Kəmwetə

Nyʉ̀ a Nyìngòŋ ndiʼ a Joyn a ndayn a

Kəmwetə

Tʉ nyʉ̀ a və diʼ a ŋwàʼlə̀ ghèn

A nyòʼo Joyn ə nyòʼo ŋwàʼlə̀ ghèn. Ghə̀ nyòʼo a tʉʼ a və ntsuʼ kəghʉ kə viʼi və byɨməvə byìʼì ando vəwenə nchoʼsə̀ la Yesò Klistò diʼ Bobo. Ghə̀ nyòʼo ŋwàʼlə̀ a ghèn ndiʼ we tətyɨm tə viʼi vəbyɨməvə be tyiftə vəwenə la kə vəwenə ne fəŋ fa vəwenə a byɨmə no tebe a zhʉ a vəwenə yenə ngəʼ ko a zhʉ a və tsuʼ kəwʉ kə vəwenə. No kətʉ kənyʉ̀ a kədiʼ a ti ŋwàʼlə̀ ghèn diʼ la: Nyìngòŋ ə lu soyn əzhɨ viʼi kəbayn ə wen no vətsèm ə boʼsə nə̀ Satan cho fa Bobo Klistò. Ghə̀ be lu ku moʼtə viʼi a və kuʼsə wen nə̀ mbwaʼmə ə kaŋ ə fighə nə̀ nse ə fi a ndo ghə̀ lu mwetə ə zhɨ.

Jì a və gəsə ŋwàʼlə̀ ghèn fa tsu

Kənzìtə̀ 1.1-8

Mbì ə nyʉ̀ a və nvì a Joyn to sə a tsi jòmsə tsi wen nə̀ və ŋwàʼlə̀ vi a ghə̀ nyòʼo a ntsèntə̀sə viʼi vəbyɨməvə sòmbo. 1.9–3.22

Ŋwàʼlə̀ ə lemtə yi nə̀ mɨ̀ŋ a shi sòmbo. 4.1–8.1

Təsoŋ ə Sòmbo 8.2–11.9

Nyam ə fansə nə̀ nyamsə ətoʼ sətsensə sə̀ bò. 12.1–13.18

Nyʉ̀ tsevə vì a və fʉ̀ a kə̀ʼ Joyn a nə̀ jòm. 14.1–15.8

Ngəʼsə sòmbo. 16.1-21.

Nyìngòŋ byɨbsə Babilòyn, be nə̀ ji a və zhɨ nyam ətoʼ fa tsu, nə̀ nshə̀ʼtə̀sə ndzɨŋsə, nə̀ Satan 17.1–20.10

Nyìngòŋ mwètə̀ soʼ viʼi 10.1-15

Kàŋ ə fi ghə̀ nə̀ nse fi a ndiʼ Jelusalèm ə fi. 21.1–22.5

Kəmwetə 22.6-21

¹ Ŋwàʼlə̀ ghèn dìʼ byìʼì ənyʉ̀ a Yesò Klistò ə̀ ndìʼi a ndayn. Nyìngòŋ ə̀ nku ənyʉ̀ avenə la ghə̀ diʼ à viʼi shwèʼ ə wen ənyʉ̀ vyi a və sə̀ laʼtə̀ ə fʉ̀. Klistò ə̀ ne Joyn kɨ ənyʉ̀ avenə chò fà ntsɨ̀ŋ ə̀ wen a ghə̀ ntɨmə̀ à Joyn. ² Joyn ə nshə̀ʼtə̀ li ənyʉ̀ no tsèm ando ghə̀ ə̀ yenə. Ghə̀ nə̀ diʼ əgàʼ ə wen ə kùm ə ntɨm yì fà Nyìngòŋ bènə̀ nəmwèʼè yì a Yesò Klistò ndìʼi à wen a ndayn. ³ Mbwaʼmə̀ dìʼ à wìʼ yì a ghə̀ dzàŋə̀ ənyʉ̀ venə a Nyìngòŋ ə shə̀ʼtə̀ lə̀. Mbwaʼmə̀ bè dìʼ à viʼi a və zhʉ be nè ənyʉ̀ vyi a və nyòʼò a ŋwàʼlə̀ a shyə̀ byìʼàndo əzhʉ boʼsə li ənyʉ̀ avenə fʉ.

Joyn tɨmə̀ toŋtə à ntsèntə̀ viʼi və byɨməvə la sòmbo

⁴ A tɨmə mò ə Joyn tɨmə̀ toŋtə à ghə̀ŋ ə ntsèntə̀sə viʼi və byɨməvə vi sòmbo a mbʉ̀ʼ Asìyà.

Boŋə tyɨm bènə̀ mbwaʼmə̀ a ndiʼ à ghə̀ŋ fà Nyìngòŋ yì a ghə̀ diʼ, mu ghə̀ ndìʼ, be diʼ əlù ndiʼ, bènə̀ mbwaʼmə̀ à ghə̀ŋ fà əzhwi vi ə sòmbo a və diʼ a mbì kəfòyn kə̀ Nyìngòŋ. ⁵ Boŋə tyɨm bènə̀ mbwaʼmə̀ be diʼ à ghə̀ŋ fà Yesò Klistò ə wu yenə nəmwèʼè, à dìʼ mbì wìʼ a və nlùsə wen fa əpfʉ, à be soʼo wen soʼo təfòn tə mbi tèntə.

Ghə̀ kòŋə̀ vəghəŋ. Ghə̀ shisə̀ li vəghəŋ fà vəghəŋ ə mbyɨsə chò fa wen ə mənlyuŋ a ghə̀ mpfʉ a kəntò ə̀ shʉ̀ʼ. ⁶ Ə mù nè la vəghəŋ ə ndiʼ vunə ntuʼ, ə̀ shyèʼ à Nyìngòŋ ə Tìʼ wen. Əghoʼsə nə̀ kədyòʼ ə ndiʼ à Yesò Klistò no məzhʉ̀ ntsèm. Amèyn.

⁷ Ghə̀ŋ yen a! ghə̀ yì a ghə̀ vì a tì mbòʼsə. No viʼi vətsèm lu yen ə wen ə boʼsə nə̀ viʼi vyi a və nsù wen nə̀ ghoŋə lì. No viʼi vətsèm a kwi nse lu dì byìʼì wen. A dìʼ ə jì a kə lu ndiʼ. ⁸ Bobo Nyìngòŋ ə Tìʼ àdyoʼ ə̀ tsèm yì a ghə̀ ə̀ ndìʼ, diʼ be diʼ ə lu ndiʼ gàʼ la, “Mà dìʼ ə mbì be diʼ əbam.”

Klistò fʉ̀ a kə̀ʼ ə̀ Joyn a jòm

⁹ Mà dìʼ Joyn ə lèmə̀ ghə̀ŋ. Vəghəŋ ə viʼi və byɨməvə à Yesò ə tsèntə̀ yenə ngəʼ alì ghaʼa ətyɨm, kə̀ʼtə̀ ə lu ndiʼ a kəshi kə fòyn ə Nyìngòŋ. Və nghʉ̀ mo a fəŋ ə̀ Batmòs byìʼàndo mà ə̀ nshə̀ʼtə̀ ntɨm ə̀ Nyìngòŋ be shə̀ʼtə̀ ənyʉ̀ nəmwèʼè vi a Yesò ə̀ ndiʼi a ndayn. ¹⁰ A ndìʼ a kətsi yì a və ghoʼsə̀ Bobo, kəzhwì kə Nyìngòŋ kə ghaʼ mo; mà zhʉ gɨ̀ ə to tsen gàʼ ə̀ vì fà mò a bàm tò nə̀ ə̀soŋ ¹¹ ə gaʼa la, “Nyòʼo ənyʉ̀ venə a wù yenə lə̀ a tì ŋwàʼlə̀ ə̀ tɨ̀m à ntsèntə̀sə viʼi və byɨməvə shì sòmbo: tɨm a Efesùs, ne Smylna, nə̀ Belgamum, a Tatiliyà, nə̀ Saldìs, nə̀ Fìlàdefìyà bènə̀ a Ladesiyà.”

¹² Mà fuʼtə əyen la à gàʼà ndò à mò lo, ə̀ sə fuʼtə̀ yèn ə nkàʼtə̀ a kwi əfo sòmbo a və ntomtə nkaʼtə tsu mu və shɨ̀tə̀ nə̀ gul a və tomtə̀ ə̀ nkàʼtə̀ yì a kwì. ¹³ A ntìntìn ə̀fo a vyi wìʼ ti tsu to nə̀ Wàyn Wìʼ mu ghə̀ mòʼ dàlə dyèfə nkwiʼ kətəŋ à wen a kədyʉ̀ʼ mu və shɨ̀tə̀ nə̀ gul. ¹⁴ Nyɨŋsə kətʉ ə̀ wìʼ ayì sə fəfə la bʉ, ashɨ ə wen ə bàŋə̀ to nə̀ kəlwàŋ kə zhìʼ, ¹⁵ Aghʉ ə wen ə so to nə̀ kəkas a və nyuʼu a chɨ kə̀ mbuŋ. Gɨ̀ wen kù to nə̀ ə̀fəŋ ə mù mə nghoʼomə̀. ¹⁶ Ghə̀ ə̀ ndìʼ mu ghə̀ ghàʼa mədzɨ̀ŋ la sòmbo a wen ə kəvu kə kwoŋ ə toghə, nyì ngwoləŋ diʼ a ghə̀ fʉ fà wen ə chʉ̀. Əkə̀ʼ ə wen ə baynə to nə̀ əchʉ zhʉ a zhʉ a chwìchwì ə bayn li ntò.

¹⁷ Mà ə̀ nyèn ə wen no a zhʉ̀ kò ə̀ fə̀ŋ à wen a shɨ sə̀ diʼ to nə̀ ə mpfʉ nse. Ghə̀ ghʉ kəvu kəkwoŋ ə toghə wen à mò a kətʉ ə̀ gàʼ la, “Kə a fàyn! mà dìʼi ə mbì be diʼ ə bàm, ¹⁸ be diʼ ə̀ wen yì a ghə̀ diʼi to (tsi). Mà ə mpfʉ li ə̀ bè lù fa pfʉ sə diʼ to ə zaʼa no fa ze. Mà kiʼi àdyoʼ a kətʉ ə pfʉ be a aloʼ viʼi və pfʉkəvə. ¹⁹ Luwèn, nyòʼo ənyʉ̀ a wù yenə, ə̀vi a və fʉ̀ luwèn bènə̀ vi a və ne ə mfʉ̀ ə zìtə̀ fa luwèn. ²⁰ Əvenə diʼ ənyʉ̀ lyomtəvə a və diʼì byìʼì mədzɨ̀ŋ mèn sòmbo a wù yenə à mo kəvu kəkwoŋ ə toghə bènə̀ əfo venə sòmbo a və tomtə̀ ə̀ nkàʼtə̀ tsu lə̀: Mədzɨ̀ŋ mèn sòmbo dìʼi ntsɨ̀ŋsə ngə̀ŋ Nyìngòŋ a aloʼ ntsèntə̀sə viʼi və byɨməvə yi sòmbo, ə̀fo venə sòmbo a və tomtə̀ ə̀ nkàʼtə̀ tsu diʼ aloʼ ntsèntə̀sə viʼi və byɨməvə yi sòmbo.”

Ntɨm à ntsèntə̀ viʼi və byɨməvə a Efesùs

¹ Ghə̀ gàʼ la, “Nyoʼo à ntsɨ̀ŋ ngə̀ŋ Nyìngòŋ a ngə̀ŋ ntsèntə̀ viʼi və byɨməvə a Efesùs la, Ghèn diʼi ntɨm fà wìʼ yì a ghə̀ ghaʼà mədzɨ̀ŋ mì sòmbo à wen ə kəvu kə kwoŋ ə toghə sə jèʼè kaʼa fa tì ə̀fo vi sòmbo a və tomtə̀ ə̀ nkàʼtə̀ tsu mu və shɨ̀tə̀ nə̀ gul lì. ² Mà kɨ əshyèʼ ə̀ ghəŋə. Mà kɨ li ando ghə̀ŋ ə shwèʼè nə̀ kədyoʼkə bènə̀ jì a ghə̀ŋ ə kə̀ʼtə̀ nə̀ tətyɨm tə zhʉtə fa tsu. Mà kɨ la ghə̀ŋ ə ko ghʉ̀sə viʼi tətyɨm tə byɨtə, be mwòmsə dìʼ laynsə viʼi vyi a vəwenə gàʼà la vəwenə diʼ viʼi ntɨm ə̀ Yesò alì kènla vəwenə diʼ ə yen la vəwenə diʼ viʼi ə ndzɨ̀ŋsə. ³ Mà kɨ la ghə̀ŋ kwiʼi tətyɨm mu ghə̀ŋ be yèn ə ngəʼsə byìʼì mò no sə ghoʼo, kènla ghə̀ŋ ə bwaʼkə li, ⁴ alì mà ghàmə̀ ghə̀ŋ a kənyʉ̀ kènkə kə mùʼ lə, la ghə̀ŋ ko bè kòŋə̀ mò ando ghə̀ŋ tə nkòŋə̀ fa mbì. ⁵ Ghə̀ŋ kwoʼtə jì a ghə̀ŋ ə̀ ndìʼ fa tsu a mbì mibu ə fəŋ, ə̀ kwitə tətyɨm ə təŋtə fà ghə̀ŋ ənyʉ̀ byɨvə nshyèʼè ando ghə̀ŋ ə̀ nshwèʼè a mbì. Ghə̀ŋ sətsèn ə̀ fàŋ ke kwitə tətyɨm ə təŋtə fà ghə̀ŋ ə mbyɨsə, mà à vì ə̀ lyèsə̀ kəfo kəŋkə̀ kì a və shɨtə̀ sə tomə kənkàʼtə̀ à yi kətʉ lì fà yi kəshi. ⁶ Kənyʉ̀ a ghə̀ŋ ə nè a kə bòŋə̀ à mò dìʼ la ghə̀ŋ ə bàynə̀ ənyʉ̀ tsenəvə a nkàyntə̀ mo ə bè bàynə̀. Ənyʉ̀ a vyi diʼ ənyʉ̀ a ndzɨ̀mtə̀sə bàm ə̀ Nikolawus sə nè. ⁷ A ə ntofə tè ndò ghə̀ tùʼù zhʉ̀tə kənyʉ̀ kì a kəzhwì kə ŋwoʼəkə gàʼà à ntsèntə̀sə viʼi və byɨməvə! A sətsèn ə̀ soyn ə̀ zhɨ̀ tè ndò ə̀ zhɨ mbyɨ, mà à nè ghə̀ zhɨ əshɨ fəkòʼ fì a fə ku ə̀bwòŋ a fə kwi a tì sɨm ə̀ Nyìngòŋ.”

Ntɨm à ngə̀ŋ ntsèntə̀ viʼi və byɨməvə a Smylna

⁸ Ghə̀ bè gàʼ la, “Nyoʼo à ntsɨ̀ŋ ngə̀ŋ Nyìngòŋ a ngə̀ŋ ntsèntə̀ viʼi və byɨməvə a Smylna la: Ghèn dìʼ ntɨm fà wìʼ yì a ghə̀ dìʼ ə mbì be diʼ ə̀ bàm, wìʼ yì a ghə̀ mpfʉ ə̀ bè bwènsə̀ lù fa pfʉ. ⁹ Mà kɨ ngəʼsə shìsə a ghə̀ŋ ə yenə. Mà kɨ la ghə̀ŋ ə femə alì diʼ viʼi vəghoʼ kəvə a kəzhwì. Mà kɨ ənyʉ̀ byɨvə a viʼi a və lyɨ̀ la vəwenə diʼ vəjew alì kèn la vəwenə ghʉ tə ziʼi tə viʼi Jus ə gàʼà byìʼì ghə̀ŋ. Vəwenə diʼ viʼi ə nòyn ə̀ Satan. ¹⁰ Ghə̀ŋ zhʉtə a! Kə ghə̀ŋ à fàyn ə̀ ngəʼ yì a ghə̀ŋ diʼi ne kwen tsu. Deblə̀ ne nè la və ghaʼ ghə̀ŋ vətsenvə we a mfɨŋ ə ghə̀ŋ yenə ngəʼ tsu a mətsi wum, à dìʼ tò mwòmsə̀ a ghə̀ vì à ghə̀ŋ. Və ndiʼ zhwi ghə̀ŋ tè zhwi, ghə̀ŋ ə nchoʼsə̀ tò mò, mà nè ku ə̀bwòŋ yi a ghə̀ ko lu mè à ghə̀ŋ a diʼ kəfo kì a ghə̀ŋ ə soynə zhɨ. ¹¹ No ndo a ghə̀ tofə ghə̀ tùʼù zhʉtə kənyʉ̀ kì a kəzhwì kə ŋwoʼəkə gàʼà à ntsèntə̀sə viʼi və byɨməvə. No ndò a ghə̀ ə soynə ə̀ zhɨ, kò ghə̀ bè lù pfʉ̀ kənkùmtə̀ kə pfʉ a tʉʼ a Nyìngòŋ ə lu soʼ viʼi”.

Ntɨm à ntsèntə̀ viʼi və byɨməvə a Belgamum

¹² Ghə̀ bè gàʼ à mò la, Nyoʼo à ntsɨ̀ŋ ngə̀ŋ Nyìngòŋ yì a ghə̀ diʼì a ntsèntə̀ viʼi və byɨməvə a Belgamum la: Ntɨm ghèn lù fà wìʼ yì a ghə̀ ə kiʼì nyì ngwoləŋ ə lyɨmə lì. ¹³ Mà kɨ kəshi kì a ghə̀ŋ ə tsi tsu. Ghə̀ŋ ə tsi a kəshi a Satan ə soʼo əfòyn ə wen tsu. Ghə̀ŋ dìʼ no nkàyntə̀ viʼi ə vwomə, kènla ghə̀ŋ ə̀ ntɨmə̀ màʼà əbyɨmə à ghə̀ŋ ə kiʼì mò no kətsi kətsenkə. Ghə̀ŋ ə shɨ̀tə̀ ghaʼa əbyɨmə ghəŋə no tè ando və̀ nzhwì Antipàs ə ndzɨ̀mtə̀ bàm ə̀ mò afì à diʼ kəshi a Satan ə soʼo əfòyn ə wen tsu. ¹⁴ Alì, ənyʉ̀ ə diʼ ə̀ shyə̀ʼ alə̀ a mà ghàmə̀ ghə̀ŋ tsu: Ghə̀ŋ vətsenvə dzɨ̀mtə̀ əziʼi Balàm a ghə̀ ə̀ ndìʼsə̀ Balak, ghə̀ sə nè la viʼi Islel ə nzhɨ ə̀fo a və moʼò à vənyìngòŋ be tsi nə̀ ki ko wenə̀ lʉmə a ko kiʼ vəwenə. ¹⁵ Viʼi vətsenvə bè dìʼ à ghə̀ŋ ə ntìntìn a vəwenə dzɨ̀mtə̀ əziʼi Nikolawus. ¹⁶ Ghə̀ŋ kaʼsə tətyɨm ə təŋtə fà ghə̀ŋ ə mbyɨsə luwèn a bwen a lì, kò kəghaf kə à dyʉ̀ ke mà vi a kəshi yì a ghə̀ŋ ə diʼì tsu ə̀ sòyn viʼi a vyi nə̀ nyì ngwoləŋ a ghə̀ fʉ̀ fà mò a chʉ̀.

¹⁷ No ndò a ghə̀ kiʼi ətiʼitiʼi, ghə̀ tùʼù zhʉ̀tə kənyʉ̀ kì a kəzhwì kə ŋwoʼəkə gàʼà à ntsèntə̀sə viʼi və byɨməvə. No ndò a ghə̀ soyn ə̀ zhɨ mbyɨ, mà à kù ə̀fo zhɨvə lyomtəvə tsenəvə à wen a və dzàŋə̀ nə̀ manà. Mà be nè ku ngùʼ fəfə à no ndò mu və nyòʼò li əzhiʼ fighə tsu a no wìʼ ko kɨ əchò to wìʼ a ghə̀ shi ngùʼ ayì.

Ntɨm à ntsèntə̀ viʼi və byɨməvə a Tatiliyà

¹⁸ Nyòʼo à ntsɨŋ ngə̀ŋ Nyìngòŋ a ghə̀ ə diʼì ntsèntə̀ viʼi və byɨməvə a Tatiliyà la:

Ghèn dìʼ ə ntɨm a ghə̀ lù fà wàyn Nyìngòŋ yì a ashɨ wen ə bàŋə̀ to nə̀ kəlwàŋ kə zhìʼ, aghʉ wen ə so to nə̀ kəkas a və buŋsə̀ a chɨ. ¹⁹ Mà kɨ ənyʉ̀ a ghə̀ŋ ə nè, kɨ ə̀kòŋ yi a ghə̀ŋ ə kiʼì be kɨ əbyɨmə ghəŋə, kɨ ando ghə̀ŋ ə shyèʼè à viʼi vətsenvə bènə̀ ə̀ ghaʼa ə tyɨm ghəŋə. Ghə̀ŋ ə shwèʼè luwèn chò ando ghə̀ŋ tə shyèʼè a mbì. ²⁰ Alì mà ghàmə̀ ghə̀ŋ to kənyʉ̀ kènkə kə mùʼ: la ghə̀ŋ ə ghʉsə li wùwì ghèn ə Jezebel a ghə̀ gàʼà la yì dìʼ ə nshə̀ʼtə̀ ghoʼo, ghə̀ sə lobtə̀ viʼi shyèʼ mò la vəwenə ntsi nə̀ ki ko nə̀ lʉmə à ko kiʼ vəwenə. Ghə̀ be nè la vəwenə nzhɨ ə̀fo zhɨvə a və moʼò vənyìngòŋ tsu. ²¹ Mà tə kù əzhʉ à wen la ghə̀ kwitə tyɨm ə wen ə̀ ghʉ̀sə mbyɨsə wensə, alì ghə̀ ko kòŋ əghʉsə ntsìnə̀ dzɨ̀mtə̀ lʉmə. ²² Mà a ne ghə̀ kwaʼa ə̀ nyə̀ŋmə̀ fàŋ a kukwen. Mà a ku ngəʼ ghoʼo à viʼi vyi a və tə ntsi nə̀ wen a zhʉ a vəwenə fàŋ ke kwitə tətyɨm tə vəwenə fa ənyʉ̀ byɨvə avenə a wenə̀ vəwenə nè lə̀. ²³ Mà ne zhwilə viʼi vì a və dzɨ̀mtə̀ ntsìnə̀ wen ə ntsèntə̀sə viʼi və byɨməvə no sətsèm ə kɨ la mà dìʼ wìʼ yì a ghə̀ kɨ təkwòʼtə̀ tə viʼi bènə̀ ənyʉ̀ a vəwenə kòŋə̀ ənè. Mà ne lòʼ no ndò fà ghə̀ŋ ə ntìntìn to a jì a ghə̀ tə nshyèʼè fa tʉ.

²⁴ Ghə̀ŋ vətsenvə diʼ a Tatiliyà a ghə̀ŋ tyen li təziʼi tə byɨtə a tèntə, ghə̀ŋ ko ziʼi ənyʉ̀ vyi a viʼi vətsenvə dzàŋə̀ nə̀ ənyʉ̀ lyomtəvə Satan. Mà sə gàʼà à ghə̀ŋ la mà ko be a ku kəbyèʼè kətsenkə à ghə̀ŋ. ²⁵ Mà gàʼà tò la ghə̀ŋ ə nshɨ̀tə̀ nè tò kənyʉ̀ a ghə̀ŋ tə nè əzaʼa azhʉ a mà bwènə̀ vì. ²⁶ No ndò a ghə̀ ne soyn ə zhɨ mbyɨ be ə nè əshyèʼ ghomə zaʼa fa kəmwètə, ma ku àdyoʼ à wen ə ghə̀ nsoʼo viʼi mbyi venə. ²⁷ Ghə̀ ne ə nsoʼo viʼi təloʼ a tèntə nə̀ àdyoʼ a mà ə ku à wen à diʼ ndə̀ŋndəŋ àdyoʼ a mà nshì fà Tìʼ ghom. Ghə̀ ne bvùsə̀ vəwenə tò ando və bvùsə̀ vəntòyn və kətsoʼ. ²⁸ Mà be ne ku fədzɨ̀ŋ fə tsi boʼo ngə̀ŋ à wen. ²⁹ No ndò a ghə̀ kiʼi ətiʼitiʼi, ghə̀ ə ntùʼù zhʉtə̀ kənyʉ̀ a kəzhwì kə ŋwoʼəkə gàʼà à ntsèntə̀sə viʼi və byɨməvə.

Ntɨm à ntsèntə̀ viʼi və byɨməvə a Saldìs

¹ Nyòʼo à ntsɨ̀ŋ ə̀ ngə̀ŋ Nyìngòŋ a ghə̀ diʼì a ntsèntə̀ viʼi və byɨməvə a Saldìs la:

Wìʼ yì a ghə̀ kiʼì əzhwi ə Nyìngòŋ vi sòmbo be kiʼ mədzɨ̀ŋ mì sòmbo gàʼ la, Mà kɨ əshwèʼ ghəŋə. Viʼi ə yenə ghə̀ŋ la ghə̀ŋ dìʼ vəto, alì mu ghə̀ŋ ə pfʉkə li kəzhwì. ² Ghə̀ŋ lukə lì fa mbəynsə ntùʼmə̀ nə̀ əbyɨmə tyetə yi a ghə̀ŋ bù kiʼi, a bwen a lì mu ghə̀ŋ a myètə pfʉkə byìʼàndo mà yen li la əshwèʼ ghəŋə ko kwʉ̀ʼ a shɨ Nyìngòŋ ghom. ³ Ghə̀ŋ bwensə̀ kwòʼtə̀ ənyʉ̀ vyi a və ndìʼsə̀ ghə̀ŋ tsu bènə̀ ə̀vi a ghə̀ŋ ə̀ nzhʉ. Ghə̀ŋ kwitə tətyɨm ə təŋtə fà ghə̀ŋ ə mbyɨsə nè ənyʉ̀ a vyi. Ghə̀ŋ sətsèn ə̀ fàŋ ke lùkə̀, mà bvʉ̀tə̀ vì à ghə̀ŋ tò nə̀ tsòŋ kèn la ghə̀ŋ a kɨ zhʉ a mà vì.

⁴ Alì viʼi vətsenvə bù dìʼ tò və tyetə a Saldìs a vəwenə ghʉ ə̀ ndisə vəwenə sə̀ laynə. Vəwenə lu mòʼ ə ndisə fəfəsə yo vəwenə njèʼè a muʼu byìʼàndo vəwenə layn li ə nkwʉʼ. ⁵ Və lu lafsə no ndò yì a ghə̀ lu soyn ə̀ zhɨ mbyɨ nə̀ ndisə fəfəsə, ko ndiʼ la mà lu tsəʼsə̀ zhiʼ ə wen fa ŋwàʼlə̀ ə̀bwòŋ. Mà lu tɨmə gàʼ to ndayn la mà kɨ wen a shɨ Tìʼ ə ghom wenə̀ ntsɨ̀ŋsə wen.

⁶ “A nkiʼ tè ndò kiʼ ətiʼitiʼi, ghə̀ tùʼù zhʉ̀tə kənyʉ̀ kì a kəzhwì kə ŋwoʼəkə gàʼà à ntsèntə̀sə viʼi və byɨməvə.”

Ntɨm à ntsentə̀ viʼi və byɨməvə a Fìlàdefìyà

⁷ “Nyòʼo à ntsɨ̀ŋ ə̀ ngə̀ŋ Nyìngòŋ yì a ghə̀ diʼì a Fìlàdefìyà la: ənyʉ̀ venə gàʼ wìʼ yì a ghə̀ ŋwòʼə̀, diʼ nəmwèʼè be kiʼ kənzàs kə ngə̀ŋ fòyn Devìt a ghə̀ sətsen ə bòʼò kò ndiʼ la wìʼ zi ghə̀ shwìnə̀, be shwìnə̀ ko ndiʼ la zi ghə̀ bòʼò. ⁸ Mà kɨ təshyèʼ ə təŋtə. Ghə̀ŋ yen a! mà bòʼò li əchʉ ngə̀ŋ ə nghʉsə à ghə̀ŋ a wìʼ ko zì ghə̀ shwin. Mà kɨ la ghə̀ŋ ə ko tùʼù kiʼ kədyòʼ alì ə nghʉ ə̀soʼ ə ghomə kèn la ghə̀ŋ ə tyen li mò. ⁹ Ghə̀ŋ zhʉtə a! mà a nè viʼi ntsèntə̀ Satan vi a və jèʼè lobtə̀ gàʼà la vəwenə diʼ vəjew lì, ə vəwenə vi ə̀ làŋtə à ghə̀ŋ a shɨ ə̀ yèn la mà kòŋə̀ ghə̀ŋ. ¹⁰ Mà ne bwòŋsə ghə̀ŋ fa zhʉ ə ngəʼ yì a ghə̀ vì à mbi ə̀ tsèm ə mwòmsə viʼi vyi a və tsi a kwi nse byìʼàndo ghə̀ŋ ə zhʉ li kənyʉ̀ kì a mà ə gàʼà la, ghə̀ŋ ə wensə. ¹¹ Mà sə̀ laʼtə̀ ə bwènə̀ vì, ghə̀ŋ tuʼù ə̀ ghàʼ tò əziʼi yi a ghə̀ŋ sə̀ kiʼ ndi kə wìʼ lù sòʼ əmoʼtə ghəŋə. ¹² A lù soyn ə̀ zhɨ̀ tè ndò ə̀ zhɨ ə mbyɨ, mà lù nè ghə̀ ə ndiʼ a nə̀ ntom a ngə̀ŋ ə̀ Nyìngòŋ ghom ko ndiʼ la ghə̀ be a fʉ̀ fa tsu. Mà lu nyòʼ əzhiʼ ə Nyìngòŋ ghom à wen ə wèn ə be nyòʼ əzhiʼ ə ntə̀ʼ ə ghoʼo ə̀ Nyìngòŋ ə̀ ghom à diʼ kəshi a viʼi və byɨmə və no vətsèm ə lu ntsi a kə shiʼi vì fà Nyìngòŋ ə̀ ghom a kàŋ. Mà be lu nyòʼ əzhiʼ ghomə fighə à wen ə wèn. ¹³ A nkiʼ tè ndò kiʼ ətiʼitiʼi, ghə̀ tùʼù zhʉ̀tə kənyʉ̀ kì a kəzhwì kə ŋwoʼəkə gàʼà à ntsèntə̀sə viʼi və byɨməvə.”

Ntɨm à ntsèntə̀ viʼi və byɨməvə a Ladesiyà

¹⁴ Ghə̀ bè gàʼ à mò la, “Nyòʼo à ntsɨ̀ŋ ə̀ ngə̀ŋ ə̀ Nyìngòŋ yì a ghə̀ ə diʼì a ntsèntə̀ viʼi və byɨməvə a Ladesiyà la: Ghèn diʼ ə ntɨm a ghə̀ lu fà wìʼ yì a dzàŋə̀ nə̀ Amèyn, à diʼ ə̀ wen diʼ wu jùŋ yì a diʼì wu yen nəmwèʼè byìʼì Nyìngòŋ. Nyìngòŋ ə̀ nshɨ̀tə no ghò a mbi ə chò fà wen. ¹⁵ Mà kɨ təshyèʼ ə̀ təŋtə. Mà kɨ la ghə̀ŋ ə ko lɨ̀mə̀ kò ndiʼ la ghə̀ŋ ə zhʉ̀ à ghə̀ŋ ə byɨmə. Kə yì bòŋ la ghə̀ŋ ə nlɨ̀mə̀ ko ə nzhʉ̀. ¹⁶ Ando ghə̀ŋ diʼ to nə̀ mù a mə ko lɨmə ko mə zhʉ̀ lì, mà a chʉ ghə̀ŋ fà mò əchʉ̀. ¹⁷ Ghə̀ŋ ə gàʼà la ghə̀ŋ kiʼi ə ko be diʼ mu ghə̀ŋ ə ghoʼ li ə̀ nkwʉʼ kèn la ghə̀ŋ ə bè gho kəfo. Ghə̀ŋ alì kò ghə̀ŋ lu kɨ la nəmwèʼè dìʼ la ghə̀ŋ dìʼ nji əfo, diʼ tò a nshinsə a nshinsə, femə, diʼ ənfyɨf, be diʼ tò ənàʼ à ntsuʼ. ¹⁸ Mà mù sə tyɨftə ghə̀ŋ la ghə̀ŋ zen ə nkàyntə̀ gul fà mò ndi ə ndiʼ viʼi ə ko ə̀ bè zèn vədàlə və fəfəvə mòʼ chiʼtə təwen ə təŋtə tsu ndi ə lyòmtə̀ kətʉ kə diʼikə kì a ghə̀ŋ kiʼi byìʼì ənàʼ ntsuʼ ə vəŋə. Ghə̀ŋ be zèn kəfʉ ə̀ wè à ghə̀ŋ əshɨ ndi ə be ə nyenə əshi ¹⁹ Mà kəŋkə̀ be ku ngəʼ à viʼi vi a mà ə kòŋə̀. Ghə̀ŋ ə nlɨ̀mtə̀ ə̀ bè kwitə tətyɨm ə təŋtə fà ghə̀ŋ ə mbyɨsə. ²⁰ Ghə̀ŋ zhʉtə a! Mà ti a chʉ ə ngə̀ŋ kùmtə̀, mu à zhʉ̀ tè ndò ə̀ zhʉ̀ gɨ̀ ghom ə̀ bòʼ, mà à kwen ə̀ vì yo wen ə ndiʼ a kənyʉ̀ kə mùʼ be zhɨ a muʼu. ²¹ No ndò a ghə̀ nè soyn ə̀ zhɨ mbyɨ, ma nè ghə̀ ŋwʉʼʉ ə̀ boʼsə kəfwoyn ə komkə ando nkàyntə̀ mò sə̀ diʼ mu mà ə nsoyn li ə̀ zhɨ mù sə̀ ŋwʉʼ boʼsə kəfwoyn kə Tìʼ ə ghom. ²² No ndò a ghə̀ kiʼì ətiʼitiʼi, ghə̀ tùʼù zhʉ̀tə kənyʉ̀ kì a kəzhwì kə ŋwoʼəkə gàʼà à ntsèntə̀ viʼi və byɨməvə.”

Joyn yen ando və ghoʼsə̀ Nyìngòŋ a kàŋ

¹ A ndìʼ ando ənyʉ̀ venə̀ ncho, kənyʉ̀ kə bè fʉ̀ à mò a kə̀ʼ a nə̀ jòm. Mà yen əchʉ ə ngə̀ŋ ə̀ kàŋ ə̀ boʼo. Gɨ̀ ə̀ mbì yì a mà yì zhʉ ndiʼ gɨ Yesò Klistò ghə̀ gàʼà à mò kù to nə̀ ə̀soŋ bè gàʼ a mò la, “Kuʼ ə̀ vì ashyə̀ mà diʼ kənyʉ̀ kì à wù a kə diʼ ə lyɨ̀ kəshi fa bàm ənyʉ̀ venə.” ² Tò a zhʉ ayì, kəzhwì kə ŋwoʼəkə vì à mò Joyn, mà yen kəfwoyn a kàŋ wìʼ ŋwʉʼ tsu, ³ əkə̀ʼ ə wìʼ ayì so to nə̀ ngùʼ jaspa nə̀ ngùʼ kaneyan. Kəmpfembiʼ kə ndiʼ mu kə nyɨŋ li ə̀ kaʼ kəfwoyn a kì, be so to nə̀ ngùʼ emelald. ⁴ Əfwoyn ə tsenəvə ndìʼ njʉ̀sə̀ kàʼ a məwum ə̀ mbò mu və nyɨŋ li ə̀ nkaʼ kəfwon kì, vəchəʼ njʉ̀sə̀ kàʼ a məwum ə̀ mbò ŋwʉʼ tsu mu vəwenə mòʼ vədàlə və fəfəvə nchiʼ təsòʼ mu və shɨ̀tə̀ nə̀ gul à vəwenə tʉ. ⁵ Əghʉ mwàntə̀, bwankə̀, gɨsə be fʉ vì fa kəfwoyn kə ghoʼokə kì. Ə̀ nkàʼtə̀ ə̀ mbaynə fa mbì kəfwon ayì sòmbo, andiʼ əzhwi ə Nyìngòŋ ə̀ sòmbo. ⁶ Andìʼ a lì mo be diʼ a mbì kəfwoyn akì baynə to nə̀ awoŋ.

Ə̀fo zhwisəvə tsenəvə ndìʼ ə̀kàʼ ə̀kàʼ no təshyə tə kəfwon tətsèm kiʼ ashɨ à vəwenə no ghoʼo fa bàm bènə̀ fa mbì. ⁷ Mbì kəfo kə zhwisəkə nkə̀ʼə̀ to nə̀ abìkəŋ, kənkùmtə̀ kə kə̀ʼə̀ to nə̀ mbòŋmbòŋ, kətsenkə kiʼ əkə̀ʼ ə wìʼ, kə bàm kə diʼ to nə̀ bole mbʉʼ ə tàynə. ⁸ Əfo avenə no tsèm ə̀ nkìʼ təvò ə̀ ntʉ̀fəntʉ̀fə, kiʼ ashɨ tò ə̀wen ə̀ tsèm nə̀ à vəwenə tì wèn. Vəwenə nzhɨmə ndzàŋsə tò məzhʉ̀ ntsèm, zhɨmə nəntʉʼʉ nə̀ nə̀nchwì la, “Wu ŋwoʼə, wu ŋwoʼə, wu ŋwoʼə dìʼ tìʼ àdyoʼ ə̀ tsèm, Ghə̀ ə̀ ndìʼ, diʼ luwèn be diʼ ə lu vì!” ⁹ Ə̀fo zhwisəvə avenə nzhɨmə ndzàŋsə ku əghoʼsə, nə̀ gumlə bènə̀ kəzòŋ à wìʼ yì a ghə̀ ŋwʉʼ a kəfwoyn yì, ə̀wen yì a ghə̀ diʼì no məzhʉ ə̀ ntsèm. ¹⁰ Vəwenə nzhɨmə a lì no zhʉ kò, vəchəʼ vi njʉ̀sə̀ kàʼ a məwum ə̀ mbò laŋtə̀ a shɨ wìʼ yì a ghə̀ ŋwʉʼ a kəfwoyn lì ghoʼsə̀ wen yì a ghə̀ ə diʼì no məzhʉ ə̀ ntsèm. Vəwenə mbe tsuʼtə̀ təsòʼ tə təfòn ə̀ vəwenə tì mòʼò a mbì kəfwon kì zhɨmə ndzàŋ la, ¹¹ “Bobo ə Nyìngòŋ ə̀ yes, wù kwʉʼ li ə və əghoʼsə nə̀ gumlə be bwomsə̀ wù a kədyòʼ a wu kiʼì, byìʼàndo wù ə̀ nshɨtə fò tsèm ə̀ bè ə̀ nè la və ndiʼ ə̀ to.”

Wàyn njɨ̀ nə̀ ŋwàʼlə̀ ə lemtə

¹ Mà bè yèn əbʉʼ ŋwàʼlə̀ a və lèmə̀ a kəvu kə kwoŋ ə toghə wìʼ yì a ghə̀ ə̀ ŋwʉʼ a kəfwon lì mu və nyòʼò li tsu no məshyə̀ ə̀ ntsèm. Əbʉʼ ŋwàʼlə̀ ayi ə̀ ndìʼ mu və shwinə̀ li nə̀ mɨ̀ŋ ə̀ shi sòmbo fà yi təchʉ̀. ² Mà yen ə ntsɨ̀ŋ ə̀ ngə̀ŋ Nyìngòŋ ə ghoʼo tsen ghə̀ kiʼ àdyoʼ no ghoʼo, ghə̀ zɨmə̀ gàʼà la, “A kwʉ̀ʼ ndò ə me əbə̀ytə mɨ̀ŋ ghèn ə bòʼ ŋwàʼlə̀ ghèn a?” ³ Alì wìʼ ə̀ nko diʼ a kàŋ ko a nse ko a loʼ ə vəmpfʉ və nse a ghə̀ nzì ghə̀ boʼ ŋwàʼlə̀ ayì ə̀ lye tin ə̀ yi. ⁴ Mo Joyn dì no mwèʼè mwèʼè, byìʼàndo və nko yèn wìʼ a ghə̀ ə kwʉʼ mè əbòʼ ŋwàʼlə̀ ayì ko ə lye tin ə̀ yi. ⁵ Chəʼ tsen gàʼ à mò la, “kə be dì byìʼàndo abìkəŋ ə̀ ngwaʼa ngə̀ŋ ə Judà a diʼì wàyn Devìt ə soyn li ə̀ zhɨ mbyɨ sə diʼ ə bə̀ytə mɨ̀ŋ ghèn ə̀ shi sòmbo lə̀ əbòʼ əbʉʼ ŋwàʼlə̀ ghenə.”

⁶ Mà yen Bobo Yesò Klistò a ghə̀ ndi to wàyn bi ənjɨ̀, ghə̀ ti a kəshi yì a kəfwon kì ə̀ nti tsu lì mu ə̀fo zhwisəvə vi nə̀ vəchəʼ vi ə nyɨŋ li ə nkaʼ wen. Wàyn bi ənjɨ̀ ayì ə̀ nkìʼ ə ndoŋsə sòmbo bènə̀ ashɨ sòmbo andiʼ əzhwi ə Nyìngòŋ sòmbo a ghə̀ ə̀ ntɨmə̀ a mbi ə̀ tsèm. Wàyn ə̀ bi njɨ̀ ayì ə̀ nkə̀ʼə̀ tò sə və shyə li. ⁷ Wàyn bi njɨ̀ ayì dyʉ̀ ə̀ shì əbʉʼ ŋwàʼlə̀ yi fa kəvu kə kwoŋ toghə wìʼ yì a ghə̀ ə̀ ŋwʉʼ a kəfwon lì. ⁸ A ə̀ ndìʼ ando ghə̀ ə̀ nshi əbʉʼ ə ŋwàʼlə̀ ayi, ə̀fo zhwisəvə vi ə̀ kàʼ nə̀ vəchəʼ vi njʉ̀sə̀ kàʼ a məwum ə̀ mbò fəŋkə à wen ə shɨ. No ndò ə̀ nkìʼ əlyuŋ nə̀ kəkaŋ kə a və shɨtə̀ nə̀ gul mu kələŋ kə lwin li tsu à diʼ təjɨ̀m tə viʼi və byɨməvə. ⁹ Vəwenə sə̀ zhɨmə ndzàŋ ə fi la, “Wàyn njɨ̀, wù ə kwʉʼ li ə̀ me əshi əbʉʼ ə ŋwàʼlə̀ ghenə ə bə̀ytə mɨ̀ŋ yi ə bòʼ byìʼe və nzhwi li wù, wù pfʉ ə̀ zèn kətʉ kə viʼi ə ngwàʼsə̀ tsèm nə̀ viʼi təgàʼ tə tsèm bènə̀ viʼi təloʼ tə tsèm a mbi. Wù ə̀ nzèn kətʉ kə vəwenə ne mənlyuŋ ə̀ bwènsə̀ ku à Nyìngòŋ. ¹⁰ Wù ə ne li vəwenə sə diʼ vunə ngwàʼ ə̀ vəchəʼ və ngə̀ŋ ə̀ Nyìngòŋ a və shyèʼè à Nyìngòŋ ə̀ vəghəŋ. Vəwenə lu soʼ ə mbi ghèn.”

¹¹ Mà bè sə ki ə̀ yèn ə ntsɨ̀ŋsə ngə̀ŋ ə̀ Nyìngòŋ və taŋə lè, ando sə tɨmə̀ ə̀ kaʼ kəfwon kì əboʼsə nə̀ ə̀fo zhwisəvə vi bènə̀ vəchəʼ vi. ¹² Vəwenə nzhɨmə ndzàŋ no a gɨ to la, “Wàyn bi ənjɨ̀ a və̀ nzhwi ə kwʉʼ li ə̀ me əkiʼi kədyòʼ nə̀ əghoʼ, nə̀ ətof, nə̀ gumlə, nə̀ əghoʼsə bènə̀ ə mbwaʼmə̀.” ¹³ Mà zhʉ no tè ghò a ghə̀ diʼì a kàŋ nə̀ a nse nə̀ a loʼ ə̀ vəmpfʉ və nse nə̀ a mù mə nghoʼomə̀ bènə̀ a mbi ə̀ tsèm zhɨmə la, “Ə wen yì a ghə̀ ŋwʉʼ a kəfwon bènə̀ wàyn bi ənjɨ̀, və diʼ əbwaʼsə̀ ghə̀ŋ, gumlə̀ ghə̀ŋ, ghoʼsə̀ ghə̀ŋ nə̀ kədyòʼ no məzhʉ ə̀ ntsèm.” ¹⁴ Ə̀fo zhwisəvə vi ə̀ kàʼ gàʼ la, “Amèyn” Vəchəʼ vi fəŋkə a nse ə̀ ghoʼsə Nyìngòŋ wenə̀ wàyn bi ənjɨ̀ a ndiʼ Yesò Klistò lì.

Vəmɨ̀ŋ vi sòmbo

¹ A ə̀ ndìʼ tò a zhʉ aghèn, mà yen ando wàyn bi ənjɨ̀ ə bɨtə̀ mbì mɨ̀ŋ fa tì vəmɨ̀ŋ vi sòmbo. Mà zhʉ ando kəfo kə zhwisəkə kətsenkə fa tì ə̀fo zhwisəvə vi ə̀ kàʼ ə bwankə̀ to nə̀ ghʉ ə̀ gàʼ la, “fʉ̀ ə̀ vì!” ² Mà sə ki ə̀ yèn əlyəŋ ə fəfəghə tsenghə, wìʼ diʼ à yi kətʉ kiʼ fənchyə. Və ku ə̀sòʼ ə təfòyn à wen, ghə̀ nyɨŋ ə̀ fʉ̀ to nə̀ wìʼ a ghə̀ lu ə ntemə ghoŋ zhɨ tò zhɨ be diʼ ə tem ə zhɨ.

³ Wàyn bi ənjɨ̀ yì bè bə̀ytə̀ mɨ̀ŋ ə tsen no ə zhʉ kò mà bè zhʉ ando kənkùmtə̀ kəfo zhwisəvə vi ə gaʼà la, “fʉ ə̀ vì!” ⁴ əlyəŋ ə tsenghə bè fʉ̀ bàŋə̀ la bùŋ. Və ku kədyòʼ bènə̀ nyì ə̀ ngwələŋ ə dyèfə à wìʼ a ghə̀ ə̀ ŋwʉʼ à yi kətʉ la ghə̀ ə nsə̀ʼə̀ əghoŋ a mbi ndi viʼi ə nzhwilə̀ vəlèmə̀ və vəwenə.

⁵ A ə̀ ndìʼ ando ghə̀ bè ə̀ mbə̀ytə̀ mɨ̀ŋ tsen ə və ndiʼ vətaʼ, mà bè zhʉ ando kəfo kə zhwisəkə kətsenkə gaʼà la, “fʉ̀ ə̀ vì!” Mà sə ki ə̀ yèn əlyəŋ ə fenəghə mu wìʼ a ghə̀ ə̀ nyɨŋə à yi kətʉ ghaʼ li vəkilò və bò à wen ə kəvu. ⁶ Mà zhʉ gɨ̀, ghə̀ gàʼa to nə̀ gɨ̀ wìʼ fa ntìntìn ə̀fo vi ə̀ kàʼ la, “Əko shyèʼ ə kətsi kə mpfen ne kwʉ̀ʼ əzen tò kilò to kəbayn a və bvu fa wit muʼ ko əzen vəkilò və kəbayn a və bvu fa balley vətaʼ, alì kə a kùm məzhiʼ nə̀ məlyʉ̀ʼ.”

⁷ Wàyn bi ənjɨ̀ yì bè bə̀ytə̀ mɨ̀ŋ ə tsen ə və ndiʼ vəkàʼ. Mà zhʉ kəmwètə̀ kə kəfo kə zhwisəkə kə gàʼ la, “Fʉ̀ ə̀ vì!” ⁸ Mà sə ki ə̀ yèn əlyəŋ tsenghə ghə̀ lyìʼlə̀ kə̀ʼə̀, əzhiʼ wìʼ a ghə̀ ə̀ ndìʼ à yi kətʉ ə̀ ndìʼ Əpfʉ. A ə̀ ndìʼ a lì, əloʼ vəmpfʉvə nse dzɨ̀mtə̀ vì fa bàm. Və ku kədyòʼ la ə̀fo avenə gətə nse məshyə̀ ə̀ nkàʼ, ə̀ lyɨ̀ əshyə̀ mùʼ zhwilə viʼi vyi a və diʼ tsu nə̀ nyì ngwələŋ, nə̀ jɨ̀ŋ ə byɨ, nə̀ təkwaʼa tə fansətə. Nyamsə tətoʼ be zhwilə̀ vətsenvə.

⁹ Wàyn bi ənjɨ̀ bè bə̀ytə̀ mɨ̀ŋ tsen ə və ndiʼ vətàyn, mà yen ə̀ zhwì ə viʼi vyi a və̀ nzhwilə̀ byìʼàndo vəwenə nshə̀ʼtə̀ kənyʉ̀ kə Nyìngòŋ be ti a nə̀ viʼi və yenəvə a kənyʉ̀ ə̀ Nyìngòŋ. Vəwenə ndìʼ ati kəchiʼ kə kəku. ¹⁰ Əzhwi a vyi zɨmə̀ gàʼà no a gɨ to la, “Bobo a ghə̀ kiʼi àdyoʼ ə̀ tsèm, ŋwòʼə̀ be diʼ nəmwèʼè, kə a lyɨ̀ ə zhʉ ale ə wù soʼ viʼi venə a nse ə ku ngəʼ à vəwenə ando vəwenə tə zhwì yes a?” ¹¹ Və mù kù vədàlə və fəfəvə à vəwenə no vətsèm ə̀ gàʼ à vəwenə la vəwenə be zhʉ̀tə̀ fəshitə̀ ə zaʼa a zhʉ a viʼi a vyi ne be zhwilə vəlèmə̀ vəŋə vi a wenə̀ vəwenə tə̀ ndiʼ ghə̀ŋ və wenə mu kuʼ a muʼu kuʼ ə̀ kwʉ̀ʼ.

¹² A ə̀ ndìʼ ando ghə̀ ə̀ mbə̀ytə̀ mɨ̀ŋ ə tsen ə və ndiʼ ə̀ ntʉfə, mà sə ki ə̀ yèn ando pfèn ə fànsə shenə ə̀ bè yèn ando chʉzhʉ ə kaʼkə̀ sə fenə to nə̀ fənchì fə di əpfʉ, sàŋ bè kaʼkə sə bàŋə̀ to nə̀ mənlyuŋ, ¹³ mədzɨ̀ŋ mə̀ kàŋ fəŋkə̀ a nse to nə̀ ə fəkoʼ a zhʉ fə zàʼà ashɨ ə chʉ ə lɨ̀m wen benə ando əfwof ə chò nə̀ʼə̀, ¹⁴ əkaŋ ə somə to nə̀ ŋwàʼlə̀ a və lèmə̀, pfensə no sətsèm nə̀ əshi nsesə a və diʼì a tì àmù somə fà yi əshi. ¹⁵ Təfòn tə mbi, nə̀ viʼi vəghoʼkəvə, nə̀ ə tʉtʉ vəsugyèʼ, nə̀ viʼi ə ko, nə̀ viʼi kədyòʼ, no viʼi vətsèm, əkòs nə̀ viʼi vyi a və ko diʼ əkòs ə nyɨŋkə lyòmtə̀ a təfyə̀ nə̀ a ti təghu a pfensə, ¹⁶ ə̀ sə zɨmə̀ dzàŋə̀ pfensə nə̀ təghu gàʼà la, “Ghə̀ŋ fəŋkə à yès ə kətʉ ə̀ lyòmtə̀ yès fà wìʼ ghèn a ghə̀ ŋwʉʼ a kəfwon lə̀ bènə̀ fa ngəʼ a wàyn bi ənjɨ̀ diʼ ə ku à yès byìʼ tin ə fwi ə wen. ¹⁷ Kə diʼ a lə̀ byìʼe kətsi kə ghoʼkə vəwenə diʼ tin ə fwi ə̀ vəwenə vi li a no wìʼ muʼ ko zì ghə̀ nyɨŋ.”

Viʼi Islel vi nkamsə̀ ghɨ nə̀ njʉ̀sə̀ kàʼ a məwum ə̀ nkàʼ

¹ Kənyʉ̀ kə tsen a mà ə̀ mbè yen ə̀ ndìʼ ntsɨ̀ŋsə ngə̀ŋ Nyìngòŋ sə̀ kàʼ sə ti a təshyə tə mbi tèn tə kàʼ. Vəwenə nti a lì ghaʼa fwof fa təshyə tèn tə kàʼ ndi kə ghə̀ à chò fa nse, ko fa mù, ko ə nə̀ʼ fəkòʼ. ² Mà bè yèn ntsɨ̀ŋ ngə̀ŋ ə̀ Nyìngòŋ ə tsen, ghə̀ kuʼ ə̀ vì fa shyə a chʉzhʉ ə saʼa fa tsu, kiʼ kəfo a Nyìngòŋ a ghə̀ ko lu pfʉ ə chwìtə̀ viʼi tsu. Ntɨ̀ŋ ayì zɨmə̀ dzàŋ ntsɨ̀ŋsə ngə̀ŋ ə̀ Nyìngòŋ shì sə̀ kàʼ a Nyìngòŋ ə̀ nku li àdyoʼ à vəwenə la vəwenə byɨsə nse bènə̀ mu no a gɨ to ³ Gàʼà la “Kə ghə̀ŋ à byɨ̀sə nse, ko mu, ko ə̀ nkòʼ, ə zaʼa fa zhʉ a yès a ku ə chwitə a təchʉ̀, ə viʼi shyèʼ ə̀ Nyìngòŋ vəghəŋ ə myetə.” ⁴ Mà zhʉ və shə̀ʼtə̀ əwen ə wìʼ yi à mò a və̀ nkiʼi əchwitə, vəwenə ndìʼ ə̀ nkamsə̀ ghɨ nə̀ njʉ̀sə̀ kàʼ a məwum ə̀ nkàʼ mu və chwìtə̀ fa ntə̀ʼsə ngwàʼa ngə̀ŋ viʼi ə̀ njʉ̀sə̀ bò. ⁵ Və̀ nchwìtə viʼi nkamsə njʉ̀sə̀ bò fa ngwàʼa ngə̀ŋ ə Judà, nə̀ viʼi nkamsə njʉ̀sə̀ bò ngwàʼ ə ngə̀ŋ ə̀ Luben, nə̀ viʼi nkamsə njʉ̀sə̀ bò fa ngwàʼ ə ngə̀ŋ Gad. ⁶ Viʼi nkamsə njʉ̀sə̀ bò ə̀ mfʉ fa ngwàʼ ə ngə̀ŋ Ashel, viʼi nkamsə njʉ̀sə̀ bò fʉ̀ fa ngwàʼ ə ngə̀ŋ ə̀ Naftalì, viʼi nkamsə njʉ̀sə̀ bò fʉ̀ fa ngwàʼ ə ngə̀ŋ ə̀ Manasè, ⁷ viʼi nkamsə njʉ̀sə̀ bò və fʉ̀ fa ngwàʼ ə ngə̀ŋ ə̀ Simìyòn, viʼi nkamsə njʉ̀sə̀ bò və fʉ̀ fa ngwàʼ ə ngə̀ŋ ə̀ Levì, viʼi nkamsə njʉ̀sə̀ bò və fʉ̀ fa ngwàʼ ə ngə̀ŋ ə̀ Isaka. ⁸ Viʼi ə̀ mfʉ nkamsə njʉ̀sə̀ bò fa ngwàʼ ə ngə̀ŋ ə̀ Zebulùn, ə̀ fʉ̀ nkamsə njʉ̀sə̀ bò fa ngwàʼ ə ngə̀ŋ ə̀ Josèf bènə̀ viʼi nkamsə njʉ̀sə̀ bò fa ngwàʼ ə ngə̀ŋ ə̀ Benjamìn.

⁹ Fà yì a bàm, mà kɨ̀blə̀ ə̀ yen ənòyn ə viʼi və tsenə və taŋə lè mu vəwenə mòʼ vədàlə və fəfəvə nə̀ əzaŋ à vəwenə avu və ti a shɨ ə̀ kəfwoyn kì bènə̀ wàyn bi njɨ̀ yì. Viʼi a vyi ə̀ ndìʼ tənkì tə viʼi no tətsèm, mu və fʉ̀ fa təshyə tə loʼ tətsèm, be gàʼà tò təgàʼ tətsèm. ¹⁰ Vəwenə nzɨmə̀ gàʼà no a gɨ̀ ə to la, “Adìʼ Nyìngòŋ vəghəŋ a ghə̀ ŋwʉʼ a kəfwoyn wenə̀ wàyn bi njɨ̀ ghèn a və bwoŋsə̀ vəghəŋ!” ¹¹ Ntsɨ̀ŋsə ngə̀ŋ Nyìngòŋ no sə̀ tsèm sə tɨmə̀ kàʼ kəfwon kì wenə̀ vəchəʼ vi bènə̀ ə̀fo ə zhwisəvə vi sə̀ ŋàŋlə dyʉ̀ nə̀ təkə̀ʼ tə vəwenə a nse ghoʼsə̀ Nyìngòŋ, ¹² gàʼà la, “Kə diʼ to a lì, mbwaʼmə̀, nə̀ əbayn, nə̀ ətof, nə̀ əku kəzòŋ, nə̀ ə gumlə, nə̀ àdyoʼ diʼ ghə̀ wenə no məzhʉ̀ ntsèm! kə ndiʼ to a lì.”

¹³ Chəʼ tsen fuʼtə̀ bèm à mò Joyn la, “Venə diʼ və ndò a və moʼò vədàlə və fəfəvə a? Vəwenə lù fa fe?” ¹⁴ Mà bwènsə̀ à wen la, “Ba, à kɨ̀ tò wù.” Ghə̀ mù gàʼ à mò la, “Venə diʼ viʼi a və cho li fa tì ngəʼsə sə̀ fàynsə sə̀. Vəwenə nshʉ li vədàlə və vəwenə ne mənlyuŋ mə wàyn bi ənjɨ̀ və sə fəfə fəfə. ¹⁵ A lə̀ kənyʉ̀ a vəwenə ti a shɨ kəfwoyn kə Nyìngòŋ, shyèʼè à wen nə̀nchwì bènə̀ nəntʉʼʉ à wen ə tì ngə̀ŋ. Wìʼ yì a ghə̀ ŋwʉʼ a kəfwoyn ne ndiʼ wenə̀ vəwenə, kɨ̀ŋtə̀ vəwenə. ¹⁶ Jɨ̀ŋ ə ko be lu zaf vəwenə, kènla ətoŋ ə mù be lu zɨm vəwenə. Chwìchwì kò əshi lɨməvə ko lu be nyùʼ vəwenə, ¹⁷ byìʼàndo wàyn bi njɨ̀ yì a ghə̀ ŋwʉʼ a tì kəshi kə kəfwoyn ne ndiʼ ntsɨ̀ŋ ə̀ vəwenə. Ghə̀ ne lyɨ̀ vəwenə dyʉ̀ nə̀ vəwenə ashi a mu mi a ku əbwòŋ ko mə lu nzɨmə. Nyìngòŋ be tì məshɨ mə vəwenə no ntsèm fà vəwenə ashɨ.”

Wàyn bi njɨ̀ yì bə̀ys kəmwètə̀ kə mɨ̀ŋ

¹ Andìʼ ando wàyn bi njɨ̀ yì ə̀ bə̀ys mɨ̀ŋ ə tsen ə və ndiʼ sòmbo, əshi chiʼ a kàŋ la kùʼ ə zaʼa kəbyeʼ kə zhʉ. ² Mà mù yèn ntsɨ̀ŋsə ngə̀ŋ Nyìngòŋ shìsə sòmbo a sə nti a shɨ Nyìngòŋ lì mu və ku li təsoŋ sòmbo à vəwenə. ³ Ntsɨ̀ŋ ngə̀ŋ ə̀ Nyìngòŋ tsen vì tɨ̀mə a mbì kəchiʼ kə kəku ə̀ Nyìngòŋ, kiʼ kəkaŋ mu və shɨ̀tə̀ nə̀ gul a və nyùʼù kələŋ tsu. Və ku kələŋ à wen no kə ghoʼo la ghə̀ nyuʼ ə̀ bòsə nə̀ təjɨ̀m tə viʼi Nyìngòŋ no vətsèm, a kwi kəchiʼ kə kəku a və shɨtə̀ nə̀ gul a mbì kəfwoyn ⁴ Ntsɨ̀ŋ ngə̀ŋ ə̀ Nyìngòŋ ayì nyùʼ kələŋ kì ə boʼsə nə̀ təjɨ̀m tə viʼi Nyìngòŋ tì, fələʼ fi fʉ̀ fà wen ə kəvu ə̀ kùʼ a shɨ ə̀ Nyìngòŋ. ⁵ Ntsɨ̀ŋ ngə̀ŋ ə̀ Nyìngòŋ ayì mù lyɨ̀ kəkaŋ kə kələŋ kì ə̀ tsə̀f ə zhiʼ fa kəchiʼ kə kəku ə̀ lwinsə tsu ə̀ mòʼ shìʼsə a nse no a zhʉ̀ kò əghʉ sə̀ mwàntə̀, bwankə̀, gɨsə gàʼà, ə̀ nse be tsɨŋtə̀ bə̀ykə̀.

Və toŋ ə̀soŋ

⁶ Ntɨ̀ŋsə ngə̀ŋ ə̀ Nyìngòŋ shì sòmbo a və kìʼ təsoŋ tì sòmbo mù sə̀ bvʉ̀tə̀ ə toŋ.

⁷ Ntsɨ̀ŋ ngə̀ŋ ə̀ Nyìngòŋ ə̀ mbì toŋ ə̀soŋ ə wen, awoŋ nə̀ əzhiʼ zìtə̀ ə shiʼi a nse mu və fɨ̀ŋ li nə̀ mənlyuŋə. Ə̀fo a vyi shiʼi a lì ə̀ nyùʼ əshyə nse kə mùʼ fa tì ə̀ bàs ə taʼ, ə̀ bè nè tò ndə̀ŋndəŋ nə̀ nkòʼ bè nyùʼ agəŋ ə zhʉghə no a tsèm.

⁸ Kənkùmtə̀ kə ntsɨ̀ŋ ngə̀ŋ ə̀ Nyìngòŋ toŋ ə̀soŋ ə wen, və mòʼ kəfo a mù kə diʼ tò nə̀ pfèn a ghə̀ bolə̀ nə̀ əzhiʼ, ⁹ əshyə mù, əmùʼ fa tì təshyə tətaʼ, ə̀fo zhwisəvə no tsèm a və ndìʼ a shyə mù ayì ə pfʉkə, vənkanuʼ ə bè byɨ̀fkə a shyə mù ayì no vətsèm. ¹⁰ Ntsɨ̀ŋ ngə̀ŋ ə̀ Nyìngòŋ tsen bè tòŋ əsoŋ ə wen, vəwenə ndiʼ vətaʼ, fədzɨ̀ŋ fə ghoʼo fə lù fa kàŋ ə̀ fə̀ŋ a nse baynə tò nə̀ kənkàʼtə̀. Fə fəŋ a lì ə̀ chìʼ təshyə mù mə nchomə̀ əmùʼ, fa tì təshyə tətaʼ nə̀ a kə shi a mu nfʉ. ¹¹ Əzhiʼ fədzɨ̀ŋ ayi ə̀ ndìʼ, məlwì əshyə mù əmùʼ, fa tì təshyə tətaʼ kaʼsə sə̀ lwilwi. Viʼi pfʉkə no vəghoʼo byìʼàndo vəwenə nyʉ̀ mu mə nlwimə a mì.

¹² Ntsɨ̀ŋ ngə̀ŋ ə̀ Nyìngòŋ tsen toŋ ə̀soŋ ə wen à ndiʼ vəkàʼ, kəfo kə pfèn ə̀ byɨsə shyə mùʼ fa təshyə tətaʼ ə̀ chwìchwì nə̀ əsàŋ bènə̀ mədzɨ̀ŋ nè chwìchwì ko bè bayn a kətemə kə zhʉ kə mùʼ fa tì ntemə taʼ ə̀ nə̀nchwì ə̀ bè nè kèn la sàŋ wenə mədzɨ̀ŋ ə bayn li a kətemə kə zhʉ kə mùʼ fa tì ntemə taʼ ə̀ nəntʉʼʉ.

¹³ Mà mù sə ki ə̀ yèn bole ghə̀ tànə̀ chò fa kàŋ dì no a gɨ̀ to gàʼà la, “Ndòyn, ndòyn, ndòyn dìʼ à viʼi vyi a və diʼì a nse a zhʉ a təsoŋ tə gàʼà a ntsɨ̀ŋsə sènsə sətaʼ sə̀ diʼ a mətoŋ lə̀.”

¹ Ntsɨ̀ŋ ngə̀ŋ ə̀ Nyìngòŋ tsen toŋ ə̀soŋ ə wen ə və ndiʼ vətàyn, mà yen fədzɨ̀ŋ fə lù fa kàŋ ə̀ fə̀ŋ a nse ə̀ və ku kənzàs kəchʉ̀ ə nkwòŋ tsen a ghə̀ shwemə shiʼi dyʉ̀ tò dyʉ̀ à wen. ² Fədzɨ̀ŋ a fìfə bòʼ əchʉ̀ ə nkwòŋ ayi, fələʼ fə tsenfə fʉ̀ ə̀ kùʼ fa tsu kə̀ʼə̀ tò sə fə fʉ̀ fa əchɨ əzhiʼ ghoʼoghə. Fələʼ afìfə fʉ̀ ə̀ fènsə̀ shi kènla chwìchwì bè baynə shiʼì. ³ Ngùməsə fʉ̀ fa tì fələʼ afì ə̀ shiʼi a nse, və ku kədyòʼ kə təŋam à səwensə, ⁴ ə̀ gàʼ à səwensə la, kə sə à kùm ə̀ byɨ̀fsə agəŋ ə nse, ko tè kəfo fəzhʉfə, ko tè fəkòʼ. Və bòŋsə̀ gàʼ à səwensə la sə chələ viʼi vyi a və ko kiʼ əchwitə Nyìngòŋ à vəwenə təchʉ̀ təkə̀ʼ. ⁵ Ngùməsə asènsə nko diʼ əzhwilə viʼi a vyi zhwilə, sə ndiʼ ə ku tò ngəʼ à vəwenə a vəsàŋ vətàyn. Ngəʼ a sə ndìʼ ə ku diʼi ə ndiʼ tò nə̀ ngəʼ a wìʼ ə yenə a zhʉ a əŋam ə chə wen. ⁶ A lu ə ndiʼ a mətsi ayì, viʼi ə nkəŋə pfʉ kò və nyenə. Vəwenə a nkòŋə̀ ə pfʉkə alì əpfʉ ə tyenə lyɨ̀ vəwenə.

⁷ Ngùməsə ashìsə ndìʼ to nə̀ təlyəŋ a tə bvʉ̀tə̀ ə dyʉ̀ a ghòŋ sə nkìʼ ə̀fo à vəwenə a tʉ və diʼ a nə̀ təsòʼ tə təfòyn a və shɨtə̀ nə̀ gul ⁸ Nyɨŋsə tʉ ə səwensə ndìʼ to nə̀ nyɨŋsə tʉ əki, asoŋ səwensə diʼ to nə̀ asoŋ ə və abìkəŋ. ⁹ Ngùməsə ashìsə ndìʼ mu sə kɨŋtə̀ li ədyʉ̀ʼ ə səwensə nə̀ ə̀fo mu və shɨ̀tə̀ nə̀ kəkas, sətànə̀ təvò tə vəwenə tə gàʼà tò nə̀ təlyəŋ no tə ghoʼo a tə gùfə̀ ə̀ mfɨŋsə dyʉ̀ a ghòŋ. ¹⁰ Sə nkìʼ tənkwèn to nə̀ təŋam be kiʼ tənchə. Kədyòʼ kə̀ ndìʼ a təkwèn ayì kwʉ̀ʼʉ̀ əchə wìʼ ə ghə̀ zhʉ lɨ̀m a vəsàŋ vətàyn. ¹¹ Ngùməsə a shìsə̀ nkìʼ fòyn a ghə̀ soʼo səwensə, à diʼ ntsɨ̀ŋ yì a ghə̀ tùʼmə̀ nə̀ nkwòŋ yì a ghə̀ shwemə shiʼi dyʉ̀ tò dyʉ̀ lì. Əzhiʼ ə wen a əgàʼ ə Hibùlù ə̀ ndìʼ Abadòn, diʼ a əgàʼ ə Glis la Abolon.

¹² Ngəʼ ə̀ mbì cho li, alì sə̀ bò sə faŋə luwèn əvì. ¹³ Ntsɨ̀ŋ ngə̀ŋ ə̀ Nyìngòŋ bè tòŋ ə̀soŋ ə wen ə və ndiʼ ə̀ ntʉfə, mà zhʉ gɨ̀ fʉ̀ vì fa təbʉ tə kàʼ a tə ndìʼ a kəchiʼ kə kəku kì a və nshɨ̀tə nə̀ gul a kə nti a shɨ Nyìngòŋ lì. ¹⁴ Gɨ̀ ayì ə̀ ngàʼà à ntsɨ̀ŋ ngə̀ŋ ə̀ Nyìngòŋ ayì la, “zàtə̀ ntsɨ̀ŋsə ngə̀ŋ ə̀ Nyìngòŋ shì səkàʼ a və̀ nkwiʼì a mù mə ghoʼomə̀ a və ndzàŋə̀ nə̀ Yuphlates lì.” ¹⁵ Və mù zàtə̀ ntsɨ̀ŋsə ngə̀ŋ Nyìngòŋ ashì səkàʼ byìʼàndo əzhʉ ə nkwʉʼ li, kətsi kə kwʉ̀ʼ, sàŋ nə̀ ngwʉ̀ʼ bè kwʉ̀ʼ ə və zhwi wìʼ muʼ ə̀ mùʼ fa tì viʼi vətaʼ. ¹⁶ Və shə̀ʼtə̀ à mò la ənòyn ə vəsugyèʼ vi a və nyɨŋ a kwi təlyəŋ tì diʼ vəmalàn ə̀ ghɨ ə̀ bò. ¹⁷ Ghèn dìʼ ji a mà ə̀ nyèn təlyəŋ tì a jòm yì a ghə̀ mfʉ à mò a kə̀ʼ lì; viʼi vyi a və̀ nyɨŋ a kwi təlyəŋ tətyɨm tə vəwenə ə nkìʼ ə nkɨ̀ŋsə ghòŋ sə bàŋə̀ tò nə̀ əzhiʼ, nyìmə̀ to nə̀ məkàyn be nyòʼlə̀ nyòʼlə. Ətʉ təlyəŋ atì ə̀ nkə̀ʼə̀ to nə̀ ətʉ ve abìkəŋ. Əzhiʼ nə̀ fələʼ nə̀ məkàyn fʉ̀ fà təwentə a təchʉ̀. ¹⁸ Ngəʼsə fànsəsə asènsə sə̀ taʼ a ndìʼ əzhiʼ, nə̀ fələʼ nə̀ məkàyn a sə mfʉ̀ fa təchʉ̀ ə̀ təlyəŋ atì, ə zhwi wìʼ muʼ mùʼ fa tì viʼi və taʼ. ¹⁹ Kədyòʼ kə təlyəŋ atì ə̀ ndìʼ à vəwenə təchʉ̀ nə̀ à vəwenə a tənkwèn. Təkwèn tə vəwenə ndìʼ to nə̀ zhusə, kiʼ ətʉ. Tə̀ nlyomsə viʼi nə̀ təwentə.

²⁰ Viʼi vətsenvə vi a ngəʼsə asènsə nko zhwì vəwenə lì, tyen la vəwenə ko a kwitə fà vəwenə mbyɨsə. Vəwenə mfaŋ li sə ghoʼsə̀ tò vədeblə̀ bènə̀ mənyo mì a və shɨtə̀ nə̀ gul nə̀ silva bènə̀ kəkas kətsen a kə bàŋə̀ baŋə, ə̀ shɨ̀tə̀ mətsenə nə̀ ngùʼ, bè shɨ̀tə̀ mətsenə nə̀ nkòʼ, à diʼ ə̀fo və ko yenə shi, ko ə nzhʉ ənyʉ̀ kènla və jèʼè. ²¹ Vəwenə bè tyèn la vəwenə ko a kwitə fà əzhwi viʼi, ko fà vəwenə nyʉ̀ luʼ viʼi, ko fà vəwenə nyʉ̀ ə ku sensə, ko fà vəwenə tsoŋ.

Ntsɨ̀ŋ ngə̀ŋ ə̀ Nyìngòŋ vì nə̀ fəndeʼ fəbʉʼ ə ŋwàʼlə̀ a və kablə̀

¹ Kənyʉ̀ kə bè fʉ̀ à mò a əkə̀ʼ a nə̀ jòm, mà yen ntsɨ̀ŋ ngə̀ŋ ə̀ Nyìngòŋ ghoʼo ə tsen ghə̀ shiʼi vì fa kàŋ mu mbòʼsə lem li wen, kəmpfembiʼ kə diʼ à wen kətʉ, əkə̀ʼ ə we baynə tò nə̀ chʉzhʉ, afwen ə wen be diʼ tò nə̀ əlwàŋ əzhiʼ. ² Ghə̀ ə̀ nkìʼ fəbʉʼ fə ŋwàʼlə̀ ə lemtə à wen kəvu mu və bòʼò li. Ghə̀ tom kəghʉ kəkwoŋ ə toghə wen a ə̀mu mə nghoʼomə̀ ə̀ tòm kəghʉ kəkwoŋ ə nənkwè a nse. ³ Ntsɨ̀ŋ ngə̀ŋ ə̀ Nyìngòŋ ayì dzàŋ no əgɨ̀ ə to ghə̀ kù tò nə̀ gɨ̀ abìkəŋ a zhʉ a ghə̀ dì. Ghə̀ ə̀ ndzàŋə̀ no əzhʉ ə̀ kò, əghʉ bwènsə̀ bwankə̀ aghayn sòmbo. ⁴ A ndìʼ ando əghʉ aghenə mbwankə, mà sə̀ kəŋ ənyòʼ kənyʉ̀ a ghə̀ ngaʼà alì ə̀ zhʉ̀ gɨ̀ ghə̀ gàʼà shiʼi fa kàŋ la, “Lyòmtə̀ nyʉ̀ vyi a əghʉ bwankəghə ghenə gaʼà aghayn ə sòmbo lə̀, kə a nyòʼ.”

⁵ Fà yi bàm, mà yen ando ntsɨ̀ŋ ngə̀ŋ ə̀ Nyìngòŋ yì a mà yì yen ghə̀ ti a mu be ti a nse ə kuʼsə̀ kəvu kəkwoŋ ə toghə wen a kàŋ ⁶ ə̀ kàyn a əzhiʼ ə̀ Nyìngòŋ yì a ghə̀ diʼì no məzhʉ ntsèm, à diʼ wen a ghə̀ ə̀ nshɨ̀tə̀ kaŋ, nə̀ nse bènə̀ ə̀mu mə nghoʼomə̀ bè shɨ̀tə̀ no ə̀fo ətsèm a və diʼì a shi avenə la kə və be à zhwi əzhʉ, ⁷ byìʼì a ne ndiʼ a mətsi a yì a ntsɨ̀ŋ ngə̀ŋ ə̀ Nyìngòŋ kəmwetə fa tì ntsɨ̀ŋsə shì sòmbo ə toŋ əsoŋ wen ə Nyìngòŋ ne kənyʉ̀ kə lyomtəkə wen kì a ghə̀ ə̀ nghʉ ando ghə̀ ə̀ nshə̀ʼtə̀ à viʼi ə shyèʼ ə wen a ə̀ ndìʼ nshə̀ʼtə̀sə sə̀ghoʼkəsə.

⁸ Fà yi bàm, mà zhʉ̀ gɨ̀ yì a ghə̀ yì gàʼ à mò fa kàŋ lì ghə̀ bè gàʼ à mò la, “Dyʉ̀ ə̀ shì ŋwàʼlə̀ yì a ghə̀ diʼì a kəvu ntsɨ̀ŋ ngə̀ŋ ə̀ Nyìngòŋ a ghə̀ ti a mu be ti a nse mu və bòʼò li lì.”

⁹ Mà mù dyʉ̀ à ntsɨ̀ŋ ngə̀ŋ ə̀ Nyìngòŋ yì ə̀ gàʼ à wen la ghə̀ ku fəŋwàʼlə̀ fə lemtəfə fì à mò. Ghə̀ gàʼ à mò la, “Ghaʼ ə̀ pfiʼ, ghə̀ a nlyɨ̀mə̀ tò nə̀ əlyʉ̀ à wù a əchʉ̀ alì ə sə shiʼi à wù a bèm ə nlwìlwi.”

¹⁰ Mà shi fəŋwàʼlə̀ afì fa kəvu ntsɨ̀ŋ ngə̀ŋ ə̀ Nyìngòŋ ayì ə̀ tsam ghə̀ lyɨ̀mlyɨmə à mò a əchʉ̀ alì sə shiʼi à mò ə bèm ə̀ kaʼsə sə̀ lwilwi. ¹¹ Ntsɨ̀ŋ ngə̀ŋ ə̀ Nyìngòŋ bè gàʼ à mò la mà diʼi ə shə̀ʼtə̀ ətɨm ə̀ Nyìngòŋ à viʼi no vəghoʼo, nə̀ a təloʼ no tə ghoʼo, nə̀ à viʼi a və gàʼà təgàʼ no təghoʼo bènə̀ à təfòyn no tə ghoʼo.

Viʼi və yenəvə və bò

¹ Və mù ku mbàŋ shəʼ ə̀fo à mò ə̀ gàʼ à mò la, “Lu ə̀ shyə̀ʼ ngə̀ŋ Nyìngòŋ ə ghoʼo nə̀ kəchiʼ kə kəku bè tàŋ viʼi a və ghoʼsə̀ Nyìngòŋ tsu, ² alì kə a shyə̀ʼ fətin fə ngə̀ŋ Nyìngòŋ ə ghoʼo byìʼe və ku li à viʼi ə tɨm la vəwenə tuʼlə̀ byɨ̀sə ntə̀ʼ ŋwoʼə a vəsàŋ njʉ̀sə̀ bò a məwum ə̀ nkàʼ.” ³ Mà ne tɨm viʼi və yenəvə mò vəbò ə vəwenə moʼ ndisə fənchì ə̀ nshə̀ʼtə̀ ntɨm ə̀ nəmwèʼè ghom a mətsi nkam nə̀ təghɨ tə bò nə̀ məwum ntʉfə.

⁴ Nkoʼ mə olìf menmə la mbo lə nə̀ fo vi a nkaʼtə nti a yi a kwi ə bo lə ə lyɨ kəshi kə viʼi venə a və njèʼè shə̀ʼtə̀ ntɨm ə Nyìngòŋ lə. ⁵ Wìʼ sətsèn ə̀ mwòmsə̀ ə lyomsə vəwenə, əzhiʼ à fʉ̀ fà vəwenə təchʉ̀ ə̀ byɨ̀sə viʼi kəbàyn ə̀ vəwenə a vyi, a ji aghèn ə zhwi no tè ndò a ghə̀ mwòmsə̀ ə lyomsə vəwenə. ⁶ Vəwenə kiʼ àdyoʼ ə ken əghʉ la kə ghə̀ shiʼi a mətsi yì a vəwenə jèʼè shə̀ʼtə̀ ntɨm ə̀ Nyìngòŋ ayì lì, kiʼ àdyoʼ ənè la mu kaʼkə a mənlyuŋ be kiʼ àdyoʼ ənè la no tè ngəʼ ko vi a nse no tè a zhʉ ə̀ kò a vəwenə koŋə.

⁷ A ne ə ndiʼ a zhʉ a vəwenə shəʼtə̀ li ntɨm ayì ə mwetə nyàm ə fànsə yì ghə̀ fʉ̀ fa nkwòŋ yì a ghə̀ shwemə shiʼi dyʉ̀ tò dyʉ̀ lì ə soyn ə zhɨ vəwenə be a zhwilə vəwenə. ⁸ Təbven tə vəwenə tə ne faŋ tò a ji ə to a ntə̀ʼ ghoʼo yì a və̀ mbantə Bobo ə̀ vəwenə tsu a kəntò. Viʼi vətsenvə toŋtə̀ ntə̀ʼ ayì nə̀ Sodòm ko nə̀ Ijìb. ⁹ Viʼi tò fa təloʼ tətsèm, bènə̀ fa ngwàʼ sətsèm bènə̀ fa təgàʼ tə mbi tətsèm, nə̀ vì nki təbven tə vəwenə a mətsi ntaʼ nə̀ kəbwəʼkə tyèn la kə wìʼ à bvɨ̀mə̀ vəwenə. ¹⁰ Viʼi vi a və̀ ntsi a nse sə saŋlə̀ be zhɨ təwen tə vəwenə byìʼì əpfʉ ə viʼi avenə. Vəwenə sə ku be shi ə̀fo fà vəlèmə byìʼàndo nshə̀ʼtə̀sə sə̀ ghoʼokə asènsə sə̀ bò sə pfʉkə li mu sə̀ nku ngəʼ ghoʼo à viʼi a nse. ¹¹ Alì à sə ndiʼ a bàm ə mətsi ayì ntaʼ nə̀ kəbyəʼkə Nyìngòŋ ku kəzhwì kì a kə nè viʼi tsi à vəwenə, kə nè vəwenə lùkə̀ ə̀ tɨ̀mə à vəwenə afwen, viʼi vyi a və̀ nyenə vəwenə sə̀ fànə̀ no nànto. ¹² Nshə̀ʼtə̀sə sə̀ ghoʼkəsə asènsə sə̀ bò bwènsə̀ lù fa pfʉ ə̀ zhʉ gɨ̀ ə to tsen a ghə̀ gàʼà fʉ̀ fa kàŋ la, “Ghə̀ŋ kuʼ ə̀ vì ashə̀!” Vəwenə kuʼ ə̀ shwe a tì mbòʼsə viʼi kəbàyn ə̀ vəwenə ti ki. ¹³ Nse shen no mwèʼè mwèʼè, tò a zhʉ ayì ə̀ bə̀ytə̀ əshyə ntə̀ʼ muʼ fa tì təshyə wum ə̀ zhwilə viʼi nkamsə sòmbo. Əfàyn ə vì a tətyɨm ə̀ viʼi vyi a və mfaŋə̀ tsu lì no nànto vəwenə mù sə ku əghoʼsə à Nyìngòŋ yì a ghə̀ diʼì a kàŋ.

¹⁴ Ghə̀ŋ zhʉtə a! kənkùmtə̀ kə ngəʼ kə cho li, ghətsen bè dìʼ a məvì tò luwèn.

Və toŋ əsoŋ à ndiʼ təsoŋ ə sòmbo

¹⁵ Ntsɨ̀ŋ ngə̀ŋ ə̀ Nyìngòŋ tsen bè tòŋ ə̀soŋ ə wen à ə̀ ndiʼ ntsɨ̀ŋsə sòmbo a sə toŋ li. Mà zhʉ gɨsə sə̀ tosə fa kàŋ sə gàʼà la, “Bobo vəghəŋ wenə̀ Klistò kìʼ kədyòʼ ə nsoʼo mbi luwèn, be diʼ ne ə nsoʼo tò soʼo no mətsi ntsèm.” ¹⁶ Vəchəʼ vi məwum əbò a njʉ̀sə̀ kàʼ a və̀ŋwʉʼ a Əfwoyn vi a shɨ ə̀ Nyìngòŋ shiʼi a nse nə̀ kəʼ ə̀ sə ghoʼsə̀ wen ¹⁷ gàʼà la,

“Bobo ə Nyìngòŋ àdyoʼ ətsèm wù yì a wu diʼì luwèn, mu wù ə̀ ndìʼ

yès ə ku kəzòŋ à wù ando wù ə diʼì li kədyòʼ kə ghoʼokə kì a wù ə kiʼi

ə̀ nzìtə̀ sə soʼo viʼi.

¹⁸ Tinsə viʼi vyi a və ko kɨ̀ wù tə mfwi,

alì əzhʉ kwʉʼ li ə wù diʼ ətoŋ fwi ghə̀ wù, əzhʉ mbè nkwʉʼ ə soʼ viʼi vəpfʉkəvə.

Zhʉ be nkwʉʼ ə wù taʼ viʼi shyèʼ ə̀ wù, andiʼ nshə̀ʼtə̀sə sə̀ ghoʼokəsə wù,

nə̀ viʼi vyə no vətsèm a və ghoʼsə̀ əzhiʼ ə̀ wu,

vətovə nə̀ vəbwaʼvə tò ndə̀ŋndəŋ.

Əzhʉ̀ be kwʉ̀ʼ ə wù byɨsə viʼi vyi a və byɨsə viʼi ə nse.”

¹⁹ Fa bàm ənyʉ̀ venə, əchʉ ngə̀ŋ ə̀ ghoʼo ə̀ Nyìngòŋ fa kàŋ ə bòʼmə̀, mà yen əkum ə məkàyn ə̀ Nyìngòŋ à wen ə ngə̀ŋ ə ghoʼo. Əghʉ sə̀ mwàntə̀ bwankə̀, fa kəshi ayì, gɨsə fʉ̀ fa tsu, nse nə̀ʼə̀, awoŋ bè shiʼi no à ghoʼo.

Kənyʉ̀ byìʼì wùwì nə̀ nyàm ə fànsə

¹ Kəchwitə kə kaynəkə kətsenkə fʉ̀ a kàŋ, mà yen wùwì mu ghə̀ mòʼ ndisə à diʼ əchʉzhʉ, aghʉ ə wen ti a kwi əsàŋ, ə̀sòʼ ə təfòyn ə diʼ à wen kətʉ kiʼ mədzɨ̀ŋ njʉ̀sə̀ bò. ² Ghə̀ ngùfə̀, diʼ mu ghə̀ sə temsə̀ a məbwi, ə̀ sə̀ zhʉ əlɨ̀m dì ando wàyn ayì ə̀ nzafə wen.

³ Kəchwitə kə kanəkə kətsenkə bè fʉ̀ a kàŋ, nyàm ə fàynsə ghoʼo tsen fʉ̀ kə̀ʼə̀ bàŋə̀baŋə, kiʼ ətʉ sòmbo nə̀ ndoŋsə wum. No kətʉ kə kò kə kiʼ ə̀sòʼ ə təfòyn. ⁴ Əkwen ə wen ə zhès əshyə mədzɨ̀ŋ ə̀ mùʼ fa tì təshyə tə taʼ ə̀ mòʼ shìsə a nse. Nyàm ə fànsə ayì tɨmə a shɨ ə̀ wùwì yì a ghə̀ sə̀ diʼ a məbwi lì sə̀ bvʉ̀tə̀ ə pfiʼ wàyn ayì a ghə̀ a bwi lì. ⁵ Wùwì ayì bwi wàyn ə wulɨm, à diʼ wen a ghə̀ diʼ lu soʼ təloʼ tə tsèm alì və sòʼ wen ə̀ kùʼ nə̀ wen à Nyìngòŋ a kàŋ nə̀ ə̀soʼ ə fòyn ə̀ wen ⁶ Wùwì ayì nyɨŋ ə̀ dyʉ̀ a nse zɨm a kəshi a Nyìngòŋ ə̀ nshɨ̀tə̀ ə̀ ghʉ la və ntùʼmə̀ nə̀ wen tsu a mətsi nkam nə̀ təghɨ tə̀ bò nə̀ məwum ə̀ ntʉfə. ⁷ Fà yì a bàm, əghoŋ ə fʉ̀ a kàŋ, Kətʉ kə ntsɨŋsə a və toŋtə nə̀ Mayikel wenə̀ ntsɨ̀ŋsə wen soyn nyàm ə fànsə yì, nyàm ə fànsə ayì wenə̀ wenə tsɨŋ sə wensə bè bwensə soyn vəwenə, ⁸ alì Mayikel wenə̀ ntsɨ̀ŋsə wen sə soyn ə̀ zhɨ nyàmə fànsə ayì kènla vəwenə mbè kìʼ kəshi a kàŋ ⁹ Və mòʼ shìʼsə nyàm ə fànsə ayì a nse, zhù ə mu yì a və ndzàŋə̀ nə̀ Deblə̀ bènə̀ Satan. Adiʼ wen yì a ghə̀ lobtə̀ viʼi mbyi no vətsèm. Və mòʼ shìʼsə wen a nse wenə̀ ntsɨ̀ŋsə wen tò sətsèm. ¹⁰ Fà yì a bàm, mà zhʉ gɨ̀ ə to ghə̀ gàʼ ə̀ vì fa kàŋ la, “Ə̀bwòŋ nə̀ kədyòʼ nə̀ ə̀soʼ ə fòyn ə Nyìngòŋ ə̀ vəghəŋ bènə̀ àdyoʼ Klistò ə vi li luwèn byìʼàndo və moʼ li ə̀ shiʼsə̀ wen yì a ghə̀ tə nti a shɨ ə̀ Nyìngòŋ vəghəŋ ghàmə̀ vəlèmə̀ və vəghəŋ nə̀nchwì nə̀ nəntʉʼʉ lì. ¹¹ Vəlèmə̀ avenə soyn li ə̀ nzhɨ wen byìʼ mənlyuŋ mə wàyn bi njɨ̀ nəmwèʼè yì a vəwenə tə̀ nshə̀ʼtə̀ bè kòŋə̀ əku təwen tə vəwenə pfʉ byìʼ wen. ¹² No ghə̀ŋ vətsèm a ghə̀ŋ ə tsi a kàŋ, ghə̀ŋ ə nsaŋlə̀! Kə ne mfàynsə̀ à ghə̀ŋ vi a ghə̀ŋ ə tsi a nse nə̀ a mù məghoʼomə̀ byìʼàndo Deblə̀ shiʼi li ə̀ mvi à ghə̀ŋ, tin ə̀ wen ə fwi byìʼàndo ghə̀ kɨ la əzhʉ temsə̀ li ə shwèʼ ə wen ə me.”

¹³ A ə̀ ndìʼ a zhʉ a nyàm ə fànsə yenə la və moʼ li yì a nse, ghə̀ sə̀ nyɨŋ fa bàm wùwì yì a ghə̀ ə̀ mbwì wàyn wulɨm yì lì. ¹⁴ Alì və ku təvò tə bolə ghoʼo à wen ndi ghə̀ tayn ə̀ nyɨ̀ŋ fà zhù ayì ə̀ dyʉ̀ a nse zɨm a kəshi yì və ndiʼ tuʼmə nə̀ wen tsu a ngʉ̀ʼsə sə̀ taʼ nə̀ kəbwəʼkə. ¹⁵ Zhù ayì chʉ mu fà wen əchʉ̀ to nə̀ nfwayn ə̀mu a bàm wùwì ayì ndi mə lyɨ wen ə̀ chò nə̀ wen. ¹⁶ Alì nse gyàmtə̀ wùwì ayì ə̀ koʼmə̀ mì mu a nyàm ə fànsə̀ nchʉ̀ fà wen əchʉ̀ lì. ¹⁷ Nyàm ə fànsə ayì fwisə tin à wùwì yì ə̀ lù ə̀ dyʉ̀ əzìtə̀ əghoŋ à viʼi ngwàʼa ngə̀ŋ wùwì ayì, andiʼ viʼi vətsèm vi a və ghʉ təsoʼ tə Nyìngòŋ be shə̀ʼtə̀ ənyʉ̀ a Yesò ə̀ ndiʼi a ndayn. ¹⁸ Nyàm ə fànsə ayì tɨmə tò a mbyɨ̀ ə̀mu məghoʼomə̀.

Nyamsə sə̀ fànsəsə sə̀ bò

¹ Fà yì a bàm, mà yen nyàm ghə̀ fʉ̀ ə̀ kuʼ ə̀ vì fa tì ə̀mu mə nghoʼomə̀, kiʼ ətʉ sòmbo. Nə̀ ndoŋsə la əwùm. No ə̀ ndoŋ kò ə̀ nkìʼ ə̀sòʼ ə təfòyn, no kətʉ kə kò kə kiʼ əzhiʼ a ghə̀ telə̀ Nyìngòŋ. ² Nyàm ətoʼ ayì a mà ə̀ nyenə lì ə̀ mfʉsə̀ nyàm ə̀ kəbo, aghʉ ə wen diʼ to nə̀ aghʉ ə bi toʼ, əchʉ wen diʼ to nə̀ əchʉ abìkəŋ. Zhù ə byɨ yì ku kəfwon nə̀ kədyòʼ ə ghoʼoghə à wen. ³ Kətʉ kə nyàm akì kətsenkə nkə̀ʼə̀ tò sə kənkiʼi li əlyom ə fansəghə alì mu və nchʉʼ li, viʼi vətsèm a nse sə̀ diʼ nə̀ kaynə mù sə̀ dzɨ̀mtə̀ dyʉ̀ tò nə̀ nyàm ayì. ⁴ Viʼi vətsèm ə sə̀ ghoʼsə̀ zhù ə byɨ yì fambwo ghə̀ ə nku li àdyoʼ ə wen à nyàm ətoʼ yì la ghə̀ ə nsoʼo. Vəwenə mbe ghoʼsə̀ nyàm ətoʼ yì gàʼà la, “A lè dìʼ ndo a nə̀ nyàm ghèn a? A lè zì à soyn ndo əsoyn ə wen a?”

⁵ Və ku vəsàŋ njʉ̀sə̀ bò a məwum ə̀ nkàʼ la nyàm ə̀ toʼ ayì ə nsoʼo, gàʼà ənyʉ̀ ə ghaŋsə̀ wèn a və̀ ntelə Nyìngòŋ. ⁶ Ghə̀ zìtə̀ sə̀ telə̀ Nyìngòŋ, telə̀ əzhiʼ ə wen be telə̀ viʼi a və̀ntsi a kàŋ. ⁷ Və nku li àdyoʼ à wen la ghə̀ soyn ə̀ zhɨ̀ viʼi Nyìngòŋ ə̀ bè ku àdyoʼ la ghə̀ soʼ viʼi ngwàʼsə sə̀tsèm, nə̀ viʼi təloʼ tə tsèm, bènə̀ viʼi a və gàʼà no əgàʼ kò ayi. ⁸ No viʼi vətsèm vi a və̀ntsi a nse ə̀ ndiʼi nghoʼsə̀ wen, andiʼ viʼi vyi a və nko ə̀ nyòʼ təzhiʼ tə vəwenə mibu mbi sə zìtə̀, a ŋwàʼlə̀ ə̀bwòŋ ə̀ wàyn bi ənjɨ̀ yì a və̀ nshyə lì.

⁹ No wu byɨmə ko a ghə̀ tofə ghə̀ tùʼù zhʉ̀tə:

¹⁰ Və sətsèn ə̀ ndiʼ ə ghaʼ no tè ndò a ghòŋ

və à ghàʼ tò ghaʼa,

No ndò a ghə̀ ə shyə nə̀ nyì ngwoləŋ,

və lù bè shyə wen tò nə̀ nyì ə ngwoləŋ.

Nakènkə dìʼì la viʼi Nyìngòŋ ə diʼi ə nwensə̀ be shɨ̀tə̀ ghaʼa əbyɨmə vəwenə.

¹¹ Mà bè yèn nyàm ə toʼ ə tsen ghə̀ fʉ̀ kuʼ ə̀ vì fa nse, kiʼ əndoŋsə sə bò to nə̀ wàyn bi ənjɨ̀. Ghə̀ ə̀ ngàʼà tò nə̀ əzhù ə byɨ. ¹² Ghə̀ shi àdyoʼ ə ghoʼoghə yi a nyàm ətoʼ ə̀ mbì yì nkiʼ lì sə̀ soʼo tò wen a shɨ. Ghə̀ nè la nse nə̀ viʼi a və tsi ə ngumlə̀ nyàm ətoʼ ə̀ mbì yì, a ghə̀ ə̀ nkìʼ əlyom ə toghə mu və chʉʼ li lì. ¹³ Kənkùmtə̀ kə nyàm ətoʼ aghèn ə̀ nè ənyʉ̀ kaynəvə, ə̀ nè tè əzhiʼ ə lù fa kàŋ ə̀ shiʼi vì a nse viʼi vətsèm ə yenə. ¹⁴ Byìʼì ənyʉ̀ kanəvə avenə a Nyìngòŋ ə nghʉsə nyàm ətoʼ aghèn sə̀ nè a shɨ nyàm ətoʼ ə̀ mbì yì lì lobtə viʼi vətsèm a və̀ ntsi a nse ə̀ gàʼ la vəwenə shɨtə kənshyə̀ʼsə̀ kə nyàm ətoʼ kì a ghə̀ ə̀ nkìʼ əlyom ə toghə mu və bvàʼ nə̀ nyì ə ngwoləŋ alì ghə̀ bu sə diʼ tò to lì. ¹⁵ Və ku kədyòʼ à kənkùmtə̀ kə nyàm ətoʼ kì la ghə̀ fwof kəzhwì a əchʉ̀ kənshyə̀ʼsə̀ kə nyàm ətoʼ ə lyomə yì ndi kənshyə̀ʼsə̀ kə nyàm akì gàʼ ə̀ nè və shyə no ndò yì a ghə̀ ə tyenə ghoʼsə kəwenkə. ¹⁶ Nyàm ətoʼ yì a ghə̀ mfʉ fa nse lì bè kàyn la və ghʉ kəchwitə a əkwoŋ ə toghə ko a chʉ kətʉ no ndò; wuto ko wàyndyə, wu ə ko, ko wù kənfem, kəkòs ko wìʼ a ghə̀ diʼì fà wen ə ngə̀ŋ. ¹⁷ Wìʼ ə nko diʼ ə baʼlə ko ə zen kəfo a bwen la ghə̀ kìʼ kəchwitə kə diʼì əzhiʼ ko ətaŋ əzhiʼ ə wen.

¹⁸ Kènkə diʼ ə wù ə nkiʼ ətof kwòʼtə̀ ə kɨ. No ndò a ghə̀ ə kiʼ ətof ghə̀ shwèʼ əkɨ ətaŋ ə nyàm aghenə byìʼàndo ətaŋ ayi diʼ əzhiʼ wìʼ. Ətaŋ ayi ə̀ ndìʼ əghɨ ntʉfə nə̀ njʉ̀sə̀ ntʉfə a məwum ə̀ ntʉfə.

Wàyn bi ənjɨ̀ wenə̀ viʼi ə wen

¹ Mo Joyn sə ki ə̀ kɨ̀blə̀ yèn wàyn bi njɨ̀ ghə̀ ti a pfèn Zayòn wenə viʼi wen nkam nə̀ sə ghɨ nə̀ njʉ̀sə̀ kàʼ a məwum ə̀ nkàʼ. Vəwenə ndìʼ mu vəwenə nyòʼò li əzhiʼ wen nə̀ əzhiʼ Tìʼ wen à vəwenə təchʉ̀ tətʉ. ² Mà zhʉ gɨ̀ ghə̀ kù fʉ vì fa kàŋ tò sə à kù ə̀fəŋ ə ghoʼoghə, bwankə̀ to nə̀ əghʉ. Gɨ̀ ayì ə̀ nkù to nə̀ təlyuŋ a viʼi vi ə bʉʼʉ. ³ Viʼi a vyi nkamsə ghɨ nə̀ njʉ̀sə̀ kàʼ a məwum ə̀ nkàʼ ə̀ nzɨmə̀ ndzàŋ ə fi kènla wìʼ zì ghə̀ ziʼi əzhɨm əchò tò vəwenə vi a və sə̀ diʼ mu və zen li kətʉ kə vəwenə fa mbi. Vəwenə nzhɨmə ndzàŋ ayì a shɨ kəfwoyn nə̀ ə̀fo zhwisəvə vi ə̀kàʼ bènə̀ vəchəʼ. ⁴ Viʼi avenə ndìʼ vi a vəwenə nko byɨsə təwen tə vəwenə wenə̀ və ki; à dìʼ vəwenə a vəwenə dzɨ̀mtə̀ wàyn bi ənjɨ̀ no fe a ghə̀ dyʉ̀; à dìʼ vəwenə a və̀ ndìʼ mu və zen li kətʉ kə vəwenə fà Wùmə̀nsòŋ vəwenə sə diʼ mbì ashɨ nkòʼ à Nyìngòŋ wenə̀ wàyn bi ənjɨ̀. ⁵ Vəwenə nko təmə̀ zhò ndzɨ̀ŋ byìʼe vəwenə nko kiʼ kənyʉ̀ kə shwekə.

Ntsɨ̀ŋsə ngə̀ŋ ə̀ Nyìngòŋ sə̀ taʼ

⁶ Fà yì a bàm, mà bè yèn ətsɨ̀ŋ ngə̀ŋ ə̀ Nyìngòŋ tsen ghə̀ tàynə̀ chò no fa kàŋ kiʼ ətɨm ə jùŋ a ghə̀ ə diʼì tò nəmwèʼè no mətsi ntsèm əshə̀ʼtə̀ à viʼi vyi a və diʼì a nse. Ghə̀ dìʼ əshə̀ʼtə̀ ntɨm ayì à viʼi təloʼ tətsèm nə̀ à ngwàʼsə sə̀tsèm, nə̀ à viʼi təgàʼ tətsèm bènə̀ à no ndò a ghə̀ tsi a nse. ⁷ Ntsɨ̀ŋ ngə̀ŋ ə̀ Nyìngòŋ ayì ə̀ nzɨmə̀ gàʼà no a gɨ̀ to la, “Ghə̀ŋ ə̀ nghoʼsə̀ Nyìngòŋ byìʼe əzhʉ kwʉʼ li ə ghə̀ soʼ viʼi. Ghə̀ŋ ghoʼsə̀ wen yì a ghə̀ ə̀ nshɨ̀tə̀ kaŋ nə̀ nse nə̀ ə̀mu mə ghoʼomə̀ bènə̀ ashɨ a mu nfʉ fa tsu.”

⁸ Kənkùmtə̀ kə ntsɨ̀ŋ ngə̀ŋ ə̀ Nyìngòŋ ə tsen bè dzɨ̀mtə̀ ə̀ fʉ̀ sə̀ gàʼà la, “Babilòyn ə ntə̀ʼ ə ghoʼo yì ə fəŋ li, ghə̀ ə fəŋ li. Andiʼ wen a ghə̀ nè la təloʼ tətsèm tə nyʉ məlyʉ̀ʼ mì a mə nè la vəwenə nkòŋə̀ əntsi ntsìnə̀sə kəmɨ̀ŋ.”

⁹ Ntsɨ̀ŋ ngə̀ŋ ə̀ Nyìngòŋ tsen bè dzɨ̀mtə̀ fʉ̀ nə̀ və mbì vi ə və ndiʼ vətaʼ, ə̀ bè sə̀ zɨmə̀ gàʼà a gɨ̀ ə to la, “No ndò a ghə̀ ə ghoʼsə̀ nyàm ə̀ toʼ yì nə̀ kənshyə̀ʼsə̀ kə wen kì, və nku kəchwitə à wen əchʉ kətʉ ko à wen əkwoŋ, ¹⁰ ne be nyʉ məlyʉ̀ʼ mə ntomə̀ a və ko ə̀ fɨ̀ŋ a diʼ tin ə fwi ə̀ Nyìngòŋ. No ndò fa vəwenə ne yen ə ngəʼ a zhìʼ nə̀ məkàyn mə nyʉ̀ʼlə mə a shɨ ntsɨ̀ŋsə ngə̀ŋ ə̀ Nyìngòŋ sə ŋwoʼəsə wenə̀ wàyn bi ənjɨ̀. ¹¹ Fələʼ fəzhiʼ fì a vəwenə a yen ə ngəʼ tsu ə kuʼu tò kuʼu a kàŋ əzaʼa no fa ze. Viʼi avenə a və ghoʼsə̀ nyàm ə̀ toʼ yì nə̀ kənshyə̀ʼsə̀ kə wen mu və ku li kəchwitə kəzhiʼ wen ko lu kiʼi ənzhʉ̀tə tè nə̀nchwì ko nəntʉʼʉ.”

¹² Kənyʉ̀ a kènkə dìʼì la viʼi ə Nyìngòŋ ə diʼi. Adìʼ vəwenə a və ghʉ təsoʼ tə Nyìngòŋ be byɨmə à Yesò.

¹³ Mà bè zhʉ̀ gɨ̀ ghə̀ fʉ vì fa kàŋ gàʼà la, “Nyoʼo kènkə: Əzìtə̀ fa luwèn ə dyʉ̀ nə̀ mbì, əsaŋlə diʼ à no ndò a ghə̀ pfʉ shyèʼè əshwèʼ ə Bobo.” Kəzhwì kəŋwoʼəkə bwènsə̀ gàʼ la, “Nəmwèʼè, əsaŋlə a lutə̀ diʼ à vəwenə. Vəwenə ne zhʉ̀tə̀ fà vəwenə ngəʼsə byìʼàndo əshyèʼ jùŋə ghə̀ vəwenə ne dzɨ̀mtə vəwenə gàʼ à vəwenə.”

Ə̀fo a və diʼ ne pfì fa nse

¹⁴ Mà sə ki ə̀ kɨ̀blə̀ yèn mbòʼ ə fəfə, wìʼ ŋwʉʼ a kwi mbòʼ, ayì diʼ to nə̀ Wàyn ə̀ Wìʼ. A ndiʼ wìʼ yi a və ntsuʼli ghʉ, mu ghə̀ chiʼ ə̀sòʼ ə təfòyn à wen kətʉ mu və shɨ̀tə̀ nə̀ gul. Ghə̀ ə nkiʼ fənyì fə sɨm fə lyɨməfə à wen kəvu. ¹⁵ Ntsɨ̀ŋ ngə̀ŋ ə̀ Nyìngòŋ tsen bè fʉ̀ vì fa tì ngə̀ŋ ə̀ Nyìngòŋ ə ghoʼo, dzàŋə̀ no a gɨ̀ ə to gàʼà à wìʼ yì a ghə̀ ə̀ ŋwʉʼ a kwi mbòʼ yì la, “Lyɨ fənyì fə sɨm ə̀ wu ə mpfì ə̀fo tsu byìʼàndo əzhʉ məpfì ə kwʉʼ li, ə̀fo ə nse to li ə nkwʉʼ a məpfì.” ¹⁶ Wìʼ yì a ghə̀ ə̀ ŋwʉʼ a kwi mbòʼ mù zìtə̀ əvə̀ŋ fənyì fə wen ə̀ pfì ə̀fo fa nse.

¹⁷ Ntsɨ̀ŋ ngə̀ŋ ə̀ Nyìngòŋ tsen bè fʉ̀ ə̀ vì fa ngə̀ŋ ə̀ Nyìngòŋ ə ghoʼo a kàŋ be kiʼ fənyì fə sɨm fə lyɨməfə.

¹⁸ Ntsɨ̀ŋ ngə̀ŋ ə̀ Nyìngòŋ tsen a ghə̀ kìʼ kədyòʼ a kətʉ əzhiʼ bè fʉ̀ ə̀ vì fa kəchiʼ kə kəku. Ghə̀ dzàŋ ə̀ gàʼ à no a gɨ̀ to à ntsɨ̀ŋ ngə̀ŋ ə̀ Nyìngòŋ yì a ghə̀ ə̀ nkìʼ fənyì fə sɨm fə lyɨməfə fì la, “Lyɨ fənyì fə sɨm ə̀ wù kwòŋ əchuŋsə lamsə̀ ə lwi fa əsɨm ə nse byìʼàndo lamsə̀ yi ə bàŋə̀ li.” ¹⁹ Ntsɨ̀ŋ ngə̀ŋ ə̀ Nyìngòŋ ayì mù və̀ŋ ə̀ kaʼsə nə̀ fənyì fə sɨm ə wen a nse ə̀ kwòŋ ashɨ lamsə̀ lwi nə̀ fəwenfə we shìʼsə a nkwòŋ yì ndi və tùʼlə to a ji a Nyìngòŋ dìʼ tin ə fwi wen à viʼi. ²⁰ Və lù ə̀ fʉ̀ fa ntə̀ʼ mibu ŋwìʼ lamsə̀ lwi ayì. Mənlyuŋ fʉ̀ lamsə̀ lwi a və̀ ŋwìʼì lì sə ti a nse ə ghoʼo əzaʼa vəmal əghɨ bò be shwemə əzaʼa akwoŋ ə̀ tàyn.

Ngəʼsə sə̀ myetəsə sòmbo

¹ Mà bè yèn kəchwitə kə ghoʼokə kə fànsəkə kətsenkə a kàŋ. Mà ə̀ nyen li ntsɨ̀ŋsə ngə̀ŋ ə̀ Nyìngòŋ la sòmbo, sə kiʼ ngəʼsə sòmbo, andiʼ ngəʼsə shì a sə dìʼì kəmyètə̀ kə tin ə fwi ə̀ Nyìngòŋ.

² Mà mbe ə̀ nyèn kəfo kə kə̀ʼə̀ to nə̀ ə̀mu mə ghoʼomə̀, baynə lyəŋsə̀ to nə̀ kənki kə ashɨ a və fə̀ŋə̀ nə̀ əzhiʼ. Mà mbe yèn viʼi a və soyn ə̀ nzhɨ nyàm ətoʼ yì a ghə̀ fʉ̀ ə̀ kuʼ ə̀ vì fa ə̀mu lì wenə̀ kənshyə̀ʼsə̀ kə wen əboʼsə nə̀ ətaŋ ə zhiʼ wen, və ti a mbyɨ̀ ə̀mu mə ghoʼomə̀ mì kiʼ təlyuŋ tə Nyìngòŋ à vəwenə avu. ³ Vəwenə nzhɨmə ndzàŋ ə̀ Mosìs ə wù shyèʼ ə̀ Nyìngòŋ nə̀ ndzàŋ wàyn bi ənjɨ̀ a ghə̀ ə̀ ngàʼà la:

“Bobo Nyìngòŋ, Tìʼ àdyoʼ ə̀ tsèm.

Wù nè ənyʉ̀ ghoʼkəvə kanəvə!

Wù dìʼ fòyn a təloʼ tò tətsèm.

Jisə shyə̀sə diʼ jisə sə̀ tɨməsə be diʼ jisə nəmwèʼè!

⁴ Tìʼ, a lè à faŋ ndo ke mfànə̀ be ghoʼsə̀ əzhiʼ ə̀ wu a?

Adìʼ tò wunyɨŋ diʼ wu ŋwòʼə.

Viʼi təloʼ tə tsèm ə lù vi

ghoʼsə̀ wù

byìʼàndo viʼi vətsèm ə yen li a ndayn la əshyèʼ wu diʼ əshwèʼ ə tɨməghə.”

⁵ Fà yi ə bàm mà sə ki ə̀ yèn mu və bòʼò li kəshi kə ŋwoʼəkə a tì fəngə̀ŋ ati ngə̀ŋ ə̀ Nyìngòŋ ə ghoʼo a kàŋ. ⁶ Mà yen ntsɨ̀ŋsə ngə̀ŋ ə̀ Nyìngòŋ shì sòmbo fʉ̀ ə̀ vì fa ngə̀ŋ Nyìngòŋ ghoʼo yì nə̀ ngəʼsə shì sòmbo. Ntsɨ̀ŋsə ashì ə̀ mòʼo ndisə sə̀ baynə la wəŋ, ə̀ kwiʼ ə̀pfʉ̀sə à vəwenə a dyʉ̀ʼ mu və shɨ̀tə̀ nə̀ gul. ⁷ Kəfo kə mùʼ fa tì ə̀fo zhwisəvə vi ə̀ kàʼ ku əkaŋ sòmbo mu və shɨ̀tə̀ nə̀ gul à ntsɨ̀ŋsə ngə̀ŋ ə̀ Nyìngòŋ shì. Əkaŋ a vyi ə̀ ndìʼ mu və lwin li nə̀ ənyʉ̀ vyi a və dìʼì tin ə fwi ə̀ Nyìngòŋ yì a ghə̀ ə faŋə̀ to tò əghayn əmùʼ. ⁸ Ngə̀ŋ Nyìngòŋ ə ghoʼo yì lwin nə̀ fələʼ mu fə fʉ̀ fa əbayn yì a Nyìngòŋ ə̀ nkìʼ ə̀ bè fʉ̀ fà wen kədyòʼ kò a ndiʼ la wìʼ zì ghə̀ kwen a tì ngə̀ŋ Nyìngòŋ ə ghoʼo ayì əchò la ngəʼsə shì a ntsɨ̀ŋsə ngə̀ŋ Nyìngòŋ shìsə sòmbo ə vì nə̀ səwensə me li.

¹ Mà mù bè zhʉ̀ gɨ̀ to ghə̀ gàʼà fʉ̀ fa tì ngə̀ŋ Nyìngòŋ ə ghoʼo yì à ntsɨ̀ŋsə ngə̀ŋ Nyìngòŋ shì sòmbo la, “Ghə̀ŋ dyʉ̀ ə̀ shʉ̀ʼ ə̀ shìʼsə ngəʼsə shì fa əkaŋ vi sòmbo a nse a sə dìʼì tin ə fwi ə̀ Nyìngòŋ.”

² Ntsɨ̀ŋ ngə̀ŋ ə̀ Nyìngòŋ mbì dyʉ̀ shʉ̀ʼ shìʼsə kəkaŋ kə wen a nse, tətsaʼa tə fànsətə ku viʼi vyi a və nkìʼ kəchwitə kə nyàm ətoʼ be ghoʼsə̀ kənshyə̀ʼsə̀ kə wen.

³ Kənkùmtə̀ kə ntsɨ̀ŋ ngə̀ŋ ə̀ Nyìngòŋ kə shʉ̀ʼ ə̀ shìʼsə kəkaŋ kə wen a ə̀mu məghoʼomə̀, ə̀mu a mì kaʼkə̀ sə̀ diʼ tò nə̀ mənlyuŋ mə wu pfʉ. No kəfo kə zhwisəkə kə kò a kə̀ ndìʼ a tì ə̀mu a mì pfʉ.

⁴ Kənkùmtə̀ kə ntsɨ̀ŋ ngə̀ŋ ə̀ Nyìngòŋ ə sə ndiʼ sətaʼ shʉ̀ʼ shìʼsə kəkaŋ kə wen a təfwàn tə a mù nə̀ a ashɨ lèmə̀lèmə̀, ə̀mu mi kaʼkə a mənlyuŋ. ⁵ Mà zhʉ ntsɨ̀ŋ ngə̀ŋ ə̀ Nyìngòŋ a ghə̀ kiʼì kədyòʼ a ə̀mu gàʼ la,

“Wù soʼ li nsoʼsə shyə̀sə ntinə a ji tɨmə,

A dìʼ wù yì a wu diʼì, mu wù tə ndiʼ à be diʼ tò wù a wù ə diʼì wu ŋwoʼə.

⁶ Viʼi ə nzhwilə̀ li viʼi vyə̀ zhwilə nshə̀ʼtə̀sə sə̀ ghoʼkəsə,

Wu ə̀ nku mənlyuŋ luwèn la vəwenə nyʉ. Vəwenə kiʼì tò kəfo a vəwenə yi ndiʼ ə kiʼi.”

⁷ Mà bè zhʉ ando gɨ̀ ə dì fʉ vì fa əshyə kəchiʼ kə kəku la,

“No nəmwèʼè, a Bobo Nyìngòŋ ə̀ Tìʼ àdyoʼ ə̀ tsèm,

wù soʼo nsoʼsə shyə̀sə tò nəmwèʼè, be soʼo tò a ji ə tɨmə!”

⁸ Fà yi bàm, mà yen ntsɨ̀ŋ ngə̀ŋ ə̀ Nyìngòŋ sə ndiʼ səkàʼ shʉ̀ʼ ə̀ shìʼsə nə̀ kəkaŋ kə wen a kətʉ əchʉzhʉ, ghə̀ kiʼi kədyòʼ ənyùʼ viʼi to nə̀ əzhiʼ. ⁹ Əlɨ̀m əchʉzhʉ a ghə̀ nyùʼù vəwenə mfànsə̀, vəwenə mù sə telə̀ Nyìngòŋ yì a ghə̀ ə kiʼì kədyòʼ əku ngəʼsə asènsə, kènla vəwenə kwitə li tətyɨm tə vəwenə fà vəwenə a mbyɨsə nghoʼsə̀ Nyìngòŋ.

¹⁰ Ntsɨ̀ŋ ngə̀ŋ ə̀ Nyìngòŋ tsen ə sə ndiʼ sətàyn shʉ̀ʼ ə̀ shìʼsə kəkaŋ kə wen a kwi kəfwoyn ə̀ nyàm ətoʼ yì, kəshi kì a ghə̀ ə̀ nsoʼo tsu lì fen no kətsèm. Viʼi vi a və̀ ndìʼ à wen ə̀soʼ fòyn ayì sə lèmə̀ lɨmə vəwenə a əlɨ̀m yi a vəwenə nzhʉ. ¹¹ Vəwenə mù sə telə̀ Nyìngòŋ ə̀ kàŋ byìʼì əlɨ̀m a vəwenə nzhʉ à vəwenə tətsaʼa alì kènla vəwenə kwitə li tətyɨm tə vəwenə fà vəwenə a mbyɨsə.

¹² Ntsɨ̀ŋ ngə̀ŋ ə̀ Nyìngòŋ ə sə ndiʼ ə ntʉfə, bè shʉ̀ʼ ə̀ shìʼsə kəkaŋ kə wen a əfwan ə̀mu məghoʼomə̀ a və ndzàŋə̀ nə̀ Yuphlates, ə̀mu mi zɨm no ə̀ ntsèm shɨ̀tə ji à təfòyn tì a təmfʉ fa shyə a əchʉzhʉ ə saʼa fa tsu ə̀ sə̀ ti ədyàŋ. ¹³ Mà yen əzhwi byɨvə tsenəvə taʼ a və kə̀ʼə̀ to nə̀ təsenətə fʉ̀ ə̀ vì fa əchʉ ə̀ əzhù ə byɨ nə̀ fa əchʉ ə nyàm ətoʼ bènə̀ fa əchʉ nshə̀ʼtə̀ kənlobtə. ¹⁴ Əzhwi byɨvə avenə ndìʼ vədeblə̀ a və̀ njèʼè dìʼì əchwitə kanəvə. Əzhwi a vyi ə̀ njèʼè dyʉ̀ no à təfòyn tə tsèm a mbi ə tsèntə vəwenə a kəshi kə mùʼ ə vəwenə baʼtə̀ soyn a kətsi kə ghoʼokə Nyìngòŋ ə Tìʼ àdyoʼ ə̀ tsèm.

¹⁵ Mà zhʉ ando wìʼ ə gàʼà la, “Ghə̀ŋ zhʉtə a! mà vì a nə̀ tsòŋ. Əsaŋlə ne ə ndiʼ à wìʼ a ghə̀ ŋwʉʼ no a əzhʉ ə̀ kò bvʉ̀tə̀ nə̀ ndisə à wen a wen ndi kə ghə̀ ne jèʼ kənàʼ ntsuʼ a ntìntìn ə̀ viʼi.”

¹⁶ Əzhwi byɨvə avenə ntsèntə̀ təfòyn a tèntə a kəshi kətsenkə a və dzàŋə̀ a əgàʼ Hibùlù nə̀ Almagedòn.

¹⁷ Ntsɨ̀ŋ ngə̀ŋ ə̀ Nyìngòŋ tsen ə sə ndiʼ sòmbo, bè fʉ̀ ə̀ chès kəkaŋ kə wen a kàŋ, mà zhʉ əgɨ̀ to gàʼ ə̀ fʉ̀ fa kəfwoyn a tì ngə̀ŋ ə̀ Nyìngòŋ ə ghoʼo la, “Ənyʉ̀ tsèm ə me li!” ¹⁸ Əghʉ sə mwàntə̀ be bwankə̀ fa kəshi ayì, gɨsə be fʉ̀ vì fa tsu. Nse bè nə̀ʼ ə̀ bə̀ykə̀ a ji tsen a ghə̀ nko təmə̀ nə̀ʼ fa ətʉʼ a Nyìngòŋ ə̀ nshɨ̀tə wìʼ. Mənə̀ʼ nse ayì ə̀ mfànsə̀. ¹⁹ Və gə̀tə̀ ntə̀ʼ Babilòyn məshyə̀ ntaʼ, ə̀ byɨ̀sə ntə̀ʼsə sə̀ ghoʼkəsə no sətsèm a sə ndìʼ tsu. A le ji a Nyìngòŋ ə̀ nkwòʼtə̀ viʼi Babilòyn fa tsu ə̀ nè vəwenə nyʉ məlyʉ̀ʼ fa ndoŋ yì a ghə̀ dìʼì tin ə fwi wen. ²⁰ Təloʼ a tə̀ ndìʼ mu ə̀mu nyɨŋ li ə̀ nkaʼ somə, pfensə bè somə tò sətsèm. ²¹ Awoŋ sə shiʼì a kətʉ ə viʼi fa kàŋ, əshɨ ə̀ mùʼ ə dìʼì fànsə̀ no nànto. Viʼi mù sə̀ telə̀ Nyìngòŋ byìʼì ngəʼ awoŋ aghenə byìʼàndo à ə̀ ndìʼ no ngəʼ fànsə.

Fòyn ə̀ njèʼtə̀sə

¹ Fa tsu, ntsɨ̀ŋ ngə̀ŋ ə̀ Nyìngòŋ tsen fa tì ntsɨ̀ŋsə ngə̀ŋ Nyìngòŋ shì sòmbo sə nkiʼ əkaŋ vi sòmbo vì ə̀ gàʼ à mò la, “Vi mà diʼ jì à wù a və ne ku ngəʼ à fòyn njèʼtə̀sə yì a diʼì loʼ yi a və bwomə̀ a mbyɨ̀ təfwan tə a mù no tə ghoʼo. ² Təfòyn tə tsi li nə̀ wen fa mbi tò tətsèm. Viʼi a və tsi a nse ə nyʉ li məlyʉ̀ʼ mə kəmɨ̀ŋ ə wen mə̀ nghaʼ vəwenə.”

³ Kəzhwì kə Nyìngòŋ kə shi əkwoʼtə ghomə, ntsɨ̀ŋ ngə̀ŋ ə̀ Nyìngòŋ yì lyɨ̀ mò ə̀ dyʉ̀ nə̀ mò a nse zɨm, mà yen wùwì ə tsen tsu ghə̀ ŋwʉʼ a kwi nyàm ə bàŋə̀ tsen mu və nyòʼò li təzhiʼ à wen əwen. Təzhiʼ atì tə diʼ mbàʼsə a sə telə̀ Nyìngòŋ. Nyàm ayì ə̀ nkìʼ ətʉ sòmbo nə̀ əndoŋsə tsu əwùm. ⁴ Wùwì ayì ə̀ ndìʼ mu ghə̀ mòʼ ndisə sə̀ bàŋə̀baŋə. Əwen ə wen nə̀ ndisə wen sə ndìʼ mu və shɨ̀tə̀ nə̀ ə̀fo a və shɨtə̀ nə̀ gul nə̀ ngùʼsə̀ ko toghə bènə̀ təfo tətotə. Ghə̀ ə̀ nkiʼ ə̀ ndoŋ à wen kəvu mu və shɨ̀tə̀ nə̀ gul ghə̀ diʼ mu ghə̀ ə lwin li tò nə̀ ənyʉ̀ byɨvə fansəvə nə̀ kəmɨ̀ŋ kə. Ənyʉ̀ avenə ndìʼ mbàʼsə a sə dìʼì tò ntsìnə̀ kəmɨ̀ŋ ə wen wenə̀ lʉmə. ⁵ Və̀ nyòʼò li əzhiʼ ə̀ kanəghə tsenghə à wen əchʉ kətʉ la, “Babilòyn, ntə̀ʼ ə ghoʼo. Wù dìʼ əmpfì njèʼtə̀sə sə̀tsèm be diʼ əmpfì ənyʉ̀ byɨvə fansəvə a nse.” ⁶ Mà yen mu wùwì ayì ə nyʉ li mənlyuŋ mə viʼi ə Nyìngòŋ nə̀ mənlyuŋ mə̀ viʼi a və̀ nzhwilə̀ byìʼàndo vəwenə ntɨmə viʼi vəyenəvə a ənyʉ̀ ə Yesò.

Mà ə̀ nyenə wen ə̀ sə̀ diʼ nə̀ kanə ghoʼoghə, ⁷ alì ntsɨ̀ŋ ngə̀ŋ ə̀ Nyìngòŋ yì bèm à mò la, “Wù dìʼ nə̀ əkaynə byìʼì ghò? Mà a shə̀ʼtə̀ kənyʉ̀ kə kanəkə à wù byìʼì wùwì ghèn nə̀ nyàm yì a ghə̀ ŋwʉʼ à yi kətʉ, ghə̀ kiʼ ətʉ sòmbo nə̀ ə ndoŋsə wum lə̀. ⁸ Nyàm ghèn a wù ə yenə lə̀ ə̀ ndìʼ to alì ghə̀ sə̀ diʼ mu ghə̀ pfʉ li. Ghə̀ diʼ ne fʉ̀ ə kuʼ fa nkwòŋ yì a ghə̀ ə shwemə shiʼi dyʉ̀ tò dyʉ̀ lì ə dyʉ̀ ə və byɨsə wen. Viʼi vi a və nko nyòʼ təzhiʼ tə vəwenə a ŋwàʼlə̀ ə̀bwòŋ mibu və sə shɨ̀tə mbi ne yen nyàm aghèn ə ndiʼ nə̀ əkaynə byìʼàndo ghə̀ tə̀ ndiʼ, ə̀ pfʉ ə be sə diʼ lu bwènə̀ vì.”

⁹ “Kènkə diʼ mu wù yi ə ntofə wù à kwòʼtə̀ ə̀ kɨ: Ətʉ venə sòmbo dìʼ pfensə sòmbo, à diʼ səwensə a wùwì ghèn ə ŋwʉʼ à yi ətʉ. ¹⁰ Ətʉ a vyi diʼ a lì à diʼ təfòyn sòmbo, təfòyn fa tsu ə pfʉkə li tə tàyn. Əmùʼ sə bò soʼo, ghətsen ko təmə̀ vì. Ghə̀ diʼ ne vì no zhʉ̀ kò ə nkiʼ tò kətemə kə zhʉ əsoʼ. ¹¹ Nyàm yì a ghə̀ ə̀ ndìʼ alì ə sə diʼ mu ghə̀ pfʉ li lə̀ bè dìʼ tò fòyn ə təfòyn tə ndiʼ fwomə diʼ be ne dyʉ̀ ə və byɨsə wen.

¹² “Ndoŋsə shìsə̀ wum a wù yì yen lì dìʼ təfòyn əwùm alì tə ko təmə̀ ə nkiʼ kədyòʼ ə nsoʼo. Və ne ku kədyòʼ ə tə soʼ to kətemə kə zhʉ kə̀ mùʼ, ə sə nsoʼo, ə nyàm yì be nsoʼo tò a zhʉ ayì. ¹³ Vəwenə vi əwùm tsèntə̀ kìʼ tò əkwòʼtə̀ mùʼ diʼ ne ku kədyòʼ kə vəwenə à nyàm yì ə ghə̀ ə nsoʼo. ¹⁴ Vəwenə ne tsèntə̀ ə sə̀ʼ əsoyn a əwen wàyn bi ənjɨ̀ yì alì wàyn bi ənjɨ̀ soyn ə̀ zhɨ̀ vəwenə byìʼàndo ghə̀ dìʼ Bobo ə̀ vəbobo, be diʼ fòyn ə̀ təfòyn tətsèm, kiʼ viʼi wen a ghə̀ ə̀ ndzàŋə̀ li ə̀ bè tsuʼ vəwenə la və nzhʉmə̀ wen.”

¹⁵ Ntsɨ̀ŋ ngə̀ŋ ə̀ Nyìngòŋ bè gàʼ à mò la ə̀mu mì a mà ə yenə njèʼtə̀ yì ŋwʉʼ tsu lì dìʼ viʼi təloʼ tətsèm, a və kə̀ʼə̀ tò təkə̀ʼ tətsèm, be gàʼà tò təgàʼ tətsèm. ¹⁶ Ntsɨ̀ŋ ngə̀ŋ ə̀ Nyìngòŋ ə be gàʼ la ndoŋsə shì əwùm a mà yì yen lì ne tsèntə̀ wenə̀ nyàm yì ə mbàynə̀ njèʼtə̀ yì. Vəwenə ne shi no ghò a ghə̀ kiʼì ə ghʉsə wen tò kənàʼ ntsuʼ, vəwenə ne pfiʼ njò əwen ə wen ə nyùʼ kəbyəʼ ki nə̀ əzhiʼ. ¹⁷ Kə diʼ alə̀ byìʼàndo Nyìngòŋ ə ghʉ li à vəwenə tətyɨm la vəwenə tsentə̀ nè tò kənyʉ̀ a ghə̀ kəŋə. Vəwenə ku kədyòʼ à nyàm yì la ghə̀ ə nsoʼo əzaʼa fa zhʉ a ənyʉ̀ no tsèm a Nyìngòŋ ə̀ ngaʼà ə kwʉʼ li. ¹⁸ Ghə̀ mbe gàʼ la wùwì yì a mà yen lì dìʼ ntə̀ʼ ghoʼo yì a ghə̀ soʼo təfòyn tə mbi.

Və byɨsə ntə̀ʼ ə̀ Babilòyn

¹ Andìʼ ando ənyʉ̀ venə̀ ncho, mà yen ntsɨ̀ŋ ngə̀ŋ ə̀ Nyìngòŋ tsen ghə̀ shiʼi vì fa kàŋ. Ghə̀ ə̀ nkìʼ kədyòʼ nə̀ ə̀soʼ ghoʼoghə, əbayn ə wen ə chiʼtə nse no tsèm. ² Ghə̀ zɨmə̀ gàʼ no əgɨ̀ ə to la, “Ghə̀ ə fəŋ li, Babilòyn ntə̀ʼ ə ghoʼo yì ə fəŋ li! A sə̀ diʼ kəshi a vədeblə̀ nə̀ zhwì byɨvə nə̀ mənyin mə kəmɨ̀ŋ mə mbyɨ ə tsi tsu no ntsèm. ³ Kə diʼ alə̀ byìʼàndo viʼi mbyi no vətsèm ə nyʉ li məlyʉ̀ʼ mə wen, mə ntomə̀ mì a mə nè viʼi və tsi ntsìnə̀ kəmɨ̀ŋ wenə̀ ki. Təfòyn tə mbi tə tsi li nə̀ wen tò tətsèm, viʼi mbàʼànkùm ə mbe ghoʼkə tò byìʼ ntsìnə̀ njèʼtə̀ wen aghèn.”

⁴ Mà bè zhʉ̀ əgɨ̀ tsen ghə̀ gàʼà fʉ̀ fa kàŋ la,

“Viʼi vwomə, ghə̀ŋ fʉ fa tsu,

a bwen a lì ghə̀ŋ à tsèntə̀ à wen ə mbyɨsə,

ngəʼsə sə̀ wen sə be kwe ghə̀ŋ.

⁵ Mbyɨsə wen sə diʼ mu sə doŋmə li ə̀ nkuʼ nzaʼa a kàŋ,

Nyìngòŋ kwòʼtə̀ li ənyʉ̀ avenə sə diʼ ə ku ngəʼ à wen.

⁶ Ghə̀ŋ ne to kənyʉ̀ kì à wen a ghə̀ tə̀ ne à ghə̀ŋ.

Ghə̀ŋ sə mbwènsə̀ loʼo wen a ənyʉ̀ a ghə̀ ə̀ ne à ghə̀ŋ, ghə̀ŋ ə lòʼo ə̀ zòmtə

Ghə̀ŋ sə nku məlyʉ̀ʼ mə ntomə̀ à wen,

ghə̀ŋ ə ku mì a mə to chò məlyʉ̀ʼ a ghə̀ ə̀ nku à ghə̀ŋ.

⁷ Ando ghə̀ ə̀ nkuʼsə̀ ə̀wen ə wen be tsi a tì əghoʼ,

ghə̀ŋ ku ngəʼ à wen alə̀ ghə̀ zhʉ əlɨ̀m.

Ghə̀ ə̀ ngàʼà à wen ətyɨm la,

‘Mà dìʼ wì ə̀ fòyn,

mà ko diʼ wùwì mpfʉ,

mà ko dì əpfʉ.’

⁸ Kə lè dìʼì la ngəʼsə wen asènsə lu kwe wen tò kətsi kə mùʼ.

Təkwaʼa tə byɨtə nə̀ ə kwòʼə mbi nə̀ əjɨ̀ŋ ə fànsə lu tsèntə̀ ə vì à wen tò ghayn ə̀ mùʼ.

Və lu nyùʼ wen nə̀ əzhiʼ

byìʼàndo Bobo Nyìngòŋ a ghə̀ ə soʼo wen kìʼ kədyòʼ no kə ghoʼo.”

⁹ Təfòyn tə mbi tì a tə̀ mbè ə̀ ntsi a tì əghoʼ be tsi ntsìnə̀ kəmɨ̀ŋ wenə̀ wen lu ndì a zhʉ a vəwenə yenə ando ghə̀ fwi fələʼ fə kuʼu. ¹⁰ Vəwenə lu tɨmə no kəghaf ando vəwenə lu mfànə̀ la kə ngəʼ wen à kwe vəwenə ngàʼà la, “Kə fànsə̀, kə fànsə̀ à Babilòyn ə ntə̀ʼ ə ghoʼo ghèn! Ghə̀ tə̀ nkiʼ kədyòʼ kə ghoʼkə alì və̀ nlyɨ tò fəshinə fəzhʉ əku ngəʼ fànsə à wen.”

¹¹ Viʼi mbàʼànkùm a nse ə ndì kwòʼə̀ mbi byìʼì wen byìʼàndo no wìʼ ə̀ nko bè ndiʼ əzen kəfo fà vəwenə. ¹² Wìʼ ko lu be zen gul nə̀ silva nə̀ təfo təko toghə nə̀ tənkì tə ndisə a vəwenə baʼlə̀ nə̀ tənkì tə nkòʼ mə nlèmtəmə̀ tò tətsèm nə̀ ə̀fo tsèm a və shɨtə̀ nə̀ asoŋ ə nshen nə̀ ə̀vi a və shɨtə̀ nə̀ nkòʼ mə̀ ə ko toghə, ə̀vi a və shɨtə nə̀ kəkas kə bàŋəkə, nə̀ ə̀vi a və shɨtə̀ nə̀ ngùʼsə sə̀ jùŋə sə fà vəwenə. ¹³ Wìʼ ko be a zen làməndà, njʉ̀sə̀, kələŋ mənzhiʼ mənlèmətə̀mə a və dzàŋə̀ nə̀ miyif bènə̀ flankincense, məlyʉ̀ʼ, məzhiʼ, kəbayn kə kukə, nyamsə mbuluʼ nə̀ byisə njɨ̀, təlyəŋ nə̀ nkansə shisə, nə̀ əkòs a diʼì Wùmə̀nsòŋ. ¹⁴ Viʼi mbàʼànkùm avenə lu gàʼ à Babilòyn la, “No ə̀fo ə juŋəvə no tsèm a wù tə̀ nkəŋ əkiʼi ə somə li əboʼsə nə̀ əghoʼ ə wu bènə̀ əbayn ə wu no tsèm ə dyʉ̀ li ko wù be lu yen!” ¹⁵ Viʼi mbàʼànkùm no vətsèm a və̀ nè mbàʼànkùm wenə̀ wen lu tɨmə no kəghaf byìʼàndo vəwenə fànə̀ la kə ngəʼ wen be à kwe vəwenə. Vəwenə lu ndì be kwòʼə̀ mbi a əgɨ̀ to la, ¹⁶ “Kə fànsə̀, kə fànsə̀ à ntə̀ʼ ə ghoʼo ghèn! Ghə̀ tə̀ nlafə a ndisə ko toghə be chiʼtə̀ ə̀wen ə wen nə̀ mfɨŋsə mu və shɨ̀tə̀ nə̀ gul nə̀ ngùʼsə sə̀ jùŋə sə bènə̀ təfo təko. ¹⁷ Əghoʼ ghenə no tsèm ə somə li tò kətemə kə zhʉ kə mùʼ.”

Vətì və vənkanuʼ nə̀ viʼi a və jèʼè a vənkanuʼ avenə viʼi a və shwèʼè tsu nə̀ ə̀vi a və zhɨ tò fa ə̀mu lu nti tò kəghaf, ¹⁸ zɨmə dì ando vəwenə yenə ando Babilòyn ə bolə̀ fələʼ fi kuʼu. “No ntə̀ʼ ə ghoʼo tsen nko təmə diʼ a nə̀ ntə̀ʼ ghèn!” ¹⁹ Vəwenə lu ə mpfʉ̀ʼʉ̀ kəbìʼ à vəwenə a tʉ be dì kwòʼə̀ mbi gàʼà la, “Kə fànsə̀, kə fànsə̀ à ntə̀ʼ ghoʼo ghèn a viʼi a və shyèʼè a ə̀mu ə̀ nlù ghoʼkə tò byìʼ wen lə̀. Ə̀fo vi tsentə̀ li ə̀ le tò kətemə kə zhʉ.”

²⁰ “Ghə̀ŋ vi a ghə̀ŋ ə tsi a kàŋ, ghə̀ŋ ə nsaŋlə̀. Ghə̀ŋ ə nsaŋlə̀ a viʼi Nyìngòŋ nə̀ viʼi ə ntɨm nə̀ nshə̀ʼtə̀sə sə̀ ghoʼkəsə byìʼàndo Nyìngòŋ ə sisə li kənyʉ̀ a ghə̀ ə̀ ne à ghə̀ŋ.”

²¹ Ntsɨ̀ŋ ngə̀ŋ ə̀ Nyìngòŋ ghoʼo tsen mù lyɨ̀ ə ngùʼ ghoʼo tsen ə̀ tem a tì ə̀mu ə̀ gàʼ la, “A lè ando və lu lyɨ̀ Babilòyn ə ntə̀ʼ ə ghoʼo ghèn ə tem ə shiʼsə no nə̀ kədyoʼkə kèn la və be lu yenə wen. ²² Wìʼ ko lu be zhʉ ando və bʉʼʉ təlyuŋ ko əzhʉ ando və toŋə fəndoŋ nə̀ təsoŋ fà ntə̀ʼ ghèn. No wìʼ muʼ a ghə̀ shwèʼè ə̀fo nə̀ avu ko lu be ndiʼ wenə̀ wen. Və ko lu be zhʉ ando wìʼ ə bvʉ̀ kəbayn ashyə̀. ²³ Wìʼ ko lu be yen əbayn ə kənkàʼtə̀ ghə̀ baynə a ntə̀ʼ ghèn. Wìʼ ko lu be zhʉ gɨsə viʼi və laməvə a shyə̀. Viʼi mbàʼànkùm ə̀ ndìʼ no viʼi vəghoʼkəvə a nse, wù be lobtə̀ viʼi nə̀ əshəŋə fənyoʼ.

²⁴ “Mənlyuŋ mə nshə̀ʼtə̀sə sə̀ ghoʼkəsə nə̀ mə viʼi Nyìngòŋ nə̀ mə viʼi vyi a və̀ nzhwilə̀ byìʼì əbyɨmə vəwenə tsèntə̀ dìʼ tò à wù kəvu.”

Əsaŋlə a ghə̀ ndìʼ a kàŋ

¹ Fa bàm ənyʉ̀ venə, mà zhʉ gɨsə sə̀ tosə sətsensə sə̀ kù fʉ̀ fa kàŋ sə à gàʼà ənòyn ə viʼi la, “Vəghəŋ ghoʼsə Nyìngòŋ! Ghə̀ bwòŋsə̀, ŋwòʼə̀ be kiʼ kədyòʼ. ² Ghə̀ soʼo tò nəmwèʼè be soʼo tò a ji ə tɨmə. Nyìngòŋ ə soʼo li ə̀ njèʼtə̀sə a ghə̀ ə̀ lobtə viʼi nse və tsi nə̀ wen lì. Ghə̀ bwensə̀ li ə̀ nloʼ wen ando ghə̀ tə̀ nzhwilə̀ viʼi shwèʼ ə wen.” ³ Vəwenə bè zɨ̀mə̀ gàʼ la, “Vəghəŋ ghoʼsə Nyìngòŋ! Fələʼ a fə fʉ̀ ando ghə̀ fwi a faŋ ə dʉsə kuʼu tò kuʼu.” ⁴ Vəchəʼ vi njʉ̀sə̀ kàʼ a məwum ə̀ nkàʼ wenə̀ ə̀fo zhwisəvə vi ə̀ kàʼ shiʼi a nse ə̀ ghoʼsə Nyìngòŋ a ghə̀ ə̀ ŋwʉʼ a kəfwoyn ə̀ gàʼ la, “Kə diʼ tò a lì, vəghəŋ ghoʼsə Nyìngòŋ.”

Əlam ə wàyn bi ənjɨ̀

⁵ Fà yi bàm, mà zhʉ əgɨ̀ ghə̀ gàʼ fʉ̀ ə̀ vì fa kəshi kə kəfwoyn kì la,

“Vəghəŋ ghoʼsə Nyìngòŋ vəghəŋ!

vəghəŋ vətsèm a və diʼì viʼi shyèʼ ə wen,

vəghəŋ vətsèm a və fàynə̀ wen ko wù dìʼ

wuto ko wù dìʼ wubwaʼ.”

⁶ Mà bè zhʉ ando kəfo kə kù tò sə à kù ə gɨsə nòyn ə viʼi, kù to nə̀ təfwan tə a mù, ko to sə à bwankə̀ əghʉ ghoʼghə gàʼà la, “Vəghəŋ ghoʼsə Nyìngòŋ vəghəŋ! Ghə̀ dìʼ Bobo Nyìngòŋ a ghə̀ ə kìʼ àdyoʼ ətsèm soʼo vəghəŋ. ⁷ Vəghəŋ ə nsaŋlə̀, kuʼsə̀ Klistò be ghoʼsə̀ wen byìʼàndo əzhʉ kwʉʼ li ə wàyn bi ənjɨ̀ lam. Wì wen a diʼ ntsèntə̀sə diʼ mu ghə̀ shɨtə̀ li ə̀wen ə wen. ⁸ Və̀ nku li kədyòʼ la ghə̀ moʼ ndisə bòŋ sə, laynə be ŋwòʼə̀” Ndisə asènsə ndìʼ ənyʉ̀ tɨməvə vi a viʼi Nyìngòŋ ə̀ nè.

⁹ Ntsɨ̀ŋ ngə̀ŋ Nyìngòŋ mù gàʼ à mò la, “Nyoʼo kənyʉ̀ kènkə la, ‘Njùŋ dìʼ à viʼi vyi a və laʼà la vəwenə vi ə̀ zhɨ əlam ə wàyn bi ənjɨ̀.’” Ghə̀ bè gàʼ à mò la, “əgàʼ ghenə lù fà Nyìngòŋ, diʼ nəmwèʼè.”

¹⁰ Mo Joyn shiʼi a nse la ma kəŋə ghoʼsə wen alì ghə̀ gàʼ à mò la, “Kə a mwòm! mà bè dìʼ wù shyèʼ ə̀ Nyìngòŋ to nə̀ wù əboʼsə nə̀ vəlèmə̀ vyə vi a və̀ nshɨ̀tə̀ ghàʼ nəmwèʼè yì a Yesò ə̀ ndiʼì. Ghoʼsə Nyìngòŋ.” Nəmwèʼè ayì a Yesò ə̀ nlù dìʼ a ndayn dìʼ kənyʉ̀ a kə gyàmtə̀ nshə̀ʼtə̀sə sə̀ghoʼkəsə la sə̀ nshə̀ʼtə̀ kənyʉ̀ kə Nyìngòŋ.

Wìʼ a ghə̀ ə̀ nyɨŋ a kwi əlyəŋ ə fəfəghə

¹¹ Mà sə kɨ̀blə̀ yen ando əkaŋ ə boʼmə̀, əlyəŋ ə fəfə ghə̀ tsenghə tɨmə à mò a shɨ. Əzhiʼ wìʼ a ghə̀ ə̀ ŋwʉʼ à yi kwì ə̀ ndìʼ, “Wu jùŋ yì a diʼì nəmwèʼè a ndiʼ Yesò Klistò.” Ghə̀ soʼo to ji tɨmə soynə viʼi kəbàyn ə wen. ¹² Ashɨ ə wen ə̀ mbàŋə̀ to nə̀ əlwàŋ əzhiʼ, mu ghə̀ chiʼi təsòʼ tə təfòyn à wen ə kətʉ no təghoʼo. Ghə̀ ə̀ nkì əzhiʼ a və nyòʼò à wen ə̀wen kènla no wìʼ zì ghə̀ kwòʼtə̀ kɨ̀ kənyʉ̀ a ghə̀ gàʼà əchò tò wen. ¹³ Ghə̀ ə̀ ndìʼ mu ghə̀ mòʼ ndisə mu və chʉ li a mənlyuŋ. Əzhiʼ a və ndzàŋə̀ wen tsu ə̀ ndìʼ la, “Əgàʼ ə Nyìngòŋ.” ¹⁴ Vəsugyèʼ və kàŋ ə mòʼ ndisə sə̀ fəfə be ŋwòʼə̀, ə̀ kùʼ a kwi təlyəŋ tə fəfətə sə̀ dzɨ̀mtə̀ dyʉ̀ nə̀ wen. ¹⁵ Ə nyì ngwələŋ tsen fʉ̀ fa wen əchʉ̀, lyɨmə no nànto, ghə̀ diʼ ə soyn ə zhɨ təloʼ tətsèm nə̀ wen. Ghə̀ ne ə̀ nsoʼo vəwenə kədyoʼkə, ghə̀ ne jèʼ ə tùʼlə vəwenə dìʼ tin ə fwi ə̀ Nyìngòŋ ə Tìʼ àdyoʼ ətsèm. ¹⁶ Ndisə shìsə a ghə̀ ə̀ moʼò lì ə̀ ndìʼ mu və nyòʼò li əzhiʼ tsenghə tsu ə̀ bè shiʼi ə̀ nyòʼ à wen əkəbì la, “Fòyn ə̀ təfòyn, nə̀ Bobo ə̀ vəbobo.”

¹⁷ Fà yi bàm mà mù yen ntsɨ̀ŋ ngə̀ŋ ə̀ Nyìngòŋ tsen ghə̀ ti a chʉzhʉ. Ghə̀ zɨmə̀ dzàŋ mənyin mì a mə̀ ntàynə̀ chò fa kàŋ no əgɨ̀ to la, “Ghə̀ŋ vi ə̀ tsèntə̀ ə̀ zhɨ̀ kətsi kə ghoʼo kə Nyìngòŋ.” ¹⁸ Ghə̀ŋ vi ə̀ tsèntə̀ ə̀ pfìʼ njòsə wèn ə̀ təfòyntə, njòsə̀wèn ə̀ tʉtʉ vəsugyèʼ, njòsə̀wèn ə̀ viʼi a və kiʼ kədyòʼ nə̀ njòsə̀wèn ə̀ təlyəŋ wenə̀ viʼi a və nyɨŋə à yi ətʉ nə̀ njòsə̀wèn ə̀ viʼi no vətsèm; ə̀vi a və diʼì fa ngə̀ŋ nə̀ ə̀vi a və diʼì əkòs. Ghə̀ŋ vi ə̀ pfiʼ njòsə̀wèn ə̀ viʼi vətokəvə wenə̀ viʼi vəbwaʼvə.

¹⁹ Mà mù yèn mu nyàm ətoʼ yì wenə̀ təfòyn tə mbi tə zhùŋtə̀ li nə̀ vəsugyèʼ və vəwenə soyn wìʼ yì a ghə̀ ə̀ ŋwʉʼ a kwi əlyəŋ yi wenə̀ vəsugyèʼ və wen. ²⁰ Və ghaʼ nyàm ətoʼ yì wenə̀ nshə̀ʼtə̀ kənlobtə yì a ghə̀ ə̀ ndìʼì əchwitə ndzɨ̀ŋsə lobtə̀ viʼi vyi a və̀ nku əchwitə à vəwenə bènə̀ ə̀vi a və̀ nghoʼsə̀ kənshyə̀ʼsə̀ kə wen à wen ə shɨ lì. Və mòʼ ə̀ shìʼsə vəwenə venə vəbò a nkwòŋ ə̀ zhìʼ mu və we li məkàyn tsu, vəwenə bu diʼ tò vəto. ²¹ Wìʼ yì a ghə̀ ə̀ ŋwʉʼ a kwi əlyəŋ yì shyələ̀ zhwilə viʼi a və̀ mfaŋə̀ nə̀ nyì ngwələŋ yì a ghə̀ mfʉ fà wen əchʉ̀ lì. Mənyin no ntsèm ə pfiʼ njòsə̀wèn ə̀ vəwenə kwʉ̀ʼ tò ando mə̀ nkòŋə̀.

Və ghaʼ Deblə̀ a mfɨŋ ngʉ̀ʼsə nkam

¹ Fa bàm ənyʉ̀ venə, mà yen ntsɨ̀ŋ ngə̀ŋ ə̀ Nyìngòŋ tsen ghə̀ shiʼì vì fa kàŋ. Ghə̀ ə̀ nkìʼ kənzàs kə nkwòŋ yì a ghə̀ ə shwemə shiʼi dyʉ̀ tò dyʉ̀ lì be kiʼ mfɨŋ ghoʼo à wen kəvu. ² Ghə̀ ghaʼ nyàm ə fànsə yì, no zhù ə mu yì a diʼì Deblə̀ à be diʼ Satan ə̀ kwiʼ wen nə̀ mfɨŋ yì a tì ngʉ̀ʼsə nkam. ³ Ghə̀ kwiʼ a lì ə̀ mòʼ shìʼsə nə̀ wen a nkwòŋ yì ə̀ shɨ̀tə̀ shwìn əchʉ yì à wen kətʉ ndi kə ghə̀ be à lobtə viʼi əzaʼa fa zhʉ a ngʉ̀ʼsə sènsə nkam ə me li. Əzhʉ aghenə ne cho ə və zàytə wen to fəshitə̀ fə zhʉ alə̀. ⁴ Fà yi bàm, mà yen Əfwoyn, bè nə̀ Viʼi a və̀ ŋwʉʼ a Əfwoyn avenə, ndìʼ mu və ku li kədyòʼ à vəwenə la vəwenə nsoʼo viʼi vətsenvə. Mà bè yèn əzhwi ə viʼi vyi a və tin tə tʉ vəwenə byìʼàndo vəwenə nshə̀ʼtə̀ əgàʼ ə Nyìngòŋ be dìʼì nəmwèʼè yì a Yesò ə̀ ndìʼsə̀. A ə̀ ndìʼ viʼi a və̀ ntyenə la vəwenə ko a ə̀ nghoʼsə̀ nyàm ətoʼ yì ko kənshyə̀ʼsə̀ kə wen kì ə̀ mù sə̀ diʼ kènla vəwenə shi li kəchwitə kə nyàm ətoʼ kì à vəwenə təchʉ̀ tətʉ ko à vəwenə a kwoŋ. Vəwenə bwènsə̀ lù fa pfʉ ə̀ sə̀ soʼo wenə̀ və Klistò a ngʉ̀ʼsə nkam. ⁵ Viʼi vəpfʉkəvə vətsenvə vi ə̀ nko bwènsə̀ lù fa pfʉ əzaʼa fa zhʉ a ngʉ̀ʼsə nkam sènsə me. Kènkə dìʼì mbì məlù ə viʼi fa pfʉ. ⁶ Njùŋ dìʼ ghə̀ no ndò a ghə̀ lu lù ə mbì məlù fa pfʉ, vəwenə diʼ viʼi və ŋwoʼvə Nyìngòŋ! Kənkùmtə̀ kəpfʉ kə ko bè kiʼ kənyʉ̀ ə lu nè nə̀ vəwenə. Vəwenə lu mbòŋsə̀ diʼ vəpfèm və Nyìngòŋ wenə̀ Klistò. Vəwenə lu tsèntə̀ ə nsoʼo a tì ngʉ̀ʼsə sènsə nkam.

Və soyn ə̀ zhɨ̀ Satan

⁷ A lu ndiʼ ando ngʉ̀ʼsə asènsə nkam me li, və shisə Satan fà wen a mfɨŋ yì, ⁸ ghə̀ fʉ ə̀ vì ə̀ dyʉ̀ ə lobtə təloʼ tə təshyə tə mbi tèn təkàʼ andiʼ Gog wenə̀ Magog la vəwenə tsentə a kəshi kə mùʼ ə̀ soyn. Viʼi təloʼ avenə lu ghoʼo to nə̀ kəsese kə̀ a mu mə nghoʼomə̀. ⁹ Mà be yen ando vəwenə fʉ ə̀ vì tò fa təshyə tə nse tə tsèm ə̀ kuʼ ə̀ dyʉ̀ nyɨŋ ə̀ kàʼ ntə̀ʼ ghoʼo yì a viʼi ə Nyìngòŋ ə̀ ntsi tsu alì əzhiʼ ə shiʼi fa kàŋ ə̀ mwès vəwenə no vətsèm. ¹⁰ Luwen və mu maʼ Deblə̀ yi a ghə̀ lobtə vəwenə ati mo əzhiʼ be nə̀ məkàyn. Kəshi a kenkə ndiʼ kəshi a və be moʼ shiʼ sə nə̀ nyam ə toʼ yi wenə nshə̀ʼtə̀sə kənlobtə shisə. Və lu nku ngəʼ a vəwenə nə̀nchwì nə̀ nəchʉʼ zaʼa no fa ze. ¹¹ Luwen ma mu yen Nyìngòŋ ghə̀ ŋwʉʼ a kəfwoyn kəfəfəkə. Ando ghə̀ fʉ a dayn, əkaŋ wenə nsə ə nsoməli dyʉ̀ to ghayn əmuʼ. ¹² A zhʉ a yi ma mu yen viʼi a və mpfʉ̀kəli, viʼi a ndiʼ ngesə̀ viʼi nə̀ vi a nko diʼ ngesə̀ viʼi ando vəwenə nti a shɨ kəfwoyn. Və nboʼli vəŋwàʼlə̀, ə be jisə boʼ ŋwàʼlə̀ tsen a ndiʼ ŋwàʼlə̀ bwòŋ. Və nsoʼli viʼi a və npfʉ̀ kə li a nyʉ a vəwenə ə ne ando və nyoʼo a ti vəŋwàʼlə̀ a vi. ¹³ Luwen, viʼi a və npfʉkə li a mù ə fʉli ə tɨmə Nyìngòŋ be soʼo vəwenə, ndə̀ŋndəŋ ando əpfʉ nə̀ loʼ vəmpfʉvə nse mbe ku viʼi a və npfʉkə li la Nyìngòŋ soʼo vəwenə a nyʉ̀ a vəwenə ə nè. ¹⁴ Luwen və mu moʼ əpfʉ nə̀ loʼ və mpfʉvənsə a nkwoŋ zhiʼ. Nkwoŋ ə zhiʼ a ghèn ndiʼ kənkùmtə̀ kəpfʉ. ¹⁵ Və ə maʼ li no ndo a zhiʼ wen nko diʼ a ti ŋwàʼlə̀ bwoŋ a nkwoŋ zhìʼ.

Əkaŋə ə fìghə nə̀ nse ə fi

¹ Fa əbàm nyʉ̀ na ghèn, ma yenə əkaŋ ə fìghə nə̀ nse ə fi mu əkaŋ ə mbì nə̀ nse ə mbì sə diʼ mù ghə̀ tə mè, boʼsə no nə̀ fwaynə ə ghoʼo ghə̀. ² Ma mu yen ndo Nyìngòŋ ə tensə Ntə̀ʼ ə laynə andiʼ Jelusalèm ə fi, ghə̀ sə shiʼi vi fa kàŋ mu və shɨtə li làbsɨ wen sə və làbsɨ wùwì la ghə̀ dyʉ̀ yèyn lɨmə wen. ³ Ma be zhʉ ghɨ ə to ə tsen ando ghə̀ fʉ̀ vi fa kəkɨ təfòyn ayi, ghə̀ gàʼ a mò la, “Yen a, Nyìngòŋ ə na ntsi wenə viʼi luwen. Ghə̀ na diʼ wenə vəwenə, vəwenə diʼ viʼi wen. Nyìngòŋ no fa wen a ngeŋ na diʼ wenə vəwenə. ⁴ Ghə̀ lu chì məshɨ no ə tsèm fa ashɨ nə̀ vəwenə ko pfʉ ə na be ndiʼ. Wìʼ ko bè diʼ lu kusə tebè shɨnsə, ko ghə̀ di, ko kəfòkə ə be zàfə tebè wìʼ byìʼì ando nyʉ̀ ə muvə chò li.”

⁵ Wìʼ yi a ghə̀ nyʉ̀ʼ a kəkɨ ə fòyn na yi ə mu gàʼ la, “Ghə̀ŋ yen a! Ma na nè ə nyʉ̀ ə tsèm ə bwensə ndiʼ to a fi.” Ghə̀ gàʼa a mò Joyn la, “Nyoʼo nyʉ̀ na venə. Və diʼ to no nəmwèʼè, kwʉ̀ʼʉ̀ ndiʼ no ndo byɨmə.” ⁶ Ghə̀ ngaʼa li mbe gaʼa a mò la, “Ənyʉ̀ ə tsèm ə kuʼu li! Ma diʼ Alfà be diʼ Omegà, mu à lə kəzìtə̀ nə̀ kəmwètə kə nyʉ̀ ə tsèm. Ma na ku mu no tèbè a ndò yi a ətoŋ mu nə̀ zɨmtə wen, a ghə̀ nyʉ ə faŋ kò ghə̀ lə lòʼ kəfo. Mu na mèyn ə na fʉ̀ fa, ə ghoʼomə yi a ghə̀ nè viʼi tsi. ⁷ A sòyn zhɨ no ndo mbyɨ a mà ku mu na mèyn a wen ə ndiʼ Nyìngòŋ ə wen, ghə̀ diʼ wàyn a mò. ⁸ A viʼi vyi a və əfwanə nə̀ viʼi vyi a və ko byɨmə a mò, nə̀ viʼi vyi a və nè nyʉ̀ vyi a və ko diʼ nə̀ laynə ə, nə̀ viʼi a və zhwilə viʼi nə̀ viʼi a və tsi nə̀ ki kò wenə lʉ̀mə, a kokiʼ vəwenə, nə̀ viʼi fənyoʼ nə̀ viʼi a və gumlə nshəʼsə nə̀ viʼi ə zho dzɨŋ no və tsèm, vəwenə nə̀ kiʼ kəshi kə ə vəwenə a nkwòŋ yi a əzhiʼ nə̀ bole tsu li mu və mòʼo li mɨ̀kayn tsu. Kəshi na kènkə le diʼ kənkùmtə̀ kə pfʉ.”

Jelusalèm ə fi

⁹ Ntsɨŋ Nyìngòŋ ə tsen fa ti ətsɨŋsə Nyìngòŋ shì sòmbo a sə nkiʼi əkaŋ vi sòmbo mu və lwinsə li nə̀ ngəʼ sə kəmwetə sisə tsu sòmbo li ə vi gàʼ a mò la “Vi, mà diʼ wùwì We Njɨ̀ a wù a diʼ ntsèntə̀sə viʼi vəbyɨmə və” ¹⁰ Kəzhwì kə Ŋwoʼkə be ghaʼ kwoʼtə ə ghomə, Ntsɨŋ Nyìngòŋ na yì ə lyɨ̀ kuʼ nə̀ mò akwi phèn ə tsen, ghə̀ dyef to alə, ə diʼ Jelusalèm a mò, mu à le Ntə̀ʼ ə laynə a ghə̀ lù fa kàŋ ə sə shiʼi vi. ¹¹ Ntə̀ʼ na ghèn nə̀ kiʼi əbayn ə ghoʼoghə Nyìngòŋ. Ntə̀ʼ na yi nə̀ baynə baynə boŋ to nə̀ ngùʼ ə nyemə ə tsen və toŋtə la jasɨbà be baynə chò tèbè kənkàʼtə̀. ¹² Ghə̀ ə kiʼi to mə mbàyn ə dyefə ə tsèn a və kwiʼ kaʼa, ghə̀ kiʼ təchʉ̀ njʉ̀sə̀ bò, no tèbe əchʉ̀ ə kò ə kiʼ Ntsɨ̀ŋ Nyìngòŋ tsu. A ndiʼ no tèbe achʉ̀ ə kò mu və nyòʼò li zhiʼ ngwaʼngə̀ŋ ə ngə̀ŋ nə̀ viʼi Islel ə mùʼ tsu. ¹³ Mbàyn na yi nə̀ kiʼi təchʉ̀ tə tàʼ ashə yi a əchʉ zhʉ̀ nə̀ saʼ fa tsù, kiʼ à tàʼ ashə yi a əchʉ zhʉ̀ nə̀ shwe fa tsù, kiʼ à tàʼ ashə gə̀kwì, kiʼ à tàʼ ashə ten. ¹⁴ Ghə̀ ndiʼ mu və bwòm a kwi əkɨ ə ngə̀ŋ njʉ̀sə̀ bò, a diʼ no kəchɨ kə ngə̀ŋ kə kò mu və nyòʼò li zhiʼ ə wù ə ntɨm tsu, a diʼ viʼi vyi a və shyèʼ a We Njɨ̀.

¹⁵ Ntsɨŋ Nyìngòŋ yì a ghə̀ nə̀ gaʼa a mò nə̀ kiʼi fɨ̀mbàŋ fifə və shəʼə əfo tsu mu və shɨtə nə̀ gul. Ghə̀ nə̀ diʼ ə shəʼ ə ntə̀ʼ ayi nə̀ əchʉ yi ə nə̀ mbàyn ntə̀ʼ na yì nə̀ fɨ̀mbàŋ a fenfə. ¹⁶ Ntə̀ʼ na yì ndiʼ təshyə titə tə tsèm diʼ to ndə̀ŋndəŋ. Məghoʼ yi ə ndiʼ to nə̀ mə̀dyefə yi. Ntsɨŋ Nyìngòŋ na yì ə shəʼ ntə̀ʼ na yi nə̀ mbàŋ wen na yì, ghə̀ sə dyefə dyʉ̀ ə misɨ̀ nkam nə̀ misɨ̀ əghɨ ə tayn, dyə̀fə kuʼu to mə ali. ¹⁷ Ntsɨŋ na yi shəʼə li təwen tə mbàyn na yi, tə sədiʼ ntàmsə məwumə ntʉfə njʉ̀sə̀ ntʉfə ə kwuʼ a kwì wi. Ghə̀ nə̀ shəʼə mbàyn ayi to nə̀ wìʼ. ¹⁸ Ə wèn mbàyn na yì ə ndiʼ mu və kwiʼ nə̀ jasɨbà, no tèbe ghò a ntə̀ʼ ayì diʼ mu və shɨtə nə̀ nkàyntə̀ gol, ghə̀ baynə chò to nə̀ ə kənkàʼtə̀. ¹⁹ Ətsi ə mbàyn ayi ə ndiʼ mu və lafsə li nə̀ tənki tə ngùʼ sə jùŋ tə to tə tsèm. Ngùʼ ə mbì ndiʼ jasɨbà, kəkumtəkə ə diʼ sàfayà, ghətsen diʼ agàt, ghətsen diʼ emelà. ²⁰ A nə̀ kumtə onìs, ntʉfə diʼ kànelìyà, sòmbo diʼ kɨ̀lisolìt, fwomə diʼ belil, abʉ̀muʼ diʼ topàs, əwùm diʼ kɨ̀lisofàs, njù ə mùʼ diʼ jasìn, njʉ̀sə̀ bò diʼ ametìs. ²¹ Təchʉ̀ tə mbàyn na ti nkiʼi ənchiʼ mu və nyùʼtə nə̀ tɨ̀fwo tə, no tèbe kəchiʼ kə kò diʼ ashɨ ə tɨfwo, ghə̀ boŋ. Ji ə to yì a ghə̀ ndiʼ a ntə̀ʼ ayì ndiʼ mu və chisə nə̀ nkàyntə̀ gul, ghə̀ baynə chò to nə̀ ə kənkàʼtə̀.

²² Ma ko yen ngə̀ŋ Nyìngòŋ a ntə̀ʼ na yi byìʼì ando ngə̀ŋ Nyìngòŋ tsu ndiʼ to no Bobo Nyìngòŋ, ə Tiʼi ədyoʼ ə tsèm no nə̀ ngə̀ŋ wen wenə We Njɨ̀. ²³ Ntə̀ʼ na yì ko kəŋ tebè la chwìchwì kò sàŋ nə̀ baynə tsu byìʼì ando əbayn ə Nyìngòŋ nə̀ diʼ tsu, We Njɨ̀ ə be diʼ làm tsu. ²⁴ Viʼi təloʼ tə tsèm lu nə̀ jèʼe əbayn na ghenə, tə təfòyn tə mbi tə tsen əghoʼ ə vəwenə ə vi nə̀ kəwenkə tsu. ²⁵ Və ko nə̀ chiʼi tebè təchʉ̀ tə mbàyn na titə byìʼì ando chʉʼ ko lù be jɨ. ²⁶ Təloʼ tə tsèm tə lu lyɨ əghoʼ ə vəwenə ə vi nə̀ wenə ghə̀ a ntə̀ʼ na ghèn. ²⁷ Kəfo kə ko lu kwen tebè ati ntə̀ʼ na ghèn, ko kə laynə. Wìʼ la ghə̀ nè nyʉ̀ kəməŋ kò wìʼ dzɨŋ lu kwen tebè tsu. A lu nə̀ kwen to viʼi vyi a və nyoʼo li təzhiʼ tə vəwenə a ŋwàʼlə̀ əbwòŋ nə̀ We Njɨ̀.

¹ Fa yi abàm, Ntsɨŋ Nyìngòŋ na yì ə be diʼ mu mi a mò a ghə̀ kù tsi, ghə̀ baynə to alə to nə̀ kənkàʼtə̀. Mu a mi nə̀ fʉ̀ vi fa kəkɨ kə fòyn Nyìngòŋ ə wenə We Njɨ̀, ² Shiʼi to a ntìntìn ji a ntə̀ʼ ə ghoʼo na yi. A ndiʼ a benə mù na ghèn, nkoʼ mì a mə nə̀ nè viʼi tsi diʼ tsu kumə ashɨ. Fɨko fə mùʼ fə nə̀ kumə ashɨ aghayn njʉ̀sə̀ bò a ngʉ̀ʼ, kumə to zhʉ̀ ə mùʼ a sàŋ. Və nə̀ lyɨ təfʉ ti tə chʉʼʉ to viʼi təloʼ tə tsèm tsu. ³ Nò tèbe gho yi a Nyìngòŋ ə sə diʼ mù ghə̀ telə li ko lu ndiʼ tebè a ntə̀ʼ na yi.

Kətsi kə fòyn Nyìngòŋ ə nə̀ ə ndiʼ a ntə̀ʼ na ghèn, We njɨ̀ ə boŋ diʼ. Viʼi və shyèʼ və Nyìngòŋ ə lu nə̀ gumlə Nyìngòŋ a ntə̀ʼ na ghèn. ⁴ Vəwenə lu yenə əkɨ ə Nyìngòŋ, a və nyòʼ əzhiʼ ə Nyìngòŋ achʉ̀ kətʉ nə̀ vəwenə. ⁵ Əchʉʼ ə jɨghə ko bè lu diʼ. Vəwenə ko bè lu kəŋ tebè vəlamə kò chwìchwì byìʼì ando Bo Nyìngòŋ lu ndiʼ əbayn a vəwenə, a wenə vəwenə nə̀ soʼo əfòyn to məzhʉ̀ ə tsèm.

Ə vi ə Yesò

⁶ Ntsɨŋ Nyìngòŋ ayi ə mu gàʼ a mò la, “Ənyʉ̀ venə a mà gàʼa lə ne diʼ to no nəmwèʼè, kwʉ̀ʼʉ̀ ando no ndo byɨmə. Bobo Nyìngòŋ yi a ghə̀ kù kəzhwì kə wen a nshə̀ʼtə̀ sə ghoʼsə tɨmə Ntsɨŋ Nyìngòŋ la ghə̀ diʼ nyʉ̀ vyi a və sə kəŋ ə fʉ̀ a viʼi və shyèʼ və nə̀ Nyìngòŋ ndiʼ vəwenə nə̀ kɨ.”

⁷ Yesò gàʼ la, “Ghə̀ŋ zhʉtə, ma vi to luwen. Njùŋ nə̀ diʼ a viʼi vyi a və zhʉ ə wʉ̀ nyʉ̀ vyi a və diʼi a ŋwàʼlə̀ ntɨm Nyìngòŋ ə ashə.”

⁸ Ənyʉ̀ na venə ə tsèm ne diʼ mu à nə̀ yen to no mo Joyn ə be zhʉ. A ndiʼ ndo mà zhʉ mwetə ə be yen, ma fəŋ ashɨ nə̀ Ntsɨŋ Nyìngòŋ na yì a ghə̀ diʼi nyʉ̀ na venə a mò ə gumlə wen. ⁹ Alì ghə̀ gàʼ a mò la, “kə wù mwomsə! Ma shyèʼ a Nyìngòŋ ə to nə̀ wù nə̀ vəlemə vyə, mu à le nshə̀ʼtə̀ sə ghoʼsə nə̀ viʼi və tsèm vi a və zhʉ ə wʉ̀ nyʉ̀ vyi a və diʼi a ŋwàʼlə̀ ashə. Wu gumlə to Nyìngòŋ!” ¹⁰ Ntsɨŋ Nyìngòŋ na yì ə be gàʼ a mò la, “kə wù lyomtə nyʉ̀ vyi a və gàʼa la və fʉ̀ a ŋwàʼlə̀ ashə a viʼi byìʼì ando zhʉ̀ na yi sə boʼsə. ¹¹ Wìʼ yi a ghə̀ tsi ntsìnə̀ kəməŋ nə̀ faŋ ə nə̀ tsi to ntsìnə̀ kəməŋ, a wìʼ yi a ghə̀ kiʼi kwoʼtə ə əbɨghə faŋ ə nə̀ kiʼ to kiʼi, a wìʼ yi a ghə̀ diʼi atì-ati faŋ ə nə̀ nè to nyʉ̀ vyi a və diʼi atì-ati, a wìʼ yi a ghə̀ diʼi nə̀ laynə ə faŋ ə ndiʼ to nə̀ laynə ə.”

¹² Yesò gàʼ la, “Ghə̀ŋ zhʉtə, ma vi to luwen nə̀ əmoʼtə a ghə̀ŋ, diʼ ə ku no tèbè a ndò to ndə̀ŋndəŋ ndo ghə̀ tə nə̀ shyèʼ. ¹³ Ma diʼ Alfà be diʼ Omegà, mu à le kəzìtə̀ nə̀ kəmwètə kə nyʉ̀ ə tsèm.”

¹⁴ Njùŋ ne diʼ a viʼi vyi a və shʉ̀ ndisə vəwenə, sə laynə, vəwenə ə sə kiʼ kədyòʼ ə phiʼ ashɨ a fəkoʼ yi a ghə̀ kù bwoŋ, be kiʼ kədyòʼ ə chò fa chʉ̀ mbàyn ə kwen a ntə̀ʼ. ¹⁵ Alì viʼi vyi a və fàŋ abàm ə mbàyn nə̀ diʼ viʼi vyi a və nè nyʉ̀ kəməŋ nə̀ viʼi fənyoʼ nə̀ viʼi vyi a və tsi nə̀ ki kò lʉ̀mə, a ko kiʼi vəwenə nə̀ viʼi vyi a və zhwilə viʼi vətsenvə ne viʼi a və gumlə nshəʼsə nə̀ viʼi vyi a və zhodzɨ̀ŋ be nè nyʉ̀ ə dzɨŋ.

¹⁶ “Nò mò Yesò tɨm li Ntsɨŋ ghom a ghə̀ŋ nə̀ nyʉ̀ venə la ghə̀ŋ shə̀ʼtə̀ a ənoyn ə viʼi və byɨməvə. Ma diʼ mu mà fʉ̀ fa ngwaʼ ə ngə̀ŋ nə̀ Devìt be diʼ fədzɨ̀ŋ fə boʼòngə̀ŋ boʼòngə̀ŋ fifə a fə baynə no nànto.”

¹⁷ Kəzhwì kə Ŋwoʼkə wenə Wi We Njɨ̀ nə̀ gàʼa la, “Vi a Bobo Yesò.” Nò ndo yi a ghə̀ zhʉ kənyʉ̀ kènkə nə̀ diʼ to mə ə gàʼ la, “Vi a Bobo Yesò.” Ətoŋ a mu nə̀ zɨmtə no ndo, ghə̀ vi. Ghə̀ nə̀ koŋə, ghə̀ shi mu mì a mə nè viʼi tsi ko andiʼ la ghə̀ loʼ no kəfo.

Ə mwetə

¹⁸ Nò mò Joyn nə̀ ku kətyiftə no tèbè a ndò yi a ghə̀ zhʉ nyʉ̀ vyi a Nyìngòŋ ə shə̀ʼtə a ŋwàʼlə̀ ashə. A kuʼsə no ndo kənyʉ̀ tsu, a Nyìngòŋ ə kwʉ̀ʼsə ngəʼ sisə a və nyoʼ a ŋwàʼlə̀ na ghèn a wen, ¹⁹ à fàbtə̀ no ndo kənyʉ̀ a ntìntìn nyʉ̀ na ghèn a və diʼi a ŋwàʼlə̀ ashə, a Nyìngòŋ ə shi ə fə wen ashɨ fəkoʼ yi a ghə̀ fəŋ fa fəkoʼ yi a fə kù bwoŋ be shi tamə kəshi kə wen fa Ntə̀ʼ ə laynə yi a və nyoʼ a ŋwàʼlə̀ ashə.

²⁰ Yi a ghə̀ shə̀ʼtə nyʉ̀ na venə gàʼ la, “Kə diʼ nəmwèʼè. Ma vi to luwen!”

Amèyn. Vi a Bobo Yesò!

²¹ Bobo Yesò ndiʼi ətɨm ə jùŋə ghə̀ nə̀ wen a viʼi Nyìngòŋ və tsèm. Amèyn.