TƐDA

TƐDA

¹ - ² Teofile fɔro, Yesu mane tɛda pepe ngwĩye ta ne sɔma kala ngwɛne, na dofɔga gwerena fɔ ya wiri a duro kɔ ma hõ ba wuro hõ, mɛ ngwona da yera be ma na sɛbɛ na gwereyi hõ. Sane Yesu hõ duro wuro hõ, a mane fane yera ya fanene na dɛ̀gɛ̀wɛye ma Ni na kmiyi barika hõ. ³ Yesu siri wɛ timi ma, a na suguyi bere ye dɔrɔ fanene ma tino nyaa na nyi kepɔla kɔrɔ hõ. A mane Wuro ta fangamabe na da yera ye ma. ⁴ Bo kɔ ma hõ Yesu to a ne ti zama hõ kɔ ya fanene nemɛ, a da ye ma ye ka ye birɛ dɛrɛbɛ Zerusalem na ga. Ye nka ye ye Tõ ta datege yɛ̀rɛ̀, a ngwĩ bi ye ma. Ye yi ngwona da yera ye ma mɛ. ⁵ A da: Zã mane sɔma batize zu hõ, nka nyi damane bɔ timi, Ni na kìnìyi na ka batize. ⁶ Ye pepe na kweye na tɔga da: Matigi, be na bere fangamabe tege Israyɛli kɔma ma bo wakati ma ra? ⁷ Yesu ne dyabi da ye ye Tõ sanga kɔ wakati ngwĩye latege kɔ ye yɛrɛ ta sebɛbe nemɛ, ye yewɔ ha daga tɛ ngwona da na tɔ̀re na ga. ⁸ A da: Nka Ni na kìnìyi hõ zi ka ma ngwĩ sanga ma, ka na sebɛbe gũ. Ka na tɛ ne syɛrɛ na Zerusalem kuru hõ kɔ Zude gana pepe hõ kɔ Samari gana hõ fɔ ya wiri lagakõ pepe tege ma. ⁹ Ngwona bɛrɛda yera wɛ timi ma a ta, hõ kalanɔmane to ye na sege, Yesu duro ba wuro hõ. Debino bo zi na pĩ a ma, ye ma a za ga. ¹⁰ Hõ ne to ye ne wurokõ sege, ne sege Yesu ba do hõ, sini na zofurokɔma sɔma pɔla bɔ na taa ye kyegɛ ma. ¹¹ Ngwõwɔ da ye ma: Galile kɔma, ngwonona ka taa bɛ ne wurokõ sege? Yesu ngwĩ ngwõ duro wɛ ka woro hõ, hõ ba wuro hõ, awe yɛrɛ ngwõ na bere na yɛ, wɔkara ka a na bayi za wuro hõ ngwɛne. ¹² Kalanɔmane ye bere ya Zerusalem hõ tuma tolo ma ngwĩ togo ti Oliviye. Ngwɛ̃ vetira Zerusalem na, ye yɔfa ngwõ kilometire tala nemɛ na yuru dama. ¹³ Ye ye bere bige. Ye mane nemɛkwebe ta zanga ngwĩ hõ, ye ba ngwɛ̃. Pierre kɔ Zã kɔ Yakuba mane tye kɔ Andre kɔ Filipe kɔ Toma kɔ Batelemi kɔ Matiyu kɔ Alife no Yakuba kɔ Simõ ngwĩ ngwõ sɔma murutibɛ Rome kɔma ta fangama ma kɔ Yakuba kɔ Zuda. ¹⁴ Ye pepe mane ye nemɛ kwe ne Wuro mɛ kɔ pepe ma, yewɔ kɔ yàra kɔ Yesu sye Mariama kɔ Yesu pyare. ¹⁵ Ngwona kɔ bo ma Pierre tuma taa syenɔmane woro hõ. Ye pepe na kweye mane sɔma kekonala wa. ¹⁶ A da ye ma: Mɛ syenɔmane, da ngwĩ sɛbɛɛ Wuro ta bɛrɛda hõ Zuda ta da na, ngwõ daga dopaga. Ni na kìnìyi mane pya bɛri Dauda do hõ, hõ Zuda ta da yera, awe ngwĩ mane tɛ Yesu na fɛgɛre na zɛngɛsigeta na. ¹⁷ Zuda mane mɛ̀ na bo, a mane ye nii gũ myà bara na mɛ. ¹⁸ Ye mana sara kɔ gwana ngwĩye nemɛ a ta dayaga yena, a lɔ bo tɛrɛ kɔ ngwõ nemɛ. Ngwõ timi a bɛrɛ ngwɛ̃ hõ baga ye ngwõ̀ ma. A tulu fɛtɛ, a kɔrɔnɔmane pepe zãzã. ¹⁹ Zerusalem kɔma pepe mane ngwona da tɔ̀. Ngwõ yena ye ngwona lɔ wiri ye yɛrɛ ta bɛrɛda hõ Hakeledama. Ngwõ kɔrɔ tõ lɔ. ²⁰ A sɛbɛɛ Zaburu kitabu hõ da: A ta kõ hõ mumugu. Sõ si ka tanga a kɔrɔ hõ ga. A da mɛ: Sõ za hõ na ta bara bi. ²¹ - ²² Aiwa, sonala daga kwe mɛ̀ ma hõ tɛ Yesu ta ngwinibɛ na syɛrɛ na kɔ ke nemɛ. Hõ Matigi Yesu to ke woro hõ, na dofɔga Zã ta batize sanga ma fɔ ya wiri Yesu duro kɔ ma hõ sa ke woro hõ, sɔma ngwĩye mane wɔ kɔ ke nemɛ ngwona wakati pepe ma, ngwona sõ daga tɛ ngwõwɔ na bo. ²³ Ye na kɔ sɔma pɔla nemɛ: Ye Y usufu ngwĩ wiri Barasaba, a togo ti Zusutusi mɛ. Ngwõ kɔ Matiyasi. ²⁴ - ²⁵ Ngwõ timi ye pepe Wuro mɛ da: Matigi bi ngwĩ ngwõ sɔma pepe kɔrɔ hõ da tɔ̀, be ngwĩ dɛ̀gɛ̀ bɔ sɔma pɔla hõ, ngwõ dɔrɔ mɛ̀ ma ngwõfatɔ mɛ̀ hõ na ka bo fanebe na bara hõ, Zuda bere hõ sa ngwĩye hõ, hõ ya ye yɛrɛ ta bihõ. ²⁶ Ngwona sanga ma ye sɔgɔlɔ dɛ. Sɔgɔlɔ bɛrɛ Matiyasi ma, a kwe fanene funala ma.

¹ Pãtekote na kɔ mane wiri wɛ, lanabe sɔma pepe na kweye mane ti bi tala hõ. ² No tala hõ digedige kõ bo sa wuro hõ, wɔkara panga yee kõ. Ye mane tanga ngwĩ kõ kɔrɔ hõ, a ngwõ pepe paga. ³ Ye nĩyono za, ye ne ti wɔkara toga kini bahõ. Ye dinidini hõ tanga ye pepe ngwã hõ. ⁴ Ye pepe pagaa Ni na kìnìyi na, ye dofɔga ne bɛrɛda zɛ bɛri wɔkara Ni na kìnìyi a ka ye da hõ ngwɛne. ⁵ Ngwona sanga ma Yahutuye na Wurokwãsɔma bɔ mane tanga Zerusalem. Ye na ngwɛ̃ hõ tuma si sɔma pepe hõ wurokõ we. ⁶ Ngwona dige kõ sa ngwĩ sanga ma, zame mane kwe. Ye pepe tala tala ye yɛrɛ ta bɛrɛda mɔ ngwona lanabe sɔma da hõ. Ngwõ yena ye kaba. ⁷ Ye kaba ngwõ na hõ da ye nemɛ ma: Bɔ sɔma ngwĩye tine bɛri, ngwõwɔ pepe Galile kɔma ga ra? ⁸ Ne na ye tɛ ke pepe sɔma tala tala hõ ne ke yɛrɛ ta gana hõ bɛrɛda na kìnìye mɔ ye ta, ye ne bɛri? ⁹ Pareti kɔma kɔ Medi kɔma kɔ Elami kɔma kɔ Mesapotami kɔma kɔ sɔma ngwĩye tanga Zude kɔ Kapadose kɔ Põ kɔ Asi. ¹⁰ Kɔ Firizi kɔma kɔ Pãfili kɔma kɔ sɔma ngwĩye tanga Misira kɔ Libi gana hõ ngwĩ ti Sirene piri ma. Kɔ ngwĩye tuma Rome. ¹¹ Yahutu kɔma kɔ Yahutuye ta tobi nɔmane kɔ Kirete kɔma kɔ Arabu kɔma. Ke pepe ne mɔ, ye ne Wuro ta da yee yera ke yɛrɛ ta bɛrɛda hõ. ¹² Ye pepe kaba, ye kakiri nyangamu. Ye da ye nemɛ ma: Bo ngwono na da sye? ¹³ Nka bɔ mane zi, ye ye nyingi duvɛ̃ na. ¹⁴ Ngwona sanga ma Pierre kɔ fanene funala tuma taa. Pierre bɛri kɔ kõ na yireyi nemɛ hõ da zamɛ ma: Ki Yahutuye kɔ ki ngwĩye pepe ngwõ tanga Zerusalem, ka na bɛrɛda mɔ fɔrona. ¹⁵ Bɔ sɔma ha nyingi duvɛ̃ na ga wɔkara a ti ka kɔrɔ hõ ngwɛne kamasɔrɔ bo nevere sanga ma kikima. ¹⁶ Puruta Zoweli mane ngwĩ fa yera ngwõ dopaga basyɛ. A mane da: ¹⁷ Wuro da: Diniya wɛ sanga ma, ma na ne Ni bo zibɛ Adama nɔmane pepe ma ho na nyaabɛ. Kya nemɛnimisini kɔ kya nemɛdala na zɛ da yera. Kya yɛlɛ na dɔre da za. Kya somɔlala na sonyange ta. ¹⁸ Ngwona kɔ ma, ma na ne Ni bo zibɛ na tɛrɛ nimisini kɔ na tɛrɛ yàra ma hõ na nyaabɛ. Ye na zɛ da yera. ¹⁹ Ma na tagamasɛ̃ bɔ dɔrɔ wuro hõ wurokõ ma hõ kabako da ta lagakõ ma. Tõ kɔ togo kɔ tyoro na dunguyi na tye. ²⁰ Sĩ na bere tɛ tunungu na. Yu na pɛnɛ bɛ̃bɛ̃ sane Matigi ta kɔ na yireyi hõ wiri, ngwona kɔ na yireyi kɔ a na noronayi. ²¹ Ngwona sanga ma sõ ngwĩ hõ Matigi togo wiri, ngwõ na kisi. ²² Pierre da: Israyɛli kɔma, ka bɔ bɛrɛda mɔ. Wuro dyã Nazarɛti sõ Yesu ma ka nyono na kɔ da yee kɔ kabako da kɔ tagamasɛ̃ nemɛ. Wuro ngwõ ta a soro hõ ka woro hõ wɔkara ka yɛrɛ ye tɔ̀ ngwɛne. ²³ Ka ngwona Yesu ka sɔma sera hõ wɔkara Wuro a latege ne tɔ̀ ngwɛne. Ka mana ka sɔma yaga sera hõ, ye na kwãgwaga sɔno ma. ²⁴ Nka Wuro a ngwini hõ siri ta nyane pepe wɛ kamasɔrɔ a ha mane sebɛne wɔ siri soro hõ ga. ²⁵ Dauda a yera awe ta da na ye: Mɛ Matigi za ne zĩ hõ sanga pepe ma kamasɔrɔ a ti ne digesoro ma ngwõfatɔ ma ka sɔma ga. ²⁶ Ngwõ yena mɛ kɔrɔ pepe pagaa nihõdyaro na, mɛ nihodyaro na bɛrɛda yera. Hale ne komavere na barikadɛgɛyi na ye zigi dɛ a ma hõ makwɔnabɛ. ²⁷ Kamasɔrɔ be ha na mɛ ni to wara hõ ga. Be ha na dyã be yɛrɛyi hõ vɔra ga. ²⁸ Be mane sogo dɔrɔ ne ma ngwĩ ngwõ na ne ka sugunɔmabe hõ. Be yɛrɛ na ne kɔrɔ hõ paga nihõdyaro na. ²⁹ Syenɔmane, ma na bɛrɛda kmibɛ ka ma ke bema Dauda ta da na. A siri, ye na sitira. A bona ti ke woro hõ hale sɔma. ³⁰ Awe mane puruta. A mane tɔ̀ da Wuro mane datege bi a ma hõ ye sũ a ma da ye na a timi sõ bo tangabɛ a ta fangama tanga kware ma. ³¹ Ngwõ yena Dauda mane bɛri Masiya ta ngwini da na. A mane ngwõ za sane ye hõ tɛ. A da ya ni ha na wɔ wara hõ ga, ya komavere ha na vɔra ga. ³² Mɛ bɛri Yesu ngwĩ ta da na, Wuro ngwõ ngwini. Mɛ̀ pepe tɛ ngwõ syɛrɛ na. ³³ A mane duro hõ ya tanga Wuro digesoro ma hõ ngwona Ni na kìnìyi gũ, Tõ Wuro mane datege bi ngwi ta da na. A ngwõ zibɛ mɛ̀ ma hõ na nyaabɛ. Ka da ngwĩye za hõ ne mɔ basyɛ, ngwõ ngwõ. ³⁴ Dauda yɛrɛ ha ba wuro hõ ga nka awe yɛrɛ da: Matigi da mya matigi ma: Tanga ne digesoro ma ³⁵ Fɔ ma hõ be zugi ka be kãe we, ye tɛ bya kãe dɛ fere na. ³⁶ Israyɛli kɔma pepe hõ na tɔ̀ na kìnì da, ka Yesu ngwĩ kwãgwaga sɔno ma, Wuro ngwõ ta Matigi kɔ Masiya na. ³⁷ Ye ngwona bɛrɛda mɔ ngwĩ sanga ma ngwõ ne ni na bã fɔrona. Ye Pierre kɔ fanene sɛrɛ tɔga da: Syenɔmane, ngwono mɛ̀ daga ngwõ ta hã? ³⁸ Pierre yera ye ma da: Ka ka kɔrɔ bere kya kakye na. Ka pepe tala tala hõ batize kɔ Yesu Krista togo nemɛ ngwõfatɔ kya kakye hõ yafa ka ma. Ni na kìnìyi na pere ka ma, ngwõ Wuro ta perefa. ³⁹ Wuro ngwona datege bi ki kɔ ka nɔmane ma kɔ ngwĩye ngwõ ti dɛrɛ do hõ, kyà Matigi Wuro na sɔma pepe ngwĩye wiri. ⁴⁰ Pierre ne wadyu kɔ bɛrɛda zɛ na nyaaye nemɛ, na kìnìbɛ ye ma da: Ka dyã ngwona kisibe ma hõ sa sɔma fire woro hõ. ⁴¹ Sɔma ngwĩye dyã na ta bɛrɛda fɔga, ngwõwɔ mane batize. Sɔma sana saa kwe lanabe sɔma ma ngwona kɔ ma. ⁴² Ye wɔ fanene ta kala hõ kɔ ye ta nemɛkwebe hõ, hõ kwe zõ kɔ lɔ hõ Wuro mɛ kɔ lɔ mɛ. ⁴³ Sɔma pepe mane kwã. Fanene kabako da kɔ tagamasɛ̃ na nyaaye ta. ⁴⁴ Lanabe sɔma pepe ya fere pepe kwe ne ta forobaye na. ⁴⁵ Ye ya lagakõ kɔ ye sera hõ fere zabire hõ ne na gwana dini sɔma pepe ma hõ kanya kɔ ye pepe tala tala mako na da nemɛ. ⁴⁶ Ye pepe na kweye mane wɔ Wuro kõ yuu hõ kɔ kɔrɔ tala nemɛ kɔ pepe ma. Ye ne kwe ne zõ ya kwã hõ kɔ nihõdyaro nemɛ kɔ kɔrɔ na teleye nemɛ. ⁴⁷ Ye mane Wuro yirebɛ hõ ye da dyabɛ sɔma pepe ma. Sɔma ngwĩye ngwõ kisi, Matigi ngwõ kwe ye ma kɔ pepe ma.

¹ Lema sĩ sanga ma Pierre kɔ Zã kwe ya Wuro kõ yuu hõ Wuro mɛbe na ngwĩ mane tɛ towazere sanga ma. ² Nomo bo mane tye, a na murukuyi vɔrɔ. Kɔ o kɔ sɔma mana bi na tege Wuro kõ yuu na konõdo ma. Ngwona konõdo togo ti Kwɔ do na fɔroyi. Ya tege ngwɛ̃ ngwõfatɔ a ne gwana mɛ sɔma ta ngwĩye ngwõ kwɔ Wuro kõ yuu hõ. ³ A Pierre kɔ Zã za, ngwõwɔ ne kwɔ Wuro kõ yuu kɔrɔ hõ. A salaka mɛ ye ta. ⁴ Pierre kɔ Zã ye nyena baga a hõ. Pierre da a ma: Mɛ̀ sege. ⁵ Ngwona nomo ne sege fɔrona, a mane ti a kɔrɔ hõ da a na bo fa gũ ye ta. ⁶ Nka Pierre da a ma: Gwana kɔ sanu ha ti mɛ ta ga. Nka ngwĩ fa ngwõ ti ne ta, ma na ngwõ pere be ma. Nazarɛti sõ Yesu Krista togo yena, tuma ya. ⁷ A na fɔga a digesoro ma na tumabɛ. Ngwona no tala hõ a kãe kɔ a kõ pepe barika gũ. ⁸ A tuma tige hõ taa hõ ya. A kwe kwɔ kɔ fanene nemɛ Wuro kõ yuu hõ. A ne ya ne tige ne Wuro yirebɛ. ⁹ Sɔma pepe na za, a ne ya ne Wuro yirebɛ. ¹⁰ Ye na dɛ̀gɛ̀ tɔ̀, ya ngwona nomo ngwĩ mane tanga ne mɛ Wuro kõ yuu na Kwɔ do na fɔroyi do ma. Da ngwĩ tɛ a ma, ye kaba ngwõ na. Ye mane kwã mɛ. ¹¹ Ngwona nomo wɔ kɔ Pierre kɔ Zã nemɛ. Sɔma pepe kaba hõ tongo ya ye birɛ Sulimane ta pa we. ¹² Pierre ngwõ za ngwĩ sanga ma, a da zamɛ ma: Israyɛli kɔma, ngwonona ka kaba bo da na? Ngwonona ka ka nyena baga mɛ̀ hõ, wɔkara mɛ̀ yɛrɛ ta sebɛbe wala myà Wuro kwãbe ngwõ tɛ bo nomo hõ ya? ¹³ Ibrahima kɔ Isaka kɔ Yakuba ta Wuro, ke bemae ta Wuro, ngwõ ye Nonanimisĩ Yesu yirebɛ. Pilate mane tyata na dira a ya ngwĩ sanga ma, ki kwane a ka fangakɔma sera hõ, hõ maga a hõ Pilate nyono na. ¹⁴ Ka maga ngwona Kìnìyi kɔ ngwona Teleyi hõ, hõ Pilate mɛ da ya sõyɛta pere ka ma. ¹⁵ Yee nemɛ, ka mane sugunɔmabe ngwonate yɛ. Nka Wuro a ngwini na sabɛ sara woro hõ. Mɛ̀ ngwõ ngwona da syɛrɛ. ¹⁶ Ka nyono ti bo nomo ngwĩ na, ka ngwõ tɔ̀. Ngwona sugunɔmabe ngwonate Yesu togo ngwõ fanga pera ma lanabɛbe yena a togo na. Lanabɛbe ngwĩ ngwõ ti Yesu hõ, ngwõ bo kɛnɛbɛbe na dopagayi pere bo nomo ma wɔkara ka a za ngwɛne. ¹⁷ Ngwõ pepe na, mɛ syenɔmane, mɛ tɔ̀ da ki kɔ ka ngwonakɔma mane ngwõ ta Yesu na tɔ̀bariyabe yena. ¹⁸ Wuro ngwĩ fa yera gwerena purusɔma barika hõ, ya ta Masiya na nyane, a ngwõ dopaga yee nemɛ si. ¹⁹ Ka ka kɔrɔ bere kya kakye na hã, hõ bere na Wuro ma, a hõ kya kakye dibɛ ne wa yɛ. ²⁰ Ngwona sanga ma Matigi na tɛ makwɔnabɛ sanga hõ na. A na Masiya fane ka ma, a pya ngwĩ ta da latege ka ma, ngwõ kɔrɔ Yesu. ²¹ Yesu Krista daga wɔ wuro hõ dɛ̃ fɔ fere pepe hõ tetɛrɛ wɛ ngwĩ sanga ma wɔkara Wuro mane pya ne ngwona da yera a ta purusɔma na kìnìye da hõ ngwɛne. ²² Musa mane da: Kyà Matigi Wuro na mɛ nemɛ na puruta fane ka ma. A na tɛ ka nemɛ na bo na. Ngwõ hõ ngwĩ fa pepe yera ka ma, ka na ngwõ mɔ. ²³ Sõ ngwĩ hõ ma ngwona puruta ta bɛrɛda mɔ ga, ngwona te na siri hõ wɛ Wuro ta sɔma woro hõ. ²⁴ Na dofɔga Samueli ta sanga ma, purusɔma pepe ngwĩye bɛri ngwõwɔ pepe ngwona kɔyi ta da yera mɛ. ²⁵ Wuro mane datege ngwĩ bi purusɔma barika hõ, ngwõ tɛ kayi na. Wuro mane datege ngwĩ bi ka bemae ma, ka nii gũ ngwõ na mɛ. A ngwona datege bi hõ da Ibrahima ma: Si sɔma pepe na duba gũ be timi kɔma barika hõ. ²⁶ Wuro pya ya baratɛta dɔrɔ ngwĩ sanga ma, a na fane ki ma dɛ̃ ngwõfatɔ a hõ duba ka ma hõ ka pepe tala tala wa kya tɛda yaga hõ.

¹ Hõ Pierre kɔ Zã to ngwona bɛrɛda hõ kɔ sɔma nemɛ, salakawɛre kɔ Wuro kõ yuu ngwonate kɔ Sadusyɛ̃ kɔma na ye birɛ. ² Fanene mane sɔma kala ne sara ngwinibe ta da yera ne kìnì Yesu ta da na. Ngwõ ha mane dya ye ma fyu ga. ³ Ye ne fɔga ne ka kaso hõ fɔ ngwona ngwinisĩ. Ngwona da mane tɛ lema. ⁴ Hale kɔ ngwõ, ngwĩye mane ngwona bɛrɛda mɔ, ye na nyaaye la ye na. Lanabe sɔma mane bugu fɔ ya wiri sɔma sana koo nemɛ si. ⁵ Ngwona ngwinisĩ Yahutuye ngwonakɔma kɔ somɔlala kɔ tõ na kalamogi ye nemɛ kwe Zerusalem. ⁶ Salakawɛre ngwonate Ane mane tye kɔ Kayife kɔ Zã kɔ Alekisãdire kɔ salakawɛre ngwonate ta kõ kɔma pepe. ⁷ Ye Pierre kɔ Zã taabɛ ye woro hõ, hõ ne tɔga da. We sebɛbe wala kɔ togo yena ka mane ngwona sõ kɛnɛbɛ? ⁸ Ngwona sanga ma Pierre pagaa Ni na kìnìyi na hõ da ye ma. ⁹ Zamɛ ngwonate kɔ Israyɛli somɔlala, ka tine tɔga dafɔre ta da na ngwĩ ngwõ tɛ ngwona komatoga pareta na, ane ka tyata hõ na ta kɛnɛbɛno ta da tɔ̀. ¹⁰ Ka pepe hõ tɔ̀ ki kɔ Israyɛli kɔma pepe, da a Nazarɛti sõ Yesu togo ngwõ tɛ bo nomo na kɛnɛyi hõ ne taa ka zĩ hõ bɛ. Ka mane ngwona Yesu kwãgwaga sɔno ma nka Wuro na ngwini na sabɛ sara woro hõ. ¹¹ Ki kõ tɔgɔre mako ha ti dɔgɔno ngwĩ na ga, ngwõ tɛ kõ na telebɛ dɔgɔno na. Ngwõ Yesu yɛrɛ. ¹² Kisibe ha gũ bi za hõ awe timi ma ga. Ka daga kisi togo ngwĩ barika hõ, Wuro ha ngwona togo pere sõ si ma sɔma woro hõ wurokõ we, awe timi ma ga. ¹³ Ngwona kitisɔre Pierre kɔ Zã wora na sigeye za ngwĩ sanga ma, na za da ye sɔma zana, ye ha kala ga, ye kaba hõ tɔ̀ da yewɔ mane Yesu yakwere. ¹⁴ Ye ngwona nomo na kɛnɛyi za ngwĩ mane taa ye kyegɛ ma mɛ, ye ma fa gũ ne dyabi ga. ¹⁵ Ye da fanene sa kiti sɔ do hõ. Ngwõ timi ye ye nemɛ za ngwona da na. ¹⁶ Ye da ye ngwono ye na ngwõ ta ngwona sɔma na? Ye Zerusalem kɔma pepe ye tɔ̀ ne kìnì da ye kabako da na yireye ta, ye ha sebɛne ye do bere ngwõ na ga. ¹⁷ Ngwõ timi ye da: Ke daga na sigebɛ ye ma da ye ka Yesu togo ta da yera sõ si ma titiri ga ngwõfatɔ bo da ka na zãzã ya zĩ sɔma woro hõ ga. ¹⁸ Aiwa, ye ne wiri na sigebɛ ye ma da ye ka bɛri hõ sɔma kala kɔ Yesu togo nemɛ fyu ga. ¹⁹ Pierre kɔ Zã ne dyabi da: Ne ye hõ ne bɛ̃ Wuro zĩ hõ, hõ kya bɛrɛda fɔga hõ yaloyi Wuroye ma, ki yɛrɛ ngwõ yera. ²⁰ Mɛ̀ da ngwĩye za ne mɔ, mɛ̀ ha sebɛne maga hõ ngwõ yera ga. ²¹ Ngwona kitisɔre na sigebɛ ye ma yɛ mɛ ne dira ye ya. Ye ma tɛno gũ hõ ne nyane ga kamasɔrɔ sɔma pepe mane Wuro yirebɛ ngwona tɛda yena. ²² Ngwona kabako da mane tɛ nomo ngwĩ na a hõ kɛnɛ, a si mane fã dɔgɔ kepɔla ma. ²³ Ye dirɛ wɛ timi ma, Pierre kɔ Zã ya ya sɔma birɛ hõ salakawɛre ngwonate kɔ somɔlala ta bɛrɛda pepe yera ye ma. ²⁴ Ye ngwõ mɔ ngwĩ sanga ma, ye pepe ye kwɛ̃ sabɛ kɔ kɔrɔ tala nemɛ hõ Wuro mɛ da: Matigi a bi ngwĩ ngwõ wurokõ kɔ lagakõ kɔ nyengezu kɔ a kɔrɔ hõ fere pepe tege. ²⁵ Be mane bɛri Ni na kìnìyi barika hõ bya baratɛta ke bema Dauda do hõ, ye: Ngwono tɛ si sɔma hõ ne songo? Ngwono tɛ sɔma hõ ne miri gwagana da na? ²⁶ Lagakõ ma fangamɛ tuma. Ngwonakɔma ye nemɛ kwe Matigi kɔ a ta Masiya na. ²⁷ Tĩyã na, Herode kɔ Põse Pilate kɔ si sɔma kɔ Israyɛli kɔma kwe bo kuru kɔrɔ hõ, hõ tuma bya baratɛta na kìnìyi Yesu na, be ngwĩ dɛ̀gɛ̀ na ta Masiya na. ²⁸ Yee nemɛ, be pya da ngwĩ latege kɔ bya sebɛbe kɔ be dungo nemɛ, ye mane ngwõ ta. ²⁹ Matigi, ye ta sigemabe sege basyɛ. Be worasigi pere bya baratɛre ma ngwõfatɔ ye hõ bya bɛrɛda yera. ³⁰ Be be soro ka ye ta ngwõfatɔ kɛnɛbɛbe kɔ tagamasɛ̃ kɔ kabako da hõ tɛ bya baratɛta Yesu togo barika hõ. ³¹ Ye Wuro mɛ wɛ timi ma, ye mane kwe ngwõ ngwɛ̃, ngwɛ̃ sɔma. Ye pepe pagaa Ni na kìnìyi na. Ye Wuro ta bɛrɛda yera kɔ worasigi nemɛ. ³² amɛ na lanabe sɔma pepe kɔrɔ mane tala, ye ni ne tala. Sõ si ma da ye soro hõ fere ye sonalaye ga, nka ye ta fere pepe kwe tɛ forobaye na. ³³ Fanene mane Matigi Yesu ta ngwinibe na syɛrɛbe ta kɔ sebɛbe na yireyi nemɛ. Wuro duba na yireyi pere ye pepe ma. ³⁴ Ye na sõ si ma pɔna fa si na ga kamasɔrɔ laga kɔ kwã mane ti ngwĩye ta, ngwõwɔ ngwõ zabire hõ na kɔ ye na gwana nemɛ ne pere fanene ma. ³⁵ Ngwõ timi ye gwana dini ye pepe ma hõ kanya kɔ ye pepe tala tala mako nemɛ. ³⁶ Sipire sõ bo, ngwõ mane Levite sõ, ngwõ togo ti Yusufu. Fanene mana wiri Banabasi mɛ. Ngwõ kɔrɔ sõ worasigebɛta. ³⁷ Lɔ bo mane ti Banabasi ta, a na zabire hõ na kɔ a na gwana nemɛ ne pere fanene ma.

¹ Nomo bo mane tye, a togo ti Ananiyas. Awe kɔ ya yà Safira ya lɔ bo zabire. ² A na na gwana na bɔ wa ne tege ye yɛrɛ ma. A ta yà mane ngwõ nyono tɔ̀ mɛ. A ya kɔ ngwona gwana sɛrɛ nemɛ hõ ne pere fanene ma. ³ Pierre da a ma: Ananiyas, ngwonona Setane be kɔrɔ paga fɔ be hõ nĩyõ sɔ Ni na kìnìyi ma hõ bɔ wa ngwona lɔ na gwana hõ? ⁴ Sane be hõ ngwona lɔ zabire a mane pya ne biyi. A zabire wɛ timi be ta, a na gwana mane biye mɛ ga ra? Ne be tɛ hõ bɔ da sye latege be kɔrɔ hõ, hõ ne ta yoo mɔ? Be ha nĩyõ sɔ sõ ma ga, Wuro ma be nĩyõ sɔ. ⁵ Ananiyas ngwona bɛrɛda mɔ ngwĩ sanga ma, a wɛbɛrɛ hõ siri. Kũ na yireyi ye na mɔre pepe fɔga fɔrona. ⁶ Yɛlɛ tuma na na soro sãge hõ ya kɔ le na sitira. ⁷ Lere saa nemɛ fɔno wɛ timi ma a ta yà na. Da ngwĩ tɛ, a ha mane ngwõ nyono tɔ̀ ga. ⁸ Pierre da a ma: Yera ne ma, ka mane ngwona lɔ zabire bo tere na ra? A da: Hõõ, yee mɛ̀ a zabire. ⁹ Ngwona sanga ma Pierre da a ma: Ne na ka tɛ hõ kwe bɛ̃ ye ma hõ Matigi ta Ni kɔrɔ wa? Yɛlɛ ngwĩye ngwõ be banga sitira, ngwõwɔ ti konõdo ma. Ye na ya kɔ bi nemɛ mɛ. ¹⁰ Ngwona no tala hõ ngwona yà wɛbɛrɛ Pierre we hõ siri. Yɛlɛ kwɔ na na soro za. Ye na bi ya a sitira a banga kyegɛ ma. ¹¹ Kũ na yireyi eglise pepe fɔga kɔ ngwona da na mɔre pepe. ¹² Fanene mane tagamasɛ̃ kɔ kabako da nyaa ta sɔma woro hõ. Lanabe sɔma pepe mane ye nemɛ kwe Sulimane ta pa we. ¹³ Sɔma zɛ ma ye wora sige hõ ya kwe kɔ lɔ ga, nka sɔma pepe mane yirebɛ fɔrona. ¹⁴ Sɔma na nyaaye mane la Matigi na hõ kwe lanabe sɔma ma, sini kɔ yàra. ¹⁵ Sɔma mane komatoga parere syãbe wisoga hõ samɛnɛ kɔ syã fere ma ngwõfatɔ Pierre hõ na ne fɔno ngwĩ sanga ma, a yɔ hõ tɛ ye na bɔ ma. ¹⁶ Zamɛ mane tuma Zerusalem do na kire hõ, hõ ya Zerusalem kɔ komatoga parere kɔ zinifɛgɛre nemɛ. Ye pepe kɛnɛ. ¹⁷ Ngwona sanga ma salakawɛre na pɔrayi tuma, awe kɔ ye tikwere pepe, ngwõ kɔrɔ Sadusyɛ̃ ta nemɛkwekuru. Ye kɔrɔ mane pagaa fanene na kerayabe na. ¹⁸ Ye fanene fɔga ne ka kaso hõ. ¹⁹ Nka wuru hõ Matigi ta mɛlɛkɛ bo kaso kõ da kɔba hõ ne sabɛ sire. ²⁰ A da ye ma: Ka ya taa Wuro kõ yuu kɔrɔ hõ, hõ bo sugunɔmabe na ngwũyi na bɛrɛda pepe yera sɔma ma. ²¹ Fanene ya ngwõ ta. Kɔ kyɛ do ma ye ya Wuro kõ yuu kɔrɔ hõ, hõ sɔma kala. Salakawɛre na pɔrayi kɔ ye tikwere na hõ Yahutu kɔma kɔ somɔlala kwe ne ta kitisɔre na zamɛ na. Ye sɔma fane ye ya kaso hõ, ye ye na kɔ fanene nemɛ. ²² Garede ya, ma ye za kaso hõ ga. Ye bere ya ngwona da yere kitisɔre na zamɛ ma. ²³ Ye da ye ma: Mɛ̀ kaso kõ do na sɔgeyi za a nɔma na yɛ. Do na kɔrɔseta na taa do ma nka mɛ̀ do kɔba ngwĩ sanga ma mɛ̀ ma sõ si za a kɔrɔ hõ ga. ²⁴ Wuro kõ yuu ngwonate kɔ salakawɛre na pɔrayi ngwona bɛrɛda mɔ ngwĩ sanga ma, ye kakiri pepe nyangamu fanene ta da na. Da ngwĩ ngwõ na tɛ ngwona da timi, ye ha mane ngwõ tɔ̀ ga. ²⁵ Sõ bo na yera ye ma da: Segerɛ, ka sɔma ngwĩye ka kaso hõ, ye ti Wuro kõ yuu hõ ne sɔma kala. ²⁶ Ngwona sanga ma Wuro kõ yuu ngwonate kɔ garede ya na kɔ lɔ dɛgɛdɛgɛ kamasɔrɔ ye mane kwã ngwõfatɔ sɔma ka ne dira kɔ dɔge nemɛ ga. ²⁷ Ye na kɔ lɔ hõ ne taabɛ kitisɔre woro hõ. Salakawɛre ngwonate na tɔgara. ²⁸ A ne tɔga da: Mɛ̀ mane yera ne sigebɛ ka ma da ka ka sɔma kala kɔ ngwona sõ togo nemɛ ga ra? Sege, ka kya kala zãzãbɛ Zerusalem kuru pepe hõ. Ka tyata bo nomo tõ na kakye hõ bɛrɛ mɛ̀ ma. ²⁹ Pierre kɔ fanene ne dyabi da: Mɛ̀ daga Wuro kwɛ̃ fɔga hõ yaloyi sɔmaye ma. ³⁰ Ki mane Yesu kwãgwaga sɔno ma na yɛ. Ke bemae ta Wuro ngwõ a ngwini. ³¹ Wuro awe duro na tangabɛ ye digesoro ma na ta Fangama kɔ Kisita na ngwõfatɔ a hõ kɔrɔberebe kɔ kayke yafabe pere Israyɛli kɔma ma. ³² Mɛ̀ a syɛrɛ ngwona da na, mɛ̀ kɔ Ni na kìnìyi mɛ, Wuro ngwĩ pere ye kwɛ̃ na fɛgɛsɔma ma. ³³ Kitisɔre na zamɛ ngwona bɛrɛda mɔ ngwĩ sanga ma ye wora ba fɔrona. Ye mane tyata fanene yɛ. ³⁴ Farisyɛ̃ sõ bo tuma taa kitisɔre woro hõ, ngwõ togo ti Gamaliyel. A mane tõ na kalamogo sõ bo, sɔma pepe mana yirebɛ. A da ye fanene sabɛ ngwɛ̃ zɔgɔta dɛ̃. ³⁵ Ngwona sanga ma a da ye ma: Israyɛli kɔma, ka na ngwĩ fa ta bɔ sɔma na, ka ka yɛrɛ kɔrɔse ngwõ na. ³⁶ Ngwõ sye ha dɛrɛ dɛ̃ ga Tudasi tuma hõ ye yɛrɛ ta sõ gwaga na. Sɔma zonaa nemɛ dɔ a ma. Nka ye Tudasi yɛ. Sɔma ngwĩye mane dɔ a timi, ngwõwɔ pepe zãzã. Ngwona da tɛ zana. ³⁷ Ngwõ timi Galile sõ Zuda tuma sɔma toga sɛbɛ sanga ma hõ sɔma nyaa kwe ye ma. Ye ngwõ yɛ mɛ. A timi dɔ sɔma pepe zãzã. ³⁸ Mɛ yera ka ma basyɛ da ka sa bɔ sɔma na hõ ne to yɛ kamasɔrɔ ne bo da kɔ bo bara hõ sa sɔma hõ, ye na yaga. ³⁹ Nka ne ye hõ sa Wuro hõ, ka ha sebɛne ngwõ yaga ga. Ka ka yɛrɛ kɔrose ka ka Wuro kwini ga. Ye na ta bɛrɛda fɔga. ⁴⁰ Ye fanene wiri hõ da ye ye ye võ. Ye da ye ma ye kada ye bɛri Yesu togo ta da na titiri ga. Ngwõ timi ye ne dira ye ya. ⁴¹ Fanene sa kitisɔre birɛ. Ye ni hõ dya kamasɔrɔ ye ngwõ dyati yirebɛbe hõ pere gũ Yesu togo yena. ⁴² Kɔ pepe ma hõ ne to Wuro kõ yuu kɔrɔ hõ kɔ sɔma ta kwã hõ, ye ye nyanga hõ sɔma kala kɔ Yesu Krista na Bɛrɛda Fɔre nemɛ.

¹ Ngwona sanga ma kalanɔmane mane nyaa. Yahutu kɔma ngwĩye Girɛki da bɛri, ngwõwɔ dumudumu bɛrɛda yera Yahutuye ma ngwĩye Heburu da bɛri. Ye da ye ha ya yɔfuro yàra dyati kɔ pepe ma zõfere dinibe na ga. ² Aiwa, fanene fumɔla kalanɔmane na zamɛ pepe kwe hõ da ye ma: Ne mɛ̀ hõ Wuro ta bɛrɛda ta yerabe do dira hõ tɛ zõfere dinine na, ngwõ ha daga tɛ ga. ³ Ngwõ yena, syenɔmane, ka sɔma kopɔra bɔ dɛ̀gɛ̀ ka woro hõ, sɔma pepe ngwĩye toga fɔro wiri. Ye daga ne pagaa Ni na kìnìyi kɔ kakirikɔmabe na. Ke na ngwõwɔ tege bo bara ngwõ̀ na. ⁴ Mɛ̀ kwane na wɔ Wuro mɛbe kɔ Wuro ta bɛrɛda na yerabe hõ. ⁵ Ngwona bɛrɛda dya zamɛ pepe ma. Ye mane Etienne dɛ̀gɛ̀, ngwõ mane pagaa Ni na kìnìyi na. Ye Filipe dɛ̀gɛ̀ mɛ kɔ Perekore kɔ Nikanore kɔ Timõ kɔ Paramenasi kɔ Nikolasi, ngwõ mane Ãtiose kuru hõ tobita bo. ⁶ Ngwõ timi ye ne taabɛ fanene zĩ hõ, ngwõwɔ Wuro mɛ hõ ye sera dɛ ye ma. ⁷ Sɔma nyaa mane Wuro ta bɛrɛda mɔ ne ya zĩ. Kalanɔmane mane bugu Zerusalem. Salakawɛre na nyaaye mane dyã hõ lanabɛbɛ ta. ⁸ Etienne kwane mane pagaa nema kɔ sebɛbe na yireyi na. A mane kabako da kɔ tagamasɛ̃ na yireye ta sɔma woro hõ. ⁹ Sɔma bɔ mane dakwiyɛro dofɔga kɔ Etienne nemɛ. Ye na bɔ tuma Yahutuye ta Wuro yirebɛ kõ bo hõ, ye ngwĩ wiri Vɛnɔma kõ. Sirene kɔma bɔ kɔ Alekisãdire kɔma bɔ mane tɛ ngwõwɔ na bɔ na. Bɔ mane Silisi kɔ Asi kɔma ta Wuro yirebɛ kwã hõ sɔma bɔ mɛ. ¹⁰ Nka Etienne bɛri kɔ kakirikɔmabe kɔ Ni na kìnìyi ta fanga nemɛ, ye ma sebɛ ngwona bɛrɛda dakwiyɛ ga. ¹¹ Ngwona sanga ma ye sɔma bɔ sara ngwõfatɔ ye nĩyono dɛ Etienne ma. Ngwona sɔma da yiwɔ mɔ da Etienne ne bɛrɛda yaga yera Musa kɔ Wuro ta da na. ¹² Yee nemɛ ye sɔma kɔ somɔlala kɔ tõ na kalamogi sĩsangabɛ. Ye ya bɛrɛ Etienne ma na fɔga ya kɔ le kitisɔre na zamɛ birɛ. ¹³ Ye ya kɔ syɛrɛ kɔma na nĩyõsɔre nemɛ. Ngwõwɔ da: Bo sõ ha sa bɛrɛda yaga yerabe na bo bi hõ na kìnìyi kɔ Musa ta da na ga. ¹⁴ Ye da ya ta bɛrɛda mɔ. A da ye Nazarɛti sõ Yesu na Wuro kõ yuu wɛbɛ. Ye Musa lãda ngwiye pere ye ma, ye Yesu na ngwõwɔ katira. ¹⁵ Sɔma pepe ngwĩye mane tanga kiti sɔ do hõ, ngwõwɔ pepe ye nyena baga Etienne hõ. A zĩ tɛ ye nyena hõ wɔkara mɛlɛkɛ zĩ.

¹ Salakawɛre ngwonate Etienne tɔga, ye yee ngwona da ti ra? ² Etienne na dyabi da: Mɛ tamɛ kɔ mɛ syenɔmane, ka mɔ ne ta. Hõ ke bema Ibrahima to Mesopotami gana hõ, Noronate Wuro ye dɔrɔ a ma sane a hõ ya tanga Karã kuru hõ. ³ A da a ma, ya sa ya gana hõ kɔ a tõ ta kõ kɔma woro hõ. Ye Wuro hõ gana ngwĩ dɔrɔ a ma, ya ya tanga ngwɛ̃. ⁴ Ngwona sanga ma a sa Kalide kɔma ta gana hõ, hõ ya tanga Karã kuru hõ. A tõ siri wɛ timi ma, ka tanga bo gana ngwĩ hõ basyɛ, Wuro na nabɛ bɛ. ⁵ Wuro ha mane lɔ si pere Ibrahima ma bo gana hõ bɛ ga, hale a kã tege do. Nka a datege bi a ma da ye na bɛ pere awe kɔ ye timi kɔma ma. Ngwona sanga ma kwane no ha mane ti Ibrahima ta dɛ̃ ga. ⁶ Wuro mane ngwĩ fa yera a ma, a da ya timi kɔma na tɛ wɔyerɛ na sɔma zɛ ta gana hõ. Ngwõwɔ na ye ta tɛrɛ na hõ dayaga ta ye na dɔgɔ zonaa kɔrɔ hõ. ⁷ Wuro da ye na tɛ si sɔma ngwĩye ta tɛrɛ na, ye na kiti sɔ ngwõwɔ ma. A da ngwõ timi ye na sa ngwɛ̃ hõ na bara ta Wuro ma bo bi hõ bɛ. ⁸ Ngwõ timi Wuro mane datege bi Ibrahima ma. Yɛrobe tɛ ngwona datege na tagamasɛ̃ na. Yee nemɛ, Ibrahima ye no Isaka yɛro a vɔrɔ kɔ na nyi korosono kɔ ma. Isaka Yakuba yɛro. Yakuba ke bemae fumɔla yɛro. ⁹ Yusufu na kereyabe mane ti kɔ ke bemae nemɛ. Ye na zabire Misira ya sɔma ta. ¹⁰ Nka Wuro wɔ a ta hõ na wa a ta nyane da pepe hõ, hõ kakirikɔmabe kɔ nema pera ma Misira kɔma ta fangama Faro zĩ hõ. Ngwõ na tangabɛ Misira gana kɔ ye yɛrɛ ta kɔma pepe ngwõ na. ¹¹ Aiwa, wu bɛrɛ Misira gana kɔ Kana gana pepe ma. Ngwona nyane mane yire fɔrona. Ke bemae ma zõfa gũ ga. ¹² Yakuba mane mɔ ngwĩ sanga ma da ye dugo gũ Misira, a ke bemae fane hõ ya ngwɛ̃ a kanyono tala na. ¹³ A kanyena pɔlalo na Yusufu ye yɛrɛ ta da yera ye vɔre ma. Yee nemɛ, Yusufu ya si ta da yera Faro ma. ¹⁴ Ngwona sanga ma Yusufu fane ye ya ye tõ Yakuba kɔ a ta kõ kɔma pepe fɔga na kɔ lɔ. Ye mane sɔma kesaafũ ne nɔma koo. ¹⁵ Yakuba ya Misira gana hõ, awe kɔ ke bemae siri ngwɛ̃. ¹⁶ Ye mane ye na sara bi ya kɔ lɔ Sisem kuru hõ. Ibrahima mane bona ngwĩ tɛrɛ gwana na Hemore nɔmane ta Sisem kuru hõ, ye ne sitira ngwɛ. ¹⁷ Wuro mane datege ngwĩ bi Ibrahima ma, ngwõ dopaga sanga vetira ngwĩ sanga ma, Israyɛli kɔma ne nyaa ne ya Misira gana hõ. ¹⁸ Ngwõ timi fangama za bo mane tanga Misira ngwõ na, ngwõ ha mane Yusufu tɔ̀ ga. ¹⁹ Ngwona fangama du ka kyà si na hõ ke bemae fɔga yagayaga. A fanga dɛ ye ma ye ne ye nɔmane tege sire ngwõfatɔ ye siri. ²⁰ Musa mane vɔrɔ ngwona sanga ma. A mane fɔro, a da ne dya Wuro ma. Ye mana woro a tõ ta kõ hõ yɛgɛ saa. ²¹ Ya bi na tege sire ngwĩ sanga ma, Faro ta nemɛdalo na bi na woro na ta ye yɛrɛ no na. ²² Yee nemɛ, Musa mane Misira kɔma ta kakirikɔmabe na da pepe kala. Fanga na yireyi mane ti a ta bɛrɛda kɔ a ta tɛda hõ. ²³ A dɔgɔ kepɔla gũ ngwĩ sanga ma a ya sa ya si Israyɛli kɔma ma. ²⁴ A ya Misira sõ bo za, ngwõ ne dayaga ta a ta si sõ bo na. A kwe ya si sõ timi hõ na mone wa hõ ngwona Misira sõ yɛ. ²⁵ A mane dyati da ye syenɔmane Israyɛli kɔma na famu da Wuro tyata hõ ne kisi a soro hõ nka ye ha mane ngwõ famu ga. ²⁶ Ngwona ngwinisĩ Musa ya Israyɛli kɔma sɔma pɔla za ye ne kwini. A mane tyata ngwona birisi wɛ ye yɔ. A da ye ma: Ki ka nemɛ syenɔmane, ngwonona ka kwini? ²⁷ Ngwĩ ngwõ tine bɛrɛ ye syeno ma, ngwõ Musa nyɛ hõ da a ma: Kɔ ngwõ be ta mɛ̀ ngwonate kɔ myà kitisɔta na? ²⁸ Be tyata mɛ yɛ wɔkara be Misira sõ yɛ dugu ngwɛne ra? ²⁹ Ngwona bɛrɛda yena Musa tongo ya tanga Madiyã gana hõ. A nemɛnimisini sɔma pɔla vɔrɔ ngwɛ̃. ³⁰ Dɔgɔ kepɔla fɔno wɛ timi, hõ Musa to Sinayi tolo ma kibe hõ, mɛlɛkɛ bo ye dɔrɔ a ma togo kini hõ sɔno silalo bo ma. ³¹ Musa ngwõ za ngwĩ sanga ma a kaba fɔrona. A ye dɔbɛ a na ngwĩ sanga ma hõ na sege a Matigi bɛri kõ mɔ, ngwõ da a ma: ³² Mɛ be bemae ta Wuro, Ibrahima kɔ Isaka kɔ Yakuba ta Wuro. Musa kwã ne sɔma, a ma sebɛna sege ga. ³³ Matigi da a ma: Bya kanɛgɛ wa be kãe hõ. Be taa ngwõ ngwɛ̃, ngwõ lagakõ na kìnìyi. ³⁴ Mya sɔma ngwĩye ti Misira, mɛ ye ta nyane za hõ ne mana kõ mɔ. Mɛ zi hõ na ye dɛ̃. Na basyɛ o. Ma na be fane be ya Misira. ³⁵ Israyɛli kɔma mane maga ngwona Musa hõ, hõ da. Kɔ ngwõ be ta mɛ̀ ngwonate kɔ myà kitisɔta na? Wuro ngwona Musa ta ngwonawɛta kɔ dɛ̃dirɛta na mɛlɛkɛ ta dyemabe barika hõ. Ngwona mɛlɛkɛ mane ye dɔrɔ a ma sɔno silalo ma. ³⁶ A Musa ngwĩ mane kabako da kɔ tagamasɛ̃ ta Misira gana hõ, hõ Israyɛli kɔma sabɛ ngwɛ̃. A mane da yeye ta nyengezu na pɛnɛyi hõ kɔ sɔkogo hõ dɔgɔ kepɔla kɔrɔ hõ. ³⁷ A mane ngwona Musa ngwõ mane da Israyɛli kɔma ma ye Wuro na puruta bo tumabɛ na wa ye ta kɔma woro hõ wɔkara awe yɛrɛ. ³⁸ A mane ngwona Musa ngwõ mane ti Israyɛli kɔma na zamɛ woro hõ sɔkogo kɔrɔ hõ. A mane ti kɔ ke bemae nemɛ kɔ mɛlɛkɛ nemɛ ngwĩ mane bɛri a ta Sinayi tolo ma. Wuro bɛrɛda na suguye yera a ma ngwõfatɔ a ngwõwɔ yera ke ma. ³⁹ Ke bemae ma dyã na kwɛ̃ fɔga ga. Ye maga a hõ. Ye mane tyata ye bere ya Misira. ⁴⁰ Ye da Arõ ma ya yirebɛ fere bɔ tetɛrɛ ye ma, ye ngwõfatɔ ngwõwɔ hõ sige ne ya ye zĩ hõ. Ye ngwona Musa ngwĩ ngwõ ye sabɛ Misira gana hõ, ya tɛ ngwɛne wa, ye ha ngwõ tɔ̀ ga. ⁴¹ ye nyangano dya tetɛrɛ hõ salaka wa ngwona fyõ ma. Ye ni hõ dya ye yɛrɛ hõ tɛ bara na. ⁴² Ngwona sanga ma Wuro ye timi bere ye ma hõ ne to ye ne wuro hõ mamala yirebɛ, wɔkara a sɛbɛɛ purusɔma ta kitabu hõ ngwɛne da: Israyɛli kɔma, ka mane woro fere na salaka kɔ salaka zɛ wa mɛ ma sɔkogo hõ dɔgɔ kepɔla kɔrɔ hõ ra? ⁴³ Awo, nka ka mane Moloki ta zogokõ kɔ kya yirebɛ fa Rafã ta mumulu dya bi. Ka mane ngwõwɔ dya saga ne yirebɛ. Ngwõ yena ma na ka bi ka tege dɛrɛ do hõ Babilone gana timi. ⁴⁴ Tõ na walaga mane ti zogokõ hõ, ngwõ mane ti ke bemae ta sɔkogo kɔrɔ hõ. A mane tetɛrɛ wɔkara Wuro mane yera Musa ma ngwɛne, ya ngwĩ zogokõ dɔrɔ a ma, ya tetɛrɛ na kanya kɔ ngwõ nemɛ. ⁴⁵ Ke bemae ngwĩye na ngwõ timi, ngwona zogokõ mane pere ngwõwɔ ma. Zosue mane ya kɔ le hõ kwɔ si sɔma ta gana hõ. Wuro ngwõwɔ laga ne wa ke bemae zĩ hõ. Ngwona zogokõ mane wɔ yɛ fɔ ya wiri fangama Dauda ta sanga ma. ⁴⁶ Dauda nema gũ Wuro zĩ hõ. A Wuro mɛ da ye tyata kõ kya Yakuba ta Wuro ma. ⁴⁷ Ngwõ pepe na, Sulimane ngwõ mane kõ tɔgɔ Wuro ma. ⁴⁸ Nka Wuro na duroyi ha tanga sõ soro ta tetɛrɛ kõ kɔrɔ hõ ga. Wɔkara puruta ye yera ngwɛne da: ⁴⁹ Matigi da ye wurokõ ngwõ ya fangama tanga kware. Lagakõ ngwõ ya kãe dɛ do. We kõ ka na ngwõ tɔgɔ Matigi ma? We piri ma ngwõ na tɛ a ta makwɔnabɛ do na? ⁵⁰ A Wuro soro ngwõ ngwona fere pepe tetɛrɛ ga ra? ⁵¹ Ki sɔma na mɔmagane, ka ka kɔrɔ kɔ ka tera da gwolo, ka ha Wuro wiri kõ mɔ ga. Ka Ni na kìnìyi dakwiyɛ sanga pepe ma. Ka tala kɔ ka bemae nemɛ. ⁵² We puruta ka bemae ngwõ nyane ga? Ngwĩye ngwõ ngwona Teleyi ta na da yera, ye ngwõwɔ yɛ. Ka mane ngwõ ka sɔma sera hõ basyɛ na yɛ. ⁵³ Ki ngwĩye Wuro ta tõ gũ mɛlɛkɛe barika hõ, ka maga mɔ na ngwona tõ ta. ⁵⁴ Kitisɔre na zamɛkuru ngwona bɛrɛda mɔ ngwĩ sanga ma, ye wora ba fɔrona fɔ ye ne ye nyini ngwĩ Etienne yena. ⁵⁵ Nka Etienne mane pagaa Ni na kìnìyi na. A ye nyena baga wurokõ hõ, hõ Wuro ta noro za hõ Yesu na taayi za Wuro digesoro ma. ⁵⁶ A da ye ma: Mɛ wurokõ do na kibɛyi za. Sãsu No taa Wuro digesoro ma. ⁵⁷ Ngwona sanga ma ye songo kɔ kõ na yireyi nemɛ hõ pĩ ye tera ma. Ye pepe yiri na kwe a ma. ⁵⁸ Ye na suru na sabɛ kuru kɔrɔ hõ, hõ dofɔga na dira na yɛ kɔ dɔge nemɛ. Syɛrɛ kɔma mane ya zogore pere yaliyo bo ma, a togo ti Sauli. ⁵⁹ Ye Etienne dira kɔ dɔge nemɛ. Ye mane ti a dirɛ hõ, a Wuro mɛ da: Matigi, ne ni fɔga. ⁶⁰ Ngwõ timi a zi yolingo ye fugolo ma hõ songo da: Matigi ka bo kakye sɛbɛ ye ngwã hõ ga. Ngwõ yera wɛ timi a ta, a siri.

¹ Sauli mane dyã Etienne ta yɛbe na. Ngwona kɔ ma nyane na yireyi bɛrɛ Zerusalem eglise ma. Lanabe sɔma pepe zãzã ya Zude kɔ Samari gana hõ fɔ fanene dama. ² Wuro nyononakwãsɔma Etienne na soro bi na sitira hõ mɔgɔ fɔrona a ta siri yena. ³ Sauli ye nyanga ngwõfatɔ a eglise yaga. A mane kwɔ kwã kɔ kwã hõ ne lanabe sɔma fɔga, sini kɔ yàra, ne ka kaso hõ. ⁴ Ngwona sɔma ngwĩye mane zãzã, ye ya bi pepe hõ ne Bɛrɛda Fɔre yera. ⁵ Filipe ya Samari kuru hõ, hõ Masiya ta da yera sɔma ma ngwɛ̃. ⁶ Zamɛ Filipe ta bɛrɛda mɔ hõ na ta tagamasɛ̃ na tɛye za ngwĩ sanga ma, ye pepe mɔ a ta kɔ kɔrɔ tala nemɛ. ⁷ Zini mane songo fɔrona ne sa zinifɛgɛre na nyaaye hõ. Sɔma na nyaaye ngwĩye koma siri kɔ murukuye na nyaaye mane kɛnɛ. ⁸ Nihõdyaro na yireyi mane tɛ ngwona kuru kɔrɔ hõ. ⁹ Nomo bo mane ti ngwona kuru hõ, mane syedɛrɛ yɛ, a togo ti Simõ. A mane dasegeta. Samari kɔma kaba a ta tɛda na. A ye yɛrɛ ta sõ gwaga na. ¹⁰ Na dofɔga sõ zoro ma ya kwe somɔlala ma, ye pepe mane mɔ a ta. Ye da: Bo nomo ta tɛda ngwõ Wuro ta sebɛbe na da, bo ye ngwõ wiri sebɛbe na yireyi yo. ¹¹ Ye mɔ a ta fɔrona kamasɔrɔ fɔ syedɛrɛ da hõ ye kaba a ta dasegebe na. ¹² Nka Filipe Wuro ta fangamabe kɔ Yesu Krista togo na Bɛrɛda Fɔre yera ye ma ngwĩ sanga ma, ye la ngwõ na hõ batize, sini kɔ yàra. ¹³ Simõ yɛrɛ mane lanabɛbe ta mɛ hõ batize. Ngwõ timi a wɔ kɔ Filipe nemɛ. A tagamasɛ̃ kɔ kabako tɛda za ngwĩ sanga ma a kaba fɔrona. ¹⁴ Fanene ngwĩye mane ti Zerusalem, ye mɔ da Samari kɔma Wuro ta bɛrɛda fɔga. Ye Pierre kɔ Zã fane ye birɛ. ¹⁵ Ye ya wiri Samari ngwĩ sanga ma ye Wuro mɛ lanabe sɔma ma ngwõfatɔ ye hõ Ni na kìnìyi gũ. ¹⁶ Ni na kìnìyi ha mane zi zɛ ye na sõ si ma dɛ̃ ga. Ye mane batize kɔ Matigi Yesu togo nemɛ dama. ¹⁷ Ngwona sanga ma Pierre kɔ Zã ye sera dɛ ye ma, ye Ni na kìnìyi gũ. ¹⁸ Simõ a za da fanene ye sera dɛ lanabe sɔma ma ngwĩ sanga ma, ye Ni na kìnìyi gũ, a mane tyata gwana pere Pierre kɔ Zã ma. ¹⁹ A da ye ma: Ka ngwona fanga pere ne ma mɛ ngwõfatɔ ma hõ ne soro dɛ ngwĩ sõ pepe ma, ngwõ hõ Ni na kìnìyi gũ mɛ. ²⁰ Nka Pierre da a ma: Be dyati da be sebɛne Wuro ta perefa gũ kɔ gwana nemɛ. Ngwõ yena bi kɔ bya gwana, ka pepe hõ kwe yaga. ²¹ Be nii ha ti bo da hõ ga, be ha na fa gũ ga kamasɔrɔ be kɔrɔ ha tele Wuro zĩ hõ ga. ²² Be kɔrɔ bere bya zugube na hõ Wuro mɛ ngwõfatɔ be kɔrɔ hõ miri hõ yafa be ma, ne ngwõ hõ ne sebɛne tɛ. ²³ Mɛ a za da kɔrɔ na yagayi ti be hõ. Be tɛ dayaga ta kasono na. ²⁴ Ngwona sanga ma Simõ da Pierre kɔ Zã ma: Ki yɛrɛ hõ Matigi mɛ ne ma ngwõfatɔ be da ngwĩye yera, ngwõ si ka na gũ ga. ²⁵ Fanene mane Matigi na syɛrɛbe ta. Ye waro wɛ timi ya wadyuli na, ye bere ya Zerusalem. Hõ ne to sogo ma ye Bɛrɛda Fɔre yera Samari kɔma ta kire nyaa hõ. ²⁶ Matigi ta mɛlɛkɛ bo bɛri Filipe ta hõ da a ma. Tuma ya wuro nyanɔma piri ma. Sogo ngwĩ ngwõ tuma Zerusalem hõ ya Gaza, be ya ngwɛ̃. Ngwɛ̃ sɔkogo hõ. ²⁷ Filipe tuma ya. Hõ na to sogo ma, a sõ gwaga Etiyopi sõ za. Ngwõ mane Etiyopi na fangama yà Kãdase ta gwana ngwonate. A mane ya Zerusalem hõ Wuro yirebɛ. ²⁸ A ne ti bere bige hõ ye birɛ. A mane tanga ya wotoro kɔrɔ hõ ne puruta Esayi ta kitabu kala. ²⁹ Ni na kìnìyi da Filipe ma ya ya zĩ, hõ ye dɔbɛ ngwona wotoro na. ³⁰ Filipe tongo ya ngwɛ̃ hõ ngwona Etiyopi sõ bɛri kõ mɔ, a ne puruta Esayi ta kitabu kala. A na tɔga da: Be ngwĩ fa kala, be ngwõ kɔrɔ tɔ̀ ra? ³¹ Ngwona nomo da a ma: Ne na ma na tɛ hõ ngwõ tɔ̀ ne sõ ma a kìnìbɛ ne ma ga? A Filipe mɛ ya ba tanga ye kyegɛ ma wotoro hõ. ³² A mane ngwĩ ngwɛ̃ kala bo ngwõ: Ya fɔga hõ ya wɔkara gwa ye ya kɔ ngwĩ nemɛ yɛ do hõ. A tɛ wɔkara gwano ngwĩ ngwĩya sɔ, a mane mɔgɔ ga. A ha ye do kɔba ga. ³³ A ye yɛrɛ mazibɛ, ye na zarake. Kɔ ngwõ na a timi kɔma ta da yera? Ya si pepe wɛ lagakõ ma. ³⁴ Ngwona sõ gwaga da Filipe ma: Ma be mɛ, yera ne ma. Puruta ngwona bɛrɛda yera kɔ ta da na, a yɛrɛ ra, ta sõ za? ³⁵ Filipe dofɔga kɔ ngwona verese nemɛ hõ Yesu na Bɛrɛda Fɔre yera a ma. ³⁶ Hõ ne to yuru hõ sogo ma, ye ya wiri bo piri bo ma, zu mane ti ngwɛ̃. Ngwona sõ gwaga da Filipe ma: Zu sege, ngwono mɛ bare hõ batize? ³⁷ [Filipe da a ma: Ne be hõ lanabɛbe ta kɔ be kɔrɔ pepe nemɛ, ngwõ sebɛne tɛ. Etiyopi sõ na dyabi da: Mɛ la a na da Yesu Krista ngwõ Wuro Nonanimisĩ.] ³⁸ Ngwõ timi a wotoro taabɛ. Filipe kɔ ngwona sõ gwaga kwe zi zu hõ, Filipe na batize. ³⁹ Ye sa wɛ timi ma zu hõ, Matigi Ni Filipe bi ya kɔ le. Ngwona sõ gwaga ma a za titiri ga. Nka a ni hõ na dyayi ya sogo bi hõ ya. ⁴⁰ Filipe ya ye yɛrɛ gũ Azoti kuru hõ. A tuma ngwɛ̃ hõ ya Sezare kuru hõ. A na fɔnoyi Bɛrɛda Fɔre yera kire pepe hõ.

¹ - ² Sauli mane sigebɛ Matigi ta kalanɔmane ma hõ ne ta yɛ da yera. A ya salakawɛre ngwonate birɛ hõ na mɛ ya sɛbɛ bo pere ye ma, ye ya kɔ le Damasi kuru hõ, hõ ngwõ pere Yahutuye ta Wuro yirebɛ kõ hõ kɔma ma ngwɛ̃ ngwõfatɔ ne a hõ ngwona sogo ma sɔma bɔ gũ ngwɛ̃, yàra kwe sini ma, a ye pɛrɛ ya kɔ lɔ Zerusalem. ³ Hõ na to a vetira Damasi kuru na, ngwona no tala hõ kini sa wuro hõ, hõ kini na zamilelu. ⁴ Sauli wɛbɛrɛ lɔ ma. A bɛri kõ bo mɔ, ngwõ da a ma: Sauli, Sauli, ngwonona be ne nyane? ⁵ Sauli da a ma: A bi kɔ mɔ Matigi? Ngwona bɛri kõ da a ma: A mɛ Yesu be tine ngwĩ nyane. ⁶ Nka tuma kwɔ kuru kɔrɔ hõ. Be daga ngwĩ fa ta, ye na ngwõ yera be ma ngwɛ̃. ⁷ Sauli yakwere taa wɔ, ye mane sebɛne bɛri ga. Ye ngwona bɛri kõ mɔ nka ye ha mane sõ si za ga. ⁸ Sauli tuma lɔ ma. A nyena mane kibɛɛ nka a ha mane sege ne fa si za ga. Ye na soro fɔga ya kɔ le Damasi. ⁹ A nyi saa ta, mane zɛ ga, mane zõ ga, mane mɛnɛ mɛ ga. ¹⁰ Kalano bo mane ti Damasi, a togo ti Ananiyas. Matigi ye dɔrɔ a ma sonyanga hõ, hõ da a ma: Ananiyas. A da. Nao, Matigi ma ti bɛ. ¹¹ Matigi da a ma. Tuma sale be ya wisogo hõ yoo, ye ngwĩ wisogo wiri Teleyi. Be ya ngwɛ̃ hõ Tarase sõ bo kya Zuda ta kõ hõ. A togo ti Sauli. A tine Wuro mɛ. ¹² A mane nomo bo za sonyanga hõ ngwĩ togo ti Ananiyas. Ngwõ mane kwɔ a birɛ hõ ye sera dɛ a ma ngwõfatɔ a hõ ye bere sege zɛ. ¹³ Ananiyas na dyabi da. Matigi, bo nomo nyane ngwĩ ta bya sɔma na Zerusalem, sɔma nyaa ngwona da yera mɛ ma. ¹⁴ Fanga ti a ta bɛ mɛ, salakawɛre ngwonate ngwona fanga pera ma, ya be togo na wiri sɔma pepe fɔga. ¹⁵ Nka Matigi da a ma: Ya kamasɔrɔ ma bo nomo dɛ̀gɛ̀. Ma na tɛ a ya kɔ ne togo nemɛ si sɔma kɔ fangamɛ kɔ Israyɛli kɔma birɛ. ¹⁶ A daga nyane ngwĩye somɔna mɛ yena, ma na ngwõ dɔrɔ a ma. ¹⁷ Aiwa, Ananiyas tuma ya. A ya wiri ngwona kõ hõ, hõ ye sera dɛ Sauli ma hõ da a ma. Mɛ syeno Sauh, Matigi Yesu ngwĩ ngwõ ye yɛrɛ dɔrɔ be ma hõ be to sogo ma be ne na bɛ, ngwõ ne fane be birɛ ngwõfatɔ be hõ be bere sege zɛ yɛ, ane be hõ pagaa Ni na kìnìyi na. ¹⁸ Ngwona no tala hõ fere bɔ sa a nyena hõ wɔkara kɔba bahõ. A nyena kini, a ye bere sege zɛ. A tuma hõ batize. ¹⁹ A zõ ngwĩ sanga ma a barika gũ. Sauli nyi damane ta kɔ kalanɔmane nemɛ ngwĩye mane ti Damasi kuru hõ. ²⁰ Ngwona sanga ma yɛrɛ a dofɔga hõ wadyuli ta Wuro yirebɛ kõ hõ, hõ na dɔrɔ da Yesu ngwõ Wuro Nonanimisĩ. ²¹ Ngwĩye pepe ngwõ a ta bɛrɛda mɔ, ye kaba hõ da: Bo ngwona nomo ngwĩ mane Yesu togo na wiri sɔma nyane Zerusalem ga ra? A na bɛ mɛ ngwõfatɔ a ye fɔga hõ ya ye ka salakawɛre ngwonakɔma sera hõ ga ra? ²² Nka Sauli mane wadyuh ta sanga pepe ma kɔ fanga nemɛ. A mana dɔrɔ Yahutuye ma ngwĩye ti Damasi ye Yesu ngwõ Masiya. Ye na dyabi ngwɛne, ye ha mane ngwõ tɔ̀ titiri ga. ²³ Wakati bɔ fɔno wɛ timi ma, Yahutuye ye do kwe ye na Sauli yɛ. ²⁴ Nka Sauli ne ta dakwebe mɔ. Ye mane kuru kɔrɔ hõ soga kɔrɔse wuro hõ kwe sĩ hõ ma ngwõfatɔ ya gũ na yɛ. ²⁵ Nka wuru hõ Sauli ta kalanɔmane na ka gwaga hõ na zibɛ kwala timi. ²⁶ Sauli wiri Zerusalem ngwĩ sanga ma a tɛno kya hõ kwe kɔ kalanɔmane nemɛ, nka ye pepe mane kwã a na. Ye ha mane la a na hõ tɔ̀ da a tɛ lanabe sõ na mɛ ga. ²⁷ Banabasi na fɔga ya kɔ le fanene birɛ. Sauli Matigi za sogo ma ngwɛne ane Matigi bɛri a ta ngwɛne, a ngwõ pepe kwɔna ye ma. A da ye ma ye Sauli mane wadyuli ta kɔ worasigi nemɛ Damasi kuru hõ kɔ Yesu togo nemɛ. ²⁸ Ngwona sanga ma Sauli wɔ kɔ lɔ Zerusalem ne kwɔ ne sa ne wadyuli ta kɔ worasigi nemɛ Matigi togo na. ²⁹ Yahutuye ngwĩye Girɛki da bɛri, a mane dakwiyɛro ta kɔ ngwõwɔ nemɛ. Nka ngwõwɔ mana kya yɛ na. ³⁰ Syenɔmane ngwõ nyono tɔ̀ ngwĩ sanga ma, ye ya kɔ le Sezare kuru hõ, hõ na to a ya Tarase. ³¹ Eglise mane ti syara na Zude kɔ Galile kɔ Samari gana pepe hõ ne ya zĩ Wuro ta sogo ma ne ya Matigi nyononakũ na ne bugu Ni na kìnìyi ta dyemabe barika hõ. ³² Pierre mane ya bi pepe hõ. Bo kɔ ma a ya lanabe sɔma birɛ ngwĩye ti Lida kuru hõ. ³³ A nomo bo za ngwɛ̃, a togo ti Ene. Ngwõ mane wɔ syã fa ma dɔgɔ korosõ. Komakwãgwiyɛbɛ langãduru mane ti kɔ le. ³⁴ Pierre da a ma: Ene, Yesu Krista be kɛnɛbɛ. Tuma bya syã fa ma. Ngwona no tala hõ a tuma. ³⁵ Lida kɔma kɔ Sarõ kɔma pepe ngwõ za hõ tobi Matigi ma. ³⁶ Lanabe yà bo mane ti Zope, a togo ti Tabita. Girɛki da hõ ye da Dorokasi, ngwõ kɔrɔ fõ̀. A mane dafɔre nyaa ta ne fangadãe dyema. ³⁷ Ngwona sanga ma a mane pare hõ siri. Ye na na soro mĩ hõ na syãbɛ zanga hõ. ³⁸ Lida kɔ Zope yɔfa ha dɛrɛ ga. Kalanɔmane mɔ da Pierre ti Lida, ye sɔma pɔla fane ngwõ ya a wiri ya sale na ye birɛ. ³⁹ Ngwona no hõ Pierre tuma ya kɔ lɔ. A ya wiri ngwĩ sanga ma ye ba kɔ le ngwona zanga hõ. Yɔfuro yàra pepe ye dɔbɛ Pierre na ne mɔgɔ. Dorokasi mane forokya kɔ zogore ngwĩye nyɛ hõ na na suguyi to, ye ngwõwɔ dɔrɔ a ma. ⁴⁰ Pierre sɔma pepe sabɛ sire. A zi yolingo ye fugolo ma hõ Wuro mɛ. Ngwõ timi a ye bere soro birɛ piri ma hõ da: Tabita tuma. A ye nyena kɔba hõ Pierre za hõ tuma tanga. ⁴¹ Pierre na soro fɔga na tumabɛ. A lanabe sɔma kɔ yɔfuro yàra wiri hõ Dorokasi na suguyi dɔrɔ ye ma. ⁴² Zope kɔma pepe ngwona da tɔ̀, ye na nyaaye la Matigi na. ⁴³ Pierre wakati nyaa ta Zope. A mane vɛ komatetɛrɛta bo ta kõ hõ, a togo ti Simõ.

¹ Nomo bo mane ti Sezare kuru hõ, a togo ti Koroneye. Sorodase kuru ngwĩ togo ti Itali, a mane ngwona sorodase ta kapitɛni. ² Ngwona nomo mane Wuro yirebɛ ne kwã a na, awe kɔ ya kõ kɔma pepe. A mane Yahutuye na fangadãe na nyaaye dyema. A mane Wuro mɛ sanga pepe ma. ³ Bo kɔ ma lema, towazere sanga ma, a Wuro ta mɛlɛkɛ bo za dɔre da hõ. Ngwõ kwɔ a birɛ hõ na wiri a togo ma. A kwã. ⁴ A ye nyena baga mɛlɛkɛ hõ, hõ da: Matigi, a ngwono mɔ? Ngwõ da a ma: Wuro bya mɛbe fɔga. Be salaka ngwĩye pere, a bya salaka tɔ. Wuro ye kakiri to be na. ⁵ Sɔma bɔ fane Zope basyɛ o, ye ya Simõ wiri, ya wiri Pierre mɛ. ⁶ A vɛ komatetɛrɛta bo ta kõ hõ, ngwõ togo ti Simõ. A ta kõ ti nyengezu do ma. ⁷ Mɛlɛkɛ ngwĩ bɛri a ta, ngwõ ya wɛ timi ma, Koroneye ya baratɛre sɔma pɔla wiri kɔ sorodase sõ sonala ngwĩ mana mako fɔro ne kwã Wuro na. ⁸ Da pepe ngwĩye tɛ, a ngwona da pepe kwɔna ye ma ne fane ye ya Zope. ⁹ Ngwona ngwinisĩ hõ ne to sogo ma, ye mane vetira kuru na. Pierre ba zɛ ngwõ̀ ma hõ Wuro mɛ midi sanga ma. ¹⁰ Wu na fɔga, a mane tyata zõ. Hõ ne to zõfere tɛ hõ a ma, a dɔre da bɔ za. ¹¹ A wurokõ do na kibɛyi za hõ fa bo za, a ne zi wɔkara pɛrɛzogo na yireyi. A da naa pepe ne kwe pɛrɛɛ nemɛ hõ, a ne zi fɔ lɔ ma. ¹² Lagakõ ma kanaa fere kɔ vɔlɔlɔ fere kɔ wuro hõ yala, ngwõwɔ sifa pepe mane ti a kɔrɔ hõ. ¹³ Bɛri kõ bo da Pierre ma: Tuma Pierre, be bo yɛ na nɔma. ¹⁴ Nka Pierre da: Awo Matigi, mɛ ha fa na dõõyi kɔ fa na kìnìbariyayi zõ na za dɛ̃ ga. ¹⁵ Ngwona bɛri kõ da yɛ mɛ, ye: Wuro ngwĩ fa kmibɛ, ka ngwõ dyati fa na dõõyi ga. ¹⁶ Ngwõ tɛ kanyena saa na. Ngwõ timi ngwona fa ye bere ba wuro hõ yɛ. ¹⁷ Hõ Pierre to a ne miri ngwona dɔre fere kɔrɔ ta da na, ngwona sanga ma Koroneye ta fanesɔma mane tɔga Simõ birɛ na. Ye na taa konõdo ma. ¹⁸ Ye tɔga hõ da: Ye Simõ ngwĩ wiri Pierre, ngwõ ti bɛ ra? ¹⁹ Pierre mane miri ngwona dɔre fere kɔrɔ ta da ngwĩ sanga ma, Ni na kìnìyi da a ma: Simõ, sɔma pɔla bɔ ti bɛ, ye tine be kya. ²⁰ Tuma zi ya kɔ lɔ, be ka sigasiga ga. Mɛ ngwõ fane. ²¹ Pierre zi ya ngwona sɔma birɛ hõ da ye ma: Ka ngwĩ sõ kya, a mɛ. Ka ka nangwõ̀ yera ne ma. ²² Ye da a ma: Mɛ̀ na hõ tuma Koroneye birɛ. Ngwõ sorodase ta kapitɛni. A sõ na syɛbɛyi. A Wuro yirebɛ, Yahutuye pepe a toga fɔro wiri. Wuro ta mɛlɛkɛ bo bɛri a ta, a ya be wiri be ya a ta kõ hõ, a hõ bɛrɛda bɔ mɔ be ta. ²³ Pierre ne kwɔbɛ kõ hõ, ye syã ngwɛ̃. Ngwona ngwinisĩ Pierre tuma ya kɔ lɔ. Zope kɔma na bɔ ya kɔ lɔ. ²⁴ Ngwona kɔfɔropere ye wiri Sezare. Koroneye mane yɛ̀rɛ̀. A mane ya kõ kɔma kɔ ye màre bɔ wiri. ²⁵ Pierre ne ti kwɔ hõ kõ hõ, Koroneye tuma na tɛ̃ hõ zi bɛrɛ a we. ²⁶ Nka Pierre na tumabɛ hõ da a ma: Tuma. Mɛ yɛrɛ sõ mɛ. ²⁷ Na to bɛrɛda hõ kɔ Koroneye nemɛ, a kwɔ kõ kɔrɔ hõ, hõ sɔma nyaa na kweye za. ²⁸ A da ye ma: Ka tɔ̀ da Yahutu sõ ha daga kwe kɔ si za nemɛ wala hõ kwɔ a ta kõ hõ ga. Nka Wuro a dɔrɔ mɛ ma ye ma ka sõ si sege sõ na kìnìbariyayi wala sõ na dõõyi ga. ²⁹ Ngwõ yena ka fane ne ta ngwĩ sanga ma, ma na. Mɛ ha dakwiyɛro ta ga. Mɛ ka tɔga, we ngwõ̀ na ka ne wiri? ³⁰ Koroneye na dyabi da: Sɔma ye nyi saa bo wakati nemɛ ma, mɛ mane Wuro mɛ na kõ hõ towazere sanga ma lema sĩ ma. No tala hõ nomo bo na taa mɛ zĩ hõ. Zogo na wɔlɔyi ne ti a mogo hõ. ³¹ A da mɛ ma: Koroneye, bya Wuro mɛbe fɛgɛ. Wuro ye kakiri to bya perefere na be ngwĩye pere fangadãe ma. ³² A da mɛ: Sɔma fane Zope ye ya Simõ Pierre wiri a na. Ya vɛ Simõ komatetɛrɛta ta kõ hõ nyengezu do ma. ³³ Ngwona no tala hõ mɛ sɔma fane hõ ya be wiri, be dyã hõ na. Basyɛ, mɛ̀ pepe ti bɛ Wuro zĩ hõ, hõ bya bɛrɛda mɔ, Matigi ngwĩye pere be ma. ³⁴ Pierre bɛrɛda dofɔga hõ da: Tĩyã na, mɛ tɔ̀ basyɛ da Wuro ha sõ dɛ̀gɛ̀ sõ na ga. ³⁵ Nka si sɔma pepe woro hõ, so ngwĩ ngwõ kwã Wuro na ne ya telebe na, ngwona te da ngwõ dya Wuro ma. ³⁶ Wuro bɛrɛda ngwĩye fane Israyɛli kɔma ma hõ syara na Bɛrɛda Fɔre yera ye ma Yesu Krista ta da na, ka ngwõ tɔ̀. Ngwõ sɔma pepe ta Matigi. ³⁷ Da ngwĩye mane tɛ Zude gana pepe hõ, na dofɔga Galile gana hõ, Zã ta batize na wadyuli tɛ wɛ timi ma, ka ngwõ tɔ̀. ³⁸ Ka tɔ̀ da Wuro mane Ni na kìnìyi kɔ sebɛbe zibɛ Nazarɛti sõ Yesu ma. A mane ya ngwõ ngwɛ̃ pepe, a dafɔre ta hõ Setane ta nyane sɔma pepe kɛnɛbɛ kamasɔrɔ Wuro mane ti a ta. ³⁹ A ngwĩ fa pepe ta Yahutuye ta gana hõ kɔ Zerusalem kuru hõ, mɛ̀ ngwõ syɛrɛ. Ya kwãgwaga sɔno ma na yɛ. ⁴⁰ Nka Wuro a ngwini a siri kɔ na nyi saaro kɔ ma hõ tɛ a ye yɛrɛ dɔrɔ sɔma bɔ ma. ⁴¹ Nka ngwõ ha sɔma pepe ga fɔ mɛ̀ syɛrɛ kɔma, Wuro ngwĩye dɛ̀gɛ̀ gwerena. Mɛ̀ mane zõ hõ mɛnɛ kɔ le a ngwini wɛ timi ma hõ sa sara woro hõ. ⁴² A fane yera mɛ̀ ma ye mɛ̀ sɔma wadyu hõ na yera na kìnìbɛ ye ma da Wuro ngwĩ tege na ta sɔma sugi kɔ sara ta kitisɔta na, ngwõ awe. ⁴³ Purusɔma pepe bɛri a ta da na, ye ngwĩ sõ pepe hõ la a na, ngwõ na kakye yafabɛ gũ a togo barika hõ. ⁴⁴ Hõ Pierre to ngwona bɛrɛda hõ, Ni na kìnìyi zi ngwona bɛrɛda na mɔre pepe ma. ⁴⁵ Yahutuye na lanabe sɔma ngwĩye mane ya kɔ Pierre nemɛ, ngwõwɔ pepe kaba kamasɔrɔ Wuro ya Ni na kìnìyi pere si sɔma ma mɛ. ⁴⁶ Ye mɔ ye ne bɛrɛda zɛ bɛri ne Wuro yirebɛ. ⁴⁷ Ngwona sanga ma Pierre da: Ngwĩye ngwõ Ni na kìnìyi gũ wɔkara ke bahõ, sõ bo sebɛne ngwõwɔ bare ye ye ka batize zu hõ ga ra? ⁴⁸ Ngwona sanga ma a da ye ye batize kɔ Yesu Krista togo nemɛ. Ngwõ timi ye na mɛ da ya nyi damane ta ye birɛ.

¹ Fanene kɔ syenɔmane ngwĩye mane ti Zude, ye mɔ da ye si sɔma Wuro ta bɛrɛda fɔga mɛ. ² Pierre bere ya Zerusalem ngwĩ sanga ma Yahutuye na lanabe sɔma na zarake. ³ Ye da a ma: Be kwɔ yɛrobariyasɔma ta kõ hõ, hõ zõ kɔ lɔ. ⁴ Ngwona sanga ma Pierre ngwona da pepe kwɔna ye ma wɔkara ye tɛ ngwɛne. A da ye ma: ⁵ Mɛ mane ti Zope kuru hõ ne Wuro mɛ, mɛ mane dɔre da za. Mɛ fa bo za a ne zi ne birɛ, a ne ti wɔkara pɛrɛzogo na yireyi bahõ,a da naa ne kwe pɛrɛɛ. A zi hõ tuma wuro hõ, hõ na wiri mɛ birɛ. ⁶ Mɛ ne nyena baga ngwona zogo hõ na sege. Mɛ mane lagakõ ma kanaa fere za a kɔrɔ hõ kɔ sɔkɔba fere kɔ vɔlɔlɔ fere kɔ wuro hõ yala. ⁷ Mɛ bɛri kõ bo mɔ, ngwõ da ne ma: Tuma Pierre be bo yɛ na nɔma. ⁸ Nka mɛ na dyabi da: Awo, Matigi. Fa na dagabariyayi kɔ fa na dõõyi ha kwɔ zɛ mɛ do hõ dɛ̃ ga. ⁹ Ngwona bɛri kõ ye bere sa wuro hõ a kanyena pɔlalo na yɛ mɛ hõ da: Wuro ngwĩ fa kìnìbɛ, ka ngwõ dyati fa na dõõyi ga. ¹⁰ Ngwõ tɛ kanyena saa na. Ngwõ timi ye pepe ye bere ba wuro hõ yɛ. ¹¹ Ngwona no tala hõ yɛ, mɛ mane ti ngwĩ kõ hõ, sɔma saa na taa ngwona konõdo ma. Y e mane fane mɛ ta hõ tuma Sezare. ¹² Ni na kìnìyi da mɛ ma ye ma ya kɔ lɔ, ye ma ka siga ga. Ngwona syenɔmane sɔma konala, ngwõwɔ mane kwe ya kɔ mɛ nemɛ mɛ. Mɛ̀ mane kwe kwɔ Koroneye ta kõ hõ. ¹³ A da mɛ̀ ma ye yi mɛlɛkɛ bo za, a ne taa ya kõ hõ. Ye ngwona mɛlɛkɛ da a ma ya sɔma fane Zope, ye ya Simõ Pierre wiri. ¹⁴ Ye ngwõ na bɛrɛda bɔ yera a ma, ya na kisi ngwona bɛrɛda ta, awe kɔ ya kõ kɔma pepe. ¹⁵ Mɛ dofɔga ne bɛri ngwĩ sanga ma Ni na kìnìyi zi ye ma wɔkara a mane zi ke ma gweregwerena ngwɛne. ¹⁶ Mɛ kakiri dige kɔ Matigi ta bɛrɛda nemɛ, ye: Zã mane sɔma batize zu hõ, ye nka Ni na kìnìyi na ka batize. ¹⁷ Ke ngwĩye ngwõ la Matigi Yesu na, Wuro perefa ngwĩ pere ke ma, ne a hõ ngwõ nemɛ pere ngwõwɔ ma mɛ, mɛ kɔ mɔ hõ ne Wuro bare? ¹⁸ Ye ngwona bɛrɛda mɔ ngwĩ sanga ma ye wora kwɔna, ye Wuro yirebɛ. Ye da: Wuro kɔrɔberebe pere si sɔma ma mɛ ngwõfatɔ ye sugunɔmabe na syɛbɛyi gũ. ¹⁹ Nyane ngwĩye mane tɛ Etienne yɛ wɛ timi ma, sɔma mane zãzã ngwõ yena. Ngwõwɔ na bɔ ya Fenisi gana hõ kɔ Sipire gana hõ kɔ Ãtiose kuru hõ. Nka ye mane Wuro ta bɛrɛda yera Yahutuye dama ngwõ ma. ²⁰ Ngwõ pepe na, Sipire kɔma kɔ Sirene kɔma na lanabe sɔma bɔ ya Atiose hõ bɛri si sɔma bɔ ta mɛ hõ Matigi Yesu ta da na Bɛrɛda Fɔre yera ye ma. ²¹ Matigi ta sebɛbe mane ti ye ta. Sɔma nyaa lanabɛbe ta hõ tobi Matigi ma. ²² Zerusalem eglise ngwona da mɔ. Ye Banabasi fane Ãtiose. ²³ A ya wiri ngwɛ̃ hõ lanabe sɔma za ngwĩye nema gũ Wuro ta, a ni hõ dya. A ne pepe ladi ye na maloye hõ wɔ Matigi ma kɔ kakiri na tangaye nemɛ. ²⁴ Banabasi mane sõ na syɛbɛyi, a mane pagaa Ni na kìnìyi kɔ lanabɛbe na. Sɔma nyaa ye yɛrɛ pere Matigi ma. ²⁵ Ngwõ timi Banabasi ya Tarese hõ Sauli kya. ²⁶ A Sauli za ngwĩ sanga ma, a kwe ya kɔ le Ãtiose, ye kwe dɔ tala pepe ta ngwona eglise hõ, hõ sɔma nyaa kala. Hõ kalanɔmane wiri Krɛtiyɛ̃, ye ngwõ dofɔga Ãtiose. ²⁷ Ngwona sanga ma purusɔma bɔ tuma Zerusalem hõ ya Ãtiose. ²⁸ Ye na sonala togo ti Agabus. Ngwõ tuma na dɔrɔ Ni na kìnìyi barika hõ da ye wu na yireyi na bɛrɛ lagakõ pepetai ma. Kilode mane fangama ngwĩ sanga ma, ngwona da tɛ. ²⁹ Kalanɔmane bɛ̃ a ma da ye na dyemabe fane syenɔmane ma ngwĩye ti Zude gana hõ, hõ kanya kɔ ye pepe tala tala ta sebɛbe nemɛ. ³⁰ Ye ngwõ ta hõ ne pere Banabasi kɔ Sauli ma, ye ya ngwõ pere somɔlala ma Zude gana hõ.

¹ Ngwona sanga ma fangama Herode bɛrɛ eglise kɔma bɔ ma ne nyane. ² A Zã vɔ Yakuba yɛ kɔ tabaku nemɛ. ³ Ngwõ timi a za da ngwõ dya Yahutuye ma, a Pierre fɔga mɛ. Ngwõ mane tɛ buru na koobɛbariya na sale sanga ma. ⁴ Pierre fɛgɛ wɛ timi ma a ta, a na ka kaso hõ, hõ na ka sorodase sɔma naa na tegeda naa sera hõ, ye ngwõ a kɔrɔse. A mane tyata hõ na wa ya kɔ le zamɛ woro hõ Fɔnoma na sale fɔno wɛ timi ma. ⁵ Pierre mane ti kaso hõ nka eglise kɔma ha mane Wuro mɛbe do dira a ta da na ga. ⁶ Herode mane tyata na wa ya kɔ le ngwĩ kɔ ma zamɛ woro hõ, ngwona kɔ ma wuru hõ Pierre mane ti sorodase sɔma pɔla woro hõ ne nyi. A mane pɛrɛɛ kɔ balazɔgɔre pɔla nemɛ. Do na kɔrɔsesɔma mane ti kaso kõ do ma. ⁷ No tala hõ Matigi ta mɛlɛkɛ bo na, kini na yireyi sa kaso kõ kɔrɔ hõ. Mɛlɛkɛ Pierre pamare na ngwini hõ da a ma: Tuma sale. Balazɔgɔre wɛbɛrɛ hõ sa a sera hõ. ⁸ Mɛlɛkɛ da a ma: Be yɔyɔ sɔ, be bya kanɛgɛ ka. Pierre ngwõ ta. Mɛlɛkɛ da a ma: Bya zogwaga ka, be dɔ ne ma. ⁹ Pierre sa hõ dɔ a ma. Mɛlɛkɛ ngwĩ fa ta, Pierre ma tɔ̀ da ngwõ da syɛbɛ ga. A ne dyati da ye tine sonyanga. ¹⁰ Ye do fɔno do na kɔrɔsɛta na gwereyi kɔ a na pɔlalo ma. Ye ya wiri balo koro ma, sɔma ngwĩ fɔno hõ kwɔ kuru kɔrɔ hõ. Ngwona kɔrɔ kibɛɛ ye yɛrɛ ma ye zĩ hõ. Ye sa ya zĩ zɔgɔta sogo ma. Ngwona no tala hõ mɛlɛkɛ ya Pierre to yɛ. ¹¹ Pierre nyena hõ kini ngwĩ sanga ma a da: Mɛ a tɔ̀ na kìnì basyɛ da Matigi ngwõ ya mɛlɛkɛ fane hõ ne wa Herode soro hõ kɔ Yahutu kɔma mane da ngwĩ yɛ̀rɛ̀ tɛ na, a mɛ wa ngwõ hõ. ¹² A ngwona da famu ngwĩ sanga ma, a ya Mariama ta kõ hõ. Ye Zã ngwĩ wiri Mareka, a ngwõ sye. Sɔma nyaa mane kwe ngwɛ̃ ne Wuro mɛ. ¹³ Pierre koro kwãgwaga. Dalo bo ya sege, ngwona dalo togo ti Roda. ¹⁴ A da ye ya koro kɔba ngwĩ sanga ma, a Pierre bɛri kõ dɛ̀gɛ̀ tɔ̀. A ma dyã koro kɔba nihõdya nɔma yɔ ta ga. A tongo kwɔ ya yera bɔ sɛrɛ ma ye Pierre ti konõdo ma. ¹⁵ Ye da a ma: Be kakaba ra? Nka a da ye ma ye tĩyã. Ye da: Ngwõ a mɛlɛkɛ. ¹⁶ Ngwõ pepe na, Pierre wɔ ne koro kwãgwaga. Ye koro kɔba ngwĩ sanga ma, ye kaba fɔrona a ta zɛ na. ¹⁷ A ye soro ta ye ma ye ye bɔɔ. Matigi a wa kaso hõ ngwɛne, a ngwõ yera ye ma. A da ye ma: Ka ngwona da yera Yakuba kɔ syenɔmane sɛrɛ ma. Ngwõ timi a sa ya bi za hõ. ¹⁸ Kɔ kyɛ ngwĩ sanga ma sorodase dya tuma fɔrona kamasɔrɔ Pierre tɛ ngwɛne, ye ha mane ngwõ tɔ̀ ga. ¹⁹ Herode da ye ya kya. Ye na kya, ma a za ga. Garede tɔga wɛ timi ma Herode ta, a da ye ye yɛ. Ngwõ timi a tuma Zude gana hõ, hõ ya tanga Sezare kuru hõ, hõ wɔ ngwɛ̃ zɔgɔta. ²⁰ Herode woro mane ba Tire kɔma kɔ Sidõ kɔma ta fɔrona. Ye pepe kwe hõ ya miri ta tala hõ ya a birɛ. Ye mane bɛ̃ kɔ fangama ta syã do na kɔrɔseta Bilasitusi nemɛ, ye syara kya fangama ta, kamasɔrɔ ye ta kuru hõ zõfa sa Herode ta gana hõ. ²¹ Herode kɔ bo latege na pere ye ma. Ngwona kɔ ma a ya fangama zogore ka hõ tanga ya fangama tanga kware ma hõ bɛrɛda yee yera. ²² Sɔma pepe songo da: Bo yirebɛ fa ngwõ tine bɛri yo, a ha sõ ga. ²³ Ngwona no tala hõ Wuro ta mɛlɛkɛ Herode vuro hõ kɔrɔ hõ mɛngɛ ka a hõ, a siri. Kamasɔrɔ a mane ye yɛrɛ yirebɛ hõ ye ta wɔkara Wuro. ²⁴ Sɔma nyaa Wuro ta bɛrɛda mɔ, ye bugu. ²⁵ Banabasi kɔ Sauli waro wɛ timi ya fane na Zerusalem, ye ye bere ya. Ye kwe ya kɔ Zã nemɛ, ye ngwĩ wiri Mareka mɛ.

¹ Purusɔma kɔ kalamogi bɔ mane ti Ãtiose eglise hõ. Ngwõwɔ mane Banabasi kɔ Simeõ dungu kɔ Sirene sõ Lusiusi kɔ Manayɛ̃ kɔ Sauli. Manayɛ̃ kɔ gana ngwonate Herode kwe pɔra kõ tala hõ. ² Bo kɔ ma hõ ne to Matigi yirebɛbe hõ, ye mane sũ ka. Ni na kìnìyi da ye ma: Mɛ Sauli kɔ Banabasi wiri bara ngwĩ na, ka ye tege ne ma ngwõ na. ³ Ye sũ ka hõ Wuro mɛ hõ ye sera dɛ ye ma hõ ne to ye ya. ⁴ Ni na kìnìyi Banabasi kɔ Sauli fane ye ya Selusi kuru hõ. Ye kwɔ koro bo hõ Selusi hõ ya Sipire na zu na kori do birɛ. ⁵ Ye ya wiri Salamine ngwĩ sanga ma, ye Wuro ta bɛrɛda yera Yahutuye ta Wuro yirebɛ kwã hõ. Zã Mareka mane ti kɔ lɔ hõ ne dyema. ⁶ Ye zu na kori da pepe fɔno hõ wiri Pafosi. Ye dasegeta bo za ngwɛ̃, a mane Yahutu na nyõsɔta na puruta bo, a togo ti Barezezu. ⁷ A mane tanga gana ngwonate Serezus Polus birɛ, ngwõ mane sõ na kakirite. Gana ngwonate mane tyata Wuro ta bɛrɛda mɔ, ngwõ yena a Banabasi kɔ Sauli wiri. ⁸ Nka ngwona dasegeta ngwĩ togo ti Elimasi Girɛki da hõ, ngwõ ne ta bɛrɛda dakwiyɛ. A mane tyata prefet ngwonayaga ngwõfatɔ a ka lanabɛbe ta ga. ⁹ Ngwona sanga ma Sauli, ye ngwĩ wiri Pauli mɛ, a pagaa Ni na kìnìyi na. A ye nyena baga ngwona dasegeta hõ, hõ da a ma: ¹⁰ Be pagaa nyenamakwiyɛ kɔ lamara si pepe na. Be Setane no, telebe pepe zugu. Be Matigi ta latege da na berebɛbe do dira ga ra? ¹¹ Mɔ bɛ basyɛ. Matigi na be vuro, be na tɛ fu na hõ wakati zɔgɔta ta. Be ha na sege sĩ na kini za ga. Ngwona no tala hõ Elimasi fu. A ne lɔgelɔge. A ne sõ kya ngwõfatɔ ngwõ a soro fɔga ya kɔ le. ¹² Gana ngwonate ngwona tɛda za ngwĩ sanga ma, a lanabɛbe ta kamasɔrɔ a mane kaba Matigi ta kala ma. ¹³ Pauli kɔ ye yakwere kwɔ koro hõ Pafosi kuru hõ, hõ ya Pereze, Pãfili gana hõ. Zã Mareka dɛ̀gɛ̀ ye na ngwɛ̃ hõ bere ya Zerusalem. ¹⁴ Ye tuma Pereze hõ ya wiri Ãtiose ngwĩ ti Pisidi gana hõ. Makwɔnabɛ kɔ ma ye kwɔ tanga Yahutuye ta Wuro yirebɛ kõ hõ. ¹⁵ To na kitabu kɔpurusɔma ta bɛrɛda kala wɛ timi ma, Wuro yirebɛ kõ ngwonate sɔma fane ye ya yera ye ma da: Syenɔmane, ne bɛrɛda bɔ hõ ne ti ka ta ne yera sɔma ma hõ ne wora sigebɛ, ka sebɛne ngwõ ta basyɛ. ¹⁶ Pauli tuma taa. A ye soro duro hõ da: Israyɛli kɔma kɔ ki ngwĩye ngwõ Wuro yirebɛ, ka mɔ ne ta. ¹⁷ Israyɛli kɔma ta Wuro ngwõ ke bemae dɛ̀gɛ̀. Hõ ngwona si to Misira gana hõ a ne nyaabɛ. Ngwõ timi a ne sabɛ ngwɛ̃ kɔ ya sebɛbe nemɛ. ¹⁸ A ne woro sɔkogo hõ dɔgɔ kepɔla nemɛ si. ¹⁹ A si kopɔra yɛ Kana gana hõ, hõ ne ta bi hõ pere ke bemae ma. ²⁰ Ngwona da pepe mane tɛ dɔgɔ zonaa ane kepɔlafũ nemɛ kɔrɔ hõ. Ngwõ timi a kitisɔre pere ye ma fɔ ya wiri puruta Samueli ta sanga ma. ²¹ Ngwõ timi ye mane fangama mɛ Wuro ta. Wuro Kis no Sauli pere ye ma. Ngwõ mane Bɛ̃zamɛ̃ timi sõ bo. A tanga fangamabe na dɔgɔ kepɔla. ²² Sauli dirɛ wɛ timi ma Wuro ta, Wuro Dauda tangabɛ na ta ye ta fangama na. A na yera na dɔrɔ a ta piri ma na da: Mɛ Isayi no Dauda za. A ta da dya ne ma fɔrona, a na ne dungo pepe ta. ²³ Wuro Dauda timi sõ bo tangabɛ na ta Israyɛli na kisita na hõ kanya kɔ a ta latege da nemɛ, ngwõ Yesu. ²⁴ Sane ngwõ hõ na, Zã mane Israyɛli kɔma pepe wadyu, ye ye kɔrɔ bere ya kakye na hõ batize. ²⁵ Zã mane ya bara pepe ta ne dopaga ngwĩ sanga ma a da: A ti ka kɔrɔ hõ da mɛ kɔ mɔ? Ka ngwĩ yɛ̀rɛ̀, mɛ ha ngwõ ga rɛ. Nka bo na na ne timi, mɛ ha daga kɔ a ta kanɛgɛ pɛrɛno ta firibe nemɛ ga. ²⁶ Pauli da: Syenɔmane, ki ngwĩye ngwõ Ibrahima timi kɔma kɔ ki ngwĩye ngwõ kwã Wuro na, bo kisibe na bɛrɛda fane ke ngwõ ma. ²⁷ Zerusalem kɔma kɔ ye ngwonakɔma ha mane Yesu tɔ̀ ga. Ye ha purusɔma ta bɛrɛda tɔ̀ mɛ ga, hale kasɔrɔ ye ne kala makwɔnabɛ kɔ ma, kɔ pepe ma. Nka ye Yesu zarake ngwĩ sanga ma, ye mane ngwona bɛrɛda dopaga. ²⁸ Hale kasɔrɔ ye ma dayaga si za a hõ ngwĩ ngwõ daga kɔ siri nemɛ ga, ye Pilate mɛ ye ya yɛ. ²⁹ Da pepe ngwĩye sɛbɛɛ a ta da na Wuro ta bɛrɛda hõ, ye ngwõwɔ pepe ta ne dopaga ngwĩ sanga ma, ye na zibɛ na wa kwãgwaga sɔno ma hõ na syãbɛ bona hõ. ³⁰ Nka Wuro a ngwini na sabɛ sara woro hõ. ³¹ Ngwĩye tuma Galile gana hõ, hõ ya kɔ le Zerusalem, ngwõwɔ mana za kanyena nyaa na. Ngwõwɔ ngwõ a syɛrɛ kɔma Israyɛli kɔma nyono na basyɛ. ³² - ³³ Mɛ yɛrɛ mane Bɛrɛda Fɔre yera ka ma da Wuro mane datege ngwĩ bi ke bemae ma, a Yesu ngwini hõ ngwona datege dopaga a timi kɔma ma yee. A timi kɔma ngwõ ke yɛrɛ. Wɔkara a sɛbɛɛ Zaburu na pɔlalo hõ ngwɛne da: Be mya nemɛnimisĩ, mɛ tɛ be tõ na sɔma. ³⁴ Wuro mane ngwõ yera da ye na a ngwini na sabɛ sara woro hõ, ya ha na vɔra ga. A ngwõ yera na kìnìbɛ da: Ma na duba na kìnìye kɔ duba na syɛbɛye pere ka ma, ma ngwĩye na datege bi Dauda ma. ³⁵ Ngwõ yena a yera bo piri ma da: Be ha na dyã biyi hõ vɔra ga. ³⁶ Dauda mane bara ta Wuro ma ya wakati ma. Ngwõ timi a siri hõ kwɔ sara hõ. ³⁷ Nka Wuro ngwĩ ngwini, ngwõ ha vɔra ga. ³⁸ Syenɔmane, ka daga na tɔ̀ da kakye yafabe ta da yera ka ma Yesu barika hõ. ³⁹ Ka ha mane sebɛne telebe gũ da ngwĩye na Musa ta tõ barika hõ ga, lanabe sɔma telebe gũ ngwona da pepe na Yesu barika hõ. ⁴⁰ Ka ka yɛrɛ kɔrɔse ngwõfatɔ purusɔma da ngwĩye yera, ngwõwɔ ka na ka gũ ga. Ye da: ⁴¹ Ka sege, ki sɔma dɛgɛbɛre. Ka daga kaba hõ zãzã kamasɔrɔ ma na da bɔ ta kya wakati ma, ne bo hõ ngwona da yera ka ma, ka ha na la a na ga. ⁴² Pauli kɔ Banabasi sa Yahutuye ta Wuro yirebɛ kõ hõ ngwĩ sanga ma, ye ne mɛ ye makwɔnabɛ kɔ za ta ye birɛ hõ ngwona da yera ye ma yɛ. ⁴³ Ngwona nemɛkwe wɛ wɛ timi ma, Yahutuye kɔ ya tobi nɔmane na nyaaye dɔ Pauli kɔ Banabasi ma. Ngwõwɔ bɛri ye ta hõ na sigebɛ ye ma, ye na taaye hõ wɔ Wuro ta nema ma. ⁴⁴ Ngwona makwɔnabɛ kɔ na pɔlalo kɔ ma, kire kɔma na fanga na kwe ngwõfatɔ ye Matigi ta bɛrɛda mɔ. ⁴⁵ Yahutuye ngwona zamɛ na nyaaye za ngwĩ sanga ma, ye kɔrɔ paga kereyabe na. Ye dofɔga ne Pauli ta bɛrɛda yagayaga ne vini. ⁴⁶ Pauli kɔ Banabasi na yera na kìnìbɛ ye ma da ye mane daga pya Wuro ta bɛrɛda yera yewɔ ma dɛ̃. Nka ne ye hõ maga ngwona bɛrɛda hõ, hõ na dyati da ye yiwɔ ha daga kɔ sugunɔmabe na wɛbariyayi nemɛ ga, ye na ya si sɔma birɛ piri ma basyɛ. ⁴⁷ Ye da: Matigi ngwõ yera mɛ̀ ma da: Mɛ be tangabɛ hõ be ta si sɔma ta kini na ngwõfatɔ be ya kɔ kisibe na bɛrɛda nemɛ lagakõ pepe tege ma. ⁴⁸ Si sɔma ngwona bɛrɛda mɔ ngwĩ sanga ma ye ni hõ dya hõ Wuro ta bɛrɛda yirebɛ. Ngwĩye ta da ngwõ latege hõ sugunɔmabe gũ, ngwõwɔ mane lanabɛbe ta. ⁴⁹ Sɔma mane Matigi ta bɛrɛda mɔ ngwona gana pepe hõ. ⁵⁰ Nka Yahutuye mane Wuro yirebɛ yàra na togayeekɔma kɔ kuru kɔrɔ hõ sɔma yee yabɛ Pauli kɔ Banabasi na hõ nyane da tumabɛ ye ma ne laga ne sabɛ ya gana hõ. ⁵¹ Ngwõwɔ ye kãe hõ kanɛgɛ hõ tulu pimiri ye ma hõ ya Ikone kuru hõ. ⁵² Ãtiose kalanɔmane mane pagaa nihõdyaro kɔ Ni na kìnìyi na.

¹ Ye wiri Ikone kuru hõ. Pauli kɔ Banabasi kwe Yahutuye ta Wuro yirebɛ kõ hõ. Ye bɛri hale fɔ Yahutuye kɔ si sɔma na nyaaye lanabɛbe ta. ² Nka Yahutuye ngwĩye ha dyã lanabɛbe ta ga, ngwõwɔ mane si sɔma sĩsangabɛ hõ miri dayaga na lanabe sɔma ta da na. ³ Pauli kɔ Banabasi wakati na nyaayi ta Ikone. Ye mane bɛri kɔ worasigi nemɛ. Ye zigi mane dɛ Matigi ma. Matigi mane sebɛbe pere ye ma hõ kabako da kɔ tagamasɛ̃ ta. Yee nemɛ, a ye dɔrɔ da ye nema na bɛrɛda ngwĩye yera, ngwõwɔ tĩyã. ⁴ Kire kɔma sɔdini. Bɔ ne ti Yahutuye ta, bɔ ne ti fanene ta. ⁵ Si sɔma kɔ Yahutuye kɔ ye ngwonakɔma ye nemɛ kwe ye dayaga ta fanene na ne dira ne yɛ kɔ dɔge nemɛ. ⁶ Ngwona sɔma pɔla ngwõ nyono tɔ̀ ngwĩ sanga ma, ye tongo ya Likayoni gana hõ kire bɔ hõ, Lisitre kɔ Derebe kɔ ye na kire kyegɛ ma kire hõ. ⁷ Ye Bɛreɛda Fɔre yera ngwɛ̃. ⁸ Nomo bo mane tanga Lisitre, a na murukuyi mane vɔrɔ, a ha mane ya zɛ ga. ⁹ A mane mɔ Pauli ta bɛrɛda na. Pauli ye nyena baga a hõ na sege. A tɔ̀ da lanabɛbe ti a ta hõ kɛnɛ. ¹⁰ A bɛri yire hõ da a ma: Tuma taa be kãe ma. A tuma tige hõ ne ya. ¹¹ Zamɛ Pauli ta tɛda za ngwĩ sanga ma, ye songo Likayoni da hõ da: Yirebɛ fere ye bere tɛ sɔma na hõ na vɛ ke ta. ¹² Ye Banabasi wiri da Zeyus hõ Pauli wiri da Heremes kamasɔrɔ Pauli ngwõ mane bɛri. ¹³ Zeyus na yirebɛ kõ bo mane ti kuru na kwɔ do do ma. Zeyus na salakawɛta tolɛ bɔ fɔga, sɔ dazugo na filɛye ne ti ye moga hõ. A ya kɔ lɔ kuru na kwɔ do do ma, awe kɔ sɔma pepe. Ye mane tyata salaka wa Pauli kɔ Banabasi ma. ¹⁴ Ngwona fanene sɔma pɔla ngwona da mɔ ngwĩ sanga ma, ye ya zogore bara hõ tongo ya zamɛ woro hõ, hõ songo da: ¹⁵ Kyà kɔma, ngwonona ka ngwõ ta? Mɛ̀ ka nemɛ na sɔma bɔ mɛ. Mɛ̀ na hõ Bɛrɛda Fɔre yera ka ma da ka sa bo gwaganagwagana da na hõ ka bere Wuro na suguyi ma, awe ngwĩ ngwõ wurokõ kɔ lagakõ kɔ nyengezu kɔ a kɔrɔ hõ fere pepe na tegeta. ¹⁶ Wakati na fɔnoyi ma a si sɔma pepe to ye yɛrɛ dungo hõ. ¹⁷ Nka a ma ye yɛrɛ na syɛrɛbe do dira ga. A dafɔre ta ne woruzu pere hõ tuma wuro hõ, hõ sõ fere nyaa pere ka ma hõ ka kɔrɔ paga kɔ nihõdyaro nemɛ. ¹⁸ Zɔgɔta hale ngwona bɛrɛda ha mane kya ne bare hõ salaka wa fanene ma ga. ¹⁹ Ngwona sanga ma Yahutuye bɔ na hõ tuma Pisidi Ãtiose kɔ Ikone kire hõ, hõ na sɔma gwãgwanabɛ fɔ ye Pauli dira kɔ dɔge nemɛ na suru na sabɛ kuru timi. A mane ti ye kɔrɔ hõ da a siri. ²⁰ Lanabe sɔma na Pauli kori ngwĩ sanga ma, a tuma kwɔ kuru kɔrɔ hõ. Ngwona ngwinisĩ a kɔ Banabasi ya Derebe. ²¹ Pauli kɔ Banabasi Bɛrɛda Fɔre yera Derebe kuru hõ. Ye mane kalanɔmane nyaa gũ ngwɛ̃. Ngwõ timi ye bere ya Lisitre kɔ Ikone kɔ Ãtiose ngwĩ ti Pisidi gana hõ. ²² Ye mane kalanɔmane wora sigebɛ hõ ne wadyu ye ye taa lanabɛbe hõ. Ye da: Nyane na nyaaye na ke gũ sane ke hõ kwɔ Wuro ta fangamabe hõ. ²³ Ye somɔlala tege eglise pepe tala tala hõ. Ye sũ kyɛ wɛ timi hõ Wuro mɛ, ye ne kalofa Matigi ma, ye mane la ngwõ ngwĩ na. ²⁴ Ngwõ timi ye do fɔno Pisidi hõ ya Pãfili. ²⁵ Ye Wuro ta Bɛrɛda yera Pereze kɔ Atali. ²⁶ Ye kwɔ koro bo hõ Atali hõ ya Ãtiose. Ye bara ngwĩ ta ne wɛ, ye mane kalofa Wuro ta nema ma ngwona kuru hõ. ²⁷ Ye wiri Ãtiose ngwĩ sanga ma ye eglise kwe. Wuro da pepe ngwĩye ta ye ta kɔ do kibɛɛ si sɔma ma ngwɛne hõ lanabɛbe ta, ye ngwõ pepe yera ye ma. ²⁸ Ye nyi damane ta lanabe sɔma birɛ.

¹ Sini bɔ na Ãtiose hõ tuma Zude gana hõ. Ye syenɔmane kala da: Ne ka ma yɛro hõ kanya kɔ Musa ta tõ nemɛ ga, ka ha sebɛne kisi ga. ² Songoro kɔ dakwiyɛro na yireyi tɛ wɛ timi ye kɔ Pauli kɔ Banabasi yɔ, syenɔmane na latege da ye Pauli kɔ Banabasi kɔ ye na bɔ hõ kwe ya Zerusalem fanene kɔ somɔlala birɛ, ye bɛri ngwona dakwiyɛro ta da na. ³ Eglise ye fane ye ya ngwona da na. Ye Fenisi kɔ Samari gana pepe fɔno, ye ne si sɔma ta tobi da yera sɔma ma. Ngwõ tɛ nihõdyaro na yireyi na syenɔmane pepe ta. ⁴ Ye wiri Zerusalem ngwĩ sanga ma eglise kɔ fanene kɔ somɔlala ne fɔga fɔrona. Wuro da pepe ngwĩye ta ye sera hõ, ye ngwõwɔ pepe yera ye ma. ⁵ Farisyɛ̃ kɔma ta nemɛkwere na bɔ mane lanabɛbe ta. Ngwona lanabe sɔma na bɔ da ye si sɔma daga yɛro hõ dɔ Musa ta tõ ma. ⁶ Fanene kɔ somɔlala ye nemɛ kwe hõ ngwona da nyonohõwa. ⁷ Dakwiyɛro na yireyi tɛ wɛ timi ma, Pierre tuma taa hõ da ye ma: Syenɔmane, ka tɔ̀ da Wuro mɛ dɛ̀gɛ̀ mɛ wa ka woro hõ fɔ sanga dɛrɛ da hõ ngwõfatɔ si sɔma hõ Bɛrɛda Fɔre mɔ ne ta hõ la ye na. ⁸ Sɔma pepe kɔrɔnatɔ̀ta Wuro a dɔrɔ da ye dyã ye ma kamasɔrɔ a Ni na kìnìyi pere ye ma wɔkara a pere ke ma ngwɛne. ⁹ A ha dɛ̀gɛ̀ do si ta ke yɔ kɔ lɔ tɛno si na ga. A ye kɔrɔ kìnìbɛ ye ta lanabɛbe yena. ¹⁰ Basyɛ ke bemae kɔ ke yɛrɛ ha sebɛ bye ngwĩye bi ga, ngwonona ka Wuro kɔrɔ wa hõ da lanabe sɔma daga ngwona bye bi? ¹¹ Ke la a na da ke na kisi Matigi Yesu ta nema barika hõ wɔkara ngwõwɔ. ¹² Sɔma pepe bɔɔ hõ mɔ Pauli kɔ Banabasi ta. Wuro tagamasɛ̃ kɔ kabako da yee ngwĩye ta ye ta si sɔma woro hõ, ye ngwõ pepe kwɔna ye ma. ¹³ Ye waro ngwona bɛrɛda na ngwĩ sanga ma Yakuba da: Syenɔmane ka mɔ ne ta dɛ̃. ¹⁴ Wuro mane ye kakiri to si sɔma na ngwĩ sanga ma gweregwerena ngwõfatɔ a ye yɛrɛ togo na wiri sɔma bɔ dɛ̀gɛ̀ ye woro hõ, Simõ ngwõ yera ke ma. ¹⁵ Ngwõ kɔ purusɔma ta bɛrɛda bɛ̃, wɔkara a sɛbɛɛ ngwɛne Wuro ta bɛrɛda hõ da: ¹⁶ Matigi da ye ngwona da timi ma ye na bere na hõ Dauda ta kõ tɔgɔ yɛ, ngwĩ mane bɛrɛ hõ na na yaga da tetɛrɛ hõ na tumabɛ. ¹⁷ Ngwõfatɔ sɔma sɛrɛ hõ Matigi kya, ngwõwɔ kɔ si sɔma pepe ngwĩye wiri ne ta yeye na. ¹⁸ Matigi ngwĩ fa yera bo ngwõ, awe ngwĩ ngwona da dɔrɔ fɔ gweregwerena syedɛrɛ da hõ. ¹⁹ Yakuba da: Ngwõ yena si sɔma woro hõ sɔma ngwĩye ngwõ tobi Wuro ma, mɛ a dyati da ke ha daga ngwõwɔ nyane ga. ²⁰ Nka ke sɛbɛ fane ye ma da ye ka salakawɛ kika kɔ fyã ma tɛtɛ fere nɔma ga. Ye ka kakalabe ta ga. Ye ka fa mogo na fɛnɛnɛyi na kika nɔma ga, ngwõ kɔ tõ. ²¹ Na dofɔga gweregwerena Musa ta tõ na bɛrɛda na yerasɔma ti kire pepe tala tala hõ. Ye ngwõ kala Yahutuye ta Wuro yirebɛ kwã hõ makwɔnabɛ kɔ pepe ma. ²² Ngwona sanga ma a dya fanene kɔ somɔlala kɔ eglise pepe ma hõ sɔma bɔ dɛ̀gɛ̀ ye hõ ne kwe Pauli kɔ Banabasi ma ne fane Ãtiose. Ye Zuda ngwĩ wiri Barasaba kɔ Silasi, ye ngwõwɔ dɛ̀gɛ̀. ²³ Ye mane syenɔmane hõ sɔma yee. Ye sɛbɛ sɛbɛ na ka ye soro hõ. Ngwona sɛbɛ da: Fanene kɔ somɔlala kɔ syenɔmane bo sɛbɛ fane syenɔmane na si sɔma ma Ãtiose kuru hõ kɔ Siri kɔ Silisi gana hõ, hõ bire ka na fɔrona. ²⁴ Mɛ̀ mɔ da myà sɔma bɔ ya ka birɛ hõ ka kakiri nyangamu kɔ ya bɛrɛda nemɛ hõ ka ni na bã. Nka mɛ̀ ha mane ye fane ga. ²⁵ Ngwõ yena mɛ̀ bɛ̃ wɛ timi ngwona da na, a dya mɛ̀ ma hõ sɔma bɔ dɛ̀gɛ̀ hõ ne fane ka birɛ, ngwõwɔ kɔ kyà kanuye Pauli kɔ Banabasi. ²⁶ Ngwõwɔ ha maga siri na kyà Matigi Yesu Krista ta bara yena ga. ²⁷ Aiwa, mɛ̀ Zude kɔ Silasi fane, ye yɛrɛ na bɔ da yera ka ma, mɛ̀ ngwĩye sɛbɛ. ²⁸ A dya Ni na kìnìyi kɔ mɛ̀ ma da ke ha na bye zɛ na tɛnɛye dɛ ka ma ga, fɔno bɔ da, ka daga ngwĩye ta: ²⁹ Ka ka fyã kãe kika kɔ tõ kɔ fa mogo na fɛnɛnɛyi na kika nɔma ga. Ka sa kakalabe na. Ne ka ne ka yɛrɛ kɛ̃gɛlɛ ngwona da ma, ngwõ fɔro. Ke ti bo wakati ma. ³⁰ Ngwona sɔma fane wɛ timi ma, ngwõwɔ ya Ãtiose hõ lanabe sɔma na zamɛ kwe hõ ngwona sɛbɛ pere ye ma. ³¹ Ya kala ngwĩ sanga ma, ye ni hõ dya ngwona bɛrɛda na, ngwõ mane ye nyangabɛ. ³² Zude kɔ Silasi yɛrɛ mane pururi. Ye syenɔmane wadyu kɔ bɛrɛda nyaa nemɛ ngwõfatɔ ye ye wora sige. ³³ Ye nyi damane ta ngwɛ̃. Ngwõ timi syenɔmane ne to ye bere ya syara na ye na fanene birɛ. ³⁴ [A mane dya Silasi ma hõ wɔ ye birɛ.] ³⁵ Ngwõ pepe na, Pauli kɔ Banabasi wɔ Ãtiose, yewɔ kɔ sɔma nyaa mane sɔma kala kɔ Matigi ta da na bɛrɛda nemɛ. ³⁶ Nyi damane fɔno wɛ timi ma Pauli da Banabasi ma: Ke Matigi ta Bɛrɛda Fɔre yera kire pepe ngwĩye hõ, to ke bere ya ngwɛ̃ hõ sa syenɔmane ma ne nɔma sege. ³⁷ Banabasi mane tyata Zã hõ kwe ya kɔ lɔ, ye ngwĩ wiri Mareka mɛ. ³⁸ Ngwõ mane dɛ̀gɛ̀ ye na Pãfili, ma kwe ya kɔ lɔ bara na ga. Ngwõ yena a ha mane dya Pauli ma ngwõ hõ kwe ya kɔ lɔ ga. ³⁹ Ye yɔ dakwiyɛro mane sige fɔ ye dɛ̀gɛ̀ nemɛ na. Banabasi ya kɔ Mareka nemɛ. Ye kwɔ koro hõ, hõ ya Sipire gana hõ. ⁴⁰ Pauli kalofa wɛ timi Matigi ta nema ma syenɔmane ta, a Silasi dɛ̀gɛ̀ hõ ya. ⁴¹ A Siri kɔ Silisi gana pepe yara hõ eglise sabati lanabɛbe na.

¹ Pauli wiri Derebe, ngwõ timi a ya wiri Lisitre. Lanabe sõ bo mane ti ngwɛ̃, a togo ti Timote. A sye mane Yahutu na lanabe yà, nka a tõ mane Girɛki sõ. ² Lisitre kɔma kɔ Ikone kɔma pepe mana toga fɔro wiri. ³ Pauli mane tyata ngwõ kwe ya kɔ le. A mana yɛro ngwona Yahutuye yena ngwĩye ngwõ ti ngwɛ̃ kamasɔrɔ ye pepe tɔ̀ da a tõ Girɛki sõ. ⁴ Ye mane do fɔno kire ngwĩye hõ, ye Zerusalem eglise hõ fanene kɔ somɔlala ta fane yera ye ma, ye ye ngwõ fɔga. ⁵ Eglise mane sabati lanabɛbe na. Sɔma nyaa ne kwe ye ma kɔ o kɔ. ⁶ Ni na kìnìyi ye bare hõ Bɛrɛda Fɔre yera Asi gana hõ. Ngwõ yena ye Firizi kɔ Galase gana fɔno. ⁷ Ye ya wiri Misi ngwĩ sanga ma, ye mane tyata ya Bitini gana hõ nka Yesu ni ma dyã ye ya ngwɛ̃ ga. ⁸ Ye do fɔno Misi gana hõ, hõ ya wiri Tirowasi zu do ma. ⁹ Wuru hõ Pauli sonyanga. Masadwane sõ bo ye dɔrɔ a ma na mɛ da: Na Masadwane hõ mɛ̀ dyema. ¹⁰ Ngwona sonyanga fɔno wɛ timi ma ngwona no tala hõ mɛ̀ tɛno kya hõ ya Masadwane. Mɛ̀ mane kìnì a na da Matigi mɛ̀ wiri hõ ya Bɛrɛda Fɔre yera ngwona ngwɛ̃ sɔma ma. ¹¹ Mɛ̀ kwɔ koro hõ Tirowasi hõ tele ya Samotirase ma. Ngwona ngwinisĩ mɛ̀ wiri Neyapolisi kuru hõ. ¹² Hõ mɛ̀ to ngwɛ̃ mɛ̀ fɔno ya Filipe, ngwõ mane Masadwane na kire gwaga bo, Rome kɔma ta kuru. Mɛ̀ nyi damane ta ngwona kuru hõ. ¹³ Makwɔnabɛ kɔ ma mɛ̀ sa kuru timi hõ ya ku do ma. Mɛ̀ mane dyati da Yahutuye ta Wuro mɛ do bo na ti ngwɛ̃. Mɛ̀ tanga ngwɛ̃ hõ bɛri yàra na kweye ta. Tiyatire yà bo mane tye, a togo ti Lidi. ¹⁴ A mane zogore pɛnɛ zabire. A mane Wuro yirebɛ. Awe mane myà bɛrɛda mɔ. Matigi na kɔrɔ do kɔba ngwõfatɔ a hõ ye turu taba Pauli ta bɛrɛda na. ¹⁵ A mane batize, awe kɔ ya kõ kɔma. Ngwõ timi a da mɛ̀ ma: Ne ka hõ mɛ dyati Matigi ta lanabe sõ, ka na vɛ na kõ hõ. A fanga dɛ mɛ̀ ma mɛ̀ dyã. ¹⁶ Bo kɔ ma mɛ̀ mane ya Wuro mɛ do hõ ngwĩ sanga ma, mɛ̀ ya tɛ̃ kɔ tɛrɛ dalo bo nemɛ, da sege zini ne ti a hõ. A ngwonakɔma mane gwana nyaa gũ a ta dasegebe na. ¹⁷ A dɔ mɛ̀ kɔ Pauli ma ne songo ne da: Bɔ sɔma Wuro na duroyi ta baratɛre. Ye kisibe ta da yera sɔma ma. ¹⁸ A ngwõ ta fɔ ya wiri nyi damane. Pauli ni na na bãyi ye bere hõ da zini ma: Ma yera be ma Yesu Krista togo barika hõ, sa a hõ. Ngwona no tala hõ a sa a hõ. ¹⁹ Ngwona tɛrɛ dalo ngwonakɔma a za da ye ha gwana gũ a ta titiri ga, ye Pauli kɔ Silasi suru ya kɔ lɔ ngwona gana hõ ngwonakɔma ta gwɛnɛgɛ hõ. ²⁰ Ye ne taabɛ Rome kɔma ta kitisɔre zi hõ, hõ da ngwõwɔ ma: Bɔ sɔma kyà kuru nyangamu fɔrona. Ye Yahutuye. ²¹ Ye lãda bɔ yera, kyà tõ ha dyã ke Rome kɔma hõ ngwona da fɔga wala hõ kwɔ ye hõ ga. ²² Sɔma pepe tuma ye na. Kitisɔre Pauli kɔ Silasi wɔla hõ da ye ye võ kɔ gwelekame nemɛ. ²³ Ye ne võ fɔrona ne ka kaso hõ, hõ da garede sõ ma ya ye kɔrɔse fɔrona. ²⁴ Garede ngwona fane mɔ ngwĩ sanga ma a ne ka kaso kõ na kõ zĩ kɔrɔ hõ, hõ ne kãe ka gwangane hõ. ²⁵ Boroma nemɛ si Pauli kɔ Silasi mane Wuro mɛ ne Wuro yirebɛ turu sõ. Kaso kõ hõ sɔma ne mɔ ye ta. ²⁶ Ngwona no tala hõ lagakõ sɔma fɔrona fɔ hõ kaso kõ du sɔmabɛ. Ngwona no tala hõ kaso ko na korore pepe kibɛɛ, kaso kõ hõ sɔma pepe na pɛrɛ balazɔgɔre sele. ²⁷ Garede sõ ngwini hõ kaso kõ da na kibɛye za ngwĩ sanga ma, a ya tabaku vɔ na wa a na syɛ̃ hõ. A mane tyata ye yɛrɛ yɛ. A mane dyati da kaso nɔmane tongo. ²⁸ Nka Pauli songo kɔ kõ na yireyi nemɛ da: Ka dayaga si ta be yɛrɛ na ga, mɛ̀ pepe ti bɛ. ²⁹ Ngwona sanga ma garede sõ da ye na kɔ kini nemɛ. A na kwãyi na sɔmayi kwɔ sale hõ zi bɛrɛ Pauli kɔ Silasi we. ³⁰ Ngwõ timi a ne sabɛ sire hõ da ye ma: Babae, ngwono ma daga ngwõ ta ngwõfatɔ ma kisi? ³¹ Ye da a ma: La Matigi Yesu na, be na kisi, bi kɔ bya kõ kɔma pepe. ³² Ye Matigi ta bɛrɛda yera a ma, awe kɔ ya kõ kɔma pepe. ³³ Garede sõ ya kɔ lɔ ye birɛ ngwona wakati ma wuru hõ, hõ ne ta dare wa. Ngwona no tala hõ a batize, awe kɔ ya kõ kɔma pepe. ³⁴ Ngwõ timi a Pauli kɔ Silasi kwɔbɛ ya kõ hõ, hõ zõfa pere ye ma. Awe kɔ ya kõ kɔma pepe ni hõ dya kamasɔrɔ ye la Wuro na. ³⁵ Ngwona ngwinisĩ kitisɔre sɔma fane ye ya yera garede ma ya ngwona sɔma dira. ³⁶ Garede ya yera Pauli kɔ Silasi ma, ye kitisɔre sɔma bɔ fane ye na yera ye ye ye dira. Ye ye sebɛne sa basyɛ hõ ya syara na. ³⁷ Nka Pauli da ye ma: Ye mɛ̀ Rome kɔma vuro sɔma pepe nyono na, ma myà kiti sɔ ga. Ngwõ timi ye mɛ̀ ka kaso hõ. Basyɛ ye tyata hõ mɛ̀ dira tunungu hõ ra? Aworɛ, yewɔ yɛrɛ ngwõ daga na mɛ̀ sabɛ bɛ. ³⁸ Garede sɔma ya ngwona bɛrɛda yera kitisɔre ma. Ye mɔ ngwĩ sanga ma ye ye Roma kɔma, ye mane kwã. ³⁹ Ye na hõ ne mɛ da ye ye kakye to. Ye ne sabɛ kaso hõ ne mɛ ye sa ye wa ya kuru hõ. ⁴⁰ Ye sa wɛ timi ma kaso hõ, ye kwɔ Lidi ta kõ hõ. Ye syenɔmane za ngwɛ̃ hõ ne ladi. Ngwõ timi ye ya.

¹ Pauli kɔ Silasi Ãfipolisi kɔ Apolini kire fɔno hõ ya wiri Tesaloni. Yahutuye ta Wuro yirebɛ kõ bo mane ti ngwɛ̃. ² Pauli kwɔ ye birɛ wɔkara a daro ne ta ngwɛne. A makwɔnabɛ kɔ saa ta ne dakwiyɛ kɔ lɔ Wuro ta bɛrɛda ta da na. ³ A ne nyono yera ne kìnìbɛ ye ma, ye Masiya mane daga nyane hõ ye bere ngwini sa sara woro hõ. A da ye ma: Ma Yesu ngwĩ ta da yera ka ma, ngwõ ngwõ Masiya. ⁴ Ye na bɔ kɔ Girɛki sɔma na Wurokwãsɔma kɔ yàra na togayeekɔma na nyaaye la ngwona bɛrɛda na hõ kwe Pauli kɔ Silasi ma. ⁵ Yahutuye mane paga kereyabe na. Ye kuru hõ gwaganagwagana sɔma kwe, ye songoro ta kuru kɔrɔ hõ. Ye yiri ya Zasõ ta kõ birɛ ngwõfatɔ ye Pauli kɔ Silasi fɔga hõ ya kɔ lɔ kitisɔre birɛ. ⁶ Ye ya, ma ye za ga, ye Zasõ kɔ syenɔmane bɔ suru ya kɔ lɔ kitisɔre birɛ hõ songo da: Bɔ sɔma ngwĩye ngwõ diniya nyangamu, ngwõwɔ na bɛ mɛ. ⁷ Zasõ ne vɛbɛ ya kõ hõ. Ye pepe Rome ta fangama gwaga ta tõ kwini. Ye da fangama za bo tye, ye ngwõ Yesu. ⁸ Kire kɔma pepe kɔ kitisɔre ngwona bɛrɛda mɔ ngwĩ sanga ma, ye gwãgwana. ⁹ Zasõ kɔ bɔ sɛrɛ mane daga gwana pere kitisɔre ma ngwõfatɔ ye ye dira. ¹⁰ Wuru ba ngwĩ sanga ma syenɔmane Pauli kɔ Silasi yabɛ Bere. Ye wiri ngwɛ̃ ngwĩ sanga ma, ye kwɔ Yahutuye ta Wuro yirebɛ kõ hõ. ¹¹ Ngwõwɔ mane fõ kɔ Tesaloni kɔma nemɛ. Ye mane Wuro ta bɛrɛda fɔga kɔ dyamabe nemɛ. Kɔ o kɔ ye mane Wuro ta bɛrɛda kala ne kɔrɔ sege yala ne Pauli ta bɛrɛda hõ ne tĩyã. ¹² Ye na sɔma nyaa lanabɛbe ta kɔ Girɛki yàra na togayeekɔma na nyaaye kɔ sini na nyaaye mɛ. ¹³ Nka Yahutuye ngwĩye ngwõ ti Tesaloni ye tɔ̀ ngwĩ sanga ma da Pauli tine Wuro ta bɛrɛda yera Bere mɛ, ye ya ngwɛ̃ hõ sɔma gwãgwanabɛ ne sĩsangabɛ. ¹⁴ Ngwona sanga ma syenɔmane Pauli yabɛ nyengezu do ma. Nka Silasi kɔ Timote wɔ Bere. ¹⁵ Pauli na yeesɔma ya kɔ le fɔ Atene kuru hõ, ye na bere bigeye, Pauli ne fane ye Silasi kɔ Timote sale na ye birɛ. ¹⁶ Hõ Pauli to a ne Silasi kɔ Timote yɛ̀rɛ̀ Atene, a woro ba kamasɔrɔ a za da ngwona kuru pagaa fyã na. ¹⁷ A mane bɛri Yahutuye ta kɔ si sɔma na lanabe sɔma ta Yahutuye ta Wuro yirebɛ kõ hõ. Kɔ o kɔ a tɛ̃ kɔ ngwĩye nemɛ gwɛnɛgɛ hõ, a bɛri ngwõwɔ ta mɛ. ¹⁸ Sɔma na kakirikɔma ye ngwĩye wiri Epikuri kɔma kɔ bɔ zaye, ye ngwĩye wiri Setoyisyɛ̃ kɔma, ngwõwɔ na bɔ bɛrɛda dofɔga kɔ Pauli nemɛ. Bɔ da: Bo da bɛri sõ tine ngwono yera mɔ? Bɔ mɔ a ne bɛri ye ta Yesu ta da na kɔ sara ngwini da na. Ngwõ yena ye da: Ye ne wɔ a tine bɛri si sɔma ta yirebɛ fere ta da na yo. ¹⁹ Ngwona sanga ma ye na fɔga ya kɔ le dabɛrikõ hõ. Ye da a ma: Be kala na ngwũyi ngwĩ yera, mɛ̀ sebɛne ngwõ kɔrɔ tɔ̀ ra? ²⁰ Mɛ̀ da ngwũ ngwĩye mɔ be ta, mɛ̀ tyata ngwõ kɔrɔ tɔ̀. ²¹ Atene kɔma pepe kɔ ye na samara ya wakati pepe ta da ngwũ mɔbe kɔ da ngwũ yerabe na. ²² Aiwa, Pauli mane taa dabɛrikõ kɔrɔ hõ. A da Atene kɔma ma: Mɛ a za da ka nyono pɛnɛ yirebɛbe hõ fɔrona. ²³ Mɛ mane ti do fɔno hõ kya kuru hõ, mɛ kya yirebɛ fere sege. Mɛ mane salaka wɛ do bo za a ne sɛbɛɛ a ma da: Bo yirebɛ fa na tɔ̀bariyayi ta salaka wɛ do. Ka tine ngwĩ fa yirebɛ, ma na dɛ̀gɛ̀ tɔ̀ ga, ngwõ mɛ tine ngwõ yera ka ma. ²⁴ Wuro ngwĩ ngwõ diniya kɔ a kɔrɔ hõ fere pepe tege, wurokõ kɔ lagakõ na Matigi, ngwõ ha tanga sɔma ta yirebɛ kõ na tetɛrɛyi hõ ga. ²⁵ Sɔma ha sebɛne bara ta a ma hõ tɛ wɔkara a mako ti bo fa na kamasɔrɔ awe yɛrɛ ngwõ sɔma sugubɛ hõ fere pepe pere sɔma pepe ma. ²⁶ A sɔma pepe tege ne wa sonala hõ, hõ ne tangabɛ lagakõ na bi pepe hõ, hõ ne ta sanga kɔ ye ta tanga do tege latege ye ma. ²⁷ A mane ngwõ pepe ta ngwõfatɔ ye hõ na kya ne ye na lɔgelɔgeye ne sebɛna gũ, hale kasɔrɔ a birɛ ha dɛrɛ ke na sõ si na ga. ²⁸ Awe barika hõ ke tye, ke sugu ne wirɛwirɛ. Kya turosone na bo ngwõ yera mɛ da: Ke tɛ awe nɔmane na. ²⁹ Ne ke hõ ma Wuro nɔmane, ke daga la a na da Wuro ha ti wɔkara sɛrɛdalo ye ngwĩye ta kɔ sanu kɔ gwana kɔ dɔge nemɛ ga. Sɔma ngwõwɔ tetɛrɛ kɔ ye sera kɔ sɔma ta datɔbe nemɛ. ³⁰ Wuro ha ngwona datɔbariya sanga ma da dyati sɔma ta ga, nka basyɛ a yera sɔma pepe ma bi pepe hõ ye ye ye kɔrɔ bere ya kakye na. ³¹ A kɔ bo tege, a na kiti sɔ diniya kɔma ma kɔ telebe nemɛ ngwona kɔ ma. A sõ bo dɛ̀gɛ̀ hõ ngwona kiti sɔ. A ngwona sõ ngwini na sabɛ sara woro hõ, hõ na dɔrɔ sɔma ma yee nemɛ ya awe dɛ̀gɛ̀. ³² Ye sara ngwini da mɔ ngwĩ sanga ma ye na bɔ na zi. Bɔ da a ma: Ke be yɛ̀rɛ̀ bɔ bɛrɛda ta mɔ na bo kɔ ma yɛ. ³³ Ngwona sanga ma Pauli sa ne to yɛ. ³⁴ Ngwõ pepe na, sɔma bɔ kwe a ma hõ lanabɛbe ta. Denis mane ti ye hõ, a mane dabɛrikõ hõ sõ gwaga bo kɔ yà bo, a togo ti Damari, ngwõ kɔ sɔma zɛ.

¹ Ngwõ timi Pauli tuma Atene hõ ya Korɛ̃te kuru hõ. ² A Yahutu bo za ngwɛ̃, a togo ti Akila. A mane Põ sõ. Awe kɔ ya yà Pirisye mane do na hõ tuma Itali kamasɔrɔ Fangama Kilode mane da ye Yahutuye pepe daga tuma ye wa Rome kuru hõ. Pauli vɛ ye birɛ. ³ A wɔ ye birɛ ne bara ta kamasɔrɔ ye pepe mane bara sifa tala ta, ye mane zogokõ tetɛrɛre. ⁴ Makwɔnabɛ kɔ na kɔ pepe ma, Pauli mane bɛri sɔma ta Yahutuye ta Wuro yirebɛ kõ hõ ne Yahutuye kɔ Girɛki ngwã berebɛ. ⁵ Silasi kɔ Timote na wɛ timi hõ tuma Masadwane, Pauli mane ya wakati pepe ta Wuro ta bɛrɛda ta yerabe hõ, ne syɛrɛbe wa Yahutuye ma ye Yesu ngwõ Masiya. ⁶ Nka Yahutuye a dakwiyɛ na vini ngwĩ sanga ma, Pauli ya zogo pimiri ye ma hõ da ye ma: Ne ka hõ fire, ngwõ ka yɛrɛ ta da. Zarake do si ha ti mɛ na titiri ga. Na dofɔga basyɛ, mɛ tine ya si sɔma birɛ. ⁷ A sa ngwɛ̃ hõ kwɔ Titiyus ta kõ hõ. Ngwõ mane kwã Wuro na. A ta kõ mane ti Yahutuye ta Wuro yirebɛ kõ kyegɛ ma. ⁸ Wuro yirebɛ kõ ngwonate Kirisipus kɔ ya kõ kɔma pepe la Matigi na. Korɛ̃te kɔma na nyaaye Pauli ta bɛrɛda mɔ hõ lanabɛbe ta hõ batize. ⁹ Bo kɔ wuru hõ Pauli sonyanga. Matigi da a ma: Ka kwã ga ne bɛri suute. Be ka bɔɔ ga. ¹⁰ Mɛ ti kɔ be nemɛ, sõ si ha na bɛrɛ be ma hõ dayaga ta be na ga. Bɛri kamasɔrɔ mya sɔma nyaa ti bo kuru kɔrɔ hõ bɛ. ¹¹ Pauli wɔ ngwɛ̃ hõ dɔ tala kɔ yɛgɛ konala ta ne sɔma kala kɔ Wuro ta bɛrɛda nemɛ. ¹² Galiyõ mane ti ngwonakɔmabe na Akayi gana hõ ngwona sanga ma. Yahutuye pepe kwe tuma Pauli na, hõ na fɔga ya kɔ le kiti sɔ do hõ. ¹³ Ye da: Bo nomo sɔma ngwonayaga ne berebɛ ye Wuro yirebɛ yirebɛnɔma za na, ngwĩ ha kanya kɔ tõ nemɛ ga. ¹⁴ Pauli mane tyata bɛri ngwĩ sanga ma, Galiyõ da Yahutuye ma: Yahutu kɔma, ne ye ma telebariya da wala ne ye ma dayaga na da, mɛ daga mɔ ka ta. ¹⁵ Nka ne ka ne nemɛ dakwiyɛ bɛrɛda bɔ kɔrɔ na wala toga kɔrɔ na wala kya tõ ta da na, ngwõ ki yɛrɛ ta da. Mɛ ha dyã ne ngwõ nemɛ na da na kiti sɔ ga. ¹⁶ A ne sabɛ kiti sɔ do hõ. ¹⁷ Ngwona sanga ma ye pepe kwe Wuro yirebɛ kõ ngwonate Sositene ma na vuro kiti sɔ do zĩ hõ. Nka Galiyõ ma ngwõ dyati ga. ¹⁸ Pauli ye bere wakati nyaa ta Korɛ̃te. Ngwõ timi a dɛ̀gɛ̀ syenɔmane na hõ kwɔ koro hõ, hõ ya Siri gana hõ. Pirisye kɔ Akila ya kɔ le. Sane a hõ kwɔ koro hõ, a mane ye ngwõ̀ vɔro Sãkire kamasɔrɔ a mane ye do sɔ Wuro ma. ¹⁹ Ye ya wiri Efese kuru hõ, Pauli Akila kɔ Pirisye to ngwɛ̃. A kwɔ Wuro yirebɛ kõ hõ, hõ dakwiyɛro ta kɔ Yahutuye nemɛ. ²⁰ Ngwõwɔ na mɛ da ya syedɛrɛ ye birɛ ngwɛ̃. A ma dyã ga. ²¹ Sane a hõ sa ngwɛ̃, a da ye ma: Sale ngwĩ ngwõ na, ma daga ngwõ ta Zerusalem. Ne Wuro hõ dyã ma na bere na ka birɛ. Ngwõ timi a kwɔ koro hõ, hõ ya Efese. ²² A sa koro hõ ngwĩ sanga ma Sezare, a ye bere ya Zerusalem hõ bire eglise na. Ngwõ timi a ya Atiose. ²³ A wakati zɔgɔ ta ngwɛ̃. Ngwõ timi a sogo bi hõ ya Galase gana kɔ Firizi gana yara ne dɔbɛ nemɛ ma ne kalanɔmane wora sigebɛ ye ta lanabɛbe ta da na. ²⁴ Yahutu sõ bo na Efese, a mane Alekisãdire sõ. A togo ti Apolosi. A mane bɛrɛda tɔ̀ fɔrona. A mane kala Wuro ta bɛrɛda na fɔrona mɛ. ²⁵ A mane Matigi ta sogo ta da tɔ̀ hõ ne sɔma kala kɔ Yesu ta da nemɛ fɔrona. Nka a ta kala tege mane Zã ta batizebe. ²⁶ A dofɔga ne bɛri Yahutuye ta Wuro yirebɛ kõ hõ kɔ worasigi nemɛ. Akila kɔ Pirisye a ta bɛrɛda mɔ ngwĩ sanga ma, ye na kwɔbɛ ye birɛ kõ hõ, hõ Wuro ta sogo dɔrɔ na kìnìbɛ a ma. ²⁷ Ngwõ timi Apolosi mane tyata ya Akayi. Syenɔmane na woro sigebɛ hõ sɛbɛ sɛbɛ na fane kalanɔmane ma ngwĩye ngwõ ti ngwɛ̃, ye ya fɔga fɔrona. A ya wiri yɛ ngwĩ sanga ma, ngwĩye ngwõ lanabɛbe ta Wuro ta nema barika hõ, a ngwõwɔ dyema fɔrona. ²⁸ A Yahutuye ta bɛrɛda yaga sɔma pepe nyono na, na dɔrɔ da Yesu ngwõ Masiya, hõ kanya kɔ Wuro ta bɛrɛda nemɛ.

¹ Hõ Apolosi to Korɛ̃te, Pauli Asi gana hõ tola fɔna hõ wiri Efese. A kalanɔmane bɔ za ngwɛ̃. ² A da ye ma: Ka lanabɛbe ta ngwĩ sanga ma, ka mane Ni na kìnìyi gũ ra? Ye na dyabi ye ye ha mɔ yɛrɛ da Ni na kìnìyi tye ga. ³ Pauli ne tɔga da: Ne na batizeno na ka batize? Ye na dyabi ye Zã ta batizebe. ⁴ Pauli da ye ma: Zã mane sɔma batize ngwĩye dyã ye kɔrɔ bere hõ yera sɔma ma ye ngwĩ na na awe timi ye daga la ngwõ na, ngwõ Yesu. ⁵ Ye ngwõ mɔ ngwĩ sanga ma ye batize kɔ Matigi Yesu togo nemɛ. ⁶ Pauli ye sera dɛ ye ma, Ni na kìnìyi zi ye ma. Ye bɛrɛda zɛ bɛri hõ Wuro ta fane yera. ⁷ Ye mane sɔma fumɔla nemɛ si wa. ⁸ Ngwõ timi Pauli kwɔ Yahutuye ta Wuro yirebɛ kõ hõ, ho bɛri kɔ worasigi nemɛ. A yɛgɛ saa ta ne wadyuli ta ne Wuro ta fangamabe ta da dɔrɔ ye ma. A mane tyata ya bɛrɛda na mɔre ta miri berebɛ. ⁹ Nka bɔ sɔma maga mɔ na a ta hõ ma dyã la ye na ga. Ye ne Matigi ta sogo yagayaga sɔma pepe nyono na. Ngwona sanga ma Pauli ye sabɛ ye na hõ kalanɔmane dɛ̀gɛ̀ ye na hõ ya ne sɔma kala kɔ o kɔ Tiranus ta sɔma kala do hõ. ¹⁰ A dɔgɔ pɔla ta ngwõ hõ fɔ Asi kɔma, Yahutuye kwe si sɔma ma, ngwõwɔ pepe Matigi ta bɛrɛda mɔ. ¹¹ Wuro kabako da na yiregwagaye ta Pauli soro hõ. ¹² Zogore kɔ patare ngwĩye mane le Pauli kõ ma, ye mane ngwõwɔ dɛ komatoga parere ma, ye ta komatoga ne sa ye hõ. Zini mane sa sɔma hõ mɛ. ¹³ Yahutuye ngwĩye mane yara ne zini laga ne wa sɔma hõ, ngwõwɔ na bɔ ne taa ne sege hõ zini laga kɔ Yesu togo nemɛ. Ye da zini yɔ ma: Pauli Yesu ngwĩ togo ta da yera, mɛ̀ a yera na sigebɛ ka ma kɔ ngwõ togo nemɛ, ka sa. ¹⁴ Yahutu sõ bo togo ti Seva, a mane salakawɛre ngwonate. Ngwõ ta nemɛnimisini sɔma kopɔra mane ngwõ ta. ¹⁵ Zini yɔ ne dyabi da ye ma: Mɛ Yesu tɔ̀ ne Pauli tɔ̀ mɛ. Ki kwane, ki kɔ kɔma mɔ? ¹⁶ Ngwona zinifɛgɛta bɛrɛ ye ma fɔ ye na mabaye kɔ ye na komagwɛ̃lɛ̃gwɛ̃lɛ̃ye tongo sa kõ hõ. ¹⁷ Efese kɔma pepe, Yahutuye kwe si sɔma ma, ye mane ngwona da tɔ̀. Ye pepe kwã fɔrona. Matigi Yesu togo mane yire fɔrona. ¹⁸ Sɔma ngwĩye ngwõ lanabɛbe ta, ngwõwɔ na nyaaye na taa ya tɛda na hõ ne pepe yera sɔma nyono na. ¹⁹ Ngwĩye mane sebɛbe na da ta, ngwõwɔ na bɔ na kɔ ya sɛbɛ nemɛ ne pepe ngwona sɔma nyono na. Ye ngwona sɛbɛ tere dyati, a na gwana ya bɛrɛ sana kepɔlafũ ma. ²⁰ Yee nemɛ, Matigi ta bɛrɛda mane zãzã ya zĩ kɔ fanga nemɛ hõ ya sebɛbe dɔrɔ sɔma ma. ²¹ Ngwona da tɛ wɛ timi ma Pauli na latege da ye na do fɔno Masadwane kɔ Akayi hõ ya Zerusalem. A da: Ne ma hõ wiri ngwɛ̃, ma daga ya Rome sege mɛ. ²² A ye na dyemasɔma Timote kɔ Erasite fane ye ya Masadwane. Nka awe yɛrɛ mane wakati zɔgɔta ta Asi gana hõ. ²³ Ngwona wakati ma songoro na yireyi mane tɛ Efese kuru hõ Matigi ta sogo ta da na. ²⁴ Nomo bo mane tye, a togo ti Demetiriyus, a mane sanu yɛ kɔlɔsõ. A mane Aretime na yirebɛ kõ nemɛ tetɛrɛ kɔ gwano furu nemɛ. A ta baratɛre mane tono na nyaaye gũ ngwona bara na. ²⁵ A ngwona baratɛre kɔ ngwõ nemɛ na baratɛre kwe. A da ye ma: Mya kɔma, ka pepe tɔ̀ da ke gwana nyaa gũ bɔ bara na. ²⁶ Ka ye za ne mɔ da ngwona sõ Pauli da ye sõ soro yirebɛ fere ngwĩye tetɛrɛ, ye ngwõwɔ ha yirebɛ fere na syɛbɛye ga. A bɛri ne sɔma ta miri berebɛ. Ye ha bɛ Efese dama ga, a ngwõ ta Asi gana pepe hõ. ²⁷ Ke kwã a na kyà bara zarabɛ. A ha ngwõ dama ga. Kyà yirebɛ fa na yànayi ngwĩ togo ti Aretime, ye na ngwõ na yirebɛ kõ dyati zana mɛ, Asi kɔma kɔ diniya kɔma pepe ngwĩ yirebɛ. ²⁸ Ye ngwona bɛrɛda mɔ ngwĩ sanga ma ye wora ba fɔrona. Ye songo da: Efese kɔma ta Aretime, ngwõ yireyi. ²⁹ Kire kɔma pepe ngwona songo kõ mɔ. Ye Pauli yakwere Gayus kɔ Arisitake fɔga hõ ya kɔ lɔ nemɛkwe do hõ. Ngwõwɔ mane Masadwane kɔma. ³⁰ Pauli mane tyata ya taa zamɛ zĩ hõ nka lanabe sɔma na bare. ³¹ Asi kɔma na sɔma yee bɔ mana màre. Ngwõwɔ sɔma fane ye ya a mɛ ya ka ya ngwona nemɛkwe do hõ ga. ³² Zamɛ pepe zĩ piri, ye ne bɛri fĩyã pepe. Ye na nyaaye ha mane ye kwengwõ̀ tɔ̀ yɛrɛ ga. ³³ Zamɛ na sɔma na bɔ ngwona da nyono yera Alekisãdire ma. Yahutuye ngwõ nyɛ na yabɛ zĩ hõ. Alekisãdire ye soro duro, a mane tyata bɛri sɔma ta. ³⁴ Nka ye tɔ̀ da a Yahutu sõ ngwĩ sanga ma, ye lere pɔla nemɛ ta ne songo kɔ kõ tala nemɛ ne da: Efese kɔma ta Aretime ngwõ yireyi. ³⁵ Ngwõ timi kuru kɔrɔ hõ da na sɛbɛta zamɛ masyãbɛ hõ da ye ma: Efese kɔma, kya yirebɛ fa na yà na yireyi Aretime kɔ a dya ngwĩ ngwõ bɛrɛ hõ tuma wuro hõ, kɔ ha tɔ̀ da Efese kɔma ngwona yirebɛ kõ na kɔrɔse sɔma ga? ³⁶ Sõ ha sebɛne ye do bere ngwona da na ga. Ngwõ yena ka daga ka masyãbɛ. Ka ka salesale ne da ta ga. ³⁷ Ka na kɔ bɔ sɔma nemɛ bɛ. Ye ha yirebɛ kwã yaga ga. Ye ma kya yirebɛ fa na yànayi togo yaga mɛ ga. ³⁸ Ne da bɔ hõ ne ti Demetiriyus kɔ a ta baratɛkwere kɔ sõ bo yɔ, kiti kɔ tye. Kitisɔre tye mɛ. Ye daga ye nemɛ kiti. ³⁹ Nka ne ka hõ ne tyata da bo dɔrɔ, ye na ngwõ nyonohõwa zamɛ kwe sanga ma. ⁴⁰ Ye na murutibe na kiti sɔ ke ma bo songoro yena, ngwĩ tɛ sɔma. Kwengwõ̀ si ha ti bo zamɛ na ga. ⁴¹ Ngwona bɛrɛda yera wɛ timi a ta, a zamɛ dira.

¹ Ngwona songoro kwɔna wɛ timi ma, Pauli lanabe sɔma kwe hõ ne ladi hõ ne wora sigebɛ. Ngwõ timi a dɛ̀ ye na hõ sa ngwɛ̃ hõ ya Masadwane. ² A ngwona ngwɛ̃ yara hõ sɔma wora sigbɛ kɔ bɛrɛda na nyaaye nemɛ. Ngwõ timi a wiri Akayi gana hõ. ³ A yɛgɛ saa ta ngwɛ̃. A mane na kwɔ koro hõ, hõ ya Siri ngwĩ sanga ma, a mɔ da Yahutu kɔma du pɛrɛ a na. A na latege ngwona sanga ma ye bere ne do Masadwane sogo ma. ⁴ Sɔma ngwĩye ya kɔ le fɔ Asi, ngwõwɔ mane Piriyus ta nemɛnimisĩ Sopater, ngwõ Bere sõ, kɔ Tesaloni kɔma Arisitake kɔ Sesũdus kɔ Derebe sõ Gayus kɔ Timote kɔ Asi kɔma, Tisike kɔ Tirofime. ⁵ Ngwõwɔ mane ya mɛ zĩ hõ, hõ ya mɛ̀ yɛ̀rɛ̀ Tirowasi. ⁶ Buru na koobɛbariyayi na sale fɔno wɛ timi, mɛ̀ kwɔ koro hõ Filipe hõ nyi koo na yuru ta nyengezu ngwõ̀ ma hõ ya wiri ye birɛ Tirowasi. Mɛ̀ nyi kopɔra ta ngwɛ̃. ⁷ Sibiri kɔ lema, mɛ̀ kwe nemɛ ma ngwõfatɔ mɛ̀ hõ nemɛkwebe na zõfa zõ. Pauli bɛri sɔma ta. A mane tyata ya ngwona ngwinisĩ, ngwõ yena a bɛri syedɛrɛ fɔ ya boro pɔra. ⁸ Mɛ̀ mane ti zanga ngwĩ hõ, lãpe nyaa mane ti ngwɛ̃. ⁹ Yaliyo bo mane tanga fɛnɛtiri do ma, a togo ti Utike. Nyi mane ti a na fɔrona. Hõ ne to ye ne Pauli ta bɛrɛda mɔ, ngwona yaliyo nyi sãfire ye yɛrɛ da. A tuma zanga na saaro ma hõ wɛbɛrɛ lɔ ma. Ye da ya bi, a ne siri. ¹⁰ Pauli zi hõ ya zi syã a ma, hõ na fɔga ye sera hõ, hõ da: Ka ka ka kakiri nyangamu ga, a sugu yɛ. ¹¹ Ngwõ timi a ye bere ba hõ buru yɔyɔ hõ zõ hõ bɛri ye ta fɔ ya kɔ kyɛ. Ngwõ timi a ya. ¹² Ye na kɔ ngwona yaliyo na suguyi nemɛ. Ngwõ tɛ zigitugube na yireyi na ye pepe ta. ¹³ Mɛ̀ mane ya Pauli zĩ hõ koro hõ, hõ ya zu ngwõ̀ ma ne ya Asos. Mɛ̀ da mɛ̀ ya Pauli bi ngwɛ̃. A yɛrɛ mane tyata ya ye kãe ma. Ngwõ yena a mane ngwõ latege. ¹⁴ A mɛ̀ tɛ̃ Asos ngwĩ sanga ma, mɛ̀ na bi koro hõ, hõ ya Mitilene. ¹⁵ Mɛ̀ sa ngwɛ̃. Ngwona ngwinisĩ mɛ̀ wiri Kios ngwõ na tele do ma. Ngwona ngwinisĩ mɛ mɛ̀ wiri Samos. Ngwona ngwinisĩ mɛ̀ wiri Mile. ¹⁶ Pauli mana latege da ye ha na do Efese ngwõfatɔ a ka wakati yaga Asi gana hõ ga. A mane tyata Pãtekote na kɔ hõ wiri na gũ Zerusalem ne ngwõ hõ ne sebɛne tɛ. Ngwõ yena a mane salesale. ¹⁷ Hõ Pauli to Mile a fane ye ya Efese hõ somɔlala wiri ye na. ¹⁸ Ye ya wiri a birɛ ngwĩ sanga ma, a da ye ma: Na dofɔga mɛ gwere kwɔ kɔ ma Asi gana hõ, ka mya da tɔ̀ ka woro hõ sanga pepe ma. ¹⁹ Mɛ na yɛrɛmazibɛye mane bara ta Matigi ma kɔ nyenazyo nemɛ. Yahutuye ta du pɛrɛbe mane mɛ nyane. ²⁰ Fa pepe ngwĩ ngwõ fɔro ka ta, mɛ ha ngwona fa si dõ ka na ga. Mɛ ha mane kwã hõ ka wadyu hõ ka kala sɔma pepe nyono na kɔ kwã pepe tala tala hõ ga. ²¹ Mɛ mane yera Yahutu kɔma kɔ si sɔma ma da ye tobi Wuro ma hõ la Matigi Yesu Krista na. ²² Mɛ tine ya Zerusalem basyɛ. Ni na kìnìyi tyata ma ngwõ ta. Da ngwĩye ngwõ na mɛ gũ ngwɛ̃, mɛ ha ngwõ tɔ̀ ga. ²³ Mɛ ngwĩ fa tɔ̀ ne mɛ hõ wiri kire pepe ngwĩye hõ, Ni na kìnìyi mɛ sɛmɛbɛ da ye kasokyɛbɛ kɔ nyane ti ne zĩ hõ. ²⁴ Ngwõ pepe na, mɛ ha ne yɛrɛ ni dyati fui ga. A tɛ wɔkara a ha fa ga ne mɛ hõ ne sebɛne na tongo dopaga kɔ nihõdyaro nemɛ hõ na bara dopaga mɛ, mɛ ngwĩ gũ Matigi Yesu ta hõ Wuro ta nema na Bɛrɛda Fɔre yera. ²⁵ Ma do fɔno ka pepe woro hõ, hõ Wuro ta fangamabe na da yera ka ma. Mɛ tɔ̀ da ka ha na ne za titiri ga. ²⁶ Ngwõ yena mɛ a yera na kinibɛ ka ma sɔma da: Ne ka na bo hõ fire, ngwõ ha mya da ga. ²⁷ Ma Wuro dungo na da pepe yera ka ma, ma ha fui dõ ka na ga. ²⁸ Ka ka yɛrɛ kɔrɔse. Ka gwarekuru kɔrɔse mɛ, Ni na kmiyi mane ka ta ye na kɔrɔsesɔma na. Ka ka kakiri to Wuro ta eglise na, a ngwĩ tɛrɛ kɔ ye yɛrɛ Nonanimisĩ tõ nemɛ a siri sanga ma. ²⁹ Mɛ tɔ̀ da ne ya wɛ timi, sɔma na baye ngwĩye ngwõ sa zare na baye ta, ngwõwɔ na kwɔ ka woro hõ, hõ bɛrɛ gware ma. ³⁰ Sɔma bɔ na tuma ka woro hõ mɛ hõ kala na kɛ̃gɛlɛyi yera ngwõfatɔ ye hõ sɔma berebɛ ne ta yeye na. ³¹ Ka wɔ ka nyono na hõ ka kakiri to a na da dɔgɔ saa kɔrɔ hõ mɛ nyenazyo na woroyi mɛ ha mane ka pepe tala tala ta ladibe do dira ga, wuru hõ kwe sĩ hõ ma. ³² Mɛ ka kalofa Wuro ma basyɛ kɔ a ta nema na bɛrɛda ma. Sebɛbe ti a ta hõ ka sabati hõ nii pere ka ma a ta fere fɔre na, a ngwĩye tetɛrɛ ne tege ne ta ya sɔma kɔrɔ na. ³³ Mɛ ha miri sõ si ta gwana kɔ a ta sanu kɔ a ta zogo na ga. ³⁴ Ka yɛrɛ ngwõ tɔ̀ da mɛ ne yɛrɛ kɔ na tikwere mako fɔro kɔ ne yɛrɛ soro hõ bara nemɛ. ³⁵ Mɛ tɛno dɔrɔ ka ma da pepe na da ke daga bara ta hõ fangadãe dyema hõ ke kakiri to Matigi Yesu ta bɛrɛda na da: Duba ti perebe na hõ yaloyi gũbe ma. ³⁶ Ngwona bɛrɛda yera wɛ timi ma Pauli ta, ye pepe kwe zi yolingo ye fugolo ma hõ Wuro mɛ. ³⁷ Ye pepe mɔgɔ ya filɛ Pauli hõ, hõ na do liyɔ hõ yadya yera a ma. ³⁸ A mane da ye ma ye ha na ye za titiri ga. Ngwõ yena ye ni na mane bã. Ngwõ timi ye na yee ya kɔ le fɔ koro do ma.

¹ Mɛ̀ dɛ̀gɛ̀ wɛ timi ma ye na, mɛ̀ kwɔ koro hõ, hõ tele ya Kos. Ngwona ngwinisĩ mɛ̀ wiri Rode. Mɛ̀ tuma ngwɛ̃ hõ ya Patara. ² Mɛ̀ koro bo za ngwɛ̃, ngwõ ne na zu kwire hõ ya Fenisi, mɛ̀ kwɔ ngwõ hõ, hõ ya. ³ Mɛ̀ Sipire za ngwĩ sanga ma, mɛ̀ na to mɛ̀ ninanga ma hõ ya nyengezu ngwõ̀ ma hõ ya Siri gana hõ, hõ ya taa Tire kuru hõ kamasɔrɔ koro kɔrɔ hõ bye mane na wɛ ngwɛ̃. ⁴ Mɛ̀ kalanɔmane za hõ nyi kopɔra ta ngwɛ̃. Ngwõwɔ da Pauli ma Ni na kimyi barika hõ, ya ka ya Zerusalem ga. ⁵ Ngwona nyi kopɔra tɛ wɛ timi ma mɛ̀ ta kɔ lɔ, mɛ̀ sogo bi hõ ya. Ye pepe kɔ ya yàra kɔ ye nɔmane mɛ̀ yee ya mɛ̀ tege kuru timi. Mɛ̀ zi yolingo nyengezu do ma hõ Wuro mɛ. ⁶ Ke yadya yera nemɛ ma ngwĩ sanga ma, mɛ̀ kwɔ koro hõ, yewɔ ye bere bige. ⁷ Mɛ̀ tuma Tire hõ wiri Tolemis, ngwɛ̃ myà nyengezu ngwõ̀ ma yuru wɛ. Mɛ̀ bire syenɔmane na ngwɛ̃ hõ sinala ta ye birɛ. ⁸ Ngwona ngwinisĩ mɛ̀ sa ngwɛ̃ hõ ya Sezare. Mɛ̀ kwɔ wadyulitɛta Filipe ta kõ hõ, hõ vɛ ngwõ ta. Ngwõ mane ngwona sɔma kopɔra na bo, ye mane ngwĩye dɛ̀gɛ̀ Zerusalem. ⁹ Nemɛdala sɔma naa mane ti a ta, ye ha mane nyo dɛ̃ ga. Ye mane dɔre da za Wuro ta ne yera. ¹⁰ Mɛ̀ mane nyi damane ta ngwɛ̃, puruta bo na hõ tuma Zude, a togo ti Agabus. ¹¹ A na mɛ̀ gũ ngwɛ̃. A Pauli ta komasulu bi hõ ye yɛrɛ kãe kɔ ye sera pɛrɛ hõ da: Ni na kìnìyi da ye Yahutu kɔma na bo komasulute pɛrɛ yee Zerusalem na ka si sɔma sera hõ. ¹² Mɛ̀ ngwona bɛrɛda mɔ ngwĩ sanga ma, mɛ̀ kɔ ngwɛ̃ sɔma Pauli mɛ da a ka ya Zerusalem ga. ¹³ Nka a mɛ̀ dyabi da: Ngwonona ka mɔgɔ ne ne ni na bã? Mɛ sɔbɛ tege na pɛrɛbe kɔ na siri na Zerusalem Matigi Yesu togo yena. ¹⁴ A ma dyã myà bɛrɛda mɔ ga, mɛ̀ bɛrɛda do dira hõ da: Matigi dungo hõ tɛ. ¹⁵ Nyi damane fɔno wɛ timi ma, mɛ̀ myà fere tetɛrɛ hõ ya Zerusalem. ¹⁶ Sezare kalanɔmane na bɔ ya kɔ mɛ̀ nemɛ hõ fɔno ya vɛ kɔ mɛ̀ nemɛ nomo bo ta kõ hõ. A Sipire gana hõ sõ ngwĩ togo ti Manesõ. A mane pya ne lanabe sõ fɔ syedɛrɛ da hõ. ¹⁷ Mɛ̀ ya wiri Zerusalem ngwĩ sanga ma, syenɔmane mɛ̀ fɔga kɔ nihõdyaro nemɛ. ¹⁸ Ngwona ngwinisĩ Pauli kwe ya kɔ mɛ̀ nemɛ Yakuba birɛ. Eglise somɔlala pepe mane ye nemɛ kwe ngwɛ̃. ¹⁹ Pauli bire ye na. Ngwõ timi Wuro da ngwĩye ta si sɔma woro hõ a ta bara barika hõ, a ngwõ pepe tala tala yera ye ma. ²⁰ Ye ngwõ mɔ ngwĩ sanga ma ye Wuro yirebɛ. Ngwõ timi ye da Pauli ma: Mɛ̀ syeno, be a za da Yahutu kɔma ngwĩye ngwõ lanabɛbe ta, ngwõwɔ zamɛ na nyaaye fɔrona. Ye kɔrɔ pepe ti tõ da hõ. ²¹ Ye bya da yera ye ma da ye Yahutuye ngwĩye ti si sɔma woro hõ, ye be ngwõwɔ kala ye Musa ta tõ dira. Ye ye ka ye nɔmane yɛro ga, ye ye ka dɔ Yahutuye ta lãda ma ga. ²² Ngwono na tɛ hã? Ye na mɔ da bi na, siga ti ye hõ ga. Ye da Pauli ma: ²³ Mɛ̀ hõ ngwĩ fa yera be ma, be ngwõ ta. Sini sɔma naa ti mɛ̀ ta bɛ, ye ye do sɔ Wuro ma. ²⁴ Bi kɔ ngwõwɔ hõ kwe ya hõ ka kinibɛ. Be gwana wa hõ ne ngwã vɔro. Yee nemɛ, sɔma pepe na tɔ̀ da ye bɛrɛda ngwĩye mɔ bya piri ma na, ye ngwõwɔ nĩyono. Ye bi yɛrɛ ya Musa ta tõ na sogo ma. ²⁵ Si sɔma na lanabe sɔma ta piri ma na kwane, ke kyà latege da sɛbɛ ne fane ngwõwɔ ma da ye ka bɔ da ta ga: Ye ye yɛrɛ kɔrɔse, ye ka fyã kãe kika nɔma ga, ngwõ kɔ tõ kɔ fa mogo na fɛnɛnɛyi na kika. Ye daga ye yɛrɛ kɔrɔse kakalatɛbe na. ²⁶ Ngwona sanga ma Pauli ya kɔ ngwona sini sɔma naa nemɛ. Ngwona ngwinisĩ a kinibɛbe na nemɛkwe ta kɔ lɔ. Ngwõ timi a kwɔ Wuro kõ yuu hõ, hõ kinibɛbe na kɔ ta dopaga da yera ye ma. Ye salaka na wɛ ngwõ pepe tala tala ta da na ngwona kɔ ma. ²⁷ Ngwona nyi kopɔra mane kya dopaga ngwĩ sanga ma, Asi gana hõ Yahutuye mane Pauli za Wuro kõ yuu hõ. Ye zamɛ sabɛ a na na fɔga. ²⁸ Ye songo da: Israyɛli kɔma, ka na ke dyema. Nomo ngwĩ ngwõ wadyuli ta bi pepe hõ ne bɛrɛda yaga yera Israyɛli kɔma pepe ta da na kɔ Musa ta tõ ta da na kɔ Wuro kõ yuu ta da na, basyɛ mɛ, a kwɔ kɔ si sɔma zɛ bɔ nemɛ Wuro kõ yuu hõ, hõ ngwona bi hõ na kiniyi dõõbɛ. ²⁹ Ye mane Efese sõ Tirofime za kɔ Pauli nemɛ kuru kɔrɔ hõ. Ngwõ yena ye ngwõ yera. Ye mane dyati da Pauli mane ngwõ kwɔbɛ Wuro kõ yuu kɔrɔ hõ. ³⁰ Ngwona songo kõ mane wiri kuru na bi pepetai hõ. Sɔma ne tongo ne sa a kyegɛ pepe ma. Ye ya kwe Pauli ma na suru na sabɛ Wuro kõ yuu kɔrɔ hõ. Ngwona no tala hõ ye ngwõ na korore pepe gwolo. ³¹ Ye mane kya Pauli yɛ. Hõ ne to ngwõ hõ, sorodase ta kapitɛni ngwona da mɔ, ye Zerusalem kɔma pepe yiri kwe. ³² Ngwona no tala hõ a sorodase kɔ sorodase ngwonakɔma fɔga ye kwe tongo ya zamɛ birɛ. Ye ngwona kapitɛni kɔ sorodase za ngwĩ sanga ma, ye sa Pauli vuro na. ³³ Kapitɛni ye dɔbɛ Pauli na na fɔga hõ da ye ya pɛrɛ kɔ balazɔgɔre pɔla nemɛ. Ngwõ timi a ne tɔga ya kɔ mɔ? Ye ngwono a ngwõ ta? ³⁴ Zamɛ pepe songo ne bɛri fĩyã. Kapitɛni ma sebɛ bɛrɛda na kiniye gũ ye ta songoro sera hõ ga. Ngwõ yena a da ye ya kɔ Pauli nemɛ sorodase ta kõ gwaga hõ. ³⁵ Pauli wiri digedige bala ma ngwĩ sanga ma, sorodase na bi, zamɛ ta gwãgwana nɔma yɔ yena. ³⁶ Kamasɔrɔ sɔma pepe mane dɔ a ma ne songo ne da. Ka a yɛ. ³⁷ Ye mane tyata Pauli kwɔbɛ sorodase ta kõ gwaga hõ ngwĩ sanga ma, a da kapitɛni ma: Ma sebɛne bɛrɛda bɔ yera be ma ra? Ngwõ da a ma: Be Girɛki da mɔ ra? ³⁸ Misira sõ ngwĩ muruti hõ ya kibe hõ kɔ sɔma sana naa nemɛ, ngwõ bi ra? ³⁹ Pauli na dyabi da: Mɛ Yahutu sõ. Mɛ tuma Tarase kuru hõ, Silisi gana hõ. Mɛ kire gwaga hõ dugule. Mɛ be mɛ be to ma bɛri sɔma ta. ⁴⁰ Ngwona kapitɛni dyã. Pauli tuma taa digedige bala ma hõ ye soro ta sɔma ma. A ngwõ ta ngwĩ sanga ma, sɔma pepe tɛ gurũ. Pauli bɛri ye ta Heburu da hõ.

¹ Mɛ syenɔmane kɔ ne tamɛ, ma na ngwĩ fa yera ka ma hõ ne yɛrɛ na syɛrɛbe ta, ka ngwõ mɔ basyɛ. ² Ye mɔ a ne bɛri ye ta Heburu da hõ ngwĩ sanga ma, ye fa kwe ya mɔbe ma. Pauli da: ³ Mɛ Yahutu sõ. Ma vɔrɔ Tarase kuru hõ, Silisi gana hõ, nka mɛ pɔra bo kuru hõ bɛ. Gamaliyel mane mɛ kala kɔ ke bemae ta tõ na dopagayi yɛrɛ nemɛ. Mɛ nyono mane pɛnɛ Wuro ta da hõ wɔkara ki yɛrɛ ti ngwɛne sɔma. ⁴ Mɛ mane Matigi ta sogo ma ya sɔma nyane fɔ ya wiri siri ma. Mɛ mane sini kɔ yàra fɔga ne ka kaso hõ. ⁵ Salakawɛre ngwonakɔma kɔ zamɛ na somɔlala tɛ mɛ syɛrɛ na ngwona da na. Mɛ mane sɛbɛ bo gũ ye ta ngwõfatɔ ma ngwõ pere syenɔmane na Yahutuye ma Damasi. Mɛ mane ya yɛ ngwõfatɔ ma lanabe sɔma fɔga ya kɔ lɔ Zerusalem hõ ne nyane. ⁶ Mɛ mane ti sogo ma ne ya Damasi kuru hõ. Mɛ vetira ngwĩ sanga ma ngwõ da ye tɛ midi mane wiri. Ngwona no tala hõ kini na yireyi tuma wuro hõ, hõ kini mɛ zamilelu. ⁷ Mɛ bɛrɛ lɔ ma hõ bɛri kõ bo mɔ. A da mɛ ma, ye: Sauli, Sauli, ngwonona be ne nyane? ⁸ Mɛ na tɔga da: A bi kɔ mɔ, Matigi? A da mɛ ma: A mɛ Nazarɛti sõ Yesu, be tine ngwĩ nyane. ⁹ Mɛ yakwere mane ngwona kini za nka ngwĩ bɛri mɛ ta, ye ma ngwõ bɛri kõ mɔ ga. ¹⁰ Mɛ na tɔga da: Ngwono ma daga ngwõ ta? Matigi da mɛ ma: Tuma be ya Damasi. Wuro da be daga ngwĩ fa ta, ye na ngwõ yera be ma. ¹¹ Mɛ nyena mane fo ngwona kini na yireyi ta. Ngwõ yena mɛ yakwere ne soro fɔga hõ ya kɔ ne nemɛ Damasi. ¹² Nomo bo mane ti ngwɛ̃, a togo ti Ananiyas. A mane kwã Wuro na ne tõ na sogo ya. Damasi kuru hõ Yahutuye pepe mana toga fɔro wiri. ¹³ Ngwõ na mɛ birɛ hõ na taa ne do na hõ da ne ma: Mɛ syeno Sauli, be nyena hõ kibɛɛ. Ngwona no tala hõ mɛ nyena mane kibɛɛ, mɛ na za. ¹⁴ A da: Ke bemae ta Wuro be dɛ̀gɛ̀ ngwõfatɔ be a dungo tɔ̀ hõ ngwona Teleyi sonala legelege za hõ bɛrɛda bɔ mɔ a yɛrɛ do hõ. ¹⁵ Be da ngwĩye za ne mɔ, be na tɛ a syere na ngwõwɔ na sɔma pepe nyono na. ¹⁶ Ngwono be tine ngwõ yɛ̀rɛ̀ basyɛ yɛ? Tuma batize hõ Matigi togo wiri hõ bya kakye mi ne wa be ma. ¹⁷ Mɛ bere na wɛ timi Zerusalem, hõ mɛ to Wuro mɛbe hõ Wuro kõ yuu hõ, mɛ dɔre da za. ¹⁸ Mɛ mane Matigi za. A da mɛ ma: Nyɛ be ma be sa Zerusalem salesale kamasɔrɔ be ngwĩ fa yera mya da na, kire kɔma ha na dyã ngwõ mɔ be ta ga. ¹⁹ Mɛ na dyabi da: Matigi, ye yɛrɛ ngwõ tɔ̀ da mɛ mane pya lanabe sɔma ka kaso hõ, hõ ne vuro Yahutuye ta Wuro yirebɛ kwã hõ. ²⁰ Ye bya syere Etienne yɛ ngwĩ kɔ ma, mɛ mane ti ngwɛ̃, mɛ mane dyã ngwõ na mɛ. Mɛ mane kwa a na yɛ sɔma ta zogore ma. ²¹ Ngwona sanga ma Matigi da ye ma ya kamasɔrɔ ye na ne fane dɛrɛ do hõ si sɔma birɛ. ²² Zamɛ Pauli ta bɛrɛda mɔ fa ya wiri ngwona bɛrɛda ma. Ngwona sanga ma ye songo da: Bo nomo daga wɛ yɛ. A daga yɛ. A ha daga wɔ yɛ ga. ²³ Ye songo hõ ya zogore wa ne sɛ̃sɛnɛ hõ yɛgɛ turu ne dira wuro hõ. ²⁴ Kapitɛni da ye Pauli kwɔbɛ sorodase ta kõ gwaga hõ na võ fɔrona kɔ gwelekame nemɛ fɔ a hõ bɛri ngwõfatɔ a hõ zamɛ ta songorongwõ̀ tɔ̀ ye songo a ma ngwĩ fa na. ²⁵ Nka ye mana pɛrɛ võ na ngwĩ sanga ma, sorodase ngwonate mane tye. Pauli na tɔga da ye daga hõ Rome hõ dugule võ kɔ gwelekame nemɛ kasɔrɔ ye ma kiti sɔ a ma dɛ̃ ga ra? ²⁶ Sorodase ngwonate ngwõ mɔ ngwĩ sanga ma, a ya kapitɛni birɛ hõ da a ma: Ngwono be na ngwõ ta yee? Bo nomo Rome hõ dugule. ²⁷ Ngwona kapitɛni na hõ Pauli tɔga da: Yera ne ma, bi Rome hõ dugule ra? Pauli na dyabi da: Õõ. ²⁸ Kapitɛni na dyabi da: Mɛ ngwona dugulebe tɛrɛ kɔ gwana nyaa nemɛ hõ zɛ tɛ Rome hõ dugule na. Pauli na dyabi da: Mɛ a gũ vɔrɔ do hõ. ²⁹ Ngwona no tala hõ ngwĩye mane na võ fɔ a hõ ya da yera ye ma, ngwõwɔ ye sabɛ a na. Kapitɛni ngwõ nyono tɔ̀ ngwĩ sanga ma, ye Pauli Rome hõ dugule, a yɛrɛ mane kwã kamasɔrɔ a mana pɛrɛ. ³⁰ Kapitɛni mane tyata Pauli yagabɛngwõ̀ tɔ̀ ne kìnì Yahutuye ta. Ngwona ngwinisĩ a na na pɛrɛ balazɔgɔre sele hõ yera salakawɛre ngwonakɔma ma kɔ ye ta kitisɔre na zamɛ ma, ye daga kwe. Ngwona sanga ma a zi kɔ Pauli nemɛ na taabɛ ye woro hõ.

¹ Pauli ye nyena baga kitisɔre na zamɛ hõ, hõ da: Mɛ kɔrɔ na fɔroyi yena mɛ wɔ Wuro zĩ hõ fɔ na wiri sɔma ma. ² Salakawɛre ngwonate Ananiyas da Pauli kyegɛ ma taa sɔma ma ye ya vuro a do ma. ³ Ngwona sanga ma Pauli da a ma: Kulu na furobɛyi, Wuro na be vuro. Bi tanga bɛ hõ ne mya kiti sɔ na kanya kɔ tõ nemɛ, bi yɛrɛ ne tõ yaga, be da ye mɛ vuro. ⁴ A kyegɛ ma kɔma da a ma: Be tine Wuro ta salakawɛre ngwonate vini rɛ. ⁵ Pauli da: Syenɔmane, mɛ ha mane tɔ̀ da a salakawɛre ngwonate ga kamasɔrɔ a sɛbɛɛ Wuro ta bɛrɛda hõ da ye: Be ka bɛrɛda yaga yera bya sɔma ngwonate ta da na ga. ⁶ auli a za da zamɛ sɔdini, bɔ ne Sadusyɛ̃ kɔma, bɔ ne Farisyɛ̃ kɔma. Ngwõ yena a bɛri yire kitisɔre na zamɛ woro hõ, hõ da: Syenɔmane, mɛ Farisyɛ̃ sõ no, mɛ yɛrɛ Farisyɛ̃ mɛ. Mɛ zigi ti a ma da sara na ngwini. Ngwona zigi yena ye kiti sɔ ne ma. ⁷ Ngwõ yera wɛ timi a ta, dakwiyɛro tuma Farisyɛ̃ kɔma kɔ Sadusyɛ̃ kɔma yɔ, zamɛ dɛ̀gɛ̀. ⁸ Sadusyɛ̃ kɔma da ye sara ha na ngwini ga, ye ni si ha tye ga, mɛlɛkɛ si tye mɛ ga. Farisyɛ̃ kɔma la ngwona da pepe na. ⁹ A tɛ songoro na yireyi na. Farisyɛ̃ kɔma ta tõ na kalamogi na bɔ tuma hõ dakwiyɛro na yireyi ta da: Mɛ̀ ha dayaga si za bo nomo hõ ga. Dora zini bo wala mɛlɛkɛ bo ngwõ bɛri a ta. ¹⁰ Dakwiyɛro mane yire fɔrona. Kapitɛni mane kwã da Pauli na sɔsɔ ye ta. A da sorodase ya a dɛ̃ ye ta hõ ya kɔ le sorodase ta kõ gwaga hõ. ¹¹ Ngwona ngwinisĩ wuru hõ Matigi ye yɛrɛ dɔrɔ Pauli ma hõ da a ma: Be woro sige. Be mɛ na syɛrɛbe ta Zerusalem ngwɛne, be daga ngwõ nemɛ na syɛrɛbe ta Rome kuru hõ mɛ. ¹² Ngwona ngwinisĩ Yahutuye du pɛrɛ hõ ye sũ hõ ye yɛrɛ voda, ye ye ha na zõ ga, ye ha na mɛnɛ ga fɔ ye hõ Pauli yɛ. ¹³ Ngwona du pɛrɛ sɔma mane fã sɔma kepɔla ma. ¹⁴ Ye ya salakawɛre ngwonakɔma kɔ somɔlala birɛ hõ da ye ma: Mɛ̀ mɛ̀ sũ hõ mɛ̀ yɛrɛ voda da mɛ̀ ha na zõ ga fɔ mɛ̀ hõ Pauli gũ na yɛ. ¹⁵ Basyɛ ki kɔ kitisɔre na zamɛ hõ ya yera kapitɛni ma ya na kɔ Pauli nemɛ ka birɛ. Ka tɛ wɔkara ka tyata na ta da tɔ̀ ne kini. Mɛ̀ kwane sɔbɛ tege na yɛ sane a hõ wiri bɛ. ¹⁶ Pauli ligeno ngwona du pɛrɛ da tɔ̀. A ya sorodase ta kõ gwaga hõ, hõ ne yera Pauli ma. ¹⁷ Pauli sorodase ngwonate bo wiri hõ da a ma ya ya kɔ ngwona yaliyo nemɛ kapitɛni birɛ. Ya tyata da bo yera a ma. ¹⁸ Sorodase ngwonate ya kɔ le kapitɛni birɛ hõ da a ma: Kaso no Pauli mɛ mɛ ye ma na kɔ bo yaliyo nemɛ be birɛ. Ye bɛrɛda ti a ta ne yera be ma. ¹⁹ Kapitɛni na soro fɔga hõ ye sabɛ kɔ le kyegɛ ma ye sana hõ na tɔga da ye ngwono a tyata ngwõ yera ye ma? ²⁰ Y aliyo da a ma: Yahutuye bɛ̃ a ma da ye na Pauli kya be ta hõ ya kɔ le kitisɔre na zamɛ hõ, hõ tɛ wɔkara ye tyata na ta da tɔ̀ ne kini. ²¹ Kada be mɔ ye ta ga kamasɔrɔ ngwĩye ngwõ da ye na a yɛ̀rɛ̀ hõ bɛrɛ a ma, ngwõwɔ fã sɔma kepɔla ma. Ye du pɛrɛ a na hõ ye sũ hõ ye yɛrɛ voda, ye ha na zõ ga, ye ha na zo mɛnɛ ga fɔ ye hõ Pauli gũ na yɛ. Ye sɔbɛ tege basye, ye tine bya bɛrɛda yɛ̀rɛ̀ dama. ²² Kapitɛni da ngwona yaliyo ma ya kada ye yera sõ si ma ye yi ngwona da yera ye ma ga. Ngwõ timi a na to a ya. ²³ Ngwõ timi a sorodase ngwonakɔma sɔma pɔla wiri hõ da ye ma: Ka sorodase zopɔla kwe, ngwõ kɔ syorikɔma kesaafũ kɔ sɛlɛkɔma zopɔla. Ka ye sɔbɛ hõ kanya kɔ nevere sanga nemɛ wuru hõ, ka ya kɔ le Sezare. ²⁴ A da ye ma ye bɔ syori tetɛrɛ Pauli ma mɛ ngwõfatɔ ye ya kɔ le syara na Prefet Felikisi birɛ. ²⁵ A sɛbɛ bo sɛbɛ da: ²⁶ Kilode Lisiyasi bo sɛbɛ fane prefet fɔro Felikisi ma. Wuro syara ta be ma. ²⁷ Yahutuye mane bo nomo fɔga, ye mane tyata na yɛ. Mɛ kɔ sorodase ya a tɔ ye ta kamasɔrɔ mɛ mɔ ye da ya Rome hõ dugule. ²⁸ Mɛ mane tyata na yagabɛngwõ tɔ̀ Yahutuye ta. Ngwõ yena mɛ ya kɔ le kitisɔre na zamɛ woro hõ. ²⁹ Nka mɛ a za da a yagabɛngwõ ye ta, ngwõ ye ta tõ da bo. Nka dayaga ngwĩ ngwõ daga kɔ siri nemɛ wala kɔ kaso kyɛbe nemɛ, a ha ngwona da si ta ga. ³⁰ Ye yera mɛ ma ye Yahutuye ye du pɛrɛ a na, ye ye na bɛrɛ a ma. Ngwõ tɛ mɛ hõ na fane be ma ngwona no hõ yɛ, hõ yera a na yagabɛre ma da ye ya bi birɛ hõ na yagabɛ bi yɛrɛ nyono na. Ke ti bo kɔ. ³¹ Sorodase ya kɔ Pauli nemɛ wuru hõ fɔ Ãtipatiris, wɔkara ye mane fane yera ye ma ngwɛne. ³² Ngwona ngwinisĩ sorodase ngwĩye mane ya ye kãe ma, ngwõwɔ ye bere ya sorodase ta kõ gwaga hõ, hõ syorikɔma to ngwɛ̃ hõ ya kɔ Pauli nemɛ. ³³ Syorikɔma ya wiri Sezare ngwĩ sanga ma, ye ngwona sɛbɛ pere prefet ma hõ Pauli pera ma. ³⁴ Prefet ngwona sɛbɛ kala ngwĩ sanga ma, a Pauli tɔga a tuma do na. A mɔ ngwĩ sanga ma da a tuma Silisi gana hõ, a da a ma: ³⁵ Be na yagabɛre hõ na ngwĩ sanga ma, ma na be tɔgara. Ngwõ timi a da ye Pauli ka Herode ta kõ hõ.

¹ Nyi koo fɔno wɛ timi ma salakawɛre ngwonate Ananiyas kɔ somɔlala na kɔ sõ bo nemɛ Sezare, a togo ti Teretule. Ye ngwõ ka ye yɔ kɔ prefet nemɛ, ya Pauli yagabɛ a ta. ² Ye Pauli wiri. Teretule dofɔga na yagabɛ da: Felikisi fɔro, ke syara na yireyi gũ be barika hõ. Bya da tetɛrɛbe yena be dafɔre nyaa ta bo gana hõ bɛ. ³ Ngwõ dya mɛ̀ pepe ma. Mɛ̀ barika yera be ma sanga pepe ma bi pepe hõ ngwona da pepe yena. ⁴ Nka mɛ ha tyata be nyamabɛ kɔ bɛrɛda nemɛ ga. Ngwõ yena mɛ be mɛ da be dyã bya dafɔretɛbe yena hõ bɛrɛda zɔgɔ mɔ mɛ̀ ta. ⁵ Mɛ̀ bo nomo gũ, a tɛ wɔkara panga yaga ke woro hõ. A Yahutuye murutibɛ diniya bi pepetai hõ. A Nazarɛti kɔma ta nemɛkwere ngwonate. ⁶ A mane tyata Wuro kõ yuu dõõbɛ. Ngwõ yena mɛ̀ a fɔga. ⁷ [Mɛ̀ mane tyata kiti sɔ a ma hõ kanya kɔ myà tõ nemɛ. Nka kapitɛni Lisiyasi na fɔga na wa mɛ̀ sera hõ kɔ fanga nemɛ. ⁸ Ngwõ timi Lisiyasi yera a na yagabɛre ma ye ye ya bi birɛ.] Ne bi yɛrɛ hõ na tɔgara mɛ̀ a yagabɛ da ngwĩye na, bi sebɛne ngwona tĩyã mɔ a do hõ. ⁹ Yahutuye dyã ngwona sõ ta yagabɛ bɛrɛda ma, ye yee ngwona da mane tɛ. ¹⁰ Prefet ye ngwõ koli Pauli ma ya bɛri. Pauli da: Mɛ tɔ̀ da bi bo si ta kitisɔta fɔ dɔgɔ nyaa kɔrɔ hõ. Ngwõ yena mɛ sebɛne bɛri kɔ worasigi nemɛ hõ ne yɛrɛ na syɛrɛbe ta. ¹¹ Be sebɛne ngwõ tɔ̀, mɛ ya Zerusalem ngwõfatɔ ma Wuro yirebɛ, ngwõ ha yalo nyi fumɔla ma dɛ̃ ga. ¹² Ye ha mɛ kɔ sõ si gũ dakwiyɛro hõ Wuro kõ yuu kɔrɔ hõ wala yirebɛ kõ bo hõ wala kuru kɔrɔ hõ mɛ ga. ¹³ Ye mɛ yagabɛ da ngwĩye na, ye ha sebɛne ngwõwɔ kìnìbɛ be ma basyɛ mɛ ga. ¹⁴ Ngwõ pepe na, mɛ taa be zĩ hõ bɛ hõ yera be ma da ye sogo ngwĩ wiri nĩyõ sogo, mɛ ngwona sogo ya hõ bara ta mɛ̀ bemae ta Wuro ma. Bɛrɛda pepe ngwĩye sɛbɛɛ tõ hõ kɔ purusɔma ta bɛrɛda hõ, mɛ la ngwõwɔ pepe na. ¹⁵ Mɛ zigi ti Wuro ma wɔkara yewɔ zigi ti a ma ngwɛne mɛ da sɔma pepe na ngwini, sɔma tele kɔ telebariyasɔma pepe. ¹⁶ Ngwõ yena mɛ ne nyanga sanga pepe ma ngwõfatɔ mɛ kɔrɔ na fɔroyi gũ Wuro nyono na kɔ sɔma nyono na mɛ. ¹⁷ Dɔgɔ nyaa fɔno wɛ basyɛ mɛ ha mane ya Zerusalem ga, nka mɛ na kɔ dyemabe na gwana nemɛ hõ ne pere na si ma. Ma na hõ salaka wa Wuro ma mɛ. ¹⁸ Yahutuye mane ne za Wuro kõ yuu hõ ngwĩ sanga ma, ma mane ti na kinibɛbe na da hõ. Zamɛ ha mane tye ga, songoro ha mane tye mɛ ga. ¹⁹ Nka Yahutu kɔma na bɔ ngwĩye ngwõ tuma Asi gana hõ, ngwõwɔ mane ti ngwɛ̃. Ngwõwɔ ngwõ mane daga na mɛ yagabɛ be ta, ne da bɔ hõ mane ti ye yɔ kɔ mɛ nemɛ. ²⁰ Bɔ sɔma ngwĩye ngwõ ti bɛ, ngwõwɔ dayaga ngwĩye za mɛ hõ, hõ mɛ to ye ta kitisɔre na zamɛ woro hõ, yewɔ daga ngwõ yera be nyono na. ²¹ Fɔno bo da dama ga, mɛ mane bɛri kɔ kõ na yireyi nemɛ ye woro hõ, hõ da: Ma la sara ngwinibe na. Ngwõ tɛ ye hõ ne kiti sɔ ne ma ka zĩ hõ bɛ sɔma. ²² Felikisi mane kala lanabe sogo ta da na fɔrona. A da ye ma: Ka yɛ̀rɛ̀ dɛ̃. Kapitɛni Lisiyasi hõ na ngwĩ sanga ma, ma na kya kiti sɔ. ²³ A yera sorodase ngwonate ma ya Pauli kɔrɔse. Ye nka ya to a syara zɔgɔ gũ, ya ka a màre bare hõ na mako fɔro ga. ²⁴ Nyi damane timi ma, Felikisi na, awe kɔ ya yà Durusye. Ngwõ mane Yahutu yà. A Pauli wiri na ta bɛrɛda mɔ Yesu Krista na lanabɛbe ta da na. ²⁵ Nka hõ Pauli to a ne bɛri telebe kɔ yɛrɛfɛgɛbe kɔ kiti na nayi ta da na, Felikisi kwã hõ da: Be sebɛne ya basyɛ. Ma hõ wakati gũ ngwĩ sanga ma, ma na be wiri yɛ. ²⁶ A zigi mane ti a ma mɛ da Pauli na gwana pere ye ma. Ngwõ yena a mana wiri sanga nyaa ma ne baro kyɛ ne kɔ le. ²⁷ Dɔgɔ pɔla fɔno wɛ timi ma, Porosiyus Fesitus mane tanga Felikisi na pilasi na. Felikisi mane tyata Yahutuye madyambe ta. Ngwõ yena a Pauli to kaso hõ.

¹ Fesitus wiri ngwona gana hõ. A nyi saaro kɔ ma a tuma Sezare hõ ya Zerusalem. ² Salakwɛre ngwonakɔma kɔ Yahutuye ngwonakɔma ya Pauli yagabɛ a ta ngwɛ̃. ³ Ye Fesitus mɛ da ya to Pauli na Zerusalem, kamasɔrɔ ye mane du pɛrɛ a na, ye na a yɛ sogo ma. ⁴ Nka Fesitus ne dyabi ye Pauli ti kaso hõ Sezare. Ye zɔgɔta awe yɛrɛ na ya ngwɛ̃. ⁵ A da mɛ: Ka ngwonakɔma daga ya kɔ ne nemɛ ngwɛ̃ ngwõfatɔ ya yagabɛ, ne zarake do hõ ne ti ngwona nomo na. ⁶ Fesitus ma yalo nyi korosõ wala nyi fũ ma ye birɛ ga. Ngwõ timi a ye bere ya Sezare. Ngwona ngwinisĩ a ya tanga kiti sɔ do hõ, hõ sõ fane ye Pauli na. ⁷ Pauli wiri ngwĩ sanga ma, Yahutuye ngwĩye tuma Zerusalem, ye na kori hõ dayaga na nyaaye dɛ a ma nka ye ha mane sebɛne ngwona da kinibe ga. ⁸ Nka Pauli mane ye yɛrɛ ta da kinibɛ da: Mɛ ha dayaga si ta Yahutuye ta tõ na kɔ Wuro kõ yuu na ga. Mɛ ha dayaga si ta Rome kɔma ta fangama gwaga na mɛ ga. ⁹ Nka Fesitus mane tyata Yahutu kɔma madyamabe ta. Ngwõ yena a Pauli tɔga da: Be tyata ya Zerusalem ngwõfatɔ bya kiti hõ sɔɔ mɛ nyono na ngwɛ̃ ra? ¹⁰ Pauli na dyabi da: Mɛ ti bɛ Rome kɔma ta fangama gwaga ta kiti sɔ do hõ. Mya kiti daga sɔɔ bɛ. Mɛ ha dayaga si ta Yahutuye na ga, bi yɛrɛ ngwõ tɔ̀. ¹¹ Ne mɛ hõ dayaga bɔ ta ngwĩ ngwõ daga kɔ siri nemɛ, mɛ ha maga yɛbe na ga, nka ye mɛ yagabɛ da ngwĩye na, ne ngwõwɔ pepe hõ ne nĩyono, sõ si ha sebɛne mɛ ka ye sera hõ ga. Mɛ ne yɛrɛ ta da to Rome kɔma ta fangama gwaga ma. ¹² Fesitus kɔ kitisɔre na zamɛ bɛri ye nemɛ ta. Ngwõ timi a da Pauli ma: Be bi yɛrɛ ta da to Rome kɔma ta fangama gwaga ma. Aiwa, be na ya fangama gwaga birɛ. ¹³ Nyi damane ngwõ timi fangama Agripa kɔ Berenise wiri Sezare, ye ya bire Fesitus na. ¹⁴ Ye nyi damane ta ngwɛ̃, ngwõ timi Fesitus Pauli ta da yera fangama ma hõ da: Felikisi nomo bo to kaso hõ bɛ. ¹⁵ Mɛ ya Zerusalem ngwĩ sanga ma, salakawɛre ngwonakɔma kɔ Yahutuye somɔlala na yagabɛ hõ mɛ mɛ ye mɛ a yɛ. ¹⁶ Mɛ ne dyabi da: Ngwõ ha Rome kɔma ta tɛno hõ sõ ka sera hõ ne awe kɔ ye na yagabɛsɔma ma kwe taa bi tala hõ ga. Ya yagabɛ da ngwĩye na, a ye yɛrɛ na syɛrɛbe ta ngwõwɔ na. ¹⁷ Ye na bɛ kɔ mɛ nemɛ, mɛ ma tege a sydɛrɛ ga. Ngwona ngwinisĩ mɛ tanga na kiti sɔ do hõ, mɛ da ngwona nomo na. ¹⁸ A na yagabɛre na nka mɛ mane da ngwĩye lanyini a ta da na, ye ma ngwõ na fa si yera a ta da na ga. ¹⁹ Nka awe kɔ lɔ mane ye nemɛ dakwiyɛ ye ta sogo ta da na kɔ nomo bo ta da na ngwĩ togo ti Yesu. Ngwõ siri nka Pauli da ya ye bere sugu yɛ. ²⁰ Mɛ ha mane ngwona da nɔma tɔ̀ ga. Ngwõ yena mɛ Pauli tɔga yala ne a hõ ne tyata ya Zerusalem hõ ya kiti sɔ ngwɛ̃ ngwona da na. ²¹ Nka Pauli da ye ye to kaso hõ, ye Rome kɔma ta fangama gwaga na ya kiti da nyonohõwa. Mɛ da ya kɔrɔse bɛ sane ma hõ na fane fangama gwaga ma. ²² Agripa da Fesitus ma: Mɛ yɛrɛ tyata ngwona nomo ta bɛrɛda mɔ mɛ. Fesitus na dyabi ya na ta bɛrɛda mɔ sɛ̃. ²³ Ngwona ngwinisĩ Agripa kɔ Berenisi na fangama tino na yireyi na. Yewɔ kɔ kapitɛni kɔ kuru kɔrɔ hõ sɔma yee na hõ kwɔ kiti sɔ do hõ. Fesitus sõ fane Pauli ta, ya na. ²⁴ Ngwona sanga ma Fesitus da: Fangama Agripa kɔ sɔma pepe ngwĩye ngwõ ti bɛ kɔ mɛ̀ nemɛ, ka nyono ti bo nomo na. Y ahutuye na zamɛ na mɛ birɛ Zerusalem hõ na ne birɛ bɛ mɛ, ye ne songo ne da ya ha daga sugu titiri ga. ²⁵ Nka mɛ na sege, a ma dayaga si ta ngwĩ ngwõ daga kɔ siri nemɛ ga. Ngwõ pepe na, a ya kiti to fangama gwaga ma Rome. Ngwõ yena mɛ da ma a to a ya ngwɛ̃. ²⁶ Da na kiniyi si ha ti mɛ ta hõ ne sɛbɛ ne fane fangama gwaga ma a ta da na ga. Ngwõ yena mɛ a wiri a na bɛ ka zĩ hõ, kɔ bi fangama Agripa zĩ hõ, ngwõfatɔ be hõ na tɔgara na wɛ ngwĩ sanga ma, ma sebɛne bɔ da gũ ne sɛbɛ. ²⁷ Hõ kasono to a ya ngwɛ̃, a yagabɛngwõ̀ mane tɔ̀ɔ̀ ga, mɛ dyati da ngwõ ha fɔro ga.

¹ Agripa da Pauli ma: Be sebɛne be yɛrɛ ta da yera. Aiwa, Pauli ye soro duro hõ ye yɛrɛ na syɛrɛbe ta da: ² Fangama Agripa, a dya ne ma fɔrona hõ ne yɛrɛ ua syɛrɛbe ta be zĩ hõ, Yahutuye ne yagabɛ da ngwĩye na. ³ Be Yahutuye ta lãda da kɔ ye ta dakwiyɛro tɔ̀ fɔrona. Ngwõ yena a dya mɛ ma hõ ne yɛrɛ ta da yera be ma. Mɛ be mɛ he somɔna hõ mɔ ne ta. ⁴ Yahutu kɔma pepe mɛ nɔma tɔ̀, ye mɛ pɔra na si sɔma woro hõ Zerusalem, na dofɔga ne na nimisalo sanga ma. ⁵ Ye mɛ tɔ̀ fɔ sydɛrɛ da hõ ne ye hõ dyã hõ ngwona syɛrɛbe ta. Ye tɔ̀ da mɛ dɔ Farisyɛ̃ da ma fɔrona, ngwõ myà sogo na nemɛkwebe na da sigeyi. ⁶ Ye kiti sɔ mɛ ma basyɛ kamasɔrɔ mɛ ne zigi dɛ Wuro ta datege na biyi ma ke bemae ma. ⁷ Myà kɔma si fumɔla bara ta Wuro ma fɔrona wuru hõ kwe sĩ hõ ma, ye zigi ti a ma da ye na ngwona datege gũ. E fangama, ngwona zigi yena Yahutuye mɛ yagabɛ. ⁸ A ti ki Yahutuye kɔrɔ hõ da sõ ha sebɛne la ye na da Wuro na sara ngwini ga ra? ⁹ Mɛ yɛrɛ mane dyati da ma daga Nazarɛti sõ Yesu togo kwini fɔrona tɛno pepe na. ¹⁰ Mɛ ngwõ ta Zerusalem. Salakawɛre ngwonakɔma mane fanga pere mɛ ma hõ lanabe sɔma nyaa fɔga ne ka kaso hõ. Ya latege da ye daga ne yɛ ngwĩ sanga ma, mɛ da ye daga ne yɛ mɛ. ¹¹ Mɛ mane nyane sanga nyaa ma Yahutuye ta Wuro yirebɛ kwã hõ. Mɛ mane tyata hõ fanga dɛ ye ma ye ye do bere ya lanabɛbe ta da na. Mɛ woro mane ba ye ta fɔrona fɔ mɛ mane dɔ ye ma hõ ne nyane gana zɛ ma kire hõ mɛ. ¹² Ngwõ yena mɛ mane ya Damasi. Salakawɛre ngwonakɔma ta fanga kɔ ye ta sɛbɛ mane ti mɛ soro hõ. ¹³ E fangama, midi sanga ma hõ mɛ to sogo ma, ma kini bo za ngwĩ tuma wuro hõ. Ngwona kini mane yireyi sĩ na kini ma. A kini mɛ kɔ ne yakwere zamilelu. ¹⁴ Mɛ̀ pepe wɛbɛrɛ lɔ ma. Mɛ bɛri kõ bo mɔ. A da mɛ ma Heburu da hõ, ye: Sauli, Sauli, ngwonona be ne nyane? A sige be ma hõ balo do na solisoliyi vare. ¹⁵ Mɛ tɔga da: A bi kɔ mɔ Matigi? Matigi da ya yi Yesu mɛ ngwĩ nyane. ¹⁶ Yema tuma taa wuro hõ. Ya ye dɔrɔ mɛ ma bɔ da yena. Ye ma da ngwĩye za kɔ a na ye dɔrɔ ne ma da ngwĩye na yɛ, ya ne ta ngwona da na baratɛta kɔ ye na syere na. ¹⁷ A da ye na mɛ bi ne wa Yahutuye sera hõ kɔ si sɔma sera hõ mɛ. Ya na ne fane ngwõwɔ ma. ¹⁸ A da: Ma be fane ngwõfatɔ be ye nyena kɔba hõ ne fɔga ne sabɛ tunungu hõ, hõ ne ka kini hõ. Ye hõ sa Setane ta fanga hõ, hõ na Wuro ma ngwõfatɔ ye hõ kakye yafabe gũ hõ tanga do gũ Wuro ta sɔma woro hõ. ¹⁹ Ngwõ yena, fangama Agripa, mɛ fia maga ngwona wuro hõ dɔre fere ma ga. ²⁰ Mɛ pya Damasi kɔma wadyu kɔ Zerusalem kɔma. Ngwõ timi ma bɛri Zude gana hõ kɔma kɔ si sɔma ta, da ye ye kɔrɔ bere ya kakye na hõ bere na Wuro ma hõ tɛda bɔ ta ngwĩye ngwõ zugoberebe ta da dɔrɔ. ²¹ Ngwõ yena Yahutuye mɛ fɔga fanga na Wuro kõ yuu hõ ne tyata mɛ yɛ. ²² Nka Wuro ta dyemabe yena mɛ wɔ yɛ fɔ na wiri sɔma ma. Mɛ ne yɛrɛ na syɛrɛbe ta sɔma silala kɔ sɔma yee ma. Mɛ ha fui si yera hõ yaloyi purusɔma kɔ Musa ta da na yeraye ma ga. ²³ Ye Masiya na nyane, yawe na pya ngwini sa sara woro hõ. Ya na kisibe na kini ta da yera myà si kɔ si sɔma zɛ ma. ²⁴ Hõ Pauli to a ne ye yɛrɛ na syɛrɛbe ta, Fesitus songo kɔ kõ na yireyi nemɛ da: Be kakaba Pauli. Bya kala na yireyi be kakababɛ. ²⁵ Pauli na dyabi da: Fesitus fɔro, mɛ ha kakaba ga. Mɛ tĩyã na bɛrɛda kɔ kakirikɔmabe na bɛrɛda yera. ²⁶ Fangama Agripa ngwona da tɔ̀. Ngwõ yena mɛ bɛri a zĩ hõ kɔ worasigi nemɛ. Mɛ la a na da ngwona da si ha tɛ tunungu hõ ga. ²⁷ Fangama Agripa, be la purusɔma ta bɛrɛda na ra? Mɛ tɔ̀ da be la ye na. ²⁸ Agripa da Pauli ma: Zɔgɔta be na mɛ berebɛ ne ta Kretiyɛ̃ na. ²⁹ Pauli na dyabi da: Wuro ngwõ ta. A ka tɛ bi dama ga nka sɔma pepe ngwĩye mya bɛrɛda mɔ sɔma, ka hõ tɛ wɔkara mɛ, bɔ balazɔgɔre nii ka ne tye ga. ³⁰ Fangama kɔ prefet kɔ Berenisi kɔ ngwĩye mane ti kɔ lɔ ngwɛ̃, ye tuma. ³¹ Ye sa wɛ timi ma, ye bɛri ye nemɛ hõ, ye: Bo nomo ha fui si ta ngwĩ ngwõ daga kɔ siri nemɛ wala kɔ kaso kyɛbe nemɛ ga. ³² Agripa da Fesitus ma: Bo nomo mane sebɛne dirɛ ne a ma mane ya kiti ta da to fangama gwaga ma ga.

¹ Ya latege da mɛ̀ na kwɔ koro hõ, hõ ya Itali. Ye Pauli kɔ kaso nɔmane bɔ ka Zuliyus soro hõ. Fangama gwaga ta sorodase kuru, Zuliyus mane ngwõwɔ ngwonate. ² Mɛ̀ kwɔ Adiramate kɔma ta koro bo hõ, ngwõ ne ya Asi gana hõ. Mɛ̀ sa ngwɛ̃. Masadwane sõ Arisitake ngwĩ tuma Tesaloni, ngwõ mane kwe ti kɔ mɛ̀ nemɛ. ³ Ngwona ngwinisĩ mɛ̀ wiri Sidõ. Zuliyus dafɔre ta Pauli ma, a dyã a ya ye màre birɛ ngwõfatɔ ya mako fɔro. ⁴ Mɛ̀ tuma ngwɛ̃ hõ ya Sipire kyegɛ ma kamasɔrɔ panga mane wirɛ ne ke tɛ̃. ⁵ Mɛ̀ Silisi kɔ Pãfili kyegɛ ma nyengezu fɔno hõ wiri Mira, ngwĩ ti Lisi gana hõ. ⁶ Sorodase ngwonate mane Alekisãdire kɔma ta koro bo za ngwɛ̃, ngwõ ne ya Itali. A mɛ̀ ka ngwõ hõ. ⁷ Mɛ̀ mane ya zɔgɔzɔgɔ nyengezu ngwõ̀ ma hõ nyi damane ta hõ zɛ wiri Kinide kuru ngwõ̀ na tele do ma. Ngwona yuru mane tɛ nyane na yireyi na fɔrona. Panga mɛ̀ bare hõ ya zĩ hõ. Ngwõ yena mɛ̀ ya Salamone ngwõ̀ na tele do hõ, hõ Kirete zu na kori do to mɛ̀ kɔ panga yɔ. ⁸ Kirete kyegɛ ma fɔnobe mane sige mɛ̀ ma fɔrona. Mɛ ya wiri bo piri bo ma ngwõ togo ti Kwɔ do fɔro, a ti Lase kuru kyegɛ ma. ⁹ Mɛ̀ mane wakati nyaa yaga ngwɛ̃. Nyengezu ngwõ̀ ma yuru mane tɛ farase na kamasɔrɔ sũ kyɛ sanga mane fɔno wɛ. Ngwõ yena Pauli mane sɛmɛbɛ. ¹⁰ A da ye ma: Fãye, mɛ a za da kyà nyengezu ngwõ̀ ma yuru na tɛ nyane kɔ yaga na yireyi na. Ngwona yaga ha na tɛ koro kɔ a kɔrɔ hõ fere dama ga fɔ ke ni mɛ. ¹¹ Nka sorodase ngwonate mane la koro wirɛta kɔ koro ngwonate ta bɛrɛda na hõ yaloyi Pauli ta bɛrɛda ma. ¹² Ngwɛ̃ kwɔ do ha mane fɔro pyã hõ ga. Ngwõ yena ye na sɔma nyaa mane da ye to ye tuma ngwɛ̃ hõ nyɛ ye ma hõ wiri Fenikisi hõ pyã hõ ta ngwɛ̃. Fenikisi ngwõ Kirete na kulu kãkã bo ngwĩ ti wurotã piri ma. ¹³ Panga zɔgɔ bɔ mane wirɛ hõ tuma wuro nyanɔma piri ma. A mane ti ye kɔrɔ hõ da ngwõ na tɛ ye dungo na. Ye mane koro na taabɛ balo bi hõ fɔno Kirete kyegɛ ma. ¹⁴ Nka zɔgɔta panga ye tuma hõ sa zu na kori do na tolo ngwõ̀ ma. Ngwona panga togo ti wuro nyanɔma panga. ¹⁵ Ngwõ koro fɔga, mɛ̀ ma sebɛ ngwona koro bare panga ta ga, mɛ̀ mɛ̀ yɛrɛ to a soro hõ. ¹⁶ Mɛ̀ dɔ fɔno zu na kori do na silaloyi bo ma, ngwõ togo ti Kiloda. Ngwõ mane pĩ mɛ̀ ma zɔgɔ. Mɛ̀ koro silalo ka koro gwaga kɔrɔ hõ, ngwõ ta kyɛbe mane sige fɔrona. ¹⁷ Ya duro ngwĩ sanga ma, ye dabare ta hõ koro gwaga kwe na pɛrɛ, a ka na pya ga. Ye mane kwã da kyà koro na wiri Libiya na bãyɛgɛ do ma. Ngwõ yena ye koro na zogore zibɛ hõ koro to panga soro hõ. ¹⁸ Ngwona ngwinisĩ ngwona panga yee mane digi mɛ̀ na fɔrona fɔ ye koro kɔrɔ hõ bye bɔ dira nyengezu hõ. ¹⁹ A nyi saaro kɔ ma ye koro kɔrɔ hõ fere wa ne dira kɔ ye yɛrɛ sera nemɛ. ²⁰ Nyi damane bɔ fɔno, sõ mane sege ne sĩ kɔ mamala za ga. Panga zigitege na wirɛ fɔ mɛ̀ zigi pepe sɔ, mɛ̀ da mɛ̀ ha na dɛɛ ga. ²¹ Sɔma ngwĩye mane ti koro hõ, ngwõwɔ syedɛrɛ ma zõ ga. Ngwona sanga ma Pauli tuma taa ye zĩ hõ, hõ da ye ma: Fãye, ka mane daga mɔ mɛ ta hõ ke to Kirete ngwõfatɔ ke ka sa ngwɛ̃ hõ bo nyane kɔ bo yaga gũ ga. ²² Nka mɛ yera ka ma basyɛ da ka ka wora sige kamasɔrɔ ka na sõ si ni ha na fire ga. Koro dama ngwõ na fire. ²³ Mɛ tɛ Wuro ngwĩyi na ane mɛ bara ta ngwĩ ma, ngwõ ya mɛlɛkɛ bo fane mɛ birɛ wuru hõ, hõ da mɛ ma: ²⁴ Pauli, ka kwã ga. Be daga ya fangama gwaga zĩ hõ. Wuro ta makare yena bya piri ma na, a be kwirekwesɔma ni kisi. ²⁵ Ngwõ yena, fãye, ka ka wora sige kamasɔrɔ mɛ la Wuro na, da ye na tɛ wɔkara a ye yera ne ma ngwɛne. ²⁶ Nka ke daga dirɛ zu na kori do bo ma. ²⁷ Mɛ̀ nyi funaano kɔ ma boroma sanga ma, hõ mɛ̀ to panga ne mɛ̀ fɔga ne mɛ̀ berebere Mediterane na nyengezu ma, a mane ti koro kɔrɔ hõ baratɛre kɔrɔ hõ da ke vetira sige do ma. ²⁸ Ye yerabɛ fa ka zu hõ, hõ na yerabɛ. A ta dɛrɛ ne metere kyofũ nɔma korosõ. Ye ye yabɛ zĩ hõ na yerabɛ yɛ mɛ, a ta dɛrɛ ne metere kyoro nɔma korosõ. ²⁹ Ye mane kwã da myà koro na vuro dɔge hõ. Ngwõ yena ye koro na taabɛ bala naa wa koro timi. Ye kɔrɔ hõ na tɔbaye mane kɔ yɛ̀rɛ̀ kyɛ na. ³⁰ Koro na baratɛre mane tyata sa koro hõ, hõ tongo. Ye koro silalo dɛ nyengezu ngwõ̀ ma hõ tɛ wɔkara ye tine koro na taabe bala wa koro timi. ³¹ Ngwona sanga ma Pauli da sorodase ngwonate kɔ sorodase ma: Ne bɔ sɔma ma wɔ koro kɔrɔ hõ ga, ka ha sebɛne dɛɛ ga. ³² Ngwona sanga ma sorodase koro silalo na pɛrɛnɔma sɔ na to a ya. ³³ Sane kɔ hõ kyɛ Pauli sɔma pepe mɛ ye zõ. A da: Sɔma ka nyi funaa ka ti yɛ̀rɛ̀be hõ, ka ha zõ ga. ³⁴ Mɛ ka mɛ basyɛ da ka zõ kamasɔrɔ ka mako ti a na hõ sugu. Ka na sõ si ngwõsɔgɔ tala ha na fire ga. ³⁵ Ngwõ yera wɛ timi ma a ta, a buru bi hõ barika yera Wuro ma sɔma pepe nyono na, na yɔyɔ hõ dofɔga ne zõ. ³⁶ Sɔma pepe ye wora sige hõ zõ mɛ. ³⁷ Mɛ̀ mane sɔma zopɔla ane kepɔlafũ ne nɔma konala ngwona koro kɔrɔ hõ. ³⁸ Ye zõ nyingi ngwĩ sanga ma, ye ya dugo bi ne dira nyengezu hõ ngwõfatɔ koro hõ zara. ³⁹ Kɔ kyɛ ngwĩ sanga ma koro hõ baratɛre ma lagakõ ti do birɛ tɔ̀ ga, ye mane nyengezu na worogala za ngwɛ̃ bãyɛgɛ ne ti a do ma. Ye da ye hõ wiri yɛ, ye na koro taabɛ bãyɛgɛ ma. ⁴⁰ Ye koro na taabɛ bala firi ne to nyengezu hõ, hõ koro wirɛ fa na pɛrɛnɔma firi mɛ hõ zogo sɔrɔ panga na hõ tele ya ngwona bãyɛgɛ ma. ⁴¹ Nka ye ya wiri nyengezu kwe do na kwe da pɔla ma ngwĩ sanga ma, ye koro to ngwɛ̃. A na zɛngɛyi taa wɔ bãyɛgɛ hõ ngwɛ̃, nka a na timiyi mane yɔyɔ nyengezu na fanga na yireyi ta. ⁴² Sorodase mane tyata kaso nɔmane pepe yɛ ngwõfatɔ ye na sõ si ka na nyina dɛɛ ye na hõ tongo ga. ⁴³ Nka Rome kɔma ta sorodase ngwonate mane tyata Pauli kisi, a ne bare hõ ngwõ ta. A da ngwĩye ngwõ nyinano tɔ̀, ngwõwɔ pya zi zu hõ, hõ nyina ya sige do hõ. ⁴⁴ Ye bɔ sɛrɛ ba tanga sɔrɔ kɔ koro na yɔyɔyi sɛrɛ ma. Yee nemɛ, mɛ̀ pepe kwe wiri sige do hõ syara na.

¹ Mɛ̀ dɛɛ wɛ timi ma, mɛ̀ mɔ da ngwona zu na kori do togo ti Malate. ² Ngwona ngwɛ̃ sɔma mane dafɔre na yireyi ta mɛ̀ ma. Wuro mane mɛnɛ, lu ne pe fɔrona. Ye togo na yireyi mulu hõ mɛ̀ pepe wiri mɛ̀ ya ngwõ do na. ³ Pauli ya sɔkala bɔ bi ne ka togo hõ. Kebo sa ye hõ tu sera hõ, hõ Pauli ngwĩ hõ zɔlɔ a soro ma. ⁴ Ngwona zu na koro do hõ sɔma ngwona kebo na zɔlɔyi za Pauli soro ma, ye da ye nemɛ ma: Tĩyã na, bo nomo sõyɛta bo kamasɔrɔ tĩyã ha dyã a sugu ga hale kasɔrɔ a mane dɛɛ hõ sa nyengezu hõ. ⁵ Nka Pauli ye soro sɛrɛ, ngwona kebo bɛrɛ togo hõ, fui ma tɛ Pauli na ga. ⁶ Bɔ mane dyati da a soro na nyo wala a na bɛrɛ siri ngwona no tala hõ. Nka ye na sege fɔ ya syedɛrɛ, ya za da fui ha tɛ a na ga. Ngwona sanga ma ye ta dyate bere, ye da ya yirebɛ fa bo. ⁷ Ngwona zu na kori do hõ sõ gwaga ta bi hõ mane vetira ngwɛ̃. Ngwona sõ togo ti Pubiliyus. Ngwõ mɛ̀ vɛbɛ ya kõ hõ. Mɛ̀ nyi saa ta ngwɛ̃, a dafɔre nyaa ta mɛ̀ ma. ⁸ Pubileyus tõ mane syã komatɔbabɛ komatogo ta. Pauli kwɔ ya sege hõ Wuro mɛ a ma hõ ye sera dɛ a ma na kɛnɛbɛ. ⁹ Ngwõ timi ngwona zu na kori do hõ komatogo parere sɛrɛ na, ye kɛnɛ ¹⁰ ye mane mɛ̀ yirebɛ fɔrona. Mɛ̀ sa sanga ma ye birɛ, mɛ̀ mako mane ti fa pepe ngwĩ na, ye ngwõ pere mɛ̀ ma. ¹¹ Yɛgɛ saa fɔno wɛ timi ma, mɛ̀ kwɔ Alekisàdire kɔma ta koro bo hõ, hõ ya. Ye mana wiri Yirebɛ fere na Kwiyɛri. A mane pyã hõ ta ngwona zu na kori do ma. ¹² Mɛ̀ ya Serakuse kuru hõ, hõ nyi saa ta ngwɛ̃. ¹³ Mɛ̀ sa wɛ timi ma ngwɛ̃, mɛ̀ minimini ya wiri Regiyõ. Ngwona ngwinisĩ wuro nyanɔma piri ma panga mane wirɛ ne mɛ̀ nyɛ. Ngwona nyi pɔlalo kɔ ma mɛ̀ wiri Puzole. ¹⁴ Mɛ̀ syenɔmane bɔ za ngwona kuru hõ ngwɛ̃. Ye mɛ̀ mɛ ye mɛ̀ nyi kopɔra ta ye birɛ ngwɛ̃. Ngwõ timi mɛ̀ ya Rome. ¹⁵ Rome kɔma ua syenɔmane mane myà da mɔ ngwĩ sanga ma, ye na mɛ̀ tɛ̃ fɔ Atiyus tũ hõ kɔ Samara Yɛ Kõ birɛ. Pauli ye za ngwĩ sanga ma a barika yera Wuro ma hõ ye woro sige. ¹⁶ Mɛ̀ wiri Rome ngwĩ sanga ma ye dyã Pauli wɔ ye sana kɔ sorodase sõ sonala nemɛ ngwĩ ngwõ a kɔrɔse. ¹⁷ Nyi saa fɔno wɛ timi ma, Pauli Rome kɔma na Yahutuye ngwonakɔma wiri. Ye na kwe ngwĩ sanga ma a da ye ma: Syenɔmane, mɛ ba dayaga si ta kyà si na ga, mɛ ha ke bemae ta lãda yaga mɛ ga. Hale o, ye mɛ fɔga Zerusalem hõ mɛ ka Rome kɔma sera hõ. ¹⁸ Ngwõwɔ mɛ fɔga ngwĩ sanga ma, ye mane tyata mɛ to ma ya kamasɔrɔ ye ha mane da si za mɛ hõ ngwĩ ngwõ daga kɔ siri nemɛ ga. ¹⁹ Nka Yahutuye da ngwõ ha tɛ ga. Ngwõ yena mɛ na da to fangama gwaga ma. A ha tɛ wɔkara mɛ tyata na si yagabɛ ga rɛ. ²⁰ Ngwõ yena mɛ ka wiri hõ na bɛ ngwõfatɔ ma ka za hõ bɛri ka ta kamasɔrɔ mɛ pɛrɛɛ kɔ balazɔgɔre nemɛ Israyɛli ta zigi yena. ²¹ Ye da a ma: Mɛ̀ ha sɛbɛ si gũ hõ tuma Zude gana hõ bya da na ga. Syenɔmane na sõ si ma bere na bɛ hõ bɛrɛda yaga si yera bya da na mɛ ga. ²² Nka ngwĩ fa ngwõ ti be kɔrɔ hõ, mɛ̀ tyata hõ ngwõ mɔ bi yɛrɛ do hõ kamasɔrɔ bo nemɛkwekuru ta piri ma na, sɔma a togo yaga bi pepe hõ. ²³ Ye kɔ Pauli kɔ bo latege. Ngwona kɔ ma ye na nyaaye na a birɛ a vɛ do hõ. Na dofɔga kikima fɔ ya wiri lema, Pauli ngwona sogo ta da pepe kinibɛ ye ma hõ Wuro ta fangamabe na da yera ye ma. Yesu ta da ngwĩ ngwõ sɛbɛɛ Musa ta tõ hõ kɔ purusɔma ta kitabu hõ, a mane tyata ne zĩ berebɛ ngwona da ma. ²⁴ Ye na bɔ la a ta bɛrɛda na, bɔ ma la ye na ga. ²⁵ Ye ha mane bɛ̃ ga. Sane ye hõ ya Pauli na yera ye ma da: Ni na kiniyi ngwĩ fa yera ka bemae ma puruta Esayi barika hõ, ngwõ tĩyã. ²⁶ A mane da: Ya bo si sɔma birɛ hõ yera ye ma da: Ka na mɔ fɔrona nka ka ha na famu ga. Ka na sege fɔrona, nka ka ha na zɛ ga. ²⁷ Bo si kɔrɔ sige fɔno. Ye pĩ ye tera ma. Ye ye nyena pĩ ngwõfatɔ ye nyena ka ne zɛ ga, ye tera ka ne mɔ ga. Ye ka na da kɔrɔ tɔ̀ ga. Ye ha ye yɛrɛ bere mɛ birɛ piri ma ngwõfatɔ ma hõ ne kɛnɛbɛ ga. Wuro da yee. ²⁸ Pauli da: Ka tɔ̀ da Wuro ya kisibe na bɛrɛda fane si sɔma ma. Ngwõwɔ na mɔ a ta. ²⁹ [Ngwona bɛrɛda yera wɛ timi ma Pauli ta, Yahutuye ya. Ye mane ye nemɛ dakwiyɛ fɔrona.] ³⁰ Pauli dɔgɔ pɔla na dopagaye ta kõ bo hõ, a mane ngwõ kya sõ bo ta. Ngwĩ sɔma pepe ya a birɛ, a ngwõwɔ pepe fɔga fɔrona. ³¹ A mane Wuro ta fangamabe na da na wadyuli ta ne sɔma kala kɔ Matigi Yesu Krista ta da nemɛ kɔ worasigi nemɛ. Sõ si ma a bare ngwõ na ga.