Gàlesìyà

Ŋwàʼlə̀ Bol a viʼi

Galesìyà

Tʉ nyʉ̀ a və diʼ a ŋwàʼlə̀ ghèn

Andiʼ to ando və zìtə̀ sə shə̀ʼtə̀ ntɨm ə jùŋə Yesò, ghə̀ zìtə̀ sə kwi dyʉ̀ a təloʼ tə tɨm, viʼi sə bèmə̀ la kə lə diʼ la no ndò diʼ nghʉ̀ əsoʼ Mosìs mibu ghə̀ a ndiʼ no nkàyntə̀ wù ə byɨmə mu lo. Bol sə nyoʼtə ə diʼi la wìʼ ko diʼ nghʉ to əsoʼ Mosìs mibu ghə̀ ne ghə̀ ndiʼ no nkàyntə̀ wù byɨmə. Ghə̀ nkəŋ ə diʼ la ji ə jùŋ yì a wìʼ diʼ chò fa tsù ə ndiʼ wenə Yesò amuʼ diʼ to azhʉ̀ a ghə̀ byɨmə a wen. A diʼ to ji na ghèn la əmùʼ lə a Nyìngòŋ ə lyɨ viʼi və tsèm fa tsù a viʼi kənyʉ̀ kətɨməkə.

Bol ə nyòʼò ŋwàʼlə̀ na ghèn a viʼi və byɨməvə a Gàlesìyà ə tyɨftə vəwenə nə̀ ziʼi yì a ghə̀ diʼ nəmwèʼè kumə əbyɨmə, ndi kə vəwenə a ndzɨ̀mtə̀ əziʼi ə dzɨŋ na ghenə.

Ghə̀ zìtə̀ ŋwàʼlə̀ a ghèn ə gàʼ ə diʼ to no la ghə̀ diʼ wù ntɨm ə Yesò Klistò. Ghə̀ gàʼa ə diʼ la à dzàŋ to no Nyìngòŋ dzàŋ wen a wù ntɨm ə Yesò Klistò, a nko dzàŋə wìʼ.

Jì a və gəsə ŋwàʼlə̀ ghèn fa tsu

Ə zìtə̀ (1.1-10)

Kədyòʼ kì a Bol nkiʼi to nə̀ wù ntɨm (1.11–2.21)

Bol ə gàʼ làynsə nyʉ̀ kùmə̀ Ntɨm ə Jùŋə byìʼì ətyɨm ə jùŋə ghə̀ ə Nyìngòŋ (3.1–4.31)

Wù byɨmə diʼ fa wen a ngəŋ nə̀ nyʉ̀ a ghə̀ diʼ nè (5.1–6.10)

Ə mwètə̀ (6.11-18)

Ətoŋtə fa Bol

¹ A nyòʼò mò Bol nyòʼò ŋwàʼlə̀ ghèn. Ma diʼ wù ə ntɨm ko andiʼ la à ghʉ viʼi. A ko tsuʼ wìʼ tsuʼ mo. A tsuʼ Yesò Klistò wenə Nyìngòŋ ə Tìʼ yi a ghə̀ nlùsə wen fa pfʉ ntsuʼ mo la ma ndiʼ wù ntɨm. ² Yo və vəlemə və byɨmə vì a və diʼ ashen ə tɨmə ətoŋtə a ghə̀ŋ ntsèntə̀sə viʼi və byɨməvə vyi a və diʼi shə ə Gàlesìyà.

³ Nyìngòŋ ə Tìʼ vəghəŋ wenə Bobo Yesò Klistò ə diʼi ətyɨm ə jùŋə ghə̀ a ghə̀ŋ, ə be ku mbwaʼmə a ghə̀ŋ. ⁴ Yesò ə nku li wen ə wen ə pfʉ byìʼì mbyɨsə vəghəŋ ə bwoŋsə vəghəŋ fa mbyi ghèn a mbyɨ ə ghoʼ tsu lə̀. A diʼ to kənyʉ̀ ki a Nyìngòŋ ə Tìʼ vəghəŋ ə nkəŋə. ⁵ Ma jɨ̀mə̀ la viʼi Əkuʼsə Nyìngòŋ to məzhʉ̀ ə tsèm. Amèyn.

Ntɨm ə jùŋ ə tsen ko be diʼ

⁶ Ma diʼ nə̀ əkaynə la ghə̀ŋ zaŋsə li kaʼkə fa bàm ə Nyìngòŋ yi a ghə̀ ndzàŋ ghə̀ŋ byìʼì ətyɨm ə jùŋə ghə̀ ə Klistò, luwen ghə̀ŋ sə dzɨ̀mtə̀ dyʉ̀ nə̀ ntɨm ə kədyàŋ. ⁷ Ma ko gàʼà tebè la ntɨm ə jùŋə tsen be diʼ. Ma gàʼà la viʼi vətsenvə sə boŋsə sàsə̀ ətof ə ghəŋə, mwomsə ə nkwitə ntɨm ə jùŋ byìʼì ə Yesò. ⁸ Alì, no tèbe wìʼ fa yès kò ntsɨ̀ŋ Nyìngòŋ fa kàŋ sətsèn be shə̀ʼtə̀ ntɨm, ghə̀ diʼ nəkwoŋ fa yi a yès ə nshə̀ʼtə̀ li a ghə̀ŋ, Nyìngòŋ moʼ ngəʼ a kətʉ wìʼ ayi. ⁹ Yès ə tə ə gàʼ a ghə̀ŋ, ma sə be gàʼà kwʉʼsə luwen la, wìʼ sətsen ə nshə̀ʼtə̀ ntɨm ə kədyàŋ a ghə̀ŋ, a kodiʼ yi a ghə̀ŋ ə nzhʉ̀ fa yès, Nyìngòŋ a moʼ ngəʼ a kətʉ wìʼ ayi.

¹⁰ Kə le diʼi luwen la, ma ne kənyʉ̀ ki a viʼi nkòŋ mò mu ki a Nyìngòŋ a kòŋ lo? A le diʼ la ma ne la viʼi ə nsaŋlə̀ mu? Mà sətsen ə nkəŋ ə ne la viʼi ə nsaŋlə̀, ko ma be a ndiʼ wù ə shwèʼè ə Klistò.

Ji a Bol nkaʼkə a wù ə ntɨm

¹¹ Vəlemə vwomə a byɨmə, ma kəŋə la ghə̀ŋ ə kɨ la ntɨm ə jùŋ yì a ma shə̀ʼtə̀ ə ko lù fa wìʼ. ¹² Ma ko tə zhʉ ntɨm na ghèn fa wìʼ, wìʼ ko tə ziʼi kənyʉ̀ a mò. A tə diʼ no nkàyntə̀ Yesò Klistò a ghə̀ tə diʼ nyʉ̀ na venə a mo no tsèm. ¹³ Ma kɨli la ghə̀ŋ nzhʉ li ji yi a ma ə ntsi to ando ma mbo dzɨ̀mtə̀ ji shisə a viʼi Jus nkuʼsə Nyìngòŋ fa tsu. Ghə̀ŋ kɨli to ando ma ntsuʼ kəghʉ kə nòyn ə viʼi və byɨməvə no nànto be mwomsə ə myetə vəwenə. ¹⁴ Ma ə nkɨli ə dzɨ̀mtə̀ ji shisə a viʼi Jus nkuʼsə Nyìngòŋ fa tsu chò tebe mbvòʼò ghom a ndiʼ viʼi Jus, ghʉ kətʉ tsu no nànto ntsi ntsìnə̀ a vətìʼ vwomə ntsi.

¹⁵ Alì, Nyìngòŋ a ghə̀ ntsuʼ mo mibu və bwi mò, ə dzàŋ mò byìʼì ətyɨm ə jùŋə ghə̀ wen la mà ə shyèʼè a wen. ¹⁶ A ndiʼ ando Nyìngòŋ ə nkòŋ ə diʼ Wàyn wen a mò ndiʼ mà shə̀ʼtə̀ ntɨm ə jùŋ kùmə̀ wen, a viʼi a nko diʼ viʼi Jus, ma nko dyʉ̀ ə bèm kənyʉ̀ a wìʼ. ¹⁷ Ma ko nkuʼ no tèbe a Jelusalèm ə bèm kənyʉ̀ a viʼi ntɨm vyi a və sə ndiʼ a mo ambì. Ma boŋsə lù to lù dyʉ̀ a loʼ Alabìyà ə lù fa tsu ə bwensə vi to a Dàmasɨkùs.

¹⁸ Ma ne kuʼ a Jelusalèm no abàm ə ngʉ̀ʼ sə tàʼ ə yen Bità, yo wen ə tsitə mətsi njʉ̀sə̀ tàyn. ¹⁹ Ma ko be yen wù ə ntɨm ə tsen tsu a bwen to Jems, à ndiʼ lèmə̀ Bobo Yesò. ²⁰ Kənyʉ̀ kèn a ma nyòʼò a ghə̀ŋ lə diʼ to nə̀ nəmwèʼè. Nyìngòŋ ə kɨ la ma ko zhò ndzɨ̀ŋ! ²¹ Ma ne lù fa Jelusalèm ə ndyʉ̀ ashə ə Silìyà nə̀ Sìlisìyà. ²² A ndiʼ ali viʼi a və ndiʼ a ntsèntə̀sə viʼi vyi a və byɨmə Klistò a ashə Jùdiyà ə nko kɨ mo. ²³ Vəwenə ə nzhʉ̀ Nyʉ̀ to zhʉ̀ a viʼi ngàʼà kùmə̀ mò la, “Wìʼ yi a ghə̀ tə ntsuʼ kəghʉ kə vəghəŋ fa ambì lì ə bwensə li sə shə̀ʼtə̀ kənyʉ̀ kumə əbyɨmə yì a ghə̀ tə nkəŋə la ghə̀ mè.” ²⁴ Vəwenə mù sə bwomsə Nyìngòŋ byìʼì mò.

Viʼi ntɨm vətsenvə ə byɨmə la Bol diʼ wù ntɨm

¹ A ndiʼ abàm ə ngʉ̀ʼsə njʉ̀sə̀ kàʼ, ma be bwenə kuʼ a Jelusalèm yo Bànabàs. Ma mbe lyɨ Taytùs. ² Ma nkuʼ tsu byìʼì ando Nyìngòŋ ə diʼi a mò la ma diʼ ə kuʼ. A ndiʼ to ando ma diʼi tsu, ma nyoʼtə gàʼ to fa abàm fa abàm yo viʼi vyi a və ndiʼ tʉtʉ ntsèntə̀sə viʼi vəbyɨməvə a Jelusalèm, ə shətə shə̀ʼtə̀ ntɨm ə jùŋ yì a ma ə nshə̀ʼtə̀ a viʼi a nko diʼ viʼi Jus. Ma ə nshə̀ʼtə̀ ali ndiʼ shyèʼ yì a ma ne luwen nə̀ yi a mà tə nè, kə ghə̀ lə lè to kədyàŋ. ³ Taytùs ndiʼ to yo wen ali kò və lu kàyn la və diʼ ə shətə ndyə̀ wen no tèbe ando ghə̀ ndiʼ wù ə Gɨ̀lìs. ⁴ Kənyʉ̀ a kèn la və shətə ndyə̀ Taytùs ə fʉ mu à lùsə viʼi və byɨməvə kənlobtə vətsenvə tsu, a və vi nyoʼtə kwen a yès a ntìntìn ə sə mwòmsə ə yen la yes ə tsi ntsìnə̀ yi a yes ə tsi fa yes a ngəŋsə yo və Yesò Klistò a kənyʉ̀ kəmùʼ ale lo. Vəwenə ə kəŋ to ji ə bwensə nè yès ndiʼ əkòs a əsoʼ ə viʼi Jus. ⁵ Yès ə nko ə byɨmə kənyʉ̀ na ki no tebe a fəshinə fəzhʉ no fa mpfen, byìʼì ando yès ə kəŋə la ntɨm ə jùŋ ə ghèn a diʼ nəmwèʼè lə faŋ to ghayn ə mùʼ a ghə̀ŋ.

⁶ Viʼi vi a və nlyɨ la a diʼ tʉtʉ tsu nko be kiʼ kənyʉ̀ ə kwʉ̀ʼsə akwi kənyʉ̀ yi a ma ziʼi. Ko vəwenə ndiʼ tèbe tʉtʉ ko vəwenə ko diʼ, na ki ə ko diʼi tebè kənyʉ̀ kə tsen kə a mò byìʼì ando Nyìngòŋ ə ko ki fa kəʼ la wìʼ diʼ ndo lo. ⁷ Vəwenə ə mboŋsə li yen la Nyìngòŋ ə wè li shwèʼ a ghenə a mo a kəvu la mà shə̀ʼtə̀ ntɨm ə jùŋ a viʼi a ko diʼ viʼi Jus, ndə̀ŋndəŋ to ando ghə̀ ə mbe wè a kəvu a Bità la ghə̀ shə̀ʼtə̀ a viʼi Jus. ⁸ Nyìngòŋ a ghə̀ ne la Bità ə ndiʼ wù ntɨm a viʼi Jus diʼ to wen yi a ghə̀ ne la mà ə ndiʼ wù ə ntɨm a viʼi a ko diʼi viʼi Jus. ⁹ A sə diʼ to ando Jems wenə Bità nə̀ Joyn a ndiʼ no nàʼ tovə ghaʼ nyʉ̀ a ntsèntə̀sə ə viʼi vəbyɨməvə yen la Nyìngòŋ ə diʼi li ətyɨm ə jùŋə ghə̀ a mò ə ne ma sə be shə̀ʼtə̀ ntɨm ə jùŋ na ghèn, vəwenə ku kəvu a yo Bànabàs, ə diʼi la yo vəwenə sə diʼ to a kənyʉ̀ kəmùʼ. Yo vəwenə mù ghʉ la, yès a nshə̀ʼtə̀ ntɨm ə jùŋ a viʼi a ko diʼ viʼi Jus vəwenə shə̀ʼtə̀ a viʼi Jus. ¹⁰ Vəwenə ə be gàʼ ə kwʉ̀ʼsə to la kə yès ne lyesə ə ngyàmtə̀ viʼi kəfem, a diʼ to kənyʉ̀ ki a ma kòŋ no nànto ə nè.

Bol kəŋkə̀ a Bità a Antìyòk

¹¹ A ndiʼ ando Bità nvi a Antìyòk, ma nkəŋkə li ə wen to ashɨ ə̀ viʼi byìʼì ando kənyʉ̀ ki a ghə̀ ne nko diʼ kənyʉ̀ kətɨməkə. ¹² A ndiʼ mibu Jems ə tɨm viʼi la və vi tsu, Bità ə nzhɨ̀ wenə viʼi a nko diʼ viʼi Jus, ko və shətə li ndyə̀ vəwenə. Viʼi a vyi vì no zhʉ̀ko, Bità ə zìtə̀ sə kòtə̀ abàm ko ghə̀ be zhɨ̀ tebè wenə viʼi kətɨm na vi byìʼì ando ghə̀ ə fwàynə̀ viʼi vyi a vəwenə ndiʼ la, və diʼ ə shətə ndyə̀ viʼi ətɨm vyi a və byɨmə li. ¹³ Viʼi Jus vətsenvə ə sə be ne to nə̀ wen, no tèbe Bànabàs ə shəmə kənyʉ̀ kə kəndzɨ̀ŋtə̀ na kènkə. ¹⁴ A sə diʼ ando mà yen la vəwenə ne nyʉ̀, ko diʼ nyʉ̀ ə tɨməvə to ando ntɨm ə jùŋ yì a ghə̀ diʼi nəmwèʼè ə nziʼi, ma gàʼ a Bità to ashɨ ə viʼi və tsèm ə bèm la, “Wù jeʼ ale ə ndiʼ wù ə Jus, tsi to nə̀ wù kətɨm, boŋsə kaynə la viʼi kətɨm ə ntsi to nə̀ viʼi Jus a?

¹⁵ “Vəghəŋ no fa vəghəŋ a ngeŋ diʼ viʼi Jus to no ando və mbwi vəghəŋ, ko ndiʼ la vəghəŋ diʼ viʼi kətɨm vi a və gàʼà la à diʼ viʼi nyʉ̀ ə byɨvə, ¹⁶ alì kɨ la və ko ghʉ tebè to la wìʼ diʼ nti a nkayn byìʼì ando ghə̀ ghʉ Əsoʼ viʼi Jus. Wìʼ diʼ nti a nkàyn azhʉ̀ a ghə̀ byɨmə a Yesò Klistò. Vəghəŋ ə sə diʼ mù vəghəŋ be byɨmə a Yesò Klistò ndiʼ vəghəŋ ə ndiʼ a ji tɨmə ashɨ Nyìngòŋ. Əsoʼ ə zizi ko ghə̀ lù ne la wìʼ ə nti a nkàyn ashɨ Nyìngòŋ. ¹⁷ Alì vəghəŋ sətsen ə mwomsə ə nti a nkàyn a shɨ ə Nyìngòŋ byìʼì ando vəghəŋ və Yesò diʼ amuʼ, ə be yenə la vəghəŋ ne mbyɨ, kə a ndiʼi la Yesò ə nè la vəghəŋ ə ne mbyɨ mu? Kə ko diʼ alì no fa mphen! ¹⁸ Mà sətsen kaʼkə be nè kənyʉ̀ mu ma tə tensə, a kə a diʼi la ma kwaʼa li Əsoʼ. ¹⁹ Mà tə ntsi a tyi Əsoʼ alì ko ndiʼ la ghə̀ gyàmtə̀ mò. Luwen ma nghʉsə soʼ na yi ndi ə ntsi to kuʼsə Nyìngòŋ. ²⁰ Və bayntə li mò a kəntò yo Klistò. Mà sə diʼ luwen, ko ma be tsi fa mo a ngeŋ, à sə tsi Yesò a mò tyɨm. Ə ntsìnə̀ yì a ma tsi luwen diʼ byìʼì əbyɨmə yì a ma kiʼi a Wàyn Nyìngòŋ yi a ghə̀ nkòŋ mo ə pfʉ byìʼì mò. ²¹ Mà zizi ko ma lu tensə ətyɨm ə jùŋə ghə̀ Nyìngòŋ. Wìʼ sətsen sə diʼ ndiʼ ti a nkayn wenə Nyìngòŋ byìʼì to ando ghə̀ ghʉ Əsoʼ, à ne ndiʼ la Yesò mpfʉ to kədyàŋ.”

Wù zhəʼtə a soʼ mu a byɨmə lo

¹ Ghə̀ŋ nkoyn ə viʼi Gàlesìyà venə! Və lùʼ ghə̀ŋ lùʼu mu? A və tə diʼ mwetə to no ando və ə bayntə Yesò Klistò a kəntò a ghə̀ŋ! ² Ghə̀ŋ shə̀ʼtə̀ kənyʉ̀ kəmùʼ ken a mò. Ghə̀ŋ shə̀ʼtə̀ a mò la, Nyìngòŋ nku kəzhwì kə wen a ghə̀ŋ byìʼì ando ghə̀ŋ ghʉ Əsoʼ mu ghə̀ nku byìʼì ando ghə̀ŋ zhʉ̀ ntɨm ə jùŋ ə byɨmə lo? ³ Ghə̀ŋ dzɨŋtə ghò alə a? Ghə̀ŋ tə zìtə̀ ə sə tsi byìʼì Kəzhwì kə Nyìngòŋ, ə sə kəŋ ə tsì ə mwetə nə̀ kədyoʼkə ngeŋsə ə ghə̀ŋ byìʼì ghò? ⁴ Kə lə diʼ la ghə̀ŋ tə yenə ngəʼ no nànto alə to kədyàŋ mu? Ghə̀ŋ ə zizi ko ghə̀ŋ lu yen ngəʼ alì to kədyàŋ. ⁵ Nyìngòŋ ə nku kəzhwì kə wen a ghə̀ŋ ə be nè nyʉ̀ ə kaynəvə a ghə̀ŋ a ntìntìn byìʼì ando ghə̀ŋ ghʉ Əsoʼ mu, mu byìʼì ando ghə̀ŋ nzhʉ̀ ntɨm ə jùŋ ə byɨmə lo?

⁶ Ghə̀ŋ yen li Ablaham a! Ŋwàʼlə̀ Nyìngòŋ gaʼa la “Ablaham mbyɨmə li a Nyìngòŋ, ghə̀ lyɨ̀ wen a wù kənyʉ̀ kətɨməkə.” ⁷ A ghə̀ŋ yen li luwèn la no nkàyntə̀ vunə Ablaham ə diʼ viʼi vyi a və byɨmə li a Nyìngòŋ. ⁸ Ŋwàʼlə̀ Nyìngòŋ sə diʼ mù ghə̀ nshə̀ʼtə̀ li la, Nyìngòŋ ə lu nè ə viʼi kətɨm ə vəwenə ndiʼ viʼi kənyʉ̀ kətɨməkə byìʼì əbyɨmə ə vəwenə. Byìʼì kənyʉ̀ a kenkə, Nyìngòŋ ə be mu shə̀ʼtə̀ ntɨm ə jùŋ a mbì a Ablaham la, “Ma lu bwaʼsə viʼi təloʼ tə tsèm chò fa wù”. ⁹ Kə le diʼi la, no ndò yi a ghə̀ byɨmə ə kiʼi mbwàʼsə̀ to ndə̀ŋndəŋ to ando Nyìngòŋ mbwàʼsə Ablaham byìʼì əbyɨmə ə wen.

¹⁰ Viʼi vyi a və kəŋ ə ghʉ tə Əsoʼ ndi nti a nkayn wenə və Nyìngòŋ, ngəʼ Nyìngòŋ diʼ a vəwenə a kətʉ, byìʼì ando və nyoʼo li a Ŋwàʼlə̀ Nyìngòŋ la, “Nyìngòŋ ne nè ngəʼ ndiʼ a kətʉ no ndò yi a ghə̀ ko ghʉ təsoʼ no tətsèm a tə diʼi a ŋwàʼlə̀ Əsoʼ.” ¹¹ Kə lə kə̀ʼə̀ lì a ndayn luwen la, wìʼ zizi ko ghə̀ lu ndiʼ wu kənyʉ̀ kətɨməkə ashɨ Nyìngòŋ byìʼì ando ghə̀ ghʉ Əsoʼ, byìʼì ando və nyòʼò li a Ŋwàʼlə̀ Nyìngòŋ la, “Viʼi vyi a və diʼ viʼi kənyʉ̀ kətɨməkə byìʼì əbyɨmə ə vəwenə lu ə ntsi byìʼì ə byɨmə vəwenə” ¹² Əsoʼ ə ko kiʼi to kənyʉ̀ kùmə̀ ə byɨmə. Və boŋsə li nyòʼ a ŋwàʼlə̀ Nyìngòŋ la, “no ndò yi a ghə̀ ne ando Əsoʼ ə kəŋ, lu ə ntsi to byìʼì wen ghə̀”. ¹³ Klistò mbwensə li zen kətʉ kə vəghəŋ fa ngəʼ yi a Əsoʼ ə nshiʼsə a vəghəŋ kətʉ. Ghə̀ ne alə a ji la ghə̀ shi li ngəʼ na yi a vəghəŋ a kəshi, byìʼì ando və nyoʼo li a ŋwàʼlə̀ la, “Ngəʼ Nyìngòŋ ne diʼ no tèbe a ndò yi a və sɨŋsə wen a fəkoʼ.” ¹⁴ Klistò ə nè alə ndiʼ mbwàʼsə̀ yì a Nyìngòŋ ə ghʉ li a Ablaham, boŋ ə dyʉ̀ a viʼi a ko diʼ viʼi Jus. Ghə̀ ə nè alə ndiʼ əbyɨmə ə vəghəŋ nè vəghəŋ boŋ kiʼi Kəzhwì kə Ŋwoʼkə na kì a Nyìngòŋ ə nghʉ li.

Əsoʼ ə Mosìs ko kiʼ tebè kədyòʼ ə kwitə kənyʉ̀ a Nyìngòŋ nghʉ li

¹⁵ Vəlemə vwomə a byɨmə, ma kù nchwi kənyʉ̀ a ghə̀ŋ, a və fʉ̀ to mətsi ə ntsèm. Viʼi və bò nə̀ byɨmə kənyʉ̀ ə zhɨ̀ məkàyn, ko wìʼ be ə diʼ ə tsuʼ kò ə kwʉ̀ʼsə kənyʉ̀ tsu. ¹⁶ Nyìngòŋ ə nghʉ li kənyʉ̀ ken a Ablaham wenə ngwaʼ wen. Ŋwàʼlə̀ Nyìngòŋ ko gàʼ la və ku a wenə vunə və ghoʼo və. Ŋwàʼlə̀ Nyìngòŋ tòŋtə to wàyn ə mùʼ, wàyn na ghèn diʼ Klistò. ¹⁷ Mà lə gàʼà ə diʼ la, Nyìngòŋ ə zhɨ̀ məkàyn mù ghʉ kənyʉ̀ fa ambì wenə Ablaham, ko ghə̀ zizi ghə̀ lu ə faŋ ke nè. Mibu və sə shɨtə Əsoʼ na ghenə, mu ngʉ̀ʼsə cho li əghɨ kàʼ nə̀ ngʉʼsə məwumə ə ntàʼ a və zhɨ məkàyn, Əsoʼ na yì ə zizi ko ghə̀ lu be tensə məkàyn na mèyn be tensə kənyʉ̀ ken a Nyìngòŋ ə nghʉ lə̀. ¹⁸ Nyìngòŋ ə sətsèn ə nku fo wen a viʼi byìʼì ando və ghʉ Əsoʼ, mu a li ko be diʼ kənyʉ̀ a ghə̀ nghʉ̀. Nyìngòŋ nku li ə fo a Ablaham ando ghə̀ nghʉ̀. ¹⁹ Əshyèʼ əsoʼ lə̀ diʼ no ghò? Nyìngòŋ ə nkù Əsoʼ ə kwʉ̀ʼsə a məkàyn mèyn ndiʼ wìʼ ne fəŋə, ghə̀ kɨ la ghə̀ nè li mbyɨ. Əsoʼ ndiʼ ə ndiʼ to diʼi ə zaʼa ando wàyn a Nyìngòŋ ə ghʉ kənyʉ̀ ken byìʼì wen vi. Nyìngòŋ ntɨm ə ntsɨŋsə wen la vəwenə ku əsoʼ a Mosìs la ghə̀ chòsə̀ a viʼi. Mosìs ndiʼ wìʼ a ghə̀ nti a ntìntìn Nyìngòŋ wenə viʼi. ²⁰ Wìʼ zizi ko ghə̀ lu ə tɨmə a ntìntìn, nchwosə nyʉ̀, a bwen la viʼi na vyi diʼ və bò. Nyìngòŋ diʼ fa wen a ngə̀ŋ. Ghə̀ nko chò fa a wìʼ mibu ghʉ kənyʉ̀ ken a Ablaham.

Kənyʉ̀ ki a Əsoʼ ə shyèʼ

²¹ Kə le diʼi la Əsoʼ ə tensə kənyʉ̀ kə ghʉ kə kikə a Nyìngòŋ ə nghʉ li mu? Kə ko diʼ alì no fa mphen. Kə diʼ la Nyìngòŋ a sətsen ə ndiʼ mu ghə̀ nkuli əsoʼ mibu ghə̀ nè la viʼi ntsi, a na ndiʼ mù ghə̀ zizi nè la viʼi nti akayn ashɨ ə Nyìngòŋ. ²² Alì Ŋwàʼlə̀ Nyìngòŋ gàʼa la kədyòʼ kə mbyɨ kə diʼ a kətʉ viʼi vətsèm a mbyi. Kə diʼi alə̀ ndiʼ Nyìngòŋ ə ghʉ kənyʉ̀ kə ghʉkə ki a ghə̀ nghʉ, a viʼi vyi a və byɨmə a Yesò Klistò.

²³ A ndiʼ mibu ə zhʉ əbyɨmə a Klistò vì, Əsoʼ ne li və ghə̀ŋ sə tsi to ne viʼi mfɨŋ. Əsoʼ nghaʼa li a vəghəŋ zaʼa ando Nyìngòŋ ə ndiʼi làynsə əbyɨmə na ghenə a Klistò. ²⁴ Əsoʼ ə ntùʼmə̀ to tuʼmə nə̀ vəghəŋ ə zaʼa ando Klistò ə nvi ə nè la vəghəŋ diʼi viʼi kənyʉ̀ kətɨməkə byìʼì əbyɨmə. ²⁵ Luwen ando vəghəŋ sə kiʼ əbyɨmə lə̀, Əsoʼ ə kə be tùʼmə̀ nə̀ vəghəŋ.

²⁶ Ghə̀ŋ vətsèm diʼ vunə a Nyìngòŋ byìʼì ando ghə̀ŋ byɨmə li a Yesò Klistò. ²⁷ Nò ghə̀ŋ və tsèm a ghə̀ŋ nshi mu, ə tsèntə vye və Yesò ə sə diʼ mù ghə̀ŋ lyɨ li ntsìnə̀ wen. ²⁸ Nəkwoŋ ko be diʼ fa wù ə Jus wenə wìʼ yi a ko diʼ wù Jus. Nəkwoŋ ko be diʼ fa wìʼ yi a ghə̀ diʼi fa ngeŋ wenə wìʼ yi a ghə̀ diʼi kəkòs, ko ghə̀ diʼ a wùlɨm nə̀ wùwì, byìʼì ando ghə̀ŋ və tsèm sə tsèntə diʼ to kənyʉ̀ kə mùʼ vye və Yesò Klistò. ²⁹ Ghə̀ŋ sətsen ndiʼ viʼi Yesò alə̀, a ghə̀ŋ ne diʼ vunə a Ablaham, diʼi la ghə̀ŋ be lu kiʼi əfo vì a Nyìngòŋ ə ghʉ a wen.

¹ Kənyʉ̀ a ma gaʼa diʼ la, və sətsen ghʉ wàyndyə a njɨkəbəŋ, ghə̀ bo tyetə, ko ghə̀ lu zhɨ̀ kəfo a kəbəŋ ayì to nə̀ njɨkəbəŋ, ghə̀ a diʼ to sə ghə̀ lye əfo lye, no tèbe ando əfo na vyi kiʼi to no wen. ² Ghə̀ sə kiʼ viʼi a və tuʼmə nə̀ əfo ə wen, be tùʼmə̀ no tebe nə̀ wen, ə zaʼa ando ghə̀ kwi kwʉ̀ʼ ando tìʼ wen nkəŋ. ³ Kə diʼ to ndə̀ŋndəŋ ando vəghəŋ ə mbo ndiʼ ko vəghəŋ kɨ nyʉ̀ vyi a və diʼi nəmwèʼè, vəghəŋ shyèʼ kəkòs a zhwì vyi a və soʼo mbi. ⁴ Əzhʉ lu kuʼ kwʉ̀ʼ, Nyìngòŋ ə tɨm Wàyn wen. A mbwi wùwì bwi wen, ghə̀ kwi kuʼ a tyi Əsoʼ viʼi Jus, ⁵ to ghə̀ ka zen kətʉ kə viʼi vyi a və ndiʼ ati Əsoʼ na yi, ə nè la vəghəŋ ə diʼ vunə ə Nyìngòŋ. ⁶ Ando ghə̀ŋ sə diʼ vunə a Nyìngòŋ, ghə̀ wè li Kəzhwì kə Wàyn wen a vəghəŋ a tətyɨm, kə sə ne vəghəŋ dzàŋə Nyìngòŋ gàʼa la, “Bàba, Bàba ghom.” ⁷ Kə le diʼi la ghə̀ŋ ko be diʼ əkòs. Ando ghə̀ŋ ə diʼ vunə Nyìngòŋ lə, Nyìngòŋ lu ku əfo vyi a ghə̀ kiʼi a nə̀ vunə wen.

Ə Tyɨm ə Bol ku ngəʼ a wen əkùm viʼi Gàlesìyà

⁸ A ndiʼ fa ambì ando ghə̀ŋ nko tɨmə ə bo kɨ Nyìngòŋ, ghə̀ŋ ndiʼ əkòs a fo ə tsenəvə, a ko diʼ tèbe Vənyìngòŋ. ⁹ Alì ghə̀ŋ sə ə kɨ Nyìngòŋ luwen. Ma zì ma gaʼa la a diʼ Nyìngòŋ a ghə̀ kɨ ghə̀ŋ. Ghə̀ŋ zizi ghə̀ŋ be bwensə ə shyèʼ a nə̀ ə kəkòs a zhwì ə bwaʼvə kədyàŋ kədyàŋ venə a və soʼ mbyi lə? Byìʼì ghò a ghə̀ŋ kəŋ ə be ə kaʼkə əkòs a əzhwì bwaʼvə kədyàŋ kədyàŋ venə a? ¹⁰ Ghə̀ŋ ghʉ li la mətsi mə tsèn, nə̀ və sàŋ və tsenəvə, nə̀ ngàm sə tsensə, nə̀ ngʉ̀ʼ sə tsensə sə diʼ boŋ nəkwoŋ. ¹¹ Ma ə fwàynə̀ la ma tə nghomə̀ to ə wèn a mò a shwèʼ yi a mà tə ne a ghə̀ŋ.

¹² Vəlemə vwomə a byɨmə, ma sensə la ghə̀ŋ diʼ to nə̀ mò byìʼì ando mà sə diʼ to nə̀ ghə̀ŋ. Ghə̀ŋ ko nè kənyʉ̀ kəbyɨkə kətsen a mò. ¹³ Ghə̀ŋ kɨli la ma ə nvi ə shə̀ʼtə̀ ntɨm ə jùŋ a ghə̀ŋ fa ambì zhʉ mu à nè kwaʼa a ma tə kwaʼa. ¹⁴ Əkwaʼa ghomə na yi ə ndiʼ a ghə̀ŋ to nə̀ əmwòmsə̀ ə tsen ghə̀, ali ghə̀ŋ ko nyeʼsə mò ko ghə̀ŋ lu maʼa mò. Ghə̀ŋ ə nshisə mò ando ghə̀ŋ zi ghə̀ŋ shisə ntsɨŋ Nyìngòŋ. Ghə̀ŋ ə shisə mò ando ghə̀ŋ zi ghə̀ŋ shisə nkàyntə̀ Yesò Klistò. ¹⁵ A tə fʉ ghò kumə saŋlə yì a ghə̀ŋ tə nkiʼ a? Ma gaʼa to no nəmwèʼè la, kə tu tə mbwaʼmə mu ghə̀ŋ ə ntsuʼtə li ashɨ à ghəŋə ə ku a mò. ¹⁶ Mà lə kaʼkə li a wù kəbàyn luwen a ghə̀ŋ to byìʼì ando mà gàʼa nəmwèʼè mu? ¹⁷ Viʼi na vi ə lɨmə to alə a ghə̀ŋ kənyʉ̀ ndi ghə̀ŋ byɨmə kənyʉ̀ a vəwenə gaʼa, ali kiʼ to əkwoʼtə ə byɨghə. Vəwenə ə kəŋ la ghə̀ŋ moʼtə mo ə lɨmə to nyʉ̀ a vəwenə gaʼa. ¹⁸ Kə bòŋə to no ə lɨ̀mə̀ a nyʉ̀ a wù ne azhʉ a diʼ nyʉ̀ jùŋə və no zhʉ̀ko. Ghə̀ŋ ə lɨ̀mtə̀ to məzhʉ ntsèm a ko diʼ to azhʉ̀ a vəghəŋ diʼ to muʼ. ¹⁹ Vunə vwomə və juŋəvə, ma zhʉ̀ lɨ̀m kumə ghə̀ŋ to no ando luwàyn nə̀ azhʉ̀ lɨm ə wàyn. Ma ne nzhʉ lɨ̀m to alə ə zaʼa ando ghə̀ŋ ne ntsi ntsìnə̀ to nə̀ Klistò. ²⁰ Ndò ku la vəghəŋ diʼ to a muʼ luwen ndiʼ mà kwitə ji yi a mà gàʼ fa tsù a ghə̀ŋ a? Ətyɨm ə ghomə ku ngəʼ a mò kumə ghə̀ŋ no nànto.

Bol shəʼmə Hagà nə̀ Sèla

²¹ Ghə̀ŋ venə a ghə̀ŋ kəŋ ə ntsi ati Əsoʼ alə̀, ghə̀ŋ shə̀ʼtə̀ li a mò la, ghə̀ŋ ko kɨ kənyʉ̀ ki a Əsoʼ gàʼ mu lo? ²² Və nyòʼo li a ŋwàʼlə̀ Nyìngòŋ la, Ablaham ə nkiʼi vunə və lʉmə və bò. Ghə̀ tsen diʼ mu à mbwi wùwì, a ndiʼ kəkòs a wen, ghətsen diʼ mu à mbwi wùwì, a kodiʼ kəkòs. ²³ Wàyn yi a lì wen ndiʼ kəkòs li ə sədiʼ mu və bwi to no ando və nə̀ bwi no ndò, ali yi a lì wen ko diʼ kəkòs diʼ mu və bwi byìʼì ando Nyìngòŋ nghʉ̀.

²⁴ Vəghəŋ zizi və lyɨ nyʉ̀ na venə ə shəʼmə kənyʉ̀ tsu. Ki venə və bò lə̀ ndiʼ to nə̀ məkàyn na mèyn ə mbò. Ghə̀ muʼ ə lyɨ kəshi kə məkàyn mi a Nyìngòŋ ə zhɨ̀ wenə Mosìs a phèn ə Sinày, ghə̀ bwi li vunə, vəwenə ndiʼ ə ndiʼ əkòs. Əzhiʼ wùwì na ghèn ə ndiʼ Hagà. ²⁵ Hagà lyɨ kəshi kə phèn ə Sinày alòʼ ə Alabìyà. Ghə̀ lyɨ kəshi kə Jelusalèm yì a ghə̀ diʼi luwen. Wen wenə vunə wen diʼ əkòs. ²⁶ Sèla lyɨ kəshi kə Jelusalèm yì a ghə̀ diʼi akàŋ, ko ghə̀ diʼ kəkòs. Ghə̀ diʼ lì vəghəŋ. ²⁷ Və nyòʼò li a Ŋwàʼlə̀ Nyìngòŋ la:

“Wù nsaŋlə a wùwì yi a wù ko tɨmə bwi wàyn.

Wù zɨmə naynə a wù yi a wàyn ko tɨmə zaf ə wù,

byìʼì ando wùwì yi a və kyemə sə kiʼ vunə,

və ghoʼo chò vunə wùwì yì a ghə̀ kiʼi lɨm.”

²⁸ Vəlemə vwomə a byɨmə, ghə̀ŋ diʼ to nə̀ Izìk byìʼì ando ghə̀ŋ diʼi vunə Nyìngòŋ ando ghə̀ nghʉ̀. ²⁹ A ndiʼ a tʉʼ na yì, wàyn wùlɨm yi a və mbwi wen to no ando və nə̀ bwi no tèbe wàyn kò, sə tsuʼ kəghʉ kə wàyn yi a və sə bwi mu à nè Kəzhwì kə ŋwoʼkə lì. Kə le be fʉ̀ to ali luwen. ³⁰ Alì Ŋwàʼlə̀ Nyìngòŋ ə gàʼa la ghò? Ghə̀ gaʼa la, “Saŋ ə wùwì kəkòs yi wenə wàyn wen, byìʼì ando wàyn kəkòs na ghèn ko lu zhɨ̀ tebè fa kəfo ə tiʼi vəwenə. A lu zhɨ to wàyn wùwì yi à ko diʼ kəkòs.” ³¹ Ghə̀ŋ yen li a vəlemə vwomə a byɨmə la, vəghəŋ ko diʼ vunə wùwì kəkòs yì. Vəghəŋ ə diʼ vunə wùwì yi à ko diʼ kəkòs.

Klistò ə bwoŋsə li vəghəŋ fa kəkòs

¹ Klistò shisə li vəghəŋ fa əshyèʼ kəkòs, ndi vəghəŋ ə ndiʼ fa vəghəŋ a ngəŋ. Ghə̀ŋ nshɨtə lì ghaʼ təwen ə təŋtə, kə wìʼ be na bwensə ne ghə̀ŋ, ghə̀ŋ əshyèʼè kəkòs a soʼ.

² Ghə̀ŋ zhʉtə! a gàʼa mò Bol a ghə̀ŋ la, ghə̀ŋ sətsen moʼtə la və shətə ndyə̀ ghə̀ŋ, a kə a ndiʼi la kənyʉ̀ ki a Klistò nè a ghə̀ŋ le li to kədyàŋ. ³ Ma be shɨtə shə̀ʼtə̀ to no shə̀ʼtə̀ a ghə̀ŋ la, no ndò a ghə̀ byɨmə la və shətə ndyə̀ wen, ghə̀ ə kɨ la ghə̀ diʼ ə ghʉ no tə Əsoʼ tə tsèm. ⁴ Ghə̀ŋ vyi a ghə̀ŋ kəŋ ə nti akayn ashɨ Nyìngòŋ ə byìʼì ando ghə̀ŋ ghʉ Əsoʼ ghenə, kɨ la ghə̀ŋ gə̀sə̀ li təwen ətəŋtə fa Klistò. Ghə̀ŋ tyenli ətyɨm ə jùŋə ghə̀ yi a Nyìngòŋ ə diʼi li a ghə̀ŋ. ⁵ Kəzhwì kə Nyìngòŋ kə nè la vəghəŋ kɨ nəmwèʼè la vəghəŋ lu ətɨmə akayn ashɨ Nyìngòŋ byìʼì əbyɨmə ə vəghəŋ. ⁶ Kə diʼ alə̀ byìʼì ando vəghəŋ sətsen ə ndiʼ vəghəŋ və Yesò Klistò, kò wìʼ shətə li ndyə̀ wen kò ghə̀ ko shətə, na kì kə ko kiʼi tebè kənyʉ̀ ə nè. Kənyʉ̀ kə tokə diʼ to la, wìʼ na ndiʼi əbyɨmə ə wen chò fa ji a ghə̀ ne koŋə viʼi fa tsu.

⁷ Ghə̀ŋ tə nè akayn. Ma ko kɨ la à tə be tàʼsə ghò tàʼsə ghə̀ŋ la kə ghə̀ŋ ghaʼ kənyʉ̀ kì a kə diʼ nəmwèʼè lo? ⁸ Kənyʉ̀ kì a kə tə ne la kə ghə̀ŋ ghaʼa kənyʉ̀ ki a ko diʼ nə̀ nəmwèʼè ko tə lù fa Nyìngòŋ yi a ghə̀ dzàŋ ghə̀ŋ. ⁹ Ngàyn tsen nə̀ diʼ la, fəshɨ̀ŋ fə nə̀ tyetə tèbe a le, fə ne makàlà mə kuʼ. ¹⁰ Ma kɨli la ando vəghəŋ sə tsèntə diʼ to kənyʉ̀ kə mùʼ vəghəŋ və Bobo, la ghə̀ŋ ko a ndzɨ̀mtə̀ kənyʉ̀ kə wìʼ, a bwen to kənyʉ̀ ki a ma gàʼà, Nyìngòŋ ə na ku ngəʼ a wìʼ yi a ghə̀ nfɨŋsə ghə̀ŋ, kò à diʼ no tebè ndò.

¹¹ Və le bè ə tsuʼ to kəghʉ komkə a gho, a vəlemə vwomə, azhʉ̀ a kə diʼ nəmwèʼè la, ma ziʼi la və diʼ ə shətə ndyə̀ ə viʼi a? Kə sətsen ə ndiʼ nəmwèʼè, mu ziʼi yì a ma ziʼi kumə Klistò a ghə̀ mpfʉ a kəntò ko be zafə viʼi Jus. ¹² Ma jɨ̀mə̀ la viʼi vyi a və kəŋ la və nshɨtə ndyə̀ ghə̀ŋ, vəwenə zoʼo təwen tə və wenə.

¹³ Vəlemə vwomə a byɨmə, Nyìngòŋ ntsuʼtə li ghə̀ŋ la kə ghə̀ŋ be andiʼ əkòs a əsoʼ ali, kə ghə̀ŋ ghʉ la ando ghə̀ŋ sə diʼ fa ngə̀ŋ la ghə̀ŋ zizi ghə̀ŋ ə nkwetə tèbe ghò yi a ghə̀ fwomə a ghə̀ŋ njòsə wen, ghə̀ŋ sə ne to ne. Ghə̀ŋ ə boŋsə kòŋ təwenə təŋtə. Ə kòŋ a yi ne ghə̀ŋ shyèʼè a vəlemə vəŋə vətsenvə. ¹⁴ Nò təsoʼ tə tsèm tsèntə vi fʉ to a əsoʼ ə mùʼ la, “Kòŋ no ndò a wù yenə to ndə̀ŋndəŋ ando wù kòŋ wenə wù.” ¹⁵ Alì mu ghə̀ŋ sətsen kaʼkə ə ne to nə̀ nyamsə ətòʼ ə mphiʼi təwen, ghə̀ŋ nkɨ la ntsèntə̀ ghə̀ŋ zizi ghə̀ na mè no ə tsèm.

Ghə̀ŋ ntsi a ji a kəzhwì kə Ŋwoʼkə kəŋ

¹⁶ Ma kəŋə gàʼ a ghə̀ŋ la, Ghə̀ŋ ə tsi ando kəzhwì kə Ŋwoʼkə ə tisə ghə̀ŋ. Ghə̀ŋ sətsen ə nè alə, ko ghə̀ŋ be na nè nyʉ̀ vyi a və fwomə a njòsə wen. ¹⁷ Ənyʉ̀ vyi a və fwomə a njòsə wèn nkòŋə̀ la vəghəŋ ne, ko diʼ nyʉ̀ vyi a kəzhwì kə Nyìngòŋ kə kəŋə la vəghəŋ nè, ə vyi a kəzhwì kə Nyìngòŋ kə kəŋ la vəghəŋ ə ne a ko diʼ nyʉ̀ vyi a njòsə wen ə vəghəŋ kòŋə̀ ə nè. Ənyʉ̀ na venə diʼi to soyn diʼ la wù ə ne no tebe ghò na yi a wù kòŋə̀ nè. ¹⁸ Alì mu kəzhwì kə Nyìngòŋ kə sətsen ə ntisə ghə̀ŋ, ko ghə̀ŋ be na ntsi atyi Əsoʼ.

¹⁹ Ənyʉ̀ vyi a njòsə wen sə kòŋ ə ne ə diʼ to a ndayn. Nyʉ̀ venə diʼ: Ə kòŋ la viʼi ntsi nə̀ ki kò nə̀ vəlɨm və viʼi, tsi ə ntsìnə̀sə kəməŋ, tsi to nə̀ bʉsə, ²⁰ gumlə nshəʼsə, shəŋə mənyoʼ, bàynə̀ viʼi, soynə, kiʼi kəghəʼ, zaŋsə fwisə tin, kwoʼtə kumə to tə wèn tə vəwenə, ə vi nə̀ kəgəsə kə, gə̀sə̀ viʼi a mənoyntə ²¹ kiʼ ashɨ kəmbàŋbàŋ, nyʉ chòsə̀ məlyʉ̀ʼ bomə, kòŋ ə nzhùŋtə̀ ashi nyʉ məlyʉ̀ʼ ne to nə̀ bʉsə. Nki ənyʉ̀ a vyi diʼ to kədə̀ŋ. Ma kù kətyiftə a ghə̀ŋ luwen ndə̀ŋndəŋ ando ma tə ku fa ambì la, “Viʼi vi a və nè nyʉ̀ na venə ko lu kiʼi kəshi a akəshi kə əfòynə ə Nyìngòŋ.”

²² Alì kəzhwì kə Ŋwoʼkə kòŋ la: viʼi ə̀ nkòŋ vətsevə, saŋlə, kiʼ mbwaʼmə, wensə, kiʼi tyɨmə jùŋ ghə̀ be nè njùŋ a viʼi, choʼsə viʼi. ²³ Gumlə, kɨ ə ghaʼ təwen. Əsoʼ ə tsenə ghə̀ ə ko tensə tebè no kənyʉ̀ kə mùʼ fa ntìntìn nyʉ̀ a ghèn. ²⁴ Viʼi Yesò Klistò diʼ mu vəwenə bayntə li njòsə əwèn nə̀ vəwenə boʼsə nə̀ nyʉ̀ vyi a və fwomə la və nə̀ nè a kəntò. ²⁵ Luwen to ando vəghəŋ sə tsì byìʼì Kəzhwì kə Ŋwoʼkə lə, vəghəŋ diʼ ne to nyʉ̀ vyi a kə kəŋə la vəghəŋ ə nè. ²⁶ Kə vəghəŋ na ghaŋsə əwèn, kə vəghəŋ na tyinsə tyinsə vəlemə və vəghəŋ, kə vəghəŋ be lye vəwenə nə̀ ashɨ a byɨghə.

Vəghəŋ nè njùŋ no viʼi vətsèm

¹ Vəlemə vwomə a byɨmə, wìʼ fa ghə̀ŋ sətsen nè no tèbe mbyɨ ə kò, ghə̀ŋ vətsenvə vi a kəzhwì kə Ŋwoʼkə tisə ghə̀ŋ, ghə̀ŋ mwomsə ə diʼ ji tɨmə. Ghə̀ŋ sə ne alə ghə̀ŋ to no nə̀ mbwaʼmə. Ghə̀ŋ sə diʼ, ghə̀ŋ tùʼmə̀ nə̀ təwen ə təŋtə abwen ali, ghə̀ŋ be fəŋ a mwomsə. ² Sətsen wìʼ ndiʼ a ngəʼ, ghə̀ŋ ə gyàmtə̀ wen. Ghə̀ŋ sətsen ə nè alə̀, mu ghə̀ŋ ə ghʉ li soʼ a Klistò nkù a vəghəŋ. ³ No ndò a ghə̀ sətsen kwoʼtə la ghə̀ diʼ kəfo, ali ko ghə̀ diʼ kəwenkə, mu ghə̀ lobtə to wen ə wen. ⁴ Nò ndò shɨtə lye nyʉ̀ a ghə̀ ne. Sətsen nyʉ̀ vyi mbù, ghə̀ a kumə kədyʉ̀ʼ kə wen, ko diʼ ghə̀ shəʼmə wenə wìʼ tsen, ⁵ byìʼì ando no ndò diʼ ne ghə̀ wenə əshyèʼ a Nyìngòŋ kəŋ la ghə̀ nè.

⁶ Wìʼ yi a və ziʼi wen nə̀ gaʼa Nyìngòŋ diʼ ngə̀tə̀ ku ndìʼsə̀sə ə wen nə̀ əfo ə jùŋ vi a ghə̀ kiʼi, no ə tsèm.

⁷ Kə wìʼ na lobtə wèn ə wen. Wìʼ ə zizi ko ghə̀ lu chəʼ Nyìngòŋ. Wìʼ ə wè no tèbe ghoʼ, ghə̀ lù pfì to kəwenkə. ⁸ Wìʼ ə sətsen ə wè to kəfo kì a kə fwomə a njòsə wèn ə wen, a ghə̀ lù pfì əpfʉ̀. Wìʼ ə sətsen ə wè kəfo kì a kəzhwì kə ə kəŋə la ghə̀ nè, ghə̀ lu pfì ntsìnə̀ yì a ghə̀ ko lu mè. ⁹ Kə vəghəŋ a bwaʼ ə nè jùŋ, byìʼì ando vəghəŋ sətsen faŋ ke bwaʼ, kətsi kə tsen lù kwʉ̀ʼ, a vəghəŋ pfi nyʉ̀ jùŋ və to kədə̀ŋ. ¹⁰ Kə lə diʼi la, no zhʉ̀ko a vəghəŋ kiʼ ji nè jùŋ, vəghəŋ nè to a viʼi və tsèm, be nè no nəkwoŋ a viʼi vyi a vəghəŋ və vəwenə ə kiʼi əbyɨmə ə mùʼ.

Bol ə ku kətyiftə kəmwetəkə

¹¹ Ghə̀ŋ yen ji a ma lyɨ kəvu komkə ə nyòʼo, ŋwàʼlə̀ ghèn a ghə̀ŋ nə̀ ashɨ ŋwàʼlə̀ ghoʼkə ghə̀. ¹² Viʼi vyi a və soʼ ghə̀ŋ la və shətə ə ndyə̀ ghə̀ŋ diʼ viʼi a və kəŋə ə ndiʼi əwen la vəwenə diʼ a nkayn. Vəwenə ne alə byìʼì ando vəwenə ə fwàynə̀ la vəwenə sətsen ə ziʼi la viʼi diʼ bwòŋ byìʼì əpfʉ̀ ə Klistò a kəntò, viʼi a ntsuʼ kəghʉ kə vəwenə. ¹³ No tèbe viʼi a vyi a və gaʼa la və diʼ ə shətə ndyə̀ viʼi li ko ghʉ tebè Əsoʼ, ali kəŋ to la və shətə ndyə̀ ghə̀ŋ ndiʼ vəwenə nə̀ jèʼe kùmə̀ kədyʉ̀ʼ, gàʼa la ghə̀ŋ nè li kənyʉ̀ kì a vəwenə ə kəŋ. ¹⁴ Alì fa mò, mà ko na kumə kədyʉ̀ʼ kumə tebè kənyʉ̀ kə tsen kə, a bwen to byìʼì kənyʉ̀ a Bobo vəghəŋ Yesò Klistò nè a mò a kəntò. A diʼ kənyʉ̀ kəwenkə a kə nè, fo ə mbyi ə sə diʼ to a mò to nə̀ əfo ə pfʉkəvə, no tèbe nkàyntə̀ mò diʼ to nə̀ kəfo kə pfʉkə kùmə̀ fo ə mbyi. ¹⁵ Ko və shətə li ndyə̀ vəghəŋ kò və ko shətə, na ki ə ko kiʼi kənyʉ̀ kə tsen ə nè. Kənyʉ̀ kə tokə ə diʼ to la, Nyìngòŋ ə nè li vəghəŋ bwensə sədiʼ viʼi və fi və. ¹⁶ Nyìngòŋ ne viʼi vyi a və tsi to ando ma gaʼa, no tebe a viʼi Nyìngòŋ no və tsèm. Ntsìnə̀ mbwaʼmə, be kusə shinsə a vəwenə,

¹⁷ Ə mwetə, ma sə gàʼa la, kə wìʼ be ku ngəʼ a mò, byìʼì ando əlas diʼ a mo wèn a və diʼi la ma diʼ wù Yesò.

¹⁸ Vəlemə vwomə a byɨmə, ma jɨ̀mə̀ la Bobo vəghəŋ Yesò Klistò diʼi ətyɨm ə jùŋ ghə̀ ə wen a ghə̀ŋ. Amèyn.