Ŋwaꞌlə Filipi
Ŋwaꞌlə Pɔɔl tɨ́ vɨɨ Nwi fɨ ntɨꞌ Filipi
Nshəŋtə vɨɨ Kristo fɨ ntɨꞌ Filipi nə luu mfɔŋ nshəŋtə vɨɨ Kristo fɨ shɨ Masedonia fɨ nsi Yurɔp. Pɔɔl nə nyɔ̀ꞌ ŋwaꞌlə ŋwə̀ yighee njyə faŋ ŋwə nə luu taa ŋii mfiŋ buꞌ nu Nwi. Pɔɔl nəə kaw vɨɨ Filipi dɨdɨꞌ, luu nə, fwi yi nəə ghaysə ŋwə buꞌ laa vɨɨ mɔ́ꞌ nə jwi Filipi, kee kɨ deesə nu Kristo jəə tɨ́ vəŋ me. Ŋwə kəə weꞌsə vəŋ maa nu Kristo. Bàw vəŋ lùu yaa Kristo. Nu Kristo lùu nu məŋaytə. Pɔɔl baa bwàŋ vəŋ maa vəkɔ faŋ vəŋ nə tɔ̀ŋ tɨ́ ŋwə.
Məsenə vəwaytə:
Vənzi vəŋwaꞌlə 1.1-11
Pɔɔl fɨꞌtə vənu vi 1.12-26
Nshinə vɨɨ Kristo 1.27–2.18
Pɔɔl kəə tɔŋ Timoti nə Epafroditɔs 2.19-30
Bàw mətoꞌ fɨ maa jɨɨ yijəə 3.1-19
Vɨɨmba Pɔɔl fɨ shɨ Filipi 4.10-20
Vəndwə və ŋwaꞌlə 4.21-23
1Faŋ Pɔɔl nə shɔ̀ꞌtə vɨɨ Nwi fɨ ntɨꞌ Filipi
1Lùu mə, Pɔɔl, nə Timoti, faŋ yia lùu vɨɨ faꞌ Yeso Kristo nə, faŋ yia tɔ̀ŋ ŋwaꞌlə ŋwə̀ tɨ́ vɨɨ ley Nwi fɨ ntɨꞌ Filipi. Yia shɔꞌtə vɨɨ taa fɨ taa ŋwaa viŋ, nə vɨɨ mbɨə faŋ vəŋ lùu vətɔ viŋ, baa shɔꞌtə viŋ vənshə, faŋ viŋ lùu vɨɨ ley Nwi buꞌ Yeso Kristo. 2Nwi, tii ŋwaa-nsiŋ, ghɔ tɨta Yeso Kristo tu mənɔŋ-bwaŋnə tɔ viŋ, kɔ viŋ nə məduꞌ-nyɔŋ.
Faŋ Pɔɔl nə shɔ̀ꞌtə Nwi tɔ vɨɨ Filipi
3Yighee tɨ̀ me yighee faŋ mə lùmə viŋ, mə bwaŋ Nwi ŋwaa buꞌ viŋ. 4Ghee nshə faŋ mə shɔꞌtə Nwi tɔ viŋ, mə shɔꞌtə ŋwə tɔ viŋ vənshə nə məŋaytə, 5buꞌ laa viŋ nəə beꞌsə mə maa faꞌ yigisə Nwi, shù fɨ́ maa yighee njyə faŋ viŋ nə fɔŋ zɔ ntɔŋ yijəə Nwi, jwi kɔ tɔ və-ndee. 6Mə kɔꞌ kɨɨ ŋkee maa yinsəŋ laa Nwi, faŋ ŋwə duꞌtə ŋwə tey kɨ faꞌ faꞌ wi taa fwisə viŋ, ndɔ kɨ faꞌ taa fwisə viŋ, gə kɔ tɨ́ shi ŋkɨə faŋ Yeso Kristo ndɔ bəŋ jwi. 7Ŋkə lùu kəloomə laa mə kìi kəŋ məlumə ŋwə̀ kɔ̀ŋ viŋ vənshə, buꞌ laa mə kaw viŋ fɨ taa fwi mə. Mənɔŋ-bwaŋnə ŋgwə faŋ Nwi nə kɔ shee nə, ŋwə kɔ tɨ́ viŋ nɨzi, faŋ mə kɔlə lùu taa ŋii mfiŋ, tɨꞌnə me, tɨ̀ŋnə taa ŋii nsɔꞌ, fɨꞌtə nu kɔ̀ŋ yigisə Nwi, baa də laa yigisə Nwi lùu yigisə yinsəŋ. 8Nwi kɔꞌ kɨɨ yinsəŋ laa ŋkawnə njyə faŋ mə kìi nyə maa viŋ vənshə, ndɔ̀ fɨ ghɔ Yeso Kristo. 9Nɨniŋ, mə shɔꞌtə Nwi tɔ viŋ laa viŋ kɨ kaw yiŋwaa yiŋ, viŋ viŋ, gə vɨsɨ vɨsɨ, kɨɨ nə Nwi nə nu jəə. 10Mə shɔꞌtə Nwi tɔ viŋ nɨniŋ, tɨ́ kaꞌ viŋ shòꞌ nu ŋkɨə faŋ luu nu jəə fɨ maa vənu vənshə. Nɨniŋ, viŋ ndɔ luu ŋkee vɨɨ ley faŋ vənu vəvəŋ lùu vəloomə maa shi ŋkɨə faŋ Kristo ndɔ baa bəŋ jwi taa mbi nə. 11Vənu vəjəəvə ndɔ lwaŋ taa ŋwaa viŋ, viŋ kii nshinə yijəə faŋ nyə ndɔ̀ fɨ ghɔ Yeso Kristo. Nɨniŋ, vɨɨ ye yikwalə Nwi fɨ fuŋ, bəŋsə ŋwə.
Faŋ Pɔɔl nə fɨ̀ꞌtə vənu vi faŋ ŋwə ŋìi taa ŋii mfiŋ buꞌ nu Kristo, luu nə, kìi məŋaytə
12Vaŋ-nshwi vaŋ, bàw viŋ kɨɨ nə vənu mbɨə faŋ mbə nə gày maa mə feenə. Vɨ kwàŋ mə taa ŋii mfiŋ, luu nə, nu kɔ́ yɨsə sheꞌ laa nu Nwi saynə taa ŋwaa vɨɨ. 13Vəsogeꞌ və fwàŋ Rom baa nə vɨɨ mɔ́ꞌ kɔꞌ kɨɨ ndwə laa luu buꞌ nu Kristo, faŋ mə ŋìi mfiŋ nə. 14Nu mɔ́ꞌ baa lùu laa, vaŋ-nshwi vaŋ-nsiŋ vəyaŋ, faŋ vəŋ ye laa mə lùu taa ŋii mfiŋ buꞌ Kristo nə, vəŋ tey kɨ yɨꞌtə maa Yeso ŋkee dɨdɨꞌ, baa kìi fwi yiweꞌ maa məbaa fɨꞌtə nu Nwi tɨ́ vɨɨ, gə vɨsɨ vɨsɨ, kee baa fɨfee me. 15Vɨɨ mɔ́ꞌ taa ŋwaa vəŋ fɨꞌtə nu Kristo nə fwi yifəŋ, kəə nsɔꞌsə. Luu nə, vɨɨ mɔ́ꞌ yɨsə nə fwi yijəə, 16fɨꞌtə nu Nwi buꞌ laa vəŋ kaw mə, kɨɨ laa vɨ kwàŋ mə taa nsɔꞌ buꞌ nu Kristo, laa mə twelə taa ŋii nsɔꞌsə laa ntɔŋ yijəə Nwi lùu nu yinsəŋ. 17Luu nə, vɨɨ mbii-wə kəə sheꞌ laa vəŋ kwàlə shɔ̀ɔ mə, faŋ vəŋ fɨꞌtə nu Kristo nə. Vəŋ kee yɨ nə fwi yijəə me. Vəŋ kəə baa metə kwaŋ ŋɨꞌ maa mə, faŋ mə lùu feenə taa ŋii mfiŋ nə. 18Luu nə, mə kee shə̀ŋ shɔ me. Vəŋ kɔlə yɨsə nə mbɨꞌtə yikə, kɨ vəŋ fɨꞌtə nu Kristo nə fwi yijəə, tɨꞌnə me nə fwi yifəŋ, fwi nyaa lùu nə məŋaytə buꞌ faŋ vɨ fɨꞌtə nu Kristo tɨ́ vɨɨ. Yinsəŋ məŋaytə ŋwaa taa kɨ gə nə vɨsɨ, 19buꞌ laa mə kɔꞌ kɨɨ laa məshɔꞌtə wiŋ, faŋ viŋ shɔꞌtə Nwi tɔ mə nə, baa nə ŋgaŋtə njyə faŋ Zwitə Yeso Kristo kɔ shee, taa yɨ laa nsɔꞌ nyaa fuu sheꞌ yijəə tɨ́ mə. 20Mə tə sɨ, kɨ kɨꞌ laa tɔ kaŋ kee ndɔ dɨɨ me, baa nə laa Nwi ndɔ yɨsə laa vɨɨ bəŋsə Kristo buꞌ mə, sheꞌ faŋ ŋwə yuu kɨ yɨsə ghee nshə. Vɨ ndɔ bəŋsə Kristo buꞌ mə, faŋ mə kɔlə kɨku, tɨꞌnə me bɨbwey. 21Gə fɨ maa mə, kɨ luu mə kee mè me, buu mə bwèy lùu tɨ́ Kristo; kɨ luu mə ku, buu mə taa sey fɨ fuŋ. 22Mə kɨ luu duꞌ yinyay taa ŋwaa mə taa mbi, buu kaꞌ mə kɨ faꞌ faꞌ tɨ́ Nwi. Nwi yɨsə nu jəə fuu fɨ fuŋ. Kɨ luu vɨ gi laa mə shoꞌ nu jəə fɨ maa vənu vɔ́ vəbɔɔ nə, buu mə kee taa kɨɨ nə ŋkɨə mə shoꞌ me. 23Vənu vɔ́ gàasə mə vəway vəbɔɔ. Nu ŋkɨə faŋ kaꞌ ŋkə bàw shee, lùu laa mə ku, gə̀ yɨ Kristo, buꞌ laa lùu nu faŋ ŋkə bàw shɔ̀ɔ vənu vənshə. 24Gə fɨ maa kwiŋ mɔ́ꞌ, ŋkə bàw laa mə goꞌ taa mbi buꞌ viŋ. 25Nɨniŋ, mə kɔꞌ kɨɨ yinsəŋ laa ŋkə lùu nɨniŋ, laa mə taa goꞌ feenə, nsiŋ taa goꞌ, tɨ́ kaꞌ mə gaŋtə viŋ vənshə, viŋ nùŋ fwi siŋ maa Kristo, tɨ̀ŋnə weꞌ, gə̀ nə vɨsɨ, baa kìi məŋaytə yaŋ buꞌ nu Kristo. 26Nɨniŋ laa, faŋ nsiŋ ndɔ baa luu mɔ́ꞌ, buu viŋ taa kii ŋkee nu kwalə mɔ́ꞌ maa məbəŋsə Yeso Kristo shɔ, maa nu ŋkɨə faŋ ŋwə yɨ maa mə nə.
Viŋ toꞌ nə nshinə faŋ nyə kùꞌnə tɨ́ vɨɨ Kristo
27Nu ŋkɨə faŋ ŋkə lùu kəkwalə, lùu laa məshəŋtə wiŋ kɨ toꞌ nə nshinə njyə faŋ nyə kùꞌnə tɨ́ vɨɨ məbiŋ nu Kristo. Nɨniŋ laa mə ndɔ jwi ye viŋ, tɨꞌnə me, mə kee kɔlə jwi me, buu mə taa zɔ laa viŋ tɨ̀ŋnə weꞌ, kìi zwitə kəmuꞌ, baa kìi mbɨꞌtə yiŋ yimuꞌ, faŋ viŋ ŋɨɨlə maa məyɨ laa ntɔŋ yijəə Nwi gə nə vɨsɨ. 28Mə taa baa kaw maa məye, tɨꞌnə me maa məzɔ laa viŋ kee fèe vɨɨ mbeenə viŋ me, maa vənu vənshə me. Yiŋkii taa də tɨ́ vəŋ laa vɨ ndɔ ndisə vəŋ. Gə fɨ maa viŋ, viŋ ndɔ kɨɨ fɨ fuŋ laa Nwi ndɔ bweysə viŋ. 29Lùu nɨniŋ buꞌ laa Nwi key viŋ nə jɨɨ maa mənuŋ fwi siŋ maa Kristo, key viŋ nə nu məye ŋɨꞌ buꞌ nu Kristo nɨzi. 30Nɨniŋ, nsiŋ nywenə sheꞌ nywaŋ yimuꞌ. Viŋ nə duꞌtə viŋ ye nywaŋ njyə faŋ mə nə nywenə nə, baa zɔ̀ ndwə laa mə kɨ bii nywenə nywaŋ yɔ́.
2Faŋ bàw viŋ luu nə nu kəmuꞌ
1Kristo nə kɔ̀ viŋ nə yigi, tɨ́ kaꞌ viŋ tɨ̀sə yiŋwaa yiŋ, viŋ viŋ, baa gaŋtə yiŋwaa yiŋ, viŋ viŋ, fɨ taa ŋkawnə. Viŋ faynə lùu fa kəmuꞌ, viŋ vɨ Zwitə Ley Nwi, baa kee gəŋ siŋ, viŋ viŋ. 2Nɨniŋ, viŋ ye laa mbɨꞌtə yiŋ lùu yimuꞌ. Viŋ kɨ kawnə yiŋwaa yiŋ, fàynə nùŋ fwi siŋ maa nu kəmuꞌ. Viŋ yɨ nɨniŋ, buu mə kìi məŋaytə yaŋ. 3Kɨ viŋ kɨ ŋwiŋ me, tɨꞌnə me, koꞌsə yiŋwaa me! Viŋ bee kɨ kii sùꞌsə yiŋwaa yiŋ nsi, ndeynə wə tɨ̀ me wə laa ŋwə shɔ̀ɔ viŋ. 4Kɨ viŋ kɨ ywiitə sheꞌ vənu mbɨə faŋ mbə bàw tɨ́ nshɨ-tɔ wiŋ me. Bàw viŋ kɨ ywiitə vənu mbɨə faŋ mbə bàw tɨ́ vɨɨ day.
Faŋ bàw viŋ kii mbɨꞌtə yiŋ yaa njyə Kristo
5Bàw mbɨꞌtə yiŋ fɨ taa fwisə viŋ lùu yaa njyə Yeso Kristo:
6Faŋ ŋwə nə kɔlə kìi ŋkɨꞌnə yi ghɔ Nwi mɔ́ꞌ nə,
ŋwə nə kee jìa nu kɔ́ nə wutə me,
laa ghɔ Nwi gòꞌ nɨndɨŋ me.
7Ŋwə nə bee kii mèꞌtə vənu vənshə, kii gù luu buꞌ,
vɨ bi ŋwə faŋ vɨ yaa kɨ bi wə,
ŋwə ta, toꞌ sheꞌ yaa wə.
8Yighee njyə faŋ ŋwə nə luu wə nə,
ŋwə baa sùꞌsə ŋwaa wi nsi,
bìŋ yiku, ŋkee yiku vɨɨ bwənə,
faŋ vɨ nə bèy ŋwə fuu fəŋkɔꞌ fə ŋkɨꞌsə.
9Ŋwə nə yɨ̀ nɨniŋ,
buu Nwi kɔ yikwalə tɨ́ ŋwə faŋ nyə shɔ̀ɔ ki,
baa shù yizii maa ŋwə faŋ nyə kwàlə shɔ̀ɔ təzii tənshə.
10Nɨniŋ laa vɨɨ vənshə guŋnə nsi vɨsɨ ŋwə, bə̀ŋsə ŋwə.
Vəzwitə fɨ taa yizɔ, nə vɨɨ fɨ shɨ nsi,
nə vəŋku və nsisə fɨ ŋiꞌ nsi ndɔ guŋnə nsi,
bə̀ŋsə yizii yi.
11Vəŋ vənshə ndɔ biŋ ntee laa
Yeso Kristo lùu wuu məsɔꞌ mbi.
Nɨniŋ, vəŋ kɔ feenə tɨ́ tɨta Nwi.
Faŋ bàw viŋ kɨ toꞌ maa nu Nwi nə wutə
12Vaŋ-nshwi vaŋ faŋ mə kàw, viŋ yaa zɔnə yigisə Nwi ghee nshə, faŋ nsiŋ nə luu mɔ́ꞌ nə. Bàw viŋ baa zɔnə shɨshɔɔ, faŋ nsiŋ kee baa lùu mɔ́ꞌ nə me. Viŋ kɨ toꞌ maa nu Nwi nə wutə, fee Nwi, kɨ lɔꞌ, tɨ́ kaꞌ Nwi ndɔ bweysə viŋ. 13Viŋ toꞌ nɨniŋ, buu lùu nshɨ-tɔ Nwi faŋ ŋwə faꞌ taa ŋwaa viŋ, yɨsə laa viŋ kaw maa mətoꞌ nɨniŋ. Ŋwə baa luu kɔ wutə tɨ́ viŋ maa mətoꞌ nɨniŋ. Too Nwi bàw maa məfaꞌ nɨniŋ taa ŋwaa vɨɨ. 14Faꞌ tɨ̀ me faꞌ faŋ viŋ faꞌ, viŋ faꞌ jəə, kee kɨ lulə me, kee kɨ tay me. 15Nɨniŋ laa viŋ ndɔ baw shɨlə, tuu wee-ndoꞌ kee lùu maa viŋ me, viŋ luu vaŋ Nwi yinsəŋ, faŋ vəŋ kee kìi nu bwə taa fwisə vəŋ me. Viŋ lùu vaŋ ley Nwi taa ŋwaa vɨɨ, faŋ fwisə vəŋ lùu sətwiŋkə, vəŋ baa lùu vɨɨ vənu vəbwəvə. Viŋ luu taa ŋwaa vəŋ yaa məjwiŋ faŋ mbə bee fɨ taa yizɔ nə. 16Viŋ nuŋsə yigisə Nwi taa fwisə viŋ, yigi njyə faŋ nyə də jɨɨ məbwey vəlwaŋ tɨ́ vɨɨ. Viŋ kɨ luu kɨ yɨ nɨniŋ, buu vɨ ndɔ biŋ mə maa shi ŋkɨə faŋ Kristo ndɔ bəŋ jwi, laa yitoꞌ nyaa faŋ mə nəə toꞌ buꞌ nu Nwi, nə faꞌ ŋgwə faŋ mə nəə faꞌ shɔ nə, kee fùu dayday me. 17Məbiŋ wiŋ faŋ viŋ biŋ Kristo nə, lùu yaa ndey faŋ viŋ fèꞌ tɨ́ Nwi. Kɨ yighee mɔ́ꞌ məbwey ŋwaa ndɔ ndi, buu lùu yaa fa faŋ vɨ ndi, kùꞌsə maa ndey yɔ́. Ŋkə taa luu nɨniŋ, buu mə taa kii məŋaytə taa fwi mə; nsiŋ baa faynə yiŋwaa, kɨ ŋaytə. 18Ŋkə bàw laa viŋ nɨzi kɨ ŋaytə, tɨ́ kaꞌ nsiŋ faynə yiŋwaa, kɨ ŋaytə.
Faŋ Pɔɔl nəə kəə tɔŋ Timoti tɨ́ vɨɨ Kristo fɨ ntɨꞌ Filipi
19Tɨta Yeso taa biŋ, buu fɨkɨꞌ nee, mə tɔŋ Timoti, ŋwə jwi yɨ viŋ, baa bə̀ŋ jwì nàysə faŋ viŋ dùꞌ tɨ́ mə, tɨ́ kaꞌ fwi nyaa zutə. 20Mə kee baa kìi wə mɔ́ꞌ, tɨ̀ lɨꞌ Timoti, faŋ ŋwə bɨꞌtə vənu yaa mə me, ŋwə kɨsə gaŋtə viŋ nə fwi yijəə. 21Bətə vɨɨ bɨꞌtə sheꞌ vənu vəvəŋ; vəŋ kee bɨꞌtə vənu və Yeso Kristo me. 22Gə fɨ maa Timoti, viŋ kɔꞌ kɨɨ nə nshinə yi, laa nyə lùu yijəə, baa nə laa ŋwə nəə beꞌsə mə maa faꞌ Nwi, sheꞌ faŋ wee yaa kɨ bèꞌsə tii wi. Yia ŋwə fàꞌ faꞌ Nwi mɔ́ꞌ, fɨꞌtə ntɔŋ yijəə Nwi tɨ́ vɨɨ. 23Lùu ŋwə, faŋ mə kəə tɔ̀ŋ tɨ́ viŋ. Yighee njyə faŋ mə taa kɨɨ faŋ vənu vaŋ dùꞌ, mə kɨ nii tɔ̀ŋ ŋwə yighee muꞌ. 24Gə fɨ maa mə, mə nùŋ fwi nyaa maa tɨta Yeso laa fɨkɨꞌ nee, mə jwi yɨ viŋ nɨzi.
Faŋ Pɔɔl nə tɔ̀ŋ Epafroditɔs, ŋwə bəŋ gə̀ Filipi
25Gə fɨ maa Epafroditɔs, weenshu ŋwaa-nsiŋ, faŋ yia ŋwə nəə faꞌ mɔ́ꞌ nə, ŋɨɨlə buꞌ nu Nwi mɔ́ꞌ nə. Ŋwə baa lùu wuu ntɔŋ wiŋ, faŋ ŋwə nə jwì ndèynə mə, gàŋtə mə. Luu nə, ŋkə bàw laa mə baa tɔŋ ŋwə, ŋwə bəŋ jwi yɨ viŋ. 26Ŋwə dùꞌ kɨ kəə sheꞌ laa yi baa ye viŋ, fwi yi nə za buꞌ faŋ ŋwə nə zɔ laa, viŋ zɔ̀ laa ŋwə zɨzasə. 27Lùu yinsəŋ laa ŋwə nəə zɨzasə, goꞌ sheꞌ tɨtiꞌ ŋwə ku. Luu nə, Nwi nə kèe gəŋsə, yɨ̀sə ŋwə bwaŋnə. Ŋkə də̀ laa ŋwə kèe gəŋsə maa mə nɨzi, laa kɨ nu mɔ́ꞌ baa jia mə me, maa yighee njyə faŋ vənu və ŋɨꞌ bàytə kìa mə nə. 28Nɨniŋ, ŋkə luu sheꞌ laa, mə taa tɔŋ ŋwə, ŋwə jwi yɨ viŋ yighee muꞌ, tɨ́ kaꞌ viŋ baa kɨ ŋaytə faŋ viŋ taa baa ye ŋwə. Nɨniŋ, məluŋ ŋwaa baa fasə. 29Faŋ ŋwə taa jwi, viŋ kɔ bwaŋnə tɨ́ ŋwə maa yizii tɨta Nwi. Viŋ ŋaytə maa ŋwə. Bàw viŋ kɨ kɔ bəŋsə tɨ́ kəŋ vɨɨ vɔ́. 30Viŋ kɔꞌ kɨɨ laa nu ŋkɨə faŋ ŋkə yɨ̀ faŋ ŋwə yaa zasə, kɨ kəə ku nə, luu buꞌ faꞌ ŋgwə faŋ ŋwə faꞌ tɨ́ Kristo nə. Viŋ nə tɔ̀ŋ ŋwə shee, laa ŋwə metə faꞌ wiŋ shee. Ŋwə nə biŋ jwi faŋ nə kɔlə luu ntɔŋ tɨ́ kaꞌ ŋwə gə shɔ ku nə.
3Faŋ Pɔɔl nə kwìinə fwi yi
1Vaŋ-nshwi vaŋ, vəndwə və yigi vaŋ lùu laa, viŋ kɨ ŋaytə maa tɨta Kristo. Faŋ mə kɔlə nyɔ̀ꞌ vənu faŋ mə nə tèꞌsə nyɔ̀ꞌ nə, mə kee bee yibwa maa mənyɔꞌ vənu vɔ́ me. Yigi yɔ́ taa kɨ yɨsə viŋ weꞌ maa nu Nwi. 2Viŋ kɨ shiinə yiŋwaa yiŋ fɨ ghɔ busə sì. Viŋ kɨ shiinə fɨ ghɔ vɨɨ mbɨə faŋ vəŋ jwi kɨ deesə nu bwə taa ŋwaa viŋ, faŋ vəŋ nùŋ tɔ vəŋ sheꞌ maa nu məsɨɨtə vɨɨ nə. 3Lùu nsiŋ lùu vɨɨ faŋ Nwi nə kɔ̀ shwenə ki tɨ́ nsiŋ. Shwenə Nwi yinsəŋ kee lùu nu məsɨɨtə wə me. Shwenə ki faŋ ŋwə kɔ̀ tɨ́ nsiŋ, lùu Zwitə Ley Nwi, faŋ ŋkə yɨsə laa nsiŋ bəŋsə Nwi, kɔ feenə tɨ́ Yeso Kristo. Nsiŋ kee nùŋsə fwi saŋ-nsiŋ maa vənu faŋ lùu vənu və shɨ nsi me. 4Ŋkə yaa toꞌ lùu laa vənu və shɨ nsi luu ŋkee vənu, buu kaꞌ nshɨ-tɔ ŋwaa nùŋ fwi nyaa maa vənu vɔ́. Wə kɨ yɨ lùu shɔ faŋ ŋwə bɨꞌtə laa kaꞌ ŋwə nùŋ fwi yi maa vənu vɔ́, viŋ kɔꞌ kɨɨ laa kaꞌ mə shɔ̀ɔ ŋwə ŋkee maa vənu vɔ́. 5Gə fɨ maa məbeꞌsə nshinə vɨɨ Jus, vɨ nə sɨ̀ɨtə mə ŋkee faŋ mə nə luu vəshi yifɔŋ. Mə luu ŋkee bi-gɔ fɨ shɨ Isirayl. Mə lùu fɨ maa ŋiꞌ ŋiinə Benyamin. Mə luu ŋkee wuu Hibru, faŋ bì vɨɨ Hibru. Gə fɨ maa nuŋsə vɨɨ Jus, mə luu wuu Farisii. 6Mə nə luu wuu weꞌ maa nu vɨɨ Jus, kɔ ŋɨꞌ tɨ́ vɨɨ mbɨə faŋ vəŋ nəə beꞌsə Yeso. Mə nə kee bɨꞌ tuu ntɨ vɨɨ Jus yimuꞌ me. Nɨniŋ, mə nə luu ŋkee wuu ley maa vənu vɔ́. 7Luu nə, faŋ mə nə kɔlə ndì vənu vɔ́ yaa sey, mə ndì yaa kəndi ndwə buꞌ Kristo. 8Maa yinsəŋ, vənu vɔ́ vənshə luu kəndi shee, buꞌ laa nu məkɨɨ nə Yeso Kristo, tɨta ŋwaa, kwàlə shɔ̀ɔ vənu vənshə. Luu buꞌ ŋwə faŋ mə meꞌ vənu vɔ́ vənshə, sheꞌ laa mə bee kii kii Kristo. Vənu vɔ́ gù yaa vəbɨ shee. 9Mə kəə sheꞌ laa mə goꞌsə yia ŋwə. Mə kee baa lùu wuu ley buꞌ vənu mbɨə faŋ nəə yɨsə mə me, faŋ mə nəə beꞌsə ntɨsə vɨɨ Jus nə me. Mə lùu wuu ley buꞌ laa mə nùŋ fwi nyaa maa Kristo. Nwi ndɨ̀ wə yaa wuu ley buꞌ faŋ ŋwə nùŋ fwi yi maa Kristo. 10Nɨniŋ, nu ŋkɨə faŋ mə kəə ŋkə, luu sheꞌ laa mə kɨɨ nə Kristo, nə wutə ŋkɨə faŋ ŋkə jwi fɨ maa məywey wi fɨ shɨ yiku. Mə baa kəə laa kaꞌ mə baa luu yè fɨ maa ŋɨꞌ yi, faŋ ŋwə nə yè nə. Mə biŋ ŋkee maa məku, sheꞌ faŋ ŋwə nə biŋ yiku nə. 11Nɨniŋ laa kaꞌ mə ziꞌ maa məywey fɨ shɨ yiku yuu ŋwə nɨzi.
Faŋ ŋkə bàw laa nsiŋ kɨ toꞌ maa nu Nwi, gə nə vɨsɨ
12Kɨ mə kee gì laa mə duꞌtə mə kìi vətɔ mbɨə faŋ mə tə̀ sɨ shɔ nə me. Mə kee gì laa mə duꞌtə mə luu ŋkee wuu bɔŋsə me. Luu nə, mə gə nə vɨsɨ, ŋɨɨlə shɔ nəŋay, tɨ́ kaꞌ mə ndɔ kii vənu vɔ́ maa mə. Mə kəə kii vənu vɔ́, buꞌ laa Yeso Kristo, kìi mə taa ghɔ ŋwə. 13Vaŋ-nshwi vaŋ, mə bɨꞌtə laa mə kee ta yiziꞌ yuu kii vənu vɔ́ me. Nu kəmuꞌ faŋ mə yɨ̀, lùu laa mə ndènə vənu vənshə faŋ mbə duꞌtə mbə shɔɔ, mə toꞌ nə wutə, gə vɨsɨ vɨsɨ, ndeynə vənu mbɨə faŋ mbə lùu vɨsɨ. 14Mə taa kɔꞌ kɨ gɨgə vɨsɨ, luu ye ndwəsə shəŋ ŋkɨə faŋ mə tə̀ sɨ shɔ nə, tɨ́ kaꞌ mə ndɔ kii vəkeynə mbɨə faŋ Nwi nə tìi mə, laa mə ndɔ kii mbə taa nu yifwàŋ ki buꞌ Yeso Kristo. 15Gə fɨ maa nsiŋ vənshə faŋ nsiŋ lùu vɨɨ taa taa nu Nwi nə, bàw nsiŋ kɨ kwaꞌtə nu kɔ́ fɨ taa fwisə nsiŋ. Mbɨꞌtə yiŋ kɨ yɨ lùu nɨŋkwiŋ maa nu mɔ́ꞌ, buu Nwi taa də tɨ́ viŋ yiley. 16Luu nə, kɨ nsiŋ bəŋ yiba me; nsiŋ kɨ beꞌsə vənu mbɨə faŋ nsiŋ nə teꞌsə beꞌsə nə.
17Vaŋ-nshwi vaŋ, viŋ vənshə kɨ toꞌ nə nshinə njyə faŋ viŋ yè maa mə nə. Viŋ kɨ ndeynə vɨɨ mbɨə faŋ vəŋ yɨ jəə maa jɨɨ yinjii. Yia lùu vəshwenə, tɨ́ kaꞌ viŋ kɨ beꞌsə. 18Vɨɨ vəyaŋ lùu shɔ faŋ vəŋ kee tòꞌ nɨniŋ me. Mə duꞌtə mə gi tɨ́ viŋ kɔ̀ŋ vɨɨ vɔ́ ghee yaŋ. Mə baa naysə tɨ́ viŋ nə mənsɨ sɨ mə ndwə laa, jɨɨ njyə faŋ vɨɨ vɔ́ toꞌ fɨ fuŋ nə, lùu jɨɨ vɨɨ mbeenə nu fəŋkɔꞌ fə ŋkɨꞌsə fə Kristo. 19Vəŋ ndɔ ŋii taa nsɔꞌ Nwi, ndì. Vəŋ kàw sheꞌ maa məzɨ shɨ. Nu kɔ́ lùu tɨ́ vəŋ yaa Nwi vəŋ. Vəŋ koꞌsə ŋwaa buꞌ vənu faŋ bee kii lùu vənu və tɔ dɨɨ. Vəŋ bɨꞌtə sheꞌ vənu və shɨ nsi. 20Gə fɨ maa nsiŋ, nsiŋ lùu vɨɨ faŋ fu ŋwaa-nsiŋ lùu yizɔ. Nsiŋ tə sɨ, kɨ kɨꞌ tɨta Yeso Kristo, faŋ lùu mbweysə nyaa-nsiŋ, faŋ ŋwə ndɔ fuu fɨ yizɔ, jwì yɨ nsiŋ. 21Yighee njyə faŋ ŋwə ndɔ jwi, ŋwə ndɔ yɨsə laa yiŋku yiŋwaa nyaa-nsiŋ nyə̀ gù yaa ŋwaa wi faŋ ŋwə bàw shɨlə nə. Ŋwə ndɔ yɨ nu kɔ́ nə wutə ki kəkwalə, ŋkɨə faŋ ŋkə ndɔ yɨ vətɔ vənshə fɨ mbi zɔnə ŋwə.
4Faŋ ŋkə bàw laa viŋ kɨ toꞌ nə nshinə yiley nə məŋaytə
1Vaŋ-nshwi vaŋ, faŋ mə kàw viŋ, baa kaw maa məye viŋ, yaa kɨ yɨ viŋ laa fwi nyaa kɨ kii məŋaytə. Viŋ lùu vəkeynə vaŋ fɨ ghɔ Nwi. Vɨɨmba vaŋ, viŋ kɨ tɨŋnə weꞌ maa nu Nwi, sheꞌ faŋ mə duꞌtə mə naysə tɨ́ viŋ nə.
2Mə kìi nu maa mənaysə tɨ́ Yiodia nə Sintayki. Ŋkə lùu laa, mə gì tɨ́ viŋ ŋkee nəŋay laa, viŋ luu nə fa kəmuꞌ maa yizii tɨta Yeso. 3Mə buꞌ ghɔ tɨ́ Sisigɔs, faŋ yia ŋwə nə fàꞌ mɔ́ꞌ nə, laa ŋwə gaŋtə vəki vɔ́, tɨ́ kaꞌ vəŋ baa kɨ duꞌ bwaŋnə, buꞌ laa yia vɨ vəŋ nə kɨ̀ɨtə mɔ́ꞌ yighee vɨsɨ buꞌ nu Nwi nə, sheꞌ yuu Klement nə vɨɨ mɔ́ꞌ faŋ vəŋ beꞌsə yia nə. Nwi nyɔ̀ꞌ təzii təvəŋ taa ŋwaꞌlə məbwey vəlwaŋ.
4Viŋ zɔ, mə gì tɨ́ vɨɨ Kristo vənshə; viŋ kɨ ŋaytə ghee nshə, buꞌ faŋ viŋ lùu vɨɨ Kristo nə. Mə baa kɨ gi laa viŋ kɨ ŋaytə. 5Viŋ kɨ yɨsə vənu maa jɨɨ yijəə, tɨ́ kaꞌ vɨɨ vənshə taa ye laa viŋ lùu vɨɨ bwaŋnə. Viŋ kɨ lumə laa tɨta Yeso luu nshənə. 6Kɨ viŋ baa kɨ ghaysə ŋwaa kɔ̀ŋ vətɔ faŋ kaꞌ mbə taa bəə fɨ ghɔ viŋ me. Viŋ kɨ kii bee shɔꞌtə Nwi ghee nshə, kɨ naysə vətɔ mbɨə faŋ viŋ kəə tɨ́ Nwi. Faŋ viŋ ndwaŋ Nwi, bàw viŋ baa bwàŋ ŋwə nɨzi. 7Viŋ yɨ nɨniŋ, buu Nwi taa kɔ məduꞌ-nyɔŋ tɨ́ viŋ, faŋ luu nu kwalə shɔ̀ɔ vənu vənshə faŋ kaꞌ wə bɨꞌtə fɨ tɔ ŋwə. Nu kɔ́ kɔ fwi yizutə tɨ́ viŋ, yɨ laa nu kee baa luu shɔ bùulə mbɨꞌtə yiŋ me, faŋ viŋ nùŋ fwi siŋ maa Yeso Kristo nə.
8Vaŋ-nshwi vaŋ, vəndwə və yigi vaŋ lùu laa, viŋ nuŋsə mbɨꞌtə yiŋ sheꞌ maa nu ŋkɨə faŋ ŋkə lùu yinsəŋ, nə ŋkɨə faŋ ŋkə kùꞌnə tɨ́ vɨɨ Nwi, nə ŋkɨə faŋ ŋkə lùu kəloomə, baa lùu kəley, baa nə maa vənu mbɨə faŋ mbə kɔ məŋaytə tɨ́ vɨɨ, baa suŋtə vɨɨ. Vənu vəjəəvə vənshə, nə mbɨə faŋ mbə jwi nə məbəŋsə tɨ́ Nwi, lùu vənu mbɨə faŋ viŋ taa kɨ bɨꞌtə mbə. 9Viŋ kɨ yɨsə vənu mbɨə faŋ mə nə dèesə viŋ shɔ, baa mèꞌtə taa ghɔ viŋ nə. Vənu mbɨə faŋ viŋ nə zɔ̀ fɨ ghɔ mə, baa yè faŋ mə yɨsə, lùu mbɨə faŋ viŋ taa yɨ nɨzi. Nɨniŋ nə, Nwi, faŋ ŋwə kɔ məduꞌ-nyɔŋ tɨ́ vɨɨ nə, taa goꞌsə viŋ vɨ vəŋ.
Faŋ Pɔɔl nə kɔ̀ bwaŋ-wee tɨ́ vɨɨ Nwi fɨ ntɨꞌ Filipi maa vətɔ faŋ vəŋ nə tɔ̀ŋ tɨ́ ŋwə
10Mə ŋaytə ŋkee dɨdɨꞌ, baa bwaŋ tɨta Nwi, buꞌ laa viŋ baa tey kɨ kɨꞌ mə nə. Ŋkə gə̀ ŋkee ntaŋ, faŋ viŋ nə kɨ̀ꞌ mə nə. Nɨniŋ, mə kìi məŋaytə yaŋ ndwə. Mə kɔꞌ kɨɨ laa viŋ yaa lumə mə ghee nshə, luu nə, viŋ nə kee kìi jɨɨ kɨ gaŋtə mə me. 11Kɨ kee lùu laa mə bə̀ə fa buu gì nee me. Mə duꞌtə mə zwetə maa məduꞌ nə məŋaytə maa vənu vənshə faŋ mbə gay maa mə. 12Mə kɔꞌ kɨɨ maa məduꞌ taa ŋɨꞌ faŋ mə bəə vətɔ. Mə baa kɨɨ maa məduꞌ faŋ vətɔ lùu vəyaŋ. Mə duꞌtə mə ye kəŋ vənu vɔ́ vənshə, zwetə maa məjia fwi maa vənu vənshə. Mə kɨɨ nə yighee faŋ mə zɨ zwə, baa nə yighee faŋ jɨŋ zà mə. Mə kɨɨ nə yighee faŋ vətɔ yaŋ bə̀, nə yighee faŋ fa kee luu shɔ me. 13Yaa kɨ weꞌsə Kristo weꞌsə mə. Ŋwə kɔ wutə shee, tɨ́ kaꞌ mə yɨ̀sə vənu vənshə. 14Luu nə, viŋ yɨ̀ jəə faŋ viŋ gaŋtə mə maa yighee njyə faŋ mə lùu taa ŋɨꞌ nə. 15Vɨɨ Nwi fɨ ntɨꞌ Filipi, viŋ kɔꞌ kɨɨ laa, shù fɨ faŋ mə nə bɨ tey kɨ fɨꞌtə nu Nwi tɨ́ vɨɨ fɨ shɨ Makedonia, nə gaŋtə sheꞌ viŋ gàŋtə mə. Məshəŋtə vɨɨ Nwi mɔ́ꞌ kee baa lùu shɔ, faŋ ŋwə nə fàynə ghɔ, yia vɨ vəŋ maa məshɔɔ nə vətɔ me. 16Yighee njyə faŋ mə nə luu Tesalonika, viŋ nə tɔ̀ŋ vətɔ shee faŋ mə nəə bəə mbə nə. Viŋ nə kee yɨ̀sə nɨniŋ sheꞌ yighee muꞌ me. 17Kɨ mə kee tə̀ sɨ maa vətɔ mbɨə faŋ viŋ tɔŋ shee nə mə. Nu ŋkɨə faŋ ŋkə lùu kəkwalə, lùu laa mə yè fɨ fuŋ laa viŋ nùŋ fwi siŋ maa nu Nwi, gə nə vɨsɨ. Lùu ŋiꞌ nu ŋkɨə faŋ mə kìi məŋaytə, buꞌ faŋ viŋ kuꞌsə vənu vəjəəvə viŋ, tɨ́ kaꞌ Nwi ndɔ key viŋ shɔ nə. 18Mə ye vətɔ vənshə faŋ viŋ tɔ̀ŋ shee nə, mbə yaŋ shɔ̀ɔ faŋ mə kəə. Fa kee baa lùu shɔ faŋ mə bəə me, buꞌ vətɔ mbɨə faŋ viŋ tɔ̀ŋ shee, Epafroditɔs jwì nə mbə nə. Mbə lùu yaa vətɔ faŋ mbə kìi lumə jəə, baa lùu yaa ndey faŋ wə fèꞌ tɨ́ Nwi, Nwi ŋaytə shɔ. 19Viŋ kɔꞌ kɨɨ laa Nwi ŋwaa taa kɔ vətɔ vənshə tɨ́ viŋ, faŋ viŋ bəə mbə. Nwi kìi vətɔ faŋ mbə shɔ̀ɔ ki. Ŋwə ndɔ kɔ tɨ́ viŋ ŋkee jəə buꞌ Yeso Kristo. 20Nɨniŋ, nsiŋ kɨ bəŋsə Nwi, tii ŋwaa-nsiŋ, ghee nshə. Ŋkə goꞌsə nɨniŋ.
Faŋ Pɔɔl nə shɔ̀ꞌtə vɨɨ Nwi fɨ ntɨꞌ Filipi
21Shɔꞌtə vɨɨ Nwi vənshə faŋ Yeso Kristo shòꞌ vəŋ laa lùu mbii vɨɨ shee. Vaŋ-nshwi vaŋ-nsiŋ maa yizii Kristo, faŋ yia vɨ vəŋ lùu feenə, shɔꞌtə viŋ nɨzi. 22Vɨɨ ley Nwi vənshə fɨ feenə shɔꞌtə viŋ. Ŋkee vɨɨ mbɨə faŋ vəŋ shi ntoꞌ fwàŋ Kaysa, faŋ lùu vɨɨ Kristo, shɔꞌtə viŋ nɨzi. 23Tɨta Yeso Kristo tu mənɔŋ-bwaŋnə tɔ viŋ.