Kɔlɔsii

Ŋwaꞌlə Kɔlɔsii

Ŋwaꞌlə Pɔɔl tɨ́ vɨɨ Nwi fɨ shɨ Kɔlɔsii

Kɔlɔsii lùu shɨ kəmɔ́ꞌ fɨ nsi Asia maa kwiŋ ntɔŋ-shɨshwi fɨ shɨ Efesɔs. Vɨɨ mədeesə nu Nwi nə ŋìi shɨ Kɔlɔsii faŋ vəŋ nəə kee deesə nu Kristo jəə me. Epafras faŋ ŋwə nəə fɔŋ fɨꞌtə nu Kristo yifi, gə ye Pɔɔl buꞌ nu kɔ́. Pɔɔl kɨ nii nyɔ̀ꞌ ŋwaꞌlə ŋwə̀ tɨ́ vɨɨ Kristo fɨ shɨ Kɔlɔsii maa məbɔŋsə vəŋ, baa kəə naysə tɨ́ vəŋ laa Kristo lùu yaa Nwi shɨ nsi, baa nə laa, Kristo nə ndìsə vənu vəbwəvə və vɨɨ faŋ vɨ nə bey ŋwə fuu fəŋkɔꞌ fə ŋkɨꞌsə nə. Nɨniŋ, ŋwə ghɔꞌ vɨɨ mbeenə vi.

Məsenə vəwaytə:

Vənzi vəŋwaꞌlə 1.1-8

Kristo nə vəfaꞌ vi luu ŋkee vəkwalə 1.9–2.19

Nshinə yifi vɨɨ Kristo 2.20–4.6

Vəndwə və ŋwaꞌlə 4.7-18

Faŋ Pɔɔl nə shɔ̀ꞌtə vɨɨ Nwi fɨ shɨ Kɔlɔsii

¹Lùu mə, Pɔɔl, wuu ntɔŋ Yeso Kristo, faŋ Nwi shòꞌ, nə weenshu ŋwaa-nsiŋ Timoti, ²faŋ yia nyɔ̀ꞌ ŋwaꞌlə ŋwə̀ tɨ́ viŋ, vɨɨ ley Nwi fɨ shɨ Kɔlɔsii. Viŋ lùu vaŋ-nshwi via fiiba jɨŋ Kristo, buꞌ faŋ viŋ nùŋ fwi siŋ maa ŋwə. Nwi, Tii ŋwaa-nsiŋ, tu mənɔŋ-bwaŋnə tɔ viŋ, kɔ̀ viŋ nə zutə.

Faŋ Pɔɔl nə shɔ̀ꞌtə Nwi tɔ vɨɨ Kristo fɨ shɨ Kɔlɔsii

³Yia bwaŋ Nwi, tɨɨ tɨta ŋwaa-nsiŋ Yeso Kristo, ghee nshə, faŋ yia shɔꞌtə Nwi tɔ viŋ. ⁴Yia bwaŋ Nwi buꞌ laa yia nə zɔ laa viŋ nùŋ fwi siŋ maa Yeso Kristo, baa kàw vɨɨ ley Nwi vənshə, ⁵buꞌ laa viŋ kɨꞌ vənu mbɨə faŋ Nwi nùŋsə tɨ́ viŋ yizɔ. Nə yɨ̀sə yigisə Nwi kɔ̀ŋ Yeso Kristo, faŋ luu ŋkee nu yinsəŋ, buu viŋ zɔ kɔ̀ŋ vənu vɔ́ faŋ Nwi nùŋsə tɨ́ viŋ yizɔ nə. ⁶Ntɔŋ yijəə Nwi yɔ́ zìꞌ maa vəshəŋ vənshə fɨ shɨ nsi, nyə yɨsə vɨɨ kwiinə nshinə vəŋ, kii nshinə yijəə. Viŋ nɨzi zɔ̀ fɨ fuŋ, nyə yɨ viŋ yɨsə vənu vəjəəvə, zì fɨ maa yighee njyə faŋ viŋ nə fɔŋ zɔ̀ yigi yɔ́, faŋ ŋkə nə lèy tɨ́ viŋ, viŋ kɨɨ jəə faŋ Nwi tu mənɔŋ-bwaŋnə wi tɔ viŋ. ⁷Viŋ nə zwètə nu Nwi fɨ ghɔ Epafras. Ŋwə lùu wuu faꞌ Kristo sheꞌ yaa yia, yia kàw ŋwə dɨdɨꞌ. Ŋwə tɨŋ tɔ yia taa ŋwaa viŋ, faꞌ faꞌ Kristo sheꞌ jəə jəə. ⁸Ŋwə baa luu nàysə tɨ́ yia kɔ̀ŋ ŋkawnə njyə faŋ viŋ kìi fɨ taa Zwitə Ley Nwi maa məkaw vɨɨ.

⁹Shù fɨ maa shi ŋkɨə faŋ yia nə zɔ̀ vənu vɔ́ kɔ̀ŋ viŋ nə, yia shɔꞌtə Nwi tɔ viŋ ghee nshə. Yia buꞌ ghɔ tɨ́ Nwi laa Nwi kɔ viŋ nə tɔ ley, tɨ́ kaꞌ viŋ kɨ̀ɨ nə nu ŋkɨə faŋ Nwi kəə laa viŋ kɨ yɨsə. Viŋ kɨɨ nə nu kɔ́ fɨ ghɔ Zwitə Ley Nwi, faŋ ŋkə kɔ̀ yitɔfə, yɨsə vənu vənshə lùu vəley tɨ́ viŋ. ¹⁰Nu tɔ ley kɔ́ taa yɨsə laa viŋ kɨ toꞌ nə nshinə yiŋ, faŋ nyə bàw tɨ́ tɨta Kristo, kùꞌnə tɨ́ vɨɨ faŋ vəŋ beꞌsə ŋwə nə. Viŋ kɨ yɨsə vənu vəjəəvə jɨɨsə səyaŋ, baa kɨ̀ɨ nə Nwi ŋkee jəə. ¹¹Yia baa shɔꞌtə Nwi laa Nwi ndi wutə ki faŋ ŋkə shɔ̀ɔ vəwutə vənshə, yɨ̀sə laa viŋ kii wutə, tɨŋ weꞌ maa nu Nwi, kɔlə gày kə, viŋ jìa fwi siŋ weꞌ, kee meꞌtə nu Nwi me. ¹²Viŋ kɨ bwaŋ Tii ŋwaa-nsiŋ fɨ yizɔ nə məŋaytə! Yɨsə ŋwə buu viŋ kùꞌnə laa viŋ ndɔ zɨ vənu mbɨə faŋ ŋwə nə nùŋsə tɨ́ vɨɨ vi maa shəŋ ŋkɨə faŋ məley Nwi bee shɔ nə. ¹³Nwi nə bwèysə nsiŋ, fùusə nsiŋ fɨ ghɔ vəwutə vəbwəvə faŋ mbə lùu taa mfiŋsə. Ŋwə nə ndì nsiŋ fɨ fuŋ, nùŋsə nsiŋ taa yifwàŋ ŋwiŋ wi, faŋ ŋwə kàw ŋwə nə. ¹⁴Lùu ŋwiŋ wi ghɔ́, faŋ ŋwə nə fùusə nsiŋ fɨ taa nsɔꞌ Nwi, yɨ̀sə laa Nwi ndenə vənu vəbwəvə vaŋ-nsiŋ.

Faŋ nu Kristo luu ŋkee nu kwalə

¹⁵Ŋkɨꞌnə Yeso Kristo luu sheꞌ yaa njyə Nwi, faŋ kaꞌ wə kee ye nshɨ-tɔ Nwi nə sɨ me. Ŋwə nə luu shɔ buu Nwi tey kɨ naysə vətɔ vənshə fɨ taa mbi. Nɨniŋ, ŋwə lùu tɔ tɨ́ vətɔ vənshə faŋ Nwi nə bɔ̀ŋ. ¹⁶Nwi nə shɔ̀ɔ fɨ maa ŋwə, bɔ̀ŋ vətɔ vənshə faŋ mbə lùu yizɔ, nə mbɨə fɨ shɨ nsi, vətɔ mbɨə faŋ kaꞌ vɨɨ yè nə sɨ, nə mbɨə faŋ kaꞌ vɨɨ kee yè nə sɨ me. Vɨɨ məsɔꞌ mbi vənshə, mbɨə taa yizɔ, nə mbɨə shɨ nsi, baa nə vəzwitə nə vəwutə vənshə, fa tɨ̀ me fa faŋ Nwi nə bɔ̀ŋ, Nwi nə shɔ̀ɔ fɨ ghɔ ŋwiŋ wi, bɔ̀ŋ mbə. Nɨniŋ, vətɔ vənshə ndɔ̀ fɨ ghɔ Kristo, baa lùu shɔ sheꞌ tɨ́ ŋwə. ¹⁷Kristo nə luu shɔ, buu vətɔ vəmɔ́ꞌ fuu fɨ yiba ŋwə. Vətɔ vənshə baa lùu shɔ sheꞌ buꞌ ŋwə. ¹⁸Ŋwə baa lùu tɔ fɨ taa vəməshəŋtə və vɨɨ Nwi, sɔꞌ vɨɨ Nwi vənshə, sheꞌ faŋ tɔ wə sɔꞌ ŋwaa wə nshə nə. Ŋwə baa lùu vənzi və ŋii Nwi, baa luu mfɔŋ wə maa məywey fɨ shɨ yiku. Nɨniŋ laa ŋwə luu vɨsɨ maa vənu vənshə. ¹⁹Nə luu nɨniŋ taa ŋkɨɨ Nwi, laa vənu vənshə luu sheꞌ taa ŋwaa Yeso. ²⁰Nwi nə baa tə laa vɨɨ vənshə bəŋ jwì, gù fa kəmuꞌ, ghɔ vɨ Nwi, fɨ yiba Kristo. Nwi nə yɨ laa Kristo kù fuu fəŋkɔꞌ fə ŋkɨꞌsə, tɨ́ kaꞌ vətɔ vənshə fɨ yizɔ nə fɨ nsi kiasə, kee baa lùu vɨɨ mbeenə vi me, luu nə, gù vɨɨmba vi buꞌ mənshi mə Kristo faŋ ŋwə nə tùtə nə.

²¹Viŋ nɨzi nə fɔŋ dùꞌ ŋgaasə viŋ Nwi, buꞌ faŋ viŋ nə luu vɨɨ mbeenə vi fɨ taa mbɨꞌtə yiŋ, yɨsə vənu vəbwəvə. ²²Luu ndwə, Yeso Kristo yɨ̀sə laa viŋ faynə tɔ kiŋ, viŋ vɨ Nwi, buꞌ faŋ ŋwə nə jwi mbi gù wə, kù tɔ viŋ. Ŋwə yɨ nɨniŋ laa ŋwə ndi viŋ, jwi nə viŋ vɨsɨ Nwi, tɨ́ viŋ kii fwisə leysə buꞌ yiku yi yɔ́, tuu wee-ndoꞌ kee baa lùu maa viŋ me. Kaꞌ viŋ kee baa ŋìi taa nsɔꞌ Nwi me, ²³buꞌ faŋ viŋ kɨ tɨtweꞌ bìŋ Nwi, nùŋ fwi siŋ sheꞌ maa nu Nwi, tɨ̀ŋnə weꞌ, tə̀ sɨ sheꞌ maa vənu mbɨə faŋ viŋ zɔ̀ fɨ taa nu Nwi. Luu sheꞌ nu Nwi kɔ́ faŋ vɨ fɨꞌtə tɨ́ vɨɨ vənshə, ŋkə saynə shɨ nsi kənshə. Mə Pɔɔl nə gù wuu faꞌ nu Nwi kɔ́, laa mə kɨ fɨꞌtə nu Nwi kɔ́ tɨ́ vɨɨ.

Faŋ Pɔɔl nə ŋàytə faŋ ŋwə nə kɔlə lùu taa ŋɨꞌ buꞌ nu Nwi

²⁴Fwi nyaa lùu nə məŋaytə faŋ mə kɔlə ye ŋɨꞌ ndwə nə. Ŋɨꞌ njyə faŋ mə ye nə, mə ye buꞌ viŋ. Nyə kuꞌsə maa ŋɨꞌ njyə faŋ Kristo nə ye maa yighee vɨsɨ nə. Faŋ mə ye ŋɨꞌ taa ŋwaa mə nə, mə ye buꞌ ŋwaa Yeso Kristo, faŋ luu nshəŋtə vɨɨ Kristo nə, laa mə kɨ metə faꞌ Kristo shɔ. ²⁵Nə shòꞌ Nwi shòꞌ mə, kwaŋ faꞌ wi taa ghɔ mə, laa mə luu wuu faꞌ Nwi, fɨꞌtə nu ki tɨ́ viŋ laylay. ²⁶Nu ŋkɨə faŋ mə fɨꞌtə tɨ́ vɨɨ nə, ŋkə nə lùu shɔ ŋkee fɨshi faŋ mbi, tɨꞌnə me, vɨɨ nə kee ta lùu shɔ me. Luu nə, ŋkə nə kee ta fuu ntee me, luu vɨɨ kee kɨɨ nə ŋkə me. Nwi yɨ̀sə ndwə laa ŋkə fuu ntee sɨ vɨɨ ley Nwi. ²⁷Ŋkə nə bàw tɨ́ Nwi laa Nwi yɨsə laa vɨɨ vi kɨɨ faŋ yigi yɔ́ dùꞌ, baa kwàlə shɔ̀ɔ. Nyə kìi sey kwalə tɨ́ vɨɨ məshɨ məshɨ. Nu kwalə kɔ́ lùu laa Kristo shi taa fwisə viŋ. Nɨniŋ, viŋ kɨ nii tə̀ sɨ maa vəkeynə və Nwi faŋ mbə kwalə shɔ̀ɔ. ²⁸Luu sheꞌ nu Kristo kɔ́ faŋ yia fɨꞌtə tɨ́ vɨɨ nə. Yia tɨsə vɨɨ vənshə, baa naysə nu Nwi tɨ́ vɨɨ vənshə nə yitɔfə yinshə, tɨ́ kaꞌ wə tɨ̀ me wə faŋ ŋwə kwàŋ fwi yi maa Kristo, kɨ toꞌ maa jɨɨ njyə faŋ Nwi kàw, maa vənu vənshə. ²⁹Lùu ŋiꞌ nu ŋkɨə faŋ mə kɨɨtə, faꞌ nəŋay, baa nə wutə ŋkɨə faŋ Kristo kɔ̀ shee nə. Wutə ki kɔ́ faꞌ taa ŋwaa mə ŋkee dɨdɨꞌ.

Faŋ ŋkə bàw viŋ kɨ ndɨɨnə laa kɨ wə bweꞌsə viŋ me

¹Mə kəə laa viŋ kɔꞌ kɨɨ faŋ mə kɨɨtə, nywenə buꞌ viŋ nə vɨɨ Laodosia, baa nə vɨɨ vənshə faŋ vəŋ kee ta yè mə nə yisɨ me. ²Mə kɨɨtə, tɨ́ kaꞌ fwi siŋ weꞌ, baa nə laa viŋ kɨ kawnə yiŋwaa yiŋ, gù fa kəmuꞌ, baa nə laa viŋ ndɔ kii ŋkee tɔ ley maa nu Nwi, kɨ̀ɨ nə ŋiꞌ nu Nwi ŋkee jəə, faŋ ŋkə nə ndènə fɨ ghɔ vɨɨ nə. Ŋiꞌ nu Nwi kɔ́ luu sheꞌ nu Kristo, wuu məbweysə ŋwaa-nsiŋ. ³Luu sheꞌ Kristo faŋ ŋwə luu ŋkwa faŋ ŋwə ŋaꞌsə jɨɨ tɨ́ vɨɨ, laa vəŋ kii tɔ ley yinsəŋ, baa kɨ̀ɨ nə vənu ŋkee jəə. Kəŋ tɔ ley kɔ́ kìi sey tɨ́ vɨɨ. ⁴Mə naysə vənu və̀ tɨ́ viŋ, tɨ́ kaꞌ wə kee baa bweꞌsə viŋ nə kəŋ yigi tɔ ley mɔ́ꞌ me.

⁵Nɨniŋ, faŋ mə kɔlə lùu ntaŋ fɨ yɨ viŋ nə, fwi nyaa lùu ghɔ viŋ taa ŋwaa viŋ. Mə kìi məŋaytə ŋkee dɨdɨꞌ, buꞌ laa mə kɔꞌ kɨɨ laa viŋ dùꞌ jəə, baa nùŋ fwi siŋ maa Kristo, tɨ̀ŋnə weꞌ maa nu Kristo. ⁶Nɨniŋ, faŋ viŋ nùŋ fwi siŋ maa tɨta Yeso Kristo, viŋ kɨ toꞌ maa nu Kristo nɨzi, yɨsə vənu mbɨə faŋ ŋwə kàw. ⁷Viŋ goꞌ viŋ ŋwə ghee nshə, gə nə vɨsɨ vɨsɨ, kɔꞌ bɨbiŋ ŋwə, wèꞌ shɔ, sheꞌ faŋ vɨ nə dèesə viŋ nə. Viŋ kɨ bwaŋ ŋwə ghee nshə nə məŋaytə.

⁸Viŋ ndɨɨnə laa kɨ wə jwi bweꞌsə viŋ, jia viŋ nə yitɔfə fɨ taa mbi nyə̀ me, tɨꞌnə me, nə yigisə dayday faŋ nyə ndɔ̀ fɨ ghɔ nuŋsə vɨɨ me, tɨꞌnə me, fɨ maa vəwutə və mbi me. Təgi tɔ́ kee ndɔ̀ fɨ ghɔ Kristo me. ⁹Viŋ kɔꞌ kɨɨ laa nshɨ-tɔ Nwi nə wutə ki kənshə lùu taa ŋwaa Kristo. ¹⁰Faŋ viŋ lùu fa kəmuꞌ viŋ ŋwə, buu viŋ mètə tɨ̀ŋnə yaa vɨɨ Nwi fɨ yiba jɨŋ ŋwə. Luu ŋwə lùu tɔ tɨ́ vɨɨ mbɨə faŋ vəŋ sɔꞌ mbi nə. Ŋwə baa lùu tɔ tɨ́ vəwutə vənshə. ¹¹Gə fɨ maa nu məsɨɨtə vɨɨ, faŋ vɨɨ mɔ́ꞌ gì laa lùu shwenə vɨɨ Nwi nə, viŋ kɔꞌ kɨɨ laa Kristo duꞌtə ŋwə sɨɨtə̀ viŋ, luu nə, ŋwə yɨ̀ maa jɨɨ yiday, faŋ vɨ kee yɨ̀sə maa mbasə ŋwaa me. Kristo kɔ̀ shwenə day tɨ́ viŋ faŋ ŋkə də̀ laa viŋ lùu vɨɨ vi. Shwenə yiŋkii faŋ Kristo kɔ̀ tɨ́ viŋ nə, lùu laa ŋwə mèꞌ nshinə yibwə yiŋ. ¹²Faŋ viŋ nə fì muu mə Nwi nə, ŋkə nə lùu yaa vɨ zwì viŋ Kristo mɔ́ꞌ, təə, nshinə yibwə yiŋ ku. Sheꞌ nɨniŋ, Nwi yweysə viŋ vɨ Kristo fɨ shɨ yiku mɔ́ꞌ, buꞌ faŋ viŋ nùŋ fwi siŋ maa wutə Nwi, faŋ ŋwə ywèysə Yeso Kristo fɨ shɨ yiku nə. ¹³Yighee vɨsɨ viŋ yaa luu yaa vəŋku və vɨɨ, viŋ nə kee kìi məbwey yinsəŋ me, buꞌ faŋ viŋ nəə yɨsə vənu vəbwəvə, kee bee lùu vɨɨ Nwi me. Luu nə, Nwi bweysə nsiŋ, ndènə yibɨsə nyaa-nsiŋ, buꞌ faŋ ŋwə nə ywèysə Kristo fɨ shɨ yiku. ¹⁴Nə luu yighee vɨsɨ, nsiŋ nə gù vənu vəyaŋ, buꞌ laa nsiŋ nəə kee yɨsə vənu mbɨə faŋ Nwi nəə kəə laa nsiŋ yɨsə me. Nwi sɔ̀ yibɨsə yɔ́ faŋ nyə nə luu maa nsiŋ nə. Ŋkə lùu sheꞌ yaa Nwi ndì ŋwaꞌlə nsɔꞌ nyaa-nsiŋ, faŋ vɨ nə nyɔ̀ꞌ tɔ nsiŋ, bèy fuu fəŋkɔꞌ fə ŋkɨꞌsə mfɨə faŋ Yeso nə kù fuu yi nə. Nɨniŋ nə, nsɔꞌ nyaa-nsiŋ yɔ́ mè laylay. ¹⁵Maa yighee yɔ́ faŋ Kristo nə kù fuu fəŋkɔꞌ fə ŋkɨꞌsə nə, ŋwə ghɔꞌ vəwutə nə vəzwitə vəbwəvə vənshə, də̀ tɨ́ vɨɨ ntee, laa yi kìi wutə shɔ̀ɔ mbə.

¹⁶Faŋ ŋkə lùu nɨniŋ, kɨ viŋ biŋ wə kɔ nuŋsə yimɔ́ꞌ tɨ́ viŋ buꞌ vətɔ mbɨə faŋ viŋ zɨ nə me, tɨꞌnə me vətɔ mbɨə faŋ viŋ nu me, tɨꞌnə me kɔ̀ŋ nu məzɨ vəshi vəkwalə taa ŋuꞌ, nə taa ŋuu finə, tɨꞌnə me kɔ̀ŋ vəshi və zwisə me. ¹⁷Kwiŋ vətɔ vɔ́ luu sheꞌ yaa ndɨŋlə, faŋ ŋkə fɔŋ də̀ nu faŋ ŋkə taa jwi tɨ́ vɨɨ. Ŋkee fa ŋkɨə faŋ ndɨŋlə kɔ́ tɨŋ buꞌ ŋkə nə, lùu Kristo. ¹⁸Nɨniŋ, kɨ viŋ biŋ laa wə kɨ yɨꞌtə viŋ buꞌ kəŋ vənu vɔ́ me. Vɨɨ mbɨə faŋ vəŋ kəə yɨꞌtə viŋ nə, gisə laa vəŋ sùꞌsə yiŋwaa vəŋ nsi, tɨ́ vəŋ kòꞌsə yiŋwaa vəŋ maa yinsəŋ. Vəŋ bəŋsə nshiisə-ŋiisə Nwi, koꞌsə̀ yiŋwaa, gi laa vəŋ yè vənu fɨ ghɔ Nwi taa njyəəsə. Luu nə, məkoꞌsə ŋwaa vəŋ lùu nu dayday; mbɨꞌtə vəŋ ndɔ̀ sheꞌ fɨ shɨ nsi. ¹⁹Vəŋ gaasə fɨ ghɔ Kristo, faŋ lùu tɔ tɨ́ ŋwaa vɨɨ Nwi nə. Vɨɨ vənshə faŋ vəŋ fàynə ghɔ vɨ Kristo, Kristo kɔ fa tɨ̀ me fa faŋ vəŋ kəə tɨ́ vəŋ. Ŋwə baa yɨ̀sə laa vəŋ lùu fa kəmuꞌ, tɨ́ kaꞌ vəŋ kɨ ta weꞌ nə vənu və Kristo faŋ Nwi kəə. Ŋkə lùu nɨniŋ, sheꞌ faŋ ŋwaa wə fàynə shəŋ muꞌ vəlaŋ vəlaŋ. ²⁰Faŋ viŋ nə ŋìi taa nu yiku Kristo nə, ŋkə də̀ laa kɨ vəzwitə vəbwəvə fɨ taa mbi nyə̀ kee baa sɔ̀ꞌ viŋ me. Nɨniŋ, sii yɨ kə viŋ shi yaa vɨɨ fɨ taa mbi nyə̀, biŋ laa vɨɨ kɔ̀ nuŋsə yimɔ́ꞌ tɨ́ viŋ laa, ²¹kɨ viŋ mɔꞌ ghɔ maa fa kəmɔ́ꞌ me, baa nə laa kɨ viŋ zɨ fazɨ kəmɔ́ꞌ me, tɨꞌnə me laa kɨ viŋ baa kɔŋ fa kəmɔ́ꞌkə me. ²²Maa vətɔ vɔ́ vənshə luu sheꞌ shɔ laa mbə shɔ̀ɔ fɨ taa ŋwaa wə, kɨ nii yindi. Kəŋ ntɨsə sɔ́ ndɔ̀ sheꞌ fɨ taa mbɨꞌtə vɨɨ. Nsə lùu sheꞌ nuŋsə faŋ dèesə vɨɨ nə. ²³Mə kɔꞌ kɨɨ laa vɨɨ gì laa nuŋsə yɔ́ lùu nu tɔ ley, buꞌ laa nsə yɨsə vɨɨ kìi feenə, bwasə̀ yiŋwaa nsi, sɔꞌ ŋwaa vəŋ nə wutə. Luu nə, ŋkee yinsəŋ nsə lùu nu dayday, nsə yɨsə sheꞌ laa wə yɨ̀ nu ŋkɨə faŋ ŋwaa wi kàw.

Faŋ bàw viŋ tə sɨ ghiŋ maa vətɔ mbɨə faŋ mbə lùu yizɔ

¹Mə duꞌtə mə gì tɨ́ viŋ laa Nwi ywèysə viŋ fɨ ghɔ yiku, viŋ vɨ Kristo mɔ́ꞌ. Nɨniŋ, viŋ tə sɨ ghiŋ maa vətɔ mbɨə faŋ mbə lùu yizɔ, shəŋ ŋkɨə faŋ Kristo lùu shɔ nə. Ŋwə dùꞌ shɔ maa kwiŋ maꞌnə Nwi. ²Nɨniŋ, viŋ tə sɨ maa vətɔ mbɨə faŋ mbə lùu yizɔ, kee kɨ tə sɨ maa vətɔ fɨ shɨ nsi me. ³Viŋ kɔꞌ kɨɨ laa viŋ duꞌtə viŋ ku tɨ́ vətɔ vɔ́ fɨ shɨ nsi. Məbwey fi faŋ viŋ kìi ndwə nə, lùu ghɔ Kristo. Nwi duꞌtə Nwi kɔ məbwey fi ghɔ́ tɨ́ viŋ, faŋ kɔlə kaꞌ wə kee ta yiye me. ⁴Kristo lùu məbwey fi ŋwaa-nsiŋ ghɔ́. Yighee njyə faŋ ŋwə ndɔ baa fuu ntee, ŋwə ndɔ fuu nsiŋ vɨ vəŋ mɔ́ꞌ. Nsiŋ ndɔ kii fɨ maa yikwalə yi.

Nshinə vɨɨ Kristo

⁵Nɨniŋ, viŋ meꞌ nshinə yimwanə yiŋ, faŋ nyə ndɔ̀ fɨ taa mbi yibwə. Viŋ ndi nshinə yɔ́ yaa nu faŋ ŋkə duꞌtə ŋkə ku. Kɨ viŋ baa kɨ tii vəki me, tɨꞌnə me yɨ kəŋ nu bwə mɔ́ꞌ me. Kɨ fwi yiŋ ndɔ maa nu me. Kɨ viŋ tə sɨ maa nu bwə me, tɨꞌnə me baytə vətɔ vəyaŋ me, buꞌ laa wə kɨ luu kɨ baytə vətɔ vəyaŋ, buu vətɔ vɔ́ kɨ nii luu tɨ́ ŋwə yaa vənwi faŋ ŋwə feꞌ. Vənu vəbwəvə vɔ́ vənshə ndɔ fɨ maa nshinə yimwanə yɔ́. ⁶Mbə yɨsə laa nsɔꞌ Nwi yiweꞌ gù tɔ vɨɨ mbɨə faŋ vəŋ kee zɔnə Nwi me. ⁷Yighee vɨsɨ viŋ nəə yɨsə kəŋ vənu vɔ́. Mbə nə sɔꞌ viŋ. ⁸Luu nə, ndwə faŋ viŋ kìi nshinə yifi nə, viŋ baꞌsə ghɔ fɨ maa vənu vəbwəvə vənshə. Kɨ viŋ kɨ kii fwi yishəsə me, tɨꞌnə me fwi yibwə me, tɨꞌnə me mbɨꞌtə yibwə me! Kɨ viŋ kɨ ndasə wə me! Kɨ viŋ gi yigi faŋ nyə kee yikuꞌnə me! ⁹Kɨ viŋ sɨɨ ba tɨ́ wə fɨ wiŋ me, buꞌ laa viŋ duꞌtə viŋ meꞌ nshinə yimwa yiŋ, faŋ nə luu nshinə maa məyɨsə kəŋ vənu vəbwəvə vɔ́. ¹⁰Viŋ bee kii ndi nshinə yifi, mɔ̀ꞌ maa viŋ yaa njwi. Nwi kɔ̀ nshinə yifi yɔ́ tɨ́ viŋ, yɨ̀sə laa viŋ gə nə vɨsɨ, kɨ kɨɨ nə Nwi. Ŋkɨꞌnə yiŋ kɨ nii lùu yaa njyə faŋ Nwi nə bɔ̀ŋ viŋ shɔ nə. ¹¹Viŋ kɨ kii nshinə yifi yɔ́, buu ŋkwiinə kee baa lùu shɔ taa ŋwaa viŋ me. Vɨɨ Griik kee baa lùu nɨŋkwiŋ fɨ ghɔ vɨɨ Jus me. Vɨɨ faŋ vɨ sɨ̀ɨtə vəŋ, kee baa lùu nɨŋkwiŋ fɨ ghɔ vɨɨ faŋ vɨ kee sɨ̀ɨtə vəŋ me. Vəndɔ nə vɨɨ fɨ taa gay kee baa lùu nɨŋkwiŋ fɨ ghɔ vɨɨ binə binə me. Buꞌ kee baa lùu nɨŋkwiŋ fɨ ghɔ wə faŋ ŋwə tɨ̀ŋ tɔ ŋwə me. Vɨɨ vənshə luu sheꞌ nɨndɨŋ. Nu kwalə luu sheꞌ Kristo faŋ ŋwə lùu taa vənu vənshə. ¹²Viŋ kìi nshinə yifi yɔ́ ndwə, buꞌ laa Nwi nə shòꞌ viŋ laa viŋ luu mbii vɨɨ. Viŋ lùu vɨɨ ley tɨ́ ŋwə. Ŋwə baa luu kaw viŋ. Nɨniŋ, viŋ kɨ shi yaa vɨɨ vi; viŋ kɨ kee gəŋsə vɨɨ, baa kìi njyoꞌ yijəə maa viŋ, viŋ viŋ! Viŋ kɨ suꞌsə yiŋwaa yiŋ nsi, duꞌ bwaŋnə, baa kìi fwi yizutə! ¹³Kɨ fwi siŋ kɨ shə maa vəliŋ viŋ me! Wə kɨ luu yɨ̀sə nu bwə maa viŋ, viŋ ndenə yibɨsə yi, fɔnə Nwi ndenə yibɨsə yiŋ. Nɨniŋ, ŋkə kùꞌnə laa viŋ ndenə yibɨsə yiŋ, viŋ viŋ. ¹⁴Nu ŋkɨə faŋ ŋkə shɔ̀ɔ vənu vəjəəvə vɔ́ vənshə, lùu laa viŋ kaw wə nə wə. Viŋ kɔꞌ kɨɨ laa ŋkawnə yɨsə vɨɨ faynə gu fa kəmuꞌ. Nshinə vəŋ kɨ nii bàw shɨlə. ¹⁵Viŋ kɨ yɨsə laa mənɔŋ-bwaŋnə faŋ ŋwə ndɔ̀ fɨ ghɔ Kristo, shiinə viŋ maa vənu vənshə faŋ viŋ yɨsə, buꞌ laa Nwi nə tìi viŋ laa viŋ jwi dùꞌ nyɔŋ, lùu yaa ŋwaa wi muꞌ, kɨ bwaŋ Nwi shɔ ghee nshə. ¹⁶Viŋ duꞌ kɨ bɨꞌtə sheꞌ yigisə Kristo fɨ taa fwisə viŋ ghee nshə. Viŋ kɨ ndi yitɔfə maa mədeesə wə nə wə nə nu Nwi, tɨsə wə nə wə. Viŋ kɨ bəŋsə Nwi nə nyaysə taŋ taŋ, viŋ kɨ zwa nyaysə faŋ Zwitə Ley Nwi kɔ̀ tɨ́ viŋ. Bàw viŋ yɨ nɨniŋ, baa bwàŋ Nwi nə fwi yimuꞌ. ¹⁷Taa vənu vənshə faŋ viŋ yɨsə, nə təgi tənshə faŋ viŋ gisə, viŋ kɨ yɨsə vənu vənshə sheꞌ maa yizii Yeso Kristo, baa bwaŋ Nwi, faŋ lùu Tii ŋwaa-nsiŋ, fɨ yiba jɨŋ Kristo.

Ntɨsə tɨ́ vɨɨ məndaa, nə tɨ́ vaŋmbwaa nə vətɨɨ və vaŋmbwaa, nə tɨ́ vəbuꞌ nə vətɨɨ və vəbuꞌ

(Efesɔs 5.21–6.9)

¹⁸Mə kəə gi nu tɨ́ vəki və məndaa ndwə. Viŋ zɔ! Viŋ kɨ suꞌsə yiŋwaa yiŋ nsi tɨ́ vəndəə viŋ, faŋ ŋkə kùꞌnə tɨ́ vɨɨ faŋ vəŋ beꞌsə Kristo nə.

¹⁹Gə fɨ maa viŋ, vəndəə və vəki, viŋ zɔ! Viŋ kɨ kaw vəki viŋ! Kɨ viŋ kɨ shə tɨ́ vəŋ me!

²⁰Gə fɨ maa viŋ, vaŋnə, viŋ kɨ zɔnə vənshwi viŋ ghɔ vətɨɨ viŋ maa vənu vənshə, buꞌ laa ŋkə bàw sɨ Kristo laa vɨɨ mbɨə faŋ vəŋ beꞌsə ŋwə, kɨ yɨ nɨniŋ.

²¹Gə fɨ maa viŋ faŋ viŋ lùu vətɨɨ vaŋnə, kɨ viŋ baa kɨ taw vaŋ viŋ me, buꞌ fwisə vəŋ bwa.

²²Gə fɨ maa viŋ vəbuꞌ, viŋ kɨ zɔnə vɨɨ mbɨə faŋ vəŋ kìi viŋ taa mbi nyə̀ maa vənu vənshə. Kɨ viŋ kɨ zɔnə vəŋ sheꞌ maa yighee njyə faŋ vəŋ lùu yɨ viŋ me, yaa vɨɨ faŋ vəŋ yaa kɨ tə sɨ maa məbəŋsə vɨɨ. Viŋ kɨ faꞌ nə fwi yimuꞌ maa jɨɨ yijəə, yaa vɨɨ faŋ vəŋ fee Nwi. ²³Maa vənu vənshə faŋ vɨ kɔ tɨ́ viŋ, laa viŋ faꞌ nə, viŋ kɨ faꞌ nə fwi yijəə, bɨꞌtə laa viŋ faꞌ tɨ́ Nwi, laa viŋ kee faꞌ sheꞌ tɨ́ wə mənsaw me. ²⁴Viŋ kɔꞌ kɨɨ laa tɨta Yeso Kristo ndɔ ndɔꞌ viŋ, faŋ viŋ ndɔ zɨ məbwey vəlwaŋ fɨ ghɔ ŋwə, buꞌ laa viŋ lùu vɨɨ faꞌ Kristo nə. ²⁵Luu nə, vɨɨ mbɨə faŋ vəŋ yɨsə vənu vəbwəvə, tɨta Yeso Kristo ndɔ kɨ ndɔꞌ vəŋ sheꞌ maa bwə vəŋ faŋ vəŋ nəə yɨsə nə. Viŋ kɔꞌ kɨɨ laa ŋwə ndɔ kɨ sɔꞌ vɨɨ, kee kɨ seesə mbi me.

¹Gə fɨ maa viŋ, vətɨɨ ŋii, viŋ kɨ yɨ jəə tɨ́ vəbuꞌ viŋ, yɨsə nu ŋkɨə faŋ ŋkə kùꞌnə tɨ́ vəŋ. Viŋ kɨ lumə laa viŋ baa luu kìi tɨɨ ŋii wiŋ taa yizɔ faŋ ŋwə sɔꞌ viŋ.

Ntɨsə tɨ́ vɨɨ Nwi vənshə

²Viŋ kɨ shɔꞌtə Nwi ghee nshə, kee bwa me! Viŋ kɨ shi nə yikɨꞌ, bwaŋ Nwi maa vənu vənshə! ³Viŋ kɨ shɔꞌtə Nwi tɔ yia nɨzi, laa Nwi gaŋtə yia, ŋàꞌsə jɨɨ tɨ́ yia, tɨ́ kaꞌ yia kɨ fɨꞌtə nu Nwi tɨ́ vɨɨ, baa naysə nu Kristo faŋ ŋkə nə ndenə fɨ ghɔ vɨɨ nə. Luu sheꞌ buꞌ nu Kristo kɔ́, faŋ mə lùu feenə taa ŋii mfiŋ nə. ⁴Viŋ kɨ ndwaŋ Nwi laa ŋwə kwaŋ ŋkee yigisə yi shuu mə, tɨ́ kaꞌ mə kɨ gisə, vənu lùu vəley tɨ́ vɨɨ.

⁵Gə fɨ maa nshinə yiŋ, viŋ kii yitɔfə maa vɨɨ mbɨə faŋ kee lùu vɨɨ Nwi me! Kɨ viŋ kɨ bɨsə yighee njyə faŋ Nwi kɔ̀ tɨ́ viŋ, laa viŋ kɨ faꞌ tɨ́ ŋwə nə me! ⁶Viŋ yɨsə laa yigisə yiŋ luu yizutə, nyə baa lùu yindɨŋ tɨ́ vɨɨ, tɨ́ kaꞌ viŋ kɨ̀ɨ maa məbəŋsə yigi tɨ̀ me yigi tɨ́ vɨɨ ŋkee yijəə.

Shɔꞌtə Pɔɔl tɨ́ vɨɨ Kristo fɨ shɨ Kɔlɔsii

⁷Mə tɔŋ Tikikɔs tɨ́ viŋ, ŋwə taa naysə vənu vaŋ tɨ́ viŋ vənshə. Tikikɔs lùu weenshu ŋwaa-nsiŋ fɨ taa ŋii Nwi, faŋ mə kàw. Ŋwə faꞌ tɨ́ Nwi nə fwi yi yimuꞌ, baa lùu wuu faꞌ Yeso Kristo sheꞌ yaa mə. ⁸Mə tɔŋ ŋwə tɨ́ viŋ, tɨ́ kaꞌ ŋwə nàysə vənu via tɨ́ viŋ vənshə, baa nə laa ŋwə baa weꞌsə viŋ nɨzi maa nu Nwi. ⁹Ŋwə jwi ghɔ Onesimɔs mɔ́ꞌ, faŋ lùu wuu wiŋ nə. Ŋwə baa lùu weenshu ŋwaa-nsiŋ faŋ mə kàw ŋwə. Ŋwə beꞌsə Kristo nə fwi yimuꞌ. Vɨɨ və̀ vəbɔɔ taa naysə vənu vənshə tɨ́ viŋ, faŋ mbə gay feenə maa yia.

¹⁰Aristarkɔs faŋ ŋwə lùu feenə taa ŋii mfiŋ yia ŋwə mɔ́ꞌ, shɔꞌtə viŋ. Mark, wee weenshu Barnabas, shɔꞌtə viŋ nɨzi. Mə duꞌtə mə nyɔꞌ vənu kɔ̀ŋ ŋwə tɨ́ viŋ. laa ŋwə taa jwi yɨ viŋ, viŋ jia ŋwə jəə. ¹¹Yeso ŋgwə faŋ vɨ tii ŋwə nə Justɔs nə, shɔꞌtə viŋ nɨzi. Luu sheꞌ vɨɨ vɔ́ vətia nə, yɨ mə, faŋ vəŋ lùu vɨɨ Jus, faŋ yia vɨ vəŋ faꞌ nu Kristo mɔ́ꞌ, fɨꞌtə nu yifwàŋ Nwi tɨ́ vɨɨ. Fwi nyaa zutə buꞌ vəŋ maa yinsəŋ. ¹²Epafras, faŋ lùu wuu shɨ wiŋ, baa lùu wuu faꞌ Yeso Kristo nə, shɔꞌtə viŋ nɨzi. Ŋwə shɔꞌtə Nwi tɔ viŋ ghee nshə, ndwaŋ Nwi ŋkee nəŋay laa viŋ ta taa nu Nwi, wèꞌ shɔ, kɨ kɨɨ nə Nwi, tɨ́ kaꞌ viŋ bàw shɨlə, yɨ̀ nu ŋkɨə faŋ Nwi kàw. ¹³Mə naysə tɨ́ viŋ ŋkee maa yinsəŋ laa ŋwə ŋɨɨlə dɨdɨꞌ buꞌ viŋ nə vɨɨ Laodosia, baa nə vɨɨ Hierapolis. ¹⁴Lukas, faŋ lùu tɨɨ vəfɔ nə, faŋ mə kàw, baa nə Dimas, shɔꞌtə viŋ nɨzi.

¹⁵Viŋ shɔꞌtə vaŋ-nshwi vaŋ-nsiŋ fɨ Laodosia shee, baa shɔꞌtə Nimfa nə nshəŋtə vɨɨ Kristo fɨ taa ŋii ŋwə.

¹⁶Yighee njyə faŋ viŋ tii ŋwaꞌlə ŋwə̀ mètə, viŋ tɔ̀ŋ tɨ́ vɨɨ Kristo fɨ Laodosia, laa vəŋ tii nɨzi. Bàw viŋ baa tii ŋwaꞌlə ŋgwə faŋ mə tɔ̀ŋ tɨ́ vɨɨ Nwi fɨ Laodosia. ¹⁷Viŋ naysə tɨ́ Arkipɔs laa ŋwə kɨ faꞌ faꞌ ŋgwə faŋ Nwi nə kɔ̀ tɨ́ ŋwə nə, sheꞌ jəə jəə, yuu ŋkə kùꞌnə.

¹⁸Maa məndwə, ye məshɔꞌtə ŋwaa faŋ nyɔ̀ꞌ mə Pɔɔl ŋkee nə ghɔ kaŋ. Viŋ kɨ lumə laa mə lùu taa ŋii mfiŋ feenə. Nwi tu mənɔŋ-bwaŋnə tɔ viŋ!