2 TESALONI KƆMA
11 Pauli kɔ Silasi kɔ Timote bo sɛbɛ fane Tesaloni kɔma ta eglise ma. Kya eglise Tõ Wuroyi kɔ Matigi Yesu Kristayi. 2 Wuro syara ta ka ma. Matigi Yesu Krista hõ nema pere ka ma. 3 Syenɔmane, mɛ̀ daga barika yera Wuro ma ka yena sanga pepe ma. Kya lanabɛbe tine yire fɔrona kɔ kya nemɛ kanube tine nyaa mɛ. Ngwõ yena a tɛ wadyibi na mɛ̀ barika yera Wuro ma kya da na. 4 Mɛ̀ yɛrɛ ka toga yera Wuro ta eglise woro hõ. Ka tɛne ka nyanga hale nyane sanga ma kɔ kɔrɔwɛ sanga ma, ngwĩye tine tɛ ka woro hõ basyɛ. Ka ngwõ pepe somɔna hõ lanabɛbe ta. Ngwõ yena mɛ̀ ka yirebɛ. 5 Ngwona da pepe Wuro ta kiti da na teleyi dɔrɔNgwonona? Kamasɔrɔ ka nyane Wuro ta fangamabe ngwĩ yena basyɛ, bo kɔ ka na daga kɔ ngwõ nemɛ. 6 Wuro tele. Sɔma ngwĩye ka nyane, Wuro na ngwõwɔ nyane mɛ. 7 Ki ngwĩye ngwõ nyane, Wuro na makwɔnakõ pere ka ma hõ ngwõ pere mɛ̀ ma mɛ. A na ngwõ ta Matigi bere na sanga ma hõ tuma wuro hõ kɔ a ta sebɛbe na mɛlɛkɛ nemɛ. 8 A na na kɔ toga kini na yireyi nemɛ mɛ hõ nyane wiribɛ sɔma ma ngwĩye ha Wuro tɔ̀ ga kɔ ngwĩye ha la Bɛrɛda Fɔre na Matigi Yesu ta da na ga. 9 Ngwõwɔ na nyane ngwĩ gũ ngwõ na tɛ dumɔlabe na wɛbariyayi na. Ye birɛ na dɛrɛ Wuro na kɔ a ta sebɛbe na yiregwagayi na. 10 Ye bire na dɛrɛ Wuro na Yesu bere na kɔ ma, a hõ na na hõ yirebɛbe gũ ya kɔma pepe ta ngwĩ sanga ma. Sɔma pepe ngwĩye la a na ngwõ na a yirebɛ. Ki na tɛ ngwõwɔ na bɔ na mɛ kamasɔrɔ mɛ̀ bɛrɛda ngwĩye yera ka ma, ka mane la ngwõwɔ na. 11 Ngwõ yena mɛ̀ Wuro mɛ ka ma sanga pepe ma. Mɛ̀ Wuro mɛ da a ka ta a ta sogo na ya sɔma na, ka daga kɔ ngwĩ ta yabe nemɛ. Wuro ka wiri ngwõ na. Mɛ̀ a mɛ da a kya dafɔre na wu pepe dopaga, hõ kya lanabɛbe na tɛda dopaga a ta sebɛbe barika hõ. 12 Yee nemɛ Matigi Yesu Krista togo na yirebɛbe gũ fɔrona kya da na. Ki na yirebɛbe gũ awe yena mɛ hõ kanya kɔ kyà Wuro kɔ Matigi Yesu Krista ta nema nemɛ.
21 Syenɔmane, mɛ tyata bɛri ka ta kyà Matigi Yesu Krista ta bere na da na, ane kyà kwe ya da na hõ ya a birɛ. 2 Bɔ sɔma da Matigi ta kɔ ngwõ na wɛ. Mɛ ka mɛ da ka ka ka kakiri nyangamu hõ ka yɛrɛ nyane ngwona bɛrɛda yena ga. Dɔra bɔ mane fane da ta hõ ngwõ yera wala wadyuli da. Dɔra bɔ da mɛ, ye mɛ̀ mane ngwõ sɛbɛ sɛbɛ bo hõ. 3 Sõ si ka ka firebɛ tɛno si na ga. Ngwona kɔ ha na na ne magabe na yireyi na wɛbeyi ma tɛ dɛ̃ ga. A ha na na ne ngwona yagayi ma ye dɔrɔ mɛ ga. Awe ngwĩ na kwɔ dyahanama hõ. 4 Sɔma fere pepe ngwĩye dyati Wuroye kɔ sɔma pepe ngwĩye fere yirebɛ, a na ngwõwɔ pepe kwini. A na ye yɛrɛ yirebɛ fere pepe ma hõ kwɔ tanga Wuro kõ yuu yɛrɛ kɔrɔ hõ, hõ ye yɛrɛ wiri da Wuro. 5 Hõ mɛ to ka birɛ, ma ngwõ pepe yera ka ma. Ka sãfire ra? 6 Basyɛ bo fa tye ngwĩ ngwona da pepe bare tɛ na. A ngwĩ fa, ka ngwõ tɔ̀. Wakati na dopagayi hõ ngwona yagayi na na. 7 Yagabe na tɔ̀bariyayi tine bara ta basyɛ. Nka da ngwĩye na tɛ zĩ hõ, ngwõ ha na tɛ ga fɔ ngwĩ ngwõ a bare, ngwõ na ya ye wa yɛ. 8 Ngwona sanga ma ngwona yagayi na ye dɔrɔ. Matigi Yesu na a ngwona kɔ ye do hõ panga nemɛ. Yesu ta noro na yireyi a na sanga ma na ngwona yagayi yɛ. 9 Ngwona yagayi na na kɔ Setane ta fanga nemɛ. A na kabako da na sifa nyaa ta hõ tagamasɛ̃ bɔ dɔrɔ, sɔma na kaba ngwĩye ma. 10 Sɔma ngwĩye na fire, ngwona yagayi na ye dyebɛ kɔ dayaga sifa pepe nemɛ. Ngwonona ye na fire? Ye ha dyã tĩyã fɔga ngwõfatɔ ye hõ kisi ga. 11 Ngwõ yena Wuro dyebɛ da na yireyi fane ye ma fɔ ye hõ la nĩyõ na. 12 Yee nemɛ, sɔma pepe ngwĩye ngwõ la tĩyã na ga, hõ dayaga na madyamabe ta, ngwõwɔ pepe na zarake. 13 Syenɔmane, mɛ̀ daga barika yera Wuro ma ka yena sanga pepe ma, ki ngwĩye da ngwõ dya Matigi ma. Wuro mane ka dɛ̀gɛ̀ hõ tɛ gweregwereye na hõ kisibe gũ Ni na kìnìyi ta fanga barika hõ. Ka la tĩyã na hõ tɛ Wuro yɛrɛ ta sɔma na. 14 Wuro ka wiri ngwõ na Bɛrɛda Fɔre barika hõ, mɛ̀ ngwĩye yera ka ma. A mane ka wiri hõ ka nii bi Matigi Yesu Krista ta noro hõ. 15 Aiwa, syenɔmane, ka taa hõ wɔ. Mɛ tĩyã na bɛrɛda ngwĩye yera ka ma kɔ ma ngwĩye sɛbɛ ne fane ka ma, ka ngwõwɔ fɔga fɔrona. 16 - 17 Kyà Matigi Yesu Krista yɛrɛ hõ ka wora sigebɛ. Awe ngwĩ mane ke kanu hõ ya nema pere ke ma kɔ worasigebe na wɛbariyayi kɔ zigi na fɔroyi. Matigi hõ sebɛbe pere ka ma hõ dafɔre ta ane hõ bɛrɛda dya yera.
31 Aiwa, syenɔmane, ka Wuro mɛ mɛ̀ ma ngwõfatɔ Matigi ta bɛrɛda hõ zãzã sale hõ yire wɔkara a mane tɛ ngwɛne ka woro hõ. 2 Ka Wuro mɛ da Wuro hõ mɛ̀ dɛ̃ sɔma yaga kɔ dayagatɛsɔma ta. Ka tɔ̀ da sɔma pepe ha la bɔ bɛrɛda na ga. 3 Matigi kwane sarati paga. A na ka sabati hõ kwa ka ma, ngwona yagayi ka na ka gũ ga. 4 Mɛ̀ tɔ da mɛ̀ da ngwĩ yera ka ma, ka tine ngwõ ta ne ya zĩ ngwõ na. Matigi da mɛ̀ daga nyo ka ma ngwõ na. 5 Matigi hõ ka zĩ fɔga fɔ ka hõ Wuro kanu kɔ ka kɔrɔ pepe nemɛ. Krista hõ ye yɛrɛ ta somɔnabe pere ka ma. 6 Syenɔmane, mɛ̀ bɔ yera na sigebɛ ka ma fɔrona Matigi Yesu Krista togo barika hõ, da syeno pepe ngwĩ kõ ngwõ ba, ka ka sabɛ ngwõ na. Mɛ̀ ladi bɛrɛda ngwĩye pere ye ma, ye ha dyã ne fɔga ga. 7 Ka yɛrɛ na tɔ̀ da ka daga tɛ wɔkara mɛ̀ mane tɛ ka woro hõ ngwɛne. Mɛ kõ ha mane ba ka woro hõ ga. 8 Mɛ̀ ha mane zõ sõ si ta kõ hõ zana ga. Mɛ̀ mane bara ta hõ nyama. Sĩ kwe wuru ma mɛ̀ mane mɛ̀ nyanga bara na ngwõfatɔ mɛ̀ ka tɛ sõ si ta bye na ga. 9 Mɛ̀ mane daga kɔ sara bo nemɛ. Nka mɛ̀ mane bara ta yee nemɛ hõ ka zĩ fɔga hõ sogo dɔrɔ ka ma. 10 Hõ mɛ̀ to ka birɛ, mɛ̀ yera ka ma da ne bo ma dyã bara ta ga, ngwõ ka zõ mɛ ga. 11 Mɛ̀ mɔ da sɔma bɔ ti ka woro hõ, ngwĩye kõ ngwõ ba. Ye ye do ka da pepe hõ dama. Ngwõ yena mɛ̀ bɔ bɛrɛda yera ka ma. 12 Ngwĩye ngwõ nemɛ na da ta, mɛ̀ yera ngwõwɔ ma hõ na sigebɛ ye ma Matigi Yesu Krista togo barika hõ, da ye hõ malo bara ma hõ ye yɛrɛ woro. 13 Ki syenɔmane, ka ka nyama dafɔretɛbe hõ ga. 14 Mɛ̀ bɛrɛda ngwĩye fane ka ma bo sɛbɛ hõ, dɔra sõ bo na ngwõwɔ fɔga ga. Ne ngwõ hõ tɛ, ka ka kakiri to ngwona sõ na. Ki kɔ ngwona sõ ka kwe ga ngwõfatɔ a hõ piri. 15 Ka ka a dyati ka zugu ga, nka ka hõ na ladi wɔkara ka syeno. 16 Aiwa, kyà syaranate Matigi yɛrɛ hõ syara ta ka ma sanga pepe ma kɔ tɛno pepe na. Matigi hõ wɔ ka ta. 17 Mɛ Pauli bɔ bɛrɛda sɛbɛ kɔ ne yere soro neme—KA FO PEPE. Yee mɛ tɛne sɛbɛ pepe na wɛbɛyi sɛbɛ. Yee mɛ a sɛbɛ yɛ. 18 Kyà Matigi Yesu Krista hõ ya nema pere ka ma.