2 ZÃ

¹ Mɛ eglise somɔlalo bo sɛbɛ fane Wuro ta yà fɔro na dɛ̀gɛ̀wɛyi kɔ a nɔmane ma. Mɛ ka kanu syɛbɛ na. A ha mɛ sonala ngwõ ka kanu ga, mɛ kɔ tĩyanatɔre pepe mɛ. ² Tĩyã wɔ ke hõ, a na ti kɔ ke nemɛ fɔ abada. ³ Nema kɔ yafabe kɔ syara hõ wɔ ke ta hõ sa Tõ Wuro kɔ a Nonanimisĩ Yesu Krista hõ. Ye hõ tɛ kiyi na tĩyã kɔ kanube na. ⁴ Mɛ ni hõ dya fɔrona hõ na za da be nɔmane bɔ ya tĩyã na sogo ma, wɔkara ke fane gũ ke Tõ ta ngwɛne. ⁵ Yà fɔro, mɛ be mɛ basyɛ, ka to ke ke nemɛ kanu. A ha tɛ wɔkara fane na ngwũyi mɛ ngwõ sɛbɛ ga, fɔ fane na biriyi ngwĩ mane pya ne tye gweregwerena. ⁶ Kanube ngwõ boo, ye ke ya kanya kɔ Wuro ta fane nemɛ. Ka fane ngwĩ mɔ gweregwerena, ye ngwõ, ngwõfatɔ ka hõ ya kanya kɔ ngwõ nemɛ. ⁷ Sɔma firebɛre na nyaaye ti diniya hõ. Ye da ye Yesu Krista ha mane bere tɛ sõ na ga. Ngwõwɔ ngwõ nĩyõsɔre kɔ Krista zugi. ⁸ Ka ka yɛrɛ kɔrɔse rɛ ngwõfatɔ ka ngwĩ bara ta, ka ka na bono ngwõ hõ ga. Nka ka daga sara na dopagayi gu. ⁹ Sõ ngwĩ ngwõ ya zĩ, mane wɔ Krista ta kala ma ga, Wuro ha ti ngwona te ta ga. Sõ ngwĩ ngwõ wɔ ngwona kala ma, Tõ Wuro kɔ a Nonanimisĩ ti ngwõ ta. ¹⁰ Ne sõ bo hõ na ka birɛ, ne a ma na kɔ ngwona kala nemɛ ga, ka ka ngwona sõ vɛbɛ kya kõ hõ ga. Ka ka bire a na mɛ ga. ¹¹ Ngwĩ ngwõ bire a na, ngwõ tɛ a nemɛ bo na a ta tɛda yaga na. ¹² Da nyaa ti ne ta hõ ne yera ka ma nka mɛ ha tyata ngwõ ta kɔ papiye kɔ lãkiri nemɛ ga. Mɛ tyata ya ka birɛ hõ bɛri ka ta do kɔ do ngwõfatɔ kyà nihõdyaro hõ dopaga. ¹³ Be syenɔma yà ngwĩ tɛ Wuro ta dɛ̀gɛ̀wɛyi na mɛ, ngwõ nɔmane bire be na.