2 KORƐ̃TE KƆMA
11 Mɛ Pauli kɔ ke syeno Timote, mɛ̀ bo letere fane ka ma. Mɛ tɛ Yesu Krista ta faneta na Wuro dungo barika hõ. Mɛ̀ bo letere fane Wuro ta eglise ma ngwĩ ti Korɛ̃te kuru hõ kɔ Wuro ta sɔma pepe ma ngwĩye ti Akayi gana hõ. 2 Ke Tõ Wuro kɔ Matigi Yesu Krista hõ nema kɔ syara ta ka ma. 3 Ke daga barika yera Wuro ma. A tɛ Matigi Yesu Krista Tõ na. Tõ ngwĩ ngwõ pagaa makare na, Wuro ngwĩ ngwõ ke zigi tugu da pepe na. 4 A mɛ̀ zigi tugu myà nyane da pepe na ngwõfatɔ sɔma nyane sifa nyaa ngwĩye gũ, ke sebɛne ngwõwɔ dyema. Wuro mɛ̀ zigi tugu ngwɛne, ke hõ sebɛ ngwõwɔ zigi tugu yee mɛ. 5 Yee nemɛ, mɛ̀ mɛ̀ nii bi Krista ta nyane da na nyaaye na. Ngwõ yena mɛ̀ zigitugube na yireyi gũ hõ sa Krista ta mɛ. 6 Ne mɛ̀ hõ nyane, mɛ̀ ngwõ ta ngwõfatɔ ka hõ zigitugube kɔ kisibe gũ. Ne mɛ̀ hõ zigitugube gũ, ki na zigitugube gũ mɛ hõ nyane da somɔna wɔkara mɛ̀ ngwona nyane somɔna ngwɛne. 7 Mɛ̀ zigi ti ka ma fɔrona. Mɛ̀ tɔ̀ da ka nii gũ myà nyane da na ngwɛne, ka nii gũ myà zigitugube na yee mɛ. 8 Syenɔmane, mɛ̀ nyane da ngwĩye gũ Asi gana hõ, mɛ̀ tyata ka hõ ka kakiri dige ngwona da na. Ngwona nyane da na bye mane tɛnɛ fɔno fɔ hõ yaloyi myà sebɛbe ma. Mɛ̀ zigi pepe mane sɔ da mɛ̀ ha na dɛɛ ga. 9 Mɛ̀ yɛrɛ mane dyati da myà siri da latege wɛ Wuro ta. Nka ngwõ mane tɛ ngwõfatɔ ke hõ ke zigi dɛ Wuro sonala ma ngwĩ ngwõ sara ngwini. Ke ka ke zigi dɛ ke yɛrɛ ma ga. 10 Wuro mɛ̀ wa ngwona siri da hõ, a na ke wa yɛ mɛ. Ke zigi ti a ma da a na ke wa ngwõ timi yɛ mɛ. 11 Ne ka hõ mɛ̀ dyema kɔ mɛbe nemɛ, Wuro na kya mɛbe na yireyi mɔ ka ngwĩ ta myà piri ma na. Wuro na duba mɛ̀ ma. Sɔma nyaa na barika yera Wuro ma myà da na. 12 Mɛ̀ mɛ̀ yɛrɛ yirebɛ da ngwĩ na, bo ngwõ: Mɛ̀ ngwõ tɔ̀ mɛ̀ yɛrɛ kɔrɔ hõ da myà yano bɛ diniya hõ kɔ ka woro hõ, ngwõ mane kìnì Wuro nyono na. Ngwõ tɛ Wuro ta nema barika hõ, a ha tɛ sɔma ta kakirikɔmabe barika hõ ga. 13 - 14 Ka sebɛne bɛrɛda ngwĩye kala ne kɔrɔ tɔ̀, mɛ̀ ngwõ dama sɛbɛ ne fane ka ma. Ka da ngwĩye tɔ̀ zɔgɔta basyɛ, mɛ tyata ka ngwona da tɔ̀ fɔrona ngwõfatɔ Matigi Yesu ta kɔ ma ka sebɛne ka yɛrɛ yirebɛ myà da na wɔkara mɛ̀ na mɛ̀ yɛrɛ yirebɛ kya da na ngwɛne. 15 Mɛ zigi mane ti ka ma ngwona da na. Ngwõ yena mɛ mane pya na latege da ma na ya ka birɛ ngwõfatɔ ka hõ duba na pɔlalo gũ. 16 Mɛ mane tyata do ka birɛ hõ ya Masadwane. Ngwõ timi ne ma hõ tuma Masadwane, ma na bere do ka birɛ yɛ ngwõfatɔ ka ne dyema na ya da na Zude gana hõ. 17 Ka dyati da ma ngwõ ta kɔ kakiritangabariyabe nemɛ ra? Ne mɛ hõ da latege, ma ngwõ ta hõ miri ne yɛrɛ ta da na damaye ra? Mɛ da hõõ, hõ bere da awo ngwona no tala hõ ra? 18 Wuro nyomata ngwɛne, ma mane ngwĩ fa yera ka ma, ngwõ ha mane lamara da ga. 19 Mɛ kɔ Silivɛ̃ kɔ Timote mane Yesu Krista Wuro Nonanimisĩ ta da yera ka ma. Ngwõ ha mane lamara da ga, ngwõ Wuro ta tĩyã. 20 Wuro mane datege pepe ngwĩye bi, Yesu ngwõwɔ pepe dopaga. Ke amina yera Yesu barika hõ, hõ noro dɛ Wuro ma. 21 Wuro mɛ̀ kɔ ki kwe ke sabati Krista hõ. Wuro yɛrɛ ngwõ ke tege. 22 A ya tɔ̀bɛ dɛ ke ma. Ke na fere ngwĩye gũ Wuro ta, a Ni na kìnìyi ka ke kɔrɔ hõ, hõ tɛ ngwona fere na gwereyi na. 23 Wuro tɛ mɛ syere na. A mɛ kɔrɔ hõ da tɔ̀. Ka na makare mane mɛ fɔga. Ngwõ yena mɛ ha dyã ya Korɛ̃te ga. 24 Ka daga la ngwĩ na, mɛ̀ ha tyata ngwõ yera ka ma kɔ fanga nemɛ ga. Ka yɛrɛ taa fɔrona lanabɛbe hõ. Mɛ̀ tyata hõ kwe bara ta kɔ ka nemɛ ka na nihõdyaro yena.
21 Mɛ ha mane tyata ka ni ye bere bã yɛ ga. Ngwõ yena mɛ da ma ha na ya ka birɛ titiri ga. 2 Ne mɛ hõ ka ni na bã, kɔ na ne ni hõ dyabɛ? Fɔ ki, mɛ mane ngwĩye ni na bã. 3 Ngwõ yena mɛ ngwona sɛbɛ fane ka ma. Ki ngwĩye mɛ ni hõ dyabɛ, mɛ ha mane tyata ka ni na bã ga. Mɛ tɔ̀ da mya nihõdya da ngwõ kya nihõdya da mɛ. 4 Mɛ ni na na bãyi kɔ ne kɔrɔ na mɔgɔyi kɔ mɛ nyenzayo na woroyi mane ngwona sɛbɛ fane ka ma. Mɛ ha ngwõ ta hõ ka ni na bã ga. Mɛ ngwõ ta ngwõfatɔ mɛ ka kanu fɔrona ngwɛne, ka hõ ngwõ tɔ̀. 5 Ne sõ bo hõ ninabã da bo ta, ngwõ ha mɛ ni na bã ga. A mane ka na bɔ ni na bã nka ye ha ki pepe ga. 6 Sɔma nyaa nyenahõtogo ngwĩ dɛ ngwona te ma, ngwõ a wa. 7 Ka daga yafa a ma basyɛ hõ na woro sigebɛ ngwõfatɔ a ni na ka na bã fɔno hõ na barika wɛ ga. 8 Ngwõ timi mɛ ka mɛ da ka kanube dɔrɔ a ma. 9 Ngwõ yena mɛ mane ngwona sɛbɛ fane ka ma ngwõfatɔ hõ ka ta ka sege, ne ka hõ ne mɛ kwɛ̃ fɔga da pepe na. 10 - 11 Aiwa, ne ka hõ ne da bo yafa sõ bo ma, mɛ na ngwõ yafa a ma mɛ. Ne mɛ hõ ne da yafa bo ma, mɛ ngwõ yafa a ma ki yena Krista nyono na ngwõfatɔ Setane ka na sebɛbe gũ ke ma ga. Ke a ta tɛda tɔ̀ fɔrona. 12 Mɛ mane ya Tirowasi kuru hõ, hõ Krista na Bɛrɛda Fɔre yera. Mɛ wiri yɛ ngwĩ sanga ma, mɛ a za da Matigi mane do na yireyi kɔba ne ma hõ bara ta. 13 Mɛ ha mane ke syeno Tite za ngwɛ̃ ga. Ngwõ yena mɛ nimisã ngwona da na hõ sogo mɛ ye ta hõ ya Masadwane. 14 Ke barika yera Wuro ma. Ke kɔ Krista kwe tɛ tala sebɛbegũbe na. Ke ke kuru kwe hõ dɔ Krista ma. Wuro bara pere ke ma hõ Krista dɔrɔ bi pepetai hõ wɔkara ngwunu dya fa ngwĩ ngwõ ngwunu ne sa bi pepe hõ. 15 Ke tɛ wɔkara wusu na na ngwunu dyayi Krista ngwĩ ngwona Wuro zĩ hõ. A ngwunu sa hõ wiri sɔma pepe ma, sɔma ngwĩye ti kisibe na sogo ma kɔ sɔma ngwĩye ti firebe na sogo ma. 16 Ngwõ tɛ wɔkara siri na ngwunu sɔma ma ngwĩye ti firebe na sogo ma. A tɛ sugunɔmabe na ngwunu na sɔma ta ngwĩye ti kisibe na sogo ma. Kɔ ngwõ sebɛne ngwona bara ta? 17 Mɛ̀ tɛ Krista ta baratɛsɔma na, Wuro mɛ̀ fane. Mɛ̀ tĩyã na bɛrɛda yera Wuro nyono na. Mɛ̀ ha tɛ wɔkara sɔma bɔ ngwĩye ngwõ Wuro ta bɛrɛda ta wɔkara dyako tɛ fere ga.
31 Ka dyati da mɛ̀ mɛ̀ yɛrɛ toga fɔro yera yɛ ra? Mɛ̀ mako ti toga fɔro yera sɛbɛ na hõ ngwõ pere ka ma wɔkara bɔ sɔma sɛrɛ mako ti ye na ngwɛne wala mɛ̀ mako ti ngwõ na hõ sa ka birɛ ngwɛ̃ ra? 2 Ki yɛrɛ ngwõ tɛ myà toga fɔro yera sɛbɛ na. A sɛbɛɛ mɛ̀ kɔrɔ hõ, sɔma pepe ngwõ tɔ̀ na kala. 3 A kìnì fɔrona da Krista yɛrɛ ngwona sɛbɛ sɛbɛ. A ba sɛbɛɛ kɔ lãkire zu nemɛ ga. A sɛbɛɛ kɔ Wuro Ni nemɛ. A ha sɛbɛɛ dɔgɔno na walaga ma ga, a sɛbɛɛ mɛ̀ kɔrɔ hõ. 4 Zigi na fɔroyi ti ke ta Wuro ma Krista barika hõ. Ngwõ yena mɛ̀ ngwona da yera. 5 Mɛ̀ ha sebɛne da bo sa mɛ̀ yɛrɛ hõ ga. Myà sebɛbe ngwõ sa Wuro ta. 6 Wuro ngwõ mɛ̀ ta datege na ngwũyi na baratɛre na. Ngwona datege ha tõ na sɛbɛye ga, ngwõ Ninayi. Tõ na sɛbɛye ngwõ sõ yɛ nka Ni ngwõ sõ sugubɛ. 7 Tõ na sɛbɛye mane sɛbɛɛ dɔgɔno na walaga ma ngwĩ sanga ma Wuro ta noro mane zi Musa zĩ ma. A ne wɔlɔ fɔrona fɔ Israyɛli kɔma ha mane sebɛna sege ga. Nka ngwona noro mane wɛ a zĩ ma. Tõ ta bara ngwõ sõ yɛbe. Ngwona tõ mane dɔre kɔ noro nemɛ. 8 Nka Ni na kìnìyi ta bara dɔre kɔ noro nemɛ ngwĩ ngwõ yireyi hõ yaloyi ngwõ ma fɔrona. 9 Bara ngwĩ mane sɔma yɛ, noro mane ti ngwõ ma. Bara ngwĩ ngwõ sɔma ta sɔma tele Wuro zĩ hõ, ngwõ na noro daga yireyi ngwõ ma ga ra? 10 Aiwa, noro ngwĩ mane pya ne tye gwerena ngwõ ha tye titiri ga kamasɔrɔ noro ngwĩ tye basyɛ, ngwõ fõ kɔ gwereyi nemɛ fɔrona. 11 Fa ngwĩ wɛ, ne ngwõ hõ na kɔ noro nemɛ, fa ngwĩ ngwõ wɛ ga, ngwõ ta noro daga yireyi ngwõyi ma fɔrona. 12 Ngwona zigi na yireyi ti ke ta. Ngwõ yena worasigi ti ke ta. 13 Ke ha tɛ wɔkara Musa bahõ ga. Awe mane zogo pĩ ye zĩ ma ngwõfatɔ ngwona noro hõ ne dibɛ ngwĩ sanga ma Israyɛli kɔma ka na ngwõ za ga. 14 Ye kakiri mane dɛgɛ fɔno ngwona da ta famube ma. Hale sɔma, ne ye ne Datege na biriyi kala ngwĩ sanga ma a tɛ wɔkara ngwona zogo pĩĩ ye ma yɛ. Sõ ngwĩ ngwõ kwe kɔ Krista nemɛ, ngwona zogo wɛ a zĩ ma ngwona sanga ma. 15 Hale sɔma, ne ye ne Musa ta tõ na sɛbɛ kala ngwĩ sanga ma, a tɛ wɔkara zogo pn ye kakiri ma. 16 Nka a sɛbɛɛ Wuro ta bɛrɛda hõ da: Sõ ngwĩ ngwõ bere Matigi ma, ngwona zogo wɛ a zĩ ma. 17 Aiwa, ngwona Matigi ngwõ kɔrɔ Ni na kìnìyi. Matigi Ni ti ngwõ ngwɛ̃, sɔma tɛ vɛnɔmane na ngwɛ̃. 18 Sõ sebɛne Matigi ta noro za ke hõ wɔkara sõ sege ne zɛ dubale hõ ngwɛne. Zogo ha pĩĩ ke zĩ ma ga. Ngwona noro sa Matigi ta Ni ta. A ke berebɛ ke ta Matigi dya na. Fa kwe ngwona noro ma sanga pepe ma.
41 Wuro makare mɛ̀ na hõ mɛ̀ ka bo bara hõ. Ngwõ yena mɛ̀ zigi ha na sɔ ga. 2 Peremaga da ngwĩye tɛ tunungu hõ, mɛ̀ maga ngwona da pepe hõ. Mɛ̀ ha ya nyenamakwiyɛbe na ga. Mɛ̀ ha Wuro ta bɛrɛda ta wɔkara nĩyono na da ga. Mɛ̀ tĩyã yera na kìnì ngwõfatɔ sɔma pepe tala tala hõ mɛ̀ toga fɔro yera Wuro zĩ hõ. 3 Mɛ̀ Bɛrɛda Fɔre ngwĩye yera, ne ngwona bɛrɛda hõ ne dõ sɔma na, ye dõ sɔma na ngwĩye ti firebe na sogo ma. 4 Bo diniya ta yirebɛ fa na yagayi ngwõwɔ kakiri muro. Ngwõ yena ye ha lanabɛbe ta ga. Ngwona yirebɛ fa ye bare hõ Bɛrɛda Fɔre na kini za. Ngwona kini sa Krista ta noro hõ, Krista ngwĩ tɛ Wuro dya na. 5 Mɛ̀ ha mɛ̀ yɛrɛ ta da na wadyuli ta ga. Mɛ̀ Yesu Krista ta da na wadyuli ta. Awe ngwõ Matigi. Mɛ̀ tɛ kya baratɛre na Yesu yena. 6 Wuro ngwĩ mane da ye kini sa tunungu hõ, ngwona Wuro ya kini sabɛ ke kɔrɔ hõ ngwõfatɔ ke Wuro ta noro na kini tɔ̀, ngwĩ ngwõ wɔlɔ ne sa Krista zĩ ma. 7 Wuro ta nafɔro ti mɛ̀ ngwĩye ta, mɛ̀ tɛ wɔkara vere sya bahõ, na dɔrɔ da ngwona sebɛbe na yireyi ngwõ Wuroyi, ngwõ ha sa mɛ̀ hõ ga. 8 Mɛ̀ nyane nyaneno si pepe na, nka mɛ̀ kakiri ha yaga ga. Mɛ̀ kakiri nyangamu nka mɛ̀ zigi ha sɔ ga. 9 Sɔma dɔ mɛ̀ ma hõ mɛ̀ nyane nka Wuro ha mɛ̀ dira ga. Sɔma mɛ̀ bi mɛ̀ bɛrɛ lɔ ma nka mɛ ha siri ga. 10 Mɛ̀ kwɔ siri na da hõ kɔ pepe ma wɔkara Yesu mane tɛ ngwɛne ngwõfatɔ a ta sugunɔmabe hõ ye dɔrɔ mɛ̀ komavere hõ. 11 Mɛ̀ kwɔ siri na da hõ sanga pepe ma Yesu yena ngwõfatɔ a ta sugunɔmabe hõ ye dɔrɔ mɛ̀ komavere na siriye hõ mɛ. 12 Yee nemɛ, siri bara ta mɛ̀ kɔrɔ hõ nka sugunɔmabe bara ta ka kɔrɔ hõ. 13 Wɔkara a sɛbɛɛ Wuro ta bɛrɛda hõ da: Mɛ lanabɛbe ta, ngwõ yena ma bɛri. Mɛ̀ lanabɛbe ta mɛ, ngwõ yena mɛ̀ bɛri. 14 Wuro ngwõ Matigi Yesu ngwini. Mɛ̀ tɔ̀ da ngwõ na mɛ̀ kwe mɛ ngwini kɔ Yesu nemɛ mɛ hõ mɛ̀ kɔ ki kwe Yesu zĩ hõ. 15 Ngwõ pepe tɛ ki yena. Yee nemɛ Wuro ta nema daga nyaa ya zĩ sɔma nyaa ta. Ngwona sɔma ta barika yerabe na nyaa fɔrona hõ noro dɛ Wuro ma. 16 Ngwõ yena mɛ̀ zigi ha sɔ ga. Hale ne mɛ̀ komavere hõ yaga, mɛ̀ ni na sugu kɔ pepe ma. 17 Myà basyɛ nyane na zɔgɔ na noro na yireyi tetɛrɛ mɛ̀ ma ngwĩ ngwõ na wɛ ga. Ngwõ na yireyi hõ yaloyi bo nyane ma. 18 Da ngwĩye ngwõ zɛ, ngwõ na wɛ sale. Mɛ̀ ha ngwona da dyati ga. Nka da ngwĩye ngwõ zɛ ga, ngwõ ha na wɛ ga. Ngwõwɔ mɛ̀ ngwõ dyati.
51 Ke komavere tɛ wɔkara kõ ke tanga ngwĩ hõ bɛ diniya hõ. Ngwona kõ hõ yaga ngwĩ sanga ma, Wuro na kõ za pere ke ma wuro hõ. A yɛrɛ ngwona kõ tetɛrɛ, ngwõ ha na yaga ga. 2 Hõ ke to bo kõ hõ, ke mana. A dya ke ma fɔrona hõ kwɔ kyà wuro hõ kõ hõ. 3 Ne ke hõ kwɔ ngwõ hõ, ngwõ na tɛ ke komavere na. 4 Hõ ke to bo kõ hõ, ke mana wɔkara bye ngwõ dɛɛ ke ngwã hõ. A ha tɛ wɔkara ke tyata sa bo kõ hõ ga nka ke tyata hõ kwɔ kyà wuro hõ kõ hõ. Ngwona sanga ma sugunɔmabe na sebɛbe gũ siri ma. 5 Wuro yɛrɛ ngwõ ke tetɛrɛ yee ngwõfatɔ ke hõ sa bo hõ, ke kwɔ wurohõye hõ. A Ni na kìnìyi pere ke ma hõ na ta kyà perefa na gwereyi na. 6 Ngwõ yena ke wora sige sanga pepe ma. Ke tɔ̀ da hõ ke to bo komavere hõ, ke birɛ dɛrɛ Matigi na. 7 Ke ya lanabɛbe barika hõ. Ke da ngwĩye za, ke ha ya ngwõ ma ga. 8 Ke wora sige. A dya ke ma hõ sa bo komavere hõ, hõ ya wɔ Matigi birɛ, ngwõ fõ. 9 Ne ke ne ti bɛ wala ke ne ti wuro hõ, ne kyà da hõ ne dya Matigi ma, ngwõ dyayi ke ma hõ yaloyi da pepe ma. 10 Ke pepe daga taa Krista zĩ hõ kiti sɔ do hõ. Sõ daga kɔ ngwĩ fa nemɛ hõ kanya kɔ a ta diniya hõ tɛda nemɛ, dafɔre o, dayaga o, a na ngwõ gũ ngwona sanga ma. 11 Sõ daga kwã Matigi na ngwɛne, mɛ̀ ngwõ tɔ̀. Ngwõ yena mɛ̀ ngwona da yera ne kìnìbɛ sɔma ma. Wuro myà da pepe tɔ̀ fɔrona. Mɛ tyata ki hõ mya da pepe tɔ̀ fɔ hõ wiri ye na. 12 Mɛ̀ ha mɛ̀ yɛrɛ toga fɔro yera ka ma damaye ga, nka mɛ̀ tɛno pere ka ma hõ ka yɛrɛ yirebɛ myà da na. Sõ ngwĩ ye yɛrɛ yirebɛ komavere ta da na kasɔrɔ a mane ye kɔrɔ hõ da dyati ga, ma tyata ka hõ bɛrɛda gũ hõ ne yera ngwõwɔ ma. 13 Ne mɛ̀ kakiri hõ tuma, ngwõ tɛ Wuro yena. Ne mɛ̀ kakiri hõ tanga, ngwõ tɛ ki yena. 14 Ke ngwĩye ngwõ tɔ̀ da sonala ngwõ siri sɔma pepe yena, basyɛ Krista ta kanube tanga ke ngwã na. Hõ da sonala ngwõ siri sɔma pepe yena, ngwõ kɔrɔ sɔma pepe nii gũ a ta siri da yena. 15 A siri sɔma pepe yena ngwõfatɔ sɔma ngwĩye ngwõ sugu, ye ka sugu ye yɛrɛ dungo na da yena titiri ga. Nka ngwĩ ngwõ siri ye yena hõ ngwini sa, ye daga sugu ngwõ dungo na da yena. 16 Ke ha sõ si sege titiri wɔkara sɔma sõ sege ngwɛne ga. Ke mane Krista sege wɔkara sɔma sõ sege ngwɛne, nka basyɛ ke ha na a sege yee titiri ga. 17 Sõ ngwĩ kwe kɔ Krista nemɛ, ngwõ tɛ sõ ngwũ na. A ta da biri pepe fɔno. A ta da pepe bere tɛ ngwũye na. 18 Ngwona da pepe sa Wuro hõ. Krista kwɔ ke yɔ kɔ Wuro nemɛ hõ vɛ ke na. A bara pere ke ma mɛ hõ kwɔ sɔma yɔ kɔ Wuro nemɛ hõ vɛ ye na. 19 Wuro yɛrɛ ngwõ ngwona bara latege ye Krista kwɔ sɔma yɔ kɔ Wuro nemɛ hõ vɛ ye na. A ha ye ta dayaga dyati ye ma ga. A ngwona bara pere ke ma hõ ne yera sɔma ma. 20 Krista mɛ̀ fane hõ bɛri ka ta. A tɛ wɔkara Wuro yɛrɛ ngwõ ngwona bɛrɛda yera ka ma mɛ̀ da hõ. Mɛ̀ ka mɛ Krista yena, ka dyã Krista kwɔ ka yɔ kɔ Wuro nemɛ hõ vɛ ka na. 21 Kakye si ha mane ti Krista hõ ga. Wuro kyà kakye dɛ Krista ma ngwõfatɔ ke hõ kwe kɔ Krista nemɛ hõ tɛ sɔma tele na Wuro zĩ hõ.
61 Mɛ̀ ngwĩye kwe ne bara ta kɔ Wuro nemɛ, mɛ̀ ka mɛ da ka nema ngwĩ gũ Wuro ta, ka ka ngwõ dira ga. 2 Wuro fa ngwĩ yera a ta bɛrɛda hõ, ka ngwõ mɔ. A da: Mɛ kya mɛbe mɔ ne madyama wakati ma. Ma ka dyema kya kisi kɔ ma. Segerɛ, Wuro madyama wakati ngwõ basyɛ. Kya kisi kɔ ngwõ sɔma. 3 Mɛ̀ tyata sõ ka myà bara yagayaga ga. Ngwõ yena mɛ̀ ha ngwonayaga tɛno si ta ga. 4 Nka mɛ̀ a dɔrɔ da pepe na da mɛ̀ Wuro ta baratɛre. Mɛ̀ nyane da kɔ kakirinyangamube kɔ ninabano nyaa somɔna. 5 Sɔma mane mɛ̀ vuro hõ mɛ̀ ka kaso hõ. Zamɛ nyaa mane kwe mɛ̀ ma. Mɛ̀ mane bara na sigeyi ta. Mɛ̀ ha mane nyi gũ bo sanga ma ga. Mɛ̀ mane wɔ wu na mɛ. 6 - 7 Myà kìnìbɛbe kɔ myà tɔbe kɔ myà somɔnabe kɔ myà foro kɔ myà kanube na syɛbɛyi kɔ myà tĩyã na bɛrɛda, ngwõ pepe a dɔrɔ da mɛ̀ Wuro ta baratɛre Ni na kìnìyi kɔ Wuro ta sebɛbe barika hõ. Telebe ngwõ myà kũ kwini fa mɛ̀ digesoro ma kɔ mɛ̀ ninanga ma. 8 Ye mɛ̀ yirebɛ ne mɛ̀ dɛgɛbɛ. Ye mɛ̀ toga fɔro kɔ mɛ̀ toga yɔ yera. Ye mɛ̀ dyati nĩyõsɔre nka mɛ̀ tĩyã na bɛrɛda yera. 9 Ye da mɛ̀ sɔma zana nka sɔma pepe myà da tɔ̀. Ye da mɛ̀ sɔma na siriye nka ka a za da mɛ̀ sugu yɛ. Ye mɛ̀ nyane nka ye ha mɛ̀ yɛ ga. 10 Ye mɛ̀ ni na bã nka mɛ̀ ni hõ dya sanga pepe ma. Mɛ̀ tɛ wɔkara fangadãe nka mɛ̀ sɔma nyaa ta ferekɔma na. A tɛ wɔkara fui ha ti mɛ̀ soro hõ ga, nka fere pepe ti mɛ̀ ta. 11 Mɛ̀ màre ngwĩye ti Korɛ̃te, mɛ̀ da pepe yera ne kìnìbɛ ka ma. Mɛ̀ mane mɛ̀ kɔrɔ pepe kɔba ka ma. 12 Mɛ̀ ha mane mɛ̀ kɔrɔ dõ ka na ga. Nka ka mane ka kɔrɔ dõ mɛ̀ na. 13 Mɛ bɛri ka ta wɔkara ka tɛ ne nɔmane na. Mɛ̀ mɛ̀ kɔrɔ kɔba ka ma ngwɛne, ka ka kɔrɔ kɔba mɛ̀ ma yee mɛ. 14 Ka ka kwe foroba da ma kɔ lanabɛbariya sɔma nemɛ ga. Nemɛkwebe weyi ngwõ ti telebe kɔ zugube yɔ? Nemɛkwebe weyi ngwõ ti kini kɔ tunungu yɔ? 15 Bɛ̃be weyi ngwõ ti Krista kɔ Setane yɔ? Nemɛkwebe weyi ngwõ ti lanabe sõ kɔ lanabɛbariya sõ yɔ? 16 Bɛ̃be weyi ngwõ ti Wuro kõ yuu kɔ fyã yɔ? Ke tɛ Wuro na suguyi ta Wuro kõ yuu na. Wɔkara Wuro ngwõ yera da: Mɛ na tanga na sɔma woro hõ. Mɛ na tɛ ye ta Wuro na, ye na tɛ na sɔma na. 17 Ngwõ yena Matigi da: Ka sa ye woro hõ, hõ dɛ̀gɛ̀ ye na. Ka ka le fa na dõõyi ma ga. Ne ka hõ ngwõ ta, mɛ na dyã ka hõ. 18 Mɛ na tɛ ka Tõ na, ka na tɛ na nemɛnimisini kɔ na nemɛdala na. Matigi Sebɛbenate da yee.
71 Mɛ màre, ngwona datege pepe ti ke ta. Ngwõ yena fa pepe ngwĩ ngwõ ke komavere kɔ ke ni dõõbɛ, ke daga ke yɛrɛ kɔrɔse ngwõ pepe na. Ke daga dopaga kìnìbɛbe na hõ kwã Wuro na. 2 Ka ka kɔrɔ kɔba mɛ̀ ma. Mɛ̀ ha dayaga ta sõ si na ga. Mɛ̀ ha sõ si togo yaga ga. Mɛ̀ ha sõ si mako yaga ga. 3 Mɛ ha ngwõ yera hõ ka zarake ga. Wɔkara ma ngwõ yera ngwõ wɛ da ka da dya mɛ̀ ma fɔrona. Nemɛkwebe ti ke yɔ sanga pepe ma, ne ke ne sugu wala ke hõ siri. 4 Mɛ nyo ka ma fɔrona. Mɛ ne yɛrɛ yirebe kya da na. Hõ mɛ̀ to nyane pepetai hõ, worasigi ti mɛ ta. Mɛ paga nihõdyaro na. 5 Mɛ̀ wiri wɛ timi Masadwane gana hõ, mɛ̀ ha makwɔnabɛ ga. Nyane da mane ti mɛ̀ kyegɛ pepetai ma. Mɛ̀ mane dakwiyɛro ta kɔ sɔma nemɛ. Kũ̀ mane ti mɛ̀ kɔrɔ hõ. 6 Wuro ngwĩ ngwõ ninabãsɔma na worasigebɛta, ngwõ mɛ̀ wora sigebɛ mɛ Tite ta na yena. 7 A ta na dama ga, nka ki mana woro sigebɛ ngwɛne, a ngwõ yera mɛ̀ ma. Ngwõ mɛ̀ wora sigebɛ mɛ. A yera mɛ̀ ma da mɛ na wu ti ka na. Ye ka ni na bã fɔrona. Ye ka zigi ti mya da ma. Basyɛ mɛ ni hõ dya ngwona da pepe yena. 8 Hale ne mɛ hõ mane ka ni na bã kɔ na sɛbɛ nemɛ, mɛ ha na tingalɔ yera ngwõ na ga. Kamasɔrɔ mɛ a za da ngwona sɛbɛ ka ni na bã zɔgɔ nka mɛ ha na tingalɔ yera ngwona da na ga. 9 Mɛ ni hõ dya basyɛ. Mɛ ni hõ ha dya kya ninabãbe yena ga nka mɛ ni hõ dya kamasɔrɔ ngwona ninabano mane zugoberebe pere ka ma. Wuro mane ngwona ninabano berebɛ na ta dafɔre na. Mɛ̀ ha mane dayaga si ta ka na ga. 10 Wuro ngwĩ ninabano berebɛ na ta zugoberebe na, ngwõ kisibe pere sõ ma. Tingalɔ si ha ti ngwõ na ga. Ninabano ngwĩ ti diniya kɔma ta, ngwõ na wɛbɛyi ngwõ siri. 11 Wuro fa ngwĩ ta kɔ ngwona ninabano nemɛ, bo ngwõ. A ngwona dayaga dɔrɔ ka ma. A mane yɛrɛnyangabe ka ka hõ, hõ tĩyã gũ ngwona da na. Ka wora mane ba ngwona da na. Ka mane kwã. Ka mane tyata hõ mɛ za. Ka mane ka nyanga fɔrona hõ ka mone wa ngwona dayaga hõ. Ka a dɔrɔ da pepe na da ka tĩyã gũ ngwona da na. 12 Mɛ sɛbɛ ngwĩ fane ka ma, mɛ ha ngwõ fane dayagatɛta yena ga. A dayaga ta ngwĩ na, mɛ ha a fane ngwõ yena mɛ ga. Mɛ ngwona sɛbɛ sɛbɛ na fane ka ma na dɔrɔ ka ma Wuro zĩ hõ da ka tɛ mɛ̀ màre na syɛbɛye na. 13 Ngwõ yena ka mane ngwĩ fa ta, ngwõ mɛ woro sigebɛ. Na kwe myà worasigi ma, mɛ̀ ni hõ dya fɔrona Tite ta nihõdyaro yena. Ka mana zigi tugu ngwɛne, ngwõ mana ni hõ dyabɛ. 14 Mɛ mane ka toga fɔro yera a ma. Ka ha mane tɛ mɛ piri ngwona da na ga. Mɛ̀ tĩyã yera ka ma sanga pepe ma. Yee nemɛ, mɛ mane ka toga fɔro yera Tite ma ngwɛne, ngwõ mane tĩyã mɛ. 15 Ne a kakiri hõ dige kya kwɛ̃fɛgɛbe ta da na ngwĩ sanga ma, ka na kanube nyaa a kɔrɔ hõ fɔrona. Ka na kwãye kɔ ka na sɔmaye mana fɔga fɔrona. 16 Mɛ nyo ka ma fɔrona. Ngwõ yena mɛ ni hõ dya.
81 Syenɔmane, Wuro ta nema bara ta Masadwane eglise hõ ngwɛne, mɛ̀ tyata ka hõ ngwõ tɔ̀. 2 Hõ ne to kɔrɔwɛbe na yireyi hõ, nyane da nyaa mane wiri ye ma. Ye ta fangadãbe ha mane bare hõ ye sera kɔba ga, ye ta nihõdyaro na yireyi yena. 3 Mɛ ye syere ngwona da na da ye perebe ta ye yɛrɛ ma hõ kanya kɔ ye ta sebɛbe nemɛ hõ yaloyi ye ta sebɛbe ma yɛrɛ. 4 Ye mane mɛ̀ mɛ fɔrona da mɛ̀ tɛ ye ye nii ka ngwona da hõ, hõ Wuro ta sɔma dyema ngwĩye ti Zude gana hõ. 5 Mɛ̀ mane fa ngwĩ dyati ye ta da na, ye mane perebe ta hõ yaloyi ngwõ ma. Ye mane pya ye yɛrɛ pere Matigi ma dɛ̃, ngwõ timi ye ye yɛrɛ pere mɛ̀ ma mɛ Wuro dungo barika hõ. 6 Ngwõ yena mɛ̀ Tite mɛ da a perebe na bara ngwĩ dofɔga ka birɛ, a bere ya ka dyema ka ye ta ne dopaga. 7 Ka tɛ ferekɔma na da pepe na—lanabɛbe kɔ bɛrɛda kɔ tɔbe kɔ yɛrɛnyangabe, tege ha ti ngwĩ na ga, kɔ kanube ngwĩ ti ka ta myà piri ma na. Ngwõ yena ka ka yɛrɛ dɔrɔ wɔkara ferekɔma bo perebe na bara na. 8 Mɛ ha fane yera ne tege ka ma ga. Mɛ tyata hõ sɔma zɛ ta perebe ta da yera ka ma na sege ne kya kanube hõ ma kanube na syɛbɛyi. 9 Ka kyà Matigi Yesu Krista ta nema tɔ̀. Awe mane pya ne ferete, a bere tɛ fangadã na ka yena. A ngwõ ta ngwõfatɔ a hõ ka ta ferekɔma na a ta fangadãbe barika hõ. 10 Mɛ ngwĩ fa dyati ngwona da na, ma ngwõ yera ka ma. Ka mane ngwĩ bara dofɔga kabe, ne ka ne ngwõ wɛbɛ basyɛ, ngwõ fõ. Ka mane pya miri ngwona da na, ka tɛ zɛngɛkɔma na ngwona bara na mɛ. 11 Ka ka nyanga basyɛ hõ ngwona bara sere wɛbɛ. Ka mane ngwona bara dofɔga kɔ nihõdyaro nemɛ ngwɛne, ka daga ne sere wɛbɛ kɔ nihõdyaro nemɛ mɛ. Ka ye ta ne kanya kɔ ka sera hõ fere nemɛ. 12 Ne ka hõ perebe ta kɔ kɔre fɔre nemɛ, Wuro na dyã ngwona perefere hõ, hõ kanya kɔ ka sera hõ fere nemɛ. Fa ngwĩ ngwõ ti ka ta ga, ngwõ nii ha ti ga. 13 Mɛ ha tyata hõ ka dɛsɛbɛ hõ sɔma zɛ mako fɔro ga. Mɛ tyata ka pepe hõ kwe tɛ tala. 14 Fere ti ka ta basyɛ, ngwõ yena ka sebɛne sɔma zɛ dyema ngwĩye mako ti fere na. Bo kɔ mɛ, ne fere nyaa ne ti ye ta, ye sebɛne ka dyema mɛ ne ka mako hõ ne ti fere na. Yee nemɛ, ka pepe na kwe tɛ tala. 15 Wɔkara a sɛbɛɛ Wuro ta bɛrɛda hõ da: Ngwĩ nyaayi turu, ngwõyi sere ha mane wɔ ga. Ngwĩ zɔgɔta turu, ngwõyi ha mane wɛ ga. 16 Ka na dyemabe na wu mane Tite fɔga wɔkara a mɛ fɔga ngwɛne. Wuro ngwõ ta, mɛ̀ barika yera a ma ngwõ yena. 17 Mɛ̀ mane Tite mɛ, a dyã myà mɛbe na. Ka na dyemabe na wu mana fɔga fɔrona fɔ a yɛrɛ mana latege da ye na ya ka birɛ. 18 Eglise pepe ke syeno ngwĩ toga fɔro wiri Bɛrɛda Fɔre ta yerabe ta da na, mɛ̀ ngwõ fane ka birɛ kɔ Tite nemɛ. 19 Na kwe ngwõ ma, eglise mana dɛ̀gɛ̀ na ta mɛ̀ yakweta na hõ ya ngwona perefere na bara ta. Mɛ̀ ngwona bara ta hõ noro dɛ Matigi ma na dɔrɔ da mɛ̀ tyata sɔma dyema. 20 Mɛ̀ ngwona perefa na yireyi ta da nyonohõwa kɔ kakiritangabe nemɛ ngwõfatɔ sõ si ka na mɛ̀ zarake ngwona da na ga. 21 Da pepe ngwĩye ngwõ fɔro Wuro kɔ sɔma nyena hõ, mɛ̀ tyata ngwõ ta. 22 Mɛ̀ ke syeno na sonala bo kwe ngwona sɔma pɔla ma a ya kɔ lɔ. Mɛ̀ a kɔrɔ wa sanga nyaa ma, a dɔrɔ da a dya a ma fɔrona hõ sɔma dyema. Basyɛ a nyo ka ma fɔrona. Ngwõ yena a ye nyono pɛnɛ ngwona bara hõ, hõ yaloyi gwerena ma. 23 Tite ta piri ma na, a mɛ yakweta. A kwe kɔ mɛ nemɛ hõ bara ta ka ma. Ke syenɔmane ngwĩye ya kɔ le, eglise ngwõwɔ fane hõ bara ta hõ noro dɛ Krista ma. 24 Ka kya kanube dɔrɔ ye ma ngwõfatɔ eglise pepe na ngwona kanube tɔ̀ hõ tɔ̀ da tĩyã ti mɛ̀ ta hõ ka toga fɔro yera.
91 Ke na dyemabe ngwĩ pere Wuro ta sɔma ma ngwĩye ti Zude gana hõ, mɛ ha daga sɛbɛ sɛbɛ na fane ka ma ngwona da na ga. 2 Mɛ kya miri tɔ̀ ngwona da na. Mɛ ka toga fɔro yera Masadwane kɔma ma da na dofɔga kabe Akayi kɔma sɔbɛ tege ngwona da na. Kya yɛrɛnyangabe Masadwane kɔma na fanga ta ye ye nyanga mɛ. 3 Mɛ̀ ka toga fɔro yera ngwona da na ngwɛne, mɛ̀ ha tyata ngwõ tɛ zana ga. Ngwõ yena ma ngwona syenɔmane fane ka birɛ ngwõfatɔ ka ka yɛrɛ sɔbɛ ngwona da na. 4 Ne Masadwane kɔma hõ na kɔ mɛ nemɛ, ka mane sɔbɛ ga, ke pepe na piri. Mɛ zigi mane ti ka ma fɔrona, ngwõ yena ma na piri ane ka na piri mɛ. 5 Ngwõ yena mɛ dyati da ma daga ngwona syenɔmane mɛ ye ya ne zĩ hõ ka birɛ. Ka mane perefere ngwĩye ta da yera, ka ngwõ sɔbɛ ne tege sane ma hõ wiri ngwɛ̃. Ngwõ a dɔrɔ da ka perebe ta kɔ kɔrɔ na fɔroyi nemɛ, ngwõ ha tɛ kɔ fanga nemɛ ga. 6 Ka ka kakiri dige bɔ na da: Ngwĩ ngwõ tugo zɔgɔta, ngwõ na tugo fere zɔgɔ kyɛ̃. Ngwĩ ngwõ tugo nyaa, ngwõ na tugo fere nyaa kyɛ̃ mɛ. 7 Sɔma pepe tala tala fa ngwĩ latege, a daga ngwõ pere. Ngwona perebe ka tɛ sigemabe na a ma ga. A ka tɛ kɔ fanga nemɛ ga. Ngwĩ ngwõ perebe ta kɔ nihõdyaro nemɛ, ngwona te da ngwõ dya Wuro ma. 8 Ka mako ti fere pepe ngwĩye na, Wuro sebɛne ngwõ pepe pere ka ma hõ bɔ kwe ye ma. A ngwõ ta hõ ka mako fɔro kɔ ngwõfatɔ ka hõ sebɛ bara fɔre ta. 9 Wɔkara a sɛbɛɛ Wuro ta bɛrɛda hõ ngwɛne da: A fere nyaa pere fangadãe ma. A ta foro ha na wɛ abada ga. 10 Wuro tugo fere nɔmane pere tugota ma hõ zõfere pera ma. Ka mako ti tugo fere nɔmane ngwĩye na, Wuro na ngwõ pere mɛ hõ ne fɔgabɛ ngwõfatɔ kya perefere hõ nɔmane nyaa vɔro. 11 A na ka ta ferekɔma na ngwõfatɔ ka hõ ka sera kɔba hõ perebe ta sanga pepe ma. Yee nemɛ, sɔma nyaa na barika yera Wuro ma kya perefere ta da na, ka mɛ̀ fane kɔ ngwĩye nemɛ. 12 Ka ngwĩ dyemabe na bara ta, ngwõ ha Wuro ta sɔma mako fɔro dama ga, nka sɔma nyaa na barika yera Wuro ma fɔrona kya da na mɛ. 13 Ngwona bara kya da dɔrɔ sɔma ma. Ye Wuro yirebɛ kya da na. Ka lanabɛbe ta hõ Krista ta Bɛrɛda Fɔre fɔga. Ka ka sera kɔba yewɔ kɔ sɔma pepe ma. 14 Ye na Wuro mɛ ka ma hõ ka kanu fɔrona Wuro ta nema na yireyi yena, ngwõ ngwĩ ti ka kɔrɔ hõ. 15 Ke barika yera Wuro ma a ta perefa yena, ngwĩ nemɛ ha tye ga.
101 Mɛ Pauli tyata ka mɛ bo da na. Sɔma da ma hõ ne ti ka woro hõ ngwĩ sanga ma, ma ne yɛrɛ mazibɛ. Nka ne ne birɛ hõ dɛrɛ ka na ngwĩ sanga ma, ma ne woro sigebɛ kya piri ma na. Mɛ ka mɛ fɔrona Krista ta kwɔnabe kɔ a ta foro yena. 2 Ne mɛ hõ ya ka birɛ ngwĩ sanga ma, ka ka ne ta ma hõ bo da sigebɛ ka ma ga. Sɔma ngwĩye ngwõ da myà bara komavere na da, ma sebɛne bɛrɛda sige yera ngwõwɔ ma. 3 Mɛ̀ ti komavere hõ bɛ diniya hõ, ngwõ tĩyã. Nka myà kwinino kɔ komavereyi ha tala ga. 4 Myà kũ kwini fere kɔ bo diniya kɔmaye ha tala ga. Wuro ta kũ kwini fere na fɔroye ti mɛ̀ ta, ngwĩye ngwõ sebɛne kũ woro kwã yaga. Mɛ̀ sɔma ta nĩyono na dakwiyɛro yaga. 5 Sõ ye yɛrɛ yirebɛ da pepe ngwĩ na hõ maga Wuro ta da na tɔbe hõ, mɛ̀ ngwõ pepe berebɛ ne ta zana da na. Mɛ̀ sɔma ta miri berebɛ ne ta ye mɔ Krista ta. 6 Kya kwɛ̃fɛgɛbe hõ dopaga ngwĩ sanga ma, mɛ̀ na kwɛ̃fɛgɛbariyabe pepe na ku wa. 7 Ka nyono dɛ fere ngwĩye ma, ka ngwõwɔ dama sege. Ka na bo ye yɛrɛ dyati Krista ta sõ ra? A daga hõ tɔ̀ da mɛ̀ Krista ta sɔma mɛ. 8 Matigi ngwonakɔmabe ngwĩ pere mɛ̀ ma, hale ne mɛ hõ mane ne yɛrɛ yirebɛ ya fɔno ngwona da ma, mɛ ha piri kɔ ngwona da nemɛ ga. A ngwona ngwonakɔmabe pere mɛ̀ ma hõ kya lanabɛbe yabɛ zĩ. 9 A ha ngwõ pere ngwõfatɔ hõ ka bare ga. A ha tɛ wɔkara mɛ tyata ka kwãbɛ kɔ na sɛbɛ nemɛ ga. 10 Bo sõ na da mya sɛbɛ hõ bɛrɛda sige fɔrona, ye fanga yire. Nka ma hõ ne ti ka birɛ ngwĩ sanga ma, ne barika dɛgɛ, mya bɛrɛda ha fa fɔro ka ma ga. 11 Ngwĩ ngwõ yera, ngwõ daga na tɔ̀ da mɛ̀ bɛrɛda ngwĩye sɛbɛ ne fane ka ma sɛbɛ hõ kɔ mɛ̀ bɛrɛda ngwĩye yera ka woro hõ, ngwõ pepe tala. Mɛ̀ birɛ dɛrɛ ka na o, mɛ̀ ti ka woro hõ o, myà tɛda pepe tala. 12 Sɔma ngwĩye ye yɛrɛ toga fɔro yera, mɛ̀ ha tyata mɛ̀ wora sige hõ tɛ wɔkara ngwõwɔ ga. Ye kakiridarakɔma. Ye ye yɛrɛ sege hõ ye yɛrɛ yerabɛ hõ kanya kɔ ye yɛrɛ komavere na da nemɛ. 13 Mɛ̀ yɛrɛ ta piri ma na, mɛ̀ ha na mɛ̀ yɛrɛ yirebɛ hõ yaloyi Wuro ta da na lategeyi ma ga. Ki yɛrɛ ti ngwona da na lategeyi hõ mɛ. 14 Mɛ̀ mane ya ka birɛ kɔ Bɛrɛda Fɔre nemɛ Krista ta da na ngwĩ sanga ma, mɛ̀ ha mane yalo da na lategeyi ma ga kamasɔrɔ ki yɛrɛ ti ngwona da na lategeyi hõ mɛ. 15 Yee nemɛ, sɔma zɛ bara ngwĩ ta ne kanya kɔ Wuro ta da na lategeyi nemɛ ye ta, mɛ̀ ha mɛ̀ yɛrɛ yirebɛ ngwona da na ga. Mɛ̀ tyata fa kwe kya lanabɛbe ma. Mɛ̀ tyata hõ bara na yireyi bo ta ka woro hõ, hõ kanya kɔ Wuro ta da na lategeyi nemɛ. 16 Ngwõ timi ma mɛ̀ sebɛne Bɛrɛda Fɔre yera gana bɔ hõ ngwĩye ti ka timi. Sõ za bara ngwĩ ta ne wɛ, mɛ̀ ha na mɛ̀ yɛrɛ yirebɛ ngwõ ta bara na ga. 17 Wɔkara a sɛbɛɛ Wuro ta bɛrɛda hõ ngwɛne da: Sõ ngwĩ tyata ye yɛrɛ yirebɛ, ngwõ daga ye yɛrɛ yirebɛ Matigi ta bara da na. 18 Sõ ngwĩ ngwõ ye yɛrɛ toga fɔro yera, Matigi ha na dyã ngwona te ta da ma ga, fɔ Matigi yɛrɛ sõ ngwĩ toga fɔro wiri.
111 Ne ka hõ ne dyã hõ mya kakiridarabe somɔna zɔgɔ, ngwõ na dya ne ma. Mɛ ka mɛ da ka mya da somɔna. 2 Mɛ mako ti ka na fɔrona wɔkara Wuro mako ti ka na ngwɛne. Ka tɛ wɔkara dalo na syɛbɛyi, mɛ ngwĩ pere banga tala ma, ngwõ Krista. 3 Sã mane Hawa dyebɛ kɔ ya nyenamakwiyɛbe nemɛ ngwɛne, mɛ kwã da a ka na ka kakiri berebɛ yee nemɛ mɛ ga, fɔ hõ Krista ta kanube wa ka kɔrɔ hõ ga. 4 Mɛ̀ Yesu ngwĩ ta da yera ka ma, ne sõ za bo hõ na ne Yesu za bo ta da yera, ka ne mɔ ngwõ ta mɛ. Mɛ̀ Ni na kìnìyi kɔ Bɛrɛda Fɔre ta da yera ka ma. Nka ne sõ bo hõ na hõ ne ni za bo ta da kɔ bɛrɛda za yera ka ma, ka ne mɔ ngwõ ta mɛ. 5 Ka dyati da fanesɔma ngwĩye fõ kɔ mɛ nemɛ, mɛ ha dyati da ngwõwɔ fõ kɔ ne nemɛ ga. 6 Bɛrɛda ta piri ma na, mɛ tɛ wɔkara dasɛmɛta. Nka tɔbe ta piri ma na, mɛ ha ti yee ga. Mɛ mane ngwõ yera ngwõ kìnìbɛ ka ma sanga nyaa ma kɔ tɛno nyaa na. 7 Mɛ mane Wuro ta Bɛrɛda Fɔre yera ka ma ngwĩ sanga ma, mɛ ha mane fui tɔ ka ta ga. Mɛ mane ne yɛrɛ mazibɛ ngwõfatɔ ma ka yirebɛ. Ngwõ mane dayaga ra? 8 Mɛ mane bara ta ka woro hõ ngwĩ sanga ma eglise zɛ ngwõ mane mɛ sara. A tɛ wɔkara mɛ mane ye ta fere dɛ̃ ye ta hõ ka dyema. 9 Mɛ mane ti ka birɛ ngwĩ sanga ma, hale ne mɛ mako hõ mane ti gwana na, mɛ ha mane fa yera ka ma ga. Syenɔmane ngwĩye ti Masadwane, ngwõwɔ mane na kɔ fere nemɛ hõ mɛ mako pepe fɔro. Mɛ ha mane tyata hõ tɛ kya bye na ga. Mɛ ha na tɛ kya bye na basyɛ mɛ ga. 10 Mɛ datege bi Krista ta tĩyã yena ngwĩ ti mɛ kɔrɔ hõ, da sõ si ha na mɛ bare hõ ne yɛrɛ yirebɛ ngwona da na Akayi gana pepe hõ ga. 11 Ngwonona ma ngwõ yera? Ma ngwõ yera kamasɔrɔ ma ha ka kanu ga ra? Wuro yɛrɛ tɔ̀ da ma ka kanu. 12 Mɛ mane ngwĩ fa ta, ma na ngwõ ta basyɛ yɛ mɛ ngwõfatɔ hõ ngwona fanesɔma zɛ bare ngwĩye ngwõ ye yɛrɛ yirebɛ ye ya bara kɔ mɛ̀ye tala. 13 Ngwona sɔma ha fanesɔma na syɛbɛye ga. Ye fanesɔma na nĩyõsɔre. Ye nĩyõ sɔ ya bara da na. Ye ye yɛrɛ katira hõ ye yɛrɛ ta Krista ta fanesɔma na syɛbɛye na. 14 Ngwõ ha kabako da ga. Setane yɛrɛ sebɛne ye yɛrɛ katira hõ ye ta mɛlɛkɛ na kìnìyi na. 15 Setane ta baratɛre hõ ye yɛrɛ katira hõ ye ta telebe na baratɛre na, ngwõ ha kabako da ga. Bo kɔ ma ye ta kiti na kanya kɔ ye ta tɛda nemɛ. 16 Mɛ ngwõ yera ye ma da sõ si ka ne dyati wɔkara kakiridurute ga. Nka ne ka hõ ne mɛ dyati yee, ka dyã ne ma wɔkara kakiridurute ngwõfatɔ ma hõ ne yɛrɛ yirebɛ zɔgɔ. 17 Tĩyã na, mɛ bɛrɛda ngwĩye yera basyɛ, Matigi ha tyata mɛ ngwõ yera ga. Ne mɛ hõ da ma na ne yɛrɛ yirebɛ, ngwõ tɛ wɔkara kakiridurute ta bɛrɛda. 18 Sɔma nyaa ye yɛrɛ yirebɛ komavere ta piri ma na, ngwõ yena ma da ma na ne yɛrɛ yirebɛ mɛ. 19 Ki tɛ kakirikɔma na, ngwõ yena ka dyã ne kakiridarakɔma ta da somɔna. 20 Sõ ngwĩ ngwõ tine bɛri ka ta wɔkara a bɛri tɛrɛ ta ngwɛne, kɔ sõ ngwĩ ngwõ ka mako yaga kɔ sõ ngwĩ ngwõ ka dyebɛ kɔ sõ ngwĩ ngwõ ka dɛgɛbɛ kɔ sõ ngwĩ ngwõ ka vuro ka zɛngɛne ma, ka dyã ne ngwõ nemɛ na sɔma sye pepe ta da somɔna. 21 Mɛ̀ barika mane dɛgɛ hõ ngwõ nemɛ na da ta. Mɛ piri hõ ne yera. Basyɛ ma na bɛri wɔkara kakiridurute. Ne ngwona sɔma hõ ne ye yɛrɛ yirebɛ da bɔ na, mɛ na ne yɛrɛ yirebɛ mɛ. 22 Ye Heburu kɔma ra? Mɛ ngwõ mɛ. Ye Israyɛli kɔma ra? Mɛ ngwõ mɛ. Ye Ibrahima timi kɔma ra? Mɛ ngwõ mɛ. 23 Ye Krista ta baratɛre ra? Ma bɛri wɔkara sõ ngwĩ ngwõ̀ tuma, mɛ ngwõ hõ yaloyi yewɔ ma. Mɛ bara ta hõ yaloyi ye ma. Ye mɛ ka kaso hõ, hõ yaloyi ye ma. Ye mɛ vuro hõ yaloyi ye ma. Mɛ kwɔ siri na da hõ, hõ yaloyi ye ma. 24 Yahutuye mɛ fɔga kanyena koo na hõ gwelekame nyena kyofũ ne nɔma korono wa mɛ hõ. 25 Rome kɔma mɛ vuro kanyena saa na. Ye mane tyata mɛ dira mɛ yɛ kɔ dɔge nemɛ kanyono tala na. Zu ngwõ̀ ma koro yaga kɔ mɛ nemɛ kanyena saa na. Mɛ sinala kɔ wuru tala ta zu hõ. 26 Mya yara nyaa pepe na mɛ mane tyata siri da nyaa na: Zu hõ kɔ bɛrɛma sɔma ta kɔ ne yɛrɛ ta si sɔma ta kɔ samara ta. Mɛ mane tyata siri kire hõ kɔ kibe hõ kɔ nyengezu hõ. Mɛ mane tyata siri màre na nĩyõsɔre ta mɛ. 27 Mɛ mane bana bo bara na sigeyi hõ. Mɛ mane sinyana ta kanyena nyaa na. Wu kɔ mulu mane mɛ fɔga. Sanga nyaa ma mɛ mane pɔna zõfa na. Mɛ mane nyane lu ta. Zogore ha mane ti mɛ ta ga. 28 Na kwe ngwõ ma, eglise pepe na ninabano mane ti kɔ mɛ nemɛ kɔ pepetai ma. 29 Ne sõ bo barika hõ dɛgɛ, mɛ barika dɛgɛ mɛ. Ne sõ bo hõ dayaga ta, mɛ ni na bã fɔrona. 30 Ne mɛ hõ ne daga ne yɛrɛ yirebɛ, ma na ne yɛrɛ yirebɛ na barika dɛgɛbe na. 31 Yirebɛbe hõ dɛ Wuro togo ma fɔ abada, ngwõ ngwĩ ngwõ Matigi Yesu Tõ. Ngwõ tɔ̀ da mɛ ha nĩyõ sɔ ga. 32 Mɛ mane ti Damasi kuru hõ ngwĩ sanga ma, Fangama Aretasi ta prefet mane garede tege kuru hõ sa soga pepe ma ngwõfatɔ a mɛ fɔga. 33 Nka ye mane mɛ ka gwaga hõ, hõ ne zibe kwala timi kulu ma wuru hõ. Yee nemɛ, mɛ mane tɛ hõ dɛɛ a na.
121 Mɛ daga ne yɛrɛ yirebɛ nka yɛrɛyirebɛbe ha fui fɔro sõ ma ga. Nka Matigi dɔre da kɔ zɛ da ngwĩye pere mɛ ma, ma na ngwõ yera ka ma basyɛ. 2 Mɛ lanabe sõ bo tɔ̀, da bo mane tɛ a na, nya ngwõ dɔgɔ funaa. Wuro mane ngwona sõ bi ya kɔ le fɔ wuro hõ. Ngwona da mane tɛ tĩyã yɛrɛyɛrɛ wa, wala ngwõ mane zɛ da wa, mɛ ha ngwõ tɔ̀ ga. Wuro sonala ngwõ tɔ̀. 3 Mɛ tɔ̀ da Wuro ngwona sõ bi hõ ya kɔ le aridyana hõ. Mɛ da yɛ mɛ, ngwona da mane tɛ tĩyã yɛrɛyɛrɛ wa, wala ngwõ mane zɛ da wa, mɛ ha ngwõ tɔ̀ ga. Wuro ngwõ tɔ̀. 4 Hõ na to ngwɛ̃, a da bɔ mɔ, sõ ha sebɛne ngwona da kìnìbɛ ga. Sõ ha daga ngwona bɛrɛda yera ga. 5 Mɛ ne yɛrɛ yirebɛ ngwona sõ ta da na, mɛ ha na ne yɛrɛ yirebɛ ne yɛrɛ ta da na ga, ne ngwõ hõ ma tɛ mya barikadɛgɛbe ga. 6 Ne mɛ hõ ne tyata ne yɛrɛ yirebɛ, mɛ ha na tɛ kakiridurute na ga kamasɔrɔ mɛ tĩyã yera. Sõ ngwĩ fa dyati hõ kanya kɔ mya tɛda kɔ mya bɛrɛda nemɛ, mɛ ha tyata a miri bo da na hõ yaloyi ngwõ ma ga. Ngwõ yena mɛ ha ne yɛrɛ yirebɛ ga. 7 Mɛ mane kabako da ngwĩye za, Wuro ha mane tyata mɛ ne yɛrɛ yirebɛ ya fɔno ngwona da na ga. Ngwõ yena ngwona komatogo na sigeyi mɛ gũ. Ngwõ tɛ wɔkara Setane fa ngwĩ fane hõ mɛ vuro ngwõfatɔ mɛ ka na paga yɛrɛyirebɛbe na ya fɔno ga. 8 Mɛ mane Matigi mɛ ngwona da na kanyena saa na da a ngwona komatogo wa ne hõ. 9 A yera mɛ ma da ya nema na mɛ wa, ya ta sebɛbe dopaga barikadɛgɛta ta. Aiwa, a dya mɛ ma hõ ne yɛrɛ yirebɛ na barikadɛgɛbe na ngwõfatɔ Krista hõ kwa mɛ ma kɔ ya sebɛbe nemɛ. 10 Ngwõ yena barikadɛgɛbe kɔ vini kɔ nyane kɔ vurobe kɔ ninabã da Krista yena, ngwõ pepe dya mɛ ma. Mɛ barika dɛgɛ ngwĩ sanga ma, ngwona sanga ma mɛ barika yire. 11 Mɛ bɛri wɔkara kakiridurute nka ki ngwõ ne ka ngwona da hõ fanga na. Ki yɛrɛ ngwõ mane daga mɛ toga fɔro yera. Mɛ tɛ wɔkara sõ zana nka ka fanesɔma ngwĩye dyati da ye fõ kɔ mɛ nemɛ, ngwona fanesɔma ha fõ kɔ mɛ nemɛ ga. 12 Mɛ mane fanesɔma ta tagamasɛ̃ ta ka woro hõ kɔ somɔnabe na dopagayi nemɛ. Tagamasɛ̃ kɔ da yee kɔ kabako da, ngwõ pepe mane tɛ. 13 Mɛ ha mane eglise zɛ fõbɛ kɔ ka nemɛ ga, fɔ da tala dama, mɛ ha mane fui tɔ ka ta hõ ne mako fɔro ga. Ka yafa ne ma ngwona da na. 14 Bo a kanyena saa mɛ sɔbɛ tege hõ ya ka birɛ. Mɛ ha na ka mɛ fui na ga. Ki mɛ ngwõ kya, a ha ka sera hõ fere mɛ ngwõ kya ga. Nɔmane ha daga gwana kya ne pere ye na vɔrɔsɔma ma ga. Vɔrɔsɔma ngwõ daga gwana kya ne pere ye nɔmane ma. 15 Mɛ dyã hõ na gwana pepe kwe ne ka ka ngwõ̀ da hõ. Mɛ dyã hõ ne yɛrɛ pere mɛ. Ne mɛ hõ ka kanu yee, mɛ na kanube na dɛgɛ ka kɔrɔ hõ ra? 16 a daga dyã ngwõ na, da mɛ ha mane tɛ kya bye na ga. Sõ bo na da ye mɛ mane ka fɔga kɔ nyenamakwiyɛbe kɔ nĩyono nemɛ. 17 Ma mane sɔma ngwĩye fane ka birɛ, mɛ mane ka mako yaga kɔ ngwona sɔma na bo nemɛ ra? 18 Mɛ mane Tite mɛ da a ya ka birɛ, mɛ mane syeno bo fane kɔ le mɛ. Tite mane ka mako yaga ra? Tite kɔ mɛ̀, mɛ̀ kɔrɔ tala, mɛ̀ sogo tala ya. 19 Dora ka dyati da mɛ̀ tyata hõ tĩyã pere mɛ̀ yɛrɛ ma ka zĩ hõ. A ha ngwõ ga rɛ. Mɛ̀ bɛri ka ta wɔkara Krista tyata mɛ̀ bɛri ngwɛne Wuro zĩ hõ. Mɛ̀ màre, mɛ̀ ngwõ pepe yera ka ma ngwõfatɔ hõ ka dyema. 20 Ne ma hõ ya ka birɛ ngwĩ sanga ma, ma kwã da ma na ka za tinɔma za na, ka na mɛ za tino za na mɛ. Mɛ kwã da dakwiyɛro na ti ka woro hõ kɔ kereyabe kɔ worababe kɔ yɛrɛfõbɛbe kɔ vini kɔ toga yagabe kɔ yɛrɛyirebɛbe kɔ da na nyangamuye. 21 Ne ma hõ ne bere ya ka birɛ ngwĩ sanga ma, mɛ kwã da na Wuro na ne mazibɛ ka woro hõ. Sɔma ngwĩye mane pya dayaga ta ne wɛ, ma ye kɔrɔ bere ya domatɛbe kɔ ya kakalatɛbe kɔ ya dayaga pepe na ga, mɛ na mɔgɔ fɔrona ngwõ ta da na.
131 Bo na tɛ a kanyena saa basyɛ ma ne ya ka birɛ. Wɔkara a sɛbɛɛ Wuro ta bɛrɛda hõ da: Kiti ha sebɛne sɔɔ sõ ma ne syɛrɛ pɔla wala syɛrɛ saa mane tye ga. 2 Ki ngwĩye ngwõ pya dayaga ta ne wɛ, kɔ ka pepe, ma tyata hõ bo da yera ka ma. Mɛ mane ngwõ yera ka ma ne na kanyena pɔlalo na ka birɛ. Nka basyɛ mɛ birɛ dɛrɛ ka na, ma na ngwõ yera ka ma yɛ mɛ, da ma hõ bere ya ka birɛ ngwĩ sanga ma dayagatɛta si ha na dɛɛ ga. 3 Ka na tɔ̀ tĩyã na da Krista bɛri mɛ do hõ. Krista barika ha dɛgɛ ka woro hõ ga, nka a ya sebɛbe dɔrɔ ka woro hõ. 4 Tĩyã na, a ta barikadɛgɛbe yena ye mana kwãgwaga sɔno ma. Nka a sugu basyɛ Wuro ta sebɛbe barika hõ. Mɛ̀ kwe kɔ le a ta barikadɛgɛbe na. Nka mɛ̀ yɛrɛ ta tɛno kya piri ma na, mɛ̀ sugu kɔ le Wuro ta sebɛbe barika hõ. 5 Ka ka yɛrɛ ta da kikyɛ na sege yala ne ka hõ ne ti lanabɛbe na sogo ma. Ne ka hõ tɛ lanabe sɔma na syɛbɛye na, ka daga na tɔ̀ tĩyã na da Yesu Krista ti ka kɔrɔ hõ. 6 Ka daga na tɔ̀ mɛ da mɛ̀ tɛ lanabe sɔma na syɛbɛye na. 7 Mɛ̀ Wuro mɛ ka ma da ka ka dayaga ta ga. Mɛ̀ ha ngwõ ta ngwõfatɔ hõ mɛ̀ toga fɔro yera ga. Mɛ̀ ngwõ ta ngwõfatɔ ka hõ dafɔre ta. Ka daga dafɔre ta hale ne ka mane mɛ̀ dyati lanabe sɔma na syɛbɛye ga. 8 Mɛ̀ ha sebɛne fui ta hõ Wuro ta tĩyã kwini ga. Mɛ bara ta ngwõfatɔ sɔma hõ Wuro ta tĩyã tɔ̀. 9 Ne mɛ̀ barika hõ dɛgɛ, ki barika ne yire, ngwõ dya mɛ̀ ma. Mɛ̀ Wuro mɛ ngwõfatɔ ka hõ dopaga. 10 Ngwõ yena hõ mɛ to ne birɛ ne dɛrɛ ka na, ma hõ bo sɛbɛ sɛbɛ na fane ka ma. Ne ma hõ wiri ka birɛ ngwĩ sanga ma, mɛ ha tyata ngwonakɔmabe ta hõ da si sigebɛ ka ma ga. Matigi ngwona ngwonakɔmabe pere mɛ ma hõ kya lanabɛbe yabɛ zĩ. A ha ngwõ pere ngwõfatɔ hõ ka bare ga. 11 Aiwa, syenɔmane, ke ti bo kɔ. Ka ka nyanga hõ dopaga. Ka ka nemɛ wora sigebɛ. Ka kɔrɔ hõ tɛ tala. Ka wɔ syara na nemɛ ta. Ne ngwõ hõ tɛ, Kanubenate kɔ Syaranate Wuro na wɔ ka ta. 12 Ka syenɔmabe na fo ta nemɛ ma. Wuro ta sɔma pepe bire ka na. 13 Matigi Yesu Krista ta nema hõ wɔ ka ta. Wurõ ta kanube hõ gũ ka kɔrɔ hõ. Ni na kìnìyi ta nemɛkwebe hõ gũ ka woro hõ.