Efesɔs

Ŋwaꞌlə Efesɔs

Ŋwaꞌlə Pɔɔl tɨ́ vɨɨ Kristo fɨ shɨ Efesɔs

Taa ŋwaꞌlə ŋwə̀ Pɔɔl twelə faŋ Nwi kəə faynə vɨɨ vənshə laa vəŋ gu fa kəmuꞌ, Kristo luu tɔ vəŋ. Nwi nə shòꞌ vɨɨ vi, ndènə yibɨsə vəŋ buꞌ ŋwiŋ wi Yeso Kristo. Pɔɔl baa kəə laa vɨɨ Kristo toꞌ ghuu yitoꞌ yuu ŋkə kuꞌnə tɨ́ vəŋ, baa gì laa, gəŋsə Nwi kwàlə shɔ̀ɔ wutə zwitə bwə.

Nshəŋtə vɨɨ Kristo lùu yaa ŋwaa wə faŋ Kristo lùu tɔ ki, nə yuu ŋii faŋ Kristo lùu mfay yi, tɨ́ꞌnə me yaa wəzwi məndaa faŋ Kristo lùu ndəə wi.

Məsenə vəwaytə:

Vənzi və ŋwaꞌlə 1.1-2

Kristo ghɔ nshəŋtə vɨɨ Kristo 1.3–3.21

Nshinə yifi vɨɨ Kristo 4.1–6.20

Vəndwə və ŋwaꞌlə 6.21-24

Faŋ Pɔɔl nə shɔ̀ꞌtə vɨɨ Nwi fɨ shɨ Efesɔs

¹Lùu mə, Pɔɔl, faŋ mə tɔ̀ŋ ŋwaꞌlə ŋwə̀ tɨ́ vɨɨ Kristo fɨ shɨ Efesɔs, faŋ vəŋ nùŋ fwisə vəŋ maa Yeso Kristo. Nə shòꞌ Nwi shòꞌ mə, yɨ̀ laa mə kiasə gù wuu ntɔŋ Kristo. ²Nwi, Tii ŋwaa-nsiŋ, nə tɨta Yeso Kristo, tu mənɔŋ-bwaŋnə tɔ viŋ, kɔ viŋ nə məduꞌ-nyɔŋ!

Faŋ bàw laa nsiŋ kɨ bəŋsə Nwi buꞌ gəŋsə si, faŋ ŋwə nə bwèysə nsiŋ maa yizii Kristo

³Nsiŋ kɨ bəŋsə Nwi, tɨɨ tɨta ŋwaa-nsiŋ Yeso Kristo, faŋ ŋwə nə kɔ̀ ŋgwisə mənɔŋ-bwaŋnə yinshə tɨ́ nsiŋ, kɔ vənu və Zwitə Ley Nwi faŋ mbə lùu taa yizɔ tɨ́ nsiŋ fɨ jɨŋ Kristo. ⁴Ŋwə nə shòꞌ nsiŋ buꞌ Yeso Kristo ŋkee maa yighee njyə faŋ ŋwə nə kee ta tey kɨ bɔŋ mbi me, laa nsiŋ ndɔ baw fɨ̀nə ŋwə, laa tuu ŋkee wee-ndoꞌ kee lùu maa nsiŋ yikəꞌ ŋwə me. Ŋwə nə kàw nsiŋ dɨdɨꞌ, ⁵shòꞌ nsiŋ shù fɨshi, laa nsiŋ ndɔ luu ŋkee vaŋ vi fɨ yiba jɨŋ Yeso Kristo. Ŋkə nə bàw tɨ́ ŋwə maa məyɨsə nɨniŋ, ⁶laa nsiŋ kɨ bəŋsə nu ŋkɨə faŋ Nwi gaŋtə nsiŋ shɔ nə, faŋ ŋkə bàw shɨlə nə. Ŋwə nə kèe gəŋ saŋ-nsiŋ buꞌ ŋwiŋ wi faŋ ŋwə kaw ŋwə dɨdɨꞌ. ⁷Ŋwiŋ wi ghɔ́ nə kù tɔ nsiŋ, yɨ laa nsiŋ fuu fɨ taa nsɔꞌ Nwi buꞌ mənshi mi. Nwi ndenə yibɨsə nyaa-nsiŋ, buꞌ faŋ ŋwə kèe gəŋ saŋ-nsiŋ dɨdɨꞌ. ⁸Ŋwə nə gaŋtə nsiŋ shɔ̀ɔ ki, kɔ̀ ŋgwisə yitɔfə tɨ́ nsiŋ, ŋàꞌsə sɨ ŋaa-nsiŋ, ⁹tɨ́ kaꞌ nsiŋ kɔꞌ kɨɨ nə nu ŋkɨə faŋ ŋkə lùu taa ŋkɨɨ Nwi, faŋ ŋkə nə ndènə fɨ yikəꞌ vɨɨ nə. Nu kɔ́ nə bàw tɨ́ ŋwə maa məyɨ nɨniŋ, ¹⁰faŋ yighee ndɔ kɨ kuꞌ nə. Maa yighee yɔ́ ŋwə nə tɔ̀ŋ Kristo laa ŋwə baytə vətɔ vənshə faŋ mbə lùu yizɔ, nə mbɨə faŋ mbə lùu nsi, laa Kristo ndɔ sɔꞌ mbə vənshə. ¹¹Nwi, faŋ ŋwə yɨsə vənu vənshə faŋ ŋwə nə gì fɨ taa fwi ŋwə, baa shòꞌ nsiŋ maa mbii vɨɨ fɨ yiba jɨŋ Kristo, buꞌ ŋkitə Nwi maa nu ŋkɨə faŋ ŋwə nə nùŋ, shù fɨ maa vənzi. ¹²Nɨniŋ laa vɨɨ kɨ bəŋsə yikwalə Nwi buꞌ nsiŋ. Lùu nɨniŋ tɨ́ yia faŋ yia nə duꞌtə yia nuŋ fwi sia maa Kristo maa yighee vɨsɨ. ¹³Gə fɨ maa viŋ, faŋ viŋ nə zɔ̀ nu yinsəŋ Nwi sheꞌ fɨ yiba, viŋ zɔ̀ ntɔŋ yijəə Nwi nɨzi, faŋ nyə bweysə viŋ nɨzi. Viŋ kɨ nii nùŋ fwi siŋ maa Kristo nɨzi. Nwi kɔ viŋ nə Zwitə Ley ki, faŋ ŋwə nə kɔ̀ꞌnə maa məkɔ tɨ́ vɨɨ nə. Zwitə Ley Nwi kɔ́ lùu shwenə ki mbɨɨ ŋwaa viŋ, ¹⁴baa luu mfɔŋsə vətɔ faŋ nsiŋ ndɔ zɨ. Zwitə Ley kɔ́ baa luu shwenə faŋ ŋkə də̀ laa Nwi ndɔ yweysə nwaa vɨɨ vi, tɨ́ la vɨ kɨ bəŋsə yikwalə Nwi.

Faŋ Kristo lùu tɨɨ vənu vənshə

¹⁵Nɨniŋ, shù fɨ nə faŋ mə nə zɔ laa viŋ nùŋ fwi siŋ maa tɨta Yeso, baa nə laa viŋ kɨ kaw vaŋ-nshwi viŋ vɨɨ Nwi, ¹⁶mə kɨ bwaŋ Nwi tɔ viŋ. Mə lumə viŋ tɔ tɔ taa məshɔꞌtə, faŋ mə shɔꞌtə Nwi. ¹⁷Mə shɔꞌtə Nwi, tɨɨ tɨta ŋwaa-nsiŋ Yeso Kristo, ŋkee tɨta Nwi faŋ vənu vi bàw shɨlə nə, laa ŋwə kɔ Zwitə ki tɨ́ viŋ. Ŋkə kɨ kɔ viŋ nə yitɔfə, baa twelə ŋiꞌ nu ki tɨ́ viŋ, viŋ kɨɨ nə ŋwə. ¹⁸Mə baa buꞌ ghɔ tɨ́ Nwi, laa ŋwə yɨsə sɨ ghiŋ ŋaꞌsə, tɨ́ kaꞌ viŋ kɨ̀ɨ nə ŋiꞌ nu ŋkɨə faŋ ŋwə tìi viŋ shɔ nə, ndɔ kɨɨ laa məbwey vəlwaŋ faŋ ŋwə kɔ̀ꞌnə tɨ́ vɨɨ vi nə, luu ŋkee nu jəə. ¹⁹Bàw viŋ kɨɨ nɨzi faŋ ŋwə wèꞌ shɔ̀ɔ ki. Ŋwə faꞌ taa ŋwaa nsiŋ, vɨɨ məbiŋ vi, ŋkee nə wutə ki kəkwalə. ²⁰Ŋwə nə də̀ wutə ki kɔ́ mbɨɨ ŋwaa Kristo, faŋ ŋwə nə ywèysə ŋwə fɨ shɨ yiku, nùŋ ŋwə maa kwiŋ maꞌnə wi taa yizɔ. ²¹Ŋwə shɔɔ vɨɨ məsɔꞌ mbi vənshə, nə vəwutə vənshə, nə vətɨɨ və vəwutə vənshə. Yizii yi kwalə shɔ̀ɔ təzii tənshə fɨ mbi nyə̀, nə fɨ mbi yifi faŋ nyə ndɔ jwi. ²²Nwi nùŋsə mbi yinshə ghɔ Kristo, laa ŋwə sɔꞌ mbi yinshə, baa yɨ̀sə ŋwə luu tɔ vɨɨ məbiŋ Nwi. Kii ŋwə kìi vɨɨ Nwi vənshə, sheꞌ faŋ tɔ wə sɔ̀ꞌ ŋwaa wi nshə. ²³Nwaa vɨɨ məbiŋ Kristo luu sheꞌ yaa ŋwaa Kristo. Ŋwə lwàŋ taa fwisə vəŋ vənshə, yɨ̀ laa vənu vənshə faynə maa ŋkɨɨ Nwi.

Faŋ Nwi kɔ məbwey vəlwaŋ tɨ́ nsiŋ buꞌ Yeso Kristo

¹Viŋ yaa luu vəŋku və vɨɨ, buꞌ vənu vəbwəvə viŋ nə ghuu yitoꞌ kiŋ kəbwəkə. ²Yighee vɨsɨ yɔ́, viŋ nəə shɔɔ fɨ maa jɨɨsə bwəsə taa mbi, zɔnə tɨɨ vəzwitə vəbwəvə fɨ taa mbi faŋ ŋwə sɔꞌ vɨɨ mbɨə faŋ vəŋ twey nu Nwi ndwə nə. ³Nə luu yighee vɨsɨ, nsiŋ vənshə nəə toꞌ ghuu yitoꞌ kaŋ-nsiŋ taa ŋwaa vɨɨ mətwey nu Nwi, yɨsə vənu mbɨə faŋ mbasə ŋwaa ŋwaa-nsiŋ nəə kaw, nə vənu mbɨə faŋ nsiŋ nəə bɨꞌtə fɨ taa fwi saŋ-nsiŋ. Nɨniŋ, nsiŋ yaa luu vɨɨ faŋ nsɔꞌ Nwi lùu tɔ vəŋ, buꞌ fwi yibwə nyaa-nsiŋ, sheꞌ yuu vəŋ. ⁴Luu nə, Nwi faŋ ŋwə kee gəŋsə vɨɨ dɨdɨꞌ nə, ŋwə nə kaw nsiŋ shɔ̀ɔ, ⁵kɔ̀ məbwey tɨ́ nsiŋ fɨ yiba Kristo maa yighee njyə faŋ nsiŋ nəə kɨ bii vəŋku və vɨɨ taa nu bwə kaŋ-nsiŋ nə. Luu sheꞌ buꞌ gəŋsə Nwi, laa Nwi bweysə viŋ ndwə. ⁶Ŋwə nə ywèysə nsiŋ fɨ yiba jɨŋ Kristo, nùŋsə nsiŋ yizɔ, nsiŋ vɨ vəŋ. ⁷Lùu faŋ ŋwə də ŋkawnə yi tɨ́ vɨɨ fɨ taa mbi yifi faŋ nyə ndɔ jwi nə. Vɨ ndɔ kɨɨ nə gəŋsə Nwi fɨ maa nu ŋkɨə faŋ ŋwə nə kee gəŋ saŋ-nsiŋ dɨdɨꞌ, gaŋtə nsiŋ dɨdɨꞌ buꞌ Yeso Kristo nə. ⁸Nwi nə bweysə viŋ buꞌ gəŋsə Nwi, faŋ viŋ nùŋ fwi siŋ maa Kristo. Kee bee gaŋtə viŋ gàŋtə yiŋwaa yiŋ me; nə key sheꞌ Nwi kèy viŋ shɔ. ⁹Viŋ kee bwèy buꞌ vənu vəjəəvə viŋ faŋ viŋ yɨsə me. Nɨniŋ laa kɨ wə kɨ bəŋsə ŋwaa wi me. ¹⁰Nsiŋ lùu fa faŋ nə bɔ̀ŋ Nwi. Ŋwə bɔ̀ŋ nsiŋ buꞌ Yeso Kristo, laa nsiŋ kɨ yɨsə vənu vəjəəvə mbɨə faŋ ŋwə nə nùŋsə shù fɨ maa yighee vɨsɨ, laa nsiŋ ndɔ kɨ toꞌ ghuu yitoꞌ kaŋ-nsiŋ maa jɨɨ yɔ́ nə.

Faŋ kaꞌ viŋ kee baa lùu vəndɔ me; viŋ lùu vɨɨ ŋiꞌ ŋii Nwi

¹¹Nɨniŋ, viŋ lumə laa viŋ yaa luu vɨɨ məmanə Nwi shù fɨ taa njyoꞌsə vənshwi viŋ. Vɨɨ mbɨə faŋ vɨ tii vəŋ nə vɨɨ faŋ vɨ nə nàysə, buꞌ faŋ vɨ nàysə ŋwaa vəŋ nə ghɔ nə, vəŋ nə tìi viŋ nə tənswia. ¹²Nə luu maa yighee yɔ́, viŋ vɨ Kristo kee lùu nə nu me. Viŋ nə luu vətɔŋ taa nu vɨɨ Isirayl, kee ŋìi taa məkee mbɨə faŋ Nwi nə gwìa ghɔ vɨ vɨɨ Isirayl me, faŋ Nwi nə kɔ̀ꞌnə vənu tɨ́ vəŋ nə me. Viŋ nə dùꞌ sheꞌ fu, kee kɨꞌ nu jəə faŋ ŋkə taa jwi nə me, kee bee lùu viŋ vɨ Nwi me. ¹³Luu nə, ndwə faŋ viŋ gù fa kəmuꞌ, viŋ vɨ Kristo nə, viŋ faŋ viŋ nə luu ntaŋ fɨ yɨ Nwi yighee vɨsɨ, viŋ shə̀ŋtə jwi yɨ Nwi buꞌ nu mənshi mə Yeso Kristo, faŋ ŋwə nə kù tɔ nsiŋ nə. ¹⁴Nshɨ-tɔ Kristo yɨsə nsiŋ duꞌ nyɔŋ nsiŋ nsiŋ. Ŋwə fàynə vɨɨ Isirayl nə vɨɨ tɔmə day, laa nsiŋ luu fa kəmuꞌ ndwə. Ŋwə bàꞌsə ŋkɔꞌ njyə faŋ nyə nə gaasə vɨɨ nə. Nɨniŋ laa ŋwə nə metə mbeenə vəŋ, faŋ ŋwə nə kɔ̀ ŋwaa wi tɨ́ yiku nə. ¹⁵Ŋwə nə ndìsə nuŋsə njyə faŋ Nwi nə kɔ̀ tɨ́ vɨɨ Isirayl, ndì kəŋ vɨɨ vɔ́ vəbɔɔ nə, kìasə vəŋ, vəŋ lùu fa kəmuꞌ ndwə fɨ yiba jɨŋ Kristo faŋ ŋwə nə fàynə yigisə vəŋ. ¹⁶Nɨniŋ, ŋwə mètə nsɔꞌ vəŋ vəbɔɔ, yɨ̀ vəŋ lùu fa kəmuꞌ ghɔ vɨ Nwi. Lùu nɨniŋ buꞌ yiku Kristo, faŋ ŋwə nə kù tɔ vəŋ fuu fəŋkɔꞌ fə ŋkɨꞌsə nə. ¹⁷Ŋwə nə jwì nɨniŋ, fɨꞌtə ntɔŋ yijəə tɨ́ viŋ, viŋ vɨɨ faŋ viŋ yaa luu ntaŋ nə, nə tɨ́ vɨɨ mbɨə faŋ vəŋ nə luu nshənə. Ntɔŋ yijəə yɔ́ də̀ jɨɨ məduꞌ nyɔŋ tɨ́ nsiŋ. ¹⁸Luu sheꞌ buꞌ ŋwə laa nsiŋ kìi jɨɨ, ŋìi yɨ tɨta Nwi taa Zwitə ki kəmuꞌ ndwə. ¹⁹Nɨniŋ, viŋ kee baa lùu vəndɔ me, viŋ kɨ nii lùu mbinə-mbinə taa ŋwaa vɨɨ ley Nwi, baa lùu vɨɨ ŋiꞌ ŋii Nwi. ²⁰Viŋ lùu ŋii Nwi, faŋ vɨ bɔ̀ŋ viŋ fuu vɨɨ ntɔŋ Kristo nə nshiisə-ŋii sɔghɔ. Vɨɨ ntɔŋ Kristo vɔ́ lùu shɨŋii kɔ́. Yeso Kristo luu ŋoꞌ mfay ŋii yɔ́. ²¹Ŋii yɔ́ yinshə tɨ̀ŋ fuu yi, kɨ ta, gù ŋii yiley tɨ́ tɨta Nwi. ²²Nɨniŋ, vɨ fìanə viŋ shɔ nɨzi, maa ŋii Nwi yɔ́ faŋ Zwitə Ley Nwi shi taa tey yi.

Ŋiꞌ faꞌ Nwi faŋ Pɔɔl nə fàꞌ

¹Lùu ŋiꞌ nu ŋkɨə faŋ mə, Pɔɔl, lùu wuu ŋii mfiŋ buꞌ Yeso Kristo ndwə, buꞌ laa mə nə fɨꞌtə ntɔŋ yijəə Nwi tɨ́ vɨɨ tətɔŋ fu. ²Maa viŋ nə zɔ kɔ̀ŋ ŋiꞌ faꞌ kaŋ maa məndeynə nu Nwi, faŋ Nwi nə nùŋsə mə shɔ nə, laa mə kɨ gisə nu ki, faŋ ŋwə gaŋtə vɨɨ shɔ nə, tɨ́ viŋ. ³Ŋwə nə fùu yikəꞌ mə, twèlə ŋiꞌ nu ki shee, faŋ ŋkə nə ndènə fɨ ghɔ mə. Mə duꞌtə mə nyɔꞌ kɔ̀ŋ nu Nwi kɔ́ sheꞌ kətɨtiꞌ. ⁴Viŋ taa kɨ tii vəshəŋ və ŋwaꞌlə vɔ́, buu viŋ taa ye faŋ mə kɔꞌ kɨɨ nə ŋiꞌ nu Kristo kɔ́, faŋ ŋkə nə ndènə maa yighee vɨsɨ nə, ⁵faŋ Nwi nə kee ta yɨsə laa vɨɨ kɨɨ nə nu kɔ́ me. Sheꞌ ndwə ŋwə yɨsə Zwitə Ley ki twelə tɨ́ vɨɨ ntɔŋ Kristo nə tɨ́ nshiisə-ŋii sɔghɔ, faŋ luu vɨɨ ley vi. ⁶Ŋiꞌ nu kɔ́ lùu laa, vɨɨ mbɨə faŋ vɨ nə kee bì vəŋ yaa vɨɨ Jus me, lùu vɨɨ məzɨ vətɔ və Nwi nɨzi, baa lùu way ŋwaa vɨɨ Nwi, ndɔ zɨ məbwey vəlwaŋ nɨzi, faŋ Nwi nə kɔ̀ꞌnə maa məkɔ tɨ́ vɨɨ nə. Lùu nɨniŋ buꞌ Yeso Kristo, faŋ vəŋ bìŋ ntɔŋ yijəə yi nə. ⁷Mə nə kìasə gù wuu faꞌ ntɔŋ yijəə yɔ́, faŋ Nwi nə kèe gəŋ saŋ, kèy mə nə faꞌ ghɔ́ nə, sùŋtə mə ŋkee nə wutə ki kəkwalə. ⁸Nwi nə kɔ̀ faꞌ Nwi ghɔ́ ŋkee tɨ́ mə, faŋ mə luu ŋkee wuu tɨtiꞌ fɨ taa ŋwaa vɨɨ ley Nwi, laa mə kɨ saynə ntɔŋ yijəə Kristo yɔ́ faŋ luu ŋkee nu kwalə nə, taa ŋwaa vɨɨ tətɔŋ fu, ⁹tɨ́ kaꞌ mə kɨ ŋaꞌsə sɨ vəŋ, vəŋ kɨɨ nə jɨɨ njyə faŋ Nwi, wuu məbɔŋ vətɔ vənshə, yɨsə vənu. Jɨɨ yɔ́ nə ndènə taa njyoꞌ ŋwə shù fɨshi. ¹⁰Ŋwə yɨ̀sə nɨniŋ laa vɨɨ məsɔꞌ mbi nə vətɨɨ və wutə fɨ taa yizɔ zɔ sheꞌ ndwə fɨ shuu nwaa vɨɨ Nwi, faŋ yitɔfə Nwi lùu taŋ taŋ maa vənu vənshə. ¹¹Nɨniŋ, nu ŋkɨə faŋ ŋkə nə luu maa ŋkɨɨ Nwi, shù ŋkee fɨshi nə, ŋkə fuu ntee ndwə, faŋ ŋwə nə tɔ̀ŋ Yeso Kristo, tɨta ŋwaa-nsiŋ. ¹²Nsiŋ kii fwi yizutə vɨsɨ Nwi buꞌ Kristo ndwə. Kɨ kaꞌ nsiŋ jìa fwi saŋ-nsiŋ, gə̀ ye Nwi nə məŋaytə, buꞌ faŋ nsiŋ nùŋ fwi saŋ-nsiŋ maa Yeso Kristo. ¹³Nɨniŋ, mə buꞌ ghɔ laa kɨ viŋ bwa maa ŋɨꞌ njyə faŋ nyə ŋìi maa mə buꞌ viŋ me, buꞌ laa lùu nu faŋ ŋkə də̀ laa Nwi kaw viŋ.

Faŋ bàw laa nsiŋ kɨ bəŋsə Nwi buꞌ ŋkawnə yi

¹⁴Lùu ŋiꞌ nu ŋkɨə faŋ mə tùŋ vətɔ-vəyəə vaŋ nsi vɨsɨ tɨta Nwi, ¹⁵faŋ ŋwə nə bɔ̀ŋ ŋgwisə vɨɨ vənshə fɨ taa yizɔ nə fɨ shɨ nsi, shù təzii təvəŋ. ¹⁶Faŋ yikwalə Nwi lùu yiyaŋ dɨdɨꞌ nə, mə buꞌ ghɔ tɨ́ ŋwə laa ŋwə yɨsə Zwitə ki kuꞌsə wutə maa viŋ, tɨ́ kaꞌ fwi siŋ weꞌ maa nu ki. ¹⁷Kristo baa nɔ̀ŋ taa fwisə viŋ, faŋ viŋ nùŋ fwi siŋ maa ŋwə, laa viŋ kɨ kaw ŋwə ŋkee dɨdɨꞌ. Mə buꞌ ghɔ tɨ́ Nwi laa viŋ nuŋ fwi siŋ maa ŋwə sheꞌ faŋ vɨ yaa kɨ bia tɨ taa nsi, ŋkə ŋìisə ghay ghi taa shɔꞌ, tɨŋ ŋkee kəweꞌ. ¹⁸Viŋ tɨ̀ŋ nɨniŋ taa ŋkawnə Nwi, buu kaꞌ viŋ kɨ̀ɨ nə nu Nwi, viŋ vɨ vɨɨ Nwi vənshə, baa kɨɨ faŋ ŋkə luu ŋkee nu kwalə maa jɨɨsə sənshə. ¹⁹Nɨniŋ, viŋ taa kɨɨ nə ŋkawnə Kristo nɨzi, faŋ nyə kwàlə shɔ̀ɔ. Kaꞌ yitɔfə wə kee kuꞌnə maa məkɨɨ nə ŋkawnə yi, faŋ ŋwə kàw vɨɨ shɔ̀ɔ ki nə me. Faŋ viŋ kɨ̀ɨ nə ŋkawnə yi yɔ́, buu vənu və Nwi vənshə ŋii taa fwisə viŋ, lwàŋ nee, fùꞌ.

²⁰Nwi kɔꞌ kɨɨ maa məyɨ nu faŋ ŋkə shɔ̀ɔ vənu vənshə, shɔ̀ɔ vənu mbɨə faŋ nsiŋ buꞌ ghɔ shɔ tɨ́ ŋwə, baa shɔ̀ɔ vənu mbɨə faŋ nsiŋ bɨꞌtə. Wutə ki kwàlə shɔ̀ɔ ki, faꞌ taa fwisə nsiŋ. ²¹Nɨniŋ, faŋ nsiŋ lùu fa kəmuꞌ, nsiŋ vɨ Yeso Kristo nə, nsiŋ kɨ bəŋsə Nwi yəəsə yəəsə, gə ziꞌ maa vəndwə və mbi. Ŋkə gòꞌ nee.

Bàw nwaa vɨɨ Nwi lùu nə nu kəmuꞌ, faꞌ vəfaꞌ vəvəŋ tɔ tɔ

¹Nɨniŋ, mə Pɔɔl, faŋ mə ŋìi mfiŋ buꞌ yizii tɨta Yeso nə, mə tɨsə viŋ laa viŋ kɨ toꞌ ghuu yitoꞌ kiŋ faŋ ŋkə kùꞌnə maa vənu mbɨə faŋ Nwi nə tìi viŋ shɔ nə. ²Viŋ bwasə yiŋwaa yiŋ nsi, kɨ yɨsə vənu fɨ taa bwaŋnə. Viŋ jia fwi siŋ, kɨ kawnə yiŋwaa yiŋ ghee nshə. ³Kɨɨtə maa məkii fwi yimuꞌ fɨ taa Zwitə Nwi. Nɨniŋ, viŋ taa duꞌ nyɔŋ viŋ viŋ. ⁴Nwaa Kristo luu muꞌ, Zwitə Nwi luu kəmuꞌ, sheꞌ faŋ nu ŋkɨə faŋ viŋ tə sɨ shɔ nə, lùu kəmuꞌ nɨzi. Nwi nə tìi viŋ maa nu kɔ́ kəmuꞌ nə. ⁵Tɨɨ faꞌ wiŋ luu muꞌ. Viŋ biŋ Nwi maa jɨɨ yimuꞌ. Muu mə Nwi faŋ viŋ nə fi nə, lùu fəmuꞌ. ⁶Nwi, tɨta vɨɨ vənshə luu muꞌ. Sɔꞌ ŋwə sɔꞌ nsiŋ vənshə, faꞌ taa ŋwaa nsiŋ vənshə, shi taa fwisə nsiŋ vənshə. ⁷Ŋwə nə tu mənɔŋ-bwaŋnə tɔ nsiŋ vənshə, key nsiŋ vənshə nə vəkeynə vi, sheꞌ faŋ Kristo fɨ̀ꞌ vəkeynə vɔ́ tɨ́ nsiŋ tɔ tɔ. ⁸Nɨniŋ, ŋwaꞌlə Nwi gì laa, «Ŋwə nə kòꞌ yizɔ nə vəbuꞌ və yighaw faŋ ŋwə jiatə, kèy vɨɨ nə vətɔ.» 4.8 Sam 68.19.⁹Faŋ vɨ nyɔ̀ꞌ laa ŋwə nə kòꞌ yizɔ nə, maa ŋkə də̀ laa ŋwə nə bɨ sìꞌ fɨ yizɔ, ŋìi shɨ nsi. ¹⁰Wə ntɨə faŋ ŋwə nə sìꞌ fɨ taa yizɔ nə, lùu wə ntɨə faŋ ŋwə nə baa koꞌ gə̀ taa yizɔ ntaŋ, laa ŋwə lwesə mbi yinshə. ¹¹Vəkɔ vi faŋ ŋwə nə kɔ̀ tɨ́ vɨɨ nə, lùu laa vɨɨ mɔ́ꞌ lùu vɨɨ ntɔŋ vi, vɨɨ mɔ́ꞌ luu nshiisə-ŋii sɔghɔ, vɨɨ mɔ́ꞌ luu vɨɨ məfɨꞌtə nu Nwi, vɨɨ mɔ́ꞌ luu vɨɨ mətɨsə vɨɨ, vɨɨ mɔ́ꞌ luu vɨɨ mədeesə. ¹²Ŋwə nùŋ vɨɨ vɔ́ nɨniŋ, laa vəŋ kɨ lootə vɨɨ Nwi, vəŋ kuꞌnə maa məfaꞌ faꞌ vəŋ tɨ́ Nwi, laa ŋwaa Kristo kɨ gə vɨsɨ vɨsɨ. ¹³Nɨniŋ, nsiŋ vənshə ndɔ luu fa kəmuꞌ maa nu ŋkɨə faŋ nsiŋ nùŋ fwi saŋ-nsiŋ maa Kristo, Wee Nwi nə, kɨ̀ɨ nə ŋwə, baa nə nu ki ŋkee jəə. Nɨniŋ nə, nsiŋ ta, gù vɨɨ taanə maa nu Nwi, nə vɨɨ faŋ nu Kristo lwàŋ taa fwisə vəŋ. ¹⁴Kɨ nsiŋ baa luu yaa vaŋmbwaa me, yuu kɨ toꞌ kwiŋ nshə, zɔ̀ ntɨsə sənshə buꞌ mənay vɨɨ, maa jɨɨsə nsɨə faŋ vəŋ bweꞌsə vɨɨ shɔ nə. ¹⁵Bàw nsiŋ kɨ toꞌ sheꞌ maa jɨɨ yinsəŋ, kàw Yeso Kristo faŋ ŋwə lùu tɔ taa ŋwaa nsiŋ nə. Nsiŋ kɨ weꞌ maa nu ki, gə̀ vɨsɨ vɨsɨ. ¹⁶Faŋ nsiŋ lùu ŋwaa Kristo, Kristo lùu tɔ taa ŋwaa nsiŋ nə, ŋwə yɨ̀ vədɨꞌ vənshə fɨ maa ŋwə ghaytə fàynə, buꞌ laa vəyəə vi vənshə faynə̀, faŋ mfɨꞌ wutə vəŋ kùꞌnə tɔ tɔ maa məfaꞌ faꞌ nə, ŋwaa ghɔ́ nshə ta, gə vɨsɨ, faŋ vəlaŋ vi kawnə vəŋ vəŋ nə.

Nshinə vɨɨ Kristo

¹⁷Nɨniŋ, mə gì tɨ́ viŋ, tɨsə viŋ maa yizii tɨta Yeso laa, kɨ viŋ kɨ toꞌ ghuu yitoꞌ kiŋ yaa vɨɨ məmanə Nwi me, faŋ vəŋ toꞌ nə nu vəmfaw vəŋ faŋ vəŋ beꞌsə nə. ¹⁸Mbɨꞌtə vəŋ kee ley me. Məbwey Nwi bəə fɨ taa fwisə vəŋ, buꞌ faŋ vəŋ kee kɨ̀ɨ nə nu me, fwisə vəŋ fɨ̀. ¹⁹Faŋ fwisə vəŋ lùu yaa ŋku fa nə, vəŋ kɔ ŋwaa vəŋ maa məzɨ shɨ, yɨsə vənu vəbwəvə vənshə. Fwisə vəŋ ndɔ maa vətɔ. ²⁰Gə fɨ maa viŋ, viŋ nə zwètə nu Kristo, faŋ ŋkə luu ŋkee nɨŋkwiŋ. ²¹Viŋ nə kee zɔ̀ nu Kristo yimu? Maa vɨ nə dèesə viŋ nə nu kɔ́? Maa viŋ kɨɨ nə nu yinsəŋ Yeso, ²²faŋ lùu laa, viŋ baꞌsə vənu vəmwavə fɨ maa viŋ, faŋ viŋ nəə yɨsə yighee vɨsɨ nə, faŋ fwi siŋ nəə ndɔ maa vətɔ və məbweꞌsə ŋwaa, faŋ mbə bɨsə yiŋwaa yiŋ nə. ²³Nɨniŋ, nu kiŋ nə luu laa viŋ kwiinə fwi siŋ, nsə bɔŋsə maa Zwitə Nwi. ²⁴Viŋ mɔꞌ nshinə yifi maa viŋ faŋ vɨ nàysə maa ŋkɨꞌnə Nwi. Viŋ kɨ toꞌ maa jɨɨ yiloomə, baa nə yaa vɨɨ ley Nwi maa yinsəŋ.

²⁵Nɨniŋ, viŋ meꞌtə təba, kɨ gisə nu ŋkɨə faŋ ŋkə lùu nu yinsəŋ viŋ viŋ, buꞌ laa nsiŋ lùu laŋnə ŋwaa kəmuꞌ. ²⁶Kɨ luu fwi siŋ za, kɨ viŋ yɨ nu bwə me, kee biŋ laa shɨshwi fiŋ, maa laa viŋ mètə ntay yiŋ me. ²⁷Kɨ viŋ kɔ jɨɨ tɨ́ tɨɨ vəzwitə vəbwəvə laa ŋwə ŋii taa ŋwaa viŋ me. ²⁸Kɨ ndɔꞌ baa kɨ shaw fa me! Bàw ŋwə faꞌ nə ghɔ, baa nə wutə, tɨ́ kaꞌ ŋwə yɨ̀ nu jəə, baa gàŋtə vɨɨ ŋɨꞌ. ²⁹Kɨ tuu ŋkee nu bwə fuu fɨ shuu viŋ me; kɨ fuu sheꞌ yigisə yijəənə, tɨ́ kaꞌ nyə jwi nə mənɔŋ-bwaŋnə tɨ́ vɨɨ mbɨə faŋ vəŋ zɔ yigi yɔ́, gàŋtə vəŋ maa nu ŋkɨə faŋ ŋkə ghɔꞌ vəŋ. ³⁰Kɨ viŋ yɨ laa Zwitə Ley Nwi luŋ me, buꞌ laa Nwi kɔ Zwitə ki kɔ́ tɨ́ viŋ, shwèe shwenə ki maa viŋ, yɨ̀ laa viŋ ndɔ fuu fɨ taa nsɔꞌ Nwi maa shi ŋkɨə faŋ vɨ ndɔ bweysə vɨɨ fɨ fuŋ. ³¹Bàw viŋ meꞌ fwi yibiŋ, nə too bwənə, nə məshəsə, nə ndisə, fɨ taa ŋwaa viŋ. Viŋ meꞌ vənu vəbwəvə vənshə! ³²Viŋ kɨ kawnə wə nə wə, kii fwi gəŋsə, ndenə yibɨsə wə nə wə, sheꞌ faŋ Nwi nə ndènə yibɨsə yiŋ buꞌ Kristo nə.

Faŋ bàw laa viŋ kɨ toꞌ fɨ taa məley Nwi

¹Nɨniŋ, viŋ ndi ghuu yitoꞌ Nwi buꞌ laa viŋ lùu vaŋ vi, faŋ ŋwə kaw viŋ. ²Viŋ kɨ toꞌ yitoꞌ yiŋ nə ŋkawnə, sheꞌ faŋ Kristo nə kàw viŋ nə, kù tɔ nsiŋ nə, vɨ feꞌ ŋwə shɔ tɨ́ Nwi. Ŋkə nə bàw tɨ́ Nwi nɨniŋ.

³Kɨ nu mətoꞌ sakə, nə nshinə yibwə, nə nu məzɨ shɨ luu taa ŋwaa viŋ me. Kɨ vɨ kee bee gisə kɔ̀ŋ kəŋ vənu vɔ́ me, tɨ́ kaꞌ viŋ kùꞌnə yaa vɨɨ ley Nwi. ⁴Kɨ yigisə ŋkɔmə, nə yigisə vəmfaw, nə yigisə yibwənə faŋ nyə kee yikuꞌnə me, kee kɨ fuu fɨ shuu viŋ me! Viŋ bee kɨ kii kɔ məbwaŋ tɨ́ Nwi. ⁵Viŋ kɔꞌ kɨɨ ŋkee jəə laa kɨ tuu wuu mətii vəki nə mətoꞌ sakə, tɨꞌnə me, yɨ-kəbwə, tɨꞌnə me wuu məzɨ shɨ, ndɔ kɨ shi taa ŋwaa vɨɨ nu yifwàŋ Kristo nə Nwi me. Kəŋ vɨɨ vɔ́ lùu yaa vɨɨ məfeꞌ vənwi vədayday. ⁶Kɨ wə bweꞌsə viŋ nə yigisə dayday buꞌ vənu vɔ́ me! Luu buꞌ kəŋ vənu vɔ́ faŋ nsɔꞌ Nwi ndɔ luu tɔ vɨɨ mbɨə faŋ vəŋ kee zɔnə Nwi me.

⁷Nɨniŋ, kɨ viŋ vɨ vəŋ faynə maa vənu vɔ́ me! ⁸Nə luu maa yighee vɨsɨ, viŋ luu vɨɨ taa mfiŋsə. Luu ndwə, viŋ lùu vɨɨ taa məley buꞌ tɨta Yeso. Nɨniŋ, viŋ kɨ toꞌ yaa vaŋ taa məley. ⁹Faŋ viŋ lùu taa məley ghɔ́, buu viŋ taa kɨ yɨsə vənu vəjəəvə, nə vənu vəloomə, nə vənu və yinsəŋ. ¹⁰Viŋ kɨ kwaꞌtə tɔ kiŋ maa nu ŋkɨə faŋ ŋkə bàw tɨ́ tɨta ŋwaa-nsiŋ. ¹¹Kɨ viŋ kwaŋ ghɔ taa vənu vədayday fɨ taa mfiŋsə me. Viŋ bee kii də vənu vɔ́ ntee laa lùu vənu vəbwəvə. ¹²Kəŋ vənu vɔ́ faŋ vɨ yɨsə taa vəndenə, lùu vənu vəbwəvə. Ŋkee maa məgi kɔ̀ŋ vənu vɔ́, lùu nu bwə. ¹³Luu nə, məley Nwi ŋìi taa mbi, vənu fuu ntee, vɨ ye. Vənu vənshə faŋ mbə lùu taa məley, lùu vəley. ¹⁴Luu sheꞌ faŋ vɨ gi laa, «Yenə mɔɔ, wuu mbweysə, ndɔ fɨ shɨ yiku, buu Kristo taa kɔ məley tɨ́ ghɔ.»

¹⁵Nɨniŋ, viŋ kɨ shiinə yiŋwaa yiŋ faŋ viŋ toꞌ ghuu yitoꞌ kiŋ, kee toꞌ yaa vɨɨ faŋ vəŋ kee lùu vətɔfə me, toꞌ yaa vɨɨ yitɔfə. ¹⁶Viŋ toꞌ yaa vɨɨ Nwi faŋ yighee kɨ bii, buꞌ laa vəshi lùu vəbwə. ¹⁷Nɨniŋ, kɨ viŋ lùu yaa vəmfaw me, luu nə, kɨɨ faŋ ŋkitə tɨta ŋwaa-nsiŋ lùu. ¹⁸Kɨ viŋ kɨ nu məluꞌ mbə kɨ shɔɔ sɨ viŋ me, buꞌ laa nshinə yibwə fuu fɨ fuŋ. Viŋ kɨ yɨ laa lwaŋ sheꞌ Zwitə Nwi taa fwisə viŋ. ¹⁹Viŋ shɔꞌtə wə nə wə nə yigi fɨ taa ŋwaꞌlə Sam, nə nyaysə məbəŋsə Nwi, nə nsə Zwitə Nwi, kɨ zwa nyaysə jəəsə tɨ́ tɨta ŋwaa-nsiŋ fɨ taa fwisə viŋ, ²⁰bwaŋ tɨta Nwi ghee nshə maa vənu vənshə fɨ yiba jɨŋ tɨta Yeso Kristo. ²¹Kɨ zɔnə viŋ viŋ, buꞌ laa viŋ zɔnə Kristo.

Nshinə vəki ghɔ vəndəə vəvəŋ

(Kɔlɔsii 3.18-19)

²²Bàw vəki duꞌ ŋiꞌ vəndəə vəvəŋ, sheꞌ faŋ vəŋ dùꞌ ŋiꞌ tɨta Yeso nə. ²³Wəndɔŋ lùu tɔ tɨ́ wəzwi, sheꞌ faŋ Kristo lùu tɔ tɨ́ nwaa vɨɨ Nwi. Nwaa vɨɨ Nwi lùu yaa ŋwaa Kristo. Ŋwə baa lùu wuu məbweysə vəŋ. ²⁴Faŋ nwaa vɨɨ Nwi zɔ̀ fɨ ghɔ Kristo nə, bàw vəki kɨ zɔ fɨ ghɔ vəndəə vəvəŋ maa vənu vənshə.

²⁵Gə fɨ maa viŋ, vəndɔŋ, viŋ kɨ kawnə vəki viŋ, sheꞌ faŋ Kristo nə kàw nwaa vɨɨ vi, kù tɔ vəŋ nə. ²⁶Nɨniŋ laa ŋwə yɨ̀sə vəŋ ley tɨ́ Nwi. Ŋwə nə sɔ̀ yibɨsə vəŋ fɨ maa vəŋ, faŋ ŋwə nə kɔ̀ yigisə Nwi nə muu mə Nwi tɨ́ vəŋ. ²⁷Nɨniŋ, ŋwə nuŋsə nwaa vɨɨ Nwi laa vəŋ baw tɨ́ ŋwə, laa tuu nu bwə, tɨꞌnə me tuu wee-ndoꞌ kee lùu maa vəŋ me, laa vəŋ luu ŋkee vɨɨ ley vɨsɨ Nwi. ²⁸Lùu faŋ nu vəndɔŋ luu sheꞌ nɨniŋ, laa wəndɔŋ kɨ kaw zu wi yaa nshɨ-tɔ wi. Wə ntɨə faŋ ŋwə kaw zu wi, buu lùu ŋwaa wi faŋ ŋwə kaw nɨniŋ. ²⁹Wə nə kee ta bèe mbasə ŋwaa wi me, ŋwə zəsə ŋwaa wi, kàw. Luu sheꞌ faŋ Kristo kàw nwaa vɨɨ Nwi nɨzi. ³⁰Maa nsiŋ lùu vəlaŋ və ŋwaa Kristo, faŋ ŋwə kaw vəŋ, zəsə vəŋ nə. ³¹Luu sheꞌ faŋ vɨ nə nyɔ̀ꞌ taa ŋwaꞌlə Nwi laa, «Wəndɔŋ ndɔ meꞌtə tii wi nə nshu wi, gə̀ fàynə ghɔ zu wi, vəŋ vəbɔɔ gu fa kəmuꞌ.» 5.31 Jenesis 2.24.³²Luu ŋkee nu kwalə faŋ ŋkə ndènə fɨ sɨ vɨɨ. Luu nə, mə gì laa muꞌlə wi luu Kristo, faŋ ghɔ nwaa vɨɨ vi faynə̀, gù fa kəmuꞌ nə. ³³Nɨniŋ nə, viŋ nɨzi, wə kɨ kaw zu wi, wə kɨ kaw zu wi yaa yiŋwaa yiŋ! Wəzwi kɨ fee ndəə wi!

Nshinə vaŋmbwaa ghɔ vətɨɨ vəvəŋ

(Kɔlɔsii 3.20-21)

¹Gə fɨ maa viŋ, vaŋmbwaa, viŋ kɨ zɔnə vətɨɨ viŋ fɨ jɨŋ Kristo! Luu ŋkee nu loomə nɨniŋ. ²Ntɨ yiweꞌ fɨ taa ntɨsə Nwi lùu laa, «Kɨ zɔnə tii wə ghɔ nshu wə!» 6.2 Eksodɔs 20.12. Lùu ntɨ njyə vɨsɨ faŋ nyə kii ŋkɔꞌnə fɨ ghɔ Nwi. ³Ŋkɔꞌnə yɔ́ lùu laa, «A yɨ̀ nɨniŋ, buu a taa kɨ duꞌ jəə, shi mbi tày.»

⁴Gə fɨ maa viŋ, vətɨɨ vaŋnə, kɨ viŋ baa kɨ taw vaŋ viŋ me, laa fwisə vəŋ kɨ bɨ me! Viŋ yɨsə vəŋ kɨ ta nə feenə, baa ta taa ntɨsə tɨta Nwi.

Nshinə vəbuꞌ ghɔ vətɨɨ vəfaꞌ vəvəŋ

(Kɔlɔsii 3.22–4.1)

⁵Gə fɨ maa viŋ, vəbuꞌ, viŋ kɨ zɔnə vətɨɨ viŋ fɨ shɨ nsi nə feenə nə məlɔꞌ, baa nə fwi yijəə, yɨ nɨniŋ sheꞌ faŋ viŋ yɨsə tɨ́ tɨta Kristo. ⁶Kɨ viŋ kɨ zɔnə vəŋ nə boꞌ me, faŋ viŋ kəə bàw tɨ́ vɨɨ me. Kɨ zɔnə vəŋ yaa vəbuꞌ və Kristo, faŋ vəŋ yɨ̀ nu ŋkɨə faŋ Nwi kàw nə fwi yiley nə. ⁷Viŋ kɨ faꞌ vəfaꞌ və vəbuꞌ nə fwi yijəə, yuu viŋ faꞌ tɨ́ tɨta Nwi, kee luu sheꞌ tɨ́ vɨɨ me. ⁸Viŋ kɔꞌ kɨɨ laa, wə kɨ luu yɨ̀ nu jəə, buu ndɔ bəŋsə tɨta Nwi tɨ́ ŋwə, faŋ wə ghɔ́ kɔlə lùu buꞌ, tɨꞌnə me luu ŋkee mbinə mbinə.

⁹Gə fɨ maa viŋ, vətɨɨ və vəbuꞌ, viŋ kɨ yɨsə maa vəbuꞌ viŋ sheꞌ nɨniŋ, kee baa kɨ kɔꞌnə maa məyɨ nu bwə maa vəŋ me. Kɨ lumə laa Tɨta wiŋ, viŋ vɨ vəŋ, lùu yizɔ. Nseesə kee bee lùu shɔ ghɔ Nwi me. Vɨɨ vənshə luu sheꞌ nɨndɨŋ tɨ́ ŋwə.

Faŋ bàw laa viŋ shuŋ vətɔ və yighaw və Nwi, kɨ ghɔꞌ vənu vəbwəvə

¹⁰Nu məndwə lùu laa, viŋ weꞌ maa nu Nwi nə maa wutə məkwalə ki. ¹¹Viŋ shuŋ vətɔ və yighaw və Nwi, laa viŋ kɨɨ maa məghɔꞌ Satan, tɨɨ vəzwitə vəbwəvə, maa jɨɨsə nsɨə faŋ lùu jɨɨsə mənay sənshə, faŋ ŋwə tuŋ viŋ shɔ nə. ¹²Yighaw njyə faŋ nsiŋ tuŋ maa yizii Nwi nə, kee lùu yighaw faŋ nsiŋ tuŋ nsiŋ vɨ vɨɨ fɨ shɨ nsi me. Nsiŋ tuŋ yighaw nsiŋ vɨ vəwutə fɨ taa yizɔ, nsiŋ vɨ vəzwitə vəbwəvə faŋ mbə sɔꞌ mbi yibwə nyə̀, nsiŋ vɨ vəzwitə vəbwəvə faŋ mbə lùu yizɔ nə.

¹³Nɨniŋ, viŋ shuŋ vətɔ və yighaw və Nwi, laa viŋ kɨɨ nə təsə ghuu wiŋ maa shi nu bwə, maa məyɨsə vənu vənshə vəjəə, mètə, tɨ̀ŋnə weꞌ. ¹⁴Nɨniŋ, viŋ tɨŋnə, shùŋ nu yinsəŋ ŋiꞌ viŋ yaa kɔtə. Njwi yighaw yiŋ luu laa viŋ duꞌ sheꞌ taa nu loomə. ¹⁵Gɔsə siŋ faŋ viŋ kwaŋ ghuu viŋ luu laa viŋ lootə ŋwaa yiŋ maa məsaynə ntɔŋ yijəə Nwi faŋ nyə kɔ məduꞌ-nyɔŋ tɨ́ vɨɨ nə. ¹⁶Viŋ nuŋ fwi siŋ maa Kristo nə vənu vənshə. Luu ŋkəsə yighaw yiŋ, faŋ kaꞌ viŋ ndɨ̀ɨsə wisə Satan faŋ ŋwə kəə tuŋ maa viŋ nə. ¹⁷Yisɔꞌ yighaw yiŋ faŋ kaꞌ viŋ bee tɔ viŋ, lùu məbwey vəlwaŋ. Viŋ ndi yigisə Nwi yaa baꞌ yighaw faŋ Zwitə Nwi kɔ tɨ́ viŋ. ¹⁸Viŋ shɔꞌtə Nwi ghee nshə taa Zwitə Nwi, kɨ shi nə yikɨꞌ. Viŋ kɨ shɔꞌtə Nwi, kee bwa me, buꞌ ghɔ tɨ́ Nwi tɔ vɨɨ Nwi vənshə. ¹⁹Viŋ kɨ shɔꞌtə Nwi tɔ mə nɨzi, laa Nwi kwaŋ nu ki taa fwi mə, ŋàꞌsə shuu ŋwaa, mə kɨ jia fwi nyaa, yɨsə vɨɨ kɨ kɨɨ nə ŋiꞌ ntɔŋ yijəə Nwi yɔ́, faŋ nyə nə ndènə fɨ yikəꞌ vɨɨ nə. ²⁰Mə lùu wuu ntɔŋ nu Nwi kɔ́, faŋ mə kɔlə lùu taa ŋii mfiŋ, vəsumə və bwey luu maa mə nə. Bàw mə kɨ gisə nə məka fwi, faŋ ŋkə kùꞌnə laa mə gi nə.

Shɔꞌtə Pɔɔl tɨ́ vɨɨ Nwi

²¹Mə kəə laa viŋ kɨɨ nə nu kaŋ faŋ mə lùu nə, nə ŋkɨə faŋ mə yɨsə. Nɨniŋ, mə tɔ̀ŋ Tikikɔs, weenshu ŋwaa-nsiŋ faŋ mə kàw ŋwə nə, tɨ́ viŋ. Ŋwə lùu wuu faꞌ Nwi bi. Ŋwə ndɔ jwi yɨ viŋ, yɨsə viŋ kɨɨ nə vənu vɔ́ vənshə. ²²Mə tɔŋ ŋwə tɨ́ viŋ buꞌ nu kɔ́, laa viŋ kɨ̀ɨ nə nu kia, ŋwə baa kɨ bwasə fwi siŋ nɨzi.

²³Nwi, tii ŋwaa-nsiŋ, ghɔ tɨta Yeso Kristo kɔ məduꞌ-nyɔŋ nə ŋkawnə yi tɨ́ viŋ, vaŋ-nshwi vaŋ-nsiŋ, yɨ laa viŋ nuŋ fwi siŋ maa ŋwə. ²⁴Mənɔŋ-bwaŋnə tɔ vɨɨ vənshə faŋ vəŋ kaw tɨta ŋwaa-nsiŋ, Yeso Kristo, kaw ŋwə nə ŋkawnə yiweꞌ faŋ kaꞌ nyə kee ndɔ mè me!