1 TIMOTE
11 Mɛ Pauli tɛ Yesu Krista ta faneta na hõ kanya kɔ ngwona fane nemɛ, ke na kisita W uro mane ngwĩ pere ne ma. Yesu Krista ngwõ ngwĩ ngwõ kyà zigi dɛ fa, ngwõ ngwona fane pere mɛ. 2 Ma bo sɛbɛ fane be ma, Timote, bi ngwĩ ngwõ mɛ vɔrɔno yɛrɛ lanabɛbe ta piri ma na. Ke Tõ Wuro kɔ kyà Matigi Yesu Krista hõ makare be na hõ nema kɔ syara pere be ma. 3 Mɛ mane ti ya hõ Masadwane gana hõ, mɛ mane be mɛ da be wɔ Efese. Mɛ tyata be wɔ yɛ basyɛ. Sɔma ngwĩye ngwõ sɔma kala kɔ kala na nĩyõyi nemɛ, be a yera na sigebɛ ngwõwɔ ma da ye ka ngwõ ta ga. 4 Be yera ye ma da ye ka dɔ ngwona sĩyɛ̃ kɔ du ma da na nyaaye na damafɔnoye ma ga. Ngwõwɔ dakwiyɛro tumabɛ dama. Ye ha kanya kɔ Wuro ta kisibe ta da nemɛ ga. Wuro ngwona da latege ane ke ngwona da tɔ̀ lanabɛbe barika hõ. 5 Mɛ ngwõ yera ngwõfatɔ ye hõ kanube tɔ̀, ngwõ ngwĩ ngwõ sa kɔrɔ na kìnìyi kɔ kɔrɔ na fɔroyi kɔ lanabɛbe ne syɛbɛyi hõ. 6 Bɔ sɔma kɛ̃gɛlɛ hõ ngwona sofɔro dira hõ dakwiyɛro na zanaye ta. 7 Ye tyata tɛ kalamogi na Wuro ta tõ ta da na. Ngwõ pepe na, ye yɛrɛ ta bɛrɛda ane kɔ ye dyati da ye da ngwĩye tɔ̀, ye ha ngwõwɔ kɔrɔ tɔ̀ ga. 8 Ke tɔ̀ da tõ fɔro ne sõ ne ya da ta hõ kanya kɔ ngwõ nemɛ. 9 Ke tɔ̀ da tõ ha tegee sɔma tele yena ga fɔ dayagatɛre kɔ muruti sɔma kɔ Wuro kwãbariyasɔma kɔ kakyetɛre kɔ Wuro ta sogo na dirɛ sɔma kɔ tamɛyɛsɔma kɔ syeriyɛsɔma kɔ sɔmayɛri. 10 A tegee kakalatɛsɔma yena kɔ sini ngwĩye ye nemɛ sini syã kɔ sɔma ngwĩye tɛrɛ zabire kɔ nĩyõsɔre kɔ syɛrɛ yaga ngwĩye ngwõ ye sũ nĩyono ma. Tõ tegee sɔma yena ngwĩye ngwõ da za ta ngwĩye ha kanya kɔ kala na syɛbɛyi nemɛ ga. 11 Dubanate kɔ Noronate Wuro mane Bɛrɛda Fɔre ngwĩ kalofa mɛ ma hõ ne yera sɔma ma, ngwona kala na syɛbeyi gũ ngwona Bɛrɛda Fɔre hõ. 12 Mɛ barika yera kyà Matigi Yesu Krista ma, ngwõ ngwĩ ngwõ sebɛbe pere ne ma hõ na ta bara ta. A mɛ dyati nyomata hõ mɛ ka a ta bara hõ. Ngwõ yena mɛ bire a na. 13 Mɛ mana togo yaga gwerena hõ tɛ sɔma nyaneta kɔ sõ na dasigeta na. Nka Wuro makare mɛ na kamasɔrɔ mɛ ngwõ ta lanabɛbariyabe kɔ datɔ̀bariyabe yena. 14 Kyà Matigi ya nema na nyaayi pere mɛ ma kɔ lanabɛbe kɔ kanube, ke ngwĩye gũ ne ke hõ kwe kɔ Krista nemɛ. 15 Ngwona bɛrɛda tĩyã. Sɔma pepe daga ne fɔga hõ la ye na, da Yesu Krista mane na bɛ diniya hõ ngwõfatɔ a hõ kakyetɛre kisi. Mɛ ngwõ ngwona sɔma pepe hõ kakyetɛta na yireyi. 16 Mɛ ngwĩ ngwõ kakyetɛta na yireyi, Wuro makare mɛ na ngwõfatɔ Yesu Krista hõ ya somɔnabe pepe dɔrɔ mya piri ma na. Yee nemɛ, sɔma ngwĩye ngwõ na la a na hõ sugunɔmabe na wɛbariyayi gũ, mɛ hõ tɛ zɛngɛdɔreta na ngwõwɔ ma. 17 Abada na fangama ngwĩ ha na siri ga, sõ ha ngwĩ za ga, Wuro sonala legelege, sɔma hõ ngwõ yirebɛ hõ noro dɛ a ma abada fɔ abada. Amina. 18 Mɛ no Timote, ma ngwona fane yera be ma ngwĩ ngwõ kanya kɔ fane bɛrɛda nemɛ bya piri ma na gwerena. Be kũ na fɔroyi kwini hõ ngwona bɛrɛda ta bya kũ kwini fere na. 19 Be kwa lanabɛbe kɔ kɔrɔ na fɔroyi ma. Sɔma bɔ maga mɔ na ya kɔre fɔre ta. Ngwõwɔ ya lanabɛbe yaga melemele. 20 Himene kɔ Alekisãdire ngwõwɔ na bɔ. Mɛ ye ka Setane soro hõ ngwõfatɔ ye hõ sɛmɛ ye na da ye ka Wuro togo yaga titiri ga.
21 Aiwa, mɛ na pya ngwĩ fa yera dɛ̃, sɔma daga Wuro mɛbe na yireyi sifa pepe ta. Ye Wuro mɛ ye nemɛ ma hõ barika yera Wuro ma sɔma pepe yena. 2 Ka Wuro mɛ fangamɛ kɔ ngwonakɔma ma ngwõfatɔ ke hõ wɔ syara na kɔ kakiritangabe nemɛ hõ ya Wuro nyononakũ̀ na tino na fɔroyi na. 3 Ngwõ ngwõ fɔro ke na kisita Wuro zĩ hõ, ngwõ dya a ma. 4 A tyata sɔma pepe hõ kisi hõ sebɛ tĩyã tɔ̀. 5 Wuro tala legelege ngwõ tye. Vɛta sonala legelege tye mɛ Wuro kɔ sɔma yɔ, ngwõ Yesu Krista ngwĩ tɛ sõ na. 6 Awe ye yɛrɛ pere hõ sɔma pepe ngwonawa. Yee nemɛ, a syɛrɛbe ta wakati na lategeyi ma ye Wuro tyata sɔma pepe hõ kisi. 7 Ngwõ yena Wuro mɛ dɛ̀gɛ̀ hõ tɛ bɛrɛda na yerata kɔ faneta na hõ tɛ si sɔma zɛ ta kalamogo sõ na lanabɛbe kɔ tĩyã ta da na. Mɛ tĩyã yera, mɛ ha nĩyõ sɔ ga. 8 Ngwõ yena mɛ tyata sini hõ Wuro mɛ bi pepe hõ, hõ ye sera na kìnìye duro wuro hõ, worababe kɔ dakwiyɛro nii ka ne tye ga. 9 Yee nemɛ, mɛ tyata yàra hõ ye yɛrɛ tetɛrɛ hõ kwa ya zogore ma. Ye zogore na bɛ̃ye pɛrɛ hõ ye yɛrɛ mazibɛ. Ye ka ye yɛrɛ tetɛrɛ kɔ ngwõdogolebe na terebaye nemɛ ga. Ye ka sanu kɔ dɛnɔma na terebaye kɔ nyena sabɛ zogore ka ga. 10 Nka ye ye yɛrɛ tetɛrɛ kɔ tɛda fɔre nemɛ. Yàra ngwĩye ngwõ da ye kwã Wuro na, ngwõ pepe kanya kɔ ngwõwɔ tino nemɛ. 11 Yàra daga bɔɔ hõ kala mɔ hõ ye yɛrɛ mazibɛ. 12 Mɛ ha dyã yà tɛ kalamogo sõ na wala hõ tɛ sĩ ngwonate na ga nka yà daga bɔɔ. 13 Adama ngwõ pya tege dɛ̃, ngwõ timi Hawa. 14 A ha Adama ngwõ dyã Setane a dyebɛ ga, nka yà ngwõ dyã Setane a dyebɛ. A Wuro ta fane na yerayi yaga. 15 Ngwõ pepe na, yà na kisi nemɛvɔrɔbe yena ne a hõ wɔ lanabɛbe na sogo ma kɔ kanube kɔ yɛrɛmazibɛbe nemɛ.
31 Ngwona bɛrɛda tĩyã: Ne sõ bo hõ ne tyata tɛ eglise na kɔrɔseta na, ngwona te bara fɔre kya. 2 Eglise na kɔrɔseta daga tɛ zarakebariyata na, yàtalate, yɛrɛfɛgɛta, kakirite. A ta da daga ne fɔro. A daga tɛ samara fɛgɛta na. A hõ sebɛ sɔma zɛ kala. 3 A ka tɛ kwĩmɛnɛta na ga wala so na dasigeta. A daga tɛ woramakwɔnata na, a ka tɛ birisisɔta na ga. A ka ne gwana da dyati suute ga. 4 A daga kwa ye yɛrɛ ta kõ ma fɔrona. A nɔmane daga ne mɔ a ta na yirebɛ. 5 Ne sõ mane sebɛne kwa ye yɛrɛ ta kõ ma ga, ne na a sebɛne tɛ hõ kwa Wuro ta eglise ma? 6 A ka tɛ lanabe sõ ngwũ na ngwĩ ngwõ dɔtobi ga ngwõfatɔ a ka na paga yɛrɛyirebɛbe na ga. Ne ngwõ hõ tɛ a na zarake wɔkara Setane mane zarake ngwɛne. 7 A toga fɔrɔ daga wiri lanabɛbariya sɔma ta mɛ ngwõfatɔ dɛgɛbɛbe ka na a gũ ga, Setane ta wore fa ka na a fɔga ga. 8 Eglise hõ baratɛre daga tɛ sɔma syɛbɛ na mɛ. Ye ka tɛ dapɔlabɛrisɔma na ga. Ye ka tɛ kwimɛnɛnyanatere na ga. Ye ka tono yɔ kya ga. 9 Wuro tĩyã dɔrɔ lanabɛbe ta da na, ye daga ngwõ fɔga ye kɔre na kìnìye hõ. 10 Ye daga ne kɔrɔ wa dɛ̃. Ngwõ timi ne zarake do hõ ma zɛ ye na ga, ye sebene tɛ eglise hõ baratɛre na. 11 Ye ta yàra tɛ sɔma syɛbɛ na mɛ. Ye ka tɛ sɔma togoyagare na ga. Ye hõ tɛ yɛrɛfɛgɛre na hõ tɛ nyomasɔma na da pepe na. 12 Eglise hõ baratɛta daga tɛ yàtalate na. A daga kwa ye nɔmane kɔ ya kõ kɔma ma fɔrona. 13 Ngwĩye ngwõ eglise ta bara ta fɔrona, ngwõwɔ zɛngɛkɔmabe na fɔroyi gũ hõ worasigi na yireyi gũ lanabɛbe ta da na, ngwõ ngwĩ ti ke ta Yesu Krista hõ. 14 Mɛ zigi ti a ma da zɔgɔta ma na ya be birɛ nka ma sɛbɛ sɛbɛ na fane be ma dɛ̃. 15 Yee nemɛ, ne ma hõ syedɛrɛ ma wiri be birɛ sale ga, sõ daga ngwĩ fa ta Wuro ta kõ kɔma woro hõ, be hõ ngwõ tɔ̀. Wuro ta kɔma, ngwõ Wuro na suguyi ta eglise, ngwõ ngwĩ tĩyã fɔga wɔkara sopagalo kõ pepe fɔga ngwɛne. 16 Wuro nyononakũ̀ na bunu da yire fɔrona, dakwiyɛro ha ti ngwõ na ga. Wuro mane ye dɔrɔ hõ tɛ sõ na. Ni na kìnìyi a ta telebe dɔrɔ. Mɛlɛkɛe mana za. Ye wadyuli ta a ta da na si sɔma woro hõ. Sɔma la a na diniya hõ. A duro ba wuro hõ.
41 Ni na kìnìyi a yera na kìni da diniya wɛ sanga ma sɔma bɔ na bere timi hõ ya lanabɛbe dira hõ mɔ zini na sɔmafirebɛre ta hõ dɔ zini ta kala ma. 2 Nĩyõsɔre na dapɔlabɛrisɔma ngwõwɔ firebɛ. Ngwona sɔma firebɛ sɔma ta kore fɔre siri wɛ. 3 Ye a yera na sigebɛ da ye nyama ha daga tɛ ga. Ye sɔma ha daga zõfere bɔ zõ ga. Nka Wuro ngwona zõfere tege ngwõfatɔ lanabe sɔma ngwĩye ngwõ tĩyã tɔ̀, ngwõwɔ barika yera Wuro ma hõ ne zõ. 4 Wuro ta tege fere pepe fɔro. Sõ ha daga maga ngwõ si hõ ga. A daga ngwõ tɔ kɔ barikayerabe nemɛ Wuro ma. 5 Wuro ta bɛrɛda kɔ Wuro mɛbe, ngwõwɔ ngwona fere kìnìbɛ. 6 Ne be hõ syenɔmane kala ngwona da na, be na tɛ Yesu Krista ta baratɛta na fɔroyi na. Be na a dɔrɔ da be be ni woro kɔ lanabɛbe na bɛrɛda nemɛ ane kɔ tĩyã na kala nemɛ, be dɔ ngwĩye ma. 7 Be ngwona sĩyɛ̃ na zanaye to yɛ, ngwõwɔ ngwĩye ha kanya ne kɔ Wuro ta da nemɛ ga. Be ye yɛrɛ sɛmɛ kɔ Wuro nyononakũ na da nemɛ. 8 Nafã ti komavere na da na sɛmɛbe na zɔgɔta nka nafã ti Wuro nyomonakũ na sɛmɛbe na, da pepe ta piri ma na kamasɔrɔ Wuro sugunɔmabe na datege bi ke ma. Basyɛ sugunɔmane kɔ sɛ̃yi mɛ. 9 Ngwona bɛrɛda tĩyã. Sɔma pepe daga ne fɔga hõ la ye na. 10 Ngwõ yena ke bara ta ne kũ kwini. Ke mane ke zigi dɛ Wuro na suguyi ma, ngwõ ngwĩ ngwõ tɛ sɔma pepe na kisita na, sãgofere ngwĩye ngwõ lanabe sɔma. 11 Be ngwona da yera ne sigebɛ hõ sɔma kala kɔ lɔ. 12 Sõ si ka be dɛgɛbɛ bya nimisalabe yena ga. Nka be daga tɛ zɛngɛdɔreta na lanabe sɔma ma, bɛrɛda ta piri ma na kɔ tɛda kɔ kanube kɔ lanabɛbe kɔ kìnìbɛbe ta da na. 13 Sane ma hõ na, be be nyanga hõ Wuro ta bɛrɛda kala sɔma nyono na hõ ne wadyu hõ ne kala. 14 Ni ta perefa ngwĩ ngwõ ti be hõ, be ka maga hõ bara ta kɔ ngwõ nemɛ ga. Sɔma mane fane bɛrɛda yera ane somɔlala mane ye sera dɛ be ma ngwĩ sanga ma, be mane ngwona perefa gũ ngwona sanga ma. 15 Be nyanga ngwona da na hõ be sebɛ ka ye hõ ngwõfatɔ sɔma pepe hõ na za da be ya zĩ. 16 Be be yɛrɛ kɔrose hõ be kakiri to bya sɔma kala da na. Be wɔ ngwona da hõ. Yee nemɛ, be na be yɛrɛ kisi hõ bya bɛrɛda na mɔre kisi mɛ.
51 Be ka bɛri somɔlalo ma kɔ sigemabe nemɛ ga. Nka be a ladi wɔkara be tõ bahõ. Yɛlɛ ladi wɔkara be pyare. 2 Yà somɔlala ladi wɔkara be syeri bahõ, hõ yɔdalamɛngɛ ladi wɔkara bya ligeyàra bahõ kɔ tino na fɔroyi nemɛ. 3 Yɔfuro yàra ngwĩye ngwõ ti ye sana, be ngwõwɔ yirebɛ. 4 Nka ne nɔmane wala mamanɔmane ne ti yɔfuro yà bo ta, ngwõwɔ daga dafɔre ta ya kõ kɔma ma dɛ̃ hõ kanya kɔ Wuro nyononakũ̀ nemɛ hõ ne na vɔrɔre ta dafɔretɛbe nemɛ ta ye ma. Ngwõ ngwõ dya Wuro ma. 5 Nka yɔfuro yà ngwĩ ngwõ ti ye sana, ngwõ ye zigi dɛ Wuro ma hõ wɔ Wuro mɛbe hõ wuru hõ kwe sĩ hõ ma. 6 Yà ngwĩ ngwõ dɔ nihõdyaro ma, hõ na na suguyi to yɛ, a siri wɛ. 7 Aiwa, be daga ngwona da yera ne sigebɛ ye ma ngwõfatɔ ye hõ tɛ zarakebariyasɔma na. 8 Ne bo sõ mane kwa ye yɛrɛ ta sɔma ma ga, sãgofere a yɛrɛ ta kõ kɔma, ngwona te ngwõ lanabɛbe na sogo dira. A yagayi lanabɛbariya sõ ma. 9 Be sebɛne yɔfuro yà togo sɛbɛ ngwĩ ngwõ dɔgɔ kesaa gũ, ne a hõ mane banga tala legelege ta yà. 10 A toga fɔro daga wiri a ta dafɔre yena. Ne a mane ye nɔmane woro hõ samara fɔga fɔrona, ne a hõ Wuro ta sɔma kãe wa, ne a hõ nyane sɔma dyema hõ tɛda fɔre sifa na nyaaye ta, ngwõ togo ngwõ sebɛne sɛbɛɛ. 11 Yɔfuro yàra ngwĩye ngwõ kyɛgɛ ga, be ka dyã ngwõwɔ toga sɛbɛ ga. Ne ye ta wu hõ ne suru hõ nyo, ye na Krista dira. 12 Yee nemɛ, ye na ye ta datege na gwereyi yaga hõ zarake ngwõ na. 13 Na kwe ngwõ ma mɛ, ye tɛ komabasɔma na ne yarayara ne kwɔ kwã kɔ kwã hõ. Ye ha komabasɔma dama ga, ye ye da ka sɔma ta da pepe hõ, hõ sɔma ta bunu da yera sire. Bɛrɛda ngwĩye ha daga yera na ga, ye ngwõwɔ yera. 14 Ngwõ yena mɛ tyata yɔdalamɛngɛ na yɔfuro yàra hõ ye bere nyo yɛ hõ nɔmane vɔrɔ hõ kwa ye yɛrɛ ta kõ ma ngwõfatɔ ke zugu ka na tɛno si gũ hõ ke dayaga bɛri ga. 15 Ngwona yɔfuro yàra na bɔ sotele dira na wɛ hõ dɔ Setane ma. 16 Ne yɔfuro yàra bɔ hõ ne ti lanabe yà bo ta kõ hõ, ngwõ daga ngwõwɔ dyema, a ka ngwona bye dɛ eglise ma ga. Yee nemɛ, eglise sebɛne yɔfuro yàra na syɛbɛye dyema ngwĩye ti ye sana. 17 Eglise somɔlala ngwĩye ngwõ zɛngɛfɛgɛbe na fɔroyi ta, eglise hõ ngwõwɔ dyati. Ye daga kɔ yirebɛbe pɔla nemɛ, sãgofere ngwĩye ngwõ Wuro ta bɛrɛda na wadyuli ta hõ ne sɔma kala mɛ. 18 A sɛbɛɛ Wuro ta bɛrɛda hõ da: Ne nyanga ne fɛ̃ tongo, be ka zɔ pɛrɛ a do ma ga. A sɛbɛɛ mɛ da ye baratɛta daga kɔ ya sara nemɛ. 19 Be ka syɛrɛbe na yagayi fɔga eglise somɔlalo ta da na ga, fɔ ne syɛrɛ pɔla wala saa hõ gũ ngwona da na. 20 Ngwĩye ngwõ kakye ta, be bɛri kyɛ ngwõwɔ ma sɔma pepe nyono na ngwõfatɔ bɔ sɛrɛ hõ kwã mɛ. 21 Ma ye yera ne sigebɛ be ma Wuro kɔ Yesu Krista kɔ mɛlɛkɛe na kìnìye nyono na da be ngwona fane pepe ta. Be ka bo sõ fõbɛ kɔ bo nemɛ ga. Be ka sõ dɛ̀gɛ̀ sõ na ga. 22 Be ka be soro dɛ sõ ma salesale hõ na ka eglise ta bara hõ ga. Be ka kwe kɔ sɔma zɛ nemɛ ye ta dayagatɛbe na ga. Be be yɛrɛ tanga dayaga pepe ma. 23 Be ka zo zana mɛnɛ ga. Be duvɛ̃ zɔgɔ mɛnɛ be kɔrɔ yena kɔ bya komatoga na nyaaye yena. 24 Bɔ sɔma ta kakye dɔre sire sɔma pepe nyono na hõ ya ye zĩ hõ kiti sɔ do hõ. Nka bɔ ta kakye na dɔre ngwõ timi. 25 Yee nemɛ si mɛ, tɛda fɔre ye dɔrɔ sire sɔma pepe nyono na. Sɔma ha dafɔre ngwĩye za sale ga, ngwõwɔ na dõye ba na wɔ yɛ mɛ ga.
61 Ngwĩye ngwõ tɛrɛ, ngwõwɔ pepe daga na tɔ̀ da ye ngwonakɔma daga kɔ yirebɛbe nemɛ ngwõfatɔ sõ si ka na Wuro togo yaga ga. Ye ka na bɛrɛda yaga yera kyà kala ta da na ga. 2 Tɛrɛ ngwĩye ngwonakɔma ngwõ lanabe sɔma, ngwõwɔ syenɔmane. Nka tere na lanabe sõ ka ye ngwonate na lanabe sõ dɛgɛbɛ ga. A hõ bara ta a ma hõ yaloyi gwerena ma kamasɔrɔ ngwĩye ngwõ nafã gũ a ta bara na, ngwõwɔ lanabe sɔma ngwĩye da dya a ma. Be sɔma kala ngwona da na hõ ne wadyu. 3 - 4 Ne sõ bo hõ sɔma kala kɔ kala za bo nemɛ, ne ngwona kala ma kanya kɔ Matigi Yesu Krista ta tĩyã na bɛrɛda kɔ Wuro nyononakũ̀ na kala nemɛ ga, ngwona te pagaa yɛrɛyirebɛbe na, a ba fui tɔ̀ ga. Togaro kɔ bɛrɛda mɛngɛ na dakwiyɛro a kakiri yaga. Da ngwĩye ngwõ sa ngwõwɔ hõ, bɔ ngwõwɔ: Kereyabe kɔ dakwiyɛro kɔ vini bɛrɛda kɔ lanyini yaga. 5 Dakwiyɛro nyaa tye mɛ ngwĩye ngwõ tɛ miri yaga na kɔma kɔ ye nemɛ yɔ. Tĩyã ha ti ngwona sɔma ta fyu ga. Ye dyati da Wuro nyononakũ ngwõ fere gũbe. 6 Fa ngwĩ ti sõ ta, ne a hõ ne ni hõ dya ngwõ na, ngwona sanga ma Wuro nyononakũ̀ ngwõ nafɔro na yireyi ngwona te ta. 7 Ke ha na kɔ fere nemɛ ke sera hõ bɛ diniya hõ ga. Ke ha na sa kɔ fere nemɛ ke sera hõ bɛ hõ ya kɔ lɔ mɛ ga. 8 Ngwõ yena ne zõfa kɔ zogo ne ti ke ta, ngwõ daga ke wa. 9 Nka ngwĩye tyata tɛ ferekɔma na, ngwõwɔ na bɛrɛ kɔrɔwɛbe hõ. Ye ta wu na yagaye na vɔraye na tɛ wɔkara wore fa hõ ne fɔga ne ka yagabe kɔ siri na da hõ. 10 Gwana na wu ngwõ dayaga sifa pepe sulu. Sɔma bɔ dɔ a ma hõ lanabɛbe na sogo dira hõ nyane na nyaaye gũ ye yɛrɛ kɔrɔ hõ. 11 Nka bi kwane, Wuro ta sõ, be yɛrɛ kɛ̃gɛlɛ ngwona da ma. Dɔ telebe kɔ Wuro nyononakũ kɔ lanabɛbe kɔ kanube kɔ woramakwɔnabe ma. 12 Lanabɛbe na kũ na fɔroyi kwini hõ sugunɔmabe na wɛbariyayi fɔga fɔrona. Be mane syɛrɛbe na fɔroyi wa syɛrɛ nyaa nyono na ngwĩ sanga ma, Wuro mane be wiri ngwõfatɔ be hõ ngwona sugunɔmabe na wɛbariyayi tɔ̀. 13 Wuro ngwĩ ngwõ fere pepe sugubɛ, kɔ Yesu Krista ngwĩ mane syɛrɛbe na fɔroyi wa Põse Pilate zĩ hõ, mɛ yera be ma ngwõwɔ nyono na hõ na sigebɛ be ma da: 14 Be na zarakebariyayi hõ kwa ngwona fane ma fɔrona fɔ ya wiri kyà Matigi Yesu Krista ta kɔ ma. 15 Wuro ngwõ sebɛbenate kɔ dubanate sonala legelege. Ngwõ fangamɛ ta fangama kɔ matige ta Matigi. Awe Yesu Krista dɔrɔ a ta wakati na lategeyi ma. 16 Awe sonala ngwõ siri ga. A tanga kini ngwĩ hõ, sõ si ha sebɛne ye dɔbɛ ngwõ na ga. Sõ si ha Wuro za ga, sõ ha sebɛna za ga. Yirebɛbe kɔ sebɛbe na wɛbariyayi, ngwõ aweyi. Amina. 17 Be yera bo diniya hõ nafɔronyaakɔma ma hõ na sigebɛ ye ma da ye ka ye yɛrɛ yirebɛ ga. Ye ka ye zigi dɛ nafɔro ma ga ngwĩ ngwõ na wɛ. Nka ye ye zigi dɛ Wuro ma, awe ngwĩ fere pepe pere ke ma hõ ne nyaabɛ ngwõfatɔ ke hõ ni hõ dya ngwõwɔ na. 18 Yera ye ma da ye dafɔre ta. Ye hõ tɛ nafɔrokɔma na tɛda fɔre ta piri ma na. Ye ye sera kɔba hõ bɔ ka. 19 Yee nemɛ, ye na nafɔro na fɔroyi na wɛbariyayi kwe sɛ̃ zĩ hõ. Ye na sugunɔmabe na syɛbɛyi gũ. 20 Timote, da ngwĩ ngwõ kalofa be ma, kwa ngwõ ma fɔrona. Be be yɛrɛ kɛ̃gɛlɛ bɛrɛda kuro ma kɔ datɔbe na nĩyononayi ma. 21 Bɔ sɔma da ye ngwona datɔbe gũ. Ye fire hõ sa lanabɛbe na sogo hõ. Wuro ta nema hõ wɔ ka ta.