KOLOSE KƆMA

¹ Mɛ Pauli tɛ Yesu Krista ta faneta na Wuro dungo barika hõ. ² Mɛ kɔ ke syeno Timote bo sɛbɛ fane Wuro ta sɔma ma ngwĩye tanga Kolose kuru hõ, ki ngwĩye ngwõ mɛ̀ syenɔmane Krista hõ. Ke Tõ Wuro hõ syara ta ka ma hõ nema pere ka ma. ³ Mɛ̀ barika yera kyà Matigi Yesu Krista Tõ Wuro ma ne mɛ̀ hõ ne Wuro mɛ ka ma ngwĩ sanga ma. ⁴ Mɛ mɔ da ka la Yesu Krista na, ye ka Wuro ta sɔma pepe kanu. ⁵ Ka mane pya ngwona tĩyã na Bɛrɛda Fɔre mɔ ngwĩ sanga ma, ka mane ngwona zigi dɛ do ta da mɔ mɛ. Ngwõ yena ka ka zigi dɛ da ngwĩ ma, ngwĩ ngwõ tegee ka ma wuro hõ, a tɛ wɔkara kya lanabɛbe kɔ kya kanube du tegee ngwõ ma. ⁶ Ngwona Bɛrɛda Fɔre wiri ka ma wɔkara a wiri diniya pepe ma ngwɛne hõ zãzã hõ dubɛ pere a na mɔ sɔma ma. A mane ngwõ ta ka woro hõ mɛ, na dofɔga Wuro ta nema ta da mɔ kɔ ma ka ta. Ka ngwona nema tɔ̀ tĩyã na. ⁷ Mɛ̀ baratɛkweta Epafarasi mane ka kala ngwona da na. Awe tɛ Krista ta baratɛta na saratipagata na hõ bara ta ka ma. ⁸ Ni na kìnìyi kanube ngwĩ ka ka kɔrɔ hõ, a ngwona da yera mɛ̀ ma. ⁹ Ngwõ yena mɛ̀ kya da mɔ ngwĩ kɔ ma, na dofɔga fɔ ngwona kɔ ma, mɛ̀ ha Wuro mɛbe do dira kya da na ga. Mɛ̀ Wuro mɛ da a ka paga a dungo na tɔbe na hõ Ni na kìnìyi na tɔbe kɔ kakirikɔmabe pere ka ma. ¹⁰ Yee nemɛ, kya yano hõ kanya kɔ Matigi tino nemɛ ane ka hõ na madyamabe ta sanga pepe ma. Ka dafɔre sifa pepe ta hõ ya zĩ hõ Wuro na tɔbe na. ¹¹ Mɛ̀ Wuro mɛ da a ya fanga na yiregwagayi ka ka hõ ngwõfatɔ ka hõ sebɛ da pepe somɔna. ¹² Ka barika yera Tõ Wuro ma kɔ nihõdyaro nemɛ, awe ngwĩ ngwõ sebɛbe pere ka ma hõ ka nii gũ a ta sɔma na kɔrɔ na bɔ na, ngwõ ngwĩ ngwõ tegee ye ma a ta fangamabe hõ, kini ti ngwõ ngwɛ̃. ¹³ A ke dɛ̃ ke wa tunungu ta fanga soro hõ, hõ ke ka a Nonanimisĩ na kanuyi ta fangamabe hõ. ¹⁴ Ke ngwonawɛbe gũ ngwõ ta. A kyà kakye yafa ke ma. ¹⁵ Krista ngwõ Wuro na zɛbariyayi dya. Awe ngwõ gwere vɔrɔ no. A ti tege fere pepe ngwõ̀ na. ¹⁶ Wuro fere pepe ngwĩye tege wurokõ hõ kɔ lagakõ ma, a ngwõ tege awe barika hõ. Fere na zɛye kɔ fere na zɛbariyaye, diniya hõ sebɛbe kɔ fanga, Wuro ngwona fere pepe tege awe yena kɔ awe barika hõ. ¹⁷ A mane tye sane ngwona fere hõ tegee. Fere pepe ye nemɛ fɔga hõ wɔ yɛ awe barika hõ. ¹⁸ Eglise ngwõ tɛ wɔkara komavere, Krista ngwõ ngwõ ngwõ̀. Awe ngwõ komavere sugubɛ. A gwere vɔrɔ no ngwĩ mane ngwini sa sara woro hõ ngwõfatɔ a hõ ke zĩ fɔga da pepe na. ¹⁹ Kamasɔrɔ a dya Tõ Wuro ma hõ ye tino na dopagayi ka awe kɔrɔ hõ. ²⁰ A syara ka a yɛrɛ kɔ fere pepe yɔ a Nonanimisĩ tõ ta vunube barika hõ kwãgwaga sɔno ma hõ ngwona yɔfabɛ̃be ka ye yɛrɛ kɔ fere pepe yɔ awe yena, lagakõ ma fere kɔ wurokõ hõ fere. ²¹ Ki mɛ, ka birɛ mane pya ne dɛrɛ Wuro na. Ka mane tɛ a zugi na kya siri kɔ kya tɛda yaga yena. ²² Nka basyɛ Wuro ki kɔ a yɔfa bɛ̃ a Nonanimisĩ ta siribe barika hõ ngwõfatɔ a hõ ka na kìnìye na zarakebariyaye na dopagaye taabɛ a zĩ hõ. ²³ Ngwõ pepe na, ka na nyangaye na sabatiye hõ wɔ lanabɛbe hõ. Ka mane zigi ngwĩ gũ ngwona Bɛrɛda Fɔre mɔ kɔ ma ka ta, ka daga wɔ ngwona da hõ. Ngwona Bɛrɛda Fɔre mane yera sɔma pepe ma diniya bi pepetai hõ. Mɛ Pauli tɛ ngwona bɛrɛda na baratɛta na. ²⁴ Basyɛ mɛ ni hõ dya na nyane da na ka yena. Fa ngwĩ ngwõ dɛsɛɛ Krista ta nyane na, mɛ ngwõ dopagabɛ ne yɛrɛ komavere hõ awe komavere yena, ngwõ ngwĩ ngwõ eglise. ²⁵ Mɛ tɛ eglise ta baratɛta na hõ kanya kɔ ngwona nema nemɛ, Wuro ngwĩ kalofa ne ma ka yena ngwõfatɔ ma hõ Wuro ta bɛrɛda yera ne kìnìbɛ. ²⁶ Ngwõ kɔrɔ ngwona bunu da ngwĩ mane dõ sɔma na, na dofɔga fɔ gweregwerena. Wuro a dɔrɔ a ta sɔma ma basyɛ. ²⁷ Ngwona bunu da na yiregwagayi, ngwõ ngwĩ tɛ sɔma pepeyi na, a dya Wuro ma hõ ngwõ dɔrɔ ya sɔma ma. Ngwona bunu da ngwõ bo: ye Yesu tanga ka kɔrɔ hõ. Ngwõ yena ka na ka nii gũ Wuro ta noro hõ. ²⁸ Yee nemɛ, ke Krista ta da yera sɔma pepe ma. Ke sɔma pepe ladi hõ ne pepe kala kɔ kakirikɔmabe pepe nemɛ ngwõfatɔ ke hõ sɔma pepe tala tala dɔrɔ Wuro ma, ye na dopagaye Krista hõ. ²⁹ Ngwõ yena mɛ bara ta ne kwini hõ kanya kɔ Krista ta bara tɛno nemɛ, ngwõ ngwĩ ngwõ bara ta ne kɔrɔ hõ kɔ sebɛbe na yireyi nemɛ.

¹ Mɛ kũ na yireyi ngwĩ kwini ka yena, ngwõ kɔrɔ mɛ bara na sigeyi ngwĩ ta, mɛ tyata ka ngwona da tɔ̀. Mɛ ngwõ ta Lahodise kɔma yena mɛ, kɔ ngwĩye ha mɛ za hõ ne dɛ̀gɛ̀ tɔ̀ dɛ̃ ga. ² Mɛ ngwona kũ kwini ngwõfatɔ ye hõ worasigi gũ kɔ ngwõfatɔ ye hõ kwe tɛ tala kanube na. Ye hõ kakiri na fɔroyi gũ ngwĩ ngwõ famube na nyaayi na dopagayi pere sõ ma. Ye hõ Wuro ta bunu da tɔ̀ mɛ, ngwõ kɔrɔ Krista yɛrɛ. ³ Wuro ta kakirikɔmabe kɔ a na tɔbe pepe ti Krista hõ, ngwõ dõ sɔma na. ⁴ Ma ngwõ yera ngwõfatɔ sõ si ka na ka firebɛ kɔ sõ ta mamana bɛrɛda na dyaye nemɛ ga. ⁵ Hale ne birɛ ne dɛrɛ ka na komavere ta piri ma na, ma ti kɔ ka nemɛ ni ta piri ma na. Mɛ a za da ka da pepe ta kɔ tɛno na fɔroyi nemɛ ane ka wɔ kya lanabɛbe hõ Krista ma. Mɛ ni hõ dya ngwõ na. ⁶ Ka la wɛ Yesu na, a tɛ kya Matigi na. Basyɛ ka kwe ya kɔ awe nemɛ. ⁷ Ka wɔ Krista ma wɔkara sɔno ngwĩ sile ngwõ kwɔ dɛrɛ. Ka ka ni ta kõ tɔgɔ awe ma. Ka fa kwe kya lanabɛbe ma wɔkara ka a kala ngwɛne. Ka barika yera Wuro ma sanga pepe ma. ⁸ Ka ka yɛrɛ kɔrɔse ngwõfatɔ sõ si ka na ka dɛgɛbe kɔ sɔma ta kakirikɔmabe na kala nemɛ kɔ firebɛ bɛrɛda nemɛ ga. Ngwõ nemɛ na bɛrɛda kanya kɔ sɔma ta lãda nemɛ kɔ bo diniya hõ ni ta da nemɛ. Ngwõwɔ ha kanya kɔ Krista ta da nemɛ ga. ⁹ Wuro ta Wurobe na dopagayi tanga Krista komavere hõ. ¹⁰ Awe ngwõ ti ngwonakɔmabe kɔ ni na fanga pepe ngwõ na. Ki kwane kwe kɔ awe nemɛ hõ tɛ dopagaye na awe hõ. ¹¹ Ka kwe kɔ Krista nemɛ hõ yɛro awe ta. Ngwona yɛrobe ngwõ ha tɛ komavere na yɛrobe ga. Ka komavere na da dira hõ sa dayagatɛbe na. Ngwõ Krista ta yɛrobe. ¹² Ka mane batize ngwĩ sanga ma, a mane tɛ wɔkara ka kwe sitira kɔ Krista nemɛ hõ kwe ngwini kɔ le, kamasɔrɔ ka la Wuro ta sebɛbe na, ngwõ ngwĩ ngwõ a ngwini na sabɛ sara woro hõ. ¹³ Gweregwerena a mane tɛ wɔkara ka mane siri ni ta piri ma na kya kakye yena. Ka ha mane Wuro ta sɔma ga, ka mane tɛ si sɔma na. Wuro ki kɔ Krista kwe ka sugubɛ nemɛ hõ. Wuro kyà kakye pepe yafa ke ma. ¹⁴ A tɛ wɔkara kyà ku mane sɛbɛɛ sɛbɛ bo ma. Wuro ngwona sɛbɛ yaga hõ ngwona ku pepe yafa ke ma. A ngwona da pepe wɛ kɔ kwãgwaga sɔno nemɛ. ¹⁵ Hõ Krista to ngwona kwãgwaga sɔno ma, a fanga pepe tɔ ngwonakɔma kɔ fangakɔma ta hõ sebɛbe gũ ye ma ne ta sege fere na sɔma pepe ta. ¹⁶ Yee nemɛ, ka ka dyã sõ si ka zarake zõ da wala mɛnɛ da na ga wala yɛgɛ ngwũ kɔ makwɔnabɛ kɔyi ta da na ga. ¹⁷ Ngwona da pepe mane tɛ da na naye dya na. Nka ngwĩ ngwõ tĩyã na da basyɛ, ngwõ Krista ta da. ¹⁸ Ka ka dyã sõ si ka bare hõ sebɛbe gũ ga. Ye tyata ka hõ ne ta yɛrɛmazibɛbe na dapɔlabɛribe nemɛ ta ne mɛlɛkɛe yirebɛ. Ngwõ nemɛ na sɔma ye zigi dɛ ye ta zɛ da ma. Ye ye yɛrɛ yirebɛ zana hõ da dyati sɔma ta dyatino na. ¹⁹ Krista ngwĩ ngwõ komavere ngwõ̀, ye ha malo ngwõ ma ga. Krista barika hõ komavere pepe ye nemɛ fɔga, woro tugu da kɔ yiya, hõ yire hõ kanya kɔ Wuro dungo nemɛ. ²⁰ Ki kɔ Krista kwe siri diniya hõ da ta piri ma na. Aiwa, ngwonona ka ya bo diniya kɔma ta yano na yɛ? Ka dyã hõ ngwona fane fɔga, ye. Kada be bo bi ga. ²¹ Ye kada be bo mɛnɛ ga. Ye kada be le bo ma ga. ²² Ngwona fere pepe na be mako fɔro zɔgɔta, ngwõ timi ye na wɛ. Ngwõwɔ sɔma ta fane na yeraye kɔ sɔma ta kala da. ²³ Ngwona fane na yeraye ngwõ kakirikɔmabe na da sɔma nyena hõ ye ta yirebɛbe tino yena ngwĩ ngwõ sa sɔma hõ kɔ ye ta yɛrɛmazibɛbe kɔ ye yɛrɛ komavere na nyane da. Hõ komavere na wu wɛ, nafã ha ti ngwõ si na ga.

¹ Ki kɔ Krista mane kwe ngwini hõ sa sara woro hõ. Aiwa, ka wuro hõ fere kya. Krista tanga Wuro digesoro ma ngwɛ̃. ² Ka miri wuro hõ fere ta da na. Ka ka miri lagakõ ma fere ta da na ga. ³ Kamasɔrɔ ka siri. Kya sugunɔmabe kɔ Krista kwe ne dõ nemɛ hõ Wuro yɛrɛ hõ. ⁴ Kya sugunɔmabe ngwõ Krista kya da pepe na. Ne a hõ ye dɔrɔ ngwĩ sanga ma, ki kɔ awe na kwe dɔre. Ka na nii gũ a ta noro na. ⁵ Aiwa, ka kya lagakõ ma tino dira. Ngwõ kɔrɔ, kakalabe kɔ dumatɛbe kɔ dayaga na wu kɔ wu sifa pepe kɔ nyenapagariyabe. Nyenapagabariyabe ngwõ fyã kãebe sifa bo. ⁶ Ngwona da yena Wuro woro na ba a kwɛnafɛgɛbariyasɔma ta. ⁷ Yee ka mane pya ne ti gwerena, ka mane pya ne ti kakye soro hõ ngwĩ sanga ma. ⁸ Nka ka ngwona da pepe do dira basyɛ, woramarabe kɔ worababe kɔ zugube. Vini bɛrɛda kɔ peremaga bɛrɛda si ka sa ka do hõ ga. ⁹ - ¹⁰ Ka ka nĩyõ sɔ ka nemɛ ma ga kamasɔrɔ ka mane kya tino biri kɔ a ta tɛda wa ka hõ, hõ tino ngwũ ka ka hõ. Ngwona tino ngwũ, ngwõ sõ ngwũ tino. Tegeta Wuro kyà sõ ngwũ ngwũbɛ suute hõ kanya kɔ ye yɛrɛ dya nemɛ ngwõfatɔ ke kɔrɔ hõ pagaa a na tɔbe na. ¹¹ Yee nemɛ, Yahutu kɔma kɔ si sɔma ha tye ga. Y ɛro sɔma kɔ yɛrobariya sɔma ha tye mɛ ga. Sɔkɔba kɔma kɔ kire gwaga hõ sɔma ha tye ga. Tɛrɛ kɔ vɛnɔmane ha tye ga. Nka Krista ngwõ ti ye ta da pepe hõ, a tanga ye pepe kɔrɔ hõ. ¹² Ka tɛ Wuro ta sɔma na. A mane ka kanu hõ ka dɛ̀gɛ̀ hõ tɛ aye na. Ngwõ yena ka sɛna kɔ foro kɔ yɛrɛmazibɛbe kɔ sabare kɔ somɔnabe ka ka hõ. ¹³ Ka ka nemɛ ta da somɔna. Ne a hõ ti bo sõ kɔrɔ hõ da ye bo ye kakye bi, ka yafa nemɛ ma. Matigi yafa ka ma ngwɛne, yee nemɛ ka daga yafa nemɛ ma mɛ. ¹⁴ Na kwe ngwõ pepe ma, ka kanube ka ka hõ, ngwõ ngwĩ ngwõ sebɛne sɔma pepe dopagabɛ ne kwe ne ta tala. ¹⁵ Krista ta syara hõ tanga ka kɔrɔ hõ, hõ ka zĩ fɔga. Wuro kwe ka wiri ngwona syara na hõ tɛ wɔkara komavere tala. Ka barika yera Wuro ma ngwõ na. ¹⁶ Krista ta bɛrɛda kɔ a ta ferekɔmabe pepe hõ tanga ka kɔrɔ hõ. Ka ka nemɛ kala hõ ka nemɛ ladi kɔ kakirikɔmabe kɔ zaburu kɔ yirebɛ turo nemɛ. Ka turu sõ Wuro ma kɔ ka kɔrɔ pepe nemɛ kɔ barikayerabe nemɛ. ¹⁷ Ka ngwĩ fa pepe ta, bɛrɛda o, tɛda o, ka ngwõ pepe ta kɔ Matigi togo nemɛ hõ barika yera Tõ Wuro ma awe barika hõ. ¹⁸ Yarà, ka mɔ ka bangane ta wɔkara ka daga ne ta ngwɛne Matigi zĩ hõ. ¹⁹ Sini, ka kya yàra kanu. Ka ka kya da sigebɛ ye ma ga. ²⁰ Nɔmane, ka ka na vɔrɔre kwɛ̃ fɔga da pepe na wɔkara ka daga ne ta ngwɛne Matigi zĩ hõ. Ngwõ dya Wuro ma. ²¹ Tamɛ, ka ka ne digi ka nɔmane na ga ngwõfatɔ ye ni na ka na bã ga. ²² Tɛrɛ, ka ngwonakɔma ngwĩye ngwõ ti lagakõ ma, ka ngwõwɔ kwɛ̃ fɔga da pepe na. Ka ka ne bara ta ye nyono na dama hõ tɛ wɔkara ka tyata hõ ka da dyabɛ sɔma ma ga. Ka kya bara ta kɔ kɔrɔ na fɔroyi nemɛ hõ kwã Wuro na. ²³ Ka ngwĩ fa pepe ta, ka ngwõ ta kɔ ka kɔrɔ pepe nemɛ wɔkara ka tine ngwõ ta Matiga ma, ka ha ye ta sɔma ma ga. ²⁴ Ka daga na tɔ̀ da ka na kɔrɔ bi Matigi ta, ngwõ kya yirebɛ fa. Ka bara ta Matigi ma, ngwõ kya ngwonate na syɛbɛyi. ²⁵ Nka ngwĩ ngwõ telebaryiya da ta, ngwõ na ya telebariyabe na sara gũ kamasɔrɔ Wuro ha sõ dɛ̀gɛ̀ sõ na ga.

¹ Ngwonakɔma, ka kya tɛrɛ fɔga fɔrona kɔ da na dagaye na teleye nemɛ. Ka daga tɔ̀ da ngwonate bo ti ka ngwõ̀ na mɛ wuro hõ. ² Ka wɔ Wuro mɛbe hõ, hõ wɔ ka nyono na ngwõ hõ, hõ barika yera Wuro ma. ³ Ka Wuro mɛ mɛ̀ ma mɛ ngwõfatɔ a hõ tɛno pere mɛ̀ ma hõ na ta bɛrɛda yera hõ Krista ta bunu da yera. Ngwona bunu da yena mɛ ti kaso hõ basyɛ. ⁴ Ka Wuro mɛ ngwõfatɔ ma hõ ngwona bɛrɛda yera ne kìnìbɛ wɔkara ma daga ne ta ngwɛne. ⁵ Ngwĩye ngwõ lanabɛbariya sɔma, ka ne ya kɔ kakirikɔmabe nemɛ ngwõwɔ ta piri ma na. Ka ka nyanga. Ka ka kya wakati yaga ga. ⁶ Kya bɛrɛda daga ne dya sanga pepe ma, nafã ne ti ye hõ ngwõfatɔ ka hõ sebɛ sɔma pepe dyabi kɔ dyabino na fɔroye nemɛ. ⁷ Ke syeno na kanuyi Tisike, ngwõ Matigi ta baratɛta na nyomayi. A mɛ baratɛkweta Matigi ta bara da na, ngwõ na mya da pepe yera ka ma. ⁸ Mɛ a fane ka birɛ ngwõfatɔ ka hõ myà da pepe tɔ̀ ane ngwõ hõ ka wora sigebɛ. ⁹ Mɛ syeno na kanuyi na teleyi Onesime na kwe ya kɔ le. A kya sõ bo. Ngwõwɔ na bɛ ta da pepe yera ka ma. ¹⁰ Mɛ kasokwenemɛ Arisitake bire ka na. Banabasi ligeno Mareka bire ka na mɛ. Ka fane mɔ ne wɛ Mareka ta da na. Ne a hõ wiri ka bire ngwɛ̃, ka a fɔga fɔrona. ¹¹ Ye Yesu ngwĩ wiri Zusitusi, ngwõ bire ka na mɛ. Ngwona sɔma saa dama ngwõ Yahutu kɔma ngwĩye tɛ lanabe sɔma na hõ kwe bara ta kɔ mɛ nemɛ Wuro ta fangamabe ta da na. Ngwõwɔ mɛ zigi tugu fɔrona. ¹² Yesu Krista ta baratɛta Epafarasi ngwĩ ngwõ kya sõ bo, ngwõ bire ka na. A ye nyanga Wuro mɛbe na ka ma, a ha ngwõ do dira ga ngwõfatɔ ka na dopagaye na zigi tangaye hõ wɔ Wuro dungo na, da pepe na. ¹³ Mɛ a syere ngwõ na da kya da na ninabano ti kɔ le fɔrona, ki kɔ Lahodise hõ lanabe sɔma kɔ Hiyeropolise hõ lanabe sɔma mɛ. ¹⁴ Ke syeno dogotoro sõ Luka kɔ Demase bire ka na. ¹⁵ Ka bire Lahodise hõ lanabe sɔma na kɔ Nefasi kɔ eglise ngwĩ ngwõ ye nemɛ kwe a ta kõ hõ. ¹⁶ Ka hõ bo sɛbɛno kala na wɛ, ka to Lahodise eglise a kala mɛ. Lahodise kɔma hõ sɛbɛno ngwĩ fane ka ma, ka ngwõ kala mɛ. ¹⁷ Ka yera Arisipe ma ye Matigi ta bara ngwĩ ngwõ kalofa a ma, a ye kakiri to ngwõ na hõ ne ta ne dopaga. ¹⁸ Mɛ Pauli ngwõ bɔ bɛrɛda sɛbɛ kɔ ne yɛrɛ soro nemɛ: KA FO PEPE. Ka ka sãfire kɔ mya da nemɛ kaso hõ bɛ ga. Wuro ta nema hõ wɔ ka ta.