3 Joyn

Vəŋwàʼlə̀ və to

Joyn

Tʉ nyʉ̀ a və diʼ a ŋwàʼlə̀ ghèn

Vəŋwàʼlə̀ və taʼ Joyn ndiʼ mu a nyoʼo chəʼ. Ghə̀ nyoʼo ŋwàʼlə̀ a ghèn a kətʉ kə ngə̀ŋ Nyìngòŋ kə tsenkə a və ntoŋtə nə̀ Gayòs. Ghə̀ nyòʼo ə bwomsə Gayòs byìʼì jì a ghə̀ ngyàmtə̀ viʼi vəbyɨməvə vətsevə tsu, ə be pfàntə̀ wen la ghə̀ tuʼmə byìʼì wutsen a və ntoŋtə wen nə̀ Dyòlefes.

Jì a və gəsə ŋwàʼlə̀ ghèn fa tsu

Kənzìtə 1-4

Joyn bwomsə Gayòs 5-8

Dyòlefes diʼ wu byɨ 9-10

Və bwomsə Demetyòs 11-12

Ə toŋtə kəmwetə 13-15

¹ A nyòʼò mò ə chəʼ ə̀ ngə̀ŋ Nyìngòŋ nyòʼò ŋwàʼlə̀ ghèn à wù ə Gayòs ə̀ wù ndoŋ ə̀ mò a mà kòŋə̀ no nəmwèʼè. ² Mà jɨ̀mə̀ la no ghò ə ndyʉ̀ tò nkàyn à wù ə wù kòŋ ə̀ mò be jɨ̀mə̀ la wù ə ndiʼ tò nə̀ wen ə toghə. Mà kɨ la kəzhwì ə kyekə diʼ to nkàyn. ³ Mà tə sàŋlə no nə̀ ŋàŋ ando vəlèmə̀ vətsenvə tə vì shə̀ʼtə̀ à mò la wù nè tò ənyʉ̀ a diʼ ənyʉ̀ nəmwèʼè bènə̀ ando wù tsi tò a nəmwèʼè. ⁴ No kənyʉ̀ kətsenkə ko diʼ a kə zì kə ne mà be ə ntùʼù saŋlə̀ ə chò ando ma zhʉ li la vunə vwomə tsi a nəmwèʼè.

Joyn bwomsə Gayòs

⁵ Wù shɨtə ə nè tò shyèʼ jùŋ ghə̀ a wù kòŋ ə̀ mò, a zhʉ a wù shwèʼè a vəlèmə̀ no tè a zhʉ a diʼ viʼi a wù ko kɨ, ⁶ a vəwenə shə̀ʼtə̀ li əkòŋ ə̀ wu à ntsèntə̀ viʼi vəbyɨməvə a shèn. Gyàmtə̀ nè la vəwenə sə jèʼè dyʉ̀ a mbi, vəwenə ə nshwèʼè dyʉ̀ a jì a Nyìngòŋ ə kəŋə, ⁷ byìʼe vəwenə tə fʉ̀ ənè shwèʼè wen kò vəwenə lu mbyɨmə gyàmtə̀ fà viʼi a vəwenə ko diʼ viʼi vəbyɨməvə. ⁸ Kə mu sə diʼ la vəghəŋ diʼ ə ntomsə̀ nki viʼi avenə ndi vəghəŋ ə ntsèntə̀ shyèʼè à nəmwèʼè.

Dyòlefes wenə Demetyòs

⁹ Mà tə nyòʼ ŋwàʼlə̀ à ntsèntə̀ viʼi və byɨməvə ghèn, alì Dyòlefes a ghə̀ koŋə ndiʼ kətʉ, tyen əzhʉtə kənyʉ̀ a ma gàʼà tsu. ¹⁰ Mà ne vì no a zhʉ kò ə shə̀ʼtə̀ ə kuʼ nə̀ nyʉ̀ vyi a ghə̀ nè, nyʉ̀ fansəvə byɨvə, benə ndzɨŋ shì, a ghə̀ gàʼà byìʼì yes. Ghə̀ ko sè tò a na kì, ghə̀ tyenə la ghə̀ ko shisə vəlèmə̀, be tàmə̀ viʼi vyi a və kəŋə nshisə vəwenə, dzɨ̀mə̀ vəwenə shìsə̀ fa ntsèntə̀ viʼi və byɨməvə.

¹¹ Kə a nshyəmə̀ mbyɨ a lèmə̀ kòŋ ə̀ mò, ə mbòŋsə shyəmə̀ tò njùŋ. Wìʼ a ghə̀ nè njùŋ dìʼ wù Nyìngòŋ, yì a ghə̀ nè mbyɨ ə ko təmə kɨ Nyìngòŋ.

¹² Viʼi vətsèm ə gàʼà njùŋ byìʼì Demetyòs, nkàntə̀ nəmwèʼè be diʼi njùŋ a wen a ntsìnə̀, mà be gàʼà, wù kɨ la kənyʉ̀ a mà gàʼà byìʼì wen dìʼ nəmwèʼè.

Ətoŋtə kəmwètə̀

¹³ Mà kiʼi nyʉ̀ no ghoʼo ə shə̀ʼtə̀ à wù, alì mà ko kòŋ ə nyòʼ nyoʼo. ¹⁴ Mà kwòʼtə̀ əvi yen wù tò mətsi ghèn yowù besə nyʉ̀ a vyi tò nə̀ chʉ̀. ¹⁵ Mbwaʼmə Nyìngòŋ ə ndiʼ à wù. Viʼi ndoŋsə wù no vətsèm ə tɨmə toŋtə à wù. Toŋtə viʼi ndoŋsə a və diʼ afì tò mùʼ ə̀ mùʼ.