FILEMÕ
11 Mɛ Pauli Yesu Krista ta kasono kɔ ke syeno Timote bo sɛbɛ fane bi Filemõ ma. Be tɛ ke mà na kanuyi kɔ ke baratɛkweta na. 2 Mɛ̀ bo sɛbɛ fane eglise ma mɛ ngwĩ ngwõ nemɛkwe ta bya kõ hõ kɔ ke syenɔmane Apiya kɔ Arisipe ngwĩ ngwõ kwe ne kwini kɔ mɛ̀ nemɛ. 3 Ke Tõ Wuro kɔ Matigi Yesu Krista hõ nema kɔ syara ta ka ma. 4 Mɛ syeno Filemõ, ne mɛ ne Wuro mɛ ngwĩ sanga ma pepe, ma miri bya da na hõ barika yera na Wuro ma. 5 Be Wuro ta sɔma kanu ngwɛne kɔ be la Matigi Yesu na ngwɛne, mɛ ngwõ pepe mɔ sɔma ta. 6 Mɛ Wuro mɛ da nemɛkwebe ngwĩ ngwõ ti mɛ̀ kɔ bi yɔ lanabɛbe ta piri ma na, ngwõ hõ ya zĩ ngwõfatɔ fa fɔro pepe ngwĩ ngwõ kiyi Krista hõ, be hõ ngwõ tɔ̀ ne dopaga. 7 Mɛ syeno, be mane Wuro ta sɔma zigi tugu. Ngwõ yena mɛ nihõdyaro na yireyi kɔ zigitugube gũ bya kanube yena. 8 Ngwõ yena Krista sebɛbe pere mɛ ma hõ fanga dɛ be ma bɔ da na. 9 Ngwõ pepe na, ma kya fa bo mɛ be ta ngwona kanube yena ngwĩ ti ke yɔ. Mɛ Pauli ngwõ tine be mɛ. Mɛ ngwĩ ngwõ somɔlalo. A ha ngwõ dama ga, mɛ tɛ Krista ta kasono na basyɛ mɛ. 10 Ma be mɛ Onɛsime ta piri ma na. A tɛ na nemɛnimisĩ na Krista hõ. Hõ mɛ to bɛ kaso hõ, mɛ tɛ a tõ na ni ta piri ma na. 11 A ha mane pya be mako fɔro wakati na fɔnoyi ma ga. Nka basyɛ a bi kɔ mɛ mako fcro mɛ. 12 Ma bere na fane be ma basyɛ. Awe ngwĩ ngwõ tɛ wɔkara mɛ yɛrɛ komavere na bo. 13 Mɛ mane tyata a wɔ kɔ mɛ nemɛ bɛ hõ ne to kaso hõ Bɛrɛda Fɔre yena ngwõfatc a hõ bara ta ne ma bi na pilasi na. 14 Nka mɛ ha mane tyata fui si ta ngwona da na, bi ha dyã ngwĩ ma ga. Be dafɔre ngwĩ ta ne ma, mɛ ha tyata ngwõ hõ tɛ kɔ sigemabe nemɛ ga, nka ye hõ tɛ kɔ dyamabe nemɛ. 15 Dɔra ngwõ yena Onɛsime mane dɛ̀gɛ̀ be na hõ wakati zɔgɔ ta ngwõfatɔ a hõ bere tɛ biyi na sanga pepe ma. 16 A ba tɛ tere na titiri ga, nka a fõ kɔ tere nemɛ fɔrona. A mɛ syeno na kanuyi Krista hõ. A tɛ bya tere na kɔ mɛ syeno na Matigi hõ. 17 Ngwõ yena ne be hõ ne mɛ dyati wɔkara be yakweta, be a fɔga fɔrona wɔkara be mɛ fɔga ngwɛne. 18 Ne a hõ be tonyo da bo na wala ne bya ku hõ ne ti a na, be ngwõ dyati mya ku. 19 Mɛ Pauli ngwõ bɔ bɛrɛda sɛbɛ kɔ ne yɛrɛ soro nemɛ da ma na ngwõ pepe sara. Ngwõ pepe na, ma tyata yera be ma da mya ku ngwĩ ngwõ ti be na, ngwõ bi yɛrɛ ni. 20 Aiwa mɛ syeno, ma be mɛ be ne dyema kɔ ngwona da nemɛ Matigi ta kanube yena. Be ne zigi tugu wɔkara mɛ syeno Krista hõ. 21 Mɛ a tɔ̀ na kìnì da ma fa ngwĩ kya be ta, da be na ngwõ ta. Ngwõ yena ma bo sɛbɛ sɛbɛ na fane be ma. Ma tɔ̀ da be na ye ta hõ ya yaloyi na yera da ma yɛrɛ. 22 Be kõ bo tetɛrɛ ne ma mɛ kamasɔrɔ mɛ zigi ti a ma da Wuro na kya mɛbɛ dyabi. Ma na bere ya ka birɛ ngwɛ̃ yɛ. 23 Eparas bire be na, ngwõ mɛ kasokyɛkwenemɛ Yesu Krista yena. 24 Mareka kɔ Aristarike kɔ Demasi kɔ Luka bire be na. Ngwõwɔmɛ baratɛkwere. 25 Kyà Matigi Yesu Krista ta nema hõ wɔ ka pepe ta.