1 ZÃ

¹ Mɛ̀ bɔ da sɛbɛ sugunɔmabe na Bɛrɛda ta piri ma na, ngwĩ mane tye gweregwerena. Mɛ̀ mane ngwõ mɔ, mɛ̀ nyono dɛ a ma, mɛ̀ a sege, mɛ̀ sera le a ma. ² Ngwona sugunɔmabe ye dɔrɔ ngwĩ sanga ma, mɛ̀ ngwõ za. Ngwõ yena mɛ̀ ngwona da yera ka ma hõ ne na syɛrɛbe ta da sugunɔmabe na wɛbariyayi ngwĩ mane ti Tõ do na, ngwõ ye dɔrɔ mɛ̀ ma. ³ Mɛ̀ ngwĩ za ne mɔ mɛ̀ ngwona syɛrɛbe ta hõ ngwona da yera ka ma ngwõfatɔ ka hõ kwe kɔ mɛ̀ nemɛ Tõ Wuro kɔ a Nonanimisĩ Yesu Krista ta nemɛkwebe hõ mɛ. ⁴ Mɛ̀ bɔ da sɛbɛ ngwõfatɔ kyà nihõdyaro hõ dopaga. ⁵ Mɛ̀ bɛrɛda ngwĩye mɔ Yesu Krista ta hõ ne yera ka ma bo ngwõ, Wuro kini, tunungu si ha ti a hõ ga. ⁶ Ne ke hõ da ke kwe kɔ le hõ ke bere ne ya tunungu hõ, ke nĩyõ sɔ, bɛrɛda kɔ tɛda na mɛ. ⁷ Nka ne ke ne ya kini na wɔkara Wuro yɛrɛ ti kini na ngwɛne, ke kwe nemɛ hõ. Wuro Nonanimisĩ Yesu Krista tò ke kìnìbɛ kakye pepe ma. ⁸ Ne ke hõ da kakye ha ti ke kɔrɔ hõ ga, ke ke yɛrɛ firebɛ. Tĩyã ha ti ke kɔrɔ hõ ga. ⁹ Nka ke daga taa kyà kakye na Wuro zĩ hõ, ngwĩ ngwõ saratipaga, a tele ya tɛda pepe na. Awe na kyà kakye yafa ke ma hõ ke kìnìbɛ dayaga pepe ma. ¹⁰ Ne ke hõ da ye ke ha kakye ta ga, ke Wuro ta nĩyõsɔta na. A ta bɛrɛda ha ti ke kɔrɔ hõ ga.

¹ Mɛ nɔmane, mɛ bɔ da sɛbɛ ngwõfatɔ ka ka kakye ta ga. Nka ne bo sõ hõ kakye ta, sõ ti ke yɔ kɔ Tõ Wuro, ngwõ Telebenate Yesu Krista. ² Yesu Krista ngwõ ye yɛrɛ pere hõ kyà kakye na ku sara. Ngwõ ha ke damaye ga, kɔ diniya hõ kɔma pepeye. ³ Ne ke ne kwa Wuro ta fane ma, ke a tɔ̀ ngwõ na da ke Wuro tɔ̀. ⁴ Ne sõ bo hõ da ya tɔ̀, nka a mane kwa a ta fane ma ga, ngwõ nĩyõsɔta. Tĩyã ha ti a kɔrɔ hõ ga. ⁵ Ngwĩ ngwõ kwa a ta bɛrɛda ma, Wuro na kanube dopaga ngwona te ta. Ke a tɔ̀ bo da na da ke kwe kɔ Wuro nemɛ. ⁶ Sõ ngwĩhõ da ye ti Wuro ta nemɛkwe hõ, ngwõ hõ ya wɔkara Yesu ya ngwɛne. ⁷ Mɛ màre, a ha fane na ngwũyi ma ngwõ sɛbɛ ka ma ga, ye fane na biriyi ngwĩ mane pya ne ti ka ta gweregwerena. Ka bɛrɛda ngwĩye mɔ, ngwõ ngwona fane na biriyi. ⁸ Ngwõ pepe na, mɛ fane na ngwũyi sɛbɛ ne fane ka ma. A ta tĩyã ye dɔrɔ Krista hõ kɔ ki hõ mɛ. Tunungu tine fɔno, kini na syɛbɛyi sa wɛ. ⁹ Sõ ngwĩ da ye ti kini na hõ ye syeno koneya, ngwõ ti tunungu hõ yɛ. ¹⁰ Sõ ngwĩ ye syeno kanu, ngwõ ti kini na. Fui si ha gũ a hõ ngwĩ ngwõ tɛ a nemɛ sõ bo hõ bɛrɛ kakye hõ ga. ¹¹ Nka sõ ngwĩ ngwõ ye syeno koneya, ngwõ ti tunungu hõ. A ya tunungu hõ, a ha ye ya do tɔ̀ ga. Tunungu a nyena pɛrɛ. ¹² Mɛ nɔmane, kya kakye yafa wɛ ka ma Krista togo barika hõ. Ngwõ yena mɛ bo sɛbɛ fane ka ma. ¹³ Tamɛ, ngwĩ mane tye gweregwerena, ka ngwõ tɔ̀. Ngwõ yena mɛ bo sɛbɛ fane ka ma. Yɛlɛ, ka sebɛbe gũ ngwona yagayi ma. Ngwõ yena mɛ bo sɛbɛ fane ka ma. ¹⁴ Nimisala, ka ke Tõ tɔ̀. Ngwõ yena mɛ bo sɛbɛ fane ka ma. Tamɛ, ngwĩ mane tye gweregwerena, ka ngwõ tɔ̀. Ngwõ yena mɛ bo sɛbɛ fane ka ma. Yɛlɛ, ka barika yire, Wuro ta bɛrɛda ti ka kɔrɔ hõ, ka sebɛbe gũ ngwona yagayi ma. Ngwõ yena mɛ bo sɛbɛ fane ka ma. ¹⁵ Ka ka diniya kanu ga, ka ka diniya hõ fere kanu mɛ ga. Ne bo sõ hõ ne diniya kanu, ke Tõ na kanube ha ti ngwõ kɔrɔ hõ fyu ga. ¹⁶ Fere pepe ngwĩye ti diniya hõ, ngwõ komavere na wu kɔ nyena hõ fere na wu kɔ yɛrɛyirebɛbe bo diniya hõ fere ta da na. Ngwõwɔ ha sa ke Tõ hõ ga, nka ye sa diniya hõ. ¹⁷ Diniya tine fɔno kɔ sɔma nyena hõ fere na wu nemɛ. Nka ngwĩ ngwõ Wuro dungo ta, ngwõ na wɔ yɛ fɔ abada. ¹⁸ Mɛ nɔmane, wɛ sanga vetira. Wɔkara ka mane mɔ ngwɛne da Krista zugu na na. Basyɛ Krista zugi na nyaaye tye. Ke a tɔ̀ ngwõ na da wɛ sanga vetira. ¹⁹ Ngwona sɔma ha mane ke na bɔ ga. Ngwõ yena ye sa ke hõ. Ne ye mane ke na bɔ, ye mane na wɔ kɔ ke nemɛ. Nka ye sa ke hõ ngwõfatɔ a hõ dɔre kìnì da ye ha mane ke na bɔ ga. ²⁰ Ki kwane Ni na kìnìyi gũ, Krista ngwõ zibɛ ka ma. Yee nemɛ, ka tĩyã na da pepe tɔ̀. ²¹ A ba tɛ wɔkara mɛ bo sɛbɛ fane hõ na dɔrɔ ka ma da ka ba tĩyã tɔ̀ ga. Ka tĩyã tɔ̀, nĩyono si ha sa tĩyã hõ ga. ²² Kɔ ngwõ nĩyõsɔta? Ngwĩ ngwõ da ye Yesu ha Masiya ga, ngwona te ngwõ Krista zugu. A ye do bere Tõ kɔ a Nonanimisĩ ta da na. ²³ Ngwĩ ye do bere Nonamimisĩ na, ngwõ ye do bere a Tõ na mɛ. Sõ ngwĩ hõ Nonanimisĩ tɔ̀, ngwona te Tõ tɔ̀ mɛ. ²⁴ Ngwõ yena ka bɛrɛda ngwĩye mɔ gweregwerena, ka daga kwa ngwõ ma ka kɔrɔ hõ. Ka bɛrɛda ngwĩye mɔ gweregwerena, ne ngwõ ne wɔ ka kɔrɔ hõ, ka na kwe wɔ Nonanimisĩ kɔ Tõ hõ. ²⁵ Krista datege ngwĩ bi ke ma, ngwõ sugunɔmabe na wɛbariyayi. ²⁶ Mɛ bo sɛbɛ fane ka ma, ka na firebɛre ta da na. ²⁷ Ki kwane, Krista ye Ni zibɛ ka ma. A ta Ni na kìnìyi ngwõ ti ka kɔrɔ hõ. Ngwõ yena ka mako ha ti sõ na a ka kala ga. Ngwona Ni na kìnìyi na ka kala da pepe na. A ngwĩ fa yera ngwõ tĩyã, nĩyono si ha ti ngwõ hõ ga. Ngwõ yena ka kwe kɔ Krista nemɛ hõ Ni na kìnìyi ta kala fɔga. ²⁸ Aiwa, mya nimisala, ka kwe kɔ Krista nemɛ ngwõfatɔ a hõ na ye dɔrɔ ngwĩ sanga ma, ke hõ worasigi gũ, ke ka na piri a ta a na sanga ma ga. ²⁹ Ka tɔ̀ da Krista tele. Ngwõ yena ka daga na famu mɛ da sõ ngwĩ ngwõ telebe na da ta ngwõ tɛ Wuro no na.

¹ Tõ Wuro ke kanu ngwɛne bo ngwõ, a ta kanube yena a ke wiri ye nɔmane, ke tɛ ngwõ yɛrɛ na. Ngwõ yena diniya kɔma ke tɔ̀ ga, ye ha Wuro tɔ̀ ga. ² Mɛ màre, ke tɛ Wuro nɔmane na basyɛ nka ke na tɛ ngwɛne, ngwõ ha dɔre kìnì dɛ̃ ga. Ngwõ pepe na, ke tɔ̀ da ne Krista hõ na ye dɔrɔ, ke na bere tɛ a nemɛ na kamasɔrɔ a ti ngwɛne, yee ke na a za yɛ. ³ Ngwona zigi ti sõ ngwĩ ta Krista ma, ngwõ ye kìnìbɛ wɔkara Yesu Krista yɛrɛ kìnì ngwɛne. ⁴ Sõ ngwĩ ngwõ kakye ta, ngwõ Wuro ta tõ yaga. Tõ yagabe ngwõ kakye. ⁵ Ka tɔ̀ da Yesu Krista ye dɔrɔ ngwõfatɔ a hõ sɔma ta kakye bi ne wa yɛ. Kakye ha ti awe hõ fyu ga. ⁶ Sõ ngwĩ ngwõ wɔ hõ kwe kɔ Krista nemɛ, ngwõ ha dyã ne kakye ta ga. Nka sõ ngwĩ ngwõ ya zĩ kakyetɛbe hõ, ngwõ ha a za ga, a ha a tɔ̀ ga. ⁷ Mɛ nɔmane, ka ka to sõ si ka firebɛ ga. Sõ ngwĩ ngwõ telebe na da ta, ngwõ yɛrɛ tele wɔkara Yesu Krista tele ngwɛne. ⁸ Sõ ngwĩ ngwõ ya zĩ kakyetɛbe na, ngwõ tɛ Setaneyi na. Setane kakye ta fɔ gweregwerena. Wuro Nonanimisĩ na hõ ye dɔrɔ ngwõfatɔ a hõ Setane ta tɛda yaga. ⁹ Sõ ngwĩ ngwõ tɛ Wuro no na, ngwona te ha dyã ne kakye ta ga kamasɔrɔ Wuro tino ngwõ ti a kɔrɔ hõ. Wuro ngwõ a Tõ. A ha sebɛne ya zĩ hõ kakyetɛbe na ga. ¹⁰ Dɛ̀gɛ̀ do na kìnìyi ngwĩ ngwõ ti Wuro nɔmane kɔ Setane nɔmane yɔ, bo ngwõ. Sõ ngwĩ ngwõ telebe na da ta ga, kɔ sõ ngwĩ ngwõ ye syeno kanu ga, ngwõ ha Wuro no ga. ¹¹ Ka bɛrɛda ngwĩye mɔ gweregwerena bo ngwõ, ka to ke ke nemɛ kanu. ¹² Ke ha daga tɛ wɔkara Kãe bahõ ga. A mane tɛ ngwona yagayi na hõ ye pu yɛ. Ngwonona a mana ye? Kamasɔrɔ Kãe ta tɛda ha mane fɔro ga, a pu ta tɛda mane tele. ¹³ Syenɔmane, ne bo diniya hõ kɔma hõ ka koneya, ka ka kaba ngwõ na ga. ¹⁴ Ke tɔ̀ da ke sa siri hõ, hõ kwɔ sugunɔmabe hõ. Ke ngwõ tɔ̀ kamasɔrɔ ke ke syenɔmane kanu. Sõ ngwĩ ha ye syeno kanu ga, ngwõ ti siri hõ yɛ. ¹⁵ Sõ ngwĩ ngwõ ye syeno koneya ngwõ sõyɛta. Ka tɔ̀ da sugunɔmabe na wɛbariyayi ha ti sõyɛta kɔrɔ hõ ga. ¹⁶ Ke kanube tɔ̀ bo da na, Yesu Krista ye ni pere ke yena. Ngwõ yena ke daga ke ni pere ke syenɔmane yena mɛ. ¹⁷ Gwana nyaa ti sõ ngwĩ ta, ne ngwõ hõ ye syeno bo za, fa ha ti ngwĩ ta ga, a ma dyã sena a na ga, ne na na Wuro ta kanube ti ngwona sõ kɔrɔ hõ? ¹⁸ Mɛ nɔmane, kyà kanube ka tɛ bɛrɛda kɔ do hõ bɛrɛda dya dama ga. Ke daga kanube na syɛbi dɔrɔ kɔ kyà tɛda nemɛ. ¹⁹ Yee nemɛ, ke na tɔ̀ da ke ti tĩyã na sogo ma. Yee nemɛ, ke kɔrɔ na worasigi gũ Wuro zĩ hõ. ²⁰ Aiwa, ne ke kɔrɔ hõ ne ke zarake, Wuro yireyi ke kɔrɔ ma, a da pepe tɔ̀. ²¹ Mɛ màre, ne ke kɔrɔ ma ke zarake ga, worasigi na dopagayi ti ke ta Wuro zĩ hõ. ²² Ke hõ fa pepe ngwĩ mɛ a ta ke na ngwõ gũ kamasɔrɔ ke kwa a ta fane ma na madyamabe ta. ²³ Bo a ta fane, ye ke la a Nonanimisĩ Yesu Krista na hõ ke nemɛ kanu hõ kanya kɔ Krista ta fane na pereye nemɛ ke ma. ²⁴ Sõ ngwĩ ngwõ kwa Wuro ta fane ma, ngwõ wɔ Wuro ta. Wuro wɔ ngwõ ta. Ke a tɔ̀ ngwĩ fa na da Wuro wɔ ke ta, kamasɔrɔ a Ni na kìnìyi pere ke ma.

¹ Mɛ màre, sɔma pepe ngwĩye ngwõ da ye Ni ti ye ta, ka ka la ngwõwɔ pepe na ga. Purusɔma na nĩyõsɔre na nyaaye ti diniya hõ. ² Ka na Wuro Ni dɛ̀gɛ̀ tɔ̀ bɔ na, sõ ngwĩ ngwõ da Yesu Krista mane tɛ sõ na, Wuro Ni ti ngwona te kɔrɔ hõ. ³ Nka sõ ngwĩ ngwõ da ye Yesu Krista ha mane tɛ sõ na ga, Wuro Ni ha ti ngwona te kɔrɔ hõ ga. Ni ngwĩ ti a ta, ngwõ Krista zugu ni. Ka ye mɔ da Krista zugu ni na na, a ti diniya hõ basyɛ yɛrɛ. ⁴ Nka ki kwane, mɛ nɔmane, ka tɛ Wuroye na. Ka sebɛbe gũ ngwona purusɔma na nĩyõsɔre ma. Ni ngwĩ ngwõ ti ka kɔrɔ hõ, ngwo yireyi bo diniya kɔrɔhõyi ma. ⁵ Ye diniyaye. Ngwõ yena ye bɛri diniya kɔma bahõ, diniya kɔma ne mɔ ye ta. ⁶ Nka ke kwane, ke Wuroye. Sõ ngwĩ ngwõ Wuro tɔ̀, ngwõ mɔ ke ta. Sõ ngwĩ ha Wuroyi ga, ngwõ ha mɔ ke ta ga. Yee nemɛ, ke tĩyã na Ni kɔ firebɛbe na ni dɛ̀gɛ̀ tɔ̀. ⁷ Mɛ màre, ka to ke ke nemɛ kanu kamasɔrɔ kanube sa Wuro hõ. Kanube ti ngwĩ sõ ta, ngwõ Wuro no, a Wuro tɔ̀. ⁸ Kanube ha ti sõ ngwĩ ta ga, ngwõ ha Wuro tɔ̀ ga kamasɔrɔ Wuro ngwõ kanube. ⁹ Wuro ya kanube dɔrɔ ke ma ngwɛne bo ngwõ, a ye Nonanimisĩ fane diniya hõ ngwõfatɔ ke hõ sugunɔmabe gũ ngwõ barika hõ. ¹⁰ Ngwõ ngwõ kanube. A ha tɛ wɔkara ke ngwõ Wuro kanu ga, nka awe ngwõ ke kanu hõ ye Nonanimisĩ fane ngwõfatɔ ke hõ kakye yafabe gũ ngwõ barika hõ. ¹¹ Mɛ màre, ne Wuro hõ ke kanu yee, ke daga ke nemɛ kanu mɛ. ¹² Sõ si ha Wuro za abada ga. Ne ke ne ke nemɛ kanu, Wuro wɔ ke ta. A ta kanube na dopagayi na ye dɔrɔ ke hõ. ¹³ Ke a tɔ̀ ngwõ na da ke wɔ Wuro ta, a ne wɔ ke ta kamasɔrɔ a ye Ni pere ke ma. ¹⁴ Ke a za hõ na na syɛrɛbe ta da Tõ Wuro ye Nonanimisĩ fane hõ na ta diniya na kisita na. ¹⁵ Sõ ngwĩ ngwõ da Yesu Wuro Nonanimisĩ, Wuro wɔ ngwõ ta, ngwõ ne wɔ Wuro ta. ¹⁶ Wuro ke kanu kanuno ngwĩ na, ke ngwõ tɔ̀, ke la ngwõ na. Wuro ngwõ kanube. Sõ ngwĩ ngwõ wɔ kanube hõ, ngwõ wɔ Wuro ta, Wuro wɔ ngwõ ta. ¹⁷ Bo ngwõ a dɔrɔ da kanube dopaga ke hõ. Awe ti ngwɛne, yee ke ti bɛ diniya hõ. Ngwõ yena ke na worasigi gũ kiti kɔ ma. ¹⁸ Kũ̀ ha ti kanube hõ ga. Kanube na dopagayi kũ̀ laga na wa yɛ. Sõ ngwĩ ngwõ kwã, kanube ha dopaga ngwona te ta ga kamasɔrɔ nyane ti kũ̀ hõ. ¹⁹ Ke awe kanu kamasɔrɔ awe mane pya ke kanu. ²⁰ Ne sõ bo hõ da ye yi Wuro kanu hõ ne ye syeno koneya, ngwõ nĩyõsɔta. A nyono ti ye syeno ngwĩ na, ne a ma ngwõ kanu ga, a nyono ha ti Wuro ngwĩ ma ga, ne a sebɛne tɛ hõ ngwõ kanu? ²¹ Krista fane ngwĩ pere ke ma bo ngwõ: Sõ ngwĩ ngwõ Wuro kanu, ngwona te daga ye syeno kanu mɛ.

¹ Sõ ngwĩ hõ la a na da Yesu ngwõ Krista, ngwona te tɛ Wuro no na. Sõ ngwĩ ngwõ tõ kanu, ngwõ a nɔmane kanu mɛ. ² Ne ke ne Wuro kanu ne kwa a ta fane ma, ke a tɔ̀ ngwõ na da ke Wuro nɔmane kanu. ³ Hõ Wuro kanu ngwõ boo, be kwa a ta fane na yeraye ma. A ta fane na yeraye ha sige fɔno ke ma ga. ⁴ Wuro nɔmane, ngwõwɔ sebɛne sebɛbe gũ diniya da ma. Ke sebɛbe gũ diniya da ma kɔ ngwĩ fa nemɛ, ngwõ kyà lanabɛbe. ⁵ Kɔ ngwõ sebɛbe gũ diniya da ma? Fɔ sõ ngwĩ hõ la a na da Yesu ngwõ Wuro Nonanimisĩ. ⁶ Ngwĩ ngwõ na, ngwõ Yesus Krista. A na kɔ zo, ngwõ a ta batizebe. Kɔ tõ, ngwõ a ta siri. A ha na kɔ zo dama nemɛ ga, nka a na kɔ zo kɔ tõ nemɛ. Ni na kìnìyi syɛrɛbe ta, da ngwona da tĩyã kamasɔrɔ Ni na kìnìyi ngwõ tĩyã. ⁷ Syɛrɛ saa tye. ⁸ Ni na kìnìyi kɔ zo kɔ tõ. Ngwona fere saa bɛ̃. ⁹ Ne ke hõ ne sɔma ta syɛrɛbe fɔga, Wuro ta syɛrɛbe yireyi ngwõ ma fɔrona, a syɛrɛbe ngwĩ ta a Nonanimisĩ ta da na. ¹⁰ Sõ ngwĩ hõ la Wuro Nonanimisĩ na, syɛrɛbe ti ngwõ ta a yɛrɛ kɔrɔ hõ. Ngwĩ hõ ma la Wuro ta bɛrɛda na ga, ngwõ Wuro ta nĩyosɔta na kamasɔrɔ Wuro ye Nonanimisĩ na syɛrɛbe ngwĩ ta, a ha la ngwõ na ga. ¹¹ Bo ngwona syɛrɛbe yo: Wuro sugunɔmabe na wɛbariyayi pere ke ma. Ngwona sugunɔmabe gũ a Nonanimisĩ hõ. ¹² Nonanimisĩ ti ngwĩ ta, sugunɔmabe ti ngwõ ta. Wuro Nonanimisĩ ha ti ngwĩ ta ga, sugunɔmabe ha ti ngwõ ta ga. ¹³ Mɛ bo da sɛbɛ ne fane ka ma ngwõfatɔ ka hõ tɔ̀ da sugunɔmabe na wɛbariyayi ti ka ta, ki ngwĩye ngwõ la Wuro Nonanimisĩ togo na. ¹⁴ Worasigi na dopagayi ngwĩ ngwõ ti ke ta Wuro zĩ hõ, bo ngwõ, ne ke hõ fa bo mɛ a ta hõ kanya kɔ a dungo nemɛ, a mɔ ke ta. ¹⁵ Ne ke hõ tɔ̀ da ke fa ngwĩ mɛ a ta, a mɔ ke ta, ke tɔ̀ da ke fa ngwĩ mɛ a ta, a na ngwõ pere ke ma. ¹⁶ Kakye ngwĩ ha sõ ka siri hõ ga, ne sõ bo hõ ye syeno za a ne ngwona kakye ta, a Wuro mɛ a ma. Wuro na sugunɔmabe pera ma. Kakye ngwĩye ngwõ sõ ka siri hõ ga, ka mɛbe ta ngwõ na. Kakye bo sõ ka siri hõ, mɛ ha tyata mɛbe tɛ ngwõ na ga. ¹⁷ Dayaga pepe ngwõ kakye. Nka kakye bɔ tye, ngwõ ha sõ ka siri hõ ga. ¹⁸ Ke tɔ̀ da sõ ngwĩ tɛ Wuro no na, ngwõ ha ya zĩ hõ kakyetɛbe na ga. Wuro Nonanimisĩ kwa a ma, ngwona yagayi ha le a ma ga. ¹⁹ Ke tɔ̀ da ke tɛ Wuroye na. Diniya kɔma pepe ti ngwona yagayi soro hõ. ²⁰ Ke tɔ̀ mɛ da Wuro Nonanimisĩ na hõ kakiri pere ke ma ngwõfatɔ ke hõ Wuro na syɛbɛyi tɔ̀. Ke wɔ hõ kwe kɔ Wuro na syɛbɛyi nemɛ a Nonanimisĩ Yesu Krista barika hõ. Ngwõ Wuro na syɛbɛyi, ngwõ sugunɔmabe na wɛbariyayi. ²¹ Mɛ nɔmane, ka ka yɛrɛ kɔrɔse fyanakãebe na.