Ŋwaꞌlə Reveleyshən
Vənu faŋ mbə ndɔ gay maa yighee yiba
Taa ŋwaꞌlə Reveleyshən Jɔn twelə vənu faŋ mbə ndɔ gay maa yighee yiba, faŋ Kristo nə bɨ tɨ́ ŋwə. Ŋwə nyɔꞌ ŋwaꞌlə ghɔ́ maa yighee faŋ vɨ nəə kɔ ŋɨꞌ tɨ́ vɨɨ Kristo buꞌ məbiŋ vəŋ. Ŋwə kəə weꞌsə vəŋ laa kɨ vəŋ bwa maa mənuŋ fwi maa Kristo me.
Vənu vəyaŋ fɨ taa ŋwaꞌlə Reveleyshən lùu maa ghaŋ tii faŋ kaꞌ vɨɨ Kristo fɨ maa yighee Jɔn zɔ kɨɨ. Luu nə, vɨɨ faŋ nə kee lùu vɨɨ Kristo me, kee zɨzɔ me. Tɨ́ vɨɨ mbə ndee, vənu vəmɔ́ꞌ weꞌ maa məkɨɨ nə ŋiꞌ ki. Luu nə, nu ŋkɨə faŋ ŋkə lùu nu kwalə fɨ taa ŋwaꞌlə ŋwə̀, fuu ŋkee kɨ ley laa, Nwi ndɔ ghɔꞌ vɨɨ mbeenə vi vənshə nə tɨɨ vəzwitə vəbwəvə, kɔ̀ məbwey vəlwaŋ tɨ́ vɨɨ vi maa yighee yiba, nàysə yizɔ yifinə nə nsi yifi.
Məsenə vəwaytə:
Vənzi və ŋwaꞌlə 1.1-8
Vəŋwaꞌlə tɨ́ vəməshəŋtə və vɨɨ Kristo kwatia 1.9–3.22
Ŋwaꞌlə faŋ ŋwə kìi vəlay kwatia 4.1–8.1
Təsaw kwatia 8.2–11.19
Zɔ-ŋgu-yibay nə nyaasə bwəsə səbɔɔ 12.1–13.18
Vəndɨɨlə vəmɔ́ꞌ 14.1–15.8
Vəkay və nsɔꞌ və Nwi kwatia 16.1-21
Faŋ vɨ sɔꞌ Babilɔn, nə nyaa yibwə, nə wuu məsɨɨ təba, baa nə tɨɨ vəzwitə vəbwəvə 17.1–20.10
Nsɔꞌ vəshi vəshə 20.11-15
Yizɔ yifinə ghɔ nsi yifi 21.1–22.5
Vəndwə və ŋwaꞌlə 22.6-21
1Vəndwə və vənu
1Ŋwaꞌlə ŋwə̀ lùu ŋwaꞌlə kɔ̀ŋ vənu faŋ mbə nə ndènə fɨ ghɔ vɨɨ, Nwi ndi kɔ̀ ghɔ Yeso Kristo laa ŋwə də nu ŋkɨə faŋ ŋkə taa ghaa yasə gay tɨ́ vɨɨ faꞌ vi. Yeso nə tɔ̀ŋ wuu ntɔŋ wi maa nu kɔ́, ŋwə gə də̀ shwenə ki tɨ́ wuu faꞌ wi Jɔn. 2Wuu faꞌ wi ghɔ́ fɨꞌtə yigisə Nwi yɔ́ tɨ́ vɨɨ, baa nə nu ŋkɨə faŋ Yeso Kristo nə də̀ tɨ́ ŋwə, faŋ ŋwə nə ye ŋwə nə yisɨ nə. 3Mənɔŋ-bwaŋnə tɔ wə ntɨə faŋ ŋwə tìi nu ŋkɨə faŋ Nwi nə gì laa ŋkə taa gay nə, baa nə tɔ vɨɨ mbɨə faŋ vəŋ zɔ, jìa nu ŋkɨə faŋ mə ŋwaꞌlə taa ŋwaꞌlə ŋwə̀, buꞌ laa yighee vənu vɔ́ lùu nshənə.
Shɔꞌtə Jɔn tɨ́ vəməshəŋtə və vɨɨ Nwi kwatia fɨ nsi Asia
4Lùu mə, Jɔn, faŋ mə tɔ̀ŋ ŋwaꞌlə ŋwə̀ tɨ́ vəməshəŋtə və vɨɨ Nwi kwatia fɨ nsi Asia. Mənɔŋ-bwaŋnə tɔ viŋ nə məduꞌ-nyɔŋ fɨ ghɔ Nwi faŋ ŋwə nə luu shɔ fɨshi, baa lùu shɔ ndwə, ndɔ baa jwi maa yighee yiba nə. Mənɔŋ-bwaŋnə baa lùu tɔ viŋ fɨ ghɔ vəzwitə vəleyvə kwatia mbɨə faŋ mbə lùu vɨsɨ yɨ ŋkaw Nwi, 5baa nə fɨ ghɔ Yeso Kristo faŋ ŋwə nə də̀ yinsəŋ Nwi ŋkee yiley, fì vɨsɨ maa məywey fɨ shɨ yiku, sɔꞌ vəfwàŋ fɨ shɨ nsi nɨzi. Ŋwə baa luu kàw nsiŋ, kù tɔ nsiŋ maa məbweysə nsiŋ fɨ taa vənu vəbwəvə vaŋ-nsiŋ, 6nàysə yifwàŋ tɨ́ nsiŋ, yɨ̀sə nsiŋ luu vɨɨ məfeꞌ Nwi tɨ́ Nwi tii wi. Nsiŋ kɔ feenə tɨ́ ŋwə. Ŋwə kwàlə shɔɔ, gòꞌsə yighee muꞌ. Ŋkə lùu nɨniŋ.
Faŋ Kristo ndɔ baa bəŋ jwi mbi
7Viŋ zɔ! Kristo ndɔ bəŋ jwi fɨ taa mbɔꞌ, vɨɨ vənshə ye ŋwə nə sɨ vəŋ. Ŋkee vɨɨ mbɨə faŋ vəŋ nə zwì ŋwə nə, ndɔ ye ŋwə nɨzi. Ŋiꞌ ŋii tɨ̀ me ŋiꞌ ŋii fɨ taa mbi ndɔ gwia buꞌ ŋwə. Ɔŋ, lùu faŋ ŋkə ndɔ luu. Ŋkə gòꞌsə nee. 8Tɨta Nwi Nshɔɔ-mbi, faŋ ŋwə nə luu shɔ yighee vɨsɨ, baa lùu shɔ ndwə, ndɔ jwi yighee yiba nɨzi, ŋwə nə gì laa lee, «Lùu mə lùu vənzi, baa lùu vəndwə və vənu.»
Faŋ Yeso nə fùu yikəꞌ Jɔn shɨ Patmɔs
9Lùu mə, Jɔn, weenshu wiŋ, faŋ nsiŋ ye ŋɨꞌ, ndɔ zɨ nu yifwàŋ Nwi mɔ́ꞌ, baa jìa fwi saŋ-nsiŋ maa ŋɨꞌ fɨ yiba Yeso, faŋ mə nyɔꞌ ŋwaꞌlə ŋwə̀ tɨ́ viŋ. Vɨ nə nùŋsə mə maa wee-shəŋ nsi mɔ́ꞌ nɨntəŋ mamuu, yizii shəŋ kɔ́ lùu Patmɔs. Vɨ nùŋsə mə buꞌ laa mə nəə fɨꞌtə nu Nwi, baa bìŋ nu Yeso ntee. 10Kɨ luu maa shi zwisə Nwi mɔ́ꞌ, Zwitə Ley Nwi ŋii maa mə, mə zɔ gɨ wə gi fɨ yiba jɨŋ mə nəŋay yaa gɨ yisaw. 11Gɨ yɔ́ gi laa mə nyɔꞌ nu ŋkɨə faŋ mə ye taa ŋwaꞌlə, tɔ̀ŋ tɨ́ vəməshəŋtə və vɨɨ Nwi kwatia. Vəməshəŋtə kwatia vɔ́ luu mbə fɨ shɨ Efesɔs, nə fɨ shɨ Smirna, nə fɨ Pergamum, nə fɨ Tiateyra, nə fɨ Sardis, nə fɨ Filadelfia, nə fɨ Laodosia. 12Faŋ mə nə zɔ gɨ yɔ́ nɨniŋ nə, mə kiasə ŋwaa maa məndeynə wə ghɔ́ faŋ ŋwə gisə shee nə. Mə kiasə ŋwaa ŋwaa, ye təkiꞌ kwatia faŋ lùu ntə goolə, 13yè wə mɔ́ꞌ faŋ ŋwə fɨnə Wuu yinsəŋ Nwi. Ŋwə nə dùꞌ nɨntəŋ ŋwaa təkiꞌ tɔ́, mɔ̀ꞌ dalə maa ŋwə, kà təŋii ti nə kɔtə goolə . 14Tɔ ki ghɔ vɨ nyuŋsə tɔ si nə fɨfusə yaa fwəsə wuŋ, fu laa buu, sɨ ghi lùu yaa wisə biinə. 15Ghuu ghi lùu yaa bwey bay faŋ vɨ fuusə fɨ taa bɨꞌ ndaa-dɨŋ. Gɨ yi lùu yaa gɨ muu məyaŋmə. 16Ŋwə nə jìa məjwiŋ kwatia maa kwiŋ maꞌnə wi. Baꞌ yighaw shəsə fuu fɨ shuu ŋwə. Yikəꞌ yi ndwaꞌlə yaa shɨshwi faŋ ŋwə bee yizɔ buꞌtə ŋkee nə wutə. 17Mə kɨ ye ŋwə, gù ghuu ŋwə yaa ŋku wə. Ŋwə mɔꞌ ghɔ ki maꞌnə maa mə, gì laa, «Kɨ ghɔ fee me, lùu mə, faŋ mə nə luu vɨsɨ, baa lùu yiba, 18baa luu ŋkee wuu bwey. Mə nə ku, lùu ndwə, mə bwèy gòꞌsə yighee muꞌ. Ŋkwa yiku, nə ŋkwa shɨ vəŋku vənsisə lùu ghɔ mə, tɨ́ kɨ kaꞌ mə ŋaꞌsə baa fə̀ŋ shuu wi. 19Zɔ mɔɔ! Nyɔꞌ nu ŋkɨə faŋ a ye, nə ŋkɨə faŋ ŋkə lùu ndwə, baa nə ŋkɨə faŋ ŋkə ndɔ jwi. 20Zɔ ŋiꞌ məjwiŋ kwatia faŋ a yè ghɔ mə, nə ŋiꞌ təkiꞌ kwatia, faŋ lùu ntə goolə nə. Ŋiꞌ məjwiŋ mbɔ́ lùu nshiisə-ŋiisə Nwi kwatia faŋ nsə ndeynə vəməshəŋtə və vɨɨ Nwi vì kwatia nə. Təkiꞌ tɔ́ kwatia lùu vəməshəŋtə vɔ́ kwatia.»
2Ŋwaꞌlə tɨ́ nshəŋtə vɨɨ Kristo fɨ shɨ Efesɔs
1Nyɔꞌ ŋwaꞌlə, tɔ̀ŋ tɨ́ nshiiŋii Nwi faŋ ŋwə lùu shɨ Efesɔs, nyɔꞌ laa lee, «Wə ntɨə faŋ ŋwə jìa məjwiŋ mbɔ́ kwatia ghɔ ŋwə, maa kwiŋ maꞌnə wi, baa toꞌ fɨ taa ŋwaa təkiꞌ tɔ́ kwatia, faŋ lùu ntə goolə nə, gì laa, 2«Mə kɨɨ nə vənu və, nə vəfaꞌ faŋ a faꞌ tɨ́ Nwi nə wutə nə, baa kɨ̀ɨ faŋ a jìa fwi yə taa ŋɨꞌ, baa bèe vənu vəbwəvə, mɔ̀ŋ vɨɨ mbɨə faŋ vəŋ gi laa vəŋ lùu vɨɨ ntɔŋ Kristo, luu nə, kee lùu me. A mɔŋ vəŋ, ye laa vəŋ lùu vɨɨ təba mu. 3Mə kɔꞌ kɨɨ laa a jìa fwi yə taa ŋɨꞌ, bìꞌ vətɔ vədɨɨvə maa nu yizii kaŋ, kee bwa me. 4Luu nə, nu ŋkɨə faŋ mə kee kaw me, lùu laa a mèꞌ ŋkawnə yə faŋ a nə kìi yighee vɨsɨ. 5Bàw a lumə nu ŋkɨə faŋ a gù ŋkə, kwìinə fwi yə, baa kɨ yɨsə nu ŋkɨə faŋ a nəə yɨsə yighee vɨsɨ nə. A kee yɨ nɨniŋ me, kee kwìinə fwi yə me, buu mə taa jwi ye ghɔ, sùꞌtə kiꞌ wə fɨ maa shəŋ ŋkɨə faŋ ŋwə lùu shɔ nə. 6Luu nə, a yɨ̀sə nu mɔ́ꞌ faŋ ŋkə kùꞌnə. Lùu faŋ a bèe vəfaꞌ və vɨɨ Nikolaytən, sheꞌ faŋ mə bee nɨzi.»
7Wə ntɨə faŋ ŋwə kìi tuulə zɔ, ŋwə zɔ nu ŋkɨə faŋ Zwitə Ley Nwi gisə tɨ́ vəməshəŋtə və vɨɨ Nwi. Mə taa kɔ məbwey vəlwaŋ tɨ́ wə ntɨə faŋ ŋwə ghɔꞌ nu bwə, zəsə ŋwə fɨ maa tɨ məbwey ŋkɨə faŋ ŋkə lùu taa ŋkɔꞌ Paradays faŋ luu ŋkɔꞌ Nwi.»
Ŋwaꞌlə tɨ́ nshəŋtə vɨɨ Kristo fɨ shɨ Smirna
8Nyɔꞌ ŋwaꞌlə, tɔ̀ŋ tɨ́ nshiiŋii Nwi faŋ ŋwə lùu shɨ Smirna, nyɔꞌ laa lee, «Wə ntɨə faŋ ŋwə nə luu vɨsɨ, baa lùu yiba nə, ŋwə faŋ ŋwə nə kù, baa ywèy fɨ shɨ yiku, gì laa, 9«Mə kɔꞌ kɨɨ nə ŋɨꞌ yə, nə bəə kə. Luu nə, a kìi yiyaŋ maa jɨɨ yiday. Mə kɨɨ nə ndisə vɨɨ nɨzi, faŋ vəŋ ndasə ghɔ shɔ nə. Lùu vɨɨ faŋ vəŋ gì laa vəŋ lùu vɨɨ Jus. Luu nə, vəŋ kee lùu vɨɨ Jus yinsəŋ me. Ŋii məshəŋtə vəŋ lùu ŋii məshəŋtə Satan, tɨɨ vəzwitə vəbwəvə. 10Kɨ fee ŋɨꞌ njyə faŋ a taa ye nə me. Tɨɨ vəzwitə vəbwəvə Satan taa kwaŋ fɨ maa viŋ taa ŋii mfiŋ, laa vɨ mɔŋ viŋ. Viŋ taa kɨ ye ŋɨꞌ maa vəshi yighuŋ. Viŋ kii fwi yiweꞌ, twèꞌ maa nu Kristo, zìꞌ tɨ́ yiku, buu ŋwə ndɔ key viŋ nə məbwey vəlwaŋ.»
11Wə ntɨə faŋ tuulə ghi lùu shɔ, ŋwə zɔ nu ŋkɨə faŋ Zwitə Ley Nwi gisə tɨ́ vəməshəŋtə və vɨɨ Nwi! Wə ntɨə faŋ ŋwə jìa fwi yi taa ŋɨꞌ, kee kɨ twey Kristo me, buu ŋwə ndɔ ku, baa ywey, kaꞌ yiku lwesə ghee bɔɔ kee ndɔ kɔŋ ŋwə me.»
Ŋwaꞌlə tɨ́ nshəŋtə vɨɨ Kristo fɨ shɨ Pergamum
12Nyɔꞌ ŋwaꞌlə, tɔ̀ŋ tɨ́ nshiiŋii Nwi faŋ ŋwə lùu shɨ Pergamum, nyɔꞌ laa lee, «Wə ntɨə faŋ ŋwə kìi baꞌ yighaw shəsə nə, gì laa lee, 13«Mə kɔꞌ kɨɨ nə shəŋ ŋkɨə faŋ a shi shɔ nə. Lùu shəŋ ŋkɨə faŋ ŋkaw Satan, tɨɨ vəzwitə vəbwəvə, lùu shɔ. Luu nə, a kee bìŋ ŋwə me; a jìa luu yizii nyaa. A nə kee ta twey maa məbiŋ nu kaŋ me. A nə jìa nu kaŋ ŋkee maa yighee njyə faŋ vɨ nə zwi Antipas, faŋ ŋwə nə bìŋ nu kaŋ ntee nə fwi yijəə nə, shɨ viŋ, faŋ Satan shi shɔ nə. 14Luu sheꞌ wee-nu faŋ ŋkə kee baw too mə me. Nu kɔ́ lùu laa, vɨɨ mɔ́ꞌ fɨ taa ŋwaa viŋ jìa nu Balaam, faŋ ŋwə nə dèesə tɨ́ Balak faŋ ŋkə bàw maa məkɔꞌsə vɨɨ Isirayl, yɨsə vəŋ yɨ nu bwə, zɨ fazɨ faŋ lùu fazɨ vəŋku vənwi, baa tii vəki. 15Vɨɨ baa lùu shɔ taa ŋwaa viŋ faŋ vəŋ jia nu Nikolaytən. 16Kwiinə fwi yə! A kee kwiinə me, buu mə taa yasə jwi yɨ ghɔ, tùŋ yighaw yia vɨ vəŋ nə baꞌ yighaw ŋkɨə faŋ ŋkə fuu fɨ shuu mə nə.»
17Wə ntɨə faŋ tuulə ghi lùu shɔ, ŋwə zɔ nu ŋkɨə faŋ Zwitə Ley Nwi gisə tɨ́ vəməshəŋtə və vɨɨ Nwi! Mə taa kɔ fazɨ Nwi mana, ŋkɨə faŋ ŋkə nə ndènə fɨ ghɔ vɨɨ nə, tɨ́ wə ntɨə faŋ ŋwə ghɔ̀ꞌ nu bwə. Mə baa luu kɔ ŋoꞌ yifusə tɨ́ ŋwə faŋ vɨ nyɔꞌ yizii yifinə maa ŋoꞌ yɔ́, faŋ wə kee kɨ̀ɨ nə yizii yɔ́ me, kɨɨ sheꞌ wuu məfi.»
Ŋwaꞌlə tɨ́ nshəŋtə vɨɨ Kristo fɨ shɨ Tiateyra
18Nyɔꞌ ŋwaꞌlə, tɔ̀ŋ tɨ́ nshiiŋii Nwi faŋ ŋwə lùu shɨ Tiateyra, nyɔꞌ laa lee, «Wee Nwi faŋ sɨ ghi bii yaa wisə, ghuu ghi luu yaa bwey bay faŋ vɨ fùusə fɨ taa bɨꞌ ndaa-dɨŋ laa, 19«Mə kɔꞌ kɨɨ nə vənu və, baa nə ŋkawnə yə, faŋ a kaw vɨɨ shɔ nə. Mə kɨɨ faŋ a nùŋ fwi yə maa mə, gàŋtə vɨɨ ŋɨꞌ, jìa fwi yə taa ŋɨꞌ. Mə baa kɨɨ laa a faꞌ vəfaꞌ vəyaŋ maa yighee ndwə, shɔ̀ɔ faŋ a nəə faꞌ maa yighee vɨsɨ. 20Luu nə, nu mɔ́ꞌ shɔ faŋ ŋkə kee bàw shee me. Nu kɔ́ lùu laa a bìŋ Jezebel, wəzwi wì faŋ ŋwə gì laa yi lùu nshiiŋii-sɔghɔ, faŋ ŋwə deesə nu ki tɨ́ vɨɨ, bweꞌsə vɨɨ vaŋ, vəŋ toꞌ tii vəki, zɨ vətɔ faŋ vɨ feꞌ vənwi vədayday shɔ nə. 21Mə nə kɔ̀ yighee tɨ́ ŋwə maa məkwiinə fwi yi. Luu nə, ŋwə kee biŋ maa məkwiinə me, yuu meꞌtə nu sakə faŋ ŋwə yɨsə nə me. 22Nɨniŋ, mə taa mɔꞌ ŋwə fuu fwaŋ nə za, ghɔ vɨ vɨɨ mbɨə faŋ ghɔ vɨ vəŋ shi nə, vəŋ ye ŋɨꞌ faŋ nyə shɔ̀ɔ wutə. Mə taa yɨsə nɨniŋ, faŋ vəŋ kee kwìinə fwisə vəŋ, mèꞌtə vənu vəbwəvə faŋ ghɔ vɨ vəŋ yɨ nə me. 23Mə taa zwilə vaŋ vi. Nɨniŋ laa vəməshəŋtə və vɨɨ Nwi vənshə taa kɨɨ laa mə lùu wə ntɨə faŋ mə kɨɨ nə mbɨꞌtə vɨɨ, baa nə nu ŋkɨə faŋ vəŋ kəə. Mə taa ndɔꞌ wə tɨ̀ me wə sheꞌ maa nu ŋkɨə faŋ ŋwə nə yɨ̀sə. 24Gə fɨ maa viŋ, bətə vɨɨ fɨ shɨ Tiateyra, faŋ viŋ kee bìŋ nu kɔ́ me, mə kee taa kɔ ntɨ yiday tɨ́ viŋ me, buꞌ laa viŋ kee kɨ̀ɨ nə ŋiꞌ nu njyoꞌ Satan kɔ́ me, faŋ vɨɨ mbii-wə gisə laa vəŋ kɨɨ nə ŋiꞌ nu nə. 25Mə gi tɨ́ viŋ sheꞌ laa viŋ kɨ jia nu ŋkɨə faŋ ŋkə lùu ghɔ viŋ nə, gə kɔ tɨ́ shi ŋkɨə faŋ mə ndɔ jwi.
26Wə ntɨə faŋ ŋwə jìa nu kaŋ, kee mèꞌtə me, gə kɔ maa vəndwə, buu mə ndɔ kɔ wutə məsɔꞌ vɨɨ tətɔŋ fu tɨ́ ŋwə. 27Ŋwə sɔꞌ vəŋ nə mbay bwey, nyeꞌtə vəŋ yaa shɔꞌ vəntɨɨ. 28(Mə ndɔ wutə kɔ́ tɨ́ ŋwə,) sheꞌ faŋ Tii ŋwaa nə kɔ̀ shee nə. Mə baa kɔ fəjwiŋ fɨ taa nshia-ndoo-mbisɨ tɨ́ ŋwə nɨzi.»
29Wə faŋ ŋwə kìi tuulə ghi zɔ, ŋwə zɔ nu ŋkɨə faŋ Zwitə Ley Nwi gì tɨ́ vəməshəŋtə və vɨɨ Nwi!»
3Ŋwaꞌlə tɨ́ nshəŋtə vɨɨ Kristo fɨ shɨ Sardis
1Nyɔꞌ ŋwaꞌlə, tɔ̀ŋ tɨ́ nshiiŋii Nwi faŋ ŋwə lùu shɨ Sardis, nyɔꞌ laa lee, «Wə ntɨə faŋ vəzwitə və Nwi kwatia nə məjwiŋ kwatia lùu ghɔ ŋwə nə, gì laa lee, «Mə kɨɨ nə vənu və. Vɨɨ gisə laa a bwey, tɨ́ ghɔ lùu ŋku fa. 2Yenə fɨ mbweysə, kwàŋ wutə maa vɨɨ mbɨə faŋ vəŋ kəə kɨ kukə nə. Mə kee ta ye nu faŋ a yɨsə ŋkə baw yikəꞌ Nwi kùꞌnə me. 3Lumə faŋ nu Kristo nə jwì zìꞌ ghɔ ghɔ, faŋ a nə zɔ̀ nu kɔ́ nə. Nɨniŋ, kwiinə fwi yə, baa jia nu kɔ́. A kee kaw kɨ shi nə yikɨꞌ me, buu mə taa nyɔꞌtə jwi yaa ndɔꞌ maa yighee faŋ a kee yikɨɨ laa mə taa jwi yɨ ghɔ me. 4Luu nə, mə kɨɨ nə vaŋ-mbusə vɨɨ fɨ taa ŋwaa viŋ, shɨ Sardis, faŋ vəŋ kee bɨsə fwisə vəŋ nə nu bwə me. Yia vɨ vɨɨ vɔ́ ndɔ kɨ toꞌ mɔ́ꞌ, mɔꞌ njwisə fusə, buꞌ laa vəŋ kùꞌnə tɨ́ Nwi. 5Wə ntɨə faŋ ŋwə tɨ̀ŋnə, wèꞌ maa nu kaŋ, kɨ ghɔꞌ nu bwə, buu vɨ ndɔ mɔꞌ njwisə fusə maa ŋwə. Mə nyɔꞌ yizii yi taa ŋwaꞌlə məbwey vəlwaŋ, kee ndɔ baa ndɨɨsə me. Mə biŋ yizii yi vɨsɨ Tii ŋwaa, baa nə vɨsɨ nshiisə-ŋiisə Nwi.»
6Wə ntɨə faŋ tuulə ghi lùu shɔ, zɔ nu ŋkɨə faŋ Zwitə Ley Nwi gisə tɨ́ vəməshəŋtə və vɨɨ Nwi!»
Ŋwaꞌlə tɨ́ nshəŋtə vɨɨ Kristo fɨ shɨ Filadelfia
7Nyɔꞌ ŋwaꞌlə, tɔ̀ŋ tɨ́ nshiiŋii Nwi faŋ ŋwə lùu shɨ Filadelfia laa, «Wə ntɨə faŋ ŋwə bàw shɨlə, baa luu ŋkee wuu yinsəŋ, faŋ ŋkwa fwàŋ Deyvid lùu ghɔ ŋwə nə, faŋ ŋwə ŋaꞌsə, kaꞌ wə kee fəŋ me; ŋwə fəŋ, kaꞌ wə kee ŋaꞌsə me. Ŋwə gi laa lee, 8«Mə kɨɨ nə vənu və. Ye mɔɔ, mə ŋaꞌsə shuufwə, meꞌtə zizi tɨ́ ghɔ, kaꞌ wə kee baa fəŋ me. Mə ŋaꞌsə tɨ́ ghɔ nɨniŋ nə, buꞌ laa wutə kə lùu kətɨtiꞌ. Luu nə, a jìa yigisə nyaa, kee twèy mə me. 9Zɔ nu ŋkɨə faŋ mə taa kɨ yɨsə maa vɨɨ vì fɨ taa ŋii nshəŋtə Satan, faŋ vəŋ gisə laa vəŋ lùu vɨɨ Jus nə, kee bee lùu me, sɨɨ luu ba. Mə taa yɨsə vəŋ jwi ye ghɔ, tùŋ vətɔ vəyəə vəŋ nsi vɨsɨ ghɔ, taa kɨ kɨɨ laa mə kaw ghɔ. 10Mə yɨsə nɨniŋ buꞌ laa a jìa nu kaŋ faŋ ŋkə kɔ wutə tɨ́ ghɔ maa məjia fwi yə taa ŋɨꞌ. Nɨniŋ, mə ndɔ gaŋtə ghɔ nɨzi maa yighee njyə faŋ nu məbweꞌsə vɨɨ ndɔ fuu taa mbi yinshə maa məmɔŋ vɨɨ vənshə. 11Mə taa yasə jwi. Jia nu ŋkɨə faŋ ŋkə lùu ghɔ ghɔ, laa kɨ wə fi vəkeynə və me.
12Wə ntɨə faŋ ŋwə jia fwi yi, kee mèꞌtə nu Nwi me, buu mə ndɔ tə ŋwə maa ntɔŋ ŋii Nwi, ŋwə kee baa fùu fɨ maa shəŋ kɔ́ taa ŋii Nwi me. Mə ndɔ nyɔꞌ yizii Nwi ŋwaa maa ŋwə, baa nə yizii shɨ Nwi ŋwaa, faŋ lùu shɨ Jerusalem kəfikə, faŋ ŋkə ndɔ siꞌ fɨ taa yizɔ, fɨ ghɔ Nwi ŋwaa, siꞌ jwi nsi, baa nyɔ̀ꞌ yizii yifinə nyaa maa ŋwə nɨzi.»
13Wə ntɨə faŋ tuulə ghi lùu shɔ, ŋwə zɔ nu ŋkɨə faŋ Zwitə Ley Nwi gisə tɨ́ vəməshəŋtə və vɨɨ Nwi!»
Ŋwaꞌlə tɨ́ nshəŋtə vɨɨ Kristo fɨ shɨ Laodosia
14Nyɔꞌ ŋwaꞌlə, tɔ̀ŋ tɨ́ nshiiŋii Nwi faŋ ŋwə lùu shɨ Laodosia, nyɔꞌ laa lee, «Wə ntɨə faŋ ŋwə goꞌsə yighee muꞌ nə, ŋgwə faŋ ŋwə nə ku buꞌ nu yinsəŋ ki, nə ŋwə faŋ ŋwə nə shɔɔ vɨsɨ, buu Nwi taa bɔŋ mbi, gì laa lee, 15«Mə kɨɨ nə njɨɨnə yə; a kee yɨyoonə me, kee nɨndɔŋ me. Ŋkə nə bàw laa a yoonə, tɨꞌnə me ndɔŋ. 16Nɨniŋ, faŋ a luu nɨntəŋ nə, kee nɨndɔŋ me, kee yɨyoonə me, mə taa tu ghɔ fɨ shuu mə. 17A gisə laa a lùu tɨɨ ka, baa gù mfuꞌ, kee bəə fa me. A kee bee kɨɨ laa a lùu mbəə faŋ ŋwə bə̀ə gəŋsə nə mənɔŋ-bwaŋnə Nwi me. A luu wuu sɨ fɨsə, baa lùu nə ntɨŋ. 18Mə tɨsə ghɔ laa a ywaŋ goolə fɨ ghɔ mə, faŋ vɨ twàŋ taa wi, ŋwə ley. Nɨniŋ laa a gu mfuꞌ. Bàw a ywaŋ njwisə fusə fɨ ghɔ mə, kɨ mɔꞌ laa a kee kɨ duꞌ nə ntɨŋ sɨ vɨɨ, tɔ kə dɨɨ me. Ywaŋ fɔ sɨ fɨsə fɨ ghɔ mə, wìŋsə sɨ ghə shɔ, yuu kɨ yenə vədɨꞌ. 19Mə sɔꞌ vɨɨ mbɨə faŋ mə kaw vəŋ, saŋ vəŋ, laa vəŋ kwiinə fwisə vəŋ. Nɨniŋ, yasə kɔꞌlə kwiinə fwi yə! 20Viŋ zɔ! Mə luu shuufɔ viŋ, buꞌtə. Wə faŋ ŋwə zɔ gɨ nyaa, ŋàꞌsə shuufɔ wi shee, buu mə taa ŋii shɔ, yè ŋwə, yia ŋwə zɨ, mə zɨ yia ŋwə.
21Wə ntɨə faŋ ŋwə jia fwi yi, kee mèꞌtə nu Nwi me, sheꞌ faŋ mə nə jìa fwi nyaa nɨzi, ziꞌ tɨ́ shi yiku nə, buu mə ndɔ biŋ laa yia ŋwə duꞌ fuu ŋkaw mə, kɨ sɔꞌ mbi mɔ́ꞌ, sheꞌ faŋ yia Tii ŋwaa duꞌ fuu ŋkaw ŋwə, kɨ sɔꞌ nə.»
22Wə ntɨə faŋ ŋwə kìi tuulə ghi zɔ, ŋwə zɔ nu ŋkɨə faŋ Zwitə Nwi gi tɨ́ vəməshəŋtə və vɨɨ Nwi!»
4Faŋ Jɔn nə yè Nwi fuu ŋkaw Nwi yizɔ
1Yiŋkii kɨ shɔɔ, mə ye shuufɔ mɔ́ꞌ ŋaꞌnə maa məŋii taa yizɔ, baa zɔ̀ gɨ wə ghɔ́ faŋ mə nə fɔŋ zɔ̀ yighee vɨsɨ nə, nyə baa gi shee ŋkee yaa yisaw, laa lee, «Koꞌ jwì feenə, mə də nu ŋkɨə faŋ ŋkə taa gay maa yighee yiba tɨ́ ghɔ.» 2Zwitə Nwi gwəkə gù maa mə, mə ye ŋkaw yizɔ faŋ nə luu ŋkaw məsɔꞌ mbi. Wə duꞌ fuu ŋkaw kɔ́. 3Gə fɨ maa wə ntɨə faŋ ŋwə nə duꞌ fuu ŋkaw kɔ nə, a ndeynə ŋwə, ŋwə fɨnə yiwey yifəŋnə nə yifusə nə yibaynə, tɨ́ kuluŋ kia ŋkaw kɔ́, a yɨye ŋkə fɨnə ŋoꞌ yindwaꞌlə. 4Vəŋkaw və wutə vəmɔ́ꞌ njɔsə-yishwe muu-mbɔɔ kia ŋkaw kɔ́, vɨɨ taa njɔsə-yishwe muu-mbɔɔ duꞌ fuu vəŋkaw vɔ́, mɔ̀ꞌ njwisə fusə maa vəŋ, bèe təsɔꞌ tə goolə tɔ vəŋ. 5Yibay bwələ fɨ maa ŋkaw kɔ́, gɨsə baa luu fùu fɨ fuŋ nɨzi, nə gɨ yimɔ́ꞌ faŋ nyə duŋ yaa yibay. Təkiꞌ təmɔ́ꞌ kwatia nə luu vɨsɨ ŋkaw kɔ́, bee fɨ fuŋ. Lùu vəzwitə və Nwi kwatia. 6Vɨsɨ ŋkaw kɔ́, fa mɔ́ꞌ nə luu shɔ yaa mamuu, bee yaa ŋwaꞌlə məye sɨ. Vətɔ vəbweyvə vəmɔ́ꞌ yishwe nə dùꞌ mbɨɨ ŋkaw kɔ́, kìa ŋkaw kɔ́, nə sɨ yaŋ maa vətɔ vəbweyvə vɔ́ fɨ vɨsɨ nə fɨ yiba. 7Vətɔ vəbweyvə vɔ́ nə fɨnə nyaasə səmɔ́ꞌ. Njyə vɨsɨ nə fɨnə bikəə. Njyə faŋ nyə beꞌsə fɨnə mbaw. Njyə faŋ nyə baa beꞌsə lwesə sətia, yikəꞌ yi fɨnə yikəꞌ wə. Njyə faŋ nyə beꞌsə lwesə yishwe kəꞌ yaa mbuꞌ. 8Nyaa tɨ̀ me nyaa fɨ taa nyaasə sɔ́ yishwe nə, nə kìi ghalə ntɔfə, nə sɨ vəŋ lwaŋ fɨ fu nə fɨ taa tey yi. Nsə gisə vətuꞌ nə shɨshwi, kee shɨshia me, gisə laa, «Məley, məley, məley lùu tɨta Nwi Nshɔɔ-mbi. Ŋwə nə luu shɔ yighee vɨsɨ, baa lùu shɔ ndee, ndɔ jwi maa yighee yiba nɨzi.»
9Vətɔ vəbweyvə vɔ́ nə bə̀ŋsə Nwi nɨniŋ, kɔ̀ feenə nə məbwaŋ tɨ́ Nwi faŋ ŋwə nə dùꞌ fuu ŋkaw kɔ́ nə, faŋ ŋwə lùu wuu bwey, gòꞌsə yighee muꞌ. Yighee tɨ̀ me yighee faŋ vətɔ vəbweyvə vɔ́ nəə bəŋsə Nwi nɨniŋ nə, 10vɨɨ taa vɔ́ njɔsə-yishwe muu-mbɔɔ nə, nɔŋ nsi vɨsɨ wə ntɨə faŋ ŋwə nə dùꞌ fuu ŋkaw kɔ́ nə, bəŋsə ŋwə faŋ ŋwə lùu bwey maa vəshi və mbi və̀ vənshə, ndɔ goꞌsə yighee muꞌ nə. Vəŋ shoꞌtə təsɔꞌ fɨ tɔ vəŋ, mɔ̀ꞌ vɨsɨ ŋkaw kɔ́, gì laa, 11«Tɨta, Nwi wia, a kùꞌnə tɨ́ kaꞌ vətɔ vənshə kɨ bəŋsə ghɔ, kɔ̀ feenə tɨ́ ghɔ. A kìi wutə kənshə, fɔnə nə bɔ̀ŋ ghɔ bɔ̀ŋ vətɔ vənshə. Mbə nə fùu taa mbi, kɨ nii lùu shɔ, buꞌ faŋ nə gì ghɔ nɨniŋ.»
5Nu ŋwaꞌlə faŋ kəŋ vəlay vəmɔ́ꞌ lùu fuu yi kwatia
1Mə kɨ ye, yè ŋwaꞌlə mɔ́ꞌ ghɔ wə ntɨə faŋ ŋwə nə dùꞌ fuu ŋkaw kɔ́ nə, ŋwə jia maa kwiŋ maꞌnə wi, tɨ́ vɨ nyɔꞌ tey wi nə yiba yi, tə̀ kəŋ vəlay vəmɔ́ꞌ fuu yi kwatia. 2Mə ye nɨniŋ, kɨ nii yè nshiiŋii Nwi weꞌ mɔ́ꞌ. Ŋwə gi ŋkee nə gɨ yishaꞌsə laa, «Kuꞌnə ndə maa məŋaꞌsə ŋwaꞌlə ghɔ́, shoꞌ vəlay vi?» 3Ŋwə gi nɨniŋ, tuu wə nə kee lùu shɔ faŋ ŋwə kùꞌnə maa məŋaꞌsə ŋwaꞌlə ghɔ́ ndeynə me. Wə nə kee lùu shɔ yizɔ me, kee lùu shɔ shɨ nsi me, kee lùu shɔ ŋiꞌ nsi me, faŋ kaꞌ ŋwə ŋaꞌsə ŋwaꞌlə ghɔ́ ndeynə me. 4Mə gwia dɨdɨꞌ faŋ vɨ kee yè tuu wə muꞌ faŋ kaꞌ ŋwə ŋaꞌsə ŋwaꞌlə ghɔ́ ndeynə me. 5Wə muꞌ fɨ taa ŋwaa vɨɨ taa vɔ́ faŋ vəŋ nə dùꞌ yifi nə, gi tɨ́ mə laa, kɨ mə baa gwia me. «Ye mɔɔ, bikəə wì faŋ ŋwə fùu fɨ ŋiꞌ ŋii Juda, wee wee fwàŋ Deyvid, ghɔꞌ vənu vənshə. Kaꞌ ŋwə ŋaꞌsə ŋwaꞌlə ghɔ́, shòꞌ vəlay vi kwatia nə.»
6Mə kɨ nii yè wə faŋ ŋwə lùu yaa wee-bi-njɨɨ faŋ ŋwə tɨ̀ŋ nɨntəŋ ŋwaa vəŋkaw vɔ́, tɨ́ vətɔ vəbweyvə vɔ́ yishwe nə vɨɨ taa vɔ́ kia ŋwə, bi yɔ́ kəꞌ yaa vɨ nii zɨzwi, ndaw si nə luu shɔ kwatia, nə sɨ ghi kwatia. Luu ŋkee vəzwitə və Nwi kwatia faŋ ŋwə tɔ̀ŋ, mbə gə maa vəshəŋ vənshə fɨ taa mbi. 7Bi yɔ́ jwi, fì ŋwaꞌlə ghɔ́ fɨ ghɔ wə ntɨə faŋ ŋwə dùꞌ fuu ŋkaw kɔ́ nə, fɨ maa kwiŋ maꞌnə wi. 8Ŋwə jwi fi nɨniŋ, vətɔ vəbweyvə vɔ́ yishwe nə vɨɨ taa vì njɔsə-yishwe muu-mbɔɔ gu nsi vɨsɨ ŋwə, tɨ́ wə kɨ kii ndəə-ntɨ, wə kɨ kii ndəə-ntɨ, baa nə vəkay faŋ vɨ naysə nə goolə, nə vətɔ lwàŋ taa tey yi, luŋsə baw baw. Vətɔ və luŋsə vɔ́ lùu məshɔꞌtə Nwi, faŋ vɨɨ ley Nwi nə shɔ̀ꞌtə Nwi shɔ nə. 9Vəŋ nə zwà nyay yifi laa, «A kùꞌnə maa məfi ŋwaꞌlə ghɔ́, shoꞌ vəlay vi, buꞌ laa a nə bìŋ vɨ zwi ghɔ, a ku, ywàŋ vɨɨ nə mənshi mə, yɨsə vɨɨ fɨ maa təkuu tə vɨɨ tənshə, nə təghaŋ tənshə, nə fɨ maa ŋgwisə vɨɨ vənshə, nə fɨ maa məshɨ mənshə, lùu vɨɨ Nwi. 10A baytə vəŋ maa yifwàŋ Nwi, vəŋ gu vɨɨ məfeꞌ Nwi nɨzi, ndɔ kɨ sɔꞌ shɨ nsi.»
11Mə baa kɨ ye, yè nshiisə-ŋiisə Nwi səyaŋ, faŋ nsə kia ŋkaw kɔ́, nə vətɔ vəbweyvə vɔ́ nə vɨɨ taa vɔ́, nwaa vəŋ nə luu ŋkaŋsə ŋkaŋsə, nə vəmalia vəmalia. Mə kɨ nii zɔ̀ gɨ vəŋ. 12Vəŋ gi ŋkee nə gɨ yishaꞌsə laa, «Bi njyə faŋ vɨ nə zwì tɔ vɨɨ nə, kùꞌnə maa məzɨ yifwàŋ yi, nə yikwalə Nwi, baa nə yitɔfə, nə wutə. Bàw vɨ kɨ kɔ feenə tɨ́ ŋwə, bəŋsə ŋwə, shɔꞌtə ŋwə!»
13Mə baa kɨ nii zɔ̀ vətɔ vənshə faŋ Nwi nə bɔ̀ŋ, mbɨə faŋ mbə lùu yizɔ, nə mbɨə faŋ mbə lùu shɨ nsi, nə mbɨə faŋ mbə lùu taa mamuu, ŋkee vətɔ vənshə faŋ mbə lùu shɔ nə, mbə gi laa, «Nsiŋ kɨ shɔꞌtə Nwi faŋ ŋwə dùꞌ fuu ŋkaw, nə bi-njɨɨ yɔ́, kɔ feenə tɨ́ vəŋ, bəŋsə vəŋ. Vəŋ kɨ sɔꞌ nsiŋ maa vəshi və mbi vənshə, kee kìi ki me.»
14Vətɔ vəbweyvə vɔ́ yishwe nə, gi laa, «Ŋkə lùu nɨniŋ.» Vɨɨ taa vɔ́ nɔŋ nsi, kɨ bəŋsə Nwi.
6Faŋ Yeso Kristo nə shòꞌ vəlay ntɔfə
1Mə baa kɨ nii yè faŋ bi-njɨɨ yɔ́ shoꞌ mfɔŋ lay fɨ maa vəlay vì kwatia nə, baa zɔ̀ faŋ wə muꞌ fɨ taa ŋwaa vətɔ vəbweyvə vɔ́ yishwe nə, tii laa, «Jwi!» Gɨ yi nə duŋ yaa yibay. 2Mə ndeynə, yè nyaa-yikoꞌ yimɔ́ꞌ yifusə fuu, wuu məkoꞌ wi jia yiŋwiŋ, bèe yisɔꞌ tɔ ŋwə yaa shwenə wuu məghɔꞌ yighaw, fùu nɨniŋ yaa wuu məghɔꞌ yighaw, gə kɨ ghɔꞌ yighaw.
3Yiŋkii kɨ me, ŋwə baa kɨ shoꞌ lay mɔ́ꞌ, lwesə vəlay vəbɔɔ. Wuu mɔ́ꞌ fɨ taa ŋwaa vətɔ vəbweyvə vɔ́ gi laa, «Jwi!» 4Nyaa-yikoꞌ yimɔ́ꞌ kɨ nii fùu, faŋ nyə bày laa bəə, fùu, tɨ́ vɨ nùŋ wuu koꞌ wi laa ŋwə kɨ ndisə məduꞌ-nyɔŋ fɨ shɨ nsi. Vɨ nə kɔ̀ baꞌ yighaw kwalə tɨ́ ŋwə. Ŋwə fuu yɨsə vɨɨ nə zwilə yiŋwaa yivəŋ, vəŋ vəŋ.
5Bi-njɨɨ yɔ́ kɨ shoꞌ vəlay lwesə vətia, mə zɔ wuu mɔ́ꞌ fɨ taa ŋwaa vətɔ vəbweyvə vɔ́, ŋgwə lwesə vətia, gi ŋkii laa, «Jwi!» Mə ndeynə, ye nyaa-yikoꞌ yifəŋ, wuu məkoꞌ wi jia kilo ghɔ ŋwə. 6Mə kɨ nii zɔ̀ gɨ wə fuu fɨ taa ŋwaa vətɔ vəbweyvə vɔ́ yishwe nə. Ŋwə gì laa, «Vɨ fiŋ kay bee maa ŋkaŋ, nə say tia maa ŋkaŋ. Gə fɨ maa məluꞌ nə məŋgwə, kɨ kɔŋ mbə me.»
7Ŋwə shoꞌ vəlay lwesə yishwe, mə zɔ gɨ wuu mɔ́ꞌ fɨ taa ŋwaa vətɔ vəbweyvə vɔ́, ŋgwə lwesə yishwe. Nyə gi ŋkii laa, «Jwi!» 8Mə ndeynə, yè nyaa yikoꞌ yimɔ́ꞌ faŋ nyə nɨndɔɔlə. Wuu məkoꞌ wi lùu yiku, shɨ yiku beꞌsə ŋwə. Vɨ gaasə vɨɨ fɨ taa mbi vəshəŋ yishwe, kɔ̀ shəŋ kəmuꞌ tɨ́ ŋwə, kɔ̀ wutə tɨ́ ŋwə maa məndisə vəŋ nə baꞌ yighaw, baa nə jɨŋ, nə vəza, nə nyaasə bwəsə fɨ shɨ nsi.
9Ŋwə shoꞌ vəlay lwesə tee, mə ye vəzwitə və vɨɨ mbɨə faŋ vɨ nə zwilə vəŋ buꞌ nu Nwi, nə buꞌ məbiŋ vəŋ faŋ vəŋ nə bìŋ yizii Kristo ntee nə. Vəŋ duꞌ ŋiꞌ shəŋ məkɔ Nwi, 10yùmə nəŋay laa, «Tɨɨ mbi faŋ a bàw shɨlə, baa lùu wuu yinsəŋ, a ndɔ baa tay kɨkə, buu sɔꞌ vɨɨ fɨ shɨ nsi, yuu kwaŋ vəŋ taa nsɔꞌ buꞌ laa vəŋ nə zwìlə yia nə?» 11Vɨ kɨ nii kɔ̀ njwi yimɔ́ꞌ yifusə tɨ́ wə tɨ̀ me wə fɨ taa ŋwaa vəŋ, nàysə tɨ́ vəŋ laa vəŋ shəŋ ŋwaa tɨtiꞌ, gə̀ kɔ̀ tɨ́ yighee njyə faŋ nwaa vəŋ taa lwaŋ, faŋ vɨ ndɔ baa zwilə vaŋ-nshwi vəŋ, vɨɨ faꞌ Nwi, mbɨə faŋ vɨ ndɔ baa zwilə vəŋ yuu vɨ nə zwìlə viŋ nə.
12Mə kɨ ye, yè faŋ ŋwə shoꞌ vəlay lwesə ntɔfə, nsi kɨ nii nə̀ꞌnə ŋkee nəŋay, shɨshwi fəŋ yaa njwi faŋ vɨ bà nə nyuŋsə fəŋsə, ŋuu kiasə kɨ bɨbay yaa mənshi. 13Məjwiŋ fɨ taa yizɔ fiŋkə nsi, yaa vətaŋ və tɨ faŋ mbə kee ta yibay me, yaa kɨ fiŋkə fɨ fuu tɨ faŋ fɨɨ shɔɔ nəŋay, nəꞌsə tɨ kɔ́. 14Yizɔ shɨshɔɔ yaa vɨ yaa kɨ kelə yighaŋ nə, baŋsə sənshə nə vəshəŋ və nsi ndɔ fɨ maa vəshəŋ vəvəŋ, shə̀ŋtə gə̀. 15Nɨniŋ, vəfwàŋ fɨ shɨ nsi, nə vɨɨ məsɔꞌ shɨ nsi, nə vətɨɨ və vəsogeꞌ, nə mfuꞌsə nə vəshɨꞌ, nə vɨɨ vənshə, vəbuꞌ nə vɨɨ faŋ vəŋ dùꞌ tɔ vəŋ, gə ndènə taa təŋɔŋ nə taa ŋoꞌsə fuu baŋsə, 16gisə tɨ́ baŋsə nə yighɔsə laa, «Viŋ gukə maa yia, ndɨə yia fɨ ghɔ wə ntɨə faŋ ŋwə duꞌ fuu ŋkaw yizɔ nə, nə fɨ ghɔ bi-njɨɨ yɔ́, faŋ fwi yi shəsə nə, 17buꞌ laa shi məshəsə kwalə vəŋ kùꞌnə maa məsɔꞌ mbi yinshə. Sii kaꞌ tɨŋ ndə yizɔ?»
7Faŋ vɨ nə shwènə vɨɨ ŋkaŋsə waaghɨꞌ nə ŋkaŋsə njɔsə-yishwe muu-yinshwe fɨ taa ŋwaa vɨɨ Isirayl
1Yiŋkii kɨ shɔɔ, mə ye nshiisə-ŋiisə Nwi yishwe, vəŋ duꞌ mfaysə mbi yishwe, jìa fɨɨ faŋ ŋkə jwi fɨ maa mfaysə mbi yishwe, laa kɨ fɨɨ baa shɔɔ fɨ fuu nsi me, tɨꞌnə me fɨ fuu mamuu me, tɨꞌnə me fɨ fuu tuu tɨ kəmuꞌ me. 2Mə baa kɨ nii yè nshiiŋii Nwi mɔ́ꞌ, ŋwə fuu fɨ kwiŋ ntɔŋ-shɨshwi nə lay Nwi, ŋwə luꞌ tɨ́ nshiisə-ŋiisə Nwi sɔ́ yishwe nə, faŋ Nwi nə kɔ̀ wutə tɨ́ vəŋ laa vəŋ bɨsə mbi nə mamuu. 3Nshiiŋii Nwi yɔ́ gi laa, «Viŋ naꞌ, kɨ viŋ ta bɨsə mbi, nə mamuu, nə vətɨ me! Naꞌ, yia taa shwenə vɨɨ faꞌ Nwi via fɨ mbootɔ vəŋ.» 4Vɨ naysə ki vɨɨ shee faŋ vɨ shwenə vəŋ nə lay Nwi kɔ́ mbootɔ vəŋ nə. Vəŋ nə luu vɨɨ ŋkaŋsə waaghɨꞌ nə ŋkaŋsə njɔsə-yishwe muu-yinshwe. Nə luu vɨɨ fɨ taa məshɨ mə Isirayl mənshə. 5Vɨ nə shwènə vɨɨ ŋkaŋsə njɔsə-bɔɔ fɨ taa ŋwaa vɨɨ Juda, nə fɨ taa ŋwaa vɨɨ Ruubən ŋkaŋsə njɔsə-bɔɔ, nə fɨ taa ŋwaa vɨɨ Gad ŋkaŋsə njɔsə-bɔɔ, 6nə fɨ taa ŋwaa vɨɨ Asha ŋkaŋsə njɔsə-bɔɔ, nə fɨ taa ŋwaa vɨɨ Naftali ŋkaŋsə njɔsə-bɔɔ, nə fɨ taa ŋwaa vɨɨ Manase ŋkaŋsə njɔsə-bɔɔ, 7nə fɨ taa ŋwaa vɨɨ Simiɔn ŋkaŋsə njɔsə-bɔɔ, nə fɨ taa ŋwaa vɨɨ Levi ŋkaŋsə njɔsə-bɔɔ, nə fɨ taa ŋwaa vɨɨ Isakar ŋkaŋsə njɔsə-bɔɔ, 8nə fɨ taa ŋwaa vɨɨ Zebulɔn ŋkaŋsə njɔsə-bɔɔ, nə fɨ taa ŋwaa vɨɨ Josef ŋkaŋsə njɔsə-bɔɔ, nə fɨ taa ŋwaa vɨɨ Benyamin ŋkaŋsə njɔsə-bɔɔ. Vɨ nə shwènə vɨɨ vɔ́ vənshə.
Faŋ vɨɨ Kristo fɨ taa mbi yinshə tɨŋnə vɨsɨ Nwi ghɔ Yeso Kristo
9Yiŋkii kɨ shɔɔ, mə kɨ ye, yè ŋkee nwaa vɨɨ vəyaŋ, tɨ́ kaꞌ wə kee say me. Vəŋ nə ndɔ̀ fɨ taa məshɨ mənshə, nə təkuu tənshə, nə ŋgwisə vɨɨ yinshə, nə təghaŋ tənshə, jwì tɨ̀ŋnə vɨsɨ ŋkaw kɔ́ nə vɨsɨ bi-njɨɨ yɔ́, nə njwisə fusə səmɔ́ꞌsə maa vəŋ, nə vəshay və yitee ghɔ vəŋ, 10luꞌ nəŋay laa, «Nu məbweysə vɨɨ lùu nu Nwi wia, faŋ ŋwə dùꞌ fuu ŋkaw məsɔꞌ mbi, ghɔ bi-njɨɨ yɔ́ nə.» 11Nshiisə-ŋiisə Nwi sənshə tɨŋnə, kìa kenə kɔ́, kìa vɨɨ taa, nə vətɔ vəbweyvə vɔ́ yishwe nə, kɨ nii nɔ̀ŋ nsi vɨsɨ kenə kɔ́, tùŋ yitɔ yivəŋ nsi, bə̀ŋsə Nwi, 12gì laa, «Lùu nɨniŋ. Nsiŋ kɨ bəŋsə Nwi, kɔ feenə tɨ́ ŋwə. Yitɔfə yinshə luu sheꞌ ghɔ ŋwə. Məbwaŋ luu sheꞌ tɨ́ ŋwə. Ŋwə kwàlə shɔ̀ɔ, kìi wutə kənshə, ndɔ gòꞌsə yighee muꞌ. Ŋkə lùu sheꞌ nɨniŋ.» 13Wuu taa mɔ́ꞌ fɨ taa ŋwaa vɨɨ taa vɔ́ kiasə, gì shee laa, «Vɨɨ və̀ faŋ vəŋ mɔ̀ꞌ njwisə fusə nə, lùu vəndə? Vəŋ ndɔ̀ fɨ fə?» 14Mə gì tɨ́ ŋwə laa, «Tɨta ŋwaa, kɨ̀ɨ ghɔ.» Ŋwə gi shee laa, «Lùu vɨɨ mbɨə faŋ vəŋ fùu fɨ taa ŋɨꞌ yiyaŋ, sɔ̀ njwisə vəŋ nə mənshi mə bi-njɨɨ yɔ́, yɨ̀sə nsə ley, buꞌ faŋ vəŋ nə nùŋ fwisə vəŋ maa wə ntɨə faŋ ŋwə nə kù tɔ vəŋ nə. 15Lùu ŋiꞌ nu ŋkɨə faŋ ŋkə yɨ̀ laa kaꞌ vəŋ tɨ̀ŋnə vɨsɨ ŋkaw Nwi, kɨ faꞌ tɨ́ ŋwə taa ŋii Nwi vətuꞌ nə shɨshwi. Wə ntɨə faŋ ŋwə dùꞌ fuu ŋkaw məsɔꞌ mbi nə, jə̀ vəbee vi, shìtə vəŋ shɔ. 16Jɨŋ kee baa za vəŋ me, fwisə vəŋ kee yɔŋ me. Shɨshwi kee baa bee ndɔ̀ŋ dɨdɨꞌ tɔ vəŋ, yɨ̀sə vəŋ bwa me. 17Lùu nɨniŋ buꞌ laa bi-njɨɨ yɔ́, faŋ ŋwə lùu nɨntəŋ kenə kɔ́ nə, taa kɨ shiinə vəŋ, ndì vəŋ, gə̀ nə vəŋ yɨ koꞌ-fɨ-nsi faŋ muu mə məbwey fùu fɨ fuŋ. Nwi baa tɔ̀ŋsə mənsɨ fɨ sɨ vəŋ laylay.»
8Faŋ Yeso Kristo shoꞌ vəlay lwesə kwatia
1Bi-njɨɨ yɔ́ kɨ nii shòꞌ vəlay lwesə kwatia, vədɨꞌ gwəkə shɨ̀nə fɨ yizɔ, tày maa kuŋtə yighee.
Faŋ nshiiŋii Nwi jwì nə məshɔꞌtə vɨɨ Nwi vɨsɨ Nwi
2Mə kɨ ye, yè nshiisə-ŋiisə Nwi sɔ́ kwatia, faŋ vəŋ tɨŋnə vɨsɨ Nwi, vɨ kɔ təsaw tɨ́ vəŋ kwatia. 3Nshiiŋii Nwi yimɔ́ꞌ jwi, tɨ̀ŋ yɨ shəŋ mətwaŋ vətɔ tɨ́ Nwi, nə kay goolə maa mətwaŋ vətɔ tɨ́ Nwi ghɔ ŋwə. Vɨ kɔ vətɔ vəyaŋ tɨ́ ŋwə maa mətwaŋ, mbə luŋsə bàw tɨ́ Nwi, laa ŋwə kuꞌsə maa vəməshɔꞌtə Nwi mbɨə faŋ vɨɨ ley Nwi nə shɔ̀ꞌtə Nwi shɔ nə. Ŋwə jwi nùŋ kay kɔ́ fuu shəŋ mətwaŋ vətɔ tɨ́ Nwi, faŋ vɨ nə bɔ̀ŋ nə goolə nə. Ŋkə nə luu vɨsɨ kenə kɔ́. 4Nshiiŋii Nwi yɔ́ twàŋ vətɔ vəluŋsə vɔ́, fəndɨꞌ fuu, koꞌ ziꞌ vɨsɨ Nwi, ghɔ məshɔꞌtə fɨ ghɔ vɨɨ ley Nwi faŋ vəŋ shɔꞌtə Nwi shɔ nə. 5Nshiiŋii Nwi yɔ́ kɨ nii jìa kay kɔ́, kwàŋ wisə taa tey yi, ŋwə lwaŋ. Ŋwə ndi, tùŋ shɨ nsi, yibay bwələ shɨ nsi, dùŋ, yumə fuu, nsi nəꞌnə. 6Nshiisə-ŋiisə Nwi sɔ́ kwatia, faŋ təsaw kwatia nə luu ghɔ vəŋ nə, kɨ nii lòotə ŋwaa maa mətaw.
Faŋ nshiisə-ŋiisə Nwi ntɔfə taw təsaw
7Mfɔŋ nshiiŋii Nwi kɨ nii tàw yisaw, wey nə wisə fuu, wàsə nə mənshi, fìŋkə nsi, kuŋtə shɨ nsi kəmuꞌ kɨɨ, mè, goꞌ vəkuŋtə vəbɔɔ, kuŋtə shəŋ vətɨ kɨɨ kəmuꞌ, goꞌ vəbɔɔ, təgay kɨɨ tənshə.
8Nshiiŋii Nwi beꞌsə səbɔɔ, taw yisaw yi. Vɨ tuŋ ŋkee fa mɔ́ꞌ kəkwalə, yaa ŋkee nshɨ-baŋ, wisə nə kɨɨ fɨ fuŋ, ŋkə fiŋ taa mamuu, waytə mamuu kiasə gù mənshi. 9Waytə kəmuꞌ fɨ taa vəwaytə vətɔ vəbweyvə vətia fɨ taa mamuu kukə, way kəmuꞌ fɨ maa ki vəbay fɨ taa muu bɨ.
10Nshiiŋii Nwi lwesə sətia taw yisaw yi, ŋkee fəjwiŋ fəkwalə faŋ mfə kɨ̀ɨ yaa wisə, fiŋ fɨ taa yizɔ fuu waytə muu kəmuꞌ fɨ taa vəwaytə və muu vətia, baa fìŋ fuu vəkoꞌ-fɨ-nsi nɨzi. 11Yizii fəjwiŋ fɔ́ lùu Məluŋ. Waytə kəmuꞌ fɨ taa vəwaytə və muu vətia kiasə kɨ bɨbiŋ. Vɨɨ vəyaŋ faŋ vəŋ nə nù muu mbɔ́ kukə, buꞌ laa mbə kìasə kɨ bɨbiŋ.
12Nshiiŋii Nwi lwesə yishwe taw yisaw yi, way kəmuꞌ fɨ taa vəway və shɨshwi vətia, nə way ŋuu kəmuꞌ, nə way məjwiŋ kəmuꞌ fəŋ. Nɨniŋ laa waytə kəmuꞌ fɨ taa vəwaytə məbee vəŋ vətia ndi, way kəmuꞌ fɨ taa vəway vətia fɨ maa shi kee kìi məley me. Way fu vətuꞌ kəmuꞌ gu sheꞌ nɨniŋ, kee baa kìi məley me.
13Mə kɨ nii ye, baa zɔ mbuꞌ mɔ́ꞌ nə vɨɨlə fɨ taa yizɔ, luꞌ nə gɨ yi nəŋay laa, «Wee, wee, wee, ŋkə ndɔ bɨ tɨ́ vɨɨ fɨ taa mbi faŋ bətə nshiisə-ŋiisə Nwi sətia ndɔ jwi taw yisaw vəŋ.»
91Nshiiŋii Nwi lwesə tee kɨ nii tàw yisaw yi, mə ye fəjwiŋ faŋ mfə fiŋ fɨ taa yizɔ nsi, vɨ kɔ ŋkwa wee-nsi yibay tɨ́ ŋwə. 2Ŋwə ŋaꞌsə wee-nsi yibay ghɔ́, fəndɨꞌ fuu fɨ fuŋ yaa ŋkee fəndɨꞌ fɨ taa bɨꞌ ndaa kwalə. Fəndɨꞌ fɔ́ fəŋsə shɨshwi, baa fə̀ŋsə fɨɨ. 3Ŋweysə fuu fɨ taa fəndɨꞌ fɔ́, gù fuu nsi, vɨ kɔ wutə tɨ́ nsə yaa wutə vəŋaa vəkwalə. 4Vɨ naysə tɨ́ nsə laa kɨ nsə bɨsə təgay fɨ shɨ nsi me, tɨꞌnə me fa faŋ ŋkə tɨta yaa vətɨ me, laa nsə kɨ gə sheꞌ maa vɨɨ mbɨə faŋ vəŋ kee kìi shwenə Nwi mbootɔ vəŋ me. 5Vɨ nə baa nàysə laa nsə yɨnə vɨɨ maa yiŋuu tee, luu nə, kee zwìlə vəŋ me. Ŋɨꞌ njyə faŋ nsə kɔ̀ tɨ́ vɨɨ nə, lùu yaa njyə vəŋaa vəbwəvə faŋ mbə yaa kɨ tələ vɨɨ nə. 6Ndɔ luu maa vəshi vɔ́, wə kɨ kəə ku, kee ye yiku me. Vɨɨ kɨ kəə laa vəŋ kukə, yiku nyɨŋ fɨ yɨ vəŋ. 7Gə̀ fɨ maa ŋkɨꞌnə ŋweysə sɔ́, nsə nə lùu yaa nyaasə-koꞌsə, faŋ nsə lòotə ŋwaa maa məgə yighaw. Fa mɔ́ꞌ nə luu shɔ maa yitɔ yivəŋ yaa yisɔꞌ vəfwàŋ, faŋ vɨ nàysə nə goolə. Təkəꞌ təvəŋ luu yaa ntə vɨɨ. 8Nyuŋsə tɔ vəŋ ghɨɨ yaa nyuŋsə tɔ vəki, gɨꞌ vəŋ luu yaa gɨꞌ bikəə. 9Vəŋ mɔꞌ njwi yighaw faŋ vɨ ta shuu njyoꞌ wi nə bwey. Ghalə ghi gisə yaa vəkaalə vəyaŋvə faŋ vɨ shùŋ ŋiꞌ nyaasə-koꞌsə, nsə nə suŋ, gə̀ yighaw. 10Nsə nə kìi nsaysə yaa vəŋaa vəmɔ́ꞌ, baa nə mətələ vəŋ. Wutə məndɨəsə wə maa yiŋuu tee luu sheꞌ taa nsaysə vəŋ. 11Fwàŋ ŋweysə sɔ́ nə luu tɨɨ wee-nsi bay. Yizii yi maa ghaŋ Hibru lùu laa Abadɔn; yizii yi maa ghaŋ Griis lùu laa Apɔliɔn, faŋ lùu laa wuu məbɨsə. 12Nɨniŋ, mfɔŋ ŋɨꞌ nə shɔ̀ɔ, ghee ŋɨꞌ baa gòꞌ bɔɔ.
13Nshiiŋii Nwi lwesə ntɔfə, taw yisaw yi, mə zɔ gɨ yimɔ́ꞌ fuu fɨ maa təsaw yishwe faŋ ntə nə luu mbɨɨ shəŋ məkɔ Nwi faŋ vɨ nə bɔ̀ŋ nə goolə nə, vɨsɨ Nwi. 14Gɨ yɔ́ gi tɨ́ nshiiŋii Nwi lwesə ntɔfə faŋ ŋwə kìi yisaw yɔ́ laa, «Keꞌtə kuu fɨ maa nshiisə-ŋiisə Nwi sì yishwe faŋ vɨ nə shùŋnə vəŋ shuu muu məkwalə mə Yufreytis.» 15Nɨniŋ, vɨ keꞌtə nshiisə-ŋiisə Nwi sɔ́ yishwe, faŋ vəŋ nəə kɨꞌ yighee vəŋ, nə shi vəŋ, nə ŋuu vəŋ, nə ŋuꞌ vəŋ maa məfuu, zwìlə way kəmuꞌ fɨ taa vəway və vɨɨ fɨ taa mbi vətia. 16Nwaa vɨɨ məkoꞌ nyaasə fɨ shuu yighaw vəŋ nə luu ŋkaŋsə yighuŋ, vəshəŋ ŋkaŋsə yighuŋ ghee bɔɔ. Lùu faŋ mə nə zɔ ki vəŋ nə. 17Ŋkɨꞌnə nyaasə koꞌsə sɔ́ nə vɨɨ məkoꞌ vɔ́ faŋ mə nə ye nə, nə lùu tɨ́ nee: njwisə yighaw nə luu maa vəŋ faŋ vɨ nàysə nə bwey, səmɔ́ꞌ luu səbay yaa wisə, səmɔ́ꞌ luu səndɔɔlə yaa yizɔ, səmɔ́ꞌ luu yaa ŋkwilii bay. Yitɔ yi nyaasə koꞌsə sɔ́ luu yaa yitɔ yi bikəə. Wisə nə fəndɨꞌ baa nə lumə bwə faŋ ŋkə zwilə vɨɨ nə fùu fɨ shuu nsə. 18Vətɔ və ŋɨꞌ vɔ́ vətia, faŋ mbə nə fùu fɨ shuu nyaasə sɔ́ nə, faŋ nə luu wisə nə fəndɨꞌ nə solfa nə, zwilə nwaa muꞌ fɨ taa yinwaa yi vɨɨ yitia, mèꞌtə yinwaa yibɔɔ. 19Wutə nyaasə sɔ́ luu shuu nsə, baa nə nsaysə vəŋ. Nsaysə vəŋ luu yaa zɔsə, nə vətɔ vəvəŋ shɔ, tɨ́ kaꞌ vəŋ ndɨ̀ə wə shɔ.
20Betə vɨɨ faŋ kəŋ ŋɨꞌ ghɔ́ kee zwìlə vəŋ nə me, kee bee kwìinə fwisə vəŋ me, kee mèꞌtə vənu vəbwəvə vəŋ faŋ vəŋ nəə yɨsə nə ghɔ vəŋ nə me, kɨ bɨbəŋsə vəzwitə vəbwəvə nə vənwi vədayday faŋ vəŋ nə fìa fɨ maa goolə, tɨꞌnə me fɨ maa tiəŋ, tɨꞌnə me fɨ maa bwey bay, nə mbɨə faŋ vɨ nə shwə̀ fɨ maa ŋoꞌsə, nə mbɨə faŋ vɨ nə shwə̀ fɨ maa fəŋkɔꞌ. Vəŋ bəŋsə vətɔ vɔ́ faŋ mbə kɔlə kee yɨyenə me, kee zɨzɔ me, kee tɨtoꞌ me. 21Vəŋ kee bee kìasə fɨ maa nu bwə vəŋ me, tɨꞌnə me fɨ maa nu ŋay me, kɨ zɨzwilə vɨɨ, tii vəki, shaw vətɔ.
10Faŋ nshiiŋii Nwi nə kɔ̀ ŋwaꞌlə tɨ́ Jɔn laa ŋwə kwə
1Mə baa kɨ ye, yè nshiiŋii Nwi yikwalə yimɔ́ꞌ siꞌ jwì fɨ yizɔ, mɔ̀ꞌ mbɔꞌ maa ŋwə yaa njwi, nə kuluŋ tɔ ŋwə. Yikəꞌ yi nə bee yaa shɨshwi, fəŋ ghi luu yaa vətweꞌ və wi. 2Ŋwə jia wee-ŋwaꞌlə ghɔ ŋwə, faŋ vɨ ŋaꞌsə. Ŋwə tə ghuu ki kəmaꞌnə fuu mamuu, tə ŋkə kwiŋ ŋkwii fuu nsi, 3yumə ŋkee nəŋay yaa bikəə yaa kɨ yumə. Faŋ ŋwə nə yumə nɨniŋ nə, yibay bwələ ghee kwatia, bə̀ŋsə tɨ́ ŋwə. 4Yibay bwələ ghee kwatia nɨniŋ nə, mèꞌtə, mə kəə nyɔꞌ nu ŋkɨə faŋ nyə gi, zɔ gɨ wə gi fɨ taa yizɔ laa, «Ndɨə nu ŋkɨə faŋ yibay nii bwələ ghee kwatia, gì nə. Kɨ nyɔꞌ me!» 5Nshiiŋii Nwi yɔ́ faŋ mə nə ye ŋwə faŋ ŋwə nə tɨŋ fuu mamuu baa nə nsi nə, shaꞌsə kwiŋ maꞌnə wi yizɔ, 6lɨ̀ꞌtə yizii wə ntɨə faŋ ŋwə gòꞌsə yighee muꞌ nə, faŋ ŋwə nə bɔ̀ŋ yizɔ nə vətɔ mbɨə faŋ mbə lùu tey yi, nə nsi baa nə vətɔ mbɨə faŋ mbə lùu fuu yi, baa nə mamuu ghɔ vətɔ mbɨə faŋ mbə lùu tey yi nə, ŋwə lɨꞌtə laa, kɨ məbetə baa lùu shɔ me. 7Ndɔ luu maa vəshi mbɨə faŋ nshiiŋii Nwi, njyə lwesə kwatia, ndɔ taw yisaw yi, buu Nwi metə vənu vənshə faŋ ŋwə nə ndɨ̀ə fɨ ghɔ vɨɨ nə. Mbə taa gay, fàynə maa ntɔŋ yijəə Nwi faŋ Nwi nə fɨ̀ꞌtə tɨ́ vɨɨ faꞌ vi, faŋ lùu nshiisə-ŋii sɔghɔ nə.
8Gɨ wə njyə faŋ mə nii zɔ fɨ yizɔ nə, baa kɨ gì tɨ́ mə laa, «Gə fì ŋwaꞌlə ghɔ́, faŋ vɨ ŋaꞌsə nə, faŋ ŋwə lùu ghɔ nshiiŋii Nwi yɔ́ nə, faŋ ŋwə tɨ̀ŋ fuu mamuu, baa nə fuu nsi nə.» 9Mə gə yɨ nshiiŋii Nwi yɔ́, gì tɨ́ ŋwə laa ŋwə kɔ ŋwaꞌlə ghɔ́ shee. Ŋwə gi tɨ́ mə laa, «Kɔ̀, kwə! Ŋwaꞌlə ghɔ́ taa biŋ fɨ taa njyoꞌ ghɔ, luu nə, sɨsɨꞌsə fɨ shuu ghɔ yaa zɔsə.» 10Mə fi wee-ŋwaꞌlə ghɔ́ fɨ ghɔ nshiiŋii Nwi yɔ́, kwə. Ŋwə sɨꞌsə yaa zɔsə fɨ shuu mə. Luu nə, faŋ mə nə kwə mètə, ŋwə nə bɨbiŋ fɨ taa njyoꞌ mə.
11Vɨ baa kɨ nii nàysə shee laa mə ndɔ ghaa kɨ fɨꞌtə nu ŋkɨə faŋ Nwi kwàŋ taa shuu mə nə, tɨ́ ŋgwisə vɨɨ vəyaŋ, nə məshɨ məyaŋ, nə təghaŋ təyaŋ, nə vəfwàŋ vəyaŋ.
11Faŋ vɨɨ məfɨꞌtə nu Nwi vəbɔɔ nə fùu
1Vɨ kɨ nii kɔ̀ mfɨꞌ shee yaa yigiŋ, gì shee laa mə ndɔ yizɔ, fɨ̀ꞌ ŋii Nwi yikwalə, nə shəŋ məkɔ Nwi, nə vɨɨ mbɨə faŋ vəŋ shɔꞌtə Nwi yifi. 2Luu nə, mèꞌtə nɨntəŋ fu faŋ ŋwə kìa ŋii Nwi nə, kee fɨ̀ꞌ me, buꞌ laa Nwi kɔ̀ tɨ́ vɨɨ tətɔŋ fu. Vəŋ taa kɨ jeꞌtə shɨ Jerusalem, faŋ nə luu shɨ ley tɨ́ Nwi nə, maa təŋuu njɔsə-bɔɔ muu-yinshwe.
3Mə taa yɨsə vɨɨ məfɨꞌtə nu kaŋ vəbɔɔ kɨ gisə nu ŋkɨə faŋ mə taa kɨ kwaŋ shuu vəŋ maa vəshi ŋkaŋ nə yiwa yibɔɔ nə muu-ntɔfə. Vəŋ ndɔ kɨ mɔꞌ njwisə məluŋ. 4Vɨɨ məfɨꞌtə nu kaŋ vɔ́ vəbɔɔ nə, lùu yaa vətɨ və məŋgwə vəbɔɔ, nə təkiꞌ təbɔɔ faŋ ntə tɨ̀ŋ vɨsɨ Tɨɨ-mbi. 5Kɨ luu wə nə kəə ndɨə vəŋ, buu wisə taa fuu fɨ taa shuu vəŋ, bɨsə vɨɨ mbeenə vəŋ. Nɨniŋ, wə faŋ ŋwə taa kəə jɨɨ maa məndɨəsə vəŋ, vɨ taa zwi ŋwə. 6Nwi kɔ wutə tɨ́ vəŋ maa məfəŋ yizɔ laa kɨ yighuu siꞌ maa vəshi mbɨə faŋ vəŋ fɨꞌtə yigisə Nwi me, baa kɔ̀ wutə tɨ́ vəŋ maa məkiasə muu fɨ shɨ nsi, mbə gù mənshi, baa nə maa məkɔ ŋɨꞌ shɨ nsi yighee tɨ̀ me yighee faŋ vəŋ kàw. 7Vəŋ ndɔ kɨ metə maa məfɨꞌtə yigisə Nwi nɨniŋ nə, buu nyaa njyə faŋ nyə ndɔ fuu fɨ taa wee-nsi-yibay, ndɔ tuŋ yighaw ghɔ vəŋ, ghɔꞌ vəŋ, zwìlə vəŋ. 8Vəŋku və ŋwaa vəvəŋ nɔŋ jɨɨsə shɨ Jerusalem, ŋkee taa shɨ kwalə ŋkɨə faŋ vɨ nə bey tɨta vəŋ shɔ fuu fəŋkɔꞌ fə ŋkɨꞌsə nə. Nɨniŋ, vɨ kɨ tii shɨ kɔ́ nə Sodom, tɨꞌnə me Ijip, (buꞌ faŋ ŋkə bɨ sheꞌ yaa məshɨ mbɔ́.) 9Vɨɨ mɔ́ꞌ faŋ vəŋ ndɔ̀ fɨ taa ŋgwisə vɨɨ vənshə, nə ŋiinə vɨɨ vənshə, nə təghaŋ tənshə, nə məshɨ mənshə, ye vəŋku vəvəŋ maa vəshi vətia nə bɨꞌ, kee biŋ laa wə ndi ŋku vəŋ, gə̀ təə me. 10Vɨɨ fɨ taa mbi taa kɨ ŋaytə ŋkee dɨdɨꞌ buꞌ yiku vɨɨ vɔ́ vəbɔɔ nə. Vəŋ ndɔ kɔ vətɔ tɨ́ vəliŋ vəvəŋ buꞌ laa vɨɨ vɔ́ vəbɔɔ faŋ nə luu nshiisə-ŋii sɔghɔ nə, yaa kɨ jwi nə ŋɨꞌ yiyaŋ tɨ́ vɨɨ fɨ taa mbi. 11Vəshi vɔ́ vətia kɨ shɔɔ, nə bɨꞌ, zwitə məbwey ndɔ fɨ ghɔ Nwi, ŋìi taa ŋwaa vəŋ, vəŋ ndɔ, tɨ̀ŋnə yizɔ, vɨɨ mbɨə faŋ vəŋ ye vəŋ, fee ŋkee dɨdɨꞌ. 12Vɨɨ vɔ́ vəbɔɔ zɔ gɨ wə gì tɨ́ vəŋ fɨ taa yizɔ ŋkee nəŋay laa, «Viŋ koꞌ jwì feenə.» Vəŋ ŋii taa mbɔꞌ, kòꞌ yizɔ, vɨɨ mbeenə vəŋ kɨ ndeynə vəŋ. 13Sheꞌ maa yighee yɔ́, nsi nəꞌnə ŋkee dɨdɨꞌ, waytə shɨ kɔ́ muꞌnə, gù nsi, goꞌ vəwaytə buumuꞌ. Faŋ nsi nə nə̀ꞌnə nə, vɨɨ kukə ŋkaŋsə kwatia, bətə vɨɨ faŋ vəŋ nə gòꞌ, fee, ndɔ bə̀ŋsə Nwi fɨ yizɔ.
14Nɨniŋ, ŋɨꞌ yinjii shɔɔ, lwèsə ghee ŋɨꞌ bɔɔ. Viŋ zɔ! Ŋɨꞌ yimɔ́ꞌ taa yasə baa jwi, lwesə ghee tia.
Faŋ nshiiŋii Nwi lwesə kwatia nə tàw yisaw yi
15Nshiiŋii Nwi lwesə kwatia kɨ nii tàw yisaw yi, gɨsə vɨɨ gi fɨ yizɔ ŋkee nəŋay laa, «Yighee jwi kùꞌ faŋ tɨta ŋwaa-nsiŋ, ghɔ wə ntɨə faŋ ŋwə nə shòꞌ ŋwə nə, ndɔ kɨ sɔꞌ mbi yinshə. Yifwàŋ yivəŋ ndɔ goꞌsə yighee muꞌ.» 16Vɨɨ taanə vì njɔsə-yishwe muu-mbɔɔ faŋ vəŋ nə dùꞌ fuu vəŋkaw vəvəŋ vɨsɨ Nwi nə, gukə nsi, tùŋ təkəꞌ təvəŋ nsi, bə̀ŋsə Nwi, 17gì laa, «Yia bwaŋ ghɔ, tɨta Nwi, Nshɔɔ-mbi, faŋ a nə luu shɔ maa yighee vɨsɨ, baa lùu shɔ ndwə, buꞌ laa a ndì wutə kə, faŋ ŋkə shɔ̀ɔ ki, kɨ sɔꞌ mbi yaa yifwàŋ yə. 18Fwisə vɨɨ məshɨ məshɨ nə shə. Fwi yə baa lùu shə, jia vəŋ. Yighee kùꞌ maa məsɔꞌ vəŋku vənsisə, baa nə maa məkey vɨɨ faꞌ və, nshiisə-ŋii sɔghɔ sə, nə vɨɨ mbɨə faŋ vəŋ ley vɨsɨ ghɔ, nə vɨɨ mbɨə faŋ vəŋ nəə fee yizii yə, vɨɨ kwalə nə vɨɨ faŋ vəŋ kee lùu nu me. Yighee kùꞌ maa məndisə vɨɨ mbɨə faŋ vəŋ nəə bɨsə shɨ nsi nə.»
19Shuu ŋii Nwi fɨ yizɔ ŋaꞌnə, vɨ ye ŋwaꞌ məkee Nwi taa ŋii yɔ́. Yibay bwələ, yumə fuu, yighuu duŋ, nsi nəꞌnə, wey kwalə fiŋkə fɨ yizɔ.
12Nu wəzwi faŋ ŋwə mɔ̀ꞌ shɨshwi yaa njwi nə zɔ-ŋgu-yibay
1Shwenə nu kwalə kəmɔ́ꞌ kɨ nii fùu taa yizɔ. Luu wəzwi faŋ ŋwə nə mɔ̀ꞌ shɨshwi yaa njwi, ŋuu luu ŋiꞌ ghuu ŋwə, məjwiŋ njɔsə-bɔɔ laytə tɔ ŋwə yaa məsɨŋ. 2Ŋwə nə luu gɔsə, yumə məza məbi, ye ŋɨꞌ maa məbi, nɨndɔmə. 3Shwenə nu kəmɔ́ꞌ baa fùu taa yizɔ, luu zɔ-ŋgu-yibay yikwalə faŋ nyə bày laa bəə. Yitɔ yi nə luu kwatia, ndawsə si yighuŋ, nə təsɔꞌ tə vəfwàŋ kwatia tɔ yitɔ yɔ́. 4Nsay yi saŋ waytə məjwiŋ fɨ taa vəwaytə vətia, mɔ̀ꞌ nsi. Zɔ-ŋgu-yibay yɔ́ tɨŋnə vɨsɨ wəzwi ghɔ́, faŋ ŋwə kɨꞌ məbi nə, laa ŋwə taa kɨ bi wee ghɔ́, ŋwə kwə. 5Wəzwi ghɔ́ bi wee-wəndɔŋ faŋ ŋwə ndɔ kɨ sɔꞌ mbi yinshə nə mbay bwey. Vɨ ndi ŋwiŋ wi ghɔ́, gə̀ nə ŋwə tɨ́ Nwi, yɨ ŋkaw Nwi taa yizɔ. 6Wəzwi ghɔ́ nyɨŋ gə̀ taa tɔɔ waꞌsə maa shəŋ faŋ Nwi nə nàysə, nùŋ tɨ́ ŋwə, laa vɨ kɨ zəsə ŋwə yifi maa vəshi ŋkaŋ nə yiwa yibɔɔ nə muu-ntɔfə.
Yighaw Maykel, nshiiŋii taa mbuꞌ Nwi, ghɔ Satan
7Yighaw kɨ nii fùu yizɔ, Maykel (faŋ lùu nshiiŋii taa mbuꞌ) ghɔ vɨ vɨɨ vi nə nywenə ghɔ vɨ zɔ-ŋgu-yibay nə vɨɨ vi. 8Nshiisə-ŋiisə Nwi ghɔꞌ zɔ-ŋgu-yibay nə vɨɨ vi, vəŋ kee baa kìi tuu wee-fɨ-shəŋ yizɔ me. 9Vɨ ndi nshɨ zɔ-ŋgu-yibay ghɔ́, mɔ̀ꞌ shɨ nsi. Luu ŋkee zɔ yimwa yɔ́ faŋ vɨ tìi nə tɨɨ vəzwitə vəbwəvə, baa nə Satan, wuu məbweꞌsə mbi yinshə. Ŋwə fiŋ fɨ taa yizɔ, fìŋ shɨ nsi, ghɔ vɨ nshiisə-ŋii si. 10Mə kɨ nii zɔ gɨ wə gi fɨ yizɔ ŋkee nəŋay laa, «Nu məbweysə vɨɨ faŋ Nwi bweysə vɨɨ nə, baa nə wutə ki, baa nə yifwàŋ yi fuu ntee ndwə, baa nə wutə Kristo maa məsɔꞌ mbi yinshə. Vɨ ghɔ̀ꞌ wə ntɨə faŋ ŋwə yaa kɨ kwaŋ vaŋ-nshwi vaŋ-nsiŋ taa nsɔꞌ, wuu məbweꞌsə vɨɨ faŋ ŋwə kɔ̀ŋtə vəŋ tɨ́ Nwi ŋwaa-nsiŋ vətuꞌ nə shɨshwi. 11Vaŋ-nshwi vaŋ-nsiŋ vɔ́ baa luu ghɔꞌ ŋwə nɨzi buꞌ mənshi mə wee-bi-njɨɨ ghɔ́, buꞌ faŋ vəŋ nə bìŋ nu Kristo ntee, kàw ŋwə shɔɔ məbwey vəŋ, biŋ ŋwə, zìꞌ tɨ́ yiku. 12Nɨniŋ, yizɔ ŋaytə ghɔ vɨ vɨɨ vənshə faŋ vəŋ lùu yizɔ nə. Luu nə, ŋɨꞌ shɨ nsi nə fuu mamuu, buꞌ laa tɨɨ vəzwitə vəbwəvə siꞌ gə̀ shɔ, yè viŋ, tɨ́ fwi yi shə dɨdɨꞌ, buꞌ faŋ ŋwə kɨɨ laa yighee yi tuŋsə̀.»
13Zɔ-ŋgu-yibay yɔ́ kɨ ye laa vɨ mɔ̀ꞌ nyə shɨ nsi, nyə ŋii maa məshoꞌ ghuu wəzwi ghɔ́ faŋ ŋwə nə bì wee-wəndɔŋ nə. 14Luu nə, vɨ kɔ ghalə tɨ́ wəzwi ghɔ́ bɔɔ, faŋ lùu ghalə mbuꞌ kwalə, tɨ́ kaꞌ ŋwə vɨɨlə, nyɨ̀ŋ fɨ ghɔ zɔ yɔ́, gə̀ taa tɔɔ waꞌsə maa shəŋ ŋkɨə faŋ vɨ taa kɨ zəsə ŋwə shɔ maa wee-fɨ-kuŋtə yighee nə bɨꞌ. 15Zɔ yɔ́ tu muu yaa muu məshɔɔmə fɨ shuu nyə fɨ yiba jɨŋ wəzwi ghɔ́, tɨ́ kaꞌ mbə kwasə ŋwə. 16Luu nə, shɨ nsi gaŋtə wəzwi ghɔ́, ŋaꞌsə shuu wi, mè muu mbɔ́ faŋ zɔ yɔ́ tù fɨ shuu nyə nə. 17Nɨniŋ, njyoꞌ zɔ yɔ́ lia maa wəzwi ghɔ́, ŋwə bəŋ gə̀ kɔ̀ꞌsə yighaw maa bətə vaŋ wəzwi ghɔ́, faŋ lùu vɨɨ mbɨə faŋ vəŋ nùŋsə ntɨsə Nwi, baa bìŋ nu Yeso ntee. Nyə kɨ nii gə tɨŋnə fuu waꞌsə taa mamuu.
13Nu nyaa yibwə faŋ nyə bweꞌsə vɨɨ
1Mə kɨ ye, yè nyaa nə koꞌ fɨ taa mamuu nə ndaw si yighuŋ nə vətɔ vi kwatia, nə təsɔꞌ tə vəfwàŋ yighuŋ maa ndaw si, nə təzii məndasə Nwi maa vətɔ vi. 2Nyaa yɔ́ faŋ mə nə ye nə, nə fɨ̀nə bɔɔ, ghuu ghi fɨnə ghuu nyaa yibwə yimɔ́ꞌ, shuu wi fɨnə shuu bikəə. Zɔ-ŋgu-yibay yɔ́ kɔ wutə kwalə ki nə kenə ki tɨ́ nyaa yɔ́, 3kɔ̀ tɔ kəmɔ́ꞌ tɨ́ ŋwə nə dɨꞌ kwalə maa tɔ kɔ́ yuu vɨ nə zwì ŋwə shɔ, luu nə, vɨ shuꞌ dɨꞌ yi kɔ́, ŋkə bwaŋnə. Nyaa yɔ́ fuu, mbi yinshə jɔmə nyə, shuu vəŋ yɔŋ maa ŋwə, vəŋ gwenə ŋwə. 4Vəŋ baa bəŋsə zɔ-ŋgu-yibay yɔ́, buꞌ laa nyə kɔ́ wutə ki tɨ́ nyaa yɔ́. Vəŋ baa luu bə̀ŋsə nyaa yɔ́, gì laa, «Sii lùu ndə yaa nyaa yɔ́, sii kaꞌ nywenə ndə nywenə nyaa yɔ́?» 5Vɨ kɔ shuu tɨ́ nyaa yɔ́, nyə nə gisə vənu vəkwalə nə ndisə. Vɨ nə nùŋ nyə laa nyə kɨ sɔꞌ mbi maa yiŋuu njɔsə-bɔɔ muu-yinshwe. 6Nyə ŋaꞌsə shuu wi maa mənda Nwi, ndasə yizii Nwi, nə vəbee vi nə vɨɨ mbɨə faŋ vəŋ lùu yizɔ nə. 7Vɨ biŋ tɨ́ ŋwə laa ŋwə kɨ ŋii yighaw maa vɨɨ ley Nwi, ghɔꞌ vəŋ. Vɨ kɔ wutə tɨ́ ŋwə maa məsɔꞌ ŋgwisə vɨɨ vənshə nə təkuu tə vɨɨ tənshə, nə təghaŋ tənshə, nə məshɨ mənshə. 8Vɨɨ vənshə fɨ taa mbi faŋ vɨ kee nyɔ̀ꞌ təzii təvəŋ taa ŋwaꞌlə məbwey vəlwaŋ me, bəŋsə nyaa yɔ́. Ŋwaꞌlə məbwey vəlwaŋ ghɔ́ lùu ŋgwə wee-bi-njɨɨ yɔ́, faŋ vɨ nə zwì ŋwə nə. Vɨ nə nyɔ̀ꞌ təzii tə vɨɨ vi taa ŋwaꞌlə ghɔ́ shù fɨ faŋ Nwi nə bɔ̀ŋ mbi.
9Wə ntɨə faŋ ŋwə kìi tuulə zɔ, ŋwə zɔ! 10Kɨ luu Nwi nuŋsə wə maa məŋii taa ŋii mfiŋ, buu ŋwə ndɔ ŋii mfiŋ. Kɨ luu Nwi nuŋsə wə laa vɨ zwi ŋwə nə baꞌ yighaw, buu vɨ ndɔ zwi ŋwə nə baꞌ yighaw. Bàw laa vɨɨ ley Nwi kɨ jiatə fwisə vəŋ, nùŋsə fwisə vəŋ sheꞌ maa Nwi buꞌ nu kɔ́.
Nu nyaa yimɔ́ꞌ faŋ nyə fùu fɨ shɨ nsi
11Mə baa yè nyaa yimɔ́ꞌ fùu fɨ shɨ nsi. Ndaw si səbɔɔ fɨ̀nə nsə wee-bi-njɨɨ, nyə gi yaa zɔ-ŋgu-yibay. 12Nyaa yɔ́ fuu, kɨ sɔꞌ mbi maa yizii nyaa njyə vɨsɨ yi, baa nə wutə ki kənshə, yɨ̀sə nsi ghɔ vɨ vɨɨ mbɨə faŋ vəŋ shì shɔ nə, kɔ feenə tɨ́ nyaa njyə vɨsɨ yì, faŋ dɨꞌ bwə ki nə bwàŋnə fɨ maa nyə nə. 13Nyə yɨsə vəshwenə vəkwalə, baa yɨsə wisə fuu fɨ yizɔ, fiŋkə nsi sɨ vɨɨ. 14Nyə bweꞌsə vɨɨ fɨ taa mbi, buꞌ vəshwenə vɔ́ faŋ vɨ nə kɔ̀ tɨ́ ŋwə nə, laa ŋwə kɨ yɨsə vɨsɨ nyaa yinjii yɔ́, baa gisə tɨ́ vɨɨ faŋ vəŋ lùu taa mbi, laa vəŋ naysə fənyia, fɨꞌ maa nyaa yɔ́, faŋ vɨ nə gwìa ŋwə nə baꞌ, ŋwə bwey nə. 15Vɨ baa kɔ̀ wutə tɨ́ ŋwə maa məkɔ zwitə tɨ́ fənyia fɨ nyaa fɔ́, fənyia fɨ nyaa fɔ́ nə gisə. Ŋwə baa yɨsə laa vɨ zwilə vɨɨ vənshə faŋ vəŋ kee bə̀ŋsə fənyia fɨ nyaa fɔ́ me, 16baa yɨ́sə laa vɨɨ vənshə, faŋ luu vɨɨ kwalə, tɨꞌnə me vɨɨ tɨtiꞌ, nə vɨɨ təka, tɨꞌnə me mbəəsə, nə vaŋ shɨ, tɨꞌnə me vəbuꞌ, shwee yisɨ ŋgwia maa ghɔ vəŋ maꞌnə, tɨꞌnə me mbootɔ vəŋ. 17Nɨniŋ laa kaꞌ wə kee baa kɨ ywaŋ fa, tɨꞌnə me fiŋ fa me, maa laa ŋwə kìi shwenə kɔ́ me. Shwenə kɔ́ lùu yizii nyaa yɔ́, tɨꞌnə me kii sɨ ŋwaꞌlə yizii yi. 18Lùu nu yitɔfə; wə ntɨə faŋ sɨ ghi ley, bàw ŋwə kɨɨ nə ŋiꞌ nyaa yɔ́. Vɨ say ŋwaꞌlə ghɔ́, ŋwə fuu yaa yizii wə. Ki sɨ ŋwaꞌlə ghɔ́ lùu yiwa ntɔfə nə njɔsə-ntɔfə muu-ntɔfə.
14Kristo ghɔ vɨ vɨɨ vi ŋkaŋsə waaghɨꞌ nə ŋkaŋsə njɔsə-yishwe muu-yinshwe
1Mə baa ndèynə, yè wee-bi-njɨɨ ghɔ́ faŋ ŋwə dùꞌ fuu baŋ Zayon, ghɔ vɨɨ ŋkaŋsə waaghɨꞌ nə ŋkaŋsə njɔsə-yishwe muu-yinshwe, faŋ vɨ nə nyɔ̀ꞌ yizii wee-bi-njɨɨ ghɔ́ nə yizii Tii wi mbootɔ vəŋ. 2Mə baa luu zɔ gɨ yimɔ́ꞌ fɨ taa yizɔ yaa gɨ muu məyaŋmə, baa nə yaa yibay yikwalə. Gɨ yɔ́ faŋ mə nə zɔ nə, nə luu yaa gɨ vɨɨ məbuꞌ vəndəə-və-ntɨ faŋ vəŋ bùꞌ vəndəə-və-ntɨ nə. 3Vəŋ zwa nyay yifi vɨsɨ kenə Nwi, baa nə vɨsɨ vətɔ vəbweyvə vɔ́ yishwe nə, baa nə vɨsɨ vɨɨ taa vɔ́. Nə kɨkaꞌ wə kee zwètə nyay yɔ́ me, tɨ̀ lɨꞌ sheꞌ vɨɨ vɔ́ ŋkaŋ waaghɨꞌ nə ŋkaŋsə njɔsə-yishwe muu-yinshwe faŋ Nwi nə shòꞌ vəŋ fɨ taa mbi, ywàŋ nə mənshi mə ŋwiŋ wi nə me. 4Lùu vɨɨ mbɨə faŋ vəŋ kee bɨsə ghɔ vəŋ buꞌ nu vəki me, nə vɨɨ faŋ vəŋ nə kee bèꞌsə nwi day me. Vəŋ beꞌsə luu bi-njɨɨ yɔ́ maa shəŋ tɨ̀ me shəŋ faŋ nyə gə̀ shɔ. Luu mfɔŋsə vɨɨ faŋ vɨ nə ywàŋ, jwì nə vəŋ tɨ́ Nwi ghɔ bi-njɨɨ yɔ́. 5Vɨ nə kee zɔ tuu nu ba fɨ shuu vəŋ me. Tuu wee-ndoꞌ kee lùu maa vəŋ me.
Faŋ nshiisə-ŋiisə Nwi jwi nə ntɔŋ yijəə, baa nə nsɔꞌ Nwi
6Mə baa kɨ ye, yè nshiiŋii Nwi yimɔ́ꞌ faŋ ŋwə vɨɨlə fɨ nɨntəŋ yizɔ, jwì nə ntɔŋ yijəə faŋ nyə gòꞌsə yighee muꞌ, fɨꞌtə tɨ́ vɨɨ vənshə fɨ taa mbi, tɨ́ məshɨ mənshə, nə təkuu tə vɨɨ tənshə, nə təghaŋ tənshə, nə ŋgwisə vɨɨ vənshə. 7Ŋwə nə gì nə gɨ yishaꞌsə laa, «Viŋ kɨ fee Nwi, bəŋsə ŋwə, buꞌ laa yighee njyə faŋ ŋwə taa shoꞌtə vənu və vɨɨ kùꞌnə. Viŋ kɨ bəŋsə wə ntɨə faŋ ŋwə nə bɔ̀ŋ yizɔ ghɔ nsi, nə mamuu, nə vəkoꞌ-fɨ-nsi faŋ muu fuu fɨ fuŋ nə.»
8Nshiiŋii Nwi yimɔ́ꞌ lwesə səbɔɔ fuu jwi, gì ŋkii laa, «Vɨ sɔꞌ shɨ Babilɔn, mɔ̀ꞌ nsi, buꞌ laa ŋwə nəə beꞌsə vəsakə nə, baa kɔ̀ fɨ maa məluꞌ mə nu bwə kɔ́ tɨ́ ŋgwisə vɨɨ vənshə, vəŋ nu nɨzi.»
9Nshiiŋii Nwi lwesə sətia jwi gì ŋkii nə gɨ yishaꞌsə laa, «Wə kɨ luu kɨ bəŋsə nyaa yɔ́ nə fənyia fi, baa biŋ laa vɨ shwee shwenə kɔ́ mbootɔ ŋwə, tɨꞌnə me ghɔ ŋwə, 10buu ŋwə taa kɨ nu fwi yishəsə Nwi yaa məluꞌ, faŋ Nwi kwàŋ taa ndaw məluꞌ, kee wasə me. Kəŋ wə ghɔ́ ndɔ kɨ ye ŋɨꞌ taa wi nə wisə baynə faŋ luŋ ki zwilə vɨɨ yikəꞌ nshiisə-ŋiisə Nwi, baa nə yikəꞌ wee-bi-njɨɨ ghɔ́. 11Fəndɨꞌ kɨ fuu fɨ maa shəŋ ŋkɨə faŋ vɨ twaŋ vəŋ shɔ maa vəshi və mbi vənshə, kee ndɔ mè me. Vətuꞌ nə shɨshwi yighee məshəŋ ŋwaa kee lùu shɔ tɨ́ vəŋ me. Vəŋ ye ŋɨꞌ, buꞌ laa vəŋ nə bəŋsə nyaa yɔ́ nə fənyia fi, baa fì shwenə yizii ki maa vəŋ.»
12Nɨniŋ, ŋkə bàw laa vɨɨ ley Nwi faŋ vəŋ jia ntɨsə Nwi, baa nùŋ fwisə vəŋ maa Yeso nə, kɨ jia fwisə vəŋ, kee biŋ nyaa yɔ́ me. 13Mə baa kɨ nii zɔ gɨ wə gi fɨ yizɔ laa, «Nyɔꞌ taa ŋwaꞌlə laa, shù ndee mənɔŋ-bwaŋnə lùu tɨ́ vɨɨ mbɨə faŋ vəŋ taa kɨ ku taa ghɔ tɨta Kristo. Zwitə Nwi gì laa lùu nɨniŋ. Vəŋ taa kɨ shəŋ ŋwaa, buꞌ faꞌ ŋgwə faŋ vəŋ nə faꞌ nə wutə nə. Lumə vəfaꞌ vəvəŋ beꞌsə vəŋ.»
Faŋ nsɔꞌ Nwi ndɔ ŋii shɨ nsi
14Mə baa ndèynə, yè mbɔꞌ yifusə, ye wə duꞌ fuu mbɔꞌ yɔ́ yaa Wuu yinsəŋ Nwi, nə yisɔꞌ vəfwàŋ tɔ ŋwə, faŋ vɨ nàysə nə goolə, nə nywi say ghinə ghɔ ŋwə ŋkee yishəsə. 15Nshiiŋii Nwi yimɔ́ꞌ baa fùu fɨ taa ŋii Nwi yikwalə, yùmə ŋkee nə gɨ yishaꞌsə tɨ́ wə ghɔ́ faŋ ŋwə nə dùꞌ fuu mbɔꞌ yɔ́ laa, «Ndi nywi yə, gwìa vətɔ shɔ fɨ taa biisə, buꞌ laa yighee kùꞌ maa məshwi vətɔ fɨ taa mbi.» 16Wə ghɔ́ faŋ ŋwə nə dùꞌ fuu mbɔꞌ nə, jɨɨsə nywi taa mbi, shwì vətɔ fɨ taa mbi.
17Nshiiŋii Nwi yimɔ́ꞌ kɨ nii fùu fɨ taa ŋii Nwi yizɔ, baa kìi nywi yishəsə ghɔ ŋwə. 18Nshiiŋii Nwi yimɔ́ꞌ faŋ ŋwə kìi wutə məsɔꞌ wisə, fùu fɨ taa shəŋ məkɔ Nwi, gì ŋkee nə gɨ yishaꞌsə tɨ́ nshiiŋii Nwi njii-wə faŋ ŋwə nə kìi nywi ghɔ ŋwə nə, laa lee, «Ndi nywi yə, shetə vətaŋ vətɨ shɔ faŋ mbə lùu maa tɨ taŋ kì fɨ shɨ nsi, buꞌ laa vətaŋ vɔ́ tà.» 19Nshiiŋii Nwi yɔ́ jɨɨsə nywi yi shɨ nsi, shetə vətaŋ vətɨ fɨ fuu tɨ taŋ kɔ́, mɔ̀ꞌ taa shəŋ məkaŋ məluꞌ mə Nwi nə njyoꞌ yishəsə. 20Vɨ kaŋ vətaŋ vətɨ vɔ́ fu fɨ taa shɨ, mənshi fuu fɨ maa shəŋ məkaŋ məluꞌ kɔ́, kɨ shɔɔ yaa muu, nyɨŋ yaa vəkilomita yiwa yitia, məgə wi luu yaa kwiŋ ŋkwəŋ.
15Faŋ nshiisə-ŋiisə Nwi kwatia jwi nə ŋɨꞌ tɨ́ vɨɨ
1Mə baa kɨ ye, yè shwenə kwalə mɔ́ꞌ, ŋkee shwenə nu shuu yɔŋ yizɔ. Nshiisə-ŋiisə Nwi kwatia nə vəndwəsə və ŋɨꞌ ghɔ vəŋ kwatia faŋ fwi Nwi yishəsə ndɔ ndwə shɔ. 2Mə baa yè fa mɔ́ꞌ nɨzi. Ŋkə nə luu yaa mamuu, kɨꞌ yaa ŋwaꞌlə məye sɨ, wàsə nə wisə. Nshiisə-ŋiisə Nwi nsɨə faŋ nsə nə ghɔ̀ꞌ nyaa yɔ́ nə fənyia fi, nə wə ntɨə faŋ vɨ nə sày yizii yi nə sɨ ŋwaꞌlə nə. Nshiisə-ŋiisə Nwi sɔ́ nə dùꞌ yɨ mamuu yɔ́, jìa vəndəə və Nwi ghɔ vəŋ, 3zwà nyay Mose, wuu faꞌ Nwi, nə nyay wee-bi-njɨɨ ghɔ́, laa, «Nu ŋkɨə faŋ a yɨsə, lùu nu kwalə, luu ŋkee nu shuu yɔŋ mɔɔ, tɨta Nwi Nshɔɔ-mbi, jɨɨsə sə bɔ̀ŋsə, baa lùu yinsəŋ mɔɔ, fwàŋ ŋgwisə vɨɨ vənshə. 4Wə ntɨə faŋ ŋwə kee fee yizii yə, bəŋsə ghɔ me, sii lùu ndə, Mɔꞌmbi? A bàw shɨlə, sheꞌ ghɔ nɨnɔŋ wə. Vɨɨ vənshə fɨ taa mbi ndɔ jwi kɨ bəŋsə ghɔ, buꞌ vənu mbɨə faŋ a yɨsə vəloomə, mbə fuu yikəꞌ vɨɨ.»
5Yiŋkii kɨ shɔɔ, mə ye vɨ ŋaꞌsə shuu ŋii Nwi, faŋ luu ŋkee vəbee və mətwelə ŋiꞌ nu Nwi yizɔ. 6Nshiisə-ŋiisə Nwi sɔ́ faŋ nsə nə jia vənu və ŋɨꞌ vɔ́ kwatia nə, fuu fɨ taa ŋii yɔ́, mɔ̀ꞌ njwisə fusə faŋ nsə ley kəndwaꞌlə, kà təŋii təvəŋ nə kɔtə goolə. 7Wə muꞌ fɨ taa ŋwaa vətɔ vəbweyvə vɔ́ yishwe nə, kɔ vəkay və goolə kwatia tɨ́ vəŋ, tɨ́ mbə lwaŋkə nə ŋɨꞌ fɨ ghɔ Nwi faŋ ŋwə bwey, goꞌsə yighee muꞌ nə. 8Fəndɨꞌ kɨ nii lwàŋ taa ŋii Nwi yɔ́, buꞌ faŋ yikwalə Nwi nə wutə ki nə ŋìi shɔ. Nə kɨ kaꞌ wə kee ŋìi taa ŋii Nwi yɔ́ maa yighee yɔ́ me, gə ziꞌ maa yighee njyə faŋ vənu və ŋɨꞌ vɔ́ kwatia nə, faŋ mbə nə luu ghɔ nshiisə-ŋiisə Nwi sɔ́ kwatia nə, ndɔ mè.
16Nshiisə-ŋiisə Nwi kwatia tutə vəkay və ŋɨꞌ kwatia, mbə kɔ ŋɨꞌ shɨ nsi
1Mə kɨ nii zɔ gɨ wə gi ŋkee nəŋay fɨ taa ŋii Nwi yɔ́, gì tɨ́ nshiisə-ŋiisə Nwi sɔ́ kwatia laa, «Viŋ gə tu vəkay və ŋɨꞌ və Nwi vì kwatia nə shɨ nsi!» 2Nɨniŋ, mfɔŋ nshiiŋii Nwi fi vɨsɨ, gə̀ tù kay ki shɨ nsi, ŋgwisə vədɨꞌ koo vɨɨ mbɨə faŋ vəŋ nə kìi shwenə nyaa yɔ́ maa vəŋ, baa bə̀ŋsə fənyia fi nə. 3Nshiiŋii Nwi beꞌsə səbɔɔ, tu kay ki taa mamuu, mbə kiasə gù yaa mənshi mə ŋku wə. Vətɔ vəbweyvə vənshə faŋ mbə lùu taa mamuu kukə. 4Nshiiŋii Nwi beꞌsə sətia tu kay ki taa muu mə shɔɔmə, nə taa vəkoꞌ-fɨ-nsi, mbə kiasə gù mənshi.
5Mə kɨ nii zɔ nshiiŋii Nwi njyə faŋ ŋwə sɔꞌ muu nə, gi laa, «A luu ŋkee wuu loomə, mɔɔ Nwi, faŋ a nə luu shɔ yighee vɨsɨ, baa lùu shɔ ndwə. A bàw shɨlə, buꞌ faŋ a shìa nu kɔ́ nee. 6Vɨɨ nə zwìlə vɨɨ ley və, nə nshiisə-ŋii sɔghɔ sə, tùtə mənshi məvəŋ nɨniŋ. A baa luu kɔ̀ mənshi tɨ́ vəŋ laa vəŋ nu. Ŋkə kùꞌnə tɨ́ vəŋ nɨniŋ.» 7Mə baa zɔ shəŋ məkɔ Nwi gi laa, «Ɔŋ mɔɔ, tɨta Nwi Nshɔɔ-mbi, a shìa nu kəbinə, kəloomə.»
8Nshiiŋii Nwi lwesə yishwe tu kay ki shuu shɨshwi ŋwə twaŋ vɨɨ yaa wisə. 9Faŋ məndɔŋ nə kɔlə twàŋ vɨɨ nɨniŋ nə, vəŋ kɨ nɨndasə yizii Nwi faŋ ŋwə kìi wutə maa ŋɨꞌ yɔ́. Vəŋ kee bee kwìinə fwisə vəŋ me, kee kɨ bəŋsə Nwi me.
10Nshiiŋii Nwi lwesə tee tu ŋkii kay fuu kenə nyaa yɔ́, mfiŋsə gu maa yifwàŋ yi. Vɨɨ kwə gɨꞌ, ndɔ̀ŋmə vənditə vəvəŋ, buꞌ məza yaŋ faŋ vəŋ nə zɔ̀. 11Nɨniŋ, vəŋ nda Nwi fɨ yizɔ, buꞌ məza vəŋ ghɔ́ nə vədɨꞌ vəvəŋ, kee kìasə fɨ maa jɨɨsə bwəsə vəŋ me.
12Nshiiŋii Nwi lwesə ntɔfə tu kay ki taa muu məshɔɔmə məkwalə Yufreytis, mbə yɔŋ. Nɨniŋ laa jɨɨ luu yiŋaꞌsə tɨ́ vəfwàŋ faŋ vəŋ jwi nə yighaw fɨ ntɔŋ-shɨshwi. 13Mə kɨ nii yè vəzwitə vəbwəvə vətia faŋ mbə nə luu yaa vənyɨnshaŋ, mbə fuu fɨ taa shuu zɔ-ŋgu-yibay, nə fɨ shuu nyaa yɔ́, nə fɨ shuu nshiiŋii-sɔghɔ, wuu təba ghɔ́. 14Luu vəzwitə vəbwəvə və Satan, faŋ mbə yɨsə vənu və shuu yɔŋvə. Mbə fuu gə maa vəfwàŋ fɨ shɨ nsi, maa məshəŋtə vəŋ maa mətuŋ yighaw maa shi kwalə Nwi Nshɔɔ-mbi.
15Viŋ kɨ lumə yigi Kristo faŋ ŋwə nə gì laa lee, «Viŋ zɔ! Mə ndɔ jwi maa yighee faŋ wə kee yikɨɨ me, sheꞌ yaa ndɔꞌ. Mənɔŋ-bwaŋnə tɨ́ wə ntɨə faŋ ŋwə shi nə yikɨꞌ, shìŋnə njwi si laa kɨ ŋwə ndɔ toꞌ nə ntɨŋ, tɔ ki dɨɨ taa ŋwaa vɨɨ me.» 16Nɨniŋ, vəzwitə vəbwəvə shəŋtə vəfwàŋ vɔ́ shəŋ mɔ́ꞌ faŋ vɨ tii shəŋ kɔ́ nə Armagedɔn maa ghaŋ Hibru.
17Nshiiŋii Nwi lwesə kwatia tu kay ki taa fɨɨ, gɨ yikwalə fuu fɨ fuu kenə fɨ taa ŋii Nwi laa, «Ŋkə mè.» 18Yighuu duŋ, gɨsə fuu, yibay bwələ, nsi nəꞌnə ŋkee nəŋay. Shù fɨ faŋ Nwi nə bɔ̀ŋ wə, nsi nə kee ta nə̀ꞌnə nɨniŋ me. Nə luu ŋkee nsi yinəꞌnə yibwənə. 19Vɨ seenə shɨ kwalə kɔ́ vəway vətia, məshɨ mə mbi ndi. Nwi lumə shɨ kwalə Babilɔn, kɔ ndaw məluꞌ məshəsə tɨ́ ŋwə laa ŋwə nu. Məluꞌ məshəsə mbɔ́ luu fwi Nwi yishəsə, nə nsɔꞌ Nwi yiweꞌ. 20Vəshəŋ və nsi faŋ mbə lùu nɨntəŋ muu vənshə, nyɨŋkə. Baŋsə kee baa lùu shɔ me. 21Yiwey faŋ nyə dɨ̀ɨ yaa ŋkee vənshɨ-və-ŋoꞌsə kwalə, fiŋkə fɨ taa yizɔ, gùkə tɔ vɨɨ. Luu nə, vɨɨ ndasə Nwi, buꞌ wey ghɔ́ faŋ ŋə kɔ ŋɨꞌ tɨ́ vəŋ nə, buꞌ laa ŋɨꞌ yɔ́ shɔ̀ɔ ki.
17Nu wəzwi sakə
1Nshiiŋii Nwi yimɔ́ꞌ fɨ taa ŋwaa nshiisə-ŋiisə Nwi kwatia faŋ vəkay və ŋɨꞌ nə lùu ghɔ vəŋ nə, jwi gì shee laa mə jwi, yi də nsɔꞌ njyə faŋ nyə ndɔ ŋii maa wəzwi sakə wì, faŋ lùu shɨ ŋkɨə faŋ vɨ nə fia mbɨɨ muu məyaŋmə nə. 2Vəfwàŋ fɨ taa mbi nəə shi nə wəzwi sakə ghɔ́. Vɨɨ fɨ taa mbi ghɨghenə buꞌ məluꞌ mə vəswaŋ faŋ mbə ndɔ̀ fɨ ghɔ wəzwi ghɔ́. 3Nshiiŋii Nwi yɔ́ gi nɨniŋ, ndì mə fɨ taa zwitə, gə̀ nə mə taa tɔɔ waꞌsə. Mə ziꞌ shɔ, yè wəzwi faŋ ŋwə kòꞌ fuu nyaa yibay, faŋ vɨ nə nyɔ̀ꞌ təzii məndasə Nwi mbɨɨ ŋwaa yi. Yitɔ yi luu kwatia, ndaw si yighuŋ. 4Wəzwi ghɔ́ mɔ̀ꞌ njwisə shwaŋ ndɔŋnə nə vətɔ və goolə nə vətɔ və shwaŋ ndɔŋnə vəmɔ́ꞌ maa ŋwə, ndɔ̀ jìa ndaw goolə ghɔ ŋwə. Ndaw yɔ́ lwaŋ nə vətɔ vəbwəvə nə vətɔ və sakə, buꞌ faŋ ŋwə nəə toꞌ vəsakə nə vənwi vədayday nə. 5Vɨ nə nyɔ̀ꞌ yizii yi mbootɔ ŋwə yaa yigisə tii. Nyə lùu laa, «Babilɔn kwalə, nshu vɨɨ mətii vəki, baa nə vətɔ və vənwi vədayday fɨ mbi yinshə.»
6Mə kɨ ye, yè wəzwi ghɔ́, tɨ́ ŋwə nu mənshi mə vɨɨ ley Nwi nə mənshi mə vɨɨ mbɨə faŋ vəŋ nəə biŋ Yeso ntee, vɨ zwìlə vəŋ nə. Mə ye nɨniŋ, shuu ŋwaa yɔŋ. 7Nshiiŋii Nwi yɔ́ gi shee laa, «Shuu wə yɔ̀ŋ buꞌ kə? Naꞌ, mə fɨꞌtə ŋiꞌ nu wəzwi ghɔ́ tɨ́ ghɔ nə ŋiꞌ nyaa yɔ́ faŋ ŋwə kòꞌ fuu yi nə, nə vətɔ vi kwatia, nə ndaw si yighuŋ nə. 8Nyaa yɔ́ faŋ a ye nə, nə fɔŋ lùu fa faŋ ŋkə lùu kəbwey. Luu nə, nyə kee baa lùu mbi ndwə me. Nɨniŋ, nyə ndɔ baa koꞌ fɨ taa wee-nsi-yibay, baa lùu shɔ, kɨ nii yindi. Shuu vɨɨ fɨ taa mbi yɔŋ faŋ vəŋ yè nyaa yɔ́ faŋ nyə nə luu shɔ, kee baa lùu shɔ nə me, ndɔ baa lùu shɔ. Luu nə, taa yɔŋ sheꞌ shuu vɨɨ mbɨə faŋ vɨ kee nyɔ̀ꞌ təzii təvəŋ taa ŋwaꞌlə məbwey vəlwaŋ me, yuu vɨ nə nyɔ̀ꞌ təzii tə vɨɨ Nwi taa ŋwaꞌlə ghɔ́ shù fɨ faŋ Nwi nə kìasə kɨ bɔŋ mbi nə. 9Lùu nu wuu tɔ ley faŋ yitɔfə yi lùu shɔ. Yitɔ yɔ́ kwatia nə, lùu baŋsə kwatia, faŋ wəzwi ghɔ́ dùꞌ fuu yi nə, baa lùu vəfwàŋ kwatia nɨzi. 10Mbə tee gùkə, ŋgwə muꞌ kɨ bii sɔꞌ shɨ. Wuu mɔ́ꞌ kee ta yijwi me. Ŋwə ndɔ jwi, tay sheꞌ maa kuŋtə yighee. 11Gə̀ fɨ maa nyaa yɔ́ faŋ nyə nə luu shɔ, kee baa lùu shɔ nə me, lùu vəfwàŋ lwesə yifɔŋ. Luu nə, ŋwə nə luu sheꞌ fɨ maa nsə kwatia sɔ́ nə. Ŋwə ndɔ gə ziꞌ shəŋ yiku. 12Ndawsə sɔ́ yighuŋ faŋ a ye nə, lùu vəfwàŋ yighuŋ, faŋ vəŋ kee ta zɨ̀ vəŋkaw me. Vəŋ ndɔ duꞌnə, sɔꞌ shɨ maa kuŋtə yighee yimuꞌ ghɔ vɨ nyaa yɔ́. 13Mbə yighuŋ vɔ́ kii sheꞌ nu kəmuꞌ, kɔ wutə vəŋ tɨ́ nyaa yɔ́. 14Vəŋ ndɔ ŋii yighaw maa bi-njɨɨ yɔ́, bi-njɨɨ yɔ́ faŋ lùu Kristo nə, ghɔꞌ vəŋ, buꞌ laa ŋwə lùu tɨɨ vɨɨ məsɔꞌ mbi, baa luu fwàŋ vəfwàŋ. Ŋwə ndɔ ghɔꞌ vəfwàŋ vɔ́ ghɔ vɨ vɨɨ vi faŋ Nwi nə tii vəŋ, shoꞌ vəŋ nə, buꞌ faŋ vəŋ nə jìa nu ki, nùŋ fwisə vəŋ maa ŋwə.»
15Nshiiŋii Nwi yɔ́ baa kɨ gi shee laa, «Yishuu yimuu yiyaŋnə yɔ́ faŋ a yè maa shəŋ ŋkɨə faŋ wəzwi sakə ghɔ́ dùꞌ nə, lùu ŋgwisə vɨɨ, nə tənwaa tə vɨɨ vəyaŋ, nə məshɨ, nə təghaŋ. 16Gə fɨ maa ndawsə sɔ́ yighuŋ nə nyaa yɔ́ faŋ a ye nə, nsə ndɔ bee wəzwi ghɔ́, fì vətɔ vənshə faŋ ŋwə kìi, mèꞌtə ŋwə nə ntɨŋ, ndɔ kwə mbasə ŋwaa wi, twàŋ ŋwə nə wisə. 17Vəŋ yɨ nɨniŋ buꞌ laa Nwi kwàŋ nu taa fwisə vəŋ laa vəŋ yɨ sheꞌ maa ŋkitə yi, baa fàynə maa fa kəmuꞌ, faŋ lùu laa vəŋ kɔ nu yifwàŋ vəŋ tɨ́ nyaa yɔ́, gə ziꞌ maa yighee njyə faŋ nu ŋkɨə faŋ Nwi nə gì, faynə. 18Gə̀ fɨ maa wəzwi ghɔ́ faŋ a ye nə, lùu shɨ kwalə kɔ́ faŋ ŋkə sɔꞌ vəfwàŋ fɨ taa mbi nə.»
18Faŋ shɨ Babilɔn ndɔ ndi
1Yiŋkii kɨ shɔɔ, mə ye nshiiŋii Nwi yimɔ́ꞌ faŋ ŋwə ndɔ fɨ yizɔ, sìꞌ nsi, tɨ́ Nwi kɔ wutə kwalə tɨ́ ŋwə. Ŋwə nə ndwàꞌlə, mbi ley. 2Ŋwə luꞌ ŋkee nəŋay laa, «Babilɔn, shɨ kwalə kì ndì. Ŋkə ndì, gù shəŋ shi tɨ́ vəzwitə vəbwəvə, gù ŋii mfiŋ tɨ́ vəzwitə vəbwəvə vənshə, nə tɨ́ mənwə məbwəmə faŋ vɨ bee mbə nə. 3Shɨ kɔ́ ndì nɨniŋ, buꞌ laa vəŋ nə kɔ̀ məluꞌ mə vəswaŋ tɨ́ vɨɨ fɨ taa məshɨ mənshə, vəŋ nu. Vəfwàŋ fɨ taa mbi yinshə nə shì ghɔ vɨ wəzwi ghɔ́. Vɨɨ məbeꞌlə təwiŋ fuꞌ ka buꞌ vətɔ və shwaŋ ndɔŋnə vi shɔ̀ɔ ki.»
4Mə baa kɨ zɔ gɨ wə baa gì fɨ yizɔ laa, «Viŋ fuu fɨ shɨ yɔ́, ŋgwisə vɨɨ vaŋ, laa kɨ viŋ mɔꞌ ŋwaa wiŋ taa nu bwə faŋ shɨ kɔ́ yɨ̀sə nə me, yuu ŋii taa ŋɨꞌ njyə faŋ Nwi ndɔ kɔ tɨ́ shɨ kɔ́ nə. 5Nu bwə ŋkɨə faŋ shɨ kɔ́ yɨ̀sə, ŋkə shɔ̀ɔ ki, koꞌ zìꞌ yizɔ. Nwi lumə vənu vəmbuulə faŋ vəŋ yɨsə nə. 6Viŋ yɨ maa ŋwə, sheꞌ faŋ ŋwə nə yɨ̀ maa viŋ nə, ndɔꞌ ŋwə ghee bɔɔ shɔ̀ɔ faŋ ŋwə nə lòotə tɨ́ viŋ nə. 7Viŋ kɔ ŋɨꞌ tɨ́ ŋwə yiyaŋ shɔ̀ɔ faŋ məzɨ ŋwaa nə vətɔ vəjəəvə faŋ ŋwə nə zɨ̀ ŋwaa wi shɔ nə, buꞌ laa ŋwə bɨꞌtə fɨ taa fwi ŋwə laa yi duꞌ feenə yaa fwàŋ, kee lùu zu ŋku me, kee ndɔ kii nu məluŋ me. 8Nɨniŋ, ŋɨꞌ yi ndɔ jwi shi kəmuꞌ, nə yiku, nə məluŋ, nə jɨŋ, vɨ baa twàŋ vəŋ nə wisə, buꞌ laa tɨta Nwi faŋ ŋwə kwàŋ shɨ kɔ́ taa nsɔꞌ nə, weꞌ.
9Vəfwàŋ fɨ taa mbi faŋ ghɔ vɨ shɨ kɔ́ nəə zɨnə vəswaŋ, zɨ̀ vətɔ vəjəəvə ghɔ vɨ vəŋ, ndɔ gwia shɨŋsə, buꞌ faŋ vəŋ ye fəndɨꞌ, faŋ shɨ kɔ́ kɨɨ nə. 10Vəŋ taa tɨŋ ntaŋ kɨ fee ŋɨꞌ yɔ́, faŋ Nwi kɔ tɨ́ shɨ kɔ́ nə, gisə laa, «Wii, shɨ kwalə Babilɔn, shɨ kwalə weꞌnə, nsɔꞌ jìa ghɔ maa kuŋtə yighee nee nə!» 11Vɨɨ məbeꞌlə yiwiŋ fɨ taa mbi gwia buꞌ ŋwə, buꞌ laa wə kee baa ywaŋ vətɔ vəvəŋ me. 12Vətɔ və yiwiŋ vɔ́ lùu vətɔ faŋ vɨ fìanə fɨ maa goolə nə siliva, nə mbɨə faŋ vɨ nàysə nə ŋoꞌsə ndwaꞌlə, nə vətaŋ və me, nə njwisə silik, nə njwisə baysə, nə njwisə səjəəsə səmɔ́ꞌsə, nə vətɨ və shwaŋ ndɔŋnə vənshə, nə vətɔ vənshə faŋ vɨ kɔ̀ŋ fɨ maa yisaw nsee, baa nə fɨ maa vətɨ və shwaŋ ndɔŋnə, nə vətɔ vənshə faŋ vɨ yə̀ŋ fɨ maa bwey bay nə vəbwey, nə mbɨə faŋ vɨ shwə̀tə fɨ maa ŋoꞌsə jəəsə, 13nə fəlɔŋ fə tɨ, nə ŋkee fəlɔŋ, nə lamenda, nə ndiŋ, nə məluꞌ, nə məŋgwə, nə bee-nə-mbwii, nə say ghinə, nə nyaasə-məndɨɨ, nə bisə-njɨɨsə, nə nyaasə-koꞌsə, nə vəkaalə, nə vəbuꞌ, nə ŋkee vɨɨ. 14Nɨniŋ, vətɔ vəjəəvə vənshə faŋ shɨ kɔ́ nə kàw nə, ndi fɨ ghɔ vəŋ. Yiyaŋ yi nə vətɔ və məkoꞌsə ŋwaa vəŋ ndì, vɨ kee ndɔ baa ye mbə me. 15Vɨɨ məbeꞌlə yiwiŋ faŋ vəŋ nə yàŋ fɨ ghɔ shɨ kɔ́ buꞌ məbeꞌlə yiwiŋ vəŋ, tɨŋ ntaŋ, buꞌ laa vəŋ fee ŋɨꞌ njyə faŋ nyə jìa shɨ kɔ́ nə, gwia kɨ shɨŋsə, 16gisə laa, «Wii, wii, shɨ kwalə kə̀ faŋ ŋkə nəə mɔꞌ njwisə ka, nə njwisə baysə, baa shuŋ vətɔ və goolə, nə wey, nə vətɔ vəjəəvə vəmɔ́ꞌ, 17yiyaŋ yə ndì maa wee-fɨ-mbuu-yighee nee.» Vɨɨ mədɔŋsə vəbay vənshə, nə vɨɨ vənshə faŋ vəŋ tɔŋ gə njɨɨ yi fɨ taa bay, nə vɨɨ faꞌ taa mamuu vənshə tɨŋ ntaŋ, 18kɨ yumə, buꞌ faŋ vəŋ yè fəndɨꞌ faŋ mfə koꞌ fɨ shɨ yɔ́, gì laa, «Shɨ kəmɔ́ꞌ sii lùu fə faŋ ŋkə fɨ̀nə ŋkə?» 19Vəŋ kuŋ vəbu, yumə, luŋ, gisə laa, «Wii, wii! Ye shɨ kwalə kə̀! Vɨɨ vənshə faŋ vəŋ kìi vəbay nə ka, kii sheꞌ buꞌ shɨ kə̀. Wii, ŋkə ndì kənshə sheꞌ maa kuŋtə yighee nee.» 20Luu nə, viŋ kɨ ŋaytə buꞌ shɨ kɔ́, mɔɔ yizɔ, viŋ vɨ vɨɨ Nwi, nə vɨɨ ntɔŋ Kristo, nə nshiisə-ŋii sɔghɔ, buꞌ laa Nwi shìa nsɔꞌ tɔ shɨ kɔ́ faŋ vəŋ nə yɨnə viŋ nə.»
21Nshiiŋii Nwi yimɔ́ꞌ kɨ nii shàꞌ nshɨ-ŋoꞌ nee yaa yiti bee, mɔ̀ꞌ taa mamuu, gì laa, «Vɨ ndɔ mɔꞌ shɨ Babilɔn sheꞌ nee nə wutə, ŋkə ndi, wə kee baa ye ŋkə me. 22Vɨ kee ndɔ baa zɔ gɨ mbuꞌsə ndəə taa shɨ yɔ́ me, tɨꞌnə me vɨɨ məzwa nyaysə, tɨꞌnə me vɨɨ mətaw ndaw, tɨꞌnə me vɨɨ mətaw təsaw. Vɨ kee baa yè vɨɨ məshwətə vətɔ me, tɨꞌnə me zɔ gɨ yiti bee yə me. 23Kiꞌ kee ndɔ baa bee shɔ me, gɨ wəndɔŋ məndaa nə wəzwi məndaa kee ndɔ baa luu shɔ me. Nsɔꞌ Nwi jia shɨ kɔ́ buꞌ laa vɨɨ məbeꞌlə yiwiŋ fɨ shɨ yɔ́ nə luu vəshɨꞌ fɨ taa mbi. Shɨ kɔ́ nə bweꞌsə mbi yinshə nə mfi yi. 24Mənshi mə nshiisə-ŋii sɔghɔ, nə mənshi mə vɨɨ Nwi, nə mənshi mə vɨɨ vənshə, faŋ vɨ nə zwìlə vəŋ taa mbi, vɨ nə tu sheꞌ taa shɨ yɔ́.»
19Faŋ məŋaytə lùu yizɔ, buꞌ faŋ Nwi shìa nsɔꞌ tɔ shɨ Babilɔn
1Yiŋkii kɨ shɔɔ, mə zɔ gɨ yimɔ́ꞌ yaa gɨ vɨɨ vəyaŋ fɨ yizɔ, gi ŋkee nəŋay. Vəŋ gi laa, «Nsiŋ kɨ bəŋsə Nwi ŋwaa-nsiŋ faŋ ŋwə yaa kɨ bweysə vɨɨ, baa bàw shɨlə, ndɔ weꞌ nɨzi. 2Ŋwə shia nsɔꞌ maa jɨɨ yinsəŋ, nyə loomə nɨzi. Ŋwə kwàŋ nsɔꞌ maa wəzwi ŋgwə faŋ ŋwə nəə toꞌ vəsakə dɨdɨꞌ nə, bɨsə mbi nə nu vəsakə ki. Nwi baa kwàŋ ŋwə taa nsɔꞌ buꞌ laa ŋwə nəə zwilə vɨɨ faꞌ Nwi.»
3Vəŋ baa kɨ gì laa, «Məbəŋsə lùu tɨ́ Nwi buꞌ fəndɨꞌ faŋ mfə fuu fɨ maa wisə ŋgwə faŋ ŋwə twaŋ shɨ kwalə kɔ́ nə. Mfə koꞌ yizɔ yighee muꞌ, ki kee lùu shɔ me.»
4Vɨɨ taa vɔ́ njɔsə-yishwe muu-mbɔɔ nə, nə vətɔ vəbweyvə vɔ́ yishwe nə, nɔŋ nsi, bə̀ŋsə Nwi faŋ ŋwə dùꞌ fuu kenə ki, gì laa, «Lùu nɨniŋ, nsiŋ kɨ bəŋsə Nwi!» 5Gɨ wə gi fɨ fuu kenə kɔ́ laa, «Viŋ bəŋsə Nwi ŋwaa-nsiŋ, viŋ vəbuꞌ və Nwi vənshə, faŋ viŋ fee ŋwə nə, viŋ vɨɨ tɨtiꞌ nə vɨɨ kwalə.»
6Mə baa zɔ̀ gɨ yimɔ́ꞌ yaa nwaa vɨɨ vəyaŋ, luu yaa muu məyaŋmə, baa nə yaa məbwələ yibay, vəŋ gi laa, «Nsiŋ kɨ bəŋsə Nwi, buꞌ laa tɨta Nwi Nshɔɔ-mbi, faŋ lùu Nwi ŋwaa-nsiŋ nə, tey kɨ sɔꞌ mbi. 7Nsiŋ kɨ ŋaytə, shɨꞌ, bəŋsə yizii yi, buꞌ laa yighee məndaa wee-bi-njɨɨ kùꞌ, zu wi duꞌtə ŋwə lootə ŋwaa wi. 8Vɨ kɔ njwi yifusə faŋ nyə ley, kɨ ndwaꞌlə tɨ́ ŋwə, ŋwə mɔꞌ.» Njwi yifusə yɔ́ lùu nu ŋkɨə faŋ vɨɨ Nwi nə yɨ̀sə, ŋkə loomə. 9Nshiiŋii Nwi yɔ́ gi tɨ́ mə laa mə nyɔꞌ laa, «Mənɔŋ-bwaŋnə lùu tɨ́ vɨɨ mbɨə faŋ Nwi tii vəŋ maa yitianə wee-bi-njɨɨ yɔ́,» baa kɨ gì laa, «Luu ŋkee yigisə Nwi yinsəŋ nə.» 10Mə gu ghuu ŋwə maa məbəŋsə ŋwə. Ŋwə gi shee laa, kɨ mə yɨ nɨniŋ me, laa yi lùu wuu faꞌ Nwi yuu mə, baa nə yaa vaŋ-nshwi vaŋ, faŋ vəŋ fɨꞌtə nu Yeso nə, baa nə laa mə kɨ bəŋsə luu nshɨ-tɔ Nwi. Nu məfɨꞌtə nu Yeso lùu nu Zwitə Ley Nwi faŋ ŋkə kwaŋ yigisə shuu Nwi taa fwisə vɨɨ.
Faŋ Kristo ndɔ jwi ndisə vɨɨ ntɔŋ tɨɨ vəzwitə vəbwəvə
11Mə kɨ nii yè yizɔ ŋaꞌnə, baa yè nyaa-yikoꞌ yifusə shɔ, nə wə mɔ́ꞌ fuu yi. Yizii wə ghɔ́ faŋ ŋwə nə kòꞌ fuu nyaa yɔ́ nə, lùu «Yinsəŋ». Ŋwə sɔꞌ nsɔꞌsə vɨɨ səloomə, ndɔ tùŋ yighaw yiloomə. 12Sɨ ghi luu yaa wisə biinə. Ŋwə bee təsɔꞌ tə vəfwàŋ tɔ ŋwə təyaŋ, vɨ nyɔꞌ yizii yi shɔ faŋ kaꞌ tuu wə kee kɨɨ me, kɨɨ sheꞌ ŋwə. 13Ŋwə mɔ́ꞌ njwi faŋ vɨ shù taa mənshi. Vɨ tii yizii yi laa «Yigisə-Nwi». 14Shuu yighaw nshiisə-ŋiisə Nwi beꞌsə ŋwə, koꞌ fuu nyaasə-koꞌsə səfusə, mɔ̀ꞌ njwisə faŋ nsə fù laa buu, baa ley. 15Baꞌ yighaw shəsə fuu fɨ shuu ŋwə, tɨ́ kaꞌ ŋwə ghɔ̀ꞌ mbi shɔ. Ŋwə taa kɨ sɔꞌ mbi nə mbay bwey, kaŋ vətaŋ və məluꞌ taa yibɨɨ məkaŋ məluꞌ njyə faŋ Nwi Nshɔɔ-mbi jìa vɨɨ bwənə shɔ nə fwi yishəsə yi. 16Vɨ nyɔꞌ maa njwi yi maa yiŋii yi laa, «Fwàŋ vəfwàŋ, nə Tɨɨ vɨɨ məsɔꞌ mbi.»
17Mə baa yè nshiiŋii Nwi yimɔ́ꞌ, ŋwə tɨŋ taa shɨshwi, yùmə ŋkee nəŋay tɨ́ mənwə faŋ mbə vɨɨlə fɨ nɨntəŋ yizɔ laa, «Viŋ baytə jwi feenə maa shəŋ ŋkɨə faŋ Nwi taa tia viŋ nə vətɔ vəyaŋvə nə. 18Viŋ taa kwə mbasə ŋwaa vəfwàŋ, nə mbasə ŋwaa vətɨɨ vəsogeꞌ, nə mbasə ŋwaa vɨɨ weꞌnə, nə mbasə nyaasə-koꞌsə nə vɨɨ məkoꞌ nsə, nə mbasə ŋwaa vaŋ shɨ vənshə nə mbasə ŋwaa vəbuꞌ, nə ŋgwə vɨɨ tɨtiꞌ nə ŋgwə vɨɨ kwalə.» 19Mə baa ye nyaa yɔ́ ghɔ vəfwàŋ fɨ mbi nə shuu yighaw vəŋ, tɨ́ vəŋ shəŋtə maa məgə yighaw maa wuu nyaa-yikoꞌ wì ghɔ shuu yighaw wi. 20Vɨ jia nyaa yɔ́, baa jìa wuu məsɨɨ təba wì faŋ ŋwə nəə naysə vəshwenə və shuu yɔŋvə vɨsɨ ŋwə, bweꞌsə vɨɨ shɔ nə, mbɨə faŋ vəŋ nə kìi shwenə nyaa yɔ́, nə vɨɨ mbɨə faŋ vəŋ nəə bəŋsə fənyia fə nyaa yɔ́ nə. Vɨ ndi nyaa yɔ́, ghɔ wuu ntɔŋ wi, vəbwey, mɔ̀ꞌ taa shəŋ wi kwalə faŋ ŋwə kɨɨ, lumə ki zwilə vɨɨ. 21Vɨ zwilə bətə vɨɨ nə baꞌ yighaw ŋkɨə faŋ ŋkə fuu fɨ shuu wuu məkoꞌ nyaa-yikoꞌ ghɔ́ nə. Mənwə mənshə zwə fɨ maa mbasə vəŋ.
20Faŋ vɨ ka tɨɨ vəzwitə vəbwəvə taa wee-nsi-yibay, vɨɨ Kristo sɔꞌ mbi maa ŋuꞌ ŋkaŋ
1Mə kɨ nii yè nshiiŋii Nwi yimɔ́ꞌ siꞌ jwì fɨ yizɔ nə ŋkwa wee-nsi-yibay nə sumə dɨɨ ghɔ ŋwə. 2Ŋwə jwi jìa zɔ-ŋgu-yibay faŋ lùu zɔ yimwa yì, baa lùu Satan, tɨɨ vəzwitə vəbwəvə, ka ŋwə maa ŋuꞌ ŋkaŋ, 3mɔ̀ꞌ ŋwə taa wee-nsi-yibay, fəŋ shuu wi, tə̀ lay fuu yi, laa kɨ ŋwə ndɔ baa kɨ bweꞌsə vɨɨ me, gə ziꞌ tɨ́ yighee njyə faŋ ŋuꞌ ŋkaŋ yɔ́ ndɔ mè. Ŋuꞌsə sɔ́ ndɔ mè, vɨ baa kèꞌtə ŋwə, ŋwə fuu dùꞌnə maa wee-fɨ-kuŋtə yighee tɨtiꞌ.
4Mə baa yè yiley vəŋkaw və məsɔꞌ mbi. Vɨɨ fuu dùꞌ fuu vəŋkaw vɔ́, Nwi nuŋ vəŋ maa vɨɨ məshia nsɔꞌsə. Mə kɨ nii yè vəŋku və vɨɨ mbɨə faŋ vɨ nə shètə yitɔ yivəŋ, buꞌ faŋ vəŋ nə biŋ nu Kristo ntee, baa fɨꞌtə nu Nwi tɨ́ vɨɨ nə. Nə luu vəŋku və vɨɨ mbɨə faŋ vəŋ nə kee bə̀ŋsə nyaa yì nə fənyia fi me, kee biŋ laa vɨ shwey ŋgwia vəŋ mbootɔ vəŋ me, tɨꞌnə me ghɔ vəŋ me. Vəŋ ywey, kɨ sɔꞌ mbi ghɔ vɨ Kristo ŋuꞌ ŋkaŋ. 5Bətə vəŋku və vɨɨ kee ta ywey me, gə kɔ tɨ́ yighee njyə faŋ ŋuꞌ ŋkaŋ yɔ́ shɔ̀ɔ. Luu mfɔŋ məyweysə vɨɨ fɨ shɨ yiku. 6Mənɔŋ-bwaŋnə tɨ́ wə ntɨə faŋ ŋwə ndɔ ywey maa yighee yɔ́, ghɔ vɨ vɨɨ vɨsɨ nə, ŋwə luu ŋkee wuu Nwi. Yiku lwesə ghee bɔɔ kee ndɔ jia vɨɨ vɔ́ me, vəŋ ndɔ kɨ feꞌ Nwi nə Kristo, ghɔ vɨ Kristo kɨ sɔꞌ mbi maa ŋuꞌ yɔ́ ŋkaŋ nə.
Faŋ Satan ndɔ baa fuu, vɨ mɔꞌ ŋwə taa wi
7Ŋuꞌ ŋkaŋ yɔ́ ndɔ me, vɨ keꞌtə Satan, ŋwə fuu fɨ taa ŋii mfiŋ ŋwə, 8fùu gə̀, kɨ bweꞌsə vɨɨ fɨ maa vəlɨ və mbi yishwe, bweꞌsə ŋkee Gɔg ghɔ Magɔg, shə̀ŋtə vəŋ maa yighaw. Nwaa vəŋ luu ŋkee yaŋ yaa waꞌsə fɨ taa mamuu. 9Vəŋ koꞌ shɨ nsi, kìa nwaa vɨɨ Nwi, nə shɨ ŋkɨə faŋ Nwi kaw. Wisə kɨ nii fùu fɨ yizɔ, ndìsə vəŋ. 10Vɨ mɔꞌ tɨɨ vəzwitə vəbwəvə, faŋ ŋwə nə bwèꞌsə vɨɨ vɔ́ nə, taa shəŋ wisə kwalə, faŋ ŋwə kɨɨ, lumə ki zwilə vɨɨ nə, maa shəŋ ŋkɨə faŋ nyaa yi ghɔ wuu məsɨɨ təba wi lùu shɔ nɨzi nə. Vəŋ ye ŋɨꞌ shɔ vətuꞌ nə shɨshwi maa vəshi və mbi vənshə, ki kee ndɔ luu shɔ me.
Nu nsɔꞌ maa yighee vəshə
11Mə baa kɨ nii yè kenə kwalə kəfusə nə wə faŋ ŋwə dùꞌ fuu yi, nsi nə yizɔ nyɨŋ fɨ yikəꞌ ŋwə. Shəŋ nə kee baa lùu shɔ, tɨ́ kaꞌ nsi ghɔ yizɔ dùꞌ shɔ me. 12Mə kɨ nii yè vəŋku vənsisə vəkwalə nə vətiitə, vəŋ tɨŋ vɨsɨ kenə kɔ́. Vɨ ŋaꞌsə vəŋwaꞌlə, baa ŋaꞌsə ŋwaꞌlə mɔ́ꞌ faŋ lùu ŋwaꞌlə məbwey vəlwaŋ. Vɨ sɔꞌ vəŋku vənsisə maa nu ŋkɨə faŋ vəŋ nə yɨ̀sə, faŋ vɨ nə nyɔ̀ꞌ taa vəŋwaꞌlə vɔ́. 13Nɨniŋ, mamuu bəŋsə vəŋku və vɨɨ faŋ mbə lùu tey yi nə. Yiku baa nə shɨ yiku bəŋsə vɨɨ mbɨə faŋ mbə lùu taa ghɔ vəŋ. Vɨ sɔꞌ vənu və vɨɨ faŋ vəŋ nəə yɨsə tɔ tɔ, 14kɨ nii mɔ̀ꞌ yiku ghɔ shɨ yiku taa shəŋ wi kwalə. Lùu məku faŋ wə ndɔ ku lwesə ghee bɔɔ taa shəŋ wi ghɔ́. 15Wə tɨ̀ me wə faŋ vɨ nə kee nyɔ̀ꞌ yizii yi taa ŋwaꞌlə məbwey vəlwaŋ me, vɨ mɔꞌ ŋwə taa wi yɔ́.
21Nu yizɔ yifinə ghɔ nsi yifi
1Mə kɨ nii yè yizɔ yifinə nə nsi yifi fuu, tɨ́ yizɔ njyə vɨsɨ nə nsi njyə vɨsɨ yaa shɔ̀ɔ nə, mamuu nɨzi kee baa lùu shɔ me. 2Mə baa yè shɨ ley Nwi, faŋ lùu shɨ Jerusalem kəfikə. Ŋkə siꞌ jwi fɨ yizɔ fɨ ghɔ Nwi, tɨ́ vɨ la ŋkə yaa vɨ yaa kɨ la wəzwi məndaa, buu kɔ̀ tɨ́ ndəə wi. 3Mə zɔ gɨ wə gi fɨ fuu kenə kɔ́ nəŋay laa, «Viŋ ye vəbee və Nwi taa ŋwaa vɨɨ. Nwi ndɔ kɨ shi taa ŋwaa vəŋ, vəŋ luu ŋgwisə vɨɨ vi. Ŋkee nshɨ-tɔ Nwi lùu ghɔ vɨ vəŋ, 4tɔ̀ŋsə mənsɨ fɨ sɨ vəŋ. Yiku kee baa lùu shɔ me. Məluŋ nə yigwia nə ŋɨꞌ kee baa lùu shɔ me, buꞌ laa mbi yimwa shɔ̀ɔ.» 5Wə ntɨə faŋ ŋwə nə dùꞌ fuu kenə məsɔꞌ mbi nə, gì laa, «Mə yɨ̀sə vənu vənshə gu vəfi,» baa gì shee laa mə nyɔꞌ vənu vɔ́ taa ŋwaꞌlə buꞌ laa mbə lùu vəbi, baa luu ŋkee nu yinsəŋ. 6Ŋwə nə baa gì shee laa, «Ŋkə gay nɨniŋ. Gì mə nɨniŋ, faŋ mə lùu vɨsɨ, nə yiba. Mə lùu vənzi, baa lùu vəndwə. Mə taa kɨ kɔ muu mə məbwey faŋ mbə fuu fɨ taa koꞌ-fɨ-nsi, tɨ́ wə faŋ fwi yi yɔ̀ŋ. Mə kɔ muu mbɔ́ sheꞌ dayday. 7Wə ntɨə faŋ ŋwə jìa fwi yi, twèꞌ maa nu Kristo, buu ŋwə ndɔ ndi fɨ maa muu mbɔ́. Mə kɨ nii luu Nwi wi, ŋwə luu ŋwiŋ ŋwaa. 8Gə̀ fɨ maa vɨɨ mbɨə faŋ vəŋ nyɨŋkə, baa twey nu Kristo, nə vɨɨ məyɨ vənu vəbwəvə, nə vɨɨ məzwilə vɨɨ, nə vɨɨ mətii vəki, nə vɨɨ vəfɔ vəbwəvə, nə vɨɨ məbiŋ vənwi vədayday, nə vɨɨ təba vənshə, shəŋ vəŋ luu shəŋ ŋkɨə faŋ wisə bii fɨ fuŋ, lumə ki zwilə vɨɨ, faŋ lùu shəŋ yiku lwesə ghee bɔɔ.»
Nu shɨ Jerusalem fi
9Nshiiŋii Nwi yimuꞌ fɨ taa ŋwaa nshiisə-ŋiisə Nwi kwatia, faŋ nsə nə kìi vəkay və ŋɨꞌ kwatia nə, jwi yɨ mə, gì laa, «Jwi feenə, mə də wəzwi məndaa wee-bi-njɨɨ ghɔ́ tɨ́ ghɔ.» 10Ŋwə ndi fwi nyaa, gə̀ nə nyə fuu baŋ yimɔ́ꞌ nee yidə, də̀ shɨ Jerusalem faŋ lùu shɨ Nwi kəkwalə nə shee. Ŋkə siꞌ jwì fɨ ghɔ Nwi yizɔ, 11nɨndwaꞌlə yaa Nwi ndwaꞌlə ŋkee yaa wey faŋ shwaŋ wi luu ŋkee ndɔŋ, bee ndɔ ley twenə. 12Ŋkee ŋkɔꞌ yikwalə faŋ vɨ nə bɔ̀ŋ nə təley tə ŋoꞌsə, kìa shɨ kɔ́. Yishuu təley tə ŋoꞌsə sɔ́ luu njɔsə-bɔɔ. Nshiisə-ŋiisə Nwi njɔsə-bɔɔ tɨŋ fuu yishuu yifwə yɔ́ njɔsə-bɔɔ nə. Vɨ nyɔ̀ꞌ təzii tə vɨɨ yikuu Isirayl njɔsə-bɔɔ maa təshuu təŋkɔꞌ tɔ́. 13Maa lɨ kəmuꞌ təshuu luu shɔ tətia, tətia fɨ ntɔŋ-shɨshwi, tətia yikwii-təŋ, tətia yikwii-kwi, tətia mfiŋ-shɨshwi. 14Vɨ bɔ̀ŋ mfaysə ŋkɔꞌ yɔ́ nə ŋoꞌsə njɔsə-bɔɔ, faŋ vɨ nyɔ̀ꞌ təzii tə vɨɨ ntɔŋ bi-njɨɨ yɔ́ mbɨɨ yi.
15Nshiiŋii Nwi njyə faŋ nyə nə gì shee nə, kii fəntɨ fə mfɨꞌ fɨ goolə ghɔ ŋwə, maa məfɨꞌ shɨ kɔ́, nə yishuu yi nə mbɨɨ si. 16Shɨ kɔ́ luu ŋgɔŋsə yishwe maa yibuŋ yi, kwiŋ muꞌ kee shɔ̀ɔ kwiŋ mɔ́ꞌ me. Nshiiŋii Nwi yɔ́ fɨꞌ shɨ kɔ́ nə fəntɨ fə mfɨꞌ fi fɔ́, shɨ kɔ́ də̀ vəkilomita ŋkaŋsə bɔɔ nə yiwa yishwe. Mədə wi nə məgha wi nə tɨ wi luu sheꞌ nɨndɨŋ. 17Nshiiŋii Nwi yɔ́ baa fɨ̀ꞌ yiley ŋoꞌsə yɔ́ faŋ nyə nə kìa shɨ kɔ́ nə. Nyə luu kwiŋ njɔsə-yishwe muu-yinshwe maa mədə wi, faŋ vɨ fɨ̀ꞌ nə mfɨꞌ vɨɨ. Mfɨꞌ nshiisə-ŋiisə Nwi luu sheꞌ nɨndɨŋ. 18Vɨ bɔŋ ŋkɔꞌ yi yɔ́ nə ŋoꞌsə jəəsə faŋ vɨ tii nə jasper, bɔ̀ŋ shɨ kɔ́ nə goolə, faŋ ŋwə lèy yaa ŋwaꞌlə məye sɨ. 19Vɨ nə bɔ̀ŋ ŋkɔꞌ yɔ́ fuu ŋkee ŋoꞌsə faŋ nsə nɨndwaꞌlə, baa luu taŋ taŋ. Yizii mfɔŋ ŋoꞌ luu jasper, yimɔ́ꞌ faŋ nyə beꞌsə luu safia, lwesə vətia luu kalsedon, lwesə yishwe luu imeral, 20lwesə tee luu onis, lwesə ntɔfə luu kanelian, lwesə kwatia luu krisolit, lwesə yifɔŋ luu beril, lwesə buumuꞌ luu topas, lwesə yighuŋ luu krisopras, lwesə njɔ-yimuꞌ luu jasint, lwesə njɔsə-bɔɔ luu ametis. 21Yishuu yɔ́ njɔsə-bɔɔ nə, luu wey njɔsə-bɔɔ. Shuu tɨ̀ me shuu vɨ taw fɨ maa yiwey yimuꞌ. Jɨɨ fɨ taa shɨ yɔ́ luu goolə, lèy yaa ŋwaꞌlə məye sɨ. 22Mə kee yè ŋii Nwi taa shɨ yɔ́ me, buꞌ laa nshɨ-tɔ Nwi, tɨta Nshɔɔ-mbi lùu taa ŋwaa vəŋ, ghɔ bi-njɨɨ yɔ́. 23Shɨ kɔ́ kee baa kəə shɨshwi, tɨꞌnə me ŋuu, maa məbee me, buꞌ laa feenə Nwi bee shɔ. Bi-njɨɨ yɔ́ luu kiꞌ wi. 24Vɨɨ tətɔŋ fu toꞌ ye vədɨꞌ buꞌ məley wi. Vəfwàŋ fɨ shɨ nsi jwi nə yifwàŋ vəŋ sheꞌ tɨ́ shɨ kɔ́. 25Yishuu yiŋkɔꞌ fɨ shɨ yɔ́ tɨŋ zizi nə shɨshwi, vɨ kee fɨfay me, buꞌ laa fu vətuꞌ kee baa lùu shɔ me. 26Vɨɨ tətɔŋ fu jwi nə yikwalə vəŋ, baa nə feenə vəŋ tɨ́ shɨ kɔ́. 27Tuu fa faŋ ŋkə kee lùu kəley me, kee ŋìi taa shɨ yɔ́ me, tɨꞌnə me wə faŋ ŋwə yɨsə vənu vəbwəvə, tɨꞌnə me sɨɨ təba me. Ndɔ ŋii sheꞌ vɨɨ mbɨə faŋ təzii təvəŋ lùu taa ŋwaꞌlə məbwey vəlwaŋ faŋ ŋwə lùu ghɔ bi-njɨɨ yɔ́ nə, ŋii taa shɨ yɔ́.
22Muu mə məbwey vəlwaŋ faŋ mbə ndɔ fɨ ghɔ Nwi
1Nshiiŋii Nwi yɔ́ baa də̀ muu mə məbwey shee, mbə nə fùu fɨ maa kenə Nwi ghɔ bi-njɨɨ yɔ́, ndwaꞌlə yaa ŋwaꞌlə məye sɨ, 2siꞌ shɔɔ fɨ nɨntəŋ jɨɨ yikwalə shɨ yɔ́. Maa kwiŋ tɨ̀ me kwiŋ fɨ mbɨɨ muu yɔ́, vətɨ və məbwey luu shɔ, faŋ vətaŋ koonə fuu yi ghee njɔsə-bɔɔ taa ŋuꞌ, yighee muꞌ taa ŋuu, vəvi və tɨ vɔ́ luu maa məshuꞌ vəza fɨ maa vɨɨ tətɔŋ fu. 3Kaꞌ a kee yè tuu ŋkee fa faŋ Nwi kee yikaw me taa shɨ yɔ́ me. Kenə Nwi ghɔ bi-njɨɨ yɔ́ lùu taa shɨ yɔ́, vɨɨ faꞌ vi bəŋsə ŋwə. 4Vəŋ ye yikəꞌ yi. Vɨ nyɔ̀ꞌ yizii yi mbootɔ vəŋ. 5Fu vətuꞌ kee lùu shɔ me. Vɨ kee kəə təkiꞌ me, tɨꞌnə me shɨshwi, buꞌ laa tɨta Nwi bee yaa kiꞌ tɨ́ vəŋ. Vəŋ sɔꞌ mbi yaa vəfwàŋ ghee nshə, kee kìi ki me.
Faŋ nə tɔ̀ŋ nshɨ-tɔ Yeso tɔ̀ŋ nshiiŋii Nwi maa Jɔn maa mənaysə vənu vɔ́ tɨ́ ŋwə
6Nshiiŋii Nwi yɔ́ baa kɨ gi shee laa, «Yigi nyə̀ luu ŋkee yinsəŋ. Tɨta Nwi faŋ ŋwə kɔ̀ Zwitə ki tɨ́ nshiisə-ŋii sɔghɔ, tɔ̀ŋ nshiisə-ŋiisə si maa mədə nu ŋkɨə faŋ ŋkə ndɔ yasə gay. 7Viŋ zɔ! Yeso gì laa yi taa yasə jwi. Mənɔŋ-bwaŋnə lùu tɨ́ vɨɨ mbɨə faŋ vəŋ nùŋsə yigisə shuu Nwi yɔ́ fɨ taa ŋwaꞌlə ŋwə̀.»
8Luu mə, Jɔn, faŋ mə yè, baa zɔ̀ vənu və̀ vənshə. Yighee njyə faŋ mə nə zɔ̀ vənu vɔ́, baa yè mètə, mə kɨ nii gù ghuu nshiiŋii Nwi yɔ́ faŋ ŋwə nə də̀ vənu vɔ́ shee nə, bə̀ŋsə ŋwə. 9Luu nə, ŋwə gi shee laa, kɨ mə yɨ me, baa nə laa yi lùu wuu faꞌ Nwi yaa mə, nə yaa vaŋ-nshwi vaŋ, faŋ vəŋ luu nshiisə-ŋii sɔghɔ, nə vɨɨ vənshə faŋ vəŋ nùŋsə yigi nyə̀ fɨ taa ŋwaꞌlə ŋwə̀, baa nə laa, bàw mə kɨ bəŋsə luu Nwi.
10Ŋwə nə baa gì laa, kɨ mə ndɨə yigi yɔ́ fɨ taa ŋwaꞌlə ŋwə̀ me, buꞌ laa yighee lùu nshənə faŋ vənu vɔ́ taa gay. 11Kaꞌ wə faŋ ŋwə yɨsə vənu vəbwəvə, kɔꞌ kɨ yɨyɨsə vənu vəbwəvə. Wə ntɨə faŋ ŋwə bɨ̀ dɨdɨꞌ, toꞌ sheꞌ maa jɨɨ yi. Luu nə, wə faŋ ŋwə yɨsə vənu vəjəəvə, kɔꞌ kɨ yɨyɨsə sheꞌ vənu vəjəəvə. Wə ntɨə faŋ ŋwə lùu wuu loomə, taa goꞌ loomə. Wə ntɨə faŋ ŋwə lùu wuu jəə tɨ́ Nwi, bàw mètə. 12Yeso gì laa, «Viŋ zɔ! Mə taa yasə jwi, kɨ jwi, jwì nə vəkeynə ghɔ mə, maa məkɔ tɨ́ vɨɨ vənshə maa vəfaꞌ vəvəŋ. 13Mə lùu vənzi baa lùu vəndwə, lùu wuu vɨsɨ nə wuu yiba, baa lùu mətey nə məmetə. 14Mənɔŋ-bwaŋnə tɨ́ vɨɨ mbɨə faŋ vəŋ sɔ̀ njwisə vəŋ, nsə ley, tɨ́ kaꞌ vəŋ kìi wutə maa məkwə fɨ maa vətaŋ tɨ və məbwey, baa nə maa məshɔɔ fɨ shuu ŋkɔꞌ, ŋìi taa shɨ yɔ́. 15Vɨɨ mbɨə faŋ vəŋ lùu fu fɨ taa ŋkɔꞌ, lùu vɨɨ bwənə, nə vɨɨ ŋay, nə vɨɨ mətii vəki, nə vɨɨ məzwilə vɨɨ, nə vɨɨ faŋ vəŋ bəŋsə vənwi vədayday, nə vɨɨ təba, faŋ vəŋ kàw təba, baa yɨsə nu təba.»
16«Lùu mə, Yeso, faŋ mə tɔ̀ŋ wuu ntɔŋ ŋwaa maa mənaysə vənu vɔ́ tɨ́ vɨɨ fɨ taa vəməshəŋtə və vɨɨ Nwi. Mə lùu wuu ŋiꞌ ŋiinə fwàŋ Deyvid, baa lùu fəjwiŋ fɨ taa nshia-ndoo-mbisɨ.» 17Zwitə Ley Nwi nə wəzwi məndaa (faŋ ŋwə kɨꞌ Kristo nə), gì laa, «Jwi!» Wə ntɨə faŋ ŋwə zɔ, taa baa luu gì laa, «Jwi!» Wə ntɨə faŋ too muu ywèy ŋwə, ŋwə jwi. Wə ntɨə faŋ ŋwə kəə muu mə məbwey, jwi fi, vɨ kɔ tɨ́ ŋwə dayday.
18Mə Jɔn, faŋ mə nyɔ̀ꞌ ŋwaꞌlə ŋwə̀, tɨsə vɨɨ vənshə faŋ vəŋ zɔ yigisə shuu Nwi nyə̀ fɨ taa ŋwaꞌlə ŋwə̀, laa wə kɨ luu kùꞌsə nu shɔ, buu Nwi ndɔ kuꞌsə ŋɨꞌ tɨ́ wə ghɔ́, sheꞌ yuu njyə faŋ vɨ nyɔ̀ꞌ nàysə taa ŋwaꞌlə ŋwə̀ nə. 19Kɨ luu wə fuusə nu fɨ taa yigisə Nwi faŋ vɨ nyɔ̀ꞌ nə, buu Nwi ndɔ fuusə ŋwə fɨ maa vətaŋ vi fɨ fuu tɨ məbwey, fùusə ŋwə fɨ taa shɨ yɔ́, faŋ lùu shɨ ley tɨ́ Nwi nə, shìa ŋwə nɨniŋ fɨ maa nu jəə ŋkɨə faŋ vɨ nyɔ̀ꞌ taa ŋwaꞌlə ŋwə̀ nə. 20Wə ntɨə faŋ ŋwə fɨꞌtə nu kɔ́ ntee, gì laa, «Yinsəŋ, mə taa yasə jwi.» Luu sheꞌ nɨniŋ. «Tɨta Yeso, jwi!»
21Tɨta Yeso tu mənɔŋ-bwaŋnə tɔ viŋ vənshə!