1 PIERRE

¹ Mɛ Pierre tɛ Yesu Krista ta faneta na. Mɛ bo sɛbɛ fane Wuro ta dɛ̀gɛ̀wɛsɔma ma, ngwĩye ngwõ tɛ wɔyerɛ na Põ kɔ Galasi kɔ Kapadose kɔ Asi kɔ Bitini gana pepe hõ. ² Tõ Wuro ka dɛ̀gɛ̀ ho kanya kɔ a yɛrɛ ta latege da nemɛ hõ tɛ sɔma kìnì na Ni na kìnìyi barika hõ. A tyata ka hõ Yesu Krista kwɛ̃ fɔga hõ kìnì Yesu Krista tõ na sɛrɛsɛrɛyi barika hõ. Wuro syara ta ka ma hõ nema pere ka ma hõ na nyaabɛ. ³ Ke barika yera Wuro ma ngwõ ngwĩ tɛ kyà Matigi Yesu Krista Tõ na. A ta makare yire yena a mane Yesu Krista ngwini na sabɛ sara woro hõ. Yee nemɛ ke vɔrɔ kanyena pɔlabe gũ. Ngwõ zigi na wɛbariyayi ka ke hõ. ⁴ Ke tɔ̀ da ke na kɔrɔ bi, Wuro ngwĩ tetɛrɛ na tege a ta sɔma ma wuro hõ. Ngwona kɔrɔ ha na vɔra ga, a ha na yaga ga, a ha na wɛ mɛ ga. ⁵ Ngwõ tɛ kayi na, Wuro kwa ki ngwĩye ma a ta sebɛbe barika hõ kya lanabɛbe yena. Ka tine ngwona kisibe yɛ̀rɛ̀ ngwĩ ngwõ tetɛrɛ wɛ. A na ye dɔrɔ diniya wɛ sanga ma. ⁶ Ka ni hõ dya ngwõ na. Ngwõ pepe na, basyɛ ne a hõ ne daga tɛ, ka ni na bã wakati zɔgɔ kya kɔrɔwbe sifa nyaa yena. ⁷ Ngwona kɔrɔwɛbe tɛ hõ na dɔrɔ da kya lanabɛbe ngwõ syɛbɛ da. Sanu ngwõ fa na wɛyi nka ya ka togo hõ, hõ na kɔrɔ wa. Kya lanabɛbe ngwĩ ngwõ fõ kɔ sanu nemɛ, ngwõ daga kɔrɔwɛ ngwõfatɔ a hõ wɔ yɛ. Ngwona sanga ma ka na yirebɛbe kɔ noro gũ Yesu Krista dɔre sanga ma. ⁸ Ka ha awe za dɛ̃ ga. Ngwõ pepe na, ka na kanu. Hale ne ka mana za basyɛ ga, ka la a na. Ngwõ yena ka ni hõ dya kɔ nihõdyaro na yireyi nemɛ. Ngwõ yire fɔ ngwona nihõdyaro nɔma ha sebɛne yera ga. ⁹ Kya lanabɛbengwõ̀ ngwõ ka ni ta kisibe. ¹⁰ Ngwona nema ngwĩ na pere ka ma, purusɔma mane fane da ta ngwona da na. Yewɔ kwane tɔga ngwona kisibe ta da na hõ na kikyɛ. ¹¹ Krista Ni ngwĩ mane ti ye kɔrɔ hõ, ngwõ mane Krista ta nyane da na nayi dɔrɔ ye ma. A noro dɔrɔ ye ma mɛ ngwĩ na dɛ Krista ma ngwõ timi. Ngwona Ni da ngwĩye dɔrɔ ye ma, ye mane ye nyanga hõ ngwona wakati kɔ a tino nɔma tɔ̀. ¹² Wuro a dɔrɔ ye ma da ye ha ngwona bara ta ye yɛrɛ ma ga, ye ngwõ ta ka ma. Yewɔ tĩyã yera, ka ngwĩ tĩyã mɔ basyɛ. Bɛrɛda Fɔre na fanene ngwona tĩyã yera ka ma. Ye bɛri Ni na kìnìyi barika hõ ngwĩ ngwõ zi hõ tuma wuro hõ. A dya mɛlɛkɛe ma mɛ hõ ngwona tĩyã tɔ̀. ¹³ Ngwõ yena ka ka kakiri tangabɛ hõ wɔ ka nyono na. Nema ngwĩ na pere ka ma Yesu Krista dɔre sanga ma, ka ka zigi pepe dɛ ngwõ ma. ¹⁴ Ka Wuro kwɛ̃ fɔga. Da ngwĩye na wu mane ka fɔga ka datɔbariya sanga ma, ka ka kya da ta hõ kanya kɔ ngwona wu nemɛ ga. ¹⁵ Nka ka hõ tɛ kìnì na kya yano pepe na wɔkara ka na wirita Wuro kìnì ngwɛne. ¹⁶ A sɛbɛɛ Wuro ta bɛrɛda hõ, ye yi kìnì, ngwõ yena ke daga kìnì mɛ. ¹⁷ Ka Wuro mɛ ngwĩ sanga ma, ka a wiri ka tõ. Awe ha sõ dɛ̀gɛ̀ sõ na ga, a kiti sɔ sɔma pepe ma hõ kanya kɔ ye ta tɛda nemɛ. Ngwõ yena, hõ ka to bɛ diniya hõ, ka kya tɛda pepe ta kɔ Wuro nyononakũ̀ nemɛ. ¹⁸ Wuro ka ngwonawa kɔ fa ngwĩ nemɛ hõ ka wa kya yano na zanazanayi hõ, ka mane ngwĩ gũ ka tamɛ ta, ka ngwõ tɔ̀. A ha tɛ wɔkara gwana kɔ sanu ga. Ngwõwɔ na wɛ. ¹⁹ Nka Wuro ka ngwonawa kɔ Krista tõ nemɛ, ngwõ ngwĩ fõ kɔ fere pepe nemɛ. Awe tɛ wɔkara gwano, zɛnɛ ha ti a ma ga, duma ha ti a ma mɛ ga. ²⁰ Wuro mana dɛ̀gɛ̀ sane lagakõ du hõ tegee. A ye dɔrɔ bo wakati wɛ sanga ma ka yena, ki ngwĩye ngwõ la Wuro na awe barika hõ. ²¹ Ngwõ a ngwini na sabɛ sara woro hõ, hõ noro dɛ a ma ngwõfatɔ ka hõ la Wuro na hõ ka zigi dɛ a ma. ²² Ka mane tĩyã fɔga hõ ka kɔrɔ hõ kìnìbɛ. Kanube na syɛbɛyi ti ka kɔrɔ hõ ka syenɔmane ta piri ma na. Aiwa, ka ka nemɛ kanu fɔrona kɔ ka kɔrɔ pepe nemɛ. ²³ Ka vɔrɔ kanyena pɔla na Wuro ta bɛrɛda na suguyi na wɛbariyayi barika hõ. Ngwona vɔrɔbe ha tɛ komavere na vɔrɔbenayi ga. Ngwõ ninayi. ²⁴ Wɔkara a sɛbɛɛ Wuro ta bɛrɛda hõ ye: Sɔma pepe ti wɔkara sɔgɔ. Ye na noro pepe ti wɔkara sɔgɔ tulo bahõ. Sɔgɔ kwiyɛ, a na tulo dɔrɔ. ²⁵ Nka Matigi ta bɛrɛda na wɔ yɛ fɔ abada. Bɛrɛda Fɔre bɛrɛda ngwĩye yera, ye ngwõwɔ.

¹ Ngwõ yena ka zugube pepe dira kɔ lamara da pepe kɔ dapɔlabɛribe kɔ kerayabe, ngwõwɔ pepe kɔ toga yagabe. ² Nyingi da dya bibi ma ngwɛne, yee nemɛ Wuro ta bɛrɛda na wu hõ ka fɔga ngwõfatɔ ka hõ yire hõ kisibe gũ. Ngwona bɛrɛda sõ ni sugubɛ wɔkara nyingi bibi sugubɛ ngwɛne. ³ Ka mane Matigi ta da sege hõ tɔ̀ da a fɔro. ⁴ Ka ka dɔbɛ Matigi na, ngwõ dɔgɔno na suguyi. Sɔma maga a ma, nka a tɛ Wuro ta dɛ̀gɛ̀wɛyi na, a tere ba hale. ⁵ Ka na mɛ, hõ tɛ wɔkara dɔge na suguye. Ka hõ dyã Ni na kìnìyi ka ta a ta tɔge kõ na. Ka na bara ta ngwɛ̃ hõ salaka na syɛbɛye wa Wuro ma Yesu Krista barika hõ, ngwĩ ngwõ na dya a ma. ⁶ A sɛbɛɛ Wuro ta bɛrɛda hõ da: Mɛ mane dɔgɔno na terebayi dɛgɛ hõ tɛ Siyõ kuru du na telebɛ dɔgɔno na. Ngwĩ hõ la ngwõ na, ngwõ ha na piri ga. ⁷ Ki ngwĩye ngwõ lanabɛbe ta, ki nyena hõ ngwona dɔgɔno fõ kɔ fere pepe nemɛ. Lanabɛbariya sɔma ta piri ma na, Kõ tɔgere maga dɔnɔno ngwĩ hõ, ngwõ tɛ kulu du na telebɛ dɔgɔno na. ⁸ A da bo piri ma mɛ: Sɔma na ne dũ ne bɛrɛ ngwona dɔgɔno hõ. Ye ha Wuro kwɛ̃ fɔga ga, ngwõ yena ye kã dũ. Ngwõ mane tɛ Wuro dungo na ye ta piri ma na. ⁹ Ki kwane, ka tɛ si na dɛ̀gɛ̀wɛyi na kɔ salakawɛre na fangamɛ kɔ si na kmiye. Ka tɛ Wuro ta sɔma na. Wuro ngwĩ mane ka wiri hõ ka sabɛ tunungu hõ, hõ ka tege awe yɛrɛ ta kini na yireyi hõ, ngwõ ka dɛ̀gɛ̀ hõ Wuro ta kabako tɛda yera. ¹⁰ Ka ha mane pya ne Wuro ta sɔma ga, nka basyɛ ka tɛ Wuro ta sɔma na. Ka ha mane pya ne Wuro ta makare tɔ̀ ga, nka basyɛ Wuro makare ka na. ¹¹ Syenɔmane na kanuye, ka tɛ samara kɔ wɔyerɛ na bɛ diniya hõ. Mɛ ka mɛ da ka komavere na wu na da to yɛ. Ngwõwɔ kwini kɔ sõ ni nemɛ. ¹² Ka yanɔma fɔro ta lanabɛbariya sɔma woro hõ. Yee nemɛ, hale ne ye hõ ka toga yɔ yera ye ka dayagatɛre, ye na kya tɛda fɔre za mɛ hõ Wuro yirebɛ ngwõ yena a na kɔ ma. ¹³ Ka ka yɛrɛ mazibɛ sɔma ta tõ we Matigi yena. Fangama ngwĩ ti fere pepe ngwõ̀ na, ka mɔ ngwõ ta. ¹⁴ Ka mɔ fangamɛ ta, a ngwĩye fane hõ dayagatɛre nyono hõ tɔba hõ dafɔretɛsɔma yirebɛ. ¹⁵ Ngwõ pepe Wuro dungo. A tyata ka hõ kakiridarakɔma ta bɛrɛda wɛ kɔ kya tɛda fɔre nemɛ. ¹⁶ Ka tɛ vɛnɔma na, nka kya vɛnɔmabe ka bere tɛ zugube na ga. Ka tɛ Wuro ta tɛrɛ na. ¹⁷ Ka sɔma pepe yirebɛ. Ka syenɔmane kanu. Ka kwã Wuro na. Ka fangama yirebɛ. ¹⁸ Baratɛre, ka mɔ ka ngwonakɔma ta hõ kwã ye na. Mɛ ha da ngwonakɔma ngwĩye wora makwɔna dama ga, nka hale kɔ yagaye mɛ. ¹⁹ Ne sõ hõ ne kwã Wuro na hõ nyane somɔna a ha daga kɔ ngwĩye nemɛ ga, a na yirebɛbe gũ. ²⁰ Ne ye hõ ka vuro kya tɛda yaga yena, ka hõ ne ngwõ somɔna, ngwono na yirebɛbe ngwõ ti ngwona somɔnabe na? Nka ne ka hõ nyane kya tɛda fɔre yena, hõ ngwõ somɔna, Wuro na ka yirebɛ ngwõ na. ²¹ Wuro mane ka wiri ngwõ na. Krista yɛrɛ nyane ka yena mɛ hõ sogo dɔrɔ ka ma ngwõfatɔ ka hõ dɔ a kãfugo ma. ²² A ha mane kakye si ta ga. Lamara da si ba mane sa a do hõ mɛ ga. ²³ Ya vini ngwĩ sanga ma, a ba mane ngwona vini nemɛ berebɛ ye ma ga. A nyane ngwĩ sanga ma, a ha mane da ye ka ye nyane ga. Wuro ngwĩ ngwõ kiti na teleyi sɔ, Krista ya da pepe to ngwõ soro hõ. ²⁴ Krista yɛrɛ kyà kakye bi ye komavere ma kwãgwaga sɔno ma ngwõfatɔ ke hõ siri kakye ta piri ma na hõ sugu telebe ta piri ma na. Ka kɛnɛ a ta võbe barika hõ. ²⁵ Ka mane tɛ wɔkara gware ngwĩye fire. Basyɛ kwane, Wuro ka berebɛ ka ni na Nɛta birɛ ngwĩ kwa ka ni ma.

¹ Yàra, yee nemɛ si ka daga mɔ ka bangane ta ngwõfatɔ ne bɔ ma dyã Wuro ta bɛrɛda kwɛ̃ fɔga ga, ye hõ ne fɔga ki yàra ta yanɔma fɔro barika hõ. Ka ba daga bɛrɛda si yere ga. ² Ye na a za da kya yano tele, ka kwã Wuro na. ³ Kya yɛrɛtɛtɛrɛbe ka tɛ komavere na yɛrɛtɛtɛrɛbe na ga wɔkara kya ngwõ̀ dɔgɔleno ane ka sanu kɔ zogore fɔre ngwĩye ka. ⁴ Kya yɛrɛtɛtɛrɛbe hõ tɛ kɔrohõye na, ka wora hõ kwɔna, ka kakiri hõ tanga. Ngwõ tere ba Wuro nyono na hale, a na wɛ mɛ ga. ⁵ Gweregwerena lanabe yàra ngwĩye mane ye zigi dɛ Wuro ma, ngwõwɔ mane ye yɛrɛ tetɛrɛ yee. Ye mane mɔ ye bangane ta. ⁶ Wɔkara Sara mane Ibrahima kwɛ̃ fɔga hõ na wiri Matigi. Basyɛ ka Sara nɔmane ne ka hõ ne dafɔre ta, mane kwã da si na ga. ⁷ Yee nemɛ si, ki sini mɛ, ka kya yàra fɔga kɔ kakiri nemɛ. Ka tɔ̀ da yàra barika dɛgɛyi kaye ma. Ka ye yirebɛ kamasɔrɔ yewɔ kɔ ki na Wuro ta perefa gũ, ngwõ sugunɔmabe. Ka ngwõ pepe ta ngwõfatɔ kya Wuro mɛbe ka sɔ ga. ⁸ Ngwõ pepe timi, ka pepe kɔrɔ hõ tɛ tala. Ka ka nemɛ kanu wɔkara nemɛ syenɔmane. Ka makare nemɛ na. Ka ka yɛrɛ mazibɛ nemɛ we. ⁹ Ka ka zugube sara kɔ zugube nemɛ ga. Ka ka vini sara kɔ vini nemɛ ga. Wuro mane ka wiri ngwĩ sanga ma, a da ye na duba ka ma. Ngwõ yena ka duba ta mɛ. ¹⁰ Wɔkara a sɛbɛɛ Wuro ta bɛrɛda hõ ye: Ngwĩ tyata sugunɔma fɔro gũ hõ kɔ na fɔroyi za, ngwõ ka bɛrɛda yaga yera ga, lamara si ka gũ a hõ ga. ¹¹ A daga ye sabɛ zugube na hõ dafɔre ta. A daga syara kya hõ dɔ ngwõ ma. ¹² Matigi nyono ti sɔma tele na. A ye turu taba ye ta mɛbe na, nka Matigi ye zĩ wa dayagatɛre birɛ. ¹³ Ne ka hõ ne ka nyanga dafɔretɛbe na, kɔ ngwõ na dayaga ta ka na? ¹⁴ Ne ka hõ ne da na teleyi ta hõ nyane ngwõ yena, ka tɛ duba nɔmane na. Ka ka kwà sɔma na ga, ka kakiri ka nyangamu mɛ ga. ¹⁵ Nka ka Krista yirebɛ ka kɔrɔ hõ wɔkara kya Matigi. Zigi ngwĩ ti ka kɔro hõ, ne sõ hõ ka tɔga ngwõ na, ka na yɛrɛtɛtɛrɛye hõ wɔ sanga pepe ma hõ na dyabi. ¹⁶ Nka ka ngwõ ta kɔ yɛrɛmazibɛbe kɔ woramakwɔnabe nemɛ. Kɔrɔ na fɔroyi hõ wɔ ka ta ngwõfatɔ ne sɔma hõ ka vini hõ bɛrɛda yaga yera kya da na, ye na piri kamasɔrɔ kya tɛda fɔre na dɔrɔ da ka dɔ Krista ma. ¹⁷ Ne a hõ tɛ Wuro dungo sõ hõ nyane ya dafɔretɛbe yena, ngwõ fõ kɔ dayagatɛbe na nyane. ¹⁸ Krista yɛrɛ siri kanyono tala ua legelege kakye yena. Teleyi mane nyane telebariyasɔma yena ngwõfatɔ a hõ ke wiribɛ Wuro ma. A komavere siri nka a ye bere sugu yɛ Ni na kìnìyi barika hõ. ¹⁹ A ya ni birɛ ngwĩye ti kaso hõ, hõ ngwõ wadyu Ni na kìnìyi barika hõ mɛ. ²⁰ Ngwona ni mane ngwona Nuhũ ta wakati na sɔma na bɔ. Nuhũ mane koro saga ngwĩ sanga ma, Wuro mane ngwona sɔma ta da somɔna nka ye ha mɔ a ta ga. Sɔma korosõ dama mane kwɔ koro hõ, ngwõwɔ dɛ zu ta. ²¹ Ngwona zu ngwõ batizibe na zɛngɛ dɔre fa bo, ngwĩ ngwõ ka kisi basyɛ. Batize da ha be kõ na dõõyi mĩ ga, a kɔrɔ na fɔroyi pere be ma ngwĩ sa Wuro ta. Batizebe ka kisi Yesu Krista ta ngwinibe barika hõ. ²² Awe ba wuro hõ, hõ tanga Wuro digesoro ma. A ngwonakɔmabe ta mɛlɛkɛe ma kɔ wuro hõ ngwonakɔma ma kɔ fangamɛ pepe ma.

¹ Krista nyane ka yena a komavere hõ. Ka hõ ngwona miri ka ka kɔrɔ hõ, hõ ngwõ ta kya kũ kwini fa na. Ngwĩ ngwõ nyane ye komavere hõ, ngwõ sa kakye hõ. ² Ngwõ yena ka kya wakati sɛrɛ ta bɛ diniya hõ Wuro dungotɛbe hõ. Komavere na wu ka ka fɔga ga. ³ Wakati na fɔnoyi ma, ka mane Wuro na tɔ̀bariyasɔma ta da nemɛ ta. Ka mane kwɔ kakala da kɔ dayaga na wu hõ. Ka mane kwĩ mɛnɛ ne nyingi hõ zõ hõ mɛnɛ nyaa hõ fyã yirebɛ. ⁴ Basyɛ ka ha kwe ne kwɔ kɔ lɔ ngwona kakala da na yagayi hõ titiri ga. Ngwõ yena ngwona sɔma kaba ngwõ na ne ka vini. ⁵ Wuro ngwĩ ngwõ kiti sɔ sɔma sugu kɔ sara ma, ngwona sɔma daga ye yɛrɛ ta da yera ngwõ ma mɛ. ⁶ Ngwõ yena Bɛrɛda Fɔre mane yera sara ma ngwõfatɔ ye hõ sugu Wuro ta piri ma na. Hõ ne to bɛ diniya hõ komavere hõ, kiti mane sɔɔ ye ma wɔkara kiti sɔɔ sɔma pepe ma ngwɛne. ⁷ Fere pepe ta wɛ sanga vetira. Ka ka kakiri tangabɛ hõ wɔ ka nyono na ngwõfatɔ ka hõ Wuro mɛ. ⁸ Hõ yalo ngwõ pepe ma, ka ka nemɛ kanu fɔrona. Kanube ngwõ kakye nyaa nyaa dibɛ ne wa yɛ. ⁹ Ka ka nemɛ fɔga fɔrona kya kwã hõ, ngwõ ka tɛ kɔ dumudumu bɛrɛda nemɛ ga. ¹⁰ Ka pepe tala tala fa ngwĩ gũ hõ sa Wuro ta, ka ka nemɛ mako fɔro kɔ ngwõ nemɛ. Wuro perefere sifa pepe ngwĩye pere ka ma, ka hõ kwa ngwõwɔ ma. ¹¹ Sõ ngwĩ ngwõ wadyuli ta, ngwõ daga Wuro ta bɛrɛda yera. Ngwĩ ngwõ bara ta, ngwõ hõ bara ta kɔ Wuro ta fanga nemɛ. Ngwona sanga ma yirebɛbe na dɛ Wuro ma Yesu Krista barika hõ. Yirebɛbe kɔ sebɛbe hõ tɛ ayi na fɔ sanga tege ma. Amina. ¹² Mɛ syenɔmane na kanuye, kɔrɔwɛbe na sigeyi ngwĩ hõ ka gũ, ka ka kaba ngwõ na ga. A ha tɛ wɔkara ngwõ kabako da ga. ¹³ Ka nii gũ Krista ta nyane da na. Ngwõ yena ka ni hõ dya. A ta noro hõ na ye dɔrɔ ngwĩ sanga ma, ka nihõnadyayi hõ ni hõ dya fɔrona. ¹⁴ Ne sɔma hõ ka vini ngwĩ sanga ma Krista togo yena, ka tɛ duba nɔmane na. Ngwona sanga ma Wuro Ni ngwĩ ngwõ noro na Ni, ngwõ tanga ka kɔrɔ hõ. ¹⁵ Ka na sõ si ka tɛ sõyɛta na wala pano wala dayagatɛta wala ngwĩye ngwõ ye do ka da pepe hõ, hõ nyane ngwõ yena ga. ¹⁶ Ne sõ hõ tɛ Kretiyɛ̃ na hõ nyane gũ ngwõ yena, a ka piri kɔ ngwõ nemɛ ga. A hõ Wuro yirebɛ ngwona Krista togo yena, a ngwĩ gũ mɛ. ¹⁷ Kiti sɔ wakati wiri basyɛ. Kiti na pya sɔɔ Wuro ta sɔma ma. Aiwa, ne kiti hõ ne na pya sɔɔ ke ma dɛ̃, ngwona sɔma ngwĩye ha dyã la Wuro ta Bɛrɛda Fɔre na ga, ye ta da na wɛbɛyi na tɛ ne? ¹⁸ Wɔkara a sɛbɛɛ Wuro ta bɛrɛda hõ ye: Ne sõ tele ta kisibe ta da hõ ne na sige, Wuro nyononakwãbariyasɔma kɔ kakyetɛre na tɛ ne? ¹⁹ Ngwõ yena ngwĩye ngwõ nyane hõ kanya kɔ Wuro dungo nemɛ, ngwõwɔ daga ye ni kalofa Tegeta Wuro ma, ngwĩ sarati paga. Ye hõ wɔ dafɔretɛbe hõ.

¹ Eglise somɔlala ngwĩye ngwõ ti ka woro hõ, mɛ tyata bɛri ngwõwɔ ta basyɛ. Mɛ ka nemɛ somɔlalo bo kɔ Krista ta nyane da na syere. Noro ngwĩ na ye dɔrɔ, mɛ na nii gũ ngwõ na mɛ. ² Mɛ ka mɛ da Wuro ta gwakuru ngwĩ ngwõ ti ka woro hõ ngwɛ̃, ka kwa ngwõ ma kɔ dyamabe nemɛ hõ kanya kɔ Wuro dungo nemɛ. A ka tɛ kɔ sigemabe nemɛ ga. Ka ka kya bara ta hõ gwana gũ dama ga, ka ye ta kɔ kɔrɔ na fɔroyi nemɛ. ³ Sɔma ngwĩye kalofa ka ma, ka ka ngwonakɔmabe dɛ ngwõ ma ga. Nka ka tɛ zɛngɛdɔresɔma na gwakuru ma. ⁴ Ne ngwõ hõ tɛ, Gwanɛne Ngwonate hõ na ye dɔrɔ ngwĩ sanga ma, ka na fangama bãfɔla gũ ngwĩ ta wɔlɔbe ha na wɛ ga. ⁵ Yee nemɛ si, ki yɛlɛ, ka mɔ somɔlala ta. Ka pepe hõ nemɛ mako fɔro kɔ yɛrɛmazibɛbe nemɛ. Wɔkara a sebɛɛ Wuro ta bɛrɛda hõ ye: Wuro yɛrɛyirebɛsɔma kwini hõ nema pere yɛrɛmazibɛsɔma ma. ⁶ Ngwõ yena ka ka yɛrɛ mazibɛ Wuro soro we, awe ngwĩ barika yire ngwõfatɔ awe hõ ka duro a ta wakati na fɔroyi ma. ⁷ Ka kya ni na bã da pepe dɛ Wuro ma kamasɔrɔ a ye kakiri to ka na. ⁸ Ka ka kakiri tangabɛ hõ wɔ ka nyono na. Ka zugu Setane tine yara wɔkara zara na danãyi. A sebɛne ngwĩ gũ na nɔma, a ngwõ kya. ⁹ Ka taa fɔrona lanabɛbe hõ, hõ na kwini. Ka tɔ̀ da ngwõ nemɛ na nyane tɛ ka syenɔmane na, ngwĩye ngwõ ti diniya hõ. ¹⁰ Ka nyane wɛ timi ma zɔgɔta, Nema pepe na te Wuro, ngwõ yɛrɛ na ka ta dopagaye na hõ ka sabati hõ ka barika yirebɛ hõ ka sigebɛ. Ngwõ yɛrɛ ka wiri hõ kwe kɔ Krista nemɛ hõ ka nii gũ a ta noro na wɛbariyayi na. ¹¹ Sebɛbe ti ngwõ ta fɔ sanga tege ma. Amina. ¹² Mɛ bo sɛbɛ silalo ta hõ na fane ka ma Silivɛ̃ soro hõ. Mɛ a dyati da a syeno na lanabe sõ. Mɛ tyata ka nyangabɛ hõ na dɔrɔ ka ma da ngwona nema ngwõ Wuro ta nema na syɛbɛyi. Ka na taaye hõ wɔ ngwona nema hõ. ¹³ Eglise ngwĩ ti Babilone, ngwõ bire ka na. Wuro ngwõ dɛ̀gɛ̀ wɔkara a ki dɛ̀gɛ̀ ngwɛne. Mɛ no Mareka bire ka na mɛ. ¹⁴ Ka syenɔmabe na fo ta nemɛ ma. Ki pepe ngwĩye ngwõ Kristaye, Wuro syara ta ka ma.