3 ZÃ

3 ZÃ

¹ Mɛ eglise somɔlalo bo sɛbɛ fane na kanuyi Gayus ma. Ma be kanu tĩyã na. ² Ne mà, mɛ tyata da pepe hõ fɔro bya piri ma na ane be na kɛnɛyi hõ wɔ, hõ kanya kɔ be ni na kɛnɛro nemɛ. ³ Syenɔmane bɔ na mɛ birɛ bɛ hõ be na syɛrɛbe ta ye be ya tĩyã na sogo ma, ane be wɔ tĩyã ma. Ngwõ yena mɛ mane ni hõ dya. ⁴ Nihõdyaro si ha ti mɛ ta hõ yaloyi bo ma ga, hõ mɔ da mɛ nɔmane ya tĩyã ma. ⁵ Ne mà, be fa pepe ngwĩ ta syenɔmane na kɔ syenɔma samara ma, be tɛ nyomata na ngwona da pepe na. ⁶ Ngwõwɔ bya kanube na syɛrɛbe ta eglise nyono na bɛ. Mɛ be mɛ be ye dyema ye ta yara da na kɔ dyemabe nemɛ ngwĩ ngwõ dya Wuro ma. ⁷ Ye ti yara hõ Krista ta bara yena. Ye ha dyã dyemabe na da tɔ lanabɛbariya sɔma ta ga. ⁸ Ke kwane, ke lanabe sɔma, ke daga ngwõ nemɛ na sɔma fɔga fɔrona ngwõfatɔ ke hõ kwe tɛ nemɛkwere na ngwona tĩyã na bara na. ⁹ Mɛ sɛbɛ fɛ̃fɛ̃ bo sɛbɛ na fane eglise ma. Nka Diyotirefe mane tyata tɛ ye ngwonate na, a ha ngwona bɛrɛda fɔga fyu ga. ¹⁰ Ngwõ yena ne na yuru na sogo hõ gũ sa ka birɛ, a tɛda yaga ngwĩye ta, hõ bɛrɛda yaga na nĩyono na nyaaye ngwĩye yera myà da na, ma na ne kakiri to ngwõwɔ ma. Nka ngwõ ha wa ga. A yɛrɛ ha dyã ne syenɔmane fɔga fɔrona ga. Ngwĩye tyata ne fɔga fɔrona, a ne ngwõwɔ bare ne laga ne sabɛ eglise hõ. ¹¹ Ne mà, ka zugube sɛmɛ ga, nka be daga dafɔre sɛmɛ. Sõ ngwĩ ngwõ dafɔre ta, ngwõ tɛ Wuroyi na. Sõ ngwĩ ngwõ dayaga ta, ngwõ ha Wuro za ga. ¹² Sɔma pepe Demetiriyus toga fɔro yera. Tĩyã yɛrɛ a toga fɔro yera. Mɛ̀ a toga fɔro yera mɛ. Be tɔ̀ da mɛ̀ ngwĩ fa yera ngwõ tĩyã. ¹³ Da nyaa ti ne ta hõ ne yera be ma, nka mɛ ha tyata ngwõ sɛbɛ kɔ lãkiri kɔ sɛbɛ sɔgɔlo nemɛ ga. ¹⁴ Mɛ zigi ti a ma da zɔgɔta ma na be za. Ke na bɛri nemɛ ta do kɔ do. ¹⁵ Wuro syara ta be ma. Be màre bire be na. Bire mɛ̀ màre pepe tala tala na ye toga ma.