Ŋwaꞌlə Jud
Ŋwaꞌlə Jud fɨ̀nə ŋwaꞌlə Pita beꞌsə vəbɔɔ. Ŋwə kɔ ntɨ maa məndɨɨnə fɨ ghɔ vɨɨ mədeesə faŋ vəŋ kee deesə nu Nwi yinsəŋ me. Ŋwə fɨ̀ꞌ fɨ maa vəshəŋ vəmɔ́ꞌ fɨ taa ŋwaꞌlə Nwi, də̀ faŋ mədeesə vəŋ ghɔ́ kee yikuꞌnə me, baa nàysə faŋ vɨɨ vɔ́ ndɔ ŋii nsɔꞌ Nwi.
Məsenə vəwaytə:
Vənzi və ŋwaꞌlə 1.1-2
Vɨɨ mədeesə faŋ vəŋ bweꞌsə vɨɨ 1.3-19
Mətɨŋ weꞌ taa nu Kristo 1.17-23
Məbəŋsə Nwi 1.24-25
1Shɔꞌtə fɨ ghɔ Jud tɨ́ vɨɨ Nwi
1Lùu mə, Jud, wuu faꞌ Yeso Kristo, weenshu Jeyms, faŋ mə nyɔ̀ꞌ ŋwaꞌlə ŋwə̀ tɨ́ viŋ, vɨɨ mbɨə faŋ Nwi, Tii ŋwaa-nsiŋ kàw viŋ, baa shòꞌ viŋ laa viŋ luu mbii vɨɨ nə. Viŋ baa lùu vɨɨ faŋ Yeso Kristo shiinə viŋ, buꞌ nu mɔ́ꞌ kɔ̀ŋ viŋ. 2Nwi kee gəŋ siŋ, tu mənɔŋ-bwaŋnə tɔ viŋ, də ŋkawnə yi tɨ́ viŋ ghee nshə!
Viŋ kɨ shiinə yiŋwaa yiŋ fɨ ghɔ vɨɨ məbweꞌsə vɨɨ Nwi
3Vɨɨmba vaŋ faŋ mə kàw, mə nə kɨsə kəə laa mə nyɔꞌ ŋwaꞌlə ŋwə̀ tɨ́ viŋ maa mədə faŋ Nwi bwèysə nsiŋ vənshə. Nwi də̀ shee laa ŋkə bàw laa mə nyɔꞌ ŋwaꞌlə tɨ́ viŋ, buꞌ ghɔ tɨ́ viŋ laa viŋ faꞌ nə wutə, tɨ́ kaꞌ viŋ tɨŋ weꞌ maa nu Nwi, faŋ viŋ nùŋ fwi maa Nwi nə. Maa lùu nu faŋ Nwi nə nàysə tɨ́ vɨɨ vi. Kaꞌ yigi yɔ́ kee ndɔ kwiinə me. 4Mə gì nɨniŋ buꞌ laa vɨɨ mɔ́ꞌ shɔ faŋ vəŋ kee kɨ̀ɨ nə Nwi me. Vəŋ ŋìi taa ŋwaa viŋ fɨ yiba, kəə jɨɨsə maa məkwiinə jɨɨ njyə faŋ Nwi kee gəŋ saŋ-nsiŋ nə. Vəŋ kwiinə jɨɨ yɔ́ maa məyɨsə vənu vəbwəvə faŋ fwisə vəŋ kàw. Vəŋ twey ŋkee Yeso Kristo nɨzi, faŋ ŋwə luu ŋkee Tii ŋwaa-nsiŋ faŋ ŋwə sɔꞌ nsiŋ. Vɨ nə nyɔ̀ꞌ taa ŋwaꞌlə Nwi fɨshi laa, Nwi ndɔ kwaŋ kəŋ vɨɨ vɔ́ taa nsɔꞌ.
5Bàw mə lumə vənu vəmɔ́ꞌ tɨ́ viŋ faŋ viŋ duꞌtə viŋ kɨ̀ɨ nə mbə. Ŋkee fɨshi, maa yighee njyə faŋ Nwi nə gàŋtə vɨɨ Isirayl laa vəŋ fuu fɨ shɨ Ijip, ŋwə kɨ nii zwìlə vɨɨ mbɨə faŋ vəŋ nə kee bìŋ Nwi me. 6Nu mɔ́ꞌ lùu nu nshiisə-ŋiisə Nwi, faŋ vəŋ nə kee dùꞌ maa shəŋ ŋkɨə faŋ Nwi nə nùŋ vəŋ shɔ me. Vəŋ nyɨŋkə fɨ maa shəŋ kɔ́, Nwi kɨ nii mèꞌ vəŋ, kwaŋ vəŋ ŋkee taa mfiŋsə, ka vəŋ nə vəsumə və bwey, mbə goꞌsə yighee muꞌ, ndɔ gə zìꞌ maa shi kwalə ŋkɨə faŋ Nwi ndɔ sɔꞌ mbi. 7Bàw viŋ baa lùmə nu məshɨ mə Sodom nə Gomora baa nə vaŋ-məshɨ mbɨə faŋ mbə nə luu yɨ məshɨ mbɔ́. Vɨɨ fɨ taa məshɨ mbɔ́ nəə yɨ vənu vəbwəvə vəyaŋ, yɨsə ŋkee ntɔ vənu vəbwəvə mbɨə faŋ mbə kee yikuꞌnə laa wə yɨsə me. Nwi kɨ nii yɨ laa vəŋ ye ŋɨꞌ yiyaŋ taa wi faŋ ŋwə goꞌsə yighee muꞌ.
8Vɨɨ vɔ́ faŋ vəŋ jwì taa ŋwaa viŋ nə, yɨ sheꞌ kəŋ vənu vəbwəvə vɔ́, yɨ vənu vəbwəvə vɔ́ buꞌ njyəəsə faŋ nsə shi vəŋ. Vəŋ kee biŋ laa Nwi lùu tɨɨ tɔ vəŋ me. Vəŋ ndasə vəzwitə mbɨə faŋ mbə kii wutə yizɔ. 9Ŋkee Maykel faŋ luu nshiiŋii taa mbuꞌ Nwi nə, nə kee ndà Satan, tɨɨ vəzwitə vəbwəvə me. Yighee njyə faŋ Maykel nə tày ghɔ Satan buꞌ nu ŋku ŋwaa ŋku Mose, Maykel nə kee kòꞌsə ŋwaa wi maa məgi yigi yibwənə maa məsɔꞌ Satan me. Ŋwə nə gì sheꞌ laa bàw Nwi bɔŋsə Satan. 1.9 Zakaraya 3.2.10Gə fɨ maa vɨɨ vɔ́, vəŋ ndasə vənu faŋ vəŋ kee kɨ̀ɨ nə mbə me. Vəŋ lùu yaa nyaasə taa gay faŋ nsə kee yaa kɨ bɨꞌtə nu me. Vəŋ yɨsə vənu sheꞌ yaa nyaasə, faŋ nsə yaa kɨ yɨsə vənu, kee bee bɨꞌtə nu shɔ me. Vəŋ yɨ nɨniŋ, buu ndìsə sheꞌ vənu vɔ́ ndìsə vəŋ. 11Ŋkə ndɔ luu ŋkee kəbwə tɨ́ vəŋ. Vəŋ toꞌ ghuu yitoꞌ Kayin, yɨ vənu vəbwəvə maa məkii ka yaa Balaam nə yɨ̀sə yighee vɨsɨ. Vəŋ ndɔ kukə buꞌ məshii vəŋ, yuu vəŋ nywenə nu Nwi, yaa Kora nə yɨ̀ buu ku.
12Vəŋ bɨsə yizii nshəŋtə yiŋ buꞌ faŋ viŋ vɨ vəŋ yaa kɨ duꞌ shəŋ muꞌ, zɨ. Vəŋ duꞌ taa ŋwaa viŋ, zɨ, lumə sheꞌ nu yiŋwaa vəŋ, kee bee kìi tɔ dɨɨ me. Nɨniŋ, vəŋ lùu yaa mbɔꞌ yifusə faŋ yighuu kee lùu taa tey yi me. Fɨɨ yaa kɨ shɔɔ, saynə nyə. Vəŋ baa lùu yaa vətɨ faŋ mbə kee kɨkoonə me, faŋ yighee məkoonə kɔlə kùꞌ, ŋkee yaa vətɨ faŋ vɨ shoꞌ fɨ nsi ghɔ vɨ ghay, mbə yɔŋ, kùkə laylay. 13Vəŋ baa lùu yaa muu faŋ mbə lùu mətatə, vənu vəbwəvə vəŋ luu yaa təfwi tə muu ntɨə faŋ muu fùu meꞌtə. Vəŋ baa lùu yaa məjwiŋ faŋ mbə mèꞌtə vəshəŋ vəvəŋ. Nɨniŋ, Nwi lòotə shəŋ tɨ́ vəŋ maa shəŋ ŋkɨə faŋ ŋkə lùu ŋkee kəfəŋ, laa vəŋ goꞌ shɔ yighee muꞌ. 14Ŋkee fɨshi, Enok, faŋ lùu vəshiŋ və vɨɨ lwesə kwatia fɨ ghɔ Adam, nə gì nu ŋkɨə faŋ Nwi nə kwàŋ taa fwi ŋwə kɔ̀ŋ vɨɨ vì. Ŋwə nə gì laa, «Viŋ zɔ! Tɨta Nwi ndɔ jwi nə vɨɨ ley vi, vəmalia vəmalia, 15jwi sɔꞌ nsɔꞌsə vɨɨ vənshə. Ŋwə ndɔ sɔꞌ vɨɨ bwənə vənshə buꞌ vənu vəbwəvə vəŋ faŋ vəŋ yɨsə, baa nə buꞌ yigisə yibwənə faŋ vəŋ gisə kɔ̀ŋ ŋwə.» 16Vɨɨ vɔ́ lɨlulə ghee nshə, gisə laa vənu vənshə bɨ̀ tɨ́ vəŋ. Vəŋ lulə nɨniŋ, yɨsə sheꞌ vənu mbɨə faŋ yiŋwaa vəŋ kàw. Vəŋ koꞌsə yiŋwaa, baa gìsə yigi yisɨꞌsə maa məbweꞌsə vɨɨ laa vəŋ kɨ yɨsə nu ŋkɨə faŋ vəŋ kàw.
17Gə fɨ maa viŋ, vɨɨmba vaŋ faŋ mə kàw, viŋ lumə vənu mbɨə faŋ vɨɨ ntɔŋ Yeso nə fɨꞌtə laa mbə ndɔ gay. 18Vəŋ nəə gisə laa, vɨɨ ndɔ fuu maa yighee shə, kɨ shɨꞌ nu Nwi. Lùu vɨɨ faŋ vəŋ kee kɨ̀ɨ nə Nwi me, yɨ sheꞌ vənu faŋ yiŋwaa vəŋ kàw. 19Vɨɨ vɔ́ jwì nə ŋgaasə taa ŋwaa vɨɨ Nwi. Sɔꞌ zwitə mbi yibwə sɔꞌ vəŋ. Zwitə Ley Nwi kee bee lùu taa ŋwaa vəŋ me.
Viŋ kɨ gaŋtə yiŋwaa yiŋ, tɨ́ kaꞌ viŋ tɨŋ weꞌ
20Gə fɨ maa viŋ, vɨɨmba vaŋ faŋ mə kàw, viŋ gaŋtə yiŋwaa yiŋ, viŋ viŋ, tɨ́ kɨ kaꞌ məbiŋ wiŋ weꞌ, gə vɨsɨ vɨsɨ. Nu Nwi ŋkɨə faŋ viŋ biŋ nə, luu ŋkee nu ley faŋ ŋkə ndɔ̀ fɨ ghɔ Nwi. Viŋ shɔꞌtə Nwi ghee nshə, kɨ shɔꞌtə Nwi nə nu ŋkɨə faŋ Zwitə Ley Nwi də tɨ́ viŋ. 21Viŋ nuŋ fwi siŋ maa ŋkawnə Nwi faŋ Nwi kàw viŋ nə. Viŋ kɨꞌ gəŋsə fɨ ghɔ Yeso Kristo laa ŋwə ndɔ gaŋtə viŋ, kɔ̀ viŋ nə məbwey vəlwaŋ. 22Vɨɨ mɔ́ꞌ lùu shɔ faŋ tɔ vəŋ kee ta lèy maa Nwi me. Viŋ kee gəŋsə vɨɨ vɔ́, gàŋtə vəŋ, 23bwèysə vəŋ fɨ ghɔ wisə. Luu nə, vɨɨ vəmɔ́ꞌ lùu shɔ nɨzi, faŋ ŋkə bàw viŋ kee gəŋsə vəŋ, baa fèe vəŋ nɨzi, laa kɨ vəŋ yɨ viŋ ndi jɨɨ Nwi me. Ŋkee njwisə vəŋ kee lùu səley me, buꞌ vənu vəbwəvə vəŋ. Kɨ viŋ kɔŋ ghɔ shɔ me.
Bàw nsiŋ kɨ bəŋsə Nwi
24Nsiŋ kɨ bəŋsə Nwi faŋ ŋwə kìi wutə maa məyɨsə viŋ weꞌ maa nu Nwi, kee gù nu shɔ me. Kìi Nwi kìi wutə maa məsɔ yibɨsə yiŋ yinshə, tɨ́ kaꞌ viŋ ndɔ jwi nə məŋaytə, jwì tɨ̀ŋnə vɨsɨ Nwi, faŋ ŋwə kìi feenə nshə. 25Nsiŋ kɨ bəŋsə Nwi, faŋ luu sheꞌ ŋwə lùu Nwi nɨnɔŋ. Gaŋtə ŋwə gaŋtə nsiŋ fɨ yiba tɨta ŋwaa-nsiŋ Yeso Kristo. Kii sheꞌ Nwi kìi feenə, nə yikwalə nə wutə məsɔꞌ mbi. Nə luu nɨniŋ fɨ maa vənzi, baa lùu ndwə, ndɔ goꞌsə nɨniŋ vəshi və mbi və̀ vənshə. Ŋkə lùu nɨniŋ.