EFESE KƆMA

¹ Mɛ Pauli tɛ Yesu Krista ta faneta na Wuro dungo barika hõ. Mɛ bo sɛbɛ fane Wuro ta sɔma ma ngwĩye ti Efese kuru hõ, ngwõwɔ ngwĩye ngwõ kwe kɔ Yesu Krista nemɛ hõ tɛ nyomasɔma na. ² Ke Tõ Wuro kɔ Matigi Yesu Krista hõ nema kɔ syara pere ka ma. ³ Ke Wuro yirebɛ, awe ngwĩ tɛ kyà Matigi Yesu Krista Tõ na. Hõ ke to ke ne kwe kɔ Krista nemɛ, Wuro duba ta ke ma hõ wuro hõ kuru hõ duba pepe pere ke ni ma. ⁴ Sane Wuro hõ diniya tege, a mane ke dɛ̀gɛ̀ hõ tɛ aye na Krista barika hõ ngwõfatɔ ke hõ tɛ kìnìye kɔ zarakebariyaye na a zĩ hõ. ⁵ Wuro ta kanube yena, a pya na latege da ye na ke ta a nɔmane na Yesu Krista barika hõ, hõ kanya kɔ a dungo madyamabe nemɛ. ⁶ Ke Wuro yirebɛ a ta nema na yiregwagayi yena, a ngwĩ pere ke ma zana a yɛrɛ Nonanimisĩ na kanuyi barika hõ. ⁷ Ke ngwonawɛbe gũ Krista barika hõ. A ye tõ vunu ke yena hõ kyà kakye yafa ke ma. Yee nemɛ, Wuro ya nema na damatɔbariyayi pere ke ma. ⁸ A ngwona nema pere ke ma nyaa hõ kakirikɔmabe kɔ tɔbe na dopagayi pere. ⁹ A ya bunu da dɔrɔ ke ma, a mane pya ngwĩ latege na wɛ, a ngwõ dopaga Krista hõ. ¹⁰ Ngwona da na lategeyi, Wuro na ngwĩ dopaga wakati na dopagayi sanga ma, ngwõ bo: a na wuro hõ fere kɔ lagakõ ma fere pepe kwe ne ta tala hõ Krista tege ye ngwõ̀ na. ¹¹ Ke kwe kɔ Krista nemɛ hõ tɛ kɔrɔbisɔma na. Wuro mane pya ke dɛ̀gɛ̀ hõ kanya kɔ a ta latege da nemɛ. A da pepe ta hõ kanya kɔ a ta latege da kɔ a dungo nemɛ. ¹² Ngwõ yena ke ngwĩye pya ke zigi dɛ Krista ma, ke hõ Wuro ta noro na yireyi yirebɛ. ¹³ Ki mɛ, ka mane tĩyã na bɛrɛda mɔ, ngwõ ngwĩ tɛ Bɛrɛda Fɔre na hõ kisibe pere sõ ma. Ka ngwõwɔ mɔ ngwĩ sanga ma, ka mane la Krista na. Ngwõ timi Wuro ya tɔ̀bɛ dɛ ka ma, ngwõ a ta Ni na kìnìyi, a mane datege bi ngwĩ ta da na. ¹⁴ A Ni na kìnìyi pere ke ma hõ na dɔrɔ ke ma da ke na tɛ kɔrɔbisɔma na wɔkara Wuro datege bi ke ma ngwɛne. A da kyà ngwonawɛbe hõ dopaga ngwĩ sanga ma, ke na ngwona kɔrɔ gũ. Ke Wuro ta noro na yireyi yirebɛ. ¹⁵ Mɛ mɔ da ka la Matigi Yesu na, ye ka Wuro ta sɔma pepe kanu mɛ. ¹⁶ Ngwõ yena mɛ ha Wuro mɛbe do dira kya da na ga. Mɛ ha sãfire kɔ kya da nemɛ na mɛbe hõ ga. ¹⁷ Kyà Matigi Yesu Krista ta Wuro, ngwĩ tɛ noro na Tõ na, mɛ ngwõ mɛ da a Ni na kìnìyi pere ka ma ngwĩ na ka ta kakirikɔma na hõ Wuro dɔrɔ ka ma ngwõfatɔ ka hõ nawe tɔ̀. ¹⁸ Mɛ a mɛ Wuro ta da a kini sabɛ ka kɔrɔ hõ ngwõfatɔ Wuro ka wiri zigi ngwĩ na, ka hõ ngwõ tɔ̀. Ane Wuro na kɔrɔ na yiregwagayi ngwĩ pere ka ma ye yɛrɛ ta sɔma woro hõ, ka hõ ngwõ tɔ̀ mɛ. ¹⁹ Ka hõ na ta sebɛbe na yireyi tɔ̀, ngwĩ ngwõ bara ta ke lanabe sɔma kɔrɔ hõ. Ngwona sebɛbe kanya kɔ a ta fanga na yireyi na bara tɛno nemɛ. ²⁰ A mane Krista ngwini na sabɛ sara woro hõ, hõ na tangabɛ a digesoro ma wuro hõ ngwĩ sanga ma, a ngwona fanga dɔrɔ. ²¹ Wuro Krista tangabɛ ngwonakɔmabe kɔ sebɛbe kɔ fanga kɔ fangamabe pepe ngwõ̀ na. A togo na yireyi gũ ngwĩ yireyi toga pepe ma, diniya hõ toga kɔ diniya na nayi toga ma mɛ. ²² Wuro fere pepe tege Krista kãe we. A Krista pere eglise ma na ta a ngwonate na da pepe na. ²³ Eglise ngwõ Krista komavere. Eglise dopaga Krista hõ, awe ngwĩ ngwõ fere pepe dopagabɛ bi pepe hõ.

¹ Wakati na fɔnoyi ma, ka mane siri ni ta piri ma na kya dayaga kɔ kya kakye yena. ² Ka mane ya ngwõwɔ hõ gwerena hõ bo diniya tino bi hõ kanya kɔ zini ngwonate tino nemɛ, ngwona ni ngwĩ ngwõ bara ta kwɛ̃dirɛsɔma kɔrɔ hõ basyɛ. ³ Ke pepe mane ti wɔkara ngwõwɔ mɛ. Ke mane dɔ ke komavere na wu na da ma kɔ ke kɔrɔ hõ miri dungo na da ma. Wuro woro mane ba ke ta wɔkara a woro ba bɔ sɔma sɛrɛ ta ngwɛne. ⁴ Nka Wuro ta makare yire fɔrona. A ke kanu kɔ kanube na yireyi nemɛ. ⁵ Ngwõ yena hõ ke to ke ne siri ke ni ta piri ma na kyà kakye hõ, a ke kwe ke sugubɛ kɔ Krista nemɛ. Ka mane kisi Wuro ta nema barika hõ. ⁶ Hõ ke to ke ne kwe kɔ Krista nemɛ, Wuro ke ngwini mɛ hõ ke kwe ke tangabɛ wuro hõ kuru hõ kɔ Krista nemɛ. ⁷ A ngwõ ta ngwõfatɔ a ya nema na yiregwagayi dɔrɔ ke ma, a ngwĩ pere ke ma Yesu Krista ta makare barika hõ. A tyata ke ngwõ tɔ̀ basyɛ ane fɔ sanga tege ma mɛ. ⁸ Ka kisi nema barika hõ lanabɛbe yena. Ngwona kisibe ha sa ka yɛrɛ hõ ga rɛ. Ngwõ Wuro ta perefa. ⁹ Ngwõ ha gũ tɛda barika hõ ga ngwõfatɔ sõ si ka ye yɛrɛ yirebɛ ga. ¹⁰ A Wuro ngwõ ke tetɛrɛ. A ke tege ngwõfatɔ ke kwe kɔ Krista nemɛ hõ dafɔre ta. A pya na latege da ke na ngwõwɔ ta. ¹¹ Ki ngwĩye ngwõ Yahutu kɔma ga, Yahutuye ka wiri yɛrobariyasɔma. Ye ye yɛrɛ wiri yɛrosɔma. Ye yɛrɛ ngwona da ta ye komavere ma. Mɛ tyata ka ka kakiri to kya gwere tino na. ¹² Ye ka birɛ mane dɛrɛ Krista na ngwona sanga ma. Ka mane tɛ samara na. Ka ha mane tɛ Wuro ta si na dɛ̀gɛ̀wɛyi na bɔ na ga. Wuro datege ngwĩ bi ya sɔma ma, ka nii ha mane ti ngwõ hõ ga. Zigi si ha mane ti ka ta ga. Hõ ka to bo diniya hõ, Wuro ha mane tanga ka kɔrɔ hõ ga. ¹³ Nka ka kwe kɔ Yesu Krista nemɛ basyɛ. Ki ngwĩye birɛ mane dɛrɛ Wuro na, Krista ye tõ vunu hõ siri hõ ka vetirabɛ a na. ¹⁴ Krista yɛrɛ ngwõ syara pere ke ma hõ Yahutu kɔma kɔ si sɔma ta tala. Ngwõ kɔrɔ zugube ngwĩ mane ti ye yɔ, ngwõ mane tɛ wɔkara kulu. Yesu na hõ ngwona kulu wɛbɛ hõ Yahutuye kɔ si sɔma pepe pɔla kwe ne ta tala. ¹⁵ Yesu mane Musa ta tõ kɔ fane kɔ ngwona da pepe dibɛ ne wa yɛ hõ ngwona Yahutuye kɔ si sɔma pepe pɔla kwe ne ta tala kɔ awe nemɛ. Yee nemɛ a syara ka ye yɔ. ¹⁶ Krista siri kwãgwaga sɔno ma hõ ngwona zugube wɛ. A Yahutuye kɔ si sɔma kwe ne ta komavere tala na ngwona kwãgwaga sɔno barika hõ, hõ ne kɔ Wuro yɔfa bɛ̃ yee nemɛ si. ¹⁷ Krista mane na hõ syara na Bɛrɛda Fɔre na pile ta ki si sɔma ma, ngwĩye birɛ mane dɛrɛ Wuro na. A ye yera Yahutuye ma mɛ ngwĩye birɛ mane vetira Wuro na. ¹⁸ Ke pepe, Yahutuye kɔ si sɔma, Ni na kìnìyi tala ke dyema hõ ke dɔbɛ Wuro na Krista barika hõ. ¹⁹ Ngwõ yena ki si sɔma ha samara kɔ gana za ma sɔma titiri ga. Ki kɔ Wuro ta sɔma kwe tɛ gana tala ma kɔma na kɔ kõ kɔma tala. ²⁰ Ka tɔge du ngwĩ ma, ngwõ fanene kɔ purusɔma. Yesu Krista yɛrɛ ngwõ ngwona kõ du na telebɛ dɔgɔno. ²¹ Awe yɛrɛ ngwõ tɛ ngwona kõ hõ sige hõ taa ngwõfatɔ a hõ tɛ Wuro yirebɛ kõ na kìnìyi na. ²² Ka kwe kɔ awe nemɛ hõ taa awe yena mɛ hõ kwe kɔ sɔma sɛrɛ nemɛ hõ tɛ Wuro ta tanga do na Ni na kìnìyi barika hõ.

¹ Mɛ Pauli tɛ Yesu Krista ta kasono na ki si sɔma yena. Ngwõ yena mɛ Wuro mɛ ka ma. ² Wuro bara ngwĩ pere ne ma ne ta ka ma, ka mane ngwõ mɔ. A ngwõ pere ya nema barika hõ. ³ - ⁴ Wuro ya bunu da na tɔbe dɔrɔ mɛ ma. Ma bɛrɛda ngwĩye sɛbɛ ne wɛ ngwona da na, ne ka hõ ngwõwɔ kala, ka na a za da ma Krista ta bunu da kɔrɔ tɔ̀. ⁵ Gwere kɔma ha mane ngwona bunu da tɔ̀ ga nka Wuro ta Ni na kìnìyi a dɔrɔ ke ma basyɛ a ta fanesɔma kɔ purusɔma barika hõ. ⁶ Bo ngwona bunu da yo: Si sɔma kɔ Yahutuye kwe tɛ Wuro ta kɔrɔbisɔma na. Ye kwe tɛ komavere tala na. Ye pepe nii gũ Wuro ta datege na, a ngwĩ bi Yesu Krista hõ. Ye ngwõ pepe gũ Bɛrɛda Fɔre barika hõ. ⁷ Wuro ta sebɛbe bara ta mya piri ma na hõ nema pere ne ma. A mɛ ta ngwona Bɛrɛda Fɔre na baratɛta na. ⁸ Mɛ ngwĩ ngwõ dɛgɛyi hõ yaloyi Wuro ta si sɔma sɛrɛ pepe ma, Wuro ya nema pere mɛ ma hõ Bɛrɛda Fɔre yera si sɔma ma Krista ta da pepe na yiregwagaye ta da na. ⁹ Wuro na ngwona bunu da dɔrɔ sɔma ma ngwɛne, a tyata mɛ sɔma pepe dyema hõ ngwõ za. Na dofɔga gweregwerena fere pepe na tegeta Wuro ngwona bunu da dõ sɔma na. ¹⁰ A ngwõ ta ngwõfatɔ a ya kakirikɔmabe na tino nyaa dɔrɔ wuro hõ sebɛbenakɔma kɔ ngwonakɔma ma basyɛ eglise barika hõ. ¹¹ Wuro ngwõ ta hõ kanya kɔ a ta abada na da na lategeye nemɛ, a ngwõ ngwĩ ta Yesu Krista kyà Matigi barika hõ. ¹² Ke nemɛkwebe ta kɔ Yesu nemɛ hõ la a na. Ngwõ yena ke sebɛne ke dɔbe Wuro na kɔ worasigi nemɛ kɔ zigi na tangayi nemɛ. ¹³ Ngwõ yena mɛ ka mɛ da nyane ngwĩye ngwõ wiri mɛ ma ka yena, ngwowɔ ka ka zigi sɔ ga. Ngwona da pepe tɛ hõ nafã pere ka ma. ¹⁴ - ¹⁵ Ngwõ yena mɛ yolingo Tõ Wuro we, ngwõ ngwĩ togo ngwõ dɛ kõ kɔma pepe ma, wurokõ hõ kɔ lagakõ ma. ¹⁶ Mɛ Wuro mɛ da a ka kɔrɔ hõ barika yirebɛ, ka hõ sebɛbe gũ hõ sa Wuro ta noro na yireyi hõ, Ni na kìnìyi barika hõ. ¹⁷ Mɛ a mɛ da Krista hõ tanga ka kɔrɔ hõ lanabɛbe barika hõ ngwõfatɔ ka sile hõ kwɔ dɛrɛ a ta kanubɛ hõ, ka hõ ka nyanga ngwõ na. ¹⁸ Ki kɔ Wuro ta sɔma pepe hõ sebɛ Krista ta kanube tɔ̀, a ta tarabe kɔ a ta kurobe kɔ a ta kuro taa tege. ¹⁹ Mɛ tyata ka hõ Krista ta kanube tɔ̀, ngwõ ngwĩ ngwõ yireyi hõ yaloyi tɔbe pepe ma ngwõfatɔ ka hõ dopaga Wuro ta da na dopagaye pepe na. ²⁰ - ²¹ Aiwa, ngwĩ ngwõ sebɛne da pepe ta hõ yaloyi kyà mɛbɛ kɔ kyà miri pepe ma fɔrona, hõ kanya kɔ a ta sebɛbe na bara tɛno nemɛ ke kɔrɔ hõ, noro hõ dɛ wuro ma eglise hõ kɔ Yesu Krista ta da na sanga pepe ma, abada fɔ abada. Amina.

¹ Mɛ ngwĩ tɛ kasono na Matigi yena, mɛ ka mɛ da ka wiri wirino ngwĩ na, kya yano hõ kanya kɔ ngwõ nemɛ. ² Ka ka yɛrɛ mazibɛ. Sabare kɔ somɔnabe hõ gũ ka hõ Ka ka nemɛ ta da somɔna kɔ kanube nemɛ. ³ Ni na kìnìyi talabe ngwĩ pere ka ma syara barika hõ ngwĩ ngwõ ka kwe ka pɛrɛ, ka ka nyanga hõ kwa ngwõ ma. ⁴ Komavere tala tye, Ni na kìnìyi tala tye. Ane Wuro ka wiri zigi ngwĩ na, ngwõ zigi tala mɛ. ⁵ Matigi tala tye kɔ lanabɛbe tala kɔ batizebe tala. ⁶ Wuro ngwõ tala, ngwõ ke pepe Tõ. A ti sɔma pepe ngwõ̀ na. A bara ta ye pepe woro hõ. A ti ye pepe kɔrɔ hõ. ⁷ Ke pepe tala tala perefa gũ hõ kanya kɔ Krista ta perebe nemɛ. ⁸ Wɔkara a sɛbɛɛ Wuro ta bɛrɛda hõ da: A ba wuro hõ ngwĩ sanga ma, a ya kɔ kaso nɔmane na nyaaye nemɛ. A perefere pere sɔma ma. ⁹ Hõ da a ba wuro hõ, ngwõ kɔrɔ ngwono? Ngwõ kɔrɔ a mane pya zi hõ kwɔ fɔ lagakõ du hõ. ¹⁰ Ngwĩ ngwõ zi kɔ ngwĩ ngwõ ba fɔ wurokõ pepe ngwõ̀ ma, ngwõfatɔ a hõ wurokõ pepe paga kɔ ye yɛrɛ nemɛ, ngwõ tala. ¹¹ Awe ngwõ perefere pere sɔma pepe ma zɛzɛ. A bɔ ta fanene na hõ bɔ ta purusɔma na hõ bɔ ta Bɛrɛda Fɔre yera sɔma na hõ bɔ ta Pasteri kɔ kalamogi na. ¹² A ngwõ ta ngwõfatɔ a Wuro ta sɔma tetɛrɛ hõ Wuro ta bara ta hõ bo kwe Krista komavere ma hõ na nyangabɛ lanabɛbe hõ. ¹³ Yee nemɛ ke pepe hõ tɛ tala lanabɛbe kɔ Wuro Nonanimisĩ na tɔbe barika hõ. Ke hõ tɛ sɔma papa na fɔ hõ wiri Krista ta dopagabe na kuro taa tege ma. ¹⁴ Ngwona sanga ma ke ha na tɛ nimisala na titiri ga. Ke ha na nyingine wɔkara zu nyingine ngwɛne ga. Ke ha na berebere kala sifa pepe ta ga wɔkara panga sɔgɔlɔ wora ne berebere ngwɛne. Lamarasɔma ngwõ nemɛ na kala ta hõ sɔma firebɛ kɔ ye ta nyenamakwiyɛbe na yagayi nemɛ. ¹⁵ Nka ke tĩyã yera kɔ kanube nemɛ hõ pɔra da pepe na Krista hõ, awe ngwĩ ngwõ komavere ngwõ̀. ¹⁶ Komavere tetɛre awe yena. Komavere pepe ye nemɛ fɔga woro tugu da barika hõ. Yee nemɛ, ne komavere na tugutugu da pepe tala tala bara ta wɔkara ye daga ne ta ngwɛne, a pepe yire hõ fa kwe ya barika ma kanube barika hõ. ¹⁷ Aiwa, mɛ fa ngwĩ yera na kìnìbɛ ka ma kɔ Matigi togo nemɛ, bo ngwõ da, ka ka ya titiri wɔkara lanabɛbariya sɔma ya ye ta miri da na zanazanaye hõ ngwɛne ga. ¹⁸ Ye kakiri tunuyo. Wuro sugunɔmabe ngwĩ pere, ye ha ye nii bi ngwõ na ga ye ta datɔbariyabe yena. Ye mɔmagasɔma. ¹⁹ Ye ha pere tɔ̀ titiri ga. Ye ye yɛrɛ pere kakalatɛbe ma hõ da na yagaye sifa pepe ta ne yiri ngwõ ma. ²⁰ Ka ha Krista ta da kala yee nemɛ si ga. ²¹ Ka mana ta da mɔ hõ kala a ta hõ kanya kɔ tĩyã nemɛ ngwĩ ti Yesu hõ. ²² Aiwa, ka kya tino biri dira, ngwõ ngwĩ mane ka zĩ fɔga wakati na fɔnoyi ma. Ngwona tino biri sõ firebɛ kɔ a na wu na yagaye nemɛ. ²³ Ka daga tɛ sɔma ngwũ na ka ni kɔ ka kakiri ta piri ma na. ²⁴ Ka tino ngwũ ka ka hõ, ngwõ ngwĩ ngwõ tege kɔ Wuro dya nemɛ. A ye dɔrɔ kɔ tĩyã na yano nemɛ ngwĩ ngwõ tele ne kìnì. ²⁵ Ngwõ yena ka ka nĩyõ sɔ ga. Ka pepe tala tala hõ tĩyã yera ka nemɛ ma kamasɔrɔ ka tɛ ka nemɛ komavere na bo na. ²⁶ Ne ka wora hõ ba, ka ka kakye ta ga. Ka ka sĩtmi ngwona worababe hõ ga. ²⁷ Ka ka bi hõ pere Setane ma ga. ²⁸ Ngwĩ mane pya ne kimi, ngwõ ka kimi titiri ga. Nka a ye nyanga hõ bara fɔre ta kɔ ye yɛrɛ sera nemɛ ngwõfatɔ ngwĩ mako ti fa na, a hõ sebɛ bo fa pera ma. ²⁹ Ka kada ka bɛrɛda yaga si yera ga. Bɛrɛda ngwĩye ngwõ dya kɔ bɛrɛda ngwĩye sebɛne barika pere sɔma zɛ ma hõ nema pere ye na mɔre ma, ka ngwõwɔ yera. ³⁰ Ka ka Ni na kìnìyi ni na bã ga. Ni na kìnìyi ngwõ Wuro ta tɔ̀bɛ a ngwĩ dɛ ka ma. Ngwona tɔ̀bɛ a dɔrɔ da kɔ bo ti zĩ hõ, Wuro na kyà ngwonawɛbe dopaga ngwona kɔ ma. ³¹ Wɔrayɔ ka gũ ka hõ ga. Ka worababe kɔ woramarabe kɔ songoro kɔ vini bɛrɛda kɔ kɔrɔ hõ yagabe sifa pepe do dira. ³² Ka dafɔre ta ka nemɛ ma. Ka yafa nemɛ ma wɔkara Wuro yafa ka ma ngwɛne Krista barika hõ.

¹ Ka tɛ Wuro nɔmane na, ka ka nyanga hõ Wuro tmo bi. ² Ka ya kanube na sogo ma hõ dɔ Krista ma ngwĩ mane ke kanu hõ ye yɛrɛ ni pere ke yena hõ tɛ perefa na kɔ salaka na ngwunu dyayi na ngwĩ dya Wuro ma. ³ Kakalatɛbe kɔ dumatɛbe sifa pepe kɔ zarabɛbe ka zɛ ka woro hõ ga. Ngwõ nemɛ na da ha daga tɛ Wuro ta sɔma woro hõ ga. ⁴ Ka ka peremaga bɛrɛda yera ga, nka ka Wuro mɛ hõ barika yera a ma. ⁵ Ka daga tɔ̀ ne kini da kakalatɛsɔma kɔ sɔma na kɔrɔ dõye kɔ nyenapagabariyasɔma, ngwõ ngwĩ ngwõ tala kɔ fyã kãebe nemɛ, ngwõwɔ na sõ si ha na nii gũ Krista kɔ Wuro ta fangamabe na fyu ga. ⁶ Sõ si ka ka firebɛ kɔ bɛrɛda zana nemɛ ga. Ngwona da yena Wuro woro na ba Wuro kwɛnafɛgɛbariya sɔma ta. ⁷ Ngwõ yena ka ka kwɔ ngwona sɔma ta nemɛkwebe hõ ga. ⁸ Ka mane pya ne ti tunungu hõ gwerena, nka ka kwe ti kɔ Matigi nemɛ basyɛ kini na. Ka daga ya kmi na sɔma yano na. ⁹ Kini bara ngwĩ ta, ngwõ foro kɔ telebe kɔ tĩyã. ¹⁰ Ka ka nyanga hõ Matigi madyama da dɛ̀gɛ̀ tɔ̀. ¹¹ Sɔma ngwĩye ngwõ nafãbariya da ta tunungu hõ, ka ka kwe kɔ ngwõwɔ nemɛ ga. Ka kya da pepe sabɛ sire kini na. ¹² Ngwona sɔma da ngwĩye ta tunungu hõ, ke yɛrɛ piri kɔ ngwona da ta yerabe nemɛ. ¹³ Ne ye ta tɛda pepe hõ sa kini na, sɔma na ye tino tɔ̀ ngwona sanga ma. ¹⁴ Sɔma da pepe ngwĩye dɔrɔ sire, ngwõ tɛ kini na. Ngwõ yena a yera da: Tuma nyita. Tuma be wa sara woro hõ. Krista na kini sabɛ be ma. ¹⁵ Ka ka yɛrɛ ta yano kɔrɔse. Ka ka ya wɔkara kakiridarakɔma ya ngwɛne ga. Nka ka ya wɔkara kakirikɔma. ¹⁶ Ka ka kya wakati yaga ga kamasɔrɔ ke ti ngwĩ wakati hõ basyɛ, ngwõ wakati na yagayi. ¹⁷ Ngwõ yena ka ka tɛ kakiridarakɔma na ga, nka ka nyɛ ka ma hõ Matigi dungo na da tɔ̀. ¹⁸ Ka ka ka zĩ piribɛ kɔ duvɛ̃ nemɛ ga. Kakalabe ti ngwõ hõ. Nka ka daga pagaa Ni na kìnìyi na. ¹⁹ Ka bɛri ka nemɛ ta kɔ zaburu kɔ yirebɛ turo kɔ Wuro sogo ma turo nemɛ. Ka turo sõ hõ Matigi yirebɛ kɔ ka kɔrɔ pepetai nemɛ. ²⁰ Ka barika yera Tõ Wuro ma sanga pepe ma, fere pepe ta da na kyà Matigi Yesu Krista togo barika hõ. ²¹ Ka mɔ ka nemɛ ta Krista nyononakũ yena. ²² Yàra, ka mɔ ka bangane ta wɔkara ka mɔ Matigi ta ngwɛne. ²³ Sĩ ngwõ yà ngwonate wɔkara Krista eglise ngwonate ngwɛne. Krista yɛrɛ ngwõ eglise na kisita ngwĩ ngwõ tɛ a komavere na. ²⁴ Yee nemɛ, yàra daga mɔ ye bangane ta wɔkara eglise mɔ Krista ta ngwɛne. ²⁵ Sini, ka kya yàra kanu wɔkara Krista eglise kanu ngwɛne hõ ye yɛrɛ ni pere a yena. ²⁶ A ngwõ ta ngwõfatɔ a hõ eglise kìnìbɛ kɔ zo nemɛ kɔ Wuro ta bɛrɛda nemɛ hõ na ta Wuroyi na. ²⁷ A mane tyata eglise tɔgɔ ye yɛrɛ zĩ hõ, eglise ngwĩ ngwõ fɔro fɔrona, yaga do wala dõ do wala ngwõ nemɛ na fa si ka ne ti a hõ ga. Nka a hõ tɛ kìnìyi kɔ zarakebariyayi na. ²⁸ Yee nemɛ, sini daga ya yàra kanu wɔkara ye ye yɛrɛ komavere kanu ngwɛne. Ngwĩ ya yà kanu, ngwõ ye yɛrɛ kanu. ²⁹ - ³⁰ Sõ si ha ye yɛrɛ komavere koneya fyu ga, nka a ngwõ woro hõ ye kakiri to a na, wɔkara Krista ye kakiri to a ta eglise na ngwɛne, kamasɔrɔ ke tɛ Krista komavere na. ³¹ Wɔkara a sɛbɛɛ Wuro ta bɛrɛda hõ, ye: Sĩ na ye tõ kɔ ye sye to yɛ hõ wɔ kɔ ya yà nemɛ. Ye pepe sɔma pɔla na kwe tɛ sonala na. ³² Ngwõ tɛ wɔkara bunu da na yireyi, mɛ ngwĩ za wɔkara Krista kɔ eglise ta da. ³³ Nka a bɛri kya da ta piri ma na mɛ. Ki sini pepe tala tala hõ kya yàra kanu wɔkara ka yɛrɛ bahõ. Yàra daga ye bangane yirebɛ mɛ.

¹ Nimisala, ka ka na vɔrɔre kwɛ̃ fɔga Matigi zĩ hõ kamasɔrɔ ngwõ daga tɛ. ² Be tõ kɔ be sye yirebɛ. Ngwõ Wuro ta fane, a mane pya datege bi kɔ ngwĩ nemɛ. ³ A da, ye ngwõfatɔ be hõ wɔ syara na hõ si na nyaayi gũ lagakõ ma. ⁴ Ki tamɛ mɛ, ka ka ka nɔmane ni na bãbɛ mɛ ga. Nka ka ye woro hõ ne kala ne ladi kɔ Matigi ta da nemɛ. ⁵ Tɛrɛ, ka ngwonakɔma ngwĩye ngwõ ti bɛ lagakõ ma, ka ye kwɛ̃ fɔga kɔ kũ̀ kɔ sɔmabe kɔ kɔrɔ talabe nemɛ, wɔkara ka tine bara ta Krista ma. ⁶ Ka ka bara ta ye nyono na dama ye ga hõ tɛ wɔkara ka tyata ka da dyabɛ sõ ma. Nka ka bara ta wɔkara Wuro ta tɛrɛ hõ Wuro dungo ta kɔ ka kɔrɔ pepe nemɛ. ⁷ Ka bara ta kɔ dyamabe nemɛ wɔkara ka tine bara ta Matigi ma, ka ha bara ta sɔma ma ga. ⁸ Ka tɔ̀ da sɔma pepe, tɛrɛ o, vɛnɔmane o, ye pepe tala tala na ya dafɔretɛbe na sara gũ Matigi ta. ⁹ Ki ngwonakɔma mɛ, ka ngwõ nemɛ ta kya tɛrɛ ma. Ka ka na sigebɛ ye ma ga. Ka tɔ̀ da ye ta Matigi kɔ kya Matigi ti wuro hõ. Ngwõ ha sõ dɛ̀gɛ̀ sõ na ga. ¹⁰ Aiwa, ka kwe kɔ Matigi nemɛ hõ kya fanga gũ a ta sebɛbe na yireyi barika hõ. ¹¹ Ka kya kũ kwini fere pepe bi, Wuro ngwĩye pere ka ma, ngwõfatɔ Setane hõ tuma kɔ ya lamara nemɛ ngwĩ sanga ma, ka na sebɛ taa na yɛ̀rɛ̀. ¹² Ke ha kwini kɔ sɔma nemɛ ga, ke kwini kɔ ni na ngwonakɔma na yagaye nemɛ kɔ ngwonakɔma na yireye kɔ fangakɔma kɔ bo diniya hõ tunungu ngwonakɔma. ¹³ Ngwõ yena ka Wuro ta kũ kwini fere pepe bi ngwõfatɔ ka hõ sebɛ kwini ngwona kɔ na yagayi ma. Ka sebɛbe gũ wɛ timi ma ka zugi ma, ka na taa wɔ ka taano na yɛ. ¹⁴ Ka ka yɛrɛ tetɛrɛ hõ wɔ ka nyono na. Ka tĩyã pɛrɛ ka yɔyɔ hõ wɔkara sõ sɛ̃tiri pɛrɛ ngwɛne. Ka telebe ka ka hõ wɔkara sõ mɛnɛbɛ zogo ka ye mogo hõ ngwɛne. ¹⁵ Ka ka nyanga syara na Bɛrɛda Fɔre yerabe na. Ngwõ hõ tɛ wɔkara kya kanɛgɛ ka ngwĩye ka. ¹⁶ Hõ na kwe ngwõ ma, ka lanabɛbe bi ngwõ ngwĩ na tɛ kya syɛɛ tɛ̃ fa na. Yee nemɛ ka na sebɛ Setane ta syɛɛ na toganaye dibɛ kɔ ngwõ nemɛ. ¹⁷ Kya kisibe hõ tɛ wɔkara kya kũ kwini bãfɔla. Ka Ni na kìnìyi ta tabaku bi, ngwõ Wuro ta bɛrɛda. ¹⁸ Ka Wuro mɛ sanga pepe ma Ni na kìnìyi barika hõ kɔ mɛbe na yireyi sifa pepe nemɛ. Ka wɔ ka nyono na hõ ka nyanga ngwona da na. Ka Wuro mɛ a ta sɔma pepe ma. ¹⁹ Ka Wuro mɛ mɛ ma mɛ, ngwõfatɔ ma hõ ne bɛri ngwĩ sanga ma, Wuro hõ bɛrɛda tele ka ne do hõ, ma hõ sebɛ Bɛrɛda Fɔre na bunu da yera ne kìnìbɛ sɔma ma kɔ worasigi nemɛ. ²⁰ Mɛ tɛ faneta na ngwona Bɛrɛda Fɔre yena hõ tɛ kasono na. Ka Wuro mɛ ngwõfatɔ ma hõ bɛri kɔ worasigi nemɛ wɔkara mɛ daga ne ta ngwɛne. ²¹ Tisike tɛ ke syeno na kanuyi na, mɛ nyo ngwĩ ma. A ke dyema Matigi ta bara na. Ngwõ na mya da yera ka ma ngwõfatɔ ka hõ ngwõ tɔ̀. ²² Ngwõ yena mɛ a fane a ya ka birɛ ngwõfatɔ ka hõ myà da tɔ̀ ane a hõ ka wora sigebɛ. ²³ Ke Tõ Wuro kɔ kyà Matigi Yesu Krista hõ syara kɔ kanube kɔ lanabɛbe pere syenɔmane pepe ma. ²⁴ Ngwĩye ngwõ kyà Matigi Yesu kanu kɔ kanube na wɛbariyayi nemɛ, Wuro nema pere ngwõwɔ pepe ma.