1 TESALONI KƆMA
11 Pauli kɔ Silasi kɔ Timote bo sɛbɛ fane Tesaloni kɔma ta eglise ma. Kya eglise Tõ Wuro kɔ Matigi Yesu Kristayi. Wuro syara ta ka ma. Wuro hõ nema pere ka ma. 2 Mɛ̀ barika yera Wuro ma kya da na sanga pepe ma hõ Wuro mɛ ka ma. 3 Ka mane tɛda ta hõ kya lanabɛbe dɔrɔ sɔma ma. Kya kanube mane ka nyangabɛ bara na. Ka zigi mane dɛ kyà Matigi Yesu Krista ma. Ngwõ pepe yena mɛ̀ ha sãfire kɔ kya da nemɛ ke Tõ Wuro zĩ hõ ga. 4 Syenɔmane, mɛ̀ tɔ̀ da kya da dya Wuro ma, a mane ka dɛ̀gɛ̀ hõ tɛ aye na. 5 Mɛ̀ na ka birɛ kɔ Bɛrɛda Fɔre nemɛ. Ye ha bɛrɛda dama ga, ngwona bɛrɛda na kɔ fanga nemɛ mɛ kɔ Ni na kìnìyi nemɛ. Mɛ̀ tɔ̀ ne kìnì da ngwona Bɛrɛda Fɔre ngwõ syɛbɛ da. Myà yano ka woro hõ ngwõ tɛ kya foro yena. 6 Ka mane mɛ̀ kɔ Matigi tɛno sɛmɛ hõ ne ta. Ka mane nyane da somɔna hõ Wuro ta bɛrɛda fɔga kɔ nihõdyaro nemɛ ngwĩ ngwõ sa Ni na kìnìyi ta. 7 Yee nemɛ ka tɛ zɛngɛdɔrere na lanabe sɔma pepe ma ngwĩye ti Masadwane kɔ Akayi gana hõ. 8 Ka mane fane Masadwane kɔma kɔ Akayi kɔma ta Matigi ta da na. A ngwõwɔ dama ga. Kya lanabɛbe ta da Wuro ma ngwõ sa ya wiri bi pepetai hõ. Ngwõ yena fa ha wɔ mɛ̀ ta hõ ne yera titiri ga. 9 Ngwona sɔma pepe kya da yera, ye ka mane mɛ̀ fɔga fɔrona ke sa sanga ma ka ma. Ye ka fyã da dira hõ ka bere Wuro ma hõ bara ta Wuro na syɛbɛyi na suguyi ma. 10 Ye da ka tine Wuro No yɛ̀rɛ̀, ngwĩ na na hõ tuma wuro hõ. A No ngwõ Yesu, Wuro ngwĩ ngwini na sabɛ sara woro hõ. Ngwõ ke wa Wuro ta worababe na nayi we.
21 Syenɔmane, ka yɛrɛ na tɔ̀ da mɛ̀ ha mane sa ka ma zana ga. 2 Ye mane mɛ̀ nyane hõ mɛ̀ vini Filipe kuru hõ sane mɛ̀ hõ wiri ka birɛ Tesaloni, ka ngwõ pepe tɔ̀. Ngwõ pepe na, kyà Wuro mane mɛ̀ wora sigebɛ hõ na ta Bɛrɛda Fɔre yera ka ma, hale ne ngwõ hõ mane tɛ kɔ birisi da nemɛ. 3 Mɛ̀ na kɔ bɛrɛda ngwĩye nemɛ, fire do ha ti ngwõwɔ hõ ga. Worayɔ kɔ namara ha ti ye hõ mɛ ga. 4 Wuro dyã ke ma hõ Bɛrɛda Fɔre kalofa ke ma. Ngwõ yena mɛ̀ bɛri wɔkara Wuro tyata mɛ̀ bɛri ngwɛne. Mɛ̀ ha tyata sɔma madyamabe ta ga. Mɛ̀ tyata Wuro madyamabe ta, ngwĩ ngwõ ke kɔrɔ hõ da tɔ̀. 5 Mɛ̀ ha na kɔ mamana bɛrɛda si nemɛ ga, ka yɛrɛ ngwõ tɔ̀. Mɛ̀ ha na kɔ bɔ bɛrɛda nemɛ ngwõfatɔ mɛ̀ hõ gwana gũ ga. Wuro ngwõ mɛ̀ syere. 6 Mɛ̀ ha yirebɛbe kya sõ si ta ga. A hõ ma ki ta wala sõ za ta ga. 7 Ngwõ pepe na, mɛ̀ mane sebɛne Krista ta fanene ta yirebɛbe kya ka ta. Nka hõ mɛ̀ to ka woro hõ, mɛ̀ wora mane kwɔna wɔkara nemɛ vɔrɔ yà woromakwɔna ngwɛne a ne kwa ye nɔmane ma. 8 Ka da dya mɛ̀ ma fɔrona. Ngwõ yena mɛ̀ mane tyata hõ Wuro ta Bɛrɛda Fɔre pere ka ma ane hõ mɛ̀ yɛrɛ ni pere mɛ. Ngwonona? Kamasɔrɔ ka da mane dya mɛ̀ ma hale. 9 Syenɔmane, ka kakiri ti kɔ myà bara kɔ myà nyane da nemɛ. Mɛ̀ mane bara ta sĩ kwe wuru ma ngwõfatɔ mɛ̀ hõ Wuro ta Bɛrɛda Fɔre yera ka ma, mɛ̀ ka tɛ ka na sõ si ta bye na ga. 10 Myà yano ki lanabe sɔma woro hõ mane kìnì ne tele. Zarake do si ha ti mɛ̀ na ga. Ki yɛrɛ kɔ Wuro tɛ ngwõ syɛrɛ na. 11 Ka tɔ̀ da mɛ̀ mane da ta ka ma wɔkara tõ da ta ye nɔmane ma ngwɛne. 12 Mɛ̀ mane ka nyangabɛ hõ ka zigitugu hõ nyɛ ka ma ngwõfatɔ kya yano hõ dya Wuro ma. Wuro ngwõ ka wiri hõ kwe kɔ le awe yɛrɛ ta fangamabe kɔ a ta noro hõ. 13 Mɛ̀ barika yera Wuro ma kya da na sanga pepe ma. Ngwonona? Kamasɔrɔ mɛ̀ ya ka birɛ kɔ Wuro ta bɛrɛda nemɛ ngwĩ sanga ma, ka mane ne mɔ ne fɔga. Ka ha mane ne fɔga wɔkara sõ ta bɛrɛda ga nka wɔkara Wuro yɛrɛ ta bɛrɛda. A tɛ ngwõ na tĩyã na. Wuro tine bara ta ki lanabe sɔma kɔrɔ hõ. 14 Syenɔmane, Wuro ta eglise ngwĩ ti Zude gana hõ ngwõ mane da ngwĩye somɔna, ki yɛrɛ ngwõ nemɛ na da somɔna mɛ. Yahutuye mane ngwõwɔ nyane. Kya gana hõ kɔma mane ka nyane. 15 Ngwona Yahutuye ngwõ Matigi Yesu yɛ. Ye pururi yɛ mɛ. Ye mɛ̀ laga kɔ nyane na yireyi nemɛ. Ye da ha dya Wuro ma ga, ye sɔma pepe zugi. 16 Ye mane tyata mɛ̀ bare hõ bɛrɛda yera si sɔma ma ngwĩye ngwõ na kisibe pere ye ma. Yee nemɛ, ye ya kakye nyaa dopaga ye ngwĩye ta sanga pepe ma. Basyɛ kwane, Wuro ta worababe bɛrɛ ye ma. 17 Syenɔmane, hõ ke to ke birɛ ne dɛrɛ nemɛ na, ka na wu ti mɛ̀ na hale. Ke birɛ dɛrɛ nemɛ na komavere ta piri ma na, nka mɛ̀ miri kya da na sanga pepe ma. Mɛ̀ mane myà sebɛbe pepe ta ngwõfatɔ ke hõ bere ka za yɛ. 18 Mɛ̀ mane tyata bere ya ka birɛ. Mɛ Pauli yɛrɛ mane tyata bere ya sanga nyaa ma nka Setane mɛ̀ bare ngwõ na. 19 A ki dama ngwõ tɛ myà zigi na. A ha sõ za ga. Mɛ̀ ni hõ dya kya da na. Mɛ̀ na mɛ̀ yɛrɛ yirebɛ hõ myà sebɛbegũbe da yera Matigi Yesu zĩ hõ a na sanga ma ki yena. 20 Mɛ̀ mɛ̀ yɛrɛ yirebɛ kya da na tĩyã na. Mɛ̀ ni hõ dya kya da na mɛ.
31 Ngwõ timi mɛ̀ ha sebɛ ngwõ somɔna titiri ga. Ngwõ yena mɛ̀ wɔ mɛ̀ sana Ateni kuru hõ, hõ Timote fane ka birɛ. 2 Ngwõ ke syeno ngwĩ ngwõ kwe bara ta kɔ mɛ̀ nemɛ hõ Bɛrɛda Fɔre yera Krista ta da na. Mɛ̀ a fane ngwõfatɔ a hõ fanga ka ka hõ, hõ ka dyema kya lanabɛbe ta piri ma na. 3 Mɛ̀ tyata ka na sõ si ka bere timi kya nyane da yena ga. Ke yɛrɛ na tɔ̀ da ngwona nyane da ngwõ Wuro ta latege da kya piri ma na. 4 Hõ mɛ̀ to ka birɛ, mɛ̀ pya ne yera ka ma da mɛ̀ na nyane gũ. Ngwõ mane tɛ wɛ, ka ngwõ tɔ̀. 5 Ngwõ yena mɛ ha mane sebɛne ngwõ somɔna titiri ga, mɛ mane Timote fane ka birɛ ngwõfatɔ mɛ hõ kya lanabɛbe nɔma tɔ̀. Mɛ mane kwã da zini yaga ngwonate mane ka mamana, da myà bara pepe tɛ zana. 6 Basyɛ kwane, Timote na hõ tuma ka birɛ hõ kya lanabɛbe kɔ kya kanube na da yera mɛ̀ ma. A da ye miri ti ka kɔrɔ hõ myà da na sanga pepe ma. A da mɛ̀ na wu ti ka na wɔkara ka na wu ti mɛ̀ na ngwɛne. 7 Syenɔmane, mɛ̀ hõ mɔ da kya lanabɛbe ya zĩ, ngwõ mɛ zigi tugu myà wakati na sigeyi kɔ myà nyane sanga ma. 8 Basyɛ mɛ̀ tɔ̀ da ka taa Matigi hõ. Ngwõ yena mɛ̀ sugu. 9 Basyɛ mɛ̀ sebɛne barika yera Wuro ma kya da na. Mɛ̀ nihõdyaro na yireyi gũ Wuro zĩ hõ ki yena, ngwõ yena mɛ̀ barika yera a ma. 10 Sĩ kwe wuru ma mɛ̀ a mɛ fɔrona da Wuro hõ dyã mɛ̀ ka za nyono kɔ nyono hõ ka dyema kya dɛsɛ da na lanabɛbe ta piri ma na. 11 Ke Tõ Wuro kɔ kyà Matigi Yesu hõ sogo tetɛrɛ mɛ̀ ma, mɛ̀ hõ wiri ka birɛ. 12 Ki kwane, Matigi hõ fa kwe kya nemɛ kanube ma kɔ sɔma pepe na kanube ma, fɔ a hõ nyaa hale wɔkara myà kanube yire fɔrona ngwɛne kya piri ma na. 13 Yee nemɛ, a na ka sabati ka kɔrɔ hõ. Matigi Yesu hõ na ngwĩ sanga ma kɔ a ta sɔma pepe nemɛ, ka na tɛ dopagaye kɔ kìnìye na ke Tõ Wuro zĩ hõ.
41 Syenɔmane, ka daga ya ngwɛne hõ ka da dyabɛ Wuro ma, mɛ̀ ka kala ngwõ na. Ka tine ya yee nemɛ si mɛ. Basyɛ mɛ̀ ka pepe mɛ fɔrona Matigi Yesu togo yena da ka fa kwe ngwona yano ma hõ ya zĩ hõ. 2 Mɛ̀ fane ngwĩye pere ka ma Matigi Yesu togo barika hõ, ka ngwõ pepe tɔ̀. 3 Wuro mako ti ngwĩ fa na kya piri ma na, ngwõ bo—ye ka ka yɛrɛ na kìnìye to hõ ka yɛrɛ kɔrɔse kɔ kakaro da pepe ta tɛbe nemɛ. 4 Ki nimisini, ka pepe tala tala daga yà nyo na fɔga tɛno na kìnìyi na hõ na yirebɛ. 5 Kakalabe na wu na miri ka kwɔ ngwona da hõ wɔkara si sɔma ngwõ ta ngwɛne ngwĩye ha Wuro tɔ̀ ga. 6 Ngwona da ta piri ma na, sõ si ka dayaga ta hõ ye syeno kakye bi ga. Mɛ̀ ngwona da yera ne wɛ ka ma hõ na sigebɛ da sõ ngwĩ ngwõ nemɛ na da ta, Wuro na ngwona te nyane fɔrona. 7 Wuro ha ke wiri hõ ya dumatɛbe hõ ga. A ke wiri hõ ya kìnìbɛbe na. 8 Ngwõ yena sõ ngwĩ ha dyã ngwona ladibe fɔga ga, ngwõ ha maga sõ ma ga, a maga Wuro ngwõ ma, ngwõ ngwĩ ye Ni na kìnìyi pere ka ma. 9 Ki lanabe sɔma ta nemɛ kanube ta piri ma na, mɛ ha daga fa sɛbɛ ngwona da na ga. Wuro yɛrɛ mane ka kala ye ka daga ka nemɛ kanu. 10 Ka ya ngwõ nemɛ na kanube na syenɔmane pepe ta piri ma na ngwĩye ti Masadwane gana hõ. Aiwa, syenɔmane mɛ ka mɛ fɔrona da ka fa kwe ngwõ ma. 11 Ka ka nyanga hõ wɔ woramakwɔnabe hõ, hõ ka yɛrɛ ta da nyonohõwa, hõ bara ta kɔ ka yɛrɛ sera nemɛ wɔkara mɛ̀ mane yera ne wɛ ka ma ngwɛne. 12 Yee nemɛ, hale lanabɛbariya sɔma na ka yirebɛ. Ke mako ha na ti sõ za na hõ ka mako fɔrɔ ga. 13 Aiwa, syenɔmane, sɔma ngwĩye siri wɛ, mɛ̀ tyata ka tĩyã tɔ̀ ngwõwɔ ta da na ngwõfatɔ ka ni na ka bã wɔkara zigi ha ti ngwĩye ta ga. 14 Ke la a na da Yesu siri hõ ngwini. Ngwõ yena ke la a na mɛ da ngwĩye la Yesu na hõ zɛ siri, Wuro na ngwõwɔ ngwini kɔ Yesu nemɛ. 15 Matigi ngwĩ fa yera ngwona da na bo ngwõ—ye ke ngwĩye na suguye hõ wɔ fɔ ya wiri Matigi bere na sanga ma, ke ha na pya ya ngwona sɔma zĩ hõ ga. 16 Matigi yɛrɛ na zi hõ tuma wuro hõ kɔ songo kõ na yireyi nemɛ. Mɛlɛkɛ ngwonate na songo yire. Wuro ta tola na pɛ̃. Krista ta lanabe sɔma ngwĩye siri wɛ, ngwõwɔ na pya ngwini dɛ̃. 17 Ngwõ timi ke ngwĩye na suguye hõ wɔ ngwona sanga ma, ke na duro wuro hõ, hõ ya ke nemɛ kwe kɔ ngwõwɔ nemɛ dabara hõ, hõ Matigi tɛ̃ wuro hõ. Aiwa, ke na wɔ Matigi birɛ sanga pepe ma. 18 Ngwõ yena ka ka nemɛ zigi tugu kɔ ngwona bɛrɛda nemɛ.
51 Ngwona da pepe na tɛ wakati ngwĩye ma, mɛ ha daga sɛbɛ sɛbɛ na fane ka ma ngwona da na ga. 2 Ka yɛrɛ ngwõ tɔ̀ fɔrona da Matigi ta kɔ na na wɔkara pano tɛne na wuru hõ ngwɛne. 3 Sɔma na da ye syara tye, ye nyane tye ga. Ngwona sanga ma nyane na yireyi na bɛrɛ ye ma sale. Ye ha na dɛɛ ga. A na tɛ wɔkara nyane bɛrɛ yà ma ngwɛne a mana sanga ma. 4 Ki kwane, syenɔmane, ka ha ti tunungu hõ ga. Ngwona kɔ ha na bare ka na wɔkara pano bare sõ na ngwɛne ga. 5 Kini kɔ sĩ da dya ka pepe ma. Wuru kɔ tunungu da dya ke na sõ si ma ga. 6 Ngwõ yena ke ka nyi ga wɔkara bɔ nyi ngwɛne. Ke daga wɔ ke nyono na, ke ka kwĩ mɛnɛ nyingi ga. 7 Sɔma ngwĩye ngwõ nyi, ngwõwɔ nyi wuru hõ. Ngwĩye kwĩ mɛnɛ nyingi, ngwõwɔ mɛnɛ nyingi wuru hõ. 8 Ke kwane, kini da dya ke ma. Ke ka kwĩ mɛnɛ nyingi ga. Ke daga lanabɛbe kɔ kanube ka ke hõ wɔkara sõ kũ kwini zogo ka ngwɛne. Ke zigi ti kisibe ngwĩ ma, ngwõ tɛ wɔkara kya kũ kwini bãfɔla. 9 Wuro ke dɛ̀gɛ̀ hõ kisibe gũ kya Matigi Yesu Krista barika hõ. A ha ke dɛ̀gɛ̀ hõ na ta worababe gũ ga. 10 Yesu Krista siri ke yena ngwõfatɔ ke hõ kwe sugu hõ tanga kɔ le a na sanga ma, hale ne ke hõ mane siri wɛ wala ke na suguye hõ wɔ ngwona wakati ma. 11 Ngwõ yena ka pepe tala tala hõ ka nemɛ nyangabɛ hõ ka nemɛ dyema wɔkara ka ye ta ngwɛne basyɛ. 12 Syenɔmane, mɛ̀ ka mɛ da ka sɔma yirebɛ ngwĩye bara ta ka woro hõ. Ma da Wuro ngwĩye dɛ̀gɛ̀ hõ ka zĩ fɔga hõ ka ladi. 13 Ka ye yirebɛ fɔrona hõ ne kanu ye ta bara yena. Ka wɔ syara na nemɛ ta. 14 Syenɔmane, mɛ̀ ka mɛ fɔrona da ka sɔma ladi ngwĩye ngwõ piripara da ta. Sɔma ngwĩye ngwõ piri sɔma na, ka ngwõwɔ wora sigebɛ. Ka barikadɛgɛsɔma dyema. Ka somɔnabe ta sɔma pepe ta piri ma na. 15 Ka na sõ si ka dayaga na ku sara kɔ dayaga nemɛ ga. Ka dafɔre ta nemɛ ma kɔ sɔma pepe ma sanga pepe ma. 16 Ka ni hõ dya sanga pepe ma. 17 Ka ka Wuro mɛbe do dira ga. 18 Ka barika yera Wuro ma da pepe na. Hõ ka to ka ne Yesu Krista ta sogo ya, ngwõ pepe ngwõ Wuro dungo kya piri ma na. 19 Ka ka Ni na kìnìyi bare ga. 20 Ka ka sĩ fane da na ga. 21 Ka da pepe kɔrɔ wa. Ngwĩ ngwõ fɔro, ka ngwõ fɔga fɔrona. 22 Ka ka yɛrɛ kɔrɔse dayaga sye pepe ma. 23 Syaranate Wuro hõ ka ta aye na melemele. A hõ kwa ka ma—ka ni ma kɔ ka kɔrɔ hõ da ma kɔ ka komavere pepe ma. Ka na kìnìye hõ wɔ kyà Matigi Yesu Krista bere na sanga ma. 24 Ka na wirita sarati paga. A na ngwõ pepe ta. 25 Syenɔmane, ka Wuro mɛ mɛ̀ ma. 26 Ka bire syenɔmane pepe na kɔ syenɔmabe na fo nemɛ. 27 Mɛ ka mɛ fɔrona Matigi togo na da ka bo sɛbɛ kala syenɔmane pepe nyono na. 28 Matigi Yesu Krista hõ nema pere ka ma.