TITE

TITE

¹ Mɛ Pauli tɛ Wuro ta tere kɔ Yesu Krista ta faneta na. Wuro mɛ fane ngwõfatɔ mɛ a ta dɛ̀gɛ̀wɛ sɔma wiribɛ lanabɛbe ma hõ ne kala kɔ tĩyã na tɔbe nemɛ ngwĩ ngwõ kanya kɔ Wuro nyononakũ nemɛ ngwõfatɔ sugunɔmabe na wɛbariyayi na zigi hõ wɔ ye kɔrɔ hõ. ² Wuro ngwĩ ha nĩyõ sɔ ga, ngwõ sugunɔmabe na wɛbariyayi na datege bi ke ma sane diniya hõ tegee. ³ A ya bɛrɛda dɔrɔ wakati na fɔroyi ma. A ngwona wadyuli kalofa mɛ ma hõ kanya kɔ ka na kisita Wuro ta fane nemɛ. ⁴ Tite, mɛ bo sɛbɛ fane be ma, bi ngwĩ ngwõ mɛ no yɛrɛyɛrɛ kyà lanabɛbe na sogo ma. Ke Tõ Wuro kɔ Yesu Krista hõ nema kɔ syara pere be ma. ⁵ Mɛ mane ya hõ be to Kirɛte ngwõfatɔ da ngwĩye ngwõ wɔ yɛ, ma nyenahõwɛ ga, be ngwõwɔ nyonohõwa fɔrona hõ eglise somɔlala bɔ tege kire pepe tala tala hõ. Ma fane ngwĩye yera be ma, be be kakiri to ngwõ na. ⁶ Ye eglise somɔlalo daga tɛ zarakebariyata na, yàtalate. A nɔmane daga tɛ lanabe sɔma na. Sɔma ka ne ta vunabe kɔ ye ta kwɛ̃dirɛbe ta da yera ga. ⁷ Eglise na zɛngɛfɛgɛta daga Wuro ta bara kɔrose. Ngwõ yena a daga tɛ zarakebariyata na. A ka tɛ yɛrɛdungotɛta na ga. A woro ka ne ba sale ga. A ka tɛ kwimɛnɛta na ga. A ka tɛ sõ na dasigeta na ga. A ka ne tono yɔ kya ga. ⁸ A daga tɛ samara fɛgɛta na. Dafɔretɛbe daga ne dya a ma. A daga tɛ kakirite na. A daga tele. A daga ne kwã Wuro na. A daga tɛ yɛrɛfɛgɛta na. ⁹ A daga malo kala na syɛbɛyi ma wɔkara a mane ngwõ kala ngwɛne. Yee nemɛ, a sebɛne sɔma ladi hõ kanya kɔ tĩyã na bɛrɛda na kala nemɛ hõ sɔmadakwiyɛsɔma do hõ bɛrɛda na sɔma firebɛye wa ye da hõ. ¹⁰ Sɔma murutibɛ sɔma na nyaaye tye ngwĩye ngwõ sɔma firebɛ kɔ ya vuna bɛrɛda nemɛ. Ye na nyaaye ngwõ Yahutuye ngwĩ ngwõ tobi Yesu ma. ¹¹ Be daga ne ta bɛrɛda sɔ ye da hõ kamasɔrɔ ye tine bɔ lu ma kɔma pepe kwe ne firebɛ hõ sɔma kala kɔ bɛrɛda bɔ nemɛ, ye ha daga ngwĩye yera ga. Ye ngwõ ta hõ gwana gũ. ¹² Kirɛte kɔma ta puruta na sonala, ngwõ yɛrɛ ngwõ Kirɛte sõ bo, ngwõ da ye Kirɛte kɔma nĩyõsɔre sanga pepe ma. Ye zare yage. Ye kõ ma ba. Ye kwerekɔma. ¹³ Ngwona bɛrɛda tĩyã. Ngwõ yena be daga be dɔbɛ ye na hõ bɛri kyɛ ye ma fɔrona ngwõfatɔ ye hõ lanabɛbe na syɛbɛyi gũ. ¹⁴ Ye ka dɔ Yahutuye ta sĩyɛ̃ ma ga. Sɔma ngwĩye ngwõ tĩyã na sogo dira, ye ka dɔ ngwõwɔ ta fane ma mɛ ga. ¹⁵ Fere pepe kìnì sɔma kini ta. Nka fa si ha kìnì sɔma na dõõye na lanabɛbariya sɔma nyena hõ ga. Ngwõwɔ kakiri kɔ ye kɔrɔ hõ dõõ. ¹⁶ Ye da ye yi Wuro tɔ̀ nka ye ta tɛda ha ngwõ dɔrɔ sɔma ma ga. Ye tɛ sɔma yaga na murutiye na. Ye ha sebɛne dafɔre si ta ga.

¹ Be kwane, be daga sɔma kala hõ kanya kɔ kala na syɛbɛyi nemɛ. ² Be yera somɔlala ma ye tɛ yɛrɛfɛgɛre na, sɔma na syɛbɛye na kakirikɔma. Ye hõ tɛ sɔma na sabatiye na lanabɛbe kɔ kanube kɔ somɔnabe ta piri ma na. ³ - ⁴ Yee nemɛ, be yera yà somɔlala ma mɛ ye ta yano daga kanya kɔ kìnìbɛbe nemɛ. Ye ka tɛ sɔma togayagasɔma na ga wala kwimɛnɛnyingine. Ye daga ladibe na fɔroyi pere sɔma ma ngwõfatɔ ye yɔdalala kala ye hõ ye bangane kɔ ye nɔmane kanu. ⁵ Ye ye kala hõ tɛ yàra na kakirikɔma na kìnìye na ngwĩye ngwõ kõ kɔrɔ hõ bara ta kɔ kɔrɔ na fɔroyi nemɛ. Ye daga kala hõ mɔ ye bangane ta ngwõfatɔ Wuro ta bɛrɛda togo ka na yaga ga. ⁶ Yee nemɛ, be yɛlɛ ladi ye hõ tɛ kakirikɔma na. ⁷ Bi yɛrɛ hõ tɛ zɛngɛdɔreta na tɛda fɔre pepe na. Be sɔma kala kɔ kɔrɔ na fɔroyi na tangayi nemɛ. ⁸ Be bɛrɛda na syɛbɛye yera, sõ ha sebɛne ngwĩye dakiyɛ ga ngwõfatɔ sɔma ngwĩye ngwõ be dakiyɛ, ngwõwɔ hõ piri. Ye ka dayaga si gũ ne yera ke ma ga. ⁹ Be tɛrɛ ladi ye ye ngwonakɔma kwɛ̃ fɔga hõ ne madyamabe ta da pepe na, dakwiyɛro nii ka ne tye ga. ¹⁰ Ye ka ye ngwonate ta fa si kimi ga. Nka ye hõ tɛ nyomasɔma na da pepe na ngwõfatɔ ye hõ ke na kisita Wuro ta kala yirebɛ da pepe na. ¹¹ Wuro ya nema dɔrɔ hõ sɔma pepe kisi. ¹² Ngwona nema ke kala da ke sa dayaga kɔ bo diniya na wu na yagayi na hõ ya bɛ diniya hõ kɔ kakiritangabe kɔ telebe kɔ Wuro nyononakũ nemɛ. ¹³ Ngwona nema ke kala da ke hõ ya yee nemɛ si hõ kyà Wuro na yireyi kɔ ke na kisita Yesu Krista ta noro dɔre sanga yɛ̀rɛ̀, ngwona duba na kɔ, ke zigi ti ngwĩ ma. ¹⁴ Yesu Krista ye yɛrɛ pere ke yena ngwõfatɔ a hõ ke ngwonawa dayaga pepe ma hõ ke ta sɔma na kìnìye na. Ke hõ tɛ a sonala legelegeye na. Ke na ke nyanga dafɔre pepe ta tɛbe na. ¹⁵ Aiwa, be sɔma kala kɔ ngwona da nemɛ hõ ne ladi ne zarake kɔ ngwonakɔmabe na fanga nemɛ. Sõ si ka be dɛgɛbɛ ga.

¹ Be sɔma pepe kakiri dige ye na da ye daga mɔ zɛngɛfɛgɛre kɔ ngwonakɔma ta hõ ne kwɛ̃ fɔga. Ane ye na yɛrɛtetɛrɛye hõ gũ hõ dafɔre ta tɛno pepe na. ² Ye ka sõ si dayaga bɛri ga. Ye hõ tɛ vɛre na kɔ matɔbasɔma na. Ye ye wora makwɔna sɔma pepe ta piri ma na. ³ Ke kwane mane pya ne kakiridarakɔma gwerena. Ke mane kwɛ̃dirɛsɔma kɔ sɔma na fireye. Ke mane wu sifa pepe kɔ madyamabe sifa pepe ta tɛrɛ. Ke mane ya zugube kɔ nemɛ kereyabe hõ. Ke mane bɔ koneya, bɔ ne ke koneya mɛ. ⁴ Nka ke na kisita Wuro ya foro kɔ ya kanube dɔrɔ sɔma ta piri ma na ngwĩ sanga ma, a ke kisi. ⁵ Ke yɛrɛ mane dafɔre ngwĩye ta, ngwõwɔ ha mane ke kisi ga. A ke mĩ hõ ke kisi yee nemɛ Ni na kìnìyi barika hõ. Ngwõ ke vɔrɔbɛ kanyena pɔla na hõ sugunɔmabe na ngwũyi pere ke ma. ⁶ Wuro ngwona Ni na kìnìyi zibɛ ke ma hõ na nyaabɛ ke na kisita Yesu Krista barika hõ. ⁷ A ngwõ ta ngwõfatɔ ke hõ tɛ sɔma tele na Wuro zĩ hõ a ta nema barika hõ, hõ sugunɔmabe na wɛbariyayi gũ, ke zigi ti ngwõ ngwĩ ma. ⁸ Ngwona bɛrɛda kìnì. Mɛ tyata be be nyanga ngwona da hõ fɔrona ngwõfatɔ ngwĩye ngwõ la Wuro na, ngwõwɔ hõ ye nyanga hõ dafɔre ta. Ngwona da fɔro, sõ nafã gũ ngwõ na. ⁹ Be yɛrɛ kɔrɔse dakwiyɛro na zanayi kɔ du ma da kɔ birisi da kɔ tõ da na dakwiyɛro ma. Ngwõwɔ zana da, nafã ha ti ngwõ na fyu ga. ¹⁰ Sõ ngwĩ ngwõ dɛ̀gɛ̀be ka eglise hõ, be bɛri a ma hõ na sɛmɛbɛ kanyena pɔla na ngwona da na. Ngwõ timi be be sabɛ ngwona te na. ¹¹ Be tɔ̀ da ngwõ nemɛ na sõ ngwõ sogo na teleyi dira. A wɔ ya kakyetɛbe hõ, hõ ye yɛrɛ zarake. ¹² Ma hõ Aritemasi wala Tisike fane be bire, be be nyanga hõ na ne birɛ Nikopolisi kamasɔrɔ mɛ a latege da ma na liya hõ ta ngwɛ̃. ¹³ Bya sebɛbe pepe ta hõ kalamogo Zenesi kɔ Apolosi dyema ye ta kire ya da na ngwõfatɔ fa ka dɛsɛɛ ye na ga. ¹⁴ Kyà kɔma hõ sɛmɛ kɔ dafɔretɛbe nemɛ mɛ ngwõfatɔ ye hõ sebɛ bɔ mako fɔro. Ye ka tɛ sɔma na nafãbariyaye na ga. ¹⁵ Ngwĩye ngwõ ti mɛ birɛ bɛ, ngwõwɔ pepe bire be na. Ngwĩye ngwõ ke kanu lanabɛbe na sogo ma, bire ngwõwɔ na. Wuro ta nema hõ wɔ ka pepe ta.