Ŋwaꞌlə Tesalonika Beꞌsə Vəbɔɔ
Ŋwaꞌlə Pɔɔl tɨ́ vɨɨ Nwi fɨ ntɨꞌ Tesalonika beꞌsə vəbɔɔ
Tɔ vɨɨ Kristo fɨ ntɨꞌ Tesalonika nəə buulə buꞌ məbəŋ jwi Kristo. Pɔɔl naysə tɨ́ vəŋ laa wuu məbweꞌsə vɨɨ ndɔ jwi ŋkəə, vənu vəbwəvə fuu vəyaŋ mbi, buu Yeso ndɔ bəŋ jwi. Bàw vɨɨ Kristo nuŋ fwi vəŋ maa Nwi, weꞌ shɔ, kee kɨ bəə ŋay me.
Məsenə vəwaytə:
Vənzi və ŋwaꞌlə 1.1-2
Məbəŋsə nə nsɔꞌ Nwi 1.3-12
Faŋ Yeso Kristo ndɔ bəŋ jwi 2.1-17
Nshinə vɨɨ Kristo 3.1-15
Vəndwə və ŋwaꞌlə 3.16-18
1Shɔꞌtə Pɔɔl tɨ́ məshəŋtə vɨɨ Kristo fɨ ntɨꞌ Tesalonika
1Lùu mə, Pɔɔl, nə Silvanɔs, baa nə Timoti, faŋ yia tɔŋ ŋwaꞌlə ŋwə̀ tɨ́ məshəŋtə vɨɨ Kristo fɨ ntɨꞌ Tesalonika, faŋ viŋ shə̀ŋtə maa yizii Nwi, tii ŋwaa-nsiŋ, nə tɨta ŋwaa-nsiŋ Yeso Kristo. 2Tɨta Nwi ghɔ tɨta Yeso Kristo tu mənɔŋ-bwaŋnə tɔ viŋ, baa nə məduꞌ-nyɔŋ.
Faŋ Pɔɔl nə bwàŋ Nwi buꞌ vɨɨ Tesalonika faŋ vəŋ nə nùŋ fwi vəŋ maa Kristo, twèꞌ shɔ
3Vaŋ-nshwi via, bàw yia kɨ bwaŋ Nwi buꞌ viŋ ghee nshə. Ŋkə kùꞌnə maa məyɨ nɨniŋ, buꞌ laa viŋ wèꞌ maa nu ŋkɨə faŋ viŋ nùŋ fwi siŋ shɔ nə. Ŋkawnə yiŋ faŋ viŋ vənshə kaw nə yiŋwaa yiŋ, viŋ viŋ, baa lùu yiyaŋ, gə vɨsɨ vɨsɨ nɨzi. 4Nshɨ-tɔ wia ŋaytə, baa bə̀ŋsə viŋ fɨ taa vəməshəŋtə və vɨɨ Nwi, buꞌ laa viŋ jìa fwi siŋ, nùŋ sheꞌ maa Kristo ghee nshə, faŋ vɨɨ shoꞌ ghuu ghiŋ, kwaŋ ŋɨꞌ maa viŋ nə. 5Nu kɔ́ lùu shwenə tɨ́ viŋ laa Nwi ndɔ shoꞌtə vənu və vɨɨ, shìa maa jɨɨ yiloomə. Ŋwə ndì viŋ laa viŋ kùꞌnə maa məzɨ nu yifwàŋ Nwi, buꞌ laa viŋ bìŋ ŋɨꞌ yɔ́ nə.
Faŋ Nwi ndɔ shia nsɔꞌ tɔ vɨɨ, nyə loomə
6Lùu nɨniŋ buꞌ laa ŋkə kùꞌnə tɨ́ Nwi maa məndɔ bəŋsə kɔ̀ ŋɨꞌ tɨ́ vɨɨ mbɨə faŋ vəŋ nə kwàŋ ŋɨꞌ maa viŋ nə. 7Ŋwə ndɔ baa kɔ zutə tɨ́ viŋ faŋ viŋ yè ŋɨꞌ fɨ ghɔ vɨɨ ndwə nə. Ŋwə ndɔ kɔ zutə tɨ́ nsiŋ vənshə maa yighee njyə faŋ tɨta Yeso ndɔ fuu fɨ taa yizɔ ntee, kɨ jwi ghɔ nshiisə-ŋiisə Nwi faŋ wutə ki lùu maa vəŋ nə. 8Ŋwə ndɔ jwi nə wisə faŋ ŋwə kɨɨ laa wuŋ-wuŋ, bə̀ŋsə bwə tɨ́ vɨɨ mbɨə faŋ vəŋ kee kɨɨ nə Nwi me, baa nə tɨ́ vɨɨ mbɨə faŋ vəŋ kee biŋ ntɔŋ Nwi buꞌ tɨta ŋwaa-nsiŋ Yeso me, kee zɔnə ŋwə me. 9Nsɔꞌ ndɔ ŋii maa vɨɨ vɔ́ ŋkee yiweꞌ, vəŋ ndɔ ye ŋɨꞌ yiyaŋ dɨdɨꞌ faŋ nyə gòꞌsə yighee muꞌ. Ŋkə taa ndɔ fɨ ghɔ tɨta Kristo, fɨ maa wutə ki kəkwalə nə, faŋ ŋkə bàw shɔ̀ɔ ki. 10Nsɔꞌ yɔ́ ndɔ jia vəŋ maa yighee njyə faŋ tɨta Yeso ndɔ baa bəŋ jwi maa mədə yikwalə yi tɨ́ vɨɨ ley vi. Vɨɨ vənshə faŋ vəŋ nə nùŋ fwi vəŋ maa ŋwə, ndɔ bəŋsə ŋwə maa shi kɔ́. Maa viŋ nə bìŋ nu ŋkɨə faŋ yia nə gì tɨ́ viŋ ntee nə.
Faŋ Pɔɔl nə shɔ̀ꞌtə Nwi tɔ vɨɨ Kristo fɨ ntɨꞌ Tesalonika
11Nɨniŋ, yia buꞌ ghɔ tɨ́ Nwi tɔ viŋ ghee nshə, laa ŋwə yɨsə viŋ kuꞌnə maa məndɔ zɨ məbwey vəlwaŋ faŋ ŋwə nə tìi viŋ shɔ nə, baa nə laa ŋwə ndɔ gaŋtə viŋ maa məmetə vənu vəjəəvə vənshə faŋ viŋ kàw maa məyɨsə, nə vəfaꞌ vənshə faŋ viŋ faꞌ nə wutə ki, buꞌ faŋ viŋ nùŋ fwi siŋ maa Kristo nə. 12Bàw ŋwə kɨ yɨsə nɨniŋ, laa viŋ ndɔ kɨ bəŋsə yizii tɨta ŋwaa-nsiŋ Yeso. Vɨ baa luu bəŋsə viŋ buꞌ ŋwə, buꞌ laa Nwi ghɔ tɨta Yeso Kristo kee gəŋsə siŋ.
2Nu məjwi Kristo faŋ ŋwə ndɔ baa bəŋ jwi, baa nə nu vɨɨ məbweꞌsə vɨɨ kɔ̀ŋ Kristo
1Vaŋ-nshwi via, gə fɨ maa məjwi tɨta ŋwaa-nsiŋ Yeso Kristo, faŋ ŋwə ndɔ baa jwi, shə̀ŋtə nsiŋ yɨ ŋwə nə, yia bùꞌ ghɔ tɨ́ viŋ laa, 2viŋ kɨ duꞌ, wə kee bùulə fwi siŋ me. Kɨ fwi siŋ ghaysə viŋ me! Shi kɔ́ faŋ tɨta Yeso ndɔ baa bəŋ jwi nə, kee ta yikuꞌnə me. Wə kɔlə jwi gi tɨ́ viŋ laa Zwitə Nwi twèlə nu kɔ́ tɨ́ yi, tɨꞌnə me laa gì yia tɨ́ yi, tɨꞌnə me laa nyɔ̀ꞌ yia nɨniŋ, laa shi kɔ́ kùꞌnə, kɨ fwi siŋ ghaysə viŋ shɔ me! 3Kɨ viŋ biŋ laa wə bweꞌsə viŋ nə tuu nu kəmuꞌ me! Kaꞌ shi kɔ́ kee ta kùꞌnə me. Viŋ kɔꞌ kɨɨ laa vənu vəmɔ́ꞌvə ndɔ ghaa gay ŋkəə, buu kaꞌ shi kɔ́ taa kuꞌ. Vənu vɔ́ lùu laa vɨɨ ndɔ meꞌ nu Nwi. Wuu mətwey ntɨsə Nwi, wee ndwaŋ, fuu taa mbi ntee. 4Wuu mbeenə ghɔ́ ndɔ tuŋ yighaw ghɔ Nwi, kòꞌsə ŋwaa wi yizɔ, kəə maa məshɔɔ vətɔ vənshə, faŋ vɨɨ tii nə Nwi, baa nə vətɔ faŋ vɨ bəŋsə laa lùu vətɔ və Nwi. Ŋwə ndɔ gə duꞌ ŋkee taa ŋii Nwi yikwalə, kɨ tii yizii yi laa yi lùu Nwi. 5Maa viŋ baa lumə faŋ mə yaa naysə vənu vɔ́ vənshə tɨ́ viŋ faŋ nsiŋ nə luu mɔ́ꞌ nə. 6Ndwə, viŋ kɔꞌ kɨɨ nə nu ŋkɨə faŋ ŋkə fə̀ŋ wuu ndwaŋ ghɔ́, laa kɨ ŋwə ta fuu ntee maa yighee yi me. 7Luu nə, nu mətwey ntɨsə Nwi duꞌtə ŋkə luu maa faꞌ, luu nə, kee ta fuu ntee me. Nu kɔ́ faŋ ŋkə ndɔ gay nə, kaꞌ ŋkə ndɔ gay sheꞌ maa yighee njyə faŋ Nwi ndɔ baꞌsə wə ntɨə faŋ ŋwə fə̀ŋ nu kɔ́ ndwə nə. 8Ndɔ luu maa yighee yɔ́, wuu mətwey Nwi ghɔ́ fuu ntee. Luu nə, tɨta Yeso ndɔ zwi ŋwə sheꞌ nə zwitə shuu ki, ndìsə ŋwə maa shi ŋkɨə faŋ ŋwə ndɔ baa fuu ntee, jwì yè vɨɨ vi. 9Ndɔ yɨsə Satan, tɨɨ vəzwitə vəbwəvə, laa wuu ndwaŋ ghɔ́ fuu taa mbi, kɨ yɨsə vənu və shuu yɔŋvə vənshə, nə vəshwenə nə vənu və yifiŋtə, faŋ lùu sheꞌ vənu və təba. 10Ŋwə ndɔ bweꞌsə vɨɨ nə taŋ vənu vədayday vənshə faŋ mbə kee lùu vəloomə me, bwèꞌsə vɨɨ mbɨə faŋ vəŋ nə kee kàw nu yinsəŋ me, tɨ́ kaꞌ Nwi bwèysə vəŋ me. Vəŋ ndɔ ndi vənshə. 11Lùu ŋiꞌ nu ŋkɨə faŋ Nwi tɔ̀ŋ zwitə təba, ŋkə faꞌ taa ŋwaa vəŋ nə wutə laa vəŋ biŋ təba tɔ́. 12Nɨniŋ, Nwi kwàŋ nsɔꞌ tɔ vɨɨ vənshə faŋ vəŋ nə kee bìŋ nu yinsəŋ me, kaw sheꞌ nu ŋkɨə faŋ ŋkə kee lùu kəloomə me. Vəŋ ndɔ gu nsɔꞌ.
Faŋ Pɔɔl nə bwàŋ Nwi faŋ ŋwə shòꞌ vɨɨ Tesalonika
13Vaŋ-nshwi via, fwi sia dɔŋsə yia laa yia kɨ bwaŋ Nwi ghee nshə buꞌ viŋ, faŋ Mɔꞌmbi kàw viŋ nə, buꞌ laa Nwi nə shòꞌ viŋ shù fɨshi, laa viŋ ndɔ baw shɨlə, gə̀ nə vɨsɨ. Yɨsə Zwitə Nwi laa viŋ baw, gə̀ nə vɨsɨ nə, baa nùŋ fwi maa nu yinsəŋ. 14Ŋwə nə tìi viŋ faŋ yia nə fɨ̀ꞌtə ntɔŋ yijəə Nwi tɨ́ viŋ nə, laa viŋ ndɔ kii feenə yaa tɨta ŋwaa-nsiŋ Yeso Kristo kìi feenə nə. 15Nɨniŋ mɔɔ, vaŋ-nshwi via, viŋ kɨ tweꞌ, jìa vənu mbɨə faŋ yia nə nàysə tɨ́ viŋ nə shuu wia, nə mbɨə faŋ yia nə nyɔ̀ꞌ tɨ́ viŋ taa ŋwaꞌlə wia nə. 16Nshɨ-tɔ tɨta ŋwaa-nsiŋ Yeso Kristo nə tɨta Nwi faŋ ŋwə nə kàw nsiŋ, kèe gəŋ saŋ-nsiŋ, bàwsə fwi saŋ-nsiŋ, nsə kuꞌnə yighee muꞌ nə, yɨsə nsiŋ kɨ kɨꞌ ŋkee nu jəə. 17Bàw ŋwə kɨ boolə fwi siŋ, kwàŋ wutə maa viŋ, tɨ́ kaꞌ viŋ kɨ yɨsə vənu vəjəəvə vənshə, gisə sheꞌ vənu vəjəəvə nɨzi.
3Bàw vɨɨ Nwi buꞌ ghɔ tɨ́ Nwi laa ŋwə yɨsə nu ki saynə taa mbi
1Vaŋ-nshwi via, maa məndwə vənu vɔ́, yia naysə tɨ́ viŋ laa viŋ kɨ buꞌ ghɔ tɨ́ Nwi tɔ yia, laa nu tɨta Kristo toꞌ sàynə, vɨɨ kɨ bəŋsə nu kɔ́, yuu ŋkə yaa gay taa ŋwaa viŋ nə. 2Viŋ buꞌ ghɔ tɨ́ Nwi laa ŋwə bweysə yia fɨ ghɔ vɨɨ bwənə faŋ vəŋ yɨsə vənu faŋ mbə kee yikuꞌnə me. Vəŋ yɨ nɨniŋ buꞌ laa nu mənuŋsə fwi maa Kristo kee lùu nu vɨɨ vənshə me. 3Luu nə, tɨta Kristo lùu wuu yinsəŋ, kwaŋ wutə maa viŋ, shìinə viŋ fɨ ghɔ tɨɨ vəzwitə vəbwəvə. 4Yia nùŋ fwi sia maa viŋ buꞌ tɨta Kristo laa viŋ kɨ yɨsə nu ŋkɨə faŋ yia nàysə tɨ́ viŋ nə, viŋ kɨ yɨyɨsə, taa baa kɔꞌ yɨyɨsə nɨniŋ. 5Tɨta Kristo kiasə fwi siŋ, viŋ kɨ kaw vɨɨ faŋ Nwi kaw viŋ nə! Viŋ jia fwi siŋ fɨ taa ŋɨꞌ, sheꞌ faŋ Kristo nə jìa fwi yi nə!
6Vaŋ-nshwi via, yia naysə tɨ́ viŋ maa yizii tɨta Yeso Kristo laa, viŋ buꞌsə fɨ ghɔ wə tɨ̀ me wə taa ŋwaa viŋ faŋ ŋwə kee kàw faꞌ me, kee kɨ toꞌ fɨ taa ntɨ njyə faŋ yia nə kɔ̀ tɨ́ viŋ nə me. 7Viŋ kɔꞌ kɨɨ faŋ ŋkə bàw laa viŋ kɨ beꞌsə ghuu yitoꞌ kia, buꞌ laa yia nə kee tòꞌ twey faꞌ taa ŋwaa viŋ me, 8kee fì bee wə, zɨ̀ dayday me. Maa yia nə sàŋ yiŋwaa, fàꞌ nə wutə, fàꞌ vətuꞌ nə shɨshwi, laa kɨ tuu wə fɨ taa ŋwaa viŋ kee kɨ ye ŋɨꞌ maa məzəsə yia me. 9Yia nəə kee yɨ nɨniŋ buꞌ faŋ ŋkə nə kee kùꞌnə tɨ́ yia me. Yia nəə yɨ nɨniŋ laa yia də shwenə nu tɨ́ viŋ, tɨ́ kaꞌ viŋ ndì ghuu yitoꞌ kia fɨ fuŋ. 10Maa yia nə duꞌtə yia naysə nu kɔ́ tɨ́ viŋ, faŋ nsiŋ nəə kɨ bii mɔ́ꞌ nə, laa wə kɨ luu kee kɨ kaw faꞌ me, kɨ ŋwə zɨ me. 11Yia nyɔ̀ꞌ vənu vɔ́ tɨ́ viŋ nɨniŋ, buꞌ laa yia zɔ laa vɨɨ mɔ́ꞌ taa ŋwaa viŋ kee toꞌ maa jɨɨ yijəə me, kee kàw faꞌ me, toꞌ sheꞌ maa nu dayday. 12Yia gi tɨ́ kəŋ vɨɨ vɔ́, baa tɨsə vəŋ maa yizii tɨta Yeso Kristo, laa vəŋ shia, kɨ faꞌ faꞌ, zɨ fazɨ vəŋ fɨ maa faꞌ vəŋ. 13Gə fɨ maa viŋ, vaŋ-nshwi via, kɨ viŋ bwa maa məyɨ nu jəə me! 14Kɨ luu wə mɔ́ꞌ kee zɔ̀ ntɨ yia faŋ nyə lùu taa ŋwaꞌlə ŋwə̀ nə me, viŋ shwenə ŋwə, kee kɨ zɨnə viŋ vɨ vəŋ me, yuu tɔ ki dɨɨ, ŋwə kwiinə fwi yi. 15Luu nə, kɨ viŋ ndi ŋwə yaa wuu mbeenə wiŋ me, kɔꞌ kɨ tɨtɨsə ŋwə, buꞌ faŋ ŋwə lùu weenshu ŋwaa-nsiŋ nə.
16Ŋkee nshɨ-tɔ Tɨɨ mənɔŋ-bwaŋnə kɔ viŋ nə mənɔŋ-bwaŋnə ghee nshə maa jɨɨsə sənshə! Tɨta Kristo goꞌsə viŋ vɨ vəŋ vənshə!
17Məshɔꞌtə ŋwə̀ faŋ mə nyɔ̀ꞌ feenə, nyɔ̀ꞌ mə Pɔɔl ŋgɨɨ-mə, ŋkee nə ghɔ kaŋ. Lùu shwenə kaŋ maa vəŋwaꞌlə vaŋ vənshə faŋ mə nyɔ̀ꞌ nə. Maa viŋ ye sɨ ŋwaꞌlə ŋə̀ faŋ mə nyɔ̀ꞌ ŋgɨɨ-mə nə.
18Mənɔŋ-bwaŋnə tɨ́ viŋ fɨ ghɔ tɨta ŋwaa-nsiŋ Yeso Kristo.