ZUDE
11 Mɛ Zude tɛ Yesu Krista ta tere na. Mɛ Yakuba pu. Ma bo sɛbɛ fane ka ma. Wuro ki ngwĩye wiri, ka tine ya Wuro ta kanube na sogo ma. Ane Yesu Krista ngwõ kwa ka ma. 2 Makare kɔ syara kɔ kanube hõ pere ka ma nyaa. 3 Kanune, mɛ mane ne nyanga hõ na sebɛbe pepe ta hõ sɛbɛ fane ka ma kyà kisibe ta da na, kiyi kɔ mɛyi. Hõ mɛ to ngwõ hõ, mɛ a za da mɛ daga sɛbɛ fane ka ma ngwõfatɔ ma ka nyangabɛ ka hõ kwini lanabɛbe yena. Wuro ngwona lanabɛbe pere a ta sɔma ma kanyono tala na legelege. 4 Sɔma yaga bɔ ye dõ hõ kwɔ ke woro hõ. Ye Wuro tɔ̀bariyasɔma. Ye kyà Wuro ta nema na bɛrɛda berebɛ ne ta nangananga da na tɛno na. Ye ye do bere ke ngwonate sonala legelege Matigi Yesu Krista na. Ngwõ yena ye ta kiti ta da yera syedɛrɛ Wuro ta bɛrɛda hõ. 5 Hale ne ka hõ bɔ da pepe tɔ̀ ne wɛ, mɛ tyata ka kakiri dige ye na da Matigi mane Israyɛli kɔma kisi ne wa Misira gana hõ nka ngwõ timi a ne na lanabɛbariya sɔma yaga. 6 Ka ka kakiri dige ngwona mɛlɛkɛe ta da na mɛ, ngwõwɔ ngwĩye ha mane wɔ ya ngwonakɔmabe na gwereyi hõ ga nka ye ya tanga do to yɛ. Wuro ngwõwɔ pɛrɛ kɔ balazɔgɔre na yagabariyaye nemɛ hõ ne ka tunungu na bi hõ lagakõ we. Ye ti ngwɛ̃ ne ngwona kiti kɔ na yireyi yɛ̀rɛ̀. 7 Ka ka kakiri dige Sodome kɔ Gomore kɔ ye do na kire na, ngwĩye mane da ta wɔkara ngwona mɛlɛkɛe. Ye ye yɛrɛ ka kakalabe hõ, hõ ye nemɛ sini ta yàra na ne syã ne kɔ ye nemɛ sini nemɛ. Ngwõ yena ye tine nyane togo hõ ngwĩ ha na dibɛ ga hõ sɔma pepe sɛmɛbɛ. 8 Yee nemɛ, ngwona sɔma ngwõ nemɛ na da ta. Ye ta sonyange ye firebɛ hõ dayaga ta ye yɛrɛ komavere na. Ye sĩ ngwonakɔmabe na. Ye wuro hõ mɛlɛkɛe na noronaye vini. 9 Mɛlɛkɛ Miɔhel mane kwini kɔ Setane nemɛ ne dakiyɛro ta Musa na soro ta da na ngwĩ sanga ma, hale ngwõ ha ye woro sige hõ Setane vini ga. A bɔ yera ye dama, ye Matigi hõ be zarake. 10 Ngwona sɔma ha da ngwĩye tɔ̀ ga, ngwõwɔ na ye vini. Ye da ngwĩye tɔ̀ ye yɛrɛ kɔrɔ hõ wɔkara sɔkɔba kike da tɔ̀ ngwɛne, ngwona da ye yaga. 11 Bono ti ye ma. Ye dɔ Kãe ta sogo ma. Ye ye yɛrɛ ka firebɛbe hõ gwana na wu yena wɔkara Balame mane ta ngwɛne. Ye mane siri kamasɔrɔ ye muruti wɔkara Kore mane muruti ngwɛne. 12 Ye tɛ wɔkara yaga fere kya syenɔmabe na zõfa zõ sanga ma. Ye ha piri kɔ zama nemɛ ga. Ye ye yɛrɛ ta nyingibe kya. Ye tɛ wɔkara wurosigi na mɛnɛbariyayi, panga ngwĩ tirɛ. Ye tɛ wɔkara sɔrɔ na vɔrɔbariyaye ngwĩye siri, ye sile milɛ. 13 Ye sa nyengezu na kũgoyi ta. Ye ta peremagabe tɛ wɔkara ngwona kũgo. Ye tɛ wɔkara mamala ngwĩye yara. Wuro bi hõ tetɛrɛ na tege ye ma tunungu hõ fɔ abada. 14 Adama timi sõ na sɔma kopɔraro Henok mane fane da ta ngwona sɔma yaga ta da na mɛ. A da: Segerɛ Matigi na na kɔ ya mɛlɛkɛe na kìnìye na damatɔ̀bariyaye nemɛ. 15 A na na hõ kiti sɔ sɔma pepe ma ye ta tɛda yaga yena, ye ngwõwɔ ngwĩye ta kɔ Wuro tɔ̀bariyabe nemɛ. A na kiti sɔ Wuro tɔ̀bariyasɔma na kakyetɛre ma ye ta bɛrɛda yaga yena ye ngwĩye yera Wuro ma. 16 Ngwona sɔma dumudumu bɛrɛda bɛri sɔma. Ye ya ne kanya kɔ ye yɛrɛ komavere dungo na da nemɛ. Ye yɛrɛ yirebɛ bɛrɛda bɛri ne manonobɛ bɛrɛda yera ye yɛrɛ ta nafã yena. 17 Mɛ màre, kyà Matigi Yesu Krista ta fanene bɛrɛda ngwĩye yera gwerena, ka ka kakiri to ngwõwɔ ma. 18 Ye mane yera ka ma da ye diniya wɛ sanga ma sɔmazisɔma na tye, ye na ka zi. Ye na ya kanya kɔ ye yɛrɛ komavere dungo na da na yagaye nemɛ. 19 Ye dɛ̀gɛ̀be na da ta. Ye Adama nɔmane zana. Ni na kìnìyi ha ti ye ngwõ̀ na ga. 20 Ki kwane, mɛ màre, ka ka nyanga hõ ya zĩ kya lanabɛbe na kìnìyi na. Ka Wuro mɛ Ni na kìnìyi barika hõ. 21 Hõ ka to ka ne ngwona sugunɔmabe na wɛbariyayi yɛ̀rɛ̀, kyà Matigi Yesu Krista nar ngwĩ pere ka ma a ta makare yena, ka hõ wɔ Wuro ta kanube hõ. 22 Sɔma ngwĩye ngwõ sigasiga, ka makare ngwõwɔ na. 23 Ka ngwõwɔ suru ne wa togo hõ, hõ ne kisi. Ka makare zaye na mɛ hõ ngwõ ta kɔ kũ̀ nemɛ. Nka ka ye ta dayaga na tɛda pepe koneya. 24 Ngwĩ ngwõ sebɛne kwa ka ma ngwõfatɔ ka ka na bɛrɛ ga, hõ ka na nihõdyaye na zarakebariyaye wiribɛ a birɛ, awe ngwĩ tɛ Noronate na. 25 Wuro sonala legelege ngwĩ ngwõ ke na kisita, Yesu Krista kyà Matigi barika hõ, yirebɛbe kɔ noro kɔ barika kɔ sebɛbe hõ dɛ awe ma na dofɔga gweregwerena fɔ ya wiri basyɛ ma fɔ abada. Amina.