ROME KƆMA

¹ A mɛ Pauli ngwĩ bo sɛbɛ fane ka ma. Mɛ tɛ Yesu Krista ta tere na kɔ Wuro ta faneta na dɛ̀gɛ̀wɛyi na. A mɛ wiri hõ na ta Bɛrɛda Fɔre yera. ² Wuro mane ngwona Bɛrɛda Fɔre na datege bi gweregwerena a ta bɛrɛda na kmiye hõ purusɔma barika hõ. ³ Ngwona Bɛrɛda Fɔre ngwõ bɛri Wuro no ta da na, ngwõ kyà Matigi Yesu Krista. Komavere ta piri ma na, a mane Dauda timi sõ. ⁴ Ni ta piri ma na, a mane kìnì. A ngwini sa sara woro hõ. Ngwõ a dɔrɔ da a Wuro no, sebɛbe pepe ti a ta. ⁵ Wuro nema pere mɛ ma hõ tɛ faneta na Yesu Krista barika hõ ngwõfatɔ ma si sɔma nyaa zĩ fɔga ye lanabɛbe ta hõ Wuro kwɛ̃ fɔga Yesu togo yena. ⁶ Yesu Krista ki ngwĩye wiri hõ tɛ ayi na, ka tɛ ngwona sɔma na bɔ na mɛ. ⁷ Wuro ki pepe ngwĩye kanu, ngwĩye ti Rome kuru hõ, Wuro ki ngwĩye wiri hõ tɛ kìnìye na, mɛ bo sɛbɛ fane ka ma. Ke Tõ Wuro kɔ Matigi Yesu Krista hõ nema kɔ woramakwɔnabe pere ka ma. ⁸ Ye kya lanabɛbe ta da yera diniya bi pepe hõ. Ngwõ yena mɛ barika yera Wuro ma dɛ̃ Yesu Krista barika hõ. ⁹ Mɛ bara ta Wuro ma kɔ ne kɔrɔ pepe nemɛ a Nonanimisĩ na Bɛrɛda Fɔre ta da na. Wuro mɛ syere da mɛ ka toga yera Wuro ma na mɛbe hõ sanga pepe ma. ¹⁰ Mɛ ha ngwõ do dira ga. Mɛ a mɛ ngwõfatɔ a hõ tɛ a dungo na mɛ ya sa ka ma. ¹¹ Mɛ mako ti a na fɔrona hõ ka za ngwõfatɔ ma hõ ka ka kɔ Ni ta perefere na bo nemɛ, ngwĩ ngwõ na ka sabati. ¹² Ngwõ kɔrɔ, ke pepe na dyemabe gũ nemɛ ta. Ka na mɛ nyangabɛ lanabɛbe hõ. Mɛ na ka nyangabɛ mɛ. ¹³ Mɛ syenɔmane, ka ka sãfire ga, sanga nyaa ma mɛ mana latege hõ ya sa ka ma, nka fɔ ya wiri basyɛ mɛ ha ya gũ ga. Mɛ tyata sɔma bɔ gũ ka woro hõ wɔkara mɛ bɔ gũ si sɔma zɛ woro hõ ngwɛne. ¹⁴ Datɔsɔma kɔ datɔbariyasɔma pepe ta ku ti mɛ na. Kakirikɔma kɔ kakiridarakɔma ta ku ti mɛ na mɛ. ¹⁵ Ngwõ yena mɛ tyata hõ Bɛrɛda Fɔre yera ki Rome kɔma ma mɛ. ¹⁶ Mɛ ha piri kɔ Bɛrɛda Fɔre nemɛ fyu ga. Ngwõ Wuro ta sebɛbe hõ sɔma pepe kisi ngwĩye ngwõ la a na. Yahutu kɔma dɛ̃, ngwõ timi si sɔma sɛrɛ. ¹⁷ Bɛrɛda Fɔre ngwõ Wuro ta telebe dɔrɔ. Ngwõ tɛ lanabɛbe barika hõ ye na dofɛgɛ do fɔ ye na wɛ do. Wɔkara a sɛbɛɛ Wuro ta bɛrɛda hõ, ye: Sõ tele na sugu lanabɛbe barika hõ. ¹⁸ Wuro ta worababe zi hõ tuma wuro hõ. A woro ba kakye kɔ dayaga pepe ta da na kɔ sɔma ta da na ngwĩye tĩyã bare kɔ ye ta dayaga nemɛ. ¹⁹ Sɔma sebɛne da ngwĩye tɔ̀ Wuro ta da na, Wuro yɛrɛ ngwõ dɔrɔ ye ma. Ngwõ yena a woro ba. ²⁰ Na dofɔga diniya tege sanga ma, Wuro ta da na zɛbariyaye, sɔma sebɛne ngwõ tɔ̀. Ngwõ kɔrɔ, Wuro ta sebɛbe na yireyi kɔ a ta Wurobe ye dɔrɔ a ta tege fere barika hõ. Ngwõ yena sɔma ha sebɛne dɛnɛbɛ bo da ma hõ tĩyã gũ ga. ²¹ Ye Wuro tɔ̀ nka a daga kɔ yirebɛbe ngwĩye nemɛ, ye ha a yirebɛ yee ga. Ye ha barika yera a ma mɛ ga. Ye ta miri kwɔ ye ta kakiridara hõ. ²² Ye ye yɛrɛ dyati kakirikɔma nka ye tɛ mɔgɔmuge na. ²³ Ye ha Wuro na suguyi yirebɛ ga. Ye sɛrɛdala ngwĩye saga ne ta sɔma kɔ yala kɔ kanaa fere kɔ vɔlɔlɔ fere na, ye ngwõwɔ yirebɛ. ²⁴ Ngwõ yena Wuro ye to ye ta dumatɛbe hõ, hõ kanya kɔ ye kɔrɔ hõ wu nemɛ fɔ ye ye yɛrɛ komavere yaga. ²⁵ Ye Wuro ta tĩyã katira nĩyõ na. Ye tege fere yirebɛ hõ bara ta ngwõwɔ ma. Ye ha Tegeta Wuro yirebɛ ga, sɔma daga ngwĩ yirebɛ fɔ abada. Amina. ²⁶ Ngwõ yena Wuro ye to ye komavere na wu na da hõ ngwĩ sõ piribɛ. Wuro sini da kɔ yàra da ngwĩ tetɛrɛ, ye ta yàra ngwõ katira hõ da na dagabariyaye ta. ²⁷ Sini yàra to yɛ mɛ. Ye nemɛ sini na wu ne fɔga. Sini ne peremaga da ta kɔ ye nemɛ sini nemɛ. Ye ta fire da daga kɔ sara ngwĩ nemɛ, ye yɛrɛ na ngwõ gũ. ²⁸ Sɔma ha dyã Wuro na tɔbe na syɛbɛyi to ye kɔrɔ hõ ga. Ngwõ yena Wuro ye to ye yɛrɛ ta kakiri na fireyi soro hõ, ye ne da na dagabariyaye ta. ²⁹ Ye paga telebariya da si pepe na. Ye dayaga si pepe ta. Ye nyena nyaa. Ye dayaga ta nemɛ na. Ye paga nemɛ na kereyabe na. Ye sɔma yɛ ne birisi kwini. Lamara kɔ miri yaga ti ye kɔrɔ hõ sɔma zɛ ta piri ma na. ³⁰ Ye sɔma toga yaga ne Wuro koneya. Ye ye nemɛ vini. Ye ye yɛrɛ yirebɛ hõ ye yɛrɛ toga sabɛ. Ye tɛno ngwũ kya hõ dayaga ta. Ye ye na vɔrɔre kwɛ̃ dira. ³¹ Ye kakala da ta. Ye datege yaga. Ye ha dafɔre ta ga. Ye ha makare sɔma na mɛ ga. ³² Ye Wuro ta kiti da tɔ̀, ye sɔma ngwĩye ngwõ nemɛ na da ta, ngwõwɔ daga kɔ siri nemɛ. Nka ye ya zĩ hõ, hõ ngwona da yɛrɛ ta. Hõ na kwe ngwõ ma mɛ, sɔma zɛ ngwĩye ngwona da ta, ngwõwɔ da dya ye ma mɛ.

¹ Bi ngwĩ ngwõ sɔma sɛrɛ zarake, be ha sebɛne dɛnɛbɛ bo da ma hõ tĩya gũ ga. Ne be hõ sɔma sɛrɛ zarake, hõ be bere ne ngwõ nemɛ na da ta mɛ, be be yɛrɛ zarake. ² Ke tɔ̀ da tĩyã ti Wuro ta ne a hõ ngwõ nemɛ na da na tɛ sɔma zarake. ³ Be ngwona da ta hõ be bere ne ngwona da na tɛ sɔma zarake mɛ. A ti be kɔrɔ hõ da be sebɛne dɛɛ Wuro ta kiti na ra? ⁴ Be sĩ Wuro ta foro kɔ a ta sabare kɔ a ta sɔmonabe na yireyireye na ra? Be tɔ̀ da a Wuro ta foro ngwĩ ngwõ be suru ye be be kɔrɔ berebɛ bya kakye na mɔ ga? ⁵ Be tɛ mɔmagata kɔ bɛribata na. Ngwõ yena be tine be yɛrɛ ta nyane morobɛ, be na nyane ngwĩ gũ kiti kɔ ma. Wuro ta worababe kɔ a ta kiti na teleyi na ye dɔrɔ ngwona kɔ ma. ⁶ Wuro na sɔma pepe tala tala sara hõ kanya kɔ ye ta tɛda nemɛ. ⁷ Ngwĩye ngwõ ye nyanga hõ dafɔre ta hõ ne kya noro kɔ yirebɛbe kɔ Wuro ta sugunɔmabe na, Wuro na sugunɔmabe na wɛbariyayi pere ngwõwɔ ma. ⁸ Ngwĩye ngwõ dakwiyɛro ta ne maga tĩyã ma ne dyã telebariyabe ma, Wuro ta worababe kɔ a ta nyane na bɛrɛ ngwõwɔ ma. ⁹ Nyane na yireyi kɔ nyenahõtogo na yiregwagayi na bɛrɛ dayagatɛsɔma pepe tala tala ma, Yahutu kɔma dɛ̃, ngwõ timi si sɔma sɛrɛ mɛ. ¹⁰ Nka Wuro na noro kɔ yirebɛbe kɔ syara pere dafɔretɛsɔma pepe tala tala ma, Yahutu kɔma dɛ̃, ngwõ timi si sɔma sɛrɛ mɛ. ¹¹ Wuro ha sõ dɛ̀gɛ̀ sõ na ga. ¹² Ngwĩye ha Musa tatõ tɔ̀ ga hõ kakye ta, ngwõ na halaki, tõ nii ma tye ga. Ngwĩye ngwõ Musa ta tõ tɔ̀ hõ zɛ kakye ta, kiti na sɔ ngwõwɔ ma hõ kanya kɔ ngwona tõ nemɛ. ¹³ Ngwĩye ngwõ tõ na bɛrɛda mɔ, ngwõwɔ ha tɛ sɔma tele na Wuro zĩ hõ ga. Ngwĩye ngwõ tɛ sɔma tele na Wuro zĩ hõ, ngwõ ngwona sɔma ngwĩye ngwõ mɔ tõ na bɛrɛda ta. ¹⁴ Musa ta tõ ti si sɔma ngwĩye ta ga, ne ngwõwɔ ne tõ da ta ye yɛrɛ ma, ye tɛ tõ na ye yɛrɛ ma, hale ne tõ ma ti ye ta ga. ¹⁵ Ye ta yano a dɔrɔ da tõ ngwĩ fa yera, a tɛ wɔkara ngwõ ti ye kɔrɔ hõ. Ye kɔrɔ tɛ ngwona da syere na. Bo sanga ma ye kɔrɔ hõ miri ye zarake, bo sanga ma ye tĩyã pere ye yɛrɛ ma. ¹⁶ Hõ kanya kɔ Bɛrɛda Fɔre nemɛ, mɛ ngwĩ yera, a na tɛ yee nemɛ si kiti kɔ ma, ne Wuro hõ kiti sɔ sɔma ma Yesu Krista barika hõ. Da pepe ngwĩye dõ sõ kɔrɔ hõ, ngwõwɔ na dɔre. ¹⁷ Bi kwane, be be yɛrɛ wiri Yahutu hõ be zigi dɛ Musa ta tõ ma hõ be yɛrɛ yirebɛ Wuro ta da na. ¹⁸ Be Wuro dungo tɔ̀. Be tõ sɛmɛ, ngwõ yena be sebɛne da na fɔroyi dɛ̀gɛ̀ tɔ̀. ¹⁹ Be dyati mɛ da be tɛ fu ta gwanga fɛgɛta na. Sɔma ngwĩye ti tunungu hõ, ye be tɛ ngwõ ta kini na. ²⁰ Be da be tɛ kakiridarakɔma kɔ nimisala ta kalamogo sõ na. A ti be kɔrɔ hõ da be tɔbe kɔ tĩyã pepe gũ Musa ta tõ hõ. ²¹ Bi ngwĩ ngwõ sɔma sɛrɛ kala, be be yɛrɛ kala ga ra? Bi ngwĩ ngwõ wadyuli ta da sõ ka fa kimi ga, be sõ ta fa kimi ra? ²² Bi ngwĩ ngwõ da sõ ka kakalabe ta ga, be kakalabe ta ra? Fyã da dya bi ngwĩ ma ga, be yɛrɛ fyã kõ hõ fere bi ra? ²³ Bi ngwĩ ngwõ be yɛrɛ yirebɛ tõ ta da na, be Wuro dɛgɛbe bya tõ yagabɛ na ra? ²⁴ Wɔkara a sɛbɛɛ Wuro ta bɛrɛda hõ, ye: Sɔma Wuro togo yaga si sɔma woro hõ ka yena. ²⁵ Nafa ti bya yɛrobe na ne be ne ya tõ na sogo ma. Nka ne be ne tõ yaga, a tɛ wɔkara be ha yɛro ga. ²⁶ Sõ ngwĩ ha yɛro ga, ne ngwõ hõ tõ na sogo ya, Wuro na a dyati wɔkara a yɛro wɛ. ²⁷ Musa ta tõ na sɛbɛ ti ki Yahutu kɔma ta, ka yɛro mɛ. Nka ka ngwona tõ yaga. Si sɔma ha yɛro ga nka ye mɔ tõ ta. Ngwõ yena si sɔma na ki Yahutu kɔma zarake. ²⁸ Ngwĩ ngwõ tɛ Yahutu na a ta tɛda na dama, ngwõ ha Yahutu na syɛbɛyi ga. Komavere na yɛrobe, ngwõ ha yerobe na syɛbɛyi ga. ²⁹ Ngwĩ ngwõ Yahutu ye kɔrɔ hõ, ngwõ Yahutu na syɛbɛyi. A tɛ wɔkara Wuro ta Ni ngwona sõ kɔrɔ hõ yɛro. Ngwõ ha tɛ kɔ Musa ta tõ na sɛbɛyi nemɛ ga. Ngwõ nemɛ na sõ na yirebɛbe gũ Wuro ta, ngwõ ha sa sɔma ta ga.

¹ Aiwa, Yahutu kɔma fõ kɔ si sɔma nemɛ ra? Nafã ti yɛrobe na ra? ² Õhõ, gweregwerena Wuro ya bɛrɛda pere Yahutuye ma. ³ Ne ngwona da ti mɔ? Ne sɔma bɔ ma wɔ lanabɛbe hõ ga, ngwõ Wuro ta saratipagabe yaga ra? ⁴ Aworɛ. Hale ne sɔma pepe ne nĩyõ sɔ, Wuro na tĩyã yera. Wɔkara a sɛbɛɛ Wuro ta bɛrɛda hõ, ye: Ngwõfatɔ be hõ bɛri ngwĩ sanga ma be hõ tɛ sõ tele na. Kɔ ngwõfatɔ kiti hõ sɔ be ma ngwĩ sanga ma, be hõ sebɛbe gũ. ⁵ Ne kyà dayaga hõ ne Wuro ta telebe dɔrɔ sɔma ma, ngwono ke na ngwõ yera hã? A tɛ wɔkara bɔ sɔma da ye ne Wuro woro hõ ba dayagatɛre ta ngwĩ sanga ma, a telebariya da ta. Ngwõ tĩyã ra? ⁶ Aworɛ. Ne Wuro ma ne tele ga, ne na a na kiti sɔ diniya kɔma ma? ⁷ Ne mya telebariyabe hõ ne Wuro ta telebe dɔrɔ sɔma ma hõ noro dɛ Wuro ma yee, ngwonona Wuro dayaga na kiti sɔ ne ma? ⁸ Yee nemɛ, bɔ sebɛne da ye ke daga dayaga ta ngwõfatɔ dafɔre sa ngwõ hõ. Bɔ sɔma mɛ togo yaga hõ da mɛ yɛrɛ tɛne ngwõ yera. Wuro na ngwona sɔma zarake. ⁹ Aiwa, ne ngwona da ti mɔ? Ke Yahutu kɔma fõ kɔ sɔma sɛrɛ nemɛ ra? Aworɛ. Mɛ a dɔrɔ na wɛ da sɔma pepe ti kakye ta sebɛbe we, Yahutuye kɔ si sɔma. ¹⁰ Wɔkara a sɛbɛɛ Wuro ta bɛrɛda hõ, ye: Sõ tele si ha tye, hale sonala legelege ga. ¹¹ Kakirite si tye ga, sõ si ha Wuro kya ga. ¹² Ye pepe kɛ̃gɛlɛ. Ye pepe kwe tɛ nafabariyasɔma na. Dafɔretɛta si tye, hale sonala legelege ga. ¹³ Ye da tɛ wɔkara bonɛ da na kibɛye. Ye sɔma firebɛ kɔ niyõ na bɛrɛda nemɛ. Ye do hõ bɛrɛda tɛ wɔkara kyebo ta baga. ¹⁴ Ye vodɛ bɛrɛda na yagaye yera. ¹⁵ Ye sɔma yɛ sale. ¹⁶ Yagabe kɔ nyane na yireyi ti ye ta sogo ma. ¹⁷ Ye ha syara na sogo tɔ̀ fyu ga. ¹⁸ Wuro nyononakũ̀ ha ti ye kɔrɔ hõ fyu ga. ¹⁹ Aiwa, ke tɔ̀ da Musa ta tõ fa pepe ngwĩ yera, a ngwõ yera sɔma ma ngwĩye ti ngwona tõ we ngwõfatɔ sɔma pepe da hõ pĩ, diniya kɔma pepe hõ zarake Wuro zĩ hõ. ²⁰ Ngwõ yena sõ si ha na tɛ sõ tele na Wuro zĩ hõ Musa ta tõ na tɛda barika hõ ga. Ngwona tõ ngwõ sõ ta kakye dɔrɔ a ma. ²¹ Basyɛ Wuro sõ ta sõ tele na ngwɛne awe zĩ hõ, a ngwõ dɔrɔ ke ma. Tõ nii ha ti ngwona da hõ ga. Musa ta tõ kɔ purusɔma ta bɛrɛda tɛ ngwona da na syɛrɛ na. ²² Wuro sõ ta sõ tele na ne a hõ la Yesu Krista na. A ngwõ ta lanabe sɔma pepe ma. Dɛ̀gɛ̀ do ha tye ga. ²³ Sɔma pepe kakye ta hõ pɔna Wuro ta noro hõ. ²⁴ Ye pepe tɛ sɔma tele na nema barika hõ, ngwĩ ngwõ Wuro ta perefa a ngwĩ pere ke ma zana. A ye ngwonawa Yesu Krista barika hõ. ²⁵ Wuro Yesu Krista pere hõ na ta kakye na yafa salaka na, sɔma daga la ngwĩ na. Wuro ngwõ ta hõ ye yɛrɛ ta telebe dɔrɔ sɔma ma. Wakati na fɔnoyi a mane sɔma ta kakye somɔna, a ha tɔga ye na ga. ²⁶ Basyɛ wakati ma a tɔga sɔma ta kakye da na ngwõfatɔ a ye yɛrɛ ta telebe dɔrɔ. Yee nemɛ Wuro a dɔrɔ da ye yɛrɛ tele ane a na sɔma pepe ta sɔma tele na ngwĩye dyã la Yesu na. ²⁷ Ke sebɛne ke yɛrɛ yirebɛ ngwono na da sye na? Fui ga. Ke sebɛne ke yɛrɛ yirebɛ hõ da ke mɔ tõ ta ra? Awo, ke tɛ sɔma tele na lanabɛbe barika hõ dama. ²⁸ Aiwa, ke a za da sõ tɛ sõ tele na lanabɛbe barika hõ, tõ na tɛda nii ma ti ga. ²⁹ Wuro Yahutu kɔma dama ta Wuro ra? A si sɔma ta Wuro mɛ mɔ ga? Õhõ, a si sɔma ta Wuro mɛ. ³⁰ Wuro tala legelege tye, a na Yahutu kɔma ta sɔma tele na ye ta lanabɛbe yena hõ si sɔma ta sɔma tele na ye ta lanabɛbe yena mɛ. ³¹ Ngwõ kɔrɔ ke tõ dyati zana lanabɛbe barika hõ ra? Aworɛ, ke tõ yirebɛ.

¹ Ibrahima mane ke tõ komavere ta piri ma na. Ngwono ke na ngwõ yera a ta da na, ye ngwono a ngwõ gũ? ² Ne Ibrahima mane tɛ sõ tele na a ta tɛda barika hõ, a sebɛne ye yɛrɛ yirebɛ. Nka a ha sebɛne ye yɛrɛ yirebɛ Wuro zĩ hõ ga. ³ Ngwono Wuro ta bɛrɛda ngwõ yera a ta da na? A da Ibrahima la Wuro ta bɛrɛda na. A ta lanabɛbe yena, Wuro a dyati sõ tele. ⁴ Ne baratɛta hõ ya sara gũ, sɔma ha ngwõ dyati perefa ga. Ngwõ a ta bara na sara. ⁵ Wuro sebɛne sõ ta sõ tele na ngwĩ ngwõ daga kɔ nyane nemɛ. Sõ ngwĩ la Wuro na, Wuro ngwona te ta lanabɛbe sege hõ na dyati sõ tele awe yɛrɛ zĩ hõ, hale bara nii ma tye ga. ⁶ Yee nemɛ, Dauda mane da ye Wuro sõ ngwĩ dyati sõ tele, bara nii ma tye ga, ngwona te tɛ duba no na. ⁷ A da: Wuro sõ ngwĩ ta dayaga yafa a ma hõ na ta kakye dibɛ ne wa yɛ, ngwõ tɛ duba no na. ⁸ Matigi sõ ngwĩ ta kakye dyati ga, ngwõ tɛ duba no na. ⁹ Yɛro sɔma dama sebɛne tɛ ngwona duba nɔmane na ra, ta sɔma ngwĩye ha yɛro mɛ ga? Ke mane da ye Ibrahima ta lanabɛbe yena, Wuro a dyati sõ tele. ¹⁰ We sanga ma Wuro ngwõ dyati, sane ye hõ na yɛro ra, ta a yɛro wɛ timi ma? Wuro ngwõ dyati sane ye hõ na yɛro. ¹¹ Ngwõ timi ye mana yɛro. Ngwõ mane tɛ tagamasɛ̃ na hõ na dɔrɔ da Wuro mana dyati sõ tele a ta lanabɛbe yena, hale ne a mane yɛro dɛ̃ ga. Yee nemɛ, Ibrahima tɛ sɔma pepe tõ na ngwĩye la Wuro na. Wuro ngwõwɔ pepe dyati sɔma tele, hale ne ye mane yɛro dɛ̃ ga. ¹² A tɛ yɛro sɔma pepe tõ na. Ngwõ kɔrɔ sɔma ngwĩye ha la ngwona yɛro da dama na ga, nka ye lanabɛbe na sogo ya wɔkara Ibrahima a ya ngwɛne. A mane ngwona sogo ya sane a hõ yɛro. ¹³ Wuro mane datege bi Ibrahima kɔ a timi kɔma ma ngwĩ sanga ma, ye ye na diniya gũ hõ na ta ye kɔrɔ na, a ngwõ ta Ibrahima ta lanabɛbe yena. Wuro a dyati sõ tele. A ha ngwona datege bi a ma tõ fɛgɛbe yena ga. ¹⁴ Ne Musa ta tõ na sogo ya sɔma mane tɛ Wuro ta kɔrɔbisɔma na, lanabɛbe tɛ zana da na, Wuro ta datege ngwõ zana mɛ. ¹⁵ Musa ta tõ ngwõ Wuro woro babɛ. Tõ ha ti ngwõ ngwɛ̃ ga, tõ yagabe ha ti ngwɛ̃ mɛ ga. ¹⁶ Ngwõ yena sɔma datege gũ lanabɛbe barika hõ ngwõfatɔ a hõ tɛ Ibrahima timi kɔma pepe ta perefa na. A ha tõ na sogo ya sɔmayi dama ga. Nka a lanabe sɔma pepeyi, ngwĩ ngwõ lanabɛbe ta wɔkara Ibrahima, ngwĩ ke pepe tõ. ¹⁷ Wɔkara a sɛbɛɛ Wuro ta bɛrɛda hõ da: Mɛ be ta si sɔma nyaa tõ na. Ibrahima la Wuro ngwĩ na, a tɛ ke tõ na ngwõ zĩ hõ. Ngwona Wuro sara ngwini ne sugubɛ. A bɛri hõ fa na zɛbariyayi ta fa na zɛyi na. ¹⁸ Zigi dɛ do ha mane ti ngwĩ da ma ga, Ibrahima ye zigi dɛ ngwona da ma, hõ la a na da ye na tɛ si sɔma nyaa tõ na. Wɔkara a sɛbɛɛ Wuro ta bɛrɛda hõ, ye: Be timi kɔma na tɛ yee. ¹⁹ Ibrahima mane dɔgɔ zɔlo nemɛ gũ ne wɛ. Ngwõ yena a miri ye yɛrɛ komavere ta da na ya siri wɛ. A ta yà mane tɛ vɔrɔkara yà na mɛ. Nka a ta lanabɛbe barika ha mane dɛgɛ ga. ²⁰ A ta lanabɛbe ha mane wɛ ga. A ha siga kɔ Wuro ta datege nemɛ ga. A ta lanabɛbe fanga pera ma, a Wuro yirebɛ. ²¹ A mane kìnì a na fɔrona da Wuro datege bi ngwĩ da na, ya sebɛne ngwõ ta. ²² Ngwõ yena Wuro Ibrahima dyati sõ tele a ta lanabɛbe yena. ²³ Ngwona bɛrɛda ha mane sɛbɛɛ awe sonala yena ga. ²⁴ Ye sɛbɛɛ ke yena mɛ. Wuro na ke dyati sɔma tele mɛ, ke ngwĩye ngwõ la Wuro na ngwĩ kyà Matigi Yesu Krista ngwini hõ na sabɛ sara woro hõ. ²⁵ Wuro mana pere hõ siri kyà kakye yena. A ngwini hõ ke ta sɔma tele na.

¹ Ke tɛ sɔma tele na Wuro zĩ hõ lanabɛbe barika hõ. Ngwõ yena syara kwɔ ke yɔ kɔ Wuro nemɛ kyà Matigi Yesu Krista barika hõ. ² Ke la Yesu na. Ngwõ yena a ke ka Wuro ta nema hõ. Ngwona zigi ngwĩ ti ke ta ye ke na nii gũ Wuro ta noro na, ngwõ ke ni hõ dyabɛ. ³ A ngwõ dama ga. Ke ni hõ dya nyane da na mɛ. Ke tɔ̀ da nyane somɔnabe pere sɔma ma. ⁴ Somɔmabe ngwõ sebɛbe pere sõ ma kɔrɔwɛ sanga ma. Ngwona sebɛbegũbe ngwõ sõ zigi tangabɛ. ⁵ Ngwona zigi tanga ke kɔrɔ hõ, a ha sɔ ga kamasɔrɔ Wuro ta kanube kwɔ ke kɔrɔ hõ, hõ wɔ yɛ Ni na kmiyi barika hõ, a ngwõ ngwĩ pere ke ma. ⁶ Hõ ke na barika dɛgɛye to, Krista siri sɔma yaga yena. A siri Wuro ta wakati na lategeyi ma. ⁷ Sõ ngwĩ dyã ne siri sõ tele yena, ngwona te gũ ba. A dɔra bo sõ dyã ne ye woro sige hõ siri sõ fɔro yena. ⁸ Nka Wuro ke kanu ngwɛne, a ngwõ dɔrɔ bo da na: Hõ ke to kakyetɛbe hõ, Krista siri ke yena. ⁹ Wuro ke dyati sɔma tele Yesu tõ barika hõ. Na kwe ngwõ ma, ke na dɛɛ Wuro ta worababe ma awe barika hõ mɛ. ¹⁰ Ke mane Wuro zugi. Nka Wuro Nonanimisĩ kwɔ ke yɔ kɔ Wuro nemɛ hõ vɛ ke na a ta siri barika hõ. Basyɛ a sugu, a na ke kisi tĩyã na mɛ. ¹¹ A ngwõ dama ga. Ke ni hõ dya fɔrona Wuro ta da na, kyà Matigi Yesu Krista barika hõ, awe ngwĩ ngwõ kwɔ ke yɔ kɔ Wuro nemɛ hõ vɛ ke na. ¹² Kakye kwɔ diniya hõ sonala barika hõ. Siri kwe kwɔ kakye barika hõ mɛ. Siri wiri sɔma pepe ma kamasɔrɔ ye pepe kakye ta. ¹³ Sane Musa ta tõ hõ tegee, kakye mane ti diniya hõ, nka ne tõ mane tye ga, sɔma ha kakye dyati ga. ¹⁴ Na dofɔga Adama ta sanga ma fɔ ya wiri Musa ta sanga ma, siri ngwonakɔmabe ta sɔma pepe ma. Hale ngwĩye ha Adama ta tõ yagabe na kakye nemɛ ta ga, siri ngwonakɔmabe ta sɔma pepe ma. Hale ngwĩye ha Adama ta tõ yagabe na kakye nemɛ ta ga, siri ngwonakɔmabe ta ngwõwɔ ma. Ngwĩ mane daga na, Adama tɛ ngwõ nemɛ na. ¹⁵ Nka ye ha tala ga. Adama ta kakye da ha tala kɔ Wuro ta perefa nemɛ ga. Ngwona sonala yena sɔma nyaa siri, ngwõ tĩyã. Wuro ta nema kwane yireyi ngwõ ma. A ta perefa yireyi mɛ, a ngwĩ pere sɔma nyaa ma Yesu Krista barika hõ. ¹⁶ Dɛ̀gɛ̀ do ti Wuro ta perefa kɔ sonala ta kakye yɔ. Wuro kiti sɔ sɔma ma hõ ne zarake ngwona sonala ta kakye yena. Nka kakye nyaa tɛ wɛ timi ma, Wuro ya perefa pere, ke ha daga kɔ ngwĩ nemɛ ga, hõ da ke tɛ sɔma tele na. ¹⁷ Sonala ta kakye yena, siri ngwonakɔmabe ta ngwona sonala barika hõ. Yesu Krista sonala barika hõ ke fere nyaa gũ ngwĩye ngwõ yaloyi gwereye ma. Ngwõ kɔrɔ, sɔma pepe ngwĩye Wuro ta nema na yireyi gũ kɔ a ta tĩyãgũbe ngwõ ngwĩ tɛ perefa na, ngwõwɔ pepe na tanga hõ ngwonakɔmabe ta mɛ Krista barika hõ. ¹⁸ Aiwa, ngwona kakye tala sɔma pepe zarake. Yee nemɛ, Yesu ta telebe na da tele tala yena sɔma pepe tɛ vɛnɔmane na hõ sugu. ¹⁹ Sɔma pepe tɛ kakyetɛre na sonala ta kwɛ̃dirɛbe yena ngwɛne, yee nemɛ Wuro na ye dyati sɔma tele sonala ta kwɛ̃fɛgɛbe yena mɛ. ²⁰ Aiwa, Wuro mane Musa ta tõ pere ngwõfatɔ kakye hõ nyaa. Nka kakye nyaa ngwõ ngwɛ̃, nema nyaa ngwɛ̃ mɛ hõ yaloyi gwerena ma fɔrona. ²¹ Kakye ngwonakɔmabe ta siri barika hõ ngwɛne, yee nemɛ nema hõ ngwonakɔmabe ta telebe barika hõ, ngwĩ ngwõ ke ka kɔ sugunɔmabe na wɛbariyayi nemɛ kyà Matigi Yesu Krista barika hõ.

¹ Ngwono ke na ngwõ yera hã? Ke daga wɔ kakyetɛbe hõ ngwõfatɔ Wuro ta nema hõ nyaa ra? ² Aworɛ. Ke ngwĩye ngwõ siri kakye ta piri ma na, ne na ke na tɛ hõ wɔ kakyetɛbe hõ yɛ? ³ Ka ngwõ tɔ̀ ga ra da ke ngwĩye ngwõ batize hõ kwe kɔ Yesu Krista nemɛ, a tɛ wɔkara ke kwe siri kɔ le batizebe na. ⁴ Aiwa, a tɛ wɔkara ke mane kwe sitira kɔ Yesu nemɛ batizebe ta. Ke kwe siri kɔ le. Tõ Wuro Yesu Krista ngwini na sabɛ sara woro hõ kɔ a ta sebɛbe na yiregwagayi nemɛ. Ngwõ yena ke ya sugunɔmabe na ngwũyi na sogo ma. ⁵ Wɔkara ke mane tɛ tala kɔ Yesu nemɛ a ta siri da na ngwɛne, ke na kwe tɛ tala a ta ngwinibe na mɛ. ⁶ Ke tɔ̀ da kyà sõ biri kwe kwãgwaga kɔ awe nemɛ sɔno ma ngwõfatɔ kakye fanga ngwĩ gũ komavere ma, ngwõ hõ wɛ. Ane ke ka wɔ kakye ta tɛrɛbe hõ titiri ga. ⁷ Sõ ngwĩ siri, ngwõ tɛ veno na kakye ta piri ma na. ⁸ Aiwa, ne ke hõ kwe siri kɔ Krista nemɛ, ke la a na mɛ da ke na kwe sugu kɔ le. ⁹ Ke tɔ̀ da Krista ngwini wɛ hõ sa sara woro hõ, a ha na siri titiri ga. Siri ha na ngwonakɔmabe ta a ma ga. ¹⁰ A siri kanyono tala na. Ngwõ yena kakye ha sebɛbe gũ a ma ga. Basyɛ a kwe sugu kɔ Wuro nemɛ hõ tanga kɔ le. ¹¹ Yee nemɛ, ki mɛ, ka ka yɛrɛ ta da dyati wɔkara ka siri kakye ta piri ma na hõ kwe sugu kɔ Wuro nemɛ Yesu Krista barika hõ. ¹² Kakye ka ngwonakɔmabe ta ka komavere ma titiri ga, ngwõ ngwĩ na siri, fɔ ka hõ dyã komavere na wu na da ma ga. ¹³ Ka ka ka yɛrɛ pere kakyetɛbe ma hõ da na yagaye ta ga. Nka ka ka yɛrɛ pere Wuro ma wɔkara sɔma ngwĩye sa siri na da hõ, hõ sugu basyɛ. Ka ka yɛrɛ pere Wuro ma hõ da na teleye ta. ¹⁴ Ka ha ti Musa ta tõ we ga. Ka ti Wuro ta nema we. Ngwõ yena kakye ka ngwonakɔmabe ta ka ma ga. ¹⁵ Aiwa, ne ngwona da ti hã? Ke ha ti tõ we ga, ke ti nema we. Ngwõ yena ke kakye ta ra? Aworɛ. ¹⁶ Ka tɔ̀ da ne ka hõ ka yɛrɛ ka sõ soro hõ, hõ tɛ a ta tere na, na kwɛ̃ fɔga, ka tɛ ngwona te ta tere na ka ngwĩ kwɛ̃ fɔga. Ne ka hõ ka yɛrɛ ka kakye soro hõ, ngwona da na wɛbɛyi ngwõ siri. Ne ka hõ ka yɛrɛ ka Wuro ta kwɛ̃fɛgɛbe soro hõ, ngwona da na wɛbɛyi ngwõ tĩyãgũbe. ¹⁷ Barika Wuro. Bo sanga ma ka mane tɛ kakye ta tɛrɛ na. Nka basyɛ ka kala da ngwĩye na, ka ngwona da kwɛ̃ fɔga ka kɔrɔ hõ. ¹⁸ Wuro ka ta vɛnɔmane na kakye ta piri ma na hõ ka ta telebe ta tɛrɛ na. ¹⁹ Mɛ bɛri sɔma bɛrino na ka komavere ta barika dɛgɛbe yena. Bo sanga ma ka mane ka yɛrɛ pepe pere hõ tɛ dɔmatɛbe kɔ dayaga ta tɛrɛ na hõ da na yagaye ta. Yee nemɛ basyɛ ka daga ka yɛrɛ pepe pere hõ tɛ telebe ta tɛrɛ na hõ da na teleye ta. ²⁰ Ka mane ti kakye ta tɛrɛbe hõ ngwĩ sanga ma, ka mane tɛ vɛnɔmane na telebe ta piri ma na. ²¹ Ka piri kɔ da ngwĩye nemɛ basyɛ, ngwono na nafã ka mane ngwõ gũ ngwõwɔ na ngwona sanga ma? Ngwona da na wɛbɛyi ngwõ siri. ²² Basyɛ kwane ka tɛ vɛnɔmane na kakye ta piri ma na hõ tɛ Wuro ta tɛrɛ na. Ka nafã ngwĩ gũ, ngwõ kɔrɔ hõ da na kiniye. Ngwõ na wɛbɛyi ngwõ sugunɔmabe na wɛbariyayi. ²³ Kakye na sara ngwõ siri. Nka Wuro ta perefa ngwõ sugunɔmabe na wɛbariyayi Yesu Krista kyà Matigi barika hõ.

¹ Syenɔmane, ka tõ ta da tɔ̀ ne wɛ. Ngwõ yena mɛ na da ngwĩ yera ka ma basyɛ, ka ngwõ tɔ̀. Hõ sõ na suguyi to, a ti tõ we. ² Yà ngwĩ nyo sĩ ta, hõ na banga na suguyi to, a pɛrɛɛ kɔ a banga ta tõ nemɛ. Ne a banga hõ siri, a tɛ vɛno na a banga ta tõ ta piri ma na. ³ Ngwõ yena, hõ na banga na suguyi to, ne a hõ bere tɛ sõ za ta yà na, a na wiri da kakala tɛ yà. Ne a banga hõ siri, a tɛ vɛno na ngwona tõ ta piri ma na. Ne a hõ tɛ sõ za ta yà na ngwona sanga ma, a ha kakala tɛ yà ga. ⁴ Mɛ syenɔmane, a tɛ yee nemɛ kya piri ma na mɛ. Ka tɛ Krista komavere na bɔ na. Ka tɛ aye na, awe ngwĩ ngwõ ngwini hõ sa sara woro hõ, ngwõfatɔ ke hõ bara ta Wuro ma. Ngwõ yena ka siri tõ ta piri ma na. ⁵ Hõ ke to ke komavere tino na, tõ mane dayaga na wu tumabɛ ke kɔrɔ hõ fɔ hõ ke ka siri na da hõ. ⁶ Basyɛ kwane, fa ngwĩ mane pya ne ke fɔga, ke siri ngwõ ta piri ma na hõ tɛ vɛnɔmane na tõ ta piri ma na. Ke ha bara ta Wuro ma tõ na sɛbɛye barika hõ titiri ga. Ke bara ta Ni na kìnìyi barika hõ. ⁷ Ngwono ke na ngwõ yera hã? Tõ kakye ra? Aworɛ. Ne tõ ma mane tye ga, mɛ ha mane na kakye dɛ̀gɛ̀ tɔ̀ ga. Hõ be nyono sabɛ sõ za ta fere na, mɛ ha mane na tɔ̀ da ngwõ kakye ga. Nka tõ da ye sõ kada ye nyono sabɛ sõ za ta fere na ga. ⁸ Wuro mane ngwona fane yera hõ tɛno pere kakye ma hõ nyena sa fere na da nyaa tumabɛ mɛ kɔrɔ hõ. Kakye siri ne tõ ma tye ga. ⁹ Tõ mane tye ngwĩ sanga ma ga, mɛ mane sugu. Nka mɛ Wuro ta fane mɔ ngwĩ sanga ma, kakye mane sugu, mɛ kwane mane siri. ¹⁰ Yee nemɛ, Wuro ta fane ngwĩ daga sõ sugubɛ, ngwõ mɛ ta mɛ siri. ¹¹ Wuro fane ngwĩ yera, kakye tɛno gũ ngwõ barika hõ, hõ mɛ firebɛ hõ mɛ yɛ. ¹² Aiwa, tõ kìnì. Wuro fane ngwĩ yera, ngwõ kìnì mɛ, a tele ne fɔro. ¹³ Ngwõ kɔrɔ fa fɔro mɛ ta mɛ siri ra? Aworɛ. Kakye ngwõ ta ngwõfatɔ a na dɔrɔ da ye kakye. Kakye fa na fɔroyi ta siri na mɛ ta. Yee nemɛ Wuro fane ngwĩ yera, ngwõ a dɔrɔ da kakye ngwõ da na yagayagayi. ¹⁴ Ke tɔ̀ da tõ ngwõ ni ta fa. Mɛ kwane tɛ komavere na barikadɛgɛyi na. A tɛ wɔkara kakye mɛ tɛrɛ hõ tɛ tere na. ¹⁵ Mɛ ngwĩ fa ta, mɛ ha ngwõ tɔ̀ ga. Mɛ tyata ngwĩ fa ta, mɛ ha ngwõ ta ga. Ngwĩ da ngwõ dya mɛ ma fyu ga, ngwõ mɛ ngwõ ta. ¹⁶ Aiwa, mɛ tyata ngwĩ fa ta ga, ne mɛ hõ ne ngwõ ta, ngwõ a dɔrɔ da mɛ dyã a ma da tõ fɔro. ¹⁷ Mɛ kwane ngwona da na tɛta ga. Kakye ngwĩ tanga mɛ kɔrɔ hõ, ngwõ ngwona da na tɛta. ¹⁸ Mɛ tɔ̀ da fa fɔro si ha tanga mɛ kɔrɔ hõ ga, ngwõ kɔrɔ mɛ yɛrɛ hõ. Mɛ tyata dafɔre ta, nka daforetɛbe na fanga ha ti mɛ ta ga. ¹⁹ Mɛ tyata dafɔre ngwĩ ta, mɛ ha ngwõ ta ga. Mɛ ha tyata dayaga ngwĩ ta ga, ngwõ mɛ ngwõ ta. ²⁰ Aiwa, mɛ kya da ngwĩ na ga, ne mɛ hõ ne ngwõ ta, mɛ ha ngwona da na tɛta titiri ga. Kakye ngwĩ ngwõ tanga mɛ kɔrɔ hõ, ngwõ ngwona da na tɛta. ²¹ Mɛ bo tino za ne yɛrɛ kɔrɔ hõ, da mɛ tyata dafɔre ta ngwĩ sanga ma, dayaga mɛ ngwõ ta dama. ²² Wuro ta tõ da dya mɛ ma fɔrona ne yɛrɛ kɔrɔ hõ. ²³ Nka mɛ tinɔma za za ne komavere hõ, ngwõ kwini kɔ mɛ kakiri nemɛ. Ngwõ kakye ngwĩ ngwõ bara ta mɛ komavere hõ, hõ mɛ ta a ta tere na. ²⁴ E, mɛ lagayireno sege. Kɔ ngwõ na mɛ wa bo komavere na siri hõ? ²⁵ Mɛ barika yera Wuro ma kyà Matigi Yesu Krista barika hõ. Yee nemɛ, mɛ yɛrɛ bara ta Wuro ta tõ ma kakiri ta piri ma na. Mɛ komavere ngwõ bara ta kakye ta tõ ma.

¹ Basyɛ kwane, ngwĩye kwe ti kɔ Yesu Krista nemɛ, zarake do si ha ti ngwõwɔ na titiri ga. ² Ni ta tõ ngwĩ ngwõ ke kwe kɔ Krista nemɛ hõ ke sugubɛ, ngwõ ke ta vɛnɔmane na siri kɔ kakye ta tõ ta piri ma na. ³ Tõ ha mane sebɛne da ngwĩ ta ga sɔma na barikadɛgɛye yena, Wuro ngwõ ta. Kakye ngwĩ ngwõ bara ta sõ kɔrɔ hõ, a ngwõ zarake hõ ye Nonanimisĩ fane hõ tɛ wɔkara ke nemɛ na sɔma na kakyetɛre. A tɛ kakye na yafa salaka na. ⁴ Wuro ngwõ ta ngwõfatɔ tõ mako ti telebe na da ngwĩ na, ngwõ hõ dopaga ke hõ, ke ngwĩye ngwõ ya Ni na kìnìyi na da hõ, ke ha ya komavere na da hõ ga. ⁵ Ngwĩye ngwõ ya komavere na da hõ, ngwõwɔ ta miri ti komavere na da ma. Ngwĩye ngwõ ya Ni na kìnìyi na da hõ, ngwõwɔ ta miri ti Ni na kìnìyi na da ma. ⁶ Komavere na da na miri ngwõ siri wiribɛ ke ma. Nka Ni na kìnìyi na da na miri ngwõ ke ka kɔ sugunɔmabe kɔ syara nemɛ. ⁷ Komavere na da na miri ti sõ ngwĩ kɔrɔ hõ, ngwõ Wuro zugu. A ha dyã Wuro ta tõ na da ma ga, a ha sebɛ ngwõ ta mɛ ga. ⁸ Ngwõ yena ngwĩye ngwõ ya komavere na da hõ, ngwõwɔ ha sebɛne Wuro madyama da ta ga. ⁹ Ki kwane ha ya komavere na da hõ ga, ka ya Ni na kìnìyi na da hõ, ne Wuro ta Ni na kìnìyi hõ ne tanga ka kɔrɔ hõ. Krista Ni ha ti ngwĩ sõ kɔrɔ hõ ga, ngwona te ha Kristayi fyu ga. ¹⁰ Ne Krista ne tanga ka kɔrɔ hõ, Wuro ka ta sɔma tele na. Ka ni na sugu Ni na kìnìyi barika hõ, hale ne ka komavere ne siri kakye yena. ¹¹ Ne Wuro ta Ni hõ ne tanga ka kɔrɔ hõ, ngwõ na ka komavere na barikadɛgɛye sugubɛ ngwona Ni tala barika hõ ngwĩ ngwõ tanga ka kɔrɔ hõ. Ngwona Ni ngwõ Yesu Krista ngwini na sabe sara woro hõ mɛ. ¹² Aiwa, syenɔmane, ku ti ke na, nka a ha komavere na sogo ya da na ku ga. ¹³ Ne ka ne ya komavere na da hõ, ka na siri. Nka ne ka ne komavere na tɛda to yɛ Ni na kìnìyi barika hõ, ka na sugu. ¹⁴ Wuro ta Ni sɔma ngwĩye zĩ fɔga, ngwõ pepe tɛ Wuro nɔmane na. ¹⁵ Wuro Ni ngwĩ pere ka ma, ngwõ ha ka kwãbɛ hõ ka ta tɛrɛ na ga. Ni bara ngwĩ ta, a ka ta Wuro nɔmane na. Ke songo hõ da Aba ke tõ, Ni ta sebɛbe barika hõ. ¹⁶ Wuro ta Ni kɔ ke ni ye nemɛ na syɛrɛbe ta ye ke Wuro nɔmane. ¹⁷ Aiwa, ne ke hõ ma a nɔmane, Wuro mane datege ngwĩ bi ya sɔma ma, ye ye na tɛ kɔrɔbire na, ke na ke nii gũ ngwona da na kɔ Krista nemɛ. Ne ke hõ kwe nyane kɔ Krista nemɛ, ke na kwe kwɔ kɔ le a ta noro hõ mɛ. ¹⁸ Mɛ dyati da basyɛ nyane ngwõ ha fa ga, ne ke hõ ne miri sɛ̃ ta noro ta da na. Wuro na ngwona noro dɔrɔ ke ma. ¹⁹ Tege fere pepe kɔrɔ hõ tɔba ne ngwona kɔ yɛ̀rɛ̀, Wuro na ye nɔmane dɔrɔ ngwĩ kɔ ma. ²⁰ Wuro tege fere pepe ka nafãbariyabe na fanga we. Ngwõ mane ye yɛrɛ dungo ga, ngwõ ye na tegeta dungo. ²¹ Ngwona zigi ti ye ta da tege fere pepe na tɛ vɛnɔmane na vɔrabe ta piri ma na hõ Wuro nɔmane ta vɛnɔmabe na yireyi nemɛ gũ. ²² Ke tɔ̀ da tege fere pepe tine mana wɔkara vɔrɔ yà mana ngwɛne. ²³ Ye ngwõwɔ dama ngwõ mana ga. Ke ngwĩye ngwõ Ni na kìnìyi gũ ngwĩ ngwõ tɛ Wuro ta perefa na gwereyi na, ke mana ke yɛrɛ kɔrɔ hõ mɛ. Ke tine ngwona kɔ yɛ̀rɛ̀, Wuro na ke ta ye nɔmane na ngwĩ kɔ ma hõ ke ta vɛnɔmane na ke kɔrɔ pepe hõ. ²⁴ Ke mane kisi zigi ta. Aiwa, ne ke hõ ne zigi dɛ fa za, ngwõ ha zigi dɛ fa titiri ga. Sõ nyono ti fa ngwĩ na, ngwonona a ye zigi dɛ a ma da a na ngwõ gũ yɛ? ²⁵ Nka ke nyono ha ti fa ngwĩ na ga, ne ke zigi ne ti ngwõ ma, ke somɔnabe ta hõ ngwõ yɛ̀rɛ̀. ²⁶ Yee nemɛ, Ni na kìnìyi ke dyema kyà barika dɛgɛ da na. Ke daga Wuro mɛ ngwɛne, ke ha ngwõ nɔma tɔ̀ ga. Nka Ni na kìnìyi yɛrɛ tine mɛbe ta ke ma hõ mana. Ngwõ tɛ ngwɛne, sõ ha sebɛne ngwona da yera ga. ²⁷ Wuro ke kɔrɔ hõ da sege. A Ni ta miri tɔ̀ mɛ. Ni ngwõ mɛbe ta Wuro ta sɔma ma hõ kanya kɔ Wuro dungo nemɛ. ²⁸ Wuro da dya sɔma ngwĩye ma, ke tɔ̀ da Wuro kwe bara ta da pepe na hõ dafɔre ta ngwõwɔ ma. Yewɔ tɛ Wuro ta wiri sɔma na hõ kanya kɔ a ta latege da nemɛ. ²⁹ Wuro mane pya sɔma ngwĩye dɛ̀gɛ̀, a ngwõwɔ ta da latege mɛ ngwõfatɔ ye hõ kanya kɔ a Nonanimisĩ dya nemɛ. Yee nemɛ, Nonanimisĩ hõ tɛ gwere vɔrɔ no na syenɔmane nyaa woro hõ. ³⁰ Wuro pya ngwĩye ta da latege, a ngwõwɔ wiri mɛ. A sɔma ngwĩye wiri, a ngwõwɔ ta sɔma tele na. A ngwĩye ta sɔma tele na, a noro dɛ ngwõwɔ ma mɛ. ³¹ Ngwono ke na ngwõ yera ngwona da na yɛ? Ne Wuro ne ti ke ta, kɔ ngwõ sebɛne tuma ke na? ³² Ngwĩ ha maga hõ ye yɛrɛ Nonanimisĩ pere hõ siri ke yena ga, awe na fere pepe pere ke ma a Nonaninimisĩ barika hõ mɛ. ³³ Kɔ na Wuro ta dɛ̀gɛ̀ wɛ sɔma nii ka kiti hõ? Wuro yɛrɛ ngwõ ye ta sɔma tele na. ³⁴ Kɔ ngwõ ne zarake? Ngwõ ha Krista ga. Awe ngwõ siri. Na kwe ngwõ ma, a ngwini hõ sa sara woro hõ. A tanga Wuro digesoro ma ne Wuro mɛ ke ma. ³⁵ Kɔ sebɛne ke dɛ̃ ne ke wa Krista soro hõ, awe ngwĩ ke kanu? Ne ke hõ ne nyane, ne ke hõ ne da na sigeyi somɔna, ne sɔma hõ ke nyane, ne ke hõ ne pɔna zõfa kɔ zogore na, ne sɔma hõ ke kwãbɛ, hale ne sɔma hõ ne tyata ke yɛ,—ngwõ kɔrɔ ke ha ti Krista soro hõ titiri ga ra? ³⁶ Wɔkara a sɛbɛɛ Wuro ta bɛrɛda hõ, da: Ye tyata ke yɛ bi yena. Ye ke dyati wɔkara gware ye ngwĩye yɛ. ³⁷ Nka ngwona da pepe na, ke tɛ sebɛbe gũ sɔma na awe barika hõ ngwĩ ngwõ ke kanu. ³⁸ - ³⁹ Mɛ ngwõ tɔ̀ ngwõ kìnì da fa si ha sebɛne ke dɛ̃ ne ke wa Wuro soro hõ ga. Ne ke hõ ne sugu, ne ke hõ siri, ke na wɔ yɛ. Mɛlɛkɛe kɔ ngwonakɔmabe kɔ wuro hõ fangamɛ, ngwõwɔ ha sebɛne ke wa a soro hõ ga. Da ngwĩ tɛ basyɛ kɔ da na nayi, ngwõwɔ si ha sebɛne ke wa ngwona kanube hõ ga, ke ngwĩ gũ Yesu Krista kyà Matigi barika hõ.

¹ Mɛ tĩyã yera. Mɛ tɛ Kristayi na, mɛ ha dye ga. Ni na kìnìyi tanga mɛ kɔrɔ hõ, ngwõ ne syere ngwona da na ye ye tĩyã. ² Mɛ ni na bã, mɛ kɔrɔ mɔgɔ sanga pepe ma. ³ Mɛ yɛrɛ mane na dyã Wuro ne voda hõ dɛ̀gɛ̀ Krista na ne syenɔmane yena. Ngwõ kɔrɔ mɛ yɛrɛ ta si. ⁴ Yewɔ ngwõ Israyɛli timi kɔma. Wuro mane ye ta ye nɔmane na hõ ye yɛrɛ ta da na yiregwagayi dɔrɔ ye ma. A mane datege ngwĩye bi ye ma, a ngwõwɔ dopaga. A tõ pere ye ma kɔ yirebɛbe na syɛbɛyi. A ya fane yera ye ma mɛ. ⁵ Ye tɛ gweretamɛ na yireyireye timi kɔma na, Krista yɛrɛ mane tɛ ye ta si sõ na mɛ. Ke pepe hõ Wuro yirebɛ fɔ abada, awe ngwĩ ti fere pepe ngwõ̀ na. Amina. ⁶ A ha tɛ wɔkara Wuro ha ya bɛrɛda dopaga ga. Israyɛli kɔma pepe ha Israyɛli kɔma na syɛbɛye ga. ⁷ Ibrahima timi kɔma pepe tɛ a nɔmane na syɛbɛye na ga. Wuro mane yera Ibrahima ma da Isaka timi kɔma dama, ngwõwɔ na wiri aweye. ⁸ Ngwõ kɔrɔ komavere na vɔrɔ nɔmane pepe ha Wuro nɔmane ga. Wuro ngwĩye dyati Ibrahima timi kɔma na syɛbɛye, ngwõ ngwõwɔ ngwĩye ngwõ vɔrɔ hõ kanya kɔ Wuro ta datege nemɛ. ⁹ Bo Wuro ta datege na bɛrɛda, ye: Dɔ za ma na na, bo wakati nemɛ ma. Sara na nonanimisĩ vɔrɔ. ¹⁰ A ngwõ dama ga. Ke bema Isaka mane Rebeka nɔmane sɔma pɔla tõ. ¹¹ - ¹² Sane Rebeka hõ ye nɔmane pɔla vɔrɔ, Wuro mane pya yera a ma ye vɔ na bara ta ye pu ma. A ngwõ yera ngwõfatɔ a da ngwĩ latege ne wɛ, a hõ ngwona nimisalo dɛ̀gɛ̀ hõ kanya kɔ ngwõ nemɛ. Ngwona nimisalo ha mane dayaga wala dafɔre ta dɛ̃ ga. Ngwõ a dɔrɔ da Wuro ngwõ dɛ̀gɛ̀ hõ kanya kɔ a ta wiribe nemɛ, ngwõ ha tɛ ye ta tɛda na bo yena ga. ¹³ Wɔkara a sɛbɛɛ Wuro ta bɛrɛda hõ da: Mɛ Yakuba kanu hõ Esau mayaga. ¹⁴ Ngwono ke na ngwõ yera hã? Wuro ha tele ga ra? Aworɛ. ¹⁵ A mane yera Musa ma ye ye tyata makare ngwĩ na, ye na makare ngwõ na. Ye ye tyata sena ngwĩ na, ye na sena ngwõ na. ¹⁶ Ngwõ yena Wuro ha sõ dɛ̀gɛ̀ hõ kanya kɔ sõ ta da nemɛ, a ngwĩ ta wala a ngwĩ ta ga. Nka Wuro makare ngwĩ sõ na, a ngwõ dɛ̀gɛ̀. ¹⁷ Wuro ta bɛrɛda na syɛbɛye da Faro ma, ye Wuro a tumabɛ ngwona da yena ngwõfatɔ a hõ ya sebɛbe dɔrɔ Faro ta da na kɔ ngwõfatɔ a togo hõ sa diniya bi pepe hõ. ¹⁸ Ngwo yena Wuro tyata makare ngwĩ na, a makare ngwõ na. A tyata ngwĩ ta mɔmagata na, a ngwõ ta mɔmagata na. ¹⁹ Ka na sõ bo na da ne a hõ ma yee, ngwonona Wuro bɛri ke ma? Kɔ ngwõ sebɛne maga a dungo na? ²⁰ E, nomo, bi kɔ mɔ hõ ne Wuro dakwiyɛ? Yera wa, su na ye na nyɛta tɔga ra, ye ngwonona a ye nyɛ yee? ²¹ Syanyɛta sebɛne ye yɛrɛ dungo ta kɔ laa nemɛ. A sebɛne laa bo bi hõ sya pɔla nyɛ kɔ ngwõ nemɛ. A tala ta su na fɔroyi na hõ tala ta syoro na. ²² A tɛ yee nemɛ Wuro ta piri ma na mɛ. A mane tyata ya worababe kɔ ya fanga dɔrɔ. Nka sɔma ngwĩye mane tɛ wɔkara sya ngwĩye daga kɔ yagabe kɔ Wuro ta worababe nemɛ, a ngwõwɔ ta da somɔna. ²³ Wuro mane makare ke ngwĩye na, a mane tyata ya noro na yireyi dɔrɔ ke ma mɛ. A mane pya ke tetɛrɛ ngwõfatɔ a hõ ngwona noro dɛ ke ma. ²⁴ Ke kwane, Wuro ke ngwĩye wiri, ke pepe ha sa Yahutu kɔma woro hõ ga, fɔ si sɔma woro hõ mɛ. ²⁵ Wuro mana yera Ose kitabu hõ da: Ngwĩye ha mane mya si sɔma ga, ma na ngwõwɔ wiri na si sɔma. Mɛ ha mane si sɔma ngwĩye kanu ga, ma na ngwõwɔ wiri na kanuye. ²⁶ Wuro mane pya ne yera ye ma ngwõ ngwɛ̃ da ye ha tɛ awe ta si sɔma na ga, ngwona ngwɛ̃ mɛ ye na wiri da Wuro na suguyi nɔmane. ²⁷ Esayi a yera Israyɛli kɔma ta piri ma na da: Hale ne Israyɛli kɔma hõ nyaa wɔkara nyengezu do ma bãyege, ye na sɔma nyaa ha na kisi ga. ²⁸ Zɔgɔta Wuro na kiti sɔ diniya kɔma pepe ma. A na ngwõ ta sale. ²⁹ Wɔkara Esayi pya ne yera ngwɛne, da: Ne kũ ngwonate Matigi ma mane kyà si na timi kɔma bɔ tege ga, ke mane na tɛ wɔkara Sodome kɔ Gomore. ³⁰ Aiwa, ke da si sɔma ha mane fui ta hõ tɛ sɔma tele na Wuro zĩ hõ ga, nka ye ta lanabɛbe yena Wuro ye ta sɔma tele na. ³¹ Israyɛli kɔma kwane, mane tõ bo kya ngwĩ ngwõ na tĩyã pere ye ma, ye ha a gũ ga. ³² Ngwonona? Kamasɔrɔ ye dafɔre ta ngwõfatɔ ye hõ tĩyã gũ, ye ha lanabɛbe na syɛbɛyi ta ga. Ngwõ yena ye dũ ngwona dɔgɔno hõ. ³³ A sɛbɛɛ Wuro ta bɛrɛda hõ ngwona dɔgɔno ta da na, ye: Segere, mɛ na kã dũ dɔgɔno tege Siyõ kuru kɔrɔ hõ. A na tɛ dɔgɔno gwaga na ngwĩ na sɔma ta ye dũ bɛrɛ. Ngwĩ hõ la ngwõ na, ngwona te ha na piri ga.

¹ Syenɔmane, mɛ Wuro mɛ Israyɛli kɔma ta da na. Mɛ mako ti a na fɔrona ye hõ kisi. ² Ye ye nyanga fɔrona Wuro kyabe na—mɛ yɛre ye syere ngwona da na. Nka ye bara ta Wuro ma kɔ datɔbariyabe nemɛ. ³ Wuro sɔma ta sɔma tele na ngwɛne, ye ha ngwõ tɔ̀ ga. Ye tɛno kya ngwõfatɔ ye hõ tĩyã gũ, nka ye ha ye yɛrɛ pere Wuro ma, a hõ ne ta sɔma tele na ga. ⁴ Krista mane Musa ta tõ ta fanga wɛ. Sɔma pepe ngwĩye lanabɛbe ta, Wuro ngwõwɔ ta sɔma tele na. ⁵ Sõ ngwĩ hõ mɔ tõ ta hõ tele Wuro nyono na yee, Musa mane bɛrɛda bɔ sɛbɛ ngwona da na. A da: Sõ ngwĩ kwa tõ ta fane ma ne ta, ngwona te na sugu. ⁶ Sõ ngwĩ tyata tele Wuro zĩ hõ lanabɛbe barika hõ, bɛrɛda ngwĩye sɛbɛɛ Wuro ta bɛrɛda hõ ngwõ ta da na, ngwõ bɔ: Kada be be yɛrɛ tɔga da kɔ na ba hõ ya wiri wuro hõ. Ngwõ kɔrɔ hõ Krista zibɛ. ⁷ Kada be tɔga mɛ da, kɔ na zi wara hõ. Ngwõ kɔrɔ hõ Krista ngwini na sabɛ sara woro hõ. ⁸ Aiwa, ngwono a ngwõ yera? A da: Wuro ta bɛrɛda vetira be na, a ti be do na kɔ be kɔrɔ hõ. Ngwõ kɔrɔ, ke wadyuli ta da ngwĩ na, ngwõ lanabɛbe. ⁹ Ne be ne taa ye na da Yesu ngwõ Matigi hõ la a na be kɔrɔ hõ mɛ da Wuro a ngwini na sabɛ sara woro hõ, be na kisi. ¹⁰ Wuro sõ ta sõ tele na lanabɛbe yena ngwĩ ti a kɔrɔ hõ. A sõ kisi ngwĩ taa ngwona lanabɛbe na, na yera. ¹¹ Wɔkara a sɛbɛɛ Wuro ta bɛrɛda hõ, da: Sõ ngwĩ pepe hõ la a na, ngwona te ha na piri fyu ga. ¹² Dɛ̀gɛ̀do si ha ti Yahutu kɔma kɔ si sɔma yɔ ga. Matigi sonala legelege ngwõ ti ye pepe ngwõ̀ na. Ngwĩye ngwõ a togo wiri, a fere nyaa pere ngwõwɔ pepe ma. ¹³ Wɔkara a sɛbɛɛ Wuro ta bɛrɛda hõ, ye: Ngwĩ sõ pepe hõ Matigi togo wiri, ngwõ na kisi. ¹⁴ Sɔma ha la ngwĩ na ga, ne ye na tɛ hõ ngwõ togo wiri? Sɔma ha ngwĩ ta da mɔ ga, ne na ye na la ngwõ na? Ne na ye na ngwona da mɔ ne wadyulitɛta ma tye ne yera ye ma ga? ¹⁵ Ne na ye na wadyuli ta ne sɔma ma ye fane ga? Wɔkara a sɛbɛɛ Wuro ta bɛrɛda hõ, da: Ngwĩye ngwõ na kɔ Bɛrɛda Fɔre nemɛ, ngwõwɔ ta na dya rɛ. ¹⁶ Nka sɔma pepe ha la Bɛrɛda Fɔre na ga. Esayi mane da: Matigi kɔ ngwõ la myà bɛrɛda na? ¹⁷ Bɔ wadyuli ta Krista ta da na, sɔma ngwõ mɔ. Sɔma ngwona da mɔ dɛ̃ hõ lanabɛbe ta. ¹⁸ Mɛ ka tɔga, Israyɛli kɔma mane ngwona da mɔ ga ra? Õhõ, ye ngwõ mɔ. Wɔkara a sɛbɛɛ Wuro ta bɛrɛda hõ, ye: Bɛri kõ sa ya lagakõ bi pepetai hõ. Ye ta bɛrɛda wiri diniya tege pepe ma. ¹⁹ Mɛ ka tɔga yɛ mɛ, Israyɛli kɔma ngwona da tɔ̀ ga ra? Musa yɛrɛ mane pya Wuro ta bɛrɛda sɛbɛ hõ da: Ngwi ngwõ si sɔma ga, ye ye na ngwõwɔ na kereyabe ka ye hõ. Ye ye na ye wora babɛ si sɔma na kakiridarakɔma ta. ²⁰ Wuro mane bɛrɛda ngwĩye yera Esayi ma, ngwõwɔ sigeye bɔ bɛrɛda ma. A da: Ngwĩye ngwõ mane mɛ kya ga, ngwõ mɛ za. Ye ngwĩye mane tɔga mya da na ga, mɛ ne yɛrɛ dɔrɔ ngwõwɔ ma. ²¹ Nka Wuro ye yera Israyɛli kɔma ta piri ma na, ye. Kɔ pepe ma ye ye sera sɔrɔ ngwona kwɛ̃fɛgɛbariyasɔma ma ngwĩye ngwõ da pepe dakwiyɛ.

¹ Mɛ ka tɔga, Wuro ya sɔma dira ra? Aworɛ. Mɛ yɛrɛ Israyɛli sõ bo. Mɛ Ibrahima timi sõ kɔ Bɛ̃zamɛ̃ ta si sõ bo. ² Wuro ya sɔma ngwĩye dɛ̀gɛ̀ gweregwerena, a ba ngwõwɔ dira ga. Wuro ta bɛrɛda fa ngwĩ yera Eli ta da na, ka ngwõ tɔ̀ ga ra? A mane Wuro mɛ Israyɛli kɔma yena hõ da. ³ Matigi, ye bya purusɔma yɛ hõ bya salaka wɛ do yaga. Mɛ sonala wɔ yɛ, ye tyata mɛ yɛ mɛ. ⁴ Ngwono Wuro ngwõ yera a ma? A da ye sɔma sana kopɔra tege ye yɛrɛ ma, ngwõwɔ na sõ si ha yolingo Bal we ga. ⁵ A ti yee nemɛ basyɛ mɛ. Wuro sɔma ngwĩye dɛ̀gɛ̀ hõ kanya kɔ a ta nema nemɛ, ngwõwɔ na bɔ tye. ⁶ Wuro sɔma dɛ̀gɛ̀ hõ kanya kɔ ye yɛrɛ ta nema nemɛ, a ha ye dɛ̀gɛ̀ hõ kanya kɔ ye ta tɛda nemɛ ga. Ne Wuro hõ sɔma dɛ̀gɛ̀ hõ kanya kɔ ye ta tɛda nemɛ, ngwona sanga ma a ta nema ha na tɛ nema syɛbɛ na titiri ga. ⁷ Ne ye ti hã? Israyɛli kɔma mane fa ngwĩ kya, ye ngwõ gũ ga. Wuro sɔma ngwĩye dɛ̀gɛ̀, ngwõ a gũ. Bɔ sɛrɛ ye nyena pĩ ngwona tĩya ta piri ma na. ⁸ Wɔkara a sɛbɛɛ Wuro ta bɛrɛda hõ da: Wuro ye kakiri da gwolo. Fɔ ya wiri sɔma ma, Wuro ye nyena pĩ, ye ha zɛ ga. A ye ta dungɔrɛ na, ye ha mɔ ga. ⁹ Dauda da mɛ: Ye ta zõ do hõ tɛ wɔkara pɛrɛno wala gyã ngwĩ ngwõ ye fɔga, ye bɛrɛ hõ nyane yire gũ. ¹⁰ Wuro hõ ne nyena fobɛ, ye ka ne zɛ ga. Ye ta nyane hõ ne kori kwilɛbɛ. ¹¹ Aiwa, mɛ ka tɔga, Yahutuye dũ bɛrɛ melemele ra? Aworɛ. Ye ta firebe yena kisibe wiri si sɔma ma hõ ngwõwɔ na kereyabe ka Yahutuye hõ. ¹² Aiwa, Israyɛli kɔma ta firebe yena, ngwõ tɛ diniya kɔma hõ nafã na yireyi gũ. Ye ta fangadãbe ni ta piri ma na, ngwõ tɛ si sɔma hõ duba na yireyi gũ. Ne ye hõ dopaga ngwĩ sanga ma, ngwona duba na yireyi hõ yaloyi gwereyi ma fɔrona. ¹³ Mɛ tine bɛri ki si sɔma ta basyɛ. Mɛ Wuro ta faneta hõ ya sa si sɔma ma. Mɛ barika yera Wuro ma bo bara yee yena. ¹⁴ Dɔra mɛ na si sɔma na kereyabe ka ne yɛrɛ ta si hõ, hõ kisibe wirebɛ ye na bɔ ma yee nemɛ si. ¹⁵ Wuro maga ye hõ ngwĩ sanga ma, diniya kɔma kɔ Wuro yɔfa mane bɛ̃. Wuro hõ dyã ye ma ngwĩ sanga ma, a na tɛ wɔkara sara ngwõ bere ngwini hõ tɛ sɔma sugi na. ¹⁶ Ne sõ hõ dugo milelu tala pere Wuro ma, dugo sɛrɛ pepe Wuroye. Ne sõ hõ sɔno sile pere Wuro ma, ngwona sɔno kala pepe Wuroye mɛ. ¹⁷ Israyɛli kɔma tɛ wɔkara oliviye sɔno, sɔma ngwĩ baga. A na kala na bɔ yɔɔ. Kibe sɔno na sɔkalo bo malo ngwona oliviye sɔno ma. Ki si sɔma tɛ wɔkara ngwona kibe sɔno. Ka malo ngwona oliviye sɔno ma hõ tɛ wɔkara Israyɛli kɔma hõ fanga gũ ni ta piri ma na hõ sa ngwõwɔ ta. ¹⁸ Sɔma ngwĩye tɛ wɔkara kala ngwĩye ngwõ yɔɔ wɛ ngwona sɔno ma, ka ha daga sĩ ngwõwɔ na ga. Ne na ka sebɛne ka yɛrɛ yirebɛ? A ha ki ngwõ sile ga. Ki sɔkala dama, sile ngwõ ngwõ ka sugubɛ. ¹⁹ Ki na da hã, ye ngwona kala yɔɔ wɛ ngwõfatɔ ki hõ malo ngwona sɔno ma. ²⁰ Ngwõ tĩyã. Ye ha lanabɛbe ta ga, ngwõ yena ye yɔɔ. Ki kwane lanabɛbe ta hõ wɔ yɛ. Ka kada ka ka yɛrɛ yirebɛ ngwõ na ga. Ka daga kwã. ²¹ Ne Wuro ma sena oliviye kala na ga, a na sena ki na ra? ²² Ke Wuro ta foro kɔ a ta tino sige za. Sɔma ngwĩye ngwõ bɛrɛ, a ta da sige ngwõwɔ ta piri ma na. Ki ngwĩye wɔ a ta foro hõ, a dafɔre ta ka ma. Ne ngwõ ma tɛ ga, ki na zaro mɛ. ²³ Ne Israyɛli kɔma ma wɔ ye ta lanabɛbariyabe hõ ga, ye na malo ye yɛrɛ du ma yɛ. Wuro sebɛne ngwõ ta. ²⁴ Ki si sɔma kwane, a tɛ wɔkara Wuro ka yɔ hõ ka wa kibe sɔno ma hõ ka malo ohviye sɔno ma. Ngwõ da ngwĩ ha sebɛne tɛ ne a ma Wuro ngwõ ngwõ ta ga. Yahutuye tɛ wɔkara ngwona oliviye sɔno. Ye na kala ngwĩye yɔɔ, Wuro sebɛne ngwõwɔ malo ye na sɔno ma yɛ. Ngwona da ha tɛ ba ga. ²⁵ Syenɔmane, mɛ tyata ka hõ bo bunu da tɔ̀ ngwõfatɔ ka ka na ka yɛrɛ dyati kakirikɔma ga. Ngwona bunu da ngwõ bo—lsrayɛli kɔma na tɛ mɔmagasɔma na fɔ si sɔma do hõ paga ngwĩye na la Wuro na. ²⁶ Yee nemɛ Israyɛli kɔma na kisi wɔkara a sɛbɛɛ Wuro ta bɛrɛda hõ da: Kisita na tuma hõ sa Siyõ kuru hõ. A na Yahutu timi kɔma ta dayaga wa yɛ. ²⁷ Ngwõ Wuro ta datege a ngwĩ bi ye ma, a hõ ne ta kakye bi ne wa yɛ ngwĩ sanga ma. ²⁸ Yahutuye maga Berɛda Fɔre hõ, ngwõ yena ye tɛ Wuro zugi na ke yena. Nka Wuro mane ye dɛ̀gɛ̀, ngwõ yena ye tɛ Wuro màre na ye tamɛ yena. ²⁹ Wuro sɔma ngwĩye wiri kɔ a perefere ngwĩye pere, a ha ye kɔrɔ bere ngwõwɔ na fyu ga. ³⁰ Ka ha mane pya Wuro kwɛ̃ fɔga ga. Nka basyɛ Wuro makare ka na Yahutuye ta kwɛ̃dirɛbe yena. ³¹ Yee nemɛ mɛ, yewɔ tɛ kwɛ̃direre na basyɛ ngwõfatɔ ye hõ Wuro ta makare gũ. Ki ngwona makare gũ ne wɛ. ³² Wuro sɔma pepe ta kaso nɔmane na ye ta kwɛ̃dirɛbe yena ngwõfatɔ a hõ makare ye pepe na. ³³ Wuro ta nafɔre nyaa hale. A kakirinyaate. A da pepe tɔ̀ fɔrona. A da ngwĩye latege, sõ ha sebɛne ngwõwɔ tɔ̀ ga. A da ngwĩye ta, kɔ ngwõ sebɛne ngwõwɔ famu? ³⁴ Wɔkara a sɛbɛɛ Wuro ta bɛrɛda hõ, da: Kɔ ngwõ Matigi ta miri tɔ̀? Kɔ ngwõ sebɛne da dɔrɔ a ma? ³⁵ Kɔ ngwõ fa pere Wuro ma, a hõ bere ngwõ berebɛ a ma? ³⁶ Ke tɔ̀ da fere pepe sa Wuro ta, fere pepe tye awe barika hõ. Fere pepe aweye. Noro hõ dɛ Wuro ma fɔ sanga tege ma. Amina.

¹ Ngwõ yena, syenɔmane, mɛ ka mɛ Wuro ta makare na yireyi yena, da ka ka yɛrɛ pere Wuro ma hõ tɛ wɔkara salaka na suguyi, ka hõ tegee Wuro ma. Ka da hõ dya a ma. Ngwõ yirebɛbe na syɛbɛyi. ² Diniya kɔma da ngwĩye ta, ka kada ka ngwõ nemɛ na da ta ga. Ka hõ dyã Wuro ma, a ka kɔrɔ berebɛ hõ ka kakiri ta ngwũyi na. Ngwona sanga ma ka na Wuro dungo pepe tɔ̀. Ngwõ kɔrɔ da ngwĩ fɔro ne dya Wuro ma ne dopaga, ka na ngwõ pepe tɔ̀. ³ Wuro ta nema yena a ngwĩ pere mɛ ma, ma yera ka pepe tala tala ma da ka ka ka yɛrɛ yirebɛ ya fɔno ga. Wuro lanabɛbe ngwĩ dini sɔma pepe tala tala ma, ka ka yɛrɛ dyati kɔ kakiri na tangayi nemɛ hõ kanya kɔ ngwõ nemɛ. ⁴ Fere nyaa ti sõ komavere tala ma, ye ta bara ha tala ga. ⁵ Yee nemɛ, ke nyaa nka ke kwe tɛ komavere tala na Krista hõ. Ke pepe tala tala nemɛ komavere na bo. ⁶ Aiwa, Wuro perefa ngwĩ pere sɔma pepe tala tala ma, ke daga bara ta kɔ ngwõ nemɛ. Ne Wuro hõ perefa pere hõ na ta fane yera, ke daga ngwõ ta hõ kanya kɔ kyà lanabɛbe nemɛ. ⁷ Ne a hõ ma bara, ke bara ta. Ngwĩye ngwõ sɔma kala, ngwõ wɔ sɔma kalabe hõ. ⁸ Ngwĩye ngwõ wadyuli ta, ngwõ hõ wadyuli ta fɔrona. Ngwĩ ngwõ perebe ta, ngwõ hõ ye sera kɔba. Ngwĩ ngwõ sɔma zĩ fɔga, a ye nyanga ngwõ hõ. Ngwĩ ngwõ makare sɔma na, a ngwõ ta kɔ nihõdyaro nemɛ. ⁹ Kyà kanube ka tɛ dapɔlabɛribe na ga. Ka dayaga koneya hõ ka nyanga dafɔretɛbe hõ. ¹⁰ Ka ka nemɛ kanu fɔrona wɔkara syenɔmane ye nemɛ kanu ngwɛne. Ka ka nyanga hõ ka nemɛ yirebɛ. ¹¹ Ka ka nyanga bara na, ka koma ka ba ga. Ka bara ta Matigi ma kɔ kɔrɔ na fɔroyi nemɛ. ¹² Kya zigi hõ ka ni hõ dyabɛ. Ka daga nyane somɔna hõ ka nyanga Wuro mɛbe na. ¹³ Ka ka nemɛ syeno ka kɔ ka sera hõ fere na bɔ nemɛ. Ka samara fɔga kya kwã hõ. ¹⁴ Ngwĩye ngwõ ka nyane, ka Wuro mɛ da a duba ngwõwɔ ma, a ka ye voda ga. ¹⁵ Ka kwe ni hõ dya kɔ nihõdyasɔma nemɛ. Sɔma ngwĩye ngwõ mɔgɔ, ka kwe mɔgɔ kɔ ngwõwɔ nemɛ. ¹⁶ Ka ka kɔrɔ kwe na ta tala. Ka ka ka yɛrɛ yirebɛ ga nka ka dyã bara mɛngɛ ta. Ka ka ka yɛrɛ dyati kakirikɔma ga. ¹⁷ Ne sõ bo ne be kakye bi, kada be a kakye bi mɛ ga. Sɔma da ngwĩye dyati da na fɔroye, ka ka nyanga hõ ngwõ ta. ¹⁸ Ka kya sebɛbe pepe ta, syara hõ wɔ ki kɔ sɔma pepe yɔ. ¹⁹ Mɛ màre ka ka ka yɛrɛ mone wa ga. Ka bi hõ pere Wuro ta worababe ma. Wɔkara a sɛbɛɛ Wuro ta bɛrɛda hõ, da: Wuro na ye mone wa sɔma hõ. Matigi da ye na sɔma sara. ²⁰ Wuro ta bɛrɛda da mɛ: Ne wu hõ ti be zugu na, be zõfa pera ma. Ne mulu hõ ne ti a na, be zo pera ma. Ne be hõ ne ngwõ ta, a na tɛ wɔkara be toga dɛnɔma dɛ a ngwõ̀ hõ. ²¹ Ka dyã zugube hõ sebɛbe gũ be ma ga. Be yɛrɛ hõ sebɛbe gũ zugube ma kɔ dafɔre nemɛ.

¹ Sɔma pepe daga mɔ fangamɛ ta. Fanga si ha tye, ne Wuro ma dyã ngwõ ma ga. Fangamɛ ngwĩye ngwõ tye, Wuro ngwõwɔ tege. ² Yee nemɛ, sõ ngwĩ ha dyã mɔ fangamɛ ta ga, ngwõ ha dyã mɔ Wuro ta da na lategeye na ga. Sõ ngwĩ ngwõ ta, ngwõ kiti bɛrɛbɛ ye yɛrɛ ma. ³ Dafɔretɛsɔma ha daga kwã fangamɛ na ga fɔ dayagatɛsɔma. Be ha tyata kwã fangama na ga ra? Aiwa, be dafɔre ta. Ngwona sanga ma fangama na be yirebɛ. ⁴ Fangama tɛ Wuro ta baratɛta na hõ dafɔre ta be ma. Nka ne be hõ ne dayaga ta, be daga kwã rɛ, kamasɔrɔ fanga ha ti a ta zana ga. A Wuro ta baratɛta. A Wuro mone wa dayagatɛsɔma hõ. ⁵ Ngwõ yena ka daga mɔ fangamɛ ta. Ka ngwõ ta kɔ kɔrɔ na fɔroyi nemɛ. A ka tɛ nyane na kũ̀ dama yena ga. ⁶ Fangamɛ ngwõ Wuro ta bara ta hõ ye yɛrɛ pere ngwõ ma. Ngwõ yena ka daga lãpo sara. ⁷ Aiwa, sɔma pepe daga gwana ngwĩ pere, ye ngwõ pere ye ma. Lãpo pepe ngwĩye daga sara, ye ngwõwɔ pepe sara. Be daga kwã ngwĩ na, be kwã ngwõ na. Be daga ngwĩ yirebɛ, be ngwõ yirebɛ. ⁸ Sõ si ta ku ka wɔ ka na ga fɔ nemɛ kanube na ku. Ngwĩ ye nemɛ sõ kanu, ngwõ tõ dopaga. ⁹ Wuro mane fane ngwĩye yera, ye: Be ka kakalabe ta ga, ye Be ka sõ yɛ ga, ye Be ka fa kimi ga, ye Be nyono ka sa fa na ga, ngwona fane pepe kɔ fane sɛrɛ pepe, ngwõwɔ pepe na kweye zɔlɔ bo ma, ye: Be be nemɛ sõ kanu wɔkara be yɛrɛ. ¹⁰ Ne be ne sõ kanu, be ha na dayaga ta a na ga. Ngwõ yena kanube ngwõ tõ na dopagayi. ¹¹ Ka daga ngwõ ta kamasɔrɔ ka bo watati tɔ̀. Ngwini wakati wiri hõ tuma nyi hõ. Ke pya lanabɛbe ta ngwĩ sanga ma kyà kisibe vetirayi basyɛ hõ yaloyi ngwona sanga ma ma. ¹² Wuru na nyaayi fɔno, kɔ kyɛ sanga vetira. Ngwõ yena ke daga tunungu na tɛda dira hõ kũ kwini fere bi ngwõfatɔ ke hõ kũ kwini kini na. ¹³ Kyà yano daga ne tele wɔkara sɔma ngwĩye ngwõ ya kini na. Ke ka kwĩ mɛnɛ nyingi ga. Ke ka kakalabe ta ga. Ke ka birisi ta ga. Sõ na kereyabe ka kwɔ ke hõ ga. ¹⁴ Ka Matigi Yesu Krista ka ka hõ wɔkara ka zogo ka ngwɛne. Ka ka dyã komavere na da kɔ a na wu ma ga.

¹ Sõ ngwĩ ta lanabɛbe ngwõ dɛgɛ, ka ngwõ fɔga fɔrona. Ka ka dakwiyɛro ta kɔ le a ta yera da na ga. ² Bõ sõ la a na da ye sebɛne zõfere pepe zõ. Zayi ta lanabɛbe barika dɛgɛ, a sõ fere dama zõ. ³ Ngwĩ ngwõ zõfere pepe zõ, ngwõ ka ngwona sõ za zarake mɛ ga ngwĩ zõfere pepe zõ kamasɔrɔ Wuro ngwõ dyã a ma. ⁴ Bi kɔ mɔ hõ ne sõ za ta baratɛta zarake? A taa o, a bɛrɛ o, ngwõ a yɛrɛ ngwonate ta da. Sebɛbe ti Matigi ta na taabɛ, ngwõ yena a na taa. ⁵ Bɔ sɔma bo kɔ yirebɛ hõ yaloyi kɔ sɛrɛ ma. Bo sõ za da ye kɔyi pepe tala. Sɔma pepe tala tala daga kìnì ngwona da na ye yɛrɛ kɔrɔ hõ. ⁶ Ngwĩ ngwõ kɔ bo yirebɛ, a ngwõ ta hõ Matigi yirebɛ. Ngwĩ ngwõ zõfere pepe zõ, a ngwõ ta hõ Matigi yirebɛ hõ barika yera Wuro ma ngwona zõfa yena. Ngwĩ ngwõ zõfere pepe zõ ga, a ngwõ ta hõ Wuro yirebɛ. A barika yera Wuro ma mɛ. ⁷ Ke na sõ si ha sugu ke yɛrɛ ma ga. Ke na sõ si ma bere ne siri ke yɛrɛ ma mɛ ga. ⁸ Ne ke hõ ne sugu, ke sugu Matigi ta. Ne ke hõ siri, ke siri Matigi ta. Ke sugu yo, ke siri yo, ke tɛ Matigiye na. ⁹ Krista mane siri hõ ngwini ngwõfatɔ a hõ tanga sɔma sugi kɔ sara ngwõ̀ na. ¹⁰ Bi kwane, ngwonona be be syeno zarake? Bi mɛ, ngwonona be sĩ be syeno na? Ke pepe na taa Wuro zĩ hõ a ta kiti sɔ do hõ. ¹¹ Wɔkara a sɛbɛɛ Wuro ta bɛrɛda hõ, ye: Matigi da, mɛ sugu. Sɔma pepe na yolingo ne we. Sɔma pepe na Wuro yirebɛ. ¹² Ke pepe tala tala na ke yɛrɛ ta da yera Wuro zĩ hõ. ¹³ Ke na sõ si ka nemɛ zarake titiri ga. Nka ka hõ bo da latege da sõ si ka fa ta ngwĩ ngwõ tɛ a syeno hõ dũ bɛrɛ dayagatɛbe hõ ga. ¹⁴ Mɛ ngwõ tɔ̀ ngwõ kìnì Matigi Yesu barika hõ, da fa si ha dõõ ye yɛrɛ ma ga nka ngwĩ ngwõ fa dyati fa na dõoyi, ngwona fa dõõ ngwona te ta. ¹⁵ Ne be hõ zõfa bo zõ ngwĩ ngwõ be syeno ni na bã, be ha ti kanube na sogo ma titiri ga. Krista siri ngwona sõ yena, be ka zõfa bo zõ ngwĩ ngwõ na a ngwonayaga ga. ¹⁶ Bya dafɔre ka bere tɛ dayaga na ga. ¹⁷ Wuro ngwonakɔmabe ngwĩ ta ke kɔrɔ hõ, ngwõ ha zõ da kɔ mɛnɛ da ga. A ngwonakɔmabe ta kɔ telebe kɔ woramakwɔnabe kɔ nihõdyaro nemɛ Ni na kìnìyi barika hõ. ¹⁸ Ne sõ hõ bara ta Krista ma yee nemɛ si, a da dya Wuro ma. A toga fɔro gũ sɔma ta mɛ. ¹⁹ Ngwõ yena ke daga ke nyanga hõ syara na da kya ane hõ bɔ da ta ngwĩye ngwõ fanga pere ke nemɛ ma. ²⁰ Ka Wuro ta bara yaga zõfa yena ga. Sõ sebɛne zõfere pepe zõ, ngwõ tĩyã. Nka ne sõ ta zõfa ne sõ za ka dayaga hõ, ngwona zõfa zõfa na yagayi ngwona sanga ma. ²¹ Be daga ngwĩ fa ta, be ka kika nɔma ga, be ka kwĩ mɛnɛ ga, be ka da si ta ngwĩ ngwõ be syeno ta a bɛrɛ ga. ²² Be yɛrɛ fa ngwĩ dyati ngwona da na, be ngwõ tɔ̀ be yɛrɛ kɔrɔ hõ, ngwona da ti bi kɔ Wuro yɔ. Sõ fa pepe ngwĩ dyati fa na fɔroyi, ne a ma ye yɛrɛ zarake ngwõ na ga, a ni hõ dya. ²³ Nka ngwĩ ngwõ zõ ne sigasiga, Wuro a zarake ngwõ na kamasɔrɔ a ha ngwõ ta kɔ lanabɛbe nemɛ ga. Da pepe ngwĩ ngwõ tɛ kɔ lanabɛbe nemɛ ga, ngwõ kakye.

¹ Ke ngwĩye barika ngwõ yire lanabɛbe ta piri ma na, ke daga barika dɛgɛre dyema. Ke ka ke yɛrɛ madyama da ta ga. ² Ke pepe tala tala hõ ke nemɛ sõ madyamabe ta hõ nafã pere ye ma ngwõ na ngwõfatɔ ke hõ ne ta lanabɛbe yirebɛ. ³ Krista ha mane ye yɛrɛ madyamabe ta ga. Wɔkara a sɛbɛɛ Wuro ta bɛrɛda hõ, da: Sɔma ngwĩye ka vini, ngwõ mɛ vini mɛ. ⁴ Da pepe ngwĩye sɛbɛɛ Wuro ta bɛrɛda hõ, ngwõwɔ sɛbɛɛ hõ ke kala ngwõfatɔ ke hõ zigi gũ somɔnabe kɔ Wuro ta bɛrɛda ta ladibe barika hõ. ⁵ Wuro ngwĩ ngwõ somɔnabe kɔ ladibe pere ke ma, ngwõ hõ ka dyema hõ ka kɔrɔ kwe ne ta tala ka nemɛ ta piri ma na. Yesu Krista yɛrɛ mane ngwona sogo dɔrɔ ka ma. ⁶ Ka ngwõ ta ngwõfatɔ ka pepe hõ kwe kyà Matigi Yesu Krista Tõ Wuro yirebɛ kɔ kwɛ̃ tala nemɛ. ⁷ Ngwõ yena ka ka nemɛ fɔga fɔrona wɔkara Krista ka fɔga ngwɛne ngwõfatɔ sɔma hõ Wuro yirebɛ. ⁸ Mɛ yera ka ma da Krista mane bara ta Yahutu kɔma ma hõ na dɔrɔ ye ma da Wuro saratipaga. A datege ngwĩye bi ke bemae ma, a na ngwõwɔ dopaga. ⁹ A mane tyata si sɔma hõ Wuro yirebɛ mɛ a ta makare yena. Wɔkara a sɛbɛɛ Wuro ta bɛrɛda hõ da: Ngwõ yena mɛ na be yirebɛ si sɔma woro hõ, hõ yirebɛ turo sõ be ma. ¹⁰ A da mɛ, ye: Si sɔma daga kwe ni hõ dya kɔ Wuro ta sɔma nemɛ. ¹¹ A da mɛ, ye: Si sɔma pepe hõ Matigi yirebɛ. Sɔma pepe hõ na yirebɛ. ¹² Esayi a yera mɛ da, ye: Isayi timi sõ na na. Ngwõ na na hõ tanga si sɔma ngwõ̀ na. Si sɔma na ye zigi dɛ ngwona te ma. ¹³ Zigituguta Wuro hõ nihõdyaro kɔ syara ka ka kɔrɔ hõ kya lanabɛbe barika hõ ngwõfatɔ kya zigi hõ yire fɔrona Ni na kìnìyi ta sebɛbe barika hõ. ¹⁴ Mɛ syenɔmane kya piri ma na, mɛ yɛrɛ tɔ̀ da ka fɔro, da ka da pepe tɔ̀, da ka sebɛne ka nemɛ kala mɛ. ¹⁵ - ¹⁶ Mɛ mane ne wora sige hõ da bɔ yera ka ma bo sɛbɛ hõ, hõ ka kakiri dige ngwona da na. Wuro bara fɔre pere mɛ ma hõ tɛ faneta na si sɔma ma. Ngwõ yena mɛ ne woro sige ngwona da na. Mɛ bara ta wɔkara salakawɛta hõ Wuro ta Bɛrɛda Fɔre yera ngwõfatɔ si sɔma hõ tɛ wɔkara salaka na fɔroyi Wuro ma. Ye tegee Wuro ma Ni na kìnìyi barika hõ. ¹⁷ Mɛ kwe kɔ Krista nemɛ hõ ne yɛrɛ yirebɛ na bara na, ma ngwĩ ta Wuro ma. ¹⁸ Krista mɛ dyema ngwɛne hõ si sɔma zĩ fɔga hõ mɔ Wuro ta, mɛ na ne woro sige hõ bɛri ngwõ ta da na dama. Krista ngwõ ta bɛrɛda kɔ tɛda barika hõ. ¹⁹ A ngwõ ta tagamasɛ̃ kɔ da yee kɔ Ni na kìnìyi barika hõ mɛ. Na dofɔga Zerusalem kuru hõ fɔ ya wiri Iliri gana hõ, mɛ yara ne Krista na Bɛrɛda Fɔre pepe yera. ²⁰ Sõ ha Krista togo yera ngwõ ngwɛ̃ dɛ̃ ga, a dya mɛ ma fɔrona hõ ya Bɛrɛda Fɔre yera ngwɛ̃ ngwõfatɔ a ka tɛ wɔkara sõ za ngwõ kõ du ka, mɛ ne kõ tɔgɔ ngwona kõ du ma ga. ²¹ Wɔkara a sɛbɛɛ Wuro ta bɛrɛda hõ da: Sɔma ha a ta da yera ngwĩye ma ga, ngwõwɔ na zɛ. Ngwĩye ngwõ Krista togo mɔ ga, ngwõwɔ na ngwona da tɔ̀. ²² Sanga nyaa ma bo fa mɛ bare hõ ya sa ka ma. ²³ Mɛ na bara pepe wɛ bo gana hõ bɛ basyɛ. Bo ngwõ dɔgɔ nyaa basyɛ mɛ tyata ya sa ka ma. ²⁴ Ngwõ yena ma hõ ya Esepanyɛ gana hõ ngwĩ sanga ma, mɛ tyata do ka birɛ dɛ̃. Ne ma hõ wakati zɔgɔta ta ka birɛ, ka sebɛne ne dyema hõ ne yee ma ya Esepanyɛ gana hõ. ²⁵ Basyɛ kwane mɛ na ya Zerusalem hõ bara bo ta Wuro ta sɔma ma ngwɛ̃. ²⁶ Masadwane kɔma kɔ Akayi kɔma a latege da ye na gwana bɔ kwe ne pere Wuro ta sɔma na fangadãye ma ngwĩye ti Zerusalem. ²⁷ Ye ngwona da latege ye yɛrɛ ma, nka ngwona fangadãe ta ku ti ye na mɛ. Ne si sɔma hõ kwe tɛ nemɛkwere na kɔ Yahutu kɔma nemɛ Wuro sogo ya da na, ye daga ne dyema mɛ kɔ ye yɛrɛ sera hõ fere nemɛ. ²⁸ Ma hõ na ngwona bara wɛ hõ ngwona perefere wiribɛ ye ma, ma na do ka birɛ hõ ya Esepanyɛ gana hõ. ²⁹ Mɛ tɔ̀ da ma hõ ya wiri ka birɛ ngwɛ̃, ma nawiri yɛ kɔ Krista ta duba na dopagayi nemɛ. ³⁰ Syenɔmane, mɛ ka mɛ kyà Matigi Yesu Krista yena kɔ ngwona kanube yena Ni na kìnìyi ngwĩ pere ke ma, ka ka nyanga hõ ne dyema kɔ kya Wuro mɛbe nemɛ mɛ yɛrɛ ta piri ma na, ngwõfatɔ ma hõ dɛɛ Zude gana hõ lanabɛbariya sɔma ta. ³¹ Ka Wuro mɛ mɛ ma da ma na bara ngwĩ ta Zerusalem, ngwõ hõ dya Wuro ta sɔma ma ngwɛ̃. ³² Yee nemɛ, mɛ na wiri ka birɛ kɔ nihõdyaro nemɛ hõ makwɔnabɛ ka birɛ ngwɛ̃ ne ngwõ hõ tɛ Wuro dungo na. ³³ Syaranate Wuro hõ wɔ ka pepe tala tala ta. Amina.

¹ Mɛ ke syenɔma yà Fɛbɛ toga fɔro yera ka ma. Awe bara ta Sãkire ta eglise hõ. ² Ka a fɔga fɔrona Matigi togo yena, wɔkara Wuro ta sɔma daga ne ta ngwɛne. A mako ti fa pepe ngwĩ na, ka a dyema kɔ ngwõ nemɛ. Awe sɔma nyaa dyema, a mɛ yɛrɛ dyema mɛ. ³ Ka bire Pirisye kɔ Akila na. Ngwõwɔ kwe bara ta kɔ mɛ nemɛ Yesu Krista ma. ⁴ Ye mane tyata ye yɛrɛ ne pere mɛ yena. A ha mɛ sonala ngwõ barika yera ye ma ga. Si sɔma ta eglise pepe bire ye na mɛ. ⁵ Eglise kɔma ngwĩye ye nemɛ kwe ye ta kõ hõ, mɛ bire ngwõwɔ na mɛ. Ka bire Epayinete na, ngwõ pya la Krista na Asi gana hõ. ⁶ Ka bire Mariama na, ngwõ ngwĩ bara nyaa ta ka ma. ⁷ Ka bire Adironika na kɔ Zunia. Ngwõwɔ mɛ nemɛ Yahutuye mɛ, ke mane kwe ti kaso hõ. Yewɔ pya la Krista na mɛ ma. Ye toga sa fanene woro hõ mɛ. ⁸ Ka bire Apiliyasi na, ngwõ mɛ mà Matigi na. ⁹ Ka bire Uribe na, ngwõ ke baratɛkweta Krista ta bara na. Ka bire Satasis na mɛ, a da dya mɛ ma. ¹⁰ Ka bire Apilesi na, ngwõ toga fɔro gũ Krista yena. Ka bire Aristabule ta kõ kɔma na. ¹¹ Ka bire na kõ sõ Herodio na. Nasise ta kõ kɔma ngwĩye ngwõ la Matigi na, ka bire ngwõwɔ pepe na. ¹² Ka bire Tirifene kɔ Tirifese na. Ye bara ta Matigi ma. Ka bire ne mà Pereside na, ngwõ bara ta fɔrona Matigi ma. ¹³ Ka bire Rufus na, ngwõ Matigi ta baratɛta na fɔroyi. Ka bire a sye na, ngwõ mɛ sye mɛ. ¹⁴ Ka bire Asɛ̃kirite na kɔ Filegõ kɔ Heremas kɔ Patirobas kɔ Heremes kɔ syenɔmane sɛrɛ ngwĩye ti ye birɛ ngwɛ̃. ¹⁵ Ka bire Filoge kɔ Zuli na kɔ Nere kɔ a ta ligeyà kɔ Olɛ̃pe kɔ Wuro ta sɔma pepe ngwĩye ngwõ ti ye bire ngwɛ̃. ¹⁶ Ka bire nemɛ na kɔ syenɔmabe na fo nemɛ. Krista ta eglise pepe bire ka na. ¹⁷ Syenɔmane, mɛ ka mɛ fɔrona da ka ka yɛrɛ kɔrɔse ngwona sɔma na ngwĩye ngwõ dɛ̀gɛ̀be ka sɔma yɔ ne lanabe sɔma firebɛ ne kya kala dakwiyɛ. Ka ka sabɛ ngwõwɔ na. ¹⁸ Ngwõ nemɛ na sɔma ha bara ta kyà Matigi Krista ma ga. Ye bara ta ye yɛrɛ komavere na wu ma. Ye datɔbariyasɔma dyebɛ kɔ mamana bɛrɛda na dyaye nemɛ. ¹⁹ Sɔma pepe kya kwɛ̃fɛgɛbe ta da mɔ. Ngwõ yena mɛ ni hõ dya kya da na. Mɛ tyata ka tɛ kakirikɔma na dafɔre ta piri ma na hõ tɛ datɔbariyasɔma na dayaga ta piri ma na. ²⁰ Zɔgɔta syaranate Wuro na Setane ka ka kãe we, ka na tongo a ma. Kyà Matigi Yesu hõ nema pere ka ma. ²¹ Mɛ baratɛkweta Timote bire ka na. Mɛ nemɛ Yahutuye Lusius kɔ Zasõ kɔ Sosipate bire ka na mɛ. ²² Mɛ Teresiyus, ngwĩ ngwõ bo sɛbɛno sɛbɛ, mɛ bire ka na Matigi togo yena. ²³ Mya kwenesõ Gayusi bire ka na. Eglise kɔma ye nemɛ kwe a ta kõ hõ. Kuru hõ gwanamarata Erasite kɔ ke syeno Kurutus, ngwõwɔ bire ka na. ²⁴ [Kyà Matigi Yesu Krista hõ nema pere ka pepe ma. Amina]. ²⁵ Ke Wuro yirebɛ. Awe ngwõ sebɛne ke nyangabɛ lanabɛbe hõ. A ngwõ ta hõ kanya kɔ Yesu Krista na Bɛrɛda Fɔre nemɛ, ma ngwĩ yera ka ma ane hõ kanya kɔ ngwona bunu da nemɛ, a ngwõ dɔrɔ sɔma ma basyɛ, ngwõ ngwĩ mane dõ sane diniya hõ tegee. ²⁶ Fanene mane bɛrɛda sɛbɛ ngwona tĩyã ta da na. Ngwõ yena sɔma pepe ngwõ tɔ̀ basyɛ. Wuro ngwĩ ha wɛ ga, ngwõ fane yera, ye si sɔma daga ngwona da tɔ̀ ngwõfatɔ ye hõ lanabɛbe kɔ kwɛ̃fɛgɛbe ta. ²⁷ Wuro sonala legelege ngwĩ ngwõ kakirite, noro hõ dɛ ngwõ ma abada fɔ abada Yesu Krista barika hõ. Amina.