EFESO

EFESO

¹ Surat na hale ki Pablo na nagin apostol ni Cristo Jesus huli sa kabotan nin Dios. Para sa mga banal na nag-eerok sa Efeso, na maimbod ki Cristo Jesus: ² Mapasaindo an biyaya asin an katoninongan nin Dios na satong Ama asin ni Jesu-Cristo na Kagurangnan. ³ Magpasalamat kita sa Dios na Ama ni Jesu-Cristo na satong Kagurangnan! Huli ta benendisyonan niya kita diyan ki Cristo, kan gabos na bendisyon na espiritwal sa kalangitan. ⁴ Bago lalangon an kinaban, pinili niya kita diyan ki Cristo tanganing magin kitang banal saka mayong digta sa atubangan niya. Huli sa pagkamoot, ⁵ itinalaga kita nin Dios na magin mga aki niya huli ki Jesu-Cristo; sadiri niyang kabotan iyan saka katuyohan. ⁶ Omawon ta an Dios dahel kan saiyang nagsusupay na biyaya na itinao niya sato bilang regalo na yaon sa namomotan niyang Aki! ⁷ Tinubos kita ni Cristo huli kan saiyang dugo, pinatawad kita kan satong mga kasalan, sosog sa kayamanan kan biyaya nin Dios, ⁸ na pinasupay niya sato! Tinawan niya kita nin kadonongan saka pakaaram, ⁹ tanganing masabotan ta an hilom na plano na ootobon niya diyan ki Cristo, ¹⁰ pag-abot kan tamang panahon. An saiyang plano iyo na pagsararoon ki Cristo an gabos na linalang, sa langit asin sa daga. ¹¹ An gabos na bagay nahahaman sosog sa plano asin kabotan nin Dios; huli ki Cristo, pinili niya kami na magin sadiri niyang banwaan dahel sa sadiri niyang katuyohan, na dati niya nang inisip poon pa sa kapinonan. ¹² Kaya kaming mga naenot na naglaom ki Cristo itinalagang mabuhay para sa kaomawan kan saiyang kamurawayan. ¹³ Kamo man nagin banwaan nin Dios kan maaraman nindo an Marahay na Bareta na nagdara nin kaligtasan saindo. Nagtubod kamo ki Cristo, kaya ipinadara saindo an Espiritu Santo na ipinanuga niya bilang tanda na sadiri na kamo nin Dios. ¹⁴ An Espiritu Santo iyo an sangra kan satong pamana sagkod na makamtan nyato iyan, sa kaomawan nin saiyang kamurawayan! ¹⁵ Huli kaini, kan madangog ko an dapit sa saindong pagtubod ki Jesus na Kagurangnan, dangan an saindong pagkamoot sa gabos na banal, ¹⁶ dai ako nag-ontok nin pagpasalamat sa Dios para saindo. Ginigiromdom ko kamo sa sakong mga pamibi; ¹⁷ hinahagad ko sa Dios ni Jesu-Cristo na satong Kagurangnan, an mamurawayon na Ama, na itao saindo an espiritu nin kadonongan, tanganing masabotan nindo nin orog an kapahayagan dapit sa Dios. ¹⁸ Hinahagad ko na maliwanagan an isip nindo tanganing manodan nindo kun ano an paglaom na inapodan niya saindo, kun ano an nagsusupay na biyaya na ipinanuga niya sa saiyang mga banal, ¹⁹ asin kun gurano kadakula an saiyang kapangyarihan na yaon sato na mga nagtutubod. An kapangyarihan na ini na yaon sato pareho kan kapangyarihan saka kosog ²⁰ na ginamit nin Dios kan buhayon niya liwat si Cristo, asin kan patukawon sa too niya duman sa langit. ²¹ Sakop duman ni Cristo an gabos na langitnon na paghahade, awtoridad, kapangyarihan, asin mga pamamayo; an ngaran niya mas halangkaw ki sa gabos na ngaran, bako sanang sa panahon na ini kundi sa maabot pa. ²² An gabos na bagay ibinugtak nin Dios sa irarom kan mga bitis ni Cristo. Itinao siya sa simbahan bilang kagsakop kan gabos na bagay. ²³ Siya an payo kan simbahan na iyo an saiyang hawak, an kapanoan niya na nakakapano sa gabos na linalang.

¹ Binuhay niya kamo kan gadan pa kamo huli kan saindong kasombikalan saka mga kasalan. ² An sinunod nindo kaidto iyo an maraot na gawe kan kinaban na ini; sinunod nindo an prinsipe kan kapangyarihan sa kahiwasan, an espiritu na nagsasakop kan mga aking masombikal sa Dios. ³ Kita gabos arog man sainda kaidto; sinunod ta an mga bisyo kan satong laman, an mga kamawotan kan satong hawak saka isip. Huli kaini, maninigo sato kaidto an makuring padusa nin Dios arog kan iba. ⁴ Alagad nagsusupay an pagkaherak nin Dios, asin dakula an saiyang pagkamoot sato, ⁵ kaya maski kan gadan pa kita huli sa kasombikalan, binuhay niya liwat kita kaiba ni Cristo. Nakaligtas kita huli sa biyaya nin Dios. ⁶ Sa pakisumaro ta ki Cristo Jesus, binuhay man kita kan buhayon siya liwat nin Dios tanganing kaiba niyang maghade sa langit. ⁷ Ginibo niya ini tanganing ipahiling sa maabot pang mga panahon an nagsusupay na biyaya sa pagkamoot na ipinahiling niya sato huli ki Cristo Jesus. ⁸ Huli sa biyaya nin Dios, nakaligtas kamo sa paagi nin pagtubod. Iyan bakong sadiri nindong gibo kundi regalo nin Dios. ⁹ Mayo saindong pwedeng mag-orgulyo dapit kaini, huli ta bako ining bunga kan sadiri nindong mga gibo. ¹⁰ Linalang kita nin Dios. Sa pakisumaro ta ki Cristo linalang kita para sa mga gibong karahayan na dati na niyang inandam tanganing gibohon ta. ¹¹ Kamong mga pagano, giromdomon nindo kun ano kamo kaidto, bakong pagkaniserkomsisyonado an apod saindo kan mga Judio huli ta sinda sirkomsisyonado (manongod ini sa ginigibo kan mga lalaki sa saindang hawak). ¹² Giromdomon nindo na kan panahon na idto, suhay kamo ki Cristo, mga dayuhan saka bakong kaayon sa banwaan na pinili nin Dios. Mayo kamong kabtang kaidto sa mga tipan asin mga panuga nin Dios. Namuhay kamo sa kinaban na ini na mayong paglaom asin mayong Dios. ¹³ Alagad ngunyan, huli ki Jesu-Cristo, kamo na harayo kaidto, irinani huli sa dugo ni Cristo. ¹⁴ Si Cristo mismo an nagdara sato nin katoninongan huli ta pinagsaro niya an mga Judio saka an mga pagano. Linaglag niya an lanob na nasa pagultanan ninda na iyo an nakakaolang kan pagkaolian nin magkaiwal. ¹⁵ Hinale niya an Katogonan nin mga Judio kaiba an mga pagsusundon kaiyan tanganing hale sa duwang nasyon, lalangon diyan sa saiya an sarong bagong banwaan, nganing magkaigwa nin katoninongan. ¹⁶ Natapos an iriwal kan duwang nasyon kan magadan si Cristo sa krus; pinagsaro niya sinda sa sarong hawak saka ibinalik sa Dios. ¹⁷ Kaya nagdigdi si Cristo asin naghulit kan Marahay na Bareta nin katoninongan sa gabos. Naghulit siya saindo na mga pagano, na kaidto harayo sa Dios, saka sa mga Judio, na harani saiya. ¹⁸ Sa paagi ni Cristo, kita gabos, Judio o bako, sa sarong Espiritu, makakadolok sa Ama. ¹⁹ Kaya kamong mga pagano bako nang mga dayuhan o mga nakikihimanwa, kundi mga kapwa syudadano kaiba kan mga banal asin kaayon kan pamilya nin Dios. ²⁰ Kamo man pinatindog sa pundasyon na ibinugtak kan mga apostol saka kan mga propeta, na an gapong patugmadan iyo si Cristo Jesus mismo. ²¹ Huli kaiyan nagkakasurugpon an gabos na kabtang kan edipisyo asin nagigin sarong banal na templo nin Kagurangnan. ²² Huli man kan saindong pakisumaro ki Cristo, kaiba man kamo nindang nagin kabtang kan erokan nin Dios sa saiyang Espiritu.

¹ Huli kaini, ako, si Pablo, na bilanggo ki Cristo Jesus para sa karahayan nindong mga pagano, namimibi sa Dios. ² Nadangog na nindo na huli sa biyaya nin Dios, itinao niya sako an trabahong ini sa ikakarahay nindo. ³ Ipinahayag nin Dios an saiyang misteryo saka ipinaaram iyan sako. (Nagsurat ako nin halipot dapit kaini; ⁴ kun basahon nindo, matatalastas nindo an pagkasabot ko sa misteryo ni Cristo.) ⁵ Kan mga panahon na nakaagi, dai ipinahayag an misteryong ini sa kiisay man, alagad ngunyan ipinahayag ini kan Espiritu sa mga banal niyang apostol saka sa mga propeta. ⁶ An misteryo iyo ini: huli kan Marahay na Bareta, an mga pagano paramana man kan mga bendisyon nin Dios; mga kabtang man kan parehong hawak, asin kahiras kan ipinanuga nin Dios diyan ki Cristo Jesus. ⁷ Ginibo akong ministro kan Marahay na Bareta huli sa balaog kan biyaya nin Dios na itinao sako sa paagi kan saiyang kapangyarihan. ⁸ Ako an pinakamenos sa gabos na mga banal. Alagad itinao sako an biyaya nin paghulit kan Marahay na Bareta sa mga pagano dapit sa daing sukol na kayamanan ni Cristo, ⁹ asin paliwanagan an gabos na tawo kun paano ootobon an misteryo na haloy nang panahon natatago sa Dios na Kaglalang kan gabos na bagay; ¹⁰ tanganing ikapahayag sa paagi kan simbahan, an daing kasagkoran na kadonongan nin Dios ngunyan sa manlaen-laen na paagi, sa mga prinsipado asin sa mga kapangyarihan sa kalangitan. ¹¹ Ginibo ini nin Dios sosog sa daing kataposan niyang katuyohan na inotob niya sa paagi ni Cristo Jesus na Kagurangnan ta. ¹² Huli kan satong pakisumaro ki Cristo, asin kan satong pagtubod saiya, daing takot saka may paglaom kitang makakadolok sa Dios. ¹³ Kaya hinahagad ko saindo na dai manluya an saindong boot huli na lamang kan tinitios ko para saindo; ini gabos para sa karahayan nindo. ¹⁴ Huli kaini, minaluhod ako sa atubang kan Ama, ¹⁵ na iyo an nagtatao nin ngaran sa gabos na pamilya na nasa langit asin sa daga. ¹⁶ Hinahagad ko sa Dios, sa paagi kan saiyang Espiritu, na tawan niya kamo nin kosog nin buhay na espiritwal, gikan sa kayamanan nin saiyang kamurawayan, ¹⁷ tanganing si Cristo mag-erok sa saindong mga puso, huli sa saindong pagtubod. Minamawot ko man na makagamot asin mapatugmad kamo sa pagkamoot, ¹⁸ tanganing kaiba an gabos na banal, mamidbid nindo an kahiwasan, kahalabaan, kahalangkawan asin kahararoman kan pagkamoot ni Cristo. ¹⁹ Masabotan logod nindo an saiyang pagkamoot—maski dai nanggad iyan matugkad nin isip. Mapano logod kamo kan kapanoan nin Dios. ²⁰ Sa Dios, na sa paagi kan saiyang kapangyarihan na naghahade sato nakakagibo kan gabos na bagay labi pa sa satong hinahagad o iniisip, ²¹ mapasaiya logod an kamurawayan sa simbahan, saka ki Cristo Jesus sa gabos na panahon sagkod pa man! Amen.

¹ Kaya ako, na sarong bilanggo dahel sa Kagurangnan, nakikiolay saindo na mamuhay kamo na maninigo sa buhay na inapodan saindo nin Dios. ² Magpakumbaba kamo, magin mahuyo asin matinios; magpatinios-tiosan kamo sa pagkamoot. ³ Hingowahon nanggad nindo na mapadanay an pagkasararo sa Espiritu sa paagi kan katoninongan na minabugkos saindo. ⁴ Igwa nin sarong hawak asin sarong Espiritu, siring na igwa nin sarong paglaom na inapodan saindo nin Dios. ⁵ May sarong Kagurangnan, sarong pagtubod, sarong bunyag; ⁶ igwa nin sarong Dios saka Ama kan gabos. Orog siya sa gabos, huli sa gabos, saka yaon sa gabos. ⁷ Alagad an biyaya itinao sa lambang saro sato sosog sa sukol kan balaog ni Cristo. ⁸ Siring sa nasasabi sa kasuratan, “Nagsakat siya sa langit, dara an dakul na bilanggo, saka nagtao nin mga balaog sa mga tawo.” ⁹ Ngunyan, ano an kahulogan kan “nagsakat siya”? An boot sabihon, naghilig ngona siya sa pinakairarom kan daga. ¹⁰ Kaya an naghilig iyo man sana an nagsakat lampas pa sa kalangitan, tanganing an gabos mapano kan saiyang presensya. ¹¹ Siya an “nagtao nin mga balaog sa mga tawo.” An iba ginibo niyang apostol, an iba propeta, an iba ebanghelista, an iba mga pastor saka mga paratukdo. ¹² Ginibo niya ini tanganing andamon sa paglingkod an gabos na banal, asin tanganing magtalubo an hawak ni Cristo. ¹³ Sa paaging ini kita gabos magkakasararo sa pagtubod asin sa pakamidbid sa Aki nin Dios. Magigin kitang mga tawong may kabatiran, sosog sa sukol kan kadakulaan kan kapanoan ni Cristo. ¹⁴ Dangan bako na kitang arog kan mga aking sadit na madaling ianod saka ipadpad kan katukdoan kan mga tusong tawo na minakabit sa iba sa salang dalan sa paagi kan saindang mga pagdaya asin pagputik. ¹⁵ Kundi, huli sa pagtaram kan katotoohan sa espiritu nin pagkamoot, magtalubo kita ki Cristo na iyo an payo. ¹⁶ Sa pamamayo niya, an gabos na kabtang kan hawak marahay an pagkamugtak; an bilog na hawak pinagsusurugpon nin mga ngalongaloan. Kun an lambang kabtang nagtatrabaho nin marahay, an bilog na hawak nagtatalubo saka nagdadakula sa pagkamoot. ¹⁷ Sa ngaran nin Kagurangnan, sinasabihan ko kamo: dai na kamo mamuhay arog kan mga pagano na an mga iniisip mayo nin halaga; ¹⁸ mayo sinda nin pakasabot. Mayo sindang kabtang sa buhay na itinao nin Dios, huli kan saindang kamangmangan saka katagasan nin puso. ¹⁹ Dai na sinda nakakamate nin sopog; nagpabaya sindang mahulog sa karigsokan saka nagin paslo sinda sa gabos na kadustaan. ²⁰ Bako iyan an nanodan nindo dapit ki Cristo! ²¹ Nakadangog na kamo dapit saiya; bilang mga parasunod niya, tinukdoan na kamo kan mga katotoohan na yaon ki Jesus. ²² Kaya hubaon na nindo an daan na pagkatawo na pinaraot kan saindong mga marumpot na kamawotan. ²³ Kaipuhan magin bago an saindong puso asin isip. ²⁴ Bagong pagkatawo na an iribay nindo, pagkatawo na linalang sa ladawan nin Dios, pagkatawo na matanos asin banal. ²⁵ Kaya dai na kamo magputik! An lambang saro magtaram nin totoo sa tugang niya, huli ta kita gabos kabtang kan saro sanang hawak ni Cristo. ²⁶ Kun maanggot kamo, likayan nindo na magkasala; dai nindo pasolnopon an aldaw na dai pa nahale an saindong kaanggotan. ²⁷ Dai nindo pagtawan nin lugar an Diablo. ²⁸ An parahabon dai na maghabon, kundi magtrabaho sa matanos na paagi tanganing matabangan niya an mga nangangaipo. ²⁹ Dai kamo maggamit nin mga tataramon na makakaraot, gamiton nindo an mga tataramon na makakapakarahay saka tama sa panahon, nganing pakinabangan kan mga makakadangog. ³⁰ Dai nindo pagpamondoon an Espiritu Santo nin Dios, an tanda nin Dios sa saindo para sa Aldaw nin pagtubos. ³¹ Ontokon na nindo an mga kapaitan, pagkaongis, kaanggotan, pagkurahaw, pakaraot saka mga maraot sa boot. ³² Kundi magmaboot kamo, magin maheherakon saka magpatinawad-tawad kamo, siring na pinatawad man kamo nin Dios diyan ki Cristo.

¹ Kamo mga aking padangat nin Dios, kaya maghingowa kamong magin siring saiya. ² Maglakaw kamo sa pagkamoot, siring na si Cristo namoot sato. Idinusay niya an saiyang buhay para sato, bilang mahamot na dolot asin sakripisyo sa Dios. ³ Huli ta kamo an banwaan nin Dios, bakong tama na maonabihan nindo an mga bagay manongod sa karigsokan, kadustaan o kapasloan. ⁴ Bako man maninigo saindo na magtaram nin rapsak, mag-orolay na mayo nin halaga o magkalwag na sala; kundi magpasalamat kamo sa Dios. ⁵ Aram nindo na an tawong marigsok o dusta o paslo (an kapasloan sarong pagsamba sa dios-dios) dai magkakaigwa nin pamana sa Kahadean ni Cristo asin nin Dios. ⁶ Dai kamo magpadaya sa kiisay man na nagsasabi kan mga bagay na mayo nin kahulogan; an mga bagay na iyan an dahelan kan pag-abot kan kaanggotan nin Dios sa mga dai nagkukuyog saiya. ⁷ Kaya dai nanggad kamo makilabot sa siring na mga tawo. ⁸ Kaidto nasa kadikloman kamo, alagad poon na magin sadiri kamo nin Kagurangnan, nasa liwanag na kamo. Kaya maglakaw kamo siring sa mga aki nin liwanag, ⁹ huli ta an bunga nin liwanag makukua sa lambang karahayan, katanosan, saka katotoohan. ¹⁰ Maghingowa kamong manodan an ikinakaogma nin Kagurangnan. ¹¹ Dai kamo mag-ayon sa mga mayong halagang gibo nin kadikloman, kundi ihayag nindo sa liwanag an mga gibong iyan. ¹² (Makasosopog maski an pagsambit kan mga bagay na ginigibo ninda sa hilom.) ¹³ Kun an gabos na bagay mahayag sa liwanag, mahihiling nanggad an totoong kamugtakan kaiyan; ¹⁴ huli ta an anoman na nahahayag, nagigin liwanag, kaya sinasabi, “Pagmata, ika na natotorog, magbangon ka hale sa mga gadan, asin liliwanagan ka ni Cristo.” ¹⁵ Kaya mag-ingat kamo sa saindong pamumuhay. Mamuhay kamo siring sa mga madonong, bakong siring sa mga tawong mangmang. ¹⁶ Pakarahayon nindo an paggamit kan panahon, huli ta an mga aldaw ngunyan maraot. ¹⁷ Dai kamo magin lolong, kundi hingowahon nindong masabotan kun ano an kabotan nin Kagurangnan saindo. ¹⁸ Dai kamo magburat, huli ta mararaot an buhay nindo; kundi mapano logod kamo kan Espiritu. ¹⁹ Mag-orolay kamo sa paagi nin mga salmo, himno saka mga banal na awit; mag-awit kamo nin mga himno saka mga salmo sa Kagurangnan na nasa puso an pag-omaw saiya. ²⁰ Danay na magpasalamat kamo sa Dios Ama para sa gabos na bagay, sa ngaran ni Jesu-Cristo na satong Kagurangnan. ²¹ Magkinuyog-kuyogan kamo bilang paggalang ki Cristo. ²² Mga babae, magpasakop kamo sa saindong agom siring kan pagpasakop nindo sa Kagurangnan. ²³ Huli ta an lalaki iyo an payo kan saiyang agom, siring na si Cristo iyo an payo kan simbahan na saiyang hawak; asin siya mismo an Paraligtas kaiyan. ²⁴ Kaya siring na an simbahan sakop ni Cristo, an mga babae dapat man na magpasakop sa saindang agom sa gabos na bagay. ²⁵ Mga lalaki, kamotan nindo an saindong agom siring kan pagkamoot ni Cristo sa simbahan; idinusay niya an saiyang buhay para sa simbahan, ²⁶ nganing mapabanal iyan, pakalinigi niya kaiyan sa paagi kan tubig saka kan tataramon. ²⁷ Ginibo niya ini nganing iatubang niya sa sadiri niya an simbahan na magayon, banal, mayo nin kaninan, mayong digta o kurundot o anoman na arog kaiyan. ²⁸ Dapat kamotan kan mga lalaki an saindang agom siring kan pagkamoot ninda sa sadiri nindang hawak. An lalaking namomoot sa agom niya, namomoot sa saiya man sana. ²⁹ (Mayo nin naoongis sa sadiri niyang hawak, kundi pinapakakan iyan saka inaataman, arog kan ginigibo ni Cristo sa simbahan. ³⁰ Mga kabtang kita kan hawak ni Cristo.) ³¹ Siring sa nasusurat, “Huli kaini babayaan kan lalaki an saiyang ama saka ina, dangan masaro sa saiyang agom, asin an duwa magigin saro.” ³² Ini dakulang misteryo; ini sinasabi ko dapit ki Cristo asin sa simbahan. ³³ Ini sinasabi ko man saindo: dapat na mamotan kan lambang lalaki an saiyang agom siring kan pagkamoot niya sa sadiri niya; dapat galangan kan lambang babae an saiyang agom.

¹ Mga aki, kuyogon nindo diyan sa Kagurangnan an saindong mga magurang, huli ta ini an tamang gibohon. ² Ini an enot na togon na may panuga: “Galangan nindo an saindong ama asin ina, ³ tanganing mapakarahay kamo asin maghalawig an saindong buhay sa daga.” ⁴ Mga magurang, dai nindo pagpaanggoton an saindong mga aki, kundi padakulaon nindo sa Cristianong disiplina asin katukdoan. ⁵ Mga oripon, kuyogon nindo an saindong mga kagurangnan digdi sa daga, na may paggalang, pagkatakot asin kaimbodan nin puso, na garo si Cristo an pinaglilingkodan nindo. ⁶ Arog kaiyan an gibohon nindo bako sana kun pinagbabantayan kamo ninda tanganing maoyonan kamo, kundi maglingkod kamo nin tudok sa puso bilang mga sorogoon ni Cristo, asin nagsusunod kan kabotan nin Dios. ⁷ Magtrabaho kamong maogma, na garo naglilingkod kamo sa Kagurangnan, asin bako sanang sa mga tawo. ⁸ Aram nindo na an lambang saro, oripon man o bako, babalosan nin Kagurangnan sosog sa marahay niyang gibo. ⁹ Mga kagurangnan, siring man an gibohon nindo sa saindong mga oripon; dai nindo sinda pagpatakoton. Giromdomon nindo na kamo saka an saindong mga oripon sakop kan saro sanang Kagurangnan na yaon sa langit. Mayo siyang pinapalaen na tawo. ¹⁰ Sa kataposan, magin makosog kamo sa pakisumaro sa Kagurangnan, sa kosog kan saiyang kapangyarihan. ¹¹ Gamiton nindo an gabos na armas na itinatao saindo nin Dios, tanganing makaya nindong labanan an mga katusohan kan Diablo. ¹² Bakong mga tawo an satong kaiwal, kundi an mga prinsipado, mga kapangyarihan, mga kagsakop kan kadikloman ngunyan sa kinaban, mga hukbo nin mga maraot na espiritu sa kalangitan. ¹³ Kaya isulot nindo an mga armas nin Dios, tanganing makatagal kamo kun umabot na an maraot na aldaw, asin pakatapos kan saindong pakilaban, pusog pa giraray kamo. ¹⁴ Kaya magin andam kamo! Ihagkos nindo sa habayan an katotoohan, saka itahob nindo sa saindong daghan an katanosan. ¹⁵ Isapatos nindo an pagigin andam para sa paghulit kan Marahay na Bareta nin katoninongan. ¹⁶ Sa gabos na oras, daraha nindo an pagtubod bilang kalasag, tanganing masigbo an mga nagkakalayong pana kan Maraot. ¹⁷ Ikalo nindo an kaligtasan bilang helmet, saka kapotan an tataramon nin Dios bilang espada na itinatao saindo kan Espiritu. ¹⁸ Dayaday kamong mamibi asin maghagad nin tabang sa Dios sa paagi kan Espiritu Santo. Huli kaini danay kamong magbantay; mamibi kamo para sa mga banal. ¹⁹ Ipamibi man nindo ako na itao sako nin Dios an mensahe sa sakong pagtaram, tanganing ikabalangibog ko na mayong takot an misteryo kan Marahay na Bareta. ²⁰ Huli kan Marahay na Baretang ini sinugo ako, asin ngunyan nakakadenahan. Kaya mamibi kamo na ikahulit ko iyan na mayong takot siring sa maninigo kong gibohon. ²¹ Si Tiquico, na satong namomotan na tugang asin maimbod na sorogoon nin Kagurangnan, iyo an mabareta saindo kan gabos dapit sako, tanganing maaraman nindo kun ano an sakong kamugtakan asin kun ano man an sakong ginigibo. ²² Sinusugo ko siya saindo tanganing maaraman nindo an samong kamugtakan saka mapakosog an saindong boot. ²³ Itao logod nin Dios Ama asin ni Jesu-Cristo na Kagurangnan sa mga tugang an katoninongan, an pagkamoot kaiba an pagtubod. ²⁴ An biyaya nin Dios mapasagabos logod na namomoot ki Jesu-Cristo na satong Kagurangnan nin mayong kataposan na pagkamoot.