2 Bità

Kənkùmtə̀ kə ə ŋwàʼlə̀

Bità

Tʉ nyʉ̀ a və diʼ a ŋwàʼlə̀ ghèn

Bità ə nyòʼò kənkùmtə̀ kə ə ŋwàʼlə̀ ə wen to a viʼi və byɨməvə vyi a ghə̀ nyoʼo a vəwenə fa ambì. Ŋwàʼlə̀ a ghèn ə dyʉ̀ to mə a viʼi vətsenvə, və diʼ to kədə̀ŋ. Ghə̀ ə̀ nyoʼo ə ne la kə vəwenə byɨmə əziʼi ə ndìʼsə̀sə ə dzɨŋ ə̀ ntsìnə̀ ə kəfwaʼlə yì a ziʼi a yi ə ne la viʼi ntsi. Ji ə faŋ ke fəŋ a nyʉ̀ a ghèn diʼ to ə ghaʼ əziʼi nəmwèʼè yi a ghə̀ diʼi kumə Nyìngòŋ nə̀ Bobo Yesò Klistò.

Kənyʉ̀ ki a kə ə̀ kù ngəʼ a Bità no nànto ndiʼ ando ndìʼsə̀sə ə dzɨŋ a sènsə nziʼi gàʼa la Yesò ko lu bwenə vi. Bità ə mu nyòʼ la, “Bobo ə ko ghaʼasə, ghaʼasə ə ne kənyʉ̀ kì a ghə̀ ghʉ ando viʼi vətsenvə ə kwoʼtə. Ghə̀ boŋsə ku to zhʉ̀ a ghə̀ŋ byìʼì ando ghə̀ kəŋ la no viʼi vətsèm kwitə tətyɨm tə vəwenə fa mbyɨsə, ko ghə̀ lu kòŋ la no wìʼ ə mùʼ lù lè” (3.9).

Jì a və gəsə ŋwàʼlə̀ ghèn fa tsu

Ətoŋtə (1.1-2)

Ji yi a Nyìngòŋ ə dzàŋ viʼi və byɨməvə la və ntsi fa tsù (1.3-21)

Ndìʼsə̀sə ə dzɨŋ (2.1-22)

Kə diʼ nəmwèʼè la Yesò lu bwenə vi (3.1-18)

¹ A nyoʼo mò Saymun Bità nyoʼo ŋwàʼlə̀ ghèn. Ma diʼ wù ə shwèʼè ə Yesò Klistò be diʼ wù ə ntɨm ə wen.

Ma nyoʼo ŋwàʼlə̀ na ghèn a ghə̀ŋ vi a ghə̀ŋ byɨmə li a Yesò Klistò to nə̀ yes. Əbyɨmə na ghenə ə boŋə a ghə̀ŋ to ndə̀ŋndəŋ ando ghə̀ bòŋə a yès. Yesò Klistò ə ne vəghəŋ kiʼi əbyɨmə na ghenə byìʼì ando ghə̀ diʼi wu kənyʉ̀ kətɨməkə. Ghə̀ diʼ Nyìngòŋ ə vəghəŋ mu ghə̀ mbwòŋsə̀ li vəghəŋ fa mbyɨsə.

² Nyìngòŋ ə ndiʼi ətyɨm ə jùŋə ghə̀ a ghə̀ŋ no nànto ə be kù mbwaʼmə a ghə̀ŋ byìʼì ando ghə̀ŋ kɨli wen be kɨ Bobo vəghəŋ Yesò Klistò.

Ji a viʼi və byɨməvə ə diʼ ə ntsi fa tsu

³ Nyìngòŋ ə ku li no tèbe ghò a vəghəŋ ə kəŋ ndiʼ vəghəŋ ə ntsi ntsìnə̀ ə laynə yì a ghə̀ kwʉ̀ʼ. Ghə̀ ku fo a venə chò fa kədyòʼ ə Nyìngòŋ a ji la ghə̀ nè li vəghəŋ sə kɨ Nyìngòŋ. Ghə̀ dzàŋə li vəghəŋ la və ntsi a ntìntìn əbayn ə ghoʼo ghə̀ ə Nyìngòŋ, jèʼè a jisə jùŋsə ə Nyìngòŋ. ⁴ A diʼ a ji na ghèn a Nyìngòŋ ə lwinsə li kənyʉ̀ kə ghʉkə kikə a ghə̀ ə nghʉ̀ la ghə̀ lu ku kəku kə jùŋ kə kə kaynəkə, la kə gyamtə vəghəŋ la vəghəŋ nyɨŋ fʉ̀ fa nyʉ̀ ə byɨvə yi a njòsə wensə ə vi nə̀ wenəvə a mbi ashə və byɨbsə viʼi, ə boŋsə tsi ntsìnə̀ Nyìngòŋ. ⁵ Ando ghə̀ŋ sə diʼ viʼi və byɨməvə lə̀, ghə̀ŋ mwomsə no nə̀ kədyòʼ kə ə nè nyʉ̀ ə jùŋə və ə kwʉ̀ʼsə əkwi a ghə̀ŋ a byɨmə. Ghə̀ŋ ə ntsi ntsìnə̀ ə jùŋ na ghèn, be tsi to nə̀ viʼi və tofəvə. ⁶ Ghə̀ŋ sə tsì to nə̀ viʼi və tofəvə, ghə̀ŋ be ə nghaʼa təwen ə təŋtə, kɨ ə nwensə̀, kə ghə̀ŋ a wensə to wensə ghə̀ŋ be tsi ntsìnə̀ yì a ghə̀ nè Nyìngòŋ ə saŋlə. ⁷ Ghə̀ŋ sə tsì ntsìnə̀ na yì, ghə̀ŋ ə kòŋ vəlemə, kə ghə̀ŋ kòŋ to vəlemə ali ghə̀ŋ be kiʼi kòŋ to a viʼi vətsèm. ⁸ Ghə̀ŋ ə sətsen ə kwi to kwi a ghə̀ŋ a ntsìnə̀sə a ji na ghèn, ghə̀ŋ a ne nyʉ̀ to ndə̀ŋndəŋ, be kuʼmə, ghə̀ŋ a diʼ la mə kɨ yì a ghə̀ŋ kɨli Bobo vəghəŋ Yesò Klistò ə ko le to kədyàŋ. ⁹ Alì viʼi vyi a və ko tsi a ji na ghèn diʼ to nə̀ viʼi a və fɨfə li, ko və yenə kəfo. Vəwenə diʼ mu və lyesə li la Nyìngòŋ ə nshʉ laynsə vəwenə fa vəwenə a mbyɨsə.

¹⁰ A le kənyʉ̀ ki a ma sensə ghə̀ŋ, a vəlemə, la ghə̀ŋ tuʼtə ə ghaʼ nyʉ̀ a venə və to ə diʼ la Nyìngòŋ ə tsùʼtə li ghə̀ŋ ə dzàŋ shisə la ghə̀ŋ ə diʼ viʼi Nyìngòŋ. Ghə̀ŋ yi nè alə̀, ko ghə̀ŋ be lu fəŋ fa ghə̀ŋ a byɨmə, ¹¹ a li Nyìngòŋ ə nè la ji bayn mwetə ndi ghə̀ŋ kwen akəshi kə əfòyn ə Bobo, ə Mbwòŋsə̀ vəghəŋ Yesò Klistò, a diʼ əfòyn mu ghə̀ faŋ li to ghayn əmùʼ.

Kənyʉ̀ ki a və nyòʼ ŋwàʼlə̀ ghèn byìʼì kəwenkə

¹² Ali, mà ndzə̀ŋtə̀ nyʉ̀ a venə to dzəŋtə a ghə̀ŋ no tèbe ando ghə̀ŋ ə kɨ li be diʼ mu ghə̀ŋ ghaʼ li nyʉ̀ a venə a və diʼi nəmwèʼè lə, və əto. ¹³ Kə diʼ no nkayn la mà ə ndzə̀ŋtə̀ ə nyʉ̀ a vyi a ghə̀ŋ zaʼa fa kətsi a mà lù pfʉ ndi ghə̀ŋ ə kwoʼtə. ¹⁴ Ma gaʼa alə̀ byìʼì ando Bobo vəghəŋ Yesò Klistò sə diʼ mù ghə̀ diʼi li nlaynsə a mò la, kəghaf ə komkə ko be dyə̀fə a nse ashen. ¹⁵ Kə le diʼi la ma mwomsə no nə̀ kədyoʼkə ə nè ndiʼ mà na pfʉ ghə̀ŋ bo nkwoʼtə nyʉ̀ avenə to kwoʼtə.

Bità ə shə̀ʼtə̀ la vəwenə yen li kədyòʼ kə Yesò to no fa vəwenə ngeŋsə

¹⁶ Ənyʉ̀ vyi a yès ə shə̀ʼtə̀ a ghə̀ŋ kumə məvi ə Bobo vəghəŋ Yesò Klistò nə̀ kədyoʼkə wenkə diʼ nyʉ̀ mu yès yen li to no fa yès a ngəŋsə. A ko diʼ mətitì mə zɨmə a wù ə tofə ə tsen shə̀ʼtə̀. ¹⁷ A ndiʼ ando tiʼi wen, ə Bobo Nyìngòŋ kùʼsə wen ə ne la ghə̀ kiʼi əbayn ə ghoʼo ghə̀, yès yen. Yès ə zhʉ li ando Nyìngòŋ ghə̀ŋ a ghə̀ kiʼi kədyòʼ no kə tsèm ə gaʼa ə gàʼa la, “Ghèn diʼ wàyn əkòŋ ə mò, ma saŋlə kumə wen no nəkwoŋ.” ¹⁸ Yès ə nzhʉ gɨ na ghèn to no fa yès a ngəŋsə ando yo vəwenə ndiʼ a kwi pfen ə laynə.

¹⁹ A lə kənyʉ̀ ki a kə nè vəghəŋ sə shətə kɨ to no kɨ la ntɨm yì a nshə̀ʼtə̀ sə ghoʼkəsə ə shə̀ʼtə̀ kumə wen ə ndiʼ to no nəmwèʼè. Ntɨm ayi ə diʼ to nə̀ kənkàʼtə̀ kə. Ghə̀ baynə a kəbəŋ kə fenəkə. Ghə̀ŋ ə zhʉ ntɨm ayi ndi kətsi kə ə lù kwʉʼ a Yesò yi a ghə̀ baynə to nə̀ chʉzhʉ ə saʼaghə ku əbayn ə wen a ghə̀ŋ tətyɨm. ²⁰ Ghə̀ŋ diʼ ə shɨtə kɨ no ji nə̀ nəkwoŋ la kənyʉ̀ kə tsen kə ko diʼ tebè a Ŋwàʼlə̀ Nyìngòŋ a nshə̀ʼtə̀ ə ghoʼo ə tsen ə nyòʼò to fa wen a ngeŋ. ²¹ Kə diʼ alə̀ byìʼì ando no tèbe kənyʉ̀ kə kò a və ə nyoʼo li a ŋwàʼlə̀ diʼ mu à ə̀ nshə̀ʼtə̀ kəzhwì kə Ŋwoʼkə Nyìngòŋ. Wìʼ ə ko ə nyoʼo kənyʉ̀ kə tsen kə byìʼì ətof ə ngeŋ ə wen.

Bità ə ku kətyiftə kumə ndìʼsə̀sə ə dzɨŋ

¹ Ndìʼsə̀sə ə dzɨŋsə na fʉ̀ kuʼ a ghə̀ŋ a ntìntìn to ndə̀ŋndəŋ ando a ndiʼ a tʉʼ ə mughə, nshə̀ʼtə̀sə dzɨŋsə fʉ̀ kuʼ a viʼi ntìntìn. Sə na fʉ̀ kuʼ, ə nyoʼtə ziʼi əziʼi ə dzɨŋ, ghə̀ ne la viʼi fəŋkə. Sə na fʉ̀ ə ntensə no Bobo yi a ghə̀ ə zen kətʉ kə ə vəwenə byìʼì Wokèn, Nyìngòŋ ə na bvɨtə byɨbsə vəwenə. ² Viʼi Nyìngòŋ vətsenvə ə na dzɨ̀mtə̀ təziʼi təbyɨtə ə vəwenə be nshəmə ə ntsìnə̀sə kəfwaʼlə sə vəwenə na sensə to kədə̀ŋ, viʼi zìtə̀ ə ngaʼa əgaʼa ə əbyɨghə kumə Ji yì a ghə̀ diʼi nəmwèʼè. ³ Ndìʼsə̀sə sə ndzɨŋ a sensə ə bàŋbàŋ a ko, diʼ ne ə mò mətitì mə zɨmə, lobtə to ghə̀ŋ, shi əfo ə vəŋə. Ali Nyìngòŋ ə nzìtə̀ li sə baʼtə̀ ə byɨbsə vəwenə no fa kəghaf kədyəkə. Nyìngòŋ ko bʉnə!

⁴ Ghə̀ŋ kɨli la Nyìngòŋ ə nko ə faŋ ke ə ku ngəʼ no tèbe a ətsɨŋsə wèn shisə a sə nè li mbyɨ. Ghə̀ ə mòʼo li shiʼsə nə̀ vəwenə akəshi kəbyɨkə ə kwiʼ ghàŋtə vəwenə a kəbəŋ kə fenəkə, vəwenə sə tsi to tsu kəʼtə kətsi kə nsòʼ. ⁵ Nyìngòŋ ə nko ə̀ moʼtə viʼi mbyi a tʉʼ ə mbì ke ku ngəʼ a vəwenə. Ghə̀ ə mbyɨsə li viʼi vyi a və ko zhʉtə tebè wen nə̀ kəkuŋkə, a bwòŋ to Nuwà, ando ghə̀ nziʼi kumə ntsìnə̀ ətɨmə, wenə viʼi vətsenvə sòmbo. ⁶ Nyìngòŋ ə nyʉʼ li əloʼ ə Sodòm nə̀ əloʼ ə Gòmolyà nə̀ zhiʼ, təloʼ na tèntə be mè, a diʼ nchwi ə diʼ la à lə kənyʉ̀ ki a kə lu fʉ̀ a viʼi vyi a və ko zhʉ̀ tebè wen. ⁷ Ghə̀ ə sə byɨbsə təloʼ a tentə ə bwoŋsə Lòt. Lòt ndiʼ wù kənyʉ̀ kətɨməkə, ghə̀ nki ə ntsìnə̀sə kəfwaʼlə shisə a viʼi lòʼ a venə ə̀ tsi, kənyʉ̀ a kì ku ngəʼ a wen no nànto. ⁸ Lòt ə ntsi to no a vəwenə a ntìntìn to a nə̀ wù ə jùŋə, ətyɨm ə wenə ku ngəʼ a wen no to mətsi ntsèm byìʼì nyʉ̀ ə byɨvə vyi a ghə̀ ə nzhʉ̀ la viʼi a venə ə nè be yenə no fa wen a ngeŋ. ⁹ Kə le diʼi la Bobo ə kɨ ji yì a ghə̀ zizi ghə̀ bwoŋsə viʼi wen fa tsù fa ngəʼsə vəwenə, kɨ ji yì a ghə̀ zizi ghə̀ ghaʼ ghʉ̀ viʼi və byɨvə fa tsù ə zàʼa fa kətsi kə nsòʼ. ¹⁰ Nyìngòŋ ə baʼtə̀ ngəʼ viʼi vətsenvə nəkwoŋ, a yi viʼi vyi a və tensə kədyòʼ kə Nyìngòŋ, ə sə nè to nyʉ̀ kəməŋ vi a njòsə wèn ə̀ vəwenə sə kòŋ.

Ndìʼsə̀sə ə dzɨŋ na sensə ə ko fwaynə tebè kəfo, ko və zhʉtə tebè kənyʉ̀ fa wìʼ. Vəwenə ko gumlə tebè ətsɨŋsə Nyìngòŋ akàŋ, boŋsə telə səwensə telə. ¹¹ Ntsɨŋsə Nyìngòŋ sə ə tɨmə ashɨ ə Bobo sə ghamə ndìʼsə̀sə ə ndzɨŋ a sensə, ko sə be ə gaʼa gaʼa ə zafəghə no tèbe ando sə kiʼi kədyòʼ chò vəwenə. ¹² Alì ndìʼsə̀sə ə dzɨŋ a sensə ə dèmə̀ nè to nyʉ̀ to nə̀ nyamsə ətòʼ, a və shɨtə to la viʼi ə nku zhwilə. Vəwenə ə tsəʼsə nyʉ̀, ko və kɨ. Nyìngòŋ ə lu byɨbsə vəwenə to nə̀ ə nyamsə ətòʼ a sensə. ¹³ Nyìngòŋ ə lu loʼ vəwenə to nə̀ ndə̀ŋndəŋ ngəʼ na ghèn a vəwenə ə ku a viʼi vətsenvə lə. Vəwenə ə̀ zhʉsə kəŋ ə zhʉ̀ a fwom, vəwenə sə dèmə̀ kwetə no tèbe ghò, nè to nè, no tèbe a kəntokə chwìchwì. Vəwenə nə̀ nyʉ̀ʼmə ə zhɨ̀ vye vəwenə, kənyʉ̀ a kì ə sə diʼsə kətʉ no nànto. Vəwenə ə̀ lobtə ghə̀ŋ no zhʉ̀ko, vəwenə sə saŋlə. ¹⁴ Vəwenə nə̀ nyʉ̀ʼ no zhʉ̀ko, kwoʼtə to ki viʼi. Vəwenə nə̀ nè mbyɨ, ko və bwaʼa, ə yèyn viʼi vi a əbyɨmə ə vəwenə ə bwaʼa, və lobtə, və kwen a mbyɨ. Vəwenə ghʉ li tə kwoʼtə tə vəwenə to ko. Nyìngòŋ ə telə li vəwenə! ¹⁵ Vəwenə moʼtə li ji ə jùŋ sə jèʼe fa ji ə̀ Balàm, ə wàyn Beyò yi a ghə̀ ə kòŋ əko yi a ghə̀ ə nkiʼ, fa nyʉ̀ ə byɨvə vyi a ghə̀ nè. ¹⁶ Alì Nyìngòŋ ə nkəŋkə li nshə̀ʼtə̀ na ghèn a ji la jàkas ə wen ə gaʼa li to nə̀ wìʼ a wen ə tensə nyʉ̀ ə kəmbo a vyi a ghə̀ nè li.

¹⁷ Ndìʼsə̀sə dzɨŋ a sensə ə diʼ to nə̀ ashɨ məghòm azhʉ̀ mə zɨmə. Vəwenə nə̀ diʼ to nə̀ mboʼsə a zhʉ̀ a təfwof tə totə nə̀ tenə chò. Nyìngòŋ ə sə diʼ mù ghə̀ shɨtə li kəshi a vəwenə, kə fenə to la lèm. ¹⁸ Vəwenə ə ghaŋsə wèn gàʼà no nànto be gàʼà gaʼa ə kənkoyn, lobtə viʼi vyi a və sə nyɨŋ fʉ̀ vi fa a ntìntìn ə̀ viʼi vyi a və ko kɨ ji Nyìngòŋ, kəŋ la viʼi a vyi vi ə tsèntə vəwenə, wenə vəwenə ə nè nyʉ̀ vyi a njòsə əwen ə̀ vəwenə sə kòŋ. ¹⁹ Vəwenə ə ghʉ viʼi a venə gàʼa la vəwenə a nè, ko viʼi a vyi ə be diʼ əkòs, ali nkàyntə̀ vəwenə diʼ əkòs a vəwenə a mbyɨsə. Kə diʼ alə̀ byìʼì ando no tèbe ghò nə̀ zhʉsə tisə wìʼ, ghə̀ sə shyèʼ to kəkòs a kəwenkə. ²⁰ Viʼi sətsen kiʼi Bobo, ə Mbwòŋsə̀ vəghəŋ Yesò Klistò ə nyɨŋ fʉ̀ fa nyʉ̀ ə mbi ə be lu bwensə kwen tsu, kə tisə vəwenə, a viʼi a vyi a byifə chò ando və ə ndiʼ fa ambì. ²¹ Kə sətsen ə ndiʼ alə̀, mù kə tə boŋsə boŋ la vəwenə faŋ kò və lu kɨ ji ntsìnə̀ ə tɨmə no fa mphen, chò ando vəwenə kɨ ə mbe bwensə ko və be zhʉ tebè əsoʼ ə laynə yì a və nku a vəwenə. ²² Kənyʉ̀ ki a kə fʉ̀ a ndìʼsə̀sə ə dzɨŋ a sènsə diʼi li la ngàyn ghèn la, “Bʉ nə̀ shisə kəfo, ghə̀ bwensə lo,” diʼ to no nəmwèʼè. Kenkə la, “Və shʉ̀ tèbe əwènə ə nkʉnyàm, a ghə̀ be bwensə kwen ə buŋkə to kətsoʼ,” be diʼ to no nəmwèʼè.

Bobo ne bwènsə̀ vì

¹ Kenkə diʼ kənkùmtə̀ kə ŋwàʼlə̀ ə mò a ghə̀ŋ a doŋ shomsə jùŋsə, a diʼ tèbe a tyì ghə̀ ko mu ma dzɨŋtə li ghə̀ŋ nə̀ nyʉ̀ a ghə̀ŋ diʼ kɨ ndi ghə̀ŋ bwensə kwòʼtə nyʉ̀ a vyi nə̀ əkwoʼtə ə laynə ghə̀. ² Ma kəŋ la ghə̀ŋ bwensə kwòʼtə nyʉ̀ vyi a nshə̀ʼtə̀sə laynəsə ə ngàʼa no fa chʉʼ ə mughə, nə̀ əsoʼ yì a Bobo, ə Mbwòŋsə̀ vəghəŋ ə ngàʼa a viʼi ntɨm və ku a ghə̀ŋ. ³ Nò kənyʉ̀ kə to kə ki a ma kəŋ la ghə̀ŋ ə kɨ diʼ la, à lu ndiʼ a mətsi mə bàm ə viʼi fʉ vì, ntsi to ntsìnə̀ njòsə wen, be chəʼ ghə̀ŋ, ⁴ bèmə la, “A Bobo ə nghʉ li la ghə̀ lu bwenə vi? Ghə̀ lə ye? Vətiʼi və vəghəŋ sə diʼ mù və pfʉkə li ali ko andiʼ la kənyʉ̀ kə ə kwitə li no fa tʉʼ a və shɨtə mbi ghèn.” ⁵ Viʼi a venə nə̀ tyenə to no tyenə ə kɨ la à ndiʼ a tʉʼ ə mbì, Nyìngòŋ ə ngaʼa to gaʼa əkaŋə sə diʼ ə be gaʼa to gaʼa, nse fʉ̀ kuʼ fa mù, be ne mu sə diʼ nə̀ nəkwoŋ. ⁶ Nyìngòŋ lyɨ̀ li to mu a menmə ə byɨbsə mbi tsu a tʉʼ ə mughə. ⁷ To byìʼì ə gaʼa Nyìngòŋ na ghenə əkaŋə yì a ghə̀ diʼi luwen nə̀ nse diʼ ghə̀ byətə byətə ndiʼ əzhʉ̀ lù kwʉʼ ghə̀ byɨbsə nə̀ zhiʼi. Ndiʼ zhʉ̀ lù kwʉʼ ghə̀ soʼo byɨbsə viʼi vyi a və ko zhʉtə tebè fa wen.

⁸ Alì kə ghə̀ŋ a lyèsə kənyʉ̀ kènkə a doŋ shom sə jùŋsə la à diʼ a Bobo, kətsi kə ə mùʼ kə diʼ to nə̀ ngʉ̀ʼ nkam, ngʉʼsə nkam diʼ to nə̀ kətsi kə mùʼ. ⁹ Bobo ə ko ghaʼasə ə nè kənyʉ̀ ki a ghə̀ nghʉ̀ li ando viʼi vətsenvə ə kwoʼtə. Ghə̀ boŋsə ku to zhʉ̀ a ghə̀ŋ byìʼì ando ghə̀ kəŋə la no viʼi və tsèm kwitə tətyɨm tə vəwenə fa mbyɨsə, ko ghə̀ lu kòŋ la no wìʼ ə mùʼ lù lè.

¹⁰ Alì Nyìngòŋ lu bvɨtə vì a kətsi a wìʼ ko ə kɨ, to nə̀ tsòŋ. A lu ndiʼ a kətsi na yi, kəfo kə zɨ̀mə fa kàŋ, ə kàŋ sàm, ə zhiʼi ə nyʉʼ no tèbe ghò yi a ghə̀ diʼi tsu, nse be mè boʼsə no tèbe nə̀ ghò yi a ghə̀ diʼi tsu. ¹¹ Ando və diʼ lu nyʉʼ əfo a venə no ə tsèm a ji na ghèn lə̀, ghə̀ŋ lə diʼ ə ntsì ale? Ghə̀ŋ diʼ ku təwen təŋtə a Nyìngòŋ ə be ntsi ntsìnə̀ laynə. ¹² Ando ghə̀ŋ ə nyʉ̀ʼ kəʼtə kətsi kì a Nyìngòŋ ə ghʉ li la Yesò lu vi, be mwomsə ə nè la kə zaŋsə vi. A lu ndiʼ a kətsi na yi, əkaŋ ə fwi, ə zhiʼi ə nyʉʼ no tèbe ghò yi a ghə̀ diʼi akàŋ. ¹³ Alì vəghəŋ ə ŋwʉ̀ʼ luwen, kəʼtə to la əkaŋ ə fìghə nə̀ nse ə fi vi, a no tèbe ghò tsu ə ti a kayn, to ndə̀ŋndəŋ ando Nyìngòŋ ə ghʉ li.

¹⁴ Kə le diʼ a doŋ shom sə jùŋsə la, ando ghə̀ŋ kəʼtə kətsi na kì, ghə̀ŋ mwòmsə̀ no nə̀ kədyoʼkə ə ndiʼ nə̀ laynə, ko ghə̀ a nkiʼi ə mbyɨ ashɨ Nyìngòŋ, be tsi nə̀ mbwaʼmə. ¹⁵ Ghə̀ŋ ə kɨ la Bobo vəghəŋ ə ghaʼa tyɨm alə̀, ku ji a ghə̀ŋ ndi ghə̀ŋ bwòŋ. Lèmə̀ vəghəŋ Bol yi a vəghəŋ ə kòŋ tə ə nyòʼ to nyʉ̀ a venə a ghə̀ŋ nə̀ ətof mu à ku Nyìngòŋ a wen. ¹⁶ A diʼ a wen a vəŋwàʼlə̀ vətsevə no və tsèm, lèmə̀ vəghəŋ Bol ə nyoʼtə li ngàʼa to kənyʉ̀ na kènkə. Ghə̀ nyòʼò li nyʉ̀ ə tsenəvə və to və zhʉ ə kɨ. Viʼi vi a və ko ziʼi kənyʉ̀ kə Nyìngòŋ, vəwenə nə̀ʼkə̀ a vəwenə a byɨmə nə̀ tə shyèʼ tə, to ando vəwenə nə̀ kwitə shì ə Ŋwàʼlə̀ Nyìngòŋ ə tsevə. Vəwenə nè alə̀, dzàŋ ngəʼsə a vəwenə a kətʉ.

¹⁷ Ando ghə̀ŋ ə kɨ li nyʉ̀ a venə a doŋ shomsə jùŋsə, ghə̀ŋ ə tofə kə viʼi a venə a və kwitə kənyʉ̀ kə Nyìngòŋ lə a nè ghə̀ŋ kwen a ntìntìn dzɨŋsə ə vəwenə a sènsə ə fʉ̀ fa kənyʉ̀ yi a ghə̀ŋ tə tsuʼ li. ¹⁸ Ali ghə̀ŋ ə mbòŋsə kwi to kwi a ntìntìn boŋ tyɨm ə Bobo ə Mbwòŋsə̀ vəghəŋ Yesò Klistò be ziʼi ə nkɨ wen. Kuʼsə ə ndiʼ wen luwen, be zaʼa no fa ze. Amèyn.