2 PIERRE
11 Mɛ Simõ Pierre tɛ Yesu Krista ta baratɛta kɔ a ta faneta na. Mɛ bo sɛbɛ fane ka ma, ki ngwĩye ngwõ myà lanabɛbe nemɛ gũ kyà Yesu Krista Wuro ta telebe barika hõ. 2 Wuro syara ta ka ma hõ nema na nyaaye pere ka ma Wuro kɔ Yesu Krista na tɔbe barika hõ. 3 Ke mako ti fere ngwĩye na hõ Wuro ta sogo ya, ke ngwõ gũ Wuro ta sebɛbe barika ho. Ngwĩ mane ke wiri hõ nii gũ a ta noro kɔ a ta foro na, ke fere gũ awe na tɔbe barika hõ. 4 Yee nemɛ a ya datege yire bi ke ma ngwĩ ngwõ fõ kɔ fere pepe nemɛ. A ngwõ bi ke ma ngwõfatɔ ke hõ dɛ diniya na wu na yagayi ma hõ ke nii gũ Wuro tino na. 5 - 7 Ngwõ yena ka ka nyanga fɔrona hõ foro kwe kya lanabɛbe ma hõ tɔbe kwe foro ma. Hõ yɛrɛfɛgɛbe kwe tɔbe ma hõ somɔnabe kwe yɛrɛfɛgɛbe ma hõ Wuro nyononakũ kwe somɔnabe ma hõ syenɔmabe na kanube kwe Wuro nyononakũ ma hõ kanube kwe syenɔmabe na kanube ma. 8 Ne ngwona fere ne gũ ka hõ nyaa, ka ha na tɛ sarekɔrɔre kɔ nafãbariyasɔma na kyà Matigi Yesu Krista na tɔbe na ga. 9 Ngwona fere ti ngwĩ hõ ga, ngwõ fu. A ha sege ne fa za dɛrɛ do hõ ga. A sãfire kɔ ya kakye na biriyi ta kìnìbɛbe ta da nemɛ. 10 Ngwõ yena, mɛ syenɔmane, Wuro ka wiri hõ ka dɛ̀gɛ̀ da ngwĩye na, ka ka sabati ngwõ hõ. Ne ka hõ ne ngwõ ta, ka ha na bɛrɛ dayaga hõ melemele ga. 11 Yee nemɛ, Wuro na ka kwɔbɛ kyà Matigi kɔ kyà Kisita Yesu Krista ta fangamabe na wɛbariyayi hõ. 12 Ngwõ yena ka da ngwĩye tɔ̀ ne wɛ, mɛ na wɔ ye ma hõ ka kakiri dige ngwona da na sanga pepe ma. Ka tĩyã na bɛrɛda ngwĩye mɔ, ka tine ka nyanga ngwõwɔ na basyɛ. 13 Hõ mɛ to ni na, mɛ dyati da a fɔro ma hõ ka kakiri dige kɔ ngwona da nemɛ. 14 Mɛ tɔ̀ da zɔgɔta mɛ na sa bo komavere hõ wɔkara kyà Matigi Yesu Krista a dɔrɔ mɛ ma ngwɛne. 15 Mɛ na ne nyanga ngwõfatɔ mɛ siri wɛ timi ma, ka hõ sebɛ ka kakiri to ngwona da na sanga pepe ma. 16 Mɛ̀ mane Matigi Yesu Krista ta sebɛbe kɔ a ta na da yera ka ma ngwĩ sanga ma, mɛ̀ ha mane ngwõ gũ kɔ ke tamɛ ta sĩyɛ̃ na nyenamakwiyɛye nemɛ ga. Mɛ̀ yɛrɛ mana ta tino na yireyi za. 17 Tõ Wuro mana yirebɛ hõ noro dɛ a ma ngwĩ sanga ma, mɛ̀ mane ti yɛ. Ngwona sanga ma bɛri kõ sa Noro na yireyi na te ta hõ da: Bo ne no na kanuyi, a da dya ne ma hale. 18 Mɛ̀ mane ti kɔ le ngwona Wuro yirebɛ tolo ngwõ̀ ma ngwĩ sanga ma, mɛ̀ yɛrɛ ngwona bɛri kõ mɔ. 19 Ngwona da pepe a dɔrɔ da pururi bɛrɛda ngwĩye yera, ye mane tĩyã. Ngwona bɛrɛda mane tɛ wɔkara lãpa ngwĩ ngwõ kini sabɛ tunungu hõ sane kɔ hõ kyɛ, fɔ kɔ kyɛ do ma mumulu hõ kini sabɛ ka kɔrɔ hõ. Ne ka hõ ka kakiri to ngwona bɛrɛda na, ngwõ fõ. 20 Hõ yalo da pepe ma, ka daga na tɔ̀ da sõ si ha sebɛne pururi ta bɛrɛda kɔrɔ tɔ̀ ye yɛrɛ ma ga, ngwĩye gũ Wuro ta bɛrɛda hõ. 21 Puruta si ha ye yɛrɛ dungo na bɛrɛda yera abada ga. Ni na kìnìyi mane sɔma zĩ fɔga, ye mane Wuro yɛrɛ ta bɛrɛda yera.
21 Pururi na nĩyõsɔre mane ti sɔma woro hõ ngwɛne gwerena, yee nemɛ kalamogi na nĩyõsɔre na ti ka woro hõ mɛ. Ye na na kɔ nĩyõ na kala bɔ nemɛ ngwĩye sɔma firebɛ. Matigi ngwĩ mane ye ngwonawa, ye na maga ngwõ hõ. Yee nemɛ, halakibe na bɛrɛ ye ma sale. 2 Sɔma nyaa na dɔ ye ta kakala da na yagaye ma. Sɔma na tĩyã na sogo togo yaga yewɔ yena. 3 Ngwona kalamogi na nĩyõsɔre nyena nyaa. Ye na firebɛ bɛrɛda yera ka ma ngwõfatɔ ye gwana gũ. Ye ta kiti da pepe tetɛrɛ wɛ. Ngwĩ na ye yɛ, ngwõ ha nyi ga. 4 Mɛlɛkɛe ngwĩye ngwõ kakye ta, Wuro ha makare ngwõwɔ na ga. A ngwõwɔ dira dyahanama kɔrɔ hõ. Ye pɛrɛɛ ngwɛ̃ tunungu hõ ne kiti kɔ yɛ̀rɛ̀. 5 Wuro ha makare diniya biri na mɛ ga. A mane zu fane ngwona dayagatɛsɔma ma. Nuhũ ngwĩ mane telebe na wadyuli ta kɔ sɔma kopɔra bɔ, ngwõwɔ dama mane dɛ zu ta. 6 Wuro Sodome kɔ Gomore kire zarake hõ togo ka ye ma ne ngwona. A ngwõ ta zɛngɛdɔre da na sɔma yaga ma na dɔrɔ ye ma da ngwõ nemɛ na tɛ ye na mɛ. 7 A mane sõ tele Loti kisi. Ngwõ ni na mane bã fɔrona ngwona dayagatɛre ta kakalabe yena. 8 Ngwona sõ tele mane tanga ye woro hõ ne ta tɛda za ne ta bɛrɛda mɔ. A mane nyane ye yɛrɛ kɔrɔ na teleyi hõ kɔ pepe ma ye ta dayaga yena. 9 Yee nemɛ, Matigi sebɛne Wuro nyononakwãsɔma wa kɔrɔwɛbe hõ. A sebɛne telebariysɔma tege ngwona nyane yena ngwĩ na tɛ ye na kiti kɔ ma. 10 Sangofere ngwĩye ngwõ ya komavere na dumatɛbe na wu hõ, hõ sĩ Wuro ta ngwonakɔmabe na. Ngwona kalamogi na nĩyõsɔre wora sige, ye ye yɛrɛ dungo na da ta. Ye ha kwã hõ wuro hõ fangamɛ vini ga. 11 Hale mɛlɛkɛe ngwĩye barika kɔ ye ta sebɛbe ngwõ yireyi yeyi ma, ngwõwɔ ha ngwõ nemɛ na zarake bɛrɛda kɔ vini bɛrɛda yera Wuro zĩ hõ ga. 12 Ngwona kalamogi kwane, ye tɛ wɔkara kibe fere, kakiri ha ti ngwĩye ta ga. Ye vɔrɔngwõ̀ ngwõ bo, ngwõfatɔ sɔma hõ ne fɔga ne yɛ. Ye ha da ngwĩye tɔ̀ ga, ngwõ na ye vini. Ye na yɛɛ wɔkara ngwona kibe fere. 13 Ye mane telebariya da ngwĩye ta hõ sɔma nyane, ye na sara gũ hõ kanya kɔ ngwõ nemɛ. A dya ye ma hõ kakala da ta sĩ hõ. Ye kwe ne zõ kɔ ka nemɛ hõ ni hõ dya ye yɛrɛ ta firebɛ da na. Ye ta da tɛ piri da na yireye na fɔrona. 14 Ye nyena pagaa kakalabe na. Ye ta dayaga na wu ha wɛ ga. Sɔma ngwĩye kakiri ha tanga ga, ye ngwõwɔ dyebɛ. Ye miri gwana da na ye kɔrɔ hõ suute. Wuro ye voda. 15 Ye sogo na teleyi dira hõ fire. Ye ti Bosore no Balame ta sogo ma. Awe kwane gwana ngwĩ gũ dayagatɛbe hõ, ngwõ mane dya a ma. 16 Nka a mane zarake a yɛrɛ ta kwɛ̃dirɛbe yena. Samare ngwĩ ha sebɛne bɛri ga, ngwõ bɛri kɔ sõ kõ nemɛ hõ ngwona puruta na kakiridɛgɛta taabɛ. 17 Ngwona sɔma tɛ wɔkara pɛ̃zu na yarayi. Ye tɛ wɔkara dabara, panga ngwĩye tirɛ. Wuro bi hõ tetɛrɛ ye ma tunungu na dunguyi hõ. 18 Ye yɛrɛyirebɛ bɛrɛda na zanaye yera. Sɔma ngwĩye sa sye ha dɛrɛ firebɛ sogo na ya sɔma soro hõ ga, ye ngwõwɔ dyebɛ kɔ komavere na wu nemɛ. 19 Ye da ye na ngwona sɔma ta vɛnɔma na nka yewɔ yɛrɛ kakalabe ta tɛrɛ. Fa pepe ngwĩ ngwõ sebɛbe gũ sõ ma, a ngwõ ta tere. 20 Sɔma sa wɛ timi diniya da na dõõye hõ kyà Matigi kɔ kyà Kisita Yesu Krista ta tɔbe barika hõ, ne ngwona da na wu hõ ne fɔga ngwõ timi hõ sebɛbe gũ ye ma, ye ta da na wɛbɛyi na yagayi hõ yaloyi gwerena ma. 21 Fane na kìnìyi ngwĩ mane yera ye ma, ne ye hõ ngwõ tɔ̀ hõ ngwõ tege, a mane fõ ye ma ne ye ma mane telebe na sogo ta da tɔ̀ ga. 22 Dakalo bo da— Gwege bere ya byã ma ne zõ. Be tege mi, a ye bere ya pilemile vɔlɔ hõ. Ngwona da tĩyã ye ta piri ma na.
31 Mɛ syenɔmane na kanuye, bo mya sɛbɛ na pɔlalo, ma ngwĩ fane ka ma. Mɛ ka kakiri dige bɔ da na ngwona sɛbɛ pɔla pepe hõ, hõ miri na fɔroyi ka ka kɔrɔ hõ. 2 Purusɔma na kiniye mane pya bɛrɛda ngwĩye yera hõ sa kyà Matigi kɔ kyà Kisita ta, mɛ tyata ka ka kakiri dige ngwõ na. 3 Ka daga pya bɔ tɔ̀ dɛ̃ da diniya wɛ sanga ma sɔma bɔ na na ngwĩye na ya hõ kanya kɔ ye yɛrɛ ta wu na yagayi nemɛ. 4 Ye na ka zi hõ da ye: A mane datege bi ye ye na na. We a ti? Ke tamɛ siri wɛ nka na dofɔga diniya tege sanga ma fɔ ya wiri basyɛ fere pepe ti ye tino na. 5 Bɔ sɔma ha dyã ngwona tĩyã tɔ̀ ga, ye gweregwerena Wuro bɛri hõ wurokõ tege kɔ lagakõ. Lagakõ mane sa zu hõ, hõ tetɛrɛ kɔ zo nemɛ. 6 Zu na hõ diniya biri yaga mɛ. 7 Wurokõ kɔ lagakõ ngwĩye tye basyɛ, ngwõwɔ tegee ngwona Wuro ta bɛrɛda tala barika hõ, fɔ ye hõ yaga togo hõ. Wuro na kiti sɔ sɔma yaga ma hõ ne yaga ngwĩ kɔ ma, ye tegee fɔ ngwona sanga ma. 8 Mɛ syenɔmane na kanuye, ka ka sãfire kɔ bo fa tala nemɛ ga, ye sinala ti Matigi nyena hõ wɔkara dɔgɔ zofũ. Dɔgɔ zofũ ne ti a nyena hõ wɔkara sinala mɛ. 9 Matigi datege ngwĩ bi ke ma, a ha na syedɛrɛ hõ ngwõ dopaga ga, wɔkara sɔma bɔ dyati ngwɛne. Nka a somɔna ke yena. A ha tyata sõ si fire ga. A tyata sɔma pepe hõ ye kɔrɔ bere dayaga ta da na. 10 Matigi ta kɔ na na wɔkara pano na ngwɛne. Ngwona kɔ ma wurokõ na fɔno kɔ digedige kõ na yireyi nemɛ. Togo na yireyi na a na tetɛrɛ fere fɔga, ye na yuu. Lagakõ kɔ a kɔrɔ hõ fere na wɛ. 11 Ne ngwona fere hõ ne na yaga yee, ki daga tɛ ne na sɔma sye na? Ka daga kwã Wuro na hõ ya yano tele na. 12 Ka daga Wuro ta kɔ na nayi yɛ̀rɛ̀. Ka kya sebɛbe pepe ta ngwõfatɔ a hõ na sale. Ngwona kɔ ma togo na wurokõ ngwona hõ na yaga. A na tetɛrɛ fere na yuu ngwona togo na yireyi hõ. 13 Wuro wurokõ ngwũ kɔ lagakõ ngwũ na datege ngwĩ bi ke ma, ke tine ngwõ yɛ̀rɛ̀. Telebe na tanga ngwõwɔ kɔrɔ hõ. 14 Ngwõ yena, syenɔmane na kanuye, hõ ka to ka ne ngwona kɔ yɛ̀rɛ̀, ka ka nyanga ngwõfatɔ ka na dõõbariyaye na zarakebariyaye hõ gũ Wuro zĩ hõ. Syara hõ wɔ ka yɔ. 15 Ka hõ na dyati da kyà Matigi somɔnabe ta ngwõfatɔ ka hõ kisi, wɔkara ke syenɔ na kanuyi Pauli ye yera ka ma a ta sɛbɛ hõ ngwɛne hõ kanya kɔ kakirikɔmabe nemɛ, Wuro ngwĩ pera ma. 16 Ne a hõ bɛri ngwona da na a ta sɛbɛ hõ, yee a tɛne ngwõ sɛbɛ yee. Da bɔ ti ngwona sɛbɛ hõ ngwĩye tɔ̀ ba. Sɔma ngwĩye da tɔ̀ ga ane ngwĩye kakiri ha tanga ga, ngwõwɔ ngwona bɛrɛda kɔrɔ berebɛ wɔkara ye ngwõ ta Wuro ta bɛrɛda sɛrɛ hõ ngwɛne. Ye ye yɛrɛ yaga. 17 Mɛ syenɔmane na kanuye, ka ngwona da tɔ̀ ne wɛ. Ngwõ yena ka ka yɛrɛ kɔrɔse ngwõfatɔ sɔma yaga ka na ka suru hõ ka firebɛ hõ ka kãe wa bi hõ na sigeyi hõ ga. 18 Ka ya zĩ nema na ane kɔ kyà Matigi kɔ kyà Kisita Yesu Krista na tɔbe na. Noro hõ dɛ awe ma basyɛ fɔ sanga tege ma. Amina.