Ŋwaꞌlə Timoti Beꞌsɔ Vəbɔɔ
Ŋwaꞌlə Pɔɔl tɨ́ Timoti beꞌsə vəbɔɔ
Taa ŋwaꞌlə ŋwə̀ Pɔɔl tɨsə Timoti buꞌ vəfaꞌ vi, laa bàw ŋwə fɨꞌtə ntɔŋ yijəə tɨ́ vɨɨ ŋkee yiley, kee bwa me, faŋ vɨ kɔlə kɔ ŋɨꞌ tɨ́ ŋwə. Kaꞌ ŋwə zwètə fɨ ghɔ nshinə Pɔɔl.
Məsenə vəwaytə:
Vənzi və ŋwaꞌlə 1.1-2
Məbəŋsə nə ntɨ 1.3–2.13
Bàw Timoti kɨ faꞌ faꞌ wi jəə 2.14–4.5
Nu Pɔɔl 4.6-18
Vəndwə və ŋwaꞌlə 4.19-22
1Shɔꞌtə Pɔɔl tɨ́ Timoti
1Lùu mə, Pɔɔl, wuu ntɔŋ Yeso Kristo, faŋ nshɨ-tɔ Nwi nə nùŋsə mə maa faꞌ ghɔ́, laa mə kɨ fɨꞌtə nu məbwey vəlwaŋ faŋ Nwi ndɔ kɔ tɨ́ vɨɨ buꞌ Yeso Kristo nə. 2Mə tɔŋ ŋwaꞌlə ŋwə̀ tɨ́ ghɔ, ŋwiŋ ŋwaa Timoti, faŋ mə kàw ghɔ. Tɨta Nwi ghɔ tii ŋwaa-nsiŋ Yeso Kristo tu mənɔŋ-bwaŋnə tɔ ghɔ, kèe gəŋ sə, kɔ̀ məduꞌ-nyɔŋ tɨ́ ghɔ!
Faŋ Pɔɔl nə bwàŋ Nwi tɔ Timoti, faŋ ŋwə nùŋ fwi yi maa Kristo, wèꞌ shɔ
3Mə bwaŋ Nwi, faŋ mə faꞌ tɨ́ ŋwə shù fɨ ghɔ vətɨɨ vaŋ nə fwi yiley, baa lumə ghɔ ghee nshə faŋ mə shɔꞌtə Nwi vətuꞌ nə shɨshwi. 4Jɨŋ maa məye ghɔ zasə mə, buꞌ laa mə lumə faŋ a nə gwia, mənsɨ shəŋkə fɨ sɨ ghɔ (faŋ sɨ nə gaasə). Nɨniŋ, mə kəə baa ye ghɔ, tɨ́ kaꞌ mə baa ŋàytə nə fwi nyaa yinshə. 5Mə lumə faŋ a nùŋ fwi yə maa Kristo ŋkee maa yinsəŋ. Nshɨ nshu wə Lois nə nshu wə Yunis nə duꞌtə vəŋ nuŋ fwisə vəŋ maa Kristo, wèꞌ shɔ. Mə kɔꞌ kɨɨ laa məbiŋ wə lùu weꞌ nɨzi.
Bàw a kɨ tweꞌ maa nu Kristo, kɨ tɔ kə dɨɨ me!
6Nɨniŋ, mə kəə lumə tɨ́ ghɔ laa, a kɨ ndeynə laa vəkɔ mbɨə faŋ Nwi nə kɔ̀ tɨ́ ghɔ maa yighee njyə faŋ mə nə mɔ̀ꞌ ghɔ ŋaa tɔ ghɔ nə, kɨ faꞌ taa ŋwaa ghɔ, 7gə nə vɨsɨ. Zwitə ŋkɨə faŋ Nwi nə kɔ̀ tɨ́ nsiŋ nə, kee lùu zwitə maa məfee me. Zwitə kɔ́ bee kii yɨ̀sə wutə lwaŋ taa ŋwaa-nsiŋ, nə ŋkawnə, nə məjiatə ŋwaa. 8Kɨ tɔ kə dɨɨ maa məbiŋ nu tɨta ŋwaa-nsiŋ ntee me, tɨꞌnə me buꞌ mə faŋ mə lùu wuu ŋii mfiŋ buꞌ nu Kristo kɔ́ nə me. Bàw a bee kii bìŋ ŋɨꞌ buꞌ nu ntɔŋ yijəə yɔ́ nɨzi, faŋ Nwi kɔ̀ wutə tɨ́ nsiŋ nə. 9Ŋwə nə bwèysə nsiŋ, shoꞌ nsiŋ maa vɨɨ ley vi, kee kɨ tii nsiŋ buꞌ vənu vəjəəvə vaŋ-nsiŋ me. Ŋwə nə tìi nsiŋ luu buꞌ faŋ nshɨ-tɔ wi nə kɔ̀ꞌnə taa fwi ŋwə shù fɨ maa vənzi və mbi, laa ŋwə ndɔ kee gəŋ saŋ-nsiŋ, faŋ ŋwə ndɔ tɔŋ Yeso Kristo tɨ́ nsiŋ nə. 10Lùu ndwə, ŋkə fùu ntee, faŋ wuu məbweysə ŋwaa-nsiŋ, Yeso Kristo nə fùu mbi, ndìsə yiku, nùŋsə məbwey vəlwaŋ faŋ ŋwə gòꞌsə yighee muꞌ tɨ́ vɨɨ mbɨə faŋ vəŋ zɔ ntɔŋ yijəə yɔ́. 11Nwi nùŋsə mə laa mə kɨ fɨꞌtə ntɔŋ yijəə yɔ́, baa lùu wuu ntɔŋ Kristo, deesə nu ki tɨ́ vɨɨ. 12Lùu ŋiꞌ nu ŋkɨə faŋ mə ye ŋɨꞌ shɔ ndwə nə. Luu nə, tɔ kaŋ kee dɨdɨɨ me, buꞌ laa mə kɔꞌ kɨɨ nə wə ntɨə faŋ mə nùŋ fwi nyaa maa ŋwə nə, baa kɨ̀ɨ yinsəŋ laa wutə ki kùꞌnə maa məshiinə nu ŋkɨə faŋ Nwi nə nùŋsə shee, gə ziꞌ maa shi ŋkɨə faŋ ŋwə ndɔ kɔ tɨ́ mə.
13Jia yigisə yinsəŋ njyə faŋ mə nə dèesə ghɔ shɔ nə, kɨ deesə sheꞌ nɨniŋ, nùŋ fwi yə maa Yeso Kristo, dùꞌ taa ŋkawnə njyə faŋ ŋwə kaw nsiŋ shɔ nə. 14Nuŋsə vənu vəjəəvə vɔ́ faŋ Nwi kɔ̀ tɨ́ ghɔ nə. Zwitə Ley Nwi faŋ ŋkə lùu taa fwisə nsiŋ, taa gaŋtə ghɔ.
Faŋ vɨɨ mɔ́ꞌ nə mèꞌ Pɔɔl, Onesifɔrɔs gaŋtə ŋwə
15A kɨɨ laa vɨɨ vənshə fɨ nsi Asia mèꞌ mə. Vɨɨ mɔ́ꞌ fɨ taa ŋwaa vəŋ luu Figelɔs nə Hermojenis. 16Bàw tɨta Nwi gaŋtə ŋiꞌ ŋii Onesifɔrɔs, buꞌ laa ŋwə nəə zwisə fwi nyaa ghee ghee, tɔ ki kee dɨ̀ɨ buꞌ mə, faŋ mə lùu mfiŋ nə me. 17Ŋwə yaa ziꞌ shɨ Rom, kə̀ə mə nə wutə, yè mə. 18Bàw tɨta Yeso yɨsə tɨta Nwi kee gəŋ si maa shi vəndwə və mbi. Nshɨ-tɔ wə kɔꞌ kɨɨ nə vəfaꞌ vəkwalə mbɨə faŋ ŋwə nə gàŋtə nsiŋ shɨ Efesɔs.
2Kɨ tweꞌ maa nu Kristo
1Faŋ ŋkə lùu nɨniŋ, gə fɨ maa ghɔ, ŋwiŋ ŋwaa, kɨ weꞌ maa nu ŋkɨə faŋ Nwi gaŋtə ghɔ shɔ nə, fɨ yiba Yeso Kristo. 2Fi yigi njyə faŋ a nə zɔ̀ fɨ ghɔ mə, faŋ mə nəə fɨꞌtə nu Kristo vɨsɨ vɨɨ vəyaŋ nə, ndì nùŋsə tɨ́ vɨɨ yinsəŋ, faŋ vəŋ kùꞌnə tɨ́ kaꞌ vəŋ ndɔ baa kɨ deesə tɨ́ vɨɨ mɔ́ꞌ. 3Biŋ ŋɨꞌ yaa sogeꞌ Yeso Kristo jəə. 4Sogeꞌ faŋ ŋwə lùu shuu yighaw, kee yaa kɨ kii mba yiwiŋ me. Ŋwə nəə toꞌ gə kɨ kəə fazɨ, buu kaꞌ ŋwə kee bàw tɨ́ wə ntɨə faŋ ŋwə sɔꞌ vəsogeꞌ me. 5Wuu mənyɨŋ ghuu kaꞌ ŋwə kee nyɨŋ zɨ me, maa laa ŋwə nyɨŋ sheꞌ faŋ nuŋsə mənyɨŋ ghɔ́ dùꞌ me, nɨniŋ buu kaꞌ ŋwə kee kii vəkeynə me. 6Wuu məndɨɨ faŋ ŋwə faꞌ taa yindɨɨ ŋwə nə wutə, yaa kɨ fuꞌ mfɔŋsə fazɨ fɨ taa biisə ŋwə. 7Ywiitə nu ŋkɨə faŋ mə gisə. Nwi taa kɔ tɔ ley tɨ́ ghɔ maa məkɨɨ nə vənu vənshə.
8Kɨ lumə Yeso Kristo faŋ Nwi nə ywèysə ŋwə fɨ shɨ yiku, ŋwə faŋ ŋwə nə fùu fɨ ŋiꞌ ŋii fwàŋ Deyvid nə. Lùu faŋ mə yuu kɨ fɨꞌtə ntɔŋ yijəə tɨ́ vɨɨ nə. 9Mə ye ŋɨꞌ, ŋii ŋkee mfiŋ yaa ŋkee yɨ-kəbwə, luu buꞌ ntɔŋ yijəə yɔ́. Luu nə, faŋ vɨ kɔlə kwàŋ mə mfiŋ nə, kaꞌ vɨ kee fə̀ŋ nu Nwi me. 10Nɨniŋ, mə jìa fwi nyaa maa ŋɨꞌ yinshə buꞌ vɨɨ mbɨə faŋ Nwi nə shoꞌ vəŋ, laa lùu vɨɨ vi, tɨ́ kaꞌ vəŋ nɨzi ndɔ zɨ məbwey vəlwaŋ fɨ yiba Yeso Kristo. Məbwey ghɔ́ ndɔ baw shɔ̀ɔ, gòꞌsə yighee muꞌ. 11Luu ŋkee nu yinsəŋ, faŋ vɨ gisə laa,
«Nsiŋ vɨ Kristo kù mɔ́ꞌ,
buu nsiŋ vɨ vəŋ ndɔ bwey mɔ́ꞌ.
12Nsiŋ kɨ luu jìa fwi taa ŋɨꞌ,
buu nsiŋ vɨ vəŋ ndɔ kɨ sɔꞌ mbi mɔ́ꞌ.
Kɨ luu nsiŋ twey ŋwə,
buu ŋwə ndɔ twey nsiŋ nɨzi.
13Nsiŋ kɔlə kɨ luu kee bìisə ghuu maa nu ki me,
buu ŋwə kɨ bii wuu yinsəŋ; kaꞌ ŋwə kee twèy nu ki me.»
Faŋ bàw Timoti twey nu vɨɨ məbuulə nu Nwi
14Kɨ lumə tɨ́ vɨɨ, baa tɨsə vəŋ nə wutə yikəꞌ Nwi, laa kɨ vəŋ kɨ mɔꞌlə yigi me, buꞌ laa kaꞌ nyə kee gàŋtə wə nə nu me, bee kii ndisə nu Nwi fɨ taa fwisə vɨɨ faŋ vəŋ zɔ̀. 15Kɨ tɔfə maa məduꞌ yikəꞌ Nwi yaa wə faŋ ŋwə kùꞌnə maa faꞌ wi. Faꞌ faꞌ Nwi tɨ́ kaꞌ tɔ kə kee ndɔ dɨɨ shɔ me. Kɨ fɨꞌtə nu yinsəŋ Nwi tɨ́ vɨɨ ŋkee ley ley. 16Kɨ buꞌsə fɨ ghɔ vɨɨ mbɨə faŋ vəŋ gisə yigisə dayday faŋ nyə kee gàŋtə wə maa nu Nwi me, buꞌ laa vəŋ manə nu Nwi, twey nu Nwi, gə vɨsɨ vɨsɨ nə nu maa mətwey nu Nwi. 17Yigisə vəŋ kwə vɨɨ yaa dɨꞌ yaa kɨ kwə fəŋ wə nə. Vɨɨ mɔ́ꞌ fɨ taa ŋwaa vɨɨ mədeesə vəbwəvə vɔ́ luu Hayminiɔs nə Filetɔs. 18Vəŋ ndì jɨɨ yinsəŋ Nwi, kɨ gisə laa vəŋku vənsisə duꞌtə vəŋ ywey. Vəŋ kìasə nu Nwi nɨniŋ, ndìsə məbiŋ vɨɨ mɔ́ꞌ faŋ vəŋ nə nùŋ fwi vəŋ maa Kristo nə.
19Luu nə, shɨ ŋii weꞌnə ŋkɨə faŋ Nwi nə bɔ̀ŋ, gòꞌsə yighee muꞌ. Shwenə ki lùu laa, «Nwi kɔꞌ kɨɨ nə vɨɨ mbɨə faŋ ŋwə nə shòꞌ,» 2.19 Numba 16.5. baa nə laa, «Wə ntɨə faŋ ŋwə tii yizii Mɔꞌmbi, bàw ŋwə fuu fɨ taa vənu vəbwəvə.» 2.19 Aysaya 52.11.20Lumə nu ŋii yikwalə: vəkay faŋ mbə lùu taa tey yi, kee luu sheꞌ mbə shwaŋ ndɔŋnə, yaa mbə goolə nə mbə Siliva me. Mbə ŋkɔꞌ nə mbə shɔꞌ shɔ nɨzi. Vəmɔ́ꞌ lùu maa məkwaŋ vətɔ vəleyvə, vəmɔ́ꞌ lùu maa məkwaŋ vətɔ faŋ mbə kee lùu vəley me. 21Kɨ luu wə yɨsə vənu vi nə ŋwaa wi ley fɨ maa vənu vəbwəvə, buu ŋwaa wi ghɔ́ taa luu maa məyɨ nu Nwi ley, kùꞌnə maa məfaꞌ vəfaꞌ tɨ́ tii wi.
Faŋ bàw Timoti kɨ toꞌ ghuu yitoꞌ ki, ŋkə kuꞌnə yaa wuu faꞌ Kristo
22Kɨ nyɨŋ vənu vəbwəvə mbɨə faŋ zawə yaa kɨ kəə, beꞌsə luu fɨ yiba jɨŋ nu faŋ lùu nu loomə, baa nə maa mənuŋ fwi yə maa Kristo, baa nə maa məkaw vɨɨ, baa nə maa məduꞌ bwaŋnə viŋ vɨ vɨɨ vənshə faŋ vəŋ tii yizii tɨta Kristo nə fwi yiley. 23Buꞌsə fɨ ghɔ vɨɨ faŋ vəŋ sɔnə yigi maa nu vəmfaw, buꞌ laa a kɨɨ laa kəŋ vənu vɔ́ bi luu ntaysə. 24Bàw laa wuu faꞌ tɨta Kristo bwaŋnə tɨ́ vɨɨ vənshə, kee kɨ nywenə nywaŋsə me. Bàw ŋwə kɨɨ maa mədeesə nu Nwi jəə, jia fwi faŋ vɨ kɔ ŋɨꞌ tɨ́ ŋwə. 25Bàw ŋwə kɔ bəŋsə tɨ́ vɨɨ mətwey nu Kristo taa gɨ yibwaŋnə, laa kaꞌ yighee mɔ́ꞌ Nwi gaŋtə vəŋ, vəŋ kwiinə fwisə vəŋ, kɨ̀ɨ nə nu yinsəŋ, 26tɔ vəŋ baa ley, vəŋ nyɨŋ fɨ taa vənu və zwitə bwə faŋ ŋkə nə jia vəŋ maa məyɨ nu maa ŋkitə yi nə.
3Faŋ vənu və vɨɨ ndɔ bɨ yighee yiba
1A kɔꞌ kɨɨ laa, ndɔ luu maa yighee shə, ŋkə ndɔ luu ŋkee yighee yiweꞌnə. 2Vɨɨ ndɔ kɨ kaw sheꞌ yiŋwaa yivəŋ, nə ka, baa nə nu məboꞌ ŋwaa, nə məkoꞌsə ŋwaa, baa nə məndasə Nwi, nə məshii tɨ́ vətɨɨ vəvəŋ, kee bwaŋ wə me, kee tii Nwi nə nu me, 3kee kaw vɨɨ me, kee mètə nsɔꞌsə ghɔ vɨɨ me, bɨsə yizii vɨɨ, kee jia fwi me, jia vənu taa njyoꞌ, bee nu jəə, 4sɨɨ təba tɔ vɨɨ, kee fee nu me, məmwa, kaw maa məzɨ vətɔ, kee kaw Nwi me. 5Vəŋ boꞌ sɨ vɨɨ, fɨnə vɨɨ məbəŋsə Nwi, luu nə, kee biŋ laa wutə Nwi ŋii maa vəŋ me. Bàw a kɨ buꞌsə fɨ yɨ kəŋ vɨɨ vɔ́. 6Vɨɨ mɔ́ꞌ fɨ taa ŋwaa vəŋ nyɔꞌtə ŋii taa ndɔꞌ vɨɨ, sùŋ vəmfaw və vəki, kwàŋ taa ŋwaa vəŋ. Lùu vəki mbɨə faŋ vənu vəbwəvə shùŋnə maa vəŋ, fwisə vəŋ ndɔ maa vənu vəyaŋ, ŋkə dɔŋsə vəŋ kwiŋ kwiŋ. 7Vəŋ kəə zwetə vənu ghee nshə, luu nə, kee bee kɨ̀ɨ nə nu yinsəŋ tuu yighee muꞌ me. 8Vɨɨ vɔ́ faŋ vəŋ bweꞌsə vəki nə, lùu yaa Janis nə Jambris, faŋ vəŋ nə twèy nu Mose fɨshi nə. Vəŋ twey nu yinsəŋ Nwi sheꞌ nɨniŋ, buꞌ faŋ vəŋ lùu vɨɨ faŋ yitɔ vəŋ ndì. Vəŋ kee kùꞌnə maa mənuŋ fwi vəŋ maa Kristo me. 9Luu nə, kaꞌ vəŋ kee ndɔ gə nə vɨsɨ vɨsɨ nə nu vəŋ dɨdɨꞌ me, buꞌ laa nu vəŋkɔmə vəŋ ndɔ fuu yikəꞌ vɨɨ vənshə, yaa ŋkə vɨɨ vì fɨ ywaŋ-vɨsɨ nə fùu ntee nɨzi nə.
Faŋ Timoti nə ndì ghuu yitoꞌ Pɔɔl
10Gə fɨ maa ghɔ, a nə ndì ghuu yitoꞌ kaŋ maa nu ŋkɨə faŋ mə nə dèesə nə, baa luu bèꞌsə mə fɨ maa nshinə nyaa, baa nə faŋ mə kəə jɨɨsə maa məgə vɨsɨ vɨsɨ, nùŋ fwi nyaa maa Kristo, jìa fwi, dùꞌ bwaŋnə, kàw vɨɨ, jia fwi nyaa faŋ vɨ kɔ ŋɨꞌ tɨ́ mə. 11Vɨɨ shoꞌ ghuu ŋaa, kwàŋ mə taa ŋɨꞌ faŋ ŋkə nə gày maa məshɨ mə Antiɔk, baa nə Ikoniɔn, baa nə Listra. Vɨ nə shòꞌ ghuu ŋaa nɨniŋ, mə jia fwi nyaa. Nɨniŋ, tɨta Nwi fuusə mə fɨ taa vənu vɔ́ vənshə. 12Sheꞌ nɨniŋ, vɨ taa kɨ shoꞌ ghuu vɨɨ vənshə faŋ vəŋ kəə kɨ toꞌ ghuu yitoꞌ vəŋ fɨ yiba Yeso Kristo, yuu ŋkə bàw tɨ́ Nwi. 13Luu nə, vɨɨ bwənə nə vɨɨ məbuulə yitɔ yi vɨɨ gə vɨsɨ vɨsɨ nə nu bwə vəŋ, toꞌ bweꞌsə vɨɨ, vɨɨ bweꞌsə vəŋ nɨzi.
14Gə fɨ maa ghɔ, bàw a goꞌ nə nu ŋkɨə faŋ a nə zwetə̀, kɨɨ laa lùu yinsəŋ, buꞌ laa a kɨ̀ɨ nə vɨɨ mbɨə faŋ a nə zwètə fɨ ghɔ vəŋ nə. 15Shù fɨ faŋ a nə luu weembwa, a kɨ̀ɨ nə ŋwaꞌlə Nwi faŋ ŋkə kùꞌnə maa məkɔ yitɔfə tɨ́ ghɔ, laa a nuŋ fwi yə maa Yeso Kristo, ndɔ̀ zɨ̀ məbwey vəlwaŋ. 16Vəŋwaꞌlə vənshə faŋ Nwi nə yɨ̀sə vɨɨ nyɔꞌ fɨ maa Zwitə ki bàw, baa gàŋtə vɨɨ, deesə nu Nwi tɨ́ vəŋ, ŋaꞌsə sɨ vəŋ maa ŋiꞌ nu vəŋ, tɨ́ kaꞌ vəŋ kwìinə fwisə vəŋ, mèꞌtə nu bwə vəŋ. Mbə baa bɔ̀ŋsə vəŋ maa yitɔfə vəŋ maa məkɨɨ nə nu ŋkɨə faŋ ŋkə lùu kəloomə. 17Nɨniŋ laa wuu Nwi baw shɨlə, kùꞌnə maa məyɨsə vənu vəjəəvə vənshə.
4Faŋ bàw Timoti kɨ faꞌ faꞌ wi, ŋwə kuꞌnə tɨ́ Nwi
1Mə tɨsə ghɔ ŋkee nə wutə yikəꞌ Nwi nə Yeso Kristo, faŋ ŋwə ndɔ shoꞌtə vənu və vɨɨ bweynə nə vəŋku və nsisə, maa yighee njyə faŋ ŋwə ndɔ fuu taa mbi, lootə nu yifwàŋ ki, 2baa nə laa a kɨ fɨꞌtə nu Nwi, jiatə vɨɨ shɔ, faŋ ŋkə taa baw tɨ́ vəŋ, tɨꞌnə me kee baw me, kɨ ŋaꞌsə sɨ vəŋ maa ŋiꞌ nu vəŋ, naysə tɨ́ vəŋ faŋ Nwi ndɔ kwaŋ vəŋ taa nsɔꞌ. Bàw a tɨsə vəŋ, kɨ jia fwi yə, kee bwà maa mətɨsə vəŋ me. Twelə ŋiꞌ nu Nwi tɨ́ vəŋ kənshə. 3A kɔꞌ kɨɨ laa yighee ndɔ kɨ jwi, faŋ nu yinsəŋ Nwi ndɔ bɨ tɨ́ vɨɨ, vəŋ twey maa məzɔ, gə̀ kɨ kəə vɨɨ mədeesə vəŋ, faŋ vəŋ gisə sheꞌ vənu faŋ mbə sɨꞌsə tɨ́ vəŋ. 4Vəŋ taa kiasə yiŋwaa vəŋ fɨ maa məzɔ nu ŋkɨə faŋ lùu nu yinsəŋ, ndì fwisə vəŋ, nùŋ maa nu mətiitii təba. 5Gə fɨ maa ghɔ, bàw a jia fwi yə, nyə ley maa vənu vənshə, kɨ biŋ ŋɨꞌ buꞌ nu Kristo, faꞌ faꞌ wuu məfɨꞌtə ntɔŋ yijəə Nwi, faꞌ faꞌ wə nshə yaa wuu faꞌ Nwi.
Faŋ Pɔɔl nə kɨ̀ɨ laa yiku yi lùu nshənə
6Gə fɨ maa mə, yighee kùꞌ faŋ vɨ taa kɔ ŋwaa ŋwaa tɨ́ Mboo nyaa. Yighee məgə nyaa kùꞌnə. 7Mə tùŋ yighaw yijəənə, ghuu yitoꞌ kaŋ ndwə̀. Mə kee bee mèꞌtə nu Kristo faŋ mə nùŋ fwi nyaa maa ŋwə nə me. 8Nu ŋkɨə faŋ ŋkə gòꞌ, lùu laa, mə ndɔ fi shwaŋ nu jəə ŋkɨə faŋ Nwi ndɔ kɔ tɨ́ vɨɨ mbɨə faŋ vənu vəvəŋ lùu vəloomə. Tɨta Nwi faŋ ŋwə ndɔ sɔꞌ nsɔꞌsə vɨɨ, sɔꞌ shìa nyə yiloomə. Ŋwə ndɔ kɔ nu jəə kɔ́ shee maa shi vəndwə, kee kɨ kɔ luu sheꞌ tɨ́ mə me, ŋwə kɔ luu tɨ́ vɨɨ vənshə faŋ vəŋ kɨꞌ ŋwə nə ŋkawnə, tə̀ sɨ maa məjwi wi faŋ ŋwə ndɔ baa jwi mbi nə.
Faŋ Pɔɔl nə bùꞌ ghɔ tɨ́ Timoti laa ŋwə jwi yɨ yi
9Ŋwiŋ ŋwaa, kɔꞌlə maa məyasə jwi yè mə titi, 10buꞌ laa Dimas nyɨ̀ŋ fɨ yɨ mə, kaw maa məshi taa mbi nyə̀, ndɔ gə shɨ Tesalonika. Kresens gə̀ shɨ Galatia, Titɔs gə̀ shɨ Dalmatia. 11Goꞌ sheꞌ Lukas yɨ mə. Bàw a ndi Mark, viŋ ŋwə jwi, buꞌ laa kaꞌ ŋwə gaŋtə mə maa faꞌ. 12Mə nə tɔ̀ŋ Tikikɔs shɨ Efesɔs. 13A taa kii jwi, a ndì kutə ŋwaa faŋ mə nə mèꞌtə shɨ Troas tɨ́ Karpɔs. Ndi vəŋwaꞌlə nɨzi, ŋkee mbɨə faŋ vɨ naysə fɨ maa gɔ nyaa nə. 14Alesanda, wuu ndaa wì, nə yɨsə vənu vəbwəvə vəyaŋ maa mə. Tɨta Nwi ndɔ bəŋsə nu faŋ ŋkə kùꞌ maa nu bwə ki tɨ́ ŋwə. 15Bàw laa nshɨ-tɔ wə kɨ tɔfə nə ŋwə, buꞌ laa ŋwə nə bɨ̀sə yigisə nyaa-nsiŋ ŋkee dɨdɨꞌ. 16Faŋ vɨ nə fɔŋ sɔ̀ꞌ nsɔꞌ nyaa, tuu wə muꞌ nə kee gì nu maa məgaŋtə mə me. Vɨɨ vənshə meꞌtə mə. Mə buꞌ ghɔ tɨ́ Nwi laa ŋwə ndenə nu kɔ́ tɨ́ vəŋ. 17Luu nə, tɨta Kristo nə tɨ̀ŋnə jɨŋ mə, kwàŋ wutə maa mə, laa mə naysə nu Nwi kənshə, vɨɨ tətɔŋ fu vənshə zɔ. Nɨniŋ, Nwi fuusə mə fɨ shuu bikəə. 18Tɨta Yeso Kristo ndɔ baa kɨ fuusə mə fɨ taa vənu vəbwəvə vənshə faŋ vɨ kəə yɨsə maa mə, bwèysə mə, nùŋ mə maa nu yifwàŋ ki yizɔ. Bàw nsiŋ kɨ bəŋsə ŋwə ghee nshə, kee shia ki me. Ŋkə goꞌsə nɨniŋ.
Məshɔꞌtə Pɔɔl
19Shɔꞌtə Prisila ghɔ Akwila, nə ŋiinə Onesifɔrɔs shee. 20Erastɔs nə gòꞌ shɨ Kɔrint. Gə fɨ maa Trofimɔs, mə yaa meꞌtə ŋwə shɨ Miletɔs nə za. 21Yasə jwi buu yighee gwə kuꞌ. Eybulɔs nə Pudens nə Linɔs nə Klɔɔdia nə vaŋ-nshwi vaŋ-nsoo vənshə shɔꞌtə ghɔ. 22Tɨta Yeso Kristo goꞌsə taa fwi ghɔ! Mənɔŋ-bwaŋnə Nwi luu taa ŋwaa viŋ!