1 KORƐ̃TE KƆMA
11 Mɛ Pauli tɛ Yesu Krista ta faneta na. Wuro mane mɛ wiri hõ kanya kɔ a dungo nemɛ. 2 Mɛ kɔ ke syeno Sositene bo sɛbɛ fane ka ma, ki ngwĩye tɛ Wuro ta eglise na Korɛ̃te kuru hõ. Wuro sɔma pepe ngwĩye wiri hõ tɛ ya sɔma na kìnìye na, mɛ̀ a fane ngwõwɔ ma mɛ. Ye kwe kɔ Yesu Krista nemɛ hõ kwe tɛ Wuroye na, yewɔ kɔ sɔma ngwĩye kyà Matigi Yesu Krista yirebɛ bi pepetai hõ. Ngwõ ye ta Matigi kɔ kyà Matigi. 3 Tõ Wuro kɔ Matigi Yesu Krista hõ nema kɔ syara pere ka ma. 4 Mɛ barika yera na Wuro ma kya da na sanga pepe ma kamasɔrɔ Wuro ya nema pere ka ma Yesu Krista barika hõ. 5 Ka bugu da pepe na awe barika hõ, bɛrɛda kɔ tɔbe pepe na. 6 Krista na syɛrɛbe sabati ka woro hõ. 7 Hõ ka to ka ne Matigi Yesu Krista ta dɔre kɔ yɛ̀rɛ̀, perefa si ha dɛsɛɛ ka na ga. 8 Awe na ka nyangabɛ fɔ ya wiri wɛ sanga ma mɛ ngwõfatɔ ka na zarakebariyaye hõ gũ kyà Matigi Yesu Krista ta kɔ ma. 9 Wuro ngwõ nyomata, awe ngwĩ mane ke wiri hõ tɛ a Nonamisĩ kyà Matigi Yesu Krista ta nemɛkwere na. 10 Syenɔmane, mɛ ka mɛ kyà Matigi Yesu Krista togo yena, da ka pepe hõ bɛrɛda tala yera, dɛ̀gɛ̀be ka tɛ ka woro hõ ga. Ka pepe hõ bɛ̃ miri tala ma hõ ka kɔrɔ ta tala. 11 Syenɔmane, Kilowe ta kõ kɔma na bɔ kya da yera mɛ ma, ye dakwiyɛro ti ka woro hõ. 12 Mɛ tyata ngwĩ yera, bo ngwõ: Ka pepe tala tala bɛri zɛzɛ. Bo da: Mɛ Pauliyi. Bo da mɛ: Mɛ Apolosiyi. Bo zayi da: Mɛ Pierreyi. Bo da: Mɛ Kristayi. 13 Ka yera wa, Krista sɔdini ra? Ye mane Pauli kwãgwaga sɔno ma ka yena ra? Ka mane batize kɔ Pauli togo nemɛ ra? 14 - 15 Mɛ barika yera Wuro ma kamasɔrɔ mɛ ha ka na sõ si batize fɔno Krisipus kɔ Gayus ga ngwõfatɔ sõ si ka na da ye mɛ sɔma batize kɔ ne yɛrɛ togo nemɛ ga. 16 Mɛ Stefanas ta kõ kɔma batize mɛ. Ne mɛ hõ sõ za batize ngwõwɔ timi, mɛ ha ngwõ nyono tɔ̀ ga. 17 Krista ha mɛ fane hõ sɔma batize ga. A mɛ fane hõ Bɛrɛda Fɔre yera. Mɛ ha ngwõ yera kɔ sɔma ta kakirikɔmabe na bɛrɛda nemɛ ga ngwõfatɔ mɛ ka na fa si wa Krista ta siri da na kwãgwaga sɔno ma ga. 18 Wadyuli ngwĩ tɛ kwãgwaga sɔno ta da na, ngwõ zana da sɔma nyena hõ, ngwĩye ti firebe na sogo ma. Ke ngwĩye ngwõ ti kisibe na sogo ma, ngwõ Wuro ta sebɛbe ke nyena hõ. 19 A sɛbɛɛ Wuro ta bɛrɛda hõ da: Mɛ kakirikɔma ta kakirikɔmabe yaga hõ datɔre ta tɔbe ta zana da. 20 Ngwono kakirite kɔ datɔta kɔ bo diniya hõ dakwiyɛta na ngwõ yera? Wuro a dɔrɔ da bo diniya hõ kakirikɔmabe ngwõ zana da. 21 Kakiri ti Wuro ta. A ha dyã diniya kɔma hõ Wuro tɔ̀ ye yɛrɛ ta kakirikɔmabe barika hõ ga. Nka a dya Wuro ma hõ lanabe sɔma kisi ngwona zana da na wadyuli barika hõ. 22 Yahutu kɔma kabako da kya wɔkara tagamasɛ̃. Girɛki kɔma ngwõ kakirikɔmabe kya. 23 Ke kwane wadyuli ta Krista ta kwãgwaga sɔno ta da na. Ngwõ ngwonayaga da Yahutuye nyena hõ. Si sɔma nyena hõ ngwõ zana da. 24 Nka Wuro ngwĩye wiri, Yahutu kɔma kɔ si sɔma pepe, ngwõwɔ nyena hõ Krista ngwõ tɛ Wuro ta sebɛbe na kɔ a ta kakirikɔmabe. 25 Sɔma Wuro ta da ngwĩye dyati zana da, kakirikɔmabe ti ngwõ hõ, hõ yaloyi sɔma ta kakirikɔmabe ma. Sɔma da ngwĩye dyati Wuro ta barika dɛgɛbe na da, barika ti ngwõ hõ, hõ yaloyi sɔma ta barika ma. 26 Syenɔmane, ka mane pya ne ti ngwɛne ka wiri sanga ma, ka ngwõ sege. Sɔma ngwĩye tɛ kakirikɔma na diniya ta piri ma na, ngwõwɔ na nyaaye nii ha ti ga. Fangakɔma na toga yeye kɔma na nyaaye nii ha ti mɛ ga. 27 Diniya kɔma da ngwĩye dyati zana da, Wuro ngwõwɔ dɛ̀gɛ̀ hõ kakirikɔma piribɛ. Diniya kɔma fere ngwĩye dyati barika dɛgɛ fere, Wuro ngwõwɔ dɛ̀gɛ̀ hõ sɔma na barikaye piribɛ. 28 Diniya hõ piripara fere kɔ diniya kɔma sĩ fere ngwĩye na kɔ ye ha fere ngwĩye dyati ga, Wuro ngwõwɔ dɛ̀gɛ̀ ngwõfatɔ fere ngwĩye tye, a hõ ngwõwɔ dyati zana da. 29 A ngwõ ta ngwõfatɔ sõ si ka na ye yɛrɛ yirebɛ Wuro zĩ hõ ga. 30 Ki kwane kwe kɔ Yesu Krista nemɛ Wuro barika hõ. Wuro Yesu ta kyà kakirikɔmabe na. Wuro ke ta sɔma tele na Krista barika hõ. Ke tegee hõ tɛ Wuroye na, a ke ngwonawa. 31 Wɔkara a sɛbɛɛ Wuro ta bɛrɛda hõ da: Ngwĩ ngwõ tyata ye yɛrɛ yirebɛ, ngwõ hõ ye yɛrɛ yirebɛ Matigi ta bara yena.
21 Mɛ mane ya ka birɛ ngwĩ sanga ma hõ Wuro ta tĩyã na bunu da yera ka ma, mɛ ha ya kɔ bɛrɛda yee nemɛ ga. Mɛ ha ya kɔ kakirikɔmabe na yireyi nemɛ mɛ ga. 2 Mɛ̀ mana latege da ma ha na da si tɔ̀ ka woro hõ Yesu Krista sonala timi ma ga kɔ a ta siri da kwãgwaga sɔno ma. 3 Ngwõ yena mɛ mane ti ka woro hõ ngwĩ sanga ma ne barika mane dɛgɛ. Mɛ mane kwã ne sɔma fɔrona. 4 Mya kala kɔ na wadyuli da ha mane tɛ kɔ kakirikɔmabe na bɛrɛda nemɛ ga, ngwõ ngwĩye ngwõ sɔma fɔga. Ye tɛ kɔ Ni na kìnìyi ta sebɛbe na dɔreyi nemɛ. 5 Yee nemɛ, kya lanabɛbe ha tanga sõ ta kakirikɔmabe ma ga. A tanga Wuro ta sebɛbe ma. 6 Ngwõ pepe na, mɛ kakirikɔmabe na da yera lanabe sɔma biri ma. A ha bo diniya ta kakirikɔmabe kɔ bɔ diniya ngwonakɔma ta kakirikɔmabe ga. Ngwõwɔ tine wɛ. 7 Mɛ Wuro ta kakirikɔmabe yera bunu da hõ. Ngwona kakirikɔmabe mane dõ sɔma na. Sane diniya hõ tegee, Wuro a latege hõ noro dɛ ke ma, 8 Bo diniya ngwonakɔma si ha ngwona kakirikɔmabe tɔ̀ ga. Ne ye mane ngwõ tɔ̀, ye ha mane na Matigi Noranate kwãgwaga sɔno ma ga. 9 Nka wɔkara a sɛbɛɛ Wuro ta bɛrɛda hõ da: Sõ nyono ha dɛ ngwĩ da ma ga, sõ turu ha da ngwĩ mɔ ga, sõ ha miri zɛ da ngwĩ na ga, Wuro ngwona fere tetɛrɛ a na kanu sɔma ma. 10 Wuro ngwona bunu da dɔrɔ ke ma a yɛrɛ ta Ni na kìnìyi barika hõ. Ni na kìnìyi fere pepe kikyɛ, hale Wuro ta da na kɔ dɛrɛye. 11 We sõ ngwõ sebɛne sõ ta da pepe tɔ̀ fɔ a ni ngwĩ ti a kɔrɔ hõ? Yee nemɛ mɛ, sõ si ha Wuro ta da pepe tɔ̀ ga fɔ Wuro Ni. 12 Ke kwane Ni ngwĩ gũ, ngwõ ha diniyahõyi ga. Ke Ni ngwĩ gũ, ngwõ sa Wuro ta ngwõfatɔ Wuro fere ngwĩye pere ke ma, ke hõ ngwõwɔ tɔ̀. 13 Ke bo da yera mɛ. Ke Wuro ta tĩyã na da kìnìbɛ sɔma ma ngwĩ sanga ma, ke ha ngwõ yera kɔ sɔma ta kakirikɔmabe na bɛrɛda nemɛ ga. Ke bɛrɛda ngwĩye gũ Ni na kìnìyi ta, ke sɔma kala kɔ ngwõwɔ nemɛ. 14 Ni na kìnìyi ha ti sõ ngwĩ ta ga, ngwõ ha sebɛne Wuro ta Ni na kìnìyi ta tĩyã na da tɔ̀ ga. Ngwõ zana da a nyena hõ. A ha sebɛne ngwõ tɔ̀ ga kamasɔrɔ sõ ngwõ dɛ̀gɛ̀ tɔ̀ Ni na kìnìyi barika hõ. 15 Ni na kìnìyi ti sõ ngwĩ ta, ngwõ sebɛne da pepe dɛ̀gɛ̀. Nka sõ si ha sebɛne awe yɛrɛ ta da dɛ̀gɛ̀ tɔ̀ ga. 16 Wɔkara a sɛbɛɛ Wuro ta bɛrɛda hõ da: Kɔ ngwõ Matigi ta miri tɔ̀? Kɔ ngwõ sebɛna sɛmɛ? Ke kwane, Krista ta miri ti ke ta.
31 Syenɔmane, tĩyã na mɛ ha mane sebɛ bɛri ka ta wɔkara sɔma ngwĩye ngwõ ya Ni na kìnìyi ta sogo ma ga. Mɛ mane bɛri ka ta wɔkara sɔma ngwĩye ngwõ ti bo diniya hõ. Ka tɛ wɔkara bibiye bahõ lanabɛbe ta piri ma na. 2 Mɛ nyawɛrɛ pere ka ma, ka ngwõ pɛrɛ, ma ha nyobulu pere ka ma ga kamasɔrɔ ka ha sebɛne ngwõ zõ ga. Hale sɔma ka ha sebɛ ga. 3 Ka tine ya bo diniya hõ sɔma yano na. Ne ka nemɛ na kereyabe kɔ birisi da ne ti ka woro hõ, ngwõ a dɔrɔ da ka ti wɔkara bo diniya hõ kɔma bahõ ga ra? Ka tine ya Adama nɔmane yano na. 4 Ne bo sõ hõ da yawe Pauliyi, ne zayi hõ da yawe Apolosiyi, ngwõ Adama nɔmane nɔma ga ra? 5 Apolosi ngwõ kɔ? Pauli ma kɔ mɛ? Mɛ̀ pepe sɔma, mɛ̀ Wuro ta baratɛre ngwĩye mane ka dyema hõ lanabɛbe ta. Matigi bara ngwĩ pere mɛ̀ pepe tala tala ma, ngwõ mɛ̀ ngwõ ta. 6 Mɛ mane tugo, Apolosi zɔ ye ma, nka Wuro ngwõ fɔgabɛ. 7 Yee nemɛ, ngwĩ sõ ngwõ tugo, ngwona te ha fui ga. Ngwĩ sõ ngwõ zɔ ye ma, ngwona te ha fui mɛ ga. Ke daga ngwĩ dyati ngwõ Wuro ngwĩ ngwõ fɔgabɛ. 8 Ngwĩ ngwõ tugo kɔ ngwĩ ngwõ zɔ ye ma, ngwõwɔ pepe tala. Ye pepe tala tala na ye yɛrɛ ta yirebɛbe gũ hõ kanya kɔ ye yɛrɛ ta bara nemɛ. 9 Mɛ̀ kɔ Wuro tɛ baratɛkwere na. Ka tɛ Wuro ta lɔ na. Ka tɛ Wuro ta tɔgɔ kõ na mɛ. 10 Wuro perefa ngwĩ pere mɛ ma, mɛ kõ du ka hõ kanya kɔ ngwõ nemɛ wɔkara kõ tɔgɔkyeta. Sõ za tine tɔgɔ ngwona kulu ma. Ye pepe tala tala daga ya kõ tɔgɔno nɔma tɔ̀ ngwona kulu ma. 11 Kõ du ngwĩ kyɛ, ngwõ Yesu Krista. Sõ si ha sebɛne zayi ka ngwõ sonala timi ga. 12 Bɔ sanu dɛ ngwona kõ du ma, bɔ gwana furo dɛ, bɔ dɔge na terebaye dɛ, bɔ sɔrɔ dɛ, bɔ sɔgɔ kwiyɛ dɛ, bɔ wɛlɛ dɛ. 13 Sɔma pepe tala tala bara ngwĩ ta, ngwona bara na dɔre ngwona kiti kɔ ma. Ngwona kɔ ma, togo na sɔma pepe tala tala ta bara dɔrɔ. Ye bara sifa ngwĩye ta, togo na ngwõ dɔrɔ. 14 Sõ ngwĩ fa tɔgɔ ngwona kõ du ma, ne togo ma ye ngwona ga, ngwona te na yirebɛbe gũ. 15 Ne bo sõ ta bara hõ ngwɛne, a na bono ye hõ nka a yɛrɛ na dɛɛ wɔkara a do fɔno togo woro hõ. 16 Ka ngwõ tɔ̀ ga ra da ka tɛ Wuro kõ yuu na, da Wuro ta Ni tanga ka kɔrɔ hõ? 17 Ne bo hõ Wuro kõ yuu yaga, Wuro na ngwona te yaga mɛ. Wuro kõ yuu kìnì, ngwõ ki yɛrɛ. 18 Sõ si ka ye yɛrɛ firebɛ ga. Ne a hõ ti bo kɔrɔ hõ da a tɛ kakirite na wɔkara sɔma kakirikɔmabe dyati ngwɛne, ngwõ hõ tɛ datɔbariyata na ngwõfatɔ a hõ tɛ kakirite na tĩyã na. 19 Be tɔ̀ bo diniya ta kakirikɔmabe ngwõ zana da Wuro nyena hõ. Wɔkara a sɛbɛɛ Wuro ta bɛrɛda hõ da: Wuro kakirikɔma fɔga ye ta nyenamakwiyɛbe hõ. 20 A sɛbɛɛ Wuro ta bɛrɛda hõ mɛ da: Matigi kakirikɔma ta miri tɔ̀, ye ngwõ zana da. 21 Ngwõ yena sõ si ka ye yɛrɛ firebɛ sɔma ta tɛda na ga. Fere pepe kiye. 22 Pauli o, Apolosi o, Pierre o, diniya o, sugunɔmabe o, siri o, basyɛ fere o, fere na naye o, —fere pepe na kweye kiye. 23 Ki tɛ Kristaye na. Krista ngwõ Wuroyi.
41 Ka daga mɛ̀ dyati wɔkara Krista ta baratɛre kɔ sɔma ngwĩye ngwõ Wuro ta bunu da nyonohõwa. 2 Aiwa, da nyenahõwɛsɔma daga tɛ nyomasɔma na. 3 Ka hõ mya da kikyɛ wala sõ za hõ mya da kikyɛ, ngwõ ha da yuu mɛ nyena hõ ga. Mɛ ha ne yɛrɛ ta da kikyɛ mɛ ga. 4 Mɛ kɔrɔ ha ne zarake da si na ga, nka ngwõ dama ha tĩyã pere mɛ ma ga. Mya da na kikyɛta ngwõ Matigi. 5 Ngwõ yena ka ka kiti sɔ sõ si ma ga. Ka kiti sɔ wakati yɛ̀rɛ̀ fɔ Matigi hõ na. Sõ ngwĩ da ta ne dõ tunungu hõ kɔ sõ miri ngwĩ da na ye kɔrɔ hõ, Matigi na ngwona da pepe sabɛ sire. Ngwona sanga ma sɔma pepe tala tala daga kɔ yirebɛbe ngwĩ nemɛ, a na ngwõ gũ Wuro ta. 6 Syenɔmane, mɛ ngwona da yera mɛ kɔ Apolosi ta da na hõ mɛ̀ ta zɛngɛ dɔre fere na ka ma. Mɛ tyata ka hõ sɛmɛ ye na myà da na, wɔkara ngwona dakalo da: Ka ka yalo da na sɛbɛye ma ga. Sõ si ka ye yɛrɛ yirebɛ bo sõ ta da na hõ bo sõ za dɛgɛbɛ ga. 7 Kɔ ngwõ be ta sõ gwaga na hõ yaloyi bɔ sɛrɛ ma? Ngwono ti be ta ne a ma Wuro ta perefa ga? Ne a hõ pere be ma, ngwonona be be yɛrɛ yirebɛ wɔkara ngwõ ha pere be ma ga? 8 Fere pepe ti ka ta. Ka tɛ ferekɔma na sĩ, ka tɛ fangamɛ na, hale ne mɛ̀ mane ti yee ga. Ne ka hõ tɛ fangamɛ na, ngwõ dya mɛ ma ngwõfatɔ mɛ̀ kɔ ki hõ kwe tɛ fangamɛ na nemɛ ta mɛ. 9 A ti mɛ kɔrɔ hõ da Wuro mɛ̀ fanesɔma tege sɔma pepe timi wɔkara mɛ̀ tegee siri do ma. Mɛ̀ tɛ sege fere na diniya hõ fere nyena hõ, mɛlɛkɛe kɔ sɔma mɛ. 10 Mɛ̀ mɔgɔmuge Krista yena. Ki tɛ kakirikɔma na Krista hõ. Mɛ̀ barikadɛgɛsɔma, ki kwane barika yire. Sɔma ka yirebɛ ne mɛ̀ dɛgɛbɛ. 11 Wu kɔ mulu ti mɛ̀ na fɔ na wiri basyɛ ma. Mɛ̀ pɔna zogore na. Sɔma mɛ̀ võ mɛ. Yɛrɛ na kwã ha ti mɛ̀ ta ga. 12 Mɛ̀ bara ta hõ nyama hõ zɛ mɛ̀ mako na fere gũ. Sɔma hõ mɛ̀ vini, mɛ̀ ne duba ta ye ma. Sɔma mɛ̀ nyane, mɛ̀ ngwõ somɔna. 13 Ye hõ mɛ̀ toga yɔ yera, mɛ̀ ne bɛrɛda dya yera. Mɛ̀ tɛ wɔkara diniya hõ sare sɔgɔ, wɔkara nyamanyama na vunuye fɔ na wiri basyɛ ma. 14 Mɛ ha bo da sɛbɛ hõ ka piribɛ ga. Mɛ tyata ka sɛmɛ wɔkara ne nɔmane na kanuye. 15 Hale ne kalamogi sɔma sana fũ mane ti ka ta hõ ka kala Krista ta yano na, vɔrɔ tõ tala ti ka ta dama. Kya yano ta piri ma ua Yesu Krista barika hõ, a mɛ ngwĩ mane Berɛda Fɔre yera ka ma hõ tɛ ka vɔrɔ tõ na. 16 Aiwa, mɛ tyata hõ ka kala na tɛno nemɛ na. 17 Ngwõ yena mɛ Timote fane ka ma. Ngwõ mɛ nonanimisĩ na kanuyi na nyomayi Matigi hõ. A na ka kakiri dige mya soga na kala da na Yesu Krista hõ. Mɛ sɔma kala kɔ ngwõ nemɛ bi pepe hõ kɔ eglise pepe hõ. 18 Bɔ sɔma ye yɛrɛ yirebɛ hõ ne dyati da ma ba na ya ka birɛ titiri ga. 19 Nka zɔgɔta ma na ya ka birɛ ne Matigi hõ dyã. Ngwona sanga ma mɛ ha na ngwona yɛrɛyirebɛsɔma ta bɛrɛda dyati ga fɔ ye ta tɛda. 20 Wuro ta fangamabe ngwõ ha bɛrɛda ga, ngwõ sebɛbe na da. 21 Weyi ngwõ dya ka ma? Ma na ka birɛ kɔ gwanga nemɛ ra, ta ma na kɔ kanube kɔ kwɔnabe nemɛ?
51 Ye mɔ bi pepe hõ da kakalabe ti ka woro hõ, ye bo sõ ye tõ ta yà nyo. Ngwõ nemɛ na kakalabe ha ti hale si sɔma woro hõ ga. 2 Ki kwane, ka pagaa yɛrɛyirebɛbe na. Ka ni na mane daga bã ga ra? Ngwĩ ngwona da ta, ka mane daga na laga na sabɛ ka woro hõ. 3 Hale ka nyono mane ti mɛ na komvavere ta piri ma na ga, mɛ ti kɔ ka nemɛ ni ta piri ma na. Ngwĩ ngwona da ta, mɛ ngwõ ta kiti sɔ na wɛ kyà Matigi Yesu togo na, wɔkara mɛ mane tye. 4 Ka hõ kwe nemɛ ma ngwĩ sanga ma, mɛ ti kɔ ka nemɛ ni ta piri ma na kyà Matigi Yesu ta sebɛbe barika hõ. 5 Ka daga ngwona nomo ka Setane soro hõ ngwõfatɔ a komavere hõ yaga, a ni hõ kisi Matigi ta kiti kɔ ma. 6 Kya yɛrɛyirebɛbe ha fɔro ga. Ka tɔ̀ da buru koobɛ fa na zɔgɔ sebɛne yoge fɔgɔ pepe koobɛ ga ra? 7 Dayaga ngwĩ tɛ wɔkara buru koobɛ fa na biriyi, ka ngwõ wa ka hõ ngwõfatɔ ka hõ tɛ yoge fɔgɔ na ngwũye na, buru koobɛ fa ha ti ngwĩ hõ ga. Kyà Fɔnoma na sale na salaka yɛɛ wɛ, ngwõ Krista. 8 Ngwõ yena ke hõ ngwona sale ta kɔ kɔrɔ hõ kìnì kɔ buru na koobɛbariyayi nemɛ, ngwõ tĩyã na buru. Ke ka ngwona sale ta kɔ buru koobɛ fa na biriyi nemɛ ga, ngwõ dayaga kɔ telebariyabe. 9 Mɛ yera ka ma na sɛbɛ hõ da ki kɔ dayagatɛsɔma ka kwe da si ma ga. 10 Mɛ ha da bo diniya hõ kɔma ga, ngwõ pepe dayaga ta. Ye nyena ha pagaa fa na ga, ye fere kimi, ye fyã kãe. Ne ye mane ngwõwɔ, ka daga sa bo diniya hõ yɛrɛ. 11 Mɛ da sõ ngwĩ ye yɛrɛ wiri lanabe sõ, ne a ne kakalabe ta, a nyono mane pagaa fa na ga, a fyã kãe, a sõ vini, a kwĩ mɛnɛ ne nyingi, a fere kimi. Ki kɔ ngwõ nemɛ na sõ, ka kwe da si ma ga. Ka ka kwe ne zõ mɛ ga. 12 - 13 Sɔma ngwĩye ha lanabe sɔma ga, mɛ nii ha ti ngwõwɔ ta kiti da hõ ga. Wuro na kiti sɔ ngwona sɔma ma. Nka sɔma ngwĩye ti kya nemɛkwebe hõ, ka daga ngwõ ta kiti sɔ. Wɔkara a sɛbɛɛ Wuro ta bɛrɛda hõ da: Ka dayagatɛta laga na wa ka woro hõ.
61 Ne kiti da hõ ne ti ka na bo kɔ bo yɔ, ngwonona ngwona te ye woro sige hõ ya ngwona kiti sɔ telebariyasɔma nyono na? A sebɛne ngwõ nyonohõwa lanabe sɔma nyono na ga ra? 2 Ka tɔ̀ da lanabe sɔma na kiti sɔ diniya ma ga ra? Ne ka hõ ne na kiti sɔ diniya kɔma ma, ka daga ngwona da mɛngɛ nyonohõwa ga ra? 3 Ka tɔ̀ da ke na kiti sɔ mɛlɛkɛe ma mɛ ga ra, a hõ ma bo diniya hõ da? 4 Ne bo diniya hõ kiti da bɔ hõ ne ti ka ta, eglise kɔma ha sɔma ngwĩye dyati ga, ka ngwõwɔ ta kitisɔre na ra? 5 Mɛ ngwõ yera ngwõfatɔ ka hõ piri. Sõ na kakirite si ti ka woro hõ ngwĩ ngwõ sebɛne ye syeno ta kiti da nyonohõwa ga ra? 6 Nka syeno ye nemɛ syeno wiri kiti na hõ dyã lanabɛbariya sɔma kiti sɔ ye ma. 7 Kiti nyaa ti ka ta, ngwõ a dɔrɔ da ka fire fɔrona. Ngwono tɛ ka hõ mane somɔna ka na kakyebita we ga? Sõ ngwĩ ngwõ bɛrɛ ka ma, ngwono tɛ ka hõ mane somɔna ngwona te we ga? 8 Ki kwane, ka bɔ kakye bi ne bɛrɛ bɔ ma, ka syenɔmane yɛrɛ. 9 - 10 Ka tɔ̀ da telebariyasɔma ha na Wuro ta fangamabe gũ ga ra? Ka ka ka yɛrɛ firebɛ ga. Ka tɔ̀ telebariyasɔma o, fyã kãe sɔma o, kakalatɛsɔma o, sini ngwĩye ye nemɛ sini syã o, pane o, nyenapagabariyasɔma o, kwĩmɛnɛnyingine o, sõ vini sɔma o, bɛrɛmasɔma o, ngwõwɔ na sõ si ha na Wuro ta fangamabe gũ ga. 11 Ka na bɔ mane pya ne ti yee. Nka ka kìnì kakye ta piri ma na, ka tegee Wuro ma hõ kìnì. Wuro ka ta sɔma tele na kyà Matigi Yesu Krista togo barika hõ kɔ kyà Wuro Ni barika hõ. 12 Ka na bɔ da ye da pepe daga tɛ na ka ta. Ngwõ tĩyã nka da pepe ha fa fɔrɔ be ma ga. Da pepe daga tɛ na mɛ ta nka mɛ ha tyata tɛ fa si ta tere na ga. 13 Ka da mɛ: Zõfa ngwõ sõ tuluyi, sõ tulu ngwõ ma zõfayi. Nka Wuro na ye pepe pɔla yaga. Wuro ha sõ komavere tetɛre kakalabe yena ga, a tetɛrɛ hõ bara ta Matigi ma. Matigi tɛ ke komavere ngwonate na. 14 Wuro mane Matigi ngwini na sabɛ sara woro hõ. A na ke ngwini mɛ a ta sebɛbe barika hõ. 15 Ka ngwõ tɔ̀ ga ra da ka komavere ngwõ Krista komavere na bo? Mɛ na Krista komavere na bo bi hõ na ta kakalatɛ yà komavere na ra? Aworɛ, ngwõ ha sebɛne tɛ ga. 16 Ka ngwõ tɔ̀ ga ra da sõ ngwĩ kwe kɔ kakalatɛ yà nemɛ, awe kɔ ngwõ tɛ sonala na? A sɛbɛɛ Wuro ta bɛrɛda hõ da: Ngwona sɔma pɔla na tɛ sonala na. 17 Nka ngwĩ ngwõ kwe kɔ Matigi nemɛ, ngwona te kɔ Matigi kwe tɛ tala ni ta piri ma na. 18 Ka tongo kakalabe na. Sõ kakye pepe ngwĩye ta, ngwõ ha fui ta a komavere na ga. Nka ngwĩ ngwõ kakalabe ta, ngwõ ye yɛrɛ komavere kakye bi. 19 Ka komavere tɛ Ni na kìnìyi ta Wuro kõ yuu na. Ngwona Ni ti ka kɔrɔ hõ, ka ngwõ gũ Wuro ta. Ka ha ka yɛrɛye ga rɛ. Ka ngwõ tɔ̀ ga ra? 20 Wuro mane ka tɛrɛ kɔ tere na yireyi nemɛ. Ka tɛ aweye na. Ngwõ yena ka Wuro yirebɛ kɔ ka komavere nemɛ.
71 Ka mane sɛbɛ fane hõ ne tɔga da ngwĩye na, ma na ngwõwɔ kìnìbɛ ka ma basyɛ. Ne sõ ma yà nyo ga, ngwõ fɔro. 2 Nka ngwõfatɔ sɔma ka ne kakalabe ta ga, ngwõ yena sini pepe tala tala daga yà nyo, yàra pepe tala tala daga wɔ ye yɛrɛ bangane ta. 3 Yà daga kɔ ngwĩ fa nemɛ, sĩ ngwõ pera ma. Sĩ daga kɔ ngwĩ fa nemɛ, yà ngwõ pera ma mɛ. 4 Yà ha ti ye yɛrɛ komavere ngwõ̀ na ga, a banga ti a ngwõ̀ na. Yee nemɛ mɛ sĩ ha ti ye yɛrɛ komavere ngwõ̀ na ga, a ta yà ti a ngwõ̀ na. 5 Ka ka maga nemɛ ma ga fɔ ka pepe sɔma pɔla hõ bɛ̃ ngwõ na ngwõfatɔ hõ wakati bo ta hõ ka yɛrɛ pere Wuro mɛbe ma. Ngwõ timi ka bere nemɛ ma yɛ ngwõfatɔ Setane ka na ka mamana kya yɛrɛfɛgɛbariyabe yena ga. 6 Mɛ ngwõ yera ngwõfatɔ hõ dyã ka dungo na da ma, ngwõ ha wadyibi na da ga. 7 A dya mɛ ma ne sɔma pepe hõ tɛ wɔkara mɛ. Nka sɔma pepe tala tala ti kɔ ya perefa nemɛ ye ngwĩ gũ Wuro ta. Bɔ ta perefere tala, bɔ ye si nii ti. 8 Ngwĩye ngwõ nyo ga kɔ yɔfuro yàra, mɛ yera ngwõwɔ ma da ne ye ne wɔ yɛ wɔkara mɛ, ngwõ fɔro. 9 Nka ne ye mane sebɛne ngwõ somɔna ga, ye nyo. Ye hõ nyo, ngwõ fõ kɔ wu na nyane nemɛ. 10 Ngwĩye ngwõ nyo wɛ kwane, mɛ bo sigebɛ ye ma da yà ka sa ye banga ta ga. Mɛ ha ngwõ yera ga rɛ, Matigi ngwõ ngwõ yera. 11 Ne a hõ sa a ta, a ka nyo ga wala a bere ya ye banga birɛ. Sõ ka ya yà dira mɛ ga. 12 Nka sɔma sɛrɛ ta piri ma na, ne lanabɛbariya yà hõ ne ti ke syeno bo ta, ne ngwona yà hõ dyã wɔ kɔ le, a ka a dira ga. Mɛ ngwõ yera, ngwõ ha Matigi ta bɛrɛda ga. 13 Yee nemɛ mɛ, ne lanabe yà hõ ti lanabɛbariya sõ bo ta, ne a bange hõ dyã wɔ kɔ le, a ka sa ye banga ta ga. 14 Lanabɛbariya sõ vetira Wuro na a ta lanabe yà barika hõ. Lanabɛbariya yà vetira Wuro na a banga na lanabe sõ barika hõ. Ne ngwõ ma tɛ ga, ye nɔmane na tɛ lanabɛbariya nɔmane na. Nka basyɛ ye vetira Wuro na mɛ. 15 Ne lanabɛbariya sõ hõ ne tyata maga ya lanabe yà hõ, a sebɛne ngwõ ta. Nka ne ngwõ hõ tɛ, lanabe yà ha pɛrɛɛ ga. Ne lanabɛbariya yà hõ ne tyata maga ye banga na lanabe sõ hõ, a sebɛne ngwõ ta. Ne ngwõ hõ tɛ, ngwona lanabe sõ ha pɛrɛɛ mɛ ga. Wuro ke wiri ngwõfatɔ ke hõ wɔ syara na. 16 Bi lanabe yà, ngwono be ngwõ tɔ̀? Dora be na be banga kisi. Bi lanabe sõ, ngwono be ngwõ tɔ̀? Dora be na bya yà kisi. 17 Matigi perefa ngwĩ pere sõ ma, a daga ya kanya kɔ ngwõ nemɛ. Wuro ka wiri ka ne ti ngwɛne, ka daga wɔ yee yɛ. Yee mɛ tine sɔma kala eglise pepe hõ. 18 Wuro ngwĩ sõ wiri, a ne yɛro, a daga wɔ yee yɛ. Wuro ngwĩ sõ wiri, a ma yɛrobariyata, ngwõ ka yɛro ga. 19 Yɛrobe ha fui ga, yɛrobariyabe ngwõ ha fui mɛ ga. Ngwĩ fa ngwõ dyati ngwõ bo—hõ kwa Wuro ta fane ma. 20 Sɔma pepe tala tala mane ti ngwɛne ye wiri sanga ma Wuro ta, ye daga wɔ yee yɛ. 21 Ne be mane pya ne sõ ta tere be wiri sanga ma Wuro ta, be ni na ka bã ngwõ na ga. Nka ne be hõ ne sebɛne tɛ vɛno na, be ngwõ ta, ngwõ fõ. 22 Matigi tere ngwĩ wiri, ngwõ tɛ Matigi ta vɛno na. Yee nemɛ mɛ, Krista vɛno ngwĩ wiri, ngwõ tɛ Krista ta tere na mɛ. 23 Wuro mane ka tɛrɛ kɔ tere na bayi nemɛ. Ka ka tɛ sɔma ta tɛrɛ na ga. 24 Syenɔmane, Wuro sɔma pepe tala tala wiri ye ne ti ngwɛne, ye hõ wɔ yee yɛ Wuro zĩ hõ. 25 Aiwa, sɔma ngwĩye ngwõ nyo ga, Matigi ta fane ha ti mɛ ta ne yera ngwõwɔ ta da na ga. Mɛ ngwĩ fa dyati, ma ngwõ yera kamasɔrɔ mɛ tɛ nyomata na Matigi ta makare barika hõ. 26 Bo wakati na sigeyi yena mɛ dyati da ne sõ hõ wɔ ye tino na, ngwõ fɔro. 27 Yà ti be ta ra? Be ka bya yà dira ga. Be yà nyo dɛ̃ ga ra? Be ka dalo kya na nyo ga. 28 Ne be hõ yà nyo, be ha dayaga ta ga. Ne dalo hõ nyo sõ ta, ngwõ ha dayaga mɛ ga. Nka ngwĩye ngwõ nyo, ngwõwɔ na nyane gũ kɔ pepe ma. Mɛ tyata hõ ka kisi ngwõ ma. 29 Aiwa, syenɔmane, mɛ bɔ yera da wakati vetira wɛ. Na dofɔga basyɛ yà ti ngwĩ sõ ta, ngwõ hõ tɛ wɔkara yà ha ti a ta ga. 30 Ngwĩye ngwõ mɔgɔ, ngwõwɔ hõ tɛ wɔkara ye ha mɔgɔ ga. Ngwĩye ngwõ zi, ngwõwɔ hõ tɛ wɔkara ye ha mane zi ga. Ngwĩye fere tɛrɛ, ngwõwɔ hõ tɛ wɔkara fa ha ti ye ta ga. 31 Ngwĩye ye mako fɔro kɔ bo diniya hõ fere nemɛ, ye ka miri ngwona fere na dama ga kamasɔrɔ bo diniya hõ da na fɔno zɔgɔta. 32 Mɛ ha mane tyata ka kakiri nyangamu ga. Yà ha ti ngwĩ ta ga, ngwona te dyati Matigi ta bara da na ngwõfatɔ a da hõ dya Matigi ma. 33 Yà ti ngwĩ sõ ta, ngwõ dyati bo diniya hõ da na ngwõfatɔ a hõ ya yà madyama da ta. 34 Ngwona sõ ta dyate pɔla. Yà ngwĩ ngwõ nyo ga kɔ dalo, ngwõwɔ dyati Matigi ta bara da na kamasɔrɔ a tyata hõ ye kakiri kɔ komavere pepe pere Matigi ma. Banga ti ngwĩ ta, ngwõ dyati bo dinya hõ da na ngwõfatɔ a hõ ne ye banga madyama da ta. 35 Mɛ ngwõ yera ngwõfatɔ hõ ka dyema, mɛ ha tyata hõ ka bare ga. Mɛ tyata ka hõ da na dagaye ta hõ ka kõ pere Matigi ta bara ma. 36 Ye dalo pere ngwĩ sõ ma, ne a ma nyo dɛ̃ ga, ne ngwona dalo na wu hõ ne ti a na, a daga na nyo. Ngwõ ha dayaga ga. 37 Nka ne sõ hõ na latege ye yɛrɛ dungo na ye ye ha na yà nyo ga, ngwona te ka dalo kya nyama na ga. 38 Yee nemɛ, ngwĩ ngwõ yà nyo ngwõ dafɔre ta. Nka ngwĩye ngwõ nyo ga, ngwõ ye fõ. 39 Yà daga wɔ kɔ ye banga nemɛ a si pepe na. Ne a banga hõ siri, ngwona sanga ma a tɛ vɛno na. Sõ ngwĩ da dya a ma a sebɛne nyo ngwõ ta, ne ngwona sõ hõ ma lanabe sõ. 40 Mɛ dyati da a hõ wɔ yɛ, ma nyo ga, ngwõ fõ a ma. Ngwõ mɛ yɛrɛ ta dyate nka mɛ dyati da Wuro Ni ti ne ta mɛ.
81 Ke na bɛri fyã kãe kika ta da ta piri ma na basyɛ. Ye da ye datɔbe ti ke pepe ta. Ngwõ tĩyã nka datɔbe sebɛne sõ ta a pagaa yɛrɛyirebɛbe na. Kanube kwane, ngwõ ke yabɛ zĩ lanabɛbe na. 2 Sõ ngwĩ dyati da ye da tɔ̀, ngwona te ha fui tɔ̀ wɔkara a daga ne tɔ̀ ngwɛne ga. 3 Ngwĩ sõ ngwõ Wuro kanu, Wuro ngwona te tɔ̀. 4 Aiwa, sõ sebɛne fyã kãe kika nɔma ra? Ke tɔ̀ da fyã da ha fui bɛ diniya hõ ga. Wuro sonala legelege tye. 5 - 6 Hale ne sɔma hõ ne dyati da yirebɛ fere nyaa ti wurokõ hõ kɔ lagakõ ma, ne dyati da Matige nyaa tye, ke tɔ̀ da Wuro sonala dama ngwõ tye, ngwõ ke Tõ. Wuro ngwõ fere pepe tege. A ke tege ngwõfatɔ ke a yirebɛ. Matigi tala tye, ngwõ Yesu Krista. A fere pepe tege, ke sugu awe barika hõ. 7 ka sɔma pepe ha ngwona tĩyã tɔ̀ ga. Bɔ mane daro fyã da na. Hale sɔma ye ngwona kika nɔma hõ ngwõ dyati fyã kãe kika. Ye ta lanabɛbe barika dɛgɛ. Ne ye ne ngwona kika nɔma, ye ne dyati da ye dayaga ta. 8 Zõfa ha sebɛne ke wiribɛ Wuro ma ga. Hale ke ma zõ ga, ngwõ ha fa wa ke hõ ga. Ne ke hõ bere zõ mɛ, ngwõ ha fa kwe ke ma mɛ ga. 9 Ka ka yɛrɛ kɔrɔse. Fanga na yireyi ngwĩ ti ka ta lanabɛbe ta piri ma na, be ka lanabe sõ na barika dɛgɛyi ngwonayaga kɔ ngwõ nemɛ ga. 10 Bi ngwĩ da tɔ̀, ne be hõ ne ya ne zõ fyã kãe kõ hõ, ne lanabe sõ na barikadɛgɛyi hõ be za, a woro na sige hõ fyã kãe kika nɔma mɛ. 11 Yee nemɛ, ngwona lanabe sõ na barikadɛgɛyi na fire bya datɔbe yena. Krista siri ngwõ yena mɛ. 12 Ne be hõ be syeno kakye bi yee hõ na ngwonayaga, be Krista kakye bi mɛ. 13 Ngwõ yena ne zõfa ne mɛ syeno ka dayaga hõ, mɛ ha na kika nɔma titiri ga ngwõfatɔ ma ka na ne syeno ka dayaga hõ ga.
91 Mɛ tɛ vɛno na ga ra? Mɛ tɛ faneta na ga ra? Mɛ mane Yesu kyà Matigi za ga ra? Ka tino, ngwõ mya bara ta da dɔrɔ, ma ngwĩ ta Matigi ma. 2 Ne mɛ hõ mane faneta bɔ sɔma sɛrɛ ta ga, ki kwane ta, ma tɛ faneta na. Ka ya ngwɛne Matigi ta sogo ma, ngwõ a dɔrɔ da mɛ tɛ faneta na. 3 Ne sɔma hõ mya da yagayaga ngwĩ sanga ma, ma ye tɔga da: 4 Ne sõ hõ ne ka kɔ zõfa, ma zõ hõ mɛnɛ na bara yena, ngwona tĩyã ti ne ta ga ra? 5 Ne mɛ hõ syenɔma yà bo nyo, a ne yara kɔ ne nemɛ kire hõ, ngwona tĩyã ti mɛ ta ga ra? Fanesɔma sɛrɛ kɔ Matigi pyare kɔ Pierre, ngwõwɔ pepe ngwõ ta. 6 Mɛ kɔ Banabasi, mɛ̀ sɔma pɔla dama mane daga bara ta hõ ke mako fɔro ra? 7 Kɔ ngwõ ya sorodasebe na hõ ye yɛrɛ ta da nyonohõwa kɔ ye yɛrɛ ta gwana nemɛ? Kɔ ngwõ rezɛ̃ nako wa ne a mana nɔmane zõ ga? Kɔ ngwõ woro fere nɛ ne a mane ngwona woro fere nyingi mɛnɛ ga? 8 Mɛ ngwona da pepe yera hõ bo da kmibɛ ka ma nka Musa ta tõ ngwona da yera mɛ ga ra? 9 A sɛbɛɛ Musa ta tõ hõ da: Ne nyanga ne fɛ tongo, be ka zɔ pɛrɛ a do ma ga. Yera wa, Wuro nyangane ta da dyati ra? 10 A ngwõ yera kyà da na ga ra? Ngwõ sɛbɛɛ ke yɛrɛ ta da na. Ngwĩ ngwõ sõ kɔ ngwĩ ngwõ dugo vuro, ngwõwɔ ngwona bara ta kɔ zigi nemɛ, ye ye na dugo bɔ gũ. 11 Ne mɛ̀ hõ Wuro ta da na bɛrɛda tugo ka kɔrɔ hõ, hõ bere kya diniya hõ tugo fere bɔ kyɛ̃, ngwõ da yuu ra? 12 Ne ngwona tĩyã hõ ne ti sɔma zɛ ta hõ ngwõ ta, a ti mɛ̀ ta hõ yaloyi ngwõwɔ ma ga ra? Ngwõ pepe na, mɛ̀ da pepe somɔna ngwõfatɔ mɛ̀ ka Krista na Bɛrɛda Fɔre bare kɔ fui si nemɛ ga. 13 Ka tɔ̀ da sɔma ngwĩye ngwõ bara ta Wuro kõ yuu hõ, ngwõwɔ ta zõfa sa ngwɛ̃. Sɔma ngwĩye salaka wɛ, ngwõwɔ ta zõfa sa ngwona salaka na bɔ hõ mɛ. 14 Yee nemɛ, Matigi a latege da ngwĩye ngwõ Bɛrɛda Fɔre yera, ngwõwɔ mako na fere daga gũ Bɛrɛda Fɔre na mɔ sɔma ta. 15 Mɛ kwane, mɛ ha ngwõ nemɛ na da ta ga. Mɛ ha bo sɛbɛ fane ngwõfatɔ ka hõ ngwõ nemɛ ta mɛ ma mɛ ga. Ne sõ hõ ngwona yɛrɛyirebɛbe na da yaga mɛ ta, siri fõ ne ma kɔ ngwõ nemɛ. 16 Ne mɛ ne Bɛrɛda Fɔre yera mɛ ha ne yɛrɛ yirebɛ ngwõ na ga. A tɛ wɔkara mɛ daga ngwõ yera. Bono ti mɛ ma ne mɛ hõ ma Bɛrɛda Fɔre yera ga. 17 Ne mɛ hõ dyã ngwõ ta ne yɛrɛ ma, ma na sara gũ. Nka a fanga mɛ ma hõ ngwona bara ta. Mɛ ngwõ ta wɔkara Wuro fane ngwĩye pere ne ma. 18 We ngwõ mya sara? Ne mɛ hõ Bɛrɛda Fɔre yera sɔma ma, ma fa tɔ ye ta ga, ngwõ mya sara. Mɛ daga kɔ ngwĩ fa nemɛ Bɛrɛda Fɔre ta yerabe yena, mɛ ha ngwõ tɔ sɔma ta ga. Ngwõ pepe ngwõ mya sara. 19 Mɛ vɛno, mɛ ha sõ si ta tere ga. Mɛ ne yɛrɛ ta sɔma pepe ta tere na ngwõfatɔ ma hõ sɔma nyaa gũ. 20 Ne mɛ hõ ne ti Yahutu kɔma birɛ ngwĩ sanga ma, ma Yahutuye ta tɛno ta ngwõfatɔ ma hõ Yahutu kɔma gũ. Mɛ ha ti Musa ta tõ we ga. Nka ne mɛ hõ ne bara ta ngwona sɔma birɛ ngwĩye ti ngwona tõ we, mɛ tɛ wɔkara ngwõwɔ ngwõfatɔ ma hõ ne gũ Krista ma. 21 Yee nemɛ mɛ, ne mɛ hõ ne ti sɔma bɔ birɛ ngwĩye ha Musa ta tõ dyati ga, mɛ tɛ wɔkara ngwõwɔ ngwõfatɔ ma hõ ne gũ. A ha tɛ wɔkara mɛ ha Wuro ta tõ dyati ga. Mɛ ti Krista ta tõ we. 22 Sɔma ngwĩye barika dɛgɛ lanabɛbe ta piri ma na, ne mɛ hõ ne ti ye birɛ ngwĩ sanga ma, mɛ tɛ barikadɛgɛta na mɛ ngwõfatɔ ma hõ ne gũ. Yee nemɛ, mɛ ne yɛrɛ berebere bereno si pepe na ngwõfatɔ hõ tɛno kya hõ sɔma bɔ kisi. 23 Mɛ ngwõ pepe ta Berɛda Fɔre yena ngwõfatɔ ma hõ duba gũ ngwõ na. 24 Ka ngwõ tɔ̀ ga ra da sɔma ngwĩye ngwõ tongo tongonemɛfɔno do hõ, ye pepe tongo nka sonala dama ngwõ yirebɛbe gũ. Aiwa, ka daga tongo ngwõfatɔ ka hõ ngwona yirebɛbe gũ. 25 Sɔma ngwĩye ngwõ ngwona tongonemɛfɔnobe ta, ngwõwɔ ye yɛrɛ kɛ̃gɛlɛ da nyaa ma ngwõfatɔ ye hõ ngwona tongonemɛfɔnobe na fangama bãfɔla gũ, ngwõ ngwĩ na yaga sale. Ke kwane, ke tongo ngwõfatɔ ke hõ fangama bãfɔla na yagabariyayi gũ. 26 Ne mɛ hõ ne tongo ngwĩ sanga ma, ne nyono ti na tongo wɛ do na. Ne mɛ hõ ne vyɛ̃ ngwĩ sanga ma, ma vyɛ̃ kɔ kakiri nemɛ, mɛ ha vyɛ̃ zana ga. 27 Mɛ ne komavere fɔga fɔrona ngwõfatɔ sɔma sɛrɛ wadyu wɛ timi ma mɛ ta, Wuro ka na maga mɛ hõ ga.
101 Mɛ syenɔmane, mɛ tyata ka kakiri dige ke bemae ta da na ngwĩye mane dɔ Musa ma. ye pepe mane ti ngwona debino we, ngwõ ngwĩ mane kwa ye ma. Ye pepe mane do fɔno nyengezu na pɛnɛyi woro hõ mɛ. 2 Ye pepe batize hõ kwɔ Musa ta nemɛkwebe hõ ngwona nyengezu kɔ ngwona debino barika hõ. 3 Ye pepe mane ngwona kabako zõfa zõ. 4 Ye pepe ngwona kabako zu mɛnɛ ngwĩ mane sa ngwona dɔgɔno hõ. Ngwona dɔgɔno mane Krista dya, ngwĩ mane ya ne kɔ lɔ. 5 Ngwõ pepe na, ye na sɔma nyaa da ha mane dya Wuro ma ga. Ngwõ yena ye na nyaaye siri kibe hõ. 6 Ngwõ pepe tɛ hõ na dɔrɔ ke ma da dayaga na wu ka ke fɔga wɔkara a ngwõwɔ fɔga ngwɛne ga. 7 Ka ka fyã kãe mɛ ga wɔkara ye na bɔ mane tɛ ngwɛne. Wɔkara a sɛbɛɛ Wuro ta bɛrɛda hõ da: Sɔma pepe tanga zõ hõ mɛnɛ hõ tuma ne nimi. 8 Ke ka kakalabe ta mɛ ga wɔkara ye na bɔ mane tɛ ngwɛne. Ye na sɔma sana kyoro ne nɔma saa kwe siri kɔ tala ma. 9 Ke ka Krista kɔrɔ wa mɛ ga, wɔkara ye na bɔ a kɔrɔ wa ngwɛne. Samɛ mane ye ngwĩ, ye siri. 10 Ka ka dumudumu bɛrɛda yera mɛ ga, wɔkara ye na bɔ ngwõ yera ngwɛne. Ni wɛ mɛlɛkɛ mane yɛ. 11 Ngwona da pepe tɛ ye na hõ tɛ zɛngɛ dɔre da na bɔ ta. Diniya wɛ wakati vetira ke ngwĩye ma, ngwona da sɛbɛɛ hõ ke sɛmɛ. 12 Ngwĩ sõ ngwõ dyati da ye taa, a daga ye yɛrɛ kɔrɔse ngwõfatɔ a ka na bɛrɛ ga. 13 Kɔrɔwɔbe pepe ngwĩ ka gũ, ngwõ nemɛ na kɔrɔwɛbe sɔma pepe gũ. Wuro saratipagata. A ha na dya kɔrɔwɛbɛ ka gũ ngwĩ ngwõ yalo ka barika tege ma ga. Kɔrɔwɛbe hõ ka gũ ngwĩ sanga ma, Wuro na fanga pere ka ma ngwõfatɔ ka hõ ngwõ somɔna. Yee nemɛ, ka na sebɛbe gũ. 14 Ngwõ yena mɛ màre, ka ka yɛrɛ kɔrɔse fyã yirebɛbe ma. 15 Mɛ bɛri ka ta wɔkara sɔma na kakirikɔma. Mɛ ngwĩ fa yera, ka miri ngwõ na. 16 Ke barika yera Wuro ma ngwona duba na zokobalo yena. Ke hõ mɛnɛ ngwõ hõ, ngwona sanga ma ke kwɔ Krista tõ ta nemɛkwebe hõ. Ke buru ngwĩ yɔyɔ, ne ke hõ ne ngwõ zõ, ngwona sanga ma ke kwɔ Krista komavere ta nemɛkwebe hõ. 17 Buruno tala tye. Ngwõ yena ke sɔma nyaa nka ke komavere tala kamasɔrɔ ke pepe kwe ngwona buruno tala ma. 18 Ka Israyɛli kɔma ta da sege. Fere ngwĩye ngwõ wɛ salaka na, sɔma ngwĩye ngwõ zõ, ngwõwɔ ti Wuro ta salakawɛbe na bara hõ. 19 Ngwõ kɔrɔ ngwono? Ngwõ kɔrɔ ke fyã kãe kika dyati ra? Ke fyã yɛrɛ dyati ra? 20 Aworɛ. Ma ngwõ yera da fyã kãe sɔma tɛtɛ fere ngwĩye ma, ngwõwɔ zini yaga. Ye ha ngwõ ta Wuro ma ga. Mɛ ha tyata ka kwɔ zini yaga ta nemɛkwebe hõ ga. 21 Ka ha sebɛne mɛnɛ kɔ Matigi ta zokobalo nemɛ hõ bere mɛnɛ kɔ zini yaga ta zokobalo nemɛ ga. Matigi ta tabale kɔ zini ta tabale tye. Ka ha sebɛne kwe ne zõ ngwona tabale pepe ma ga. 22 Ke tyata kereyabe ka Matigi hõ ra? Ka dyati da ke barika yireyi ayi ma ra? 23 Ye da: Da pepe daga tɛ na ke ta. Ngwõ tĩyã nka da pepe ha fɔro ga. Da pepe daga tɛ na sõ ta nka da pepe ha sebɛne sõ dyema ga. 24 Sõ si ka miri ye yɛrɛ ta da na dama ga. A daga miri sõ za ta da na mɛ. 25 Ye kika ngwĩye zabire tũ hõ, ka sebɛne ngwõ pepe nɔma. Ka ha daga sõ tɔga ngwõ na yala ne ngwõ hõ ma ne fyã kãe kika ga. 26 Wɔkara a sɛbɛɛ Wuro ta bɛrɛda hõ da: Lagakõ kɔ a ma fere pepe Matigiye. 27 Ne lanabɛbariya sõ bo hõ be wiri zama na, be hõ ya a birɛ zõ do hõ, a hõ ngwĩ fa pepe tege be we, be ngwõ zõ. Be ka tɔga yala ne ngwõ hõ ma fyã kãe kika ga. 28 Nka ne sõ bo hõ da be ma: Ngwõ fyã kãe kika. Ngwona sanga ma be ka ngwõ nɔma ga. Be ka ngwona kika nɔma ga ngwona sõ yena ngwĩ ngwõ yera be ma. 29 Fanga na yireyi ti be ta lanabɛbe ta piri ma na, nka ngwona sõ ta lanabɛbe barika dɛgɛ. Dɔra be na tɔga da: Sõ ngwĩ barika ngwõ dɛgɛ, ngwonona ngwõ mɛ bare hõ bo da ta? 30 Mɛ barika yera Wuro ma na zõfa yena. Mɛ barika yera Wuro ma fa ngwĩ na, ngwonona sõ za hõ ne mɛ togo yaga ngwõ na? 31 Aiwa, ka zõ o, ka mɛnɛ o, ka ngwĩ fa pepe ta, ka ngwõ pepe ta hõ Wuro yirebɛ. 32 Ka ka yɛrɛ kɔrɔse, ka ka sõ si ngwonayaga ga. Yahutu kɔma wala si sɔma wala Wuro ta eglise. 33 Ka mya tɛda nemɛ ta mɛ. Mɛ tyata sɔma madyama da ta da pepe na. Mɛ ha ne yɛrɛ ta da dyati ga. Mɛ sɔma zɛ ta da dyati ngwõfatɔ ye hõ kisi.
111 Ka mya tɛno sɛmɛ wɔkara mɛ Krista ta tɛno sɛmɛ ngwɛne. 2 Mɛ syenɔmane, ka kakiri ti mya da na sanga pepe ma. Mɛ mane da ngwĩye yera ka ma, ka mane ngwõwɔ fɔga mɛ. Ngwõ yena ma bire ka na fɔrona. 3 Mɛ tyata ka hõ tɔ̀ da Krista ngwõ sini pepe ngwonate. Nimisĩ ngwõ yà ngwonate. Wuro ngwõ Krista ngwonate. 4 Hõ nimisĩ to kala do hõ, a ne Wuro mɛ wala ne Wuro ta bɛrɛda yera, a ka bãfɔla pĩ ye ngwõ̀ hõ ga. Ngwõ Krista na dɛgɛbɛ da. 5 Hõ yà to kala do hõ, a ne Wuro mɛ wala ne Wuro ta bɛrɛda yera, ne patara mane pɛrɛɛ a ngwõ̀ hõ ga, ngwõ a banga na dɛgɛbɛ da. Yà ngwĩ ngwõ patara pɛrɛ ye ngwõ hõ ga, a tɛ wɔkara ngwona yà ye ngwõ vɔro. 6 Ne yà ma patara pɛrɛ ye ngwõ̀ hõ ga, a daga ye ngwõsɔgɔ yaro mɛ. Ngwõ̀yarobe kɔ ngwõ̀vɔrobe ngwõ pepe yà na piribe da. A daga patara pɛrɛ ye ngwõ̀ hõ, ngwõ fõ. 7 Nimisĩ ha daga bãfɔla pĩ ye ngwõ̀ hõ ga kamasɔrɔ a tɛ wɔkara Wuro dya, Wuro ta noro ti a ma. Yà kwane, nimisĩ ta noro ti ngwõ ma. 8 Sĩ ha mane tegee hõ sa yà hõ ga. Yà mane sa sĩ hõ. 9 Sĩ ha mane tegee yà yena mɛ ga, nka yà ngwõ tegee sĩ yena. 10 Ngwõ yena yà daga patara pɛrɛ ye ngwõ̀ hõ, hõ ye banga ta ngwonakɔmabe dɔrɔ sɔma ma ngwõfatɔ mɛlɛkɛe na ngwõ za mɛ. 11 Matigi ta sogo ya da ta piri ma na, sĩ ha sebɛne wɔ ye sana ne yà mane tye ga. Yà ha mane sebɛne wɔ ye sana ne sĩ mane tye mɛ ga. 12 Wuro yà tege na wa sĩ hõ. Yà nimisĩ vɔrɔ. Nka Wuro ngwõ fere pepe pere. 13 Ka yera wa: Hõ yà to kala do hõ, a ne Wuro mɛ, ne a ma patara pɛrɛ ye ngwõ̀ hõ ga, ngwõ fɔro ra? 14 Sɔma ta da yɛrɛ ke kala ngwona da na ga ra? Ye ne ngwõsɔgɔ nyaa ne ti sĩ ta, ngwõ a na dɛgɛbɛ da. 15 Nka ne ngwõsɔgɔ nyaa ne ti yà ta, ngwõ a na yirebɛ da. Wuro ngwõsɔgɔ pere yà ma na ta a ngwõ̀ na pĩ fa na. 16 Ne sõ hõ ne tyata dakwiyɛ ngwona da na, ma na ngwĩ fa yera a ma ngwõ bo—ngwona lãda ti ke pepe ta, ke kɔ Wuro ta eglise. 17 Mɛ ngwĩ fa yera ka ma basyɛ, mɛ ha na ka yirebɛ ngwõ na ga. Ka hõ ka nemɛ kwe ngwĩ sanga ma, kya kala da ba fui fɔro sõ ma ga. Ngwõ kala na yagayi. 18 Mɛ tyata bɛri ka ta da ngwĩ na dɛ̃, ngwõ dɛ̀gɛ̀be ngwĩ ti kya eglise kɔma woro hõ. Mɛ ngwĩ mɔ sɔma ta, mɛ dyati ngwona da na bo tĩyã. 19 A wadyibi dɛ̀gɛ̀be hõ tɛ ka woro hõ ngwõfatɔ ke hõ sɔma tele dɛ̀gɛ̀ tɔ̀. 20 Ka hõ ka nemɛ kwe ngwĩ sanga ma ka ba na Matigi ta zõfa zõ na ga. 21 Ka hõ ne zõ ngwĩ sanga ma sɔma pepe tala tala ne ye yɛrɛ ta zõfa zõ, Wu ti bɔ sɔma na, bɔ nyingi kwĩ na. 22 Kwã ti ka ta hõ zõ hõ mɛnɛ ngwɛ̃ ga ra? Fa ti ngwĩye ta ga, ka tyata hõ ngwõwɔ piribɛ hõ Wuro ta eglise dɛgɛbɛ yee nemɛ ra? Ngwono ka tyata ma ngwõ yera ka ma? Mɛ daga ka yirebɛ ngwona da na ra? Mɛ ba na ka yirebɛ ngwõ na ga rɛ. 23 - 24 Mɛ ka kala da ngwĩ na, mɛ mane ngwõ gũ Matigi ta, da Matigi Yesu kwɔ sɔma sera hõ wuru ngwĩ hõ, a mane buru bi hõ barika yera Wuro ma hõ ngwona buru yɔyɔ. A da ngwõ ye komavere, a ngwõ pere ye yena. Ye ye ngwõ ta ngwõfatɔ hõ ye kakiri dige a ta da na. 25 Yee nemɛ, ye zõ wɛ timi, a zokobalo bi mɛ. A da ngwona zokobalo ngwõ datege na ngwũyi a ngwĩ bi ye ma kɔ ye tõ nemɛ. Ne ye hõ mɛnɛ kɔ ngwona zokobalo nemɛ ngwĩ sanga ma, ye ngwõ ta hõ ye kakiri dige a ta da na. 26 A mane da ye hõ ngwona buru zõ hõ mɛnɛ kɔ ngwona zokobalo nemɛ ngwĩ sanga ma ye Matigi ta siri da yera fɔ a hõ bere na. 27 Ngwõ yena ne da na dagabariyayi ne ti sõ bo kɔrɔ hõ, ne a hõ Matigi ta buru zõ hõ mɛnɛ kɔ a ta zokobalo nemɛ ngwĩ sanga ma, ngwona te na zarake Matigi komavere kɔ a tõ ta piri ma na. 28 Sõ daga ye yɛrɛ ta da kikyɛ dɛ̃. Ngwõ timi a hõ zɛ buru zõ hõ mɛnɛ kɔ Matigi ta zokobalo nemɛ. 29 Kamasɔrɔ sõ ngwĩ ngwõ zõ hõ mɛnɛ, ne a mane miri Matigi komavere ta da kɔrɔ na ga, ngwona te na kiti bɛrɛbɛ ye yɛrɛ ma. 30 Ngwõ yena ka na sɔma nyaa pare, nyaaye barika dɛgɛ, ka na bɔ siri mɛ. 31 Ne ke hõ pya ke yɛrɛ ta da kikyɛ dɛ̃, Wuro ha na kiti sɔ ke ma ga. 32 Matigi kiti sɔ ke ma hõ ke nyane ngwõfatɔ zarake ka na bɛrɛ ke ma wɔkara a bɛrɛ diniya kɔma ma ngwɛne ga. 33 Ngwõ yena syenɔmane, ka hõ ka nemɛ kwe hõ Matigi ta zõfa zõ ngwĩ sanga ma, ka ka nemɛ yɛ̀rɛ̀. 34 Ne wu hõ ne ti bo sõ na, ngwõ daga zõ ye birɛ ngwõfatɔ Wuro ka na kiti sɔ ka ma kya nemɛkwe sanga ma ga. Bɔ da sɛrɛ kwane, ne mɛ hõ wiri ka birɛ ngwĩ sanga ma, ma na ngwõwɔ nyonohõwa.
121 Aiwa syenɔmane, mɛ tyata bɛri ka ta Ni na kìnìyi ta perefere ta da na. Mɛ tyata ka hõ tĩyã tɔ̀ ngwona da na. 2 Hõ ka to lanabɛbariyabe hõ ngwĩ sanga ma, fyã ngwĩye ngwõ ha fui ga, ngwõwɔ mane ka zĩ fɔga hõ ngwonakɔmabe ta ka ma. 3 Mɛ tyata ka hõ bo da tɔ̀ ne kìnì da Wuro ta Ni na kìnìyi sõ ngwĩ zĩ fɔga, ngwona te ha sebɛne Yesu voda ga. Sõ ngwĩ hõ Yesu wiri ya Matigi, ngwõ ha sebɛne ngwõ ta ne ngwõ ma tɛ Ni na kìnìyi barika hõ mɛ ga. 4 Perefere nyaa tye nka Ni na kìnìyi sonala ngwõwɔ pere. 5 Kyà bara tɛno sifa nyaa nka ke pepe bara ta Matigi tala ma. 6 Kyà tɛda sifa nyaa mɛ, nka Wuro sonala bara ta sɔma pepe kɔrɔ hõ. 7 Ni na kìnìyi ta perefa bo ye yɛrɛ dɔrɔ sɔma pepe tala tala hõ ngwõfatɔ ngwona perefa hõ fa fɔro sɔma pepe ma. 8 Ni na kìnìyi kakirikɔmabe na bɛrɛda pere bo sõ ma. Ngwona Ni na kìnìyi ngwõ tɔbe na bɛrɛda pere bo sõ za ma mɛ. 9 Ngwona Ni na kìnìyi sonala ngwõ lanabɛbe pere bo sõ ma. A sebɛbe pere bo zayi ma hõ komatoga parere kɛnɛbɛ. 10 Ni na kìnìyi sebɛbe pere bo ma hõ kabako da ta. A sebɛbe pere bo ma hõ Wuro ta bɛrɛda yera. A perefa pere bo ma hõ tĩyã na ni kɔ nĩyõ na ni dɛ̀gɛ̀ ne wa nemɛ na. Bo sõ sebɛne bɛrɛda zɛ bɛri Ni na kìnìyi barika hõ. Bo sõ za sebɛne ngwona bɛrɛda kɔrɔ yera Ni na kìnìyi barika hõ mɛ. 11 Ni tala ngwõ ngwona bara pepe ta hõ sɔma pepe tala tala ta perefere pere ye ma zɛzɛ. A ngwõ ta ye yɛrɛ dungo na. 12 Sõ komavere tala nka a na dɛ̀gɛ̀dɛ̀gɛ̀ da nyaa. Yee nemɛ, Krista tɛ wɔkara sõ komavere. 13 Yee nemɛ mɛ, Yahutu kɔma kɔ si sɔma kɔ tɛrɛ kɔ vɛnɔmane, Ni na kìnìyi ke pepe batize hõ ke ta komavere tala na. Ngwona Ni na kìnìyi ke pepe ka ke mɛnɛ. 14 Sõ komavere ha fa tala ga, dɛ̀gɛ̀dɛ̀gɛ̀ da na nyaaye ti a ma. 15 Ne kã hõ da yi ha soro ga, ngwõ yena ye ha komavere na bo ga. Ne a hõ mane soro ga, ngwõ yena a komavere na bo ga ra? Aworɛ, ye pepe pɔla komavere na bɔ. 16 Ne turu hõ da ye yi ha nyono ga, ngwõ yena ye ha komavere na bo ga. Ne a hõ mane nyono ga, ngwõ yena a komavere na bo ga ra? Aworɛ, ye pepe pɔla komavere na bɔ. 17 Ne komavere pepe na kweyi mane nyono, ne sõ mane na tɛ hõ ne mɔ? Ne a pepe na kweyi mane turu, ne sõ mane na tɛ hõ ne ngwunu mɔ? 18 Nka Wuro dɛ̀gɛ̀dɛ̀gɛ̀ da nyaa ta komavere na hõ kanya kɔ ye yɛrɛ dungo nemɛ. 19 Ne dɛ̀gɛ̀do tala ne tye dama, ngwõ ha dyati komavere ga. 20 Nka dɛ̀gɛ̀dɛ̀gɛ̀ da nyaa ti sõ komavere tala ma. 21 Nyono ha sebɛne da soro ma ye yi mako ha ti a na ga. Ngwõtulu ha sebɛne da kãe ma ye yi mako ha ti ye na ga. 22 Ke komavere na dɛ̀gɛ̀dɛ̀gɛ̀ da ke ngwĩye dyati wɔkara barika dɛgɛ fere, ke mako ti ngwõwɔ na fɔrona. 23 Ngwona komavere na dɛ̀gɛ̀dɛ̀gɛ̀ da ngwĩye barika dɛgɛ, ke kwa ngwõ ma fɔrona. Ke piri kɔ ngwĩye nemɛ, ke ngwõwɔ tetɛrɛ fɔrona. 24 Ke komavere na dɛ̀gɛ̀dɛ̀gɛ̀ da ngwĩye sege dya, ke ha daga ngwõwɔ tetɛrɛ ga. Wuro komavere pepe kwe ne tetɛrɛ ngwõfatɔ yirebɛbe dɛgɛ ngwõ ngwɛ̃ na, ngwõ hõ yirebɛbe gũ mɛ. 25 Dɛ̀gɛ̀ do si ha ti komavere na ga. A na dɛ̀gɛ̀dɛ̀gɛ̀ da pepe ye kakiri to ye nemɛ na. 26 Ne komavere na bo piri tala hõ ne nyane, ngwõ kɔ bɔ sɛrɛ pepe kwe ne nyane nemɛ ta. Ne bo piri tala hõ yirebɛbe gũ, ngwõ kɔ bɔ sɛrɛ pepe kwe ne ni hõ dya nemɛ ta. 27 Aiwa, ka pepe tɛ Krista komavere na. Ka pepe tɛ a komavere na bo na. 28 Wuro pilasi pere sɔma pepe tala tala ma eglise hõ. A na gwereyi ngwõ fanesɔma. A na pɔlalo ngwõ pururi. A na saaro ngwõ kalamogi. Ngwĩye dɔ ngwõwɔ ma, ngwõ bɔ ngwĩye ngwõ kabako da ta kɔ ngwĩye ngwõ sebɛbe gũ Wuro ta hõ paresɔma kɛnɛbɛ kɔ ngwĩye ngwõ sɔma dyema kɔ ngwĩye ngwõ sɔma zĩ fɔga kɔ ngwĩye ngwõ bɛrɛda zɛ bɛri. 29 Sɔma pepe ha fanesɔma ga. Sɔma pepe ha pururi ga. Sɔma pepe ha kalamogi ga. Sɔma pepe ha sebɛbe gũ hõ kabako da ta ga. 30 Sɔma pepe ha sebɛbe gũ hõ komatoga parere kɛnɛbɛ ga. Sɔma pepe ha sebɛne bɛrɛda zɛ bɛri ga. Sɔma pepe ha sebɛne bɛrɛda zɛ kɔrɔ yera ga. 31 Ka Wuro ta perefere na fɔroye kya. Sogo ngwĩ ngwõ fõ kɔ soga pepe nemɛ, mɛ tyata ngwõ dɔrɔ ka ma basyɛ.
131 Hale mɛ ne sebɛne sɔma zɛ ta bɛrɛda kɔ mɛlɛkɛe ta bɛrɛda bɛri, ne kanube mane ti mɛ ta ga, mya bɛrɛda tɛ wɔkara gõgõ kuru ye ngwĩ tuma wala teleno ngwĩ ngwõ dige. 2 Hale ne perefa ne ti mɛ ta hõ Wuro ta bɛrɛda yera, ne kanube mane ti mɛ ta ga, ngwõ pepe zana da. Hale ne tɔbe ne ti mɛ ta hõ bunu da pepe tɔ̀, ne kanube mane ti mɛ ta ga, ngwõ pepe zana da. Hale ne lanabɛbe ne ti mɛ ta hõ tola tumabɛ ne wa ye tanga da hõ, ne kanube mane ti mɛ ta ga, ngwõ pepe zana da. 3 Hale ne mɛ hõ ne soro hõ fere pepe kwe ne dini sɔma ma hõ dyã ne komavere pere ya ngwona, ngwõ ha fui fɔrɔ mɛ ma ga ne kanube mane ti mɛ ta ga. 4 Kanube ngwõ somɔnabe pere sõ ma kɔ foro. Kereyabe ha ti a hõ ga. A ha ye yɛrɛ yirebɛ ga. 5 Kanube ha peremaga da ta ga. A ha miri ye yɛrɛ ta da na ga. A woro ha ba sale ga. A ha ye mone wa sõ hõ ga. 6 Kanube ha ni hõ dya telebariya da na ga. A ni hõ dya tĩyã na da dama na. 7 Kanube dyã ne da pepe somɔna. A ta lanabɛbe kɔ a ta zigi kɔ a ta somɔnabe ha na wɛ ga. 8 Kanube ha na wɛ abada ga. Wuro bɛrɛda ngwĩye pere sõ ma kɔ perefa hõ bɛrɛda zɛ yera kɔ tɔbe, ngwõwɔ pepe na wɛ. 9 Kyà tɔbe kɔ kyà bɛrɛda ngwõ pepe ha dopaga ga. 10 Da na dopagaye hõ na na, da na dopagabariyaye na wɛ. 11 Hõ mɛ to nimisalabe hõ, mɛ mane bɛri wɔkara nimasalo, mɛ mane miri wɔkara nimisalo, mɛ mane da dyati wɔkara nimisalo. Basyɛ mɛ tɛ sõpe na, mɛ nimisalabe do dira. 12 Ke tĩya ngwĩ za basyɛ, ngwõ tɛ wɔkara dya ke ngwĩ za dubale hõ. A ha kìnì syee ga. Nka bo kɔ ke na ngwona tĩyã za na tɔ̀ nyono kɔ nyono. Basyɛ mɛ da zɔgɔ tɔ̀. Ngwona sanga ma mɛ na da na dopagayi tɔ̀ wɔkara Wuro mɛ tɔ̀ ngwɛne. 13 Aiwa, basyɛ ngwona fere saa tye: lanabɛbe kɔ zigi kɔ kanube. Nka ye pepe na yireyi ngwõ kanube.
141 Ka kanube kya dɛ̃. Ngwõ timi ka kya Ni na kìnìyi ta perefere na fɔrona. Ka daga ngwĩ perefa kya hõ yaloyi bɔ sɛrɛ pepe ma, ngwõ boo—hõ Wuro ta bɛrɛda yera. 2 Sõ ngwĩ ngwõ bɛrɛda zɛ yera, ngwõ ha bɛri sõ ta ga. A bɛri Wuro sonala ta. Sõ za ha ngwona bɛrɛda kɔrɔ tɔ̀ ga. A bɛrɛda ngwĩye yera Ni na kìnìyi barika hõ, ngwõ tĩya na bɛrɛda ngwĩye ngwõ dõ sɔma na. 3 Nka sõ ngwĩ ngwõ Wuro ta bɛrɛda yera, ngwõ sɔma dyema hõ ne ta lanabɛbe yabɛ zĩ hõ ne wora sigebɛ ne zigi tugu. 4 Sõ ngwĩ ngwõ bɛrɛda zɛ yera, ngwõ fanga gũ ye yɛrɛ ta lanabɛbe ta da na. Nka sõ ngwĩ ngwõ Wuro ta bɛrɛda yera, ngwõ fanga pere eglise kɔma pepe ma. 5 A dya mɛ ma ne ka pepe ne sebɛne bɛrɛda zɛ yera, nka ne ka pepe ne sebɛne Wuro ta bɛrɛda yera, ngwõ dyayi mɛ ma. Ngwĩ ngwõ Wuro ta bɛrɛda yera, ngwõ nafã pere sõ ma hõ yaloyi bɛrɛda zɛ na yerata ma. Nka ne sõ bo ne tye ngwĩ ngwõ sebɛne ngwona bɛrɛda kɔrɔ yera, ngwona sanga ma eglise kɔma pepe na fanga gũ ye ta lanabɛbe ta da na. 6 Mɛ syenɔmane, ne mɛ hõ ya ka birɛ hõ bɛrɛda zɛ yera, ngwõ na ngwono fɔro ka ma? Ngwõ ha na fui fɔrɔ ka ma ga. Mɛ daga Wuro ta dɔre da bo yera ka ma wala a ta tɔbe na bo wala a ta fane kɔ kala bo. 7 Ni ti fere ngwĩye hõ ga, yee ngwõwɔ ti mɛ. Ne sõ bo hõ bobofile wala sĩdoro pɛ̃, ne a mane ngwõ pɛno tɔ̀ ga, ne sõ na tɛ hõ na ta turu tɔ̀? 8 Ne tola dige kõ ne nyangamu, kɔ na ye yɛrɛ tetɛrɛ hõ kũ yɛ̀rɛ̀? 9 Yee nemɛ, ne ka hõ bɛrɛda zɛ yera, ne ye mane kìnì ga, ne sõ na tɛ hõ ngwona bɛrɛda kɔrɔ tɔ̀? A tɛ wɔkara ka bɛri zana. 10 Bɛrɛda nyaa ti diniya hõ. Ngwona bɛrɛda si ha tye ne kɔrɔ ma ti ye na ga. 11 Ne sõ hõ bɛrɛda yera mɛ ngwĩye kɔrɔ tɔ̀ ga, ngwona te na tɛ gana za hõ sõ na mɛ ta. Mɛ na tɛ gana za hõ sõ ngwona te ta mɛ. 12 Ki kwane, Ni na kìnìyi ta perefere na wu ti ka na fɔrona. Ngwõ yena ka ngwona perefere kya ngwĩye na eglise ta lanabɛbe yabɛ zĩ. 13 Ngwĩ sõ ngwõ bɛrɛda zɛ yera, a daga Wuro mɛ ngwõfatɔ a hõ sebɛ ngwona bɛrɛda zɛ kɔrɔ yera mɛ. 14 Ne mɛ hõ Wuro mɛ bɛrɛda zɛ hõ, mɛ ni mɛbe ta, nka mɛ kakiri nii ha ti ga. 15 Aiwa, ngwono mɛ daga ngwõ ta? Mɛ na Wuro mɛ kɔ ne ni kɔ ne kakiri nemɛ mɛ. Mɛ na yirebɛ turo sõ kɔ ne ni nemɛ, ma na yirebɛ turo sõ kɔ ne kakiri nemɛ mɛ. 16 Ne be hõ ne barika yera Wuro ma kɔ be ni nemɛ dama, be ngwĩ fa yera sõ za ha ngwõ tɔ̀ ga. Sɔma sɛrɛ ngwĩye bya Wuro mɛbe mɔ, mane kɔrɔ tɔ̀ ga, ne ye na tɛ hõ da amina bya Wuro mɛbe yena? 17 Bya barika yerabe Wuro ma ngwõ fɔro fɔrona, nka a ha fanga pere sõ za ma ga. 18 Mɛ bɛrɛda zɛ yera hõ yaloyi ki pepe ma. Ngwõ yena mɛ barika yera Wuro ma. 19 Nka ne mɛ ne ti eglise kɔma woro hõ, a dya ne ma hõ sɔma kala kɔ bɛrɛda koo nemɛ sɔma sebɛne ngwĩye mɔ hõ yaloyi bɛrɛda zɛ sana fũ ma sɔma ha ngwĩye mɔ ga. 20 Syenɔmane, ka ka tɛ nimisala na kakiri ta piri ma na ga. Ka tɛ nimisala na zugube ta piri ma na. Nka ka hõ tɛ sɔma papa na kakiri ta piri ma na. 21 Wɔkara a sɛbɛɛ Wuro ta bɛrɛda hõ da: Matigi da ye na bɛri bɔ sɔma ta. Ye na bɛri ye ta sɔma barika hõ ngwĩye ngwõ bɛrɛda zɛ bɛri. Ye na bɛri ye ta samara da hõ. Ye hale o ye ha na mɔ ye ta ga. 22 Ngwõ yena bɛrɛda zɛ ngwõ tɛ tagamasɛ̃ na lanabɛbariya sɔma ta, ye ha tɛ lanabe sɔma yena ga. Hõ Wuro ta bɛrɛda yera, ngwõ tɛ tagamasɛ̃ na lanabe sɔma ta, ngwõ ha tɛ lanabɛbariya sɔma yena ga. 23 Aiwa, ne eglise kɔma pepe hõ ye nemɛ kwe bi tala hõ, hõ ne bɛrɛda zɛ bɛri, ne sõ zana wala lanabɛbariya sõ hõ kwɔ yɛ, ye na da ye pepe kakaba ga ra? 24 Nka ne ka pepe hõ ne Wuro ta bɛrɛda yera, ne sõ zana wala lanabɛbariya sõ hõ kwɔ ka birɛ, ngwona bɛrɛda na a zarake hõ na ta dayaga dɔrɔ a ma. Wuro na kiti sɔ a ma kɔ ngwona bɛrɛda nemɛ. 25 A ta miri pepe ngwĩye mane dõ a kɔrɔ hõ, ngwõ pepe na dɔre sire. A na zi yolingo lɔ ma hõ Wuro yirebɛ. A na tɔ̀ da Wuro ti ka woro hõ tĩyã na. 26 Syenɔmane, ngwono ka daga ngwõ ta? Ne ka hõ ka nemɛ kwe hõ Wuro yirebɛ hõ turu sõ, bo ne kala ta, bo ne Wuro ta dɔre da bo yera, bo ne bɛrɛda zɛ bɛri, bo ne bɛrɛda zɛ kɔrɔ yera. Ngwona da pepe daga tɛ ngwõfatɔ eglise hõ ya zĩ. 27 Ne bo hõ ne bɛrɛda zɛ yera, ngwõ daga tɛ sɔma pɔla wala sɔma saa. Ye ka yalo sɔma saa ma ga. Sonala hõ bɛri, ngwõ timi bo bɛri. Sõ za daga ngwona bɛrɛda zɛ kɔrɔ yera. 28 Ne bɛrɛda zɛ na kɔrɔ yerata mane tye ga, sõ ka fa yera eglise kɔrɔ hõ ga, a daga bɔɔ. A sebɛne bɛri ye yɛrɛ kɔrɔ hõ kɔ Wuro nemɛ. 29 Sɔma pɔla wala sɔma saa hõ Wuro ta bɛrɛda yera, bɔ sɔma sɛrɛ ngwona bɛrɛda kikyɛ. 30 Sɔma ngwĩye tanga ngwona kala do hõ, ne Wuro hõ bo da dɔrɔ ye na bo ma, ngwĩ sõ ngwõ bɛri, ngwõ daga taa dɛ̃. 31 Ka pepe sɔma tala tala sebɛne Wuro ta bɛrɛda yera ngwõfatɔ ka hõ sɔma sɛrɛ kala hõ ne wora sigebɛ. 32 Sõ ngwĩ ngwõ Wuro ta bɛrɛda yera, ngwona te daga ye yɛrɛ fɔga. 33 Wuro ha ke wiri hõ da na nyangamuyi ta ga, a ke wiri syara na da na. 34 Hõ yàra to eglise hõ, ye daga bɔɔ, ye ka bɛri ga, wɔkara ye tɛ Wuro ta eglise pepe hõ ngwɛne. Wuro ta tõ da yàra daga mɔ, ye ka ngwonakɔmabe ta ga. 35 Ne ye ne tyata tɔga da bo na, ye daga ye yɛrɛ bangane tɔga ye birɛ. Ne yà ne bɛri eglise kɔrɔ hõ, ngwõ piri da. 36 Ka dyati da Wuro ta bɛrɛda tuma ki ngwõ birɛ ra? Ka dyati da a wiri ki dama ngwõ birɛ ra? 37 Ne a hõ ti sõ bo kɔrɔ hõ da Wuro a fane wala Ni na kìnìyi ta perefa ti a ta, ngwõ hõ tɔ̀ mɛ da, da ngwĩye ngwõ sɛbɛɛ fane ka ma, ngwõwɔ Matigi ta fane. 38 Sõ ngwĩ ngwõ bɔ bɛrɛda dyati ga, ka ka ngwona te dyati mɛ ga. 39 Mɛ syenɔmane, ka ka nyanga Wuro ta bɛrɛda ta yerabe na. Nka ka ka sõ bare hõ bɛrɛda zɛ yera mɛ ga. 40 Ka daga da pepe tetɛrɛ ne nyonohõwa hõ ne kanya kɔ bɔ bɛrɛda nemɛ.
151 Mɛ syenɔmane, mɛ mane Bɛrɛda Fɔre ngwĩ yera ka ma, ma tyata ka kakiri dige ngwõ na basyɛ. Ka mane ngwona bɛrɛda fɔga fɔrona. Kya lanabɛbe ti ngwona bɛrɛda ma mɛ. 2 Ka kisi ngwona bɛrɛda ta mɛ, ne ka hõ ne fɔga wɔkara ma ye yera ka ma ngwɛne. Fɔno ngwõ ga, kya lanabɛbe tɛ zana. 3 Mɛ kala na yireyi ngwĩ gũ, mɛ ka kala kɔ ngwõ nemɛ. Wɔkara a sɛbɛɛ Wuro ta bɛrɛda hõ da: Krista siri kyà kakye yena. 4 Wɔkara a sɛbɛɛ mɛ da ya sitira. A nyi saaro kɔ ma a ngwini hõ ye bere sugu. 5 A ye dɔrɔ Pierre ma. Ngwõ timi a ye yɛrɛ dɔrɔ fanene fumɔla ma. 6 Ngwõ timi a ye yɛrɛ dɔrɔ kalanɔmane bɔ ma wakati tala ma. Ye mane fã sɔma zokoo ma. Ye na nyaaye tye hale sɔma, nka ye na bɔ siri. 7 Ngwõ timi a ye yɛrɛ dɔrɔ Yakuba ma. Ngwõ timi a ye yɛrɛ dɔrɔ fanesɔma pepe ma. 8 Ngwõ timi lɛloma a ye yɛrɛ dɔrɔ mɛ ma mɛ. Mɛ vɔrɔno Wuro ta, ngwõ tɛ kabako da na. 9 Mɛ fanesɔma pepe na silaloyi. Mɛ ha daga wiri faneta ga kamasɔrɔ mɛ mane pya ne Wuro ta eglise nyane. 10 Mɛ ti ngwɛne, yee mɛ ti yɛ Wuro ta nema barika hõ. Wuro ha nema pere mɛ ma zana ga. Mɛ bara ta hõ yaloyi fanesɔma sɛrɛ pepe ma. Mɛ ha ngwõ ta ne yɛrɛ barika hõ ga. Wuro ta nema ngwõ ngwõ ta. 11 Ne mɛ hõ ne yera, ne yewɔ hõ ne yera, mɛ̀ pepe ngwona wadyuli ta. Ki la ngwõ na mɛ. 12 Ke wadyuli ta hõ da Krista ngwini sa sara woro hõ. Ngwonona ka na bɔ da ye sara ha na ngwini ga? 13 Ne ngwõ hõ ne tĩyã, Krista ha ngwini mɛ ga. 14 Ne Krista hõ ma ngwini ga, ke wadyuli ta zana. Ka lanabɛbe ta zana mɛ. 15 Na kwe ngwõ ma, mɛ̀ tɛ sɔma na nĩyõsɔre na Wuro ta da na kamasɔrɔ mɛ̀ yera ka ma da Wuro Krista ngwini na sabɛ sara woro hõ. Ne sara hõ mane sebɛne ngwini ga, ngwõ kɔrɔ Wuro ha mane Krista ngwini mɛ ga. 16 Ne sara hõ mane na ngwini ga, Krista ha ngwini mɛ ga. 17 Ne Krista hõ ma ngwini ga, kya lanabɛbe tɛ zana. Hale sɔma ka ti kya kakye hõ yɛ. 18 Sɔma ngwĩye la Krista na hõ zɛ siri, ngwõwɔ fire mɛ. 19 Ne ke zigi ne ti Krista ma hõ ke to bɛ diniya hõ dama, ke tɛ bonatege sɔma na hõ yaloyi sɔma pepe ma. 20 Tĩyã na, Krista ngwini sa sara woro hõ. Krista pya ngwini sa. Ngwõ yena sɔma pepe ngwĩye siri, ngwõ na ngwini mɛ. 21 Siri wiri sɔma pepe ma sonala barika hõ. Yee nemɛ, sɔma na ngwini sonala barika hõ mɛ. 22 Ke pepe Adama nɔmane. Ngwõ yena siri wiri ke pepe ma. yee nemɛ ke ngwĩye tɛ Kristaye na, ke na bere ngwini sa. 23 Sɔma pepe ti ye ti da hõ. Krista pya ngwini. Ngwõ timi sɔma ngwĩye tɛ Kristaye na, ngwõwɔ na ngwini a na sanga ma. 24 Ngwõ timi wɛ sanga wiri. Krista na sebɛbe gũ ngwonakɔmabe kɔ sebɛbe kɔ fanga pepe ma. A na fangamabe ka Tõ Wuro soro hõ. 25 Krista daga ngwonakɔmabe ta fɔ Wuro hõ na zugi pepe kwe a we, a ba ya ye ma. 26 Ngwõ timi lɛloma a na sebɛbe gũ siri ma. 27 Wɔkara a sɛbɛɛ Wuro ta bɛrɛda hõ da: Wuro fere pepe kwe a we a ba ya ye ma. Ke tɔ̀ da Wuro nii ha ti ngwona da hõ ga. Wuro yɛrɛ mane ngwona fere pepe kwe Krista we. 28 Fere pepe na mɔ Krista ta. Ngwõ timi Nonanimisĩ na mɔ Wuro ta. Wuro ngwõ mane fere pepe kwe Krista we, ngwõ na tanga fere pepe ngwõ̀ na. 29 Ngwĩye batize sara yena, ne ngwõwɔ ta da ti? Ne sara hõ mane na ngwini ga, wɔkara ka na bɔ da, ngwonona ye batize sara yena? 30 Mɛ̀ yɛrɛ ta piri ma na, ngwonona mɛ̀ dyã farati da na sanga pepe ma? 31 Syenɔmane,kɔ pepe ma mɛ ti siri na da hõ. Mɛ ne yɛrɛ yirebɛ kya da na Yesu Krista kyà Matigi yena. Ngwõ yena ma ngwõ yera ka ma. 32 Ne mɛ hõ ne sɔkɔba fere kwini bɛ Efese kuru hõ, ngwono na nafã mɛ na ngwõ gũ ngwõ na, ne sara mane na ngwini ga? Wɔkara sɔma da: Ka zõ hõ mɛnɛ kamasɔrɔ sɛ̃ ke na siri. 33 Ka ka ka yɛrɛ firebɛ ga. Màre yaga sebɛne màre fɔre yaga. 34 Ka ka nyamalɔɔ hõ sa dayagatɛbe na. Ka na bɔ ha Wuro tɔ̀ ga. Ma ngwõ yera hõ ka piribɛ. 35 Bo sõ na be tɔga da: Ne na tɛno na sara na tɛ hõ ngwini? Ye na na kɔ we komavere nemɛ? 36 Kakiridurute. Be tugo fa ngwĩ tugo, ngwõ ha na fɔga ne a ma vɔra ga. 37 Be ngwĩ tugo lɔ hõ, ngwõ ha tugo fere ga, ngwõ tugo fere nɔmane dama wɔkara dugo nɔmane wala tugo fere zɛ nɔmane. 38 Wuro tugo fere pepe tala tala yɛrɛ nɔmane pere ye ma hõ kanya kɔ ngwona tugo fa yɛrɛ si nemɛ. A ngwõ ta ya yɛrɛ dungo na. 39 Fere sugi pepe komavere ha tala ga. Komavere ngwĩ ti sɔma ta ngwõ si ti. Woro fere komavere si ti. Yala komavere si ti. Zɛ komavere si ti mɛ. 40 Wuro hõ fere tye kɔ lagakõ ma fere komavere tye. Foro ngwĩ ti wuro hõ fere ma ngwõ si ti lagakõ ma fere na foro na. 41 Sĩ ta foro si ti. Yuyi si ti mɛ. Mamalaye si ti. Hale mamala pepe ta foro ha tala ga. 42 Yee nemɛ sara ngwinibe na tɛ. Ne be hõ sõ sitira lɔ hõ, a komavere vɔra. A na ngwini sa kɔ komavere ngwĩ nemɛ, ngwõ ha na vɔra titiri ga. 43 Ne a hõ kyɛ lɔ hõ, a ha sege dya ga, a yaga. Ne a hõ ngwini sa ngwĩ sanga ma, a na ne fɔro, fanga ne ti a hõ. 44 Komavere ngwĩ kyɛ lɔ hõ, ngwõ bo lagakõ ma komavere. A na ngwini sa kɔ komavere ngwĩ nemɛ, ngwõ na tɛ wuro hõ komavere na. Lagakõ ma komavere tye, wuro hõ komavere ne tye mɛ. 45 Wɔkara a sɛbɛɛ Wuro ta bɛrɛda hõ da: Wuro sõ na gwereyi Adama tege na ta sõ na suguyi na. Adama na lɛlomayi tɛ ni na, ngwõ sugunɔmabe na pereta. 46 Lagakõ ma komavere ngwõ komavere na gwereyi. Ngwĩ dɔ ngwõ ma ngwõ wuro hõ komavere. 47 Wuro sõ na gwereyi Adama tege kɔ lagakõ na vere nemɛ. Adama na pɔlalo tuma wuro hõ. 48 Lagakõ ma komavere ngwõ tɛ wɔkara ngwona sõ ngwĩ mane tegee kɔ lagakõ na vere nemɛ. Wuro hõ komavere ngwõ tɛ wɔkara ngwona sõ ngwĩ tuma wuro hõ. 49 Ngwona lagakõ na sõ dya ti ke ma ngwɛne, yee ngwona wuro hõ sõ dya na ti ke ma mɛ. 50 Syenɔmane, ma yera ka ma da komavere kɔ tõ ha sebɛne kwɔ Wuro ta fangamabe hõ ga. Komavere ngwĩ ngwõ vɔra, ngwõ ha sebɛne tɛ komavere na vɔrabariyayi na ga. 51 Ka sege, ma tyata bunu da yera ka ma. Ke pepe ha na siri ga, nka ke pepe na bere. 52 Ngwõ na tɛ no tala hõ, nyena pĩ kɔ ye kibɛɛ, lɛloma tola pɛ̃ sanga ma. Ngwona tola hõ pɛ̃ ngwĩ sanga ma sara na ngwini sa kɔ komavere na vɔrabariyayi nemɛ. Ke pepe na bere. 53 Yee nemɛ, komavere na vɔrayi ngwĩ ti ke ta, ngwõ na bere tɛ komavere na vɔrabariyayi na. Komavere ngwĩ ngwõ siri, ngwõ na bere tɛ komavere na siribariyayi na. 54 Aiwa, komavere na vɔrayi hõ bere tɛ komavere na vɔrabariyayi na kɔ komavere ngwĩ ngwõ siri, ngwõ hõ bere tɛ komavere na siribariyayi na ngwĩ sanga ma, ngwona sanga ma bɔ bɛrɛda na sɛbɛye na dopaga ye: Sebɛbe gũ siri ma hõ na ta fanga yaga. 55 Bi siri, we bya sebɛbe ti? Bi siri, we bya ba do ti? 56 Kakye ngwõ sebɛbe pere siri ma hõ sõ ba. Tõ ngwõ sebɛbe pere kakye ma. 57 Ke barika yera Wuro ma ngwĩ ngwõ sebɛbe pere ke ma kyà Matigi Yesu Krista barika hõ. 58 Ngwõ yena mɛ syenɔmane na kanuye, ka taa fɔrona, ka ka berebere ga. Ka ka nyono pɛnɛ Matigi ta bara hõ sanga pepe ma. Ka tɔ̀ da ka bara ngwĩ ta Matigi ma, ngwõ ha na tɛ zana ga.
161 Aiwa, mɛ tyata bɛri ka ta gwana da na, ka na ngwĩye kwe ne pere Wuro ta sɔma ma ngwĩye ti Zerusalem. Mɛ mane fane ngwĩye yera Galase eglise ma ngwona da na, ki hõ ne ta yee mɛ. 2 Tumu do pepe na gwereyi kɔ ma ka daga gwana bɔ wa kya gũ gwana pepe hõ. Ka ngwõ tege fɔ ma hõ na. Yee nemɛ, ma hõ na ngwĩ sanga ma ka mako ba na ti gwana kwebe na ngwona sanga ma ga. 3 Ma hõ wiri ka birɛ ngwĩ sanga ma, ka sɔma ngwĩye dɛ̀gɛ̀, ma na sɛbɛ pere ngwõwɔ ma ne fane ye ya kɔ kya perefere nemɛ Zerusalem. 4 Ne mɛ yɛrɛ hõ ne daga ya, ye na ya kɔ mɛ nemɛ. 5 Ma na do fɔno ya Masadwane gana hõ. Ngwõ timi ma na wiri ka birɛ. 6 Mɛ na wakati zɔgɔ ta ka birɛ. Dɔra ma na lya hõ pepe ta ngwɛ̃. Ngwõ timi ha hõ ne ya ngwõ ngwɛ̃ pepe, ka sebɛne ne dyema na yara da na. 7 Mɛ ha tyata hõ ka za ne na fɔno sanga ma damaye ga. Mɛ tyata wakati zɔgɔ ta ka birɛ ne Matigi hõ ne dyã. 8 Nka mɛ na wɔ bɛ Efese kuru hõ fɔ Pãtekote na kɔ hõ wiri. 9 Bara na yireyi ti mɛ zĩ hõ bɛ, mɛ ngwĩye ta. Zugi na nyaaye tye mɛ. 10 Ne Timote hõ wiri ka birɛ, ka a fɔga fɔrona. A yɛrɛ bara ta Matigi ma wɔkara mɛ bahõ. 11 Ka na sõ si ka a dɛgɛbɛ ga. Mɛ tyata ka a dyema a ngwona yara ta syara na ngwõfatɔ a hõ bere na ne birɛ. Mɛ tine awe kɔ syenɔmane yɛ̀rɛ̀. 12 Ke syeno Apolosi ta piri ma na kwane, mɛ a woro sigebɛ a ya ki kɔ syenɔmane sɛrɛ birɛ, nka a ha tyata ngwõ ta basyɛ ga. A hõ wakati na fɔroyi gũ a na ya. 13 Ka wɔ ka nyono na. Ka ka nyanga hõ wɔ lanabɛbe hõ. Ka ka wora sige hõ barika ka ka yɛrɛ hõ. 14 Ka da pepe ta kɔ kanube nemɛ. 15 Ka Stefanas kɔ a ta kõ kɔma ta da mɔ. Yewɔ tɛ lanabe sɔma na gwereye na Akayi gana hõ. Ye ye yɛrɛ pere Wuro ma hõ lanabe sɔma mako fɔro. 16 Aiwa syenɔmane, ngwõwɔ kɔ sɔma pepe ngwĩye bara ta kɔ lɔ, ngwõwɔ ti ka zĩ. Mɛ ka mɛ ka dɔ ye ma. 17 Stefanas kɔ Forotunatus kɔ Akayikus ta nabe dya mɛ ma hale. Ka ha sebɛ ngwĩ fa ta mɛ ma ga, ngwõwɔ ngwõ ta. 18 Ye mɛ zigi tugu wɔkara ye mane ka zigi tugu ngwɛne. Ka daga ngwõ nemɛ na sɔma sye yirebɛ. 19 Eglise ngwĩye ti Asi gana hõ, ngwõwɔ bire ka na. Akila kɔ Pirisye kɔ eglise kɔma ngwĩye ngwõ nemɛkwe ta ye birɛ, ngwõwɔ bire ka na fɔrofɔrona. 20 Syenɔmane ngwĩye ngwõ ti bɛ, ngwõwɔ bire ka na. Ka syenɔmabe na fo ta nemɛ ma. 21 Mɛ Pauli yɛrɛ soro ngwõ bo sɛbɛ: KA Fo PEPE. 22 Sõ ngwĩ ngwõ Matigi kanu ga, ngwõ daga voda. Maranata. Na, kyà Matigi. 23 Matigi Yesu Krista ta nema hõ wɔ ka ta. 24 Mɛ ka pepe kanu Yesu Krista barika hõ.