FILIPE KƆMA

¹ Mɛ Pauli kɔ Timote, Yesu Krista ta baratɛre, mɛ̀ bo sɛbɛ fane Wuro ta sɔma ma Filipe kuru hõ, ngwĩye ngwõ la Yesu Krista na kɔ eglise na zɛngɛfɛgɛre kɔ eglise ta baratɛre ma. ² Ke Tõ Wuro kɔ Matigi Yesu Krista hõ nema kɔ syara pere ka ma. ³ Ne mɛ hõ miri kya da na ngwĩ sanga ma pepe, ma barika yera Wuro ma. ⁴ Ne mɛ ne Wuro mɛ ka ma ngwĩ sanga ma pepe, mɛ Wuro mɛ kɔ nihõdyaro nemɛ. ⁵ Ngwonona? Kamasɔrɔ ka mane ne dyema hõ Bɛrɛda Fɔre yera na dofɔga ye na gwere kɔ ma fɔ ya wiri basyɛ. ⁶ Mɛ a tɔ̀ na da Wuro ngwĩ bara fɔre dofɔga ka kɔrɔ hõ, ngwõ na wɔ ye ma hõ ne dopaga fɔ Yesu Krista ta kɔ ma. ⁷ Kya da ti mɛ kɔrɔ hõ, ngwõ tĩyã. Mɛ miri kya da na kamasɔrɔ ka mane kwe bara ta kɔ ne nemɛ, Wuro ngwĩ pere ne ma. Hõ mɛ to kaso hõ bɛ wala hõ mɛ to ma ne Bɛrɛda Fɔre kìnìbe sɔma ma ne sabati, ka kwe ngwona bara ta kɔ mɛ nemɛ. ⁸ Wuro mɛ syere da ka na wu ti ne na fɔrona hõ kanya kɔ Yesu Krista ta kanube nemɛ. ⁹ - ¹⁰ Mɛ Wuro mɛ ka ma da kya kanube hõ yire ya zĩ hõ, ka hõ tɔbe na syɛbɛyi kɔ kakirikɔmabe na dopagayi gũ, ngwõfatɔ ka hõ sebɛ dafɔre dɛ̀gɛ̀ tɔ̀. Yee nemɛ ka na tɛ sɔma kìnì na zarakebariyaye na Krista ta kɔ ma. ¹¹ Mɛ a mɛ da Yesu Krista hõ da na teleye ka ka hõ ngwõfatɔ yirebɛbe kɔ noro hõ dɛ Wuro ma. ¹² Syenɔmane, ma tyata ka hõ bɔ tɔ̀ da, da ngwĩye ngwõ tɛ mɛ na, ngwõwɔ ngwõ tɛ Bɛrɛda Fɔre hõ ya zĩ hõ, ngwõ ha a bare ga. ¹³ Ngwona da yena sɔma ngwĩye ngwõ fangama ta kõ kɔrɔse, ngwõwɔ kɔ sɔma sɛrɛ pepe tɔ̀ da mɛ bara ta Krista ma, ye ngwõ yena mɛ ti kaso hõ. ¹⁴ Syenɔmane na nyaaye ngwĩye mɛ za bɛ kaso hõ, ngwõwɔ ye wora sige Matigi ta da na hõ ne Wuro ta bɛrɛda yera, ye ha kwã ga. ¹⁵ Tĩyã na, ye na bɔ wadyuli ta Krista ta da na kɔ mɛ na kerayabe kɔ dakwiyɛro nemɛ. Nka ye na bɔ ye ta kɔ dyamabe nemɛ. ¹⁶ Ngwõwɔ ye ta kanube yena. Ye tɔ̀ da Wuro bara kalofa mɛ ma hõ Bɛrɛda Fɔre kìnìbɛ sɔma ma. ¹⁷ Nka ye na bɔ ngwĩye Krista ta da yera kɔ dakwiyɛro nemɛ, ngwõwɔ ha ye ta kɔ kɔrɔ na fɔroyi nemɛ ga. Ye dyati da ye na bɔ kwe mya nyane ma hõ ne to kaso hõ. ¹⁸ Ngwõ ha base ga. Hale ye tɛ ngwɛne pepe, ne ye hõ ne ta kɔ kɔrɔ na fɔroyi nemɛ wala ne ye ma ye ta yee ga, ye Krista ta da yera. Mɛ ni hõ dya ngwõ na. ¹⁹ Mɛ na ya zĩ ngwona nihõdyaro na kamasɔrɔ mɛ tɔ̀ da ngwona da na wɛbɛyi na tɛ mɛ hõ tɛ vɛno na hõ sa kaso hõ kya mɛbe kɔ Yesu Krista ta Ni na kìnìyi ta dyemabe barika hõ. ²⁰ Mɛ zigi ti a ma fɔrona da mɛ ha na piri fyu ga. Basyɛ kɔ sanga pepe ma mɛ tyata ne woro sige ngwõfatɔ ne mɛ hõ sugu o, ne mɛ hõ siri o, mya da pepe na yirebɛbe dɛ Krista ma. ²¹ Sugunɔmabe ngwõ ngwono? Ngwõ Krista mya da pepe hõ. Ne mɛ hõ siri, ma nafã gũ. ²² Hõ mɛ na suguyi to, ne mɛ hõ ne sebɛne bara fɔre bɔ ta, mɛ daga ngwĩ fa dɛ̀gɛ̀, ma ha ngwõ tɔ̀ ga. ²³ Mɛ kakiri nyangamu ngwona dadoga pɔla na. Mɛ tyata ya wɔ Krista birɛ, ngwõ fõyi. ²⁴ Nka ne mɛ na suguyi hõ wɔ yɛ, ngwõ fõ ka ma. ²⁵ Mɛ la ye na da ma na wɔ yɛ hõ tanga ka pepe birɛ ngwõfatɔ ka hõ ya zĩ hõ, hõ ni hõ dya lanabɛbe ta da na. ²⁶ Ne mɛ hõ bere ne yɛrɛ gũ ka woro hõ ngwĩ sanga ma, ka na yɛrɛyirebɛbe na tɛno gũ mya da na Yesu Krista barika hõ. ²⁷ Ka yano daga kanya kɔ Krista na Bɛrɛda Fɔre nemɛ. Yee nemɛ, ne ma hõ ya ka birɛ o, ne mɛ ma ya mɛ ga o, ma na mɔ da ka wɔ miri tala ma. Ane Bɛrɛda Fɔre lanabɛbe ngwĩ pere, ka hõ ka nemɛ dyema hõ ngwona lanabɛbe zugi kwini kɔ kɔrɔ tala nemɛ. ²⁸ Ka ka to ka zugi ka kwãbɛ da si na ga. Kya worasigibe na tɛ tagamasɛ̃ na ye ta, da ye na halaki. A na tɛ tagamasɛ̃ na ki ta, ye ka ti kisibe na sogo ma, ngwõ ngwĩ sa Wuro ta. ²⁹ Wuro bo nema pere ka ma ngwõfatɔ ka hõ bara ta Krista ma. A ha ngwõ dama ga, ka hõ nyane a yena mɛ. ³⁰ Ka a za da mɛ mane ti ngwĩ kũ kwinibe hõ, ane ka tɔ̀ da ma ti a hõ hale sɔma, basyɛ ki ti ngwona kũ kwinibe hõ mɛ.

¹ Kya lanabɛbe Krista na, ngwõ fanga na yireyi ka ka hõ ra? A ta kanube ka wora sigebɛ ra? Nemɛkwebe ti ka yɔ kɔ Ni na kìnìyi nemɛ ra? Sena kɔ makare ti ki kɔ ka nemɛ yɔ ra? ² Ka kya miri ta tala hõ na nihõdyaro dopaga. Kanube tala hõ gũ ka hõ, ka kɔrɔ hõ tɛ tala. ³ Ka ka fui si ta kɔ dɛ̀gɛ̀be na kɔrɔ nemɛ ga wala yɛrɛdɔrebe. Nka ka pepe hõ ka yɛrɛ mazibɛ hõ na dyati da ka nemɛ sõ bo fõ kɔ ka nemɛ. ⁴ Ka na sõ si ka miri ye yɛrɛ ta da na ye dama ga, nka ka pepe tala tala hõ miri ka nemɛ bo ta da na mɛ. ⁵ Ngwĩ kɔrɔ nemɛ mane ti Yesu Krista hõ, ngwõ nemɛ hõ gũ ka hõ mɛ. ⁶ Awe mane ti Wuro tino na. A yɛrɛ mane tala kɔ Wuro nemɛ, a ma dyati da ye daga wɔ ngwona talabe hõ ga. ⁷ Nka a ngwõ sabɛ ye na hõ tere tino bi hõ tɛ ke nemɛ na sõ na. A ye dɔrɔ wɔkara sõ. ⁸ A ye yɛrɛ mazibɛ hõ tɛ kwɛ̃fɛgɛta na fɔ ya wiri siri ma. Ngwõ mane tɛ siri na yagayi na ngwĩ ngwõ tɛ kwãgwaga sɔno ma. ⁹ Ngwõ yena Wuro a duro fɔrona. Togo ngwĩ ngwõ yireyi toga pepe ma, ¹⁰ Wuro ngwona togo dɛ a ma ngwõfatɔ wurokõ hõ fere kɔ lagakõ ma fere kɔ lagakõ du we fere pepe hõ yolingo Yesu togo yena. ¹¹ Sɔma pepe hõ taa ye na da Yesu Krista ngwõ Matigi hõ noro dɛ Tõ Wuro ma. ¹² Ne mare, yee nemɛ si, hõ mɛ to ka birɛ ngwĩ sanga ma, ka mane mɔ ne ta. Basyɛ mɛ ha ti ka birɛ titiri ga nka ka daga mɔ ne ta hõ yaloyi gwerena ma. Ka na kwãye kɔ ka na sɔmaye hõ kya kisibe na bara ta. ¹³ Wuro ngwõ bara ta ka kɔrɔ hõ, hõ sebɛbe pere ka ma hõ dyã a yɛrɛ madyama da ma ne ta. ¹⁴ Ka da pepe ta, dumudumu bɛrɛda kɔ dakwiyɛro nii ka ne tye ga. ¹⁵ Ka ngwõ ta ngwõfatɔ ka hõ tɛ zakarakebariyasɔma na kìnìye na. Hõ ka to bo diniya hõ sɔma woro hõ ngwĩye tɛ mɔmagasɔma na ka hõ tɛ Wuro nɔmane na zarakebariyaye na. Ka hõ kini sabɛ ye woro hõ wɔkara wuro hõ mamala kini sabɛ wuru hõ ngwɛne. ¹⁶ Ka ya ye birɛ kɔ sugunɔmabe na bɛrɛda nemɛ. Ne ka hõ ngwõ ta, ma na sebɛ ne yɛrɛ yirebɛ kya da na Krista ta kɔ ma. Ngwõ na a dɔrɔ da mya bara kɔ na yɛrɛnyangabe ha tɛ zana da na ga. ¹⁷ Be lanabɛbe ngwĩ ta, ngwõ tɛ wɔkara salaka ngwĩ pere Wuro ma. Dɔra mɛ yɛrɛ tõ na vunu ngwona salaka ma, ngwõ kɔrɔ ne mɛ hõ siri. Ne ngwõ hõ tɛ, mɛ ni hõ dya ngwõ na hõ kwe ni hõ dya ka pepe ta. ¹⁸ Yee nemɛ si, ki hõ ni ho dya ngwõ na mɛ hõ ni hõ dya kɔ ne nemɛ. ¹⁹ Mɛ zigi ti a ma Matigi Yesu ma da zɔgɔta ma na Timote fane ka birɛ ngwõfatɔ ma hõ kya da mɔ ngwĩ sanga ma, ngwõ na ne woro sigebɛ. ²⁰ Awe sonala ta miri ngwõ tala kɔ mɛye nemɛ kya da na. A ni na bã syɛbe na kya da na. ²¹ Bɔ sɛrɛ pepe ni na bã kɔ ye yɛrɛ ta da nemɛ. Ye ni na ha bã kɔ Yesu Krista ta bara da nemɛ ga. ²² Ka yɛrɛ na tɔ̀ da Timote ya saratipagabe dɔrɔ. A bara ta kɔ mɛ nemɛ Bɛrɛda Fɔre na bara na wɔkara no bara ta kɔ ye tõ nemɛ ngwɛne. ²³ Ngwõ yena ne ma hõ na ne yɛre ta da tɔ̀ ne kìnì, ma na a fane ka birɛ. ²⁴ Mɛ la ye na Matigi Yesu yena da zɔgɔta mɛ yɛrɛ na ya ka birɛ. ²⁵ Mɛ mane dyati da ma daga Epafodite berebɛ na yabɛ ka birɛ, ngwõ mɛ̀ syeno kɔ ne baratɛkweta. Ka mana fane, a na kɔ mya mako fɔro fere nemɛ. ²⁶ Ka na wu ti a na fɔrona, a tyata ka za. Ka mane mɔ da ya pare, ngwõ a ni na bã. ²⁷ Ngwõ tĩyã, a ha mane kɛnɛ ga, a mane tɛ siri na yɛrɛ. Nka Wuro mane makare a na. A ha awe dama ga, a makare mɛ na mɛ ngwõfatɔ ninabano za ka na kwe na ninabano ma ga. ²⁸ Ngwõ yena ma na a fane salesale ngwõfatɔ ka hõ na za hõ ni hõ dya fɔrona. Mya ninabano na wɛ mɛ. ²⁹ - ³⁰ Aiwa, ka a fɔga fɔrona kɔ nihõdyaro nemɛ Matigi barika hõ. Ka daga ngwõ nemɛ na sɔma yirebɛ kamasɔrɔ a mane tyata siri Krista yena. Ka ha mane sebɛne mɛ dyema bara ngwĩ na ga, a mane tyata bono ye yɛrɛ ni hõ, hõ ngwõ ta.

¹ Aiwa, syenɔmane, basyɛ ka ni hõ dya Matigi ta da na. Hõ ne bere ngwona da sɛbɛ ne fane ka ma, ngwõ ha sige mɛ ma ga. A sebɛne tɛ ka ka nyanga. ² Ka ka yɛrɛ kɔrɔse ngwona dayagatɛsɔma na ngwĩye tɛ wɔkara gwegeri. Ngwõwɔ tyata sɔma yɛro. ³ Ngwona yɛrobe ngwõ yɛrobe na zanayi. Ke yɛrobe na syɛbɛyi ta, ke ngwĩye ngwõ Wuro yirebɛ Ni na kìnìyi barika hõ, hõ ke yɛrɛ yirebɛ Yesu Krista ta da na. Nka ke ha ke zigi dɛ komavere na da ma ga. ⁴ Mɛ kwane, mɛ sebɛne ne zigi dɛ komavere na da ma mɛ. Ne bo sõ hõ ne miri da zigi dɛ do ti a ta komavere na da ma, zigi dɛ do ti mɛ ta ngwona da na hõ yaloyi ngwona te ma. ⁵ Ye mane mɛ yɛro ne vɔrɔ kɔ na nyi korosono kɔ ma. Mɛ Israyɛli ta si sõ na bo. Mɛ Bɛ̃zamɛ̃ timi sõ, ngwõ Heburu sõ yɛrɛ. Musa ta tõ ta piri ma na, mɛ mane tɛ Farisyɛ̃ kɔma na bo na, ngwõwɔ ngwĩye kwa tõ ta fane pepe ma. ⁶ Mɛ mane ne nyanga ngwona da na hõ eglise nyane fɔrona. Sõ sebɛne telebe ngwĩ gũ tõ na kwɛ̃fɛgɛbe barika hõ, zarake do si ha mane ti mɛ na ngwona da na ga. ⁷ Nka mɛ mane tono gũ da ngwĩye na, mɛ maga ngwõwɔ hõ Yesu Krista yena. ⁸ A ngwõwɔ dama ga. Mɛ maga da pepe hõ, hõ mya Matigi Yesu Krista na tɔbe dyati da na yireyi hõ yaloyi da pepe ma. Mɛ maga da pepe hõ, hõ ngwõ dyati wɔkara nyamanyama ngwõfatɔ ma hõ Krista gũ hõ kwe tɛ tala kɔ awe nemɛ. ⁹ Mɛ telebe ngwĩ gũ tõ na kwɛ̃fɛgɛbe barika hõ, mɛ ha ngwõ dyati titiri ga. Mɛ telebe ngwĩ gũ basyɛ, ma ngwõ gũ lanabɛbe yena Krista hõ. Ngwona telebe sa Wuro yɛrɛ hõ. A ngwõ pere sɔma ma ngwĩye lanabɛbe ta. ¹⁰ Mɛ ngwĩ fa kya ngwõ bo: Hõ Krista kɔ a ta ngwini da na sebɛbe tɔ̀, hõ ne nii bi a ta nyane da na a ta sirino na. ¹¹ Mɛ zigi ti a ma da mɛ yɛrɛ na ngwini sa sara woro hõ. ¹² A ha tɛ wɔkara mɛ ngwona da pepe gũ ne wɛ ga. Mɛ ha tɛ sõ na dopagayi na ga. Nka mɛ dɔ a ma hõ ne nyanga ngwõfatɔ ma hõ ngwona tongo na sara gũ wɔkara Yesu Krista a gũ na wɛ ngwɛne. ¹³ Syenɔmane, a ha tɛ wɔkara mɛ ngwona sara gũ na wɛ ga, nka mɛ na ngwĩ fa ta ngwõ bo: Ma na sãfire kɔ ne timi fere ta da nemɛ hõ ne nyanga hõ zĩ hõ fere gũ. ¹⁴ Ngwõ yena mɛ tongo fɔ ya wiri tongo tɛgɛ ma ngwõfatɔ ma hõ ngwona sebɛbegũbe na sara gũ. Ngwõ Wuro ta wuro hõ wiribe Yesu Krista barika hõ. ¹⁵ Ke pepe ngwĩye ngwõ pɔra ni ta piri ma na, ke pepe ta miri tɛ yee. Ngwõ pepe na, ne miri zɛ bɔ hõ ne ti ka na bɔ kɔrɔ hõ, Wuro na ngwõ dɔrɔ ka ma. ¹⁶ Hale o, ke ya kanya kɔ da ngwĩye nemɛ fɔ ya wiri basyɛ ma, ka to ke ya zĩ ngwõ na. ¹⁷ Syenɔmane, ka pepe, ka ne tino sɛmɛ. Mɛ̀ mane tino dɔrɔ ka ma. Ngwĩye ngwõ ya ne kanya kɔ ngwona tino nemɛ, ka ngwõwɔ sege. ¹⁸ Mɛ ngwõ yera ka ma kanyena nyaa naa. Basyɛ mɛ na mɔgɔyi ngwõ bere ne ngwõ yera ka ma yɛ mɛ da, sɔma nyaa tino a dɔrɔ da ye Krista na kwãgwaga sɔno ta da na zugi. ¹⁹ Ye ta da na wɛ melemele kamasɔrɔ ye fa ngwĩ yirebɛ, ngwõ ye yɛrɛ komavere na wu. Ye ye yɛrɛ yirebɛ ye ta piri da na. Ye miri bo diniya hõ da na ye dama. ²⁰ Ke kwane, ke tõ kõ ti wuro hõ. Ke kisita Matigi Yesu Krista yɛ̀rɛ̀ ngwĩ na na hõ tuma wuro hõ. ²¹ A na ke komavere na yagayi berebɛ na ta a yɛrɛ komavere na noronayi nemɛ na. A na ngwõ ta ngwona sebɛbe na yireyi barika hõ ngwĩ ngwõ tɛ fere pepe hõ ne mɔ a ta.

¹ Ngwõ yena, mɛ syenɔmane na kanuye, ka na wu ti mɛ na fɔrona, mɛ tyata ka za. Mɛ ni hõ dya kya da na hõ ne yɛrɛ yirebɛ ka yena. Yee nemɛ mɛ, ka daga wɔ Matigi ta da hõ. ² Mɛ Evodi kɔ Sɛ̃tise mɛ da ye bɛ̃ nemɛ hõ wɔkara syenɔma yàra Krista hõ. ³ Bi mɛ, ne baratɛkweta na saratipagata, ma be mɛ da be ngwona yàra dyema. Ngwõwɔ mane mɛ dyema hõ Bɛrɛda Fɔre yera, yewɔ kɔ Kilema kɔ bɔ baratɛkwere sɔma sɛrɛ. Ngwõwɔ pepe toga sɛbɛɛ sugunɔmabe na kitabu hõ. ⁴ Ka ni hõ dya Matigi ta da na sanga pepe ma. Ma bere ne yera yɛ mɛ, ka ni hõ dya. ⁵ Ka ka wora makwɔna sɔma pepe ta piri ma na. Matigi na bere na zɔgɔta. ⁶ Ka kakiri ka nyangamu fui na ga. Nka ngwĩ fa pepe na da hõ ne ti ka na, ka ngwõ mɛ Wuro ta kɔ mɛbe na yireyi nemɛ hõ barika yera a ma. ⁷ Ne ngwõ hõ tɛ, Wuro ta syara ngwĩ ngwõ yaloyi sɔma pepe ta miri ma, ngwõ na kwa ka kɔrɔ kɔ kya miri ma Yesu Krista hõ. ⁸ Ngwõ pepe timi, syenɔmane, da ngwĩye ngwõ tĩyã na da kɔ da ngwĩye ngwõ daga kɔ yirebɛbe nemɛ kɔ da ngwĩye ngwõ tele kɔ da ngwĩye ngwõ kìnì kɔ da ngwĩye ngwõ dya kɔ da ngwĩye toga fɔro sa, ka miri ngwona da pepe na, ngwõwɔ ngwĩye ngwõ fɔro ne daga kɔ yirebɛbe nemɛ. ⁹ Ka da ngwĩye kala ne gũ hõ ne mɔ hõ ne za ne ta, ka ngwõwɔ ta. Ne ngwõ hõ tɛ, Syaranate Wuro na wɔ ka ta. ¹⁰ Mɛ ni hõ dya Matigi ta da na fɔrona. Mɛ a za basyɛ da ka dyati na da na yɛ. Mɛ ha da ka sãfire kɔ na da nemɛ ga, nka ka ha mane tɛno gũ hõ ngwõ dɔrɔ ga. ¹¹ Mɛ ha ngwõ yera ka ma na fangadãbe yena ga. Fere ngwĩye ngwõ ti ne ta, mɛ daro ye na hõ ne mako fɔro kɔ ngwõwɔ nemɛ. ¹² Ne fangadãbe ne ti ne na, ma ne yɛrɛ fɛgɛno tɔ̀. Ne fere nyaa ne ti ne ta mɛ, ma ne yɛrɛ fɛgɛno tɔ̀. Da pepe na kɔ tɛno pepe na, hõ nyingi o, hõ wɔ wu na o, hõ gũ o, hõ pɔna o, mɛ daro ngwona tino pepe na. ¹³ Mɛ sebɛne da pepe sɔmona Krista barika hõ. ¹⁴ Ngwõ pepe na, ka dafɔre ta hõ ne dyema na nyane da na, ngwõ fɔro. ¹⁵ Ki Filipe kɔma, ka ngwõ tɔ̀ ka yɛrɛ ma da ma tuma Masedwane gana hõ ngwĩ sanga ma, kya eglise dama ngwõ mane mɛ dyema. Ki dama ngwõ mane ka nii bi mya da na perebe na kɔ gũbe na. ¹⁶ Mɛ mane ti Tesaloni kuru hõ ngwĩ sanga ma, ka mane ne mako na fa bo fane ne ma fɔ ya wiri kanyena damane ma. ¹⁷ A ha tɛ wɔkara mɛ tine perefa bo kya ga, nka mɛ tyata fa hõ kwe kya tono ma hõ na nyaabɛ. ¹⁸ Ka ne mako na fere ngwĩye fane ne ma, ma ye pepe za. Ye nyaa fɔ ya yaloyi ne mako na da ma yɛrɛ. Ka fere ngwĩye pere, ma ngwõ pepe za. Ngwõ ne mako fɔro. Ngwona perefere tɛ wɔkara salaka na ngwunu dyayi. A da dya Wuro ma, a ngwõ tɔ. ¹⁹ Mya Wuro na ka mako pepe fɔro hõ kanya kɔ a yɛrɛ ta ferekɔmabe na yiregwagayi nemɛ Yesu Krista hõ. ²⁰ Ke Tõ Wuro hõ yirebɛ fɔ sanga tege ma. Amina. ²¹ Ka bire Wuro ta sɔma pepe tala tala na Yesu Krista togo yena. Syenɔmane ngwĩye ngwõ ti mɛ birɛ bɛ, ngwõwɔ pepe bire ka na. ²² Wuro ta sɔma pepe ngwĩye ti bɛ, ngwõwɔ bire ka na, sangofere ngwĩye ngwõ ti fangama ta kõ kɔrɔse bara hõ. Matigi Yesu Krista ta nema hõ wɔ ka pepe ta.