2 Timotì

Kənkùmtə̀ kə ŋwàʼlə̀ Bol a

Timotì

Tʉ nyʉ̀ a və diʼ a ŋwàʼlə̀ ghèn

Kənkùmtə̀ kə ŋwàʼlə̀ ə Bol kèn à Timotì ə ghoʼo dìʼ tò kətyɨftə a Bol ə nku à wen a nə̀ wàyndyə ə shyèʼ a wen a əbyɨmə. Ghə̀ ə ngàʼà la ghə̀ ne wensə, shɨ̀tə ghaʼa əziʼi ntɨm ə jùŋ bè shɨ̀tə ne ə shyèʼ ə wen a nə̀ ndìʼsə̀, no te a zhʉ a ghə̀ yenə ngəʼ, və bè tsuʼ kəghʉ kə wen. Bol mpfàntə̀ li Timotì la kə ghə̀ a kwenə a ntaŋsə kənkoyn, (2.23) byìʼì a sə ko ne njùŋ ə tsen à wìʼ, alì bòŋsə byɨsə viʼi to byɨsə a və zhʉtə ntaŋsə kəkoyn a sensə.

Ə sə mwetə Bol zɨ̀ŋtə Timotì nə̀ ji a nkàyntə̀ Bol ntsi ntsìnə̀ wen. Bol ngaʼa byìʼì byɨmə wen, ji a ghə̀ ə wensə, nə̀ ji a ghə̀ nkòŋ viʼi fa tsu, nə̀ ji a ghə̀ nghaʼ tyɨm, nə̀ ngəʼ a ghə̀ nyenə ando və ntsu kəghʉ kə wen.

Jì a və gəsə ŋwàʼlə̀ ghèn fa tsu

Ətoŋtə (1.1-2)

Bol ə ku kəzòŋ à Nyìngòŋ ə be tyɨftə Timotì (1.3–2.13)

Bol ə tyɨftə Timotì əpfantə ə wen (2.14–4.5)

Bol ə gàʼ byìʼì wenə wen (4.6-18)

Ə mwètə̀ (4.19-22)

Bol ə tɨm ə toŋtə à Timotì

¹ A ə nyòʼò mò Bol, nyòʼo ŋwàʼlə̀ ghèn à wù a Timotì. Mà dìʼ wù ə ntɨm ə̀ Yesò Klistò mu a ntsuʼ Nyìngòŋ. Ghə̀ ntsuʼ mò la mà shə̀ʼtə̀ ntɨm ə jùŋ kùmə̀ ntsìnə̀ yi a ghə̀ ko lə me to ando ghə̀ əghʉ̀ li. Ntsìnə̀ a ghèn ə diʼ to zhʉ a vəghəŋ diʼ to kənyʉ̀ kəmùʼ vəghəŋ və Yesò Klistò. ² Timotì, wàyn kòŋ ə̀ mò, Nyìngòŋ ə Tìʼ, wenə Yesò Klistò, ə Bobo vəghəŋ ə diʼi ətyɨm ə jùŋ ghə̀ à wù nə̀ əkusə shinsə, ə be ku mbwaʼmə a wù.

Bol ə ku kəzòŋ à Nyìngòŋ byìʼì Timotì, ə be ne la ghə̀ ə kiʼi tyɨm ətoghə

³ Mà ku kəzòŋ à Nyìngòŋ a ma shwèʼ a wen byìʼì wù, nə̀ ətyɨm ə mùʼ ando vətiʼi vwomə ə nlu sə shyèʼè. Mà jɨ̀mə̀ à wù nò məzhʉ ntsèm. ⁴ Mà kwoʼtə dì wu. Ma sə kòŋ no nànto ə yen wù ndi ndiʼ nə̀ nsaŋlə̀ ghə̀. ⁵ Mà bu kwòʼtə̀ ə nkàyntə̀ byɨmə yi a wù kiʼi à Klistò, a diʼ tò əbyɨmə yi a Lowis ə lì ə lì wù wenə Yunis ə li wù nkiʼ. Mà kɨ la wù kiʼi tò əbyɨmə a yi. ⁶ Byìʼì kənyʉ̀ a kenkə, ma ə mbwènsə̀ dzɨŋtə wù la kə wù a moʼtə kəku ki a Nyìngòŋ ə nku à wù ando ma ghʉ̀ avu ə ghomə a wu kətʉ lì. ⁷ Mà gàʼà alə byiʼ ando Nyìngòŋ ko ku kəzhwì kəfwàyn a vəghəŋ. Ghə̀ ku kəzhwì la kə nə̀ ne vəghəŋ ə kiʼi ətyɨm to ghə̀, kòŋ viʼi vətsenvə, bè kɨ ə ghaʼ tə wen tə vəghəŋ.

⁸ Kə lə diʼi la wù ko diʼ ə ndiʼsə kətʉ ə tɨmə ncho nsoʼ à Bobo vəghəŋ, kò be ndiʼsə kətʉ byìʼì mò ando ma diʼì a mfɨŋ byiʼ ando ma byɨmə à Klistò. Mà gàʼà la wù bòŋsə lyɨ̀ kədyòʼ ki a Nyìngòŋ ku à wù, ə vi boʼsə à mò atyi ngəʼ yi a ma diʼì tsu byìʼì ntɨm ə jùŋ. ⁹ Nyìngòŋ ə mbwòŋsə̀ li vəghəŋ ə ne la vəghəŋ ə ndìʼ viʼi wen. Ghə̀ nko ne alə byìʼì ando vəghəŋ ə nè kənyʉ̀ kə jùŋ kə kətsenkə à wen. Ghə̀ ne a lì tò fa wen a ngeŋ byìʼì ətyɨm ə jùŋə̀ ghə̀. Ghə̀ ghʉ̀ kənyʉ̀ a kenkə mimbu no mbyi sə zìtə̀, la ghə̀ lu ne ənyʉ̀ a venə əcho fa Yesò Klistò ə diʼ ətyɨm ə jùŋ ghə̀ ə̀ wen. ¹⁰ Luwèn sə ə dìʼ mu ghə̀ diʼi li ətyɨm ə jùŋ ghə̀ a ghenə a jì la Yesò Klistò, ə Mbwòŋsə̀ vəghəŋ nvi li. Ghə̀ nvi li ne la kə pfʉ mbe kiʼ kədyòʼ kùmə̀ vəghəŋ. Ghə̀ ziʼi li ntɨm ə jùŋ ə ne la vəghəŋ ə kɨ ntsìnə̀ yi a ghə̀ ko lə mè. ¹¹ Nyìngòŋ ə ntsuʼ mò la mà ə ndiʼ wù ə ntɨm, shə̀ʼtə̀ ntɨm ə jùŋ a ghèn, bè ziʼi viʼi. ¹² A lə kənyʉ̀ ki a ma yen ngəʼ byìʼì kəwenkə, alì ken la ma ndiʼsə kətʉ byiʼ ando ma kɨ kɨ la ghə̀ tùʼmə̀ nə̀ mò ə zaʼa a kətsi a ghə̀ lu bwenə ə vi. ¹³ Shɨtə ghaʼ nəmwèʼè a ghèn a mà ziʼi à wù lə ə nziʼi à viʼi vətsenvə. Wù sə ə ne ənyʉ̀ a venə, wu shɨ̀tə̀ ghaʼ byɨmə ə wu nə̀ əkòŋ yi a vəghəŋ ə kiʼi à Yesò Klistò. ¹⁴ Kəzhwì kə Ŋwòʼəkə kì a kə diʼì a vəghəŋ a ntìntìn a gyamtə wù ə ku kədyòʼ ndi wù shɨ̀tə̀ ghaʼ ənyʉ̀ jùŋvə vi a və ku li à wù.

¹⁵ Wu kɨ la no viʼi və byɨməvə vi a və diʼì aloʼ ə Asìyà no və tsèm nyɨŋ li əmoʼtə mò. A ntìntìn ə vəwenə a diʼ Figelùs nə̀ Helmogenes. ¹⁶ Mà jɨ̀mə̀ la Nyìngòŋ diʼ kusə shinsə à viʼi ngwaʼ ə ngə̀ŋ nə̀ Onèsìpholùs byiʼ ando ghə̀ tə nè la ma ə saŋlə. Ghə̀ ko tə ə diʼsə kətʉ la ma dìʼ a ngə̀ŋ mfɨŋ. ¹⁷ To ando ghə̀ nlu vi zaʼa a Lum no a zhʉ ko ə ghə̀ jèʼè kəŋ no nə̀ kədyoʼkə mibu yen mo. ¹⁸ Mà jɨ̀mə̀ la Nyìngòŋ lù diʼ ə kusə nshinsə a wen à Kətsi kə bàm. No wù ə kɨ ando ghə̀ ngyàmtə̀ mò a Efesùs.

Bol ə gàʼ la Timotì ə shwèʼ à Yesò Klistò tò nəmwèʼè

¹ A dìʼ fà wù a wàyn ə ghom Timotì, wu diʼ ə nto cho fa ətyɨm ə jùŋ a Yesò Klistò a ghə̀ diʼi li à wù. ² Wù tə ə zhʉ nyʉ̀ vyi a ma tə nziʼi ashɨ nə̀ viʼi. Wù diʼ ə lyɨ̀ əziʼi ghenə luwen ə ziʼi viʼi və jùŋvə vyi a zì vəwenə be ə ziʼi viʼi vətsenvə.

³ Wù diʼ ə yen ngəʼ to nə̀ sugyèʼ ə jùŋ yi a ghə̀ zhʉmə fà Yesò Klistò. ⁴ No te sugyèʼ ə ko ə mwòmsə ə ne əshwèʼ ə wen a nkàyn ndi ə nè la kətʉ kə shwèʼ wen ə nsaŋlə̀. Ghə̀ ko moʼ wenə wen a kənyʉ̀, a kə ko diʼ shwèʼè ə sugyèʼ. ⁵ Wù kənyɨŋ zi ko ghə̀ lə nyɨŋ ə zhɨ a bwen tò la ghə̀ ghʉ li təsoʼ tə kənyɨŋ a tyì. ⁶ No ndo a ghə̀ shyèʼè a wen a sɨm nə̀ kədyòʼ kə, ghə̀ pfì əfo ambì. ⁷ Wù kwòʼtə̀ kənyʉ̀ kenkə a mà gàʼa lə, byiʼ ando Bobo a nè ə wù zhʉ kɨ ənyʉ̀ avenə no ə tsèm.

⁸ Kwòʼtə̀ Yesò Klistò. Ghə̀ nfʉ̀ fa ngwaʼ ə ngə̀ŋ ə̀ Devìt. Nyìngòŋ ə lusə li wen fa ə pfʉ, a diʼ ntɨm ə jùŋ yi a ma shə̀ʼtə̀. ⁹ Mà yenə ngəʼ, və shwinə̀ mò a nə̀ wù ə mfɨŋ alə tò byiʼ ando ma ziʼi ntɨm ə jùŋ à viʼi. Alì kənyʉ̀ kə Nyìngòŋ a kenkə ə diʼ mu və zi ko və lu shwìn. ¹⁰ A dìʼ byìʼì kənyʉ̀ a kenkə a ma kiʼi kwiʼi ətyɨm tò ənyʉ̀ ə tsèm byìʼì viʼi vyi a Nyìngòŋ tsuʼ li ndi vəwenə lu kiʼi əbwòŋ chò fa Yesò Klistò ə kiʼi əkuʼsə no məzhʉ ntsèm. ¹¹ Kənyʉ̀ kenkə a və gàʼà lə ə diʼ tò no nəmwèʼè la:

“Vəghəŋ sətsen pfʉ vəghəŋ ve wen, mu vəghəŋ lu ndiʼ vəghəŋ vəwen.

Ə vəghəŋ lu bwènə̀ ə ntsi to vəghəŋ və wen a muʼ.

¹² Vəghəŋ sətsen ə ghaʼa ətyɨm a tyi ngəʼsə,

vəghəŋ və wen lu ə soʼo mbyi.

Vəghəŋ sətsen tensə la vəghəŋ ə ko kɨ wen,

ghə̀ lu be tensə la ghə̀ ko kɨ vəghəŋ.

¹³ Vəghəŋ sətsen bwìn dzèm à wen,

ko ghə̀ lu bwìn dzèm a vəghəŋ,

byìʼì ando ghə̀ zi ko ghə̀ lu tyen ə wenə wen.”

Bol ə ziʼi jì yi a zì Timotì ə nshwèʼè fa tsu

¹⁴ Wù mbèsə̀ nyʉ̀ venə a mà gàʼa a wù lə à viʼi, pfàntə vəwenə a shɨ Nyìngòŋ la, kə vəwenə ə jèʼè soʼtə̀ chò nə̀ nyʉ̀, byìʼì nyʉ̀ a və zì ko və lu ə gyàmtə̀. Ənyʉ̀ a venə ə gyàmtə̀ tò ə byɨsə viʼi vyi a və zhʉtə. ¹⁵ Mwòmsə̀ no nə̀ kədyòʼ kə ə nè la Nyìngòŋ yen la wù dìʼ wù ə shyèʼ yi a ghə̀ ko diʼsə kətʉ ə ne əshwèʼ ə wen, bè ziʼi tò nəmwèʼè yi a ghə̀ diʼi a ntɨm ə jùŋ ə̀ wen. ¹⁶ Kə wù ə nzhʉtə ə gàʼ ə kəndzɨ̀ŋtə̀ yi a və gaʼa a mbyì a shə̀ byìʼì ando ghə̀ kò ku ə ghoʼsə à Nyìngòŋ. Tənkì tə əgaʼa a tentə tə ne tò la viʼi ghʉsə jì shì a Nyìngòŋ ə kəŋ. ¹⁷ Viʼi vətsenvə vyi a və gaʼa əgaʼa a ghenə ə diʼ Hymenùs wenə Filitùs. Əgàʼ ə vəwenə ə diʼ to nə̀ chʉ kəshi kì a kə nə̀ mpfiʼi njò əwen ə̀ wìʼ. ¹⁸ Vəwenə ə ziʼi la Nyìngòŋ sə dìʼ mu ghə̀ lusə li vəghəŋ fa pfʉ. Əziʼi a ghenə ə diʼ no əziʼi ə ndzɨŋ. Ghə̀ ne li la viʼi vətsenvə tyen la və ko bè mbyɨmə à Klistò. ¹⁹ Alì kə to ə nə̀ʼsə kəchɨ kə ngə̀ŋ ki a Nyìngòŋ ə dìʼ mu ghə̀ we li a diʼ Klistò. Və nyoʼ li la, “Ghə̀ kɨ viʼi a və diʼ viʼi wen,” bè nyòʼ la, “No mə ndò yi a ghə̀ gàʼà la ghə̀ dzɨ̀mtə̀ Bobo ə diʼ ə ghʉsə ənyʉ̀ ə byɨvə vyi a ghə̀ nè.”

²⁰ Wù kɨ la, à diʼ a ngə̀ŋ ghoʼo kaŋ nə̀ bolə diʼ tsu to tənkì a tənkì. Ətsenəvə ə diʼ mu və shɨ̀tə̀ nə̀ kəso kəko, tsenəvə dìʼ mu və shɨ̀tə̀ nə̀ kəkas kə, tsenəvə dìʼ mu və tsɨf nə̀ ənkòʼ ə mbwom tsenəvə nə̀ kətsoʼ kə. Və nè və sə lyɨ̀ əkayntə əkaŋ vyi a və shɨ̀tə̀ nə̀ kəso kəko kò nə̀ kəkas kə, we əfo tsu a zhʉ a və tsuʼtə ənyʉ̀, lyɨ̀ tsenəvə vyi we əfo tsu no a zhʉ ko. ²¹ A sətsen no te ndò ghʉsə ənyʉ̀ ə byɨvə ə ndìʼ nə̀ laynə, Nyìngòŋ a lyɨ̀ wen tò nə̀ əkayntə wìʼ byìʼ ando ghə̀ ku li wenə wen ə sə dìʼ ə nkàyntə̀ wù ə shyèʼ à wen, kəʼtə ə ne no tənkì tə shyèʼ tə jùŋ tə no tə tsèm. ²² Nyɨŋ bwènə̀ fa əbàm ə təmwòmsə̀ yi a tə ku ngəʼ à mbvòʼò wìʼ li ə mwòmsə̀ ə ne nyʉ̀ tɨməvə, ə byɨmə à Klistò ə kòŋ viʼi bè tsi nə̀ mbwaʼmə. Wù ne nyʉ̀ a venə no ə tsèm we viʼi vyi a və jɨ̀mə̀ à Bobo nə̀ tətyɨm tə laynə tə. ²³ Kə wù nə̀ nzhʉtə ə gàʼ kə kəndzɨ̀ŋtə̀ yi a ghə̀ ko shyèʼè no kənyʉ̀. Wù kɨ la əgaʼa a ghenə ə vi tò nə̀ ntaŋ. ²⁴ Wù kɨ la wù ə shyèʼ ə Nyìngòŋ ə ko diʼ ə ntaŋmə̀. Ghə̀ diʼ ə bwaʼmə wenə no ndo, bè shɨtə ziʼi viʼi tò no a nkàyn, be kiʼi əghaʼa ətyɨm a nə̀ ndìʼsə̀. ²⁵ Tisə viʼi vyi a və nkəmə kənyʉ̀ ki a wu gàʼà nə̀ mbwaʼmə, kɨ la Nyìngòŋ ne nè ə vəwenə kwitə tətyɨm tə vəwenə fa vəwenə mbyɨsə ə bwènə̀ vi ə kɨ kənyʉ̀ ki a kə diʼ nəmwèʼè. ²⁶ Vəwenə sə dìʼ mu və fəŋ li a kətam nə̀ Deblə̀ ə sə ə ne ə shwèʼ ə wen, alì mu Nyìngòŋ zi ghə̀ ne tə tof tə vəwenə bwenə vi, vəwenə nyɨŋ fʉ̀ fa kətam a ghèn.

Ənyʉ̀ ə byɨvə vyi a viʼi lu ə ne a mətsi mə kəmwetə

¹ Mà kəŋ la wù ə kɨ la, à lu ə ndìʼ a mətsi mə kəmwetə, ə ngəʼsə lu ə ndìʼ no sə ghoʼo. ² Viʼi lu ə ntùʼmə̀ tò nə̀ təwen tə vəwenə, kòŋ ə ko no a nànto, ghaŋsə əwen, ko və lu lyɨ la wùtsen ə diʼ kəfo. Vəwenə lu ə telə̀ viʼi, bè to kətʉ fà vətìʼ vəwenə nə̀ vəlì vəwenə. Vəwenə ko lu nku kəzòŋ à wìʼ byìʼì no kənyʉ̀ kə tyetəkə kətsenkə a wìʼ ə ne à vəwenə, ko mfwàynə̀ Nyìngòŋ. ³ Vəwenə ko lu nkiʼ əkusə nshinsə, ko və lyèsə ku viʼi, gàʼa ənyʉ̀ ə byɨvə byìʼì viʼi, ko vəwenə ə ghaʼa təwen tə vəwenə, tsi tò nə̀ nyamsə, ko və nkòŋ ə yenə kənyʉ̀ kə jùŋkə. ⁴ Vəwenə mbaʼlə̀ viʼi nə̀ ə gaʼa ə vəwenə, shenə nè kənyʉ̀ ko və kwòʼtə̀, chasə viʼi vətsenvə. Vəwenə ko lu nkòŋə̀ Nyìngòŋ, bòŋsə kòŋ tò nyʉ̀ njòsə wen. ⁵ Vəwenə lu ə nfɨsə̀ viʼi vyi a və ghoʼsə Nyìngòŋ, alì ken la vəwenə əzhʉ fa wen no fa mpfen. Kə wù ə nkiʼ kənyʉ̀ kətsenkə ə ne we nkì ə viʼi a venə. ⁶ Viʼi vətsenvə ə diʼ a ntìntìn nə̀ vəwenə, jèʼè kwenə a aloʼ ə̀ viʼi, lobtə ki vyi a və ne li nchosə nyʉ̀ ə byɨvə ə sə kiʼ tətyɨm tə bwaʼa tə. Vəwenə ne li, ki a venə ə sə tsi tò a vəwenə a tyì soʼ. ⁷ Ki a venə mwòmsə̀ ə nkɨ kənyʉ̀ kə fikə, alì kenla vəwenə tɨmə nzhʉ kənyʉ̀ kùmə̀ əziʼi yi a ghə̀ diʼì nəmwèʼè. ⁸ Viʼi a venə ə taʼsə əziʼi yi a ghə̀ diʼì nəmwèʼè tò ndə̀ŋndəŋ ando Janès wenə̀ Jambles ə nlu sə taʼsə əziʼi ə Mosìs. Vəwenə ə nkiʼ təkwòʼtə̀ tə byɨtə, ko və mbe kwʉ̀ʼmə̀ a kənyʉ̀ kətsenkə a ntìntìn byɨmə. ⁹ Vəwenə ə ko ŋwʉʼ kəghaf byìʼì ando viʼi ə yenə myetə la vəwenə ə diʼ ngu. Ndə̀ŋndəŋ tò ando kənaʼ kə Janès wenə̀ Jambles ə mbayn li.

Timotì ə ndiʼ ə shəmə ntsìnə̀ Bol

¹⁰ Timotì, wù sə dìʼ luwèn alə mu wù ndzɨ̀mtə̀ li əziʼi ə ghomə, nə̀ ntsìnə̀ ghom, nè kənyʉ̀ ki a mà tə ə nkwòʼtə̀ ə lu ə nè. Wù yen li jì yi a ma choʼsə Klistò fatsu, kiʼi ətyɨm ə zhʉtə ghə̀, kòŋ viʼi, kɨ ə kwiʼi ətyɨm. ¹¹ Wù yen li ando və tə ntsuʼ kəghʉ ə kom mbè yenə ngəʼ shisə a və tə ku à mò a ntə̀ʼ Antìyòk. Wù kɨ ə nyʉ̀ vyi a və tə chò nə̀ mò a ntə̀ʼ Ikonùm nə̀ Lista, ma kwiʼi tò ətyɨm ə byèʼè ngəʼsə ashi, Bobo shìsə mò fa a ngəʼsə na shìsə no sətsèm. ¹² Mà gàʼà nəmwèʼè la, no ndo a ghə̀ sətsèn ə kòŋ ə ntsi ntsìnə̀ Nyìngòŋ, dzɨ̀mtə̀ Yesò Klistò, mu viʼi ne nku ngəʼ à wen. ¹³ Viʼi və byɨvə nə̀ viʼi vyi a və diʼi la və dìʼ kəfo, diʼ ne ə byɨfə dyʉ̀ tò nə̀ mbì, lobtə viʼi, viʼi vətsenvə be lobtə vəwenə.

Kənyʉ̀ kə tokə ki a kə diʼì a Ŋwàʼlə̀ Nyìngòŋ

¹⁴ Alì fa wù, faŋə mbyɨmə tò nəmwèʼè yi a və tə ziʼì wù tsu li. No wù ə nkɨ ndìʼsə̀ shi a sə tə ziʼì wù nə̀ kənyʉ̀ a kenkə. ¹⁵ Wù kwòʼtə̀ to ando və nlu sə ziʼì wù nə̀ ənyʉ̀ mu və fʉ̀ fa Ŋwàʼlə̀ Nyìngòŋ tò no fa ətʉ̀ʼ a wù mbo bu wàyn. Ənyʉ̀ a venə ə diʼ ə ku ətof à wù ndi wù byɨmə à Yesò Klistò a ghə̀ bwòŋsə̀ wù. ¹⁶ No te kənyʉ̀ kə ko a və nyoʼo a Ŋwàʼlə̀ Nyìngòŋ kə diʼ mu à nkù Nyìngòŋ la və nyoʼo, kə boŋə kwʉʼmə la və nziʼi viʼi tsu, shə̀ʼtə̀ la viʼi shwe li fatsu, tomsə viʼi fatsu, dìʼsə̀ viʼi fatsu ndi və ə ntsi ntsìnə̀ ə tɨmə. ¹⁷ Ənyʉ̀ a venə ə diʼ ə nè la wù ə shyèʼ ə Nyìngòŋ ə kwʉʼ myetə̀ ə ne no tənkì tə təshwèʼ tə jùŋtə tə tsèm.

Bol ə sensə la Timotì kwiʼi ətyɨm

¹ Yesò Klistò lu vi to nə̀ fòyn ə soʼ viʼi vyi a və bu tsi nə̀ vi a və pfʉkə li. Byìʼì wokenkə, mà sə gàʼa à wù no nə̀ kədyòʼ kə, ashɨ nə̀ Nyìngòŋ nə̀ Yesò Klistò la, ² wù ə nshə̀ʼtə̀ ntɨm ə jùŋ à viʼi no mənzhʉ̀ ntsèm. Wù nshə̀ʼtə̀ tò shə̀ʼtə̀ kò viʼi ə kòŋ ə zhʉtə, kò və faŋ ke kòŋ. Wù diʼi laynsə kənyʉ̀ ki a viʼi ə nè byɨsə, ə gàʼ la kə vəwenə bè nè, ə sensə la vəwenə ə nzhʉ ənyʉ̀ a venə. Wù sə ə ziʼì vəwenə, wù ə shɨtə ziʼi nə̀ ətyɨm ə zhʉtə ghə̀. ³ Mà gàʼà alə byìʼì ando ə zhʉ ne vì, a viʼi kə be ne kòŋ ə nzhʉtə əziʼi yi a ghə̀ diʼì ziʼi nəmwèʼè, alì ə bòŋsə kəŋ ə zhʉ ənyʉ̀ vyi a vəwenə kòŋ. Vəwenə ne jèʼè gubtə̀ ndìʼsə̀sə sə vi ə ziʼi ənyʉ̀ a venə à vəwenə. ⁴ Vəwenə nə̀ ghʉsə kənyʉ̀ ki a kə diʼì nəmwèʼè ə nə̀ bòŋsə zhʉtə mətitì mə zɨmə. ⁵ Fà wù, wù dìʼ ə ghaʼa wenə wu, ə kwiʼi ətyɨm ə bwəʼ ngəʼ wù ə nshə̀ʼtə̀ dyʉ̀ nə̀ ntɨm ə jùŋ, bè nè ə shwèʼ ə wu no tsèm a nə̀ wù ə shyèʼ ə Nyìngòŋ.

⁶ Mà kòŋ la wù ə nè tò alə̀ byìʼì ando ma diʼ mu à faŋ tò fə shitə fə ə zhʉ alə ə Nyìngòŋ lyɨ̀ mò a nə̀ kəku kə. Əzhʉ ə pfʉ ə mò boʼsə li. ⁷ Ma shwèʼè li nkwʉʼ tò no a nkàyn. Ma shwèʼ li ə zaʼa a kəlyɨŋ yi a və kəŋ, bè shɨtə ghaʼ əbyɨmə ə ghomə. ⁸ Mà sə kə̀ʼtə̀ tò əmòʼtə ntsìnə̀ ə tɨmə ə̀ mò luwèn, Bobo vəghəŋ yi a ghə̀ soʼo viʼi a ji tɨmə ə lu ku əmòʼtə a ghenə à mò a kətsi kə nsoʼ. Ghə̀ ko lə ku tò à mò, ghə̀ lu be ku te be à viʼi vyi a və tə ə nkə̀ʼtə̀ məvi ə wen nə̀ ə koŋə.

Bol ə sensə Timotì la ghə̀ ne ənyʉ̀ tsenəvə à wen

⁹ Mwòmsə no nə̀ kədyòʼ kə ə zàŋsə ə vi ə yen mò, ¹⁰ byìʼì ando Demàs kòŋ li əfo mbyi luwèn, ə nyɨŋ moʼtə mo ə dyʉ̀ a Tèsàlonikà. Klesèns mbe lu ə ndyʉ̀ a Gàlesìyà, Taytùs ə dyʉ̀ a Dalmatiyà. ¹¹ A faŋ tò Luk a shə̀ yo wen. Wù sə ə nvì wu vi ve Mak ndi ghə̀ ə ngyàmtə̀ mò a mò a shyèʼ. ¹² Ma tɨm li Tychicùs a Efesùs. ¹³ Wù sə ə nvi, wu vi nə̀ kəgwʉnə ə kom kì a mà tə mòʼtə̀ à Kalbus a Tuwas lì. Vi nə̀ və ŋwàʼlə̀ vwomə vi a və lemtə lemtə̀ lì, no te nə̀ yi a və shìtə nə̀ gwʉ̀ nyàm lì.

¹⁴ Alèksandà a ghə̀ tì kəlàm tə mwòm kənyʉ̀ à mò wen kə fànsə̀ no nànto. A ne loʼ to Bobo loʼ wen byìʼì kənyʉ̀ a kì. ¹⁵ Nkàyntə̀ wù be diʼ tùʼmə̀ byìʼì wen byìʼì ando ghə̀ tə ə ngàʼà ənyʉ̀ no a kədyòʼ, ko və boŋ byìʼì ntɨm ə jùŋ yì a vəghəŋ ə ziʼi. ¹⁶ A ə ndiʼ ando mà tɨmə akəshi kə nsoʼ ə gàʼ ə shi kətʉ komkə ambì kətsi, viʼi nyɨŋkə tò nyɨŋkə, no wìʼ nko faŋ ə tomsə ə mò. Mà jɨ̀mə̀ la Nyìngòŋ lyèsə ku vəwenə ando vəwenə tə nyɨŋ mòʼtə̀ mò. ¹⁷ Bobo ə nlu li tɨmə ə tomsə mò la ə mà kiʼi kədyòʼ ə shə̀ʼtə̀ mwetə ntɨm ə jùŋ à viʼi ətɨm vətsèm. Ghə̀ mbè ə bwòŋsə̀ mò fa kəvu ə pfʉ. ¹⁸ Mà kɨ la Bobo a mbwòŋsə̀ mò no fa nyʉ̀ byɨvə no tsèm ə bè lyɨ̀ mò ə mà shɨ̀tə̀ jèʼ kwen akəshi kə fòyn ə̀ wen a kaŋ. Viʼi ə nkuʼsə wen no məzhʉ ntsèm. Amèyn.

Bol ə ku toŋtə ə kəmwetə à viʼi və byɨməvə

¹⁹ Toŋtə Blisilyà wenə lɨmə wen Akwilà nə̀ viʼi ngwaʼ ngə̀ŋ nə̀ Onèsìpholùs à mò. ²⁰ Elastùs tə ə faŋ a ntə̀ʼ Kolìn. Mà tə sə ə lu ə moʼtə Tlophimùs a ntə̀ʼ Miletùs, ghə̀ kwaʼa kwaʼa. ²¹ Mwòmsə̀ no nə̀ kədyòʼ kə vi mibu ə byɨ̀ŋ chʉ. Ebulùs nə̀ Budèns nə̀ Laynùs nə̀ Klodyà no nə̀ viʼi və byɨməvə no və tsèm gàʼ la mà toŋtə ə wù.

²² Bobo a gyàmtə̀ wù. Nyìngòŋ ə diʼ ətyɨm ə jùŋ ghə̀ no a ghə̀ŋ və tsèm.