DƆRE DA
11 Yesu Krista mane da ngwĩye dɔrɔ, ngwona da gũ bo sɛbɛ hõ. W uro ngwona da dɔrɔ a ma ngwõfatɔ da ngwĩye daga tɛ zɔgɔta, a hõ ngwõwɔ dɔrɔ ya baratɛre ma. A ya mɛlɛkɛ fane hõ ngwona da kìnìbɛ a ta baratɛta Zã ma. 2 Zã da ngwĩye za, a ngwõwɔ pepe yera. Wuro fane ngwĩ yera a ma kɔ Yesu Krista tĩyã na da ngwĩ dɔrɔ a ma, a ngwona da pepe sɛbɛ bo sɛbɛ hõ. 3 Ngwĩ ngwõ bo sɛbɛ kala, ngwõ tɛ duba no na. Kɔ ngwĩ ngwõ bɔ fane bɛrɛda mɔ hõ kwa ye ma, ngwõ tɛ duba no na mɛ. Kamasɔrɔ ye na tɛ wakati vetira. 4 Eglise kopɔra ngwĩye ti Asi gana hõ, Zã bo sɛbɛ fane ngwõwɔ ma. Wuro tye, a mane tye, a na na. Ngwona Wuro kɔ ni kopɔra ngwĩye ti a ta fangama tanga kware zĩ hõ, ngwõwɔ hõ nema kɔ syara pere ka ma. 5 Ngwõ hõ sa Yesu Krista ta mɛ, awe ngwĩ ngwõ syere na nyomayi. A tɛ gwere vɔrɔ no na, Wuro ngwĩ ngwini na sabɛ sara woro hõ. Awe tɛ diniya hõ fangamɛ ngwonate na. A ke kanu hõ ke wa kyà kakye hõ kɔ ye yɛrɛ tõ nemɛ. 6 A ke ta salakwɛre na ngwĩye ngwõ bara ta a Tõ Wuro ma. Noro kɔ sebɛbe hõ tɛ Yesu Kristayi na fɔ sanga tege ma. Amina. 7 Segere, a tine na dabara ma. Sɔma pepe na a za. Ngwĩye ngwõ a wuru, ngwõwɔ na a za mɛ. Lagakõ ma si sɔma na mɔgɔ awe yena. Õhõ, yee ye na tɛ. Amina. 8 Sebɛbenate Matigi Wuro da ye yi ngwõ Alife kɔ Omega. Ngwõ kɔrɔ gwereyi kɔ lɛlomayi. Awe ngwõ tye, a mane tye, a na na. 9 Mɛ Zã ka syeno, mɛ kɔ ki kwe dɔ Yesu ma hõ ngwona nyane somɔna ngwĩ ngwõ a ta fangamabe na sɔma gũ. Yesu tĩyã ngwĩ dɔrɔ ke ma kɔ Wuro ta bɛrɛda, mɛ mane ngwõwɔ na wadyuli ta. Ngwõ yena ye mane mɛ tege zu na kori do bo hõ, ye da Patimosi. 10 Ni mane zi mɛ ma Matigi ta kɔ ma. Mɛ bɛri kõ na yireyi mɔ ne timi. A tɛ wɔkara tola kõ. 11 A da: Be nyono ti da ngwĩye na, be ngwõwɔ sɛbɛ kitabu bo hõ, hõ ne fane bɔ eglise kopɔra ma: Efese kɔ Simirine kɔ Peregame kɔ Tiyatire kɔ Sarede kɔ Filadɛlifi kɔ Lahodise. 12 Sõ ngwĩ mane bɛri mɛ ta, me ne bere hõ ngwõ sege. Mɛ ne bere ngwĩ sanga ma, mɛ sanu na fĩtina kopɔra bɔ za. 13 Mɛ fa bo za fĩtina kopɔra woro hõ, a ne ti wɔkara sõ bahõ. Forokya ne ti a mogo hõ, ngwõ zi fɔ na kãe bɔra. Sanu na sɛ̃tiri ne pɛrɛɛ a dũ ma. 14 A ngwõ̀ kɔ a ngwõsɔgɔ furo perepere wɔkara gwa ngwĩya na furoyi. A nyena ne kini wɔkara toga kini. 15 A kãe mane wɔlɔ wɔkara danya balo na wɔlɔyi. A bɛri kõ tɛ wɔkara zu na nyaaye dige kõ. 16 Mamala kopɔra mane ti a digesoro hõ. Tabaku na dapɔla do na dyayi na kɔgeyi ne sa a do hõ. A zĩ ne kini wɔkara sĩ ngwõ taa ngwõtala hõ. 17 Mɛ a za ngwĩ sanga ma, mɛ zi bɛrɛ a kãe we hõ tɛ wɔkara soro. A ye digesoro dɛ mɛ ma hõ da: Ka kwã ga. Mɛ ngwõ gwereyi kɔ lɛlomayi. 18 Mɛ sugu. Mɛ mane siri nka basyɛ mɛ na suguyi na wɔ yɛ fɔ abada. Ngwonakɔmabe ti ne ta siri kɔ wara yɔ ma. 19 Be fere ngwĩye za kɔ fere ngwĩye ngwõ tye kɔ fere ngwĩye ngwõ na tɛ bɔ timi, be ngwõwɔ pepe sɛbɛ. 20 Be mamala kopɔra ngwĩye za ne digesoro hõ kɔ sanu na fĩtina kopɔra, bɔ ngwõwɔ na bunu da: Mamala kopɔra ngwõ eglise kopɔra ta mɛlɛkɛe. Fĩtina kopɔra ngwõ eglise kopɔra.
21 Eglise ngwĩ ti Efese, be sɛbɛ fane ngwõ ta mɛlɛkɛ ma da: Mamala kopɔra ti ngwĩ soro hõ, a ne ya sanu na fĩtina kopɔra woro ho, ngwõ bɔ da yera. 2 A da: Mɛ bya tɛda pepe tɔ̀. Be mane bara na sigeyi ta hõ da nyaa somɔna. Ma tɔ̀ da be ha sebɛne sɔma yaga ta da somɔna ga. Ngwĩye da ye fanene, nka ye ha ngwõwɔ ga, be ngwõwɔ ta da sege hõ tɔ̀ da ye tɛ nĩyõsɔre na. 3 Be somɔnabe ta hõ nyane gũ mɛ togo yena, be ma nyama ga. 4 Nka be ha mɛ kanu wɔkara be mane pya ne ne kanu ngwɛne gweregwerena ga. Ngwõ yena ma be zarake. 5 Be bɛrɛ hõ tuma ngwõ ngwɛ̃, be kakiri zibɛ ngwõ na hõ be zugo katira hõ bya gwere tɛda ta. Ne be ma ngwõ ta ga, ma na na be birɛ hõ bya fĩtina bi na wa a ti do hõ, ne be ma be zugo katira ga. 6 Nka be mane bɔ dafɔre ta. Nikolayite kɔma ta tɛda ngwĩye ha dya mɛ ma ga, ngwõwɔ ha dya be ma mɛ ga. 7 Ni na kìnìyi ngwĩ fa yera eglise ma, turu ti sõ ngwĩ ta, ngwõ hõ ngwõ mɔ. Ngwĩye hõ sebɛbe gũ, ngwõwɔ sebɛne sugunɔmabe na sɔno no zõ, ngwõ ngwĩ ti Wuro ta nako hõ. 8 Eglise ngwĩ ti Simirine, be sɛbɛ fane ye ta mɛlɛkɛ ma da: Ngwĩ ngwõ gwereyi kɔ lɛlomayi, ngwõ ngwĩ mane siri hõ ye bere sugu yɛ, ngwõ bɔ da yera. 9 A da: Ma bya nyane kɔ bya fangadãbe tɔ̀. Nka be tɛ fereta na. Ngwĩye ngwõ da ye Yahutuye nka ye ha ngwõwɔ ga, ngwõwɔ be togo yaga. Ma ngwõ tɔ̀. Ngwona sɔma Setane ta nemɛkwekuru na bo. 10 Nyane da ngwĩye na be gũ, be ka kwã ngwõ si na ga. Segerɛ, Setane na ka na bɔ kɔrɔ wa hõ ka ka kaso hõ. Ka na nyane gũ nyi fũ kɔrɔ hõ. Be daga tɛ nyomata na fɔ ya wiri siri ma. Ne be hõ ngwõ ta, ma na sugunɔmabe na fangama bãfɔla pere be ma. 11 Ni na kìnìyi ngwĩ fa yera eglise ma, turu ti sõ ngwĩ ta, ngwõ hõ ngwõ mɔ. Ngwĩye hõ sebɛbe gũ, ngwõwɔ ha na nyane siri na pɔlalo ta ga. 12 Eglise ngwĩ ti Peregame, be sɛbɛ fane ye ta mɛlɛkɛ ma da: Tabaku na dapɔla do na dyayi ti ngwĩ soro hõ, ngwõ bɔ da yera. 13 A da: Ma bya tanga do tɔ̀. Setane ta fangama tanga kware ti ngwɛ̃. Be dɔ ne ma fɔrona. Ye mane mya syere na nyomayi Atipasi yɛ ngwĩ sanga ma ngwɛ̃ Setane ta tanga do hõ, be ma be do bere mɛ na lanabɛbe na ngwona sanga ma ga. 14 Nka ma be zarake da zɔgɔta na. Sɔma bɔ ti ka birɛ ngwɛ̃ ngwĩye dyã Balame ta kala ma. Ngwõ mane Balake kala da a Israyɛli kɔma ka dayaga hõ. A mane ye mamana hõ fyã kãe zõfere zõ hõ kakalabe ta. 15 Yee nemɛ, bɔ ti ka birɛ ngwɛ̃ mɛ, ye dyã Nikolayite kɔma ta kala ma. 16 Be daga be zugo katira. Ne be ma ngwõ ta ga, ma na na be birɛ zɔgɔta hõ ngwõwɔ kwini kɔ na tabaku nemɛ ngwĩ ngwõ sa ne do hõ. 17 Ni na kìnìyi ngwĩ fa yera eglise ma, turu ti sõ ngwĩ ta, ngwõ hõ ngwõ mɔ. Ngwĩye hõ sebɛbe gũ, ma na mane bo pere ngwõwɔ ma, ngwĩ mane dõ sɔma na. Ma na dɔgɔno na furoyi pere ye pepe tala tala ma mɛ, toga ngwũ sɛbɛɛ ngwĩ ma. Sõ si ha ngwõ tɔ̀ ga fɔ a na gũta. 18 Eglise ngwĩ ti Tiyatire, be sɛbɛ fane ye ta mɛlɛkɛ ma da: Wuro Nonanimisĩ ngwõ bɔ da yera. A nyena kini wɔkara toga kini. A kãe ti wɔkara danya balo na wɔlɔyi. 19 Mɛ bya tɛda pepe tɔ̀. Bya kanube kɔ bya nyomabe kɔ bya bara kɔ bya somɔnabe, ma ngwõwɔ pepe tɔ̀. Bya basyɛ tɛda ngwõ nyaayi gwereyi ma. 20 Ma be zarake da ngwĩ na, ngwõ bo: be dyã ngwona yà Zezabel hõ wɔ be birɛ ngwɛ̃, ngwõ ngwĩ ngwõ da a Wuro ta fane yera. A mya baratɛre kala ne firebɛ fɔ ye ne kakalabe ta ne fyã kãe zõfere zõ. 21 Ma wakati pera ma ngwõfatɔ a hõ ye zugo katira ya kakalabe na. Nka a ha tyata ye zugo katira ga. 22 Ngwõ yena ma na a syãbɛ syã fa ma. Ngwĩye ngwõ kakalabe ta na kwe kɔ le, ma na ngwõwɔ kwe ne ka nyane na yireyi hõ kɔ le. Ne ye ma ye zugo katira ya tɛda na ga, ma na ngwõ ta. 23 Hõ na kwe ngwõ ma, ma na a nɔmane yɛ. Eglise pepe na tɔ̀ da mɛ ngwõ sɔma kɔrɔ hõ da kɔ ye ta wu na da tɔ̀. Ma na ka pepe sara hõ kanya kɔ kya tɛda nemɛ. 24 Nka ki Tiyatire kɔma sɛrɛ, ki ha dyã ngwona kala ma ga, sɔma ngwĩye wiri Setane ta bunu da na yireye. Ma yera ka ma da ma ha na bye zɛ dɛ ka ngwã hõ ga. 25 Nka ngwĩ ngwõ ti ka soro hõ, ka ngwõ fɔga fɔrona fɔ ma hõ na. 26 - 27 Ngwĩye hõ sebɛbe gũ kɔ ngwĩye hõ na tɛda ta fɔ ya wiri diniya wɛ sanga ma, ma na fanga pere ngwõwɔ ma, ma ngwĩ gũ ne Tõ ta. Ma na fanga pere ye ma si sɔma ma kɔ balo gwanga nemɛ. Ye na ngwõwɔ zĩ fɔga. Ye na ye wɛbɛ wɔkara sõ vere sya wɛbɛ ne kelekele ngwɛne. 28 Ma na kɔ kyɛ do ma mumulu pere ye ma. 29 Ni na kìnìyi ngwĩ fa yera eglise ma, tera ti ki ngwĩye ta, ka hõ ngwõ mɔ.
31 Eglise ngwĩ ti Sarede, be sɛbɛ fane ye ta mɛlɛkɛ ma da. Wuro ta ni kopɔra kɔ mamala kopɔra ti ngwĩ soro hõ, ngwõ bɔ da yera. A da: Mɛ bya tɛda tɔ̀ da togo ti be ta da be sugu nka be siri. 2 Tuma. Zɔgɔ ngwĩ ngwõ ti be ta, be fanga ka ngwõ hõ ngwõfatɔ ngwõ ka na siri mɛ ga. Be da ngwĩye ta ne wɛ, ngwõwɔ ha dopaga Wuro zĩ hõ ga. 3 Be mane da ngwĩye mɔ hõ ne kala, be be kakiri dige ngwõ na. Be ngwõ fɔga hõ be zugo katira. Ne be ma tuma nyi hõ ga, ma na ua wɔkara pano na ngwɛne. Ma na na be na wakati ngwĩ ma, be ba na ngwõ tɔ̀ ga. 4 Ngwõ pepe na, sɔma zɔgɔ togo gũ ngwɛ̃ Sarede ngwĩye ha ye yɛrɛ dõõbɛ kɔ dayaga nemɛ ga. Zogo na kìnìyi na kyɛ ye moga hõ. Ye na ya kɔ mɛ nemɛ kamasɔrɔ ye daga kɔ ngwõ nemɛ. 5 Ngwĩye hõ sebɛbe gũ, zogore furo na kyɛ ngwõwɔ moga hõ. Mɛ ha na ye toga dibɛ ne wa sugunɔmabe na kitabu hõ ga. Ma na ye toga yera ne Tõ kɔ a ta mɛlɛkɛe zĩ hõ da ye tɛ mɛye na. 6 Ni na kìnìyi ngwĩ fa yera eglise ma, turu ti sõ ngwĩ ta, ngwõ hõ ngwõ mɔ. 7 Eglise ngwĩ ti Filadɛlifi, be sɛbɛ fane ye ta mɛlɛkɛ ma da: Kiniyi na syɛbɛyi ngwõ bɔ da yera. Dauda ta koro sɔgɔlɔ ti ngwĩ soro hõ, ngwõ ngwĩ ngwõ do kɔba, sõ si ha sebɛna gwolo ga. A hõ do gwolo, sõ si ha sebɛna kɔba mɛ ga. Ngwõ da: 8 Ma bya tɛda tɔ̀. Mɛ tɔ̀ da be barika dɛgɛ. Ngwõ pepe na, be kwa mya bɛrɛda ma. Be ha be do bere ne togo na ga. Mɛ mane do kɔba be zĩ hõ, sõ si ha sebɛna gwolo ga. 9 Setane ta nemɛkwekuru na sɔma ngwĩye nĩyõ sɔ hõ da ye Yahutuye, ma na ngwĩ ta ye na, ngwõ bo: Ma na tɛ ye ne yolingo be we hõ be yirebɛ. Ye na tɔ̀ da ma be kanu. 10 Be mane somɔnabe ta wɔkara ma ye yera be ma ngwɛne. Ngwõ yena ma na kwa be ma kɔrɔ wɛ wakati ma, ngwõ ngwĩ na na lagakõ pepe ma hõ lagakõ ma sɔma kɔrɔ wa. 11 Zɔgɔta ma na na. Ngwĩ ti be soro hõ, ngwõ fɔga fɔrona ngwõfatɔ sõ si ka na bya fangama bãfɔla tɔ ga, ngwõ ngwĩ tɛ bya sebɛbe gũ fa na. 12 Ngwĩ hõ sebɛbe gũ, ma na ngwõ ta sɔpagalo na na Wuro kõ yuu hõ. A ha na sa ngwɛ̃ titiri ga. Ma na na Wuro togo sɛbɛ a ma kɔ na Wuro ta kuru togo. Ngwona kuru ngwõ Zerusalem ngwũ ngwĩ na zi hõ tuma na Wuro birɛ wuro hõ. Mɛ na na toga ngwũ sɛbɛ a ma mɛ. 13 Ni na kìnìyi ngwĩ fa yera eglise ma, turu ti sõ ngwĩ ta, ngwõ hõ ngwõ mɔ. 14 Eglise ngwĩ ti Lahodise, be sɛbɛ fane ye ta eglise ma da: Ye ngwĩ wiri Amina, awe ngwõ tɛ teleyi na syɛbɛyi na, kɔ Wuro ta tege fere pepe ngwonate. Ngwõ da: 15 Ma bya tɛda tɔ̀, da be ha kwɔna ga, mane tɔba mɛ ga. Ne be mane kwɔna wala ne be made tɔba, ngwõ mane na dya ne ma. 16 Nka be ti wɔkara zo tɔbayɛ. Be ha tɔba ga, mane kwɔna mɛ ga. Ngwõ yena ma na be bɛ̃ be wa ne kɔrɔ hõ. 17 Be da be fangama, ye be tɛ ferete na fɔrona, ye be mako ha ti fui na ga. Nka be lagayireno sege. Be nyane. Be tɛ fu kɔ fangadã na. Be komagwɛlɛ̃gwɛlɛ̃te. 18 Ngwõ yena ma be ladi da be sanu tɛrɛ ne ta, togo ngwĩ kìnìbɛ, ngwõfatɔ be hõ tɛ ferete na. Be zogo furu ka be mogo hõ, sõ ka be na komagwɛlɛ̃gwɛlɛ̃yi za ga, ngwõ ngwĩ tɛ sõ na piribɛ da na. Be nyena ba su tɛrɛ mɛ hõ ngwõ ka be nyena hõ ngwõfatɔ be hõ sege zɛ. 19 Mɛ sɔma ngwĩye kanu, ma ngwõwɔ vuro hõ ne ladi. Ngwõ yena be daga be kɔrɔ hõ da pepe berebɛ hõ be zugo katira. 20 Segere, ma taa konõdo ma ne koro kwãgwaga. Ne bo sõ hõ mɛ bire kõ mɔ hõ kɔrɔ kɔba, ma na kwɔ ngwõ ta hõ zõ a ta. A na zõ ne ta. 21 Ngwĩye hõ sebɛbe gũ, ma na dyã ngwõwɔ tanga ne kyegɛ ma na fangama tanga kware ma wɔkara mɛ sebɛbe gũ hõ tanga ne Tõ kyegɛ ma a ta fangama tanga kware ma ngwɛne. 22 Ni na kìnìyi ngwĩ fa yera eglise ma, turu ti sõ ngwĩ ta, ngwõ hõ ngwõ mɔ.
41 Ngwõ timi mɛ dɔre da bo za, mɛ do na kibɛyi za wuro hõ. Mɛ pya bɛri kõ ngwĩ mɔ ngwĩ mane tɛ wɔkara tola kõ, ngwõ bɛri mɛ ta. A da: Na ba bɛ. Da ngwĩ daga tɛ zɔgɔta, ma na ngwõ dɔrɔ be ma. 2 Ngwona no tala hõ Ni mane zi mɛ ma. Ngwona wurokõ hõ ngwɛ̃, fangama tanga kware mane tye. Bo mane tanga ngwõ ma. 3 A zĩ mane wɔlɔ wɔkara dɔgɔno na terebayi wɔlɔ ngwɛne, ye ngwĩye wiri zasipe kɔ saredwane. Wuro tabala mane fangama tanga kware zamilelu, ngwõ mane wɔlɔ wɔkara dɔgɔno na terebayi bo, ye da emerode. 4 Fangama tanga kware kyoro ne nɔma naa ngwona fangama tanga kware zamilelu. Somɔlala kyoro ne nɔma naa ne tanga ngwona fangama tanga kwara ma, zogore furo ne ti ye moga hõ, sanu na fangama bãfɔlɛ ne ti ye ngwã hõ. 5 Wuro mumulu kɔ bɛri kõ kɔ wuro gwɛmɛ kõ sa ngwona fangama tanga kware birɛ. Lãpɛ kini kopɔra mane ti fangama tanga kware zĩ hõ. Ngwõwɔ ngwõ Wuro ta ni kopɔra. 6 Zu bo mane ti ngwona fangama tanga kware zĩ hõ, ngwõ tɛ wɔkara vere bahõ. A ne kìnì perepere wɔkara dubale. Fere sugi naa mane ti fangama tanga kware kyegɛ pepe ma hõ fangama tanga kware zamilelu. Ye zĩ kɔ ye timi pepe ne pagaa nyena nɔmane na. 7 Ngwona fere sugi na gwereyi mane ti wɔkara zara. A na pɔlalo ne ti wɔkara nyangano. A na saaro zĩ ne ti wɔkara sõ zĩ. A na naano ne ti wɔkara sisi bahõ, ngwĩ ngwõ tirɛ. 8 Kabadɛgɛ konala mane ti ngwona sugu fere pepe tala tala ta. Ye kɔrɔ kɔ ye kõ pepe mane pagaa nyena nɔmane na. Ye mane turu sõ wuru hõ kwe sĩ hõ ma, ye ha mane bɔɔ ga. Ye da: Sebɛbe pepe na te Matigi Wuro kìnìyi, kìnìyi, kìnìyi. Awe mane tye, a tye, a na na. 9 Ngwona fere sugi turu sõ hõ noro kɔ yirebɛbe kɔ barika yerabe na turu sõ ngwona fangama tanga kware ma tangata ma, ngwõ ngwĩ na suguyi na wɔ yɛ abada fɔ abada. 10 Ye ngwõ ta ngwĩ sanga ma, ngwona somɔlala kyoro ne nɔma naa zi bɛrɛ lɔ ma fangama tanga kware ma tangata zĩ hõ, hõ na yirebɛ, ngwõ ngwĩ na suguyi ngwõ na wɔ yɛ abada fɔ abada. Ye yolingo a we hõ ya fangama bãfɔlɛ tege fangama tanga kware zĩ hõ. 11 Ye da: Kyà Matigi kɔ kyà Wuro, be daga kɔ noro kɔ yirebɛbe kɔ sebɛbe nemɛ kamasɔrɔ bi ngwõ fere pepe na tegeta. Fere pepe tegee hõ sugu be dungo barika hõ.
51 Ngwĩ mane tanga fangama tanga kware ma, mɛ sɛbɛ na kwiniyi za ngwõ digesoro hõ. Ngwona sɛbɛ kɔrɔ hõ kɔ a ku ma pepe ne sɛbɛɛ. Tagamasɛ̃ kopɔra ne dɛɛ a ma. 2 Mɛ mɛlɛkɛ na barikamayi za, a ne pile ta kɔ kõ na yireyi nemɛ da: Hõ ngwona sɛbɛ do kɔba na na tagamasɛ̃ wa, kɔ ngwõ daga kɔ ngwõ nemɛ? 3 Sõ si ma gũ wurokõ hõ wala lagakõ ma wala lagakõ we ngwĩ ngwõ sebɛ ngwona sɛbɛ do kɔba na sege ga. 4 Mɛ mane mɔgɔ fɔrona kamasɔrɔ sõ ngwĩ daga kɔ ngwona sɛbɛ do ta kibɛbe nemɛ na sege, ngwona sõ ha mane gũ ga. 5 Ngwona somɔlala na sonala da mɛ ma: Ka mɔgɔ ga. Segerɛ, zara ngwĩ ngwõ sa Zude ta si hõ, ngwõ fangama Dauda timi sõ. Awe sebɛbe gũ hõ tagamasɛ̃ kopɔra wa hõ ngwona sɛbɛ do kɔba. 6 Mɛ Gwano bo za. A mane taa somɔlala woro hõ fangama tanga kware kɔ fere sugi naa yɔwuru hõ. A ne ti wɔkara ye mana yɛ. Byɛ̃ kopɔra kɔ nyena nɔmane kopɔra ne ti a ta, ngwõwɔ Wuro ta ni kopɔra, a ngwĩye fane hõ ya lagakõ bi pepe hõ. 7 Ngwona Gwano na hõ ngwona sɛbɛ bi kɔ ye digesoro nemɛ hõ na tɔ fangama tanga kware ma tangata ta. 8 A sɛbɛ bi ngwĩ sanga ma ngwona sugu fere naa kɔ somɔlala kyoro ne nɔma naa zi bɛrɛ lɔ ma Gwano zĩ hõ. Kolĩzo ne ti ye pepe tala tala soro hõ kɔ sanu kobala, ngwõwɔ ne pagaa wusu fa na ngwunu dyayi na. Ngwõ Wuro ta sɔma ta Wuro mɛbe. 9 Ye yirebɛ turu na ngwũyi sõ da: Bi ngwõ daga kɔ kitabu ta bibe nemɛ hõ na na tagamasɛ̃ wa. Ye mane be yɛ. Yee nemɛ, be sɔma bɔ tɛrɛ Wuro ma kɔ be tõ nemɛ hõ sa si sɔma pepe hõ ngwĩye bɛrɛda sifa pepe bɛri hõ sa gana pepe hõ. 10 Be ngwõwɔ ta salakawɛre na hõ bara ta kyà Wuro ma. Ngwõ na ngwonakɔmabe ta lagakõ ma. 11 Mɛ sege yɛ mɛ hõ mɛlɛkɛe nyaa kõ mɔ, ye ne turu sõ. Ye ne fangama tanga kware kɔ sugu fere kɔ somɔlala zamilelu. Ye pepe do na kweyi mane mɛlɛkɛe sana fũ kɔ mɛlɛkɛe zofũ na tɛgɛ do na sana nyaa. 12 Ye ne turu sõ kɔ kõ gwaga nemɛ ne da: Ye mane Gwano ngwĩ yɛ, ngwõ daga kɔ sebɛbe kɔ nafɔro nyaa kɔ kakirikɔmabe kɔ fanga kɔ yirebɛbe kɔ noro kɔ tanube nemɛ. 13 Tege fere pepe ngwĩye ti wurokõ hõ kɔ lagakõ ma kɔ lagakõ we kɔ nyengezu hõ, ngwõ kɔrɔ fere sugi pepe ngwĩye ti bi pepe hõ, mɛ ngwõwɔ pepe ta turu sõ kõ mɔ. Ye da: Ke yirebɛbe kɔ noro kɔ sebɛbe dɛ fangama tanga kware ma tangata kɔ Gwano ma abada fɔ abada. 14 Ngwona fere sugi naa da: Amina. Ngwona somɔlala zi bɛrɛ lɔ ma hõ ne yirebɛ.
61 Ngwõ timi mɛ Gwano za, a ne ngwona tagamasɛ̃ kopɔra wa. Mɛ ngwona fere sugi naa na tala bɛri kõ mɔ. A ne bɛri kɔ kõ yire nemɛ wɔkara wuro ngwõ gwɛmɛ. A da: Na bɛ o. 2 Mɛ sege hõ syo furu za. Ngwĩ ba tanga a ma, põ mane ti ngwõ ta kɔ fangama bãfɔla. A na sebɛbegũyi sa hõ sebɛbe gũ. 3 Ngwõ timi Gwano ngwona tagamasɛ̃ pɔlalo wa. Mɛ fere sugi na pɔlalo bɛri kõ mɔ. A da: Na bɛ o. 4 Syo za bo sa, ngwõ mane pɛnɛ. Ngwĩ ngwõ tanga a ma, fanga ti ngwõ ta hõ kũ kwini hõ syara wɛ lagakõ ma. Sɔma na ye nemɛ yɛ. Ye tabaku na kuroyi pera ma. 5 Ngwõ timi Gwano tagamasɛ̃ saaro wa. Mɛ fere sugi na saaro bɛri kõ mɔ. A da: Na bɛ o. Mɛ sege hõ syo dungu za. Ngwĩ ngwõ tanga a ma, fere yerabɛ fa ne ti ngwõ soro hõ. 6 Mɛ bɛri kõ bo mɔ, a ne sa fere sugi naa woro hõ. A da: Kɔ tala na sara gwana na mana na kilo tala tɛrɛ. Kɔ tala na sara gwana na dugo na kilo tala tɛrɛ. Kada be nyi kɔ duvɛ̃ yaga ga. 7 Ngwõ timi Gwano ngwona tagamasɛ̃ naano wa. Mɛ fere sugi na naano bɛri kõ mɔ. A da: Na bɛ o. 8 Mɛ sege hõ syo na dɛ̃fɔgɔyi za. Ngwĩ ngwõ tanga a ma, ngwõ togo ti Siri. Warayɔnate ne dɔ a timi. Ye fanga pere ye ma lagakõ na sɔdini do naa ma hõ sɔma yɛ kɔ tabaku kɔ wu kɔ langãduru kɔ sɔkoba fere nemɛ. 9 Ngwõ timi Gwano ngwona tagamasɛ̃ kooro wa. Ye mane ngwĩye yɛ Wuro ta bɛrɛda yena kɔ ye ta syɛrɛbe yena, mɛ ngwõwɔ ni za salaka wɛ fa we. 10 Ye songo kɔ kõ na yireyi nemɛ da: E Matigi na syɛbɛyi na kìnìyi. Be na yɛ̀rɛ̀ fɔ we sanga ma hõ kiti sɔ sɔma ma hõ ke mone wa lagakõ ma sɔma hõ kyà siri da yena? 11 Ye forokya furo pere ye pepe tala tala ma. Ye yera ye ma da ye makwɔnabɛ zɔgɔta dɛ̃ fɔ ye nemɛ kɔ ye syenɔmane do hõ dopaga, ngwõwɔ ngwĩye daga yɛɛ wɔkara yewɔ yɛrɛ mane yɛɛ ngwɛne. 12 Ngwõ timi mɛ Gwano za, a ne tagamasɛ̃ konalalo wa. Lagakõ mane sɔma fɔrona. Sĩ dungu wɔkara yara hõ kyɛ zogo na dungubɛyi. Yu mane pɛnɛ bɛ̃bɛ̃ wɔkara tõ. 13 Wuro hõ mamala bɛrɛ lɔ ma. Ye tɛ wɔkara panga yee ngwõ kafɔna bile vɔrɔ ne vunu. 14 Wurokõ tuma ye ti do hõ wɔkara sɛbɛno na kwiniyi. Tola pepe kɔ zu na kori da pepe tuma ye ti da hõ. 15 Lagakõ ma fangamɛ kɔ sɔma yee kɔ sorodase ngwonakɔma kɔ ferekɔma kɔ fangakɔma kɔ sɔma pepe, vɛnɔmane kɔ tɛrɛ, ngwõwɔ pepe ye dõ tola wura hõ kɔ tola kokoe hõ. 16 Ye da tola kɔ taara ma ye ye bɛrɛ ye ma hõ pĩ ye ma ngwõfatɔ ye hõ dɛɛ tanga kware ma tangata na kɔ Gwano na, ngwĩye wora ngwõ ba. 17 Ye ta wora ba kɔ na yireyi wiri. Kɔ ngwõ sebɛne taa?
71 Ngwona da timi mɛ mɛlɛkɛe naa za, ye ne taa lagakõ zĩ naa ma. Ye ne lagakõ ma panga naa fɔga ngwõfatɔ panga si ka wirɛ lagakõ ma wala nyengezu ma wala sɔno si ma ga. 2 Mɛ mɛlɛkɛ bo za ngwĩ tuma wurodu hõ piri ma. Wuro na suguyi ta tagamasɛ̃ mane ti a soro hõ. Fanga mane pere mɛlɛkɛe naa ma hõ lagakõ kɔ nyengezu ngwona. Mɛlɛkɛ ngwĩ tuma wurodu hõ, ngwõ songo kɔ kõ yire nemɛ hõ da ngwõwɔ ma: 3 Ka ka lagakõ kɔ nyengezu kɔ sɔrɔ yaga dɛ̃ ga sane ke hõ tagamasɛ̃ dɛ kyà Wuro ta baratɛre kini ma. 4 Ye tagamasɛ̃ dɛ ngwĩye ma, mɛ ngwõwɔ do mɔ hõ sa Israyɛli timi kɔma pepe hõ. Ngwõwɔ sɔma sana zolo ne kepɔla ane sana naa. Ye Wuro ta tagamasɛ̃ dɛ ngwõwɔ kini ma. 5 Zude timi kɔma ngwĩye ngwona tagamasɛ̃ gũ, ngwõwɔ sɔma sana fumɔla. Rubɛ̃ timi kɔma ngwõwɔ sɔma sana fumɔla. Gade timi kɔma, ngwõwɔ sɔma sana fumɔla. 6 Aseri timi kɔma, ngwõwɔ sɔma sana fumɔla. Nefetali timi kɔma, ngwõwɔ sɔma sana fumɔla. Manase timi kɔma, ngwõwɔ sɔma sana fumɔla. 7 Simeon timi kɔma, ngwõwɔ sɔma sana fumɔla. Levi timi kɔma, ngwõwɔ sɔma sana fumɔla. Isakari timi kɔma, ngwõwɔ sɔma sana fumɔla. 8 Zabulõ timi kɔma, ngwõwɔ sɔma sana fumɔla. Yakuba timi kɔma, ngwõwɔ sɔma sana fumɔla. Bɛ̃zamɛ̃ timi kɔma, ngwõwɔ sɔma sana fumɔla. Tagamasɛ̃ mane dɛɛ ngwõwɔ pepe ma. 9 Ngwõ timi mɛ sege hõ zamɛ nyaa za, sõ si ha mane sebene zyo ga. Ye sa si sɔma pepe hõ kɔ timi kɔma pepe kɔ sɔma sifa pepe kɔ bɛrɛda sifa pepe na bɛri sɔma hõ. Ye na taa fangama tanga kware zĩ hõ Gwano zĩ hõ. Zogore furo ne ti ye moga hõ. Tegelɛ dazugo ne ti ye sera hõ. 10 Ye ne songo kɔ kõ na yireyi nemɛ ne da: Kyà kisibe sa kyà Wuro ta ngwĩ ngwõ tanga fangama tanga kware ma, ane a sa Gwano ta. 11 Mɛlɛkɛe pepe taa hõ fangama tanga kware kɔ somɔlala kɔ fere sugi naa zamilelu. Ye zi bɛrɛ ye zɛngɛne ma fangama tanga kware zĩ hõ, hõ Wuro yirebɛ. 12 Ye da: Amina. Tanube kɔ noro kɔ kakirikɔmabe kɔ barikayerabe kɔ yirebɛbe kɔ sebɛbe kɔ fanga, ngwõwɔ kyà Wuroyi abada fɔ abada. Amina. 13 Somɔlala na sonala mɛ tɔga da: Bɔ zofurokɔma kɔ kɔ kɔ mɔ? We ye tuma? 14 Mɛ da a ma: Matigi bi ngwõ ngwõ tɔ̀. A da mɛ ma ye ngwĩye ngwõ sa ngwona nyane na yireyi hõ, hõ ya zogore wa Gwano na tõ hõ ne kìnìbɛ, ye ye ngwõwɔ. 15 Ngwõ yena ye ti Wuro ta fangama tanga kware zĩ hõ, hõ bara ta Wuro ma wuru hõ kwe sĩ hõ ma a ta Wuro kõ yuu kɔrɔ hõ. Fangama tanga kware ma tangata tye hõ kwa ye ma. 16 Wu ha ne fɔga titiri ga. Mulu ha ne fɔga titiri mɛ ga. Sĩ ha ne ngwona titiri ga. Tu ha ne nyane ga. 17 Gwano kwane ngwĩ ngwõ ti fangama tanga kware yɔwuru hõ, ngwõ na tɛ ye na nɛta na hõ ne zĩ fɔga hõ ya sugunɔmabe na pɛ̃zu birɛ. Wuro na nyenazyo pepe vɔrɔ ne wa ye nyena ma.
81 Gwano ngwona tagamasɛ̃ kopɔraro wa ngwĩ sanga ma digedige kõ si ma sa wurokõ hõ, hõ lere na sɔdini do tala nemɛ ta ga. 2 Mɛlɛkɛe kopɔra ngwĩye ngwõ taa Wuro zĩ hõ, mɛ ngwõwɔ za. Ye tola na pɛ̃ye kopɔra pere ye ma. 3 Mɛlɛkɛ za na taa salaka wɛ fa kyegɛ ma. Wusu fa na sanu su ne ti a soro hõ. Ye wusu fere na ngwunu dya fere na nyaaye pera ma ngwõfatɔ a ngwõ kɔ Wuro ta sɔma ta mɛbe kwe ne pere ngwona sanu na salaka wɛ fa ma, ngwõ ngwĩ ti fangama tanga kware zĩ hõ. 4 Ngwona wusu fa na ngwunu dyayi na tyoro kɔ Wuro ta sɔma ta mɛbe kwe ba nemɛ hõ Wuro zĩ hõ, hõ sa mɛlɛkɛe sera hõ. 5 Mɛlɛkɛ wusu fa na su bi na paga salaka wɛ fana togo na hõ ngwõ dira lagakõ ma. Wuro mane dige, a mumulu hõ gwɛmɛ. Lakagõ mane sɔma mɛ. 6 Tola na pɛ̃ye kopɔra mane ti mɛlɛkɛe kopɔra ngwĩye sera hõ, ngwõwɔ ye yɛrɛ tetɛre hõ tola pɛ̃. 7 Gwereyi tola pɛ̃. Wuro dɔgɔlɔ kɔ togo kɔ tõ kwe nyangamu nemɛ hõ, hõ bɛrɛ lagakõ ma. Ngwõ mane lagakõ na sɔdini do saa ngwona. A sɔrɔ na sɔdini do saa ngwona mɛ. A sɔgɔ bĩ pepe ngwona. 8 Mɛlɛkɛ pɔlalo tola pɛ̃. A tɛ wɔkara tolo na yireyi na toga kininayi ngwõ dirɛ nyengezu hõ. Nyengezu na sɔdini do na saaro tɛ tõ na. 9 Nyengezu kɔrɔ hõ fere na sɔdini do saa siri. Nyengezu ngwõ̀ ma korore na sɔdini do na saaro yaga. 10 Ngwõ timi mɛlɛkɛ saaro tola pɛ̃. Mumulu yuu bo bɛrɛ hõ tuma wuro hõ. A ne kini wɔkara wɛpɛrɛ na yireyi. A bɛrɛ ku na sɔdini do na saaro ma kɔ pɛ̃zore ma. 11 Ngwona mumulu togo ti Sagaro. Zu na sɔdini do saa tɛ zu saga na. Sɔma nyaa siri ngwona zu ta kamasɔrɔ a saga. 12 Ngwõ timi mɛlɛkɛ naano tola pɛ̃. Sĩ na sɔdini do na saaro mane dungu kɔ yu na sɔdini do na saaro kɔ mamala na sɔdini do na saaro. Kini ha mane gũ sĩ na sɔdini do na saaro hõ ga. Wuru hõ mane tɛ yee nemɛ mɛ. 13 Mɛ sege yɛ mɛ hõ sisi bɛri kõ na yireyi mɔ, a ne tirɛ wurokõ yɔfa woro hõ. A bɛri hõ da: Bono ti sɔma ma. Ne mɛlɛkɛe sɛrɛ saa hõ ya tola pɛ̃ ngwĩ sanga ma, ne lagakõ ma sɔma hõ ngwona tola pɛ̃ kwɛ̃ mɔ, bono ti ye ma.
91 Ngwõ time mɛlɛkɛ kooro ya tola pɛ̃. Mɛ mumulu na bɛrɛyi za hõ tuma wuro hõ, hõ bɛrɛ lɔ ma. Ye wura gwaga na tunungunayi na koro sɔgɔlɔ pera ma. 2 Mumulu ngwona wura gwaga na tunungunayi do kɔba. Tyoro sa ngwona wuru hõ wɔkara toga kini na yireyi na tyoro. 3 Gwale bɔ sa ngwona tyoro hõ, hõ zãzà lagakõ bi pepe hõ. Sebɛbe mane pere ye ma. Ye ta baga mane tɛ wɔkara nyɛmɛ ta baga. 4 A yera ye ma da ye ka lagakõ ma sɔgɔ yaga ga wala fere bĩ si wala sɔrɔ si. Ye ya dayaga ta sɔma na, Wuro ta tagamasɛ̃ ha ti ngwĩye kini ma ga. 5 A yera ye ma da ye ka ye yɛ ga nka ye ye nyane yɛgɛ koo kɔrɔ hõ. Ye ta nyane mane ti wɔkara nyɛmɛ ta ngwĩ do na nyane. 6 Ngwona yɛgɛ koo kɔrɔ hõ, sɔma na siri kya, ye ha na a gũ ga. Ye na kya siri na, siri na tongo ye na. 7 Ngwona gwale mane ti wɔkara syori ngwĩye ngwõ sɔbe tege kũ kwini na. Sanu na fangama bãfɔlɛ nemɛ mane ti ye ngwã hõ. Ye zɛngɛne mane ti wɔkara sõ zĩ. 8 Ngwõsɔga mane ti ye ta wɔkara yàra ngwõsɔga. Ye nyini mane ti wɔkara zare nyini. 9 Fa mane ti ye dũ ma wɔkara balo tɛ̃ fa. Ye kabadɛgɛ dige kõ mane ti wɔkara syori na wotorokɔma na nyaaye na tongoye dige kwɛ̃, ngwĩye ya kũ na. 10 Dibi ti ye ta wɔkara nyɛmɛ dibi kɔ dibi lɛlo. Ye na nyane ngwĩ ta sɔma na yɛgɛ koo kɔrɔ hõ, ngwona fanga ti ye dibi hõ. 11 Fangama ti ye ngwõ̀ na. Ngwona te ngwona wura gwaga na tunungunayi na mɛlɛkɛ. A togo ti Abadõ Heburu da hõ. Togo ti a ta Girɛki da hõ, ye da Apoliyõ. Ngwõ kɔrɔ sõ yagabɛta. 12 Nyane na gwereyi fɔno wɛ. Segerɛ, nyane pɔla bɔ na na ngwona nyane timi. 13 Ngwõ timi mɛlɛkɛ konalalo ya tola pɛ̃. Mɛ bɛri kõ bo mɔ hõ sa sanu na salaka wɛ fa na bĩ hõ, ngwõ ngwĩ ti Wuro zĩ hõ. 14 Ngwona bɛri kõ da mɛlɛkɛ tolakonalalote ma: Mɛlɛkɛe naa ngwĩye ngwõ pɛrɛɛ Ufirate ku do ma, ya ngwõwɔ firi. 15 Mɛlɛkɛe naa ngwĩye mane sɔbe tege ngwona wakati tala yena kɔ ngwona sinala kɔ ngwona yu tala kɔ ngwona dɔ tala yena, ye ngwõwɔ firi ngwõfatɔ ye hõ sɔma na sɔdini do na saaro yɛ. 16 Syorikɔma ngwĩye kũ kwini, ngwõwɔ mane sana fũ na tege do sana kyoro. Mɛ ngwõwɔ do mɔ. 17 Mɛ ngwona syori kɔ ye ma ba sɔma za na dɔre da hõ. Bala tɛ̃ fere ne ti ye ta, ye ne pɛnɛ bɛ̃bɛ̃ wɔkara togo bahõ. Ye ne dungu wɔkara safiri na dɔgɔno. Ye tɛ wɔkara giribi. Syori ngwõtala mane ti wɔkara zare ngwõtala. Togo kɔ tyoro kɔ giribi sa ye da hõ. 18 Sɔma na sɔdini da saa mane siri ngwona nyane saa ta, togo kɔ tyoro kɔ giribi ngwĩye mane sa syori da hõ. 19 Ngwona syori ta fanga mane ti ye da hõ kɔ ye pɛgɛ hõ. Ye pɛgɛ ti wɔkara samɛ. Ngwõtala ti ye pɛgɛ ma, ye sɔma nyane kɔ ngwõwɔ nemɛ. 20 Sɔma ngwĩye ngwõ siri ngwona nyane ta ga, ngwõwɔ ma ye zugo katira ye yɛrɛ ta tɛda na ga. Ye ma ya zini yirebɛbe do dira ga. Ye sɛrɛdala ngwĩye ta kɔ sanu kɔ gwana furo kɔ danya kɔ dɔge kɔ sɔrɔ nemɛ, ye ngwõwɔ yirebɛ. Ngwõwɔ ha sege ne zɛ ga. Ye ha da mɔ ga. Ye ha sebɛne ya ga. 21 Ye ma ye zugo katira ya sõyɛbe na mɛ ga, kɔ ye ta kyonobɛbe kɔ ye ta kakalabe na da kɔ ye ta panobe na da.
101 Ngwõ timi mɛ mɛlɛkɛ na barikamayi bo za, ngwĩ zi hõ tuma wuro hõ. Dabara ne filɛ a ma. Wuro ta tabala bo ne filɛ a ngwõ̀ hõ. A zĩ ne kini wɔkara sĩ. A zoga tɛ wɔkara toga kini na nyaaye. 2 Kitabu silalo na kibɛyi mane ti a soro hõ. A ye digesoro ma kã dɛ nyengezu ma hõ ye ninanga ma kã dɛ lagakõ ma. 3 A mane songo kɔ kõ na yireyi nemɛ wɔkara zara ngwõ dãdã. A songo wɛ timi ma wuro gwɛmɛ kõ kopɔra sa. 4 Wuro gwɛmɛ kõ kopɔra sa ngwĩ sanga ma, mɛ mane na ngwõ sɛbɛ. Nka mɛ bɛri kõ bo mɔ hõ tuma wuro hõ. A da: Wuro gwɛmɛ kõ kopɔra fa ngwĩ yera ngwõ to be kɔrɔ hõ, ka ngwõ sɛbɛ ga. 5 Mɛ mane mɛlɛkɛ ngwĩ za, a ne taa nyengezu kɔ lagakõ ma, ngwõ ye digesoro duro wuro hõ. 6 A ye sũ Wuro togo ma ngwĩ na suguyi wɔ yɛ abada fɔ abada. Ngwõ wurokõ kɔ a kɔrɔ hõ fere pepe tege. Mɛlɛkɛ ye sũ ngwõ ma hõ da ye wakati ha na syedɛrɛ titiri ga. 7 A da mɛlɛkɛ kopɔraro hõ ya tola pɛ̃ ngwĩ sanga ma, ye ngwona no hõ Wuro ta bunu da na dopaga wɔkara a ye yera ya baratɛre na purusɔma ma ngwɛne. 8 Ngwona sanga ma mɛ mane kõ ngwĩ mɔ hõ tuma wuro hõ, ngwõ bɛri mɛ ta yɛ mɛ. A da: Ya ngwona kitabu silalo na kibɛyi tɔ na wa mɛlɛkɛ soro hõ ngwĩ ngwõ taa nyengezu kɔ lagakõ ma. 9 Mɛ ne dɔbɛ mɛlɛkɛ na hõ na mɛ da a ngwona kitabu silalo pere ne ma. A da mɛ ma ye ma a tɔ na zõ. A da. A na be kɔrɔ sagabɛ nka a na dya be do hõ wɔkara yi. 10 Mɛ ngwona kitabu silalo tɔ na wa mɛlɛkɛ soro hõ na zõ. A mane dya mɛ do hõ wɔkara yi. Nka a zõ wɛ timi mɛ ta, mɛ kɔrɔ ne saga. 11 A yera mɛ ma da ye ma daga Wuro ta fane yera yɛ mɛ, a mane ngwĩ yera sɔma sifa nyaa kɔ si sɔma nyaa kɔ bɛrɛda nyaa kɔ fangamɛ nyaa ta da na.
111 Ye sɔgɔlo bo pere mɛ ma, ngwõ tɛ wɔkara fere yerabɛ sɔgɔlo. A yera mɛ ma da: Tuma Wuro kõ yuu yerabɛ kɔ salaka wɛ fa. Sɔma pepe ngwĩye ngwõ yirebɛbe ta ngwɛ̃ be ngwõwɔ zyo. 2 Lu na gwɛnɛgɛ ngwĩ ti Wuro kõ yuu kyegɛ ma, be ngwõ to yɛ, be ka ngwõ yerabɛ ga. Ye ngwõ pere si sɔma ma, ye na ne yara ne fɔno kuru na kìnìyi hõ, hõ yɛgɛ kepɔla ne nɔma pɔla ta. 3 Ma na na syɛrɛ kɔma sɔma pɔla fane, ye na Wuro ta bɛrɛda yera nyi zofũ ane zopɔla ne kesaa kɔrɔ hõ. Ye na zopile zogore ka ye moga hõ. 4 Ngwõwɔ ngwõ oliviye sɔrɔ pɔla kɔ fĩtina pɔla ngwĩye ngwõ taa lagakõ ma Matigi zĩ hõ. 5 Ne sõ bo hõ ne tyata ne nyane, togo na sa ye da hõ, hõ ne zugi yɛ. Yee nemɛ, ye na nyaneta na siri. 6 Sebɛbe ti ye ta hõ wurokõ do pĩ ngwõfatɔ hõ ne to ye ne Wuro ta bɛrɛda yera, wuro ka mɛnɛ ga. Sebɛbe ti ye ta mɛ hõ zu berebɛ na ta tõ na ane hõ lagakõ vuro kɔ nyane sifa pepe nemɛ wakati o wakati ngwĩ ngwõ dya ye ma. 7 Ye hõ na waro ya syɛrɛbe na bɛrɛda na ngwĩ sanga ma, zara ngwĩ ngwõ sa hõ tuma wura gwaga na tunungunayi kɔrɔ hõ, ngwõ na ye kwini hõ sebɛbe gũ ye ma hõ ne yɛ. 8 Ye na sara na wɔ ngwɛ̃ kire gwaga na wisogo hõ, ye mane Matigi kwãgwaga sɔno ma ngwõ ngwɛ̃. Bɛrɛda biri hõ, ye ngwona kuru togo wiri da Sodome wala Misira. 9 Sɔma sifa pepe kɔ si sɔma kɔ ngwĩye bɛrɛda pepe bɛri kɔ gana pepe hõ sɔma bɔ, ngwõwɔ na ngwona sara sege nyi saa ne kobi, ye ha na dyã ye ye sitira ga. 10 Lagakõ ma sɔma na ni hõ dya ye ta siri da yena hõ koko hõ perefere fane ye nemɛ ma kamasɔrɔ ngwona purusɔma sɔma pɔla mane lagakõ ma sɔma nyane hale. 11 Nyi saa ne kobi fɔno wɛ timi ma, Wuro na sugunɔmabe na nyunu ka ye hõ, ye na tuma taa. Sɔma pepe ngwĩye hõ ne za, kũ na yireyi na ngwõwɔ fɔga. 12 Ngwona purusɔma bɛri kõ na yireyi mɔ hõ tuma wuro hõ, hõ da ye ma: Ka ba bɛ wuro hõ. Ye ba wuro hõ dabara ma ye zugi nyono na. 13 Ngwona sanga ma yɛrɛ lagakõ sɔma fɔrona. Ngwona kuru na sɔdini do fũ bɛrɛ, sɔma sana kopɔra siri ngwona lagakõ ta sɔmabe ta. Sɔma sɛrɛ kwã fɔrona hõ wurokõ hõ Wuro yirebɛ. 14 Nyane pɔlalo fɔno. Sege, nyane saaro na na zɔgɔta. 15 Mɛlɛkɛ kopɔraro ya tola pɛ̃. Bɛri kwɛ̃ na yireyireye sa wurokõ hõ, hõ da: Diniya hõ fangamabe tɛ kyà Matigi kɔ kyà Kristayi na. A na tanga fangamabe na fɔ sanga tege ma. 16 Somɔlala kyoro ne nɔma naa ngwĩye tanga Wuro zĩ hõ ye ta fangama tanga kwara ma, ngwõwɔ bɛrɛ hõ ye zɛngɛne sugu lɔ ma hõ Wuro yirebɛ. 17 Ye da. Ke barika yera be ma Matigi Wuro, Sebɛbe pepe na te, bi ngwĩ tye, be mane tye. Be bya sebɛbe na yireyi dɔrɔ hõ ngwonakɔmabe ta. 18 Si sɔma wora mane ba. Be woro na ba ye ta mɛ. Sara ta kiti sɔ sanga wiri. Wakati wiri hõ bya baratɛre na purusɔma sara. Bya sɔma kɔ ngwĩye ngwõ kwã be togo na, sɔma yee kɔ sɔma silala pepe, ngwõwɔ sara sanga wiri. Lakagõ na yagare yɛ sanga wiri mɛ. 19 Wuro kõ yuu ngwĩ ti wurokõ hõ, ngwõ do mane kibɛɛ. Wuro ta datege na kɛsu mane ti ngwɛ̃. Wuro dige kõ kɔ wuro mumulu kɔ wuro gwɛmɛbe tɛ. Lagakõ mane sɔma. Wuro dɔgɔlɔ yeye bɛrɛ mɛ.
121 Tagamasɛ̃ na yireyi ye dɔrɔ wurokõ hõ. Yà bo mane tye, sĩ ne filɛ a ma wɔkara sõ zogo filɛ ye ma ngwɛne. Yu ne ti a kãe we. Mamala fumɔla tɛ a ta fangama bãfɔla na. 2 A mane ti tulu. A mane pɛro kamasɔrɔ a mane ti mana hõ, a mane tyata vɔrɔ. 3 Tagamasɛ̃ za ye dɔrɔ wurokõ hõ. Diragõ na yiregwagayi na pɛnɛyi sege. Ngwõtala kopɔra kɔ byɛ̃ fũ ne ti a ta. Fangama bãfɔla ne pĩĩ ngwona ngwõtala kopɔra pepe tala tala ma. 4 A pege mane wurokõ hõ mamala na sɔdini do na saaro suru ne dira lɔ ma. Yà ngwĩ tyata vɔrɔ, ngwona diragõ ya taa a zĩ hõ ngwõfatɔ a hõ vɔrɔ, a ngwona uo bɔra. 5 Ngwona yà vɔrɔ nimisĩ. Ngwona no na ngwonakɔmabe ta si sɔma pepe ma kɔ balo gwanga nemɛ. Nka ngwona no duro ba Wuro birɛ kɔ a ta fangama tanga kware birɛ. 6 Ngwona yà tongo ya sɔkogo hõ. Wuro mane bo piri ma tetɛrɛ a ma ngwɛ̃ ngwõfatɔ a hõ wɔ ngwɛ̃ nyi zofũ ne nyi zopɔla ne kesaa. 7 Kũ tɛ wurokõ hõ. Miehel kɔ ya mɛlɛkɛe ngwona diragõ kwini. Diragõ kɔ ya mɛlɛkɛe kwini mɛ. 8 Diragõ ma sebɛbe gũ ga. Ye ma pilasi gũ wuro hõ titiri ga. 9 Ye diragõ na yiregwagayi dira sire. Ngwona diragõ ngwõ sã na biriyi, ngwõ togo ti zini ngwonate Setane, ngwõ ngwĩ ngwõ lagakõ ma sɔma pepe firebɛ. Ye ngwõ dira na wa ngwɛ̃, a bɛrɛ lagakõ ma, awe kɔ ya mɛlɛkɛe. 10 Mɛ bɛri kõ na yireyi mɔ wuro hõ. A da: Kyà Wuro ta kisibe wiri basyɛ. Wuro ya fangamabe na sebɛbe dɔrɔ basyɛ. Masiya ya fanga dɔrɔ basyɛ. Ke syenɔmane na kãkyɛta ngwĩ mane taa Wuro zĩ hõ, hõ syenɔmane kãe ka wuru hõ kwe sĩ hõ ma, ye ngwõ dira hõ na wa wurokõ hõ. 11 Ke syenɔmane sebɛbe gũ a ma Gwano tõ barika hõ kɔ ye ta syɛrɛbe na bɛrɛda barika hõ. Ye yɛrɛ mane dyã ye ni pere hõ siri. 12 Ngwõ yena wurokõ kɔ ye kɔrɔ hõ fere, ka ni hõ dya. Bono ti lagakõ kɔ nyengezu ma kamasɔrɔ Setane zi ya ka birɛ. A tɔ̀ da ya wakati sere ha nyaa titiri ga. Ngwõ yena a woro ba fɔrona. 13 Diragõ a za da ya dira lagakõ ma ngwĩ sanga ma, yà ngwĩ vɔrɔ nimisĩ, a dɔ ngwõ ma na nyane. 14 Yà sisi na yireyi kabadɛgɛ gũ ngwõfatɔ a tirɛ ya ya bi hõ sɔkogo hõ. A na wɔ yɛ hõ ye yɛrɛ woro ngwɛ̃ hõ dɔgɔ saa ne kobi ta hõ ye sabɛ ngwona sã do na. 15 Ngwona sã zo sabɛ ye do hõ yà timi wɔkara ku ngwõfatɔ ngwona woro zu hõ ngwona yà bi. 16 Nka lagakõ ngwona yà dyema hõ ngwona zu mɛnɛ ngwĩ sa diragõ do hõ. 17 Diragõ woro ba yà ta. Yà timi kɔma sɛrɛ ngwĩye kwa Wuro ta fane ma hõ Yesu na syɛrɛbe ta, a ya ngwõwɔ kwini. 18 Diragõ ya taa nyengezu do ma bãyɛgɛ ma.
131 Ngwõ timi mɛ sɔkɔba fa bo za, a tuma sa nyengezu hõ. Byɛ̃ fũ kɔ ngwõtala kopɔra ne ti a ta. Fangama bãfɔla ne pĩĩ a byɛ̃ pepe tala tala ma. Wuro togo na yagabe na toga ne sɛbɛɛ a ngwõtala pepe tala tala ma. 2 Mɛ sɔkoba fa ngwĩ za, ngwõ sa sɔgɔ ta. A kãe ti wɔkara sɔkɔba fa bo kãe, ngwĩ togo ti Urisi. A do ti wɔkara zara do. Diragõ ya barika kɔ ya fangama tanga kware kɔ ya ngwonakɔmabe pera ma. 3 Ngwona sɔkɔba fa ngwõtulu na tala tɛ wɔkara a maba fɔ ya wiri siri ma. Ngwona ba do ngwĩ mane na yɛ, ngwõ kɛnɛ. Lagakõ ma kɔma pepe kaba sɔkɔba fa ta da na hõ dɔ a ma. 4 Ye diragõ yirebɛ kamasɔrɔ a ngwonakɔmabe pere ngwona sɔkɔba fa ma. Ye ngwona sɔkɔba fa yirebɛ mɛ hõ da: We ngwona sɔkɔba fa nemɛ ti? Kɔ ngwõ sebɛna kwini? 5 Sɔkɔba fa fanga gũ hõ ye yɛrɛ yirebɛ hõ Wuro togo yaga. A ngwonakɔmabe gũ sɔma ma hõ da ta yɛgɛ kepɔla ne nɔma pɔla kɔrɔ hõ. 6 A dofɔga hõ Wuro vini. A Wuro togo yaga hõ na ta zogokõ togo yaga hõ wurokõ hõ tangare toga yaga. 7 A ngwonakɔmabe gũ hõ Wuro ta sɔma kwini hõ sebɛbe gũ ye ma. A ngwonakɔmabe gũ mɛ si sɔma kɔ sɔma sifa pepe kɔ bɛrɛda pepe kɔ gana pepe ma. 8 Lagakõ ma sɔma pepe tala tala na ngwona sɔkɔba fa yirebɛ. Ngwõ kɔrɔ yewɔ ngwĩye toga ha sɛbɛɛ Gwano na yɛyi ta sugunɔmabe na kitabu hõ na dofɔga diniya tege sanga ma ga. 9 Turu ti ngwĩ ta, ngwõ daga mɔ rɛ. 10 Ne sõ bo daga kyɛ kaso hõa, ngwona te na kyɛ kaso hõ. Ne sõ bo daga yɛɛ kɔ tabaku nemɛ, ye na ngwõ yɛ kɔ tabaku nemɛ. Ngwõ yena Wuro ta sɔma daga somɔnabe ta hõ lanabɛbe ta. 11 Ngwõ timi mɛ sɔkɔba fa za ngwĩ tuma sa lagakõ hõ. Byɛ̃ pɔla mane ti a ta wɔkara gwano. A mane bɛri wɔkara diragõ. 12 A bara ta kɔ gwere sɔkɔba fa ta fanga nemɛ a nyono na. Ngwona gwere sɔkɔba fa ngwĩ ta ba do mane na yɛ, nka a hõ kɛnɛ, a tɛ lagakõ kɔ a ma sɔma pepe hõ ngwõ yirebɛ. 13 A mane kabako da yee ta fɔ a mane togo zibɛ hõ tuma wuro hõ, hõ na lagakõ ma sɔma pepe nyono na. 14 A sebɛbe gũ hõ kabako da ngwĩye ta sɔkɔba fa nyono na, a lagakõ ma sɔma pepe firebɛ kɔ ngwõwɔ nemɛ. A yera lagakõ ma sɔma ma da sɔkɔba fa ngwĩ ma mane ba kɔ tabaku nemɛ a ma siri ga, ye ngwõ dya tetɛre hõ na yirebɛ. 15 Fanga pera ma hõ nyunu ka sɔkɔba fa dya hõ ngwõfatɔ ngwona sɔkɔba fa dya hõ bɛri. Sɔma ngwĩye ha dyã sɔkɔba fa dya yirebɛ ga, a fanga gũ hõ ngwõwɔ pepe yɛ mɛ. 16 Ngwona sɔkɔba fa fanga dɛ sɔma pepe ma, ye tagamasɛ̃ ta ye digesoro ma kɔ ye kini ma. Ngwõ kɔrɔ sɔma silala kɔ sɔma yee, fangamɛ kɔ fangadãe, vɛnɔma kɔ tɛrɛ. 17 Sõ si ha sebɛne fa tɛrɛ wala hõ fa zabire ne ngwona tagamasɛ̃ mane ti a ma ga. Ngwona tagamasɛ̃ ngwõ sɔkɔba fa togo wala a na numero ngwĩ ngwõ kanya kɔ ngwona togo nemɛ. 18 Sõ mako ti kakirikɔmabe na rɛ. Kakiri ti ngwĩ ta, ngwõ sebɛne sɔkɔba fa togo do zyo, ngwõ do ngwõ sõ togo do. Ngwona numero ngwõ zokonala ane kesaa ne nɔma konala.
141 Ngwõ timi mɛ sege hõ Gwano za, a ne taa Siyõ tolo ma. Sɔma sana zolo ne kepɔla ane sana naa ne ti kɔ le. Gwano togo kɔ a Tõ togo ne sɛbɛɛ ye kini ma. 2 Mɛ bɛri kõ bo mɔ hõ sa wurokõ hõ. Ngwõ tɛ wɔkara zu na nyaaye dige kõ kɔ wuro gwɛmɛ kõ na yireyi. Mɛ bɛri kõ ngwĩ mɔ, ngwõ tɛ wɔkara kolĩzo kõ, ne kolĩzonate na tuma ngwĩ sanga ma. 3 Ngwona sɔma sana nyaa mane taa fangama tanga kware zĩ hõ kɔ fere sugi naa kɔ somɔlala zĩ hõ ne yirebɛ turu ngwũ sõ. Sõ si ha mane sebɛne ngwona turu sɛmɛ ga fɔ ngwona sɔma sana zolo ne kepɔla ane sana naa, ngwĩye ngwonawɛ hõ tuma lagakõ ma. 4 Ngwõwɔ mane ye na kìnìye to, ye ha mane kwe zɛ kɔ yàra nemɛ ga. Gwano ne ya ngwõ ngwɛ̃ pepe, ngwõwɔ dɔ a ma. Ye ngwonawɛ hõ sa sɔma woro hõ, hõ tɛ perefere na gwereye na Wuro kɔ Gwano ma. 5 Nĩyono si ha gũ ye da hõ ga. Ye zarakebariyasɔma. 6 Ngwõ timi mɛ mɛlɛkɛ za za, a ne tirɛ wurokõ yɔwuru hõ. Bɛrɛda Fɔre na wɛbariyayi ne ti a ta hõ ne yera lagakõ ma sɔma ma kɔ si sɔma pepe kɔ bɛrɛda sifa pepe na bɛri sɔma kɔ gana hõ sɔma pepe. 7 A songo kɔ kõ na yireyi nemɛ da: Ka kwã Wuro na hõ noro dɛ a ma kamasɔrɔ a ta kiti sɔ wakati wiri. Ka wurokõ kɔ lagakõ kɔ nyengezu kɔ pɛ̃zu na tegeta yirebɛ. 8 Mɛlɛkɛ pɔlalo dɔ ngwõ ma. Ngwõ da: Babilone bɛrɛ. Ngwona kuru gwaga bɛrɛ. Awe mane tɛ si sɔma pepe hõ na ta duvɛ̃ mɛnɛ, ngwõ ngwĩ tɛ a ta kakalabe kɔ a ta worababe. 9 - 10 Mɛlɛkɛ saaro dɔ ngwona pɔla ma hõ da kɔ kõ na yireyi nemɛ: Ne sõ bo ne sɔkɔba fa kɔ a dya yirebɛ, a ta tagamasɛ̃ ne ti a kini ma wala a soro ma, ngwona sõ na Wuro ta duvɛ̃ mɛnɛ ngwĩ ngwõ vunu hõ sa a ta zokobalo hõ. Ngwõ kɔrɔ Wuro woro na ba a ta fɔrona. Ngwona worababe na bɛrɛ ngwona te ma kɔ fanga nemɛ. Ngwona sɔma pepe na nyane togo kɔ giribi hõ mɛlɛkɛe na kìnìye kɔ Gwano zĩ hõ. 11 Togo ngwĩ na ye nyane, ngwõ na tyoro na ba wuro hõ fɔ abada. Ngwona sɔma ngwĩye ngwõ sɔkɔba fa kɔ a dya yirebɛ, a togo na tagamasɛ̃ ne ti ye ma, ngwõwɔ ha na lagafiya gũ wuru hõ kwe sĩ hõ ma ga. 12 Ngwõ yena Wuro ta sɔma daga somɔnabe ta, ngwõwɔ ngwĩye kwa Wuro ta fane ma hõ nyo Yesu ma. 13 Ngwõ timi mɛ bɛri kõ bo mɔ hõ tuma wuro hõ. A da ye ma a sɛbɛ da, na dofɔga basyɛ, ngwĩye ngwõ siri Matigi ta bara yena, ngwõwɔ duba nɔmane. Ni na kìnìyi da: Õhõ, ngwõ tĩya. Ye bara sige ngwĩ ta, ye na sebɛ makwɔnabɛ ngwõ na. Ye ta dafɔre dɔ ye timi. 14 Ngwõ timi mɛ sege hõ debino furu za. Bo mane tanga a ma, a tɛ wɔkara sõ bo. Sanu na fangama bãfɔla ne pĩĩ a ngwõ̀ hõ. Sɛlõ na do dyayi ne ti a soro hõ. 15 Mɛlɛkɛ za sa Wuro kõ yuu hõ, hõ songo kɔ kõ na yireyi nemɛ hõ da debino ma tangata ma: Bya sɛlõ bi hõ tugo fere kyɛ̃. Tugo fere kyɛ̃ wakati wiri lagakõ ma. Tugo fere pɔra wɛ. 16 Aiwa, ngwĩ mane tanga debino ma, ngwõ ya sɛlõ sana lagakõ ma, lagakõ ma tugo fere kyɛ̃. 17 Wuro kõ yuu ngwĩ ti wurokõ hõ, mɛlɛkɛ za sa ngwõ hõ, sɛlõ na do dyayi ne ti ngwõ soro hõ mɛ. 18 Mɛlɛkɛ za sa salaka wɛ fa birɛ, fanga ti ngwõ ta togo ma. A bɛri sɛlõ na do dyayite ma kɔ kõ na yireyi nemɛ ya ya sɛlõ na do dyayi bi hõ ya rezɛ̃ turo sɔ, ye nɔmane pɔra wɛ. 19 Mɛlɛkɛ ya sɛlõ sana lagakõ ma hõ lagakõ ma rezɛ̃ nɔmane sɔ hõ ne dira rezɛ̃ na zu sa do na yireyi kɔrɔ hõ, ngwõ ngwĩ tɛ Wuro ta worababe. 20 Ye ngwona rezɛ̃ fɛlo kuru timi. Tõ sa rezɛ̃ zo wɛ do hõ fɔ ya wiri kilometire zosaa nemɛ ma. A ta babe ne wiri syo do hõ garefere ma.
151 Ngwõ timi mɛ tagamasɛ̃ za za wurokõ ma, kabako na tagamasɛ̃ na yireyi. Wɛ sanga ma nyane kopɔra mane ti mɛlɛkɛe kopɔra sera hõ. Wuro ta worababe na wɛ kɔ ngwona da nemɛ. 2 Ngwõ timi mɛ zu na nyaaye za, a tɛ wɔkara vere kɔ togo na nyangamuye. Ngwĩye mane sebɛbe gũ sɔkɔba fa kɔ a dya kɔ a togo na numero ma, mɛ ngwõwɔ za mɛ. Ye ne taa vere na zu do ma. Wuro kolĩzoe ngwĩye pere ye ma, ngwõwɔ ne ti ye sera hõ. 3 Ye ne Wuro ta baratɛta Musa ta yirebɛ turu sõ kɔ Gwano ta yirebɛ turu. Ye da: E Matigo Wuro, Sebɛbenate. Bya tɛda yire, ke kaba ngwõ na. Si sɔma ta fangama, bya soga tele, ye soga na syɛbɛye. 4 Matigi, kɔ ngwõ na kwã be na ga? Kɔ na maga hõ be togo yirebɛ? Bi sonala ngwõ kìnì. Si sɔma pepe na na hõ yolingo be zĩ hõ kamasɔrɔ bya tɛda na teleye ye dɔrɔ. 5 Ngwona da timi Wuro kõ yuu ngwĩ ti wurokõ hõ, mɛ ngwõ do na kibɛyi za. Wuro ta datege na zogokõ ne ti a hõ. 6 Nyane da kopɔra ti mɛlɛkɛe kopɔra ngwĩye sera hõ, ngwõwɔ sa Wuro kõ yuu kɔrɔ hõ. Zogo na nonoyi na kìnìyi na wɔlɔyi ne ti ye moga hõ. Ye dũ ne pɛrɛɛ kɔ sanu na yɔyɔ sɔ fere nemɛ. 7 Ngwona fere sugi naa na tala sanu na zokobala kopɔra pere mɛlɛkɛe kopɔra ma. Ye ne pagaa Wuro ta worababe na, Wuro ngwĩ na suguyi ngwõ na wɔ yɛ fɔ abada. 8 Wuro ta noro kɔ a ta sebɛbe mane tyoro ta. Wuro kõ yuu kɔrɔ hõ pagaa ngwona tyoro na. Sõ si ma sebɛ kwɔ Wuro kõ yuu kɔrɔ hõ ga, fɔ ngwona nyane da kopɔra hõ wɛ, ngwĩye mane ti ngwona mɛlɛkɛe kopɔra sera hõ.
161 Ngwõ timi mɛ bɛri kõ yire bo mɔ hõ sa Wuro kõ yuu hõ. A da mɛlɛkɛe kopɔra ma, ye: Wuro ta worababe ngwĩ ti ngwona zokobala kopɔra kɔrɔ hõ, ka ya ngwõ vunu lagakõ ma. 2 Mɛlɛkɛ na gwereyi ya hõ ya zokobalo kɔrɔ hõ fere vunu lagakõ ma. Sɔkɔba fa ta tagamasɛ̃ mane ti sɔma ngwĩye ma kɔ a dya na yirebɛ sɔma, dare yaga sa ngwõwɔ kɔma ma hõ ne nyane fɔrona. 3 Mɛlɛkɛ pɔlalo ya zokobalo kɔrɔ hõ fere vunu nyengezu ma. Nyengezu tɛ tõ na wɔkara sara na tõ. Nyengezu kɔrɔ hõ fere sugi pepe siri. 4 Mɛlɛkɛ saaro ya zokobalo kɔrɔ hõ fere vunu kɔre kɔ pɛ̃zore ma, ye bere tɛ tõ na. 5 Sebɛbe ti mɛlɛkɛ ngwĩ ta zu ngwõ ma, mɛ ngwõ kõ mɔ. A da: Kìnìnate, bi ngwĩ tye kɔ be mane tye. Be na teleyi ngwõ ngwona kiti da ta yee. 6 Ngwonona? Kamasɔrɔ ye Wuro ta sɔma tõ vunu kɔ purusɔma tõ. Basyɛ be tõ pere ye ma ye ne mɛnɛ. Ye daga kɔ ngwõ nemɛ. 7 Ngwõ timi mɛ bɛri kõ bo mɔ hõ sa salaka wɛ fa birɛ. A da: Namo, Matigi Wuro, Sebɛbenate. Bya kiti da ngwõ kiti na syɛbeye, ye tele. 8 Mɛlɛkɛ naano ya zokobalo kɔrɔ hõ fere vunu sĩ ma. Fanga pere sĩ ma hõ sɔma ngwona kɔ a na tɔbabe nemɛ. 9 Sĩ mane tɔba popopo hõ sɔma ngwona. Ngwona nyane da na fanga ti Wuro soro hõ. Ngwõ yena ye Wuro togo yaga. Ye ma dyã ye zugo katira ya kakye na hõ Wuro yirebɛ ga. 10 Mɛlɛkɛ kooro ya zokobalo kɔrɔ hõ fere vunu sɔkɔba fa ta fangama tanga kware ma. Tunungu kwɔ a ta fangamabe na bi pepe hõ. Sɔma ye nĩyono nɔma ye ta nyane yena. 11 Ye wurokõ hõ Wuro togo yaga ye ta nyane kɔ ye ta dare yena. Ye ma dyã ye kɔrɔ bere ye ta dayaga na ga. 12 Mɛlɛkɛ konalalo ya zokobalo kɔrɔ hõ fere vunu Ufirate ku ma. Ku yara ngwõfatɔ hõ sogo tetɛrɛ fangamɛ ma ngwĩye ngwõ na na hõ tuma wurodu hõ. 13 Ngwõ timi mɛ zini saa za, ye tɛ wɔkara kwiyare, ye mane sa diragõ do hõ kɔ sokɔba fa do hõ kɔ faneta na nĩyõsɔta do hõ. 14 Ngwõwɔ ngwõ zini ni. Ye kabako da ta. Ngwona zini saa ya lagakõ pepe na fangamɛ birɛ ngwõfatɔ ye hõ ngwõwɔ kwe Sebɛbenate Wuro ta kɔ gwaga na kũ yena. 15 Sãsu No da: Segerɛ, ma na wɔkara pano. Ngwĩ ngwõ wɔ ye nyono na hõ kwa ya zogo ma ngwõfatɔ a ka na ya komagwelɛ̃gwelɛ̃ ga, sɔma ka na ta piri do za ga, ngwõ tɛ duba no na. 16 Ye ya ye kwe bo piri bo ma, ye da Haramagedõ Heburu da hõ. 17 Mɛlɛkɛ kopɔraro ya zokobalo kɔrɔ hõ fere vunu panga ma. Bɛri kõ na yireyi sa Wuro kõ yuu hõ, hõ sa fangama tanga kware birɛ. A da: Ye tɛ wɛ. 18 Wuro mumulu hõ gwɛmɛ. Wuro dige. Lagakõ sɔma fɔrona. Lagakõ ha mane pya sɔma zɛ yee nemɛ si ga na dofɔga sɔma tege sanga ma fɔ ya wiri basyɛ ma. 19 Ngwona kire gwaga yaga hõ sɔdini saa. Si sɔma ta kire bɛrɛ. Wuro kakiri mane dige Babilone na yiregwagayi na ngwõfatɔ a hõ ya duvɛ̃ pera ma a mɛnɛ, ngwĩ ti a ta zokobalo hõ, ngwõ ngwĩ tɛ a ta worababe na. 20 Zu na kori da pepe bɔra zu hõ. Tola ma zɛ titiri mɛ ga. 21 Wuro dɔgɔlɔ na yiregwagaye zi hõ tuma wuro hõ. Ye pepe tala tala kilo kepɔla ne nɔma pɔla nemɛ wa. Ngwõ bɛrɛ sɔma ma hõ tuma wuro hõ. Sɔma Wuro togo yaga ngwona wuro dɔgɔlɔ ta nyane yena. Ye na nyane mane yire fɔrona.
171 Zokobala kopɔra ti mɛlɛkɛe kopɔra ngwĩye sera hõ, ngwõwɔ na sonala na da mɛ ma ye: Na bɛ. Kiti da ngwĩ na bɛrɛ kakala tɛ yà ma ngwĩ togo sa, ma na ngwõ dɔrɔ be ma. Ngwona kakala tɛ yà, ngwõ ngwona kire gwaga ngwĩ tanga zu na nyaaye do ma. 2 Lagakõ ma fangamɛ mane kakalabe ta kɔ le. Lagakõ ma sɔma zĩ piri a ta duvɛ̃ ta, ngwõ ngwĩ tɛ a ta kakalabe na. 3 Ni na kìnìyi zi mɛ ma. Mɛlɛkɛ ya kɔ mɛ nemɛ hõ ya gwɛnɛgɛ bo hõ. Mɛ yà na tangayi za sɔkɔba fa na pɛnɛyi ma. Wuro togo na yagabɛ na toga ne sɛbɛɛ ngwona sɔkɔba fa kõ pepe ma. Ngwõtala kopɔra kɔ byɛ̃ fũ ne ti a ta. 4 Zogo pɛnɛ sanya kɔ zogo pɛnɛ bɛ̃bɛ̃ mane ti ngwona yà mogo hõ. A ne bɛgɛɛ kɔ sanu kɔ dɔge na terebaye kɔ moga hõ kyɛ dɛnɔma na terebaye nemɛ. Sanu na zokobalo ne ti a soro hõ. Ngwõ ne pagaa kɔ da na yagayagaye kɔ a ta kakala da na dõõye nemɛ. 5 Togo mane sɛbɛɛ ngwona yà kini ma. Ngwõ bunu na togo. A da: Babilone na yiregwagayi, kakala tɛ yàra kɔ lagakõ ma da na yagayagaye pepe vɔrɔ sye. 6 Mɛ ngwona yà za, a zĩ ne piri kɔ Wuro ta sɔma tõ kɔ Krista na syɛrɛ tõ nemɛ. Mɛ a za ngwĩ sanga ma, mɛ kaba ngwõ na fɔrona. 7 Mɛlɛkɛ da mɛ ma ye: Ngwonona be kaba ngwõ na? Ngwona yà kɔ sɔkɔba fa, a tanga ngwĩ ma, ngwõtala kopɔra kɔ byɛ̃ fũ ti ngwĩ ta, ma na ngwõwɔ na bunu da yera be ma. 8 Be sɔkɔba fa ngwĩ za, ngwõ mane sugu nka a ha sugu titiri ga. A na sa ngwona wura gwaga na tunungunayi kɔrɔ hõ, hõ ya ye yɛ do hõ. Lagakõ ma sɔma ngwĩye toga ha sɛbɛɛ sugunɔmabe na kitabu hõ ga, na dofɔga diniya tege sanga ma, ngwõwɔ na ngwona sɔkɔba fa za hõ kaba a ta da na. A mane sugu, a ba sugu titiri ga. A na bere ye dɔrɔ yɛ. 9 Sõ daga hõ kakiri gũ hõ kakirikɔmabe gũ ngwona da na. Ngwona yà tanga tola kopɔra ngwĩye ma, ngwõwɔ ngwona ngwõtala kopɔra. Ye tɛ fangamɛ kopɔra na mɛ. 10 Ye na sɔma koo bɛrɛ wɛ. Tala tye basyɛ. Tala ba na dɛ̃ ga. Ngwõ hõ na na ngwĩ sanga ma, a ha na syedɛrɛ ga. 11 Sɔkɔba fa ngwĩ mane sugu nka a ha sugu titiri ga, ngwõ ngwona fangama na sɔma korosono. A sa ngwona fangamɛ kopɔra hõ mɛ hõ ya ye yɛ do hõ. 12 Be byɛ̃ fũ ngwĩya za, ngwõwɔ fangamɛ fũ ngwĩye ha ya fangamabe gũ dɛ̃ ga. Nka yewɔ kɔ ngwona sɔkɔba fa na kwe fangamabe gũ hõ wakati tala ta. 13 Ye kɔrɔ pepe tala. Ya ya sebɛbe kɔ ya fanga pere sɔkɔba fa ma. 14 Ye na Gwano kwini. Gwano na sebɛbe gũ ye ma kamasɔrɔ awe ngwõ matige ta Matigi kɔ fangamɛ ta Fangama. Ngwĩye ti kɔ le, ye ngwõwɔ a ngwĩye wiri ne dɛ̀gɛ̀, ngwĩye ngwõ nyo a ma. 15 Mɛlɛkɛ da mɛ ma: Be zu ngwĩye za, kakala tɛ yà tanga ngwõ ngwɛ̃, ngwõwɔ sɔma bɔ kɔ zamɛ nyaa kɔ si sɔma ngwĩye si da nyaa bɛri. 16 Be byɛ̃ fũ ngwĩye za, ngwõwɔ kɔ sɔkɔba fa na kakala tɛ yà koneya hõ fere pepe dɛ̃ a ta na kõ to gwelɛ̃gwelɛ̃ na na kika nɔma na na wɔrɔ ngwona togo hõ. 17 Wuro ye yɛrɛ dungo ka ye kɔrɔ hõ. Ye ya miri ta tala hõ ya ngwonakɔmabe pere sɔkɔba fa ma fɔ Wuro ta bɛrɛda hõ dopaga. 18 Mɛlɛkɛ da: Be yà ngwĩ za, ngwõ kire gwaga ngwĩ ngwonakɔmabe ta lagakõ ma fangamɛ ma.
181 Ngwona da timi ma, mɛ mɛlɛkɛ za bo za, a ne zi hõ tuma wuro hõ. Fanga na yireyi mane ti a ta. A ne wɔlɔ fɔ a kini sabɛ lagakõ pepe ma. 2 A songo kɔ kõ na yireyi nemɛ hõ da: Kire gwaga Babilone bɛrɛ, a bɛrɛ. A tɛ zini ta kõ na kɔ zini yaga pepe ta tanga do kɔ yala dõõ kɔ yala furo pepe ta tanga do. 3 Si sɔma pepe a ta duvɛ̃ mɛnɛ. Ngwõ kɔrɔ a ta kakalaba na yagayi. Lagakõ ma fangamɛ kakalabe ta kɔ le. Lagakõ ma dyakotɛre tɛ ferekɔma na a ta ferekɔmabe barika hõ. 4 Ngwõ timi mɛ bɛri kõ bo mɔ hõ sa wurokõ hõ. A da: Na kɔma, ka sa Babilone hõ ngwõfatɔ ka ka na kwe kɔ le a ta kakye na ga. Ka ka na a ta nyane na yireyireye bɔ gũ ga. 5 A ta kakye wiri fɔ wurokõ hõ. Wuro ye kakiri to a ta tɛda yaga na. 6 A ngwĩ fa ta ka na, ka ngwõ nemɛ ta a na mɛ. Ka a ta nyane ta pɔla hõ kanya kɔ a ta tɛda nemɛ. A mɛnɛ fa ngwĩ pere ka ma, ka ngwõ nemɛ na mɛnɛ fa na sigeyi pera ma. 7 A ta fere kɔ a ta noro nyaa ngwɛne, ka nyane kɔ ninabano nyaabɛ yee nemɛ si hõ na pera ma. A da ye yɛrɛ kɔrɔ hõ, ye ye tanga ngwɛ̃ wɔkara fangama yà. Ye ye ha yɔfuro yà ga. Ye mɔgɔ da ha na ye gũ fyu ga. 8 Ngwõ yena nyane da ngwĩ tetɛrɛ a ma, ngwõ na na kɔ tala ma, siri kɔ nyenzayo kɔ wu gwaga. A na ngwɛne togo hõ. Ngwĩ na kiti sɔ a ma, ngwõ Sebɛbenate. 9 Lagakõ ma fangamɛ ngwĩye ngwõ mane kakalabe ta kɔ le hõ fere nyaa gũ, ngwõwɔ hõ na na ngwɛne tyoro za ngwĩ sanga ma, ye na mɔgɔ hõ songo a yena. 10 Ye na taa dɛrɛ do hõ a ta nyane na kũ yena hõ da: Be lagayireno sege, kire gwaga Babilone, kuru na yiregwagayi. Bya nyane na lere tala legelege ma. 11 Lagakõ ma dyakotɛre na mɔgɔ hõ songo ninabano ta a yena kamasɔrɔ sõ si ha na ye ta dyako tɛ fere tɛrɛ titiri ga. 12 Sanu na dyako tɛ fere kɔ gwana furo kɔ dɔge na terebaye kɔ dɛnɔma na terebaye kɔ zogo nono na fɔroyi kɔ zogo pɛnɛ sanya kɔ sowa na zogo kɔ zogo pɛnɛ kɔ sɔrɔ sifa pepe ngwĩye gũ ba kɔ kɔrɔ nyini na fere pepe kɔ danya na fere kɔ bala na fere kɔ dɔge fɔre na fere. 13 Ye na bɔ ngwõ kanɛli kɔ ngwunu dya fa kɔ nyi na ngwunu dyaye kɔ wusu fa na ngwunu dyayi kɔ duvɛ̃ kɔ nyi kɔ fɔgɔ kɔ dugo kɔ nyangane kɔ gware kɔ syori kɔ wotori kɔ tɛrɛ kɔ sɔma yɛrɛ mɛ. 14 Ngwona dyakotɛre da ngwona kire gwaga ma: Fere pepe ngwĩye na wu mane ti be na, ngwõwɔ birɛ dɛrɛ be na. Fere ngwĩye ngwõ fɔro hale, ne sara ne ti ye na, be ha na ngwõwɔ za titiri ga. Ye na fire be na. 15 Ngwona fere na dyakotɛre ngwĩye tɛ ferekɔma na a barika hõ, ngwõwɔ na taa dɛrɛ do hõ a ta nyane na kũ̀ yena. Ye na mɔgɔ hõ songo ninabano ta. 16 Ye na da: Ngwona kire gwaga lagayireno sege rɛ. A mane tɛ wɔkara zogo nono na fɔroyi kɔ zogo pɛnɛ sanya kɔ zogo pɛnɛ mane ti a mogo hõ. A mane ye yɛrɛ tetɛrɛ kɔ sanu kɔ dɔge na terebaye nemɛ. 17 Ngwona nafɔro pepe yaga lere tala kɔrɔ hõ. Nyengezu ngwõ̀ ma kororekɔma pepe kɔ ngwĩye ngwõ ya nyengezu ngwõ̀ ma kɔ korore kɔrɔ hõ baratɛre, ngwõwɔ taa dɛrɛ do hõ. 18 Ya ta ngwɛnebe na tyoro za hõ songo da: We kuru ngwõ bo kire gwaga nemɛ za? 19 Ye yɛgɛ turu ne dira ye ngwã hõ, hõ mɔgɔ hõ songo ninabano ta hõ da ye: Ngwona kire gwaga lagayireno sege. Nyengezu ma kororekɔma pepe a ta fere tɛrɛ hõ tɛ ferekɔma na. Fere pepe yaga lere tala kɔrɔ hõ. 20 Bi wurokõ, be ni hõ dya a ta da na. Wuro ta sɔma kɔ fanene kɔ purusɔma, ka ni hõ dya mɛ. Wuro ka mone wa a hõ. 21 Mɛlɛkɛ na barikamayi dɔgɔno bi, ngwĩ tɛ wɔkara yulu na yiregwagayi. A ngwõ dira nyengezu hõ, hõ da: Ngwona kire gwaga Babilone na dirɛ kɔ fanga na yireyi nemɛ yee nemɛ si. A ha na zɛ titiri ga. 22 Kolĩzotumasɔma kɔ kininitumasɔma kɔ pĩyopɛ̃sɔma, ngwõwɔ si kwɛ̃ ha na mɔ be kɔrɔ hõ titiri ga. Baratɛta si ha na gũ be kɔrɔ hõ titiri ga. Ke ha na dugo dĩ kõ mɔ titiri ga. 23 Lãpa kini ha na zɛ be hõ titiri ga. Bya dyakotɛre mane lagakõ ma fangamɛ. Be mane si sɔma firebɛ bya kyonobɛbe ta. 24 Fanesɔma tõ kɔ Wuro ta sɔma tõ kɔ ye ngwĩye pepe yɛ lagakõ ma, ngwõwɔ tõ, ngwõ pepe zɛ Babilone kɔrɔ hõ. Ngwõ yena Wuro mana yaga.
191 Ngwona da timi ma, mɛ songo kõ bo mɔ, a ne ti wɔkara wurokõ hõ zamɛ nyaa dige kõ. Ye da: Aleluya. Kisibe kɔ noro kɔ sebɛbe ngwõ kyà Wuroyi. 2 A ta kiti ngwõ kiti da na syɛbɛye na teleye. A mane kiti sɔ ngwona kakala tɛ yà ma ngwĩ togo sa. Ngwõ mane lagakõ yaga kɔ ya kakalabe nemɛ, a ngwõ yaga hõ ya baratɛre na tõ na mone wa a hõ. 3 Ye da yɛ mɛ ye: Aleluya. A na tyoro ba abada fɔ sanga tege ma. 4 Somɔlala kyoro ne nɔma naa kɔ fere sugi naa zi bɛrɛ lɔ ma hõ Wuro yirebɛ, awe ngwĩ tanga fangama tanga kware ma. Ye da: Amina, Aleluya. 5 Bɛri kõ bo sa fangama tanga kware birɛ hõ da. Wuro ta baratɛre, ka pepe, kɔ ki ngwĩye ngwõ kwã a na, sɔma silala kɔ sɔma yee, ka kyà Wuro yirebɛ. 6 Ngwõ timi mɛ songo kõ mɔ, a ne wɔkara zamɛ nyaa dige kõ kɔ zu nyaa dige kõ kɔ wuro gwɛmɛ kõ na yireyi. Ye da. Aleluya, Matigi, kyà Sebɛbenate Wuro kwɔ a ta fangamabe hõ. 7 To ke ni hõ dya hõ zi hõ Wuro yirebɛ kamasɔrɔ Gwano ta damarabe wiri. A ta yà ye yɛrɛ tetɛrɛ na wɛ. 8 Ye da a sebɛne zogo na fɔroyi na wɔlɔyi na kìnìyi ka ye mogo hõ. Ngwona zogo na fɔroyi ngwõ tɛ wɔkara Wuro ta sɔma ta telebe na da. 9 Mɛlɛkɛ da mɛ ma ye ma sɛbɛ. Ye ngwĩye pepe wiri hõ na damara sõ zõfa zõ, ngwõwɔ ni hõ dya. Ngwõ timi a da: Ngwõwɔ ngwõ Wuro ta bɛrɛda na syɛbɛye. 10 Mɛ zi bɛrɛ a we, mɛ mane tyata na yirebɛ. Nka a da ye mɛ ka ngwõ ta ga. Ye yi mɛ nemɛ baratɛta. Ye mɛ syenɔmane ngwĩye ngwõ Yesu na syɛrɛbe ta, ya ngwõwɔ nemɛ mɛ. Ye mɛ Wuro yirebɛ. Yesu na syɛrɛbe, ngwõ purusɔma ta bɛrɛda sɛbɛngwõ̀. 11 Ngwõ timi mɛ wurokõ do na kibɛyi za hõ syo furu za kɔ a ma bata. Ngwõ togo ti Saratipagata kɔ Syɛbɛyi. A kiti sɔ hõ kũ kwini kɔ telebe nemɛ. 12 A nyena mane kini wɔkara toga kini. Fangama bãfɔlɛ na nyaaye ne pĩĩ a ngwõ̀ hõ. Togo na sɛbɛyi ne ti a ta. Sõ si ha ngwona togo tɔ̀ awe yɛrɛ timi ma ga. 13 Zogo ne ti a mogo hõ, ngwona zogo ne mɛnɛbɛ tõ na. A togo ti Wuro ta Bɛrɛda. 14 Wuro hõ kũ kwini sɔma dɔ a ma. Ye ne tanga syori furo ma. Zogore nono na furoye na kìnìye mane ti ye moga hõ. 15 Tabaku do na dyayi na kogeyi ne sa a do hõ. A na si sɔma vuro kɔ ngwõ nemɛ. A na ngwonakɔmabe ta ye ma kɔ balo gwanga nemɛ. A na rezɛ̃ fɛlo Sebɛbe pepe na te Wuro ta rezɛ̃ na zu wɛ do hõ, ngwõ ngwĩ ngwõ Wuro ta worababe na yagayi. 16 Togo bo mane sɛbɛɛ a ta zogo kɔ a kwano ma da: Fangamɛ ta Fangama kɔ matige ta Matigi. 17 Ngwõ timi mɛ mɛlɛkɛ na taayi za sĩ ma. Yala pepe ngwĩye ngwõ tirɛ wuro hõ, a songo kɔ kõ na yireyi nemɛ hõ da ngwona yala ma: Ka na kwe hõ Wuro ta zõfa na yireyi bɔra. 18 Ka na fangamɛ na kikye bɔra kɔ kũ ngwonakɔma kɔ sorodase na kikye. Syori na kikye kɔ ye ma ba sɔma. Sɔma pepe na kikye, tɛrɛ kɔ vɛnɔmane, sɔma yee kɔ sɔma silala mɛ. 19 Ngwõ timi mɛ sɔkɔba fa kɔ lagakõ ma fangamɛ kɔ ye ta kũ kwini sɔma na kweye za. Ye da ye ngwona syo ma bata kɔ a ta kũ kwini sɔma kwini. 20 Ye mane ngwona sɔkɔba fa fɔga na ka kaso hõ kɔ ngwona faneta na nĩyõsɔta mɛ. Ngwona faneta na nĩyõsɔta mane kabako da ta sɔkɔba fa zĩ hõ, hõ sɔma firebɛ kɔ ngwõwɔ nemɛ. Ngwõ kɔrɔ sɔkɔba fa ta tɔ̀bɛ dɛɛ ngwĩye ma kɔ a dya na yirebɛ sɔma. Ngwona sɔkɔba fa kɔ ngwona faneta na nĩyõsɔta, ye pepe pɔla na suguyi kwe dirɛ wura gwaga hõ togo na yiregwagayi hõ. Ngwona togo mulu kɔ giribi nemɛ. 21 Syo ma bata ta tabaku ngwĩ sa a do hõ, ngwõ ne sɛrɛ yɛ. Yala pepe nyingi ye na kikye na.
201 Ngwõ timi mɛ mɛlɛkɛ za, a zi hõ tuma wurokõ hõ. Wura gwaga na tunungunayi na koro sogolɔ kɔ balazɔgɔre na yireyi ne ti a soro hõ. 2 A diragõ fɔga, ngwona sã na biriyi. Ngwõ kɔrɔ zini ngwonate wala Setane. A ne pɛrɛ ngwõfatɔ a dɔgɔ zofũ ta pɛrɛ hõ. 3 Mɛlɛkɛ na a dira ngwona wura gwaga na tunungunayi kɔrɔ hõ, hõ koro sɔgɔ hõ tagamasɛ̃ dɛ a ma ngwõfatɔ a ka na si sɔma firebɛ titiri ga fɔ ngwona dɔgɔ zofũ hõ fɔno. Ngwõ timi a na firi hõ wakati zɔgɔta ta dɛ̃. 4 Ngwõ timi mɛ fangama tanga kwara za. Ngwĩye ngwõ tanga ye ma, ngwõwɔ sebɛbe gũ hõ kiti sɔ sɔma ma. Ye mane sɔma ngwĩye ngwa sɔ Yesu na syɛrɛbe kɔ Wuro ta bɛrɛda yena, mɛ ngwõwɔ ni za. Ye ha ngwona sɔkɔba fa kɔ a dya yirebɛ ga. Sɔkɔba fa ta tɔ̀bɛ ha mane ti ye kini kɔ ye sera ma mɛ ga. Mɛ ngwõwɔ za. Ye ye bere sugu yɛ hõ tanga kɔ Krista nemɛ fangamabe na dɔgɔ zofũ kɔrɔ hõ. 5 Bɔ sara sɛrɛ ha na ngwini ga fɔ ngwona dɔgɔ zofũ hõ dopaga. Ngwõ ngwõ sara ngwinibe na gwereyi. 6 Ngwĩye ngwõ nii gũ sara ngwinibe na gwereyi na, ngwõwɔ duba nɔmane. Siri na pɔlalo ha na sebɛbe gũ ye ma ga. Ye na tɛ Wuro kɔ Krista ta salakawɛre na. Ye na tanga kɔ Krista nemɛ fangamabe na hõ dɔgɔ zofũ ta. 7 Dɔgɔ zofũ dopaga wɛ timi ma, Setane na firi hõ sa ya kaso hõ. 8 Si sɔma ngwĩye ti diniya bi pepe hõ, a na ya ngwõwɔ firebɛ, ngwõ Gogi kɔ Magogi. A na ye kwe hõ kũ kwini. Ye na nyaa wɔkara nyengezu do ma bãyɛgɛ. 9 Ye na zãzã lagakõ bi pepe hõ. Ye na Wuro ta sɔma ta kũ kwini do pepe zamilelu kɔ Wuro ta kuru na kanuyi. Nka togo zi hõ tuma wuro hõ, hõ ne ngwona. 10 Ngwõ timi Setane ngwĩ mane firebɛ, ngwõ dirɛ ngwona togo na yiregwagayi kɔrɔ hõ, sɔkɔba fa kɔ fanene na nĩyõsɔta ti ngwõ ngwɛ̃. ye na nyane wuru hõ kwe sĩ hõ ma abada fɔ abada. 11 Ngwõ timi mɛ fangama tanga kware na yiregwagayi na furuyi za, kɔ ngwĩ ngwõ tanga a ma. Lagakõ na gwereyi kɔ wurokõ na gwereyi zãzã ye wa a zĩ hõ. Ye ma zɛ titiri ga. 12 Ngwõ timi mɛ sara pepe za, sɔma yee na sara kɔ sɔma silala na sara. Ye ne taa fangama tanga kware zĩ hõ. Ye kitabu za do kɔba mɛ, ngwõ sugunɔmabe na kitabu. Kiti mane sɔɔ sara ma hõ kanya kɔ ngwona da nemɛ ngwĩye mane sɛbɛɛ ngwona kitabu hõ. Ngwõ kɔrɔ ye ta tɛda. 13 Sara ngwĩye ngwõ ti nyengezu hõ, ye ngwõwɔ sabɛ. Ngwĩye ngwõ siri ne ti wara hõ, ye ngwõwɔ sabɛ ngwɛ̃ mɛ. Kiti mane sɔɔ ye pepe tala tala ma hõ kanya kɔ ye ta tɛda nemɛ. 14 Siri kɔ wara kwe dirɛ wuru na yiregwagayi na togonayi kɔrɔ hõ. Ngwona wura gwaga ngwõ siri na pɔlalo. 15 Sõ ngwĩ togo ha sɛbɛɛ ngwona sugunɔmabe na kitabu hõ ga, ngwona te na dirɛ wuru na yiregwagayi na togonayi kɔrɔ hõ.
211 Ngwõ timi mɛ wurokõ ngwũ kɔ lagakõ ngwũ za. Wurokõ na gwereyi kɔ lagakõ na gwereyi fɔno. Nyengezu ha tye titiri mɛ ga. 2 Mɛ kuru na kìnìyi Zerusalem ngwũ za mɛ, a ne zi hõ tuma wuro hõ Wuro birɛ. A tetɛrɛ fɔrona wɔkara damoro ngwĩ ngwõ ye yɛrɛ tetɛrɛ ye banga ma. 3 Mɛ bɛri kõ na yireyi bo mɔ hõ sa fangama tanga kware birɛ. A da: Wuro ta tanga do ti sɔma woro hõ basyɛ. Awe na tanga ye birɛ, ye na tɛ a ta sɔma na. Wuro yɛrɛ na ti kɔ lɔ, a na tɛ ye ta Wuro na. 4 A na nyenazyo pepe vɔrɔ ne wa ye nyena ma. Siri ha na tye titiri ga. Ninabano ha na tye titiri mɛ ga wala mɔgɔ wala nyane kamasɔrɔ gwere fere pepe fɔno. 5 Ngwĩ ngwõ tanga fangama tanga kware ma, ngwõ da: Segerɛ, ma fere pepe ta ngwũye na. Ngwõ timi a da mɛ ma ye ma ye sɛbɛ kamasɔrɔ ngwona bɛrɛda ngwõwɔ bɛrɛda na syɛbɛye, sõ daga la ngwĩye na. 6 Ngwõ timi a da mɛ ma ye ye tɛ wɛ. Yawe ngwõ Alifa kɔ Omega, ngwõ kɔrɔ dofɛgɛ do kɔ wɛ do. Ye mulu ti ngwĩye na, ya na sugunɔmabe na zu pere ngwõwɔ ma, ye ngwõ mɛnɛ zana. 7 Wuro da: Ngwĩ hõ sebɛbe gũ, ngwõ na bo da gũ ne ta—Ma na tɛ a ta Wuro na, a na tɛ ne no na. 8 Nka kwãsinine kɔ lanabɛbariya sɔma kɔ sɔma ngwĩye ngwõ dagabariya da ta kɔ sɔmayɛsɔma kɔ kakalatɛre kɔ kyonobɛe kɔ fyãkaene kɔ nĩyõsɔre pepe, ngwõwɔ na ye nii gũ wuru na yiregwagayi kɔrɔ hõ, togo kɔ giribi syuu ngwɛ̃. Ngwõ siri na pɔlalo. 9 Zokobala kopɔra ngwĩye pagaa nyane na wɛbɛye kopɔra na, ngwõwɔ mane ti mɛlɛkɛe kopɔra sera hõ. Ngwona mɛlɛkɛ na sonala na bɛri mɛ ta. A da: Na bɛ, ma na damoro dɔrɔ be ma, Gwano ta yà. 10 Ni na kìnìyi zi mɛ ma. Mɛlɛkɛ ya kɔ mɛ nemɛ tolo na kuroyi ngwõ̀ ma. A ngwona kuru na kìnìyi Zerusalem dɔrɔ mɛ ma. A ne ti zi hõ, hõ tuma wuro hõ Wuro birɛ. 11 Wuro ta noro ne ti a ma. Ngwona kuru ne wɔlɔ wɔkara dɔgɔno na terebaye wɔlɔ ngwɛne. A wɔlɔ wɔkara zasipe na dɔgɔno. A ne kìnì wɔkara dubale. 12 Kulu na kuroyi na zamilelu. Da fumɔla ti a na, mɛlɛkɛe fumɔla ti ngwona da ma ne kɔrɔse. Toga mane sɛbɛɛ ngwona da ma, ngwõ Israyɛli kɔma ta si fumɔla toga. 13 Da saa ti wurodu hõ piri ma. Da saa ne ti wuro nyanɔma piri ma. Da saa ne ti bo wuro nyanɔma piri ma mɛ. Da saa ne ti wurotã piri ma. 14 Ngwona kulu du kyɛ kɔ dɔge fumɔla nemɛ. Gwano ta fanene fumɔla toga ne sɛbɛɛ ngwona dɔge ma. 15 Mɛlɛkɛe ngwĩ mane bɛri mɛ ta, sanu na yerabɛ sɔgɔlo mane ti ngwõ soro hõ. A ne kuru kɔ a da kɔ a na kwala yerabɛ. 16 A kyegɛ naa pepe mane tala. A ta kurobe kɔ a ta tarabe pepe ne tala. Mɛlɛkɛ mane kuru yerabɛ kɔ yerabɛ sɔgɔlo nemɛ. A mane kilometire sana pɔla ane zopɔla wa. A ta kurobe kɔ a ta tɔge kurobe pepe mane tala. 17 Mɛlɛkɛ na na kulu yerabɛ metere kesaafũ ne nɔma pɔla hõ kanya kɔ sɔma ta yerabɛno nemɛ. 18 A na kulu mane tɔge kɔ zasipe na dɔge nemɛ. Ngwona kuru sanu yɛrɛyɛrɛ. A kìnì perepere. 19 Kuru na kulu du mane bɛgɛ kɔ dɔge na terebaye si pepe nemɛ. A du na kyɛ dɔgɔno na gwereyi mane zasipe na dɔgɔno. A na pɔlalo safire. A na saaro agate. A na naano emerode. 20 A na kooro onike. A na konalalo saridwane. A na kopɔraro kirisolite. A na korosono bereli. A na koronono topaze. A na funo kirisopase. A na funalalo yasɛ̃te. A na fumɔlalo ametisite. 21 Ngwona korore fumɔla mane moga hõ kyɛ dɛnɔma na terebaye fumɔla. Koro o koro ngwõ moga hõ kyɛ dɛno tala. Kuru na wisogo mane sanu yɛrɛyɛrɛ, a ne wɔ vere na syɛbɛyi. 22 Mɛ ha mane Wuro kõ yuu za a kɔrɔ hõ ga kamasɔrɔ Matigi Wuro Sebɛbe pepe na te kɔ Gwano, ngwõwɔ a ta Wuro kõ yuu. 23 Ngwona kuru mako ha ti sĩ wala yu na hõ kini sabɛ a ma ga kamasɔrɔ Wuro ta noro ngwõ ngwõ a ta kini. Gwano ngwõ ngwõ a ta lãpa. 24 Diniya hõ si sɔma na ya a na kini na. Lagakõ ma fangamɛ na na hõ kwɔ a kɔrɔ hõ kɔ ya fere nemɛ. 25 A na korore ha na gwolo sĩ hõ ga. Wuru ha na ba ngwɛ̃ ga. Ngwõ yena a na korore ha na gwolo ga. 26 Ye na na hõ kwɔ yɛ kɔ si sɔma ta ferekɔmabe nemɛ. 27 Fa na dõõyi si ha na kwɔ a kɔrɔ hõ ga wala sõ ngwĩ ngwõ dagabariya da ta wala nĩyõsɔta, fɔ sɔma ngwĩye toga ngwõ sɛbɛɛ Gwano ta sugunɔmabe na kitabu hõ.
221 Mɛlɛkɛ ku dɔrɔ mɛ ma, ngwõ sugunɔmabe na zu. A ne wɔlɔ wɔkara dubale. A mane sa Wuro kɔ Gwano ta fangama tanga kware hõ. 2 A ne woro kuru na wisogo woro hõ. Sugunɔmabe na sɔno ti ngwona ku kyegɛ pɔla pepe ma. Ngwona sɔno vɔrɔ kanyena fumɔla dɔ tala kɔrɔ hõ, kanyono tala, yu tala. Ngwona sɔno na dazugo si sɔma kɛnɛbɛ. 3 Wuro fa ngwĩ voda, ngwõ ha na gũ ngwona ngwɛ̃ ga. Wuro kɔ Gwano ta fangama tanga kware na ti ngwona kuru kɔrɔ hõ. Wuro ta baratɛre na a yirebɛ. 4 Ye na a zĩ za. A togo na sɛbɛɛ ye kini ma. 5 Wuru ha na ba ngwɛ̃ titiri ga. Ye mako ha na ti lãpa na kini na ga wala sĩ na kini kamasɔrɔ Matigi Wuro yɛrɛ na ya kini sabɛ ye ma. Ye na ngwonakɔmabe ta fɔ sanga tege ma. 6 Ngwõ timi mɛlɛkɛ da mɛ ma: Ngwona bɛrɛda tĩyã, be daga la ye na. Da ngwĩye ngwõ daga tɛ zɔgɔta, Matigi Wuro ngwĩ ngwõ ya Ni pere purusɔma ma, ngwõ mane ya mɛlɛkɛ fane hõ na ngwona da dɔrɔ ya baratɛre ma. 7 Yesu da: Segerɛ, zɔgɔta ma na na. Ngwĩ ngwõ kwa bo kitabu na fane bɛrɛda ma, ngwõ tɛ duba no na. 8 Mɛ Zã ngwona da mɔ ne za. Mɛ ngwõ za hõ ne mɔ wɛ timi ma, mɛlɛkɛ ngwĩ ngwona da dɔrɔ mɛ ma, mɛ zi bɛrɛ ngwona mɛlɛkɛ kãe we na yirebɛ. 9 A da mɛ ma. Be yɛrɛ kɔrɔse, be ha daga ngwõ ta ga. Mɛ baratɛta wɔkara bi yɛrɛ ane kɔ be syenɔmane na purusɔma. Ngwĩye ngwõ kwa bo kitabu ta bɛrɛda ma, mɛ tala kɔ ngwõwɔ nemɛ. Wuro yirebɛ. 10 Ngwõ timi a da mɛ ma: Ka bo kitabu ta fane bɛrɛda dõ tunungu hõ ga. Da pepe na tɛ wakati vetira. 11 Ngwĩ ngwõ dayagatɛta, ngwõ hõ wɔ ya dayagatɛbe hõ. Ngwĩ ngwõ dõõ, ngwõ hõ wɔ ya dumatɛbe hõ. Ngwĩ ngwõ sõ fɔro, ngwõ hõ wɔ ya sõfɔrobe hõ. Ngwĩ ngwõ kìnì, ngwõ hõ wɔ ya kìnìbɛbe hõ. 12 Yesu da: Segerɛ, zɔgɔta ma na na. Na sɔma sara fere na ne ti ne ta. Ma na sɔma pepe tala tala sara hõ kanya kɔ ye ta tɛda nemɛ. 13 Mɛ Alifa kɔ Omega, ngwõ kɔrɔ gwereyi kɔ lɛlomayi, dofɛgɛyi kɔ wɛbɛyi. 14 Ngwĩye ngwõ ya zogore wa ngwõfatɔ ye hõ sebɛ sugunɔmabe na sɔno no bo zõ ane hõ kwɔ kuru do na kwɔ do hõ, ngwõwɔ tɛ duba nɔmane na. 15 Sɔma yaga na ti ngwona kuru timi, ngwõwɔ kɔ kyonobɛe kɔ kakalatɛre kɔ sõyɛre kɔ fyãkaene kɔ ngwĩye ngwõ nĩyõsɔre, bɛrɛda kɔ tɛda na. 16 Mɛ Yesu na mɛlɛkɛ fane hõ ya ngwona da yera ka ma eglise hõ. Mɛ Fangama Dauda timi sõ. Mɛ kɔ kyɛ do ma mumulu na wɔlɔyi. 17 Ni na kìnìyi kɔ damoro da: Na. Ngwĩ hõ ngwõ mɔ, ngwõ da: Na. Mulu ti ngwĩ na, ngwõ hõ na. Ngwĩ hõ dyã, ngwõ na ngwona sugunɔmabe na zu mɛnɛ zana. 18 Ngwĩye pepe ngwõ bo kitabu ta fane bɛrɛda mɔ, mɛ syɛrɛbe wa ngwõwɔ ma da. Sõ ngwĩ hõ bo ngwona da ma, nyane na yireyi ngwĩye ngwõ sɛbɛɛ bo kitabu hõ, Wuro na ngwõwɔ kwe ngwona teye ma. 19 Ne sõ bo hõ bo wa bo kitabu ta fane bɛrɛda hõ, Wuro na ngwona te nii wa sugunɔmabe na sɔnɔmane hõ. A na a nii wa ngwona kuru na kìnìyi hõ mɛ, ngwõ ngwĩ ta da ngwõ sɛbɛɛ bo kitabu hõ. 20 Ngwĩ ngwõ ngwona tĩyã yera na kìnìbɛ, ngwõ da: Õhõ, zɔgɔta ma na na. Amina, Matigi Yesu na. 21 Matigi Yesu ta nema hõ wɔ ka pepe ta. Amina.