GALACIA

GALACIA

¹ Surat na hale ki Pablo na an pagigin apostol bakong hale o sa paagi nin tawo, kundi sa paagi ni Jesu-Cristo asin nin Dios Ama na nagbuhay liwat ki Jesus sa mga gadan. ² An surat na ini hale man sa mga tugang sa pagtubod na kaibahan ko, para sa mga simbahan nin Galacia: ³ An biyaya asin an katoninongan nin Dios na satong Ama asin ni Jesu-Cristo na satong Kagurangnan mapasaindo. ⁴ Idinolot ni Cristo an saiyang buhay para sa satong mga kasalan tanganing makaligtas kita sa maraot na kapanahonan na ini. Ginibo niya ini sa pagkuyog kan kabotan kan satong Dios asin Ama. ⁵ Pag-omawon an Dios sagkod pa man! Amen. ⁶ Nagngangalas ako kun tadaw ta minabaya tolos kamo sa Dios na nag-apod saindo huli sa biyaya ni Cristo, dangan minasunod kamo sa ibang “marahay na bareta.” ⁷ An katunayan, mayo nin ibang “marahay na bareta,” alagad sinasabi ko ini huli ta igwa nin nagkapirang tawo na nagpaparibok saindo saka naghihingowang ribayan an Marahay na Bareta ni Cristo. ⁸ Maski kami, o sarong anghel na hale sa langit an maghulit saindo nin marahay na bareta na laen man kan ipinaghulit mi na saindo, mapa impyerno logod siya! ⁹ Sinabi mi na ini kaidto, alagad ngunyan sinasabi ko giraray: kun igwa nin maghulit saindo nin marahay na bareta na laen man kan Marahay na Baretang inako nindo, mapa impyerno logod siya! ¹⁰ Nangangahulogan daw iyan na hinahanap ko an omaw nin mga tawo? Bako nanggad! An talagang boot ko, Dios an mag-omaw sako. Kun nagmamawot akong omawon nin mga tawo, dai kutana ako nagin sorogoon ni Cristo. ¹¹ Mga tugang, boot kong masabotan nindo na an Marahay na Baretang ipinaghulit ko bakong gikan sa tawo. ¹² Dai ko iyan inako sa kiisay man na tawo, ni dai man itinukdo sako nin siisay man. Si Jesu-Cristo mismo an nagpahayag sako kaiyan. ¹³ Huli ta aram nindo an gibo ko kaidto kan maimbod pa ako sa Judaismo: pinasakitan ko nin makuri an simbahan nin Dios asin hiningowa kong marumpag iyan. ¹⁴ Mas maimbod ako sa pagsunod kan Judaismo ki sa kapwa ko mga Judio na kaedad ko; mas estrikto ako sa pagsunod sa mga tradisyon kan samong mga ginikanan. ¹⁵ Alagad, pinili ako nin Dios bago pa ako namundag, asin inapod niya ako huli kan saiyang biyaya. Kan binoot na niyang ¹⁶ ipahayag sako an saiyang Aki, tanganing ikapaghulit ko an Marahay na Bareta dapit ki Cristo sa mga pagano, dai ako nakihumatol sa kiisay man na tawo, ¹⁷ ni nagduman sa Jerusalem sa pakihumapot sa mga apostol na naenot sako. Kundi nagduman tolos ako sa Arabia, dangan nagbalik ako sa Damasco. ¹⁸ Tolong taon pa bago ako nagduman sa Jerusalem tanganing makihumapot ki Pedro, asin kinseng aldaw ako sa kaibahan niya. ¹⁹ Alagad dai akong nahiling na ibang apostol pwera ki Santiago na tugang nin Kagurangnan. ²⁰ Totoo ining isinusurat ko. Aram nin Dios na dai ako nagpuputik! ²¹ Dangan nagpasiring ako sa mga lugar duman sa Siria saka Cilicia. ²² Dai pa ako kaidto midbid kan mga simbahan ni Cristo sa Judea. ²³ An aram sana ninda iyo an sinasabi kan iba na an tawong nagpapasakit sainda kaidto, naghuhulit na ngunyan kan pagtubod na boot niyang laglagon kaidto. ²⁴ Kaya inomaw ninda an Dios dahel sako.

¹ Pakalihis nin katorseng taon nagbalik ako sa Jerusalem kaiba si Bernabe; ipinag-iba ko man si Tito. ² Nagduman ako huli ta ipinahayag sako nin Dios na dapat akong magduman. Sa sarong hilom na pakipag-olay sa mga lider, ipinaliwanag ko sainda an Marahay na Bareta na ipinaghuhulit ko sa mga pagano. Habo kong masayang an sakong gibo sa nakaaging panahon asin sa ngunyan. ³ Si Tito na kaiba ko, maski sarong Griyego, dai napirit na magpaserkomsisyon, ⁴ maski boot siyang serkomsisyonon kan nagkapirang lalaking nagsagin-sagin na mga tugang na nag-ayon sa grupo. An mga tawong ini nakalaog bilang mga espiya, sa pagsiyasat dapit kan katalingkasan na nasa sato sa paagi kan pakisumaro ta ki Cristo Jesus. Boot ninda kitang gibohon na mga oripon. ⁵ Alagad dai nanggad kami nagpahunod sainda maski sa kadikit na panahon, tanganing an katotoohan kan Marahay na Bareta magdanay para saindo. ⁶ Alagad mayo na nin idinagdag sa sinabi ko an mga midbid na mga lider na idto. (Sinasabi ko ini huli ta para sako mayo nin kalaenan kun ano sinda kaidto, huli ta mayong pinapalaen an Dios.) ⁷ Ata ngani, nahiling ninda na ipinaniwala sako nin Dios an paghulit kan Marahay na Bareta sa mga pagano, siring na ipinaniwala niya ki Pedro an paghulit kaiyan sa mga Judio. ⁸ Sa paagi kan kapangyarihan nin Dios, ginibo niya akong apostol para sa mga pagano, arog man ki Pedro na ginibo niyang apostol para sa mga Judio. ⁹ Nasabotan ni Santiago, ni Pedro saka ni Juan, midbid na mga lider, na tinawan ako nin Dios kan espesyal na trabahong ini. Kaya inabrasa ninda kami ni Bernabe sa pag-ako samo bilang kapwa trabahador. Nagkaoroyon kami gabos na matrabaho kami ni Bernabe sa mga pagano dangan sinda sa mga Judio. ¹⁰ An hinagad sana ninda iyo an pagromdom sa mga dukha, na iyo mananggad an pinagmamaigotan kong gibohon. ¹¹ Pag-abot ni Pedro duman sa Antiokia, sinagwe ko siya sa publiko, huli ta hayag na sala siya. ¹² Bago nag-abot duman an nagkapirang tawo na sinugo ni Santiago, nagkakakan si Pedro kaiba kan mga pagano, alagad pag-abot ninda, suminiblag siya sa mga pagano, huli ta natakot siya sa mga tawong boot serkomsisyonon an mga pagano. ¹³ Nag-arog ki Pedro an ibang mga tugang na Judio; maski si Bernabe nadara kan saindang pagsagin-sagin. ¹⁴ Kan mahiling ko na dai sinda nagsusunod kan katotoohan kan Marahay na Bareta, sinabihan ko si Pedro sa atubangan ninda gabos, “Saro kang Judio, alagad namumuhay ka siring sa pagano, asin bakong siring sa Judio. Kun siring kaiyan, paano mo mapipirit na mamuhay an mga pagano siring sa mga Judio?” ¹⁵ Totoo mananggad na namundag kitang Judio; dai kita namundag na inaapod “parakasalang pagano.” ¹⁶ Alagad aram ta na an sarong tawo nagigin matanos sa Dios huli sa pagtubod ki Cristo Jesus, bako huli sa pag-otob kan Katogonan. Kita man nagtubod ki Cristo tanganing magin matanos sa Dios huli sa pagtubod ki Cristo, asin bako huli sa pag-otob kan Katogonan. ¹⁷ Kun totoo mananggad na kita parakasala arog kan mga pagano huli sa pagmawot tang magin matanos sa Dios diyan ki Cristo, nangahulogan daw iyan na si Cristo an dahelan kan satong pagkasala? Bako! ¹⁸ Kun ibalik ko giraray an daan na sistema nin Katogonan na hinale ko na, nagpapahiling na ako mismo an naglapas kan Katogonan. ¹⁹ Alagad kun an Katogonan an pag-oolayan, ako gadan—ginadan kan mismong Katogonan na idto—tanganing mabuhay ako para sa Dios. Nagadan ako sa krus kaiba ni Cristo, ²⁰ kaya bako nang ako an nabubuhay, kundi si Cristo an nabubuhay sako. An buhay kong ini ngunyan ipinamumuhay ko huli sa pagtubod sa Aki nin Dios, na namoot sako dangan nagtao kan saiyang buhay para sako. ²¹ Dai ko isinisikwal an biyaya nin Dios. Huli ta kun an tawo nagigin matanos sa Dios sa paagi kan Katogonan, mayong halaga an pagkagadan ni Cristo.

¹ Mga lolong na taga Galacia! Siisay an nakalumay saindo? Malinaw na ipinahayag saindo an pagkagadan ni Jesu-Cristo sa krus! ² Simbaga daw nindo ini: Inako daw nindo an Espiritu nin Dios huli sa pag-otob kan Katogonan o huli sa pagdangog saka pagtubod kan Marahay na Bareta? ³ Siring kamo kaiyan kalolong? Nagpoon kamo sa Espiritu nin Dios; boot na nindong taposon sa laman? ⁴ Mayo daw nin kahulogan saindo an gabos na nangyari? Igwang kahulogan idto! ⁵ Tinatawan daw kamo nin Dios kan saiyang Espiritu asin naggigibo saindo nin mga milagro huli ta nag-ootob kamo kan Katogonan o huli ta nagdadangog kamo kan Marahay na Bareta saka nagtutubod kamo kaiyan? ⁶ Arog sa nasasabi sa kasuratan dapit ki Abraham, “Nagtubod siya sa Dios; huli kan pagtubod niyang iyan, inako siya nin Dios bilang matanos.” ⁷ Kaya saboton nindo na an mga tawong may pagtubod iyo an tunay na kapagarakian ni Abraham. ⁸ An kasuratan naghula na gigibohon nin Dios na magin matanos saiya an mga pagano sa paagi nin pagtubod. Kaya an kasuratan an nagpahayag ki Abraham kan Marahay na Bareta: “Sa paagi mo, bebendisyonan nin Dios an gabos na tawo.” ⁹ Nagtubod si Abraham asin benendisyonan siya; kaya an gabos na nagtutubod, benebendisyonan arog saiya. ¹⁰ An mga nagsasarig sa pagkuyog kan Katogonan nasa pag-alaman nin maldisyon. Huli ta nasusurat, “An siisay man na dai naggigibo kan gabos na nasusurat sa libro kan Katogonan nasa pag-alaman nin maldisyon!” ¹¹ Kaya malinaw na mayong tawong nagigin matanos sa Dios huli sa Katogonan. Huli ta nasusurat, “An nagigin matanos sa Dios huli sa pagtubod, mabubuhay.” ¹² Alagad an Katogonan dai napapatugmad sa pagtubod, huli ta nasusurat, “An tawong naggigibo kan gabos na ipinagboboot kan Katogonan, mabubuhay sa paagi kaiyan.” ¹³ Ilinigtas kita ni Cristo sa maldisyon na dara kan Katogonan. Siya an minaldisyon embes na kita, huli ta nasusurat, “An siisay man na binitay sa kahoy minaldisyon.” ¹⁴ Ginibo ini ni Cristo tanganing an bendisyon na ipinanuga nin Dios ki Abraham ikatao man sa mga pagano huli ki Cristo Jesus; tanganing huli sa pagtubod, kita man makaako kan Espiritu na ipinanuga nin Dios. ¹⁵ Mga tugang, uya an simpleng halimbawa: kun an duwang tawo nagpirma na sa sarong kontrata, mayo nin siisay man na makakapawara nin halaga kaiyan o makakadagdag diyan nin anoman. ¹⁶ Ngunyan, an Dios nanuga ki Abraham, saka sa saro kan saiyang kapagarakian. Dai sinabi sa kasuratan, “asin sa saiyang mga aki,” na an boot sabihon, sa dakul na tawo. An sinabi, “asin sa saiyang aki,” na an kahulogan saro sanang tawo, na iyo si Cristo. ¹⁷ An boot kong sabihon iyo ini: Nakipagtipan an Dios ki Abraham saka nanuga na ootobon niya iyan. Dai malalapas an tipan asin an panuga nin Dios; dai mapapawaraan nin halaga kan Katogonan na nag-abot pakalihis nin kwatro syentos treyntang taon. ¹⁸ Kun an pamana nin Dios itinao huli sa Katogonan, an pagtao kaiyan bako huli sa panuga. Alagad itinao iyan nin Dios ki Abraham huli ta ipinanuga niya iyan saiya. ¹⁹ Kun siring, ano an katuyohan kan Katogonan? Idinagdag iyan tanganing mahiling kun ano an gibong sala; igwa iyan nin halaga sagkod na dai pa minaabot an aki ni Abraham na iyo an pinanongdan kan panuga. An Katogonan itinao sa paagi nin mga anghel sa tabang nin sarong tagapagultanan. ²⁰ An tagapagultanan nangangahulogan nin labi sa saro katawo; alagad an Dios saro. ²¹ Nangangahulogan daw ini na an Katogonan tumang sa mga panuga nin Dios? Bako! Kun an katogonan makakatao nin buhay, an tawo pwedeng magin matanos sa Dios sa pagkuyog kan katogonan. ²² Alagad nasasabi sa kasuratan na an bilog na kinaban nasa kapangyarihan nin kasalan; kaya, an ipinanuga nin Dios huli sa pagtubod ki Jesu-Cristo, itinatao sa mga tawong igwa nin pagtubod. ²³ Alagad bago nag-abot an panahon nin pagtubod, ibinilanggo kami kan Katogonan sagkod na ipinahayag an pagtubod. ²⁴ Kaya an Katogonan iyo an nangataman samo sagkod na dai pa minaabot si Cristo, tanganing magin matanos kami sa Dios huli sa pagtubod. ²⁵ Ngunyan na nag-abot na an pagtubod, bako nang an Katogonan an nangataman samo. ²⁶ Huli kan saindong pagtubod ki Cristo Jesus, kamo gabos nagin mga aki nin Dios. ²⁷ Kaya kamong mga binunyagan sa pakisumaro ki Cristo, nagubingan na kan buhay ni Cristo. ²⁸ Kaya mayo nin kalaenan an Judio sa pagano, an oripon sa bakong oripon, an lalaki sa babae; kamo gabos saro sana ki Cristo Jesus. ²⁹ Kun kamo ki Cristo, mga aki kamo ni Abraham, mga paramana sosog sa panuga.

¹ An boot kong sabihon iyo ini: mantang aki pa an paramana, mayo siyang kalaenan sa sarong oripon, maski siya an kagsadiri kan gabos. ² Mantang sadit pa siya, igwa nin mga tawong nag-aataman saiya saka namamahala kan mga rogaring niya, sagkod sa panahon na itinalaan kan saiyang ama. ³ Siring man kita kaiyan kan aki pa kita sa pagtubod, nasa irarom pa kita kan mga espiritung nagsasakop kan kinaban. ⁴ Alagad kan umabot na an tamang panahon, sinugo nin Dios an sadiri niyang Aki, ipinangaki nin sarong babae dangan nabuhay sa irarom kan Katogonan kan mga Judio. ⁵ Nagdigdi siya sa pagligtas kan mga nasa irarom kan Katogonan, tanganing magin kitang mga aki nin Dios. ⁶ Asin huli ta kamo mga aki niya, sinugo niya an Espiritu kan saiyang Aki sa puso nyato; iyan an minapakurahaw sato nin “Ama! Ama ko!” ⁷ Kaya ika bako nang oripon kundi aki na nin Dios. Huli ta aki ka na nin Dios, ika man paramana. ⁸ Kaidto na bako pa nindo midbid an Dios, oripon kamo kan mga espiritu na bakong hale sa Dios. ⁹ Ngunyan na midbid na nindo an Dios—o an dapat kong sabihon, ngunyan midbid na kamo nin Dios—tadaw ta boot nindong magbalik sa mga maluluya saka makaheherak na mga espiritu? Nganing kamo magin oripon giraray ninda? ¹⁰ Tinatawan pa giraray nindo nin halaga an ibang mga aldaw, mga bulan, mga panahon, saka mga taon. ¹¹ Natatakot ako na tibaad sayang lamang an sakong trabaho para saindo. ¹² Mga tugang, nakikimaherak ako saindo, arogon nindo ako huli ta ako nagin arog man saindo. Mayo kamong sala na naginibo sako. ¹³ Aram nindo na enot na ipinaghulit ko saindo an Marahay na Bareta huli ta may helang akong tinitios. ¹⁴ Alagad maski nagin dakulang kagabatan para saindo an kamugtakan kan sakong hawak, dai nindo ako pinagtuya-tuya o isinikwal, kundi inako na garo ako sarong anghel nin Dios o garo si Cristo Jesus. ¹⁵ Maogma kamo kaidto! Alagad ngunyan ano na an nangyari saindo? Saksi ako na kun mahihimo pa sana, huhulwaton kuta nindo an sadiri nindong mga mata tanganing itao sako. ¹⁶ Kaiwal na daw nindo ako ngunyan huli ta tinaraman ko kamo kan katotoohan? ¹⁷ An mga ibang tawong idto na naghuhulit nin ibang “marahay na bareta” nagpapahiling nin dakulang pagmakulog saindo, alagad bakong marahay an saindang mga katuyohan. Boot sana nindang isuhay kamo sako, nganing sinda an pagmakulogan nindo. ¹⁸ Marahay an pagkaigwa nin pagmakulog, kun marahay man an katuyohan; danay na totoo ini, bako sanang kun kaiba nindo ako. ¹⁹ Namomotan kong mga aki, huli saindo namamatean ko giraray an sakit na inaagihan nin sarong inang nangangaki, sagkod na dai pa nasa saindo si Cristo. ²⁰ Minamawot ko na makaiba nindo ako ngunyan, tanganing ipahiling ko saindo an nasa puso ko. Napupurisaw ako dapit saindo! ²¹ Hapoton ko daw kamo, na mga boot magpasakop sa Katogonan: dai daw nindo nadadangog an sinasabi sa Katogonan? ²² Nasusurat na si Abraham igwa nin duwang aking lalaki; an saro, sa babaeng oripon, an saro, sa babaeng talingkas. ²³ An aki niya sa babaeng oripon namundag sa natural na paagi, alagad an saiyang aki sa babaeng talingkas namundag huli sa panuga nin Dios. ²⁴ Ini an kahulogan kaiyan: an duwang babae iyo an duwang tipan; an sarong tipan ginibo sa Bukid nin Sinai, ilinaladawan iyan ni Agar na an mga aki namundag na oripon. ²⁵ Si Agar iyo an Bukid nin Sinai sa Arabia; siya an syudad nin Jerusalem na nasa kaoripnan kaiba an mga tawo diyan. ²⁶ Alagad an langitnon na Jerusalem talingkas asin iyan an satong ina. ²⁷ Huli ta nasusurat: “Mag-ogma ka, babaeng dai nagkaaki! Magkurahaw ka saka mag-awit sa kaogmahan, ika na dai nanggad nakamate kan kulog nin pangaki! Huli ta an babaeng binayaan magkakaigwa nin mas dakul na mga aki ki kan babaeng dai binayaan kan agom.” ²⁸ Mga tugang, kamo an mga aki nin Dios bunga kan saiyang panuga, arog ki Isaac. ²⁹ Siring kaidtong panahon na an aking namundag sa natural na paagi nagpasakit sa aki na namundag sa kapangyarihan nin Espiritu nin Dios, siring man kaiyan an mangyayari ngunyan. ³⁰ Alagad ano an sinasabi sa kasuratan? “Pahalea an babaeng oripon asin an saiyang aki, huli ta an aki kan oripon dai dapat makihiras sa rogaring kan ama na mamanahon kan aki kan babaeng talingkas.” ³¹ Kaya, mga tugang, bako kitang mga aki kan babaeng oripon kundi kan babaeng talingkas.

¹ Tinawan kita nin katalingkasan ni Cristo tanganing magdanay kitang talingkas. Kaya mamuhay kamo siring sa mga tawong talingkas, saka dai na nanggad kamo magpaoripon. ² Hinanyoga nindo ako! Ako, si Pablo, an nagsasabi saindo na kun magpaserkomsisyon kamo, nangangahulogan na si Cristo mayo nin halaga para saindo. ³ Sinasabi ko giraray sa kiisay man na boot magpaserkomsisyon, na dapat siyang magkuyog kan bilog na Katogonan. ⁴ Kamong mga naghihingowa na magin matanos sa Dios huli sa Katogonan, siblag na ki Cristo. Napasuhay kamo sa biyaya nin Dios. ⁵ Linalaom mi man na gigibohon nin Dios na magin matanos kami saiya huli sa pagtubod mi ki Cristo, sa tabang kan Espiritu nin Dios. ⁶ Huli sa pakisumaro ta ki Cristo Jesus, mayong kalaenan kun pagkaniserkomsisyonado man o bako an tawo; an mahalaga iyo na igwa siya nin pagtubod dahel sa pagkamoot. ⁷ Marahay an ginigibo nindo kaidto! Siisay an nag-olang saindo sa pagkuyog sa katotoohan? ⁸ Bako iyan gibo nin Dios na nag-apod saindo. ⁹ May kasabihan, “Kadikit sanang lebadura an kaipuhan tanganing pausbogon an bilog na minasa.” ¹⁰ Huli ta nagkasararo kita sa Kagurangnan, nananarig ako na dai kamo maako nin ibang kaisipan; nananarig man ako na an tawong iyan na nagpupurisaw saindo, maski siisay man siya, papadusahan nin Dios. ¹¹ Mga tugang, kun naghuhulit pa ako na kaipuhan an pagserkomsisyon, siring kan sinasabi ninda, tadaw ta pinapasakitan pa ako sagkod ngunyan? Kun totoo man iyan, dai na kutanang problema an paghulit ko manongod sa krus ni Cristo. ¹² Mawot ko na an mga tawong nagpaparibok saindo bako sanang magpaserkomsisyon kundi magpakapon pa! ¹³ Mga tugang, inapod kamo na magin talingkas. Alagad dai nindo gibohon iyan na dahelan na magpadaog kamo sa mga kamawotan kan laman. Kundi magpatarabang-tabang kamo dahel sa pagkamoot. ¹⁴ Huli ta an bilog na Katogonan naootob sa saro sanang togon, “Kamotan mo an saimong kapwa siring sa pagkamoot mo sa sadiri mo.” ¹⁵ Alagad kun garo kamo mga hayop na nagdudurulakan, mapapahamak kamo gabos. Kaya mag-ingat kamo. ¹⁶ Ini an sinasabi ko: mamuhay kamo sa Espiritu; dai nindo pagsunodon an mga kamawotan kan laman. ¹⁷ Huli ta an mga kamawotan kan laman tumang sa Espiritu; an mga kamawotan kan Espiritu tumang sa laman. Magkasarungat an duwang ini. Kaya dai ta masusunod an boot tang gibohon. ¹⁸ Kun an Espiritu an nangengenot saindo, dai kamo sakop kan Katogonan. ¹⁹ Madaling mahiling an mga gibo kan laman; nahihiling iyan sa gibong karigsokan, kausmakan, karompotan; ²⁰ pagsamba sa mga dios-dios, pagtubod sa kulam, pag-iriwal, karibokan, pag-imon, aranggotan, pagkamaimot, pagkabaranga, pag-apil sa partido o grupo; ²¹ pag-ori, pagburat, dororogan, asin iba pang bagay na arog kaiyan. Pinapatanidan ko kamo siring sa ginibo ko kaidto: an mga naggigibo kan mga bagay na ini dai magmamana kan Kahadean nin Dios. ²² Alagad an bunga kan Espiritu pagkamoot, kaogmahan, katoninongan, pakatios, kabootan, karahayan, kaimbodan; ²³ kahoyoan saka pagpugol sa sadiri. Mayo nin katogonan tumang sa mga bagay na ini. ²⁴ An laman, kaiba kan mga bisyo saka mga kamawotan kaiyan, ipinako na sa krus kan mga tawong sadiri ni Cristo Jesus. ²⁵ Tinawan kita nin buhay kan Espiritu, kaya dapat na siya an mangenot sa satong buhay. ²⁶ Dai kita dapat magpaabaw-abaw o mag-aragyatan o mag-ororihan.

¹ Mga tugang, kun igwa kamong madakop na naggigibo nin anoman na sala, kamo na nag-ako kan Espiritu nin Dios an dapat na magtabang saiya na magin matanos giraray. Alagad gibohon nindo iyan sa mahuyong paagi. Kamo man dapat maglikay ta tibaad kamo man an masogotan. ² Magpatarabang-tabang kamo sa pagdara kan saindong mga pasan; sa siring na paagi, kinukuyog nindo an katogonan ni Cristo. ³ Kun igwang naghohona na siya mahalaga, maski sa katunayan bako man, dinadaya niya an sadiri niya. ⁴ An lambang saro dapat na magsiyasat kan sadiri niyang gawe. Kun iyan marahay, pwede niyang ipag-orgulyo an ginibo niya; dai na kaipuhan ipagbaing pa iyan sa ginibo nin iba. ⁵ Huli ta an lambang saro kaipuhan na magdara kan sadiri niyang pasan. ⁶ Dapat hirasan kan tawong tinutukdoan kan mensahe nin Dios an saiyang maestro kan gabos na marahay na bagay na yaon saiya. ⁷ Dai nindo pagdayaon an sadiri nindo; an Dios dai maloloko nin siisay man. Kun ano an itinanom nin tawo, iyan man an saiyang aanihon. ⁸ An nagtatanom sa oma nin mga kamawotan sa laman, maani nin kagadanan; an nagtatanom sa oma nin Espiritu, maani nin buhay na daing kataposan. ⁹ Kaya dai kita mapagal sa paggibo nin karahayan; huli ta kun dai kita magmaluya, maabot an panahon na maani kita. ¹⁰ Kaya sa lambang oportunidad na itao sato, maggibo kita nin marahay sa gabos, orog nang gayo sa kapwa nyato paratubod. ¹¹ Hilinga nindo kun gurano kadarakulang letra ining pagkasurat ko saindo; ako mismo an nagsurat kaini! ¹² An mga tawo na namimirit na magpaserkomsisyon kamo boot maghambog dapit sa mga bagay na nahihiling. Ginigibo ninda iyan, tangani sanang dai sinda pagpasakitan dahel sa krus ni Cristo. ¹³ Maski an mga sinerkomsisyon dai nagkukuyog kan Katogonan; boot nindang magpaserkomsisyon kamo tanganing makapaghambog sinda na kamo nagpasakop sa seremonyang ini nin laman. ¹⁴ Alagad para sako, an ipag-oorgulyo ko sana iyo an krus ni Jesu-Cristo na satong Kagurangnan, huli ta sa paagi kan saiyang krus, an kinaban gadan na para sako; ako man gadan na para sa kinaban. ¹⁵ Mayo nin kalaenan kun an sarong tawo pagkaniserkomsisyonado man o bako; an mahalaga iyo an pagigin bagong linalang. ¹⁶ An katoninongan saka pagkaherak nin Dios mapasagabos na nag-ootob kaining pagsusundon—sa sainda asin sa bilog na banwaan nin Dios! ¹⁷ Poon ngunyan, dai na ako pagribokon nin siisay man, huli ta an mga pinilaan sa hawak ko nagpapatotoo na oripon ako ni Jesus. ¹⁸ An biyaya ni Jesu-Cristo na satong Kagurangnan mapasaindo gabos, mga tugang. Amen.