GALASE KƆMA

¹ Mɛ Pauli bo sɛbɛ fane ka ma. Mɛ tɛ faneta na nka a ha sõ ngwõ ne fane ga. Ngwona fane ba sa sõ hõ ga. Yesu Krista yɛrɛ kɔ Tõ Wuro ngwõ ngwĩ ngwõ Yesu ngwini na sabɛ sara woro hõ, ngwõwɔ ngwõ ne fane. ² Syenɔmane pepe ngwĩye ngwõ ti kɔ mɛ nemɛ bɛ, mɛ kɔ ngwõwɔ pepe bo sɛbɛ fane Galase gana hõ eglise ma. ³ Ke Tõ Wuro kɔ Matigi Yesu Krista syara ta ka ma hõ nema pere ka ma. ⁴ Krista ye yɛrɛ pere kyà kakye yena ngwõfatɔ a hõ ke dɛ̃ ke wa bo diniya hõ yagayi soro hõ. A ngwõ ta hõ kanya kɔ ke Tõ Wuro dungo nemɛ. ⁵ Noro hõ dɛ awe ma abada fɔ abada. Amina. ⁶ Ngwĩ ngwõ mane ka wiri Krista ta nema barika hõ, ka ngwõ dira sale hõ dɔ Bɛrɛda Fɔre sifa za ma. Mɛ kaba ngwõ na fɔrona. ⁷ Bɛrɛda Fɔre za ha tye ga, nka bɔ sɔma tine ka kakiri nyangamu. Ngwõwɔ tyata Krista ta Bɛrɛda Fɔre berebɛ. ⁸ Hale ne a ma mɛ̀ na bo wala wuro hõ mɛlɛkɛe na bo hõ na Bɛrɛda Fɔre yera ka ma, ngwĩ ha tala kɔ ngwona bɛrɛda nemɛ ga, mɛ pya ngwĩ yera ka ma, ngwona te hõ voda. ⁹ Mɛ̀ ye yera ne wɛ ka ma ngwɛne, ma ne bere ne ngwona bɛrɛda yera yɛ mɛ da: Ne bo sõ hõ Bɛrɛda Fɔre za yera ka ma, ngwĩ dɛ̀gɛ̀ ti ngwona bɛrɛda na, mɛ pya ngwĩ yera ka ma, ngwona sõ hõ voda. ¹⁰ Aiwa, ka dyati da mɛ tyata ne da dyabɛ sɔma ma ra? Aworɛ, mɛ tyata ne da dyabɛ Wuro ma. Mɛ tyata sɔma madyama da ta ra? Ne mɛ mane tyata sɔma madyama da ta, mɛ ha mane na tɛ Krista ta baratɛta na ga. ¹¹ Syenɔmane, ma yera na kìnìbɛ ka ma da ma Bɛrɛda Fɔre ngwĩ yera ka ma, ngwõ ha sa sõ ta ga. ¹² Mɛ ha ngwõ gũ sõ ta ga. Sõ si ha mɛ kala kɔ ngwõ nemɛ ga, nka Yesu Krista ngwõ ngwõ dɔrɔ mɛ ma. ¹³ Mɛ mane ya Yahutuye ta sogo ma ngwɛne gwerena, ka ngwona da mɔ. Ka tɔ̀ da mɛ mane dɔ Wuro ta eglise kɔma ma ne nyane fɔ ya ne dama fɔno ngwõfatɔ ma hõ ne pepe zãzãbɛ. ¹⁴ Mɛ mane ti na dɔgɔri pepe zĩ hõ Yahutuye ta sogo ma da na. Mɛ kɔrɔ pepe mane ti ke bemae ta lãda da hõ. ¹⁵ Nka sane mɛ hõ vɔrɔ, Wuro mane mɛ dɛ̀gɛ̀ hõ ne wiri a ta nema barika hõ, hõ bara ta a ma. ¹⁶ Ye dya a ma a ye Nonanimisĩ dɔrɔ mɛ ma ngwõfatɔ mɛ hõ ngwona Bɛrɛda Fɔre yera si sɔma zɛ ma. Mɛ ha ya sõ si tɔgara ngwõ na ga. ¹⁷ Ngwĩye ngwõ tɛ fanesɔma na mɛ zĩ hõ, mɛ ha ya ngwõwɔ birɛ Zerusalem mɛ ga. Nka mɛ mane tele ya Arabi gana hõ. Ngwõ timi mɛ mane bere ya Damasi kuru hõ. ¹⁸ Dɔgɔ saa fɔno we timi ma, mɛ ya Zerusalem ngwõfatɔ mɛ kɔ Pierre hõ ke nemɛ tɔ̀. Mɛ nyi fũkoo ta a birɛ. ¹⁹ Mɛ ha mane bɔ fanesɔma sɛrɛ na sõ si za ga fɔ Matigi pu Yakuba. ²⁰ Mɛ ngwõ yera Wuro zĩ hõ da, mɛ tine da ngwĩye sɛbɛ, nĩyono ha ti ngwõwɔ hõ ga. ²¹ Ngwõ timi mɛ ya Siri kɔ Silisi gana hõ. ²² Ngwona wakati pepe ma Krista ta eglise kɔma ngwĩye ti Zude gana hõ, ngwõwɔ ha mane mɛ za hõ ne tɔ̀ ga. ²³ Ye mane mɔ dama da sõ ngwĩ mane dɔ ye ma ne nyane hõ na sigebɛ ye ma ne ta lanabɛbe yaga, ye ngwõ tine ngwona lanabɛbe ta da na wadyuli ta basyɛ. ²⁴ Ngwona sanga ma ye mane Wuro yirebɛ mya da na.

¹ Dɔgɔ funaa fɔno wɛ timi ma, mɛ kɔ Banabasi bere ya Zerusalem. Tite mane ya kɔ mɛ nemɛ mɛ. ² Wuro mane yera ne ma ye ma ya yɛ. Ngwõ yena ma ya. Mɛ daro ne Bɛrɛda Fɔre na wadyuli ngwĩ ta si sɔma woro hõ, mɛ ngwõ pepe dɔrɔ ye ta zɛngɛfɛgɛre ma ye sana. Mɛ mane bara ngwĩ ta ne wɛ ane kɔ mɛ bara ngwĩ ta basyɛ, ma ha tyata ngwona bara ta zana ga. ³ - ⁴ Aiwa, mɛ yakweta Tite ngwĩ Girɛki sõ, ye ha fanga dɛ a ma hõ na yɛro ga, hale kasɔrɔ syenɔmane na nĩyõsɔre bɔ mane tyata fanga dɛ a ma ngwona da na. Ngwõwɔ mane ye dõ hõ kwɔ ke woro hõ ngwõfatɔ ke vɛnɔmabe ngwĩ gũ Yesu Krista hõ, ye hõ ngwõ yaga hõ ke ka tɛrɛbe hõ. ⁵ Mɛ̀ ha ye kwɛ̃ fɔga ga. Mɛ̀ ha mɔ ye ta hale zɔgɔ ga ngwõfatɔ Bɛrɛda Fɔre na tĩyã hõ wɔ ka ta. ⁶ Nka ngwĩye ngwõ dyati zɛngɛfɛgɛre, ngwõwɔ kwane ha fui kwe mya Bɛrɛda Fɔre yerano ma ga. Sɔma da ye zɛngɛfɛgɛre nka ngwõwɔ ha fui mɛ nyena hõ ga. Wuro ha sõ sege a kõ ma ga. ⁷ Ngwona sɔma a za da Wuro bara kalofa mɛ ma, ye ma Bɛrɛda Fɔre yera si sɔma woro hõ wɔkara a pere Pierre ma hõ ne yera Yahutu kɔma woro hõ ngwɛne. ⁸ Wuro mane Pierre tetɛrɛ hõ tɛ faneta na Yahutuye ma ngwɛne, yee nemɛ a mɛ tetɛrɛ mɛ hõ tɛ faneta na hõ ya si sɔma birɛ. ⁹ Yakuba kɔ Pierre kɔ Zã ngwĩye mane dyati wɔkara ngwonakɔma, ngwõwɔ a za ngwĩ sanga ma da ngwona bara kalofa mɛ ma Wuro ta nema barika hõ, ngwõwɔ ye sera ka mɛ kɔ Banabasi sera hõ, hõ na dɔrɔ da ke tɛ baratɛkwere na. Ye dyã mɛ̀ ya bara ta si sɔma woro hõ, yewɔ na ya Yahutu kɔma woro hõ. ¹⁰ Ye mane mɛ̀ mɛ dama ye ke ke kakiri to ye ta eglise hõ fangadãe na. Mɛ mane ne nyanga fɔrona hõ ngwõ ta. ¹¹ Pierre wiri Ãtiose kuru hõ ngwĩ sanga ma, mɛ na dakwiyɛ sɔma pepe nyono na kamasɔrɔ a mane fire. ¹² Sane sɔma bɔ hõ wiri yɛ hõ tuma Yakuba birɛ, ngwõ da ye tɛ a mane kwe ne zõ kɔ syenɔmane na si sɔma nemɛ. Nka ngwõwɔ wiri yɛ ngwĩ sanga ma, a ma dyã zõ kɔ si sɔma nemɛ titiri ga kamasɔrɔ a mane kwã ngwona sɔma na ngwĩye tyata si sɔma yɛro. ¹³ Pierre kɔ syenɔmane na Yahutu kɔma sɛrɛ dapɔlabɛribe ta. Ye mane Banabasi yɛrɛ suru hõ kwe kɔ lɔ ngwona da na. ¹⁴ Mɛ a za ngwĩ sanga ma da ye ha ya ne tele ne kanya kɔ Bɛrɛda Fɔre na tĩyã nemɛ ga, mɛ ne yera Pierre ma ye pepe nyono na: Bi ngwĩ ngwõ Yahutu sõ, be mane si sɔma tino bi hõ Yahutuye tino dira. Aiwa, ne na bi tɛ hõ ne fanga dɛ si sɔma sɛrɛ ma ye ye Yahutuye tino bi? ¹⁵ Ke kwane vɔrɔ Yahutube hõ. Ke ha si sɔma na kakyetɛre ga. ¹⁶ Ngwõ pepe na, ke tɔ̀ da sõ si ha tɛ sõ tele na Wuro zĩ hõ tõ na tɛda barika hõ ga. A tɛ sõ tele na lanabɛbe barika hõ Yesu Krista hõ. Ke mɛ, ke la Yesu Krista na ngwõfatɔ ke hõ tɛ sɔma tele na lanabɛbe barika hõ Krista hõ. Ngwõ ha na tɛ kɔ tõ na tɛda nemɛ ga. Sõ si ha na tɛ sõ tele na Wuro zĩ hõ tõ na tɛda barika hõ ga. ¹⁷ Aiwa, hõ ke to ke ne kwe kɔ Krista nemɛ hõ tɛ sɔma tele na Wuro zĩ hõ, ke kakyetɛre wɔkara si sɔma tɛ kakyetɛre na ngwɛne. Ngwõ kɔrɔ Krista bara ta kakye ma ra? Aworɛ. ¹⁸ Nka mɛ mane fere ngwĩye yaga, ne mɛ hõ ne bere ngwõwɔ tetɛrɛ yɛ, mɛ a dɔrɔ da ma tõ yaga. ¹⁹ Mɛ kwane siri tõ ta piri ma na. Tõ yɛrɛ ngwõ ta. Ngwona da pepe tɛ ngwõfatɔ ma hõ sugu Wuro ta. Mɛ kɔ Krista kwe siri kwãgwaga sɔno ma. ²⁰ Mɛ sugu, ngwõ ha mɛ yɛrɛ ga. Krista ngwõ sugu mɛ kɔrɔ hõ. Mɛ ti sugunɔmabe ngwĩ hõ basyɛ, mɛ ya ngwõ hõ lanabɛbe barika hõ, Wuro Nonanimisĩ hõ. Awe ngwõ mɛ kanu hõ ye yɛrɛ pere mɛ yena. ²¹ Mɛ ha maga Wuro ta nema hõ ga. Nka ne sõ hõ ne sebɛne tɛ sõ tele na tõ barika hõ, ngwõ kɔrɔ Krista siri zana.

¹ Ki Galase kɔma tɛ kakiridarakɔma na. Kɔ ngwõ ka dyebɛ? Yesu Krista ta kwãgwaga da sɔno ma, mɛ yɛrɛ mane ngwona da dɔrɔ ne kìnì ka ma. ² Mɛ tyata ka bo da dama yera ne ma. Ka Ni na kmiyi gũ tõ na tɛda barika hõ ra, ta Bɛrɛda Fɔre ta mɔbe barika hõ, ka la ngwĩye na? ³ Ne ka tɛ hõ tɛ kakiridarakɔma na yee nemɛ si mɔ? Ka mane dofɔga Ni na kìnìyi barika hõ, ka tyata ne wɛbɛ basyɛ ka yɛrɛ barika hõ ra? ⁴ Da pepe ngwĩye mane tɛ ka na, ngwõwɔ pepe tɛ zana ra? Ye ha sebɛne tɛ zana ga. ⁵ Wuro ya Ni na kmiyi pere ka ma hõ kabako da ta ka woro hõ ngwĩ sanga ma, a ngwõ ta kya tõ fɛgɛbe yena ra, ta a ngwõ ta kamasɔrɔ ka Bɛrɛda Fɔre mɔ hõ la ye na? ⁶ Yee nemɛ, Wuro ta bɛrɛda bɛri Ibrahima ta da na da: A la Wuro ta bɛrɛda na, Wuro a dyati sõ tele. ⁷ Ngwõ yena ka hõ tɔ̀ da ngwĩye ngwõ ti lanabɛbe na sogo ma, ngwõwɔ Ibrahima timi kɔma na syɛbɛye. ⁸ Wuro ta bɛrɛda pya na yera da Wuro na si sɔma ta sɔma tele na ye ta lanabɛbe barika hõ. Ngwõ yena a pya ngwona bɛrɛda dya yera Ibrahima ma da: Lagakõ ma si sɔma pepe na duba gũ bi ta. ⁹ Ibrahima lanabɛbe ta hõ duba gũ. Yee nemɛ mɛ, sɔma pepe ngwĩye lanabɛbe ta, ngwõwɔ pepe na duba gũ. ¹⁰ Sɔma ngwĩye ngwõ tõ kwɛ̃ fɔga, ngwõwɔ voda gũ kamasɔrɔ a sɛbɛɛ Wuro ta bɛrɛda hõ da, da pepe ngwĩye ti tõ na sɛbɛ hõ, ngwĩ sõ ma ngwõ pepe ta ne dopaga ga, ngwona te na voda. ¹¹ Aiwa, a kìnì da sõ si ha na tɛ sõ tele na Wuro zĩ hõ tõ barika hõ ga. Kamasɔrɔ a sɛbɛɛ Wuro ta bɛrɛda hõ da: Sõ tele na sugu lanabɛbe barika hõ. ¹² Tõ kɔ lanabɛbe ha tala ga kamasɔrɔ a sɛbɛɛ Wuro ta bɛrɛda hõ da: Ngwĩ ngwõ tõ na fane pepe ta, ngwõ na sugu ngwõwɔ barika hõ. ¹³ Krista ke ngwonawa tõ ta voda ma. Awe yɛrɛ voda ke na pilasi na. A sɛbɛɛ da: Ye ngwĩ sõ zɔlɔ sɔno ma, ngwona te voda. ¹⁴ Krista ngwõ ta ngwõfatɔ Wuro duba na datege ngwĩbi Ibrahima ma, si sɔma hõ ngwõ gũ Yesu Krista barika hõ. Yee nemɛ Wuro Ni na kìnìyi ngwĩ na datege bi, ke hõ ngwõ gũ lanabɛbe barika hõ. ¹⁵ Syenɔmane, ma na bɛri hõ kanya kɔ sɔma ta da tɛno nemɛ. Ne sõ bo hõ datege bi hõ na sigebɛ fɔrona, sõ za ha sebɛne ngwona datege yaga ga. A ha sebɛne bo kwe a ma mɛ ga. ¹⁶ Aiwa, Wuro mane datege bi Ibrahima kɔ a timi sõ ma. Wuro ta bɛrɛda ha da, a timi kɔma ga, ngwõ kɔrɔ sɔma nyaa. A da a timi sõ sonala. Ngwõ kɔrɔ a timi sõ ngwõ Krista. ¹⁷ Mɛ tyata ngwĩ fa yera, ngwõ bo—Wuro mane datege bi na sigebɛ. Wuro mane tõ ngwĩ pere dɔgɔ zonaa ne kyofũ ngwona datege bi wɛ timi ma, ngwõ ha sebɛne ngwona datege berebɛ hõ ngwona bɛrɛda yaga ga. ¹⁸ Wuro datege ngwĩ bi hõ perefa pere hõ na ta kɔrɔ na, ne a hõ ngwõ pere tõ na kwɛ̃fɛgɛbe yena, a ha ngwõ pere ya datege yena titiri ga. Nka Wuro mane ngwõ pere Ibrahima ma ngwona datege yena. ¹⁹ Ngwonona ngwona tõ tegee? A tegee hõ da dɔrɔ sɔma ma ngwĩye ha kanya kɔ Wuro dungo nemɛ ga. A mane daga wɔ yɛ fɔ Ibrahima timi sõ hõ na, Wuro datege bi ngwĩ ta da na. Wuro tõ tege mɛlɛkɛe barika hõ, nka sõ soro ngwõ ngwõ sɛbɛ. ²⁰ Ne a hõ ma sõ soro ngwõ mane ngwõ sɛbɛ, ngwõ a dɔrɔ da ngwõ ha sonala ta da ga. Wuro mako ha ti mɛlɛkɛe wala sõ na hõ ya datege dopaga ga. Awe sonala sebɛne ngwõ ta. ²¹ Ngwõ a dɔrɔ da tõ tuma Wuro ta datege na ra? Aworɛ. Tõ ngwĩ ngwõ sɔma sugubɛ, ne ngwõ nemɛ na tõ mane pya tegee, ngwona sanga ma sɔma mane na tɛ sɔma tele na Wuro zĩ hõ ngwona tõ barika hõ. ²² Nka Wuro ta bɛrɛda da sɔma pepe ti kakye ta fanga we. Wuro datege ngwĩ bi perefa ta da na, ngwĩ ngwõ gũ Yesu Krista na lanabɛbe ta, ngwõ na pere sɔma ma ngwĩye la a na. ²³ Sane lanabɛbe na wakati hõ wiri, a tɛ wɔkara ke mane ti tõ ta kaso hõ, ne ngwona lanabɛbe yɛ̀rɛ̀ ngwĩ ngwõ na na. ²⁴ Yee nemɛ si, tõ mane kwa ke ma fɔ Krista hõ na ngwõfatɔ ke hõ tɛ sɔma tele na Wuro zĩ hõ lanabɛbe barika hõ. ²⁵ Basyɛ ngwõ lanabɛbe na wakati. Ke ha ti tõ we titiri ga. ²⁶ Lanabɛbe barika hõ ka kwe kɔ Yesu Krista nemɛ hõ tɛ Wuro nɔmane na. ²⁷ Ki mane batize hõ kwe kɔ Yesu Krista nemɛ. Ka mane Krista ka ka moga hõ wɔkara sõ zogo ka ye mogo hõ ngwɛne. ²⁸ Ngwõ yena dɛ̀gɛ̀ do si ha ti Yahutu kɔma kɔ si sɔma yɔ titiri ga wala tɛrɛ kɔ vɛnɔmane wala sini kɔ yàra kamasɔrɔ ke pepe tala Yesu Krista hõ. ²⁹ Aiwa, ne ka hõ ma Kristaye, ka Ibrahima timi kɔma mɛ. Ka tɛ kɔrɔbisɔma na hõ kanya kɔ Wuro ta datege nemɛ.

¹ Mɛ tyata ya zĩ kɔ ngwona da nemɛ. Sõ no ngwõ a kɔrɔnabita. Hõ na to nimisalabe hõ, a kɔ tere pepe tala hale kasɔrɔ fere pepe ma aye. ² Hõ na na nimisaloyi to, sɔma bɔ kwa a ma hõ na ta da nyonahõwa fɔ ya wiri a tõ ta latege da na wakati ma. ³ Yee ke ti mɛ. Hõ ke to ni na nimisalabe hõ, ke mane ti diniya hõ da ta tɛrɛbe hõ. ⁴ Nka wakati na dopagayi wiri ngwĩ sanga ma, Wuro ye Nonanimisĩ fane hõ na. A vɔrɔ yà ta. A mane ti Musa ta tõ we. ⁵ Yee nemɛ, a hõ sɔma ngwonawa ngwĩye mane ti tõ we ngwõfatɔ ke hõ tɛ Wuro nɔmane na. ⁶ Wuro ye Ni fane hõ na tanga ka kɔrɔ hõ. Ngwona Ni songo ne da: Aba ke Tõ. Ngwõ a dɔrɔ da ka Wuro nɔmane. ⁷ Yee nemɛ, be ha tere titiri ga, be Wuro no. Aiwa, ne be hõ ma Wuro no, be tɛ a kɔrɔnabita na mɛ. ⁸ Wakati na fɔnoyi ma, ka ha mane Wuro tɔ̀ ga. Ka mane yirebɛ fere ta tɛrɛ, ngwĩye ha mane yirebɛ fere na syɛbɛye ga. ⁹ Nka basyɛ ka Wuro tɔ̀. Awo, basyɛ Wuro ka tɔ̀. Ne na ka tɛ hõ ne ka bere ngwona yirebɛ fere na barikadɛgɛye ma yɛ? Ka tyata hõ bere tɛ ye ta tɛrɛ na yɛ mɛ ra? ¹⁰ Ka kɔyi kɔ yɛgɛ kɔ wakati kɔ dɔgɔ tege. ¹¹ Mɛ ni na bã kɔ kya da nemɛ, a ka na tɛ mɛ bara ta ka yena zana ga. ¹² Syenɔmane, ma ka mɛ da ka tɛ wɔkara mɛ kamasɔrɔ mɛ ti wɔkara ki. Ka ha dayaga si ta ne na ga. ¹³ Ka tɔ̀ da ma pya ya ka birɛ ngwĩ sanga ma hõ Bɛrɛda Fɔre yera ka ma, ngwõ da ye tɛ ma ha mane kɛnɛ ga. ¹⁴ Ka mane kɔrɔwɛbe gũ na nyane yena. Ngwõ pepe na, ka ha ne dɛgɛbe hõ sĩ ne na ga, nka ka ne fɔga wɔkara Wuro ta mɛlɛkɛ wala Yesu Krista yɛrɛ. ¹⁵ Ka mane ni hõ dya fɔrona. Nka ngwono tɛ? Mɛ ka syere da ne ye mane sebɛne tɛ, ka mane na ka yɛrɛ nyena wa ne pere mɛ ma. ¹⁶ Mɛ tĩyã yera ka ma, ngwõ yena mɛ tɛ ka zugu na ra? ¹⁷ Ngwona sɔma ye nyanga kya da na, nka ye tyata ngwĩ fa ta, ngwõ ha fɔro ga. Ye tyata ka dɛ̀gɛ̀ ka wa mɛ na ngwõfatɔ ka ka nyanga ye ta da na. ¹⁸ Yɛrɛnyangabe kwane fɔro ne ngwõ hõ tɛ dafɔre ta piri ma na ane kɔ sanga pepe ma. Ngwõ ka tɛ hõ mɛ to ka woro hõ dama ga. ¹⁹ Mya nimisala, mɛ mana ka yena wɔkara yà ngwĩ tine vɔrɔ, fɔ Krista hõ kwɔ ka kɔrɔ hõ syɛbɛ na. ²⁰ Mɛ mane tyata ne yɛrɛ gũ ka woro hõ ngwõfatɔ ma hõ bɛri ka ta kamasɔrɔ mɛ ni na bã fɔrona kya da na. ²¹ Ki ngwĩye ngwõ tyata wɔ tõ we, ka yera ne ma, ka tõ ta bɛrɛda mɔ ga ra? ²² A sɛbɛɛ da nemɛnimisini sɔma pɔla mane ti Ibrahima ta. Tala mana ta tere yà no. Bo tala mana ta vɛnɔma yà no. ²³ Tere yà ta nemɛnimisĩ mane vɔrɔ komavere barika hõ. Vɛnɔma yà ta nemɛnimisĩ mane vɔrɔ Wuro ta datege barika hõ. ²⁴ Ke sebɛne ngwona da sege wɔkara sõ dya sege ngwɛne. Ngwona yàra sɔma pɔla datege pɔla ta da dɔrɔ. Agare ngwona datege tala ta da dɔrɔ ngwĩ mane bi Sinayi tolo ma. Ngwõ nɔmane vɔrɔ tɛrɛbe hõ. ²⁵ Agare ngwõ tɛ wɔkara ngwona Sinayi tolo ngwĩ ti Arabi gana hõ. Ngwõ kanya kɔ Zerusalem kuru nemɛ ngwĩ tye basyɛ kamasɔrɔ ngwõ kɔ ya kɔma pepe ti tɛrɛbe hõ. ²⁶ Nka wuro hõ Zerusalem ngwõ ti vɛnɔmabe hõ. Ngwõ ke pepe sye. ²⁷ A sɛbɛɛ Wuro ta bɛrɛda hõ, da: Bi vɔrɔkara yà, be ni hõ dya. Ni hõ dya kõ na yireyi sabɛ, bi ngwĩ ngwõ vɔrɔbe na ba do tɔ̀ ga. Kamasɔrɔ yà ngwĩ ngwõ wɔ ye sana, ngwõ nɔmane nyaa gũ hõ yaloyi yà ma, banga ti ngwĩ ta. ²⁸ Ki kwane, syenɔmane, ka Wuro ta datege na nɔmane wɔkara Isaka. ²⁹ Wakati na fɔnoyi ma, no ngwĩ ngwõ vɔrɔ komavere na vɔrɔno na, ngwõ dɔ Wuro ta Ni na no ma na nyane. Yee a ti hale sɔma. ³⁰ Nka ngwono Wuro ta bɛrɛda ngwõ yera? A da tere yà kɔ a no laga kamasɔrɔ tere yà ta nemɛnimisĩ kɔ vɛnɔma yà ta nemɛnimisĩ ha na kwe kɔrɔ bi ga. ³¹ Syenɔmane, yee nemɛ, ke ha tere yà nɔmane ga. Ke vɛnɔma yà nɔmane.

¹ Krista ke dɛ̃ hõ ke ta vɛnɔmane na. Ngwõ yena ka daga wɔ ngwona vɛnɔmabe hõ. Ka ka yɛrɛ kɔrɔse, ka ka bere tɛ tɛrɛ na ga. ² Ka mɔ dɛ̃. Mɛ Pauli a yera ka ma da: Ne ka hõ dyã sõ ka yɛro, Krista ha na fui fɔro ka ma ga. ³ Ma bere ne yera yɛ mɛ da: Ngwĩ sõ hõ dyã ye a yɛro, mɛ a yera na kìnìbɛ ngwona te ma da a daga tõ na da pepe ta. ⁴ Ki ngwĩye ngwõ tyata tɛ sɔma tele na Wuro ta tõ barika hõ, ka dɛ̀gɛ̀ hõ wɛ Krista na. Ka ha Wuro ta nema gũ ga. ⁵ Mɛ̀ kwane zigi ti a ma da Wuro na ke ta sɔma tele na a zĩ hõ. Ke tine ngwõ yɛ̀rɛ̀ kɔ lanabɛbe nemɛ Ni na kìnìyi barika hõ. ⁶ Ne ke hõ kwe kɔ Krista nemɛ, yɛrobe o, yɛrobariyabe o, nafã ha ti ngwõ si na ga. Lanabɛbe ngwĩ ngwõ bara ta kanube barika hõ, nafã ti ngwõ na. ⁷ Ka mane ya zĩ fɔrona. Kɔ ngwõ ka bare ka hõ ma mɔ tĩyã na ga? ⁸ Ngwona da ha sa ka na wirita Wuro hõ fyu ga. ⁹ Ke da: Buru koobɛ fa zɔgɔ sebɛne buru fɔgɔ pepe koobɛ. ¹⁰ Ngwõ pepe na, Matigi zigi na fɔroyi ka mɛ hõ ka yɛrɛ ta piri ma na, da kya miri na kanya kɔ mya miri nemɛ. Ngwĩ sõ ngwõ ka kakiri nyangamu, Wuro na ngwona te nyane. ¹¹ Syenɔmane, mɛ yɛrɛ ta piri ma na, ne mɛ mane wadyuli ta, da yɛrobe fɔro, ngwonona ye dɔ mɛ ma ne ne nyane? Ne ngwõ mane tĩyã, aiwa, mɛ wadyuli ngwĩ ta Krista ta kwãgwaga sɔno ta da na, ngwõ ha mane na sõ si ngwonayaga titiri ga. ¹² Ngwĩye ngwõ ka kakiri nyangamu, mɛ tyata ngwõwɔ hõ ya zĩ, hõ ye sabɛ ka na melemele. ¹³ Syenɔmane, Wuro ka wiri hõ tɛ vɛnɔmane na. Nka ka ka ngwona vɛnɔmabe ta komavere na da na ga. Nka ka ka nemɛ mako fɔro kɔ nemɛ kanube nemɛ. ¹⁴ Tõ pepe dopaga kɔ bɔ bɛrɛda nemɛ, da ye: Be be nemɛ sõ kanu wɔkara be yɛrɛ. ¹⁵ Nka ne ka hõ ne tɛ wɔkara sɔkɔba fere hõ ne nemɛ ngwĩ ne nemɛ nɔma, ka ka yɛrɛ kɔrɔse ka ka na ka nemɛ ngwonayaga ga. ¹⁶ Aiwa, ngwĩ fa ti mɛ ta hõ na yera ka ma, bo ngwõ da: Ka ya Ni na kmiyi barika hõ. Ne ngwõ hõ tɛ, ka ha na komavere na wu na da ta fyu ga. ¹⁷ Da ngwĩye ngwõ dya Ni na kìnìyi ma ga, komavere nyono sa ngwõwɔ na. Da ngwĩye ngwõ dya komavere ma, Ni na kìnìyi ha kya ngwõwɔ na fyu ga. Komavere na da kɔ Ni na kìnìyi ye nemɛ kwini fɔ ka tyata hõ da ngwĩye ta, ka ha ngwõwɔ ta ga. ¹⁸ Nka ne a hõ ma Ni na kìnìyi ngwõ ka zĩ fɔga, ngwõ kɔrɔ ka ha ti tõ we ga. ¹⁹ Komavere na da ye dɔrɔ da ngwĩye na, ngwõ bɔ— nanganangabe kɔ dumatɛbe kɔ kakalatɛbe. ²⁰ Sɔma ngwĩye komavere na da ta, ngwõwɔ fyã yirebɛ ne da sege. Ye tɛ nemɛ zugi na. Ye dakwiyɛro ta hõ birisi tumabɛ. Ye pagaa kereyabe na, ye wora ba. Ye ye yɛrɛ yirebɛ hõ ne sɔma sɛrɛ dɛgɛbɛ. Ye ha bɛ̃ nemɛ hõ ga. ²¹ Ye sɔma koneya. Ye kwĩ mɛnɛ ne nyingi ne dakuro ta. Ye dayaga sifa nyaa ta. Ma ka sɛmɛbɛ wɔkara ma mane pya ne yera ka ma ngwɛne, ngwĩye ngwona da ta, ngwõwɔ ha na kwɔ Wuro ta fangamabe hõ fyu ga. ²² - ²³ Nka Ni na kìnìyi nɔmane ngwõ kanube kɔ nihõdyaro, syara, somɔnabe, sena, foro, lanabɛbe, yɛrɛmazibɛbe, yɛrɛfɛgɛbe. Tõ si ha ngwõ nemɛ na da kwini ga. ²⁴ Ngwĩye ngwõ Yesu Kristaye, ngwõwɔ tɛ wɔkara ye komavere na da kɔ a na wu pepe yɛ kwãgwaga sɔno ma. ²⁵ Ni na kìnìyi ke sugubɛ hõ ke zĩ fɔga yanɔma fɔro na. ²⁶ Ka ka ka yɛrɛ yirebɛ hõ kwɔ ka nemɛ na ba da hõ, hõ ka nemɛ zarabɛ ga.

¹ Mɛ syenɔmane, ne ka hõ sõ bo fɔga dayagatɛbe hõ, Wuro ta Ni na kìnìyi ti ki ngwĩ ta, ka ngwona te berebɛ na ka sogo na teleyi hõ kɔ yɛrɛmazibɛbe nemɛ. Nka be be yɛrɛ kɔrɔse ngwõfatɔ bi ka na kɔrɔwɛ mɛ ga. ² Ka ka nemɛ dyema kya bye na ne bi. Yee nemɛ, ka na Krista ta tõ dopaga. ³ Ne bo sõ ne ye yɛrɛ yirebɛ kasɔrɔ a mane fui ga, ngwona te ye yɛrɛ firebɛ. ⁴ Sɔma pepe tala tala daga ye yɛrɛ ta yano sege. Ne a hõ ne fɔro, a sebɛne ye yɛrɛ yirebɛ ngwõ na. A ka ye yɛrɛ ta yano yerabɛ kɔ sõ za ta yano nemɛ ga. ⁵ Ke pepe tala tala daga ke yɛrɛ ta bye bi. ⁶ Sõ ngwĩ ngwõ Wuro ta bɛrɛda kala sõ za ta, ngwona te daga ya kalamogo sõ nii wa ye soro hõ fere pepe hõ. ⁷ Ka ka ka yɛrɛ firebɛ ga. Sõ ha Wuro zi ga. Sõ ngwĩ fa tugo, ngwõ a na ngwõ kyɛ̃. ⁸ Sõ ngwĩ ngwõ komavere na tugo fere tugo, ngwona te na siri na tugo fere kyɛ̃. Ngwĩ ngwõ fere tugo ngwĩye dya Ni na kìnìyi ma, Ni na kìnìyi na ngwona te ta a sugunɔmabe na wɛbariyayi na tugo fere kyɛ̃. ⁹ Ke ka nyama dafɔretɛbe hõ ga kamasɔrɔ ne ke ma bana ngwona da hõ ga, ke na tugo fere kyɛ̃ wakati na fɔroyi ma. ¹⁰ Ngwõ yena ne tɛno ne ti ke ta, ke daga dafɔre ta sɔma pepe ma, sangofere ke syenɔmane na lanabe sɔma. ¹¹ Ka bɔ sɛbɛ nɔmane yeye sege. Mɛ yɛrɛ soro ngwõ ngwõ sɛbɛ ne fane ka ma. ¹² Ngwĩye ngwõ tyata ye da dyabɛ sɔma ma komavere na da na, ngwõwɔ tyata fanga dɛ ka ma hõ ka yɛro. Ye ngwõ ta ngwõfatɔ sɔma ka ye nyane Krista na kwãgwaga sɔno ta da yena ga. ¹³ Ngwona sɔma ngwĩye ngwõ yɛro, yewɔ yɛrɛ ha tõ na da pepe fɔga ga. Ye tyata ka yɛro ngwõfatɔ ye hõ ye yɛrɛ yirebɛ da ye ngwona tagamasɛ̃ ti ka kõ ma. ¹⁴ Mɛ kwane ha na ne yɛrɛ yirebɛ fui si na ga fɔno kyà Matigi Yesu Krista ta kwãgwaga sɔno ta da na ga. Krista ta kwãgwaga sɔno barika hõ a tɛ wɔkara diniya hõ da siri mya piri ma na, mɛ siri diniya hõ da ta peri ma na. ¹⁵ Yɛrobe kɔ yɛrobariyabe, ye pepe ba fui ga. Hõ tɛ tege fa ngwũ na, nafã ti ngwõ na. ¹⁶ Sɔma pepe ngwĩye ngwõ ya bo sogo ma, ma yera ngwõwɔ ma da. Wuro syara ta ka ma. Wuro makare ngwõwɔ kɔ Wuro ta sɔma pepe na kweye na. ¹⁷ Na bi basyɛ, sõ si ka mɛ nyane titiri ga kamasɔrɔ Yesu ta dadɛbɛru da ti mɛ komavere ma. ¹⁸ Syenɔmane, kyà Matigi Yesu Krista ta nema hõ wɔ ka pepe tala tala ta. Amina.