Ŋwaꞌlə Taytəs
Ŋwaꞌlə Pɔɔl tɨ́ Taytəs
Taytəs nə luu wuu Kristo fɨ shɨ Griis faŋ ŋwə nə gù wuu yitoꞌ Pɔɔl nə wuu məfɨꞌtə nu Nwi. Pɔɔl meꞌtə ŋwə shɨ Kriit maa məndəynə nshəŋtə vɨɨ Kristo fɨ yifi.
Taa ŋwaꞌlə ŋwə̀ Pɔɔl naysə ŋiꞌ nu Kristo maa jɨɨ yijəə, baa nàysə tɨ́ Taytəs faŋ ŋkə bàw maa mətɨsə vɨɨ, baa nə nu kɔ̀ŋ nshinə vɨɨ mbɨə faŋ vəŋ lùu vətɔ taa nshəŋtə vɨɨ Kristo.
Məsenə vəwaytə:
Vənzi və ŋwaꞌlə 1.1-4
Yigi kɔ̀ŋ vɨɨ mbɨə faŋ vəŋ luu vətɔ taa nshəŋtə vɨɨ Kristo 1.5-16
Nshinə vɨɨ Kristo 2.1-15
Ntɨsə səmɔ́ꞌ 3.1-11
Vəndwə və ŋwaꞌlə 3.12-15
1Shɔꞌtə Pɔɔl tɨ́ Taytəs
1Lùu mə, Pɔɔl, wuu faꞌ Nwi, faŋ mə nyɔ̀ꞌ ŋwaꞌlə ŋwə̀ tɨ́ ghɔ, Taytəs. Mə lùu wuu ntɔŋ Yeso Kristo, faŋ mə fɨꞌtə nu Nwi tɨ́ vɨɨ mbɨə faŋ Nwi nə shòꞌ maa mbii vɨɨ nə, laa vəŋ nuŋ fwisə vəŋ maa Kristo, baa kɨ̀ɨ nə nu yinsəŋ Nwi, faŋ ŋkə yɨsə vɨɨ bəŋsə Nwi. 2Mə faꞌ faꞌ ghɔ́ buꞌ laa mə kɨꞌ məbwey vəlwaŋ faŋ ŋwə gòꞌsə yighee muꞌ. Nshɨ-tɔ Nwi faŋ ŋwə kee yaa kɨ sɨɨ ba me, nə kɔ̀ꞌnə shù fɨshi maa məndɔ kɔ məbwey vəlwaŋ ghɔ́ tɨ́ vɨɨ. 3Ŋwə nə yɨ̀ laa yigisə yi yɔ́ fuu ntee yikəꞌ vɨɨ maa njii yighee. Yigi yɔ́ lùu ntɔŋ yijəə Nwi faŋ Nwi, wuu məbweysə ŋwaa-nsiŋ, nə kɔ̀ ghɔ mə, laa mə kɨ fɨꞌtə tɨ́ vɨɨ. 4Mə tɔ̀ŋ ŋwaꞌlə ŋwə̀ tɨ́ ghɔ, Taytəs, faŋ a luu ŋkee ŋwiŋ ŋwaa maa yizii Kristo faŋ nsiŋ nùŋ fwi saŋ-nsiŋ maa ŋwə nə. Tɨta Nwi ghɔ Yeso Kristo, wuu məbweysə ŋwaa-nsiŋ, tu mənɔŋ-bwaŋnə tɔ ghɔ, nə məduꞌ-nyɔŋ.
Faŋ bàw Taytəs shoꞌ vɨɨ faŋ vəŋ kùꞌnə, nùŋ vəŋ maa vɨɨ taa taa nshəŋtə vɨɨ Nwi
5Ŋiꞌ nu ŋkɨə faŋ mə nə mèꞌtə ghɔ shɨ Kriit, lùu laa a bɔŋsə vənu mbɨə faŋ mbə nə gòꞌ nə, nùŋsə vɨɨ taa taa nshəŋtə vɨɨ Nwi ntɨꞌsə ntɨꞌsə, faŋ mə nə gì tɨ́ ghɔ nə. 6Bàw laa wuu taa fɨ taa nshəŋtə vɨɨ Nwi luu wə faŋ tuu kee wee-nsɔꞌ kee lùu maa ŋwə me, zu wi baa luu sheꞌ muꞌ, vaŋ vi bìŋ nu Kristo nɨzi, kee kɨ bɨbuulə me, kee shɨshii me. 7Kee bàw laa wə faŋ lùu tɔ taa nshəŋtə vɨɨ Nwi kii nsɔꞌ maa ŋwə me, fɔnə ŋwə lùu wuu məndeynə vətɔ və Nwi. Kɨ ŋwə yɨsə vənu nə wutə ki me, kee kìi fwi yishəsə me, kee nu məluꞌ mbə shɔɔ sɨ ŋwə me, kee nywenə nywaŋsə me, kee kəə ka ŋkuŋ me. 8Bàw ŋwə bee kii kàw maa məfisə vəndɔ taa ŋii ŋwə, kàw vənu vəjəəvə, yɨsə vənu vənshə nə yitɔfə, yɨ vənu vəloomə, baa lùu wuu ley vɨsɨ Nwi, kɨɨ maa məshiinə ŋwaa wi, 9jia sheꞌ nu yinsəŋ Nwi faŋ vɨ nə dèesə tɨ́ ŋwə nə, tɨ́ kaꞌ ŋwə baa kùꞌnə maa mətɨsə vɨɨ nə nu yinsəŋ Nwi, kɨ̀ɨ maa məkɨ ŋaꞌsə sɨ vɨɨ faŋ ghɔ vɨ vəŋ shɔɔnə nə yigi.
Faŋ bàw Taytəs fəŋ yigisə vɨɨ məbuulə nu Nwi
10Vɨɨ vəyaŋ shɔ faŋ vəŋ ndì wutə, gisə yigisə dayday, buulə yitɔ yi vɨɨ. Vɨɨ mbɨə faŋ vəŋ bɨ shɔ̀ɔ taa ŋwaa vəŋ, lùu mbɨə faŋ vəŋ fùu fɨ taa ŋwaa vɨɨ mbɨə faŋ vɨ nə sɨ̀ɨtə vəŋ nə. 11Bàw vɨ kɨ fəŋ vəŋ, buꞌ laa vəŋ kiasə ŋkee yishuu yindɔꞌ yi vɨɨ, nyə gu, buꞌ faŋ vəŋ fɨꞌtə vənu faŋ mbə kee yikuꞌnə me. Vəŋ yɨ̀ nɨniŋ sheꞌ maa məkəə ka, faŋ lùu nu tɔ dɨɨ. 12Maa wuu shɨ vəŋ mɔ́ꞌ, faŋ nə luu nshiiŋii-sɔghɔ, nə gi ŋkee nu yinsəŋ laa, «Vɨɨ Kriit sɨɨ təba ghee nshə. Vəŋ lùu yaa nyaasə bwəsə, lùu vɨɨ məbəə ŋay, baa lùu vəwaŋ-mfii-ndaa.» 13Yigi yɔ́ luu ŋkee yinsəŋ. Nɨniŋ, bàw a kɨ gi tɨ́ vəŋ ŋkee nə wutə, laa vəŋ kɨ duꞌ nə nu ŋkɨə faŋ vəŋ nùŋ fwisə vəŋ shɔ maa Kristo, 14kee nùŋ tɔ vəŋ maa mətiitii mə vɨɨ Jus me, tɨꞌnə me maa nuŋsə vəŋ me, faŋ luu sheꞌ nuŋsə vɨɨ faŋ vəŋ mèꞌ nu yinsəŋ. 15Vənu vənshə ley tɨ́ vɨɨ mbɨə faŋ fwisə vəŋ lèy. Luu nə, tuu ŋkee nu kəmuꞌ kee lèy tɨ́ vɨɨ mbɨə faŋ fwisə vəŋ kee lùu səley me, baa nə tɨ́ vɨɨ mbɨə faŋ vəŋ kee nùŋ fwisə vəŋ maa Kristo me. Vənu mbɨə faŋ kəŋ vɨɨ vɔ́ bɨꞌtə nə, bɨ. Fwisə vəŋ bɨ nɨzi. 16Vəŋ gisə laa vəŋ kɨ̀ɨ nə Nwi. Luu nə, vəŋ twey ŋwə fɨ taa nshinə vəŋ. Vəŋ luu ŋkee vɨɨ bwənə, kee zɨzɔnə Nwi me, kee bee kùꞌnə maa məyɨ tuu nu jəə kəmuꞌ me.
2Ntɨsə tɨ́ vəndɔŋ nə vəki
1Gə fɨ maa ghɔ, bàw a naysə nu ŋkɨə faŋ ŋkə kùꞌnə maa nu yinsəŋ Nwi, faŋ nsiŋ deesə nə. 2Tɨsə vəndɔŋ vətaavə laa vəŋ jiatə yiŋwaa vəŋ, toꞌ yuu ŋkə kuꞌnə tɨ́ wuu taa, kɨ yɨsə vənu vənshə nə yitɔfə, nùŋ fwi vəŋ maa Kristo ŋkee maa yinsəŋ, kaw vɨɨ, jia fwisə vəŋ taa ŋɨꞌ.
3Gə fɨ maa vəki vətaavə, tɨ vəŋ sheꞌ nɨniŋ, laa vəŋ kɨ duꞌ nə nshinə vəŋ yiley vɨsɨ Nwi, kee kɨ bɨsə təzii tə vɨɨ me, kee lùu vəbuꞌ tɨ́ məluꞌ məyaŋmə me, deesə vənu vəjəəvə, faŋ mbə gaŋtə vɨɨ maa məkii fwi yijəə. 4Nɨniŋ laa vaŋ-vəki zwètə maa məduꞌ bwaŋnə, kàw vəndəə vəvəŋ nə vaŋ vəŋ, 5yɨsə vənu vənshə nə yitɔfə, kee toꞌ vəswaŋ me, faꞌ vəfaꞌ taa ndɔꞌ vəŋ nə fwi yijəə, yɨsə vənu vəjəəvə, zɔnə vəndəə vəvəŋ. Nɨniŋ laa kɨ vɨɨ kɨ ndasə nu Nwi buꞌ vəŋ me.
6Gə fɨ maa vəndɔŋ və zawə, tɨ vəŋ laa vəŋ kɨ shiinə yiŋwaa yivəŋ. 7Nuŋsə ŋwaa wə laa a luu mfɨꞌ nu tɨ́ vəŋ maa vənu vənshə, mbə kɨ baw. Deesə sheꞌ nu yinsəŋ tɨ́ vɨɨ, faŋ a deesə nu Nwi tɨ́ vəŋ. Deesə nu Nwi nə fwi yimuꞌ, 8gisə nu faŋ ŋkə lùu kəweꞌ, baa lùu nu yinsəŋ, tɨ́ kaꞌ wə kee lùlə me, tɔ wuu mbeenə ŋwaa-nsiŋ dɨɨ, buꞌ faŋ ŋwə kee yè nu bwə maa məgi tɔ nsiŋ nə me.
9Gə fɨ maa vəbuꞌ, naysə tɨ́ vəŋ laa vəŋ kɨ zɔnə vətɨɨ vəvəŋ maa vənu vənshə, yɨsə vənu faŋ mbə baw too vətɨɨ vəvəŋ, kee lulə vəŋ me, 10kee shaw fa fɨ ghɔ vəŋ me, yɨsə vənu vəvəŋ vənshə vəbi. Nɨniŋ, vəŋ gaŋtə nu Nwi, wuu məbweysə ŋwaa-nsiŋ, maa vənu vənshə, laa ŋkə baw tɨ́ vɨɨ.
Faŋ Nwi kee gəŋ saŋ-nsiŋ
11Nu məkee gəŋsə faŋ Nwi kee gəŋsə vɨɨ nə, fùu taa mbi, kɨ kəə bwèysə vɨɨ vənshə. 12Ŋkə də̀ jɨɨ tɨ́ nsiŋ maa məmeꞌ nu mətwey Nwi, meꞌ nu məkaw vətɔ və taa mbi, baa nə laa nsiŋ toꞌ ghuu yitoꞌ kaŋ-nsiŋ taa mbi nyə̀ nə yitɔfə, yɨsə vənu vəloomə, fee Nwi. 13Nsiŋ kɨ kɨꞌ nu mənɔŋ-bwaŋnə Nwi, faŋ ŋwə ndɔ kɔ məbwey vəlwaŋ tɨ́ nsiŋ, baa kɨꞌ yighee njyə faŋ feenə Nwi, faŋ luu ŋkee Nwi kwalə nə, ndɔ fuu ghɔ Yeso Kristo, wuu məbweysə ŋwaa-nsiŋ, 14faŋ ŋwə nə kɔ̀ ŋwaa wi, kù tɔ nsiŋ, fùusə nsiŋ fɨ taa vənu vəbwəvə vaŋ-nsiŋ vənshə, laa nsiŋ kɨ nii lùu vɨɨ ley, baa lùu ŋkee mbii vɨɨ, kəə sheꞌ maa məyɨ vənu vəjəəvə. 15Kɨ gisə vənu vɔ́ tɨ́ vɨɨ, tɨsə vəŋ shɔ, ŋaꞌsə sɨ vəŋ buꞌ vənu vəbwəvə vəŋ, yɨsə nɨniŋ nə wutə kə kənshə. Kɨ wə shia ghɔ me.
3Faŋ bàw vɨɨ Kristo kɨ zɔnə vɨɨ mbɨə faŋ vəŋ sɔꞌ vəŋ
1Lumə tɨ́ vɨɨ laa ŋkə bàw vəŋ fee vɨɨ mbɨə faŋ vəŋ sɔꞌ vəŋ, zɔnə vəŋ, baa yɨsə vənu vəjəəvə vənshə. 2Kɨ vəŋ kɨ ndasə vɨɨ me, kee kəə nsɔꞌ me, yɨsə vənu vənshə maa jɨɨ yijəə, duꞌ bwaŋnə ghɔ vɨ vɨɨ vənshə.
Faŋ Nwi nə bwèysə nsiŋ
3Maa yighee vɨsɨ, nsiŋ nɨzi nə bə̀ə tɔ ley, kee zɔnə Nwi me, toꞌ maa jɨɨ yibwə, baa lùu vəbuꞌ tɨ́ vənu vəbwəvə vəyaŋ faŋ fwi saŋ-nsiŋ nə kàw, toꞌ yitoꞌ nyaa-nsiŋ nə njyoꞌ yibwə, baa ghɨꞌ vɨɨ, vɨɨ bee nsiŋ, nsiŋ baa beenə yiŋwaa nyaa-nsiŋ nɨzi. 4Luu nə, nə luu maa yighee njyə faŋ Nwi, wuu məbweysə ŋwaa-nsiŋ, nə də̀ njyoꞌ yijəə yi nə ŋkawnə yi tɨ́ nsiŋ, ŋwə bweysə nsiŋ fɨ ghɔ jɨɨ yibwə yɔ́. 5Faŋ ŋwə nə bweysə nsiŋ nɨniŋ nə, kee bweysə nsiŋ buꞌ vəfaꞌ vəjəəvə faŋ nsiŋ nə yɨsə me. Ŋwə bwèysə nsiŋ luu sheꞌ buꞌ gəŋ si, faŋ ŋwə nə sɔ nu bwə fɨ maa nsiŋ, bì nsiŋ fi. Zwitə Ley Nwi ŋii taa fwisə nsiŋ, kɔ nsiŋ nə nshinə yifi. 6Ŋwə nə fə̀ Zwitə Ley ki taa fwisə nsiŋ kəyaŋ buꞌ Yeso Kristo, wuu məbweysə ŋwaa-nsiŋ. 7Ŋwə nə yɨsə nɨniŋ tɨ́ kaꞌ vənu vaŋ-nsiŋ lùu vəloomə sɨ Nwi, buꞌ faŋ Kristo kee gəŋ saŋ-nsiŋ, gaŋtə nsiŋ nə. Ŋwə baa bweysə nsiŋ laa nsiŋ kɨ kɨꞌ məbwey vəlwaŋ faŋ nsiŋ ndɔ zɨ, buꞌ faŋ nsiŋ lùu vaŋ vi nə.
Faŋ bàw Taytəs kɨ tɨsə vɨɨ məbuulə nu Nwi nə wutə
8Yigi yɔ́ lùu nu yinsəŋ. Mə kəə laa a gi vənu vɔ́ ŋkee nə wutə, laa vɨɨ mbɨə faŋ vəŋ nùŋ fwisə vəŋ maa Nwi, tə̀ sɨ maa məyɨsə vənu vəjəəvə. Kɨ luu vəŋ yɨ̀ nɨniŋ, buu luu ŋkee nu jəə. Ŋkə baa gàŋtə vɨɨ nɨzi. 9Nyɨŋ fɨ maa yigisə vəmfaw nə nu yikuu yidənə, nə ntaysə nə nywaŋsə kɔ̀ŋ nuŋsə; vənu vɔ́ kee gaŋtə wə nə nu me, lùu vənu vədayday. 10Wə mɔ́ꞌ lùu shɔ faŋ ŋwə yaa kɨ jwi nə ŋgaasə taa ŋwaa vɨɨ Nwi, a tɨ ŋwə yighee muꞌ, tɨꞌnə me ghee bɔɔ. Ŋwə kee zɔ me, a fəŋ ŋwə. 11A kɔꞌ kɨɨ laa kəŋ wə ghɔ́ ndì jɨɨ, mbɨꞌtə yi kee baa yiley me. Vənu vəbwəvə vi dəsə laa ŋwə lùu wuu bwə, faŋ kwàŋ ŋwə kwàŋ tɔ ki taa nsɔꞌ Nwi.
Faŋ Pɔɔl nə tɨ̀ Taytəs nə vaŋ-vənu vəmɔ́ꞌ, baa kɔ̀ shɔꞌtə tɨ́ ŋwə
12Yighee njyə faŋ mə ndɔ tɔŋ Artimas, ŋwə ziꞌ yɨ ghɔ, tɨꞌnə me Tikikɔs, a yasə ndɔ fɨ nsi, jwì yè mə shɨ Nikopolis. Mbɨꞌtə nyaa lùu laa mə taa duꞌ yifi maa yighee gwə. 13Yɨ jəə maa məkɔ vətɔ və yitoꞌ tɨ́ Zenas, wuu məkɨɨ nə ntɨsə wì, nə Apɔlɔs, laa tuu wee-fa kee bə̀ə fɨ ghɔ vəŋ me. 14Bàw laa vaŋ-nshwi vaŋ-nsiŋ zwetə maa məyɨ vənu vəjəəvə maa vɨɨ faŋ nu mɔ́ꞌ ghɔꞌ vəŋ, laa kɨ məbiŋ vəŋ, faŋ vəŋ nùŋ fwi vəŋ maa Kristo nə, kee gù nu yɔŋ me.
15Vɨɨ vənshə faŋ yia vɨ vəŋ lùu mɔ́ꞌ, shɔꞌtə ghɔ. Shɔꞌtə vɨɨ mbɨə faŋ vəŋ kaw yia, buꞌ nu Kristo, faŋ nsiŋ nùŋ fwi saŋ-nsiŋ maa ŋwə nə, tɨ́ yia. Nwi tu mənɔŋ-bwaŋnə tɔ viŋ vənshə!