dụụ́ wo née wá, togụ́ ụtụzé sɨmɨzé sɨmɨ ꞌdoꞌdó ga bɨ nɨyí kɨ́ ndị́sị méngị zée ní gị sɨmɨ sịndị́ kadra bɨ Yésụ maꞌdáa nɨ ndáꞌbaógụ sɨmɨ a ní yá,

azé ídí dongará ꞌyị ga bɨ Yésụ maꞌdáa nɨ ídí Ngére doyé ní.

Togụ́ otoomozé wo gɨ zɨ́ ꞌdoꞌdó bɨ ndịsịzé ndíki a gɨ ro ledre ené ní yá,

sɨmɨ bɨ karanée nɨ ndáꞌbaógụ káa do Ngére do ꞌyịmaꞌdí e do sogo káṇgá ona ní, nɨ ótoómo zée kpá kenée, zɨ́a úku ledre kɨ́dí, née owo ené zée wá.

¹³Togụ́ owozé wo káa do Ngére ezé, zɨ́ze ndị́sịzé lódụ́ kacɨ́ a yá,

oyóloꞌbó ené ledre ené wá,

ledre ga bɨ uku yée ní, nɨ méngị yée mbá.

ꞌYị ꞌbɨ moko bɨ Lomo nɨ kɨ́ rokinyi kɨ́e ní

¹⁴Káa zɨ́ bɨ kenée ní, ledre ga bɨ máúku yée zɨ́yị née, ídí ndị́sị úku yée zɨ́ ꞌyị ga bɨ sị́ sị́lị́yị íri ní mbá, ndanɨ́ ndị́sị méngị kangú sɨmɨ ledre ꞌbɨ Lomo wá. Kangú káa zɨ́ bɨ ngíti géyị ꞌyị ga gére ndịsịnɨ́ méngị yée née, sakánɨ́ eyé ꞌyị e wá. Bi ndịsị sínyí ro ꞌyị ga bɨ ndịsịnɨ́ úwú yée ní mɨsínyí. ¹⁵Máúku zɨ́yị, dokuwu moko ꞌbɨ Lomo ndaá méngị yị́ị wá. Ídí íꞌbí royị́ ndị́sị méngị moko ené kɨ́ ndị́sị ꞌdódo bɨlámá ledre ené zɨ́ ꞌyị e. ¹⁶ꞌYị ga bɨ ambá ledre eyé lá kangú kɨ́ úkucáyi ledre gɨ do bi ledre ꞌbɨ Lomo ní, ndá íꞌbí royị́ zɨ́se ndị́sịsé ítí kangú kéye wá. Gɨ zɨ́a ꞌyị tara sinyí káa zɨ́ ga gére née, ndịsịnɨ́ lengbe ꞌdíꞌbióyó ꞌyị e gɨ do mɨsiꞌdi ꞌbɨ Lomo ꞌdáꞌba. ¹⁷Bɨsinyí ódro ga bɨ káa zɨ́ bɨ Amána e kɨ́ Phịléta ndịsịnɨ́ ódro yée emenɨ́ ngụ́, ndịsịnɨ́ ꞌdíꞌbióyó ledre ꞌbɨ Lomo gɨ do mɨmbéꞌde ꞌyị ga bɨ ꞌbɨ Kɨ́résịto ní ꞌdáꞌba, zɨ́ mɨméngị ledre eyé nda ndị́sị ídíne bɨsinyíne. ¹⁸ꞌYị ga gére née ukunɨ́ eyé maꞌdíi ledre wá, ambá ledre eyé yị́ ené lá dụụ́ ṛanga. Lúrú aka lá ledre bɨ ukunɨ́ kɨ́dí, ꞌyị e ndanɨ́ lolụ óto komoyé gɨ ro ledre úrú gɨ sɨmɨ umbu wá, ꞌyị ga kóo uyunɨ́ ní, Ngére Yésụ uru yị́ ené yée go. Ngíti éyị́ ndaá lolụ íri ya úrú gɨ sɨmɨ umbu wá. Ledre eyé ga gére née ndịsị nda go sínyi sómụ́ ledre ꞌbɨ ꞌyị e kɨ́ lódụ́ kacɨ́ Yésụ. ¹⁹Timatíyo, ídí ówo a bɨlámáne kɨ́dí, ledre ꞌbɨ Lomo ndaá owụ́ éyị́ cúkuꞌdée zɨ́ ꞌyị e ndị́sịyé ndéndeke kɨ́e wá. Nɨ éyị́ bɨ Lomo yeme ne kɨ́ ledrené owóowó zɨ́ ꞌyị e za mbá ní, “Lomo maꞌdáa owo mbigí ꞌyị ené ga bɨ ṇguṇgunɨ́ ledre ené go ní mbá bú.”2:19 Ólo ꞌyị~e 16:5 Kpá kenée, “ꞌYị bɨ ṇguṇgu ledre Ngére Yésụ go maꞌdíi ní, idí nda ndị́sị méngị dụụ́ éyị́ ga bɨ Yésụ maꞌdáa ili yée ní.”

²⁰Ngíti ledre nɨ kpá káa, ꞌyị bɨ nɨ do mongụ́ moko kpá kɨ́ mongụ́ ꞌbe zɨ́ne ní, éyị́ ꞌbɨ éyị́ mɨánu ga bɨ zɨ́a ꞌbe ní, nɨyí kacɨ́ ṛị́kị́ sị́ doyé mbá mɨngúngúcua. Ngíti géyị ꞌbɨ eyé gɨ sɨmɨ dábu, ngíti géyị gɨ sɨmɨ késị́ bɨ ndịsịnɨ́ ṛíṛí mɨṛíṛí ní. Zɨ́ ngíti géyị ídí ꞌbɨ eyé gɨ sɨmɨ káṇgá kpá kɨ́ yée ga bɨ cecenɨ́ gɨ sɨmɨ kágá ní. Éyị́ ga gére née ndịsịnɨ́ méngị moko kɨ́ye kacɨ́ sịndị́ kadra eyé e mɨngúngúcua. Ngíti géyị gɨ ro mɨngburoko sị́lị́ e, zɨ́ ngíti géyị ídí ꞌbɨ eyé gɨ ro gbékpị́ sị́lị́ e. ²¹Ledre née nɨ kpá kenée gɨ ro ꞌyị ga bɨ iꞌbínɨ́ royé go ndị́sị lódụ́ kacɨ́ Ngére Yésụ ní. Togụ́ ꞌyị otoomo kɨ́ méngị bɨsinyí ledre, zɨ́a ndị́sịné méngị dụụ́ ledre ga bɨ utúasánɨ́ mɨútúásá ní yá, Lomo nɨ íꞌbí moko bɨ kɨ́ ledrené owóowó ní zɨ́a, gɨ zɨ́a ꞌyị maꞌdáa née iꞌbí roné go ndị́sị lódụ́ kacɨ́ Ngére ené Yésụ. Gɨ zɨ́ kéyị née ní, ꞌyị máa née nɨ go kpá nzíyiné gɨ ro ndị́sị méngị ledre ga bɨ utúasánɨ́ mɨútúásá ní.

²²Timatíyo owụ́ ꞌbɨ amáa, máúku zɨ́yị fúó, lafúyị ga bɨ ambá ledre eyé lá dụụ́ bɨcayi ódro kɨ́ bɨcayi mɨméngị ledre e ní, ídí ígí royị́ gɨ royé ꞌdáꞌba. Ídí ndị́sị méngị dụụ́ ledre ga bɨ utúasánɨ́ mɨútúásá ní. Zɨ́yị óto komoyị́ ro ledre ꞌbɨ Lomo kɨ́ngaya. Ídísé ndị́sị bɨlámáse kɨ́ mɨmbéꞌdesé kị́éꞌdo kɨ́ ꞌyị ga bɨ iꞌbínɨ́ royé go ndị́sị lódụ́ kacɨ́ Ngére Yésụ ní.

²³Ndaá kpá lá dụụ́ ledre máa yée ga gére née wá, ndá íꞌbí royị́ zɨ́se ndị́sịsé méngị kangú kɨ́ ꞌyị ga gére née wá, gɨ zɨ́a, kangú ndịsị lengbe ꞌdíꞌbiógụ ófụ́ kɨ́ okó dongará ꞌyị e. ²⁴Ídí óto ledre ba sɨmɨ doyị́. Togụ́ ꞌyị nɨ go ꞌyị kasa ꞌbɨ Ngére Yésụ yá, ꞌyị máa née ndaá lolụ ꞌyị ófụ́ kɨ́ ꞌyị e wá. Nɨ nda go ꞌyị bɨ mɨmbéꞌdea nɨ go bɨlámáne ro ꞌyị e za mbá, ambá ledre ené nda go ꞌbɨ ꞌdódo bɨlámá ledre bɨ ꞌbɨ Lomo ní zɨ́ ꞌyị e. ²⁵ꞌYị ga gére née, bɨ ndịsịnɨ́ úkucáyi ledre gɨ do bi ledre ꞌbɨ Lomo ní, ídí ꞌdódo ledre zɨ́ye kpá kɨ́ íni ini gɨ royé. Lomo idí óyólóꞌbó mɨmbéꞌdeyé gɨ ro zɨ́ye ówo dụụ́ mbigí ledre ené. ²⁶Zɨ́ye óyólóꞌbó sómụ́ ledre eyé zɨ́ye ídíye nda ꞌyị lódụ́ kacɨ́ Yésụ. Gɨ ro zɨ́ye ólụ́ógụyé gɨ sị́ sị́lị́ ngére ꞌbɨ bɨcayi lomo e, gɨ zɨ́a ndịsịnɨ́ nda kóo go méngị ledre ga bɨ Satána ili yée ní.

Tụ́ꞌdụ́ ꞌyị e nɨyí karanée óyó sogoyé zɨ́ Lomo

¹Timatíyo, ídí óto ledre ba sɨmɨ doyị́ bɨlámáne, kadra mɨndáꞌbaógụ Yésụ nɨ ídí bɨsinyíne zɨ́ tụ́ꞌdụ́ ngíti géyị ꞌyị e. ²Gɨ zɨ́a ndịsịnɨ́ yị́ eyé méngị dụụ́ éyị́ bɨ bi ndịsị éme royé gɨ zɨ́a ní, do ndị́sịyé óto komoyé kpá dụụ́ ro késị́ eyé ga bɨ ndịsịnɨ́ yóko yée ní, zɨ́ye ndị́sịyé kɨ́ ị́lị́ye káa zɨ́ éyị́ bɨ romonɨ́ do ꞌyị e go za mbá ní. Ndaá kpá lá dụụ́ ledre máa yée ga gére née wá, zɨ́ye ndị́sịyé kɨ́ óto ꞌyị e káa do sɨmɨ sịndị́ye, zɨ́ye ꞌdụ́tụ mbílíye ngbụ́rụ́ kɨ́ úwú lorụ ga bɨ ꞌyị ndíki yée ndịsịnɨ́ úku a zɨ́ye ní. Ndanɨ́ kpá ꞌyị íꞌbí mbófo éyị́ zɨ́ ꞌyị e wá, zɨ́ye ndị́sị óto royé ꞌduo káa zɨ́ éyị́ bɨ romonɨ́ do ꞌyị e go ví, gɨ zɨ́ kéyị née, ledre ꞌbɨ Lomo ndaá zɨ́ye owóowó wá. ³ꞌBú ꞌyị e ndaá doyé wá. Ndanɨ́ ꞌyị ótoómo ledre zɨ́ ꞌyị e wá. Ambá ledre eyé lá lịkpị́, zɨ́ye ndị́sịyé méngị ledre e ꞌduo faa káa zɨ́ éyị́ bɨ sɨmɨ doyé sinyí go mɨsínyí ní, sókụ́ nɨ royé ꞌduo sága, ilinɨ́ bɨlámá ledre wá. ⁴Ndaá kpá lá dụụ́ ledre máa yée ga gére née wá, nɨyí kpá ꞌyị íꞌbí ngbángá ꞌyị e zɨ́ bɨsinyí ꞌyị e. Ndịsịnɨ́ méngị ledre e ꞌduo faa somụ́nɨ́ eyé sogo a kí wá, zɨ́ye ndị́sị sị́kpị fúndúye ꞌdága sɨmɨ ledre e za mbá, somụ́nɨ́ do Lomo wá, mongụ́ ledre eyé dụụ́ rokinyi eyé bɨ ilinɨ́ ní. ⁵Owụ́ ꞌbɨ amáa, máúku zɨ́yị, ídí ígí royị́ gɨ ro ꞌyị e káa zɨ́ ga gére née ꞌdáꞌba. Londonɨ́ royé kɨ́dí, yée nɨyí ꞌyị lódụ́ kacɨ́ Yésụ, ɨ́ꞌɨ, née gbékpị́ ledre, mɨméngị ledre eyé nɨ yị́ ené fú lá bɨsinyíne, gɨ zɨ́a Lomo ndaá ꞌbɨ ené kɨ́ye wá.

⁶Ngíti géyị ndịsịnɨ́ ndéré ꞌbe ꞌbɨ ꞌyị e kɨ́ sínyi do kará ga bɨ kɨ́ sómụ́ ledre eyé cúkuꞌdée ní, gɨ ro zɨ́ kará máa ga gére née ndị́sịyé méngị ledre ga bɨ yée ilinɨ́ ní. ⁷Kará ga gére née ilinɨ́ tɨ́ gɨ ro zɨ́ye ówo ledre gɨ sɨmɨ ꞌdódo ledre bɨ gɨ sɨmɨ mɨéké kúrú Lomo ní, icinɨ́ royé má, utúasánɨ́ ndíki a wá. ⁸ꞌYị ṛanga ga gére née ndịsịnɨ́ tóroꞌdụ́tụ mɨsiꞌdi ledre ꞌbɨ Lomo gɨ zɨ́ ꞌyị e cé káa zɨ́ bɨ kóo sɨmɨ sịndị́ kadra ꞌbɨ Mụ́sa, Yóna e kɨ́ Yombere otonɨ́ royé okó ro Lomo zɨ́ye ndị́sịyé úkucáyi Mụ́sa ní. ꞌYị ṛanga ga gére née sɨmɨ doyé sinyí gɨ zɨ́ lúyú ledre go mɨsínyí gɨ zɨ́a, ledre ꞌbɨ Lomo ndaá do mɨmbéꞌdeyé wá. ⁹Nɨyí méngị ledre ga gére née kenée má, kacɨ́ye utúasá akpa kɨ́e wá, gɨ zɨ́a ꞌyị e nɨyí lúrúcáyi yée mbá mɨlúrúcáyi, cé káa zɨ́ bɨ kóo ꞌyị e lurúcayinɨ́ Yóna e kɨ́ Yombere sɨmɨ sịndị́ kadra máa bɨ kóo ꞌbɨ Mụ́sa ní.

Yata lorụ gɨ zɨ́ Páwulo zɨ́ Timatíyo

¹⁰Owụ́ ꞌbɨ amáa, káa zɨ́ bɨ ꞌdíꞌbi ledre ga bɨ kóo mɨꞌdódo yée zɨ́yị ní go, zɨ́yị ꞌdíꞌbi mɨméngị ledre amá e kpá go mbá, zɨ́yị ndị́sịyị́ go méngị kéyị cé káa zɨ́ma. Mɨsiꞌdi bɨ mándị́sị lódụ́ kacɨ́ Yésụ kɨ́e, kɨ́ mɨtóromá ga bɨ ngbúó sɨmɨ úzu éyị́ e, kɨ́ ꞌbú ꞌyị e bɨ mándị́sị óto a, nda kɨ́ ụ́tụsɨmɨ ga bɨ mándị́sị ụ́tụ yée mbá ní, ídí ndị́sị méngị ledre máa ga gére née kpá té kenée ndéré kɨ́e ꞌdáꞌdá za fí. ¹¹Lúrú aka lá ledre ga bɨ kóo mengịnɨ́ royé zɨ́ma, ꞌyị e sogónɨ́ máa, do ndị́sịyé ꞌdóꞌdo máa kɨ́ toso ꞌdoꞌdó e mɨngúngúcua ní. Nda kpá kɨ́ wo bɨ mengịnɨ́ máa kɨ́e sɨmɨ Ánatiyoko kɨ́ Ikonị́yomo kpá kɨ́ Lísitra ní. Sɨmɨ ledre ga gére née mbá, Ngére Yésụ otoomo máa wá. Ndịsị kóo kpá fú sáká máa gɨ sɨmɨ ledre ga gére née za mbá. ¹²Máúku zɨ́yị maꞌdíi, ꞌyị ga bɨ ṇguṇgunɨ́ Kɨ́résịto Yésụ go káa do Ngére eyé, iꞌbínɨ́ royé go ndị́sị lódụ́ kacɨ́ a ní, ezeokó Yésụ nɨyí ndị́sị ꞌdóꞌdo ꞌyị ꞌbɨ Yésụ ga gére née, gɨ zɨ́a bɨ ṇguṇgunɨ́ ledre Yésụ maꞌdáa go ní. ¹³Bɨsinyí ꞌyị ṛanga ga gére née, nɨyí yóko royé kɨ́ ngíti géyị lafúye do ídíye tụ́ꞌdụ́, zɨ́ye ndị́sịyé sínyi do tụ́ꞌdụ́ ꞌyị e káa bɨ nɨyí ídí ꞌyị ndị́sị lódụ́ kacɨ́ Yésụ ke.

¹⁴Gɨ zɨ́ kéyị née ní, ledre ꞌbɨ Ngére idí ngbóró sɨmɨyị́ ndéréne fú ꞌdáꞌdá. Ledre ga bɨ kóo ꞌdodonɨ́ yée zɨ́yị ní, ídí lányá royé kɨ́ngaya. ¹⁵Káa zɨ́ bɨ kóo tonónɨ́ ꞌdódo ledre ꞌbɨ Lomo go zɨ́yị kú gɨ do owụ́yị, zɨ́yị ówoyéme mɨéké kúrú Lomo go bɨlámáne, bɨ karaba ndịsị go íꞌbí komokenzị zɨ́yị, zɨ́yị ndị́sịyị́ lódụ́ kacɨ́ Kɨ́résịto Yésụ kɨ́e gɨ ro zɨ́yị ídíyị trịdrịyị́ za fí ní. ¹⁶Ledre máa ga gére née, ꞌDówụ́ Lomo ꞌdodo kóo yée ne do ékéómo yée gɨ ro zɨ́ye ídíye bɨlámá mɨsiꞌdi ꞌbɨ ꞌdódo maꞌdíi ledre zɨ́ ꞌyị e. Kpá gɨ ro do ndị́sị ụ́cụómo ꞌyị e kɨ́e káa bɨ nɨyí ndị́sị lúyú ledre ke. Ndaá kpá lá dụụ́ wo née wá, nɨ kpá gɨ ro togụ́ ꞌyị luyú ledre go yá, do ꞌdózoyéme wo kɨ́e. Kpá gɨ ro ꞌdódoyéme mɨsiꞌdi ꞌbɨ bɨlámá ndị́sị kɨ́e zɨ́ ꞌyị e. ¹⁷Née mɨsiꞌdi bɨ ꞌBụzé Lomo yeme gɨ ro do ndị́sị yéme zée ꞌyị kasa ga bɨ ꞌbɨ Ngére Yésụ ní kɨ́e, gɨ ro zɨ́ze ndị́sịzé méngị dụụ́ ledre ga bɨ utúasánɨ́ mɨútúásá ní.

Yata lorụ zɨ́ Timatíyo

¹Timatíyo, ba ledre bɨ oꞌbụ mɨóꞌbụ ní. Ídí óto a sɨmɨ doyị́, ndaá lị́gị yị́ị wá. Mɨndáꞌbaógụ Yésụ ndaá owụ́ ledre wá. Yésụ nɨ ndáꞌbaógụ ꞌdécị ngbanga ꞌyị e za mbá. Yée ga bɨ nɨyí aka trịdrị kɨ́ yée ga bɨ uyunɨ́ go ní. Gɨ zɨ́ kéyị née, zɨ́ma énzị komoyị́ ꞌdesị́ do bi kacɨ́ ꞌBụzé Lomo kɨ́ Kɨ́résịto Yésụ maꞌdáa. ²Ídí íꞌbí royị́ kɨ́ngaya ndị́sị ꞌdódo ledre ꞌbɨ Lomo zɨ́ ꞌyị e. Zɨ́yị kɨ́ énzị komoyé. Idínɨ́ ndị́sị méngị dụụ́ ledre ga bɨ bi nɨ ndị́sị éme ro Lomo gɨ zɨ́ye mɨéme ní. Ndanɨ́ lúyú ledre wá. Ídí ndị́sị ꞌdódo ledre née kenée zɨ́ ꞌyị e kɨ́ mɨmbéꞌdeyị́ kị́éꞌdo. ³Gɨ zɨ́a sịndị́ kadra nɨ ógụ, ꞌyị e nɨyí ésịꞌdụ́tụ mbílíye ngbụ́rụ́ kɨ́ úwú ledre ꞌbɨ Lomo. Zɨ́ye óto komoyé yị́ eyé dụụ́ ndị́sị úwú ledre ga bɨ ngárá ndanɨ́ ꞌbɨ Lomo wá ní kɨ́ngaya. Gɨ zɨ́a née ledre ga bɨ ilinɨ́ yị́ eyé yée ní. ⁴Nɨyí ási gɨ ro cóngó ꞌdódo ledre bɨ ꞌbɨ Lomo ní kenée, do nda óto komoyé ro gbékpị́ bɨcayi ꞌdódo ledre ga bɨ ngárá ndanɨ́ ꞌbɨ Lomo wá ní. ⁵Kacɨ́ kadra za mbá, ídí ndị́sị tóro ngbúó, mɨmbéꞌdeyị́ idí ídí dụụ́ ro moko ꞌbɨ Lomo bɨ do sị́lị́yị ní, gɨ ro zɨ́yị ndị́sịyị́ ꞌdíꞌbiógụ ꞌyị e zɨ́ Ngére Yésụ.

⁶Máúku ledre ga gére née zɨ́yị kenée, gɨ zɨ́a kacɨ́ma akpa do sogo káṇgá go, mááyí nda go káa zɨ́ kadra tagá ní, mááyí go gbóo gɨ ro ndáꞌbalúgu romá zɨ́ ꞌBụzé Lomo komo ere. ⁷Moko bɨ kóꞌdụ́ma ní, máméngịónzó go. Máódó mɨmbéꞌdemá zɨ́ma méngị a za kɨ́ sɨmɨmá mbá, gị do odụné tɨ́ káa zɨ́ bɨ Lomo, mị́ngị́ moko maꞌdáa ili ní. ⁸Gɨ zɨ́ kéyị née ní, Lomo maꞌdáa yemeomo bɨlámá bi go zɨ́ma ꞌbe ꞌbɨ ené komo ere, gɨ zɨ́a mɨútúásá go kacɨ́ komoa káa do mbigí ꞌyị ené. Ngére Yésụ nɨ ꞌdíꞌbióto máa née do bɨlámá bi máa née. Ndaá kpá lá dụụ́ máa ngúcumá wá, azé ídí kɨ́ ꞌyị ga bɨ ṇguṇgunɨ́ ledre Yésụ go, otonɨ́ royé go ndị́sị lódụ́ kacɨ́ a gị sɨmɨ sịndị́ kadra bɨ karanée Yésụ maꞌdáa nɨ ndáꞌbaógụ sɨmɨ a ní.

Páwulo ndolo Timatíyo

⁹Timatíyo, méngị aka kéyị zɨ́yị ngásáógụyị́ zɨ́ma yáa ꞌdiya. ¹⁰Éyị́ bɨ Démasi e kɨ́ Kɨrɨséne e kɨ́ Tị́to e mengịnɨ́ ní, ndaá bɨlámáne wá. Bayiomonɨ́ moko bɨ Lomo iꞌbí zɨ́ye ní go. Démasi nderé go sɨmɨ Tasalonị́ka, Kɨrɨséne nderé ꞌbɨ ené go sɨmɨ Galatíya, Tị́to ndéré ꞌbɨ eyị́ sɨmɨ Dalamatíya. ꞌYị ga gére née mbá, ꞌbú ledre ꞌbɨ sága ba ꞌdiꞌbioyó yée go. ¹¹Idíakázé nda yáa go lá dụụ́ gbre kɨ́ Lúka. Togụ́ áyí gɨrí go ógụ yá, ndá óyó sogoyị́ zɨ́ Márɨko wá, ꞌdíꞌbiútú wo gɨrí kpa, gɨ ro zɨ́a ógụné ndị́sị sáká máa, ¹²gɨ zɨ́a máíli aka kása Takíka sɨmɨ Éfeso. ¹³Sɨmɨ bɨ togụ́ áyí gɨrí go ị́nyị ní, mongụ́ bongó drụ́ amá kóo máótoómo lị́gị sɨmɨ Tóra ꞌbe ꞌbɨ Karapó ní, ꞌdíꞌbiútú gɨrí kpa zɨ́ma. Kpá kɨ́ mɨéké kúrú Lomo ga bɨ kóo máótoómo yée íri ní, ꞌdíꞌbiútú yée gɨrí kpá kpa zɨ́ma.

¹⁴Éyị́ bɨ Alakɨzánde ꞌyị ꞌboro mengị zɨ́ma ní, sinyí romá go gbála. Máútúásá méngịlúgu bɨsinyí ledre zɨ́a kacɨ́ ledre bɨ mengị zɨ́ma née wá. Odụ a, Ngére Yésụ idí lúrú bi zɨ́a sɨmɨ ledre máa née dụụ́ ne. ¹⁵Komoyị́ idí ídí royị́ gɨ zɨ́ Alakɨzánde maꞌdáa. Oto roné go okó rozé, ndịsị go úkucáyi ledre gɨ do bi ledre ꞌbɨ Lomo bɨ ndịsịzé ꞌdódo a zɨ́ ꞌyị e ní kɨ́ngaya.

¹⁶Sɨmɨ mɨzefị ꞌdíꞌbi bɨ kóo ꞌdiꞌbinɨ́ máa ógụ kɨ́ma kóꞌdụ́ ꞌyị ꞌdécị ngbanga e gɨ zɨ́a bɨ mándị́sị ꞌdódo ledre ꞌbɨ Ngére Yésụ zɨ́ ꞌyị e ní, bɨkéṛị́ ꞌyị bɨ kóo iꞌbí roné útúne do kacɨ́ma ndéré úku yéme ledre gɨ romá ní ndaá. Abú mengịnɨ́ kóo bɨsinyí ledre zɨ́ma kenée ndotó, Lomo ndaá méngịlúgu bɨsinyí ledre zɨ́ye kacɨ́ a wá. ¹⁷Sɨmɨ ledre máa bɨ kóo née mbá, Ngére Yésụ otoomo ené kóo máa wá. Nɨ kóo fú kɨ́ma, ndịsị kɨ́ íꞌbí rokoꞌbụ zɨ́ma, zɨ́ma ndị́sịmá úku bɨlámá ledre ené kɨ́e zɨ́ ṛị́kị́ kúfú ꞌyị e za mbá. Née sị́ ledre bɨ kóo yomo máa gɨ roa gɨ zɨ́ kemị ga gére ní. ¹⁸Máówo bú, Ngére Yésụ nɨ ndị́sị sáká máa gɨ zɨ́ bɨsinyí ledre fú kenée gị zɨ́ma ndéréma ndị́sịmá sị́ sịndị́a komo ere, gɨ zɨ́a, nɨ ne Ngére amá. ꞌYị e idínɨ́ ndị́sị mbófo wo kacɨ́ kadra za mbá, kenée za fí. Idí kenée.

Mandá kɨ́ úndru gɨ zɨ́ Páwulo zɨ́ ꞌyị e

¹⁹Mandá zɨ́ Akúwíla e kɨ́ meꞌbené, Purisíla e kɨ́ Onésịforụ kɨ́ ꞌyị ꞌbɨ ꞌbe ꞌbɨ eyé e za mbá. ²⁰Sɨmɨ bɨ kóo máị́nyị ógụmá sɨmɨ Róma ní, Erésito idíaká kóo cịkị sɨmɨ Korị́ndo, zɨ́ma nda kóo ótoómo Tarafímo sɨmɨ Meléto gɨ zɨ́a nɨ kɨ́ ndíyá. ²¹Odụ ledre, ndá lúꞌbú wá, ídí méngị kéyị, zɨ́yị ógụyị́ ꞌdáꞌdá zɨ́ iní kɨ́ ndáꞌbaógụné. ꞌYị ga bɨ ꞌbɨ Ngére Yésụ azé kéye yáa ní, Yubúla e kɨ́ Pódene e kɨ́ Lị́no e kɨ́ Kụlị́da e, Iꞌbínɨ́ mandá zɨ́yị kɨ́ngaya.

²²Ngére Yésụ idí ídí kɨ́yị, zɨ́a íꞌbí úndru zɨ́se za mbá.