2 TIMOTE

¹ Mɛ Pauli tɛ Yesu Krista ta faneta na Wuro dungo barika hõ, hõ kanya kɔ sugunɔmabe na datege nemɛ, ke ngwĩ gũ Yesu Krista barika hõ. ² Mɛ no na kanuyi Timote, mɛ bo sɛbɛ fane be ma. Ke Tõ Wuro kɔ kyà Matigi Yesu Krista hõ nema kɔ syara pere be ma hõ makare be na. ³ Mɛ barika yera Wuro ma, mɛ bara ta ngwõ ngwĩ ma kɔ kɔrɔ na kìnìyi nemɛ wɔkara ne bemae ye ta ngwɛne. Ne mɛ ne be togo wiri na Wuro mɛbe hõ wuru hõ kwe sĩ hõ ma, ma barika yera Wuro ma. ⁴ Mɛ kakiri ti kɔ be nyenazyo ta da nemɛ ke dɛ̀ sanga ma nemɛ na. A dya ne ma fɔrona hõ bere be za yɛ ngwõfatɔ ma hõ ni hõ dya fɔrona. ⁵ Mɛ kakiri ti kɔ bya lanabɛbe na syɛbɛyi ta da nemɛ. Ngwona lanabɛbe mane pya ne ti be mamasye Lowisi hõ ne ti be sye Unisi hõ. Mɛ kìnì a na da a ti bi yɛrɛ hõ mɛ. ⁶ Ngwõ yena mɛ be kakiri dige a na da be kwa Wuro ta perefa ma, be ngwĩ gũ mɛ mane ne sera dɛ be ma ngwĩ sanga ma. ⁷ Wuro Ni na kìnìyi ngwĩ pere ke ma, ngwõ ha ke ta ke ne piri ga. A ta Ni na kìnìyi sebɛbe kɔ kanube kɔ kakirikɔmabe ka ke hõ. ⁸ Be ka piri hõ syɛrɛbe wa kyà Matigi ta da na ga. Be ka piri kɔ mɛ nemɛ mɛ ga, mɛ ngwĩ tɛ Matigi ta kasono na. Nka be be nii bi nyane da na Bɛrɛda Fɔre yena hõ kanya kɔ Wuro ta sebɛbe nemɛ a ngwĩ pere be ma. ⁹ Awe ngwĩ ke kisi hõ ke wiri hõ tɛ a ta sɔma na. Ngwõ ha tɛ kyà tɛda yena ga, ke mane ngwĩye ta. A tɛ Wuro yɛrɛ ta latege da yena kɔ a ta nema yena a ngwĩ pere ke ma Yesu Krista barika hõ sane diniya hõ tegee. ¹⁰ Nka a ngwõ dɔrɔ ke ma basyɛ ke na kisita Yesu Krista barika hõ. Awe ngwõ siri ta fanga wɛ hõ sugunɔmabe na wɛbariyayi dɔrɔ kɔ Bɛrɛda Fɔre nemɛ. ¹¹ Wuro mɛ tege hõ tɛ ngwona Bɛrɛda Fɔre na wadyulitɛta na hõ tɛ faneta kɔ kalamogo na. ¹² Ngwõ yena mɛ nyane gũ ngwona da na. Nka mɛ ha piri kɔ ngwõ nemɛ ga kamasɔrɔ mɛ la ngwĩ na, mɛ ngwõ tɔ̀. A ngwĩ kalofa mɛ ma, mɛ la a na da sebɛbe ti a ta hõ kwa ngwõ ma fɔ wɛ sanga ma. ¹³ Ma tĩyã na bɛrɛda ngwĩye yera be ma, be ngwõwɔ fɔga hõ taa fɔrona lanabɛbe kɔ kanube na, ke ngwĩye gũ Yesu Krista barika hõ. ¹⁴ Wuro fere fɔre ngwĩye kalofa be ma, be kwa ngwõ ma Ni na kìnìyi barika hõ, ngwõ ngwĩ ngwõ tanga ke kɔrɔ hõ. ¹⁵ Be tɔ̀ da Asi kɔma pepe mɛ dira, hale Figeli kɔ Hemozene mɛ. ¹⁶ Matigi hõ makare Onesifore ta kõ kɔma na. A mane mɛ zigi tugu sanga nyaa ma. A ha piri kɔ mya kaso hõ kyɛbɛ ta da nemɛ ga. ¹⁷ Nka a wiri Rome ngwĩ sanga ma, a mɛ birɛ kya fɔrona fɔ hõ ne za. ¹⁸ Matigi hõ tɛ a hõ makare gũ Matigi ta wɛ sanga ma. A mɛ mako fɔro da nyaa ngwĩye na hõ ke to Efese, be ngwona da tɔ̀.

¹ Bi kwane, mɛ no, be be woro sige nema barika hõ ngwĩ ngwõ ke kwe kɔ Yesu Krista nemɛ. ² Be da ngwĩye mɔ mɛ ta syɛrɛ kɔma nyaa nyono na, be ngwõwɔ yera nyomasɔma bɔ ma, ngwõwɔ ngwĩye ngwõ sebɛne sɔma zɛ kala mɛ. ³ Be be nii bi nyane da na wɔkara Yesu Krista ta sorodase fɔro. ⁴ Sõ ngwĩ ngwõ ya sorodasebe na, ngwõ ha ye ni na bã kɔ sɔma ta da nemɛ ga, ne a hõ ne tyata ye da dya ye ngwonate ma. ⁵ Ngwĩye ngwõ kwɔ tongonemɛfɔnobe na da hõ, ye ha pya ne ngwona sara gũ dɛ̃ ga fɔ ye hõ ngwona tongo ta a tɛno na. ⁶ Lagasõta ngwĩ ngwõ bara na yireyi ta, ngwõ daga pya ye nii gũ sõ fere na dɛ̃. ⁷ Ma ngwĩ yera, be miri ngwo na. Matigi na kakiri pere be ma hõ ne pepe famu. ⁸ Be be kakiri to Yesu Krista na. A ngwini sa sara woro hõ. A tɛ Dauda timi sõ na hõ kanya kɔ Bɛrɛda Fɔre nemɛ, ma ngwĩye yera sɔma ma. ⁹ Mɛ ngwona Bɛrɛda Fɔre yera, ngwõ yena mɛ ti nyane hõ. Ye mɛ pɛrɛ kɔ balazɔgɔre nemɛ wɔkara ye dayagatɛta pɛrɛ ngwɛne. Nka Wuro ta bɛrɛda ha pɛrɛɛ ga. ¹⁰ Ngwõ yena mɛ da pepe somɔna Wuro ta dɛ̀gɛ̀wɛ sɔma yena ngwõfatɔ kisibe ngwĩ ngwõ ti Yesu Krista hõ, ye hõ ngwõ gũ hõ Kirsta ta noro na wɛbariyayi gũ mɛ. ¹¹ Ngwona bɛrɛda tĩyã, ye: Ne ke kɔ Krista hõ kwe siri, ke kɔ awe na kwe sugu nemɛ hõ. ¹² Ne ke hõ somɔna fɔ ya wiri wɛ sanga ma, ke na tanga fangamabe na kɔ le. Ne ke hõ ke do bere a ta da na, awe na ye do bere kyà da na mɛ. ¹³ Ne ke hõ mane saratipaga ga, awe saratipaga. A ha sebɛne ye do bere ye yɛrɛ ta da na ga. ¹⁴ Be sɔma pepe kakiri dige ngwona da na hõ ne yera ne sigebɛ ye ma Wuro nyono na, ye ka zɔba bɛrɛda ta da na ga. Zogo ha fui fɔro ga fɔ a ngwona da na mɔ sɔma firebɛ. ¹⁵ Be nyanga hõ be yɛrɛ dɔrɔ Wuro ma wɔkara baratɛta ngwĩ ha piri kɔ ya bara nemɛ ga, ngwĩ ngwõ tĩyã na bɛrɛda yera ne kìnì. ¹⁶ Be yɛrɛ kɛ̃gɛlɛ dakwiyɛro vuna ma ngwĩye ngwõ sõ ta lanabɛbe piripara. Ye na yerasɔma ya zĩ hõ sanga pepe ma ne ye birɛ dɛrɛbɛ Wuro na. ¹⁷ Ye ta kala tɛ wɔkara daro yɔ ngwĩ ngwõ sõ komavere zõ. Himene kɔ Filete tɛ ngwona sɔma na bɔ na. ¹⁸ Ngwõwɔ kɛ̃gɛlɛ hõ sa tĩyã na sogo hõ. Ye da sara ngwinibe tɛ wɛ hõ sɔma bɔ ta lanabɛbe yaga yee nemɛ si. ¹⁹ Ngwõ pepe na, Wuro du na sigeyi ngwĩ ka, ngwõ na wɔ yɛ. Bɔ bɛrɛda sɛbɛɛ ngwona du ma da: Matigi ye yɛrɛye tɔ̀. Ye: Ngwĩ sõ pepe hõ ne Matigi togo wiri, ngwõ hõ ye sabɛ dayagatɛbe na. ²⁰ Kõ gwaga kɔrɔ hõ tetɛrɛ fere ba sanu kɔ gwana damanaye ga. Sɔrɔ na tetɛrɛ fere kɔ vere na tetɛrɛ fere ti yɛ mɛ. Sanu kɔ gwana na tetɛrɛ fere, ngwõwɔ tegee kɔ gwaga do ma na. Zaye tegee kɔ pepe ma bara tɛ na. ²¹ Ne sõ bo hõ ye yɛrɛ kìnìbɛ ngwona dayaga ma, ngwõ na tɛ bara fɔre tɛ fa na kamasɔrɔ a pepe na kweyi tɛ a ngwonateyi na. A sɔbe tege hõ bara fɔre pepe ta. ²² Be tongo yɛlɛbe na wu na. Ngwĩye ngwõ Matigi kya kɔ kɔrɔ na kìnìye nemɛ, bi kɔ ngwõwɔ hõ telebe kɔ lanabɛbe kɔ kanube kɔ syara kya. ²³ Nka be daga maga kakiridarabe na dakwiyɛro na zanaye ma. Be tɔ̀ da ngwõ birisi tumabɛ. ²⁴ Matigi ta baratɛta ha daga tɛ birisisɔta na ga. A daga ye da dyabɛ sɔma pepe ma hõ sebɛ sɔma kala kɔ somɔnabe nemɛ. ²⁵ Sɔma ngwĩye ngwõ a dakwiyɛ, a daga ngwõwɔ kala kɔ woramakwɔnabe nemɛ. Dora Wuro na zugo berebɛ na kɔrɔ pere ye ma ngwõfatɔ ye hõ sebɛ tĩyã tɔ̀. ²⁶ Ye na kakiri gũ hõ sa Setane ta wore fa hõ. Setane mane fɔga hõ ye yɛrɛ dungo ta.

¹ Be daga na famu da wɛbɛ kɔye ma wakati na sigeyi na tye. ² Sɔma na miri ye yɛrɛ ta da na dama. Ye na tɛ gwana na wu na kɔma na kɔ togayagare kɔ yɛrɛyirebɛre na. Ye na Wuro togo yaga hõ ye na vɔrɔre kwɛ̃ dira. Sodanyaasɔma kɔ Wuro nyononakwãbariyasɔma. ³ Ngwona sɔma na tɛ sɔma na dasigesɔma na. Ye ha na makare sɔma na ga. Ye na tɛ sɔma togayagare na, yɛrɛfɛgɛbariyasɔma, sɔma na baye. Ye mako ha ti dafɔre na ga. ⁴ Ye na tɛ dyãfãsɔma na kɔ yɛrɛdungotɛsɔma. Ye na paga yɛrɛyirebɛbe na. Kokoru na dya ye ma hõ yaloyi Wuro ta da ma. ⁵ Ye na tɛ Wuro ta sogo ku ma ya sɔma na nka ye na maga a ta sebɛbe hõ. Be be kɛ̃gɛlɛ be wa ngwõ nemɛ na sɔma sye ma. ⁶ Ye na bɔ kwɔ kwã hõ, hõ yàra na kakiridarakɔma bɔ dyebɛ. Ngwona yàra kwane bi kakye na, ye dɔ wu na yagaye sifa pepe ma. ⁷ Ngwona yàra tyata kala sanga pepe ma nka ye ha sebɛne tĩyã dɛ̀gɛ̀ tɔ̀ ga. ⁸ Zanesi kɔ Zaberesi mane Musa dakwiyɛ ngwɛne, yee nemɛ ngwona sɔma tĩyã dakwiyɛ mɛ. Ngwona sɔma kakiri ha fɔro ga, ye ta lanabɛbe ha fui ga. ⁹ Nka ye ha na ya zĩ hõ ga kamasɔrɔ ye ta kakiridɛgɛbe na dɔre sire sɔma pepe nyono na wɔkara ye mane tɛ Zanesi kɔ Zaberesi ta da na ngwɛne. ¹⁰ Nka bi kwane, be mane dɔ ne ma na kala ma kɔ na yano kɔ na latege da kɔ na lanabɛbe kɔ na yɛrɛnyangabe kɔ na nyane da pepe ma. ¹¹ Nyane ngwĩye mane ne gũ Ãtiose kɔ Ikone kɔ Lisitre, be ngwõwɔ pepe tɔ̀. Mɛ nyane na yireyi somɔna nka Matigi mɛ dɛ̃ hõ ne wa ngwõ pepe hõ. ¹² Aiwa, sɔma ngwĩye ngwõ tyata kwe kɔ Matigi Yesu Krista nemɛ hõ ya Wuro nyononakũ na, ngwõwɔ pepe na nyane gũ. ¹³ Nka sɔma yaga kɔ dapɔlabɛrisɔma ta da na moro ya zĩ hõ dayagatɛbe na. Ye na bɔ firebɛ, ye yɛrɛ na fire mɛ. ¹⁴ Bi kwane, be kala da ngwĩye na hõ tɔ̀ da ngwõ tĩyã, be malo ngwõwɔ ma. Sõ ngwĩ ngwõ be kala kɔ ngwona da nemɛ, be ngwõ tɔ̀. ¹⁵ Be Wuro ta bɛrɛda na kìnìye tɔ̀ na dofɔga be na nimisalo sanga ma. Ngwõ sebɛne kakirikɔmabe pere be ma ngwõfatɔ be hõ la Yesu Krista na hõ kisibe gũ ngwõ barika hõ. ¹⁶ - ¹⁷ Wuro ya bɛrɛda ka ye na sɛbɛsɔma kɔrɔ hõ. A sõ kala kɔ tĩyã nemɛ hõ maga kala na sɔma firebɛye hõ, hõ be kãe ka sofɔro hõ, hõ bya yano telebɛ ngwõfatɔ a Wuro ta sõ dopaga hõ na tetɛrɛ hõ tɛda fɔre pepe ta.

¹ Mɛ be mɛ bo da na Wuro zĩ hõ kɔ Yesu Krista zĩ hõ, ngwõ ngwĩ na kiti sɔ sɔma sugi kɔ sara ma. Mɛ be mɛ Krista ta nabe kɔ a ta fangamabe yena. ² Ma tyata be Wuro ta bɛrɛda yera hõ be nyanga sanga pepe ma wakati fɔro ma kɔ wakati yɔ ma. Be sɔma ta da dɔrɔ ye ma hõ bɛri ye ma hõ ne ladi hõ ne kala kɔ somɔnabe nemɛ. ³ Wakati bo na na, sɔma ha na dyã hõ tĩyã na kala mɔ titiri ga nka hõ kanya kɔ ye yɛrɛ ta da na wu nemɛ, ye na kalamogi nyaa kya ye yɛrɛ ma ngwĩye ye madyama bɛrɛda yera. ⁴ Ye ha na mɔ tĩyã na titiri ga. Ye na dɔ sĩyɛ̃ ma. ⁵ Bi kwane, be hõ tɛ sõ syɛbɛ na da pepe na hõ nyane somɔna hõ Bɛrɛda Fɔre na wadyuli ta hõ bya bara pepe ta Wuro ma ne dopaga. ⁶ Mɛ kwane, mɛ tɛ wɔkara salaka ye ngwĩ wa. Ngwõ kɔrɔ mɛ siri sanga wiri. ⁷ Mɛ kũ na fɔroyi kwini. Mɛ tongonemɛfɔnobe na tongo ta ne wɛ. Mɛ kwa lanabɛbe ma. ⁸ Basyɛ kwane, mɛ na na sara gũ, ngwõ telebe na fangama bãfɔla. Matigi ngwĩ ngwõ kitisɔta na teleyi, ngwõ na ngwõ pere ne ma ngwona kɔ ma. A ha na ngwõ pere mɛ sonala ma ga, nka ngwĩye pepe ngwõ tina dɔre sanga yɛ̀rɛ̀ kɔ kanube nemɛ, a na ngwõ pere ngwõwɔ pepe ma. ⁹ Be nyanga hõ na ne birɛ bɛ sale. ¹⁰ Demasi ne dira. Bo diniya hõ da dya a ma. A ya Tesaloni. Kirɛsã ya Galase gana hõ. Tite ya Dalamasi. ¹¹ Luka sonala ngwõ ti kɔ mɛ nemɛ bɛ. Be ne na ngwĩ sanga ma, be kwe na kɔ Mareka nemɛ kamasɔrɔ a sebɛne ne dyema na bara na. ¹² Ma Tisike fane Efese. ¹³ Be hõ ne na ngwĩ sanga ma, be na kɔ na zogwaga nemɛ. Mɛ mana to Karepusi birɛ Tirowasi. Be na kɔ le. Be na kɔ kitabu nemɛ mɛ. Mɛ mako ti kõ na kitabu na hõ yaloyi bɔ sɛrɛ ma. ¹⁴ Kɔlɔ sõ Alekisãdire dayaga nyaa ta mɛ na. Matigi na a sara hõ kanya kɔ a ta tɛda nemɛ. ¹⁵ A mane mya bɛrɛda dakwiyɛ fɔrona. Ngwõ yena be daga be yɛrɛ kɔrɔse a na mɛ. ¹⁶ Mɛ ne yɛrɛ ta da kìnìbɛ ngwĩ sanga ma, sõ si ha mɛ dyema ngwona sanga ma ga. Ye pepe ne dira. Wuro ka ngwõ dyati ye ngwõ̀ hõ ga. ¹⁷ Nka Matigi mane mɛ dyema hõ ne barika yirebɛ ngwõfatɔ ma hõ wadyuli ta ne dopaga. Si sɔma pepe hõ ne mɔ. Mɛ dɛɛ hõ sa zara do hõ. ¹⁸ Matigi na mɛ dɛ̃ mɛ wa dayaga pepe hõ, hõ ne kisi hõ ne ka a ta fangamabe hõ wuro hõ. Noro hõ dɛ awe ma abada fɔ abada. Amina. ¹⁹ Bire Pirisye kɔ Akila kɔ Onesifore ta kõ kɔma na. ²⁰ Erasite wɔ Korɛ̃te. Tirofime ha mane kɛnɛ ga. Ngwõ yena mɛ a to Mile. ²¹ Be daga nyɛ be ma hõ na sane pyã hõ hõ wiri. Ubulusi bire be na kɔ Pudã kɔ Linus kɔ Kilodeya kɔ syenɔmane sɛrɛ pepe. ²² Matigi wɔ be ta. Wuro ta nema hõ wɔ ka ta.